HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II 2021-2022 - Page 8 Empty

Latest topics

» COV ZAJ NYEEM Hnub Chiv 2021-2022 Xyoo C
by NrhiavTswvNtuj Today at 10:06 am

» COV ZAJ NYEEM NRUAB LIS PIAM XYOO II 2021-2022
by Mim Today at 12:38 am

» HMOOB NPAM NAJ XEES
by Maiv Tooj 1st July 2022, 8:52 am

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Mim 16th April 2022, 8:18 am

» MOO QAIJ QAUG
by Maiv Tooj 7th April 2022, 2:51 am

» Txiv Tswv QhiaTxwj Choo Thoj nyob los tsuas
by Maiv Tooj 16th March 2022, 6:54 am

» Qhia Ntuj Kev Cai.
by Maiv Tooj 17th February 2022, 11:25 pm

» Zaj thov Ntuj rau cov neeg mob.
by Maiv Tooj 17th February 2022, 11:22 pm

» XH. Yaj Zoov Ntxheb lub Tsev THOOB TSIB
by Maiv Tooj 19th January 2022, 7:52 am

» Xib Hwb Thoj Xyooj lub neej
by Maiv Tooj 19th January 2022, 7:49 am

» COV ZAJ NYEEM RAU CAIJ YES XUS YUG LOS
by Mim 24th December 2021, 8:00 pm

» ZAJ THOV NTUJ RAU OB TUG TXWJ NKAWM.
by Maiv Tooj 10th December 2021, 6:10 am

Suav neeg tuaj saib, txij hnub 17/09/2010 los mus.


    COV ZAJ NYEEM NRUAB LIS PIAM XYOO II 2021-2022

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 16th June 2022, 1:53 am

    Tim     17     lub     6     Hli     2022
     
    Hnub Rau Lis Piam Kaum Ib Nruab Xyoo ABC Nruab Lis Piam Xyoo II
    Lectionary:  369
     
    Zaj Nyeem Ib:   2 VAJ 11: 1-4, 9-18, 20

    1 Thaum As Thas Lias uas yog Os Kos Xias niam, paub hais tias nws tus tub tuag lawm,

    mas nws npaj pib muab caj ces ua vaj tua kom tuag tu noob.
    2 Tab sis Yes Hos Ses Npas, uas yog tus vaj Yes Hos Las tus ntxhais thiab yog Os Kos Xias tus muam,
    nyiag nqa Os Kos Xias tus tub Yos As khiav tawm ntawm tus vaj cov tub uas tab tom raug muab tua mus.
    Nws muab Yos As thiab Yos As ib tug niam tus nws coj mus nkaum nyob hauv ib chav pw.
    Yes Hos Ses Npas muab nws zais li ntawd ces As Thas Lias thiaj tua tsis tau nws.
    3 Yos As raug muab zais li ntawd tau rau xyoo nyob hauv HUAB TAIS lub Tuam Tsev.
    Lub caij ntawd yog As Thas Lias ua poj vaj kav lub teb chaws.
    4 Thaum xyoo xya tuaj, Yes Hos Yas Das tso neeg mus hu cov thawj tub rog kav pua leej cov Kas Lis
    thiab cov tub zov keeb tuaj cuag nws nyob hauv HUAB TAIS lub Tuam Tsev. Nws nrog lawv cog lus
    ruaj khov thiab kom lawv tsa tes tib si nyob hauv HUAB TAIS lub Tuam Tsev,
    ces nws muab tus vaj tus tub rau lawv pom.
    9 Cov thawj tub rog ua tas puas tsav yam raws li tus Leej Choj Yes Hos Yas Das kom ua.

    Lawv nyias coj nyias cov neeg tuaj cuag tus Leej Choj Yes Hos Yas Das, cov uas tsis raug ua hauj lwm
    hnub xas npas tos ntawd thiab cov raug ua hauj lwm zov keeb rau hnub ntawd tuaj tib si.
    10 Tus Leej Choj muab vaj Das Vis cov hmuv thiab cov leem phiaj
    uas nyob hauv Huab Tais lub tuam tsev los faib rau lawv.
    11 Cov tub zov keeb, tuav rawv riam phom ntawm tes, sawv ua tej leej ntawm lub tuam tsev sab nrad mus rau sab ped, lawv sawv ncig lub thaj txi Ntuj thiab ncig lub Tuam Tsev tib si, los tiv thaiv tus vaj nyob txhua fab.
    12 Ces Yes Hos Yas Das coj tus vaj tus tub tawm los, nws muab lub mom teev kub rau nws ntoo,
    muab daim phiaj ua vaj rau nws coj, thiab tsa nws ua vaj muab nws pleev roj.
    Ces sawv daws npuaj teg thiab qw tias: "Kom tus vaj muaj sia nyobntev dhawv!"
    13 As Thas Lias hnov cov tub zov keeb thiab tsoom pej xeem suab qw ntsuag qees,

    nws txawm tuaj rau ntawm tsoom pej xeem nyob lub HUAB TAIS lub Tuam Tsev.
    14 Thaum As Thas Lias pom tus vaj sawv ntsug ntawm tus ncej raws li txoj cai, thiab pom cov thawj tub rog thiab cov neeg tshuab hom nyob ze tus vaj, tas tsoom pej xeem zoo siab ke qw ke tshuab hom,
    As Thas Lias dua rhe nws cev ris tsho, nws qw tias: "Muaj kev ntxeev siab! Muaj kev ntxeev siab!"
    15 Ces tus Leej Choj Yes Hos Yas Das ceeb toom rau cov thawj tub rog ua tau txais txoj hauj lwm
    saib tsoom tub rog tias: "Nej coj As Thas Lias tawm ntawm lub Tuam Tsev no mus.
    Yog leej twg raws nws nej xuas ntaj tua pov tseg!" Tus Leej Choj hais li no vim nws xav tias:
    “Yuav tsis txhob cia As Thas Lias tuag nyob hauv Huab Tais lub Tuam Tsev.”
    16 Ces lawv ntes As Thas Lias, coj nws nkag ntawm lub Rooj Vag Nees los rau hauv tus vaj lub tsev,
    lawv thiaj muab nws tua nyob ntawd.
    17 Yes Hos Yas Das nrog tus vaj thiab tsoom pej xeem cog lus rau HUAB TAIS tias:

    Lawv yuav ua HUAB TAIS haiv neeg; tus vaj thiab tsoom pej xeem kuj muaj kev sib cog lus thiab.
    18 Tas ces tsoom pej xeem sawv daws mus tom lub tsev teev Npas Has, lawv muab lub tsev rhuav,
    muab cov thaj thiab cov duab cov mlom tsoo tawg tas, thiab lawv muab tus Leej Choj teev Npas Has
    hu ua Mas Taas tua nyob ntawm cov thaj txi Npas Has.
    Yes Hos Yas Das tsa ib pab tub zov keeb cia los zov HUAB TAIS lub tuam tsev.
    20 Tas tsoom pej xeem hauv lub teb chaws sawv daws zoo siab, thiab lub nroog nyob ntsiag to,

    vim zaum no As Thas Lias raug muab ntaj tua tuag nyob hauv tus vaj lub tuam tsev lawm.

    NPN   132: 11, 12, 13-14, 17-18

    Txais: (13) Huab Tais tau xaiv Xis Yoos los ua nws qhov chaw nyob.

    HUAB TAIS tau cog lus rau Das Vis,
    yog ib lo lus ruaj, nws yuav tsis thim nws lo lus tias:
    “Ib tug tawm hauv koj roj ntsha los
    Yog tus kuv yuav tsa los zaum saum koj lub theej kiab.”

    Txais: (13) Huab Tais tau xaiv Xis Yoos los ua nws qhov chaw nyob.

    “Yog koj cov tub khaws cov lus kuv nrog lawv cog,
    thiab ua raws li cov lus kuv qhia kom lawv ua,
    mas lawv phaj tub phaj ki kuj yuav tau
    zaum saum koj lub theej kiab mus li."

    Txais: (13) Huab Tais tau xaiv Xis Yoos los ua nws qhov chaw nyob.

    Vim HUAB TAIS tau xaiv Xis Yoos,
    nws nyiam Xis Yoos dua lwm qhov los ua nws chaw nyob:
    "Xis Yoos yog kuv qhov chaw so mus li,
    kuv yuav nyob saum Xis Yoos, vim kuv nyiam nws dua.”

    Txais: (13) Huab Tais tau xaiv Xis Yoos los ua nws qhov chaw nyob.

    “Nyob saum Xis Yoos, kuv yuav ua kom Das Vis hlav ib tug kub tuaj,
    Kuv yuav taws ib lub teeb rau tus kuv pleev roj rau.
    Kuv yuav muab kev txaj muag rau nws cov yeeb ncuab hnav,
    hos kuv lub mom teev kub yuav ci hob nyob saum nws."

    Txais: (13) Huab Tais tau xaiv Xis Yoos los ua nws qhov chaw nyob.

    As Les Lus Yas:   MT 5: 3

    Txais: As les lus yas, as les lus yas.

    Cov tau txoj hmoov zoo yog pluag hauv nruab siab,
    vim Ntuj lub Ceeb Tsheej yog lawv li.

    Txais: As les lus yas, as les lus yas.

    Ntawv Moo Zoo:   MT 6: 19-23

    Yes Xus hais rau nws cov thwj tim tias:
    19 "Nej txhob sau tej txhab cuab tam cia nyob ntiaj teb no rau nej,

    uas muaj kab rws kab lia txo, thiab muaj tub sab tho qhov tsev tuaj nyiag.
    20 Nej yuav sau tej txhab cuab tam cia nyob saum ntuj,
    qhov chaw uas tsis muaj kab rws kab lia txo, tsis muaj tub sab tho qhov tsev tuaj nyiag.
    21 Vim tias, koj txhab nyiaj txhab kub nyob qhov twg, koj lub siab kuj yuav nyob qhov ntawd.
    22 "Lub teeb pom kev rau lub cev yog lub qhov muag.

    Yog koj lub qhov muag zoo, mas tas koj lub cev yuav pom kev nrig.
    23 Tab sis yog koj lub qhov muag phem, mas tas koj lub cev yuav nyob tsaus ntuj nti.
    Yog qhov pom kev nyob hauv koj twb tsaus ntuj nti xwb,
    mas qhov tsaus ntuj haj yam yuav ua cas tsaus loj heev tuaj.”   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 17th June 2022, 12:53 am

    Tim     18     lub     6     Hli     2022
     
    Hnub Xya Lis Piam Kaum Ib Nruab Xyoo ABC Nruab Lis Piam Xyoo II
    Lectionary: 370
     
    Zaj Nyeem Ib:   2 XWM 24: 17-25

    17 Thaum leej choj Yes Hos Yas Das tuag tas lawm,

    cov ntaus thawj Yus Das tuaj pe tus vaj Yos As, tus vaj mloog lawv cov tswv yim.
    18 Ces cov Yus Das tso HUAB TAIS, lawv cov yawg koob tus Tswv Ntuj lub Tuam Tsev pov tseg,
    lawv mus teev cov dab ncej dab mlom; vim lawv ua txhaum li ntawd
    mas txoj kev npau taws thiaj los raug Yus Das thiab Yes Lus Xas Les.
    19 HUAB TAIS xa ib co Yaj Saub tuaj hais rau lawv kom lawv rov qab los cuag HUAB TAIS,
    tab sis thaum cov Yaj Saub hais lus ceeb toom rau lawv, lawv tsis quav ntsej mloog li.
    20 Ces Tswv Ntuj lub tswv yim thiaj los nyob hauv Ntxas Kas Lias uas yog leej choj Yes Hos Yas Das tus tub.
    Ntxas Kas Lias sawv ntsug saum ib qho chaw siab hais rau tsoom sid tias: "Tswv Ntuj hais li no:
    ‘Vim li cas nej hla HUAB TAIS cov lus qhia kom nej tsis vam meej?
    Vim nej tso HUAB TAIS pov tseg mas HUAB TAIS kuj tso nej pov tseg thiab.’"
    21 Ces cov Yus Das sib koom siab hiam nws. Lawv ua raws li tus vaj lus ceeb toom kom lawv xuas
    pob zeb los txawb nws tuag nyob ntawm lub tshav ntawm HUAB TAIS lub Tuam Tsev.
    22 Tus vaj Yos As tsis nco qab Yes Hos Yas Das, Ntxas Kas Lias txiv, lub txiaj ntsim lawm, nws muab Yes Hos
    Yas Das tus tub tua. Thaum nws yuav tuag nws qw tias: "Muaj HUAB TAIS pom thiab yuav ua pauj!"
    23 Ces thaum xyoo laus tas xyoo tshiab pib, cov tub rog As Las Mais sawv tuaj ntaus Yos As.

    Lawv tuaj vij Yus Das teb thiab Yes Lus Xas Les; lawv muab tas cov thawj coj tsoom pej xeem
    Yus Das tua thiab lawv xa tas puas tsav yam lawv lwg tau mus rau lawv tus vaj nyob Das Mas.
    24 Cov tub rog As Las Mais tuaj tsis coob, tab sis HUAB TAIS cia lawv yeej ib pab tub rog coob kawg,
    vim cov Yus Das tso HUAB TAIS, lawv cov yawg koob tus Tswv Ntuj pov tseg. Ces thiaj khaum tus vaj Yos As.
    25 Thaum cov As Las Mais rov qab, lawv tso Yos As raug mob loj heev tseg. Nws cov tub txib koom siab
    ntxeev siab rau nws, vim nws tau muab leej choj Yes Hos Yas Das tus tub tua tuag lawm.
    Lawv muab Yos As tua nyob saum nws lub txaj; nws thiaj tuag zoo li ntawd. Lawv muab nws faus
    nyob hauv Das Vis lub tsheej, tab sis tsis faus rau ntawm cov vaj cov ntxa.

    NPN   89: 4-5, 29-30, 31-32, 33-34

    Txais: (29a) Kuv yuav hlub kuv tus tub txib mus li.

    Kuv tau cog ib lo lus nrog tus kuv xaiv,
    kuv tau cog lus khov rau kuv tus tub txib Das Vis tias:
    Kuv yuav tsa koj caj ces kom nyob ruaj mus li,
    kuv yuav txhim ib lub theej kiab rau koj zaum tiam dhau tiam.

    Txais: (29a) Kuv yuav hlub kuv tus tub txib mus li.

    Kuv yuav hlub nws mus li,
    Kuv lo lus kuv nrog nws cog yuav nyob ruaj khov.
    Kuv yuav tsa kom nws caj ces nyob ib txhis,
    tsa nws lub theej kiab nyob ntev li lub ntuj.

    Txais: (29a) Kuv yuav hlub kuv tus tub txib mus li.

    Yog nws cov tub tso kuv txoj cai lij choj pov tseg,
    tsis mus taug kuv tej txhooj,
    yog lawv hla kuv txoj cai kuv tau txiav tseg
    thiab tsis khaws kuv cov lus qhia.

    Txais: (29a) Kuv yuav hlub kuv tus tub txib mus li.

    Kuv yuav xuas qws rau txim rau lawv txoj kev ua phem,
    xuas hlua rau txim rau lawv qhov kev txhaum.
    Tab sis, kuv yuav tsis txiav kuv txoj kev hlub nws,
    kuv yuav tsis thim kuv txoj kev ua zoo rau nws.

    Txais: (29a) Kuv yuav hlub kuv tus tub txib mus li.

    As Les Lus Yas:   2 KLN 8: 9

    Txais: As les lus yas, as les lus yas.

    Yes Xus Pleev yog tus nplua nuj, tab sis nws ua kom nws pluag,
    kom xwv nws txoj kev pluag ua nej nplua nuj tuaj.

    Txais: As les lus yas, as les lus yas.

