Hmoob Nplog tua Hmoob Fab Kis

By: Hmoob
Posted 13 January 2011 - 06:48 AM

Nyob Fab Kis Teb, nram qab teb, muaj ib tug poj hmoob laus tau mag ib tug txiv neej hmoob tuaj nplog teb tuaj ntaus tuag rau hnub tim lub 04 /01/2011.

Tus txiv neej ntawd nws tuaj nplog teb tuaj mus yuav ib tug poj niam hmoob ntawm lub zos ntawd thiab.
Hnub ntawd nws mus taij nyiaj ntawm tus pog laus uas yog ib pab kwv tij, ib lub xeem.
Tus pog laus tsis kam muab nyiaj rau ces nws muab ntau tas ces nws mam mus tshawb nyiaj nyiag.

Tam sim ntawd tus pog laus tseem tsis tau tuag, nws meem lawm xwb, nws tsis los ces nws hu xov tooj rau ib tug txheeb, thiaj tuaj pab thiab hu thaj maum tuaj coj mus tom haub maum lawm.
Tias sis nws mus nyob tau 2 hnub ces nws txawm tag sim neej lawm, thaj maum hais tias nws lub paj hlwb nce ntshav tag lawm.

Ceeb toom rau cov ua pheej lav lav thiab tos tos hmoob nplog. Txawm txheeb npaum li cas los thaum luag xav tua ces luag yeej tsis hais txog kev txheeb li lawm.

Sim neej no tu siab tshaj plaws. Vim li cas peb haiv neeg hmoob yuav cia li liam ua luaj li lawm.
Ntshai peb yuav tau rov mus nrhiav poj koob yawg koob thov kom pab.

Zaum no tej ntxhais 17 , 18 xyoo cia li lam yuav tej tug yawg laus 65 xyoo tsuav tau nyiaj xwb, yeej tsis nco qias neeg li. Tej tus laus li los yeej tsis paub txaj muag li lawm.

Tej tub hluas los lam yuav thiab tham tej poj laus 60 xyoo.

Peb hmoob thaum ub, peb niam peb txiv lawv phaum, txaj muag xwb twb yuav noj yeej kom tuag mus. Ua li cas zaum no es yuav ua dog ua dig tsis pom qab yuav muab piv rau dab tsis li lawm.

*************

Posted 14 January 2011 - 02:13 AM
..... hais ntxiv mus , ntawm cov txim, kuv muaj cov txheej ze nyob ntawm lub zos lawv hais tias tub ceev xwm coj tus txiv neej hmoob coj mus kaw tos txiav txim. Hais txog ntawm tus pog laus, kuv yeej paub npe paub xeem, ntawm tus txiv neej los yeej paub xeem. Tias tsis yuav tsis hais kom tawm, tsuas yog muab thsaj meme rau sawv daws paub tias kom nyias ua zoo xav nyias xwb.


Vim peb hmoob tsis txawj coj thiab muaj tej no tshwm sim.

Cov tau tuaj rau tej teb chaws vam meej es tsis tu pluas noj, tsis khaub hla ces txawm khav dhau lawm ua rau cov nyob tom qab xav tias peb mas ntshai yuav zais tsheej miaj loos nyiaj rau hauv tsev.

Yam tseeb tiag, hmoob qab ntuj yeej ib yam lawm xwb.
Hmoob nplog txhob xav yuam kev tias hmoob france thiab usa muaj muaj, yeej tsis muaj luaj twg.
Yeej ua hnub ua hmo khwv thiaj tau noj tau haus, cov tsis muaj hauj lwm ces twb piv tsis tau cov hmoob nplog lawm nawb hais rau nej paub.

Nyob nplog teb lawv tsis muaj nqe vaj nqe tsev, tsis muaj se av se tsev se dej se khib nyhiab, se nyiaj hli ....... muab hais los yus yeej txhem 70% ntwam yus lub nyiah hli coj mus them nuj nqi, tsuas tshuav 30 % rau yus noj tuav hli lawm xwb.

Yog yus muaj meme teb zaub ces thiab tau zaub los pab noj ntxuag meme nqaij, yog tsis muaj ces ib teg zaub twb tsis tau noj.

Kuv hnov lawv hais tias zaum no cov hmoob nplog mas tau zoo tshaj plaws, taws rauv yeej tsis mus txiav, yeej xum yuav rauv, zaub yeej tsis cog noj, yeej rho nyiaj yuav, kev ua noj, tej hluas zaum no yeej tsis paub ua noj ua hnav, tsuas yoj muas tom lab los noj los hnav xwb.

