XH. Yaj Zoov Ntxheb lub Tsev THOOB TSIB

-Muaj ib hnub poj niam wb tuaj dab ros. Wb nyob hauv tsev zov cov me nyuam xeeb ntxwv.
Tus me  nyuam xeeb ntxwv ntawd txhoj  txhoj puab, kuv txawm cem nws, kuv ib nyuag ua qhov muag hlaws hlo rau nws, ces nws quaj  nws khiav mus nrog nws niam tais nyob, kuv los ntxias nws los nws tsis ntsiag li. Nws tau quaj ntev loo  lawm.  Kuv txawm xav tau tias tsam nws lam ntshai kuv pob! Kuv sawv tsees mus muab tsom iav los tsom kuv, ces kuv ua zoo li thaum kuv ua rau tus me nyuam xeeb ntxwv ntawd. Kuv twb ntshai kuv tus duab nyob hauv daim iav lawm thiab.
Kuv hais rau pog laus tias, koj sim saib kuv saib puas txaus nthai!  Pog laus ntsia kuv ib plia, nws hais tias:
Niag  tsov tom, koj  ntsia kuv xwb kuv twb ntshai lawm koj ua li ko, koj tseem hais nchav thiab ua cas me nyuav yuav tsis ntshai koj naj! Koj tseem zoo nraug tshaj liab lawm thiab hod!
Kuv ho hais rau nws tias no koj sim quaj rau kuv saib saib puas tseem zoo nkauj cuag li thaum koj tseem hluas thiab.  Nws nyuam qhuav ib nyuag  hnya li yuav quaj xwb kuv twb ntshai lawm. Kuv hais rau nws tias yog koj tseem quaj thiab mas kuv yuav poob plig li lauj.
Ab yuad, ua cas thaum hluas es quaj los zoo saib, luag los zoo saib. Nyiam no as ua cas quaj los twb  txaus ntshai lawm. Yus luag los twb tsis zoo saib li lawm. Koj niad laus lawm zov me nyuam los me nyuam tsis ncawg li lawm, ces ntshai tej me nyuam twb ntshai ntshai yus lawm lauj yod. Xav tias laus laum lam zov tej me nyuam xeeb ntxwv, kom tej tub tej nyab los tej ntxhais tej vauv ho dim tes me ntsis no, zov me nyuam los tsam lawv ho tau muab qaib los hu me nyuam plig thiab.
Laus lawm, tsis muaj phooj ywg tsis pom qab nyob.  Tej me nyuam los tsis ncawg yus, tej hluas los lawv muaj lawv phooj ywg, lawv tsuas tham txog lawv hauj lwm lawm xwb. Xav mus cuav zos nrog cov niag laus tham los koj mus tsis taus.  Lawv los tuaj tsis taus, tsis muaj caij sib tham tso daj tso luag.  Yus kev lom zem tsis zoo li cov hluas, yuav tham mus tua nqaij, nuv ntses los kev tawm rooj mus saib neej saib tsav.  Kho siab los tsis zoo quaj, zoo siab los tsis zoo luag li.  Tsam muaj neeg pom ces lawv ho tau muab qaib los hu plig, los ho tau mus ua neeb kho,  Ua zaj twg los twb tsis zoo lawm os yuad!

Tus neeg uas muaj lub neej nplua nuj tseeb nyob rau saum lub sim ceeb no.  Mas nws yuav muaj peb yam no:
a- Nws muaj txoj kev ntseeg.
b- Muaj kev sib faib txuj ci.
c- Muaj kev sib raug zoo nrog zeej tsoom.

1-Muaj kev ntseeg.
Kev ntseeg yog ib yam loj thiab khov heev nyob hauv tus neeg lub neej.
Kev ntseeg muaj ntau yam:
Kev ntseeg Ntuj kom muaj txoj sia nyob ua Ntuj li tub ki kuj yog.
Kev ntseeg coj lub tswv yim kom paub ua lub neej pib lub paus mus xaus rau lub ntsis. Nws coj ntau yam tuaj rau tus neeg ntawd.
Yam li nws muaj kev thoob tsib, kev txawj kev ntse, kev paub tab paub cai txawj hwm Ntuj hwm neeg, nrog kev muaj tsim, muaj koob meej xws li nws yog Vaj Ntxwv ib Leej Tub uas yuav tau sawv ua Vaj kav teb chaws yav tom ntej.
Muab piv rau cov neeg kawm txuj ci. Nws nyob rau txheej uas tus neeg tau kawm ntau ntau yam txuj siab uas tsis muaj coob leej tau kawm tiav.
Neeg ntiaj teb ntsia ntsoov nws xws li ib lub hnub qub loj nyob ze rau lub hnub thiab lub hli. Nws ci lam lug kav ib feem qhov pom kev ntawm lub hnub thiab lub hli.

