HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


LUB KOOM HAUM KAS TOS LIV. Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


    LUB KOOM HAUM KAS TOS LIV.

    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    LUB KOOM HAUM KAS TOS LIV. Empty LUB KOOM HAUM KAS TOS LIV.

    Post  Maiv Tooj 15th April 2019, 7:08 am


    Zaj 392- LUB KOOM HAUM KAS TOS LIV.


    LUB KOOM HAUM KAS TOS LIV. Vatica11

    Lub Koom Haum Ka Tau Liv no, tus tswj kav tas nrho txhua Haiv neeg ntawm txhua lub teb chaws. ntseeg txog Yes Xus lub npe. Hu ua Ka Tau Liv.  Yog tus Vaj Qhia nyob Los Mas Italia teb (Rome).

    1.Lo lus Ka Tau Liv no, yog hais tias:  Tswv Ntuj lub Koom Txoos cia rau tas nrho ntiaj teb neeg. Nyob hauv lub Koom Txoos ka Tau Liv, tsuas muaj tib tug yog tus tswj kav.
    Nws yog tus Vaj Qhia nyob Los Mas. {Rom} Tas ntiaj teb, Zoo li Mes Kuj, Fuaj Kuj, Suav Nyab Laj, Los Tsuas los Thaib… Txhua lub teb chaws thoob plaws, uas muaj neeg ntseeg nyob.  
    Tas sawv daws nyob hauv qab tswj hwm, ntawm tus Vaj Qhia, nyob rau Los Mas.  Yog lub Koom Haum Ka Tau Liv.

    2. Nyob hauv lub Koom Haum Ka Tau Liv,muaj Vaj Qhia yog tus nyob siab, tswj kav tas nrho txhua Haiv neeg ntseeg. Tus Vaj Qhia yog tus hloov Leej Ntshiab Pob Zeb, uas yog tus Yes Xus muab lub npe rau hu ua Pob Zeb rau Xis Moos kom hu ua Pob Zeb nws.
    Yes Xus tau hais Xis Moos tias:  Kuv tsa koj ua lub Pob Zeb, Dab Phem cov roog loog yuav tsis yeej lub Pob Zeb no. Tas nrho tsoom Vaj Qhia lawv hloov Pob Zeb ib tug zuj zus los txog ntua lub zwj ceeb no.
    Tas nrho tsoom neeg ntseeg ka Tau Liv zwm rau tib tug Vaj Qhia no, nyob Los Mas, Italia teb.

    3. Lub Koom Txoos Ka Tau Liv, muaj Vaj Qhia yog tus nyob siab hloov Yes Xus lub meej Mom Hwj chim nyob ntiaj teb no.
    Dhau ntawm tus Vaj Qhia no lawm. Muaj cov Tswv qhia Liab uas peb hu ua Vaj Qhai cov Tiam Lis.  Cov teb chaws loj thiab dav, mas tsa muaj ib ob tug li ntawd. Hos cov teb chaws nqaim zoo li Thaib Los Tsuas  nyob Laj los Khas Npaus Dias mas, lawv kuj tsa muaj li ib tug los saib xyuas tas ob los peb lub teb chaws.
    Tej lub teb chaws dav li Mes Kuj teb, kuj tsa muaj li ob tug Tiam Lis Vaj qhia, los saib xyuas. Vim teb chaws dav thiab muaj neeg ntseeg coob.
    Dhau cov Tiam lis no, lub Koom Txoos Ka Tau Liv, lawv kuj Tsa muaj cov Tswv Qhia los saib cov leej Choj uas peb hu ua Txiv Plig thiab cov neeg ntseeg.
    Cov teb chaws nqaim li Los Tsuas teb kuj tsa muaj li ob tug Tswv qhia. Saib nyob ntawm tej lub teb chaws muaj neeg coob los tsawg. Cov teb chaws muaj ntau lub nroog loj thiab muaj neeg ntseeg coob.
    Mas lub Koom Txoos kuj tsa muaj ib tug Tswv Qhia nyob rau ib lub nroog. Vim muaj neeg ntseeg coob thiab muaj tsoom Leej choj los tsoom tub Tsob Hwb  thiab cov neeg ntseeg coob txog li ntawm txhiab tus neeg ntseeg.

    4. Cov Tswv Qhia nws kav thiab saib xyuas cov Txiv Plig cov leej Tsob Hwb thiab cov neeg ntseeg sawv daws. Muaj neeg coob ces cov Tswv Qhias no, lawv tsa muaj ib pab Txiv Plig hu ua Leej Choj los pab nws saib tsoom neeg ntseeg.
    Tus Tswv qhia nws mam tsa ib pab Leej Tsob Hwb muaj poj niam tub se los tuav hauj lwm.  Qhia kev ntseeg, pab saib xyuas cov ntseeg, kom muaj tus qhia kev ntseeg rau tej pab neeg los ntseeg tshiab.
    Los mus xyuas cov neeg txom nyem, muaj mob muaj nkeeg, nyob tsev kho mob.  Los nyob tim lawv tej vaj tse, xyuas kev cob qhia tej tub ntxhais thaum yuav sib sau los ua txij nkawm rau lawv lub neej.
    Qhia lub Koom Txoos tej kab lis kev cai raws li Tswv Ntuj txoj cai, kom ua raws li Tswv Ntuj 10 lo lus qhia.  Thiab kom tsoom neeg ntseeg ua lub neej nyob ze Tswv Ntuj kev nyiam kev hlub.
    Hu ua pab neeg ntseeg ntuj nyob hauv lub Koom Txoos Ka Tau Liv mas txawm yog ntau haiv neeg, los sawv daws nyob hauv tus cai qab tswj hwm ntawm Vaj qhia tas nrho.
    Vim tias peb sawv daws nyob ua ib cuab ib yim nyob hauv Tswv Ntuj tsev neeg. Mas cov neeg ntseeg, los rau cov Txiv Leej Choj thiab cov tub Tsob Hwb, mas peb yuav sib hwm, sib raug zoo nyob ua ke.
    Thaum peb pom ib tug txiv Leej choj, los ib tug Leej Tsob Hwb.  Mas peb yuav saib nws zoo li yog peb ib leej txiv, los ib Leej Tub.  Los nws yog kiag peb ib leej tij los ib leej kwv kiag.
    Peb yuav hlub nws, pov hwm nws.  Pom nws ua yam tsis zoo nkauj los tsis yog, peb yuav hlub nws pab qhia kev kom nws tawm hauv kev ua txhaum mus.
    Yog peb tso nws pov tseg, mas nws yuav tuag nyob hauv kev ua txhaum mus.  peb kuj yuav nrog nws ris kev muaj txhaum, vim peb tsis kam cawm nws kom dim rov los ua neeg zoo.