Li no muab piv mas lawv taus zoo tshaj peb lawm ntau.

Tiam sis tej no nej yeej paub lawm lam hais saib cov nyob nplog teb puas tau paub txog.

Nyob france cov poj niam ua muaj 30 xyoo mus rau 40 los 50, mas yeej khwv heev rau kev ua noj, tus txawj ua hnav los yeej ua qees, tej ua hauj lwm los muaj... yeej tsis lam mus yuav ib pluag fawm tom lab los noj.

Cov nyob nplog teb, yeej pom tias lawv yeej nyob tos nyiaj ntawm tej txheeb xwb, ib hmo hu 10 zaus tuaj los yeej muaj....

Vim thaum ntxov pheej khav khav tias muaj muaj, hnub no hmoob nplog thiaj cug tes tos nyiaj lawm xwb.

Ntawm kuv tus khej mas kuv yeej tsis nug, tsis xa ib qho li, lawv txawm yuav cem, yuav thuam los xij.... yus tej me tub me nyuam tsem yuav siv, yuav noj... es yog muab rau lawv tag lawm no ces yus pab niam txiv tub txawm yuav yoo...

Hmoob nploh thov nyiaj mas , tus hais tias mob plab, tus hais tias mob plawv, tus ho hais tias me nyuam tsis tau mis noj.... ntawm ib tsob kwv tib txiv tub es loj xov cov nyab los yeej tsis txaj muag sawv daws yeej hu fone tuaj thov kom tau.


Muaj ib zaug ib tug nyab tim Lao hu fone rau kuv niam ua yog nws niam ntxawm hais tias kom xav 300E mus, nws me ab mob mob yuav coj mus haub maum.
Kuv niam teb tias ; es koj txiv ntxawm tseem yuav npaj xa rau nyab X uas yog niag niam tij, nws tias nws mob mob thiab no ne. Tus nyab txawm teb tias : kuv phem nws mob tsis npaum kuv me ab, ne xub xa rau kuv es yog tias nej muaj no mam xa rau nws .....


Tsis paub hais li lawm, yeej tshaj yus lub hlwb xam thiab xav lawm.....

Nyob zoo Maiv Paj Lug thiab Hmoob Ntujqubqab,

Maiv Paj Lug,

Tej xwm txheej nov mas kuv tus kheej los tseem tssi tau hnov tiag thiab. Cia mam nug qhov tseeb mam tuaj hais ntxiv.
Hais txog txoj kev UA DEV NPUA ntawm cov niam tsev txiv tsev uas tsis tos thawj thiab li cia li plhis mas kuj pab lawv tu siab rau lawv tus kheej thiab. Twb tsis yog pab lawv txaj muag, twb tsis txaj muag lawm, tab sis tu siab xwb.

Qhov uas cov tub hluas nyiam cov pog laus thiab cov ntxhais hluas nyiam cov yawg laus nov mas thaum kuv tsis tau mus pom kiag ntawm kuv lub qhov muag, kuv xav tias ntshe yog tim cov laus uas rov mus khav teeb quab yuam no. Tab sis thaum mus txog chaw lawm, tsis yog tim cov sab nraud los quab yuam, yeej yog tim cov sab hauv, tsis hais tej me tub me nyuam, tej niam tej txiv kiag ntag. Tsis muaj qhov txaj muag, tsis muaj qhov poob hwj chim li lawm. Lawv tsuas ntsia pom nyiaj thiab nyiaj dai ntawm lawv qhov muag xwb. Txawm ntau thiab tsawg los yog nyiaj lawm ces ywj muab tag nrho txhiaj meej, hwj chim, meej mom mus pauv kiag li lawm xwb. Kuv xav tias cov tub hluas ntxhais hluas tid ntshaw ua luag tej niam yau txiv yau ua luaj, ntshe yog yuav yuav tag nrho neeg no. Tab sis cov nyob tid uas txom nyem mas kuj tsis muaj tus nyiam li thiab, yog tus puav uas muaj nyiaj nplua nuj mas thiaj tau niam yau thiab xwb no...

