Ntuj yav pem suab, thaum ub muaj ib zaj dab neeg qub qub hais tias:
Zaj dab neeg no ua rau cov txiv neej Hmoob raug xwv txheej ob ntus loj kawg.
Lub zim txwv Hmoob swb rog rau Suav lawd.Huab Tais Suav tsa cov poj niam Hmoob ua nom. Kom cov txiv neej tau poob tsim mus.
Lub zim txwv ntawd,Cov poj niam sawv ua nom tswj ntug. Lawv tswj cov txiv neej.
Poj niam muaj kev cib nyeej, thiab khib siab tias, cov txiv neej muaj siab ntau, siab coob nyiam ntau tus poj niam hwv. Ces cov poj niam nom cob qhia tas ib tsoom poj niam. Kom muab lawv cov txiv zoo nraug tua pov tseg. Ib hmoos mam hu ib tug txiv neej tuaj ua yus luag pw xwb.
Zaum no, cov txiv neej tuag yuav tas tiag. Tshuav tsawg tsawg lawm xwb. Ces cov poj niam ho sib txeeb cov txiv neej. Ces poj niam rov muab cov txiv neej tua ib zaug ntxiv thiab. Nws los khib lawv los khib, sawv daws muab tua, kom koj los tsis tau nws los tsis tau txiv neej. Cov poj niam ntawd lawv sawv daws sib khib loj heev. Pom tsis tau ib tug txiv neej li, pom xwb ces twb muab tua lawm.
Txiv neej Hmoob muaj hmoo:
Muaj ib tug ntxhais poj ruam zais tau ib tug txiv neej cia rau hauv ib lub qhov tsua. Niaj hnub nws nyiag ua mov xa mus rau noj. Nyob nyob ces tus poj ruam no txawm xeeb tub.Nws yug tau ib tug tub, nws coj tus tub ntawd los.
Ces tas nrho cov poj niam ntawd muab tus tub ntawd hlais ib leeg ib daim luaj li lub taub teg coj mus ua thuaj muaj tub. Sawv daws coj mus ntshaws rau hauv lub qhov xeeb tub, cia cia lwj tas xeeb tsis tau tub.
Ces tas tsoom poj niam sawv daws tuaj ua tsiv ua nyaum rau poj ruam, kom nws qhia saib ua cas nws thiaj xeeb tub tau. Ces poj ruam mam qhia tias nws zais tau ib tug txiv neej rau hauv ib lub qhov tsua. Tas nrho tsom noj niam mus qhib lub qhov tsua, thiab coj tus txiv neej no los txog.
Lawv tsim ib txoj cai, cia ua ib lub tsev siab siab, loj dua lub tsev yug nquab. Tuam ib tug ntaiv rau. Cov poj niam yog leej twg coj khaub ncaus tsim nyog xeeb tub tau mas mam pub nce tus ntaiv no mus cuag tus txiv neej ntawd ib zaug kom tau xeeb tub xwb.
Tus poj niam twg coj khaub ncaws lawm mas yuav ntoo phuam tis paj liab rau kom sawv daws paub, nws thiaj muaj cai nce mus ntsib tus txiv neej ntawd.
Txij thaum ntawd los cov poj niam hluas uas tseem yuav xeeb tub tau mas thiaj ntoo phuam tis paj liab. Thiab cov ntxhais hlob tiav nkauj ze lub caij coj khaub ncaws mam ntoo phuam liab tau. Cov me nyuam ntxhais thiab cov pog laus tsis muaj noob qe me nyuam lawm mas ntoo phuam dub xwb.
Txiv neej poob tsim zaum ob yog:
Lub zim txwv ntawd, poj niam tswj ntug. Poj niam saib txiv neej tsis rau nqi. Nws tseem nco ntsoov tias txiv neej siab coob. Poj niam tau qhib lo lus tias txiv neej yog txiv dev.
Tom qab no Huab Tais rov pub hwj chim rau txiv neej ua tus tswj ntug.
Ces Huab Tais hu cov poj niam thiab cov txiv neej mus ua nws cov kab xwm ua ke. Huab Tais yuav sim sawv daws siab. Nws hais rau cov txiv neej tias:
Tag kis nej cov txiv neej tuaj mas nej nqa nej cov poj niam lub taub hau tuaj rau kuv. Kuv yuav tsa nej ua huab tais nrog kuv ua kab xwm txuas ntxiv mus. Cov txiv neej rov los, ib hmos lawv tua tsis tau lawv cov poj niam li.
Tag kis los lawv mus tes dawb tes npliag tsis muaj ib tug yuav nqa tau nws poj niam lub taub hau mus rau Huab Tais. Ces Huab Tais rov sim cov poj nbiam siab tias:
Tag kis nej tuaj mas nej nqa nej cov txiv lub tau hau tuaj rau kuv. Ces kuv yuav cia Huab Tais rau nej ua.
Mus ib hmos, kaj ntug los cov poj niam tuaj lawv ib leeg nqa ib lub taub hau tuaj yog lawv cov txiv li taub hau.
