Nram no yog sau ntxiv txog Gloria Polo cov lus piav txog nws mus pom Tswv Ntuj tau qhia rau nws paub txog tias nws tsis tau ua raws Tswv Ntuj kaum lo lus qhia:
Hais txog Tswv Ntuj lo lus qhia ob: Koj yuav hwm koj tus Tswv Ntuj lub npe, Gloria piav li no: “Thaum lawv hais txog lo lus thib ob rau kuv mas ua rau kuv tu siab kawg nkaus,vim txij thaum kuv me nyuam ntxhais me me los, kuv twb kawm tau hais tias yog kuv dag mas kuv tsis mag kuv niam muab rau txim hnyav hnyav no lawm. Ces kuv cia li pib caum Xas Taas uas yog lub hauv paus kev dag, thiab xyaum ua neeg dag los lawm. Kuv cia li ua txhaum ntau zuj zus thiab xyaum dag loj zus zus tuaj. Thaum ntawd kuv paub hais tias kuv niam hwm hwm Tswv Ntuj lub npe kawg li, yog ib lub npe ntshiab heev rau kuv niam. Ces kuv txawm siv Tswv Ntuj lub npe los cog lus cuav. Tsuav yog kuv ntshai tsam kuv niam rau txim thaum twg mas kuv tab siv lo lus tias: ‘Niad, Kuv cog lus rau Tswv Ntuj tias…’Tsuav kuv hais li ntawd xwb ces kuv yeej tsis tau mag txim li. Ces kuv yeej siv Tswv Ntuj lub npe ntshiab ua kuv tej niag hauj lwm cuav qias neeg tas li, vim kuv lub siab yeej tsuas puv… kev txhaum nkaus xwb.
Cov kwv tij viv ncaus, tom qab no kuv mam paub hais tias yus tej lus yus hais tsis yog yuav hais tas dawb dawb. Kuv niam cem kuv thaum twg mas kuv tab hais tias: “Niad, yog kuv dag koj mas kom xob tua kuv!” Saib tom qab no los pov, thaum twb tsis nco qab tej lus ntawd lawm, xob cia li tua kuv tiag tiag, muab kuv hlawv kub hnyiab tas ib nrab. Twb yog vim muajTswv Ntuj txoj kev khuv leej, kuv thiaj tseem tau nyob ntawm no…”
Hais txog lo lus qhia peb: Koj yuav caiv Tswv Ntuj hnub: “… Lub suab hais lus rau kuv tias, kuv niaj hnub siv plaub tsib teev los mus tu kuv lub cev, tiam sis kuv twb siv tsis txog kaum nas this los nyiam Tswv Ntuj ua nws tsaug los yog teev ntuj me me li. Kuv pib hais Saw Mab Liab, tiam sis kuv saib kuv movie, ces thaum txog commercials mam hais tsuag tsuag me ntsis xwb. Hos hnub twg kuv tsis xav mus teev ntuj tom tsev teev ntuj mas kuv hais li no: “Niad, tswv Ntuj twb nyob tas qhov txhia chaw ne, cas tseem pheej yuav mus tod (tsev teev ntuj) thiab maj?”… Lub suab hais rau kuv tias kom kuv nco ntsoov tias Tswv Ntuj saib xyuas kuv 24 teev ib hnub tiam sis kuv twb tsis teev ntuj me me li, hos hnub Chiv mus teev ntuj twb tsis ua Tswv Ntuj tsaug, twb tsis nco nws txiaj ntsim me ntsis li. Nws qhia kuv tias mus teev ntuj Hnub Chiv yog mus nrhiav qhov los yug yus tus ntsuj plig xwb. Tiam sis kuv tsuas yog tu kuv lub cev nkaus xwb. Kuv ua kuv lub cev qhev, tsis nco qhov tseem ceeb lawm tias: Kuv muaj ib tug ntsuj plig tiam sis kuv tsis tu nws kiag li. Kuv tsis tau nyeem Tswv ntuj lo lus los yug kuv tus ntsuj plig ib zaug li, vim kuv hais tias leej twg nyeem Tswv Nuj lo lus mas yog vwm thiaj nyeem.”