Kuv pom tau tias lawv tsis yog zoo li peb cov neeg qub thaum ub lawm, lawv lub qhov muag pom ntawm taw, lawv tsis txuag hwj chim meej mom, txuag lawv tus kheej kom dawb huv lawm. Tej tub hluas ntxhais hluas sib ntsib thawj zaug xwb, nyuam qhuav sib paub xwb, tib pliag xwb mas txawm siv sib khawm, sib tuav tes, piav yeev xwb...Tshaj cov neeg tawv dawb lawm thiab. Qhov nov yog tim tag nrho lub Société, niam txiv los mus. Thaum ua ntej tsov rog, peb txoj kev nkauj nraug, peb tsuas sib nyiam hauv lub siab, lub qhov muag xwb. Ib tug txuag ib tug, ib tug hwm ib tug. Peb txoj kev sib hlub tseem loj thiab ruaj tshaj plaws li. Tu siab kawg, ntau yam nov ua rau neeg rov thaub qab lawm, tsis tsim nyog Huab Tais Ntuj los tshoj cov Yaj Saub Hmoob siab ntau zaus tias yuav tso ib tug niam txiv Vaj Hmoob los CAWM Hmoob rau kev vam meej no li lauj...Txheej laus khwv ciaj khwv tuag los yug siav kom txhob poob noob neeg xwb, lawv ntshaw ntshaw lub Sawm Fem uas tus cawm seej los txog. Hnub no peb yog cov muaj hmoo tshaj plaws, peb tau nyob lub caij uas cov Yaj Saub Hmoob tau teev tseg lawm, ua cas peb tsis muab ua kom muaj txiaj ntsig, ntxeev kom Hmoob vam meej ib theem, kom tsis txhob poob rau luag CEV QHEV (esclave) ntxiv. Ua cas twb tsis tau tuag dhau ib tiam neej ntawm kev tau zoo vam meej, txawm siv zoo siab khav theeb, ua lwj ua liam tsis xws li luag lwm haiv neeg. Peb nyuam qhuav pib muaj mov tsis tu saum tsum, tsis ua teb los tau mov noj tsau plab xwb cas peb yuav khav ua luaj li...Khav khav es cia li tsis mus khwv li lawm, cia li muab lub caij nyoog coj mus khav xwb...Tu siab kawg nkaus...Peb twb ntshaw ntshaw ib thaj av yog peb tug, ib lub teb chaws yog peb kav. Yog peb nyuam qhuav muaj mov noj xwb peb twb tso tes tsis khwv ntxiv lawm ces txawm Tswv Ntuj muab kiag ib thaj av rau peb los peb yeej tsis muaj peev xwm mus tuav mus tswj tau li. Vim ruam yuav tsab ntse, pluag yuav khav muaj, tus khwv thiab ncaj ncees ces niaj hnub yuav raug luag iab hiam thiab lauj kom nws zog qaug. Ces Hmoob yuav rov poob ib theem yam Hmoob tsis nco txog...Dhau ntawm ces cov me nyuam tsis paub lus Hmoob, tsis paub keeb kwm, tsis paub caj ces lawm ces luv npe Hmoob yuav ploj mus cuag dej ntws...Kwv tij neej tsa, nej puas noj txhij xav txhua ...Es nej puas tus siab thiab naj yuad...!