2- Kev sib faib txuj ci.
Tus neeg kam faib nws tej txuj ci rau lwm tus, nws yog zoo li thaum nws yug los nws yeej yog ib co tseem nyiaj tseem kub uas muaj neeg tau sim dhau los lawm nyob hau lub tais yeej vub chuav nyiaj nhuav kub ntawd.
Tus neeg zoo siab faib nws cov txuj ci rau lwm tus, nws zoo li tus neeg nplua nuj muaj nyiaj txiag cuab tam ntau. Nws twb muaj zoo txhab loj ntim tseg los tsis tas. Nws muab faib rau luag tej los zoo li nws tej txuj ci txawj ntws los li tus dej txhawv ntws tsis paub tas li.
Neeg ntiaj teb saib mas yog dej xwb cov dej ntawd puav leej muaj nuj nqis tib si. Cov dej ntshiab thiab cov dej nro puav leej muaj nqi tsim nuj ib yam.
Cov dej ntshiab yuav muab los siv nws kuj yuav paug sub tsuag rau ces yuav nro tuaj.  Cov dej nro muab lim tas kuj huv zoo siv ua dej tshuaj. Yam twg los yuav tau paub cais, ces yuav ua tau dej huv ib yam los yug txhua yam txij sia tau.
Tus neeg txaus siab faib nws tej txuj ci rau luag, nws muaj nuj nqis loj, thiab muaj qab hau rau txhua yam.  Nws zoo puav tam li tus niam dej  txhawv ntws los tsis tsis txawj tu hla tas nrho lub ntiaj teb no.
Neeg ntiaj teb yuav hu nws ua tus dej tshuaj cawm siav nyob muaj meej.
Nws tau ua rau neeg zoo siab xws li lub niaj xyoos zoo uas pub qoob loo ntsu, neeg zoo siab vim sawv daws tau dim ntawm kev tshaib kev nqhis.

3-Muaj kev sib raug zoo.
Tus neeg nrog luag sib raug zoo, nws lub hnub nyug tseem hluas los luag twb hom nws los ua niam ua txiv tuav pov hwm tej hlob tej yau mus rau yav tom ntej lawm.
Nws txoj kev hwm thiab nyiam zeej tsoom txhawb nqa tau txhua yam hwj chim  koob meej rau txhua tus neeg muab los ntoo xws li lub mom roos fwj chim rau neeg.
Nws yog neeg zej zog qhov chaws tso siab, nws zoo li tus thawj neeg txheem kev thaj yeeb kom khov kho rau teb chaws nyob tiaj tus.
Nws zoo li Hmoob tus txiv muam sau kev xam khib. Kev cib nyeej, kev paub luag ua tub qaug neeg coj mus pov tseg rau zaj zeg zaj qho, kom tsis muaj tus vij sib cav sib ceg, kom xeeb tau ua plaub ua ntug.
Yog muaj ib leeg twg txawj muab yeeb yaj kiab los tsom,mas nws yuav pom tias tus neeg faib txuj ci ntawd, yog tus neeg tseem nyiaj tseem kub chuav tawm ntawm lub yeej vub los tiag. Cuag li nws twb yeej zoo los txij thaum lub ntuj pib tawg paj hos lub teb pib tuaj nrog los lawm.
4- Xaus qab lus.
Ib tug neeg muaj peb yam no nyob hauv nws nruab siab. Mas nws yog neeg nplua nuj tseeb tiag.
Thaum nws nplua nuj nyob hauv peb yam no, nws txoj kev nplua nuj yog kev nplua nuj nqes saum ntuj los.
Nws muaj feem xyuam tuav pov hwm zej zog, xws li ib tug vaj tswj kav ib xeev ntuj nws tuav pov hwm tsoom laj meej pej xem huab hwm sawv daws.
Qaum ntuj yuav foom hmoov zoo rau nws ua ib tug Vaj Txheeb uas yog Ntuj tsa los faib txuj ci,rau qaum ntuj me nyuam.
Kev sib raug zoo,coj ntau yam zoo tuaj rau nws:
Coj kev sib hlub tuaj nyob nrog nws tsev neeg, nws cov txheeb ze, nrog rau cov nom tswv, cov thawj neeg tuav kab xwm hauj lwm.
Nyob hauv sab ntsuj plig muaj kev thoob tsib, kev txawj ntse, kev sib hwm, sib hlub ua rau lub cev noj qab nyob zoo ua lub neej nyob nrog kev kaj siab lug.
Zeej tsoom ntiaj tog qaum pes saib nws zoo li lub pov haum thaiv tau kev txom nyem kev lwj siab ntxhov plawv.  Nws zoo puav tam li muaj tus muab lub hwj chim koob meej poob saum ntuj los rau nws ntoo. Ua rau kom leej tib neeg ntshaw zoo xws li nws.
Saib nws cia li zoo li cov dej muaj nuj nqis ywg tas nrho lub sim ceeb, tej Leej neeg, tsiaj txhu, me kab noog nroj tsuag, xyoob ntoo txhua yam huv si.

