UA KOOB TSHEEJ YES XUS YUG LOS XYOO 2018

Nyob zoo sawv daws,

Kuv tuaj tau lig me me lawm los thov nej zam lub txim rau kuv thiab, vim peb lub koob tsheej Yes Xus Yug los twb dhau los lawm.  Txawm li ntawd los nyob hauv Koom Txoos Kas Tos Liv lub caij Yes Xus Yug yog txij hmo tim 24 lub 12 hlis mus txog tim 6 lub 1 hlis, ces peb kuj tseem nyob hauv lub caij ntawd thiab. Ua li mas kuv thiaj tuaj tso cov zaj nyeem rau lub koob tsheej Yes Xus Yug rau ntawm no, kom leej twg xav mus nrhiav nyeem los yeej tsis tau lig. Xyoo no nyob hauv peb lub church mas peb nyeem cov zaj nyeem hauv Thaj Txi Ntuj thaum ib tag hmo rau hmo tim 24 thiab cov zaj nyeem hauv Thaj txi Ntuj thaum nruab hnub rau tim 25 thaum yav sawv ntxov.

Thov kom peb tus HT Yes Xus yug los nyob rau hauv nej txhua tus lub siab lub ntsws kom nej muaj lub siab kub lug ntseeg nws thiab nrhiav nws.

Nej mus taum hauv no nrhiav cov zaj nyeem los nyeem:

https://hmongcatholique.forumdediscussions.com/t1456-cov-zaj-nyeem-ua-koob-tsheej-yes-xus-yug-los#13557

TIM 26 LUB 12 HLIS 2018

Hnub Plaub – Hnub tom qab Yes Xus Yug Los Xyoo C

Hwm Leej Ntshiab Tes Fas Nos (Stephen), Thawj tus Tuag Ua tim Khawv

Zaj Nyeem Ib: HAUJ LWM 6: 8-10; 7:54-59

8 Tes Fas Nos yog ib tug neeg muaj txiaj ntsim thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos uas hu ua cov Qhev Dim Txim lub ; lawv yog ib co neeg nyob Xis Les Nas tuaj, nyob As Les Xas Nrias tuaj, thiab ib co nyob Xis Lis Xias, thiab nyob As Xias tuaj. 10 Lawv nrog Tes Fas Nos sib cav. Tab sis lawv cav tsis yeej Tes Fas Nos, vim nws yog neeg thoob tsib, thiab yog Leej Ntuj Plig qhia nws hais. 54 Thaum lawv hnov cov lus no, mas lawv npau taws ceev kawg. Lawv zim hniav zaig rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg. Sawv daws ua ib tsaug khiav mus nthos nkaus Tes Fas Nos. 58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov ua pov thawj hle lawv tej khaub ncaws tso rau ntawm ib tug tub hluas hu ua Xauv ko taw. 59 Thaum lawv tab tom txawb pob zeb tua Tes Fas Nos mas nws hu txog Ntuj, nws hais tias : "Huab Tais Yes Xus, thov koj txais kuv tus ntsuj plig."

NPN 31: 3CD-4, 6 + 8AB, 16BC + 17

Txais: (6) Huab Tais, kuv tso kuv tus ntsuj plig
rau hauv koj txhais tes.

Thov koj ua kuv lub tsua rau kuv tau chaw nkaum,
ua ib lub loog khov ruaj thaiv kuv.
Koj yog kuv lub tsua thiab kuv lub ntsa loog zeb;
vim koj saib koj lub npe, koj yuav coj kuv
thiab yuav qhia kev rau kuv taug.

Txais…

Kuv muab kuv tus ntsuj plig tso rau hauv koj txhais tes;
HUAB TAIS, tus Tswv Ntuj muaj kev pheej xeeb, koj yuav txhiv kuv;
Kuv yuav zoo siab thiab luag ntxhi vim koj txoj kev khuv leej.

Txais…

Thov koj cawm kuv dim ntawm kuv cov yeeb ncuab thiab cov tsim txom kuv.
Thov cia koj lub ntsej muag ci hob tuaj rau koj tus tub txib;
thov cawm kuv vim koj muaj lub siab zoo.

Txais…

As Les Lus Yas: NPN 118: 26A, 27A

Txais: As les lus yas, As les lus yas

Kom tus tuaj ntawm Huab Tais lub npe tuaj nto meej nto moo;
HUAB TAIS yog Tswv Ntuj, nws muab txoj kev pom kev rau peb.

Txais: As les lus yas, As les lus yas

Ntawv Moo Zoo: MT 10: 17-22

Yes Xus hais rau nws cov thwj tim tias:
17 “Nej ceev faj txog tej tib neeg : lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18 Luag yuav coj nej mus rau cov nom thiab cov vaj ntxwv vim kuv, kom nej tau ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, Ntuj yuav muab cov lus teb rau nej hais. 20 Li ntawd, yuav tsis yog nej hais lus, yog nej Txiv tus Ntsuj Plig yuav hais tawm hauv nej los. 21 "Tus tij yuav muab tus kwv muag rau luag tua, leej txiv yuav mus kom nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd coj mus tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj txog qhov kawg, mas nws yuav txais kev cawm.”

TIM 27 LUB 12 HLIS 2018

Hnub Tsib Lis Piam Ib Caij Yes Xus Yug Los Xyoo C

Hwm LN Zam, Hauv Paus Xa Lus thiab Kws Sau Ntawv Moo Zoo

Zaj Nyeem Ib: 1 ZAM 1: 1-4

Cov hmov tshua:
1 Tej yam uas tau tshwm sim thaum lub hauv paus los, tej yam peb tau hnov, tej yam peb tau pom xyeem ntawm qhov muag, tej yam peb tau ntsia ntsoov, thiab tej yam peb txhais tes tau kov, mas yog hais txog Leej Lo Lus pub Txoj Sia; 2 vim Txoj Sia tau tawm los lawm. Peb tau pom Txoj Sia lawm, peb ua tim khawv hais txog Txoj Sia no, thiab peb tuaj qhia kom nej paub txog Txoj Sia nyob mus li no; nws nyob ze Leej Txiv thiab nws kuj ho tawm los rau peb pom thiab. 3 Yam uas peb tau pom thiab tau hnov, mas peb tshaj rau nej paub, kom nej nrog peb koom ua ib lub siab. Peb txoj kev sib koom siab ntawd kuj yog nrog Leej Txiv thiab nws Leej Tub Yes Xus Pleev koom siab thiab. 4 Peb sau tas puas tsav yam no rau nej paub, kom nej muaj txoj kev zoo siab puv meem mias nyob hauv nej.

NPN 97: 1-2, 5-6, 11-12

Txais: (12) Tus neeg ncaj, koj yuav zoo siab nyob hauv Huab Tais!

HUAB TAIS yog vaj ntxwv, kom lub ntiaj teb zoo siab;
kom ntau lub pov txwv luag ntxhi.
Cov huab thiab qhov tsaus nyob ncig nws,
kev ncaj ncees thiab kev txiav txim yog
lub taw ncej txheem nws lub theej kiab.

Txais…

Cov roob yaj tas xws li ciab ntab yaj nyob ntawm Huab Tais xub ntiag,
ntawm tus HUAB TAIS kav tas lub ntiaj teb xub ntiag.
Lub ntuj tshaj txog nws txoj kev ncaj ncees,
tas txhua haiv neeg pom nws lub hwj chim.

Txais…

Qhov pom kev ci tawm tuaj kaj tus neeg ncaj,
kev zoo siab ci tuaj rau tus neeg siab zoo.
Cov neeg ncaj nej zoo siab nyob hauv HUAB TAIS,
nej ua tsaug rau nws lub npe ntshiab.

Txais…

As Les Lus Yas: Te Deum

Txais: As les lus yas, As les lus yas

Tswv Ntuj peb cav txog koj,
peb qw xaiv koj ua peb tus Huab Tais;
npoj Hauv Paus Xa Lus muaj hwj chim cav txog koj.

Txais: As les lus yas, As les lus yas

Ntawv Moo Zoo: ZAM 20: 1A+2-8

1 Thawj hnub pib lub lis piam thaum sawv ntxov, 2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim uas yog tus Yes Xus nyiam. Nws hais rau nkawd tias : "Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm." 3 Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa. 4 Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws khiav ua ntej, nws xub mus txog tom ntxa. 5 Nws khoov mus xauj, nws pom cov ntaub qhwv nyob ntawd, tab sis nws tsis chaws mus hauv. 6 Ces Xis Moos Pob Zeb lawv nws qab tuaj txog, Pob Zeb chaws mus hauv lub ntxa. Nws pom cov ntaub qhwv nyob ntawd, 7 hos daim ntaub qhwv taub hau kauv cia nyob lwm qhov, tsis xyaw cov ntaub qhwv. 8 Ces lwm tus thwj tim uas xub mus txog ntawm lub ntxa mam li chaws mus hauv. Nws pom ces nws ntseeg.

TIM 28 LUB 12 HLIS 2018

Hnub Rau Lis Piam Ib Caij Yes Xus Yug Los Xyoo C

Hwm Cov Me Nyuam Tsis Txhaum, Tuag Ua Tim Khawv Pauv Yes Xus Chaw

Zaj Nyeem Ib: 1 Zam 1: 5—2:2

Cov hmov tshua,
5 Lub xov uas peb tau hnov ntawm Yes Xus los, thiab peb tshaj rau nej paub, yog li no : Tswv Ntuj yog qhov pom kev, nyob hauv nws tsis muaj ib yam tsaus li. 6 Yog peb hais tias: “Peb nrog nws koom siab,” tab sis peb tseem mus taug txoj kev tsaus ntuj, mas peb dag xwb, peb tsis ua raws qhov tseeb. 7 Hos yog peb taug txoj kev pom kev, vim nws yeej nyob hauv qhov pom kev, mas peb thiab nej sawv daws muaj kev sib koom siab ua ke, ces nws Leej Tub Yes Xus cov ntshav ntxuav peb ntawm txhua yam txhaum kom peb dawb huv tuaj. 8 Yog peb hais tias: “Peb tsis muaj txhaum,” mas peb rov dag rau peb, qhov tseeb tsis nyob hauv peb li. 9 Yog peb lees peb cov txhaum, mas Tswv Ntuj uas yog tus pheej xeeb thiab tus siab ncaj yuav zam peb cov txhaum rau peb, thiab yuav ntxuav tas puas tsav yam phem ntawm peb pov tseg kom peb dawb huv tuaj. 10 Yog peb hais tias: “Peb tsis tau ua txhaum,” mas yog zoo li peb hais tias Tswv Ntuj yog tus dag. Tswv Ntuj lo lus tsis nyob hauv peb.
2 1 Kuv cov me nyuad, kuv sau tej yam no tuaj rau nej, kom nej tsis txhob ua txhaum. Txawm tias yog muaj ib tug twg tau ua txhaum lawm, los peb muaj ib tug pab peb cev lus thov Leej Txiv, yog Yes Xus Pleev, tus siab ncaj. 2 Nws yog tus tuag ua nqi txhiv peb ntawm peb cov txhaum; tsis yog txhiv peb xwb, nws tseem txhiv tas lub qab ntuj neeg ntawm lawv cov txhaum huv tib si.

NPN 124: 2-3, 4-5, 7CD-8

Txais: (7) Peb tus ntsuj plig tau txais kev dim xws li tus noog
dim plaws ntawm tus cuab noog lub vas.

Yog HUAB TAIS tsis txhob tuaj pab peb
thaum cov tib neeg tuaj tua peb,
mas ntshai lawv yeej muab peb nqos ciaj lawm
vim lawv npau taws heev rau peb cuag hluav taws kub.

Txais: (7) Peb tus ntsuj plig tau txais kev dim xws li tus noog
dim plaws ntawm tus cuab noog lub vas.

Ntshai dej twb los nyab peb tas,
dej sab siv twb los tshoob peb tas ;
cov dej hlob twb tshoob peb mus lawm.

Txais: (7) Peb tus ntsuj plig tau txais kev dim xws li tus noog
dim plaws ntawm tus cuab noog lub vas.

Lub vas ntuag rhe,
peb dim plaws lawm.
Peb qhov chaw vam khom yog nyob hauv HUAB TAIS lub npe;
nws yog tus tswv tsim lub ntuj lub teb.

Txais: (7) Peb tus ntsuj plig tau txais kev dim xws li tus noog
dim plaws ntawm tus cuab noog lub vas.

As Les Lus Yas: (zaj Te Deum)

Txais: As les lus yas,as les lus yas.

Peb cav txog koj, Tswv Ntuj,
peb qw zeem koj ua Huab Tais;
tsoom tub rog hnav dawb uas tuag ua tim khawv cav txog koj.

Txais: As les lus yas,as les lus yas.

Ntawv Moo Zoo: MT 2: 13-18

13 Thaum cov kws hnub qub rov qab mus lawm, Huab Tais tus Tshiab tawm tuaj ua npau suav rau Yos Xes, nws hais tias : "Koj sawv, koj coj tus me nyuam thiab nws niam khiav mus Hais Nkws Tos teb, koj yuav nyob ntawd mus txog thaum kuv rov tuaj qhia koj, vim Hes Los yuav nrhiav tus me nyuam tua." 14 Yos Xes sawv tsees los, nws coj tus me nyuam thiab leej niam, lawv khiav hmo ntuj mus Hais Nkws Tos teb. 15 Nws nyob Hais Nkws Tos teb mus txog hnub Hes Los tuag, kom thiaj muaj raws li lo lus Huab Tais tus yaj saub xub hais tseg tias : “Kuv hu kuv leej tub tim Hais Nkws Tos teb los.”
16 Thaum Hes Los pom tias cov kws hnub qub dag nws, ces nws npau taws ceev kawg. Nws xa neeg mus tua cov me nyuam uas nyob Npes Les Hes thiab nyob ib ncig thaj tsam ntawd tas tib si, kom tua cov uas muaj ob xyoos rov hauv raws li lub caij cov kws hnub qub qhia rau nws. 17 Ces muaj raws li yaj saub Yes Les Mias tau hais tias : 18 “Yuav hnov ib lub suab nrov nyob Las Mas, yog ib lub suab quaj suab nyiav ntev loo : yog Las Nkes quaj nws cov me nyuam; tsis muaj neeg nplij tau nws, vim nws cov me nyuam tsis ciaj nyob lawm.”

