Txoj kev kawm ua Txiv Plig

**Maiv Tooj** 8th August 2011, 12:30 pm

Maiv Tooj: Tswv Cuab Hmong Catholique; Messages : 5527
Date d'inscription : 2009-08-18

Post n°1

Txoj kev kawm ua Txiv Plig

Post Maiv Tooj 8th August 2011, 12:30 pm

TXOJ KEV KAWM UA TXIV PLIG.
Tus sau : Leej Tij Mas Tsab. Austraslia teb.

Nyob zoo ib tsoom phooj ywg Hmoob uas hmov thiab tshua. Kuv zoo siab hnub no tau tuaj ntsib nej nyob rau hauv Tseb Nplej. Kuv yuav sau me ntsis hais txog kuv txoj kev kawm ua Txiv Plig rau nej sawv daws paub.
Kuv hu ua Mas xeem Tsab, kuv yug nyob rau lub zos Tiaj Ntxhw Tuag, Los Tsuas teb. Thaum kuv tseem me nyuam yaus, kuv nyiam mus teev Ntuj, mus mloog Ntuj cov lus thiab mus hu nkauj teev Ntuj. Xyoo 2002, yog xyoo kuv kawm ntawv tiav qib 12 los yog High school. Ua lub neej nyob hauv txoj kev ntseeg, kuv yeej tsis tseg txoj kev thov Ntuj pab rau yus tus kheej thiab pab rau lwm tus. Xyoo ntawd, kuv thov Ntuj tsis tseg pab kuv seb Tswv Ntuj yuav pub kom kuv mus kawm ua dab tsi ?
Tib xyoos ntawd, kuv kuj tsis tau mus kawm dab tsi li. Tsis tas li ntawd, kuv los kuj nyuaj siab tsis tseg rau kuv txiv, vim nws xav yuav ib tug niam yau. Txoj kev muaj niam hlob niam yau kuj yog ib qho piv txwv tsis zoo rau tej me tub me nyuam. Thiab kuj tseem yog ib qho txhaum kev cai nyob rau hauv txoj kev ntseeg. Li cas los puam chawj, tej yam kev nyuaj siab uas kuv tau ntsib ntawd, ua rau kuv ras dheev txog peb Hmoob lub neej cov tseem ua neej nyob rau yav nram qab. Cov tseem pheej tsis txawj sib hlub, cov xav muaj poj niam ntau tus, cov me nyuam ntsuag, cov neeg txom nyem uas luag lwm tus saib tsis taus. Thaum kuv xav li ntawd, kuv xav tias kheev lam yog Tswv Ntuj hu kuv, mas kuv yuav rau siab mus kawm kom tiav thiab los qhia kev ntseeg rau peb cov Hmoob kom sawv dawv txawj sib hlub.
Txij thaum ntawd los, kuv thiaj xav txog txoj kev yuav mus kawm ua Txiv Plig kom tau los pab peb cov Hmoob, thiab kom peb ho muaj ib co Txiv Plig los coj peb cov Hmoob xws li lwm heev neeg es peb thiaj li yuav vam meej.
Xyoo 2003, kuv muaj txoj hmoo tau nrog 3 tug tub hluas tuaj mus saib Txiv Plig Nyiaj Pov nyob rau hauv lub nroog Lomsak, xeev Phetchabun uas nyob Thaib teb. Peb tau nrog Txiv Plig Nyiaj Pov nyob ua ke thiab kawm kev ntseeg ib lub hlis. Ces twb txog peb lub caij nyoog yuav rov qab mus tsev. Hnub peb yuav rov mus tsev, kuv tseem nco ntsoov Txiv Plig Nyiaj Pov lo lus nws hais rau peb nyob hauv thaj txi Ntuj tias : “Nej rov mus, mas nej nplua nuj lawm.” Kuv tsis nkag siab Txiv Plig lo lus ntawd, kuv tseem tab tom xav seb yog txhais li cas. Tam sim ntawd, Txiv Plig txawm hais ntxiv tias : “Thaum nej muaj Tswv Ntuj nyob hauv nej siab, ces yog nej muaj tas ib puas tsav yam lawm.” Kuv hnov li ntawd, kuv mam li nkag siab Txiv Plig lo lus. Lo lus ntawd yog ib lo lus txhib kuv lub siab kub lug, ua rau kuv haj yam xav mus kawm ua Txiv Plig ntxiv.