    Ntawv Moo Zoo:   MT 6: 24-34

    Yes Xus hais rau nws cov thwj tim tias:
    24 "Tsis muaj leej twg tsob hwb ob tug tswv tau.  Nws yuav ntxub ib tug, nyiam lwm tus,

    nws yuav npuab ib tug, thuam lwm tus. Nej ib txhij tsob hwb Tswv Ntuj thiab nyiaj txiag tsis tau.
    25 Yog vim li ntawd, kuv thiaj hais rau nej tias: Nej txhob txhawj txog nej txoj sia tias yuav muab
    dab tsi los noj los yuav muab dab tsi los haus, txhob txhawj txog nej lub cev tias yuav muab dab tsi los
    hnav. Nej txoj sia tsis muaj nqis dua txhiam xws thiab nej lub cev tsis muaj nqi dua tej tsoos tsho lod?
    26 Nej ntsia cov noog saum ntuj saib, lawv tsis tseb nplej, tsis hlais nplej, tsis sau qoob rau hauv txhab li,
    tsis kav nej Txiv tus nyob saum ntuj pub rau lawv noj. Nej tsis muaj nqi dua cov noog ntawd lod?
    27 Yog nej leej twg txhawj txhawj, nws puas rub tau nws txoj sia kom ntev ib nyuag pliag ntxiv?
    28 Hais txog tej tsoos tsho, nej yuav txhawj dab tsi? Nej kawm ntawm cov paj hmab paj ntoos
    nyob tom tej nras saib lawv hlob zoo li cas: Lawv tsis khwv, tsis ua maj ua ntuag li.
    29 Kuv hais rau nej tias, tab yog Xas Los Moos, txawm nws muaj hwj chim loj npaum cas,
    tsis kav nws tsis tau hnav zoo npaum li ib lub paj ntoos li.
    30 Yog tias Tswv Ntuj twb muab zam zoo npaum ntawd rau tej nroj nruab nrag,
    uas hnub no ciaj, tag kis luag twb yuav muab pov hlawv hauv qhov txos,
    mas nws haj yuav tsis ua zoo tshaj rau nej lod, cov neeg uas ntseeg tsis ti txha?
    31 Li no nej txhob ua siab fab tias: 'Peb yuav noj dab tsi ?’
    los ‘Peb yuav haus dab tsi?’ los ‘Peb yuav hnav dab tsi?'
    32 Tej ntawd, yog tas puas tsav yam uas cov neeg teev pej kum dab nrhiav.
    Nej Txiv nyob saum ntuj yeej paub tias nej yuav tsum muaj tej ntawd huv tib si.
    33 Ntawm nej, nej yuav xub nrhiav Tswv Ntuj lub Ceeb Tsheej thiab nws txoj kev ntshiab tso,
    ces nws yuav pub tas puav tsav yam ntawd tib si ntxiv rau nej thiab.
    34 Nej txhob ua siab fab txog tag kis: tag kis mam li txhawj rau tag kis.
    Vim niaj hnub twb muaj kev nyuaj txaus rau hnub ntawd lawm.”    
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 19th June 2022, 11:42 am

    Tim     20     lub     6     Hli     2022
     
    Hnub Ob Lis Piam Kaum Ob Nruab Xyoo ABC Nruab Lis Piam Xyoo II  
    Lectionary: 371
     
    Zaj Nyeem Ib:   2 VAJ 17: 5-8, 13-15a, 18

    5 Xas Mas Nas Xas, tus vaj kav As Xis Lias teb, tuaj nkag rau hauv lub teb chaws txhua qhov chaw,

    nws tuaj ntaus Xas Mas Lias teb tau peb xyoos nkaus.
    6 Ces xyoo cuaj uas Hos Xias ua vaj kav His Xas Lais, tus vaj As Xis Lias ntaus yeej Xas Mas Lias,
    ces nws coj cov His Xas Lais mus nyob As Xis Lias teb, nws xa lawv mus nyob Has Las,
    ntawm tus ntug dej Has Npos hauv lub xeev Nkos Xas, thiab nyob hauv cov nroog Mes Dias.
    7 Cov xwm tshwm sim zoo li ntawd yog vim cov His Xas Lais ua txhaum rau HUAB TAIS

    lawv tus Tswv Ntuj, uas yog tus tau coj lawv tawm ntawm Hais Nkws Tos teb los, kom lawv tau
    dim ntawm Fas Las Oos, tus vaj Hais Nkws Tos, tes; thiab vim lawv mus teev lwm cov tswv ntuj,
    8 lawv mus coj lwm haiv neeg uas HUAB TAIS tau ntiab khiav tawm ntawm cov His Xas Lais mus
    tej kev cai thiab tej uas cov vaj His Xas Lais tau coj.
    13 HUAB TAIS tau siv cov Yaj Saub thiab cov txawj yees pom ntau yam los ceeb toom rau

    His Xas Lais thiab rau Yus Das tias: "Nej tso nej txoj kev ua phem pov tseg, nej tig los coj
    kuv cov lus qhia thiab kuv tej lij choj, raws li txoj cai kuv tau qhia rau nej cov yawg koob lawm
    thiab raws li kuv tau xa kuv cov tub txib Yaj Saub tuaj hais rau nej."
    14 Tab sis lawv tsis mloog, lawv ua caj qwb txhav qhi xws li lawv cov
    poj yawm txwv koob uas tsis ntseeg HUAB TAIS lawv tus Tswv Ntuj.                                                       
    15 Lawv tau ntxub nws cov kev cai lij choj, ntxub lo lus nws tau nrog
    lawv cov yawg koob cog, thiab nws tej lus tim khawv rau lawv.
    18 Vim li ntawd, HUAB TAIS npau taws heev rau cov His Xas Lais, nws thiaj muab lawv

    tshem mus deb ntawm nws ntsej muag; tsuas tshuav lub xeem Yus Das lawm xwb.

    NPN   60: 3, 4-5, 12-13

    Txais: (7b) Thov koj muab koj txhais tes xis los pab peb,
                                     Huab Tais, thov koj teb peb mas.

    Tswv Ntuj, koj tau tso peb pov tseg, tau rhuav lub zog thaiv peb,
    koj tau npau taws heev; thov koj rov los coj peb mas!

    Txais: (7b) Thov koj muab koj txhais tes xis los pab peb,
                                     Huab Tais, thov koj teb peb mas.

    Koj ua kom lub teb chaws qeeg nkaws, kom av tawg tej kab pleb;
    thov koj txhub cov kab pleb rau, vim teb chaws ua zog koog.
    Koj tau cia kom koj haiv neeg raug kev txom nyem kev nyuaj;
    koj muab ib co cawv rau peb haus kom peb loog.

    Txais: (7b) Thov koj muab koj txhais tes xis los pab peb,
                                     Huab Tais, thov koj teb peb mas.

    Tswv Ntuj, puas yog koj tso peb pov tseg lawm,
    Koj thiaj tsis kam nrog peb cov tub rog tawm mus ntaus tsam?
    Thov koj tuaj pab peb ntaus peb cov yeeb ncuab mas,
    vim neeg txoj kev pab tsis zoo dab tsi rau peb.

    Txais: (7b) Thov koj muab koj txhais tes xis los pab peb,
                                     Huab Tais, thov koj teb peb mas.

    As Les Lus Yas:   Hes Nplaws 4: 12

    Txais: As les lus yas, as les lus yas.

    Tswv Ntuj lo lus muaj txoj sia thiab ua tau hauj lwm,
    nws tsom tau neeg tej kev xav thiaj tej zaj tswv yim hauv nruab siab.

    Txais: As les lus yas, as les lus yas.

    Ntawv Moo Zoo:   MT 7: 1-5

    Yes Xus hais rau nws cov thwj tim tias:
    1 "Nej tsis txhob txiav txim rau luag, Ntuj thiaj yuav tsis txiav txim rau nej ;
    2 vim tias, nej txiav txim li cas rau luag, Ntuj kuj yuav txiav txim li ntawd rau nej thiab;
    nej luj li cas rau luag, Ntuj kuj yuav luj li ntawd rau nej.
    3 Ua cas koj pom tus quav nplej nyob hauv koj tus kwv tij qhov muag,
    tab sis koj ho tsis pom tus nqaj ntoo nyob hauv koj qhov muag?
    4 Koj ua cas hais tau rau koj tus kwv tij tias: ‘Cia kuv rho tus quav nplej hauv

    koj qhov muag pov tseg,’ tab sis ib tug niag nqaj twb nyob hauv koj qhov muag?
    5 Neeg ua zoo sab nraud, koj xub rho tus nqaj hauv koj qhov muag pov tseg tso mas
    koj thiaj li yuav pom kev tseeb rho tau tus quav nplej hauv koj tus kwv tij qhov muag.”  
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 20th June 2022, 12:39 am

    Tim     21     lub     6     Hli     2022
     
    Hnub Peb Lis Piam Kaum Ob Nruab Xyoo ABC Nruab Lis Piam Xyoo II
    Lectionary: 372
     
    Yuav Hwm LN Aloysius Gonzaga
     
    Zaj Nyeem Ib:   2 VAJ 19: 9b-11, 14-21, 31-35a, 36

    9b Xes Nas Ses Lis, cov As Xis Lias tus vaj, rov tso ib co tiam lis tuaj cuag Es Xes Kias,

    nws hais cov lus no rau Es Xes Kias:
    10 "Nej mus hais li no rau Es Xes Kias cov Yus Das tus vaj: ‘Koj tsis txhob cia koj tus Tswv Ntuj
    uas koj tso tso siab rau dag koj tias Yes Lus Xas Les yuav tsis poob rau hauv tus vaj As Xis Lias tes.
    11 Koj twb paub txog tej yam uas cov vaj As Xis Lias tau ua rau tas txhua lub teb chaws kom lawv puas ntsoog tas tib si lawm. Koj tsis txhob xav tias koj yuav dim!”
    14 Es Xes Kias txais tsab ntawv ntawm cov tiam lis tes los, nws muab los nyeem. Ces nws mus

    pem HUAB TAIS lub Tuam Tsev, nws nthuav tsab ntawv tso rau ntawm HUAB TAIS xub ntiag.
    15 Ces Es Xes Kias thov HUAB TAIS zoo li no: "HUAB TAIS, His Xas Lais tus Tswv Ntuj, koj zaum
    saum koj lub theej kiab nyob saum cov Tshiab Kes Lus Npis; koj tib leeg yog tus Tswv Ntuj kav
    tas ib puas xyeem teb chaws muaj vaj nyob ntiaj teb no. Koj yog tus tau tsim lub ntuj lub teb.
    16 HUAB TAIS, thov koj tig ntsej los mloog; HUAB TAIS, thov koj qhib qhov muag los saib. Koj hnov
    Xes Nas Ses Lis cov lus lawm; nws tso neeg tuaj hais lus thuam tus Tswv Ntuj muaj txoj sia.
    17 HUAB TAIS, yeej muaj tseeb tias cov vaj As Xis Lias tau rhuav
    kom cov haiv neeg thiab lawv cov teb chaws tau puas mtsoog mus lawm.
    18 Lawv tau muab luag cov dab qhuas pov rau hauv hluav taws, txawm tias tsis yog
    ib co tswv ntuj tiag, tsuas yog neeg txhais tes txua xwb, yog ntoo, yog pob zeb xwb,
    los cov vaj As Xis Lias tau muab rhuav tas tib si lawm.
    19 Nyem no, HUAB TAIS, peb tus Tswv Ntuj, kuv thov kom koj cawm peb dim
    ntawm Xes Nas Ses Lis tes, ces txhua lub teb chaws muaj vaj ntxwv nyob ntiaj teb no
    thiaj yuav paub tias koj tib leeg yog Tswv Ntuj, HUAB TAIS aw!"
    20 Ces His Xais, uas yog As Mos tub, xa lus mus rau Es Xes Kias tias:

    "HUAB TAIS , His Xas Lais tus Tswv Ntuj hais li no: Kuv tau hnov
    koj zaj thov ntuj hais txog tus vaj As Xis Lias, Xes Nas Ses Lis lawm.                                                     
    21 Cov lus no yog Huab Tais cov lus uas nws hais txog Xes Nas Ses Lis:
    ‘Tus ntxhais nkauj xwb Xis Yoos ntxub koj thiab luag thuam koj;

    tus ntxhais Yes Lus Xas Les co hau nto nyob tom koj nrob qaum.
    31 Vim tias yuav muaj ib pab seem tawm hauv Yes Lus Xas Les los, thiab ib co neeg ciaj yuav dim tawm

    ntawm lub roob Xis Yoos los. HUAB TAIS kav tsoom tshiab txoj kev mob siab yuav ua tau qhov ntawd.’
    32 HUAB TAIS hais txog tus vaj As Xis Lias li no tias: ‘Nws yuav tuaj tsis txog lub nroog no,

    yuav tsis tau tua ib xib xub mus rau hauv lub nroog,  yuav tsis tau tuav
    daim leem phiaj mus ntaus lub nroog, thiab yuav tsis tau tsa ntsa vij lub nroog.
    33 Nws tuaj txoj kev twg tuaj, nws yuav taug txoj kev ntawd rov qab,
    nws yuav tsis tau chaws mus hauv lub nroog no li.’” HUAB TAIS hais li ntawd.
    34 “Kuv yuav txuag thiab yuav cawm lub nroog no, rau kuv tus kheej thiab rau kuv tus tub txib Das Vis.”
    35a Hmo ntawd HUAB TAIS tus Tshiab tawm mus, nws mus ntaus

    ib puas yim caum tsib txhiab leej neeg As Xis Lias tuag nyob hauv lawv lub yeej.
    36 Ces Xes Nas Ses Lis, tus vaj As Xis Lias, tso lub yeej tseg,
    nws khiav rov mus tsev mus nyob Nis Nis Vas lawm.

    NPN   48: 2-3ab, 3cd-4, 10-11

    Txais: (9d) Tswv Ntuj txuag nws lub tsheej kom nyob mus li.

    HUAB TAIS loj tas nrho, yeej tsim nyog peb cav txog nws
    nyob hauv peb tus Tswv Ntuj lub tsheej.
    Nws lub roob ntshiab, uas zoo tshaj txhua lub roob,
    yog txoj kev zoo siab rau tas ntiaj teb neeg

    Txais: (9d) Tswv Ntuj txuag nws lub tsheej kom nyob mus li.

    Roob Xis Yoos, thaj chaw nraim nyob qaum teb,
    yog tus tuam vaj lub tsheej,
    Tswv Ntuj nyob rawv hauv nws tej tsev vaj loog,
    nws nto moo lug tias nws yog ib lub ntsa loog zeb.

    Txais: (9d) Tswv Ntuj txuag nws lub tsheej kom nyob mus li.

    Tswv Ntuj, peb xav ntsoov txog koj txoj kev khuv leej
    nyob hauv koj lub tuam tsev.
    Ib yam li koj lub npe, Tswv Ntuj, koj lub koob meej
    kuj ncha mus txog tim npoo ntiaj teb kawg.
    Txoj kev ncaj ncees nyob puv nkaus koj txhais tes xis.

    Txais: (9d) Tswv Ntuj txuag nws lub tsheej kom nyob mus li.

    As Les Lus Yas:   ZAM 8: 12

    Txais: As les lus yas, as les lus yas.

    Huab Tais hais tias: Kuv yog qhov pom kev kaj lub ntiaj teb,
    leej twg los raws kuv mas nws yuav tauj qhov pom kev uas pub txoj sia.

    Txais: As les lus yas, as les lus yas.

    Ntawv Moo Zoo:   MT 7: 6, 12-14

    Yes Xus hais rau nws cov thwj tim tias:
    6 "Nej tsis txhob muab tej yam ntshiab pub rau dev noj, txhob muab nej cov hlaws npliag deg
    pov rau ntawm npua xub ntiag, tsam npua muab tsuj ces npua tig rov los dua nej.
    12 "Nej yuav ua rau luag tej tas ib puas tsav yam uas nej xav kom luag ua rau nej.
    Txoj Cai thiab cov Yaj Saub yog li ntawd.
    13 “Nej chaws ntawm lub qhov rooj nqaim mus mog. Vim lub qhov rooj loj thiab txoj kev dav
    yog txoj coj neeg mus rau lub qhov tuag; muaj coob leej taug txoj kev ntawd.
    14 Hos lub qhov rooj nqaim nqaim thiab txoj kev ti ti thiaj yog txoj coj mus txog txoj sia.

    Muaj tsawg leej nrhiav tau txoj kev ntawd taug.”  
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 21st June 2022, 12:12 am

    Tim     22     lub     6     Hli     2022
     
    Hnub plaub Lis Piam Kaum Ob Nruab Xyoo ABC Nruab Lis Piam Xyoo II
    Lectionary: 373
     
    XHLT:   LN John Fisher thiab LN Thomas More, tuag ua Tim Khawv
                LN Paulinus nyob Nola, ua Tswv Qhia
     
    Zaj Nyeem Ib:   2 VAJ 22: 8-13; 23:1-3

    8 Tus tuamj Leej Choj His Kis Yas Hus hais rau tus tuav ntawv hu ua Sas Fas tias:

    "Kuv nrhiav tau phau ntawv Txoj Cai nyob hauv lub Tuam Tsev teev HUAB TAIS lawm."
    Ces His Kis Yas Hus muab phau ntawv rau Sas Fas nyeem.
    9 Tus tuav ntawv Sas Fas mus cuag tus vaj thiab qhia rau nws tias:
    "Koj cov tub txib muab cov nyiaj nyob hauv lub Tuam Tsev nchuav tas lawm thiab muab
    faib rau cov thawj neeg saib hauj lwm kho HUAB TAIS lub Tuam Tsev Teev Ntuj lawm."
    10 Tus tuav ntawv Sas Fas kuj hais qhia rau tus vaj tias: "Tus Leej Choj His Kis Yas Hus muab
    tau ib phau ntawv rau kuv." Ces nws nyeem phau ntawv rau tus vaj mloog.
    11 Tus vaj hnov cov lus nyob hauv phau ntawv Txoj Cai, mas nws dua rhe nws cov ris tsho.
    12 Nws ceeb toom rau tus leej choj His Kis Yas Hus, rau As His Kas uas yog Sas Fas tus tub, rau As Npos uas
    yog Mis Kais Yas tus tub, rau Sas Fas tus tuav ntawv, thiab rau As Xais Yas uas yog tus vaj tus tub txib tias :
    13 "Nej mus nug HUAB TAIS rau kuv, rau tsoom pej xeem, thiab rau tas Yus Das teb txog cov lus nyob hauv phau ntawv uas nyuam qhuav nrhiav tau no saib; vim HUAB TAIS npau taws heev kawg rau peb lawm,
    vim tias peb cov yawg koob tsis tau mloog cov lus xws li hais nyob hauv phau ntawv,
    lawv tsis tau ua raws nraim li tau sau tseg kom yuav tsum ua nyob rau hauv."
    23: 1 Ces tus vaj hu tas tsoom txwj laus nyob Yus Das teb thiab nyob Yes Lus Xas Les tuaj rau ntawm nws.

