Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

ZOS ROOB NYUJ QUS 1956 NTAWV HMOOB THOOB TEB LUB HAUV PAUS.

Gallery


UA KOOB TSHEEJ YES XUS YUG LOS XYOO 2018 - Page 4 Empty

Latest topics

» TP.Txhiaj Foom
by Mim Today at 6:28 pm

» UA KOOB TSHEEJ YES XUS YUG LOS XYOO 2018
by Mim Today at 1:53 pm

» MOO QAIJ QAUG
by Maiv Tooj Today at 12:34 pm

» COV ZAJ NYEEM HNUB CHIV 2018-2019 xyoo C
by NrhiavTswvNtuj 13th November 2019, 6:39 am

» XH. Yaj Zoov Ntxheb lub Tsev THOOB TSIB
by Maiv Tooj 13th November 2019, 6:34 am

» Xov Tooj Cua Zoo Tswv Zov Yaj
by Maiv Tooj 6th November 2019, 9:08 pm

» Qhia Ntuj Kev Cai.
by Maiv Tooj 21st October 2019, 10:29 pm

» Tij Teej Xyooj Cob Tsib teb Cog Lus ib sim neej hauv Tswv Ntuj.
by Maiv Tooj 13th October 2019, 8:17 am

» Cov Txiv Plig Hmoob Suav teb
by Maiv Tooj 11th October 2019, 2:32 am

» HMOOB LUB XEEM
by Maiv Tooj 8th October 2019, 10:13 pm

» QHOV UAS DAB YUAV TSWJ KAV TAU NEEG
by Maiv Tooj 8th October 2019, 2:56 pm

» TXOJ KEV YUAV RAUG TXIM TIAM YUAV TUAJ NO.
by Maiv Tooj 18th September 2019, 6:33 am

Suav neeg tuaj saib, txij hnub 17/09/2010 los mus.


    UA KOOB TSHEEJ YES XUS YUG LOS XYOO 2018

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 18th March 2019, 11:30 am

    TIM 19 LUB 3 HLIS 2019

    Hnub Peb Lis Piam Ob Caij Plaub Caug Xyoo C Nruab Lis Piam Xyoo I

    Hwm leej Ntshiab Yos Xes, Niam Mab Liab tus txij nkawm

    Zaj Nyeem Ib: 2 XAS MUAS 7: 4-5A, 12-14A, 16


    4 Tib hmos ntawd, HUAB TAIS lo lus nrov tuaj rau Nas Taas tias :
    5 "Koj mus hais rau kuv tus tub txib Das Vis li no:
    12 ‘Thaum txog koj lub caij mus nrog koj cov poj yawm txwv koob pw tsaug zog lawm, kuv yuav tsa koj ib tug tub los tom qab koj kom sawv, yog ib tug tawm ntawm koj roj ntsha los, kuv yuav tsa nws txoj kev ua vaj kom nyob ruaj nreb.
    13 Nws yog tus yuav txhim ib lub tsev rau kuv lub npe, ces kuv yuav tsa nws txoj kev ua vaj kom nyob ruaj nreb mus li.
    14 Kuv yuav ua nws txiv, nws yuav ua kuv tus tub.
    16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.’”

    NPN 89: 2-3, 4-5, 27+29

    Txais: (37) Das Vis leej tub yuav nyob tas mus li ib txhis.

    Kuv yuav hu nkauj mus li cav txog HUAB TAIS txoj kev hlub;
    tiam dhau tiam kuv lub ncauj yuav
    tshaj txog nws lub siab pheej xeeb.
    Vim koj tau hais tias: “Kuv txoj kev hlub yuav nyob mus li,”
    nyob saum ntuj, koj tau tsa koj txoj
    kev ua siab pheej xeeb kom nyob ruaj nreb.

    Txais: (37) Das Vis leej tub yuav nyob tas mus li ib txhis.

    Kuv tau hais haum nrog tus kuv xaiv,
    kuv tau cog lus ruaj rau Das Vis kuv tus tub txib tias:
    “Kuv yuav tsa koj caj ces kom nyob mus li,
    kuv yuav txhim koj lub theej kiab kom nyob tiam dhau tiam.”

    Txais: (37) Das Vis leej tub yuav nyob tas mus li ib txhis.

    “Nws yuav hais txog kuv tias: ‘Koj yog kuv txiv,
    kuv tus Tswv Ntuj, kuv lub tsua uas cawm kuv.’
    Kuv yuav muab kuv txoj kev hlub rau nws tas mus li,
    thiab kuv txoj kev nrog nws cog lus yuav nyob ruaj nreb.”

    Txais: (37) Das Vis leej tub yuav nyob tas mus li ib txhis.

    Zaj Nyeem Ob: LOS MAS 4: 13, 16-18, 22

    13 Tsis yog vim txoj cai ces Has Nplas Has los nws tsoom xeeb ntxwv thiaj tau txais txoj kev cog lus tias lawv yuav tau txais lub ntiaj teb los ua lawv tug, tiam sis yog vim txoj kev ncaj ncees uas los ntawm kev ntseeg los.
    16 Vim li no txoj kev cog lus ntawd yog los ntawm kev ntseeg los ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws txiv, 17 raws li muaj ntawv sau tseg tias: “Kuv tsa koj ua txiv rau ntau haiv neeg.” Tswv Ntuj yeej saib Has Nplas Has yog peb txiv, vim nws ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam tsis muaj txawj xeeb muaj tuaj. 18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi tias nws yuav ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
    22 Vim li no thiaj muab qhov kev ntseeg ntawd ntaus nqe ua nws txoj kev ncaj ncees.

    Zaj Cav lub Moo Zoo: NPN 84: 5

    Cov muaj hmoov zoo yog cov nyob hauv koj lub tsev, HUAB TAIS,
    lawv yuav cav txog koj mus li tsis muaj caij kawg.

    Ntawv Moo Zoo: MT 1: 16, 18-21, 24A

    16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
    18 Yes Xus Pleev lub keeb chiv zoo li no : Mab Liab uas yog Yes Xus niam raug muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab li ntawd lawm, Huab Tais tus Tshiab txawm tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus, vim nws yuav cawm nws haiv neeg ntawm lawv cov txhaum."
    24 Thaum Yos Xes tsim los, nws ua raws li Huab Tais tus Tshiab qhia rau nws : nws mus coj nws poj niam los nyob hauv nws tsev.