TIM      29      LUB      12      HLIS      2018

Hnub Xya Lis Piam Ib Caij Yes Xus Yug Los Xyoo C - Hnub Tsib Tom Qab Yes Xus Yug

Hwm LN Tos Mas Becket

Zaj Nyeem Ib:       1 ZAM  2:   3-11

Cov zoo nyiad,
3 Qhov ua kom peb pom tias peb paub Yes Xus, yog qhov tias peb coj nws cov lus qhia. 4 Tus hais tias : “Kuv paub nws,” tab sis twb tsis coj nws cov lus qhia, mas tus ntawd yog ib tug neeg dag, qhov tseeb tsis nyob hauv nws. 5 Hos tus coj Yes Xus lo lus, mas txoj kev nyiam Tswv Ntuj zoo tiav log nyob hauv nws lawm. Yog peb ua li ntawd, mas peb thiaj paub tias peb nyob hauv nws. 6 Tus uas nws hais tias nws nyob hauv Yes Xus, mas nws yuav tsum coj raws nraim li Yes Xus tau coj.
7 Cov zoo nyiad, qhov kuv sau tuaj rau nej, tsis yog ib lo lus qhia tshiab. Yog ib lo lus qhia qub uas nej twb tau txais puag thaum lub hauv paus los lawm. Lo lus qhia qub ntawd, yog lo lus uas nej twb tau hnov lawm. 8 Tsis kav, qhov kuv sau tuaj rau nej no, kuj yog ib lo lus qhia tshiab thiab. Yog ib qho tseeb uas nyob hauv Yes Xus thiab nyob hauv nruab nrab nej. Vim qhov tsaus ntuj dua lawm, ces qhov uas yog qhov tseem pom kev twb ci tuaj lawm. 9 Tus hais tias nws nyob hauv qhov pom kev, tab sis nws ntxub nws tus kwv tij, mas nws tseem nyob hauv qhov tsaus ntuj. 10 Tus nyiam nws tus kwv tij, mas nws thiaj nyob hauv qhov pom kev. Ces nyob hauv nws tsis muaj dab tsi yuav ua kom muaj kev ntog. 11 Hos tus ntxub nws tus kwv tij, mas nws nyob hauv qhov tsaus ntuj, thiab nws maub taug kev hauv qhov tsaus ntuj, nws tsis paub tias nws mus qhov twg li, vim qhov tsaus ntuj npog rawv nws qhov muag.

NPN       96:   1-2A, 2B-3, 5B-6

Txais: (11a) Kom lub ntuj zoo siab thiab kom lub ntiaj teb hom khaj!

Nej hu ib zaj nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.

Txais…

Hnub dhau hnub, nej tshaj txog nws txoj kev cawm seej.
Nej piav txog nws lub hwj chim rau cov kuj cuab hnov,
piav txog nws tej hauj lwm txaus qhuas rau txhua haiv neeg paub.

Txais…

HUAB TAIS tau tsim lub ntuj.
Lub hwj chim ci ntsa iab thiab lub meej mom ua nws ntej;
lub hwj huam thiab kev zoo nyob hauv nws lub tuam tsev.

Txais…

As Les Lus Yas:       LK  2:   32

Txais: As les lus yas, As les lus yas

Yog qhov pom kev tawm tuaj kaj cov pej kum neeg,
thiab ua kom koj haiv His Xas Lais tau koob meej.

Txais: As les lus yas, As les lus ya

Ntawv Moo Zoo:       LK  2:   22-35

22 Thaum lub caij ua ntej yuav ua cov kab ke ntxuav kom huv rau ob niam tub raws li Mais Xes Txoj Cai tas lawm, Mab Liab thiab Yos Xes coj Yes Xus mus pem Yes Lus Xas Les, kom tau fij tus me nyuam rau Huab Tais, 23 vim Huab Tais Txoj Cai sau tias: "Txhua tus tub xub qhib leej niam plab yug los, yuav tsum muab qee rau Huab Tais,”
24 thiab kom tau cev ib co txim rau Ntuj raws li Huab Tais Txoj Cai hais cia tias : “Cev ib nkawg nquab lwb rwg, los ob tug nquab mos.”
25 Thaum ntawd nyob Yes Lus Xas Les, muaj ib tug txiv neej hu ua Xis Mes Oos. Tus txiv neej ntawd yog neeg ncaj thiab nyiam teev ntuj, nws tos ntsoov tus yuav tuaj nplij His Xas Lais; Leej Ntuj Plig Ntshiab nyob saum nws. 26 Leej Ntuj Plig Ntshiab qhia rau nws paub tias nws yuav tsis xub tuag ua ntej nws tau pom Huab Tais tus Pleev. 27 Leej Ntuj Plig coj nws tuaj nyob hauv lub Tuam Tsev Teev Ntuj, thaum leej niam thiab leej txiv nkawd coj tus me nyuam Yes Xus tuaj ua cov kab ke raws li Txoj Cai. 28 Ces Xis Mes Oos txais tus me nyuam los rau hauv nws xub ntiag, nws cav lus zoo txog Tswv Ntuj, nws hais tias : 29 “Huab Tais, nyem no koj tso tau koj tus tub txib mus kaj lug raws li koj tau hais lawm, 30 vim kuv qhov muag twb tau pom koj txoj kev cawm neeg lawm, 31 uas koj tau npaj nyob ntawm tas ib tsoom haiv neeg xub ntiag, 32 uas yog qhov pom kev tawm tuaj qhia koj rau cov pej kum neeg paub, thiab yog qhov ua kom koj haiv His Xas Lais tau koob meej.”
33 Tus me nyuam niam thiab txiv poob siab tas rau cov lus nkawd hnov hais txog nws. 34 Ces Xis Mes Oos foom hmoov zoo rau nkawd, thiab nws hais rau Mab Liab, tus me nyuam leej niam tias : "Koj saib mus, tus me nyuam no yuav ua chaw rau ntau leej nyob His Xas Lais ntog thiab ua rau ntau leej sawv los. Nws yog ib lub cim yuav ua kom neeg hais lus thuam txog nws. 35 Hos ntawm koj, mas ib rab ntaj yuav chob ntsia ntsees koj tus plig, kom xwv tej lus uas coob leej xav tuaj nruab siab tawm los rau sawv daws paub.”

TIM 31 LUB 12 HLIS 2018

Hnub Ob Lis Piam Ob Caij Yes Xus Yug Los Xyoo C - Xya hnub tom qab Yes Xus Yug

Hwm LN Vaj Qhia Sylvester I, tuag xyoo 335 AD

Zaj Nyeem Ib: 1 ZAM 2: 18-21

18 Cov me nyuad, twb txog lub zim txwv kawg lawm. Nej tau hnov hais tias tus tiv Leej Pleev yuav tuaj no, zaum no twb muaj ntau tus uas tiv Leej Pleev tshwm tuaj lawm; vim li ntawd peb thiaj paub tias txog lub zim txwv kawg lawm. 19 Cov neeg ntawd tawm hauv peb mus, tab sis lawv tsis nrog peb koom ua ib pab. Yog lawv nrog peb koom ua ib pab tiag, mas lawv yeej tseem nrog peb nyob ua ke. Lawv tawm mus kom sawv daws pom xyeem tias lawv tsis yog peb pab neeg. 20 Ntawm nej, mas nej tau txais cov roj ntawm tus Ntshiab los pleev ne lawmj, ces nej sawv daws paub tib si lawm. 21 Kuv sau ntawv tuaj rau nej, tsis yog vim nej tsis tau paub qhov tseeb, tiam sis yog vim nej twb lawm, thiab vim txhua yam lus dag yeej nyob tsis taus nrog qhov tseeb.

NPN 96: 1-2, 11-12, 13

Txais: (11a) Kom lub ntuj zoo siab thiab lub ntiaj teb hom khaj!

Nej hu ib zaj nkauj tshiab rau HUAB TAIS,
tas lub ntiaj teb, nej hu nkauj rau HUAB TAIS,
nej hu nkauj rau HUAB TAIS, nej cav txog nws lub npe.
Hnub dhau hnub, nej tshaj tawm txog nws txoj kev cawm seej.

Txais…

Kom lub ntuj zoo siab thiab lub ntiaj teb hom khaj;
kom lub hiav txwv thiab txhua yam nyob hauv nrov nroo ntws;
kom cov tiaj nrag luag ntxhi nrog txhua yam nyob hauv lawv!
Ces txhua tsob ntoo nyob hauv hav zoov
yuav dhia zoo siab ntawm HUAB TAIS xub ntiag.

Txais…

HUAB TAIS tuaj lawm,
nws tuaj kav lub ntiaj teb.
Nws yuav tswj ntiaj teb neeg raws kev ncaj
thiab txhua haiv neeg raws kev haum pheej. .

Txasi…

As Les Lus Yas: ZAM 1: 14A, 12A

Txais: As les lus yas, As les lus yas

Tswv Ntuj Lo Lus yug los ua neeg nqaij tawv
thiab nws tau nrog peb nyob.
Cov uas txais nws, nws pub kom lawv muaj
peev xwm ua tau Tswv Ntuj cov me nyuam.

Txais: As les lus yas, As les lus yas

Ntawv Moo Zoo: ZAM 1: 1-18

1 Thaum lub hauv paus, Leej Lo Lus yeej nyob lawm, Leej Lo Lus nrog Tswv Ntuj nyob, Leej Lo Lus yog Tswv Ntuj. 2 Thaum lub hauv paus, nws yeej nrog Tswv Ntuj nyob. 3 Tas ib puas tsav yam muaj tuaj tau vim nws. Yog tsis muaj nws, yuav tsis muaj ib yam dab tsi muaj tuaj tau. 4 Yam uas nyob hauv nws yog txoj sia; txoj sia yog qhov pom kev kaj tib neeg. 5 Qhov pom kev ci nyob hauv qhov tsaus ntuj, qhov tsaus ntuj roos tsis tau qhov pom kev.
6 Muaj ib tug neeg, yog Tswv Ntuj xa nws tuaj. Nws lub npe hu ua Zam. 7 Nws yog ib tug tim khawv tuaj ua pov thawj txog qhov pom kev, kom txhua leej txhua tus ntseeg vim nws. 8 Tus ntawd tsis yog qhov pom kev, tab sis nws tuaj ua tim khawv txog qhov pom kev. 9 Leej Lo Lus yog qhov pom kev qhov tseem, uas ci tuaj ziab txhua leej txhua tus, nws tuaj nyob hauv lub sim ceeb. 10 Nws nyob hauv lub sim ceeb, nws yog tus ua kom lub sim ceeb tshwm tawm los, tiam sis lub sim ceeb tsis paub nws. 11 Nws los nyob hauv nws tsev, tiam sis nws cov neeg tsis txais nws. 12 Tas cov uas txais nws, mas nws pub hwj huam rau lawv kom los ua tau Tswv Ntuj cov me nyuam; yog cov uas ntseeg txog nws lub npe. 13 Cov ntawd lawv tsis yug ntawm roj ntsha los, tsis yog lub cev nqaij xav kom lawv yug los, thiab kuj tsis yog neeg lub siab xav kom lawv yug los. Lawv yug ntawm Tswv Ntuj los.
14 Leej Lo Lus tau xeeb los muaj ib lub cev nqaij, nws tau tsa tsev nrog peb nyob. Peb tau ntsia ntsoov nws lub hwj chim. Yog lub hwj chim uas Leej Tub twm zeej muaj nyob ze ntawm Leej Txiv. Nws muaj txiaj ntsim thiab qhov tseeb nyob puv hauv nws. 15 Zam ua tim khawv txog nws. Zam tshaj hais tias : "Tus no yog tus kuv hais txog tias: ‘Tus uas lawv kuv qab tuaj, nws twb tuaj ua kuv ntej lawm, vim nws yeej xub nyob ua ntej kuv los.’" 16 Peb sawv daws puav leej tau txais qhov uas muaj nplua mias nyob hauv nws: peb tau txais txiaj ntsim tas txiaj ntsim thiab. 17 Vim tias txoj Cai yog hla ntawm Mais Xes tuaj, hos lub txiaj ntsim thiab txoj kev tseeb yog Yes Xus Pleev coj tuaj. 18 Tsis muaj leej twg tau pom dua Tswv Ntuj ib zaug li, tab sis Leej Tub Twm Zeej uas yog Tswv Ntuj thiab nyob nraim hauv Leej Txiv lub xub ntiag, nws ua kom peb paub Tswv Ntuj.

TIM      1     LUB      1      HLIS      2019

Hnub Peb hauv lis piam- yog Hnub Yim hauv lub Caij Yes Xus Yug Los Xyoo C

Hnub Pib Xyoo Tshiab


Hwm Nkauj Tsim Txiaj Mab Liab ua Tswv Ntuj Niam

Hnub no phim peb cov ntseeg sawv daws yuav tsum mus koom Thaj Txi Ntuj thov ntuj pab peb thiab pub nws lub txiaj ntsim rau peb nrhiav nws thiab muab nws los ua qhov loj tshaj hauv peb lub neej nyob hauv tas lub xyoo tshiab no

Zaj Nyeem IB:       XAM PHAJ  6:   22-27

22 HUAB TAIS hais cov lus no rau Mais Xes : 23 "Koj hais lus rau As Loos thiab nws cov tub, koj hais rau lawv tias : ‘Nej yuav foom hmoov zoo li no rau cov His Xas Lais, nej yuav hais rau lawv tias: 24 Thov kom HUAB TAIS foom hmoov zoo rau nej thiab pov hwm nej ! 25 Thov kom HUAB TAIS lub ntsej muag ci ntsa iab rau saum nej thiab pub nws lub txiaj ntsim rau nej ! 26 Thov kom HUAB TAIS ua siab zoo tsa qhov muag ntsia nej thiab pub kev thaj yeeb rau nej !' 27 Lawv yuav tuav txog kuv lub npe rau saum cov His Xas Lais zoo li no, ces kuv yuav foom hmoov zoo rau lawv."

