Hwm Niam Mab Liab Nce Mus Saum Ntuj

Tim 15 lub 8 hli 2012

Hwm Niam Mab Liab lub Cev nce mus pem ntuj


Qhib Yav Tom Ntej 11: 19 a; 12: 1-6a +10 ab

19 Ces Tswv Ntuj lub Tuam Tsev nyob saum ntuj qhib plho. Pom lub Xab Cog Lus tawm los nyob hauv lub Tuam Tsev.

12 1 Muaj ib lub cim loj tas nrho tshwm nyob saum ntuj : yog ib tug Poj Niam! Nws hnav lub hnub, Lub hli nyob hauv nws qab xib taws thiab kaum ob lub hnub qub vij nws taub hau. 2 Tus Poj Niam ntawd cev hnyav, nws ntsaj mob, vim nws tab tom daws cev. 3 Tseem muaj dua ib lub cim tshwm tuaj nyob saum ntuj : ib tug niag Zaj loj kawg, liab ploog cuag hluav taws. Nws muaj xya lub taub hau thiab kaum tus kub. Txhua lub taub hau ntoo ib lub kauj kub. 4 Nws tus ko tw mus muab cov hnub qub saum ntuj cheb tas lawm ib feem peb kom poob los rau hauv ntiaj teb. Tus Zaj mus nres ntawm tus poj niam uas tab tom daws cev xub ntiag, npaj yuav nqos tus me nyuam tam sid thaum nws yug tawm plaws los. 5 Tus Poj Niam yug tau ib tug me tub : yog tus yuav tuav ib rab cwj hlau coj tas txhua haiv neeg. Luag nqa tus me nyuam khiav mus rau saum Tswv Ntuj, nyob ze ntawm lub theej kiab. 6 Hos tus Poj Niam khiav mus rau teb chaws suab puam : Tswv ntuj npaj tau ib qho chaw rau nws mus nkaum.

10 Ces kuv hnov ib lub suab nrov nrov hais saum ntuj tuaj tias : “Txij no mus , peb tus Tswv Ntuj tau txais txoj kev yeej, kev muaj hwj huam, thiab kev ua Vaj lawm, thiab nws Leej Pleev tau txais txoj kev ua tus tswj lawm.

1 Kos Lis Nthos 15: 20-27

20 Cov kwv tij nkauj muam, Leej Pleev sawv hauv cov tuag rov los lawm tiag, nws yog zoo li thawj cov txiv uas txi ntawm cov tau ncaim mus lawd. 21 Txoj kev tuag tshwm tuaj tau vim ib tug txiv neej, yog li txoj kev sawv hauv kev tuag rov qab los tau kuj yog vim ib tug txiv neej thiab 22 Sawv daws tuag nyob hauv As Das, tab sis sawv daws yuav ciaj rov los nyob hauv Leej Pleev. 23 Nyias muaj nyias lub sij hawm sawv rov los : tus ntaus thawj sawv rov los yog Leej Pleev, ces thaum txog lub Hnub Nyoog Leej Pleev rov qab los, mas cov neeg uas ntseeg nws yuav sawv rov qab los. 24 Thaum ntawd yuav yog lub zim txwv kawg : Leej Pleev yuav xub rhuav cov vaj, cov tswj lub ntiaj teb, thiab cov muaj hwj huam, ces nws yuav muab lub hwj chim ua vaj cob rov rau nws Leej Txiv Tswv Ntuj. 25 Leej Pleev yuav tsum ua vaj mus txog lub caij Leej Txiv tso tsoom yeeb ncuab tas tib si rau hauv nws qab xib taws. 26 Tus yeeb ncuab kawg, uas nws yuav rhuav, yog txoj kev tuag, 27 vim nws tau muab tas puas tsav yam tso rau hauv nws qab xib taws lawm.