Hmoob ntujqubqab,

Thaum ub hnob cov Khej Dub nyob qab dav hlau nyiag tawm teb chaws xwb, cas zaum no peb Hmoob yuav ua li ntawd lawm thiab. Kuv tsis hais dab tsi, yog tias ntshaw mus nyob Fab Kis los Miv Kuj npaum ntawd, kawg muab yus txoj sia mus pauv kiag lawm thiab. Yog li mas Peb Hmoob tus twg hla ciam teb Nplog lawm, yuav tsum tsim txiaj, rau siab khwv kom nrog luag muaj hwj chim meej mom, ceev txoj kev zoo kom tsim nyog yus txoj kev ntshaw mas thiaj li. Yog muab siav ciaj pauv siav tuag tuaj txog, tsis ris siab ces txhob tuaj zoo dua. Cov kwv tij Hmoob ua neej dig muag lawm, tsuas pob ntseg mloog xwb, tsis qheb qhov muag ua neej. Tsuas tab xav tias hla kiag Nplog ciam teb lawm ces yuav khaws quav hnub quav hli pawg lug li thuam ub txiv nraug ntsuag. Tab sis nej twb tsis paub peb txoj kev khwv, peb mas khwv tiag tiag li, tab sis peb tsis xam txeem es nej tsis hnov xwb. Dua li peb tau ib qho nyiaj los peb nqe vaj nqe tsev, kev noj haus kim kim li. Peb tsuas ua hauj lwm yug ncauj kom peb txhob tuag xwb...peb tsis muaj teeg tug dab tsi li. Yuav hais los, nej cov tseem nyob Nplog teb, nej haj yam muaj yam zoo tshaj peb ib txhiab ib puas npaug, yog nej tsis xav muab tej yam muaj nqes los ua kom muaj nqes xwb. Nej tsuas ntsia qhov ci ci ces mus sib txeeb khaws qhov ci...Tab sis nej nco ntsoov los lus tias: "ci tsis yog kub".
Nej teb chaws, nyiaj hli ib hlis yog $50, tab sis nej tej txiv xyoob txiv ntoo, zaub noj, qaib npau, nqaij mas kim ib yam nkaus li nyob Fab Kis teb. Xyoo no kiag nyob Phonsavanh, qaib tseem kim tshaj Fab Kis teb uas nyiaj hli qhov tsawg yog 1000€ txais ntawm tes (rho se tag),ntxiv rau nyiaj pab me nyuam, nyiaj pab nqe tsev tib si.
Thaum zoo li nov, pom tau tias nej tsis khwv, tsis ua, dab tsi los tsis muaj, yog coj Thaib teb thiab Nyab Laj teb, Suav teb tuaj muag xwb. Kuv tsis hais ntaub xov los toob xib, kuv hais kiag cov qaib npua, txiv xyoob txiv ntoo kiag xwb tseem yog coj lwm teb chaw tuaj muag rau nej thiab. Nyiaj txiag yuav khwv los yus ces ho tsis khwv kom tau yuav. Ho thov cov txheeb ze txawv teb chaw xav los rau nej yuav thiab...Tu siab kagw nkaus, yog nej txawj muab nej lub teb chaws saib rau lub sam xeeb, nej tsis muaj dab tsi los nej tu tsiaj tu txhu, ua qoob ua loo kom muaj xwb ces nej yog ib lub teb chaws nplua nuj lawm.

Qhov xwm txheej nov yog tshwm sim nyob lub nroog Toulouse, Fab Kis Qab teb.

Tus tub Hmoob Nplog hu ua Ntxawg Lauj, nws hnub nyug thaj tsam 25-30 xyoo, nws muaj poj niam thiab plaub tug me nyuam nyob Nplog teb. Tab sis nws tsis qhia rau lawv paub. Nws tuaj txog Fab Kis teb ces nws tuaj yuav tus poj niam laus nov tus nyab. Uas nws tus tub tau raug tsheb sib tsoo tuag lawm. Lawv nyob ib lub tsev, tab sis nyias muaj nyias theem xwb. Hnub ntawd tias tus nyab tseem mus tom teb lawm, ces Ntxawg txawm nce mus nrog Poj Liab nyob, Poj Liab ua mov rau nkawd noj tag, Ntxawm txawm thov Pog Liab ib qho nyiaj, ces Pog tsis muaj muab. Ces thiaj muab pog ntau, ntau sab heev, xav tias tuag lawm, thiaj muab tso tseg thiaj xauv qhov rooj cia. Ho vau ze rau ntawm lub xov tooj thiab ces pog xeev rov los, nws thiaj li hu xov tooj mus rau nws tus ntxhais. Thiaj coj nws mus Hopital, ces nws tsim los tau ob hnub, nws thiaj tuag lawm. Tus poj niam nov yog ib tug poj ntsuam, lawv pheej hu nws ua Pog Liab, nws yog nkauj Hmoob Yaj, yuav txiv Hmoob Lauj.

Nyob zoo Maiv Tooj

Qhov kuv tias muaj 8 leej nrog khoom rov qab teb chaws Mes kuj ntawv twb yog lawv los tsiab peb caug xyoo no es lawv tsis muaj txoj sia lawv rov qab li hais xwb.
Nyuam qhuav hnov nws tias Khej dub nyob qab plab dav hlau no es yog nyob qab plab dav hlau mus txog puas ciaj nas los.

Ntawm neeg tub nkeeg tsis xav ua noj ua haus cev tes thov nyiaj mas tsis paub hais li lawm , cog tej txhiam laj txhiam xwm xws li dib, taum, zaub , kua txob....tom teb los yog Xuan mas tab mus nyiag noj nyiag haus xwb li
nas txom fav tiag los muaj nas txom fav sawv ntsug los muaj ...ceeb laj kho lub neej li tiag Maiv Tooj.. e ...