Hais txog lub Cim Daws Txhaum:“… Kuv nquag hais kam tias kuv tsis kam mus daws txhaum ntawm cov niag txiv neej laus uas tseem ua phem tshaj kuv… Qhov ntawd yog dab phem cab kuv tawm hauv txoj kev daws txhaum mus ces thiaj ua rau kuv tus ntsuj plig plam txoj kev dawb huv … lawm. Niaj zaus thaum kuv ua txhaum mas kuv plam ib qho tseem ceeb: vim Xas Taas muab nws txoj kev phem kev tsaus ntuj los hloov kuv tus nsuj plig txoj kev dawb huv zuj zus tas lawm. Tswv Ntuj qhia rau kuv to taub tias hauv kuv lub neej, kuv tsuas tau mus daws txhaum ib zaug xwb thiaj tseem ceeb, yog thaum kuv mus txais Yes Xus lub Cev thawj zaug, dua li ces kuv mus daws txhaum tiag, tiam sis yog mus daws txhaum cuav xwb. Kuv mus txais Yes Xus lub Cev thaum twg ces yeej tsis tsim nyog mus li. Tsis tas li xwb, kuv tseem tau hais lus thuam lub Cim Yug thiab…Kuv txoj kev hwm ntuj mas poob qis tshaj plaws li.
Hais txog cov leej choj: … Kuv kuj yog ib tug neeg uas nquag nquag thuam cov leej choj kawg li… Qhov ntawd yog kuv kawm ntawm kuv tsev neeg los. Kuv nco thaud kuv txiv yeej pheej thuam cov leej choj, ces peb cia li xyaum ua ib yam li ntawd… Huab Tais (Yes Xus) hais rau kuv tias:‘Koj xav tias koj yog leej twg? Ua cas koj thiaj muab koj ua Tswv Ntuj, koj thiaj muaj cai txiav txim rau kuv cov neeg uas kuv tau xaiv (my anointed)? Lawv yog neeg thiab xwb. Ib tug leej choj yuav ua neeg ntshiab tau yog los ntawm nws pawg ntseeg los, lawv yuav tsum thov ntuj tiag pab nws, lawv yuav tsum hlub nws, thiab txhawb nws. Yog thaum twg ib tug leej choj ua txhum, mas luag yuav nug txog qhov ntawd ntawm nws pawg ntseeg, luag yuav tsis nug nws.’ Thiab Huab Tais ua rau kuv pom tias, niaj zaus thaum kuv hais lus thuam cov leej choj, mas muaj ib co dab phem los lo rau kuv ntag.”
Hais txog lo lus qhia plaub: Koj yuav hwm koj niam koj txiv. “Huab Tais ua rau kuv pom tej uas kuv tsis ris kuv niam kuv txiv tej txiaj ntsim, tej uas kuv cem kuv yws nkawd , tej uas kuv saib tsis taus kuv niam vim kuv niam ruam… Thiab kuv xav hais tias kuv twb muab nyiaj mus them nkawd tej nqe kho mob tej nqe tshuaj lawm ces yog kuv ua zoo kawg lawm, tiam sis Huab Tais hais tias kuv siv nyiaj pab nkawd tiag, tiam sis yog pab kom kuv tau yuam nkawd siv nkawd raws kuv siab nyiam xwb.
Hais txog niam thiab txiv ua tus qauv tsis zoo rau tej me nyuam: Kuv tsa muag ntsia pom kuv txiv quaj tu siab kawg pos muag nti (nyob hauv teb chaws hem txim), vim rau qhov tias nws tau qhia kuv kom rau siab khwv, … kom ua neeg ncaj. Tiam sis nws tsis tau qhia ib qho tseem ceeb: Yog qhov tias kuv muaj ib tug ntuj plig. Nws tsis tau ua ib tug pov thawj zoo txog lub Moo Zoo rau kuv li, vim li ntawd kuv lub neej thiaj poob mus rau qhov phem lawm.