Lus Kas 1: 39-56

39 Tau ob peb hnub, ces Mab Liab sawv kev mus, nws rau siab ntso mus pem toj siab, rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces Es Lis Xas Npes tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas Ntuj thiaj pub kom kuv tus Huab Tais leej niam tuaj xyuas kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, tus me nyuam hauv kuv plab dhia zoo siab. 45 Tus uas ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo !"
46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj, tus Cawm kuv, 48 vim nws tau dauv muag ntsia nws tus ntxhais txib uas nyob qhov chaw qis. Vim li ntawd, txij no mus, txhua tiam neeg yuav hais tias kuv txoj hmoov zoo, 49 vim tus Muaj Hwj Huam ua tej yam loj rau kuv, nws lub npe Ntshiab. 50 Nws lub siab khuv leej cov neeg hwm nws tiam dhau tiam. 51 Nws tau siv nws sab npab muaj zog, nws tau ntaus cov neeg uas lub siab muab hlob kom lawv tawg tas. 52 Huab Tais ntiab cov muaj hwj chim kom poob ntawm lawv lub theej kiab. Nws tsa cov neeg hauv txheej qis kom siab tuaj. 53 Nws pub tej yam zoo rau cov neeg tshaib kom tau noj seem noj so, hos nws ntiab cov neeg muaj rov qab mus tes qhuav qhawv. 54 Huab Tais tuaj pab nws tus tub txib His Xas Lais, vim nws nco ntsoov tias nws lub siab hlub neeg, 55 nws ua raws nraim li nws tau tshaj rau peb cov yawg koob, rau Has Nplas Has thiab Has Nplas Has cov xeeb ntxwv mus ib txhiab ib txhis."
56 Mab Liab nrog Es Lis Xas Npes nyob peb lub hlis tej, ces nws rov mus tsev.

Koom Txoos Kas Tos Liv tej lus tshaj tawm puas muaj tseeb?

Niaj xyoo, koom Txoos kas Tos Liv ua hmoov hwm Niam Mab Liab nce mus saum ntuj nrog nws lub cev. Puag ntxov los Koom Txoos yeej ntseeg tias Niam Mab Liab lub cev dawb huv, vim nws yog HT Yes Xus leej niam. Thaum nws xeeb hauv nws niam plab, Tswv Ntuj ua hwj huam kom nws txhob lo As Das thiab Es Vas nkawd lub keeb txhaum, vim Tswv ntuj yeej npaj nws los ua Tswv Ntuj leej Tub Niam. Nyob hauv ntawv Ntshiab, yeej tsis muaj ib lo lus hais meej txog qhov no li, tiam sis vim lub Koom Txoos muaj Tswv ntuj Leej Tswv Yim Ntshiab, thiab HT Yes Xus tau hais rau Pob Zeb tias, “yam twg koj khi mas yuav khi nyob saum ntuj, yam twg koj daws mas kuj yuav daws nyob saum ntuj,” yog li ntawd Vaj Qhia yog tus hloov Pob Zeb chaw, nws kuj tau txais lub hwj huam khi thiab daws huv tib si. Lub Koom txoos qhia rau peb tias thaum twg Vaj Qhia zaum saum Pob Zeb lub Rooj zaum (cathedra), thiab nws tshaj tej yam tseem ceeb txog txoj kev ntseeg (faith) los yog txoj kev ua lub neej tsim txiaj dawb huv (morals), mas nws tsis txawj yuam kev li.

Xyoo 1854 tim 8 lub 12 hlis, Vaj Qhia Pis Yus 9 (Pius IX) thiaj zaum saum Pob Zeb lub rooj zaum los tshaj tawm tias Niam Mab Liab xeeb los tsis lo neeg lub keeb txhaum (immaculate Conception). Thaum twg yog Vaj qhia los tshaj tawm ib txoj kev ntseeg zoo li no mas lub koom txoos hu tias “a dogma of faith,” nws yog ib txoj kev ntseeg uas lub Koom Txoos tshaj tawm kom tas ib tsoom neeg ntseeg Kas Tos Liv yuav tsum ntseeg raws li ntawd. Tsis tau ntev xyoo tom qab, xyoo 1858 xwb, Niam mab Liab tau tuaj hais rau leej ntshiab Bernadette nyob tim Lourdes tias, “Kuv yog txoj kev xeeb los tsis lo neeg lub keev txhaum.” Yog li Niam Mab liab tau tuaj hais qhia rau peb paub tseeb tias, Vaj Qhia tsis tau yuam kev, nws tau hais qhov tseeb tiag.