NPN       67:   2-3, 5, 6, 8.

Txais: (2a) Thov kom Tswv Ntuj khuv leej peb foom hmoov zoo rau peb.

Thov kom Tswv Ntuj khuv leej peb thiab foom hmoov zoo rau peb;
kom nws lub ntsej muag ci tuaj rau saum peb.
Ces lub ntiaj teb thiaj yuav paub txog koj txoj hau kev,
tas txhua haiv neeg yuav paub txog koj txoj kev cawm neeg.

Txais: (2a) Thov kom Tswv Ntuj khuv leej peb foom hmoov zoo rau peb.

Kom cov haiv neeg zoo siab thiab hom khaj
vim koj tswj sawv dawv raws txoj kev ncaj;
koj yog tus qhia kev rau cov haiv neeg nyob ntiaj teb taug.

Txais: (2a) Thov kom Tswv Ntuj khuv leej peb foom hmoov zoo rau peb.

Kom cov haiv neeg cav txog koj, Tswv Ntuj,
kom tas txhua xeem neeg cav txog koj !
Thov kom Tswv Ntuj foom hmoov zoo rau peb,
thiab kom tas cov npoo ntiaj teb kawg hwm nws !

Txais: (2a) Thov kom Tswv Ntuj khuv leej peb foom hmoov zoo rau peb.

Zaj Nyeem Ob:       NKAS LAS TIAS  4:   4-7

Paj Lug sau ntawv tias:
4 Thaum txog lub caij teem lawm, Tswv Ntuj tso nws Leej Tub tuaj, nws yug ntawm ib tug poj niam los, nws zwm rau Txoj Cai,  5 kom tau txhiv cov uas zwm rau Txoj Cai, kom nws rub tau peb los ua Ntuj cov tub sau. 6 Qhov uas zeem tias nej yog Tswv Ntuj cov tub yog qhov tias nws tau xa nws Leej Tub lub Tswv Yim tuaj nyob hauv peb nruab siab, ces nws qw tias : ‘As Npas, Txiv !’ 7 Ua li mas nej tsis yog ib tug qhev ntxiv, nej yog ib tug tub lawm; ces nej kuj yuav tau txais lub cuab tam nyob hauv Tswv Ntuj thiab.

As Les Lus Yas:       HES NPLAWS  1:   1-2

Txais: As les lus yas, as les lus yas

Yav tas los Tswv Ntuj hais lus rau peb cov yawg koob nyob hauv cov yaj saub;
niaj hnub no, nws hais lus rau peb nyob hauv nws leej Tub.

Txais: As les lus yas, as les lus yas

Ntawv Moo Zoo:       LK  2:   16-21

16 Cov tub zov yaj maj zeeg tuaj mus Npes Les Hes. Lawv pom Mab Liab thiab Yos Xes, thiab pom tus me nyuam mos pw hauv dab nyuj. 17 Thaum lawv pom li ntawd, lawv piav lo lus uas tus Tshiab tau qhia rau lawv txog tus me nyuam. 18 Tus twg hnov, nws kuj qhuas txog tej lus uas cov zov yaj hais rau lawv. 19 Hos Mab Liab, nws ua tib zoo khaws tej lus no huv si cia rau nruab siab. 20 Cov zov yaj rov mus tsev, lawv foom koob meej rau Tswv Ntuj thiab cav lus zoo txog nws vim tas txhua yam lawv tau pom thiab tau hnov muaj raws li Ntuj qhia lawv.
21 Thaum txog yim hnub lawm, yog hnub ua lub cim txiav rau tus me nyuam, lawv tis npe rau nws hu ua Yes Xus, yog lub npe uas tus Tshiab tau qhia rau Mab Liab thaum nws tsis tau xeeb tub hauv plab.

TIM 2 LUB 1 HLIS 2019

Hnub Plaub Lis Piam Ob Caij Yes Xus Yug Los Xyoo C

Hwm LN Basil tus Loj thiab LN Gregory Nazianzen, ob tug Tswv Qhia

Zaj Nyeem Ib: 1 ZAM 2: 22-28

Zam sau ntawv tias:
22 Tus neeg dag yog leej twg ? Yog tus uas tsis kam lees tias Yes Xus yog Leej Pleev. Tus ntawd ntag yog tus tiv Leej Pleev, nws yog tus tsis lees Leej Txiv thiab Leej Tub. 23 Leej twg tsis lees Leej Tub, mas nws kuj tsis muaj Leej Txiv li thiab, tus lees Leej Tub, mas nws kuj muaj Leej Txiv nrog thiab. 24 Ntawm nej, mas nej yuav tsum khaws cov lus uas nej tau hnov txij thaum lub hauv paus los kom nyob ruaj rau hauv nej. Yog cov lus uas nej tau hnov txij lub hauv paus los nyob ruaj hauv nej, mas nej kuj yuav nyob ruaj hauv Leej Tub thiab hauv Leej Txiv thiab. 25 Qhov uas nws tau cog lus yuav pub rau peb yog txoj sia nyob mus li. 26 Kuv tau sau cov lus no rau nej yog xav hais txog cov neeg uas yuav coj nej mus taug txoj kev yuam kev. 27 Ntawm nej, mas cov roj pleev uas nej tau txais ntawm nws yeej nyob rawv hauv nej , ces tsis tas yuav muaj tus qhia nej, vim cov roj uas nws pleev nej txawj qhia txhua yam rau nej; thiab vim yog qhov tseeb, tsis yog cuav; mas nej yuav nyob ruaj hauv nws raws li nws tau qhia rau nej.
28 Cov me nyuad, nej yuav nyob nraim hauv Leej Pleev mog, kom thaum twg nws tshwm sim tuaj peb tso siab lug xwb, thiab nws yuav tsis ua kom peb tau kev txaj muag, lub zim txwv nws rov los ntawd.

NPN 98: 1, 2-3AB, 3CD-4

Txais: (3cd) Tas cov npoo ntuj npoo ntiaj teb kawg tau
pom peb tus Tswv Ntuj txoj kev cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua qhov ntawd.

Txais…

HUAB TAIS ua kom sawv daws paub txog nws txoj kev cawm neeg,
nws muab nws txoj kev ncaj tawm rau cov haiv neeg pom.
Nws rov nco txog nws txoj kev ua zoo thiab ua ncaj rau
tsev neeg His Xas Lais.

Txais…

Tas npoo ntuj npoo ntiaj teb kawg tau pom
peb tus Tswv Ntuj txoj kev cawm neeg lawm.
Tas txhua teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais…

As Les Lus Yas: HES NPLAWS 1: 1-2

Txais: As les lus yas, as les lus yas

Yav tas los Tswv Ntuj hais lus rau peb
cov yawg koob nyob hauv cov yaj saub;
niaj hnub no, nws hais lus rau peb nyob hauv nws leej Tub.

Txais: As les lus yas, as les lus yas

Ntawv Moo Zoo: ZAM 1: 19-28

19 Ntawm no yog Zam cov lus pov thawj: Thaum cov Yus Das nyob Yes Lus Xas Les xa ib co leej choj thiab ib co les vis tuaj mus nug Zam hais tias : "Koj yog leej twg ?" 20 Mas Zam lees, nws tsis zais, nws lees tias : "Kuv tsis yog Leej Pleev." 21 Lawv nug Zam tias : "Ua li koj yog leej twg ? Koj puas yog Es Lias ?" Zam hais tias : "Kuv tsis yog." "Koj puas yog tus Yaj Saub ?" Zam teb tias : "Tsis yog." 22 Lawv thiaj hais rau nws tias : "Koj yog leej twg ? Peb yuav tsum coj ib lo lus teb rov mus rau cov xa peb tuaj. Koj hais dab tsi txog koj ?" 23 Zam hais tias : "Kuv yog ib tug neeg nyob hauv teb chaws suab puam lub suab qw tias : ‘Nej ua kom Huab Tais txoj kev ncaj tuaj,’ raws li yaj saub His Xais tau hais tseg." 24 Luag kuj xa ib co Fas Lis Xais tuaj thiab. 25 Lawv nug Zam tias : "Vim li cas koj thiaj ua kab ke ntxuav yog tias koj tsis yog Leej Pleev, tsis yog Es Lias, thiab tsis yog tus Yaj Saub ?" 26 Zam teb rau lawv tias : "Kuv ua kab ke ntxuav nyob hauv dej, tiam sis nyob hauv nej, muaj ib tug uas nej tsis paub, 27 tus ntawd yuav lawv kuv qab tuaj, kuv tsis tsim nyog daws nws txoj hlua khau."
28 Tej no tshwm sim tuaj nyob Npes Tas Nias, nyob sab dej Yos Las Das tim ub, ntawm thaj chaw uas Zam ua kab ke ntxuav.

Mim,

Koj ua tau zoo kawg li, ua tsaug ntau mog.

Ua tsaug os tais Tooj.

Kuv tab tom kho cov zaj pib lub Xyoo Teev Ntuj 2018-2019 uas yog pib lub Caij Tos Huab Tais tuaj mus nrog cov zaj tam sis no mus thiab. Thaum twg yog kuv kho cov ntawd tas lawm no kuv ho yuav ua cas muab ob co los tso ua ke ne yod?

Mim,

Tsos tsis tau ua ke lawm, ntshe yog koj tso kiag rau lub poste qub xwb mas thiaj li tau, yog tso tom qab ces kawg yuav nyob tom qab xwb. Tab sis koj tuaj tso es kuv mam li muab cov koj tso yog yuav tsum nyeem ua ntej cov zaj lub caij Yes Xus Yug ces kuv mam li muab sib hloov chaw rau koj xwb.

TIM 3 LUB 1 HLIS 2019

Hnub Tsib Lis Piam Ob Caij Yes Xus Yug Xyoo C

Hwm Yes Xus lub Npe Ntshiab (Most Holy Name of Jesus)

Zaj Nyeem Ib: 1 ZAM 2: 29–3:6

29 Yog nej paub tias Tswv Ntuj siab ncaj, mas nej kuj yuav paub tias yog tus twg ua raws txoj kev ncaj, mas tus ntawd yug ntawm Tswv Ntuj los.
3 1 Nej saib saib, Leej Txiv txoj kev hlub peb loj npaum li no, nws pub kom peb hu ua Tswv Ntuj cov me nyuam – ces yeej peb yeej yog tiag ! Tos ntiaj teb neeg tsis paub peb los vim ntiaj teb neeg twb tsis paub nws. 2 Cov zoo nyiad, nyem no peb yog Tswv Ntuj me nyuam lawm. Qhov uas yav tom ntej peb yuav zoo li cas, tseem tsis tau muaj qhov qhia rau peb paub. Qhov peb paub yog qhov tias thaum Leej Pleev rov los, mas peb yuav zoo li nws, vim nws zoo li cas peb yuav pom nws zoo li ntawd. 3 Tus twg muaj txoj kev cia siab raws li no, mas nws yuav ua kom nws dawb huv tuaj ib yam li Leej Pleev yog tus dawb huv. 4 Tus twg ua txhaum, mas nws ua tsis haum txoj cai, vim kev txhaum yog kev ua tsis haum txoj cai. 5 Nej paub zoo tias Leej Pleev tau tshwm los, yog los tshem neeg cov txhaum pov tseg, thiab nyob hauv nws tsis muaj txhaum li. 6 Tus twg nyob rawv hauv Leej Pleev mas nws tsis ua txhaum, tus twg ua txhaum mas nws tsis tau pom thiab tsis tau paub Leej Pleev.

NPN 98: 1, 3CD-4, 5-6

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua qhov ntawd.

Txais…

Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg.
Tas txhuam teb chaws, nej zoo siab hu nkauj rau HUAB TAIS,
nej qw suab hu nkauj, nej cav txog nws.

Txais…

Nej ntaus nkauj nog ncas cav txog HUAB TAIS
nej ntau nkauj nog ncas thiab hu tej zaj nkauj seev.
Nej tshuab puab tshuab hom nrov nrov,
nej hu nkauj zoo siab nyob ntawm
tus Vaj Ntxwv HUAB TAIS xub ntiag.

Txais…

As Les Lus Yas: ZAM 1: 14A, 12A

Txais: As les lus yas, As les lus yas

Tswv Ntuj Lo Lus yuav ib lub cev neeg, nws tuaj nrog peb nyob.
Cov uas txais nws, nws pub kom lawv muaj lub hwj huam
hloov tau los ua Tswv Ntuj cov me nyuam.

Txais: As les lus yas, As les lus yas

Ntawv Moo Zoo: ZAM 1: 29-34

29 Hnub tom qab, Zam pom Yes Xus tuaj ze ntawm nws, nws hais tias : "Nej ntsia Tswv Ntuj tus Yaj, tus daws qab ntuj neeg cov txhaum. 30 Tus ntawd yog tus uas kuv tau hais txog nws tias : Muaj ib tug neeg yuav lawv kuv qab tuaj, nws twb ua kuv ntej lawm, vim nws xub nyob dua kuv. 31 Kuv tsis tau paub nws, tab sis kuv tuaj yog tuaj ua kab ke ntxuav nyob hauv dej kom xwv nws tawm los rau His Xas Lais paub nws." 32 Ces Zam ua tim khawv hais tias : "Kuv pom Leej Ntuj Plig nqes saum ntuj los xws li ib tug nquab los nyob rau saum nws. 33 Kuv tsis paub nws, tab sis Tus xa kuv tuaj ua kab ke ntxuav hauv dej, nws hais rau kuv tias : ‘Tus uas koj yuav pom Leej Ntuj Plig nqes los nyob saum nws, mas nws yog tus yuav ua kab ke ntxuav nyob hauv Leej Ntuj Plig Ntshiab.’ 34 Kuv tau pom lawm, ces kuv ua tim khawv tias nws yog Tswv Ntuj Leej Tub."