    2 Tus Vaj nce mus pem HUAB TAIS lub Tuam Tsev, tas tsoom neeg nyob Yus Das teb thiab nyob
    Yes Lus Xas Les, tas cov Leej Choj, cov Yaj Saub, tas tsoom pej xeem me hlob me yau
    kuj nrog tus vaj mus. Tus vaj kom lawv nyeem tas nrho cov lus nyob hauv phau ntawv cog lus
    uas nrhiav tau nyob hauv HUAB TAIS lub Tuam Tsev rau sawv daws mloog.
    3 Tus vaj sawv nyob ntawm tus ncej, nws cog lus rau HUAB TAIS tias lawv yuav caum HUAB TAIS,
    yuav coj HUAB TAIS cov lus qhia, cov kev cai thiab lij choj, tas lawv siab ntsws tas lawv ntsuj plig;
    lawv rov cog lus dua raws li lo lus cog sau tseg nyob hauv phau ntawv ntawd.
    Tas tsoom pej xeem kuj koom sawv nrog tus vaj cog lus tib si.

    NPN   119: 33, 34, 35, 36, 37, 40

    Txais: (33a) Huab Tais, thov koj qhia kom kuv taug raws koj txoj cai lij choj.

    HUAB TAIS, thov koj qhia txoj kev coj raws koj cov cai lij choj rau kuv,
    Kom kuv coj tau raws nraim li ntawd.

    Txais: (33a) Huab Tais, thov koj qhia kom kuv taug raws koj txoj cai lij choj.

    Thov koj ua kom kuv to taub, ces kuv yuav coj koj Txoj Cai,
    kuv yuav muab tas kuv lub siab lub ntsws los khaws koj Txoj Cai.

    Txais: (33a) Huab Tais, thov koj qhia kom kuv taug raws koj txoj cai lij choj.

    Thov koj coj kuv kev kom kuv taug raws koj cov lus qhia,
    vim kuv zoo siab nyob hauv koj cov lus qhia.

    Txais: (33a) Huab Tais, thov koj qhia kom kuv taug raws koj txoj cai lij choj.

    Thov koj tig kuv lub siab kom xib mus rau cov kev cai koj tau txiav,
    txhob pub qaij mus rau kev nrhiav ua kom yus tsam peev.

    Txais: (33a) Huab Tais, thov koj qhia kom kuv taug raws koj txoj cai lij choj.

    Thov koj tig kuv qhov muag mus deb txoj kev tsis tseem ceeb,
    koj pub txoj sia rau kuv nyob hauv koj txoj kev.

    Txais: (33a) Huab Tais, thov koj qhia kom kuv taug raws koj txoj cai lij choj.

    Koj ntsia saib, kuv yeej ntshaw koj cov cai lij choj tiag,
    thov koj muab txoj sia rau kuv vim koj txoj kev ua ncaj.

    Txais: (33a) Huab Tais, thov koj qhia kom kuv taug raws koj txoj cai lij choj.

    As Les Lus yas:   ZAM 15: 4a, 5b

    Txais: As les lus yas, as les lus yas.

    Huab Tais hais tias, nej yuav nyob ruaj hauv kuv ib yam li kuv nyob hauv nej.
    Tus uas nyob ruaj hauv kuv nws yuav txi txiv ntau.

    Txais: As les lus yas, as les lus yas.

    Ntawv Moo Zoo:   MT 7: 15-20

    Yes Xus hais rau nws cov thwj tim tias:
    15 “Nej ceev faj txog cov yaj saub cuav, lawv tuaj zoo li ib co yaj tuaj cuag nej,

    tab sis nyob sab hauv, lawv yog ib co hma nrhiav ncauj.
    16 Nej ntsia lawv lub txiv lawv txi ces nej yuav paub.
    Neeg puas de txiv cawv saum ib tsob pos los de txiv ncuav pias saum ib tsob nrhab?
    17 Ib yam li ntawd, tus ntoo zoo yeej txi ib co txiv zoo, hos tus ntoo lwj yeej txi ib co txiv phem.
    18 Tsob ntoo zoo txi tsis tau txiv phem, hos tsob ntoo lwj kuj txi tsis tau txiv zoo.
    19 Tsob ntoo twg tsis txi txiv zoo, yuav raug muab ntov mus pov hlawv rau hauv hluav taws.
    20 Li ntawd, thaum nej pom lawv cov txiv, ces nej yuav paub lawv.”    
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 22nd June 2022, 12:50 am

    Hnub ua koob tsheej txog LN Zam Ntxuav Plig hnub yug, mas tus txiv plig muaj cai xaiv tias nws yuav ua Thaj Txi Ntuj hmo ua ntej thiab Thaj Txi Ntuj hnub ntawd huv si.
    Yog leej twg xav ua Thaj Txi Ntuj hmo ua ntej, mas nej mus xyuas cov zaj nyeem nyob nram qab.


    Tim     23     lub     6     Hli     2022
     
    Koob Tsheej Hwm LN Zam Ntxuav Plig Hnub Yug - hnub ntawd
    Lectionary: 587
     
    Zaj Nyeem Ib:   HIS XAIS 49: 1-6

    1 Cov pov txwv, nej mloog kuv hais!

    Cov haiv neeg nyob deb, nej cuab pob ntseg mloog kuv!
    HUAB TAIS yeej hu kuv txij thaum kuv yug los lawm,
    nws yeej hu kuv npe txij thaum kuv nyob hauv kuv niam plab los lawm.
    2 Nws muab kuv lub ncauj ua ib rab ntaj ntse zuag plias;
    nws muab kuv zais rau hauv nws txhais npab qhov ntxoov.
    Nws muab kuv ua ib xib xub vos ntse ntse,
    muab kuv zais rau hauv nws lub raj xub.
    3 HUAB TAIS hais rau kuv tias: "koj yog kuv tus tub txib;
    His Xas Lais, kuv yuav siv koj ua kuv lub hwj chim tawm los."
    4 Hos kuv xav hais tias: "Kuv tau siv zog khwv dag tsis tau dab tsi li,
    kuv nkim kuv lub zog tas dawb dawb xwb.
    Tsis kav kuv muaj paj tshab nyob ntawm HUAB TAIS,
    kuv tus nqi zog yog nyob ntawm kuv tus Tswv Ntuj.”
    5 Nyem no, HUAB TAIS tau hais lawm,

    nws yog tus tau puab kuv nyob hauv kuv niam plab
    kom kuv ua nws tus tub txib,
    kom tau coj Yas Kos rov los cuag nws,
    kom tau sau His Xas Lais rov los nrog nws ua ke,
    vim Huab Tais saib kuv tsim nyog;
    ces kuv tus Tswv Ntuj thiaj yog kuv lub zog.
    6 Nws hais tias: "Tsis tsim nyog kom koj yog kuv tus tub txib xwb,
    tus rov tsa cov xeem Yas Kos kom sawv,
    thiab coj cov His Xas Lais seem kom rov los,
    kuv tseem xaiv koj kom koj yog lub teeb ci kaj cov kuj cuab,
    ces kuv txoj kev cawm thiaj yuav ri mus txog cov npoo ntiaj teb kawg.”

    NPN   139: 1b-3, 13-14ab, 14c-15

    Txais: (14) Kuv cav txog koj vim koj puab kuv tau zoo tas nrho.

    HUAB TAIS, koj tsom tshab kuv, koj paub kuv:
    koj paub thaum kuv sawv thiab thaum kuv zaum;
    koj nyob deb paub tas tej kuv xav.
    Koj saib nraim kuv thaum kuv taug kev los thaum kuv so,
    koj paub txhua yam kuv ua.

    Txais: (14) Kuv cav txog koj vim koj puab kuv tau zoo tas nrho.

    Koj yog tus tsim kuv sab nruab nrog tas huv si;
    koj xaws kuv ntxiv kuv hauv kuv niam plab.
    Kuv ua koj tsaug, vim koj tsim kuv tau txaus ntshai txaus qhuas tas nrho:
    koj tsim kuv zoo ua luaj, koj cov dej num zoo tas nrho

    Txais: (14) Kuv cav txog koj vim koj puab kuv tau zoo tas nrho.

    Koj paub kuv tus ntsuj plig txhij txhua thoob plaws.
    koj pom thaum kuv cov pob txha pib tsheej xeeb los,
    thaum koj puab kuv nyob hauv qhov chaw nraim,
    thaum koj xaws kuv tsheej zuj zus puag hauv tej nruab a.

    Txais: (14) Kuv cav txog koj vim koj puab kuv tau zoo tas nrho.

    Zaj Nyeem Ob:   HAUJ LWM 13: 22-26

    Paj Lug hais lus, nws hais tias:
    22 “Tswv Ntuj tsa Das Vis ua vaj. Tswv Ntuj ua pov thawj txog Das Vis li no: ‘Kuv nrhiav tau Das Vis,

    Yes Xes tus tub; nws yog tus neeg ntxim kuv siab, nws yuav ua raws li kuv lub siab xav tas huv si.’
    23 Nyob hauv Das Vis cov xeeb ntxwv, raws li Tswv Ntuj tau cog lus,
    nws coj ib tug cawm seej tuaj rau tsoom His Xas Lais, yog Yes Xus.
    24 Zam xub tuaj npaj kev rau nws ua ntej, Zam tuaj tshaj rau haiv His Xas Lais
    kom tas sawv daws txais cov kab ke ntxuav los thov txhaum.
    25 Thaum Zam ua nws txoj hauj lwm yuav tiav, nws hais tias:
    ‘Nej xav tias kuv yog leej twg? Kuv tsis yog tus nej xav. Ntsia saib, tus lawv kuv qab,
    nws twb tuaj lawm; tus ntawd mas kuv tsis tsim nyog daws nws txoj hlua khau.’
    26 Cov kwv tij, nej cov uas yog Has Nplas Has cov tub, thiab nej cov uas hwm Tswv Ntuj,

    lo lus tshaj txog txoj kev cawm seej no twb tuaj txog peb lawm.”

    As Les Lus Yas:   LK 1: 76

    Txais: As les lus yas, as les lus yas.

    Me tub, luag yuav hu koj ua Leej Nyob Siab Tshaj tus yaj saub,
    vim koj yuav mus ua Huab Tais ntej, koj yuav npaj nws txoj kev.

    Txais: As les lus yas, as les lus yas.

    Ntawv Moo Zoo:   LK 1: 57-66, 80

    57 Thaum txog Es Lis Xas Npes lub caij daws cev, mas nws yug tau ib tug tub.

    58 Cov neeg koom zej koom zos thiab nws cov kwv tij neej tsa hnov tias
    Huab Tais hlub Es Lis Xas Npes kawg nkaus, mas lawv nrog nws zoo siab tas nrho.
    59 Thaum txog hnub yim, lawv tuaj ua lub cim txiav tawv rau tus me nyuam,
    lawv xav tis nws npe hu ua Ntxas Kas Lias raws li nws txiv.
    60 Tab sis nws niam hais tias: "Tsis tau, tus me nyuam yuav hu ua Zam."
    61 Lawv hais rau leej niam tias: "Tsis muaj ib tug hauv koj cov txheeb ze hu li ntawd."
    62 Ces lawv piav tes rau leej txiv saib nws xav kom lawv tis tus me nyuam npe hu li cas.
    63 Leej txiv kom lawv muab ib daim txiag los, nws sau ntawv rau saud tias:
    "Zam yog nws lub npe." Sawv daws ceeb tas.
    64 Tam sis ntawd, leej txiv lub ncauj qhib plho, tus nplaig muag nthas,
    nws hais tau lus los cav txog Tswv Ntuj.
    65 Tsoom neeg nyob ib ncig ntawd sawv daws tau ntshai kawg.
    Hos nyob pem toj siab hauv xeev Yus Das, sawv daws tham txog tej xwm ntawd.
    66 Cov uas tau hnov luag tham txog tej xwm no, muab khaws cia rau nruab siab, lawv hais tias:
    "Tus me nyuam ntawd yuav yog ib tug zoo li cas?" Vim Huab Tais txhais tes yeej nrog nraim tus me nyuam.
    80 Tus me nyuam hlob tuaj, nws lub tswv yim muaj zog zuj zus.

    Nws nyob hauv teb chaws suab puam mus txog hnub nws tawm los rau cov His Xas Lais pom.


    **************************

    Koob Tsheej Hwm LN Zam Ntxuav Plig Hnub Yug – Hmo ua ntej
    Lectionary: 586
     
    Zaj Nyeem Ib:   YLM 1: 4-10

    Thaum lub caij Yos Xias ua vaj,
    4 HUAB TAIS lo lus nrov tuaj hais rau kuv li no:
    5 "Thaum kuv tseem tsis tau puab koj rau hauv plab, kuv twb paub koj lawm;
    thaum koj tseem tsis tau tawm hauv lub plab los, kuv twb tau xaiv koj,
    kuv twb tau tsa koj ua Yaj Saub rau cov kuj cuab lawm."
    6 Kuv hais tias: "HUAB TAIS, koj ntsia, kuv tsis txawj hais lus, vim kuv yog me nyuam yaus xwb!"
    7 HUAB TAIS hais tias: "Koj tsis txhob hais tias: 'Kuv yog me nyuam yaus!' Koj yuav mus cuag
    cov neeg kuv xa koj mus; thiab koj yuav hais txhua yam kuv qhia koj hais.
    8 Koj tsis txhob ntshai nyob ntawm lawv xub ntiag, vim kuv nrog koj nraim,
    kuv yuav npo koj dim.” HUAB TAIS hais li ntawd.
    9 HUAB TAIS cev tes tuaj chwv kuv qhov ncauj, nws hais rau kuv tias:
    "Ntsia saib, kuv muab kuv cov lus rau hauv koj qhov ncauj lawm!
    10 Koj ntsia, hnub no kuv tsa koj rau saum cov kuj cuab thiab cov teb chaws muaj vaj ntxwv,
    koj yuav rho tawm thiab muab ntov pov tseg;
    koj yuav ua kom puas thiab yuav muab rhuav;
    koj yuav txhim tsa thiab yuav cog rau.
     
    NPN   71: 1-2,3-4a,5-6ab,15ab+17
     
    Txais:  (6)  Txij thaum kuv tseem nyob hauv niam plab los, koj yeej yog kuv lub zog.
     
    HUAB TAIS, koj yog kuv qhov chaw nkaum;
    thov koj tsis txhob pub kom kuv poob ntsej muag ib zaug li.
    Vim koj muaj lub siab ncaj, thov koj npo kuv thiab txhiv kuv dim;
    Thov koj tig pob ntseg rau kuv thiab cawm kuv. .

    Txais:  (6)  
    Txij thaum kuv tseem nyob hauv niam plab los, koj yeej yog kuv lub zog.

    Thov koj ua lub tsua rau kuv nkaum, ua lub yeej ntsa zeb txuag kuv,
    vim koj yog kuv lub tsua thiab kuv lub yeej ntsa zeb.
    Kuv tus Tswv Ntuj, thov koj pab npo kuv dim
    ntawm tus neeg siab phem txhais tes

    Txais:  (6)  
    Txij thaum kuv tseem nyob hauv niam plab los, koj yeej yog kuv lub zog.

    HUAB TAIS, koj yog kuv chaw tso siab,
    koj yog kuv qhov chaw vam khom txij thaum hluas los.
    Kuv ib rau koj xij thaum kuv yug los lawm,
    koj yog kuv lub zog txij thaum kuv tseem
    tsis tau tawm hauv kuv niam plab los lawm.

    Txais:  (6)  
    Txij thaum kuv tseem nyob hauv niam plab los, koj yeej yog kuv lub zog.

    Kuv lub ncauj tshaj tawm txog koj txoj kev ncaj
    thiab txog koj txoj kev cawm hnub dhau hnub,
    Tswv Ntuj, koj tau qhuab qhia kuv puag thaum yau los lawm,
    los txog tav no kuv kuj tau tshaj koj tej dej num muaj hwj huam.

    Txais:  (6)  
    Txij thaum kuv tseem nyob hauv niam plab los, koj yeej yog kuv lub zog.
     
    Zaj Nyeem Ob:   1 PZ 1: 8-12

    Cov zoo nyiad:
    8 Txawm nej tsis tau pom Yes Xus Pleev, tsis kav nej nyiam nws; tab nyem no nej tsis pom nws, los nej ntseeg txog nws, mas nej muaj ib txog kev zoo siab uas piav tsis tau thiab nto hwj chim,
    9 vim nej mus txog lub hom phiaj ntawm nej txoj kev ntseeg lawm, uas yog txoj kev cawm nej tus plig.
    10 Txoj kev cawm ntawd, mas cov Yaj Saub, uas tau hais lus saub txog lub txiaj ntsim uas nej yuav tau txais ua nej tug, twb tau nrhiav thiab tau tshuaj txog tas lawm.
    11 Lawv tau tshuaj txog lub caij thiab cov xwm uas Leej Pleev Leej Tswv Yim
    nyob hauv lawv qhia rau lawv paub; nws xub zeem tseeb tias Leej Pleev
    yuav raug txom nyem tso, ces nws mam nto koob meej lawv qab.
    12 Ntuj tau qhia rau cov Yaj Saub paub tias, cov hauj lwm lawv ua, tsis yog ua rau lawv tus kheej
    tiam sis yog ua rau nej, hais txog tej yam uas nyem no cov tub tshaj lub Moo Zoo
    twb muab qhia rau nej nyob hauv Leej Ntuj Plig Ntshiab uas nqes saum ntuj los lawm.
    Tej yam ntawd yog tej uas cov Tshiab ntshaw kom lawv tau pom.
     
    As Les Lus Yas:   Zam 1:7;LK 1:17

    Txais: As les lus yas, as les lus yas.
     
    Nws tuaj yog tuaj ua tim khawv txog qhov pom kev
    Kom thiaj npaj tau ib haiv neeg tsim nyog rau Huab Tais.

    Txais: As les lus yas, as les lus yas.
     
