KEV CAI KHI TES

Kev khi tes Peb Hmoob kuj yog ib txwm muaj. Tab sis Hmoob yog ib pab uas tau thoj nam kev kuv ntxhov mus nrhiav kev thaj yeeb. Tau los Tuam tshoj los nyob zoov nuj txeeg, toj roob hauv pes, toj siab tau ntau caum lub xyoo rau Xov Tshoj. Txheej thaum ub peb muaj hu plig xwb tsis muaj khi tes. Tsuas yog tus muaj txiab, sem nqaij sem tawv, peb hu kwv tij, niam qhuav txiv qhuav tuaj khi tes pov hwm, ntiaj ywj phem mus kom rov los ua niam ua txiv, ua kwv ua tij. Tab sis, tom qab no, txij thaum 1910, cov niam txiv, uas qhov muag pom kev deb me ntsis lawm, lawv nyiam kev nom kev tswv. Lawv pib muaj qhov tiam nom tiam tswv, tiam hau teb chaws. Lawv ho tuaj hawm txog nom tswv thiab vaj ntxwv huab tais Los Tsuas. Luag ho muaj khi tes thiab mas pom tau tias zoo nkauj. Lawv muab ua qhia rau sawv daws. Ces koj ua kuv ua, muaj muaj noj muaj haus ces muab khis tes nrog vim vam lus foom ntawm tsoom laus neeg muab lub yeeb koob yeej huam thiab txhawb nqa.

Txiv Plig Tshaj Sawm hais:
"Hmoob ua plig khi tes tos txais luag. Luag kuj zoo siab, vim muaj lo lus hais tias: Kom nyob txhiab niaj puas xyoo, dawb hau nres caug tsis muaj mob. Rau qhov kom nyob nres nroos ruaj nreb li cag zeb, khov li caj tsua, ua peb niam peb txiv kom txog 120 xyoo. Qhov nov kuj yog lub looj loog pab txhawb thiab.


Tooj Pov Thoj, UT.
Xov Xwm Tsim neej Tshiab 1996 .USA

A. Khi rau tus laus:
-Hnub no yog hnub dawb hnub huv,Hnub no yog Ntuj Niam hnub, hmo no yog Ntuj Txiv hmo. Kuv thov kom Ntuj Niam Ntuj Txi, muab lub sawm koob nyob ntug ntoob, lub sawm txhiaj nyob ntug nto.
Los pov hwm, pov yawm koj.  Kuv khi txoj hlua no,kom lub muaj sawm koob sawm yeej, nyob nrog txij nrog nkawm,  nrog tuj nrog ki.
Khi los nrog txij nyob nrog nkawm, nrog tub nrog ki kom nyob, ua neej nqaj mus nto ntuj ploog mus nto ntsi.  Nyob txheeb nyeej vam sawm, tsis muaj mob, tsis muaj nkeeg no od.
Los nyob ua luag txwj, zaum ua luag laus,los nyob noj tsis kawg paus, haus tsis kawg ntsis no lauj! Nyob ib txhiab mus kav ib txhis no od....

B. Cov me nyuam los cov hluas:
-Hnub no yog hnub dawb, hnub huv. Hnub no yog Ntuj Niam hnub. Hmo no yog Ntuj Txiv hmo, Kuv thov kom Ntuj Niam Ntuj Txi muab lub sawm koob nyob ntug ntoob, lub sawm txhiaj nyob ntug nto.
Los pov hwm pov yawm yawm koj,muab lub sawm koob sawm yeej no los khi txoj hlua no rau koj.  Khi los nrog Ntuj Niam, Ntuj Txi, khi los nrog Niam nrog Txiv, los nrog Viv nrog ncaus, khi los nrog kwv nrog tij.
Kom loj hlob tiav hlaub tiav ces,tsis muaj mob muaj nkeeg.  {cov me nyuam tseem me}  =Kom txhob tshiam niam tshiav txiv, txhob quav lav quav lav zis, rau nruab txaj nruab chaw.
Kom hlob plhias ncos, tsis txhob muaj mob muaj nkeeg no od....

C. Khi nrog qee leej neeg:
Hais tib co lus li saum no, hloov lo puav lus kom phim li tus neeg khi hlua rau ntawd mus....
     
* Yaj zoov Ntxheb Xib Hwb.

Tim13/9/2016.