    Los: LK 2: 41-51A

    41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les. 42 Thaum Yes Xus muaj kaum ob xyoos, lawv kuj mus ua lub Ntees Hla pem Yes Lus Xas Les raws li kev cai thiab. 43 Thaum cov hnub ua ntees tas lawm, Yos Xes thiab Mab Liab nkawd sawv kev rov mus tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. 45 Nkawd nrhiav tsis tau, ces nkawd rov mus nrhiav nws pem Yes Lus Xas Les. 46 Nkawd nrhiav tau peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws qhia Txoj Cai, nws mloog lawv thiab ho nug lawv. 47 Cov neeg uas tau hnov Yes Xus hais lus, puav leej yoob tas rau nws txoj kev to taub thiab rau nws cov lus teb. 48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias : "Me tub, vim li cas koj ua li ntawd rau wb ? Saib ! Koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav tsum ua kuv Txiv cov hauj lwm no lod ?” 50 Mab Liab thiab Yos Xes nkawd tsis to taub lo lus uas Yes Xus hais rau nkawd li. 51 Yes Xus nrog nkawd rov mus Nas Xas Les. Nws mloog nkawd lus.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 19th March 2019, 11:23 am

    TIM 20 LUB 3 HLIS 2019

    Hnub PLaub Lis Piam Ob Caij Plaub Caug Xyoo C Nruab Lis Piam Xyoo I

    Zaj Nyeem Ib: YES LES MIAS 18: 18-20


    18 Tsoom neeg hais tias : "Nej tuaj ! Peb sab laj saib peb yuav npaj ua phem li cas rau Yes Les Mias ! Vim txoj cai yeej yuav ploj tsis taus, yeej tseem yuav muaj cov Leej Choj qhia ntxiv; kev thoob tsib los yuav ploj tsis taus, yeej yuav muaj cov txawj ntuas neeg ntxiv; thiab tseem yuav muaj cov yaj saub txawj tshaj lus ntxiv thiab. Tuaj, peb kav tsij rhuav nws nyob hauv nws tej lus thiab peb tsis txhob quav ntsej mloog nws hais kiag li."
    19 HUAB TAIS, thov koj mloog kuv, thiab thov koj cuab pob ntseg rau kuv cov yeeb ncuab tej lus.
    20 Puas tsim nyog ua tej yam phem los pauj tej yam zoo? Lawv twb khawb ib lub qhov taub tos kuv lawm. HUAB TAIS, thov koj nco txog tias kuv tau sawv nyob ntawm koj xub ntiag hais lus zoo txog lawv rau koj kom koj txhob npau taws rau lawv.

    NPN 31: 5-6, 14, 15-16

    Txais: (17b) Huab Tais, thov koj cawm kuv, vim koj lub siab zoo.

    Koj yuav cawm kuv dim ntawm cov rooj ntxiab uas lawv caws tos kuv,
    vim koj yog kuv qhov chaw nkaum.
    Kuv muab kuv tus ntsuj plig tso rau hauv koj txhais tes;
    koj yeej yuav txhiv kuv dim, Huab Tais, tus Tswv Ntuj muaj siab pheej xeeb.

    Txais: (17b) Huab Tais, thov koj cawm kuv, vim koj lub siab zoo.

    Kuv hnov tsoom neeg hais lus ntxhi nyob txhua qhov txhia chaw
    ib ncig kuv, lawv ua rau kuv ntshai;
    lawv sib tuav tswv yim txog kuv tias lawv yuav txo kuv txoj sia.

    Txais: (17b) Huab Tais, thov koj cawm kuv, vim koj lub siab zoo.

    Tiam sis, Huab Tais, kuv tso siab lug rau koj,
    kuv hais tias: “Koj yog kuv tus Tswv Ntuj.”
    Kuv lub neej nyob hauv koj txhais tes; thov koj cawm kuv dim
    ntawm kuv cov yeeb ncuab thiab cov neeg hiam kuv lub xib teg.

    Txais: (17b) Huab Tais, thov koj cawm kuv, vim koj lub siab zoo.

    Zaj Cav lub Moo Zoo: ZAM 8: 12

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Huab Tais hais tias, kuv yog lub ntiaj teb qhov pom kev;
    leej twg lawv kuv qab yuav muaj txoj kev kaj lub neej.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: MT 20: 17-28

    17 Thaum Yes Xus mus pem Yes Lus Xas Les, Yes Xus coj Pab Kaum Ob mus rau ib cag, thaum lawv tab tom taug kev, ces nws hais rau lawv tias : 18 “Peb mus pem Yes Lus Xas Les, ces neeg Leej Tub yuav raug luag muag rau cov thawj leej choj thiab cov Kws Ntawv Ntshiab. Lawv yuav txiav lub txim tuag rau nws. 19 Lawv yuav muab nws rau cov neeg teev pej kum dab kom lawv thuam nws, nplawm nws thiab muab nws dai saum ntoo cuam. Hnub peb, nws yuav sawv rov los.” 20 Ces niam Ntxes Npes Dais txawm nrog nws ob tug tub los thov ib yam ntawm Yes Xus, nws txhos caug khoov qis qis thov. 21 Yes Xus hais rau nws tias : “Koj xav tau dab tsi ?” Nws hais rau Yes Xus tias : “Thov koj cia kuv ob tug tub no, ib tug zaum ntawm koj sab xis, ib tug zaum ntawm koj sab laug nyob hauv koj lub Ceeb Tsheej.” 22 Yes Xus teb tias : “Nej tsis paub qhov nej thov. Neb puas haus taus lub ntim uas kuv yuav haus ?” Nkawd teb tias : “Wb haus taus.” 23 Yes Xus hais rau nkawd tias : “Kuv lub ntim, mas neb yuav haus, tab sis qhov yuav tau zaum ntawm kuv sab xis thiab kuv sab laug, tsis yog kuv yuav muab rau neb. Kuv Txiv npaj qhov ntawd rau leej twg, mas yog leej twg tug." 24 Kaum leej thwj tim hnov cov lus thov ntawd, lawv npau taws rau nkawd ob kwv tij.
    25 Ces Yes Xus hu lawv kom txav los ze nws, nws hais tias : “Nej paub lawm tias nyov hauv cov pej kum haiv neeg cov thawj tswj ua nom kav pej xeem nruj nruj, thiab nej paub tias cov loj ua heev heev kom luag pom tias lawv muaj peev xwm. 26 Tab sis nyob hauv nej, mas yuav tsis txhob muaj li ntawd : leej twg xav ua tus loj nyob hauv nej, mas nws yuav ua nej tus tub txib. 27 Leej twg xav ua nej tus thawj, mas nws yuav ua nej tus qhev. 28 Ib yam li ntawd, Neeg Leej Tub tuaj tsis yog kom luag tsob hwb nws tiam sis yog tuaj tsob hwb sawv daws, thiab muab nws txoj sia los ua nqi txhiv coob leej.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 20th March 2019, 4:49 pm

    TIM 21 LUB 3 HLIS 2019

    Hnub Tsib Lis Piam Ob Caij Plaub Caug Xyoo C Nruab Lis Piam Xyoo I

    Zaj Nyeem Ib: YES LES MIAS 17: 5-10


    5 HUAB TAIS hais li no : "Tus tau hmoov phem yog tus neeg uas tso siab rau tib neeg, nws muab lub cev nqaij los ua nws lub zog, hos nws lub siab txav mus nyob deb ntawm HUAB TAIS. 6 Nws zoo li ib tsob ntsuag ntoo tuaj nyob hauv hav suab puam qhuav, txawm muaj yam zoo tuaj los nws tsis pom, vim nws nyob hauv tej thaj chaw qhuav qhawv hauv teb chaws suab puam, hauv cov av ntsev tsis muaj neeg nyob. 7 Tus tau txoj hmoov zoo yog tus neeg tso siab rau HUAB TAIS thiab vam khom HUAB TAIS. 8 Nws zoo li ib tsob ntoo cog nyob ze ntug dej; nws nrhau cag mus txog cov dej. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj, nws txi txiv tas mus li. 9 Neeg lub siab nkhaus tshaj lwm yam tas nrho, thiab phem kawg nkaus, leej twg yuav to taub nws tau? 10 Kuv, HUAB TAIS, kuv pom tau hauv neeg lub siab, tsom tau hauv neeg lub ntsws, ces kuv pub rau neeg kom phim li tus yam ntxwv nws coj thiab raws li cov hauj lwm nws ua."