    Ntawv Moo Zoo:   LK 1: 5-17

    5 Lub zim txwv Hes Los ua vaj kav Yus Das teb, muaj ib tug Leej Choj hu ua Ntxas Kas Lias, nws yog phiaj Leej Choj As Npias. Nws poj niam yog As Loos ib tug ntxhais xeeb ntxwv, hu ua Es Lis Xas Npes.
    6 Nkawd ob leeg yog neeg ncaj nyob ntawm Tswv Ntuj xub ntiag;
    nkawd ua raws nraim li Huab Tais cov lus qhia thiab cov cai tas huv si, tsis muaj ib qho xyeej li.
    7 Nkawd tsis muaj me nyuam, vim Es Lis Xas Npes xeeb tub tsis tau, thiab nkawd hnub nyug kuj laus lawm.
    8 Muaj ib hnub, Ntxas Kas Lias tab tom leg Leej Choj txoj kab xwm nyob ntawm Tswv Ntuj xub ntiag,
    vim txog lub caij nws phiaj Leej Choj rov leg kab xwm lawm.
    9 Lawv ntaus txheeb raws li cov Leej Choj kev cai ua kam,
    ces Ntxas Kas Lias raug ua tus chaws mus hlawv xyab hauv Huab Tais Kem Ntshiab.
    10 Lub caij hlawv xyab, tas tsoom pej xeem teev Ntuj nyob sab nraud.
    11 Huab Tais tus Tshiab tawm tuaj sawv ntsug nyob ntawm lub thaj hlawv xyab sab xis rau nws pom.
    12 Ntxas Kas Lias pom dheev, nws ua siab nphau npog, nws ntshai kawg.
    13 Tab sis tus Tshiab hais rau nws tias: "Ntxas Kas Lias, koj txhob ntshai, vim Tswv Ntuj
    mloog koj cov lus thov lawm. Koj poj niam Es Lis Xas Npes yuav yug ib tug tub rau koj,
    koj yuav tis nws npe hu ua Zam.
    14 Koj yuav kaj siab thiab zoo siab tas nrho. Thaum nws yug los, coob leej kuj yuav zoo siab.
    15 Vim nws yuav yog ib tug loj nyob ntawm Huab Tais xub ntiag. Nws yuav tsis haus cawv qab,
    tsis haus cawv ntsim. Txij nruab thiab los, Leej Ntuj Plig Ntshiab yuav nyob puv hauv nws.
    16 Nws yuav coj coob leej tub ki His Xas Lais rov los cuag Huab Tais, lawv tus Tswv Ntuj.
    17 Nws yuav taug kev ua Huab Tais ntej, muaj Es Lias lub tswv yim thiab lub hwj huam,
    kom nws coj tau cov ua txiv lub siab tig rov los rau lawv cov me nyuam, coj cov neeg tsis yuav lus rov los
    taug cov neeg ncaj txoj kev ua neeg to taub, thiab npaj ib haiv neeg kom tsim nyog rau Huab Tais.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 23rd June 2022, 2:08 am

    Tim     24     lub     6     Hli     2022
     
    Hnub Rau Lis Piam Kaum Ob Nruab Xyoo ABC Nruab Lis Piam Xyoo II
     
    Koob Tsheej Hwm HT Yes Xus lub Plawv Ntshiab
    Lectionary: 172
     
    Zaj Nyeem Ib:   EXK 34: 11-16
     
    11 HUAB TAIS Tswv Ntuj hais li no: Kuv yog tus yuav mus nrhiav kuv pab yaj, kuv yuav mus nrhiav kom tau lawv los.
    12 Xws li ib tug tswv zov yaj mus nrhiav kom tau nws cov yaj uas tawg ua lwj ua liam tas,
    kuv kuj yuav mus nrhiav kom tau kuv pab yaj thiab. Kuv yuav mus coj lawv tawm ntawm txhua
    qhov chaw uas lawv tau tawg mus nyob thaum uas muaj pos huab ntuj tsaus nti dub nciab.
    13 Kuv yuav coj lawv tawm ntawm cov haiv neeg uas lawv mus nrog nyob los, yuav sau lawv ntawm pej kum teb los;
    kuv yuav coj lawv rov los rau hauv lawv thaj av thiab yuav cia lawv nog zaub nyob saum His Xas Lais
    tej hauv roob, nyob taug tej ntug dej thiab nyob tas qhov txhia chaw uas muaj neeg nyob.
    14 Kuv yuav cia lawv nog zaub nyob hauv tej tshav zaub mos nyoos, thiab His Xas Lais tej hauv roob yuav yog lawv chaw nog zaub; nyob saud, lawv yuav tau chaw so nyob hauv ib lub tshav zaub mos. Ces kuv pab yaj yuav nog tej hav nyom ntsuab xiab saum His Xas Lais tej toj roob.
    15 Kuv yog tus yuav coj kuv cov yaj mus nog zaub, kuv yog tus yuav ua kom lawv tau so; HUAB TAIS hais li ntawd.
    16 Tus poob zoo kuv yuav nrhiav kom tau; tus ncaim npoj lawm kuv yuav coj rov los poo npoj,
    tus raug mob kuv yuav qhwv nws tej qhov txhab, tus muaj mob nkeeg kuv yuav kho kom rov muaj zog tuaj;
    tab sis tus cam thawj thiab muaj zog kuv yuav rhuav tshem nws. Kuv yuav saib xyuas kuv cov yaj kom raws txoj kev ncaj.
     
    NPN   23: 1-3a,3b-4,5,6
     
    Txais:   (1) HUAB TAIS yog tus tswv zov yaj saib kuv, kuv yuav tsis ntshaw dab tsi.
     
    HUAB TAIS yog tus tswv zov yaj saib kuv, kuv yuav tsis tshaib tsis nqhis dab tsi.
    Nws tso kuv so nyob hauv tej tshav zaub mos ntsuab xiab;
    nws coj kuv mus nyob ze tej tus dej tus yees,
    nws ntxiv siav rau kuv tus ntsuj plig.

    Txais:   (1) HUAB TAIS yog tus tswv zov yaj saib kuv, kuv yuav tsis ntshaw dab tsi..

    Nws coj kuv mus taug txoj kev ncaj vim nws lub npe
    Tab yog kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob rawv ntawm kuv ib sab,
    koj rab qws thiab koj rab pas nrig pab kuv ua siab loj.

    Txais:   (1) HUAB TAIS yog tus tswv zov yaj saib kuv, kuv yuav tsis ntshaw dab tsi.

    Koj npaj ib roog qav rau ntawm kuv xub ntiag,
    rau kuv cov yeeb ncuab qhov muag pom ntsoov,
    koj muab roj tsw qab pleev kuv taub hau;
    kuv lub ntim puv phwj yaws.

    Txais:   (1) HUAB TAIS yog tus tswv zov yaj saib kuv, kuv yuav tsis ntshaw dab tsi.

    Kev tau qhov zoo thiab kev hlub caum rawv kuv
    niaj hnub hauv kuv lub neej;
    Kuv lub chaw nyob yog nyob hauv Huab Tais lub tsev
    Mus tas lub caij tom ntej.

    Txais:   (1) HUAB TAIS yog tus tswv zov yaj saib kuv, kuv yuav tsis ntshaw dab tsi.

     
    Zaj Nyeem Ob:   LM 5: 5b-11
     
    Cov kwv tij nkauj muad:
    5 Txoj kev tso siab tsis ua kom peb muaj chaw khuv xim, vim Leej Ntuj Plig Ntshiab
    uas Ntuj pub rau peb, nws hliv Tswv ntuj txoj kev nyiam rau hauv peb lub siab.
    6 Vim li ntawd lub sij hawm thaum peb tsis tau muaj tus pab,
    Leej Pleev thiaj raug luag tua thaum txog lub caij teem, kom tau pab ib co neeg tsis hwm Ntuj.
    7 Muaj tseeb tias, yog yus yuav tuag kom tau pab ib tug neeg ncaj mas yeej nyuaj kawg nkaus; tej zaum yus ho yuav muaj peev xwm tuag kom tau pab ib tug neeg siab zoo dua.
    8 Yam uas zeem tseeb tias Tswv Ntuj nyiam peb yog qhov tias
    thaum peb tseem yog neeg txhaum, Leej Pleev tuag kom tau pab peb.
    9 Nyem no peb twb ncaj tuaj nyob hauv Leej Pleev cov roj ntsha lawm,
    mas nws haj yam yuav cawm peb dim ntawm kev npau taws.
    10 Yog tias thaum peb tseem ua yeeb ncuab rau Tswv Ntuj, nws Leej Tub kev tuag twb ua kom
    peb nrog nws rov sib haum xeeb, mas  thaum peb nrog Tswv Ntuj rov sib haum xeeb lawm,
    mas nws Leej Tub txoj sia haj yam yuav cawm tau peb.
    11 Tsis tas li xwb, peb khav tau tias peb yog Tswv Ntuj neeg, vim peb tau txais
    kev nrog nws sib raug zoo nyob hauv peb tus Huab Tais Yes Xus Pleev lawm.
     
    As Les Lus Yas:   MT 11: 29ab
     
    Txais:     As les lus yas, as les lus yas.

    Huab Tais hais tias: Nej txais kuv tus quab mus nej kwv,
    Nej kawm ntawm kuv vim kuv muaj lub siab txo hwj chim ua neeg me.

    Txais:     As les lus yas, as les lus yas.

     
    Los:    Zam 10: 14
     
    Txais: As les lus yas, as les lus yas.

    Huab Tais hais tias: Kuv yog tus zoo tswv zov yaj,
    kuv paub kuv cov yaj, kuv cov yaj paub kuv.

    Txais: As les lus yas, as les lus yas.

     
    Ntawv Moo Zoo:   LK 15: 3-7
     
    3 Yes Xus thiaj hais zaj paj lug no rau cov Fas Lis Xais thiab cov thoob xwm ntawv tias:
    4 "Yog nej leej twg muaj ib puas tus yaj, tab sis ib tug ploj lawm, mas nws puas yuav tsis tso cuaj caum cuaj
    tus yaj tseg rau tom hav quav poj, thiab mus nrhiav kom tau tus uas poob zoo lawd?
    5 Thaum nws nrhiav tau tus yaj poob zoo lawm, nws muab kwv hlo saum xwb pwg, nws zoo siab tas nrho.
    6 Nws rov los txog tsev, nws nqua hu nws cov phooj ywg thiab cov nyob ze nws tuaj, nws hais rau lawv tias:
    'Nej nrog kuv zoo siab, vim kuv nrhiav tau kuv tus yaj poob zoo lawm.'
    7 Kuv hais rau nej tias, ib yam li ntawd, thaum ib tug neeg txhaum hloov siab tig los lees txhaum, mas nyob saum ntuj muaj kev zoo siab loj dua kev zoo siab rau cuaj caum cuaj leeg siab ncaj uas tsis tas yuav hloov siab los lees txhaum.”
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 24th June 2022, 7:03 am

    Tim     25     lub     6     Hli     2022
     
    Hnub Xya Lis Piam Kaum Ob Nruab Xyoo ABC Nruab Lis Piam Xyoo II
    Lectionary: 376/573
     
    Yuav hwm Niam Mab Liab lub Plawv tsis lo txhaum
     
    Zaj Nyeem Ib:   SEEV 2: 2, 10-14, 18-19

    2 HUAB TAIS hlawv Yas Kos cov vaj tse tas huv si, nws tsis hlub lawv li;
    nws npau taws, nws tsoo cov yeej ntsa zeb thaiv tus ntxhais Yus Das tawg tas;
    nws ua kom tus vaj thiab cov nom tswj teb chaws poob ntsej muag ti av nkaus.
    10 Cov neeg laus hauv tus ntxhais Xis Yoos zaum ntsiag to hauv av,
    lawv nphoo hmoov tshauv rau saum lawv taub hau, thiab npua hnab tsaj.
    Cov ntxhais hluas nyob Yes Lus Xas Les nyo hau rau hauv av.
    11 Kuv quaj ua rau kuv qhov muag puas tas, kuv plab plaw mob ntswj lees;
    kuv cov kua tsib raug muab nchuav rau hauv av, vim tus ntxhais hauv kuv haiv neeg

    poob rau kev txom nyem lawm, ces cov me nyuam yau thiab cov me nyuam mos
    tsaus muag ntog pawg lug hauv tej tshav puam hauv lub Tsheej.
    12 Lawv quaj nug lawv niam tias: "Mov nyob qhov twg, cawv nyob qhov twg?”

    Tsis muaj dab tsi li, ces lawv tsaus muag zoo li cov neeg raug mob hnyav nyob ntawm
    tej tshav puam hauv nroog, ces lawv tas txoj sia nyob hauv lawv niam xub ntiag.
    13 Kuv yuav piav li cas txog koj, yuav muab koj piv rau dab tsi os Ntxhais Yes Lus Xas Les?
    Kuv yuav hais tias koj zoo li cas, kuv thiaj yuav nplij tau koj os Ntxhais nkauj xwb Xis Yoos?
    Vim koj txoj kev piam sij loj cuag li lub hiav txwv, leej twg thiaj yuav kho tau koj ?
    14 Koj cov yaj saub tau yees pom tej yam tsis muaj qab hau tsis tseem ceeb txog koj;
    lawv tsis tau piav koj cov txhaum meej rau koj thiaj yuav pab tau kom koj dim kev raug txim.
    Lawv tsuas yees pom tej yam tsis muaj qab hau thiab ntxias koj xwb.
    18 Koj cia li quaj hu txog HUAB TAIS… Me Ntxhais Xis Yoos lub ntsa loog.
    Koj ua kua muag ntws zoo li ib tug dej nruab hnub hmo ntuj tib si,
    tsis txhob pub koj tau so, tsis txhob cia koj qhov muag tau qi.
    19 Hmo ntuj koj sawv, koj tsa suab quaj thaum txhua lub caij pib zov hmo;
    qhib koj lub siab kom ntws lug li dej nyob ntawm HUAB TAIS xub ntiag;
    tsa koj ob txhais tes rau nws, thov kom nws pab koj cov me nyuam txoj sia,
    vim lawv tshaib plab tsaus muag tas rau ntawm txhua txoj hauj kev.

    NPN   74: 1b-2, 3-5, 6-7, 20-21

    Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

    Tswv Ntuj, vim li cas koj muab peb tso pov tseg tsis muaj caij kawg li?
    Vim li cas koj ua kev npau taws ncho pa lug rau koj pab yaj nyob hauv koj lub nras zaub?
    Thov koj rov nco txog koj pab yaj uas koj tau tu txij thaum ntxov ub los lawm,
    koj haiv neeg uas koj tau txhiv los ua koj lub cuab tam,
    lub roob Xis Yoos uas koj xaiv los ua koj lub chaw nyob.

    Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

    Thov tig koj ko taw tshais ruam mus ncig tej qub vaj tse uas vau tas.
    Mus ncig koj lub tsev ntshiab uas yeeb ncuab tau ua phem npaum li cas rau.

    Lawv qw ntshos tsuam tias lawv yeej lawm nyob hauv koj lub tuam tsev;
    lawv tsa lawv tus chij rau ntawd ua cim nco txog lawv txoj kev yeej.
    Lawv ua zoo li ib pab neeg nqa taus yuav tuaj ntov ib koog zoov.

    Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

    Lawv xuas txaug thiab rauj tsoo koj lub tsev ntshiab cov phab ntsa tawg tas,
    Lawv xuas taws hlawv koj lub tsev ntshiab kom kub hnyiab,
    Lub tsev uas muaj koj lub npe lawv ua kom vau ti av, lawv ua phem rau.

    Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

    Thov koj saib txog lo lus koj tau cog rau peb,
    vim tej chaw nkaum tej tiaj nrag hauv lub teb chaws yog chaw sib nkaug sib tua tas.
    Thov kom tus neeg me txhob nyob nkaum nkoos hauv txoj kev ua xyem xyav,
    kom tus neeg txom nyem thiab tus pluag cav lus zoo txog koj lub npe!

    Txais: (19b) Huab Tais, thov koj nco ntsoov txog koj cov neeg txom nyem tus ntsuj plig.

     
    Vim hnub no peb yuav tsum hwm Niam Mab Liab lub Plawv tsis lo txhaum, nej mus nyeem zaj As Les Lus Yas thiab zaj Ntawv Moo Zoo nram qab ob zag ntawm no.

    As Les lus Yas:   MT 8: 17

    Txais: As les lus yas, as les lus yas.

    Leej Pleev tshem peb tej kev ceg tawv mus,
    nws ris peb tej kev mob kev ntsaj.

    Txais: As les lus yas, as les lus yas.