TIM 4 LUB 1 HLIS 2019

Thawj Hnub Rau Lis Piam Ob Caij Yes Xus Yug Los Xyoo C

Hwm LN Elizabeth Ann Seton, ua Leej Phauj

Zaj Nyeem Ib: 1 Zam 3: 7-10

7 Cov me nyuad, nej txhob cia leej twg ua kom nej yuam kev. Tus ua raws txoj kev ncaj, mas nws yog neeg ncaj ib yam li Leej Pleev yog tus ncaj. 8 Tus ua txhaum, nws tuaj ntawm dab phem tuaj, vim txij thaum lub hauv paus los, dab phem yog tus ua txhaum. Vin li no Tswv Ntuj Leej Tub tawm tuaj yog tuaj rhuav dab phem cov hauj lwm. 9 Leej twg yug ntawm Tswv Ntuj los, nws tsis ua txhaum, vim Tswv Ntuj tsob noob nyob ruaj rau hauv nws. Nws ua txhaum tsis tau, vim nws yug ntawm Tswv Ntuj los. 10 Li ntawd, peb pom tseeb tias cov twg yog Tswv Ntuj cov me nyuam, thiab cov twg yog dab phem cov me nyuam. Tus tsis ua raws txoj kev ncaj, mas nws tsis yog Tswv Ntuj tug; thiab tus tsis nyiam nws tus kwv tij, nws kuj tsis yog Tswv Ntuj tug thiab.

NPN 98: 1, 7-8, 9

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg lawm.

Nej hu ib zaj nkauj tshiab rau HUAB TAIS
vim nws tau ua tej yam txaus qhuas;
nws txhais tes xis tau ua kom nws yeej,
nws sab npab ntshiab tau ua qhov ntawd.

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg lawm.

Kom dej hiav txwv thiab tej yam uas
nyob puv hauv qw nrov nroo ntws,
Kom lub ntiaj teb thiab tsoom neeg
uas nyob hauv qw nrov ntsuag qees;
Kom cov dej txhawv dej ntws npuaj teg,
Kom cov roob nrog lawv ua ke dhia zoo siab
nyob ntawm HUAB TAIS xub ntiag,

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg lawm.

HUAB TAIS tab tom tuaj,
nws tuaj tswj kav lub ntiaj teb.
Nws yuav tswj kav qab ntuj neeg raws kev ncaj,
thiab tswj kav cov haiv neeg raws kev haum pheej.

Txais: (3cd) Tas cov npoo ntuj npoo ntiaj teb tau pom
peb tus Tswv Ntuj txoj kev cawm neeg lawm.

As Les Lus Yas: HES NPLAWS 1: 1-2

Txais: As les lus yas, as les lus yas.

Thaum ub, Tswv Ntuj hais lus rau peb cov yawg koob nyob hauv cov yaj saub.
Lub zim txwv no, Tswv Ntuj hais nws cov lus rau peb nyob hauv nws Leej Tub.

Txais: As les lus yas, as les lus yas.

Ntawv Moo Zoo: ZAM 1: 35-42

35 Hnub tom qab, Zam nrog nws ob tug thwj tim rov sawv ntsug nyob ntawd dua. 36 Nws ntsia Yes Xus hla tuaj mus, nws hais tias : "Neb ntsia Tswv Ntuj tus Yaj." 37 Ob tug thwj tim hnov Zam hais li ntawd, nkawd raws Yes Xus qab mus. 38 Yes Xus tig los, nws pom nkawd raws nws, ces nws hais rau nkawd tias : "Neb nrhiav dab tsi ?" Nkawd hais rau Yes Xus tias : "Las Npis, (txhais tias Xib Hwb), koj tsev nyob qhov twg ?" 39 Yes Xus hais rau nkawd tias : "Neb tuaj, ces neb yuav pom." Ces nkawd mus, nkawd pom qhov chaw Yes Xus nyob. Hnub ntawd, nkawd nrog Yes Xus nyob ib hnub mus txog thaum kwv yees plaub teev hnub qaij. 40 As Nres, uas yog Xis Moos Pob Zeb tus kwv, nws yog ib tug ntawm ob tug thwj tim uas hnov Zam hais li ntawd thiab tau raws Yes Xus qab mus. 41 Nws xub mus nrhiav nws tus tij laug Xis Moos, nws hais rau Xis Moos tias : "Wb ntsib tus Mes Xias lawm," -lo lus no txhais tias Leej Pleev- 42 Ces As Nres coj Xis Moos mus cuag Yes Xus. Yes Xus ntsia Xis Moos, nws hais tias : "Koj yog Xis Moos, Zam tus tub, koj lub npe yuav hu ua Kes Fas," -lo lus no txhais tias Pob Zeb.

TIM 5 LUB 1 HLIS 2019

Thawj Hnub Xya Lis Piam Ob Caij Yes Xus Yug Los Xyoo C

Hwm LN John Neumann, ua Tswv Qhia

Zaj Nyeem Ib: 1 Zam 3: 11-21

11 Lo lus uas txij thaum lub hauv paus los nej tau hnov, yog lo lus no : kom peb yuav tsum ib leeg hlub ib leeg, 12 tsis txhob yoog raws li Kas Ees, uas nws mloog tus Phem, nws thiaj muab nws tus kwv tua. Vim li cas nws tua nws tus kwv? Yog vim nws ua cov hauj lwm phem, hos nws tus kwv ua cov hauj lwm ncaj. 13 Li ntawd, cov kwv tij, nej tsis txhob poob siab yog lub ntiaj teb neeg ntxub nej. 14 Peb paub tias, peb twb hla ntawm txoj kev tuag los nyob hauv txoj sia lawm, vim peb nyiam peb hlub peb cov kwv tij. Tus tsis nyiam tsis hlub, nws tseem nyob hauv txoj kev tuag. 15 Leej twg ntxub nws tus kwv tij, mas nws yog ib tug tua neeg. Nej twb paub lawm tias, tsis muaj ib tug tua neeg yuav tau txoj sia nyob mus li nyob hauv nws. 16 Peb paub txog txoj kev nyiam kev hlub vim qhov tias Yes Xus tau siv nws txoj sia los pab peb. Li ntawd peb kuj yuav tsum siv peb txoj sia los pab peb cov kwv tij thiab. 17 Tus uas muaj txhua yam hauv lub ntiaj, yog nws pom nws ib tug kwv tij nyob hauv txoj kev txom nyem, tab sis nws kaw nti nws lub siab lub ntsws tsis kam hlub nws tus kwv tij, mas Tswv Ntuj txoj kev nyiam kev hlub yuav ua li cas nyob tau hauv nws ?
18 Cov me nyuad, peb tsis txhob nyiam ntawm peb lo lus thiab peb lub ncauj xwb, peb ua kiag tej yam hauj lwm los nyiam luag thiab peb yuav nyiam tseeb tiag ! 19 Peb ua li ntawd, mas peb thiaj paub tias peb nyob hauv txoj kev tseeb, ces peb lub siab yuav nyob kaj lug nyob ntawm Tswv Ntuj xub ntiag. 20 Vim tias yog peb lub siab rov muab txim rau peb mas Tswv Ntuj uas loj tshaj peb lub siab, nws yuav paub tas puas tsav yam. 21 Li ntawd, cov zoo nyiad, yog peb lub siab tsis muab txim rau peb, mas peb muaj kev tso siab lug nyob ntawm Tswv Ntuj xub ntiag.

NPN 100: 1B-2, 3, 4, 5

Txais: (1) Tas lub ntiaj teb, nej qw zoo siab rau HUAB TAIS!

Tas txhua lub teb chaws, nej hu nkauj zoo siab rau HUAB TAIS !
Nej xyiv fab hlo luag ntxhi tsob hwb HUAB TAIS ;
nej hu nkauj zoo siab chaws los ntawm nws xub ntiag !

Txais: (1) Tas lub ntiaj teb, nej qw zoo siab rau HUAB TAIS!

Nej yuav tsum paub tias HUAB TAIS yog Tswv Ntuj.
Nws tsim peb los, peb yog nws tug,
peb yog nws haiv neeg, yog nws pab yaj nws saib.

Txais: (1) Tas lub ntiaj teb, nej qw zoo siab rau HUAB TAIS!

Nej chaws mus hauv nws cov rooj loog, nej ua nws tsaug,
Nej mus hauv nws cov tshav loog, nej cav txog nws ;
nej ua nws tsaug, nej foom lus zoo rau nws lub npe.

Txais: (1) Tas lub ntiaj teb, nej qw zoo siab rau HUAB TAIS!

HUAB TAIS muaj lub siab zoo :
HUAB TAIS, nws ua zoo rau peb mus li,
nws ua ncaj rau peb txheej dhau txheej.

Txais: (1) Tas lub ntiaj teb, nej qw zoo siab rau HUAB TAIS!

As Les Lus Yas

Txais: As les lus yas, as les lus yas.

Ib hnub ntshiab tawm tuaj rau peb lawm.
Tuaj mas, cov haiv neeg, tuaj pe hawm Huab Tais.
Hnub no ib qho pom kev loj kawg tawm tuaj kaj lub ntiaj teb.

Txais: As les lus yas, as les lus yas.

Ntawv Moo Zoo: Zam 1: 43-51

43 Hnub tom qab, Yes Xus npaj sawv kev mus Nkas Lis Lais teb, nws txawm ntsib Fis Lis Pos; nws hais rau Fis Lis Pos tias : "Koj los raws kuv." 44 Fis Lis Pos nyob Npes Xais Das uas yog As Nres thiab Pob Zeb nkawd lub nroog. Fis Lis Pos ntsib Nas Tas Nais, nws hais rau Nas Tas Nais tias : "Tus uas Mais Xes tau sau txog nyob hauv Txoj Cai, thiab cov Yaj Saub tau hais txog, mas peb ntsib nws lawm. Yog Yes Xus, uas yog Yos Xes nyob Nas Xas Les tus tub." 46 Ces Nas Tas Nais hais rau Fis Lis Pos tias : "Puas yuav muaj ib yam zoo tawm hauv Nas Xas Les tuaj tau ?" Fis Lis Pos hais rau nws tias : "Koj tuaj ces koj yuav pom." 47 Yes Xus pom Nas Tas Nais tuaj, nws hais txog Nas Tas Nais, nws hais tias : "Nej saib, tus ntawd yog ib tug tseem His Xas Lais uas tsis zais siab li." 48 Nas Tas Nais hais rau Yes Xus tias: "Ua cas koj paub kuv ?" Yes Xus teb rau Nas Tas Nais tias : "Thaum Fis Lis Pos tsis tau hu koj, kuv twb pom koj nyob hauv tsob qab ntoo txiv ncuav pias lawm." 49 Nas Tas Nais teb rau Yes Xus tias : "Las Npis, koj yog Tswv Ntuj Leej Tub tiag ! Koj yog His Xas Lais tus Vaj." 50 Yes Xus hais rau nws tias : "Yog vim kuv hais rau koj tias : Kuv pom koj nyob hauv tsob qab ntoo txiv ncuav pias, mas koj thiaj ntseeg, puas yog? Koj yuav pom tej yam loj dua no." 51 Ces Yes Xus hais ntxiv rau nws tias : "Kuv hais qhov muaj tseeb tiag rau nej: Nej yuav pom ntuj qhib los, thiab pom Tswv Ntuj cov Tshiab nce mus thiab nqes los saum Neeg Leej Tub."

TIM      7      LUB      1      HLIS      2019

Hnub Ob Lis Piam Yes Xus Tawm Tuaj (Epiphany) Xyoo C

Hwm LN Raymond of Pinafort

Zaj Nyeem Ib:        1 ZAM  3:   22–4:6

Cov Zoo Nyiad,
22 Peb yuav tau txais yam peb thov ntawm Tswv Ntuj, vim peb coj nws cov lus qhia, thiab peb ua xis nws siab. 23 Tswv Ntuj Lo Lus qhia yog lo lus no : kom peb ntseeg txog nws Leej Tub Yes Xus Pleev lub npe, thiab kom peb sib nyiam sib hlub raws li lo lus qhia nws tau muab rau peb. 24 Tus coj Tswv Ntuj cov lus qhia, nws nyob hauv Tswv Ntuj, thiab Tswv Ntuj nyob hauv nws. Peb paub tias Tswv Ntuj nyob hauv peb, vim muaj Leej Ntuj Plig uas Tswv Ntuj tau pub rau peb.
4   1 Cov zoo nyiad, nej txhob ntseeg txhua leej txhua tus zaj tswv yim mog. Nej yuav sim tib neeg tej zaj tswv yim ntawd saib puas yog tuaj ntawm Tswv Ntuj tuaj. Vim ntau tus yaj saub cuav tau tawm tuaj mus nyob puv lub qab ntuj lawm. 2 Nej yuav paub Tswv Ntuj lub tswv yog muaj li no : lub tswv yim twg zeem tseeb tias Yes Xus Pleev nqes los yuav ib lub cev neeg, mas lub tswv yim ntawd tuaj ntawm Tswv Ntuj tuaj. 3 Lub tswv yim twg tsis zeem tseeb txog Yes Xus, mas nws tsis tuaj ntawm Tswv Ntuj tuaj, yog tus tiv Leej Pleev lub tswv yim. Nej tau hnov tias tus tiv Leej Pleev yuav tuaj; nyem no, nws twb nyob hauv lub qab ntuj neeg lawm.
4 Cov me nyuad, nej tuaj ntawm Tswv Ntuj tuaj, nej twb yeej cov tiv Leej Pleev lawm. Vim Tus nyob hauv nej, nws loj dua tus nyob hauv lub qab ntuj neeg. 5 Lawv, mas lawv tuaj hauv lub qab ntuj neeg tuaj. Lawv hais lus raws li lub qab ntuj neeg, ces lub qab ntuj neeg mloog lawv. 6 Ntawm peb, mas peb tuaj ntawm Tswv Ntuj tuaj; tus twg paub Tswv Ntuj, mas nws mloog peb; tus tsis tuaj ntawm Tswv Ntuj tuaj, mas nws tsis mloog peb. Li ntawd, peb thiaj paub tias lub tswv yim twg yog qhov tseeb, thiab lub tswv yim twg yog qhov yuam kev.