    5. Peb yuav paub thiab ceev faj tej yam no:  Peb yuav tsum paub:  Kev pov hwm thiab cawm peb cov txiv Leej Choj thiab peb cov Leej Tsob Hwb:
    Cov Txiv Leej Choj thiab cov Leej Tsob Hwb, mas lawv coj ib lub neej ua thawj neeg, mas cov dab phem caum lawv heev kawg nkaus li, kom lawv ua neeg coj tau tej pab neeg yuam kev kom muaj neeg mus poob qhov ntuj mus lawm tsheej pab.
    Nej txhob xav tias, ua cas Hwb Hwb pheej hais tej yam zoo li ntawd, twb rhiab peb pob ntseg tas lawm. Yeej muaj tseeb li hais no, mas thiaj hais kom peb txawj sib pab nyob ruaj rau txoj kev sib koom ua Tswv Ntuj me nyuam.

    6. Muaj ob yam no, mas yeej tsis zoo kiag li:
    A.Yog nej qhuas tus Xib Hwb heev dhau lawm, ces cuag li nej nrog dab phem koom siab, koom tswv yim ua ke.  Kom tau muab tus tub Tsob hwb muag rau dab tau yooj yim heev thiab sai kawg!

    B. Yog nej muab tus Leej Tsob Hwb no thuam heev dhau lawm,ua rau nws qaug zog mus lawm. Nej kuj tau mus pab dab phem  muas tau tus Leej Tsob Hwb los tus Txiv Leej Choj choj no, kom swb mus rau dab, yog qhov nej ua kom nws qaug zog mus.
    Kom nws muaj kev tu siab tias:  Ua cas Ntuj yuav tsis pab nws, cia nws raug neeg thuam thiab tsawm nws tas npaum no.  Ces nws qaug zog, nws cia li ncaim ntawm Tswv Ntuj mus yam tu siab nrho, tsis nco txog tias, tswv Ntuj muaj zoo txiaj ntsim txuj ci yuav pab tau nws li.
    Nws cia li ua ib tug neeg tsis muaj kev ntseeg nyob koom nrog Tswv Ntuj txoj sia, nws lam tau lam mus ntseeg dab kauj tsaim tej lus hais tsis muaj tseeb.  
    Nrov tawm ntawm neeg tej qhov ncquj los,ces nws tas kev cia siab rau nws kev ua neeg ruam.  Fim tsis tau tau Leej Tswv Yim Ntshiab, lub Tswv Yim thoob tsib coj ua neeg muaj lub siab loj siab tawv siab kub tiv kev txom nyem.

    7. Nco  ntsoov tias, peb sawv daws yog Tswv Ntuj cuab yim neeg yim neeg!  Txhua tus neeg ntseeg Yog Yes Xus, tas nrho txiv neej poj niam tub ntxhais hluas. Sawv daws yog Yes Xus Thwj Tim tas nrho.
    Peb yuav nco txog thaum Yes Xus hais, kom Pob Zeb tsav nws lub nkoj mus rau qhov dej tob me ntsis.  Ces Nws qhia kom lawv tso cov puav ntses nqes lawm hauv dej.
    Ces lub puav tau ntses ntau kawg, ua lub puav ntses ntuag kiag.  Lawv thiaj hu lwm lub nkoj tuaj pab, tej no, twb yog tej lus ua paj lug hais tias:   Kom sawv daws sib pab. Yog tsis pab ces, thaum lub puav ntses ntuag lawd.
    Mas ntses yuav dim tas tib si, tsis tau ib tug ntses li.  Cov neeg tuaj pab ces yog cov neeg ntseeg uas lawv tau pov hwm cov Leej Tsob Hwb thiab cov txiv Leej Choj ntag.
    Thaum lawv coj cov ntses los thau tim ntug dej, muaj cov ntses loj. Cov ntses phem ntses zoo los muaj.  Cov ntses ntawd, yog peb sawv daws ntag.

    8. Lub Koom Txoos Ka Tau Liv kawg muaj tib tug yog tus tswj thiab kav sawv daws:  Yog Tus peb hu ua Vaj Qhia no, tus Vaj Qhia sab cev nqaij yog tus hloov Pob Zeb uas Thaud Yes Xus tau tsa los hloov Yes Xus nyob ntiaj teb no.
    Txij li Vaj qhia, cov Tiam Lis, yog= Cov {Cadinal} Thiab cov Tswv Qhia, yog cov hloov tus zoo Tswv zov Yaj chaw saib  Yes Xus pab Yaj.  Hos los rau cov Txiv Leej Choj thiab cov Leej Tsob Hwb no.  
    Lawv yog Yes Xus pab Thwj Tim.  Tuaj yeem mus ua cov tub puav ntses thiab pab Tub zov Yaj.  Pawg ntseeg tib si ua ke yog lub Koom Txoos Ka Tau Liv, cia rau lub ntiaj teb no ntag.

    9. Cov ncaim uas hu ua cov Protestant Lawv yog cov neeg ntseeg txog Yes Xus lub npe ib yam li peb
    Lawv muaj lub npe hu ua cov ncaim vim lawv tsis nyob ua ke hauv ib lub Koom txoos. Thiab tsis muaj tus hu ua Vaj Qhia no.
    Lawv yeej tuaj yeem yuav lub npe hu ua pab ncaim,  Thaum lub hauv paus lawv  ncaim mus, mas tsuas muaj Lws Tes yog tus coj ib pab ncaim mus xwb.
    Cov ncaim ntawm Lws Tes mus, mas nyem no, twb muaj  yuav ze tshaj li 300 puas pab sib ncaim lawm. Sawv Daws siv Tswv Ntuj cov lus thiab Yes Xus cov lus uas ntiaj teb hu ua Phau ntawv ntshiab. Bible tib yam. Tab sis nyias muaj nyias kev coj siab, tej cai sib txawv me ntsis.
    Tswv Ntuj thiab Yes Xus Pleev kuj tsis thuam lawv, vim lawv coj Tswv Ntuj cov lus.  Yes Xus yeej paub tias, lub ntiaj teb neeg yuav coj li ntawd!