    Ntawv Moo Zoo:   MT 8: 5-17

    5 Thaum Yes Xus mus hauv Kas Fas Naus, ib tug xab txheeb txav los ze Yes Xus, nws thov tias:

    6 "Huab Tais, kuv tus tub txib pw tom tsev, nws tes taw tuag tas. Nws mob hnyav heev."
    7 Yes Xus teb tias: "Kuv yuav mus kho nws."
    8 Tus xab txheeb hais ntxiv tias: "Huab Tais, kuv tsis tsim nyog koj chaws los hauv kuv tsev,
    tsuav yog koj hais lo lus xwb ces kuv tus tub txib yuav zoo hlo.
    9 Txawm tias kuv yog ib tug neeg zwm rau tus loj, los kuv kuj muaj ib co tub rog zwm rau kuv thiab.
    Yog kuv hais rau ib tug tias: 'Koj mus !' nws cia li mus; kuv ho hais rau lwm tus tias: 'Koj los,' nws kuj cia li los. Kuv hais rau kuv tus tub txib tias: 'Koj ua qhov no !' nws cia li ua.’"
    10 Yes Xus hnov nws hais li ntawd, Yes Xus qhuas kawg. Yes Xus hais rau cov neeg raws nws tias:
    "Kuv hais tseeb rau nej, kuv tsis tau dua pom ib tug neeg yuav ntseeg npaum li ntawd hauv cov His Xas Lais li.
    11 Kuv hais rau nej tias , yuav muaj neeg coob tuaj Toob Fab thiab Xib Fab tuaj nrog Has Nplas Has,
    nrog His Xas Has thiab Yas Kos noj rooj qav hauv lub Ceeb Tsheej saum ntuj.
    12 Hos cov tub hauv Ceeb Tsheej yuav raug muab rho mus pov rau hauv qhov tsaus ntuj
    nraum zoov; nyob nraud, sawv daws yuav quaj tom hniav nkawv.”
    13 Ces Yes Xus hais rau tus xab txheeb tias:
    "Koj rov mus! Koj yuav tau raws li koj lub siab ntseeg!" Ces tam sis ntawd, tus tub txib zoo hlo.
    14 Yes Xus mus hauv Pob Zeb tsev. Nws pom Pob Zeb niam tais pw saum txaj, mob kub cev.

    15 Yes Xus tuav nws txhais tes, tus mob kub cev thim hlo.
    Ces Pob Zeb niam tais sawv los, nws tsob hwb Yes Xus.
    16 Yav tsaus ntuj, luag coj ib co neeg raug dab coob leej tuaj cuag Yes Xus.

    Nws hais ib lo lus los ntiab cov dab ntawd tawm thiab nws kho cov neeg mob zoo tas huv si.
    17 Ua li mas muaj raws li Yaj Saub His Xais lo lus tias:
    “ Nws tshem peb tej kev ceg tawv mus, nws ris peb tej kev mob kev ntsaj.”
     
    Yog yuav hwm Niam Mab Lia blub Plawv tsis lo txhaum, xaiv ob zaj nram no:
     
    As Les Lus Yas:  LK 2: 19

    Txais: As les lus yas, as les lus yas.

    Tus nkauj tsim txiaj Mab Liab tau txoj hmoov zoo vim nws khaws
    Tswv Ntuj lo lus cia rau nruab siab thiab muab coj los xav.

    Txais: As les lus yas, as les lus yas.

    Ntawv Moo Zoo: LK 2:  41-51

    41 Yes Xus niam thiab txiv nkawd niaj xyoo mus ua lub Ntees Hla pem Yes LusXas Les.

    42 Thaum Yes Xus muaj kaum ob xyoos, lawv kuj mus ua lub Ntees Hla rau ped raws li kev cai thiab.
    43 Thaum cov hnub ua ntees ntawd tas lawm, Yos Xes thiab Mab Liab nkawd sawv kev rov los,
    hos tus me tub Yes Xus tseem nyob Yes Lus Xas Les, nws niam thiab nws txiv tsis paub li.
    44 Nkawd xav tias nws nyob hauv pab neeg coob nrog sawv daws rov qab los lawm.
    Ces nkawd mus ib hnub ke, nkawd mam li pib nrhiav nws hauv cov txheeb ze thiab cov swm neeg.
    45 Tiam sis nkawd nrhiav tsis tau, ces nkawd thiaj rov mus nrhiav nws pem Yes Lus Xas Les.
    46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj,
    nws zaum hauv nruab nrab cov kws Txoj Cai, nws mloog lawv thiab nug lawv.
    47 Cov neeg uas tau hnov nws hais lus puav leej yoob tas rau nws lub tswv yim ntse thiab nws cov lus teb.
    48 Thaum nkawd pom Yes Xus, nkawd xav tsis thoob, ces nws niam hais rau nws tias:
    "Me tub, vim li cas koj ua li ntawd rau wb? Saib koj txiv wb nrhiav koj, wb ntxhov siab tas nrho."
    49 Yes Xus hais rau nkawd tias: "Vim li cas neb nrhiav kuv?
    Neb tsis paub tias kuv yuav tsum nyob hauv kuv Txiv lub tsev no lod?”
    50 Tiam sis nkawd tsis to taub nws lo lus nws hais rau nkawd li.
    51 Yes Xus nrog nkawd rov mus, nws mus nyob Nas Xas Les, nws mloog nkawd lus
    Nws niam khaws tej ntawd huv tib si cia rau nruab siab.   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 26th June 2022, 2:58 pm

    Tim     27     lub     6     Hli     2022  
     
    Hnub Ob Lis Piam Kaum Peb Nruab Xyoo ABC Nruab Lis Piam Xyoo II
    Lectionary: 377
     
    XHLT:   LN Cyril nyob Alexandria, Tswv Qhia thiab Kws cov Txuj Ntshiab
     
    Zaj Nyeem Ib:   AM 2: 6-10, 13-16

    6 HUAB TAIS hais li no:
    “Vim His Xas Lais peb qho txhaum thiab plaub qho ntxiv, 
    mas kuv yuav tsis thim kuv lo lus,
    yog vim lawv muab tus neeg ncaj muag yuav nyiaj
    thiab muab tus neeg pluag muag pauv ib nkawm khau khiab;
    7 lawv yog cov muab tus pluag taub hau tsuj ntiag rau hauv cov plua av
    thiab ntiab tus txom nyem tseev kom txav tawm txhob thaiv lawv kev;
    leej tub thiab leej txiv ob leeg koom mus deev ib tug ntxhais hluas,
    ces nkawd ua tsis hwm kuv lub npe ntshiab.
    8 Lawv muab cov tsho uas luag coj tuaj yuam nqi cia
    coj mus pua xyab noj mov 

    ze ntawm tej thaj txi dab, thiab lawv haus cov neeg raug lawv nplua tej cawv
    nyob hauv cov tsev teev lawv cov dab.
    9 Kuv yog tus tau ua kom cov As Mos Lis puas tsuaj tas nyob ntawm lawv hauv ntej,
    txawm cov As Mos Lis loj siab cuag cov ntoo ciab, txawm lawv khov npaum cov ntoo qhib;
    kuv tau txiav lawv cov txiv uas nyob saud thiab tau txo lawv cov cag uas nyob hauv.
    10 Kuv yog tus tau coj nej tawm ntawm Hais Nkws Tos teb los,
    Thiab coj nej ncig tau plaub caug xyoo nyob teb chaws suab puam
    nej mam los txeeb tau cov As Mos Lis lub te chaws ua nej lub.
    13 Hais rau nej paub, kuv yuav siv zog muab nej tsuj zom rau hauv av
    xws li ib lub tsheb nog tau hnyav hnyav zom av rau ntawm chaw.
    14 Tus neeg nrawm yuav khiav tsis taus nrawm, tus neeg muaj zog yuav tsis muaj zog ntxiv,
    tus tub rog yuav cawm tsis tau nws txoj sia;
    15 tus tuav hneev yuav nyob tiv tsis taus ntxiv, tus neeg taw nrawm yuav khiav tsis dim,
    hos tus caij nees yuav cawm tsis tau nws txoj sia,
    16 tus neeg siab tawv tshaj nyob hauv tsoom tub rog yuav khiav

    liab qab ploog thaum txog hnub ntawd,” HUAB TAIS hais li ntawd.

    NPN   50: 16bc-17, 18-19, 20-21, 22-23

    Txais: (22a) Nej cov uas tsis nco txog Tswv Ntuj li, nej nco ntsoov qhov no.

    “Vim li cas nej qog kuv cov kev cai lij choj
    thiab lees kuv txoj kev cog lus ntawm nej lub ncauj,
    tiam sis nej ntxub txoj cai nruj
    thiab muab kuv cov lus cuam si pov tom nej nrob qaum?”

    Txais: (22a) Nej cov uas tsis nco txog Tswv Ntuj li, nej nco ntsoov qhov no.

    Thaum nej pom ib tug tub sab, mas nej caum kom tau nws qab,
    Nej txaus siab hlo koom nrog cov deev luag txij nkawm ua ke.
    Nej qhib ncauj lug hais lus phem,
    Nej tso plhuav nej tus nplaig hais qhov dag.

    Txais: (22a) Nej cov uas tsis nco txog Tswv Ntuj li, nej nco ntsoov qhov no.

    Koj zaum tsaws hais lus phem txog koj tus kwv tij,
    koj xyav lus moo cua txog koj niam tus tub.
    Thaum koj ua zoo li no, kuv puas yuav tsum ua ntsej lag muag dig?
    Los koj puas xav tias kuv zoo nkaus li koj?
    Kuv yuav qhuab qhia koj, yuav hais ncaj qha kom koj pom tseeb.”

    Txais: (22a) Nej cov uas tsis nco txog Tswv Ntuj li, nej nco ntsoov qhov no.

    Nej yuav tsum muab los xav, nej cov uas tsis quav ntsej txog Tswv Ntuj,
    Tsis li ces kuv yuav muab nej rhuav, yuav tsis muaj neeg cawm tau nej.
    Tus uas cev ib co lus qhuas los txi Ntuj, nws ua kom kuv muaj hwj chim.
    Tus neeg taug txoj kev ncaj, kuv yuav pub nws pom Tswv Ntuj txoj kev cawm. 


    Txais: (22a) Nej cov uas tsis nco txog Tswv Ntuj li, nej nco ntsoov qhov no.

    As Les Lus Yas:   NPN 95: 8

    Txais: As les lus yas, as les lus yas.

    Yog hnub no, nej hnov nws lub suab,
    txhob ua nej lub siab tawv ncauj.

    Txais: As les lus yas, as les lus yas.

    Ntawv Moo Zoo:   MT 8: 18-22

    18 Yes Xus pom neeg coob coob tuaj ntsauv nws, nws kom lawv mus lawm sab ntug dej tim ub.

    19 Ces muaj ib tug Kws Ntawv Ntshiab txav los hais rau nws tias:
    "Xib Hwb, txawm koj mus qhov twg, los kuv yuav raws koj mus."
    20 Yes Xus teb rau nws tias: "Hma muaj hma lub chaw nkaum, cov noog saum ntuj lawv kuj muaj lawv lub zes nyob, hos Neeg Leej Tub tsis muaj chaw ib nws taub hau li."
    21 Nyob hauv cov thwj tim, muaj ib tug hais rau Yes Xus tias:
    "Huab Tais, thov koj cia kuv xub mus faus kuv txiv tso."
    22 Tab sis Yes Xus hais rau nws tias: "Koj raws kuv mus, cia cov tuag mam li faus lawv cov tuag."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 27th June 2022, 1:10 am

    Tim     28     lub     6     Hli     2022
     
    Hnub Peb Lis Piam Kaum Peb Nruab Xyoo ABC Nruab Lis Piam Xyoo II
    Lectionary: 378
     
    Yuav Hwm LN Irenaeus, Tswv Qhia tuag ua Tim Khawv
     
    Zaj Nyeem Ib:   AM 3: 1-8; 4: 11-12

    3: 1 “Cov tub kis His Xas Lais aw, nej mloog lo lus no, yog lo lus HUAB TAIS hais rau nej,
    hais rau tas nrho tsev neeg kuv tau coj tawm hauv Hais Nkws Tos teb los.
    2 Nyob hauv tas cov tsev neeg nyob ntiaj teb, kuv tsuas tau ua zoo rau nej xwb;
    vim li ntawd, kuv thiaj yuav rau txim rau nej vim tas nej cov txhaum huv tib si.
    3 Ob tug neeg tsis tau xub teem caij, nkawd puas yuav ua ke taug kev tau?
    4 Tus tsov ntxhuav nyob hauv hav zoov, nws puas yuav nyooj yog nws tsis pom nqaij?
    Tus me nyuam tsov ntxhuav puas yuav quaj nyob hauv nws qhov chaw nkaum,
    yog nws tom tsis tau dab tsi?
    5 Ib tug noog puas yuav mag rooj ntxiab nyob hauv av yog tsis rau w rau?
    Yog ib rooj ntxiab tsis mag dab tsi nws puas yuav txawj txhais?
    6 Yog muaj suab hom nrov nyob hauv ib lub nroog
    mas tsoom pej xeem puas yuav tsis ntshai li?
    Puas yuav muaj ib yam xwv txheej tshwm tuaj raug ib lub tsheej,
    yog HUAB TAIS tsis tau tso tuaj?
    7 Yeej tseeb tias, HUAB TAIS Tswv Ntuj nws tsis lam ua ib yam
    uas nws tsis tau xub qhia rau nws cov tub txib yaj saub paub tso.
    8 Hnov tsov ntxhuav nyooj, puas yuav muaj leej twg uas tsis ntshai li?
    Yog nws hnov HUAB TAIS Tswv Ntuj hais lus, leej twg thiaj yuav tsis kam ua saub?
    4: 11 Kuv rhuav nej loj zoo li thaud Tswv Ntuj rhuav Xos Dos Mas thiab Nkos Mos Las;
    nej zoo li ib tug pas ntoo kub hnyiab rho hauv hluav taws los xwb,
    tsis kav nej tseem tsis kam los cuag kuv li,” HUAB TAIS hais li ntawd.
    12 “Li ntawd, His Xas Lais, kuv yuav npaj ua raws li kuv pom zoo rau nej;
    vim kuv yuav ua li ntawd rau nej, mas His Xas Lais,
    nej kav tsij npaj siab yuav tau ntsib nej tus Tswv Ntuj nawb!”

    NPN   5: 4b-6a, 6b-7, 8

    Txais: (9a) Huab Tais, thov coj kuv mus taug koj txoj kev ncaj.

    Sawv ntxov tsees, kuv tuaj thov koj, vam ntsoov tias koj yuav teb.
    Vim koj, Tswv Ntuj, tsis nyiam txoj kev ua phem:

    tsis muaj neeg phem tuaj nyob ntawm koj xub ntiag;
    tus neeg khav theeb sawv tsis taus ntsug rau koj pom.

    Txais: (9a) Huab Tais, thov coj kuv mus taug koj txoj kev ncaj..

    Koj ntxub tas tsoom neeg nrhiav ua phem;
    Koj rhuav tas cov neeg hais lus dag;
    Cov neeg nyiam tua neeg thiab cov neeg ua cuav,
    mas HUAB TAIS ntxub lawv tas siab.

    Txais: (9a) Huab Tais, thov coj kuv mus taug koj txoj kev ncaj.

    Ntawm kuv mas, vim koj muaj kev khuv leej loj tas nrho,
    kuv yuav tau nkag los hauv koj lub tsev,
    Kuv yuav tau pe hawm hauv koj lub tuam tsev ntshiab,
    kuv yuav ntshai yuav hwm koj, HUAB TAIS.

    Txais: (9a) Huab Tais, thov coj kuv mus taug koj txoj kev ncaj.

    As Les Lus Yas:   NPN 130: 5

    Txais: As les lus yas, as les lus yas.

    Kuv tso siab rau HUAB TAIS,
    kuv tus ntsuj plig tso siab rau nws lo lus.

    Txais: As les lus yas, as les lus yas.

    Ntawv Moo Zoo:  MT 8: 23-27

    23 Yes Xus nce mus hauv nkoj, cov thwj tim lawv nws qab nce mus thiab.
    24 Ib sij huam, cua daj cua dub sawv hauv dej ntuj tuaj;

    cov nplaim dej nphau tej niag twv tuaj npog nkaus lub nkoj. Hos Yes Xus tsaug zog lawm.
    25 Cov thwj tim los ntawm Yes Xus, lawv tsa nws tias : "Huab Tais, koj cawm peb mas, peb yuav tuag!"
    26 Yes Xus hais rau lawv tias: "Vim li cas nej ntshai, ua cas nej ntseeg me ua luaj?"

    Ces Yes Xus sawv ntsug, nws txwv cua thiab dej ntuj, gej cia li rov tus yees tuaj.
    27 Cov thwj tim nyob hab nuv cia; lawv sib hais zom zaws tias:

    "Tus ntawd yog leej twg? Tab yog cua thiab dej ntuj los yeej mloog nws lus!"   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 28th June 2022, 2:54 am

    Tim     29     lub     6     Hli     2022

    Hnub Plaub Lis Piam Kaum Peb Nruab Xyoo C Nruab Lis Piam Xyoo II

    Koob Tsheej Hwm Hauv Paus Xa Lus LN Pob Zeb thiab Paj Lug – Thaj Txi Ntuj hnub ntawd

    Lectionary: 591

    Zaj Nyeem Ib:   HAUJ LWM 12: 1-11

    1 Lub caij ntawd, tus vaj Hes Los ntes ib co neeg nyob hauv lub Koom Txoos thiab tsim txom lawv.  

    2 Nws xuas ntaj tua Yas Kos uas yog Zam tus tij laug.
    3 Thaum nws pom tias cov Yus Das zoo siab rau qhov nws ua ntawd, nws kuj tso neeg mus
    ntes Pob Zeb thiab. Thaum ntawd yog lub caij noj cov ncuav mov tsis rau poov xab.
    4 Thaum Hes Los ntes tau Pob Zeb lawm, nws coj Pob Zeb mus kaw hauv tsev loj faj, muaj plaub pab
    tub rog zov rawv, ib pab muaj plaub leeg. Hes Los npaj tias thaum ua lub Ntees Hla tas nrho,
    mas nws yuav coj Pob Zeb tawm los rau ntawm tsoom pej xeem xub ntiag.
    5 Li ntawd, Pob Zeb raug kaw hauv tsev loj faj; hos lub Koom Txoos thov Tswv Ntuj tsis tseg rau Pob Zeb.
    6 Hmo ua ntej kiag hnub Hes Los yuav coj Pob Zeb tawm los, Pob Zeb pw tsaug zog

    nyob nruab nrab ob tug tub rog, muaj ob txog saw khi rawv nws cia, hos tseem muaj
    ib co tub rog zov qhov rooj nyob sab nraud saib lub tsev loj faj thiab.
    7 Ib sij huam, Huab Tais tus Tshiab cia li los sawv nyob ze ntawm Pob Zeb, thiab muaj ib qho ci ci
    ua kom pom kev rau hauv kem tsev. Tus Tshiab diaj Pob Zeb ntawm ib sab, tsa kom nws sawv, thiab
    hais rau nws tias: "Koj sawv tsees tam sis no!" Cov saw khi Pob Zeb ob txhais tes cia li plam plaws tas.
    8 Tus Tshiab hais tias: "Sia koj txoj siv thiab rau koj nkawm khau!" Pob Zeb ua li ntawd tas,
    Tus Tshiab hais tias: "Hnav koj lub tsho loj ces lawv kuv qab!"
    9 Ces Pob Zeb lawv tus Tshiab qab tawm mus. Pob Zeb tsis paub tias
    qhov tus tshiab ua ntawd yog tiag, nws xav tias yog nws ua yog toog pom xwb.
    10 Nkawd mus hla thawj pab zov keeb, thiab tseem mus dhau pab ob ntxiv thiab, nkawd thiaj los txog
    lub qhov rooj hlau uas yuav tawm sab nraud mus rau hauv nroog. Lub qhov rooj hlau cia li qhib plho nws tus kheej rau nkawd, nkawd tawm plaws mus taug ib txog kev, ces tus Tshiab cia li ploj ntais ncaim mus lawm.
    11 Pob Zeb thiaj tsim dheev feeb meej tuaj, nws hais tias: "Zaum no, kuv paub tseeb lawm tias
    Huab Tais tau xa nws tus Tshiab tuaj pab kuv kom kuv dim ntawm Hes Los txhais tes
    thiab ntawm qhov uas cov Yus Das vam vam yuav tau pom."