Xyoo 1950, tim 1 lub 11 hlis, Pis Yus 12 (Pius XII), kuj tau los zaum saum Pob Zeb lub rooj zaum tshaj tawm tias “thaum Niam Mab Liab ua neej los xaus, nws lub cev tsis paub kev puas kev lwj, nws lub cev tau nce mus saum ntuj lawm.” Muaj ib qho uas tej zaum peb coob leej tsis paub txog, yog thaum lub caij Pis Yus 12 tab tom npaj yuav tshaj tawm txoj kev ntseeg no, mas nws tau pom lub hnub ua hwj huam yees ntxwv, txawj dhia thiab tsis ci qhov muag, ib yam nkaus li xyoo 1917 nyob Fas Tis Mas. Nws tau sau ntawv piav tseg hais tias nws pom txog plaub zaug nkaus, thawj zaug yog hnub tim 30 lub 10 hli thaum yav tav li 4 teev tsaus ntuj, nws taug kev ncig hauv lub vaj hauv Vatican, nws nyeem ntawv thiab teev ntuj; thaum nws los txog ntawm tus mlom Niam Mab Liab nyob Lourdes, ces nws cia li pom lub hnub ua hwj huam yees ntxwv li hais saud. Zaum ob yog hnub tom qab, tim 31 lub 10 hli; zaum peb yog hnub tim 1 lub 11 hlis: hnub ntawd yog hnub uas Vaj Qhia tshaj tawm tias Niam mab Liab lub cev mus saum ntuj lawm; nws rov pom dua ib zaug zaum kawg yog tim 8 lub 11 hlis. Ces dhau qhov ntawd nws cia li tsis pom ntxiv li lawm. Ces Vaj Qhia kuj zoo siab hais tias yog ib lub cim qhia tias nws tau tshaj tawm ib qho tseeb.

Cov Protestants mas lawv thuam Koom Txoos Kas Tos Liv heev kawg. Vim Koom Txoos kas Tos Liv hwm Niam Mab Liab mas lawv hais tias, Niam Mab Liab tsis txawv peb kiag li, nws yog neeg muaj txhaum ib yam li peb. Mas lawv thuam hais tias peb “teev leej Niam” xwb, peb tsis teev Yes Xus, peb muab Niam Mab Liab los ua peb tus cawm seej lawm. Qhov no yog lawv hnov tej lus uas cov Protestants yeej ib txwm thuam los, ces lawv cia li qog lawv qab xwb, lawv twb tsis tau mus kawm kom paub zoo zoo tias Koom Txoos Kas Tos Liv hwm niam mab Liab zoo li cas. Peb tsis muab Niam Mab Liab los hloov Yes Xus ua peb tus cawm seej li lawv hais. Peb ntseeg hais tias Niam Mab Liab yog tus muab Yes Xus rau peb, thiab nws kuj yog tus coj peb mus cuag Yes Xus. Yog peb vam Niam Mab Liab coj peb, mas peb haj yam mus txog Yes Xus sai, peb haj yam txawj ntseeg nws, txawj nyiam nws zoo, thiab txawj yoog raws li nws qhia xwb.

Thiab vim peb hwm cov leej ntshiab, mas lawv hais tias cas Koom Txoos Kas Tos Liv “teev ib co neeg tuag?” Xav kom peb cov ntseeg to taub tias Peb tsis “teev” Niam Mab Liab los cov leej ntshiab, peb tsuas hwm lawv xwb thiab vam kom lawv thov ntuj pab peb xwb. Thiab peb tseem muab lawv lub neej ua neeg ntseeg los ua ib co qauv zoo rau peb xyaum kom muaj ib hnub peb thiaj tau mus nyob saum ntuj ib yam li lawv thiab. Thiab peb tsis saib hais tias lawv yog ib co neeg tuag, peb saib hais tias lawv yog ib co ntsuj plig ciaj sia, tseem ciaj sia tshaj thaum lawv ua neej nyob, vim lawv tau kiag Tswv Ntuj txoj sia, nyob ze ze Tswv ntuj lawm. Thiab peb ntseeg hais tias lawv tsis yog mus nyob tau tau zoo ces tsis quav ntsej txog cov tseem ua neej nyob li. Peb ntseeg hais tias lawv tseem niaj hnub txhawj txog peb cov nyob ntiaj teb, thiab lawv tseem niaj hnub thov ntuj pab peb. Txawm peb cov neeg txheeb neeg ze, uas yog lawv tau ua ib lub neej ntseeg Tswv Ntuj zoo, txawm lub Koom Txoos tsis muab lawv tsa ua leej ntshiab los yog lawv tau mus nyob ze ze Tswv Ntuj lawm ces lawv yeej thov ntuj pab peb tsis tseg thiab.