    NPN 1: 1-2, 3, 4+6

    Txais: (40:5a) Cov muaj hmoov zoo yog cov uas tso siab rau Huab Tais.

    Tus muaj hmoov zoo yog tus uas tsis
    coj raws tus neeg phem zaj tswv yim,
    los taug cov neeg txhaum txoj kev,
    los zaum nrog cov neeg saib tsis taus luag tej,
    tiam sis nws zoo siab hlo coj HUAB TAIS txoj cai,
    thiab nws xav ntsoov HUAB TAIS
    txoj cai nruab hnub hmo ntuj.

    Txais: (40:5a) Cov muaj hmoov zoo yog cov uas tso siab rau Huab Tais.

    Nws zoo li ib tsob ntoo cog nyob ze cov dej ntws,
    nws txi txiv raws caij raws nyoog,
    thiab nws tej nplooj tsis txawj ntsws li.
    Nws ua yam twg tau yam ntawd. .

    Txais: (40:5a) Cov muaj hmoov zoo yog cov uas tso siab rau Huab Tais.

    Cov neeg phem tsis zoo li ntawd,
    lawv zoo li cov npluag nplej uas cua muab nplawm tawm mus.
    Vim HUAB TAIS saib ntsoov tus neeg ncaj txoj kev,
    hos tus neeg phem txoj kev yaj ntshis mus.

    Txais: (40:5a) Cov muaj hmoov zoo yog cov uas tso siab rau Huab Tais.

    Zaj Cav lub Moo Zoo: LK 8: 15

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Cov muaj hmoov zoo yog cov muaj ib lub siab dav khaws Lo Lus,
    thiab siv zog mus txog qhov kawg ces lawv txi tau txiv zoo.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: LK 16: 19-31


    Yes Xus hais rau cov Fas Lis Xais tias:
    19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos, nws niaj hnub noj tej phaj qav qab kawg. 20 Muaj ib tug pluag hu ua Las Ntxas Los pw ze ntawm tus nplua nuj lub rooj vag; nws ib ce puv qhov txhab tas. 21 Las Ntxas Los ntshaw noj tej yam poob ntawm tus nplua nuj lub rooj mov los kom tsau nws plab... Dev tseem tuaj yaim nws tej qhov txhab thiab.
    22 Muaj ib hnub, tus pluag tuag, cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus. 23 Tus nplua nuj nyob hauv ntuj txias teb tsaus, nws raug txom nyem loj. Nws tsa muag ntsia pom Has Nplas Has nyob deb thiab pom Las Ntxas Los nyob hauv nws xub ntiag. 24 Nws hu nrov nrov tias : ‘Txiv Has Nplas Has, thov koj khuv leej kuv, thov koj xa Las Ntxas Los tuaj muab nws tus ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no.’ Tab sis Has Nplas Has hais tias : 25 ‘Kuv tub, koj nco ntsoov tias thaum ua neej nyob koj tau txais koj qhov zoo tas lawm, hos Las Ntxas Los tau txais kev txom nyem. Zaum no Las Ntxas Los tau txais kev nplig siab nyob ntawm no, hos koj raug tsim txom. 26 Thiab tsis tag li ntawd : tseem muaj ib lub qhov ntuj tob kawg kem peb thiab nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no.’ 27 Ces tus nplua nuj hais tias : ‘Txiv, kuv thov koj xa Las Ntxas Los mus hauv kuv txiv tsev, 28 vim kuv muaj tsib tug kwv tij, kom Las Ntxas Los mus ua pov thawj qhia lawv, kom lawv tsis txhob tuaj nyob hauv qhov chaw raug tsim txom no.’ 29 Ces Has Nplas Has hais tias : ‘Lawv muaj Mais Xes thiab cov Yaj Saub, cia lawv mloog Mais Xes thiab cov Yaj Saub qhia.’ 30 Tab sis tus nplua nuj hais tias : ‘Txiv Has Nplas Has, yog tias ib tug hauv cov tuag mus cuag lawv, mas lawv thiaj yuav hloov siab.’ 31 Tab sis Has Nplas Has hais rau nws tias : ‘Yog lawv tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv, los lawv yeej yuav tsis ntseeg nws.’”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st March 2019, 6:11 am

    TIM 22 LUB 3 HLIS 2019

    Hnub Rau Lis Piam Ob Caij Plaub Caug Xyoo C Nruab Lis Piam Xyoo I

    Zaj Nyeem Ib: HAUV PAUS 37: 3-4, 12-13A, 17B-28A


    3 His Xas Lais hlub Yos Xes tshaj nws cov tub huv si, vim Yos Xes yug thaum nws twb laus laus lawm. Ces nws kom lawv xaws ib lub tsho ntev txaij zoo nkauj rau Yos Xes hnav. 4 Nws cov tij laug pom tias nws txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav hais ib lo lus zoo rau nws li.
    12 Yos Xes cov tij laug mus zov lawv txiv pab yaj noj zaub nyob Xis Kes lawm. 13a His Xas Lais hais rau Yos Xes tias : "Koj cov tij laug mus zov tsiaj dua tom lub tshav zaub Xis Kes lawm puas yog ? Los, kuv xa koj mus xyuas lawv."
    17b Ces Yos Xes mus nrhiav nws cov tij laug, nws nrhiav tau lawv nyob Dos Tas. 18 Lawv pom nws tseem tuaj txog deb. Thaum nws tuaj tsis tau txog, lawv sib tuav tswv yim tias yuav ua kom nws tuag. 19 Lawv sib tham tias : "Nej saib ! Niag neeg ua npau suav tuaj lawm ! 20 Zaum no, peb muab nws tua kiag thiab muab nws pov rau hauv ib lub qub qhov tim thaj, ces peb mus hais tias yog ib tug tsiaj qus tom nws lawm. Peb yuav pom tias nws cov npau suav leej tas nrho !" 21 Tiam sis Lus Npees hnov lawv tham, nws xav pab kom Yos Xes dim ntawm lawv tes. Nws hais tias : "Peb tsis txhob txo nws txoj sia." 22 Lus Npees hais ntxiv rau lawv tias : "Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws." Lus Npees hais li no, vim nws xav cawm Yos Xes ntawm lawv tes, nws thiaj li yuav coj tau Yos Xes rov mus rau nws txiv. 23 Ces thaum Yos Xes tuaj txog ntawm nws cov tij laug lawm, lawv muab nws lub tsho ntev txaij zoo nkauj uas nws hnav hle. 24 Lawv txhom nws thiab muab nws pov rau hauv lub qhov tim thaj uas yog ib lub qhuav tsis muaj dej.
    25 Ua li tas ces lawv mus zaum noj mov. Lawv tsa muag ntsia pom ib pab neeg Is Mas Es thauj ib co nra, lawv tuaj Nkas Las As tuaj. Lawv cov ntxhuav thauj ib co tshuaj tsw qab uas lawv yuav coj mus muag rau Hais Nkws Tos teb. 26 Ces Yus Das hais rau nws cov kwv tij tias : "Yog peb muab peb tus kwv tua thiab muab nws cov ntshav zais, peb yuav tau dab tsi ? 27 Nej los, peb muab nws muag rau cov neeg Is Mas Es xwb, peb txhob tsa peb txhais tes rau saum nws : vim nws twb yog peb tus kwv, yog tib co roj ntsha ib li peb thiab." Ces nws cov kwv tij mloog nws hais. 28 Thaum ntawd muaj ib co tub luam Mis Dias tuaj hla ntawd, ces lawv rub Yos Xes tawm hauv lub qhov dej los, lawv muab nws muag nees nkaum lub txiaj nyiag, rau cov neeg Is Mas Es ntawd.