Nyob zoo Hmoob Ntujqubqab,

Wow...! Koj hais nyob qab nyoob hwm zaum tav lov? Cas yuav coob ua luaj li...!Muaj ib tug Hmoob Xyooj nyuam qhuav los rau USA kiag lawm, tseem yuav muab pam rau lub week end tom ntej 28-31 lub 1hlis 2011 nov thiab tiag. Yog nws mus yuav tau ib tug mos ab es mus noj phawm tawm txog ntawm qhov rooj cia li ntuav, ntuav, ntuav ntshav thiab ces cia li tuag kiag tam sim ntawd no...Tam sim no cov kwv tij Hmoob uas plhis zom zaws ua nkauj kiab nraug KAUS, ua nkauj KAUS nraug kiab mas xyov lawv yuav xaus lawv lub neej li cas li lauj...Hnob kiag xov tooj nrov xwb, tej tug yawg 70 xyoo lawm los tej niam tej txiv yeej coj tej tug me nyuam ntxhais 14-15 xyoos tuaj puag Luam nab Thas tuaj rau Vees Cam, coj tej me nyuam tuaj rau Yawg thaub xwb. Cia li coj tej me nyuam ntawm yus ntiag tuaj cuab dab cuab tsov, tuaj muag nqaij muag plig li tsiaj li txhuv tsis nco hlub, tsis nco khuv leej li lawm...Yus yog niam yog txiv, yog yus tsis hlub tsis nqe, tsis qaws, leej twg thiaj yuav los hlub thiab tiv thaiv yus tej me nyuam, yus tej roj ntsha????? Yus tseem yog tus yuam ua ntej...Cas tu siab ua luaj li...Hmoob ntshaw ntshaw kev tau zoo kev vam meej, Saub nim los tshoj Hmoob siab ntau zaud, txog hnub no Peb nyob rau lub sawm fem uas Saub tshoj los txog lawm, tab sis peb tsis txawj txais qhov zoo. Peb tseem rov mus nyob Sawm Fem Dev Npua lawm thiab....

Hmoob ntuj qub qab,

Kuv hais Khej Dub nyob qab dav hlau hla teb chaws mas yog lawv nce ntawm cov log nyoob hoom mus nyob rau hauv theem rau khoom ya mus xwb. Tab sis no heev, thaum nyoob hoom ya siab lawm. No tab sis lawv kuj tsis muaj tus tuag, cov tuag coob yog cov nyob hauv cov tsheb freezer uas thauj zaub, txiv ntoo thib khoom noj tshiab tej...Cov nov mas lawv tsis muaj cua ua pa ces kuj muaj coob tus tuag lua ntej txog chaw...Kuj muaj cov Suav tuaj coob li nov tuaj thiab....

Cas neb yuav piav tau txaus nsthai ua luaj nas Tijlaug Hmoob ntuj qub qab thiab Maiv Tooj e! ua neeg nyob es tsis ntshai tuag tiag tiag li lauj , ab xyov ua li cas neeg pheej xav txog nyiaj nkaus xwb, pheej tsis pom ntiaj teb zoo nkauj thiab muaj nqis li tiag, pheej pom kev plees kev yig, kev ntshaw nyiaj ntshaw txiaj thiab kev ntshaw ua nom ua tswv nkaus xwb, lawv pheej pom thiab ntshaw yam khoom nyob ntiaj teb xwb,puas muaj hnub lawv xav txog lub neej yav pem suab nid? Puas muaj hnub lawv xav ua neeg ntshiab si nid? Puas muaj hnub lawv saib yam saum ntuj muaj nqis dua yam hauv ntiaj teb no ned?

Maiv Paj Lug wrote:[color=blue]

nyob zoo os Maivtooj , Maivpaj , Hmoob ntujqubqab , thiab cov phooj ywg sawv daws .

