Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

TSA TSEV TEEV NTUJ HAUV TOJ COB TSIB TEB 06-06-2014

Gallery


Latest topics

» Nkauj teev Ntuj nyob hauv Youtube
by Maiv Tooj 30th August 2014, 5:15 pm

» Phau ntawv Txiv xaiv foom kom-TP ROLAND JACQUES TSAB NTAWV
by Maiv Tooj 30th August 2014, 8:30 am

» XH.Zoov Ntxheb Yaj Nthuav Ntawv Ntshiab.
by Maiv Tooj 29th August 2014, 8:56 pm

» TP.Txhiaj Foom lub TSEV Ntawv
by Maiv Tooj 29th August 2014, 7:25 pm

» COV ZAJ NYEEM HNUB CHIV 2013-2014 XYOO A
by Yaj Suav Nus 29th August 2014, 12:02 am

» Hmoob Catholique Sacramento, USA
by Maiv Tooj 27th August 2014, 10:07 pm

» HMOOB CATHOLIC NYOB COB TSIB TEB (Hmong Catholic Vietnam)
by Maiv Tooj 27th August 2014, 9:59 pm

» KEV THOOB TSIB & ZAJ NKAUJ SEEV
by Maiv Tooj 26th August 2014, 7:06 am

» Hmoob Guyane
by Maiv Tooj 18th August 2014, 4:23 pm

» Kwv txhiaj teev Ntuj Liag Xyooj
by Maiv Tooj 18th August 2014, 12:15 am

» Maiv Tooj lub tsev ua si
by Maiv Tooj 18th August 2014, 12:05 am

» Nyob ruaj nreb hauv txoj kev ntseeg txog Yesxus tus cawm seej
by Tub Kawm 14th August 2014, 5:24 pm

Suav neeg tuaj saib, txij hnub 17/09/2010 los mus.

    Mus pom saum ntuj thiab dab phem teb los

    Share

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Mus pom saum ntuj thiab dab phem teb los

    Post  Mim on 17th February 2011, 4:44 am

    Kuv muab ib zaj video no tuaj tso rau peb mloog. Yog hais txog ib tug tib neeg nyob Serbia uas nws tau mus pom saum ntuj ceeb tsheej thiab dab phem teb los. Kuv tsis tau muaj sij hawm muab txhais ua lus Hmoob ces peb xub mloog ua lus Mes Lis Kas tso.










    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages: 4255
    Date d'inscription: 2009-08-19

    Re: Mus pom saum ntuj thiab dab phem teb los

    Post  Maiv Tooj on 18th February 2011, 10:22 am



    Mim,

    Koj cov videos nov zoo kawg, tab sis to taub tsis tag, yog yuav txhais mas ntshe yuav muab lub caij ntau me ntsis, tab sis kuj xav kom nws txhais rau peb paub txog ntau yam tshuam txog txoj kev ua Ntuj Kev Cai, Yes Xus txoj kev Cawm Neeg thiab thiaj yuav paub tseeb tias txoj kev Ntseeg tseem ceeb npaum li cas. Yog tsis paub tsis pom tej yam tim khawv no ces yus pheej tsis ntseeg tag yus lub siab, yus pheej muaj qhov tub nkeeg, ua xyem xyav thiab xav qhov yooj yim tshaj uas hais tias:"Tsuav kuv ua Ntuj Kev Cai lawm ces tsis zam rau luag, tsis teev Ntuj li los Tswv Ntuj yeej PUB rau kuv lawm."




    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 5:40 am

    Nyob zoo tais Tooj thiab sawv daws,

    Kuv yuav tuaj muab zaj video saum no txhais ua lus Hmoob. Tiam sis kuv yuav txhais tsis tas raws nraim li nws cov lus uas nws sau. Kuv yuav tuaj piav lub ntsiab ntau. Muaj tej yam tseem ceeb kuv mam txhais nws cov lus xwb.

    Tus neeg nyob hauv zaj no yog ib tug neeg ntseeg Orthodox. Txawm nws tsis yog neeg ntseeg kas Tos Liv los tej yam nws qhia hauv no yeej raws nraim li peb Kas Tos Liv txoj kev ntseeg thiab. Zaj no zoo pab kom peb mob siab coj lub neej raws peb txoj kev ntseeg tiag tiag, thiab zoo pab kom peb to taub tias ua lub neej raws Tswv ntuj 10 Lo Lus Qhia txoj kev ncaj ncees, txoj kev tsim txiaj, thiab txoj kev hlub luag yog li cas.


    Part 1 - Ntu 1

    Dushan Yovanovich yog ib tug neeg nyob lub zos Kragujevac, Serbia teb chaws. Serbia yog ib lub teb chaws uas nyob rov rau ntawm Is Tas Lis teb sab toob fab(east),nyob rov rau sab ntug dej tim ub nram qab Hungary. Xyoo 1976, Dushan muaj 48 xyoo. Nws yog ib tug tub rog “Xiam oob qhab,”(lov tes lov taw los tu tes tu taw tej) ces ib xyoos twg nws pheej mus da dej tsau dej hauv cov chaw tsau dej (Spas) kom pab nws lub cev tau noj qab nyob zoo. Nws yog ib tug neeg ntseeg Orthodox. Tiam sis nws kuj tsis yog ib tug neeg kub siab thiab mob siab ntseeg zoo.

    Xyoo 1976 ntawd yog lub caij uas nws mus tsau dej li niaj xyoo. Nws twb mus tsau dej tau kaum hnub lawm, ces nws rov los tsev vim nws xav los mus koom nws tsev neeg ua kev nco txog lawv ib tug txheeb ze tau tas sim neej puv ib xyoos nkaus lawm. Hnub lawv ua kev nco txog yog tim 10 lub 7 hli. Tim 11 yav sawv ntxov tav li 10 teev, nws thiaj tsav tsheb rov mus lawm tom tsev tsau dej, yuav mus tsau dej ntxiv. Thaum txog ntawm tog kev yuav luag txog ib tug choj, txawm muaj tsheb coob coob thiab sawv daws maj mam swb mus xwb, vim muaj tsheb sib tsoo ntawm ib qho chaw sam roj uas nyob ze ntawd. Dhau plaws tus choj, muaj ib txog kev lem mus rau tom ib lub tsev koom haum cov leej phauj(monastery ) nyob Zica. Dushan txawm lem taug txoj kev ntawd, nws xav tias nws yuav xub mus tom lub tsev koom haum tso no.

    Tsis deb ntawm tus taw choj muaj ib qho chaw nres bus rau cov neeg caij bus(ib lub tsheb ntiav thauj neeg). Dushan txawm pom muaj li 20 leej neeg sawv tos bus. Hauv 20 leej ntawd muaj ob tug neeg zoo txawv cov, tus txiv neej yog ib tug monk(txiv tab seeb), hos tus poj niam yog ib tug leej phauj(nun). Nkawd hnav ris tsho dub ntev ntev thiab ntoo hom kaus mom phuam dub siab siab muaj daim khwb zoo li cov txiv plig Orthodox.

    Nkawd ob leeg pheej tsa tes tas zog rau cov tsheb uas los hla ntawd saib puas muaj neeg nres, tiam sis tsis muaj neeg kam nres li . Nkawd kuj tsa tes ib yam rau Dushan, ces nws thiaj mus nres tos nkawd thiab thauj nkawd. Thaum nkawd nkag los hauv tsheb lawm, nkawd pib nrog nws tham, cia li tuav nws npe, paub lub zos nws yug, lub zos nws nyob tib si, ua rau Dushan thiaj xav tsis thoob tias cas nkawd paub nws zoo ua luaj. Nkawd tseem tau piav txog nws niam nws txiv, nws pab nus muag tib si, nkawd paub lawv tej npe, paub lawv tej kev kawm txuj, tej hauj lwm, paub tias leej twg ntseeg ntuj leej twg tsis ntseeg tib si.

    Nkawd hais rau Dushan tias: “…koj mas koj ntseeg hais tias yog Tswv Ntuj tsim tib neeg. Koj tsis ntseeg zaj uas tej kws txawj ntse hais tias neeg txia ntawm liab los no, tiam sis mas koj ho tsis kam teev ntuj li. Koj muaj ib lub siab zoo thiab siab ncaj. Muaj peb lub sij hawm dhau los uas yog koj xav nplua nuj ces koj twb nplua nuj lawm, tiam sis koj tsis tau nplua nuj vim yog koj tsis xav ua neeg tsis ncaj. Koj muaj lub siab hlub cov neeg laus thiab cov neeg pluag. Vim koj muaj lub siab zoo koj thiaj nres thauj wb thiab koj thiaj teb wb lo lus tias: ‘Thov kom Tswv Ntuj pab peb!’ Koj hmoov zoo kawg uas koj tau ua li ntawd. Cov neeg uas tsis nres rau wb, zoo cuag li yog lawv fee ntsej muag rau wb thiab lawv nto aub ncaug rau wb lawm. Tsim nyog kom lawv txhob tau yug los yuav zoo dua li uas lawv tsis kam pab wb.”

    Thaum nkawd tham cov lus no mas Dushan tseem nres ntawm ntug kev tos kom tsheb sib zog es tau kev nkag los rau hauv kev thiaj tau mus ntxiv. Ces txawm muaj ib tug neeg yoj tes kom nws kav tsij los, ces nws thiaj nkag los rau hauv kev. Nws ke tsav tsheb ke ntsia rov tom qab tsam muaj neeg xav huas nws ntej. Thaum nws ntsia rov tom qab ces nws pom tias ob tug neeg ntawd ntshai tsis yog neeg ntiaj teb pob, vim nkawd ntsej muag ci hob hos muaj ob lub voj voog(halos) dawb paug ncig nkawd taub hau. Ces nws thiaj li ntshai thiab ho zoo siab thiab. Ces nws haj yam ua zoo tsav tsheb mus ntxiv.

    Tus monk(tus txiv tab seeb) thiab tus leej phauj nkawd tseem piav Dushan lub neej txij puag thaum nws tseem yau yau los txog niaj hnub no rau nws, thiab piav txog tej yam tsis muaj neeg paub uas Dushan tau xav txog hauv nruab siab tiam sis nws ho tso tseg tsis ua, tib si. Nkawd piav nws lub neej mas yeej raug tas nrho, zoo cuag li yog nyeem hauv ib phau ntawv rau nws mloog. Nkawd qhuas nws txog tej yam zoo nws tau ua, thiab ho cem ntuas nws txog tej yam tsis zoo. Thaum ntawd mas nws txaj muag kawg nkaus li xav kom ploj ntais rau hauv av lawm xwb, tiam sis ua tsis tau li ntawd, ces nws tau mloog nkawd hais.