    NPN 105: 16-17, 18-19, 20-21

    Txais: (5a) Nej cim ntsoov Huab Tais cov hwj huam loj nws tau ua cia.

    Thaum HUAB TAIS hu kom kev tshaib plab
    poob los rau saum lub teb chaws,
    thiab ua kom tej qoob loo uas yuav yug lawv lwj tas,
    nws tso ib tug neeg mus ua lawv ntej,
    yog Yos Xes, tus raug muag mus ua qhev.

    Txais: (5a) Nej cim ntsoov Huab Tais cov hwj huam loj nws tau ua cia.

    Lawv muab khawb hlau pav nws ko taw
    thiab muab kauj hlau khi nws caj dab.
    Thaum txog caij, kuj muaj tuaj raws li nws tau hais tseg,
    HUAB TAIS lo lus ua pov thawj tias nws yog tus ncaj.

    Txais: (5a) Nej cim ntsoov Huab Tais cov hwj huam loj nws tau ua cia.

    Tus vaj hu nws mus thiab tso nws tawm nkuaj,
    tus tswj cov haiv neeg muab kev twj lij rau nws.
    Tus vaj muab nws ua tus kav tus vaj lub vaj lub tsev
    thiab tus tswj tas txhua yam uas yog tus vaj tug.

    Txais: (5a) Nej cim ntsoov Huab Tais cov hwj huam loj nws tau ua cia.

    Zaj Cav lub Moo Zoo: ZAM 3: 16

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Tswv Ntuj hlub lub ntiaj teb npaum li ntawd
    nws thiaj tso nws tib leeg tub los
    kom xwv txhua leej uas ntseeg nws
    yuav muaj txoj sia nyob mus li.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: MT 21: 33-43, 45-46

    Yes Xus hais rau cov thawj leej choj thiab cov txwj laus tias:
    33 “Nej mloog dua ib zag paj lug li no. Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb, nws khawb qhov ntim ib lub zeb zom txiv cawv, thiab tseem txhim tau ib lub lawj siab siab rau hauv. Nws ntiav ib co neeg zov, ces nws tawm rooj mus kev deb lawm. 34 Thaum yuav txog caij de txiv, nws xa nws cov tub txib mus nqa txiv cawv ntawm cov zov teb. 35 Cov neeg zov teb ntes cov tub txib, muab ib tug ntaus, muab ib tug tua, muab pob zeb los txawb lwm tus kom tuag. 36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov. 37 Qhov kawg, nws xa nws tus tub mus cuag lawv, nws xav tias : ‘Lawv yuav hwm kuv tus tub.’ 38 Tab sis cov zov teb pom dheev tus tub, lawv sib tham tias : ‘Tus ntawd yog tus yuav txais lub cuab tam. Tsuag tsuag ! Peb muab nws tua, lub cuab tam thiaj yuav yog peb tug.’ 39 Ces lawv ntes ntho tus tub, coj nws mus rau tom ntug teb thiab muab nws tua. 40 Thaum tus tswv teb txiv cawv los txog, nws yuav ua dab tsi rau cov zov teb ntawd?” 41 Lawv teb rau Yes Xus tias : “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.” 42 Yes Xus hais rau lawv tias : “Nej puas tau nyeem ib zaug li txog cov lus hauv Ntawv tias :
    ‘Lub pob zeb uas cov tub txhim tsev muab pov tseg, txia ua lub pob zeb txheem kaum tsev; yog Huab Tais ua kom muaj tau li ntawd; yog ib yam zoo kawg nkaus rau ntawm peb qhov muag.’
    43 Vim li ntawd, kuv hais rau nej tias: Ntuj lub Ceeb Tsheej yuav raug muab thau ntawm nej los pub rau ib haiv neeg uas yuav tu kom txi txiv zoo.”
    45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
    46 Lawv nrhiav kev ntes Yes Xus, tab sis lawv ho ntshai tsoom sid, vim sawv daws saib Yes Xus yog ib tug yaj saub.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 22nd March 2019, 8:08 am

    TIM      23       LUB      3      HLIS      2019

    Hnub Xya Lis Piam Ob Caij Plaub Caug Xyoo C Nruab Lis Piam Xyoo I

    Hwm LN Toribio Alfonso de Mogrovejo (Turibius of Mogrovejo)

    Zaj Nyeem Ib: MIS KES 7: 14-15, 18-20


    14 Thov koj tuav koj rab pas ua tswv zov yaj coj koj haiv neeg mus nog zaub, lawv yog pab yaj hauv koj lub cuab tam; lawv nyob ncaim npoj nyob hauv ib koog zoov uas muaj av zoo ua noj. Kheev lam lawv tau mus nog zaub nyob Npas Sas thiab nyob Nkas Las As xws li yav thaum ub mas!
    15 Xws li thaum lub caij thaum nej tawm Hais Nkws Tos teb los, kuv yuav cia nej pom tej yam hwj huam loj.
    18 Tus Tswv Ntuj twg thiaj yuav muab qhov tsis zoo tshem thiab zam txhaum zoo li koj zam rau koj haiv neeg seem ? Thiaj yuav tsis npau taws tas mus li tiam sis nyiam ua lub siab zoo khuv leej neeg?
    19 Thov koj hlub peb ib zaug ntxiv, thov muab peb tej kev phem tsuj hauv av, muab tas peb tej txhaum pov lawm hauv qab tiv txwv !
    20 Thov koj ua zoo rau Yas Kos, pub koj txoj kev hlub pheej xeeb rau Has Nplas Has, xws li koj tau cog lus rau peb cov yawg koob thaum ntxov ub los.

    NPN 103: 1-2, 3-4, 9-10, 11-12

    Txais: (8a) Huab Tais siab zoo thiab khuv leej neeg.

    Kuv tus ntsuj plig, koj cia li cav txog HUAB TAIS;
    kuv tej siab ntsws, nej cia li cav txog nws lub npe ntshiab.
    Kuv tus ntsuj plig, koj cia li cav txog HUAB TAIS,
    koj tsis txhob hnov qab nws tej kev ua zoo ib qho li.

    Txais: (8a) Huab Tais siab zoo thiab khuv leej neeg.

    Nws tau zam tas koj tej txhaum rau koj,
    nws tau kho tas koj tej kev mob nkeeg zoo hlo.
    Nws tau cawm koj txoj sia ntawm kev puas nstoog,
    nws tau muab nws txoj kev ua siab zoo thiab kev khuv leej rau koj ntoo.

    Txais: (8a) Huab Tais siab zoo thiab khuv leej neeg.

    Nws tsis npau taws tas mus li,
    nws kuj tsis chim tas mus ib txhis.
    Nws tsis nplua peb raws li peb tau ua txhaum,
    nws tsis ua pauj rau peb raws li peb tau ua phem.