Thaum kuv txiv ua neej yav hluas, kuv txiv yog ib tug neeg tham tham hluas nkauj coob coob. Kuv txiv qhuas tias ua taus li ntawd mas thiaj yog txiv neej yawg. Kuv txiv kuj tseem quav dej quav cawv, quav luam yeeb tib si thiab. Kuv pom kuv niam quaj tu siab kawg, ces kuv cia li pib ntxub pib khib. Txoj kev hkib siab cia li coj kuv mus ua lub neej poob rau kev phem kev txhaum lawm. Kuv pom kuv txiv pheej ua tej yam saib tsis taus kuv niam rau ntawm txhua leej txhua tus xub ntiag, ces kuv cia li npau taws heev heev li. Kuv mus cem kuv niam tias kuv li mas kuv yuav tsis coj li kuv niam. ‘Tos poj niam tsis muaj nqes kiag li los yog vim muaj cov poj niam zoo li koj es tsis tsa yus hwj chim hos pheej cia tej txiv neej tsuj yus nkaus xwb nev!’ Thaum kuv loj zog lawm, kuv mus nrog kuv txiv sib cav: ‘kuv li mas kuv yuav tsis cia ib tug txiv neej tsuj kuv li koj tsuj kuv niam ib zaug li. Yog nws tseem mus tham hluas nkauj thiab mas kuv yeej ua kiag li nws los puj thiab tiag!’ Kuv txiv txawm ntaus kuv thiab cem kuv tias: ‘Koj tsis txhob vam hais tias yuav ua li ntawd!’ …Kuv hais kuv txiv tias: ‘Koj txawm yuav ntaus kuv, koj txawm yuav tua kuv los yog kuv mus yuav txiv ib hnub, es kuv tus txiv tseem tham hluas nkauj thiab mas kuv yeej yuav ua kiag pauj kom txiv neej thiaj paub tias poj niam chim npaum li cas thaum txiv neej muab lawv tsuj ntiag!’
Vim kuv muaj txoj kev khib siab thiab kev npau taws, mas thaum kuv pib mus ua hauj lwm tau me ntsis nyiaj, ku cia li pib rau tswv yim rau kuv niam kom kuv niam nrauj kuv txiv: ‘Koj tsis tas pheej yuav nyiaj ib tug neeg zoo li ntawd li na! Tsa koj lub hwj chim me ntsis mas, es ua kom nws pom tias koj muaj nqes thiab no maj!’
Kuv niam tsuas teb kuv tias: ‘Ua tsis tau li ntawd os, me ntxhais. Kuv yeej nyuaj siab kawg tiag, tiam sis kuv zoo siab muab qhov ntawd fij rau ntuj, vim kuv muaj nej xya leej me nyuam diam. Txawm li cas los koj txiv mus mus ib hnub los, koj txiv kuj tseem yog ib leeg zoo txiv rau nej cov me nyuam, es kuv ho yuav ua cas khiav thiab muab nej cais ntawm nej txiv mas? Tsis tas li ntawd xwb, yog kuv khiav mus lawm, leej twg yuav los thov ntuj pab cawm koj txiv no? Tsuas muaj kuv ib leeg xwb thiaj thov ntuj rau nws kom Tswv Ntuj cawm nws. Tej kev nyuaj siab uas nws tsim rau kuv ntawd, kuv muab coj mus koom nrog HT Yes Xus txoj kev txom nyem saum Ntoo Cuam. Niaj hnub kuv hais rau HT Yes Xus tias:'Kuv txoj kev nyuaj siab twb piv tsis tau rau koj tus Ntoo Cuam li, thov koj cawm kuv tus txiv thiab kuv cov me nyuam.’
Thaum ntawd kuv tsis to taub kuv niam zaj li. Kuv txoj kev npau taws haj yam loj tuaj xwb thiab ua rau kuv pauv kuv leej neej tas. Kuv cia li pib mus tshaj tawm kuv lub tswv yim xav pab cov poj niam. Kuv pib hais lus txhawb txoj kev rho me nyuam, txoj kev pw ua ke tsis tas sib yuav tso, txoj kev sib nrauj, txoj kev uas luag ua phem rau yus yus yuav tsum ua pauj. Kuv tsis tau ntxeev siab rau kuv tus txiv ib zaug li, tiam sis kuv tau coj coob leej ua txhaum vim kuv lo lus.”