    Nkawd hais txog ntau yam tsis zoo uas nws tau ua, tiam sis yog personal (hais txog nws tus kheej) xwb ces nws tsuas piav ib yam pub rau sawv daws paub xwb. Yog ib co lus uas qhia kom peb yuav tsum hwm thiab saib taus yus niam yus txiv. Yog tus phauj hais rau nws.: “Dushan, ua cas koj thiaj tsis kam nrog koj txiv tham thaum nej mus ua kev zoo siab rau hnub yug (birthday party) tom koj tus muam kwv tij(cousin) Desa lub tsev?” - “Kuv txiv tsis hlub kuv li lwm tus me nyuam. Nws tsis ua zoo rau peb, ces kuv xav ua kom nws tu siab thiab tau txaj muag ces kuv thiaj txhob txwm tsis nrog nws tham rau sawv daws pom.” Tus phauj thiaj cem thiab qhuab qhia nws tias: “Koj loj npaum li cas, ua cas koj thiaj muaj cai mus txiav txim rau lwm tus li ntawd? Tsuas yog Tswv Ntuj ib leeg xwb thiaj muaj cai txiav txim thiab rau txim. Nyob hauv Tswv Ntuj cov lus qhia, nws muaj ib los hais tias kom peb yuav tsum hwm niam hwm txiv no ne. Tswv Ntuj cog lus tias leej twg coj raws lo lus no mas nws yuav tau lub neej ntev kaj siab nyob ntiaj teb no no. Nyob hauv ntiaj teb no mas cov me nyuam yuav tsum saib niam thiab txiv zoo li yog tuaj ntawm Tswv Ntuj tuaj . Koj hmoov zoo, vim hnub tom qab koj rov pom koj qhov txhaum, ces koj tau rov mus ntsib koj txiv , mus thov txim ntawm nws lawm. Koj txiv zoo siab kawg, nws kua muag poob nthav thiab hais rau koj tias: 'Kuv zam rau koj os me tub!'" Tus phauj piav raws nraim li Dushan tau ua.

    Thaum lawv tuaj txog ze ntawm lub tsev leej phauj (monastery) nyob Zica lawm, tus txiv tab seeb (monk) hais tias: “Dushan , peb lub hlis tom ntej no mas koj yuav tsum tsis txhob piav dab tsi txog tej yam uas tshwm sim rau koj ntawm no, thiab tseem yuav tshwm sim hnub no ntxiv li ov. Dhau ntawd lawm mas koj mam piav tau tas puas tsav yam rau koj tsev neeg thiab koj cov phooj ywg.” Dushan tig ntsia rov tom qab, kuj tseem pom cov voj voog ci hob ncig nkawd taub hau. Ces nws txawm ntshai thiab xav kom txhob pom nkawd lawm. Nws thiaj nkag mus hauv qhov chaw nres tsheb, thiab tsav tsheb mus txog ze ze lub tsev cov leej phauj (monastery), ces nws nres thiab tawm los qhib qhov rooj rau nkawd. Ua cas nws cia li ceeb tag, vim tsis pom muaj neeg nyob hauv tsheb li. Nws ntsia pes tsawg lwm los tsheb qhuav qhawv xwb.

    Dushan thiaj pib ntshai heev thiab pib tshee. Nws xav tias ntshai yog nws vwm lawm lau. Nws tom nws txhais tes, rub nws cov plaub hau, tawg ncuav rau nws sab plhu. Nws tsis nco qab pom tias cov neeg uas tuaj ncig xyuas ua si ntawm lub monastery twb los ntsauv nws tas lawm. Lawv nug tias yog muaj dab tsi, nws hais kom lawv txhob quav ntsej txog nws ces nws khiav tawm hauv cov neeg mus.


    Last edited by Mim on 26th August 2012, 8:20 pm; edited 6 times in total

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 5:42 am


    Part 2 - Ntu 2

    Thaum nws ib leeg lawm xwb, nws saib moo no yog 11:30 teev yuav tav su. Ces nws thiaj txiav txim siab ncaj qha mus lawm tom chaw pw xwb, tsis noj sus li, vim nws tsis tshaib plab, thiab nws hnov sab sab.
    Ces nws thiaj tsav tsheb mus txog tom cov tsev da dej , tab tom tav su, neeg mus noj sus zom zaws. Nws nqa nws cov khoom hauv tsheb tawm los mus hauv nws chav pw, nws tsis hle ris tsho li, cia li pw nthi li ntawd rau saum txaj. Ib pliag ntshis xwb, ua cas cia li hnov mob ib zag ntawm nws hauv siab tuaj, thiab zoo li muaj ib qho dab tsi mus chob nws lub plawv. Nws cia li hnov nws xav xav tsaug zog, ces nws cia looj kiag lawm.

    Tiam sis nws ho cia li mus pom ib yam mas tseem tseeb tshaj saum neej no lawm thiab. Nws lub qhov rooj cia li qhib plho dav dav, hos nws chav pw ci pom kev lug. Muaj ib tug tshiab muaj tis tib si txawm nkag los. Nws zoo nraug ntxiag, plaub hau ntev ntev muab pav ua ib tug tw rau nraum nrob qaum. Nws hnav ib lub tsho ntev ntev ci ci, thiab tseem hnav ib lub tsho khuam ntev ntev haj yam ci tuaj saum toj. Nws rau ib nkawm khau khiab. Nws hais tias: “Dushan, sawv los wb yuav mus taug kev!” Ces Dushan txawm sawv los.

    Tus tshiab thiaj coj nws tawm hauv nws chav pw mus. Nkawd taug kev nce roob ntsiag to mus ib me pliag xwb ces tus tshiab txawm pib hais lus tuaj tias: “Dushan, ... Koj tau hais tias,’ua ib tug neeg mas yuav tsum noj, yuav tsum haus, yuav tsum hnav, thiab yuav tsum ua lom zem kom txaus txaus thaum tseem ciaj nyob thiaj tsim nyog. Thaum tuag lawm ces tsuav yog tau ib qhov chaw ntev li ob mev thiab me ntsis av los npoog xwb ces yuav li ntawd xwb’ no. Tiam sis koj yuav tsum paub tias neeg txoj sia tsis yog yuav tas rau thaum tuag ntawd. Txoj kev tuag tsuas yog ib lub rooj vag uas txhua tus neeg yuav tsum hla xwb. Thaum Tswv Ntuj tsim tib neeg, nws muab av los puab, tiam sis nws tshuab pa rau tib neeg, ces tib neeg thiaj muaj ntsuj plig thiab ciaj sia.”

    Thaum ntawd nkawd nce nto saum lub roob. Txawm muaj ib tauv huab nqes los nyob ntawm nkawd hauv ntej. Nkawd nkag rau hauv tauv huab ces nkawd cia li nce siab zuj zus mus saum ntuj lawm. Thaum tauv huab tab tom thauj nkawd li ntawd, tus tshiab thiaj hais ntxiv tias: “Dushan, yog vim koj muaj siab zoo, koj nyiam kev ncaj ncees, tsis nyiam dag, ces Tswv Ntuj thiaj li hlub koj thiab xav qhia kom koj paub txoj kev yuav taug mus ntsib kev cawm seej.” Thaum ntawd tauv huab nres, tus tshiab hais tias: “Koj ntsia lub ntiaj teb saib mas!”

    Ce nws ntsia no pom lub ntiab teb tas nrho, pom cov teb chaws, cov nroog, cov zos, cov niam dej, cov hiav txwv, pom cov tsiaj txhu, cov tib neeg tib si; pom lawv tej ntsej muag paub lawv yog leej twg tib si. Nws ho rov tig mus ntsia tus tshiab no pom ib co tshiab coob coob sawv ua peb leej nyob nraum tus tshiab qub qab, tuav rawv ib co hom(trumpets). Lawv zoo nkauj zoo nraug ci ntsa iab xwb, tsis muaj lus yuav piav tau.

    Tus tshiab thiaj hais ntxiv tias: “Dushan, koj ntsia mus hauv ntiaj teb ces koj yuav pom tias (yav tom ntej)cov neeg tuag yuav sawv rov los zoo li cas, thaum uas cov tshiab tshuab lawv cov hom thiab thaum HT Yes Xus yuav nqes rov los txiav txim rau ib tsoom neeg ciaj thiab neeg tuag.” Dushan txawm tig loo qhov muag ntsia mus rau hauv, ces thaum ntawd cov tshiab pib tshuab lawv cov hom. Tib txhij ntawd nws pom tej ntxa qhib zom zaws qhov txhia chaw hos cov neeg tuag tawm zom zaws los. Nws pom poj niam, txiv neej, me nyuam yaus tawm nplawg ntia hauv tej niam dej, tej hiav txwv, tej hluav taws, tej tsiaj qus lub qhov ncauj los, thiab lwm qhov chaw uas lawv tau tas txoj sia los.

    Tus tshiab thiaj piav rau nws tias: “Dushan, ua cas koj thiaj ceeb? Thaum cov suab hom nrov ces cov neeg tuag yuav sawv tsees rov los muaj txoj sia. Txawm yuav yog lawv raug nqos lawm, los raug kub hnyiab tas lawm los raug tsiaj muab noj tas lawm los lawv yeej yuav ciaj rov los. Nyob ntawm Tswv Ntuj xub ntiag mas tsis muaj ib yam uas yuav ua tsis tau li, thiab tsis muaj ib yam uas yuav tsis muaj sia; tas puas tsav yam yuav muaj sia tuaj!”

    Dushan pom tias ntawm cov neeg txhua tus hauv pliaj lo ib daig ntawv rau. Ib co muaj ntawv sau ntau ntau rau, ib co muaj sau me me xwb. Tus tshiab thiaj piav tias cov ntawv ntawd yog sau tias tus neeg ntawd tau ua dab tsi thaum nws ua neej nyob, thiab nws tau xav txog dab tsi, kom tsis muaj ib yam uas yuav zais tau li. Txhia tus yuav tsum ntoo daim ntawv li ntawd mus rau HT Yes Xus Pleev txiav txim rau lawv.