Yaj Xib Hwb Zoov Ntxheb.

Nyob hauv ntawv hauv puas Thaum Tswv Ntuj nrog Nom Hes thiab nws cov tub cog lus thiab foom lus zoo rau lawv. Thiab tus pej Thuam Npas Npes. Zaj 9:1-17. Thiab zaj 11: 1-9.
-Tswv Ntuj hais:
Nej kav tsij huam vam mus puv lub ntiaj teb. Tas puas tsav yam tsiaj  nqhuab tsiaj deg,cov ya saum ntuj los cov nkag hauv av.  Lawv yuav nyob hauv nej xib teg tas huv si. Tas txhua yam txawj ua zog los tsis txawj ua zog, yog txhiam xws rau nej noj.
-Thawj qib lus hauv ntawv hauv paus no yog hais rau peb tsoom ntseeg txhua tus.  Uas yog Nom Hes cov xeeb ntxwv. Huam vam muaj kev txawj kev ntse nrog kev thoob tsib to nrog.
-Thaum peb sawv daws tau paub Tswv Ntuj zoo mas zoo li peb hais tib xeem lus, yog cov lus sis nyiam sis hlub.  Los ntawm Tswv Ntuj los.
-Peb yuav mus saib tias, thaum Nom Hes cov xeeb ntxwv lawv sib hu tias:
Los peb yuav txhim ib lub nroog, thiab puab ib tug ncej pej Thuam kom sisb siab, lub ntsis mus txog ntua saum ntuj.
Ces peb lub npe yuav nrov, peb yuav tsis sib ncaim ib zaug li, thiab peb yuav tsis sib tawg mus nyob puv lub ntiaj teb.
Ces Huab Tais Ntuj nqes los xyuas,  Ntuj pom tias cov neeg no, lawv muaj Xas Tas lub Tswv yim.  Lawv muaj peev xwm kawg.
Kuv yuav mus xyuas lawv kom lawv hais lus sib txawv, tsis sib to taub.  Ces lawv yuav sib ncaim sib tawg mus nyob thoob ntiaj teb li lawv cov lus lawv tau hais.  Vim tus Pej Thuam uas lawv txhim no yuav rau hu ua  Pej Thuam Npas Npes.  Yog lawv kev sib ncaim.
Ces tus ncej Pej Thuam Npas Npes no yuav vau, lawv nyias yuav hais nyias xeem lus. Tsis yog xeem lus sib haum xeeb sis nyiam sis hlub nqes saum ntuj los.
Tswv Ntuj yuav cia nyias mus taug nyias txoj kev. Ntuj yeej paub tseeb tias, sab twg los  nyias nrhiav nyias kev vwm kev yuam kev. Ntuj yuav cia sawv daws taug mus ib ntus li ntawd.
-Tswv Ntuj mam rov hu Has Nplas los ua thawj leej txiv ntseeg. Leej twg ntseeg thiab coj Tswv Ntuj Yas Ves 10 lo lus qhia  pub txoj sia nyob mus li. Tus ntawd, txawm yog neeg dig muag, ceg tawv, lag ntseg, nplaig txhav, mob ruas  mob tsis huv, los tsuav yog nws ntseeg ces nws tau txais kev cawm.
-Thaum Yes Xus tau ntsib nws ces Yes Xus yuav hais tias Hnub no koj tau ntsib kuv vim koj yog Has Nplas ib tug tub ki nyob hauv txoj kev ntseeg.