    NPN   34: 2-3, 4-5, 6-7, 8-9

    Txais: Huab Tais tus tshiab yuav tuaj cawm cov uas hwm nws.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Kuv tus plig lub koob meej yog nyob hauv HUAB TAIS;
    tus neeg me yuav hnov txog kuv thiab yuav zoo siab.

    Txais: Huab Tais tus tshiab yuav tuaj cawm cov uas hwm nws.

    Nej nrog kuv cav txog HUAB TAIS,
    peb sawv daws ua ke qhuas nws lub npe.
    Kuv tau nrhiav HUAB TAIS, ces nws teb kuv,
    Nws cawm kuv dim ntawm tas kuv tej kev ntshai.

    Txais: Huab Tais tus tshiab yuav tuaj cawm cov uas hwm nws..

    Nej vam txog HUAB TAIS, ces kev zoo siab yuav ua nej ci ntsa iab,
    nej ntsej muag yuav tsis liab ploog vim kev txaj muag.
    Thaum tus pluag hu, HUAB TAIS mloog
    thiab yuav cawm nws ntawm tas nws tej kev nyuaj siab.

    Txais: Huab Tais tus tshiab yuav tuaj cawm cov uas hwm nws.

    HUAB TAIS tus tshiab tsa tsev tsam phooj

    nyob ncig cov neeg hwm HUAB TAIS, nws cawm lawv.
    Nej saj ces nej yuav pom tias HUAB TAIS siab zoo npaum li cas.
    Tus tau txoj hmoov zoo yog tus vam khom HUAB TAIS.

    Txais: Huab Tais tus tshiab yuav tuaj cawm cov uas hwm nws.

    Zaj Nyeem Ob:   2 TMT 4: 6-8, 17-18

    6 Ntawm kuv, Paj Lug, mas kuv twb raug muab hliv los txi Ntuj lawm,

    ces twb txog lub caij kuv yuav mus lawm.
    7 Kuv tau sib tw khiav txaus, kuv khiav mus txog chaw lawm; kuv tau ceev txoj kev ntseeg cia.
    8 Txij nyem no mus, lub mom teeb kub muaj kev ncaj nyob tos kuv lawm xwb. Huab Tais tus txiav txim ncaj yuav muab ua paj tshab rau kuv thaum txog hnub ntawd, tsis yog muab rau kuv ib leeg xwb,
    nws tseem yuav muab rau tas ib tsoom neeg nyiam nws thiab tos ntsoov lub caij nws yuav los.
    17 Huab Tais yog tus tau pab kuv thiab ntxiv zog rau kuv, kom vim kuv, mas txoj kev tshaj Lo Lus

    thiaj yuav tiav log, ces tas cov neeg teev pej kum dab thiaj tau hnov txog.
    Nws tau npo kuv dim ntawm tsov ntxhuav lub ncauj lo.
    18 Huab Tais yeej yuav npo kuv dim ntawm txhua yam kev phem thiab yuav txuag kuv kom kuv mus
    txog nws lub Ceeb Tsheej nyob saum ntuj. Thov kom Huab Tais nto koob meej mus ib txhiab ib txhis. Ua li.


    As Les Lus Yas:   MT 16: 18

    Txais: As les lus yas, as les lus yas.

    Koj yog Pob Zeb, kuv yuav txhim kuv lub Koom Txoos rau saum lub pob zeb no.
    Dab phem teb cov qhov rooj yuav tiv tsis yeej nws.

    Txais: As les lus yas, as les lus yas.

    Ntawv Moo Zoo:   MT 16: 13-19

    13 Thaum Yes Xus tuaj txog cheeb tsam ntawm Xes Ntxas Les Fis Lis Pos,

    nws nug cov thwj tim tias: "Luag tej hais tias Neeg Leej Tub yog leej twg?"
    14 Lawv teb tias : “Ib txhia hais tias yog Zam Ntxuav Plig, ib txhia hais tias yog Es Lias,
    muaj lwm cov hais tias yog Yes Les Mias los yog ib tug hauv cov yaj saub.”
    15 Yes Xus hais rau lawv tias: "Nej ne, nej hais tias kuv yog leej twg?"
    16 Xis Moos Pob Zeb teb tias: "Koj yog Leej Pleev, yog tus Tswv Ntuj Muaj Txoj Sia Leej Tub."
    17 Yes Xus teb rau Pob Zeb tias: "Xis Moos, Yos Nas tub, koj txoj hmoov zoo, vim tsis yog
    nqaij thiab ntshav qhia koj paub txog qhov no, yog kuv Txiv nyob saum ntuj qhia koj.
    18 Ua li mas kuv hais rau koj: Koj yog Pob Zeb, kuv yuav txhim kuv lub Koom Txoos rau saum
    lub pob zeb no, ces dab phem teb cov qhov rooj yuav tiv tsis yeej nws.
    19 Kuv yuav muab lub Ceeb Tsheej saum ntuj cov yawm sij rau koj tuav.
    Koj khi yam twg nyob ntiaj teb no, yam ntawd kuj yuav raug khi nyob saum ntuj;
    koj daws yam twg nyob ntiaj teb no, yam ntawd kuj yuav raug daws nyob saum ntuj."
     
    *************
     
    Koob Tsheej Hwm ob tug Hauv Paus Xa Lus LN Pob Zeb thiab Paj Lug – Thaj Txi Ntuj hmo ua ntej
    Lectionary: 590
     
    Zaj Nyeem Ib:   HAUJ LWM 3:1-10
     
    1 Pob Zeb thiab Zam nkawd nce mus pem lub Tuam Tsev Teev Ntuj,
    mus ua zaj teev ntuj thaum teev cuaj (3 teev hnub qaij).
    2 Thaum ntawd, luag coj ib tug neeg tuag ceg nruab thiab tuaj. Lawv niaj hnub muab nws tso rau
    ntawm lub qhov rooj mus hauv lub Tuam Tsev Teev Ntuj, hu ua Qhov Rooj Zoo Nkauj,
    kom tus tuag ceg tau kev thov khawv ntawm cov neeg uas chaws mus hauv.
    3 Thaum nws pom Pob Zeb thiab Zam nkawd tab tom yuav chaws mus hauv, ces nws thov khawv ntawm nkawd.
    4 Pob Zeb ntsia ntsoov nws, Zam kuj ntsia ntsoov thiab. Pob Zeb hais tias "Koj ntsia wb."
    5 Tus tuag ceg ntsia ntsoov nkawd, tsis ntsais muag, nws xav tias nws yuav tau ib yam dab tsi.
    6 Tab sis Pob Zeb hais tias: "Nyiaj thiab kub mas kuv tsis muaj. Tab sis qhov kuv muaj,
     mas kuv muab pub rau koj: Kuv tuav txog Yes Xus Pleev, tus neeg Nas Xas Les lub npe, koj mus kev!"
    7 Ces Pob Zeb tuav nkaus tus tuag ceg sab tes xis rub nws sawv.
    Tam sim ntawd, nws ob txhais taw thiab nws ob lub pob qij taws ruaj nrees tuaj.
    8 Nws tib plhaw sawv tsees, ces nws mus mus los los ib ncig ntawd. Nws nrog nkawd chaws mus
    hauv lub Tuam Tsev. Nws rhais ruam mus kev, nws dhia tej paj paws thiab nws cav txog Tswv Ntuj.
    9 Tas tsoom pej xeem pom nws rhais ruam mus kev thiab cav txog Tswv Ntuj.
    10 Sawv daws zeem tau nws : yog tus zaum thov khawv ntawm lub Qhov Rooj Zoo Nkauj tiag.
    Sawv daws ceeb tas thiab ua siab poob nthav txog qhov uas nyuam qhuav tshwm sim tuaj rau tus tuag ceg.
     
    NPN   19: 2-3,4-5
     
    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Cov txheej ntuj saud tshaj txog Tswv Ntuj lub koob meej,
    lub qab ntuj khwb tshaj cov hauj lwm nws txhais tes tsim los.
    Nruab hnub hais lo lus rau nruab hnub mloog,
    Hmo ntuj qhia rau hmo ntuj paub txog.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Tsis muaj ib lo lus los ib zaj lus piav
    uas leej tib neeg yuav tsis hnov txog.
    Lawv lub suab ncha mus puv tas ntiaj teb,
    lawv lo lus xa moo nrov txog tim npoo ntiaj teb kawg.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

     
    Zaj Nyeem Ob:   NLT 1: 11-20
     
    11 Cov kwv tij nkauj muad, kuv xav kom nej paub tias,
    lub Moo Zoo uas kuv xa tuaj rau nej, mas tsis yog tuaj ntawm neeg tuaj.
    12 Vim kuv tsis tau txais lub Moo Zoo ntawd ntawm neeg los thiab tsis ytog neeg qhia rau kuv paub,
    yog Yes Xus Pleev yees tawm los qhia rau kuv paub.
    13 Nej yeej tau hnov tias, thaum kuv tseem coj cov Yus Das kev cai, kuv tau ua dab tsi lawm;
    kuv tau hiam Tswv Ntuj lub Koom Txoos heev kawg nkaus, thiab kuv tau xav rhuav lub Koom Txoos kom ploj mus..
    14 Kuv tau coj txoj kev cai Yus Das mus deb tshaj coob leej nyob hauv kuv phaum neeg hauv kuv haiv neeg,
    vim kuv kub siab tshaj plaws rau kuv cov yawg koob tej kab lis kev cai ib txwm coj los.
    15 Tiam sis Tswv Ntuj, tus uas xaiv kuv thaum kuv tseem nyob hauv
    kuv niam plab lawm thiab tus hu kuv los nyob hauv nws lub txiaj ntsim,
    16 thaum nws ua kom nws Leej Tub tawm los rau kuv pom, kom kuv tshaj txog nws rau cov pej kum neeg,
    17 mas tam sis ntawd, kuv tsis tau mloog raws li neeg nqaij tawv lub tswv yim, kuv tsis tau mus pem Yes Lus Xas Les mus cuag cov xub ua Hauv Paus Xa Lus dua kuv; kuv mus rau As Las Npias teb, ces kuv rov los nyob Das Mas xwb.
    18 Twb peb xyoos tom qab lawm, kuv thiaj mam mus pem Yes Lus Xas Les,
    mus nrog Pob Zeb tham; kuv nrog nws nyob tau kaum tsib hnub.
    19 Tiam sis kuv tsis tau ntsib lwm tus Hauv Paus Xa Lus li, kuv tsuas tau ntsib Yas Kos, uas yog Huab Tais tus kwv tij xwb.
    20 Hais txog qhov kuv sau li no tuaj rau nej, mas kom nej saib tias nyob ntawm Tswv Ntuj xub ntiag, kuv tsis dag.
     
    As Les Lus Yas:   Zam 21: 17
     
    Huab Tais, koj paub tas ib puas tsav yam, koj paub tias kuv nyiam koj tiag.
     
    Ntawv Moo Zoo:   Zam 21: 15-19
     
    Yes Xus tawm tuaj rau nws cov thwj tim pom.
    15 Thaum lawv noj tshais tas, Yes Xus hais rau Xis Moos Pob Zeb tias:
    "Xis Moos, Zam tus tub, koj puas nyiam kuv dua lawv cov ntawd?"
    Pob Zeb hais rau Yes Xus tias: "Huab Tais, koj yeej paub tias kuv nyiam koj."
    Yes Xus hais rau Pob Zeb tias: "Koj coj kuv cov me nyuam yaj mus noj zaub mog."
    16 Yes Xus rov hais zaum ob tias "Xis Moos, Zam tus tub, koj puas nyiam kuv?" Pob Zeb hais rau Yes Xus tias:
    "Huab Tais, koj yeej paub tias kuv nyiam koj." Yes Xus hais rau nws tias: "Koj zov kuv cov yaj mog."
    17 Yes Xus tseem rov hais dua zaum peb rau Pob Zeb tias: "Xis Moos, Zam tus tub, koj puas nyiam kuv tiag?”
    Pob Zeb tu siab rau qhov Yes Xus hais rau nws zaum peb tias: "Koj puas nyiam kuv tiag?"
    Pob Zeb hais rau Yes Xus tias: "Huab Tais, koj paub tas ib puas tsav yam, koj yeej paub tias kuv nyiam koj tiag."
    Yes Xus hais rau Pob Zeb tias : "Koj coj kuv cov yaj mus noj zaub mog.
    18 Kuv hais qhov muaj tseeb tiag rau koj: Thaum koj tseem hluas zog, koj muab koj txoj siv koj sia koj,
    koj xav mus qhov twg los koj mus koj. Tiam sis thaum koj laus lawm, koj yuav tsa tes
    cia lwm tus muab siv rau koj sia, thiab coj koj mus rau qhov chaw uas koj tsis xav mus."
    19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej.
    Yes Xus hais li tas, nws hais rau Pob Zeb tias: "Koj raws kuv mus."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 29th June 2022, 2:33 am

    Tim     30     lub     6     Hli     2022
     
    Hnub Tsib Lis Piam Kaum Peb Nruab Xyoo ABC Nruab Lis Piam Xyoo II
    Lectionary: 380
     
    XHLT:  Thawj cov Ntseeg Tuag Ua Tim Khawv

    Zaj Nyeem Ib:   AM 7: 10-17

    10 As Mas Xias, tus Leej Choj nyob Npes Thes, tso neeg mus hais rau Yes Los Npuag

    tus vaj His Xas Lais tias: "As Mos ntxias tsev neeg His Xas Lais kom lawv ntxeev siab rau koj.
    Lub teb chaws nyiaj tsis taus nws tej lus ntxiv lawm.
    11 Vim As Mos hais zoo li no: ‘Yes Los Npuag yuav raug ntaj tua,
    thiab tsoom His Xas Lais yuav raug xa tawm mus nyob deb ntawm lawv lub teb chaws.’"
    12 Ces As Mas Xias hais rau As Mos tias: "Niag neeg txawj ua saub, koj cia li khiav, koj khiav mus

    nyob Yus Das teb! Koj mus nrhiav noj nrhiav haus nyob nrad, thiab ua Saub nyob nrad.
    13 Koj tsis txhob ua Saub nyob Npes Thes ib zaug ntxiv, vim yog tus vaj qhov chaw ntshiab
    thiab yog tus vaj lub tuam tsev teev Ntuj."
    14 As Mos teb rau As Mas Xias tias: "Kuv ib txwm tsis yog saub, los yog saub ib tug tub.

    Kuv ib txwm yog neeg zov yaj thiab neeg tu cov ntoo xis kas mos xwb.
    15 Tiam sis HUAB TAIS tau tuaj hu kuv ntawm kuv pab yaj, nws hais rau kuv tias:
    ‘Koj mus ua yaj saub hais lus rau kuv haiv His Xas Lais.’
    16 Ces myem no koj yuav tsum mloog HUAB TAIS lo lus.

    Koj hais tias kom kuv txhob ua Yaj Saub cem His Xas Lais,
    kom kuv txhob hais lus rhuav His Xas Has tsev neeg.
    17 Mas zaum no HUAB TAIS hais li no:
    ‘Koj tus poj niam yuav tab meeg mus ua poj ntiav nyob hauv nroog,
    thiab koj cov tub koj cov ntxhais yuav raug ntaj tua;
    koj tej liaj tej teb yuav raug luag muab kos ua tej kab sib faib yuav;
    koj tus kheej yuav mus tuag nyob hauv ib lub teb chaws tsis huv.
    His Xas Lais yuav raug xa tawm mus nyob deb ntawm lawv lub teb chaws.’"

    NPN   19: 8, 9, 10, 11

    Txais: (10cd) Huab Tais cov lus txiav txim yog lus tseeb,
                txhua lo lus nws txiav yog qhov ncaj.