    Txais: (8a) Huab Tais siab zoo thiab khuv leej neeg.

    Lub ntuj nyob siab tshaj saum lub ntiaj teb npaum li cas,
    nws kuj hlub cov neeg uas hwm nws tshaj npaum li ntawd.
    Sab hnub tuaj nyob deb sab hnub poob npaum li cas,
    nws kuj tau muab peb tej txhaum pov tseg deb ntawm peb npaum li ntawd .

    Txais: (8a) Huab Tais siab zoo thiab khuv leej neeg.

    Zaj Cav lub Moo Zoo: LK 15: 18

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Kuv yuav sawv mus, kuv yuav mus cuag kuv txiv thiab hais rau nws tias,
    Txiv, kuv tau ua txhaum rau Ntuj thiab rau koj lawm.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: LK 15: 1-3, 11-32

    1 Tas cov neeg sau se thiab cov neeg txhaum txav los ze Yes Xus, lawv xav mloog Yes Xus hais lus. 2 Ces cov fas lis xais thiab cov thoob xwm ntawv cem zom zaws tias : "Tus neeg ntawd txais cov neeg txhaum, nws tseem nrog lawv noj mov thiab !" 3 Yes Xus thiaj hais zaj paj lug no rau lawv :
    11 “Ib tug neeg muaj ob tug tub. 12 Tus tub ntxawg hais rau nws txiv tias : ‘Txiv, koj muab koj lub cuab tam feem uas yog kuv tug faib rau kuv.’ Ces leej txiv thiaj muab nws lub cuab tam faib rau nws ob tug tub. 13 Ob peb hnub tom qab, tus tub ntxawg sau feem uas yog nws tug tas huv si, nws khiav mus rau ib lub teb chaws nyob deb. Nyob ntawd nws muab nws lub cuab tam phob tas vim nws coj ib lub neej tsis tsim txiaj. 14 Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. 15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. 16 Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj li. 17 Nws lub siab mam li ras dheev tias : Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 18 Kuv xav mus cuag kuv txiv, kuv yuav hais rau nws tias : Txiv, kuv ua txhaum rau Ntuj thiab rau koj lawm. 19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog. 20 Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws lawm; nws txiv hlub nws kawg. Leej txiv khiav loo mus puag nkaus tus tub, thiab nwj nws tub tub ntev loo. 21 Tus tub hais rau leej txiv tias : 'Txiv, kuv tau ua txhaum rau Ntuj thiab rau koj. Kuv tsis tsim nyog koj hu kuv ua koj tus tub ntxiv.' 22 Tab sis leej txiv hais rau cov tub txib tias : 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib ntiv nplhaib los ntxig nws ntiv tes, thiab ib nkawg khau los ntxig nws ko taw. 23 Nej cab tus xyuas nyuj rog los tua. Peb noj nqaij, peb ua lom zem. 24 Vim tias kuv tus tub no tuag lawm, nyem no nws ciaj rov los dua. Nws ploj lawm, nyem no rov nrhiav tau nws dua lawm.' Ces lawv sawv daws noj haus lom zem. 25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. 26 Nws hu ib tug tub txib kom tawm tuaj, nws nug saib lub suab ntawd yog dab tsi. 27 Tus tub txib hais rau nws tias : 'Yog koj tus kwv rov qab los tsev lawm, koj txiv tua tus xyuas nyuj rog, vim nws tau pom koj tus kwv rov los noj qab nyob zoo.' 28 Ces tus tub hlob npau taws, nws tsis kam nkag los hauv tsev. Leej txiv tawm tuaj thov kom nws los tsev. 29 Tab sis tus tub hlob teb rau nws txiv tias : 'Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem li. 30 Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws !' 31 Ces leej txiv hais rau tus tub hlob tias : 'Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. 32 Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los dua, nws ploj lawm, nyem no rov nrhiav tau nws dua lawm."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 24th March 2019, 8:06 am

    TIM 25 LUB 3 HLIS 2019

    Hnub Ob Lis Piam Peb Caij Plaub Caug Xyoo C Nruab Lis Piam Xyoo I

    Hwm txog lub Caij tus Tshiab Tuaj Xa Lus rau Mab Liab

    Zaj Nyeem Ib: HIS XAIS 7: 10-14; 8: 10c


    10 HUAB TAIS rov hais lus rau As Kas tias:
    11 "Koj thov HUAB TAIS koj tus Tswv Ntuj kom nws ua ib lub cim rau koj pom, kom yog ib lub cim nyob tob npaum puag hauv qab ntuj txias teb tsaus, los puas kom nyob siab npaum puag saum cov chaw siab puag saum ntuj."
    12 As Kas hais tias : "Kuv yuav tsis thov. Kuv yuav tsis sim HUAB TAIS."
    13 Ces His Xais hais tias: "Das Vis tsev neeg, nej mloog ! Nej ua kom tej tib neeg ceeb laj tas nrho, los tsis txaus nej siab! Nej tseem yuav ua kom kuv tus Tswv Ntuj ceeb laj thiab lod?
    14 Vim li ntawd, Huab Tais yuav pub ib lub cim rau nej. Nej ntsia saib ! Tus nkauj tsim txiaj xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es,
    8 10c txhais tias: “Tswv Ntuj nrog peb nyob!”

    NPN 40: 7-8A, 8B-9, 10, 11

    Txais: (8a+9a) Kuv nyob ntawm no, Huab tais, kuv tuaj ua ywj koj lub siab.

    Koj tsis xav yuav tsiaj los txhiam xws los txi rau koj,
    koj muab ib lub pob ntseg xav mloog lus rau kuv;
    koj tsis xav tau cov tsiaj hlawv txi ntuj los cov tsiaj them txim txhaum.
    Ces kuv hais tias: “Cia kuv tuaj.”

    Txais: Kuv nyob ntawm no, Huab tais, kuv tuaj ua ywj koj lub siab.

    “Nyob hauv kauj ntawv, muaj lus sau tseg rau kuv
    kom kuv ua ywj koj siab nyiam; yog qhov kuv zoo siab hlo ua.
    Tswv Ntuj, koj txoj cai nyob rawv hauv kuv nruab siab!”

    Txais: Kuv nyob ntawm no, Huab tais, kuv tuaj ua ywj koj lub siab.

    Kuv tau tshaj koj txoj kev ncaj nyob hauv lub txoos loj muaj neeg coob;
    kuv tsis tau kaw kuv qhov ncauj, Huab tais, koj yeej paub.

    Txais: Kuv nyob ntawm no, Huab tais, kuv tuaj ua ywj koj lub siab.

    Kuv tsis tau muab koj txoj kev ncaj zais cia rau nruab siab;
    kuv tau piav txog koj txoj kev pheej xeeb thiab koj txoj kev cawm neeg;
    kuv tsis tau zais tsis qhia koj txoj kev hlub
    thiab kev tseeb rau lub txoos muaj neeg coob.

    Txais: Kuv nyob ntawm no, Huab tais, kuv tuaj ua ywj koj lub siab.