    10: Lub caij Yes Xus  tuaj nyob, Nws tsos cov Thwj Tim mus tshaj  Ntuj lus ob leeg ua ke mus ncig zej zog. Yes Xus cov Thwj Tim pom muaj ib tug neeg tsis nrog lawv thiab tsis yog lawv pab.
    Nws tuav txog Yes Xus lub npe los ntiab cov dab phem. Lawv qhia rau Yus Xus tias:
    Muaj ib tug neeg tsis yog peb pab, tuav Koj lub npe los ntiab dab. Peb xav twv nws, vim nws tsis yog peb pab neeg.  Yes Xus hais rau nws cov Thwj Tim tias, nej txhob txwv nws.
    Tsuav yog nws tsis hais kuv lub npe phem mas nws kuj yog peb tog thiab.   Cov neeg npaj sib ncaim Tswv Ntuj yeej paub tias yuav muaj ntau pab li no.

    11. Cov neeg ntseeg txog Yes Xus lub npe qhov yuav tawg paj zoo nkauj los yuav txi txiv ncw thiab qoos zoo.  Yog cov neeg ntseeg, cov pab neeeg ncaim, mas cov pej xeem lawv tsuas paub ntseeg thiab tso siab rau Ntuj xwb.  Lub paj tshiab yuav tawg tau tshiab zoo nkauj  yog nyob hauv cov neeg ntseeg ntawd.
    Hos ntawm cov Xib Hwb ua thawj coj tej pab pawg, mas peb tsis paub leej twg yog tus ntshiab huv. Tsuas yog Yes Xus thiab tus uas Yes Xus qhia peb hu nws ua Leej Txiv no thiaj paub zoo.
    Mas peb yuav yoog raws li Yes Xus qhia tias, Peb muaj Yes Xus ua peb tus cawm seej. Peb muaj Tswv Ntuj ua peb Leej Txiv. Peb muaj Yes Xus Leej Niam ua Poj Huab Tais hlub peb.
    Peb tsuas thov kom peb tau nyob ruaj, ua Tswv Ntuj Yim Neeg  ntshiab.  Peb yuav txhob sib thuam thiab ntxub Leej twg li.
    Lub caij kawg peb yuav nyob ua ke hauv Tswv Ntuj lub tsev nyob ua kwv ua tij koom ib cuab ib yig.

    12. Cov Thwj Tim tseeb thiab Thwm Tim cuav mas peb mam paub thaum lub paj tawg los lub txiv txi peb mam paub tau xwb.
    Zoo li Yes Xus tus Thwj Tim Yus Das raws Yes Xus tau peb lub xyoo kiag, ib yam li txhua tus Thwj Tim. Thaum txog lub caij Yes Xus yuav txhiv lub qab ntuj neeg cov Ntsuj Plig rov los ua Ntuj me nyuam.
    Tseem yog Yus Das muab Yes Xus muag 30 lub txiaj  nyiag rau cov thoob xwm txoj cai thiab cov thawj leej Choj thiaj paub tuaj ntses Yes Xus nyob tom lub txiv ntoo roj ntawd.

    13. Lo lus uas kuv hais tias, kom peb saib cov leej Tsob Hwb los cov Txiv Leej Choj zoo li yog peb leej txiv los zoo li peb leej tub thiab peb tsev neeg txheeb ze peb no:
    A. Peb Saib tus Vaj Das Vis nws yog neeg tau ua phem, xa nws tus phooj ywg mus rau txoj kev tuag. Nws hloov siab nws rov ntxub nws lub siab nyiam kev txhaum. Tswv Ntuj tau tsa nws ua Tswv Ntuj tus pleev cawm Ntuj Haiv neeg.
    B. Tus Hauv Paus xa lus Paj Lug, nws yog tus neeg rhuav tswv Ntuj Haiv neeg pov tseg. Tswv Ntuj paub tias, nws yuav muaj lub siab zoo lo yuav npuab Yes Xus tau.  Yes Xus hu Paj Lug los ua ib tug Hauv paus, xa lus puag tom qab no, loj cuag li Pob Zeb thiab.
    Peb cov Txiv Leej Choj los cov Leej Tsob Hwb lawv nyob hauv cov qauv no ntag. Peb yuav pab Yes Xus cawm lawv.  Zoo li lawv nrog Yes Xus, cawm peb kom peb tau dim ntawm kev txhaum, hloov siab los ua neeg zoo nyob ua ke, rau hauv Tswv Ntuj yim neeg.
    Yog peb tsis paub kev hloov siab, ces peb yuav ua lis Yus Das.  Yus das nqa cov Thoob xwm txoj thiab cov thawj Leej Choj cov nyiaj mus thim los lawv tsis yuav.  Vim yog nyiaj nqi ntshav yog yam tsis huv luag tsis siv.
    Yog peb tsis pov hwm peb cov thawj neeg, ces Ntuj cov txiaj ntsim uas tau pub rau lawv.  Yog cov txiaj ntsim, coj mus muas kev txhaum.
    Tsis zoo muab pub rau leej twg yuav tsis zoo dab tsi li thiab. Vim nws yog kev ua txhaum xwb.

    Sacramento tim 10/2/2019.
    Yaj Zoov Ntxheb Xib Hwb.


    Last edited by Maiv Tooj on 15th April 2019, 7:25 am; edited 1 time in total
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    LUB KOOM HAUM KAS TOS LIV. Empty Re: LUB KOOM HAUM KAS TOS LIV.

    Post  Maiv Tooj 15th April 2019, 7:21 am


    Zaj 393- LUB KOOM TXOOS KA TAU LIV KEV NTSEEG.