    HUAB TAIS txoj cai zoo tas nrho,
    nws ntxiv siav rau tus ntsuj plig;
    HUAB TAIS tus txhooj tsim nyog yuav,
    nws ua kom tus neeg ruam thoob tsib tuaj.

    Txais: (10cd) Huab Tais cov lus txiav txim yog lus tseeb,
                txhua lo lus nws txiav yog qhov ncaj.

    HUAB TAIS cov lus qhuab qhia yog lus ncaj
    ua kom neeg muaj kev zoo siab.
    HUAB TAIS lo lus qhia meej kawg nkaus,
    ua kom qhov muag pom kev.

    Txais: (10cd) Huab Tais cov lus txiav txim yog lus tseeb,
                txhua lo lus nws txiav yog qhov ncaj.

    Kev hwm HUAB TAIS yog kev dawb huv,
    kev hwm Huab Tais yuav nyob mus li.
    HUAB TAIS cov lus txiav txim yog lus tseeb,
    Txhua lo lus nws txiav yog qhov ncaj.

    Txais: (10cd) Huab Tais cov lus txiav txim yog lus tseeb,
                txhua lo lus nws txiav yog qhov ncaj.

    Nws cov lus txiav txim muaj nqes dua kub,
    Tsim nyog ntshaw dua ib txhab tseem kub,
    qab zib dua ib co kua zib,
    los cov zib mu ntawm daim nas muv.

    Txais: (10cd) Huab Tais cov lus txiav txim yog lus tseeb,
                txhua lo lus nws txiav yog qhov ncaj.

    As Les Lus Yas:   2 KLN 5: 19

    Txais: As les lus yas, as les lus yas.

    Tswv Ntuj ua kom lub ntiaj teb neeg nrog nws rov sib haum xeeb nyob hauv Leej Pleev,
    nws txib peb kom tshaj tawm txog lub moo zoo ntawm txoj kev sib haum xeeb.

    Txais: As les lus yas, as les lus yas.

    Ntawv Moo Zoo:   MT 9: 1-8

    1 Yes Xus nce mus hauv nkoj, nws hla dej rov los txog nws lub nroog.
    2 Thaum ntawd, luag nqa ib tug tuag ceg pw saum ib lub txaj tuaj rau Yes Xus. Yes Xus pom lawv ntseeg,

    nws hais rau tus tuag ceg tias: "Me tub, koj tso siab mog! Koj cov txhaum daws tas lawm."
    3 Thaum ntawd, muaj ob peb tug Kws Ntawv Ntshiab xav twj ywm hauv nruab siab tias:

    ‘Tus neeg ntawd thuam Ntuj.’
    4 Tab sis Yes Xus paub qhov lawv xav, nws hais tias: "Vim li cas nej xav tej yam phem rau nruab siab?
    5 Lo lus twg yog lo hais yooj yim dua, puas yog lo tias: 'Koj cov txhaum

    daws tas lawm,' los yog lo tias 'Koj sawv mus kev.’?
    6 Tiam sis kom nej paub tias Neeg Leej Tub muaj lub hwj huam daws txhaum tau nyob ntiaj teb no,"
    Ces Yes Xus hais rau tus tuag ceg tias: "Koj sawv, nqa koj lub txaj, koj rov mus tsev".
    7 Ces tus tuag ceg sawv, thiab nws rov mus nws lub tsev.
    8 Tsoom sid pom li ntawd, sawv daws qhuas kawg.

    Lawv cav txog Tswv Ntuj vim nws pub lub hwj huam loj npaum li no rau tib neeg.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 30th June 2022, 1:49 am

    Tim     1     lub     7     Hli     2022
     
    Hnub Rau Lis Piam Kaum Peb Nruab Xyoo ABC Nruab Lis Piam Xyoo II
    Lectionary: 381
     
    Zaj Nyeem Ib:   AM 8: 4-6, 9-12

    4 Nej cov uas tsuj ntiag cov txom nyem thiab rhuav cov pluag nyob hauv lub teb chaws, nej mloog qhov no.

    5 Nej hais tias: "Thaum twg hli xiab mam dhau kom peb tau muag peb cov qoob loo? Thaum twg Xas Npas Tos mam dua, kom peb tau muag peb cov nplej mov mog? Peb yuav xuas cov kawm yau tsis txwm tawv los yeem, yuav siv thooj hlau kom hnyav tshaj, yuav kho kom peb rab teev tsis txwm choj thaum peb luj.
    6 Peb yuav muab nyiaj los muas cov neeg pluag, yuav muab ib nkawm khau khiab los muas  
    cov neeg txom nyem. Tab yog cov nplej muaj npluag ntau los peb tseem yuav sau nqe tib si."
    9 HUAB TAIS Tswv Ntuj ceeb toom li no tias:

    Hnub ntawd kuv yuav ua kom lub hnub poob qho thaum tav su,
    yuav ua kom lub ntiaj teb tsaus ntuj nti thaum nruab hnub nrig.
    10 Kuv yuav ua kom nej tej hnub nyoog lom zem hloov ua hnub nyoog tu siab,
    kom nej tej zaj kwv txhiaj hloov ua tej zaj quaj nyiav. Kuv yuav ua kom nej txhua tus npua ntaub tsaj
    thiab kom nej txhua tus taub hau do dus. Kuv yuav ua kom muaj kev quaj kev nyiav loj npaum  li
    thaum muaj ib tug tub twm zeej ploj; ces hnub ntawd lawv yuav kawg rau kev txom nyem loj.”
    11 Huab Tais Tswv Ntuj hais tias: “Yeej yuav muaj ib lub caij uas kuv yuav xa kev tshaib kev nqhis tuaj rau
    lub teb chaws; tsis yog tshaib mov los nqhis dej, tiam sis yog tshaib nqhis kev mloog HUAB TAIS lo lus.
    12 Lawv yuav nquam nkoj txij ib lub hiav txwv mus rau lwm lub, txij pej fab mus rau toob fab,
    lawv yuav mus mus los los nrhiav HUAB TAIS lo lus, tab sis lawv yuav nrhiav tsis tau!

    NPN   119: 2, 10, 20, 30, 40, 131

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Cov tau txoj hmoov zoo yog cov coj HUAB TAIS txoj cai,
    yog cov nrhiav nws tas siab tas ntsws.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Kuv nrhiav koj tas siab tas ntsws,
    Thov koj txhob cia kuv yuam kev mus deb koj cov lus qhia.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Kuv tus plig yuj pluj plaws nqhis txog
    koj cov cai lij choj txhua lub sij hawm.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Kuv tau xaiv txoj kev tseeb taug, tau muab

    koj cov cai lij choj tso nraim rau ntawm kuv xub ntiag.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Koj ntsia saib, kuv ntshaw koj cov lus qhia tiag,
    thov koj muab txoj sia rau kuv vim koj ua ncaj.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    Kuv rua ncauj txog siav huas pa,
    Vim kuv tshaib nqhis koj cov lus qhia.

    Txais: (MT 4:4) Neeg tsis kawg muab mov xwb los yug siav, neeg tseem muab

                txhua lo lus tawm ntawm Tswv Ntuj lub ncauj los yug siav thiab.

    As Les Lus yas:   MT 11: 28

    Txais: As les lus yas, as les lus yas.

    Huab Tais hais tias: "Tas nej sawv daws uas nej khwv thiab
    ris nra hnyav, nej tuaj cuag kuv, kuv yuav cia nej so los siav.

    Txais: As les lus yas, as les lus yas.

    Ntawv Moo Zoo:   MT 9: 9-13

    9 Thaum Yes Xus tab tom taug kev mus hla ntawd, nws pom ib tug neeg hu ua Mas Tais zaum ntawm lub

    rooj sau se. Yes Xus hais rau nws tias: "Koj raws kuv mus!" Ces tus neeg ntawd sawv tsees raws Yes Xus mus.
    10 Thaum Yes Xus zaum noj mov hauv nws tsev, muaj ib co neeg sau se thiab ib co neeg txhaum coob
    tuaj nrog Yes Xus thiab nws cov thwj tim noj mov.
    11 Cov Fas Lis Xais pom li ntawd, lawv hais rau cov thwj tim tias:
    "Vim li cas nej tus Xib Hwb nrog cov sau se thiab cov neeg txhaum noj mov?"
    12 Yes Xus hnov qhov lawv hais, nws teb tias: "Tsis yog cov neeg noj qab nyob zoo
    thiaj vam txog kws kho mob, tsuas yog cov neeg muaj mob thiaj vam txog xwb.
    13 Nej yuav kawm lo lus no lub ntsiab cia: 'Qhov kuv xav tau yog txoj kev khuv leej,
    tsis yog thaj txi Ntuj.' Kuv tsis yog tuaj hu cov neeg ncaj, kuv tuaj hu cov neeg txhaum."   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 1st July 2022, 2:17 am

    Tim     2     lub     7     Hli     2022
     
    Hnub Xya Lis Piam Kaum Peb Nruab Xyoo ABC Nruab Lis Piam Xyoo II
    Lectionary: 382
     
    Zaj Nyeem Ib:   AM 9: 11-15

    Huab Tais hais tias:
    11 “Hnub ntawd kuv yuav rov tsa Das Vis lub khaub tsev, kuv yuav rov kho nws tej phab ntsa ntuag,

    kuv yuav rov tsa nws tej vaj tse uas vau tas; kuv yuav rov txhim kom rov zoo li yav thaud dua.
    12 Ces lawv yuav tau txais cov seem nyob hauv Es Dos thiab cov kuj cuab uas ris kuv lub npe
    los ua lawv tug. Kuv HUAB TAIS hais cov lus no, kuv yuav ua raws li ntawd.”
    13 HUAB TAIS hais tias: “Yuav muaj ib lub caij tom ntej, uas tus laij teb yuav mus caum tau

    tus sau qoob qab, tus tsuj txiv cawv yuav caum tau tus tseb noob qab. Cov cawv qab
    yuav txhawv pem tej hauv roob los thiab yuav ntws lug nyob saum tej pov roob.
    14 Kuv yuav rov tsa kuv haiv His Xas Lais kom vam meej; lawv yuav rov txhim tsa lawv cov tsheej
    uas vau tas, lawv yuav rov los nyob hauv cov tsheej ntawd; lawv yuav cog tej vaj txiv cawv
    thiab yuav tau cawv haus; lawv yuav cog vaj txiv ntoo, thiab yuav tau txiv noj.
    15 Kuv yuav cog kuv haiv neeg rau hauv lawv thaj av, ces tsis muaj leej twg yuav tuaj rho tau lawv
    tawm ntawm thaj av kuv tau muab rau lawv ntxiv.” HUAB TAIS, koj tus Tswv Ntuj hais li ntawd.

    NPN   85: 9ab+10, 11-12, 13-14

    Txais: (9b) Huab Tais hais txog kev thaj yeeb rau nws haiv neeg.

    Kuv yuav hnov qhov Tswv Ntuj tshaj tawm:
    HUAB TAIS nws tshaj kev thaj yeeb rau nws haiv neeg.
    Nws txoj kev cawm los txog ze ze cov hwm nws lawm,
    nws lub hwj chim tsa nyob hauv peb lub teb chaws.

    Txais: (9b) Huab Tais hais txog kev thaj yeeb rau nws haiv neeg.

    Kev ua siab zoo thiab kev tseeb yuav los sib ntsib,
    Kev ncaj ncees thiab kev thaj yeeb yuav los sib qawg.
    Kev tseeb yuav txhawv tawm hauv ntiaj teb los,
    kev ncaj ncees yuav dauv muag ntsia saum ntuj tuaj.

    Txais: (9b) Huab Tais hais txog kev thaj yeeb rau nws haiv neeg.

    HUAB TAIS yuav pub kev vam meej,
    hos peb cov av yuav ntsu qoob ntsu loo,
    Kev ncaj ncees yuav mus ua Huab Tais ntej,
    kev cawm yuav taug raws txoj kev muaj nws cov hneev taw.

    Txais: (9b) Huab Tais hais txog kev thaj yeeb rau nws haiv neeg.

    As Les Lus Yas:   ZAM 10: 27

    Txais: As les lus yas, as les lus yas.

    Huab Tais hais tias: Kuv cov yaj mloog kuv lub suab,
    Kuv paub kuv cov yaj, kuv cov yaj caum kuv qab mus.

    Txais: As les lus yas, as les lus yas.

    Ntawv Moo Zoo:   MT 9: 14-17

    14 Zam cov thwj tim tuaj cuag Yes Xus, lawv hais tias: "Peb yoo mov, cov Fas Lis Xais kuj yoo, vim li cas koj cov thwj tim tsis yoo?"

    15 Yes Xus teb tias: “Cov qhua tuaj noj tshoob puas yuav tu siab thaum nraug vauv tseem nrog
    lawv nyob? Muaj ib hnub, thaum luag coj nraug vauv mus lawm, mas lawv mam li yuav yoo mov.
    16 Tsis muaj leej twg ntxiv ib daim ntaub tshiab rau ib lub qub tsho, vim daim ntaub ntxiv

    ntawd yuav caws rub lub qub tsho, ces haj yam ntuag loj.
    17 Luag kuj tsis muab cov cawv tshiab ntim rau hauv cov hnab tawv qub; vim cov hnab tawv qub yuav tawg, ces cawv yuav txeej tas, cov hnab kuj yuav puas tas. Luag thiaj muab cawv tshiab ntim rau hauv cov hnab tshiab, ces cov hnab thiab cov cawv thiaj yuav tsis nkim pov tseg tas.”   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 3rd July 2022, 2:09 am

    Tim     4     lub     7     Hli     2022
     
    Hnub Ob Lis Piam Kaum Plaub Nruab Xyoo ABC Nruab Lis Piam Xyoo II
    Lectionary: 383
     
    Yog Hnub USA tau kev Twj Lij (Independence Day)

    Zaj Nyeem Ib:   OS XES 2: 16, 17c-18, 21-22

    Huab Tais hais tias:
    16 "Kuv yuav ntxias kom tau nws, kuv yuav coj nws mus

    hauv teb chaws suab puam, kuv yuav hais lus mos lus muag rau nws.
    17c Nyob ntawd, nws yuav teb kuv zoo li thaum nws kom tseem hluas,
    zoo li thaum lub caij nws tawm hauv Hais Nkws Tos teb los."
    18 Hnub ntawd, koj yuav hu kuv tias: 'Kuv tus txiv,' HUAB TAIS hais li ntawd,

    “Koj yuav tsis hu kuv ntxiv tias: 'Kuv tus Npas Has’ lawm.
    21 Kuv yuav qaws koj ua txij nkawm mus tas ib txhiab ib txhis. Kuv yuav qaws koj ua txij nkawm

    nyob hauv txoj kev ncaj thiab txoj cai, nyob hauv txoj kev sib nyiam sib hlub thiab txoj kev khuv leej.
    22 Kuv yuav qhqaws koj ua txij nkawm nyob hauv txoj kev ua siab ncaj, ces koj yuav paub HUAB TAIS."

    NPN   145: 2-3, 4-5, 6-7, 8-9

    Txais: (8a) HUAB TAIS muaj kev hlub thiab khuv leej neeg.

    Kuv yuav niaj hnub cav txog koj lub koob meej,
    kuv yuav cav lus zoo txog koj lub npe mus li ib txhiab ib txhis.
    HUAB TAIS loj tas nrho, tsim nyog cav txog nws ;
    nws loj tas nrho, neeg ntsuas tsis tau.

    Txais: (8a) HUAB TAIS yog kev hlub thiab khuv leej neeg.

    Sawv daws yuav qhuas txog koj tej hauj lwm txheej dhau txheej,
    Lawv yuav tshaj koj lub hwj huaj hwj xyeej.
    Lawv yuav piav txog koj lub hwj huam hwj chim loj ci ntsa iab,
    thiab yuav hais txog koj cov dej num tsim nyog qhuas.

    Txais: (8a) HUAB TAIS muaj kev hlub thiab khuv leej neeg.

    Neeg yuav hais txog koj lub hwj huam txaus ntshai,
    lawv yuav tshaj koj lub hwj huam loj kawg nkaus.
    Neeg yuav cav txog koj lub siab zoo siab dav tas nrho,
    thiab yuav qw ntsuag qees cav txog koj lub siab ncaj.

    Txais: (8a) HUAB TAIS muaj kev hlub thiab khuv leej neeg.

    HUAB TAIS muaj lub siab hlub thiab khuv leej neeg,
    Nws npau taws qeeb, nws lub siab hlub neeg tas nrho.
    HUAB TAIS ua siab zoo rau txhua leej txhua tus,
    nws lub siab khuv leej tas puas tsav yam nws tau tsim.

    Txais: (8a) HUAB TAIS muaj kev hlub thiab khuv leej neeg.

    As Les Lus Yas:   2 TM 1: 10

    Txais: As les lus yas, as les lus yas.

    Peb tus Huab Tais Yes Xus Pleev tau rhuav txoj kev tuag lawm,
    thiab nws lub Moo Zoo ua kom txoj sia ci tawm tuaj.

    Txais: As les lus yas, as les lus yas.