Nco ntsoov tias peb cov neeg ntseeg tsis yog cov muaj hwj chim thiab muaj tsim cia rau tej neeg hwm peb nyob tom tej kev sib tshuam.
-Yes Xus hais tias:
Nej yuav raug luag thuam, luag ntxub, luag tsawm nej.  Luag yuav coj nej mus rau cov nom txiav txim nyob hauv tsev loj faj.
Yog nej ua siab ntev mas nej ib txoj plaub hau yuav tsis poob mus rau hauv pem teb.

Sau npe,  Nej yog cov uas kuv tau xaiv lawd,  Ntuj lub cuab tam hauv kev nplua nuj Ntuj yuav muab los pub rau nej ua nej tug mus li.

Ua tsaug.


Zaj no sau rau ob pab neeg tsis sib haum xeeb.  Kom tau muab los daws sawv daws tej kev sib tiv nyias ua nyias pab nyias pawg koom nyob ua ke hauv ib lub tsev teev hawm Ntswv Ntuj.

Peb ua neeg nyob rau lub ntiaj teb no, Yog yus tau thuam ib tug neeg lawm mas yus yuav suav tias yus yog ib tug neeg RUAM tshaj luag tej lawm. Ua cas yus ho yuav muaj kev khav theeb me ntsis lawm thiab lauj.
Tus coj kev sib thuam, mas tab yog yus kawm txuj qib siab los, los yus tau mus kawm txuj nyob hauv ib lub tsev kawm txuj nto moo zoo tawm los lawm, los yus yeej tseem yog neeg RUAM.

Yog tias, kuv pheej ua ib tug neeg thuam luag los hais lus saib tsis taus lwm tus, los kuv sau tej zaj hais luag dab plig nrog kev thuam kuv twb txhais tsis tau luag lo lus, kuv cia li muab ntaus nqi ua lwm yam mas kuv xav tias kuv tsis tsim nyog sau kuv lub npe no rau luag paub, vim kuv yog neeg RUAM.

Yog kuv sau ib zaj pub tswv yim sib pab nrhiav kev thoob tsib muaj txuj ci los sib nres kev nyiam kev hlub los ua neeg paub tab paub cai pub rau neeg ntiaj teb tau siv mas yuav sau kuv lub npe tawm hauv mas yog tseeb lawm.

Kuv sau zaj me nyuam tswv yim no, mas kuv nco txog sawv daws peb puav leej yog neeg RUAM tas nrho, tseem tsis tau muaj ib tug neeg uas txog tav no luag cav tias nws yog neeg ntse, paub txuj ci. Paub tab paub cai kawg.
Peb Hmoob cov txuj ci yog ib co txuj ci siab los tob heev.
Cov tub muaj txuj tau kawm Mab Sua txuj ci thoob, tseem twb tsis tau paub txog, muaj coob leej ntau tus.
Yam li tej lus paj lug los tej lus piv sab sij huam hais, los qhuab qhia. Yog tus tsis txawj txhais ces nws muab txhais ntaus lwm tus nqi lawm ces neeg to taub yaum kev loj.

Yam uas Peb Hmoob sawv daws tsis txawj txhais kom tas mas yog cov txuj ci teev hawm Ntuj los teev hawm dab. Hmoob tej kab lis kev cai hais tshoob hais kos, kab ke pam neeg tuag cov zaj cov haiv uas Hmoob hu ua txiv xaiv foom kom cov txhais tau muaj tsawg leej kawg. Ua rau peb Haiv Hmoob cov coj poj yawm txwv koob kev ntseeg, thiab cov mus teev hawm Tswv Ntuj hais lus tsis sib to taub li. Tab cov neeg ntseeg Ntuj los lawv tsis to tau lawv muab ntaus nqi tias yog dab tug tas nrho cuag li yog dab tawm tuaj qhia ib hom lus rau hmoob xws li Phu Thas thiab Yes Xus lawv, tsis muaj qaum Ntuj ib los lus nyob hauv li.