NPN        2:   7BC-8, 10-12A

Txais:  (8ab) Kuv yuav muab tas ib tsoom haiv neeg ua cuab tam pub rau koj.

HUAB TAIS hais rau kuv tias: ‘Koj yog kuv leej tub,  
hnub no kuv tau yug koj los.
Koj thov kuv ces kuv yuav muab tas
ib tsoom haiv neeg ua cuab tam pub rau koj
thiab lub ntiaj teb mus txog tim npoo
ntuj kawg yuav yog koj teej tug.”

Txais…

Ib tsoom vaj, nej yuav tsum to taub zoo txog,
cov tswj lub ntiaj teb, nej yuav tsum hloov siab.
Nej yuav hwm HUAB TAIS, nej tsob hwb nws;  
Nej yuav dhia zoo siab nrog kev tshee na.

Txais…

As Les Lus Yas:        MT  4:   23

Txais:  As les lus yas, as les lus yas.

Yes Xus tshaj lub Moo Zoo txog lub Ceeb Tsheej  
thiab nws kho txhua yam mob hauv tsoom pej xeem zoo hlo.      

Txais:  As les lus yas, as les lus yas.

Ntawv Moo Zoo:       MT  4:   12-17, 23-25

12 Yes Xus hnov tias luag ntes Zam lawm, ces nws khiav mus rau Nkas Lis Lais teb. 13 Nws tso Nas Xas Las tseg, nws mus nyob rau Kas Fas Naus, ntawm ntug dej ntuj, nyob ntawm Ntxas Npus Loos thiab Nes Tas Lis daim av. 14 Li ntawd muaj raws li yaj saub His Xais xub hais tseg tias :
15 “Ntxas Npus Loos daim av thiab Nes Tas Lis daim av, kev mus rau dej ntuj, cov teb chaws nyob sab dej Yos Las Das tim ub, cov neeg teev pej kum dab uas nyob Nkas Lis Lais, 16 haiv neeg uas nyob hauv kev tsaus ntuj, lawv pom ib qho pom kev ci loj; hos nyob saum cov neeg uas maub hauv lub teb chaws muaj kev tuag roos, muaj ib qho pom kev ci tawm tuaj kaj lawv lawm.”
17 Txij ntawd los, Yes Xus pib ceeb toom hais tias : "Nej hloov siab mog, vim Ntuj lub Ceeb Tsheej los txog ze lawm.”
23 Yes Xus mus ncig thoob lub xeev Nkas Lis Lais, nws qhuab qhia nyob hauv lawv cov tsev txoos, nws tshaj lub Moo Zoo txog Ntuj lub Ceeb Tsheej, nws kho tas puas tsav yam mob, tas puas tsav yam txiab nkeeg hauv tsoom pej xeem zoo tas. 24 Nws lub moo nto mus thoob Xis Lias teb. Ces sawv daws coj cov neeg raug txhua hom mob, txhua hom txiab xeeb tuaj rau nws : cov raug dab, cov neeg vwm, cov tuag tes tuag taw huv si. Nws kho lawv sawv daws zoo tas. 25 Muaj tej pab neeg coob coob tuaj caum nws, lawv tuaj Nkas Lis Lais, tuaj Des Kas Pos Lis, tuaj Yes Lus Xas Les, tuaj Yus Das teb, thiab tuaj sab dej Yos Las Das tim ub tuaj.

TIM      8      LUB      1      HLIS      2019

Hnub Peb Lis Piam Yes Xus Tawm Tuaj (Epiphany) Xyoo C

Zaj Nyeem Ib:        1 ZAM  4:    7-10

7 Cov zoo nyiad, peb yuav sib nyiam sib hlub mog , vim txoj kev nyiam tuaj ntawm Tswv Ntuj tuaj, ua li mas tus twg nyiam, tus ntawd yug ntawm Tswv Ntuj los, thiab nws paub Tswv Ntuj. 8 Tus tsis muaj kev nyiam, mas nws tsis paub Tswv Ntuj, vim Tswv Ntuj yog txoj kev nyiam. 9 Tswv Ntuj txoj kev nyiam peb tawm los rau qhov muag pom xyeem li no : Tswv Ntuj xa nws Leej Tub Twm Zeej tuaj nyob ntiaj teb no, kom peb muaj txoj sia nyob hauv nws Leej Tub. 10 Txoj kev nyiam yog zoo li no : Tsis yog peb tau nyiam Tswv Ntuj, tiam sis yog Tswv Ntuj tau nyiam peb, thiab nws xa nws Leej Tub tuaj ua nqi txhiv peb ntawm peb cov txhaum.

NPN       72:   1-2, 3-4, 7-8

Txais: (11) HUAB TAIS, txhua haiv neeg nyob hauv ntiaj teb yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab yuav kav koj cov neeg me rawj kev txawj txiav txim .

Txais…

Cov roob siab nej muab kev thaj yeeb rau tsoom pej xeem,
cov pov roob nej muab kev ncaj ncees rau lawv.
Nws yuav tuaj cov pluag hauv tsoom pej xeem tog,
nws yuav cawm cov txom nyem tej me nyuam.

Txais…

Kev ncaj ncees yuav tawg paj lub caij nws ua vaj,
thiab yuav muaj kev thaj yeeb lug mus txog thaum tsis muaj lub hli ntxiv.
Thov kom nws kav txij ib lub hiav txwv mus rau lwm lub,
txij tus Niam Dej mus txog tim npoo ntiaj teb kawg.

Txais…

As Les Lus Yas:        LK  4:   18

Txais: As les lus yas, as les lus yas

Huab Tais tau xa kuv tuaj kom kuv
coj ib lub moo zoo tuaj rau cov pluag
thiab tshaj kev twj lij rau cov neeg raug txim.

Txais: As les lus yas, as les lus yas

Ntawv Moo Zoo:        MK  6:   34-44

34 Thaum Yes Xus nqes nkoj, nws pom ib pab neeg coob coob, nws lub siab quaj dhi hlub lawv, vim lawv zoo li ib co yaj uas tsis muaj tswv zov. Ces Yes Xus pib qhia lawv txog ntau yam. 35 Thaum lub sij hawm lig lawm, cov thwj tim los hais rau Yes Xus tias : “Qhov chaw no tsis muaj neeg nyob li, thiab tsam no lig lawm, 36 koj tso lawv rov mus, kom lawv mus muas noj ntawm cov thaj tsam thiab cov zej zog nyob ib ncig ntawm no.” 37 Tiam sis Yes Xus hais rau lawv tias : "Nej muab rau lawv noj mas." Cov thwj tim hais tias : "Peb puas yuav tsum mus muas mov txog ob puas lub txiaj nyiag coj los rau lawv noj ?” 38 Yes Xus hais rau lawv tias : "Nej muaj pes tsawg lub ncuav mov ? Nej mus xyuas saib." Cov thwj tim mus nug, lawv hais tias : "Tsib lub ncuav mov, thiab ob tug ntses." 39 Yes Xus kom cov thwj tim coj sawv daws zaum ua tej pab tej pawg saum cov nroj ntsuab. 40 Ces tas sawv daws zaum ua tej pab ib puas leej, tej pab tsib caug leej. 41 Yes Xus tuav tsib lub ncuav mov thiab ob tug ntses, nws tsa muag ntsia saum ntuj, nws hais zaj foom hmoov zoo rau, nws muab cov ncuav mov ntais, nws cev rau cov thwj tim kom lawv nqa mus rau sawv daws noj. Yes Xus kuj muab ob tug ntses faib rau sawv daws thiab. 42 Txhua leej txhua tus tau noj thiab sawv daws tau noj tsau npo. 43 Lawv khaws tej sab mov seem tau puv kaum ob tawb thiab cov nqaij ntses seem. 44 Cov neeg uas noj cov mov ntawd muaj tsib txhiab leej txiv neej.

TIM 9 LUB 1 HLIS 2019

Hnub Plaub Lis Piam Yes Xus Tawm Tuaj Xyoo C

Zaj Nyeem Ib: 1 ZAM 4: 11-18

11 Cov zoo nyiad, yog Tswv Ntuj nyiam peb npaum li ntawd, mas peb kuj yuav tsum sib nyiam sib hlub thiab. 12 Tsis muaj leej twg tau pom Tswv Ntuj ib zaug li, tiam sis yog peb sib nyiam sib hlub, mas Tswv Ntuj nyob hauv peb, thiab nws txoj kev nyiam yuav zoo txhij zoo txhua hlob tiav log nyob hauv peb.
13 Peb paub tias peb nyob hauv Tswv Ntuj, thiab nws nyob hauv peb vim qhov no : yog qhov tias nws pub nws Leej Ntuj Plig rau peb. 14 Ntawm peb, mas peb tau pom ntsoov ces peb ua tim khawv zeem tias Leej Txiv tau xa nws Leej Tub tuaj cawm lub qab ntuj neeg. 15 Tus twg lees tias Yes Xus yog Tswv Ntuj Leej Tub, mas Tswv Ntuj nyob hauv nws, thiab nws nyob hauv Tswv Ntuj. 16 Ntawm peb mas peb zeem tau lawm thiab peb ntseeg tias Tswv Ntuj muaj kev nyiam peb hlub peb. Tswv Ntuj yeej yog txoj kev nyiam; tus twg nyob hauv txoj kev nyiam, mas nws kuj nyob hauv Tswv Ntuj, thiab Tswv Ntuj nyob hauv nws. 17 Thaum txoj kev nyiam zoo txhij txhua, hlob tiav log nyob hauv peb lawm mas yuav muaj zoo li no : Peb yuav muaj kev tso siab lug thaum txog hnub txiav txim, vim tias Tswv Ntuj zoo li cas, mas peb kuj yuav zoo li ntawd nyob ntiaj teb no thiab. 18 Txoj kev ntshai tsis nyob hauv txoj kev nyiam, tiam sis txoj kev nyiam uas zoo txhij txhua muab txoj kev ntshai tshem tawm pov tseg, vim nyob hauv txoj kev ntshai, mas kuj muaj txoj kev raug txim nrog thiab : li ntawd, tus twg ntshai, mas nws tseem tsis tau zoo txhij txhua hlob tiav log nyob hauv txoj kev nyiam.

NPN 72: 1-2, 10, 12-13

Txais: (11) HUAB TAIS, txhua haiv neeg nyob hauv ntiaj teb yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab yuav kav koj cov neeg me rawj kev txawj txiav txim .

Txais…

Cov vaj nyob Tas Xis thiab nyob hauv cov pov txwv yuav tuaj hawm nws;
Cov vaj nyob Xes Npas thiab Xas Npas yuav nqa paj tshab tuaj rau nws.

Txais…

Nws yuav cawm tus pluag thaum nws quaj hu,
thiab yuav pab tus raug txom nyem thaum tsis muaj neeg pab nws.
Nws yuav hlub cov neeg me thiab cov pluag;
nws yuav cawm cov pluag txoj sia.

Txais…

As Les Lus Yas: 1 TM 3: 16

Txais: As les lus yas, as les lus yas

Koj muaj koob meej, Huab Tais Pleev,
neeg tshaj txog koj rau cov tsis paub Tswv Ntuj.
Koj muaj koob meej, Huab Tais Pleev,
tas ntiaj teb neeg ntseeg txog koj.

Txais: As les lus yas, as les lus yas

Ntawv Moo Zoo: MK 6: 45-52

45 Thaum cov tsib txhiab leej neeg tau noj mov tsau plab tas, Yes Xus txhib nws cov thwj tim kom nce nkoj ua nws ntej mus lawm sab ntug dej tim ub, mus rau zaj ntawm Npes Xais Das, hos Yes Xus tseem nyob hais lus rau tsoom sid kom lawv rov qab mus tsev. 46 Thaum lawv mus tas lawm, nws nce mus saum roob mus teev ntuj saud. 47 Thaum tsaus ntuj lawm, lub nkoj twb mus deb txog tom plawv dej ntuj lawm, hos Yes Xus tib leeg tseem nyob tim ntug nqhuab. 48 Yes Xus pom cov thwj tim nquam nkoj raug cua hlob ntsawj lawv, vim cua tshuab tom hauv ntej tuaj. Thaum yuav kaj ntug kwv yees peb teev sawv ntxov, Yes Xus mus ko taw saum nplaim dej caum lawv qab, nws npaj yuav huas lawv ntej. 49 Cov thwj tim pom Yes Xus mus kev saum nplaim dej, lawv xav tias yog poj ntxoog, ces lawv qw qw. 50 Sawv daws puav leej pom tib si ces lawv ntshai tas. Tab sis, Yes Xus hais lus tam sis ntawd rau lawv, nws hais tias : "Nej ua siab loj ! Yog kuv, nej txhob ntshai." 51 Yes Xus thiaj nce mus nrog lawv nyob hauv nkoj, cua cia li tu nrho. Ces cov thwj tim poob siab loj kawg nkaus, 52 vim lawv tseem tsis tau to taub dab tsi txog cov ncuav mov li, lawv lub siab haj tseem qhwv nrees cia xwb.