Cov Protestants tseem thuam hais tias lub Koom Txoos Kas Tos Liv xev tej txoj kev ntseeg cuav uas tsis muaj nyob hauv Ntawv Ntshiab li. Cov Protestants mas lawv siv phau Ntawv Ntshiab (Bible) nkaus los qhuab qhia lawv txoj kev ntseeg xwb, tiam sis yog ua li cas lawv sawv daws twb sib tib phau Ntawv ntshiab xwb tiag, tiam sis lawv ho tsis qhia ib txog kev ntseeg raws Ntawv Ntshiab xwb, lawv ho nyias qhia nyias ib txoj kev ntseeg raws nyias lub tswv yim to taub thiab raws nyias lub siab xav xwb, ces niaj hnub no mas muaj txog 30-40 txhiab lub koom txoos Protestants li? Hos ntawm Koom Txoos Kas Tos Liv, mas sawv daws yuav tsum ntseeg thiab coj raws li tus thawj, uas yog Vaj Qhia thiab cov Tswv Qhia, hais. Mas txawm peb mus txog qhov twg, txawm peb tsis to taub lawv xeem lus, los peb paub hais tias peb txoj kev pe hawm thiab txi ntuj zoo ib yam nkaus. Peb tsis to taub lawv cov lus los peb yeej koom tau lawv, vim peb paub hais tias lawv ua dab tsi.

Cov Protestants saib hais tias phau Ntawv Ntshiab tseem ceeb. Lub koom Txoos Kas Tos Liv los yeej saib Phau Ntawv Ntshiab tseem ceeb ib yam, tiam sis lub koom Txoos kuj saib tias lub Koom Txoos txoj kev ib txwm coj thiab ib txwm sib qhia los (Sacred Tradition) kuj tseem ceeb thiab. Peb yuav tsum to taub li ntawm no: Lub Koom Txoos xub tshwm sim dua Phau Ntawv Cog Lus Tshiab (New Testament). Phau Ntawv Cog Lus Tshiab (New Testament) yog lub Koom Txoos tsim thiaj muaj los siv.

Thaum cov Hauv Paus Xa Lus pib mus tshaj lub Moo Zoo txog HT Yes Xus, lawv tsuas muaj phau Ntawv Cog Qub Lus uas hais txog yav tas los thiab hais txog cov yaj saub thaud tej lus xwb. Cov zaj uas lawv hais txog HT Yes Xus lub neej thiab HT Yes Xus cov lus uas lawv nco tau coj los qhia rau ib tsoom neeg, mas nyob hauv lawv lub hlwb xwb thiab lawv hais tawm ntawm lawv lub ncauj xwb, vim lawv yog cov tim khawv tau pom kiag HT Yes Xus, tau mloog kiag nws cov lus, tau caum nws mus mus los los tau peb lub xyoos. Ces lawv yog cov qhuab qhua cov neeg nsteeg. Tiam sis thaum muaj neeg coob los ntseeg lawm, mas lawv yuav mus tsis txog qhov txhia qhov chaw uas muaj neeg ntseeg, ces lawv yuav tsum tsa ib co xib hwb hloov lawv mus qhuab qhia rau tej lub zos los tej lub nroog lawv mus tsis txog. Vim cov xib hwb ntawd tsis yog ib cov tim khawv tau caum Yes Xus, mas cov thwj tim thiaj yuav tsum tau muab lawv cov zaj thiab HT Yes Xus cov lus los sau rau hauv ntawv, rau cov xib hwb ntawd coj mus nyeem qhia rau cov neeg. Vim cov thwj tim xav kom sawv daws qhia ib yam nkaus xwb, thiab qhia qhov tseeb xwb, tsis txhob nyias mus xev nyias ib zaj tsis muaj tseeb los qhia. Ces thiaj pib muaj cov Ntawv Moos Zoo raws Mas Tais, Mas Kos, Lus Kas, thiab Zam. Zam phau mas yog phau sau tom qab kiag, vim nws yog tus nyob ntev tshaj. Tsis tas li ntawd xwb, thaum Paj Lug poob nees tag, nws tig los ntseeg Yes Xus, nws mus nyob tau ntau xyoo nrog cov Hauv Paus Xa Lus, nws kawm txog HT Yes Xus lub neej thiab nws tej lus ntawm lawv. Tiam sis HT Yes Xus yeej tau tshwm sim tuaj qhia ntau yam ntxiv rau Paj Lug thiab. Ces paj Lug thiaj yog tus tub tshaj ntuj lus mus rau cov pej kum neeg. Nws tau mus tsa ntau pawg ntseeg, tiam sis nws tsis yog yuav nrog lawv nyob, ces nws thiaj sau tej tsab ntawv mus txhawb lawv txoj kev ntseeg. Niaj hnub no peb tseem nyeem Paj lug cov tsab ntawv los txhawb peb txoj kev ntseeg ib yam li cov ntseeg txheej thaud thiab. Pob Zeb thiab Zam thiab Yas Kos (James) kuj tau sau tsab puav ntawv mus txhawb cov ntseeg thiab. Cov ntseeg lawv saib tej tsab ntawv ntawd muaj nqes kawg, ces lawv muab khaws cia rau lawv tau nyeem tsis tseg los txhawb lawv. Tom qab no Zam kuj tau sau nws phau ntawv piav txog tej yam nws pom yuav muaj tuaj rau yav tom ntej.