Peb rov mus txog tsev tsis ntev, kuv txawm txiav siab meej tias kuv yuav mus kawm ua Txiv Plig. Kuv tau mus thov tus Tswv Qhia uas saib lub Cheeb Koom Txoos Kav Tos Liv nyob Vees Cas, kom nws pab txais kuv. Ces nws zoo siab txais kuv, mas kuv ua Tswv Ntuj tsaug. Tus Tswv Qhia ntawd nws yog ib tug neeg Los Tsuas. Nws lub npe hu ua Tswv Qhia Qhas Xem (Khamse). Kuv tau nrog Tswv Qhia nyob hauv lub tsev teev Ntuj Vees Cas ntawd 5 xyoos txwm nkaus. Kuv tau pab Tswv Qhia thiab pab peb cov Hmoob. Kuv tau tos txais cov neeg paub kuv uas tej thaum lawv tuaj kho mob thiab tsis muaj chaw so, ces lawv los so hauv kuv. Kuv kuj nyiam mus xyuas cov neeg mob uas kuv paub nyob hauv tsev kho mob. Txawm kuv tsis muaj nyiaj pab lawv, tsis kav kuv nqa dej, nqa mov thiab nqa pam mus rau lawv vov. Tej thaum kuv kuj mus nrog lawv nyob zov lawv tus neeg mob thiab nrog lawv tham. Txhawb lawv lub dag zog kom lawv ua siab loj. Muaj ntau zaus kuv xav pab lawv kom zoo thiab ntau dua nod, tiam sis kuv tsuas kawg ua tau li qhov kuv ua tau xwb.
Tsis tas li ntawd, kuv kuj txhawj txog cov ntseeg uas nyob deb nroog thiab tsis muaj cov Txiv Plig los yog cov Leej Phauj mus txog lawv : xws li cov nyob Sam Neua, nyob Muang Fuang thiab ib co zos uas nyob deb tuam ceeb Vees Cas. Kuv thiaj pab kom cov Xib Hwb tau tuaj sib sau kawm kev ntseeg nyob rau hauv tsev teev Ntuj Vees Cas ib xyoo ib zaug. Tej thaum kuv khoom, kuv kuj mus tsham xyuas cov ntseeg zaum puav. Kuv tau mus xyuas cov ntseeg nyob rau zos Hav Zeb Dub nyob Sam Neua ib zaug zoo li npau suav. Kuv tseem cia siab ntsoov tias muaj ib hnub twg kuv yuav rov mus txog lub zos ntawd dua. Dhau li ntawd lawm, nyob rau hauv Vees Cas, kuv kuj tau tsa kom muaj ib pawg tub ntxhais hluas Hmoob ntseeg. Txawm tias peb yog ib pab tub ntxhais hluas tsawg tsawg xwb los puam chawj. Yog Tswv Ntuj pab peb, mas vam tias tom ntej peb yuav huam vam thiab loj hlob. Cov tub ntxhais hluas muaj huv si 14 leeg xwb. 4 leeg tub thiab 9 leeg ntxhais. Vim peb tseem tsawg thiab tsis muaj zog. Peb zoo yam li tus me nyuam uas pib xyaum mus kev. Ces peb tis ib lub npe rau pab tub ntxhais hluas tias :
“Pawg Noob Hnav.” Txhua Hnub Chiv tom qab ua thaj txi Ntuj tas, peb sib sau kawm hu nkauj thiab kawm kev ntseeg ua ke. Thaum txog lub caij ua hmoov tsuj xeeb Huab Tais Yes Xus yug los, peb kuj tau mus nrog cov zos nyob ze Vees Cas koom ua lub hmoov tsuj xeeb, thiab peb tau mus coj cov me nyuam yaus ua si thiab ua kev lom zem rau cov laus tau saib.
Hnub tim 10 lub 6 hli xyoo 2008, kuv tau ncaim cov ntseeg thiab cov tub ntxhais hluas mus kawm cov txuj ua Leej Choj rau teb chaws Australia lawm. Kuv tseem yuav kawm li 6 xyoo ntxiv thiaj mam li tiav. Seb Tswv Ntuj puas pom zoo kuv ua nws ib tug tub txib. Yog Tswv Ntuj pom zoo, mas kuv ua Tswv Ntuj tsaug. Kuv txoj kev kawm thawj xyoo nyob Australia teb, mas nyuaj hauj sim. Kuv zoo li ib tug me nyuam yug los tshiab nyob rau teb chaws Australia, vim ib puas tsav yam tshiab rau kuv tas nrho. Tsis hais haiv neeg, huab cua, kev kawm thiab lwm yam. Qhov nyuaj tshaj plaws rau kuv, mas yog nco vaj nco tsev. Kuv laj tos txog hnub kuv kawm tiav thiab tau rov mus tsev. Li cas los xij peem, vam tias lub 6 hli tim 29 xyoo 2010 tom ntej no, kuv yuav tau txais lub Cim Cog Lus thawj zaug. Tom qab ntawd txij lub 11 hlis mus txog lub 12 hlis 2010, kuv kuj yuav tau rov mus xyuas tsev thiab. Thaum kawg no, kuv ua ib tsoom phooj ywg tsaug ntau ntau uas nej ua siab ntev nyeem kuv zaj no. Kuv thov kom Tswv Ntuj nrog nraim nej nyob, kom nej tsuas ntsib txoj kev kaj siab lug. Yog nej leej twg muaj dab tsi xav nug, los yog xav nrog kuv sib fim, mas nej sau ntawv rau kuv raws li lub chaw nyob nram qab no. Peb mam ntsib nej dua lwm zaus.
Br. Ma Cha
St Mary’s Seminary
62-94 Jacksons Rd
Mulgrave - Vic 3170
AUSTRALIA
Tel: 61-3-97953535
E-mail: macha_net2003@yahoo.com

Tshaj tawm nyob: Zoo Tswv Zov Yaj