    Zaj Nyeem Ob: HES NPLAWS 10: 4-10

    Cov kwv tij,
    4 Ntshav nyuj ntshav tshis daws txhaum tsis tau.
    5 Vim li ntawd, thaum Leej Pleev tuaj nyob ntiaj teb no, nws thiaj hais tias : “Tswv Ntuj, cov thaj txi Ntuj thiab cov paj tshab, mas koj tsis xav yuav, koj thiaj puab ib lub cev rau kuv.
    6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais.
    7 Kuv thiaj hais tias : ‘Tswv Ntuj, cia kuv tuaj ua ywj koj siab nyiam, raws li kauj ntawv sau hais txog kuv.’
    8 Leej Pleev xub hais li no : ‘Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais;’ vim tej ntawd yog tej yam uas Txoj Cai qhia kom txi.
    9 Ces Leej Pleev hais ntxiv tias : ‘Kuv tuaj ua ywj koj siab nyiam.’ Li ntawd, Leej Pleev rhuav thawj txoj cai, nws tsa ib txog tshiab los hloov.
    10 Qhov Tswv Ntuj nyiam ntawd yog ua kom peb ntshiab tuaj nyob hauv Yes Xus Pleev txoj kev txi nws lub cev rau Ntuj, nws tsuas txi ib zaug xwb pub rau txhua leej txhua tus.

    Zaj Cav lub Moo Zoo: ZAM 1: 14AB

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Tswv Ntuj Lo Lus yuav ib lub cev nqaij thiab tuaj nrog peb nyob,
    peb tau pom nws lub hwj chim.

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Ntawv Moo Zoo: LK 1: 26-38

    26 Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais teb, hu ua Nas Xas Les. 27 Tus ntxhais ntawdb raug muab qhaib rau ib tug txiv neej hu ua Yos Xes, xeem Das Vis lawm. Tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws zaum. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tau zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj rau kuv raws li koj hais." Tus Tshiab thiaj tso Mab Liab tseg.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 25th March 2019, 6:55 am

    TIM 26 LUB 3 HLIS 2019

    Hnub Peb Lis Piam Peb Caij Plaub Caug Xyoo C Nruab Lis Piam Xyoo I

    Zaj Nyeem Ib: DAS NIAS 3: 25, 34-43


    25 As Xas Lias sawv ntsug hauv cov nplaim taws, nws qhib ncauj thov Ntuj li no :
    34 "Huab Tais, vim koj lub npe, thov koj tsis txhob tso peb pov tseg mus li; koj tsis txhob thim koj lo lus koj tau cog. 35 Koj tsis txhob thau koj lub txiaj ntsim ntawm peb rov qab, vim koj saib txog koj tus phooj ywg Has Nplas Has, koj tus tub txib His Xas Has thiab koj tus Ntshiab His Xas Lais. 36 Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj, cuag li cov suab zeb nyob ntawm ntug hiav txwv. 37 Huab Tais, hnub no peb yog ib haiv neeg tsawg tshaj lwm haiv neeg, thiab nyob tas ntiaj teb peb poob qis kawg nkaus vim peb cov txhaum. 38 Nyem no, peb tsis muaj vaj ntxwv, tsis muaj Yaj Saub, tsis muaj tus coj li, peb tsis muaj tsiaj hlawv txi ntuj, tsis paj tshab los qoob loo, tsis muaj xyab hlawv txi Ntuj, tsis muaj qhov chaw yuav cev paj tshab rau koj kom tau ua yam xis koj siab li. 39 Tab sis vim peb muaj lub siab xav lees txhaum thiab peb muaj lub tswv yim tsis muab hlob, thov koj txais peb, ib yam li txais ib co laug tshis thiab ib co heev nyuj thiab ib txhiab tus yaj rog hlawv txi rau koj. 40 Hnub no peb muab peb cev ua thaj txi Ntuj rau koj raws li ntawd, thov kom koj zoo siab txais: peb xav muab tas peb lub siab los raws koj, vim cov tso siab rau koj yuav tsis raug kev poob ntsej muag. 41 Nyem no peb muab tas peb lub siab lub ntsws los raws koj, los hwm koj thiab nrhiav koj lub ntsej muag. 42 Thov koj tsis txhob cia peb poob rau kev txaj muag, tiam sis koj mloog koj lub siab zoo thiab khuv leej neeg, koj ua zoo rau peb. 43 Thov koj ua hwj huam loj los cawm peb, Huab Tais, thiab ua kom koj lub npe tau koob meej."

    NPN 25: 4-5AB, 6+7BC, 8-9

    Txais: (6a) Huab Tais, thov koj nco ntsoov koj txoj kev hlub.

    Huab Tais, thov qhia koj tej kev rau kuv paub,
    thov qhia kom kuv txawj taug koj tej kev,
    koj coj kuv mus raws koj txoj kev tseeb
    thiab qhia rau kuv kawm,
    vim koj yog Tswv Ntuj, tus cawm kuv.

    Txais: (6a) Huab Tais, thov koj nco ntsoov koj txoj kev hlub.

    Huab Tais, thov koj nco ntsoov tias
    koj yeej ib txwm muaj lub siab zoo,
    thiab muaj kev hlub txij puag thaum ub los.
    Huab Tais, koj muaj lub siab hlub neeg,
    thov koj nco txog kuv vim koj lub siab zoo.

    Txais: (6a) Huab Tais, thov koj nco ntsoov koj txoj kev hlub.

    Huab Tais yog tus ncaj tus zoo,
    nws coj tus neeg txhaum rov los taug txoj kev zoo.
    Nws coj tus neeg me mus raws txoj kev ncaj,
    nws qhia nws txoj kev rau tus neeg me taug.

    Txais: (6a) Huab Tais, thov koj nco ntsoov koj txoj kev hlub.

    Zaj Cav lub Moo Zoo: Yos Es 2: 12-13

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    HUAB TAIS hais tias, nyem no
    nej cia li muab tas nej lub siab tig rov los cuag kuv,
    vim kuv yog tus muaj siab zoo thiab khuv leej neeg.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: MT 18: 21-35

    21 Thaum ntawd, Pob Zeb txav los hais rau Yes Xus tias : “Huab Tais, yog kuv tus kwv ua txhaum rau kuv, kuv yuav zam pes tsawg zaus ? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais rau koj tias 'xya zaus'. Kuv hais rau koj tias, 'xya caum xya zaus'. 23 Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, ces luag coj ib tug tub txib uas tshuav nuj nqis ib vam nras nyiaj, tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus vaj ko taw, nws pe tus vaj, nws hais tias : ‘Thov koj ua siab ntev rau kuv, kuv yuav them kom tas rau koj.’ 27 Tus vaj hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug npawg, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus npawg caj dab, zawm tus npawg caj pas, thiab hais tias : ‘Them koj cov nqi los.’ 29 Nws tus npawg txhos caug ntua ntawm nws ko taw thov tias : ‘Thov koj ua siab ntev rau kuv, kuv yuav them rau koj.’ 30 Tab sis tus tub txib ntawd tsis kam li, nws kom luag muab nws tus npawg kaw hauv tsev loj faj mus txog hnub tus npawg them nuj nqis tas huv tib si rau nws. 31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : “Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus npawg zoo li kuv tau hlub koj ?" 34 Ces tus vaj npau taws heev, nws muab tus tub txib rau cov tub hiam neeg hiam nws mus txog hnub nws them nws cov nuj nqis tas huv tib si. 35 Nej txhua tus, yog nej tsis zam hauv nruab siab rau nej ib tug kwv tij, mas kuv Txiv nyob saum Ntuj kuj yuav ua ib yam li ntawd rau nej thiab.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 26th March 2019, 8:44 am

