Home
Yog koj tso siab rau Yesxus lub siab ntshiab, nws yuav ua koj siab kaj lug 
Pom lub Cim Yug nyob Paray Le Monial Tim 02-03/04/2016
( Paray le Monial yog thaj chaw Ntshiab uas HT.Yes Xus tshwm rau leej Phauj Margurite-Marie pom, 1647-1690)
Tsev teev Ntuj LN. Zam
Lub Cim Yug nyob hauv tsev teev Ntuj LN.Zam.
Thaum Hmoov Tswv Ntuj txoj kev Khuv Leej ( Hnub Chiv tom qab Hnub Chiv Hla, Dimanche Divine Miséricorde) xyoo 2016, yog Xyoo uas txiv Vaj Qhia tsa ua ib xyoos ntshiab rau txoj kev Khuv Leej, peb pab teev Ntuj « Réjuires-toi Jérusalem » muaj tshaj 20 leej, peb mus teev Ntuj rau lub chaw Ntshiab Paray Le Monial ( Huab Tais Yes Xus muab Nws lub Plawv Ntshiab rau Leej Ntshiab Véronique Marie Alacoque pom, yog tib qhov chaw hauv ntiaj teb nov uas Huab Tais Yes Xus tshwm rau neeg pom xwb). Muaj kuv ib tug phooj ywg hu ua Ntxhoo no nrog kuv mus thiab.
Hnub Xya Hla tim 02/04/2016, peb sawv ntxov ntxov mus, 8h sawv ntxov xwb peb twb mus txog lawm, peb yog thawj lub tsheb uas xub mus txog. Peb tos lawv cov lawv qab tuaj txog, peb haus me ntsis kav fes, haus kob swm tshuaj thiab noj ncauj me ntsis tag ces peb pib mus koom nrog lwm pab uas tuaj ntau qhov tuaj. 9h peb mus teev Ntuj thiab kawm kev ntseeg txog 11 teev ces peb mus Mis Xas. Mis Xas tag peb mus noj sus, noj sus tag peb taug kev nce roob teev Saw Mab Liab, mus los txog 17h45, 18h peb rov mloog qhia Ntuj Kev Cai tag, peb mus noj hmo, noj hmo tag rov mus mloog qhia Ntuj Kev Cai thiab hu nkauj teev Ntuj txog rau 23h. Ces cov coob lawv ncaj qha rov los pw tim tsev ntiav lawm. Xyoo no peb pab mus pw tsev ntiav vim yog xyoo Ntshiab Txoj Kev Khuv Leej uas muaj neeg tuaj coob ces peb tsis tau kev pw hauv cov tsev rau neeg teev Ntuj lawm. Kuv tsis rov mus pw ces kuv thiaj li thov lwm tus pab thauj kuv tus phooj ywg Ntxhoo nrog lawv mus pw. Peb mus Hawm lub Cim Yug txog 24h, kuv tseem xav nyob ntxiv tab sis ib txhia uas lawv nrog kuv caij tsheb tsaug tsaug zog no ces peb thiaj li rov los pw lawm.
Hnub tim 03, yog Hnub Chiv Tswv Ntuj lub Siab Khuv Leej yog Hnub Chiv tom qab Hnub Chiv Hla, hnub no mas peb muaj ntau yam yuav ua, kuv xam ces peb lub caij tsis txaus. Thaum 8h peb sawv los noj tshais (haus kav fes , peb nyob Fab Kis teb mas thaum sawv ntxov peb noj mov ci thiab haus kas fes los haus dej kob swm tshuaj xwb peb tsis noj mov). Ces kuv xam li cas los peb lub caij tsis txaus lawm. Vim 9h30 peb twb yuav pib peb cov hauj lwm mus nxiv lawm. Xam los yeej tsis muaj caij seem li txog ntua thaum peb yuav rov mus tsev. Kuv thiaj hais rau Ntxhoo tias : « Nag hmo peb mus hawm lub Cim Yug lawm, koj tsis tau mus, peb twb tuaj txog qhov nov ib zaug, koj yuav tsum mus. Koj mus no ces yog koj xav thov txiaj ntsim dab tsi no koj sau rau ib daim ntawv me me tais pov rau hauv lub tawb uas lawv tso rau hauv qab Thaj Txiv Ntuj. Koj mus, koj txhob ntshai, yeej muaj neeg nyob hauv tas mus li. Koj twb pom lawm, yog ntawm kem tsev muag khoom sab lauj, tus ntaiv uas nce mus saud, koj nce mus saud ces yeej ncaj qha mus rau hauv lub tsev teev Ntuj ‘Zam’ uas muaj lub Cim Yug (nyob Paray le Monial mas teev Ntuj 24h/24 li) . Tsis deb ces koj mus ko taw mus es kuv nyob, kuv tos cov uas muaj me nyuam uas nrog wb caij tsheb, peb mam lawv qab tuaj.