Muaj ob peb tug piv txwv los hais:

1-Hais txog Hmoob tus Siv Yis ntuj yav pem suab dhau lo lawd. Siv Yis yog ib leej tib neeg xws li tas neeg ntiaj teb sawv daws. Nws tsis yogTswv Ntuj leej Tub. Nws tsis yog ib tug Huab Tais. Nws yog ib tug neeg Ntuj tau txib nws tuaj ua ib txoj hauj lwm Kho mob kho nkeeg, Hmoob kuj hu Siv Yis ua tus cawm seej vim Siv Yis ua neeb kho mob nkeeg kom zoo, Hmoob ntseeg tias Siv Yis nws kho sab ntsuj plig kom tus plig nrog lub cev nyob txhob tuag mus sai, kom muaj txoj sia nyob ntev li ntev tau mus puv ib puas nees nkaum xyoo.

Siv Yis Cov hwj huam muaj peb yam li no.
a-Cov ua neeb hais tias, Siv Yis hnov lus ntxhi.
b-Tsheej Xeeb hais lus tseeb.
Leej Nkaub hais lus paub.

Peb yam no yog ib co txiaj ntsim tuaj saum ntuj tuaj.
Yog Koob hmoov ua Ntuj Niam Ntuj Txi muab rau Siv Yis coj tuaj kho neeg mob. Yog ib zaj thov Ntuj kom Ntuj pab cais neej rau neej teb cais dab rau dab chaw, kom dab mus txis dab txij, neej mus txis neej nkawm. Dab txhob tuaj tshav neej nyias nyob nyias. Thaum Siv Yis ua neeb Hmoob ntseeg tias Siv Yis mus nrog Ntuj los mus nrog Dab sib Txuas lus. Neej nroj Ntuj thiab dab txuas lus tau, Ntuj thiab dab nrog neej txuas lus tsis tau. Vim tias yam uas neej niaj hnub thov kom Ntuj pab tsis haum raws li neej kev tso siab thiab kev ntseeg. rau qhov neej hloov siab sai dhau thiab tso siab rau ntau tus tswv, xws li ntau tus txiv muam. Ces neej tsis hnov Ntuj thiab dab li lus. Yus xav hauv nruab siab ob peb yam, Yam twg los yus twv tsis raug li. Ua neeb nqes los ces mam khov KUAM saib kuam seem sab twg yus ua tus txiav txim qhov kawg raws li KUAM qhia. (< Qhov no ntag yog lo lus hais tias Neeg nrog Ntuj txuas lus mas Ntuj hnov. Hos Ntuj txawm nrog neeg txuas lus los neeg tsis hnov thiaj li yuav tau nug rau KUAM kom kuam qhia.)

Lo lus hais tias Leej Nkaub hais lus paub Yog kev sib txuas lus ntawm Ntuj Leej Tswv Yim kom Ntuj Leej Tswv Yim tuaj qhia yus. Cov tseem coj kev cai raws li tej pog tej yawg qhia, Leej Nkaub zoo li Leej Tswv Yim.
Ntuj Leej Tswv Yim yeej zoo Siab tuaj qhia tiag. Tej zaum yuav muaj tej yam xwm loj txaus Ntuj qhia mas Ntuj mam qhia, Tsis yog yuav niaj hnub qhia txhua tus txiv neeb txawj ua neeb txhua zaus. Xyov pes tsawg tiam Ntuj mas li qhia rau ib leeg paub. Muaj tsawg zaus kawg tej tus neeg siab dawb, lo kev ua txhaum tsawg mas nws nrog Ntuj sib txuas lus tau yuav yog Ntuj pom zoo lawm mas Ntuj pub kom txuas lus tau. Tab sis tsis yog cov neeg muaj tsim thiab yog neeg ua nom ua tswv los ib tug nws yog thawj neeg loj.

