Ntse ua rau yus nyuaj siab li yus ua rau Tswv Ntuj nyuaj siab.

Ntse ua rau yus nyuaj siab li yus ua rau Tswv Ntuj nyuaj siab.

By: Nuj Sis Moog Vaj
Xov xwm Tsim Neej tshiab
Tsab1 xyoo 1997
USA.

Kuv nyuam qhuav paub tias: Tos Tswv Ntuj pheej xav kom sawv daws ua txoj kev zoo xwb,
los ua cas kuv ob tug ntses kuj txawj ua rau kuv nyuaj siab kawg thiab tiag.
Muaj ib hnub kuv xav tau tej me ntses luag yug saib hauv tej me rhawv iav zoo nkauj
ntxim nyiam heev. Kuv npaj mus yuav tau ib cov cuab yeej txhij txhua los, xws li:
lub rhawv iav ntim dej, lub pa pa mus xyaw dej, lub teeb pom kev, cov xuab zeb thiab
cov nroj tsuag uas ua kom zoo nkauj. Kuv ntim dej rau raws li cov kws yug ntses qhia
kom yug cov ntses. Thaum kuv nta hluav taws xob ntawm lub rhawv iav, mas ci ntsa iab
zoo li lub ntuj ceeb tsheej. Kuv mus yuav tau ib nkawm ntses txawj txawj sib hlub,
sib pab kawg. Nkawd txawm tsis muaj tes taw thiab nyob nruab deg los, los nkawd
txawj xuas ob lyb qhov ncauj nqa cov xuab zeb hauv lub rhawv iav mus tso ua tej qhov
chaw siab, tej qhov qes. Yus saib nkawd tej chaw nyob zoo li ua toj roob hauv hav.
Yus tseem xav txia ntshis mus nrog nkawd nyob ua ke thiab. Nkawm ntses no muaj qee
lub caij mas nkawd sib tog kawg. Muaj tej zaum mas ib tug caum ib tug tom noj rau
txhua ces kaum tsev. Tus uas ntshai mas nrhiav qhov twg los tsis muaj chaw nraim li.
Tej thuam zoo li no, mas ib tug cia li txia mus ua tus txawv kawg lawm zoo li nkawd
tsis yog ib hom ntses li lawm. Thaum no mas ntxhov kuv siab kawg, vim kuv hlub ob tug
ntses no ib yam nkaus. Kuv tsis xav kom tus twg raug mob thiab ho tuag. Kuv tsis paub
xyov yuav ua li cas rau nkawd es thiaj tsis txhob sib tog li ntawd. Kuv xav tias yog
muab dab tsi kem ib tug nyob ib sab es thiaj tsis sib tog. Kuv xav muab lub rhawv kem
ib tug nyob ib sab, los lub rhawv tssi zoo nkauj lawm. Kuv xav kom nkawd tseg txhob
sib tog li, los kuj kuj nrog nkawd sib txuas lus tsis tau. Kuv xav thiab xav:
"Aub! Tos yus tus Tswv Ntuj tsis nyiam kom neeg ntiaj teb ua tej yam tsis zoo los,
yog yus ua tej yam tsis zoo ntawd rau yus xwb tiag. Tiam sis, ntshe mob thiab ntxhov
Tswv Ntuj siab kawg lawm. Zoo li yus ob tug ntses nov ua rau yus ntxhov siab ntag lauv.
Tswv Ntuj khuv leej yus heev, npaum yus khuv leej yus ob tug ntses ntag lauv.