Ces Ntxhoo haus kas fes tsuag tsuag tag, nws txawm sawv kev mus lawm.
Kuv nyob tos cov muaj me nyuam npaj tau peb thiaj li lawv qab mus. Peb mus txog, peb mus mloog ob peb tug Txiv Plig qhia Ntuj Kev Cai txog rau 11h ces peb mus ua Mis Xas, lub Mis Xas lawv muaj 5 tug txais lub Cim Ntxuav thiab lawv kuj ua tau zoo heev thiab ua ntev tsawv. Peb coob heev ua rau lub tseev teev Ntuj ntsawm nkaus yuav luag tsis tau kev li, ib txhia tseem zaum hauv av xwb. Peb yuav muaj tshaj 1.000 leej. Thaum lawv qhia kev cai ntawd txawm muaj ib tug pog, yog cov tuaj teev Ntuj li peb tab sis tsis yog peb pab, nws txawm hais tias : « Kuv tuaj rau qhov nov mas zoo li Tswv Ntuj txoj kev Hlub puv npo phwj yaws rau hauv kuv lub siab, txiv ceev nkaus kuv lub hauv siab tsis muaj chaw rau li lawm. Cas txawm siv yuav rov qab mus tsev lawm. »
Ua Mis Xas tag ces peb rov mus noj sus tom tsev ntiav.
Lawv rub ib lub rooj ntev rau tag nrho peb pab noj mov ua ke. Ntxhoo wb zaum ntawm tw rooj. Ntxhoo zaum ntawm kuv xub ntiag, nws txawm pib tham tias :
« Tu siab heev, ua cas kuv tsis tau kawm ntawv, kuv tsis paub lus fab kis txaus, luag hais kuv paub lo puav nyuag xwb. Yog kuv paub lus npaum koj, es luag hais dab tsi kuv paub, luag muaj mus teev Ntuj txog qhov twg yog kuv paub no ntshe kuv yuav mus tas mus li. »
Nws hais li no ces nws txawm cia li quaj, kuv kuj sawv mus nplws nws taub haus, kuv nwj nws lub hauv pliaj, kuv puag nws rau hauv kuv xub ntiag , kuv plhws nws taub hau ces kuv hais rau nws tias : « Txhob tu siab, peb paub lus los luag hais tag peb twb tsis nco qab tag lawm. Tuaj ib lom ntshe tsuas khaws tau ib ob los rau nruab siab xwb. » Hais li nov tag, kuv txawm tham rau nws tias : Peb tsis paub tau Tswv Ntuj lub hom phiaj, feem ntau mas Tswv Ntuj tsis hu cov neeg ntse, vim cov ntse mas lawv tsis hais Tswv Ntuj cov lus, cov neeg ntse mas lawv hais lawv cov lus xwb. Li ntawd mas Tswv Ntuj nyiam txib cov neeg txom nyem, cov neeg tsis muaj txuj ci. Kuv txawm muab piv txwv rau LN. Npes Nas De thaum Niam Mab Liab tshwm rau nws nyob Lourdes, Tswv Qhia nug nws tias : « Ua cas Niam Mab Liab ho tshwm rau koj es ho tsis tshwm rau luag tej ? » Npes Nas De thiaj teb tias : « Yog muaj lwm tus pluag tshaj kuv mas yuav tshwm rau lawv, tab sis ntshe tsis muaj tus pluag tshaj kuv ces thiaj tshwm rau kuv. » thiab LN. Nquas Kav Lauv (Juan Carlos) , ib tug tub liaj tub teb yaj sab uas pom Niam Mab Liab nyob Guadalupe.
Kuv tham me ntsis li nov tag ces Ntxhoo txawm hais rau kuv hais tias :
Puag ta tus pog i hais li ntawd, taig kis no kuv mus Hawm lub Cim Yug, kuv hnov kuv lub hauv siab ceev ceev phwj yaws li pog hais thiab tiag. Ntshe koj tsis nrog kuv mus es kuv mus ib leeg xwb kuv ntshais los xyov yog ua li cas, kuv lub siab mas dhia pig poog xwb. Kuv nce ntaiv mus txog saud ces zoo li kuv lub siab fab fo, kuv cia li xav hais tias : « Uab ! Ib ntsis kuv nkag kiag mus es kuv yuav mus pom dab tsi ? Kuv pom es kuv yuav ua li cas ? » ( tab sis nws kuj tsis paub hais tias nws yuav mus pom dab tsi). Ntxhoo hais li nov, ces kuv txawm hais rau nws hais tias : Kuv twb hais rau koj hais tias tab hmo ntuj los yeej muaj neeg nyob tas mus li no ne, cas koj ho ntshai maj ! Es nyaj koj yeej tau nkag mus xyuas tej tsev teev Ntuj uas koj tsis tau paub dua los lawm thiab pob ? Ntxhoo hais : Kuv yeej tau mus lawm thiab mav, tab sis kuv tsis tau ntshai li nov li. Wb hais li nov xwb ces txawm tso tseg ib nyuag pliag ( thaum nov los zoo li Ntxhoo lub siab tsis tus li, nws tseem los kua muag thiab). Ntxhoo txawm rov hais tias :
- « Lub Cim Yug ci heev yom ! »
- Yeej ci mav ! vim lawv ua lub cheeb kub los dhos ces cov teeb ci rau ces yeej ci mav.