Neeg yaj ceeb sawv daws hais tias KomThov Ntuj pab. Thob niam txiv poj yawm pab, cov tsis paub txog Tswv Ntuj lawv hais tias Thov Dab pab. Lo lus no txawm yog thov leej twg los xij. Yeej yog thov Ntuj pab. Thov Ntuj, thov Dab los yog Tib Tug Tswv. Hmoob Tus dab loj yog tus dab xeeb teb xeeb chaw, tus no yeej yog Huab Tais Ntuj li lawm. Tsuas muaj Tswv Ntuj tib leeg thiaj yog tus xeeb kom muaj lub ntuj lub teb. Ntuj thiaj ua tau. Dab yeej ua tsis tau. Tsis tau hnov dua leej twg hais tias dab ua tau. Luag hais tias, mus dab teb,dab teb los tsis yog dab los tsim tau. Nyob hauv Hmoob lub tswv yim mas yam twg pom tsis tau mas hmoob hu ua dab no tas nrho.

a-Nyob hauv Hmoob cov lus hais txog dab mas 90 % tus dab mas yog cov dab zoo, nyob nrog Ntuj.
b-Muaj 8% tus dab yog cov hmoob tsis paub hmoob xav tias ntshai yog dab.
c- Muaj 1% yog tus lam hu yuam kev xwb tsis paub.
d- Tshuav 1% mas nws thiaj yog tus dab phem tseeb tiag. Tus no hu ua Ntxwj Nyoog. Lub npe no Txhua tus Hmoob yeej tsis nyiam. Ib tiam qhia los dhau tiam tias nws yog tus phem tso ntaub ploj ntawv tuag los rau neeg ces neeg thiaj tau mob tau tuag mus.
Tus dab phem muaj 1% no nws yeej txaus siab tias Hmoob muab txhua tus neeg zoo nrog rau Tswv Ntuj tib si hu ua dab no mas nws kuj xav huas huv si los ua nws feem kom neeg yaj ceeb muab ntaus nqi yuam kev, tias dab dab muaj nyob puv lub qab ntuj no, thiab dab yog cov muajzog tshaj yam twg los yog dab li tas nrho.

-Tus neeg uas nws niaj hnub xav tias luag lwm tus yog neeg tsis zoo, yus xav ua neeg nto moo tias yus paub neeg phem coob leej Kom muaj neeg pab qhuas yua tias yus muaj peev xwm loj txog sab twv tau cov neeg plem coob leej kawg.
Tus ua zoo li no yog yus rov xav zoo zoo mas yus yog tus RUAM tshaj luag tej ua cas Yus tseem yuav sau yus lub npe rau luag paub lawm thiab. Tab yus muaj txuj kawm tiav qib siab los, los yus yeej tseem RUAM qees li.

Yog yus sau ib zaj pub tswv yim los sib nres nrhiav kev thoob tsib los coj kev sib haum xeeb nrog kev nyiam kev hlub mas tsim nyog sau yus lub npe rau.Tab nws yog ib tug neeg tsis muaj txuj los sau yeej tsim nyog lawm, vim ib tug neeg tsis muaj txuj tsis kav nws muaj lub zoo tswv yim pub rau luag zeej tsoom tau siv

Ib tug neeg yus pheej nyiam thuam neeg los thuam luag pab luag pawg li no,ces yog yus rov muab yus ntaus tus nqe pheej yig. Dab phem tsis tau siv tswv yim los mus ntiav cov neeg muaj txiag tuaj kheev nqi yuav muas yus li. Dab phem ntsia yus lub qhov muag xwb nws yeej paub tias tus zoo li yus no, dab ntxhi xwb twb tau dawb lawm.


-Cov neeg nyiam nyob hauv txoj kev sib thuam no mas yog Ntuj txib yus ua ib txoj hauj lwm kom tshem kev sib thuam sib ntxub no kom txav mus deb ntawm yus mas yus ho hais ib tug nqi kim heev, uas Ntuj cov neeg ntiav tsis taus li. hos yog dab phem mas muab ob lub teeb liab thiab ntsuab nram kev tshuam los yoj xwb mas yus yeej xaiv kiag lub liab vim li ntsuab yeej cig tom qab lub liab xwb.

2- Hais txog Phus Thas los Npus Das.