Ces Huab Tais thiaj foom tseg tias:
Txij no mus mas cov txiv neej siab dawb dua,Txij no lawm yav tod mas cia txiv neej los tswj ntug, Txiv neej muaj cai hu poj niam ua Maum Dev no mus. Txij li thaum Haiv Hmoob khiav Tuam Tshoj los rau Xov Tshoj teb no mas kuv yeej hnov cov txiv neej cem lawv tej poj niam tsis tsheej haj tias niag Maum Dev no.
Vim muaj zaj lus hais ua ntej saum no mas thiaj li muaj ib toom dab neeg hais txog tus txiv dev zov Huab Tais qhov rooj.
Nyob nyob txawm muaj ib tug txiv neej Hmoob nws muaj zoo txuj ci. Ces nws mus ua tus zov Huab Tais lub qhov rooj. Muaj ib hnub Huab Tais txawm seev tias, ab yog muaj leej twg mus muab Huab Tais tus yeeb ncuab no tua tau kom tuag mas Huab Tais yuav muab nws tus ntxhais ntxawm rau yuav ua poj niam. Thiab yuav tu ib ntsug teb rau nws kav.
Ces tus txiv dev zov lub rooj loog ntawd hnov. Nws khiav mus muab Huab Tais tus yeeb ncuab tua tuag txiav lub taub hau nqa los rau Huab Tais. Ces Huab Tais tau muab nws tus ntxhais ntxawm thiab ib ntsug teb rau nws tus vauv txiv dev nyob. Huab Tais tu ib tsuj teb nyob pem hauv sab rau nkawd kom nkawd mus nyob deb deb Huab Tais, vim tias Huab Tais ntxhais tau mus yuav ib tug txiv dev. Txij tiam ntawd los Hmoob thiaj nyiam nyob rau pem hauv sab ntau thiaj tsis muaj txiab xeeb hlob.
Nyoj hauv phau ntawv Haiv Hmoob liv xwm kuj muaj ib qib hais txog tus txiv dev zov Huab Tais lub qhov rooj. Kuj muaj tej txoj dab neeg hais tias Hmoob thiab Cos koom ib caj hlav ib ces ncau los ua ke thiab. Yog lub zim txwv ntawd los.
Lub zim txwv Hmoob txav pem niam dej dag los rau sab Kim Tsawb teb ze npuas rau ntug hiav txwv qab teb sab toob fab.
Suav thiab Hmoob muaj caub chim loj heev ua rau Hmoob nyob tsis taus rau Suav Teb. Cov noob Nom Tswv thiaj pheej nrhiav kev tawm mus kom deb Suav li deb tau. Ua los mus Hmoob thiaj hu Suav teb ua TuamTshoj.Cov teb chaws nyob sib npus ciam uas tsis yog Suab teb Hmoob hu ua Xov Tshoj teb no.
Tiam no muaj tej yam tsis zoo rau Hmoob kuj yog tawm ntawm Hmoob los:
Xws li, Hmoob muaj txheej siab thiab txheej qis. Mua Siv Thawj. Lwm Thawj, hais tau tias muaj cov hlob los cov yau.
Hmoob yeej ib txwm muaj zoo txuj. Ntau zaus yog cov lwm thawj muab cov Siv thawj tej koob meej hwj chim muag rau Suav ces Hmoob ua rau Hmoob swb rog.
Ces Suav thiaj muab Hmoob cuab khi. Lub zim txwv ntawd tsis muaj tsev loj cuj. Kuj tsis muaj zaub mov yug ces thiaj muab kauj hlau los xauv caj dab los xauv kav taw. Zoo li cov coj xauv no yog cov raug txim.
Cov raug txim los yuav tau mus ua qhev los nyias ua nyias noj nyias.
Qhov tseeb ces kom paub tias coj xauv ces yog pab raug txim.
Cov Xauv no los ntau tiam tom qab no ces tab txawm yaig tu lawm los ntsia zoo li tsis zoo saib, pheej zoo li nqia nqia dab. Kuj muaj qhov hais tias muab los hloov ua xauv dab. Kom dab paub tias tus me nyuam no yog neej me nyuam lawm. Dab tsis muaj cai los kov. Ces Hmoob hu lub xauv caj dab ua lub xauv pov siav. Lub xauv kav taw hu ua xauv dab Cim tseg tias yog neej me nyuam, yog neej tug dab kov tsis tau.
Tiam no yog xauv nyiaj xauv kub cia rau kev zoo nkauj zoo nraug lawm xwb tsis yog ib qhov txawv li cas lawm. Vim muaj zaj dab neeg no Hmoob thiaj yog haiv neeg zoo nkauj zoo nraug dua cov. Coj npauj kub npauj nyiag ci hob xwb.
Txij li thaum Haiv Hmoob khiav Tuam Tshoj los rau Xov Thsoj teb los, mas nyob Suav teb muaj ob pab Hmoob ib pab yog Hmoob Nyoos. Hos ib poab yog Hmoob Siav.
Cov Hmoob Nyoos yog cov hais lus hmoob coj kab li kev cai li Hmoob. Hnav tsoos tsho hmoob.
Cov Hmoob Siav, lawv yog cov hais lus Suav hnav tsoos tsho xws li Suav tas lawd, sis lawv keeb kwm yog Hmoob thiab kev xav txhua yam.