    Dushan pom nyob hauv cov sawv rov los ntawd, muaj ib co neeg uas yog nws tsev neeg, ib co yog phooj ywg, thiab ib co yog cov neeg nws paub. Nws zoo siab pom lawv, lawv los kuj zoo siab pom nws kawg. Lawv tsa tsa tes rau nws thiab hais lus rau nws, tiam sis nws tsis hnov lawv lub suab li. Ces tus tshiab hais tias kom nkawd mus ntxiv, ib tsam nkawd mam rov los dua.

    Tauv huab thauj nkawd nce mus siab zuj zus rov sab hnub tuaj. Thaum nkawd nce li ntawd Dushan pom ib co zoo li duab neeg muaj taub hau muaj ntsej muag muaj tes taw ti si thiab ci ci. Cov neeg no ya mus mus los los ib ncig nkawd. Tus tshiab thiaj qhia tias cov ntawd tsis yog tseem tib neeg muaj cev nqaij, yog ib co ntsuj plig tib neeg xwb. Thaum Tswv Ntuj tau muab av los tsim tib neeg, nws tshuab pa ua ntsuj plig rau tib neeg, yog vim li ntawd cov ntsuj plig thiaj li ci ci. Thaum ib tug ntsuj plig tawm ntawm nws lub cev nqaij mus lawm, mas nws tseem pom kev tau, tseem hnov lus tau, tseem txawj hais lus tau, tseem nco tau, tseem txawj zoo siab ib yam li thaum nyob hauv lub cev nqaij. Tus tshiab qhia hais tias, tus ntsuj plig nyob tas nrho qhov txhia chaw hauv nws lub cev nqaij, tus plig yog lub zog ua kom lub cev ciaj taus khiav taus. Yog ib lub cev tsis muaj tus ntsuj plig ces yeej ciaj sia tsis tau li. Thaum ib tug ntsuj plig tawm hauv lub cev mus mas nws muaj 40 hnub rov los ntsuam xyuas nws lub neej uas nws tau ua nyob ntiaj teb, tas puas tsav yam uas nws tau ua, nws tau hais los yog tau xav txog tib si. Thaum tas 40 hnub lawm, ces tus ntsuj plig mam nce mus saum ntuj mus raug txiav txim saib nws tsim nyog yuav mus nyob qhov twg.

    Tauv huab tseem thauj nkawd mus siab tshaj ntxiv. Nkawd tau hla xyov pes tsawg txheej ntuj, ua rau Dushan ntshai kawg, ces nws npuab ti ti tus tshiab xwb. Ces nkawd thiaj mus txog ib lub vaj muaj nyom zoo nkauj kawg nkaus. Muaj ib tug laj kab loj loj uas tsis pom qhov pib los qhov xaus li xov ncig lub vaj . Nyob ntawm tus ntsa laj kab no, muaj ib lub rooj vag uas yog ua zoo li ib tug ntoo cuam. Ntawm lub rooj vag sab xis, muaj ib tug tshiab sawv rawv ntawd saib. Lub ntsa laj kab thiab lub rooj vag ci ci zoo nkauj kawg li. Ncig ntawm thaj tsam no mas muaj cov ntsuj plig coob coob. Ib co ci ci hos ib co tsis ci heev.

    Muaj ib co tshiab nyob ncig cov ntsuj plig ntawd, thiab kuj ho muaj ib co dab phem nyob ncig thiab. Thaum cov ntsuj plig los txog ntawd, lawv mus thov tus tshiab zov rooj vag. Yog tus tshiab kam ces lawv yuav mus lawm hauv lub vaj. Tiam sis cov dab phem pheej nyob ntawd thaiv lawv tas zog kom lawv txhob tau nkag mus. Muaj ntau yam Dushan tsis to taub, tiam sis nws tus coj kev tsis kam piav rau nws. Tus tshiab coj Dushan hla lub rooj vag nkag mus lawm hauv.

    Tiam sis cas tseem muaj ntau lub rooj vag yuav tsum hla thiab, tsis yog ib lub xwb. Txoj kev uas mus ntawm thawj lub rooj vag mus rau lub tim ob tod, mas mus ncaj qha xwb tiam sis nqaim kawg li, Ntawm sab xis thiab ntawm sab laug, muaj ob tug kwj tob tob uas tsis muaj qab kawg hauv li. Ncua kev uas mus ntawm ib lub rooj vag mus rau lub tom ntej mas deb ib yam xwb, tiam sis txoj kev mas nqaim zuj zus nqaim zuj zus mus lawm xwb. Thaum mus txog tom lub rooj vag kawg nkaus mas txoj kev tsuas dav li ib sab taw lawm xwb.

    Thaum nkawd nkag mus dhau thawj lub rooj vag lawm, nkawd mus kev ib pliag xwb ces nkawd twb mus txog lub ob tod lawm. Lub rooj vag thib ob no tseem zoo nkauj tshaj lub thib ib lawm thiab. Kuj muaj ib tug tshiab zov rooj vag nyob ntawm no thiab muaj ib co ntsuj plig nrog lawv cov tshiab pov hwm,thiab kuj tseem muaj cov dab phem thiab, cov dab phem no mas haj yam siv zog thaiv kom cov ntsuj plig txhob tau nkag. Tiam sis cov uas lawv tau txais lus kheev ntawm tus tshiab zov rooj vag lawm mas lawv kuj nkag tau, vim dab phem ua tsis tau li cas rau lawv lawm.

    Nkawd mus hla dhau cov rooj vag tib si, tsis muaj ob lub yuav zoo ib yam, nyias zoo txawv nyias tas nrho, lub los lawv qab zoo nkauj tshaj lub ua ntej. Cov tshiab zov rooj vag los kuj hnav txawv tib si thiab. Nyob ntawm lub rooj vag kawg nkaus, sawv ib tug tub hluas ua zoo nraug kawg li, thiab zoo muaj ntsis yuav xws li tus tshiab uas coj Dushan kev. Nws tuav ib phau ntawv ntawm sab tes laug, nqa ib rab ntaj ntawm sab tes xis. Nws luag nyav thiab khoov rau nkawd thaum nkawd hla ntawm txoj kev uas nqaim nqaim heev mus rau hauv lub vaj. Dhau plaws lub rooj vag kawg ntawd , ces nkawd txawm mus rau hauv ib qho chaw uas pom pom kev heev kawg nkaus.

    Ua ntej ntawd, mas kuj pom kev thiab tiam sis tsuas pom kev li thaum nruab hnub nrig xwb. Hos qhov pom kev no mas txawv deb kawg li, yog yuav piv mas txawv npaum ib hnub tshav ntuj nrig thiab ib hmos uas tsaus ntuj dub nciab. Dushan thiaj tig nrhiav saib lub hnub nyob rau qhov twg. Tiam sis tus tshiab hais rau nws tias, nkawd twb ncaim lub hnub los lawm ntev heev lawm. Zaum no nkawd los nyob rau Huab Tais lub ntuj lawm. Yog Tswv Ntuj lub ntsej muag ci hob tas mus li ua kom pom kev lawm xwb. Ua ntej ntawd mas Dushan pheej muaj qhov nshai mtshai thiab tshee tas mus li, tiam sis los txog hauv no, qhov ntshai ntawd ploj ntais mus lawm, hos nws cia li hnov zoo zoo siab thiab kaj kaj siab lawm xwb.

    Dushan tuaj puag saum txheej ntuj kawg ntsia rau hauv, nws pom muaj ib lub nroog zoo zoo nkauj dav dav tsis muaj qhov xaus li. Pom muaj tsev, muaj tsev teev ntuj, muaj vaj ncig ua si, thiab lwm hom chaw zoo nkauj nyob qhov ub qhov no puv nkaus saum ceeb tsheej. Tas puas tsav yam ci ntsa iab xwb. Nws pom ob tug dej ntws, ib tug dej daj ib tug dej dawb ntws hla lub nroog ntawd. Tus tshiab coj kev thiaj qhia tias ib tug yog dej mis nyuj hos ib tug yog dej zib muv. Tseem muaj ntau ntau tus me nyuam dej ncau ntawm ob tug dej loj mus ywg txhua tsob nroj tsuag tib si.


    Last edited by Mim on 3rd August 2012, 4:53 am; edited 3 times in total

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 5:45 am


    Part 3 - Ntu 3

    Tus tshiab coj Dushan nqes mus txog lub nroog zoo nkauj ntawd, yog ntuj ceeb tsheej tiag tiag. Zoo nkauj tshaj plaws tsis muaj ib yam yuav zoo li ntawd li. Hauv av ci hob cuag tsom iav thiab pom kev cuag pov haum (crystal) xwb. Tej vaj tej tsev zoo nkauj tas nrho li, nyias zoo txawv nyias, nyias zoo muaj nyias tug. Cov ru tsev kheej kheej zoo li cov tsev teev ntuj Lav Xias (Russian). Nyob ncig cov vaj cov tsev muaj ib cov vaj paj ntoos zoo nkauj kawg nkaus thiab.

    Tas puas tsav yam tsw qab ntxiag, muaj cua nplawm ntxuj ntxiag nplawm tej pa tswv qab ntawd mus puv qhov txhia chaw. Muaj tej hom paj txawj nthuav tsis tseg tas mus li, muaj tej hom mas ho txawj hloov tsos, nyob nyob hloov zoj ua ib tsos txawv, nyob nyob ho rov hloov dua. Kuj muaj ntau hom txiv ntoo thiab. Tej txiv mas txi tau hlaws hlaws thiab muaj muaj kua xwb, pom kua ntws lug nyob hauv lub txiv kiag. Tus tshiab qhia hais tias cov txiv ntoo ntawd mas ib xyoos txi 12 phaum txiv. Kuj pom muaj tej cov vaj hmab txiv cawv (vineyards) nyob taug tej ntug dej los ncig tej vaj tse thiab. Kuj tseem muaj ntau hom noog zoo nkauj tshaj plaws li thiab.