Phus Thas nws tsis yog ib tug Tswv Ntuj zoo li Yes Xus. Nws kuj tsis yog Tswv Ntuj tus tub thiab.
Phus Thas yog ib leej tib neeg sib xws li ne nyuam neeg ntiaj teb.
Tab sis yog Tswv Ntuj tau txib Phus Thas xa ib co lus tuaj rau Yaj Ceeb neeg coj:
Yog kev hwm Ntuj, hwm.neeg, hwm tsiaj txhu xyoob ntoo, txhua yam Ntuj tau tsim los.
Phus Thas tsis nyiam kev nplua nuj nws kuj tsis nyiam kev pluag dhau nws nyob rau qhov muaj mov txaus noj txwm hnub.

Phus Thas muaj lub npe yog Huab Tais mas los ntawm nws cov thwj tim tau hu ua Huab Tais:
Yog thaum Phus Thas tuag ces nws cov thwj tim hais tias peb tus Huab Tais tuag lawm.

Thaum Phus Thas tuag tas lawd ces nws cov thwj Tim tuav txoj kev ntseeg no tseg, thiab coj los mus txog niaj hnub no.

Tej yam puav pheej tawm ntawm Phus Thas cov hwj huam los mas txawv Yes Xus cov hwj huam lawm ntau:
Phus Thas cov Hwj huam Kuv tsis paub zoo. Hais raws li neeg ntseeg xwb.
Nws yog cov Pov Haum:
Xws li pov haum Zaj, Pov Haum Nab. Pov haum Roob Ris. Pov Haum Laum Kiav Tshooj. Tus Phab Lev Lais. Pov Khoos Phom tua tsis to, cov pov haum no yog pov zeb uas yus pom nyob ze tus tsiaj ntawd los ntawm ib thaj chaw tus tsiaj ntawd nyob.

Hos Yes Xus cov Hwj Huam thiab puav pheej, mas yog thaiv dab phem kom neeg tso siab rau Tswv Ntuj, ces dab tsis los zes neeg. Tsuas muaj ua kom dab txhob ntxias neeg ua dab hauj lwm, thiab tsis pub kom dab yuam tau neej xwb.

Phus Thas nws tsis tau hais tias nws yog Huab Tais. Phus Thas nws yog ntiaj teb neeg ib tug me nyuam xws li zeej tsoom sawv daws. Tiam sis Phus Thas yog ib tug neeg muaj lub siab dawb tsis muab hlob. Nws tus ntsuj plig kuj nyob ze Tswv Ntuj. Nws tau txais txoj kev tuag vim nws siab ncaj, luag tau ntshai tsam nws tau ua ib tug tuam vaj loj kav tas cov vaj muaj koob meej ces luag siv tshuaj kuab lom los txo nws txoj sia kom nws tau tas sim neej mus.

Thaum peb hnov txog Siv Yis thiab Phus Thas nkawd, mas peb kuj yuav nco tias kuv ne! kuv pus yuav ncaj li nkawd thib ces yus thiaj rov tswj tau yus thiab xwb.

Hos cov zoo li Hmoob hais tias, Nkauj Iab Nraug Oo. Nkauj Ntsuab Nraug Nab, Yaj Yuam, Tswb Tshoj, Hauv Haiv Hmoob Liv Xwm uas muaj Yaj Txiv Yawg, Vwj Paj Yig Tuam Nqaj Kab,Huab Tais Vam Khib, Yawg Paj Cai, Lauj Kiab Toom. Phas Nyas Tub Npis Lis Foom Lwj Txheeb Vaj Pov, cov no yog thawj neeg coj Hmoob tseem tsis tau nce mus ua ib tug Huab Tais zoo Teev hawm. Lawv yog peb cov poj koob yawm txwv muaj koob nto moo hauv Haiv Hmoob.

Kawm Txog Siv Yis thiab Phus Thas nkawd tej kev cai mas xws li kuj yog neeg ncaj ncees.
Yog tias yog yus no ntshai yus tseem yuav nrog Tswv Ntuj sib tw sib txeeb saib yus puas tau ua tus loj dua Tswv Ntuj thiab.
Kev nrog Tswv Ntuj sib tw mas Tswv Ntuj yuav cia yus ua tus yeej txhua zaus xwb. Vim tias yus tsuas kawg muaj qhov kev muab hlob xwb dhau ntawd yus tsus muaj dab tsi tas nrho li lawm. Ces yus kev muab hlob coj yus mus poob qhov ntuj tas ces tsis muaj neeg pom thiab paub yus lub npe ntxiv li lawm.