Hais txog lo lus qhia tsib: Koj yuav tsis txhob tua neeg. “Huab Tais tau qhia rau kuv paub txog tias kuv yog ib tug tua neeg loj kawg nkaus, thiab kuv tau ua yam kev tua neeg txhaum loj tshaj raws li nws qhov muag pom: Yog qhov kuv tau rho me nyuam ib zaug. Thiab vim kuv muaj nyiaj txiag, kuv muaj lub peev xwm pab tau coob leej rho me nyuam pov tseg, vim kuv ntseeg hais tias poj niam muaj cai xaiv thaum twg lawv xav yug me nyuam thaum twg lawv tsis kam yug. Kuv tau pom nyob hau phau ntawv txoj sia,,, kuv pom ib tug me ntxhais muaj 14 xyoos mus rho me nyuam vim yog kuv cob qhia nws kom ua li ntawd… Tseem pom muaj peb plaub tug ntxhais, peb tug yog kuv peb tug ntxhais xeeb ntxwv… Lawv niam lawv txiv pub lawv tuaj ntawm kuv tsev, vim kuv muaj nyiaj muaj txiaj, thiab kuv cob kom lawv txawj hnav zoo raws li fashion, txawj ua kom luag ntsia yus nyiam yus, txawj khav yus lub cev rau luag. Kuv tus viv ncaus xa nws cov ntxhais tuaj rau kuv. Kuv cob lawv mus ua txhaum. Kuv cob cov uas tseem tsis tau muaj hnub nyoog txaus kom mus ua txhaum, mus ua kev tsis tsim txiaj. Kuv ua ib qho txhaum loj kawg nkaus li: Kuv tseem cob lawv mus rho me nyuam thiab.
.... Niaj zaus thaum peb muab ib tug me nyuam rho, mas zoo cuag li yog peb muab tus me nyuam ntawd cov ntshav mus txi rau dab phem Xas Taas, hos peb ua kom mob Tswv Ntuj siab kawg li. Nyob hauv phau ntawv txoj sia, kuv pom tib neeg tus ntsuj plig xeeb tsim los thaum uas tus kab txiv neej los nkag kiag rau lub qe niam. Txawm pom tawm kiag ib qho txim ci zoo nkauj, thiab pom ib txoj sab hnub pom kev ci saum Tswv Ntuj leej Txiv lub hnub tuaj. Txij kiag thaum ib leeg niam suab me nyuam lawm mas tus me nyuam tus ntsuj plig ci ntsa pom kev rau hauv nws lub plab. Thaum muab tus me nyuam rho, mas nws txawj mob, nws quaj qw, nws ntsaj, txawm tias nws tsis tau muaj qhov muag tsis tau muaj nqaij. Thaum neeg muab tus me nyuam tua li ntawd, nws lub suab quaj nrov mus txog saum ntuj , ua rau lub ntuj tshee qeeg tag, thiab kuj hnov ib lub suab nrov qeeg nkaws nyob dab phem teb thiab, tiam sis yog ib lug suab luag zoo siab. Thaum ua li no tas nrho, cov phab ntsa xov ncig dab phem teb txawm tawg tej kab ua kom muaj ib co kas tau kev tawm tuaj nkag mus lo rau ntawm tej tib neeg, ua kom tib neeg qaug mus ua lub cev qhev, thiab ua qhev rau tej yam kev phem uas peb niaj hnub pom thiab tseem yuav muaj tuaj.
Xyov nws muaj nws pes tsawg leej me nyuam raug tua li no hauv ib hnub? Yog ib txog kev yeej rau dab phem. Niaj zaus ib tug me nyuam tuag li no, mas nws cov ntshav mus daws tau ib tug dab phem tawm los ntxiv rau hauv ntiaj teb… Kuv pom tias kuv tshuav nqe ntau heev li: kuv tau tua me nyuam coob leej los ntawm kuv txoj kev siv cov IUD rau hauv tsev me nyuam. Kuv pom ntau tus me nyuam xeeb tau los, tiam sis lawv lub hnub ci pom kev cia li tawg rhe nrog rau lawv lub suab quaj, vim luag muab lawv chua ntia ntawm leej Txiv Tswv Ntuj txhais tes mus lawm…
… Kuv kuj tau tua neeg los ntawm txoj kev ntxub thiab, vim neeg tsis yog raug phom thiaj tuag xwb. Thaum yus ntxub lawv, yus ua phem rau lawv, los yog yus khib lawv, mas yus yeej tua tau lawv (tus ntsuj plig) thiab.” (Vim yus qhia kom lawv txawj ntxub txawj ua phem thiab).
(Mam tuaj tso ntxiv...)
Last edited by Mim on 3rd August 2012, 2:42 pm; edited 2 times in total