Yes Xus lub Cev ua hwj huam yees ntxwv nyob Lanciano, Italy

Yes Xus lub Cev ua hwj huam yees ntxwv nyob Lanciano, Italy

Lub zos "Lanciano" yog ib lub zos me me nyob rau phab Laj fab Italy, nrug ntawm Tuam Ceeb Los mas li 120km. lo lus Lanciano txhais tias "rab hmuv". Vim muaj kwv huam piav txog zoo li no tias:

"Tus peeb zeej uas tau muab rab hmuv nkaug Huab Tais yes Xus hauv siab thaum nws twb tuag nyob saum Ntoo Cuam lawd, mas nws hu ua "Longimus". Nws yog ib tug pej xeem nyob hauv lub zos Lanciano nov. Nws raug mus ua peeb zeej rau Yes Lus xas Les, thaum lawv muab Huab Tais Yes Xus ntsia nyob saum lub roob "Nkos Nkos Tas" mas yawg Longinus yog ib tug peeb zeej uas nws pom ntsoov zaj no. Tom qab nws mam tig los ntseeg txog Huab tais Yes Xus. Thiab qhov kawg, nws tau tuag ua Huab tais Yes Xus ib tug Tim khawv thiab.

Kwv huam piav ntxiv tias:

Kwv yees xyoo 800 A.D.(Tom qab Yes Xus yug), nyob rau lub zos Lanciano muaj ib tug Leej Choj ua xyem xyav tias:
"Xyov cov ncuav mov thiab cov cawv puas yuav txia tau los ua Huab tais Yes Xus Lub Cev thiab Cov Ntshav tiag."
Muaj ib hnub nws tab tom coj ib co neeg ntseeg nrog nws ua lub thaj Txiv Ntuj. Thaum nws tab tom foom hmoov zoo rau cov ncuav mov thiab cov cawv kom txia ua Huab tais Yes Xus lub Cev thiab cov Ntshav, mas tam sim ntawd lub ncuav mov cia li txia ntshis ua ib daig nqaij nyias nyias; hos cov cawv cia li txia ntshis ua ib cov ntshav. Tam sim ntawd nws poob siab nthav thiab tshee na. Nws hu cov neeg uas tuaj nrog nws koom ua thaj txi Ntuj ntawd los nrog nws saib, nws pom qhov Hwj Huam Yees Ntxwv ntawd. Thaum lawv sawv daws pom zoo li ntawd, ua rau lawv hab tag, lawv thiaj txhos caug thov txim Tswv Ntuj thiab ho ua Tswv Ntuj tsaug vim Tswv Ntuj tau puv kom muaj zaj hwj huam yees ntxwv nov los pab lawv kom lawv txawj ntseeg txog Tswv ntuj zoo dua tuaj. Lub moo ntawd nrov mus thoob teb chaws tias: "Zaj no yog ib zaj hwj huam yees ntxwv tiag". Sawv daws tau muab qhov nqaij thiab qhov cawv khaws cia zoo. Tam sim ntawd lub Koom Txoos Kas Tos Liv tau tshaj thiab zeem tseeb tias yog ib qho hw huam yees ntxwv tiag.




Li ntawd, xyoo 1713A.D., lawv thiaj tau muab cov ntshav los ntim rau ib lub khob lam hwj cia thiab muab daim nqaij los ntim rau hauv qhv chaw khaws lub Cim Yug rau ib tsoom neeg mus hawm.

Xyoo 1970 txog rau xyoo 1981 A.D., lub Koom Txoos Catholic tau tso cai rau cov kws txawj ntse muaj tshuaj ntsuas seb zaj no puas yog ib zag tseeb zoo li cas tiag. Muaj ob peb tug Kws txawj ntse nyob Italy teb kuj tau mus nrog lawv tshuaj ntsuas. Tus ib yog Yawg "Prof. Odoardo Linoli", tus ob yog Yawg Prof. Ruggero Bertelli". Ob tug Kws Txuj no yog nyob rau hauv fab kam kev txawj ntse "Anatomy, Histology thiab Chemistry, Clinical microscopy." Qhoc kawg lub ntsiab thiaj tawm los muaj 5 nqes li nram no:

1-Daim nqaij nyias nyias thiab cov ntshav yog nqaij thib yog ntshav tiag: Yog nqaij thiab ntshav los ntawm ib tug txiv neej los.
2- Cov nqaij thiab cov ntshav no yog tib co xwb. Yog hom nqaij thiab ntshav AB. (Hais txog qhov nov mas xav piav me ntsis ntxiv li no thiab: lub Koom Haum "NASA: Mes Kas tau mus tshuaj xyuas txog "daim ntaub" uas sawv daws ntseeg hais tias yog daim ntaub uas tau qhwv Huab tais Yes Xus lub cev thaum muab nws zwm ntxa (Saint Suaire de Turin), mas kuj pom tau tias cov ntshav uas lo rau ntawm daim ntaub ntawd kuj yog ntshav AB tib yam).

3- Daim nqaij nyias nyias ntawd yog cov nqaij ntshiv uas nyob hauv neeg lub plawv sab laug (Myocadium).
4- Cov ntshav tau khov los ua 5 thooj ntawd mas nyhav tib yam nkaus li thiab nws tseem yog ib cov ntshav ciaj,zoo li nyuam qhuav tso tawm kiag ntawm ib tug neeg ciaj sia hnub ntawd los kiag. Yam li nws tseem muaj "Protein, phosphorus, calcium, magnesium, sodium, potassium. Tej no tseem ciaj tib si. (Thov nthuav me ntsis ntxiv li no kom meej, yam li ib tug neeg nws cov ntshav tawm ntawm nws lub cev mus rau sab nraud lawm mas tsis dhau ntawm 30 fiab xwb ces nws cov protein, thc...yuav tuag tas lawm).
5- Tsis pom muaj tshuaj "Chemistry" dab tsi li nyob rau ntawm daim nqaij nyias nyias thiab cov ntshav ntawd li. Tab sis ob yam khoom no tseem nyob tau ntev txog 1311 xyoo ...Thiab tseem yuav nyob ntxiv mus...

Qhov nov txhais tau tias Huab tais Yes Xus, nws yeej sawv rov los muaj txoj sia tiag.

Niaj hnub no, nyob rau lub nroog Lanciano, Italy teb no, yog ib qhov chaw rau ib tsoom neeg ntseeg mus nrhiav koob hmoov thiab mus hawm huab tais Yes Xus cov hwj huam yees ntxwv: Cov Mov thiab Cawv.

Tus sau: XH. Txoos Yej
Tsev hauv paus tshaj Ntuj Lus tseej Maim, Thaib teb.
Xov Xwm Tsim Neej tshiab
USA. Tsab 3 xyoo 1995