- Tsis yog lub cheeb sab nraud ci hos ! kuv hais lub Cim Yug ci hos, ci li lub hnub, ci heev, kuv nkag mus muaj neeg coob coob sawv ntsug ped ces kuv nyob nram qhov rooj xwb, kuv nkag kiag mus, kuv nyob nram qhov rooj los yeej ci txog ntua kuv li tiag. Ci zoo nkaus li lub hnub, tab sis lub hnub mas yus ntsia tsis taus, tab sis lib Cim Yug nov mas yus ntsia tau. Ci zoo nkaus li thaum lawv tua coob fais (feu d’artifice, fireworks) es tawg paj paug tiag. Tab sis cov sab pom kev mas ci ib laig ib laig ntawm lub Cim Yug los...
- Kuv paub tias Tswv Ntuj pub txiaj ntsim rau Ntxhoo lawm, tab sis kuv tsis xav ua rau kom nws ceeb ces kuv txawm hais rau nws tias : Lub Cim Yug ces zoo li cov uas taig kis no peb ua Mis Xas peb txais xwb mas.
- Nws ci heev hos ! ci ci li hos !
- Kuv saib zoo li nws tsis to taub kuv hais ces kuv rov hais tias : Lub Cim Yug ces yog Yes Xus lub Cev uas taig kis nov ua Mis Xas peb noj xwb mas, tsuas yog lawv ua lub loj dua coj los tsa rau sawv daws hawm xwb.
- Ab ! Kuv pom ses ci ci heev li.
- Yog tias peb pom lub Cim Yug ci ci li koj hais nov ces ntshe nag hmo peb twb tsis los pw li os, ntshe peb cia yuav nyob ib hmo kag ntug xwb ! Lub Cim Yug ces yeej yog lub uas peb noj thaum ua Mis Xas xwb mas.
- Aub ! Yog li no mas kuv pom tsis yog li lub peb noj, kuv pom mas ci ci li lub hnub, thaum kuv nkag mus kuv pom kiag yeej ci txog ntua thaum kuv rov tawm los. Zoo li ntawd ces kuv mus nyob hauv, kuv txhos caug puag nram qhov rooj, kuv twb tsis nco qab saib moo li, kuv twb tawm los nraum zoov nov, kuv mam saib moo no yog 9h15. Yog li no ib ntsis kuv yuav rov qab mus saib seb puas yog li koj hais tiag. Ntshe yog kuv vwm vwm lawm es kuv thiaj pom ci cuag li lub hnub pob !
- Tsis yog koj vwm, yog Tswv Ntuj pom koj txoj kev txom nyem quaj ntsuag es Tswv Ntuj pub txiaj ntsim rau koj xwb. Qhov chaw nov, yog ib qho chaw ntshiab. Sawv daws tuaj, sawv daws yeej tau txiaj ntsim ntau heev thiaj li muaj neeg tuaj coob ua luaj. Tab sis yog lawv tsis hais ces peb tsis paub xwb.
Li nov tag ces noj sus tag, peb rov mus teev Ntuj rau ntau lub tsev teev Ntuj, mus txog lub tsev teev Ntuj twg los nws kuj tseem los kua muag thiab. Peb mus ntau lub tsev teev Ntuj tag, peb rov mus nkag hauv kem tsev teev Ntuj ‘Zam’, Ntxhoo pom lub Cim Yug peb sawv daws pom lawm xwb, tsis ci li thaum sawv ntxov nws pom lawm.
NB. Ntxhoo tau mus txais lub Cim Yug li cov ntseeg uas ntxuav plig tas, tab sis nws tsis tau mus hawm lub Cim Yug dua ib zaug li, yog thawj zaug nws mus hawm lub Cim Yug, tab sis tsis muaj neeg coj ces nws mus ib leeg xwb. Ntxhoo tsis yog ib tug neeg los kua muag yooj yim, thaum nws tus txiv muab muab nws tso tseg mus yuav niam yau thiab nws ob lub tsev poob tib si nws twb tsis quaj...nws yeej tu siab tab sis tsis tau los kua muag...
Tsev teev Ntuj Paray Le Monial.
Peb tab tom pib teev Saw Mab Liab yuav taug kev nce roob mus pem ib lub tsev teev ntuj me nyob 2km deb.
Vaj Qhia Zam Paj Lug 2 tus Ntoo Cuam.
Ntxhoo.
Last edited by Maiv Tooj on 24th January 2021, 10:00 am; edited 1 time in total
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