    Dushan kuj pom muaj neeg coob coob nyob hauv ceeb tsheej. Cov neeg laus mas ntsej mug hluas hluas xwb, tiam sis yus paub tias lawv yog neeg laus vim lawv plaub hau thiab hwj xwv dawb paug. Cov me nyuam yaus mas lawv zoo xws li ib co tshiab xwb. Cov neeg nyob tau lom lom zem, lawv sib yaum mus ncig mus ua si hauv tej vaj paj. Lawv de tej paj ntoos los ua kauj ntoo. Tej noog los tsis ntshai lawv li, noog ya los tsaws lawv tej xwb pwg, los quaj rau lawv mloog. Cov laus thiab cov me nyuam yaus hnav khaub ncaws txawv. Cov tshiab thiab cov neeg nyob ua ke sib nphoo ntxuas. Cov tshiab mas ntsej muag ci tshaj lub hnub ci hos lawv tej ris tsho ci npaum xob laim. Cov laus cov hluas thiab cov tshiab sawv daws nyob sib haum zoo. Nyob ntau qhov chaw pom lawv ua ke hu nkauj qhuas Tswv Ntuj.

    Tus tshiab coj Dushan taug kev ncig xyuas ntuj ceeb tsheej. Nkawd taug kev tsis nyuaj mus kev li, qee tsam nkawd mus khiav sas ntws xwb. Nkawd mus txog ib qho chaw mas zoo nkauj tshaj lwm qhov tas nrho . Ntawm sab xis, muaj ib co neeg tsim txiaj sawv ua ib leej zoo saib. Ntawm sab laug kuj sawv ib leej thiab. Nyob hauv ob leej neeg ntawd, mas cov neeg sawv ua tej pwb pab ua ke raws lawv txoj dej num. Thaum mus txog ze lawm, tus tshiab txawm maj mam mus kev lawm xwb. Nws tig mus rau sab xis, muab tes piav tias: “Cov no yog cov tshiab (Angels), cov no yog cov thawj tshiab(Archngels).” Ces nws tig mus rau sab laug, nws hais tias: “Cov no yog cov Leej Ntshiab(Saints), cov no yog cov Txiv Twj Cuab(Hermits).” Nws rov qab tig mus sab xis: “Cov no yog cov Kes Lus Npis(Cherubs), cov no yog cov Xes Las Fis(Seraphs).” Nws rov tig rau sab laug: “Cov no yog cov txiv tab seeb(Monks), cov no yog cov tuag ua Tim Khawv(Martyrs) uas tau tuaj yeem muab lawv txoj sia rau HT Yes Xus Pleev, lawv thiaj li tau txais koob meej nyob saum ntuj ceeb tsheej no.” Nws rov tig mus rau sab xis ib zaug ntxiv: “Cov no yog cov Hauv Paus Xa Lus(Apostles)…” ces nws ntsiag lawm, vim thaum ntawd kiag, tus Haus Paus Xa Lus Pob Zeb (Peter) tawm plaws hauv pab Hauv Paus Xa Lus los. Leej ntshiab Paraskeva (tus phauj) kuj tawm tom sab laug los sawv nrog Pob Zeb thiab.

    Dushan thiaj mam paub hais tias ob tug neeg uas nws tau thauj ntawm kev yog leej twg. Nws tuaj pom nkawd nyob saum ntuj, ntoo nkawd cov mom nyiaj mom kub, hnav nkawd cov tsoos nom tsoos tswv zoo laim txias xwb. Nws kuj ceeb tias cas tuaj pom nkawd, thiab ho zoo siab thiab, nws saib nkawd tsis dhuav li. Tus Hauv Paus Xa Lus pob Zeb thiaj li qhib ncauj hais lus rau Dushan tias: “Koj paub lawm puas yog, tias hnub no koj thauj leej twg hauv koj lub tsheb?” Dushan thiaj teb tias: “Kuv pub lawm laud!”

    Pob Zeb thiaj hais ntxiv tias: “Txij hnub no mus, koj yuav tsum tsis txhob ua ib tug neeg tsis ntseeg lawm, koj yuav tsum ua ib tug neeg ntseeg. Koj yuav ua Ntoo Cuam lub cim, hu txog leej txiv thiab leej Tub thiab leej Ntuj Plug lub npe.” Pob Zeb qhia ua ntoo cuam lub cim rau Dushan, kom nws xyaum ua, vim Dushan yeej paub ua thiab tiam sis nws ua tsis yog. Ces Pob Zeb rov qhia nws ntxiv tias: “Thaum koj thov ntuj mas koj yuav tsum hu txog cov Leej Ntshiab, cov Yaj Saub(Prophets), cov Hauv Paus Xa Lus, cov Tshiab, cov Thawj tshiab, cov Kes lus Npis, thiab cov Xes Las Fis tib si. Tiam sis tus tseem ceeb tshaj uas koj yuav hu txog mas yog Huab Tais Yes Xus leej Niam, Mab Liab, vim nws lub hwj chim thiab lub koob meej loj tshaj tas nrho ib tsoom tshiab nyob saum ntuj. Yog leej twg muaj lub siab ntseeg thiab thov nws pab, mas nws yog tus yuav teb sai tshaj plaws. Pib txij hnub no mus, koj yuav tum tso tej yam uas koj nyiam nyiam ua kam los ntev lawm tseg kom tas; koj yuav tsum ua hmoov nco txog koj tus leej ntshiab pov hwm uas yog leej Ntshiab Paraskeva. Nws thov ntuj nraim rau cov neeg uas nco ntsoov thov txog nws.

    Tas puas tsav yam uas koj tau pom hnub no, thiab tas puas tsav yam uas tus thawj tshiab Nkas Nplias tseem yuav coj koj mus xyuas ntxiv hnub no, yog ib lub txiaj ntsim zoo rau koj, rau koj tsev neeg thiab rau cov uas ntseeg koj hais. Tiam sis lub txiaj ntsim no yuav pab tsis tau koj, yog tias koj tsis taug raws HT Yes Xus Pleev txoj kev. Dushan, kuv hais rau koj, yog koj xav cawm koj tus kheej, mas txij no mus, koj yuav tau yoo mov, koj yuav tau nquag teev ntuj, thiab koj yuav tsum coj raws nraim li kaum lo lus qhia.”

    Pob zeb cov lus no ua rau Dushan sawv twj ywm mloog tsis nco qab nti li lawm. Tiam sis tus tshiab Nkas Nplias los piav ntxiv rau nws, ua rau nws tsim dheev los: “Cov no yog Tswv Ntuj cov Yaj Saub, hos cov no yog cov tuag ua Tim Khawv.” Tus tshiab Nkas Nplias coj Dushan mus qhia rau ib tug zuj zus. Lawv luag nyav thiab ib nyuag nyo hau tuaj.

    Nkawd tseem mus ncig xyuas ntau qhov ntxiv. Dushan piav tias nws ob lub qhov muag pom tau deb deb, thiab txawm tej yam me me los pom tau tseeb tseeb kawg, cuag li yog nyob ze ze ntawd. Dushan mus pom tej cov tsev teev ntuj zoo nkauj kawg, yog muab tseem tseem kub thiab muab pov haum ua xwb. Tej qhov rooj qhib lug. Hnov cov tshiab thiab cov leej ntshiab ua ke teev ntuj hu nkauj cav txog Tswv Ntuj zoo mloog tshaj plaws li.

    Dushan piav tias nkawd mus ncig tsis paub xyov ntev npaum li cas, tiam sis nkawd tsis nres tsis so ib qho twg li. Tsuas yog muaj qee qhov chaw nkawd mus qeeb zog kom pom zoo me ntsis xwb. Cas zaum no nws mloog zoo li nkawd cia li nres kiag lawm. Ces nws txawm ntsia pom HT Yes Xus nyob saum Ntoo Cuam, nyob deb deb-eb puag tim ib lub roob puag tid. Pom ib tug nquab dawb nthuav tis ya ya nyob ncaj saum tus Ntoo Cuam. Muaj ib co sab pom kev uas qhov muag ntsia tsis taus ci ntawm tus Ntoo cuam mus rau qhov txhia chaw tag nrho. Nyob ncig hauv tus taw Ntoo Cuam, pom ib co tshiab muaj ob peb tug tis sawv ntawd, thiab pom cov Thawj Tshiab, cov Hauv Paus Xa Lus, cov Yaj Saub, thiab cov leej Ntshiab sawv nyob ntawd; lawv hu nkauj cav txog tus Huab Tais uas dai saum Ntoo Cuam. Sab nraum qab Ntoo Cuam, pom muaj ib co tsev teev ntuj loj loj.

    Thaum tus tshiab coj Dushan mus rau hauv ntuj ceeb tsheej lawm mas tauv huab cia li nres nyob ntawd tos. Thaum nkawd rov los nkag rau hauv tauv huab, tauv huab coj nkawd mus rov sab hnub poob. Ib pliag ntshis xwb, nkawd cia li nqes ceev ceev dua puag-uag hauv qhov tob tob hauv lawm, nkawd mus txog puag hauv ib lub kwj ha nqaim nqaim. Tauv huab nres rau ntawm ib qho chaw. Ces nkawd thiaj tawm hauv tauv huab los mus rau ib qho tsaus ntuj nti. Nkawd tshais kiag ob peb ruam xwb, cas qhov tsaus ntuj ntawd haj yam tsaus tuab ntxiv xwb.

    Txawm hnov ib tug ntxhiab tsw tsw phem hauv qhov tsaus tsaus ntuj hauv tuaj. Dushan cia li pib ntshai pib tshee, ces nws txav mus npuab ti ti tus tshiab coj kev. Ces txawm pom ib lub hiav txwv hluav taws loj loj tsis muaj chaw kawg li, cig liab ploog nyob tom hauv ntej. Thaum nkawd mus txog ntawd lawm, nkawd mus nres saum lub ntsa vaj siab siab uas xov ncig lub hiav xwv hluav taws. Dushan pom lub hiav txwv ntawd, nws cia li ntshai ntshai tshee nyho, ib ce txhav tas, qi muag yuav lawm xwb. Ib pliag nws rov qhib qhov muag ntsia, pom ib lub qhov hluav taws npau sis dug, tsw hiav ntxiag, hos cig nplaim loj loj tuaj.Tus tshiab thiaj piav tias: “Lub hiav txwv no tsis tob xwm yeem. Ntawm tej qhov chaw uas tus nplaim cig siab txij 50 yards mas qhov ntawd yog qhov tob tshaj.”