Thaum lub caij ntawd muaj ntau ntau tus kws uas lawv nyias taus nyias sau txog HT Yes Xus lub neej thiab tej lus qhuab qhia. Tiam sis peb plaub puas xyoo tom qab, lub Koom Txoos tau los sib hais thiab los xaiv cov phau ntawv uas raug raws cov Hauv Paus Xa Lus txoj kev qhuab qhia tshaj, ces thiaj muab coj los tso ua ib phau loj loj, uas niaj hnub no peb siv, thiab tis npe ua Phau Ntawv Ntshiab: Nyob hauv muaj phau Ntawv Cog Qub Lus, thiab Phau Ntawv Cog Lus Tshiab tib si. Koom Txoos Kas Tos Liv tau muaj ob peb lub rooj ncauj lus los tham txog thiab zeem tseeb txog cov phau ntawv nyob hau Ntawv Ntshiab (Ntawv Cog Qub Lus thiab Ntawv Cog Lus Tshiab): Thawj lub rooj ncauj lus yog lub Rooj Ncauj Lus nyov Laodicea, xyoo 363 A.D. Tseem muaj lub Rooj Ncauj Lus myob Hippo, xyoo 393 A.D., thiab lub Rooj Ncauj Lus nyob Carthage xyoo 397 A.D. thiab. Peb lub rooj ncauj lus no puav leej zeem tseeb tias cov Ntawv Ntshiab uas niaj hnub no peb tseem siv yog cov tseeb. Tiam sis nco ntsoov tias cov Protestants tau rho ib co Ntawv Cog Qub Lus tawm lawm, ces lawv phau Ntawv Cog Qub Lus muaj tsawg dua Kas Tos Liv phau.

Yog li ntawd peb pom hais tias phau Ntawv Cog Lus Tshiab, yog txhawv ntawm Koom Txoos txoj kev ib txwm cov Hauv Paus Xa Lus tau qhia rau lawv coj noj coj ua los, thiab ib txwm qhia rau lawv ntseeg los. Yog li ntawd lub Koom Txoos thiaj yog tus paub lub ntsiab tseeb nyob hauv phau Ntawv Ntshiab, thiab nyob hauv txoj kev ntseeg uas ib txwm sib qhia los txog niaj hnub no. Thiab lub Koom Txoos thiaj khaws Koom Txoos cov Cim (Sacraments) raws li cov Hauv Paus Xa Lus tau coj sawv daws ib txwm siv los.

Koom Txoos Kas Tos liv yog tas nrho ib tsoom neeg ntseeg leej Niam, nws yog cov Protestants leej Niam tib si, txawm lawv tsis xav lees nws npaum twg los lawv yeej yug ntawm koom Txoos Kas Tos liv los. Lawv yog cov khiav tawm, cov ncaim mus lawm, lawv yeej paub lawv kev txhaum kawg, tiam sis lawv tsis kam lees, lawv xav kom lawv tau ntsej muag thiab kom neeg poog lawv, ces lawv thiaj nrhiav kev thuam Kas Tos Liv, tej yam twb tsis tseeb los lawv hais tas zog, kom lawv tau ntsej muag tias, “tos peb ncaim Kas Tos Liv mus los vim muaj ntau yam yuam kev thiab ntau yam phem li no nev.” Protestants yeej pib thuam Koom Txoos Kas Tos Liv txij thaum Martin Luther khiav tawm hauv Kas Tos Liv mus lawm los txog niaj hnub no los yeej tseem thuam qees.