    Lub Koom Txoos Ka Tau Lib kev ntseeg raws li Lub Moo Zoo Yes Xus tshaj tawm los. Thiab Yes Xus tsa nyob saum lub pob zeb, uas Nws tau hais tseg tias, Dab Phem cov rooj loog yuav tsis yeej lub Pob Zeb no.
    Tus neeg ntseeg txog Tswv Ntuj  raws li Yes Xus lub Moo Zoo, uas Yes Xus tshaj, mas tsis yog hais ntawm lub ncauj tawm los tias, kuv ntseeg txog Tswv Ntuj no xwb ces yog neeg ntseeg tseeb lawm.
    Tus neeg ntseeg tiag, mas nws yuav tau thau tej yam phem nyob hauv nws nruab siab nruab plawv tawm mus pov tseg!
    Yam li yog tej kev phem, uas Hmoob hu ua cov kev kem tsuab no tawm mus. (Kem Tsuab= lus Los Tsuas hais tias yog Khib Nywuab no.)
    Cov kem tsuab, yog tas nrho cov kev phem:
    Yam li kev ua neeg tub nkeeg, kev xam khib, kev cib nyeej, kev npau taws rau luag, kev ua tub qaug rau luag.  Thiab kev xav phem rau luag, kev dag, los kev nyiam sib cav sib ceg, hais lus xaiv kom muaj kom muaj kev tsis sib haum, kom sawv daws muaj kev sib ua plaub ntug.
    Ua neej nyob tuam meej tuam pem hla tas nrho tswv Ntuj kaum los lus qhia tib si mus.
    Ib tug neeg ntseeg yog nws tsis thau tej yam phem no tawm hauv nws nruab siab mus. Mas nws tsis yog ib tug neeg ntseeg raws li Yes Xus zaj lus uas Yes Xus tau qhia los kom peb ua mus yoog raws li Yes Xus txoj kev ntseeg tseeb.
    Nws lam ua ib tug neeg nrauj dab xwb, mas hais tseeb tias, tus coj li no.  Mas txaus txawj txog, nws lub cev thiab nws tus Ntsuj Plig.
    Yog ib tug neeg nrauj dab tas lawm, nws tsis muaj kev ntseeg khov nyob rau hauv nruab siab.  Mas tus dab uas nws tau nrauj mus lawd, yuav mus coj 9 tug dab yog cov dab tsiv tsaim heev los nyob hauv nws nruab siab.
    Ces nws yuav ua neeg phem dua li yav tas los lawd ntau npaug ntxiv.  Vim nyob hauv nws nruab siab muaj chaw seem ntau kawg rau ntau tus dab yuav los nyob ntxiv.
    Ces nws yuav coj ib lub neej xws li Tej laus hais kam los tias: Ncauj pauv ncauj, muag pauv muag, nrig pauv nrig,
    vim cov kem tsuab no tseem muaj nyob ntau heev rau hauv nws nruab siab, nws tsis thau ib yam tawm mus li. Ntuj cov txiaj ntsim poob saum ntuj los tsis muaj chaw rau txiaj ntsim koob hmoov nyob.
    Cov Txiaj Ntsim Koob Hmoov nyob tsis tau ua ke nrog rau ib lub siab, uas tseem tseg cov kem tsuab no nyob puv ntia rau hauv.
    Peb sawv daws tsis hais leej twg li, yog peb ua neeg ntseeg tiag. Mas peb yuav nyob zwm rau leej Tswv Yim Ntshiab, thov kom tus Leej Ntuj Plig qhia tej yam zoo tshaj thiab qhov tseeb rau peb.
    Ces peb mam coj yam zoo tshaj plaws ntawd, nyob hauv peb nruab siab. Rho los pub rau peb tsoom txheeb ze, kom peb ua ib npoj neeg ntshiab dawb huv, kom cov txiaj ntsim koob hmoov poob saum ntuj los.  Nyob hauv peb nruab siab,  tawg paj los tshiab, txi txiv los qoos zoo.
    Kom txhua lub koom haum cov Tuam Los Pav keev nqis rau peb tej hauj lwm muaj txiaj ntsim koob hmoov no. Kom peb sawv daws ua lub neej  nplua nuj nyob rau sab Ntsuj Plig.
    Peb twb tau hnov zaj kwv huam uas Yes Xus hais txog tus yawg nplua nuj.  Thiab tus neeg txom nyem hu ua Las Ntxas Los no. Las Ntxas Los thaum ua neej nyob ntiaj teb no, mas nws tshaw noj tus Yawg Nplua Nuj cov tsig mov poob ntawm nws lub rooj los rau hauv av kawg.
    Los nws tsis tau noj li, thaum nyob saum ntuj.  Mas tus nplua Nuj no, nws ho ntshaw kom tus txom nyem Las Ntxas Los no, muab nws ntiv tes tub ib tee dej los ntub tus yawg nplua nuj no, tus nplaig kom ib nyuag laj me ntsis, los kuj ua tsis tau li thiab.
    Nyiaj kub mas sib txawv deb kawg, ntawm cov txiaj ntsim koob hmoov. Nyiaj kub yog ntiaj teb tug, hos txiaj ntsim koob hmoov yog qaum ntuj tug.
    Tus muaj nyiaj kub, mas lawv ua cov Tuam Los Pav nyob ntiaj teb no, hos tus muaj txiaj ntsim koob hmoov, mas lawv yuav ua cov Tuam Los Pav loj nyob saum ntuj.
    Qhov tseem ceeb tshaj yog peb txoj kev ntseeg, peb puas muaj kev ntseeg tiag, los peb ua cov neeg nrauj dab xwb.  Kev ntseeg peb hais ntawm peb lub ncauj rau neeg hnov thiab qhuas xwb.
    Nyob hauv lub siab, peb tseem yog Tswv Ntuj tus yeeb ncuab.  Npaj qiv thiab muab Tswv Ntuj tej lus los ua kev tawm tsam rau Tswv Ntuj.  Ces peb yuav yog cov nplua nuj thiab cov Tuam Los Pav nyob rau ntiaj teb no, mus tas ib txhiab ib txis li.
    Thaum txog hnub uas Yes Xus hais tias:
    Lub ntuj thiab lub ntiaj teb no yuav dua mus, hos kuv cov lus mas yuav nyob mus li tsis txawj dua mus.  Ces yog lub caij lig rau peb lawm lauj!