    Dushan pom ib cov tsiaj txaus txaus ntshai nyob hauv cov hluav taws hauv, ntuj tsim lawv los tsim txom cov neeg txhaum xwb. Pom tej tug nab loj loj muaj ib lub los ob peb lub taub hau. Cov nab ntawd tsa taub hau tawm tuaj kauv kiag cov neeg txhaum ruaj ruaj coj mus pov rau hauv hluav taws qhov tob tob lawm. Tseem muaj ib hom tsiaj haj yam txaus ntshai tshaj thiab. Pom neeg tej yas tes yas taw taub hau tawm zom zaws hauv cov tsiaj ntawd qhov ncauj los mas rhiab kawg li. Tseem muaj ib co kas (los cab?), thiab laum kiav tshooj thiab lwm yam tsiaj qias qias neeg nti zom zaws dhia zom zaws mus lij mus noj cov neeg txhaum .

    Hnov suab neeg quaj qw ntsuag qees. Cov ntsuj plig uas nyob hauv lub hiav txwv hluav taws no mas muab piv tau rau ib pab ntses uas huas pa rua ncauj zom zaws nyob hauv ib qho dej ntiav ntiav. Cov tsiaj phem ya qhov txhia chaw tuaj tom tuaj rub thiab dua lawv. Pom lawv twb ntuag ua daim tas lawm, tiam sis cov daim ntawd cia li txawj rov los ua ke ua dua tus neeg qub lawm thiab.

    Dushan ntshai ntshai, nws twb yuav luag poob rau hauv lub pas hluav taws, tiam sis tus tshiab tuav nkaus nws thiab hais tias: “Txhob ntshai. Tam sis no wb nyob hauv dab phem teb lawm. Cov nab thiab cov tsiaj ntawd yog Tswv Ntuj tsim lawv los kom hluav taws thiab dej kub txhob tua tau lawv. Lawv yuav tom thiab nqus cov neeg txhaum tej roj ntsha tas mus li. Txhua leej txhua tus uas nyob hauv cov hluav taws no mas yuav raug txhiab thiab raug ncu tas mus li tsis muaj caij kawg li.


    Last edited by Mim on 3rd August 2012, 4:52 am; edited 3 times in total

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages: 4255
    Date d'inscription: 2009-08-19

    Re: Mus pom saum ntuj thiab dab phem teb los

    Post  Maiv Tooj on 3rd March 2011, 5:40 pm



    Nyob zoo Mim,

    Ua tsaug rau koj lub caij muaj nqes los txhais cov lus zoo nov. Peb ua tsum nthuav txhua yam ntawm lub ntsiab hauv txoj kev ntseeg qhov tseem ceeb kom qhia rau sawv daws paub txog qhov zoo thiab qhov phem. Yog peb tsis sib pab ua ntsaum kwv pleb, coob leej yuav tsis paub txog qhov tseem ceeb muaj nqes ntawm txoj kev ntseeg Huab Tais Yes Xus thiab kev Cawm Seej, muaj txoj sia nyob mus li. Vim sawv daws xav rau qhov yooj yim hauv lub neej. Tswv Ntuj hlub peb, tab sis peb tssi hnov Tswv Ntuj lo lus kiag ces zoo li txoj kev ntseeg cia li tsuag zuj zus, tsuag thiab tsuag ces yus ua tej yam txhaum uas kuv tsis xav txog tias yog ib qho txhaum loj, yus tseem niaj hnub xav tias Tswv Ntuj twb zam rau yus...Vim Tswv Ntuj zoo heev...Tab sis txhua yam yog yus tsis tsim txiaj ntsim, yus tsis cog cia ces ntshe yus ntshaw npaum li cas los yuav tsis tau nrog luag de luag sau...

    Ua tsaug ntau nawb Mim, yog muaj caij los koj ho nrhia tej yam tshiab tuaj tso thiab txhais rau peb mloog nawb.




    Maiv Paj Lug
    Tswv Cuab Hmong Catholique
    Tswv Cuab Hmong Catholique

    Messages: 1656
    Date d'inscription: 2009-08-17

    Re: Mus pom saum ntuj thiab dab phem teb los

    Post  Maiv Paj Lug on 3rd March 2011, 10:54 pm

    Mim aw! ua tsaug os,

    Koj txhais tau zoo kawg nkaus li, nyeem mas yus mloog ntsoov yus yeej pom ntawm qhov muag li lawm thiab. Saum ntuj ceeb tsheej mas cas yuav piav tau txaus siab tiag tiag li, ib tsob txiv ntoo txi 1 2 zaug txiv hauv ib xyoos, cov paj hmab paj ntoos txawj hloov xim thiab tawg txhua phaum tsw qab ntxiag....wowowow....zoo tiag tiag, tej dej yog zib ntab zib mu thiab mis nyuj, me nroj tsuag me av ci lag luag cuag diamon, tsev nyiaj tsev kub, thiab neeg hluas hluas , ncig zom zaws hauv tej vaj paj cav thiab qhuav txog Yesxus lub koob meej...wowow...txawm yus tsis tau pom tam sim no los ntshe yuav cia siab ntsoov tos tiag li lauj, peb kav tsij cav txog Yesxus lub koob meej ua ntej hauv ntiaj teb no tos lawm os yuad!!! zoo siab heev.
    <3 o)




    <3 <3 Pab kuv rov los cuag koj Huab Tais Yesxus <3 <3

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 11:26 pm

    Tais Tooj thiab Maiv Paj Lug,

    Ua neb tsaug uas neb kuj hais tias hais tau zoo thiab no... Kuv yeej xav tias yog tej yam pab tau peb lub tswv yim pom me me saum ntuj zoo li cas, ces kuv thiaj muab txhais kom peb cov Hmoob ho tau nyeem txog.

    Tseem tshuav part 4, yog piav txog cov neeg raug txim nyob dab phem teb zoo li cas, thiab cov lus xaus part 5. Tej zaum muaj ib txhia yuav hais tias cas yuav lam hais hem neeg ua luaj. Ntawm kuv tus kheej mas kuv xav tias tsis yog ib qho kev hem phem, yog ib qho kev hem kom yus ua zoo thiab tau qhov zoo xwb. Tus tsis xav mloog cov lus no mas yog tus neeg tsis kam ua lub neej tsim txiaj dawb huv li Tswv Ntuj xav kom ua xwb. Cov neeg nyiam ua kev yooj yim kev ywj siab, mas ntshai lawv yuav luag thiab tsis ntseeg cov lus no. Tiam sis kuv coj tuaj kom ho pab tau cov uas ntshaw mus saum ntuj.

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 11:31 pm


    Part 4 - ntu 4

    Dushan ntsia tsis taus cov neeg ntawd raug tsim txom ces nws txawm qi muag ntau kom txhob pom. Muaj ib zaug nws tig mus ntsia rov sab tom qhov uas tsaus ntuj dub nciab, cas nws tseem pom ib cov tsiaj phem phem qhov muag cig liab ploog hos qhov ncauj rua u tos. Lawv quaj nyooj laws nrov cuag xob nroo, thiab ya ncig pes lees ncig ntawm nkawd. Tus Tshiab thiaj hais rau Dushan tias: “Txhob ntshai! Cov no yog ib co dab phem. Lawv tsis xav pom wb tuaj nyob qhov no, lawv thiaj ua cuag li ntawd, tiam sis lawv yuav tsis muaj cuab kav los ze wb li.”

    Tus Tshiab tseem hais ntxiv li no: “Dushan, koj tau pom cov neeg uas tsis ntseeg Tswv Ntuj raug tsim txom zoo li cas lawm lod? Tiam sis tsis yog lawv xwb thiaj yuav raug tsim txom li ntawd mus tas ib txhis. Cov uas thim tsis kam lees Tswv Ntuj lawm ho mus teev lwm tus tswv ntuj cuav, thiab cov uas saib nyiaj txiag, vaj tsev zoo nkauj, kev twv txiaj yuam pov, kev ua neej tsis tsim txiaj, thiab kev noj tsau haus qaug, los lawv yuav tau raug kev tsim txom ib yam. Thiab cov uas lawv ntseeg Tswv Ntuj, tiam sis tsis kam lees tias lawv ntseeg Tswv Ntuj rau ntawm neeg xub ntiag los lawv yuav raug tsim txom li ntawd thiab.

    Tsis tas li ntawd xwb, cov uas tsis hwm niam hwm txiv los yus cov txheeb ze yeej yuav raug ib yam. Tseem tshuav cov uas tuaj yeem ua kev txhaum, tsis kam ua neeg ncaj ncees, yuav raug muab pov rau hauv hluav taws: xws li cov neeg dag, cov mus tsa tes cog lus cuav, cov dag kom tau nyiaj tau txiaj, cov ua plees ua yi zes luag txij luag nkawm, cov xav tau ntau vuag kom yus tau tshaj luag, cov uas thuam saib tsis taus lwm tus, cov siab nkhaus lim hiam, cov ntshaw luag tug, thiab cov neeg muaj lub siab phem… Yog koj tsis xav kom koj raug ib yam li no, mas thaum koj rov mus txog ntiaj teb lawm, koj yuav tu siab rau koj cov txhaum thiab koj yuav mus daws txhaum.”

    Thaum ntawd, Dushan rov qab pom cov neeg sawv rov los uas nws xub pom thaum hauv paus lawm, lawv los nyob ua peb pawg. Thawj pawg, nyob sab xis, yog ib co neeg muaj ntsej muag luag ntxhi. Pawg ob nyob nruab nrab, pawg no coob tshaj pawg ib. Lawv ua ntsej muag mluas mlob dub nciab xwb. Nyob tom sab laug, yog pawg peb. Lawv yog cov coob tshaj cov, lawv ua ntsej muag phem phem dub nciab xwb.

