1. Pab neeg ntseeg txog Yes Xus lub npe, nyob hauv lub Koom Txoos Ka Tau Liv. Lawv muaj kev tso siab rau Ntuj cov Tshiab vam txog Mab Liab, uas yog Yes Xus Niam thiab tsoom Leej Ntshiab.
Pab lawv cev thiab coj neeg cov lus thov kom mus txog rau Nws Leej Tub Yes Xus thiab Tswv Ntuj. Vim Mab Liab yog tus muaj txiaj ntsim loj, tuaj yeem mloog Tswv Ntuj lus.
Mab Liab paub txog neeg tej nruab siab kev vam khom. Thiab paub txog Tswv Ntuj kev nyiam kev hlub kev zam. Mab Liab zoo li tus choj tuam ntawm Tswv Ntuj nqes los rau ntawm neeg.
Niam Mab Liab nws paub cev neeg tej kev vam khom mus dhos rau Ntuj cov txiaj ntsim tuaj ntawm Nws Leej Tub Yes Xus kev pab rau neeg tej teeb meem muaj tuaj rau neeg.
Vim Mab Liab yug los Dawb Huv, tsis lo Keeb Txhaum thiab Nws muaj lub hwj chim loj dua tus Poj Es Vas qub uas Tswv Ntuj tau xub tsim los. Nws yog tus tuaj yeem mloog Tswv Ntuj lus, tso cai rau Tswv Ntuj npaj txhua yam raws li Tswv Ntuj lub siab nyiam.
Mab Liab yog lub Rooj Ntug qheb rau Tswv Ntuj Leej Tub nqes los yuav lub cev neeg. Thiab yog tus Ntaiv Ntuj tuam rau neeg ntiaj teb nce mus lawm saum Ntuj.
Mab Liab yog tus paub txog neeg kev nplua nuj, muaj txiaj ntsim koob hmoov los ntawm kev sib nyiam sib hlub raws li Nws Leej Tub Yes Xus tau tshaj qhia tawm los.
Vim neeg lub lub siab kub tab sis neeg lub cev tsis muaj zog. Neeg thiaj nyiam pw tsaug zog nyob hauv kev ua txhaum. Xws li tus neeg qaug yeeb los qaug tshuaj ua neeg tsis paub tab kom tsim meej rov los. Mab Liab zoo li rab ntxuam ntxuaj cua kom nthuav mus rau ob sab kom txhob muaj ib sab txias thiab ib sab kub kom neeg yoog tau Tswv Ntuj siab thiab Ntuj yoog tau neeg tus pa txom nyem. Mab Liab Nws paub vim Nws yog thawj tug xub tau mloog Tswv Ntuj lus txib. Kom Ntuj tau tsim dua lub Sim Ceeb no rov tshiab dua tuaj ib zaug ntxiv. Kom lub ntiaj teb neeg tau paub txog txoj kev tiv thaiv tau cov dab muaj toj taug txoj kev haub ntxias neeg haus cov tshuaj lom neeg tus ntsuj plig kom tsaug zog mus txij hnub neeg yug los los mus txog hnub ncaim ntawm lub ntiaj teb no mus. Kom neeg tsis muaj feem mus ntsib tau Tswv Ntuj uas yog tus tau tsim neeg lub cev thiab neeg cov ntsuj plig tuaj nyob rau hauv lub Sim ceeb no.
2. Ntuj cov Tshiab thiab tsoom Leej Ntshiab nyob saum Ntuj thiab neeg ntseeg txog Yes Xus lub npe nyob hauv lub Koom Txoos Ka Tau Liv. Yog cov neeg ntseeg chaw khaub zig txog Ntuj cov Tshiab thiab tsoom Leej Ntshiab kom lawv muaj zog nyob ze Tswv Ntuj. Ntuj cov Tshiab thiab tsoom Leej Ntshiab yog cov pov hwm neeg thiab pab cov neeg ntseeg kom neeg dawb huv thiab txawj hwm Ntuj hwm neeg raws li kev ua neeg ncaj ncees. Uas sawv daws yog Ntuj ib tsoom tub ki nyob ua ke.