    Sacramento tim 15/1/ 2019.
    Yaj Zoov Ntxheb X.H.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    LUB KOOM HAUM KAS TOS LIV. Empty Re: LUB KOOM HAUM KAS TOS LIV.

    Post  Maiv Tooj 15th April 2019, 7:29 am



    Zaj 394- LUB KOOM TXOOS KEV NTSEEG NTUJ TXUAS NTXIV MUS.


    Ib tug neeg ntseeg Ntuj tiag, yog nws tsis yoog raws li Yes Xus tus piv txwv. Mas nws kawg lam siv lub npe ntseeg Ntuj, kom tau lub npe tias yeej dab.
    Mas tsis tau yog qhov tseeb, Nws tseem qhib siab lug los txais lwm cov dab los nyob hauv nws nruab siab. Kom nws muaj zog siv dab tej txuj ci loj dua qub, los tawm tsam rau Tswv Ntuj thiab neeg.
    Yus yog ib tug neeg ntseeg tiag, mas yuav hwm Ntuj hwm neeg ib yam li yus rov hwm yus tus kheej. Yus yuav saib zeej tsoom txhua tus, yog Tswv Ntuj Tsoom tub ki, ib yam li yus ntseeg tias, yog Tswv Ntuj tus me nyuam!
    Thaum yus yog ib leej txiv lawd, yus yuav saib yus tus txij nkawm nws yog ib leej niam muaj hwm chim ib yam. Vim ob leej nyias muaj nyias qhov zoo, uas Tswv Ntuj tau muab Tswv Ntuj yees nyob rau hauv nkawd, ua Tswv Ntuj tus duab.
    Nco ntsoov zaj lus hais tias: Tsoom Leej Txiv yog Tswv Ntuj tus duab. Hos tsoom Leej niam yog Tswv Ntuj txoj kev xeeb neeg los nyob rau hauv lub sim ceeb no.
    Sab Leej Txiv los sab Leej Niam, ob leeg muaj hwj Chim Koob Meej loj sib luag zos. Yog yus hwm tus Leej Txiv, ces yus tau hwm tus Tswv Ntuj tsim lub ntuj lub teb lawm. Thiab yus hwm tus Leej Niam, ces yus tau hwm tus uas yog poj Tswv Ntuj ib yam lawm thiab.
    Lo lus no yog Yes Xus hais tawm los: Leej Txiv thib kuv zoo ib yam nkaus. Nej pom kuv ces nej twb tau pom Leej Txiv lawm. Yog nej hwm Leen Niam, ces nej tau hwm tus hu ua Poj Huab Tais no lawm.
    Vim Lo lus no, Txwv Ntuj thiaj xaiv ib Leej Niam nyob tab seeb los ua Tswv Ntuj Leej Niam. Kom ob leeg muaj txoj kev tuam choj rau Noob Neej tej Ntsuj Plig nqe los xeeb ua neej nyob rau lub sim ceeb no.
    Thaum Noob Neej sib txis ua txij ua nkawm, mas Tswv Ntuj hais lo lus no tias: Neeb tsis yog ob leeg lawm, neb yog ib tug neeg lawm xwb.
    Leej Txiv yog ib sab tes, hos Leej niam yog lwm sab tes. Ob sab tes no, yuav los sib pab kom tau txhawb kev tus siab los kev kaj siab ua ke. Leej Txiv raug mob los Leej Niam kuj yuav mob ib yam, Leej Niam tus siab los Leej txiv kuj muaj kev tus siab sib xws thiaj yog.
    Ob tug uas yog txij nkawm, txhob tsim teeb meem rau yus tus txij nkawm. Tsis hais leej twg li, Ib tug ua rau lwm tus muaj kev tu siab yuav tuag. Los nws tseem zoos siab tias, nyuam qhuav ntxim rau nws xwb.
    Kev phem kev zoo, tsis muaj tus paub tseeb cuag li yog yaj Saub. Txhob rawm zoo siab, tsam Yus zoo siab dhau ces yus ho mus muab hloov tau ua yus tug, nyob ua yus txoj kev tu siab!
    Ces yus yuav hais tias, Ntuj tsis muaj qhov muag los ua cas. Tus phem tsis tau txais qhov phem, ho cia tus zoo txais qhov phem. Vim qhov phem ntawd yog Leej twg ua tus cog cia mas yog leej twg li.
    Peb yuav tsis txhob ua tub qaug rau Ntuj, muaj ntau zaus yus xav tias, yus yeej tsis tau ua tub qaug rau ntuj. Tab sis yus tau ua tub qaug rau tus neeg, uas Ntuj muab tso rau ntawm yus xub ntiag, kom yus ua tus pab nws.
    Yus tau tsim txom tus nyob ze yus tshaj plaws ntawd, nws tus Ntuj Plig. Ua rau nws tus Ntsuj Plig, raug txom nyem loj thiab ua rau Tswv Ntuj muaj kev tu siab, vim tus Ntuj tso nrog yus nyob. Yog tus daws yus tej teeb meem kom tau ua neeg zoo thiab muaj koob meej rau luag pom luag saib.
    Zaj lus no yog nthuav Tswv Ntuj cov lus, rau peb txhua tus neeg ntseeg nyob hau Yes Xus lub npe. Kom saib taus neeg, thiaj tsis tau ua tub qaug rau Ntuj.
    Yog peb paub Tswv Ntuj cov lus, mas peb yeej tsom tau me ntsis nyob rau peb nruab siab lawm. Leej twg tau ua raws li zaj lus no, txhob tas kev cia siab. Thov Leej Tswv Yim Ntshiab, pab yus kho yus lub siab kom txawj xav thiab ua tau xis Tswv Ntuj siab. Ces yus yuav tau nyob kaj siab lug lawm.

    Sacramento tim 5/2/2019.
    Yaj Zoov Ntxheb Xib Hwb.


    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    LUB KOOM HAUM KAS TOS LIV. Empty Re: LUB KOOM HAUM KAS TOS LIV.

    Post  Maiv Tooj 15th April 2019, 7:54 am


    Zaj 399- TSHAJ TXOG LUB KOOM TXOOS KA TOS LIV.