Peb yuav tsum paub peb txoj kev ntseeg Kas Tos Liv kom meej, thaum luag thuam peb, peb thiaj tsis qaug mus ntseeg lawv lub tswv yim, thiaj tsis tig rov los ntxub thiab thuam yus cov ntseeg Kas Tos liv.

Nyob zoo Mim,

Ua tsaug uas nws tuaj tham txog Niam Mab Liab lub txiaj ntsim. Yog ib qho zoo thiab tseem ceeb heev uas peb cov ntseeg Catholic yuav tsum paub txog lub ntsiab. Txoj kev ntseeg Catholic yog txoj kev ntseeg chiv keeb puam kwm, yog lub hauv paus ntawm lub noob txiv cog los, yog qhov tseeb thiab qhov yog, yog lub ntsiab thiab lub cheeb ntawm txoj kev ntseeg. Tswv Ntuj nyob ze cov ntseeg Catholic, Tswv Ntuj tsom kwm lawv, thiaj li muaj tau ntau yam hwj huam yees ntxwv tshwm los rau tsoom ntseeg thaum lub keeb kwm los txog rau niaj hnub no. Cov neeg txais tog, txais nta, thwj ncauj loj hais ncha, yog yuav piv los mas tsis pom muaj ib qho chaw ntshiab nyob qhov twg, tsis pom ib leej twg yuav muaj cov qhov txhab uas Yes Xus raug tsim txom, tsis pom muaj ib qho chaw qhov twg uas yuav muaj neeg mus xyuas, mus teev hawm laub lug li cov Catholic tej chaw ntshiab. Keeb kwm cov ncaim, ncau ntawm cov Catholic mus, tsis yog ib qho keeb kwm zoo thiab hauv paus hauv ntsis zoo. Yog tus neeg ntawd xav hla txoj cai, tsis leem cai ces nws tsim ib txoj cai tshiab, muab txoj kev ntseeg teev txawv kom nws tau ua li nws txoj kev siab hlob xwb. Thaum nws tsim txoj cai tshiab lawm ces nws yuav tsum nrhiav kev thuam cov Catholic kom nws thiaj li muaj plhus mus ua qhov tshiab. Lub keeb tiag, tsis yog lawv ua yog, lawv ua kom tau rau lawv lub siab hlob xwb. Yog tias cov Catholic ho coj tsis yog, ua li lawv teb keeb kwm yog muab qhov twg los, tsuas yog khaws cov Catholic li keeb kwm hauv paus hauv ntsis los siv xwb. Tsuas qhov twg yog lawv tsis xav kom chwv lawv ces lawv muab tshem tawm kom txhob muaj pov thawj xwb.

Niam Mab Liab yog ib leej niam muaj txiaj ntsim heev, yog peb cev peb cov zaj thov Ntuj rau nws pab xa mus rau nws Leej Tub Yes Xus mas peb yuav tau txiaj ntsim zoo dua uas peb thov peb tus kheej. Thiab Niam Mab Liab qhia kom peb txawj xyaum ua neeg zoo, txawj coj kom ntxim Tswv Ntuj siab, nco ntsoov tso kev ua txhaum tseg, nco ntsoov teev Ntuj thiab qhia kev teev Ntuj kom tau txiaj ntsim. Nws yog ib leej Niam zoo rau txhua leej.

Nyob zoo Mim,
Zaj koj sau no yog ib zag zoo rau peb cov neeg ntseeg kawm, tsis yog ib zag uas koj xav tawm ntawm koj lub tswv yim los, yog ib zag lub Koom Txoos tau sau qhov muaj tseeb tseg. Txhua leej Xib Hwb los yog thawj coj ntawm ib pawg ntseeg yeej yuav tau paub txog zaj no mas nws thiaj phim (yog muaj neeg nug txog thiaj yuav teb tau)
Ua tsaug rau koj lub sij hawm tuaj sau zaj no.