    Ntawv Moo Zoo:   MT 9: 18-26

    18 Yes Xus tseem tab tom hais lus rau lawv, muaj ib tug nom tuaj, nws txhos caug ntua ntawm

    Yes Xus xub ntiag, nws thov tias: "Kuv tus ntxhais txoj sia nyuam qhuav tu nrho.
    Thov koj tuaj tsa tes rau saum nws, ces nws yuav rov muaj txoj sia."
    19 Yes Xus sawv tsees, nws lawv tus nom qab mus, nws cov thwj tim kuj mus thiab.
    20 Muaj ib tug poj niam tsob ntshav tau kaum ob xyoos lawm,
    nws txav los ze ntawm Yes Xus nraub qaum, nws kov Yes Xus lub tw tsho.
    21 Vim nws xav hauv siab tias: ‘Tsuav yog kuv kov tau nws lub tsho xwb, mas kuv yuav dim.’
    22 Yes Xus tig loo ntsia, nws pom tus poj niam, ces nws hais rau tus poj niam tias: "Tus ntxhais, koj tso siab,
    koj lub siab ntseeg cawm koj lawm." Tus poj niam cia li dim plaws ntawm tus mob txij thaum ntawd los.
    23 Thaum Yes Xus tuaj txog tus nom lub tsev, nws pom cov txiv tshuab raj

    thiab pom neeg coob coob ua ntxhov hnyo.
    24 Yes Xus hais tias: "Nej tawm mus. Tus me ntxhais tsis tuag,
    nws tsaug zog xwb." Sawv daws luag Yes Xus zom zaws.
    25 Thaum cov neeg tawm nraum zoov tas, Yes Xus chaws mus hauv,
    nws tuav tus ntxhais txhais tes, ces tus ntxhais sawv los.
    26 Lub moo ntawd thiaj nrov mus thoob lub teb chaws ntawd.   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim 4th July 2022, 1:58 am

    Tim     5     lub     7     Hli     2022
     
    Hnub Peb Lis Piam Kaum Plaub Nruab Xyoo ABC Nruab Lis Piam Xyoo II
    Lectionary: 384

    XHLT:  LN Anthony Mary Zaccaria, ua Leej Choj;

                LN Elizabeth nyob Portugal

    Zaj NYeem Ib:   OS XES 8: 4-7, 11-13

    Huab Tais hais li no tias:
    4 “Lawv tau tsa vaj kav His Xas Lais, tab sis kuv tsis tau tso cai; lawv tau tsa lawv cov tswj,

    tab sis kuv tsis tau pom zoo. Lawv muab lawv tej nyiaj tej kub los nchuav ua mlom rau lawv teev;
    yog lawv rov ua kom lawv raug kev puas tsuaj puas ntsoog.
    5 Xas Mas Lias, koj tus mlom nyuj yuav raug mjab cuam pov tseg! Kuv lub siab npau taws
    heev rau lawv; yuav hov ntev lawv thiaj mam ua tau neeg dawb huv?
    6 Vim nws tawm hauv His Xais Lais tuaj; muaj tus kws puab tawm los xwb, tsis yog
    ib tug tswv ntuj; tus mlom nyuj Xas Mas Lias yuav tsum tawg ua hmoov tas xwb.
    7 Vim lawv tseb cua, ces lawv yuav sau cua daj cua dub. Lawv cov nplej yuav tsis txhawv hnab nplej,

    ces yuav tsis qoos tsis muaj hmoov nplej; yog qoos taus, ces cov pej kum neeg yuav tuaj noj tas.
    11 Cov Es Fais tau tsa ntau lub thaj txi Ntuj los them txim txhaum,

    tab sis lawv tsuas siv cov thaj ntawd los ua txhaum xwb.
    12 Kuv txawm sau ntau txhiab lo lus qhia rau lawv coj, los lawv tsuas saib yog ib co lus txawv txawv xwb.
    13 Lawv nyiam tua tsiaj txi Ntuj, lawv hlawv tsiaj txi ntuj thiab noj tej nqaij, tab sis HUAB TAIS
    tsis txaus siab rau tej ntawd. Nyem no, HUAB TAIS yuav nco txog lawv cov txhaum,
    nws yuav rau txim rau lawv; ces lawv yuav rov qab mus nyob Hais Nkws Tos teb dua.

    NPN   115: 3-4, 5-6, 7ab-8, 9-10

    Txais: (9a) His Xas Lais tsev neeg tso siab rau Huab tais.

    Peb tus Tswv Ntuj nyob txheej ntuj saud ;
    Nws xav ua dab tsi, nws ua tau tas.
    Lawv cov dab yog mlom nyiaj mlom kub,
    Yog neeg ob txhais tes puab tawm los xwb.

    Txais: (9a) His Xas Lais tsev neeg tso siab rau Huab tais..

    Lawv muaj qhov ncauj, tab sis tsis txawj hais lus ;
    Lawv muaj qhov muag, tab sis tsis pom kev.
    Lawv muaj pob ntseg, tab sis lawv tsis hnov lus ;
    Lawv muaj qhov ntswg, tab sis tsis hnov ntxhiab ;

    Txais: (9a) His Xas Lais tsev neeg tso siab rau Huab tais.

    Lawv muaj ob txhais tes, tab sis tsis txawj kov dab tsi ;
    Lawv muaj ob txhais taw, tab sis tsis txawj mus kev ;
    Cov neeg puab lawv yuav zoo ib yam li lawv,
    Cov tso siab rau lawv kuj yuav zoo ib yam li lawv.

    Txais: (9a) His Xas Lais tsev neeg tso siab rau Huab tais.

    His Xas Lais tsev neeg, nej tso siab rau Huab Tais mas,
    Nws yog tus tuaj pab peb tus tuaj thaiv peb.
    As loos tsev neeg, nej tso siab rau Huab Tais,
    Nws yog tus tuaj pab peb tus tuaj thaiv peb.

    Txais: (9a) His Xas Lais tsev neeg tso siab rau Huab tais.

    As Les Lus Yas:   Zam 10: 14a

    Txais: As les lus yas, as les lus yas.

    Huab Tais hais tias: Kuv yog tus zoo tswv zov yaj;
    kuv paub kuv cov yaj, kuv cov yaj paub kuv.

    Txais: As les lus yas, as les lus yas.

    Ntawv Moo Zoo:   MT 9: 32-38

    32 Thaum lawv tab tom tawm mus, luag coj ib tug neeg tsis txawj hais lus

    tuaj cuag Yes Xus, vim nws raug ib tug dab phem.
    33 Yes Xus ntiab tus dab tawm, ces tus neeg cia li txawj hais lus tuaj. Tas tsoom sid qhuas kawg,
    lawv hais tias: "Tsis tau pom dua tej yam zoo li ntawd nyob hauv haiv His Xas Lais ib zaug li."
    34 Tab sis cov Fas Lis Xais hais tias: "Nws hu tus Tuam Thawj dab tuaj ntiab dab."
    35 Yes Xus mus ncig txhua cov nroog thiab cov zos huv si, nws qhia sawv daws nyob hauv

    cov tsev txoos, nws tshaj lub Moo Zoo txog lub Ceeb Tsheej, thiab nws tseem
    kho sawv daws tej txiab xeeb thiab tej mob nkeeg zoo tas huv si.
    36 Yes Xus pom tej pab neeg coob coob, nws hlub lawv, vim sawv daws ntsib kev nyuaj
    thiab tsis muaj tus pab, lawv zoo li ib co yaj tsis muaj tswv zov.
    37 Yes Xus thiaj hais rau nws cov thwj tim tias: "Qoob loo ntau kawg, tab sis cov tub zog tsawg.
    38 Nej thov tus Tswv qoob kom nws xa ib co tub zog tuaj sau nws cov qoob."   
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim Yesterday at 2:30 am

    Tim     6     lub     7     Hli     2022
     
    Hnub plaub Lis Piam Kaum Plaub Nruab Xyoo ABC Nruab Lis Piam Xyoo II
    Lectionary: 385
     
    XHLT:   LN Maria Goretti, Nkauj Tsim Txiaj tuag ua Tim Khawv
     
    Zaj Nyeem Ib:   OS XES 10:  1-3, 7-8, 12

    1 His Xas Lais yog ib tsob hmab txiv cawv zoo ntsuab xiab, txi txiv ncw hna. Nws yim txi txiv ntau, nws yim txhim thaj txi dab ntau tuaj. nws lub teb chaws yim nplua nuj tuaj, nws yim tsa ncej teev dab ntau ntxiv.

    2 Lawv lub siab tsis ncaj, li ntawd mas nyem no lawv yuav raug txim vim lawv qhov txhaum.
    Huab Tais yuav muab lawv tej thaj txi dab tsoo pov tseg, yuav rhuav lawv tej ncej teev dab.
    3 Ces lawv yuav hais tias: "Peb tsis muaj vaj ntxwv, vim peb tsis tau hwm HUAB TAIS;
    tiam sis txawm muaj vaj los, nws yuav ua tau dab tsi pab peb?"
    7 Xas Mas Lias tus vaj ces nyob ntsiag to, nws yuav ploj mus xws cov npuas ntab saum nplaim dej.

    8 Cov chaw siab saum As Vees, His Xas Lais chaw ua txhaum, yuav raug muab rhuav pov tseg.
    Pos thiab nrhab yuav hlob tuaj laum lawv cov thaj txi dab. Ces lawv yuav hais rau cov hauv roob tias:
    “Nej vau los vov peb mas!" thiab hais rau cov hauv toj tias: "Nej vau los tsuam peb mas!"
    12 Nej kav tsij tseb cov noob muaj kev ncaj ncees rau nej, thiab kav tsij sau cov qoob

    muaj kev nyiam kev hlub mas; nej cia li mus ncaws nej cov qub liaj qub teb,  vim txog caij
    nej nrhiav HUAB TAIS lawm, mus txog hnub nws los ywg txoj kev ncaj rau saum nej.

    NPN   105:  2-3, 4-5, 6-7

    Txais: (4b) Nej yuav nrhiav Huab Tais lub ntsej muag mus li.

    Nej hu nkauj rau nws, nej ntaus suab paj nruag cav txog nws,
    nej tshaj tawm txog tej yam loj nws tau ua.
    Nej txais hwj chim nyob hauv nws lub npe;
    nej cia li zoo siab, nej cov uas muaj lub siab nrhiav HUAB TAIS!

    Txais: (4b) Nej yuav nrhiav Huab Tais lub ntsej muag mus li.

    Nej vam ntsoov Huab Tais nyob hauv nws lub zog,
    nej nrhiav kom tau tsob hwb nws mus li.
    Nej nco ntsoov txog cov hwj huam txaus qhuas nws tau ua,
    nws cov hauj lwm loj, thiab cov lus txiav txim nws lub ncauj tau hais.

    Txais: (4b) Nej yuav nrhiav Huab Tais lub ntsej muag mus li.

    Has Nplas Has tsoom xeeb ntxwv, nej yog nws cov tub txib,
    Yas Kos cov tub, nej yog nws pab neeg nws tau xaiv!
    Huab Tais nws yog peb tus Tswv Ntuj;
    tas ntiaj teb coj raws li nws txiav.

    Txais: (4b) Nej yuav nrhiav Huab Tais lub ntsej muag mus li.

    As Les Lus Yas:   MK 1:  15

    Txais: As les lus yas, as les lus yas.

    Tswv Ntuj lub Ceeb Tsheej nyob ze ze lawm:
    Nej cia li thov txhaum thiab ntseeg lub Moo Zoo.

    Txais: As les lus yas, as les lus yas.

    Ntawv Moo Zoo:   MT 10:  1-7

    1 Yes Xus hu nws kaum ob leeg thwj tim los ntawm nws, nws muab lub hwj huam ntiab tau cov dab

    tsis huv tawm thiab kho tau txhua yam kev mob nkeeg kev txiab xeeb kom zoo hlo rau lawv.
    2 Kaum ob leeg Hauv Paus Xa Lus muaj npe li no:
    3 Tus ib, Xis Moos uas tseem hu ua Pob Zeb, ces As Nres, Xis Moos tus kwv, Yas Kos,
    Ntxes Npes Dais tub, Zam, Yas Kos tus kwv, Fis Lis Pos thiab Npas Tos Los Mas Yos,
    Tos Mas thiab Mas Tais, tus sau se, Yas Kos, uas yog As Fas Yos tub, thiab Thas Dais Yos,
    4 Xis Moos tus Siab Kub, thiab Yus Das Kas Lis Yaus tus muab Yes Xus muag rau luag.
    5 Yes Xus xa kaum ob leeg no mus tshaj lub Moo Zoo, nws qhia lawv tias:
    "Nej tsis txhob mus rau cov neeg teev dab, txhob mus rau ib lub nroog Xas Mas Lias li.

    6 Nej mus rau hauv cov yaj ploj hauv haiv His Xas Lais tso.
    7 Thaum nej taug kev, nej ceeb toom tias: ‘Lub Ceeb Tsheej saum ntuj tuaj txog ze lawm.’”  
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3413
    Date d'inscription : 2009-10-16

    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Mim Today at 12:38 am

    Tim     7     lub     7     Hli     2022
     
    Hnub Tsib Lis Piam Kaum Plaub Nruab Xyoo ABC Nruab Lis Piam Xyoo II
    Lectionary: 386
     
    Zaj Nyeem Ib:   OS XES 11: 1-4, 8e-9

    Huab Tais hais tias:
    1 Thaum His Xas Lais tseem yau, kuv nyiam nws,

    kuv tau hu kuv tus tub kom tawm Hais Nkws Tos teb los.
    2 Tab sis kuv yim hu lawv mas lawv yim txav mus deb kuv;

    lawv txi cov dab Npas Has, thiab lawv hlawv xyab rau cov mlom dab.
    3 Kuv twb yog tus uas tau hwj Es Fais xyaum mus kev, tus tau puag lawv

    rau kuv txhais npab; tiam sis lawv tsis paub tias kuv yog tus saib xyuas lawv.
    4 Kuv xuas ib co hlua tib neeg rub lawv los, yog ib co hlua muaj kev hlub; rau lawv kuv zoo li tus neeg

    uas nqa hlo nws tus me nyuam los npuab nws sab plhu; kuv khoov mus pub mov rau lawv noj.
    8e Kuv lub siab lub plawv ntxeev tas, kuv txoj kev hlub ua rau kuv thim xav.
    9 Kuv yuav tsis ua raws kuv lub siab npau taws ceev, kuv yuav tsis rov rhuav Es Fais dua ntxiv;

    vim kuv yog Tswv Ntuj, kuv tsis yog tib neeg; kuv yog tus Ntshiab
    nyob nruab nrab hauv nej; kuv yuav tsis ua kub ua ntxhov rau nej.

    NPN   80: 2ac+3b, 15-16

    Txais: (4b) Huab Tais, cia peb pom koj lub ntsej muag ces peb yuav tau txais kev cawm.

    His Xas Lais tus tswv zov yaj aw, thov cuab pob ntseg mloog.
    Koj zaum saum theej kiab saum cov tshiab kes lus npis, thov koj ci ntsa tuaj.
    Koj tsa koj lub hwj huam kom tsim dheev.

    Txais: (4b) Huab Tais, cia peb pom koj lub ntsej muag ces peb yuav tau txais kev cawm.

    HUAB TAIS kav ib tsoom tshiab,
    thov koj dauv muag saum ntuj los saib dua, ces koj yuav pom.
    Thov koj los tu tsob txiv cawv no,
    thov koj txuag yam uas koj txhais tes xis tau cog,
    yog tib neeg tus tub uas koj tau ua kom muaj zog.

    Txais: (4b) Huab Tais, cia peb pom koj lub ntsej muag ces peb yuav tau txais kev cawm.

    As Les Lus Yas:   MK 1: 15

    Txais: As les lus yas, as les lus yas.

    Tswv Ntuj lub Ceeb Tsheej nyob ze ze lawm,
    Nej cia li lees txhaum thiab ntseeg lub Moo Zoo.

    Txais: As les lus yas, as les lus yas.

    Ntawv Moo Zoo:   MT 10: 7-15

    Yes Xus hais rau nws cov thwj tim tias:
    7 “Thaum nej taug kev, nej ceeb toom tias: ‘Lub Ceeb Tsheej saum ntuj tuaj txog ze lawm.’
    8 Nej kho cov muaj mob kom zoo, nej tsa cov tuag kom ciaj rov los, nej kho cov mob ruas kom huv tuaj,

    nej ntiab cov dab phem kom khiav tawm. Nej tau txais dawb los, nej yuav muab pub dawb.
    9 Nej txhob muab kub, muab nyiaj, los xim nyiaj qhwv rau hauv duav siv;
    10 txhob ris hnab taug kev, txhob nqa ob lub tsho, txhob nqa khau los nrig pas;

    tus tub zog yeej tsim nyog txais nws pluas mov los noj.
    11 Nej mus hauv lub nroog los lub zos twg, nej nug kom tau ib tug neeg tsim nyog,

    nej nyob hauv nws tsev mus txog hnub nej rov qab.
    12 Thaum nej chaws mus hauv ib lub tsev, nej foom key kaj lug rau lub tsev ntawd.
    13 Yog lub tsev ntawd tsim nyog txais, mas nej txoj key kaj lug yuav nqes los nyob hauv lawv.

    Yog lub tsev ntawd tsis tsim nyog txais, ces nej txoj key kaj lug yuav rov los roos nej.
    14 Yog leej twg tsis txais nej, thiab tsis mloog nej cov lus, nej cia li tawm hauv lub tsev

    los lub nroog ntawd mus. Nej yuav nchos cov plua av lo nej ko taw pov tseg.
    15 Kuv hais tseeb rau nej: Thaum txog Hnub Txiav Txim, teb chaws Xos Dos Mas

    thiab Nkos Mos Las yuav raug txim hnyav tsis cuag li lub nroog ntawd.”   

    Sponsored content


    COV ZAJ NYEEM NRUAB LIS PIAM XYOO II 2021-2022 - Page 8 Empty Re: COV ZAJ NYEEM NRUAB LIS PIAM XYOO II 2021-2022

    Post  Sponsored content


      Current date/time is 6th July 2022, 7:41 pm