    Tus tshiab thiaj piav li no: “Cov nyob sab xis uas muaj ntsej muag luag ntxhi yog cov neeg siab ncaj. Lawv yuav tau txais ib qho paj tshab zoo ua nqe zog, vim lawv tau siv zog coj lub neej ncaj ncees hauv ntiaj teb. Pab nruab nrab, yog cov neeg tseem muaj txhaum , tiam sis lawv cov txhaum sib. Peb yuav tsum tau thov Tswv Ntuj zam rau lawv, yuav tsum ua tej yam them txim txhaum pab rau lawv kom Tswv Ntuj daws lawv cov txhaum kom tas. Tswv Ntuj nyiam cov zaj teev ntuj thiab cov kev them txim txhaum uas peb ua pab rau cov ntawd kawg nkaus. Pab uas nyob sab laug tom kawg yog cov neeg muaj txhaum loj. Lawv cov ntsej muag phem nkaus li cov txhaum lawv tau ua. Lawv yuav raug muab pov lawm hauv lub cub tawg tsis txawj tuag.”

    Cov neeg muaj txhaum loj mas lawv tsis zoo saib kiag li. Lawv lub cev o wv, muaj kev txhab thoob plaws, ua kua paug kua yig paim yaws thoob plaws, tseem muaj kas (los cab?) thiab nab coob coob los noj lawv lij pes yos qhov txhia chaw thiab. Lawv tus nplaig o nkoos lam dai vias ntawm qhov ncauj, muab nkaum tsis tau rau hauv qhov ncauj lawm. Cov neeg ntawd ib leeg tuav ib yam twj qhia tias lawv tau ua txoj hauj lwm dab tsi. Tus ua mov ci tuav rawv ib lub mov ci, tus neeg hlais nqaij tuav rawv ib rab riam, tus tua neeg tuav ib rab riam lo ntshav tas thiab ib rab phom, cov tub lag tub luam tuav ib rab teev los lwm yam twj luj toob xib. Yam twj lawv tuav ntawd qhia hais tias lawv tau ua txhaum noj luag li cas. Muaj tej tus, thaum lawv luj khoom, lawv muab tsawg zog, ces lawv nplua nuj los ntawm qhov lawv muab tsis puv rau luag.

    Muaj tej tus kws tshuaj uas yuam kom cov neeg mob xub muab nyiaj ua ntej tso mam li kho, yog tsis muaj nyiaj them ces cia lawv mob mob tuag kus tsis kho li. Pom muaj cov txawj saib tes txawj ua saub npaj lawv tej twj ua saub, txhob txwm hais kom tej niam txiv muaj sib ceg, muaj sib nrauj, los yog kom cov twb tsis sib nyiam ho lam los sib yuav. Lawv ua li ntawd kom tau nyiaj nkaus xwb, ces pom tej niag pawg nyiaj nrog lawv tej twj ua saub.
    Pom cov neeg uas yuam kom luag muab nyiaj xiab lawv mas lawv mam muab hauj lwm rau ua. Kuj muaj cov txiv neej uas ntxias cov poj niam los cov ntxhais kom nrog lawv pw ces thiaj tau hauj lwm ua los puas thiaj tau txoj hauj lwm siab dua zoo dua qub. Pom cov poj niam uas nyiam nrog txiv neej pw thiab cov nyiam rho me nyuam kom tau kev ua lom zem ywj siab nrog tej txiv neej. Tseem pom tej cov neeg uas yog leej txiv mus deev tej ntxhais, los yog tej niam mus deev cov tub los yog cov nus muag tseem sib dee tib si. Cov neeg uas ua txhaum los ntawm kev sib dee mas pom lawv tej chaw mos o loj loj hlauv dai vias mus txog puag hauv av hos ua kua paug kua yig daws, muaj nab thiab muaj kas (cab) lij lias tas mus li. Txaus ntshai tshaj plaws li.

    Dushan pom nyob hauv pab neeg muaj txhaum loj ntawd, uas yog cov neeg siab hlob, cov tua neeg, cov noj luag taub hau, cov ua hluas deev hluas, cov dag, cov cog lus cuav, muaj ib co yog tswv qhia, yog txiv plig, yog txiv tab seeb (monks) thiab yog leej phauj tib si. Nws txawm poob siab. Tiam sis tus Tshiab hais rau nws tias: “Koj txhob poob siab tias cas lawv tau nyob hauv pab neeg ua txhaum loj tshaj cov. Lawv yog cov tau yeem cog lus nyob ntawm tus Ntoo Cuam thiab nyob saum phau Ntawv Ntshiab tias lawv yuav tsob hwb Tswv Ntuj thiab yuav lawv Yes Xus qab. Lawv tau cog lus tias lawv yuav qhuab qhia neeg, yuav ua ib tug qauv zoo rau lwm cov neeg kom coj tau lawv los caum Yes Xus qab thiaj tau txais kev cawm seej. Tiam sis lawv tsis tau ua raws li lawv cog lus. Thaum lawv qhuab qhia neeg, lawv hais ib yam, tiam sis thaum lawv ua, lawv ua txawv li lawv qhia luag. Lawv tau txiav lub sij hawm los mus teev ntuj pe hawm Tswv Ntuj los yog ua tej kab ke hauv lub txoos kom luv luv. Lawv siab hlob ntshaw nyiaj, lawv noj cov neeg pluag thiab cov pej xeem tej nyiaj txiag ntau tshaj li lawv noj cov neeg muaj thiab cov neeg muaj koob nto npe li nyiaj. Lawv nyiam ua kev hluas deev hluas, lawv nyiam foom lus phem, nyiam dej nyiam cawv, nyiam twv txiaj yuam pov, nyiam vaj tse zoo, nyiam tsheb zoo nkauj. Lawv yog ib co neeg dag zoo sab nraud, thiab lawv ntshaw luag tug. Lawv hais lus sib thuam kom lawv tau ntsej muag. Lawv tus yeeb yam tsis zoo ntawd tau ua kom muaj coob leej ntseeg tuaj pom thaum lawv tuaj teev ntuj, ces lawv tsis nyiam, lawv cia li tso lawv txoj kev ntseeg tseg.

    Dushan, koj yuav tsum nco ntsoov tias yog leej twg ua tej yam kom ib tug neeg thim kev ntseeg mas yog txhaum loj ib yam li nws tau tua neeg ntag. Yog cov tub tshaj ntuj lus ntawd tau coj ib tug qauv zoo mas cov neeg twb tau los cuag Tswv Ntuj thiab tau txais kev cawm seej lawm. Vim li no mas lawv thiaj yuav tsum ris cov neeg uas thim kev ntseeg tej txim txhaum tib si nrog rau lawv tus kheej cov txhaum thiab. Lawv yuav tau them txim rau ob qho txhaum tib si. Tiam sis yog leej twg qhia txoj kev ncaj rau ib tug neeg txhaum taug, es tus neeg txhaum ntawd los lees txim thiab hloov los ua ib tug neeg ntseeg zoo, mas Tswv Ntuj yuav zam tus neeg qhia ntawd cov txhaum rau nws. Cov tub tshaj ntuj lus ntawd tau ua kom coob leej poob rau kev txhaum, vim li ntawd Tswv Ntuj thiaj muab lawv tso nrog pab neeg muaj txhaum loj dua cov.

    Dushan, koj twb pom tias cov neeg siab ncaj thiab cov neeg txhaum zoo li cas lawm. Lawv yuav los zoo li ntawd thaum ntiaj teb kawg los mus nyob ntawm HT Yes Xus Pleev xub ntiag rau nws txiav txim rau lawv raws li tej yam lawv tau ua thaum ua neej nyob.”

    Cov neeg siab ncaj kuj tuav rawv tej yam qhia tias lawv txoj hauj lwm yog ua mov ci, los yog hlais nqaij los yog tub lag tub luam. Cov tub lag tub luam siab ncaj no lawv rab teev luj mas yog luj kom cov neeg yuav khoom tau ntau xwb tsis poob peev. Cov siab ncaj pub nyiaj pub txiaj rau cov koom haum pab neeg; lawv hlub cov raug txom nyem, cov pluag, cov tshaib plab; lawv muab mov muab dej rau cov tshaib noj thiab haus; lawv txais tej qhua taug kev los pw hauv lawv vaj lawv tsev. Lawv yog neeg hwm Ntuj, lawv coj raws li Tswv Ntuj cov lus qhia. Tswv Ntuj zam lawv tej txhaum rau lawv tas lawm, vim lawv tu siab rau lawv tej txhaum, lawv yoo mov them txim txhaum, lawv teev ntuj, lawv mus txais Yes Xus lub Cev, lawv pub nyiaj rau cov txom nyem thiab lawv ua ntau yam zoo. Lawv zam txhaum rau lwm tus ces Tswv Ntuj kuj zam rau lawv thiab.

    Dushan pom muaj ib cov neeg uas yog nws cov txheeb ze los yog cov phooj ywg nyob hauv ob pawg neeg ntawd tib si, hauv pawg neeg siab ncaj thiab hauv pawg neeg txhaum tib si. Tiam sis tus Tshiab txwv tsis pub kom nws qhia npe tias leej twg poob rau pawg twg thiab zoo li cas. Nws tsuas piav tau yam tsis hais leej twg npe xwb.

    Thaum tus Tshiab hais nws cov lus tas lawm, cov thawj tshiab tshuab lawv cov hom, ces tas puas tsav yam ploj ntais tas. Tus coj kev thiaj piav hais tias thaum txog hnub txiav txim hnub ntiaj teb kawg mas cov neeg tseem ciaj nyob yuav hloov plhis plho kom zoo li cov neeg tuag uas sawv rov qab los, thiab lawv kuj yuav muaj ib daig ntawv sau tas puas tsav yam lawv tau ua nyob rau ntawm lawv hauv pliaj. Ces cov thawj tshiab tshuab hom kuj cia li ploj ntais tas, tshuav tus tshiab coj kev thiab tshuav Dushan nyob saum tauv huab lawm xwb.

    Tus tshiab thiaj hais rau Dushan tias Dushan yog ib tug neeg ncaj, neeg siab zoo hlub luag, tsis nyiam dag. Nws ntseeg Ntuj tiam sis ntseeg ntiav ntiav xwb vim nws paub Tswv Ntuj ntiav ntiav raws li nws tau kawm thaum me nyuam yaus xwb. Tus tshiab tseem hais ntxiv tias: “Koj muaj ntau yam phem koj niaj hnub ua kam (habits) thiab ntau yam txhaum. Koj nyiam kev sib dee. Koj xav kom tau deev tas txhua tus poj niam tsuav tsis yog koj tus muam xwb. Koj tau zoo ua zaj no kawg vim koj txawj hu nkauj thiab txawj ua saub nyeem khob kas fes. Koj tsis nyiam dag, tiam sis yog hais txog hluas nkauj mas koj dag kawg, koj dag rau koj poj niam, koj tseem hais lus twv ntuj tib si, kom nws ntseeg tias koj yeej ncaj ncees rau nws.