Y. Suav Nus

Ntuj txiv zoo nam tau nce ntuj,ntuj txiv zoo nam maria moos pes ntuj.maria lub cev thab tug plig tau ci nplaas moos pes ntuj.peb le puj huab tais tau ci nplaas .A LE LUB YA. .as le lub ya. peb tug puj num tswv A LE LUB YAS. . . . . . . . . . . . . . . . . . . . . . . . . . . . . MUAJ IB QHOV TSHWM CHIM. .muaj ib qhov le tshwm chim tawm lug rau pes saum ntuj .muaj ib qhov le tshwm chim tawm lug rau sau ntuj u. .ib tug puj tsoog ci nplaas cuag nam hnub ob txhais taw nres tuav ruaj saum nam hli kaum ob lub hnub qub ua lub kauj ntsais qos ntsa.kaum cuab koob ntsais qos ntsa sau tau hau .peb yuav seev ib zaj seev qhuas rau koj qhuas vaj tsiwv qhuas rau koj qhuas vaj tswv.

Nyob zoo sawv daws, Niam Mab Liam yeej yog peb tsoom ntseeg thoob ntiaj teb leej Niam tib si. Tiam sis muaj qee lub Koom Txoos tsis leeg paub Niam Mab Liab yog lawv Niam. Muaj lug nug tias vim li cas thiaj hu tias Niam Mab Liam yog tas nrho tsoom neeg ntseeg nyob thoob ntiaj teb Niam? Teb hais tias:"vim thaum peb sawv daws los txais kev ntseeg lawm, peb kuj yog HT Yes Xus ib leej kwv los ib leem muam. Yog li peb thiaj hu Niam Mab Liab ua Niam, zoo ib yam li HT Yes Xus hu thiab. Peb cov ntseeg Catholic mas peb zeem tseeb hai tias: Mab Liab yog Yes Xus Niam kuj yog peb Niam ib yam nkaus thiab. Tiam sis cov Protestants mas lawv hais tias: "Niam Mab Liab (Maiv Liag) mas tsuas zoo xws li peb tib neeb ntiaj teb xwb, Yes Xus tsuas los yug rau hauv Mab Liab(Maiv Liag) kom tau cawm ntiaj teb neeg xwb, lawv tsi zeem tseeb hais Mab Liab(Maiv Liag) yog lawv cov ntseeg leej Niam." yog muab xav kom zoo zoo mas mas, Yes Xus twb hu Mab Liab(Maiv Liag) ua Niam, mas peb kuj hu ib yam li Yes Xus thiab. Vim Yes Xus hwm Mab Liab ib yam li peb hwm peb niam. Tias sis yog peb ho tsi hwm Mab Liab ib yam li Yes Xus no, peb puas yog Yes Xus ib tus kwv, tij, muam, maj?. Kuv xav mas tsi yog lawm. Yog hais tias peb tsi nyiam los tsi hwm Niam Mab Liab mas peb yeej tsi hwm Yes Xus tib yam nkaus, yog peb thuam Mab Liab mas yog thuam Yes Xus lawm. Cov phooj ywg yog hais tias muaj leej twg thuam thiab hais lus tsis zoo rau nej niam no, nej puas txaus siab rau tus ntawd? Kuv xav mas twb yog yus niam uas yug thiab tu yus hlob mas yus yuav tsi txaus siab rau tus uas thuam yus niam ntawd. Li ntawd mas Mab Liab twb yog HT Yes Xus Niam, yog peb hais lus thuam Mab Liab mas HT Yes Xus yuav tsi txaus siab rau peb. Vim Mab Liab twb yog Yes xus Niam. Li ntawd mas Niam Mab Liab yog tus tau koob hmoov loj tshaj tas tsoom Leej Ntshiab tib si. Thov kom peb cov neeg ntseeg to tau, kom peb txhob yuam kev. Yog peb ua ib tus ntseeg lawm, txawm yuav yog cov ntseeg twg los kom peb nkag siab rau peb txoj kev ntseeg. Txhob lam tau lam hais lus thuam lu Koom Txoos, los Niam Mab Liab. Nyob tsam muaj ib hnub peb yuav tu siab rau peb tus kheej. Thaum ntawd tsi muaj twg pab tau peb lawm, cov kwv tij ua ntej thaum nej yuav los txais kev ntseeg thov kom nej ntsia kom zoo. Nej thiaj yuav nkag tau hauv Tswv Ntuj lub tseem qhov rooj mog. Kawg no thov Leej Niam Mab Liab dhauv muag luag ntxhi rau sawv daws.