3- Yes Xus mas nws txawv deb dua cov npe hais los lawd saum no ntau. Nws Txawv tshaj Txhua yam Muaj tuaj nyob saum ntuj thiab nyob ntiaj teb no huv si lawm.
Vim tias Yes Xus ib txhij yog Tswv Ntuj uas nrog Leej Txiv tsim lub ntuj lub teb. Txhua yam txawj ua zog los tsis txawj puav leej yog nws tsim los.

Yes Xus tshwm sim tuaj yuav lub cev neeg vim tias, Yes Xus yog Leej Txiv lo lus thiab Leej Txiv Tswv Ntuj tus duab nws thiaj Tuaj yuav lub cev neeg. Kom tau cev Leej Txiv lo lus thiab nws tus duab rau ntiaj teb neeg paub, kom neeg ntseeg tau paub thiab tau hnov. Yes Xus nws tau hais tias Kuv yog Vaj, Kuv tuaj nyob Yaj ceeb no kom tau zeem tseeb txog txoj kev tseem ceeb. Thiab nws tuag mus tub tuag teb, nws sawv rov los. Nws tsis rov tuag dua lawm.

Nws txawv dua li Siv Yis thiab Phus Thas nkawd, uas tuag mus ces tsis sawv rov los. Leej Txiv lub hwj chim nrog Leej Tub uas yog Leej Txiv lo lus nyob ua kev kom xeeb muaj Leej Tswv Yim Ntshiab tau tuaj ua hauj lwm nyob txawm hauv Txhua tus Leej neeg nruab siab.
Ces lub Koom Txoos Ka Tau Liv thiaj hais tias: Leej Txiv, Leej Tub, thiab Leej Tswv Yim Ntshiab, yog tib tug Huab Tais, Lawv ua peb leeg.

Leej Txiv yog lub Hwj Chim Hwj Huam tsim lub Ntuj lub Teb. Leej Tub yog Leej Txiv lo lus tuaj yuav lub cev neeg. Leeb Tswv Yim Ntshiab yog lub Hwj Chim Tuaj nplij neeg yaj ceeb. Kom neeg ntiaj teb hloov siab tig los yuav lub siab tshiab kom yeej Dab kev haub kev ntxias.

Lus Xaus.
-Kuv sau zaj no vim nyob Yaj ceeb no neeg ntiaj teb muaj kev sib thaum ntau dhau lawm.

a-Tus thuam ib tug neeg los thuam tej pab neeg, nws zoo li yog ib tug neeg dag hla Ntuj lus ntau heev. Nws yeej hla tas nrho Tswv Ntuj 10 lo lus qhia tib si lawm. Vim tus neeg los pab neeg yus thuam ntawd lawv yog Ntuj me nyuam, cov lus lawv hais tsam yog Leej Tswv Yim Ntshiab kheev lawv hais tawm los.
Yog nws xav khav theeb dag los cia nws dag nws, Tsis yog dag koj, yog dag rau Ntuj xwb.
Tsis txaus uas yus yuav khib tas npaum ntawd.
Yus rau siab ntso THUAM ces cuag li yus txhob txwm dag rau Ntuj lawm.


b-Thaum Yus THUAM ib tug neeg txaus nkaus lawd
Cuag li yus sawv nws caw los DAG rau lub ntiaj teb neeg tau hnov.
c-Thaum yus thuam neeg ces yus tau thuam Ntuj tib yam lawm. Zoo li yus rov dag rau yus tias yus yog ib tug neeg tsis muaj nqi lawm vim tsis tseeb los yus tsis txawj txhais yus tau hais tias tseeb lawm rau Ntuj hnov. Thiab thiab nyob hauv yus muaj ib qho kev ntxhub tus yus thuam ntawd. Ces ua rau luag lwm cov neeg ntseeg yuam kev.
Tus neeg nyiam thuam lwm tus mas nws y 4td
og ib tug neeg pheej yig heev rau Dab phem ntxias. Dab zij ncaug xwb dab twb ntxias tau nws kiag lawm.