    LUB KOOM HAUM KAS TOS LIV. Benoit10

    Lub Koom Txoos Ka Tau Liv, yog Tswv Ntuj lub Koom Txoos nyob ntiaj teb no. Yog Leej Tswv Yim Ntshiab qhia tis lub npe hu ua Ka Tau Liv no rau.
    Yuav muab txhais los hais tias, Tswv Ntuj lub Koom Txoos cia rau tas lub qab ntuj neeg. Sawv daws tib si, tas txhua Haiv txhua xeem neeg thoob plaws, muaj cai nyob hauv.
    Lub Koom Txoos Ka Tau Liv no, nws xeeb los muaj nyob, suav txij li hnub uas Leej Ntuj Plig nqes los. Los txog lub caij no thiab tseem yuav nyob mus ntxiv, txog thaum lub ntiaj teb no. Txia los hloov mus ua Tswv Ntuj lub Ceeb Tsheej.
    Thaum Leej Ntuj Plig tsis tau nqes los nyob ntiaj teb no, mas tsuas muaj Yes Xus cov Thwj Tim ntseeg txog Yes Xus nyob thiab nrog Mab Liab ob peb tug viv ncaus xwb.
    Hnub Leej Ntuj Plig nqes los, tib hnub ntawd. Muaj peb txhiab leej ntseeg txog Yes Xus lub npe thiab txais lub Cim Ntxuav.
    Lub Koom Txoos pib muaj los, txij hnub ntawd los thiab nyob ruaj nreb los txog lub zim txwv no. Thiab nws yuav nyob mus li txheej dhau txheej mus ntxiv.
    Ua ntej Leej Ntuj Plig tsis tau nqes los nyob, cov neeg ntseeg tsuas muaj Yes Xus cov Thwj Tim, nrog Yes Xus Leej Niam thiab pab neeg raws Yes Xus, thaum Yes Xus tseem ua neej nyob, cov tau paub thiab hnov lawv ntseeg nrog Yes Xus cov Thwj Tim xwb.
    Tas nrho Tsoom His Xas Lais, lawv ntseeg txog tus Tswv Ntuj Yas Ves. Uas Tswv Ntuj tau qhia rau Has Nplas , His Xas Has, Yas Kos thiab Mais Xes lawv tus Tswv Ntuj.
    Txij hnub Leej Tswv Yim Ntshiab nqes los, cov neeg ntseeg nyob hauv Tswv Ntuj lub Koom Txoos, mam rov nco tau Yes Xus txhua los lus uas Yes Xus tau qhia tseg tias:
    Muaj leej Txiv, tus Yes Xus hu ua kuv Txiv, nrog Leej Ntuj Plig Ntshiab. Lawv yog ib tug Huab Tais ua peb leeg, zoo tib yam li Leej Txiv.
    Txij thaum Leej Ntuj Plig tuaj nyob, los txog niaj hnub no. Tsis muaj ib zaug li uas Tswv Ntuj lub Koom Txoo yuav rhuav Tswv Ntuj tej lus pov tseg ib qho mus li.
    Tej yam Tshiab uas kho kom zoo dua tuaj, mas puav leej yog Leej Tswv Yim Ntshiab qhia thiab tshoj tus thawj coj lub Koom Txoos kho kom zoo thiab tseeb tuaj mus xwb.
    Vim yog Leej Tswv Yim Ntshiab, yog tus coj thiab nres cov thawj coj Tswv Ntuj lub Koom Txoos Ka Tau Liv. Kom txhob muaj qhov yuam kev.

    Vim li cas peb ho pom cov neeg ntseeg txog Yes Xus lub npe muaj ntau pab ntau pawg?
    . Txoj kev sib ncaim no, Yes Xus Yeej xub paub ua ntej, thaum Yes Xus tseem nyob hauv lub sim Ceeb no lawm!

    a.Thawj zaug Yes Xus txib nws cov Thwj Tim, mus tshaj Ntuj lus lawv mus ob leeg mus ua ke. Cov Thwj Tim ntsib, ib tug neeg tsis yog lawv pab ntawd. Nws tuav txog, Yes Xus lub npe los ntiab dab.
    Lawv hais rau Yes Xus tias, peb xav txwv nws. Yes Xus hais tias, nej txhob txwv nws, yog nws tsis hais kuv lub npe phem. Mas nws kuj zoo li yog peb tog thiab.
    b. Thawj tug ncaim ntawm Yes Xus thiab Nws cov Thwj Tim, yog Yus Das. Tus muab Yes Xus rau cov thawj Leej Choj thiab cov thoob xwm ntawv ntes thiab muab Yes Xus tua nyob saum tus ntoo cuam khaub lig.

    c. Thaum Yes Xus hu Paj Lug, los ua ib tug hauv paus xa lus, mus tshaj Ntuj lus rau cov neeg tseem teev dab qhuas.
    Tswv Ntuj lub Koom Txoos, tsis tau muaj lus xaiv lus ncua dab tsi. Tab sis tsoom neeg ntseeg twb pib muaj lus hais tias: Peb yog Paj Lug tog, los peb yog Pob Zeb tog.
    Yes Xus cov Thwj Tim, thiaj ua thawj lub rooj ncauj lus sab laj nyob Yes Lus Xas Les. Kom txhob muaj kev sib ncaim, Lawv thiaj sau Zaj Kuv ntseeg txog Tswv Ntuj, yog Leej Txiv muaj Hwj Huam tas nrho… Uas peb hais nyob hauv lub thaj cav txiaj ntsim txhua zaus.

    d. Thaum ze xyoo 500 Lub Koom Txoos Os Tos Dov ncaim ntawm Lub Koom Txoos Ka Tau Liv mus. Thaum txog xyoo 500, Lws Tes mam ncaim ntawm Lub Koom Txoos Ka Tau Lib mus lawm Thiab.
    Nyiam no txij thaum Lws Tes ncaim mus lawd, cov ncaim coob coob, ua ntau pab ntau pawg, yog cov ncaim ntawm Lws Tes los mus. Ntshai twb muaj tshaj ntau pua pab sib ncaim mus uas sawv daws yuav Yes Xus lub npe lawm.