Cov peb hu lawv ua Leej Ntshiab no yog tus neeg thaum lawv ua neej nyob ntiaj teb, lawv yog neeg siab dawb siab huv; lawv tsis kam hla Tswv Ntuj lus, lawv nyiam ua neeg ntshiab huv tsis muab lub cev mus zwm rau kev txhaum kom tau pw tsaug zog nrog kev ua txhaum. Lawv tau vam txog Niam Mab Liab cov txiaj ntsim coj lawv lub neej hloov los mloog Ntuj lus.
Mab Liab niaj hnub coj mus qhia rau Nws Leej Tub Yes Xus kom pab tau lawv hloov siab los nyiam Ntuj. Txhob swb rau kev txhaum, tig los lees ua kev zoo kom hawm rau Nws Leej Tub Yes Xus kev nyiam kom lawv muaj txoj kev txawj khuv leej luag tej tuaj ntawm Yes Xus tuaj. Thiab Nws pab lawv ntau ntau zaus kom lawv tau yeej cov dab muaj toj taug tuaj ntxias lawv. Ces lawv thiaj tau lub npe hu ua Leej Ntshiab no, peb cov neeg tseem nyob ntiaj teb no, peb vam txog lawv tej koob hmoov tuaj pov hwm peb kom peb yoog thiab ua tau raws li lawv tus piv txwv kom peb txhob tau ncaim mus nyob rau dab phem teb.
3. Cov neeg ntseeg nyob hauv lub Koom Txoos Ka Tau Liv, peb tsis teev Mab Liab thiab Ntuj cov Tshiab xws li teev Tswv Ntuj thiab teev Yes Xus Pleev.
Cov neeg ntseeg lawv muaj kev tso siab thiab vam txog Mab Liab tus muaj txiaj ntsim loj. Lawv thov kom Mab Liab pab cev lawv tej lus thov thiab xa mus kom txog rau Nws leej Tub Yes Xus thiab Tswv Ntuj.
Zoo li Tsoom Hmoob lawv vam txog cov txiv neeb ua neeb saib thiab kho cov neeg raug dab. Yog peb tsis txawj hais lus thiab tsis paub cais peb cov lus kom meej.
Mas peb kuj yuav hais tau tias Hmoob teev cov txiv neeb uas niaj hnub mus ua neeb saib thiab kho Hmoob. Tsoom Hmoob tsuas vam txog cov txiv neeb, pab lawv cev ncauj cev lus. Zoo li cov kws lij choj hais paub mus cev ncauj cev lus. Zoo li cov neeg kawm tiav kev hais plaub ntug lawd.
Nyob hauv kev ntseeg thiab kev coj dab qhuas muaj txhua fab lus hais los mus sib raws li no. Sab hais los rau neeg lub cev kev txhaum rau neej yog cov kws hais plaub, yog cov hu ua lawyer los avocat lawv muaj cai mus txheem plaub ntug. Sab ua rau cov plaub ntug ntawm tus Ntsuj Plig, cov neeg ntseeg hu ua kev mus daws txhaum, los mus vam txog Niam Mab Liab, los Ntuj cov Tshiab thiab tsoom Leej Ntshiab lawv kuj yog cov muaj cai pab tiv thaiv dab kev haub ntxias.
Sab Ntuj Plig muaj mob nkeeg, raws Hmoob kev cai kom txhob tau mus zwm rau kev tuag. Yog cov txiv neeb txiv yaig lawv muaj cai mus tiv thaiv sab ntsuj plig yuav ntxee tig mus rau dab teb thiab.
4. Yog cov neeg tsis paub tab thiaj muaj qee leej neeg nyob hauv cov ntseeg txog Yes Xus lub npe los cov teev dab qhuas.
Lawv thiaj hais tias cov Ka Tau Liv mas lawv teev Ntuj teev Mab Liab los teev Ntuj cov Tshiab thiab teev cov Leej Ntshiab ib yam li teev Ntuj. Tab xawm muaj neeg hais tau li no los nws tsis yog yam tseeb. nws tsuas yog tej yam me me uas neeg muaj lub tswv yim me me thiab neeg paub tsis tau txog xwb.
Txhob muab ntaus nqe mus ua yam tseem ceeb tsam yus ua neeg yuam kev. Cia nws nyob raws li koj tsis paub mas zoo dua.
Sacramento tim 11/7/2019.
Yaj Zoov Ntxheb X.H.