TIM 10 LUB 1 HLIS 2019

Hnub Tsib Lis Piam Yes Xus Tawm Tuaj

Zaj Nyeem Ib: 1 ZAM 4: 19–5:4

Cov zoo nyiad,
19 Ntawm peb, mas peb nyiam vim Tswv Ntuj xub tau nyiam peb ua ntej lawm. 20 Yog leej twg hais tias : “Kuv nyiam Tswv Ntuj,” tab sis nws ntxub nws tus kwv tij, mas nws yog ib tug neeg dag. Vim tus tsis nyiam nws tus kwv tij uas nws qhov muag pom, mas nws nyiam tsis tau Tswv Ntuj uas nws qhov muag tsis pom. 21 Lo lus qhia uas peb tau txais ntawm nws los yog lo lus tias: kom tus nyiam Tswv Ntuj mas nws kuj yuav tsum nyiam nws tus kwv tij thiab.
5 1 Leej twg ntseeg tias Yes Xus yog Leej Pleev, mas tus ntawd yug ntawm Tswv Ntuj los. Vim leej twg nyiam leej Txiv mas nws kuj nyiam tus yug ntawm leej Txiv los thiab. 2 Qhov ua kom peb paub tias peb nyiam Tswv Ntuj cov me nyuam, yog qhov tias peb nyiam Tswv Ntuj, thiab peb coj nws cov lus qhia. 3 Vim kev nyiam Tswv Ntuj yog li no: yog kom peb coj nws cov lus qhia; Tswv Ntuj cov lus qhia tsis hnyav li. 4 Vim yam twg yug ntawm Tswv Ntuj los mas yam ntawd yeej lub qab ntuj neeg; txoj kev uas yeej lub qab ntuj neeg yog peb txoj kev ntseeg.

NPN 72: 1-2, 14+15BC, 17

Txais: (11) HUAB TAIS, txhua haiv neeg nyob hauv ntiaj teb yuav pe hawm koj.

Tswv Ntuj, thov koj pub txoj kev txawj txiav txim rau tus vaj,
thiab txoj kev ncaj ncees rau vaj tus tub.
Nws thiaj yuav tswj koj haiv neeg raws kev ncaj ncees
thiab yuav kav koj cov neeg me rawj kev txawj txiav txim .

Txais…

Nws yuav cawm lawv dim ntawm txoj kev
Raug luag dag thiab raug luag tsim txom,
thiab nws yuav saib lawv cov ntshav muaj nuj nqes.
Kom muaj tus thov ntuj rau lawv tas mus li;
hnub dhau hnub lawv yuav cav txog nws.

Txais…

Thov kom nws lub npe nto moo mus li,
kom nws lub npe nyob ntev npaum lub hnub
Tas txhua xeem neeg nyob ntiaj teb yuav
txais koob hmoov nyob hauv nws,
tas txhua haiv neeg yuav qhuas txog nws yog tus tau hmoov zoo.

Txais…

As Les Lus Yas: LK 4: 18

Txais: As les lus yas, as les lus yas

HUAB TAIS tau xa kuv tuaj kom kuv coj ib lub moo zoo rau cov pluag
thiab tshaj tawm txoj kev twj lij rau cov neeg nyob txim.

Txais: As les lus yas, as les lus yas.

Ntawv Moo Zoo: LK 4: 14-22

14 Yes Xus rov mus rau Nkas Lis Lais, nws muaj Leej Ntuj Plig lub zog puv hauv nws. Nws lub moo nto lug mus puv ib cheeb tsam cov zej zog nyob ntawd. 15 Nws qhia tsoom sid hauv cov tsev txoos, tas sawv daws qhuas nws. 16 Ces Yes Xus los txog Nas Xas Les, lub zos uas nws hlob; hnub Xas Npas Tos, nws mus hauv lub tsev txoos xws li nws ua kam, thiab nws sawv mus nyeem ntawv. 17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias:
18 “Huab Tais lub Tswv Yim nyob saum kuv, vim nws tau pleev roj los qee kuv kom kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim txog txoj kev twj lij, thiab rau cov dig muag txog kev yuav rov pom kev; nws xa kuv mus tso cov raug luag tsim txom kom dim rov los nyob twj lij, 19 thiab xa kuv mus tshaj tias yog xyoo Huab Tais pom zoo.”
20 Yes Xus rov kauv kauj ntawv rau, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov lawm." 22 Tas cov neeg ntawd hais lus zoo kawg txog nws, lawv qhuas cov lus muaj txiaj ntsim tawm hauv nws lub ncauj los. Lawv hais tias : "Tus ntawd, tsis yog Yos Xes tus tub lod ?"

TIM      11      LUB      1      HLIS      2019

Hnub Rau Lis Piam Yes Xus Tawm Tuaj Xyoo C

Zaj Nyeem Ib:       1 ZAM  5:   5-13

Cov zoo nyiad,
5 Leej twg yog tus yeej lub qab ntuj neeg? Yog tus ntseeg tias Yes Xus yog Tswv Ntuj Leej Tub. 6 Tus tuaj nyob hauv dej thiab nyob hauv ntshav  tuaj, Yes Xus Pleev, nws tsis yog tuaj nyob hauv dej xwb, nws tuaj nyob hauv dej thiab nyob hauv ntshav tuaj; Leej Ntuj Plig ua tim khawv zeem tseeb txog qhov ntawd, vim Leej Ntuj Plig yog qhov tseeb. 7 Li ntawd muaj peb tug tim khawv. 8 Yog Leej Ntuj Plig, dej thiab ntshav. Peb tug no puav leej hais tib los xwb. 9 Peb twb ntseeg tib neeg lo lus ua tim khawv, ua li mas Tswv Ntuj lo lus ua tim khawv tseem loj dua tib neeg lo lus. Tswv Ntuj lo lus ua tim khawv uas nws hais zeem tseeb txog nws Leej Tub yog lo lus no : 10 Tus twg ntseeg txog Tswv Ntuj Leej Tub, mas nws tau lo lus tim khawv zeem tseeb ntawd los nyob hauv nws. Hos tus tsis ntseeg Tswv Ntuj, mas nws saib tias Tswv Ntuj yog tus dag, vim nws tsis ntseeg lo lus tim khawv zeem tseeb uas Tswv Ntuj hais txog nws Leej Tub. 11 Tswv Ntuj lo lus ua tim khawv zeem tseeb yog li no : Tswv Ntuj pub txoj sia nyob mus li rau peb, txoj sia ntawd nyob hauv nws Leej Tub. 12 Leej twg tau Leej Tub, ces nws tau txoj sia. Leej twg tsis tau Tswv Ntuj Leej Tub, mas nws kuj tsis tau txoj sia thiab.
13 Kuv sau tej ntawd tuaj rau nej, kom nej paub tseeb tias nej tau txoj sia nyob mus li vim nej ntseeg txog Tswv Ntuj Leej Tub lub npe.

NPN       147:   12-13, 14-15, 19-20

Txais: (12a) Yes Lus Xas Les, koj cia li cav txog Huab Tais.
Los: As les lus yas

Yes Lus Xas Les, koj cav txog koj tus Huab Tais,
Xis Yoos, koj qhuas txog koj tus Tswv Ntuj.
Vim nws tau ua kom koj cov tab ntoo ntawm rooj vag khov tuaj.
Nws tau foom koob hmoov rau koj cov me nyuam uas nyob hauv koj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws ua kom muaj kev thaj yeeb nyob hauv koj tus ciam teb.
Nws ua kom koj muaj cov mov qab noj tsau npo.
Nws xa nws lo lus ceeb toom tuaj rau ntiaj teb,
nws lo lus khiav ceev nrooj tuaj.

Txais: (12a) Yes Lus Xas Les, koj cia li cav txog Huab Tais.
Los: As les lus yas

Nws tshaj nws tej lus rau Yas Kos
thiab nws tej kev cai tej lij choj rau His Xas Lais.
Nws tsis tau ua li no dua rau lwm haiv neeg,
tsis tau qhia nws tej lij choj rau lawv paub li. As les lus yas.

Txais: (12a) Yes Lus Xas Les, koj cia li cav txog Huab Tais.
Los: As les lus yas

As Les Lus Yas:       MT  4:   23

Txais: As les lus yas, as les lus yas

Yes Xus tshaj lub Moo Zoo txog Ntuj Ceeb Tsheej
thiab nws kho txhua yam mob hauv tsoom pej xeem zoo hlo.

Txais: As les lus yas, as les lus yas

Ntawv Moo Zoo:       LK  5:   12-16

12 Muaj ib zaug, Yes Xus nyob hauv ib lub nroog, muaj ib tug neeg nws ib ce mob ruas tas huv si. Thaum nws pom Yes Xus, nws khoov ntsej muag ti av pe, nws thov Yes Xus tias : "Huab Tais, yog koj xav mas koj ua tau kom kuv rov huv tuaj." 13 Ces Yes Xus cev tes tuav tus neeg mob ruas, nws hais tias : "Kuv xav. Koj cia li huv tuaj." Tam sis ntawd tus mob ruas tso tus neeg tseg. 14 Yes Xus txwv tus neeg ntawd kom txhob hais dab tsi rau leej twg li.  Tab sis “Koj yuav mus thws koj lub cev rau tus Leej Choj saib, thiab koj yuav cev tej yam ntxuav txhaum raws li Mais Xes qhia, los ua pov thawj rau lawv paub." 15 Tiam sis Yes Xus lub moo haj yam nrov zuj zus xwb. Tej pab neeg coob coob tuaj sib txoos mloog Yes Xus, thiab kom Yes Xus kho lawv cov mob kom zoo. 16 Tab sis Yes Xus mus nraim nyob tom tej chaw tsis muaj neeg, nws teev Ntuj nyob ntawd.

TIM 12 LUB 1 HLIS 2019

Hnub Xya Lis Piam Yes Xus Tawm Tuaj Xyoo C

Zaj Nyeem Ib: 1 ZAM 5: 14-21

Cov zoo nyiad:
14 Peb muaj kev tso siab lug rau Tswv Ntuj tias yog peb thov ib yam raws li Tswv Ntuj lub siab xav, mas nws yeej yuav mloog peb. 15 Yog peb paub tias nws mloog peb thaum peb thov txhua tsav txhua yam, mas peb kuj paub tias peb twb tau txhua yam uas peb thov lawm.
16 Yog nej leej twg pom nws tus kwv tij ua ib qho txhaum , uas tsis yog ib qho txhaum tuag, mas nws yuav thov Ntuj rau nws tus kwv tij, ces Tswv Ntuj yuav pub txoj sia rau tus kwv tij ntawd, tiam sis yuav tsum tsis yog ib qho txhaum tuag. Vim muaj ib hom txhaum uas yog kev tuag; kuv tsis hais kom thov Ntuj rau tus neeg ua qhov txhaum tuag ntawd. 17 Tas puas tsav yam tsis zoo yeej yog kev txhaum, tab sis muaj ib hom txhaum tsis yog txhaum tuag.
18 Peb paub zoo tias tus yug ntawm Tswv Ntuj los, mas nws tsis ua txhaum, vim tias tus yug ntawm Tswv Ntuj los mas Tswv Ntuj pov hwm nws, ces tus Phem kov tsis tau nws. 19 Peb paub tias peb yog Tswv Ntuj tug, hos tas lub qab ntuj neeg nyob hauv tus Phem lub hwj huam. 20 Peb kuj paub tias Tswv Ntuj Leej Tub twb tuaj lawm, nws pub txoj kev txawj mem tau rau peb, kom peb paub tus uas yog tus Tseeb. Peb nyob hauv tus uas yog tus Tseeb, hauv nws Leej Tub Yes Xus Pleev. Nws yog tus Tseem Tswv Ntuj, nws yog txoj sia nyob mus li. 21 Cov me nyuad, nej ceev faj txog cov tswv ntuj cuav mog !

NPN 149: 1-2, 3-4, 5-6A+9B

Txais: (4a) Huab Tais zoo siab nyob hauv nws haiv neeg.
los: As les lus yas

Nej hu ib zaj nkauj tshiab rau HUAB TAIS,
nej cav txog nws nyob hauv tsoom ntseeg lub txoos.
His Xas Lais yuav zoo siab nyob hauv tus uas tsim lawv,
Xis Yoos cov me nyuam yuav luag ntxhi nyob hauv lawv tus vaj.

Txais: (4a) Huab Tais zoo siab nyob hauv nws haiv neeg.
los: As les lus yas

Lawv yuav ua kev lom zem yoj cev cav txog nws lub npe,
lawv yuav hu nkauj cav txog nws nrog suab nruas thiab suab nkauj nog ncas.
Vim HUAB TAIS hlub nws haiv neeg,
thiab nws muab txoj kev yeej ua zam npua cov neeg me.

Txais: (4a) Huab Tais zoo siab nyob hauv nws haiv neeg.
los: As les lus yas

Cov muaj lub siab ntseeg hom khaj nyob hauv txoj kev nto koob meej;
lawv yuav hu nkauj zoo siab hauv lawv tej chaw nyob;
lawv lub qa tsuas muaj qw suab cav txog Tswv Ntuj.
Qhov no yog cov uas ntseeg nws lub koob meej. As les lus yas.

Txais: (4a) Huab Tais zoo siab nyob hauv nws haiv neeg.
los: As les lus yas

As Les Lus Yas: MT 4: 16

Txais: As les lus yas, as les lus yas

Haiv neeg zaum hauv kev tsaus ntuj tau pom ib qhov ci pom kev loj,
Qho pom kev tawm tuaj ci rau cov uas nyob hauv lub teb chaws muaj kev tuag roos.