    Koj twb pom lawm hais tias cov neeg ua txhaum vim kev sib dee, lawv lub cev cia li lwj nyoos thiab raug tsim txom zoo li cas. Koj kuj pom tias cov neeg ua saub raug txom nyem zoo li cas. Yog li koj yuav tsum tseg txoj kev ua saub saib khob kas fes, txhob ua ntxiv lawm. Koj yuav saib txhua tus ntxhais hluas yog zoo li koj tus muam thiab txhua tus poj niam yog zoo li koj niam, txhua tus tub hluas yog zoo li koj tus kwv tij thiab txhua tus txiv neej yog zoo li koj txiv. Koj yuav tseg kiag txoj kev hais lus foom neeg phem. Koj yuav thov kom Tswv Ntuj zam koj cov txhaum rau koj. Xyaum nyiam tus tib neeg tsuas ntxub yam phem nws ua xwb. Yuav tsum tau zam rau luag tej yog koj xav kom Ntuj zam rau koj.

    Koj txoj kev ncaj kev zoo npog tau koj cov txhaum tas nrho lawm. Tiam sis koj yuav tsum tau mus daws txhaum thiab txais Yes Xus lub Cev thiab nws cov Ntshav nyob hauv ib lub church Orthodox. Thaum koj mus daws txhaum tas thiab txais Yes Xus lub Cev thiab cov Ntshav lawm, mas Tswv ntuj yuav zam txhaum rau koj. Txij hnub no mus txhob ua txhaum ntxiv lawm mog. Koj yuav ua ntoo cuam lub cim rau saum koj, hu txog Leej Txiv, thiab Leej Tub, thiab Leej Ntuj Plig lub npe.” Ces tus tshiab ua kiag ntoo cuam lub cim qhia rau Dushan.

    Nws kuj tseem hais ntxiv tias: “Thaum koj teev ntuj mas koj hu tas cov leej ntshiab thiab koj tus leej ntshiab pov hwm kom pab koj, hu cov Hauv Paus Xa Lus, cov Yaj Saub, cov Tshiab, cov Thawj Tshiab, cov Kes Lus Npis (Cherubims), thiab cov Xes La Fis (Seraphim) tib si; qhov loj tshaj koj yuav tsum hu txog Yes Xus leej Niam Mab liab, tus dawb huv, tus tau koob tau hmoov tshaj plaws, vim nws muaj koob meej muaj hwj chim loj tshaj tas nrho ib tsoom tshiab saum ntuj. Nws yog tus uas yuav teb sai tshaj plaws rau cov neeg uas hwm nws vam txog nws pab.

    Thiab koj yuav nco ntsoov qhov no: txhua tus neeg txhaum, yog nws tu siab nrho rau nws qhov txhaum thiab thov Tswv Ntuj zam txhaum rau nws, thiab nws vam txog peb cov nyob saum ntuj tas nrho, mas lub sij hawm ntawd peb sawv daws yuav los nyob nrog nws. Peb yuav nrog nws thov Tswv Ntuj leej Txiv, thiab leej Tub, thiab leej Ntuj Plig kom zam nws cov txhaum rau nws. Ces nyob saum ntuj yuav muaj kev zoo siab loj kawg nkaus.

    Txij hnub no mus, koj yuav ua hmoov nco txog koj tus leej ntshiab pov hwm ua yog leej ntshiab Paraskeva. Nws thov ntuj nraim rau cov neeg uas hwm nws. Dushan, kuv rov qab hais tus Hauv paus Xa Lus Pob Zeb cov lus rau koj dua: Koj yuav tsum siv koj lub neej yav tseem tshuav no los mus nrhiav kev mus saum ntuj rau koj. Koj yuav cawm tau koj tus kheej mas yog koj yuav tsum yoo mov, yuav tsum teev ntuj, txais Yes Xus lub Cev thiab ua tej yam zoo los pab rau lwm tus. Koj yuav tsum tau mloog Tswv ntuj cov lus qhia, muab ua ib txoj cai rau koj coj nraim raws li ntawd mus txog hnub tuag.

    Peb lub hlis saum no mas koj tsis txhob tham dab tsi qhia rau leej twg txog tej yam tshwm sim rau koj hnub no li. Dhau qhov ntawd lawm, koj mam qhia tau rau koj tsev neeg thiab koj cov phooj ywg. Nco ntsoov qhov no: Thaum koj thov ntuj, koj yuav ua siab tus tus thiab ua tus neeg me me nyob ntawm Tswv Ntuj xub ntiag. Thaum koj yoo mov, tsis txhob ua tus mluas mluas ntsoos ntsoos, tiam sis yuav tsum ua tus zoo zoo siab luag ntxhi xwb. Tsis tas kom luag paub tias koj ua dab tsi. Koj nyob li qub, kheev tham li qub, ua neeg luag ntxhi, ua qhov twg coj tus tus, tswj koj tus kheej. Koj pom leej twg quaj koj nrog lawv quaj, thiab nplij lawv. Coj kom raws txoj cai, thiab ua koj txoj hauj lwm pab teb pab chaw kom zoo.

    Koj yuav tsum nquag teev ntuj, muab Tswv Ntuj ua qhov loj tshaj tas txhua yam. Yog koj xav tau kev pab nyob hauv koj txoj kev ntseeg, koj mus nug ntawm Leej Pleev lub Koom Txoos. Thaum wb sib ncaim ntawm no lawm, koj ncaj qha mus lawm tom lub tsev koom haum cov leej phauj nyob Zica. Nyob hauv tsev teev ntuj koj yuav pom muaj duab, muaj tswm ciab, muaj ntawv, thiab lwm yam muag. Nyob saum txee ze ntawm qhov rooj muaj ib co ntawv. Koj yuav muas phau ib, phau ob, phau peb thiab phau plaub. Thaum koj tawm hauv cov tsev tsau dej los mas koj muab phau uas tus kws sau yog Vuk Stefanovic Karadzic los nyeem. Phau ntawd yog Phau Ntawv Cog Lus Tshiab, uas koj tau sim nyeem dua los lawm, tiam sis koj muab tso tseg sai dhau, vim koj tsis to taub lub ntsiab tseem ceeb hais txog Yes Xus lub keeb kwm ntawm lub hauv paus. Yav tom ntej no, koj yuav tsum tau nyeem phau ntawv no tsis tseg."

    Tus tshiab hais cov lus no tas, nws tsa tes foom hmoov zoo rau Dushan tas ces nws ploj ntais lawm.


    Last edited by Mim on 26th August 2012, 8:46 pm; edited 5 times in total

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 3rd March 2011, 11:34 pm


    Part 5 - Ntu 5

    Dushan tsim dheev los, nws ib ce tawm hws npliag nplaws, nws hnov sab sab nti tsis taus li. Nws saib moo no yog 6 moo tsaus ntuj lawm. Dushan xav txog tej yam nws tau mus pom, nws kuj zoo siab thiab ho ntshai thiab. Thiab nws ua Tswv Ntuj tsaug rau tej nws tau pom. Ces nws txawm cev tes mus ua Ntoo Cuam lub Cim. Nws hnov qhov sab sab ua rau nws nti tsis taus ntawd yaj ntshis lawm, ces nws sawv tsees zoo siab hlo. Nws los kho me ntsis ris tsho rau kom zoo saib, ces nws mus kiag tom lub tsev koom haum nyob Zica, yuav mus yuav cov phau ntawv raws li tus tshiab kom yuav.

    Nws mus tsis pom muaj neeg li tsuas pom ib tug txiv plig nyob hauv xwb. Nws thiaj nug txiv plig kom pab muab cov phau ntawv rau nws, ces nws thiaj yuav plaub phau ntawv uas tus tshiab kom yuav thiab nws tseem yuav ob peb phau ntxiv.

    Thaum nws rov los tom nws chav pw lawm, nws thiaj muab cov ntawv los pib nyeem. Hnub tom qab yog hnub hwm tus Hauv Paus Xa Lus Pob Zeb. Dushan thiaj mus teev ntuj tom lub tsev koom haum nyob Zica. Nws hnov cov leej phauj hu nkauj ua rau nws rov nco txog cov tshiab saum ntuj hu nkauj. Nws zoo siab thiab ho tu siab, vim nws xav txog nws lub neej yav tas tej kev phem kev tsis zoo kev txhaum. Ces nws tsis xav quaj los kua muag cia li poob si laws. Nws quaj tag, nws thiaj li mloog nws lub siab sib kha thiab zoo siab hlo.

    Dushan tseem nyob da dej ntev me ntsis ntxiv, tiam sis nws pauv cwj pwm tsis coj li qub lawm, tsis taug kev mloog tej nkauj haus dej haus cawv lawm. Nws siv nws lub sij hawm los teev ntuj ntau, nyeem ntawv thiab xav txog tas puas tsav yam uas tshwm sim rau nws pom.
    Thaum rov los txog tsev lawm, nws tseg tsis nrog luag tso dag tso luag hais lus dev lus npua li qub lawm. Nws nyiam nyob ib leeg ntau, xav txog Pob Zeb lo lus tias kom nws yuav tsum siv nws lub neej yav tseem tshuav no los nrhiav kev cawm nws tus kheej. Nws yoo mov caiv nqaij hnub plaub (Wednesday) thiab hnub rau (Friday). Thawj peb lub hlis ntawd, nws coj txawv txawv li ntawd los nws poj niam kuj tsis hais dab tsi li thiab. Zoo li yog muaj ib qho dab tsi ua kom nws txhob nug txog. Thaum tshuav ob hnub ces tas peb lub hlis, nws poj niam mam hais rau nws tias, cas nws yuav coj txawv ua luaj tsis tau pom dua li, nkawd sib yuav tau 18 xyoo, yeej tsis pom nws yuav yoo mov caiv nqaij ib zaug li cas tau peb lub hlis no nws cia li yoo ib lis piam ob hnub tib si thiab. Cas tsis pom nws mus tso daj tso luag tsis pom nws mus caum tej poj niam hluas nkauj lawm. Ces Dushan thiaj kom nws ua siab ntev to ob hnub tso nws mam piav.