    e. Pab ncaim kawg yog pab nyob Aas Kiv teb chaws, lawv tau ncaim, yog vim tus Vaj Aas Kiv coj lawv ncaim. Thiaj muaj pab ntawd.
    Pab no, mas lawv tsa muaj cov poj niam los ua Niam Plig. Lawv muaj thaj cav txiaj tsim ib yam li cov Ka tau Liv. Pab ntseeg Ka Tau Liv uas Xib Hwb Lauj Vam Thaiv coj ib pab mus zwm rau lawv nyob mes Nis Xaus Tas, ces yog pab hais no.
    Txiaj no mus, mas tsis paub tias yuav ncaim li cas mus ntxiv. Hais meej tias cov xub paub lub Koom Txoos Ka Tau Liv mas lawv txoj Hmoov zoo heev.
    Txhob ua siab fab, ua neeg ywj fab ywj fwj, thov kom Leej Ntuj Plig pab qhia qhov tseeb. Kom yus nyob ruaj nreb, hauv lub Koom Txoos Ka Tau Liv. Uas hu tau hais tias, yog Lub Koom Txoos Ka Tau Liv, cia rau lub qab ntuj neeg, txhua Haiv txhua xeem.

    f. Lub zwj Ceeb no, muaj ib pab neeg yuav Xus Xus lub npe thiab yuav Mab Liab lub npe los tsim ib kev ntseeg txog Yes Xus tshiab.
    Lawv hais tias, Yes Xus twb yug los ua Hmoob lawm, lawv yuav cov keeb muaj kwm los ntawm txhua lub Koom Txoos. Ntseeg txog Yes Xus lub npe los. Tab sis lawv hais tias, tus Yes Xus Hmoob no. Thiaj yog Hmoob tus uas yuav los cawm Haiv Hmoob tiag.
    Nyob hauv ntawv Ntshiab piav tias, Yes Xus rov los zaum ob, mas yog los txiav txim xwb no. Yes Xus tsis tau hais ib lo lus tseg tias, Nws yuav rov los yug dua zaum ob no ib zaug li.
    Cov cia li ntseeg tias, tus Yes Xus Hmoob yug los lawm, mas lawv ntseeg yuam kev, tus tsis yog Tswv Ntuj Leej Tub tiag.
    Uas nws tuaj yeem tuag kom tau txhiv neeg ntiaj teb ntawm neeg lub keeb txhaum los kom rov muaj txoj sia ua Tswv Ntuj me nyuam.
    Thiab Yes Xus Niam, mas nws yog ib tug Ntxhais Nkauj xwb. Tsis zoo li tsoom poj niam paub dua ib tug txiv neej los.
    Ib tug poj niam Hmoob paub tej txiv neej ntau tus los lawm, nws cia li sawv los ua Ntuj Niam nws tus kheej tsis txuas rau ib yam uas yuav muaj keeb kwm los ntawm ib txoj keeb kwm nthaw hauv av tawm tuaj, los nqes pem ntuj los thiab muaj keeb kwm qhov twg los li.
    Tsis paub yuav nyob ntev li cas, los yuav maj mam ploj mus li. Hmoob tus Yes Xus tshiab no twb yuav muaj 18 xyoo lawm. Tsis tau paub ua hwj huam yees ntxwv.

    g. Kuj tseem muaj Siv Yis ntuj neeb, los twb sawv rov los tsa tau tej tub tuag li Yawg hlob Vaj Pov lawv sawv los nyob puv nkaus rau nram tiaj suab puam lawm thiab.
    Tej no kuj tsuas yog nws hais tawm los xwb, Tseem qhib tsis tau rau ib tug neeg twg mus saib thiab pom li.

    h. Kuj tseem muaj dua ib pab twb tsa tau Vaj Hmoob twb muaj lawm, ntsej loj luaj ntxuam, muag luaj nkob, caj ntswm luaj qws tuav txob. Sawv los nyob rau Thaib teb.

    I. Pab hu ua Hmoob teb chaws muaj Niam Txiv vaj Hmoob pem ntuj, nkawm niam txiv kab yeeb thiab Niam Nkauj hnub txiv nraug hli. Muaj xob txwj xob laug, nrog rau zaj txwg zaj laug. Coob npaum li no los ua ib tug.
    Puas yog Av thiab Dej, los Huab Cua yuav ua kom Hmoob to ntsej los nyob ua ib Haiv neeg zoo, los yuav ua kom Hmoob muaj kev sib ncaim mus, ua ntau pab Hmoob thiab ntau lub xeem Hmoob li lauj.
    Kwv tij Phooj ywg, Zaj lus no, sau los ua kev kawm paub txog yam tseeb thiab cuav rau leej uas xav paub. Kom muaj lub siab nyob tiaj tus, txuag yus tus ntsuj plig kom muaj nuj nqis los rau Tswv Ntuj hlub.

    Tim 13/11/2018.
    Yaj Zoov Ntxheb X.H.
    Maiv Tooj
    Maiv Tooj
    Tswv Cuab Hmong Catholique
    Tswv Cuab Hmong Catholique


    Messages : 5527
    Date d'inscription : 2009-08-18

    LUB KOOM HAUM KAS TOS LIV. Empty Re: LUB KOOM HAUM KAS TOS LIV.

    Post  Maiv Tooj 3rd May 2019, 8:32 am


    Zaj 424- NYOB HAUV LUB KOOM TXOOS KA TAU LIV.