Txais: As les lus yas, as les lus yas

Ntawv Moo Zoo: ZAM 3: 22-30

22 Yes Xus nrog nws cov thwj tim mus rau teb chaws Yus Das, nws nrog lawv nyob ntawd, thiab nws ua cov kab ke ntxuav. 23 Zam kuj ua kab ke ntxuav nyob Es Noos ze Xas Lis thiab, vim nyob ntawd muaj dej ntau, tsoom neeg tuaj cuag nws, ces lawv txais cov kab ke ntxuav. 24 Thaum ntawd, Zam tseem tsis tau raug luag muab kaw hauv tsev loj faj. 25 Muaj ib zaug, Zam cov thwj tim nrog ib tug Yus Das sib cav txog txoj kev ntxuav txhaum. 26 Lawv los cuag Zam, lawv hais rau nws tias : "Las Npis, tus uas nrog koj ua ke nyob sab dej Yos Las Das tim ub, tus uas koj ua tim khawv hais txog nws, saib zaum no nws ua kab ke ntxuav thiab, tas ib tsoom neeg tuaj cuag nws." 27 Zam teb tias : "Neeg muab tsis tau ib yam dab tsi los ua nws tug, yog Ntuj tsis pub rau nws. 28 Nej yog cov tim khawv hnov kuv hais tias : Kuv tsis yog Leej Pleev, kuv yog tus Ntuj xa tuaj ua nws ntej. 29 Tus tau nkauj nyab, yog nraug vauv. Tab sis nraug vauv tus phooj ywg sawv ntsug nyob ntawd, nws hnov nraug vauv; nws zoo siab kawg vim nws hnov nraug vauv lub suab. Li ntawd kuv muaj kev zoo siab puv npo lawm. 30 Tus ntawd nws yuav tsum loj tuaj, hos kuv yuav tsum me tuaj.”

TIM      14      LUB      1      HLIS     2019

Hnub Ob Lis Piam Ib Nruab Xyoo C Nruab Lis Piam Xyoo I

Zaj Nyeem Ib:       HES NPLAWS  1:   1-6

Cov kwv tij nkauj muam,
1 Txheej thaum ub, muaj ntau ntau zaus thiab ntau ntau txoj kev uas Tswv Ntuj tau hais lus rau peb cov yawg koob nyob hauv cov yaj saub. 2 Lub zim txwv thaum kawg no, Tswv Ntuj hais nws cov lus rau peb nyob hauv nws leej Tub, uas nws tau tsa ua tus yuav txais tas txhua yam los ua cuab tam, thiab kuj yog tus tau nrog nws tsim lub sim ceeb. 3 Leej Tub yog Tswv Ntuj lub hwj chim ci ntsa iab, thiab yog Tswv Ntuj tus ntsuj duab; nws siv nws lo lus muaj zog tuav lub sim ceeb kom nyob ruaj; thaum nws ua txoj hauj lwm ntxuav kev txhaum pov tseg tas lawm, nws mus zaum ntawm tus Muaj Hwj Huam nyob saum txheej siab sab xis. 4 Nws loj dua ib tsoom tshiab, thiab lub npe nws tau txais loj dua lawv tej npe.
5 Puas muaj ib tug tshiab twg uas Tswv Ntuj tau hais rau nws tias : “Koj yog kuv Leej Tub, hnub no kuv tau yug koj los ?” Los puas: “Kuv yog nws Txiv, nws yog kuv Leej Tub” ? 6 Thaum Tswv Ntuj xa Leej Tub Hlob los yug rau hauv lub ntiaj teb no, nws kuj tseem hais tias : “Kom tas Tswv Ntuj tsoom tshiab pe hawm nws.”

NPN       97:   1+2B, 6+7C, 9

Txais: (7c) Tas Huab Tais cov tshiab yuav pe hawm nws.

HUAB TAIS ua vaj, kom lub ntiaj teb cia li hom khaj,
kom ntau lub pov txwv cia li zoo siab.
Kev ncaj ncees thiab kev txiav txim yog tus taw
txheem nws lub theej kiab.

Txais: (7c) Tas Huab Tais cov tshiab yuav pe hawm nws.

Lub ntuj tshaj nws txoj kev ncaj ncees,
tas txhua haiv neeg pom nws lub hwj chim.
Kom tas nws tsoom tshiab cia li pe hawm nws.

Txais: (7c) Tas Huab Tais cov tshiab yuav pe hawm nws.

HUAB TAIS, koj yog tus nyob siab saib tas lub ntiaj teb.
koj loj tshaj tas ib tsoom tswv ntuj.

Txais: (7c) Tas Huab Tais cov tshiab yuav pe hawm nws.

As Les Lus Yas:       MK  1:   15

Txais: As les lus yas, as les lus yas.

Tswv Ntuj lub Ceeb Tsheej nyob ze ze lawm,
nej lees txhaum thiab ntseeg txog lub Moo Zoo.

Txais: As les lus yas, as les lus yas.

Ntawv Noo Zoo:       MK  1:   14-20

14 Thaum luag ntes Zam lawm, Yes Xus mus Nkas Lis Lais teb; nws tshaj Tswv Ntuj lub Moo Zoo tias : 15 "Txog lub caij teem lawm, Tswv Ntuj lub Ceeb Tsheej los txog ze lawm, nej lees txhaum thiab nej ntseeg lub Moo Zoo."
16 Thaum Yes Xus taug ntug dej ntuj Nkas Lis Lais, nws pom Xis Moos, thiab Xis Moos tus kwv As Nres, nkawd tab tom pov vas rau hauv dej ntuj, vim nkawd yog tub puav ntses. 17 Yes Xus hais rau nkawd tias : "Neb raws kuv mus, kuv yuav muab neb hloov ua tub puav neeg." 18 Nkawd tso plhuav nkawd cov vas puav ntses tseg tam sis ntawd, nkawd raws Yes Xus mus. 19 Yes Xus mus ntxiv me ntsis tom ntej, nws pom Yas Kos, uas yog Ntxes Npes Dais tus tub, thiab Yas Kos tus kwv Zam. Nkawd kuj nyob hauv nkoj thiab, nkawd tseem tab tom ntxiv nkawd cov vas puav ntses. 20 Yes Xus hu nkawd tam sis ntawd ces nkawd tso plhuav nkawd txiv Ntxes Npes Dais rau hauv nkoj nrog cov tub zog, nkawd raws Yes Xus mus.

TIM      15      LUB      1      HLIS      2019

Hnub Peb Lis Piam Ib Nruab Xyoo C Nruab Lis Piam Xyoo I

Zaj Nyeem Ib:       HES NPLAWS  2:   5-12

5 Tswv Ntuj tsis tau muab lub sim ceeb fab lwm tiam uas peb hais txog zwm rau ib co Tshiab. 6 Muaj ib tug tau sau lo lus zeem tseeb no tias : “Neeg yog dab tsi koj thiaj nco txog nws ?” los “Leej tib neeg tus tub yog dab tsi, koj thiaj muab nws saib rau qhov siab ? 7 Koj tau muab nws tso qis dua cov Tshiab me ntsis.  Koj muab hwj chim thiab koob meej ua mom teev kub rau nws ntoo. 8 Koj tso puas tsav puas yam rau hauv nws qab xib taws.” Tswv Ntuj tso txhua yam zwm rau tib neeg, nws tsis cia ib yam dab tsi uas yuav tsis zwm rau tib neeg. Lub zim txwv no, peb tseem tsis tau pom tias txhua yam zwm rau tib neeg. 9 Tiam sis Yes Xus tus uas tau rov txo nws qis dua cov Tshiab ib me ntu, mas peb pom tias nws tau lub hwj chim thiab lub koob meej ua mom teev kub ntoo lawm, vim nws tau raug txom nyem nyiaj txoj kev tuag. Tswv Ntuj lub txiaj ntsim ua kom nws yuav tsum saj txoj kev tuag, nws thiaj pab tau txhua tus neeg.
10 Vim tias, tus uas tas puas tsav yam yog nws tug thiab nws yog tus tsim tas puas tsav yam, mas nws pom zoo kom tus ntaus thawj coj cov tub ki coob leej mus txais koob meej, tus ntawd yuav tsum raug txom nyem loj nws thiaj yuav ua tau txoj hauj lwm cawm lawv kom tiav log zoo txhij txhua. 11 Vim tus ua tau kom luag ntshiab tuaj, thiab cov tab tom txais kev ntshiab, lawv sawv daws puav leej tawm ntawm ib tug los xwb. Vim li ntawd, nws thiaj tsis txaj muag hu lawv ua nws cov kwv. 12 Nws thiaj hais tias : “Kuv yuav tshaj koj lub npe rau kuv cov kwv, kuv yuav hu nkauj cav txog koj nyob hauv lub txoos.”

NPN        8:   2AB+5, 6-7, 8-9

Txais:   (7) Koj tau muab koj Leej Tub ua tus kav tej yam koj txhais tes tau tsim.

HUAB TAIS, peb tus Huab Tais, ua cas koj lub npe
yuav muaj hwj chim loj ua luaj rau saum tas lub ntiaj teb!
Neeg yog dab tsi, koj thiaj li quav ntsej txog nws?
As Das tus tub yog dab tsi, koj thiaj li khuv xim nws?

Txais:   (7) Koj tau muab koj Leej Tub ua tus kav tej yam koj txhais tes tau tsim.

Koj tau tsim nws qis me ntsis cov tshiab,    
koj tau muab koob meej thiab hwj chim rau nws ntoo.
Koj tau tsa nws ua tus kav tej yam koj txhais tes tau tsim,      
koj tso txhua tsav txhua yam rau hauv nws qab xib taws.      

Txais:   (7) Koj tau muab koj Leej Tub ua tus kav tej yam koj txhais tes tau tsim.

Xws li tas cov yaj thiab cov nyuj,
tas cov tsiaj nyob hauv tej nras liaj nras teb,
cov noog ya saum ntuj, cov ntses hauv hiav txwv,
thiab txhua yam tsiaj ua luam dej hauv hiav txwv.

Txais:   (7) Koj tau muab koj Leej Tub ua tus kav tej yam koj txhais tes tau tsim.

As Les Lus Yas:       1 TES XAS LOS NIS  2:   13

Txais:    As les lus yas, as les lus yas.

Nej yuav txais Tswv Ntuj lo lus, tsis txais li yog neeg lo lus,  
tiam sis raws li qhov tseeb tiag, uas yog Tswv ntuj lo lus.    

Txais:    As les lus yas, as les lus yas.

Ntawv Moo Zoo:       MK  1:   21-28

21 Yes Xus thiab nws cov thwj tim mus hauv Kas Fas Naus. Hnub Xas Npas Tos, Yes Xus mus hauv lub tsev txoos, nws qhia sawv daws tam sis ntawd. 22 Zeej tsoom qhuas nws cov lus qhia, vim nws qhia lawv xws li neeg muaj peev xwm, tsis zoo li cov kws Ntawv Ntshiab. 23 Tam sis ntawd, nyob hauv lawv lub tsev txoos, muaj ib tug neeg raug ib tug dab tsis huv nthe nthe, 24 nws hais tias: "Yes Xus Nas Xas Les, koj xav ua dab tsi rau peb ? Puas yog koj tuaj rhuav peb ? Kuv paub koj yog leej twg : koj yog Tswv Ntuj tus Ntshiab." 25 Yes Xus cem nws tias : "Ua twj ywm, koj cia li tawm hauv tus neeg no mus."
26 Dab tsis huv siv zog muab tus neeg ntawd nchos heev heev, nws nthe ib suab nrov nrov ces nws tawm hauv tus neeg mus. 27 Tas sawv daws ntshai, lawv sib nug zom zaws tias : “Qhov ntawd yog dab tsi ? Yog ib txog kev qhuab qhia tshiab muaj peev xwm kawg. Tab yog dab tsis huv los nws tswj taulawv, ces lawv mloog nws lus.”
28 Ces ib sij huam, Yes Xus lub moo nto lug rau txhua qhov, mus thoob ib cheeb tsam hauv xeev Nkas Lis Lais.

TIM      16      LUB      1      HLIS      2019

Hnub Plaub Lis Piam Ib Nruab Xyoo C Nruab Lis Piam Xyoo I

Zaj Nyeem Ib:      HES NPLAWS  2:   14-18

14 Vim ib co me nyuam koom ib co roj ntsha ib ce nqaij, mas Yes Xus kuj nrog lawv koom thiab, kom nws txoj kev tuag yeej tus tuav txoj kev tuag lub hwj huam, uas yog tus dab phem. 15 Yes Xus tso cov uas raug kev tuag muab lawv ua qhev nyob hauv txoj kev ntshai tuag tas lawv sim neej kom lawv dim. 16 Nws tsis yog tuaj cawm ib co tshiab, nws tuaj cawm Has Nplas Has tsoom xeeb ntxwv. 17 Vim li no, nws thiaj yuav tsum yug los zoo ib yam li nws cov kwv, kom nws ua tau ib tug Thawj Leej Choj khuv leej neeg thiab npuab Tswv Ntu zoo, nws thiaj theej tau tsoom pej xeem lub txhoj. 18 Vim nws tus kheej tau raug txom nyem nyob hauv txoj kev sim siab, mas nws thiaj muaj peev xwm pab tau cov uas raug kev sim siab.

NPN       105:   1-2, 3-4, 6-7, 8-9

Txais:   (8a) Huab Tais nco ntsoov tas mus li txog nws lo lus cog tseg.
los:   As les lus yas.

Nej ua HUAB TAIS tsaug, nej tuav txog nws lub npe,
nej tshaj tej yam nws tau ua rau cov haiv neeg paub.
Nej hu nkauj rau nws, nej ntaus suab paj nruag cav txog nws,
nej tshaj tawm txog tej yam loj nws tau ua.      

Txais:   (8a)  Huab Tais nco ntsoov tas mus li txog nws lo lus cog tseg.
los:  As les lus yas.

Nej txais koob meej nyob hauv nws lub npe,      
nej cia li zoo siab, nej cov uas muaj lub siab nrhiav HUAB TAIS!      
Nej nrhiav HUAB TAIS nrhiav nws lub zog,
nej yuav nrhiav tsob hwb nws tsis tseg.    