Oh !! cas nej thamyuav tham tau txaus ntshai thiab txaus chim siab ua luaj li os ,
Ua li cas lub ntuj nim txawj tig es
Nim yuav tig peb hmoob nyob mus nto moo
Los ua cas peb hmoob ib txhia twb tsis xyau ua neeg zoo
Lub ntuj nim tig peb hmoob nyob txawj ntse
Los ua cas peb hmoob ib txhia tseem tsis tseg txoj kev ua Dev
Lub ntuj xav kom peb hmoob los sib hlub sib nyiam
Tab sis thaum peb hmoob tau zoo thiab muaj nyiaj
Ua li cas peb hmoob ib txhia yuav tsis tseg txoj kev lim hiam
Cov txom nyem los yuav saib huab cua plooj ntoos yog nyiaj
yuav yuam yus tej me tub me ntxhais ua txoj kev qias
tsis nco tias lawv yog neeg muaj sia muaj pa
ua li nej puas xav tias lawv yog nej roj ntsha
Peb hmoob kheev lam zoo li daim MOVIE es tig tau rov
Xav kom nej muab tig saib dua kaum zaus
Seb nej lub hlwb puas yuav to taub kom nej ho hloov dua siab


Thov kom huab tais ntuj ua nej lub siab zoo es ho thim xav
thiaj li nco ra rov los phlw nej tej tub ntxhais
ho tej niam txiv los ho tsis txhob nrhuav lawv tej neej
rau txoj kev npau suav puas ntsoog ua yuav tsim tsis meej
ces ntshe yuav plam tag nej lub neej mus ib sim tsis ciaj neeg os

Nyob zoo Maiv Xis, Maiv Paj Lug thiab Hmoob Ntujqubqab,

Maiv Xis,

Nws cov lus yog tag nrho, cas Hmoob ho tsis xav txog...?
Nws cov lus raug tag huv si, cas Hmoob ho tsis xav txhij...?

Hais lo twg los tu siab, vim lawv tsis hlub lawv tej me nyuam ntawm ntiag...
Hais los twg los lwj plawv, vim lawv tsis thaiv lawv tej me tub ntawm taw...

Thaum me nyuam raug luag ua phem, thawj los lus yog me nyuam hais tias kuv yuav mus qhia kuv txiv pab kuv nres...Cas hnub no pom nyiaj es ho yog kuv txiv coj kuv mus txhub zaj qho rau dab hem...?
Thaum me nyuam raug kev nyuaj, me nyuam thawj lo lus hais tias kuv yuav mus qhia kuv niam so kuv lub kua muag..., cas hnub no ntshaw nyiaj es yog kuv niam coj kuv mus rau tsov noj rau dais dua...?
Es yog li cas lawm os Hmoob...? Zaj dab neeg uas Hmoob Vaj coj ntxhais mus rau Tsov noj tseem hais tsis tau tag txog niaj hnub no...

Nyob zoo MaivTooj Maiv Paj Lug thiab Maivxis

Nyob ntuj qub qab tsis pom qab xeeb fab
Khwv nyiaj tsis tau yooj yim lub zog los nkim
Ua qoob los muaj nas txom fav tu tsiaj los muaj tub sab
yog li ib txhia thiaj npav yooj yim muab tej ntxhais los sim ua nqi

Niag laus zoo li yus txiv los tseem hais rau tej ntxhais tias tus yawg no khws kawg li
Niag laus zoo li yus yawg los tseem hais rau tej ntxhais tias zoo kawg

Tej tub ntxhais leeg lub xov tooj tsuas hnov nroo
hauj lwm vaj tsev tsis xav ua tsuas yog xav li cas seb puas tau nyiaj yuav zoo dua

Laus los lam khawm txawm maj los yeej tsis rawm
Laus ua pa tsw ntxhiab los tseem hais tias tsw qab thiab
laus los tsis xyeej tsuav tau nyiaj los siv rau lub neej
Lam muab lub cev tab sis tsis xav ntsia lub ntsej
Lam muab lub cev rau yawg laus puag tab sis tsis pom qab ua cas ces qi muag

Tsis pom qab hais li lawm cov laus los maj kov
ces cov hluas los yeej puam chawj hlo.

Tub Ceev Xwm tau muab Ntxawg Lauj cov hneev tes, qaub ncaug coj mus tshuaj xwm ADN, lawv pom tau tias cov hneev khau uas luam Pog Liab tej hauv siab yog Ntxawg cov, cov hneev tes tuav Pog Liab los yeej yog nrog rau tej pob kub uas raug ntaus sab ntawd puav leej muaj Ntxawg cov ADN lo tib si. Dua li Pog Liab txoj saw kub, lawv tshawb tau hauv Ntxawg Lauj nkawm khau...Ces lawv muab Ntxawg coj mus nyob tsev Loj Fab lawm...