    Thaum tas ob hnub lawm, nws thiaj hu nws poj niam nws tus tub thiab tus niam tais hluas los ces nws piav ib tog zus tuaj rau lawv mloog. Piav tas lawm nws cia li hais rau lawv tias kom txij hnub no mus lawv yuav tsum txiav tsis txhob hais lus phem phem lawm, kom lawv nquag teev ntuj thiab yuav tsum mus teev ntuj hnub chiv . Lawv yuav nquag nco txog lawv tus leej ntshiab pov hwm, yuav xyaum yoo mov thiab nquag txais Yes Xus lub cev. Ntawm nws tus kheej mas nws yuav caiv hnub plaub thiab hnub rau li ntawd thiab lwm hnub yoo uas muaj hauv lub koom txoos, kom lawv txhob txwv nws txhob cuam tshuam nws. Thiab xav kom lawv txhob txob nws thaum lub caij nws teev ntuj hauv tsev. Nws poj niam me nyuam kuj txaus siab yuav hloov qee yam tiam sis nkawd kuj tsis kam yoo los mus church xwm yeem, tiam sis nws tsis yuam nkawd, tsuav nkawd cia nws ua raws li nws xav ua xwb.

    Ob peb hnub tom qab nws thiaj mus daws txham ntawm tus tswv qhia nyob Zica. Nws piav tej yam nws tau pom rau Tswv Qhia paub, thiab nws thov txais Yes Xus lub cev. Nws kuj ntshai daws txhaum, tiam sis tswv qhia hais rau nws tias, nyob hauv txoj kev daws txhaum mas tus txiv plig tsis muaj cai yuav mus piav tej yam nws tau hnov rau leej twg paub li, kom tso siab. Ces Dushan thiaj zoo siab hlo lees nws cov txhaum.Tswv qhia nug ob peb zaug tias ua li nws puas tu siab rau nws tej txhaum tiag tiag, ces tswv qhia thiaj tsa tes rau saum nws thov ntuj zam nws cov txhaum rau nws. Tas ces tswv qhia los ua zaj thov ntuj txais Yes Xus lub Cev tiab muab Yes Xus lub Cev rau nws txais. Daws txhaum thiab txais Yes Xus lub Cev tas, Dushan hnov zoo siab kawg nkaus thiab mloog zoo li nws yug los dua tshiab lawm.

    Tswv qhia qhia nws tias kom nws yuav tsum xav txog txoj kev tuag ntau dua, vim yog yus xav txog txoj kev tuag ntau mas yus thiaj txiav tau tsis ua txhaum ntxiv. Txawm yus yuav nyob txog 100 xyoo los yus yuav mob siab rau teev ntuj cuag li yus twb yuav tuag tag kis.

    Dushan cov lus xaus, nws hais li no: “Kuv zoo siab tias Huab Tais hlub kuv, nws coj kuv rov los taug txoj kev ntseeg lawm. Kuv ua nws tsaug tas nrho kuv lub siab lub ntsws rau nws tej paj tshab, tej lus cem lus ntuas, tej kev rau txim uas nws tau muab rau kuv tau txais. Kuv thov Tswv Ntuj kom txhua tus tau hnov txog kuv zaj no yuav tig los ntseeg. Kuv cia siab tias zaj no yuav qhia kom lawv nrhiav tau txoj kev uas yuav cawm lawv tus ntsuj plig.

    Thov kom nej tau txais peb tus HT Yes Xus Pleev txoj koob txoj hmoov thiab kev thaj yeeb! Ua li.”


    Last edited by Mim on 26th August 2012, 9:06 pm; edited 3 times in total

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages: 4255
    Date d'inscription: 2009-08-19

    Re: Mus pom saum ntuj thiab dab phem teb los

    Post  Maiv Tooj on 4th March 2011, 5:42 pm



    Nypb zoo Mim,

    Ua tsaug rau koj lub caij los txhais cov lus nov kom thoob plaws. Yog ib qho zoo heev, yog pom cov piv txwv nov lawd mas ua rau yus paub meej dua tias yam dab tsi rau dab tsi yuav zoo thiab yuav phem, yuav pab tau yus thiab yuav ua rau yus poob tau...Ntsia Tswv Ntuj lub Ceeb Tsheej mas kuj yooj yim kawg; tab sis kuj nyuaj kawg thiab...Qhov yooj yim ces yog yus txiav txim siab tau ces txhua yam yooj yim tag nrho. Yog yus txiav siab nyuaj ces nyuaj tag nrho...Cia kom paub meej meej li nov es ib hnub twg yog yus ho ev rawv ib lub niag qhov txhab lwj dhi dai via, kas, cuav nab lij lias ib sim neej los yus yuav tsis tu siab vim yus yeej paub ua ntej lawm yus yeej txaus siab ua qhov yus ua kom poob rau tej yam phem. Yog yus tsis tau paub txog tias yuav rub tau yus mus rau txoj kev txhaum tsis muaj hnub rov, ntshe yus yuav tu siab heev vim yus tsis paub.

    Mim, peb txawm yog me nyuam neeg xwb los peb lam sib tuav tes ncig ntuj nrhiav Tswv Ntuj txoj kev es seb peb puas cawm tau peb kom txhob yuam kev thiab seb peb puas cawm tau tus puav uas lawv xav taug txoj kev zoo mog.




    Yaj Suav Nus
    Phooj Ywg
    Phooj Ywg

    Messages: 247
    Date d'inscription: 2009-10-24

    Re: Mus pom saum ntuj thiab dab phem teb los

    Post  Yaj Suav Nus on 4th March 2011, 8:00 pm

    Nyob zoo os Mim tbiab cov phooj ywg txhua tus,

    Mim koj tau muab siab rau txhais zaj "mus saum ntuj thiab dab phem teb los" tau zoo kawg lawm, tsuas yog tej tus ntawv uas koj tau ntau yuam kev los yog ntau tsis tshwm xwb (vim yog koj maj maj), kuv zoo siab kawg thiab thov qhuas koj ov!
    Ib lub npe uas kuv cia li tsis paub: yog lub npe "Monk" kuv nrhiav tsis tau lub npe Monk no nyob hauv phau ntawv Ntshiab li, koj puas kam qhia tias lub npe "Monk" no thaum ub koj tau nrog TP Nyiaj Pov txhais cov npe nyob hauv phau ntawv Ntshiab los ua lus hmoob los yog ib lub npe kom hmoob hais tau meej es TP tau muab hu li cas?

    Y. Suav Nus

    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 4th March 2011, 8:34 pm

    Nyob zoo txiv Suav Nus,

    Yog li koj hais kawg, thaum kuv ntaus ces zoo li pheej muaj yuam kev ntau ntau. Cia saib kuv puas khoom tuaj mus kho rau os.

    Hais txog ntawm lo lus "monk" mas kuv tsis paub tias yuav muab txhais li cas ces kuv thiaj tsis txhais. Cov "hermits" mas zoo li yog muab txhais hu ua cov "txiv twj cuab" sub no. Hos tus "monk" mas xyov yuav hu li cas? Nej sim ho pab kuv thiab saib yuav muab lo lus ntawd txhais li cas? Ib tug monk mas nws zoo li ib tug hauj sam, nws mus cog lus ua leej tij los ua leej choj nyob hauv ib lub koom haum, tiam sis lawv chais plaub hau thiab hnav ib cev tsho tiab ntev ntev muaj kaus mom zoo li leej ntshiab Francis of Assisi(St. Francois d'Assise). Kuv nrhiav tsis tau ib lub npe los rau cov ntawd li... Leej twg nrhiav tau no thov pab tuaj qhia rau kuv paub thiab...

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages: 4255
    Date d'inscription: 2009-08-19

    Re: Mus pom saum ntuj thiab dab phem teb los

    Post  Maiv Tooj on 4th March 2011, 10:08 pm



    Nyob zoo Mim thiab txiv Suav Nus,

    Cov "monk" = Moine los ntawm lus Latin Monachus, los ntawm lus Grec μοναχός, monachos txhais tias: Tab seeb, ib leeg, twj cuab. Yog cov txiv neej uas lawv nyob nraim nroos hauv cov tsev twj cuab deb zej zog thiab tib neeg coob. Hauv tej tsev teev hawm Tswv Ntuj thiab nrhiav Tswv Ntuj. Yam li Monastère, cov Txiv tab seeb, twj cuab no qhov ntau yeej yog cov Txiv Plig uas lawv nyiam nyob kaw nti, tsis poo luag, lawv khwv rau lawv noj, lawv tsis tawm. Lawv txhim tej lus tsev loj loj, ruaj thiab ua tej lub Tuam Txhab tsim cuab yeej, los yog khoom noj khoom siv yam li: Cawv, =qab zib, ncuav qab zib, phuas mis nyuj, twj ua tshuab tsheb thiab dav hlau...Lawv ua hauj lwm kaw nti, thaum ua tau mam muaj tus coj mus muag sab nraud xwb...Lawv teev Ntuj ntau heev thiab ua hauj lwm nkaus xwb. Tus yuav tawm sab nraud mas tsuas yog mus kho mob thaum lawv cov hauv tsis muaj peev xwm kho tau xwb. Thiab tus uas yuav mus muag khoom los mus yuav khoom tseem ceeb rau lub tsev xwb.





    Mim
    Tswv Cuab Hmong Catholique
    Tswv Cuab Hmong Catholique

    Messages: 1048
    Date d'inscription: 2009-10-17

    Re: Mus pom saum ntuj thiab dab phem teb los

    Post  Mim on 4th March 2011, 11:01 pm

    Txiv Suav Nus thiab tais Tooj,

    Tais Tooj, kuv nyiam koj lo lus hu ua "txiv tab seeb" no. Kuv xav tias lo lus ntawd yuav raug lub npe "monk" no zoo dua lwm lo. Ua tsaug koj tuaj muab ib lub npe rau peb tau paub.

    Lo lus "hermit/ermite" = txiv twj cuab,
    Lo lus "monk/moine" = txiv tab seeb


    Ib tug leej choj Orthodox ntoo phuam dub zoo li no


    Ib tug leej phauj Orthodox


    Last edited by Mim on 26th August 2012, 10:25 pm; edited 1 time in total

      Current date/time is 1st September 2014, 3:36 pm