Txais:   (8a)  Huab Tais nco ntsoov tas mus li txog nws lo lus cog tseg.
los:  As les lus yas.

nej Has Nplas Has tsoom xeeb ntxwv, Tswv Ntuj cov tub txib,    
Yas Kos cov tub, nej cov nws tau xaiv,      
nws HUAB TAIS yog peb tus Tswv Ntuj!      
Nyob thoob ntiaj teb nws txoj kev txiav txim muaj yeej.  

Txais:   (8a)  Huab Tais nco ntsoov tas mus li txog nws lo lus cog tseg.
los:  As les lus yas.

Nws nco ntsoov tas mus li txog nws lo lus cog tseg      
uas nws tau hais ruaj khov kom kav ib txhiab tiam neeg,    
raws li nws tau hais rau Has Nplas Has  
thiab tau nrog His Xas Has cog lus.      

Txais:   (8a)  Huab Tais nco ntsoov tas mus li txog nws lo lus cog tseg.
los:  As les lus yas.

As Les Lus Yas:       ZAM  10:   27

Txais:  As les lus yas, as les lus yas

Huab Tais hais tias: Kuv cov yaj mloog kuv lub suab,
kuv paub lawv,  lawv taug raws kuv qab.  

Txais:  As les lus yas, as les lus yas

Ntawv Moo Zoo:      MK  1:   29-39

29 Yes Xus tawm hauv tsev txoos los, nws nrog Yas Kos thiab Zam nkawd mus hauv Xis Moos thiab As Nres nkawd tsev.  30 Xis Moos niam tais mob kub cev, nws pw saum txaj. Tam sim ntawd, lawv tham txog tus niam tais rau Yes Xus paub. 31 Yes Xus txav los tuav niam tais txhais tes, tsa nws sawv. Tus mob kub cev cia li thim hlo. Ces niam tais mus tsob hwb lawv.  
32 Yav tsaus ntuj, thaum lub hnub poob qho lawm, sawv daws coj tas nrho cov neeg mob thiab cov raug dab huv si tuaj rau Yes Xus. 33 Tas lub nroog sau nthwv tuaj nyob ua ke ntawm qhov rooj. 34 Yes Xus kho neeg coob zoo, uas lawv nyias raug nyias hom mob, thiab nws tseem ntiab ntau tus dab tawm; nws tsis pub cov dab hais lus li, vim lawv paub nws.  
35 Thaum sawv ntxov tseem tsaus ntuj nti, Yes Xus sawv, nws tawm mus rau ib qho chaw tsis muaj neeg, ces nws teev Ntuj nyob ntawd. 36 Xis Moos thiab cov neeg nrog nws raws Yes Xus qab mus nrhiav nws. 37 Thaum lawv nrhiav tau Yes Xus, lawv hais rau nws tias : "Sawv daws nrhiav koj." 38 Yes Xus hais rau lawv tias : "Peb mus rau lwm qhov chaw, hauv cov zej zog nyob tsis deb ntawm no, kom kuv tau kev qhuab qhia nyob ntawd thiab, yog vim li ntawd, kuv thiaj tawm tuaj."  39 Ces Yes Xus mus thoob lub xeev Nkas Lis Lais, nws qhuab qhia nyob hauv lawv cov tsev txoos, thiab nws ntiab dab phem tawm.

TIM      17      LUB      1      HLIS      2019

Hnub Tsib Lis Piam Ib Nruab Xyoo  C Nruab Lis Piam Xyoo I

Hwm LN Antony, Txiv Twj Cuab nyob Hais Nkws Tos teb

Zaj Nyeem Ib:       HES NPLAWS  3:   7-14

7 Leej Ntuj Plig Ntshiab hais tias : “Hnub no, yog nej hnov nws lub suab, 8 mas nej tsis txhob ua nej lub siab cam thawj xws li thaum ub muaj kev ntxeev siab thaum lub caij raug sim siab nyob teb chaws suab puam. 9 Nyob ntawd, nej cov yawg koob tau sim kuv thiab ua nyuaj rau kuv, ces lawv tau pom kuv cov hauj lwm tau plaub caug xyoo. 10 Kuv thiaj npau taws rau tiam neeg ntawd, kuv hais tias : ‘Lawv niaj hnub mus yuam kev nyob hauv lawv lub siab, lawv tsis paub kuv tej kev li.’ 11 Ces kuv npau taws, kuv cog lus tias lawv yuav tsis tau mus nyob hauv kuv lub chaw so.”
12 Cov kwv tij, nej yuav ceev faj, tsam nyob hauv nej muaj ib tug twg muaj lub siab phem tsis xav ntseeg, ces nws txav mus deb ntawm tus Tswv Ntuj muaj txoj sia. 13 Nej yuav tsum niaj hnub sib txhawb zog thaum tseem yog “hnub no,” kom xwv nej tsis txhob muaj ib tug twg cia kev txhaum ntxias nws kom nws ua lub siab cam thawj. 14 Vim tias peb yuav tau ua Leej Pleev cov phooj ywg mas yuav tsum yog peb nyob ruaj nreb hauv peb txoj kev cia siab txij thaum pib mus txog thaum xaus.

NPN        95:   6-7C, 8-9, 10-11

Txais:  ( 8 ) Hnub no yog nej hnov nws lub suab, nej tsis txhob ua lub siab cam thawj.

Tuaj peb mus khoov pe hawm nws, peb mus txhos caug
ntawm tus HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws saib, pab yaj nws coj.
 
Txais:  ( 8 ) Hnub no yog nej hnov nws lub suab, nej tsis txhob ua lub siab cam thawj.

Xav kom hnub no nej mloog nws lub suab hais:      
“Nej tsis txhob ua lub siab cam thawj li nyob Me Lis Npas,
lub caij uas nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hauj lwm los lawv tseem sim kuv thiab.”      

Txais:  ( 8 ) Hnub no yog nej hnov nws lub suab, nej tsis txhob ua lub siab cam thawj.

Tau 40 xyoo kuv ceeb laj nyiaj lawv phaj neeg ntawd kawg;    
kuv tau hais tias: “Haiv neeg no lub siab mus yuam kev,
lawv tsis paub kuv tej kev li.”    
Vim li no kuv npau taws, kuv tau cog lus tias:          
“Lawv yuav tsis tau nkag los nyob hauv kuv lub chaw so ib zaug li.”

Txais:  ( 8 ) Hnub no yog nej hnov nws lub suab, nej tsis txhob ua lub siab cam thawj.

As Les Lus Yas:        MT  4:   23

Txais:  As les lus yas, as les lus yas.

Yes Xus tshaj lub Moo Zoo txog Ntuj Ceeb Tsheej  
thiab nws kho txhua yam mob nyob hauv cov neeg zoo hlo.

Txais:  As les lus yas, as les lus yas.

Ntawv Moo Zoo:        MK  1:   40-45

40 Muaj ib tug neeg mob ruas tuaj cuag Yes Xus, nws txhos caug thov Yes Xus tias : "Yog koj xav, mas koj yeej ua tau kom kuv rov huv tuaj." 41 Yes Xus hlub tus neeg ntawd, Yes Xus cev tes tuav nws thiab hais rau nws tias : "Kuv xav. Koj rov huv tuaj." 42 Tam sim ntawd, tus mob ruas tso tus neeg ntawd tseg, nws cia li huv hlo. 43 Yes Xus txwv nruj rau nws thiab kom nws rov mus tam sis ntawd. 44 Yes Xus hais rau nws tias : "Koj ua twj ywm, txhob qhia dab tsi rau leej twg li. Tiam sis koj yuav mus thws koj lub cev rau tus leej choj saib, thiab mus cev paj tshab ntxuav txhaum rau koj raws li Mais Xes qhia, los ua puav pheej rau lawv pom." 45 Tab sis tus neeg ntawd tawm plaws xwb, nws cia li pib tshaj tej ntawd tawm thiab mus hais rau txhua qhov chaw. Ces Yes Xus tsis tau kev tab meeg mus rau hauv ib lub nroog li, nws nyob sab nroog nraud ntawm tej qhov chaw tsis muaj neeg xwb, los neeg tseem tuaj tas qhov txhia chaw tuaj cuag nws thiab.

TIM 18 LUB 1 HLIS 2019

Hnub Rau Lis Piam Ib Nruab Xyoo C Nruab Lis Piam Xyoo I

Zaj Nyeem Ib: HES NPLAWS 4: 1-5, 11

1 Peb yuav tsum ntshai rwg tias txawm txoj kev cog lus tseem qhib lug rau peb mus hauv Tswv Ntuj lub chaw so, los tsam nej ib tug twg ho raug saib tsis tsim nyog mus.
2 Vim peb yeej tau hnov lub Moo Zoo ib yam li peb cov yawg koob thaud. Tab sis lo lus lawv tau hnov tsis pab lawv dab tsi, vim lawv tsis muaj kev koom siab ntseeg nrog cov uas mloog lo lus.
3 Peb cov uas ntseeg, mas peb yuav tau mus hauv lub chaw so, raws li Tswv Ntuj tau hais tias : “Kuv npau taws, kuv thiaj cog lus tias lawv yuav tsis tau mus nyob hauv kuv lub chaw so.” Tswv Ntuj tej hauj lwm yeej tiav tas puag thaum ntuj tsim teb raug lawm,
4 rau qhov muaj ntawv sau hais txog hnub xya li no tias : “Hnub xya, Tswv Ntuj so, nws tso hauj lwm tseg tas tib si.” 5 Thiab tseem muaj lwm qhov chaw hais tias : “Lawv yuav tsis tau mus nyob hauv kuv lub chaw so.”
11 Ua li mas peb kav tsij peem tiag kom tau mus nyob hauv lub chaw so ntawd, kom tsis txhob muaj ib tug poob vim nws yoog lawv tus piv txwv tawv ncauj thaum ub.

NPN 78: 3+4BC, 6C-7, 8

Txais: (7b) Nej yuav tsis txhob hnov qab Huab Tais cov hauj lwm!

Tej yam uas peb tau hnov thiab paub,
tej yam uas peb cov yawg koob tau hais qhia rau peb,
peb yuav muab hais qhia rau cov tiam neeg tom ntej,
yog tej yam txaus qhuas HUAB TAIS tau ua thiab yog nws lub zog.

Txais: (7b) Nej yuav tsis txhob hnov qab Huab Tais cov hauj lwm!

Lawv kuj yuav tsum tau qhia rau lawv tej tub ki
tias kom yuav tsum tso siab rau Tswv ntuj,
thiab tsis txhob hnov qab Tswv ntuj cov hwj huam
thiab yuav coj raws nws tej lus qhia.

Txais: (7b) Nej yuav tsis txhob hnov qab Huab Tais cov hauj lwm!

Kom tsis txhob ua zoo li lawv cov yawg koob,
uas yog ib tiam neeg phem thiab ntxeev siab,
ib tiam neeg tsis muaj lub siab ruaj nreb,
los lub tswv yim npuab khov kho rau Tswv ntuj.

Txais: (7b) Nej yuav tsis txhob hnov qab Huab Tais cov hauj lwm!

As Les Lus Yas: LK 7: 16

Txais: As les lus yas, as les lus yas

Ib tug yaj saub loj sawv los nyob hauv peb,
Tswv Ntuj tau tuaj xyuas nws haiv neeg lawm.

Txais: As les lus yas, as les lus yas

Ntawv Moo Zoo: MK 2: 1-12

1 Ob peb hnub tom qab, Yes Xus rov los hauv Kas Fas Naus, sawv daws paub txog tias nws nyob hauv tsev. 2 Ces neeg tuaj sib sau coob coob ua ke, tsis tshuav chaw seem rau lawv li lawm, tab ntawm qhov rooj los tsis seem li. Yes Xus tshaj Lo Lus rau sawv daws. 3 Ces muaj plaub leeg nqa ib tug tuag ceg tuaj rau Yes Xus. 4 Lawv tsis tau kev nqa tus tuag ceg los rau Yes Xus vim neeg coob dhau, ces lawv yaws lub ruv tsev ncaj qhov chaw Yes Xus nyob; lawv tho qhov saum ruv tsev, lawv dauv lub txaj uas tus tuag ceg pw nqes los. 5 Yes Xus pom lawv lub siab ntseeg, nws hais rau tus tuag ceg tias : "Me nyuad, koj cov txhaum daws tas lawm." 6 Muaj ib co kws Ntawv Ntshiab zaum nyob ntawd, lawv xav hauv nruab siab tias : 7 "Tus neeg ntawd hais dab tsi li ntawd ? Nws thuam Ntuj ! Leej twg thiaj daws txhaum tau ? Tsuas kawg Tswv Ntuj tib leeg xwb." 8 Tab sis Yes Xus lub tswv yim twb paub tam sis ntawd tias lawv xav dab tsi hauv lawv siab lawm, nws thiaj hais rau lawv tias : "Ua cas nej xav tej zaj zoo li no hauv nej siab ? 9 Lo lus twg yog lo hais yooj yim dua rau tus tuag ceg : Yog lo tias 'Koj cov txhaum daws tas', los yog lo tias : ‘Koj sawv, nqa koj lub txaj, koj mus’ ? 10 Ua li mas, kom nej paub tias Neeg Leej Tub muaj hwj huam daws txhaum tau nyob ntiaj teb no." Ces Yes Xus hais rau tus tuag ceg tias : 11 "Kuv hais rau koj, koj sawv, nqa koj lub txaj, koj rov mus tsev." 12 Tus tuag ceg sawv tsees, nws nqa hlo nws lub txaj tam sim ntawd, nws hla sawv daws xub ntiag tawm mus. Cov neeg nyob ntawd yoob tas, lawv cav txog Tswv Ntuj, thiab lawv hais tias : "Peb tsis tau pom dua ib yam zoo li no ib zaug li."