    Txoj kev ntseeg ntuj raws li lub Koom Txoos Ka Tau Liv, tus piv txwv ntseeg txog Txwv Ntuj, muaj ob lub ntsiab lus loj nyob hauv kev hwm Ntuj thiab hwm neeg. Nyob hauv kev sib hwm, yog ob lub ntsiab lus zoo li no:
    A.Thaum Tswv Ntuj tsim neeg los, mas Tswv Ntuj xub tsim tus txiv neej ua ntej. Tswv Ntuj mam li muab tus Txiv neej cov nqaij thiab txav los tsim tus poj niam.
    Vim Tswv Ntuj xav muab Tswv Ntuj lub meej mom koob meej hwj Chim los tso rau saum tus Txiv neej, kom muaj hwj Chim Koob meej zoo xws li Tswv Ntuj tus duab.
    Ua li mas tas nrho tsoom Txiv neej, lawv muaj Tswv Ntuj tus duab nyob nrog tsoom Leej txiv lub koob meej thiab lub hwj Chim. Los rau tsoom ua tub ki, los poj niam hwm, tsoom Leej Txiv xws li yog Tswv Ntuj. Lub meej mom thiab Ntuj tus duab.
    B. Txij hnub neeg poob mus ua kev txhaum los lawd, Tswv Ntuj lub hwj Chim yuav xeeb los dua ntawm ib leej Niam los. Kom tau rov tuaj cawm thiab txhiv neeg los ua Ntuj me nyuam kom zoo dua tuaj.
    Mas Tswv Ntuj yuav tau nqes ntawm ib Leej Niam los, kom tau yuav lub cev neeg. Tswv Ntuj tsis nug Leej twg tias, ua li ntawd puas zoo.
    Tswv Ntuj tau xaiv ib leej Niam ua Tswv Ntuj lub rooj ntug kom tau nqes saum ntuj los cawm neeg. Tswv Ntuj tsuas nug tus Leej Niam ntawd tias: koj puas txaus siab rhawv txoj kev rau Tswv Ntuj tuaj cawm lub ntiaj teb neeg no xwb.
    Ces tus Leej Niam no, nws teb rau Tswv Ntuj lo lus tias: Koj ua raws li koj lub siab nyiam. Kuv yog koj tus Ntxhais txib, mas Tswv Ntuj thiaj nqes los yuav neeg lub cev, kom tau ua Tswv Ntuj txoj hauj lwm mus tiav hlo.
    Txij thaum Tswv Ntuj, lub zim txwv ntawd los, mas tsoom Leej Niam lawv muaj Tswv Ntuj lub meej Mom, Hwj Chim los ua poj Huab Tais muaj koob meej ib yam li tsoom Leej Txiv.
    Mas tsoom Leej Niam, lawv kuj yog Tswv Ntuj lub Meej Mom Hwj Chim. Los ua Leej Niam qhib rooj ntug rau ib tsoom neeg nqes saum ntuj los, yuav lub cev neeg. Nyob rau lub Sim Ceeb no.
    Kom Tswv Ntuj thiab neeg Yaj Ceeb nyob koom ua tau ib cuab ib yim nrog Tswv Ntuj. Kom ruaj khov li Lub Pob Zeb uas Leej Pleev tau hais tias:
    Dab phem cov rooj loog yuav tsis yeej lub Pob Zeb no, ua li mas peb cov neeg, ntseeg txog Yes Xus lub npe thiab coj Yes Xus tej lus qhia.
    Mas tas nrho tsoom Txiv Neej txhua tus yuav hwm thiab saib taus cov uas yog Leej Niam. Vim lawv muaj lub keeb, hu ua Tswv Ntuj Leej niam. Thiab yog Poj Huab Tais, Lawv tsis loj dua li Tswv Ntuj Leej Niam Mab Liab. Tab sis lawv muaj lub hwj chim ua Tswv Ntuj Leej niam lawm.
    Vim tias, lawv yuav yug tub ki. Lawv cov tub ki, yuav raug sawv mus ua Tswv Ntuj cov Tiam lis. Rau Tswv Ntuj txib, cov tub ki ntawd, lawv yuav ua Tswv Ntuj tsoom Tub. Lawv yuav nrog Tswv Ntuj, zaum ntawm Tswv Ntuj sab xis los sab laug.
    Zoo li tsoom Vaj Qhia Tswv Qhia thiab Tsoom Leej Choj los tsom tub Tsob Hwb. Los tsoom Niam Phauj nyob tab seeb, yog li, mas tsawg tus ntxhais muaj cuab muaj yig lawm. Mas lawv yog ib leej niam muaj nuj nqes nyob ze Tswv Ntuj tib yam nkaus.
    Peb yuav tau saib taus thiab hwm lawv zoo li ib Leej Niam, zoo kiag li yog yus niam, los yog poj Huab Tais, nyob ze Tswv Ntuj.
    Hos tsoom tub thiab tsoom ntxhais tsis tau muaj cuab yim, mas lawv zoo li yog Tswv Ntuj tsoom tub, los yog yus tsoom kwv, los tsoom tij thiab yog yus tsoom nkauj muam. Peb yog ib pab Nkauj Muam Nraug Nus ua ke loj sib luag nyob hauv Tswv Ntuj lub hwj Chim.
    Tsoom Leej Txiv muaj cuab muaj yim lawd, lawv puav Leej yog tsoom Leej Txiv. Uas muaj Tswv Ntuj tus duab roos lawv los ua ib leej Txiv muaj hwj chim koob meej.
    Tej hais no, yog Tswv Ntuj txoj kev qhia kom txhua tus sib raug zoo nyob ua Tswv Ntuj lub npe los ua Tswv Ntuj cuab Yim neeg nyob ua ke.
    Kom peb sawv daws ua neej nyob. Muaj yeej kev haub kev ntxias, txhob swb mus rau kev ua txhaum. Mus ua tub qaug rau Ntuj thiab rau Neeg.
    Kom lo lus peb hu ua Leej Txiv thiab Leej Niam no. Nws yog ob lub npe muaj hwj Chim Koob Meej nyob nrog Tswv Ntuj kom muaj kev nyiam kev hlub rau Leej Txiv thiab Leej Niam.
    Thaij muaj tseeb raws li Leej Txiv thiab Leej Tub nkawd, muaj txoj kev sib hlub loj kawg, ces xeeb tau los muaj Leej Ntuj Plig los nyob ua ke.
    Lawv peb leeg yog tib tug Tswv Ntuj xwb, loj sib luag zos, zaj lus no nws tawm hauv Tswv Ntuj lo lus qhia 4 los tias: Koj yuv hawm koj Niam koj Txiv no los.

    Sacramento tim 24/1/2019.
    Yaj Zoov Ntxheb Xib Hwb.



    Sponsored content


    LUB KOOM HAUM KAS TOS LIV. Empty Re: LUB KOOM HAUM KAS TOS LIV.

    Post  Sponsored content


      Current date/time is 28th March 2024, 12:46 pm