    TIM 27 LUB 3 HLIS 2019

    Hnub Plaub Lis Piam Peb Caij Plaub Caug Xyoo C Nruab Lis Piam Xyoo I

    Zaj Nyeem Ib: TXOJ CAI OB 4: 1, 5-9


    Mais Xes hais rau tsoom neeg tias:
    1 "Cov His Xas Lais, zaum no nej mloog txoj cai lij choj, thiab tej kab lis kev cai uas kuv qhia rau nej, kom nej coj raws nraim li ntawd, ces nej yuav muaj txoj sia thiab yuav tau nkag mus hauv thiab yuav txeeb tau lub teb chaws uas HUAB TAIS nej cov yawg koob tus Tswv Ntuj muab rau nej nyob, los ua nej tug.
    5 Li ntawd, kuv ua raws li Huab Tais kuv tus Tswv Ntuj tau kom kuv ua, kuv qhia rau nej ib co kev cai lij choj uas nej yuav tau coj raws li ntawd nyob hauv lub teb chaws nej yuav mus txeeb los ua nej tug. 6 Nej yuav mloog yuav coj raws nraim cov lus qhia ntawd, nej thiaj yuav yog neeg thoob tsib neeg ntse txawj to taub nyob ntawm cov pej kum haiv neeg xub ntiag. Thaum lawv hnov hais txog txoj cai no, lawv yuav tsa suab hlo cav tias : ‘Haiv neeg loj ntawd thiaj yog ib haiv neeg thoob tsib thiab ntse txawj to taub tiag!’ 7 Vim haiv neeg loj twg thiaj muaj ib tug tswv ntuj nyob ze ze lawv li HUAB TAIS peb tus Tswv Ntuj nyob ze ze peb niaj zaus thaum peb hu txog nws ? 8 Haiv neeg loj twg thiaj muaj ib co cai lij choj thiab ib co kab lis kev cai ncaj npaum li Txoj Cai uas kuv muab qhia rau nej hnub no ? 9 Nej yuav tau ceev faj nraim, thiab nej yuav tau txuag nej txoj sia kom zoo; nej yuav tau tsis txhob hnov qab tej yam nej qhov muag tau pom xyeem, yuav tsis txhob muab tej ntawd tshem tawm ntawm nej lub siab mus ib hnub nyob hauv nej lub neej li; tiam sis nej yuav tsum tau qhia rau nej cov me nyuam paub, thiab rau nej cov me nyuam cov me nyuam huv tib si.

    NPN 147: 12-13, 15-16, 19-20

    Txais: (12a) Yes Lus Xas Les, koj cia li cav txog Huab Tais.

    Yes Lus Xas Les, koj cia li cav txog Huab Tais lub koob meej,
    Xis Yoos, koj cia li qhuas txog koj tus Tswv Ntuj.
    Vim nws tau ua kom cov tab ntawm koj cov rooj vag khov tuaj lawm,
    nws tau foom hmoov zoo rau koj cov me nyuam nyob hauv koj.

    Txais: (12a) Yes Lus Xas Les, koj cia li cav txog Huab Tais.

    Nws xa nws lo lus qhuab qhia tuaj rau ntiaj teb;
    nws lo lus khiav nrawm nroos!
    Nws tseb daus los zoo li plaub yaj,
    nws pov cov te los zoo li tshauv.

    Txais: (12a) Yes Lus Xas Les, koj cia li cav txog Huab Tais.

    Nws tau tshaj nws lo lus rau Yas Kos,
    nws cov kev cai thiab lij choj rau His Xas Lais.
    Nws tsis tau ua zoo li ntawd rau lwm haiv neeg twg li,
    nws tsis tau qhia nws cov lij choj rau lawv paub li.

    Txais: (12a) Yes Lus Xas Les, koj cia li cav txog Huab Tais.

    Zaj Cav lub Moo Zoo: ZAM 6: 63C, 68C

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    HUAB TAIS, koj cov lus yog tswv yim thiab txoj sia,
    koj muaj cov lus muaj txoj sia nyob mus li.

    Txais: Huab Tais Yes Xus Pleev, Tswv Ntuj Lo Lus, peb cav txog koj.

    Ntawv Moo Zoo: MT 5: 17-19

    Yes Xus hais rau nws cov thwj tim tias:
    17 “Nej txhob xav tias kuv tuaj rhuav Txoj Cai thiab cov Yaj Saub : kuv tsis yog tuaj rhuav, kuv tuaj qhia ntxiv kom thoob xwb.
    18 Kuv hais tseeb rau nej tias : ua ntej lub ntuj thiab lub teb yuav dua mus, tsis muaj ib tug txwm ntawv, los ib lub cim ntawv me me hauv Txoj Cai yuav ploj li, tas ib puas tsav yam yuav tsum tshwm sim tuaj tso.
    19 Vim li ntawd, tus twg hla ib txog cai me nyob hauv cov lus qhia, thiab nws qhia kom luag ua xws li nws, mas Ntuj yuav saib tus ntawd me tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, Ntuj yuav saib nws yog tus loj nyob hauv Ntuj lub Ceeb Tsheej.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 27th March 2019, 7:34 am

    TIM 28 LUB 3 HLIS 2019

    Hnub Tsib Lis Piam Peb Caij Plaub Caug Xyoo C Nruab Lis Piam Xyoo I

    Zaj Nyeem Ib: YES LES MIAS 7: 23-28


    HUAB TAIS hais tias:
    23 “Qhov kuv tau qhia kom lawv ua yog li no: ‘Nej mloog kuv lub suab, ces kuv yuav yog nej tus Tswv Ntuj thiab nej yuav yog kuv haiv neeg. Nej yuav taug nraim txoj kev uas kuv qhia kom nej taug, nej thiaj yuav muaj kev kaj siab.’ 24 Tab sis lawv tsis mloog, tsis tig pob ntseg los li, lawv ua raws lawv lub siab xav, raws lawv lub siab twm xeeb thiab lub siab phem xwb, lawv tig rov tom qab tsis yog tig mus pem hauv ntej. 25 Txij hnub nej cov yawg koob tawm hauv Hais Nkws Tos teb los txog hnub no, kuv tau xa kuv cov tub txib Yaj Saub tuaj rau nej tsis tseg, kuv tsis nkees li. 26 Tab sis lawv tsis mloog tsis tig pob ntseg los li, lawv ua xwb qwb txhav qhi, lawv tseem coj phem dua lawv cov yawg koob lawm thiab. 27 Koj yuav hais cov lus no tas huv si rau lawv, tiam sis lawv yuav tsis mloog koj li thiab. Koj yuav hu lawv, tab sis lawv yuav tsis teb koj. 28 Ces koj yuav hais rau lawv tias : ‘Nov yog haiv neeg uas tsis mloog HUAB TAIS nws tus Tswv Ntuj hais thiab tsis kam txais tej lus qhuab qhia li. Kev mloog lus ploj lawm, lawv lub ncauj twb tsis hais txog ntxiv.’”

    NPN 95: 1-2, 6-7, 8-9

    Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

    Nej tuaj peb hu nkauj luag ntxhi rau HUAB TAIS,
    peb qw suab cav txog lub Tsua Cawm peb.
    Peb tuaj nyob ntawm nws xub ntiag ua nws tsaug,
    peb hu nkauj paj nruag luag ntxhi rau nws.

    Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

    Tuaj peb mus khoov pe hawm nws,
    peb mus txhos caug ntawm tus HUAB TAIS tsim peb los xub ntiag.
    Vim nws yog peb tus Tswv Ntuj,
    peb yog haiv neeg nws saib xyuas, pab yaj nws coj.

    Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

    Xav kom hnub no nej mloog nws lus suab hais:
    “Nej tsis txhob ua lub siab tawv ncauj li nyob Me Lis Npas,
    thaum lub caij uas nyob Mas Xas hauv teb chaws suab puam,
    qhov chaw uas nej phaj txiv tau sim kuv;
    lawv twb tau pom kuv tej hauj lwm los lawv tseem sim kuv thiab.”

    Txais: ( 8 ) Hnub no yog nej hnov nws lub suab, nej tsis txhob ua lub siab tawv ncauj.

    Zaj Cav lub Moo Zoo: YOS ES 2: 12-13

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab muaj hwj huam.

    HUAB TAIS hais tias, lub sij hawm no,
    nej muab tas nrho nej lub siab tig rov los cuag kuv,
    vim kuv muaj lub siab hlub thiab khuv leej neeg.

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab muaj hwj huam.

    Ntawv Moo Zoo: LK 11: 14-23

    14 Yes Xus ntiab ib tug dab phem, yog tus dab ruam. Thaum tus dab tawm mus lawm, tus neeg ruam hais tau lus tuaj; pab neeg coob nyob ntawd poob siab loj. 15 Lawv muaj ib txhia hais tias : "Nws hu txog tus vaj dab phem Npes Ntxes Npus los ntiab dab." 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj rau lawv pom. 17 Tab sis Yes Xus paub qhov lawv xav, nws hais rau lawv tias : "Lub teb chaws twg rov tawm tsam nws tus kheej, mas nws kawg raug kev puas tsuaj, tej vaj tse ib lub yuav vau tsuam ib lub. 18 Yog tias Xas Tas rov tawm tsam Xas Tas, mas nws lub ceeb tsheej yuav ua cas nyob tau ruaj ? Vim nej hais tias kuv hu txog Npes Ntxes Npus los ntiab dab; 19 yog kuv vam txog Npes Ntxes Npus los ntiab dab no, nej cov tub ho vam txog leej twg los ntiab dab ? Ua li mas, nej cov tub yuav txiav txim rau nej. 20 Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm. 21 Thaum ib tug neeg muaj zog tuav ntaj tuav hmuv zov rawv nws lub tuam tsev, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, mas luag yuav txeeb nws cev ris tsho hlau uas yog nws lub chaw tso siab, ces luag yuav muab nws tej cuab yeej cuab tam los sib faib. 23 Leej twg tsis nrog kuv, mas yog nws tiv kuv; leej twg tsis nrog kuv muab sau los cia, mas nws ua kom ploj tas.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 28th March 2019, 5:14 am

    TIM 29 LUB 3 HLIS 2019

    Hnub Rau Lis Piam Peb Caij Plaub Caug Xyoo C Nruab Lis Piam Xyoo I

    Zaj Nyeem Ib: OS XES 14: 2-10


    Huab Tais hais tias:
    2 “Cov His Xas Lais, nej cia li rov qab los cuag HUAB TAIS nej tus Tswv Ntuj; nej tau ntog vim nej cov txhaum. 3 Nej yuav npaj ib co lus, ces nej yuav rov los cuag HUAB TAIS. Nej yuav hais rau nws tias : ‘Thov koj tshem peb cov txhaum tas huv si pov tseg, koj tsuas saib qhov zoo xwb. Peb yuav muab peb di ncauj ua cov heev nyuj peb txi rau koj. 4 As Xws yuav cawm tsis tau peb, peb yuav tsis caij nees, peb yuav tsis hais ntxiv tias : ‘Peb tus Tswv Ntuj !’ rau tej yam peb txhais tes puab. Vim yog nyob ntawm koj, tus me nyuam ntsuag thiaj tau txais kev khuv leej.’
    5 Ces kuv yuav kho lawv kom lawv txoj kev ntxeev siab zoo hlo, kuv yuav hlub lawv tsis muaj tus yuam kuv, vim kuv tau tshem kuv txoj kev npau taws rau lawv mus lawm. 6 Kuv yuav zoo li ib co lwg los yug His Xas Lais, ces nws yuav tawg taus paj zoo li tsob paj ‘lis’, nws yuav nrhau cag khov xws li cov ntoo ciab nyob Lis Npaas. 7 Nws yuav huam kaus tshiab ntau tuaj, yuav zoo saib xws li tsob txiv ntoo roj, yuav tsw qab xws li cov hav zoov Lis Npaas. 8 Lawv yuav rov los zaum nyob hauv nws qhov ntxoov ntxoo; lawv yuav ua kom cov nplej mov mog rov ciaj tuaj; lawv yuav rov hlob tuaj xws li cov hmab txiv cawv uas yuav tawg paj thiab yuav ua kom nws nto moo xws li cov cawv nyob Lis Npaas. 9 Es Fais puas tseem yuav vam txog tej pej kum dab ntxiv? Kuv yog tus mloog nws tej lus thov, kuv saib ntsoov nws; kuv zoo puav tam li ib tug ntoo thuv ntsuab mus li; yog vim kuv, koj thiaj txi txiv tau.
    10 Tus neeg thoob tsib twg thiaj yuav to taub tej yam no, thiab ntse txaus kom paub tau tej no? HUAB TAIS txoj kev yog kev ncaj, cov neeg siab ncaj thiaj yuav taug tau, hos cov neeg txhaum yuav ntog."

    NPN 81: 6C-8A, 8BC-9, 10-11AB, 14+17

    Txais: (11+9a) Kuv yog HUAB TAIS koj tus Tswv Ntuj, cia li mloog kuv hais.

    Kuv hnov ib co lus tshiab tias:
    “ Kuv txo nws lub nra ntawm nws xub pwg,
    nws ob txhais tes dim plaws tsis tau tuav lub pob tawb ntxiv.
    Koj muaj kev nyuaj siab, koj tau hu, ces kuv tau tuaj pab koj.”

    Txais: Kuv yog HUAB TAIS koj tus Tswv Ntuj, cia li mloog kuv hais.

    “Koj tsis pom kuv, kuv tau teb koj nyob hauv xob quaj.
    Kuv tau sim koj nyob ntawm cov dej Mes Lis Npas.
    Kuv haiv neeg, nej mloog kuv, kuv yuav ntuas nej.
    His Xas Lais, koj puas yuav mloog kuv?”

    Txais: Kuv yog HUAB TAIS koj tus Tswv Ntuj, cia li mloog kuv hais.

    “Nej yuav tsis txhob muaj dua lwm tus tswv ntuj txawv txawv,
    tsis txhob teev hawm lwm tus pej kum dab.
    Kuv, HUAB TAIS, yog nej tus Tswv Ntuj
    tus tau coj nej tawm Hais Nkws Tos teb los.”

    Txais: Kuv yog HUAB TAIS koj tus Tswv Ntuj, cia li mloog kuv hais.

    “Kheev lam kuv haiv neeg cuab pob ntseg mloog kuv hais,
    kheev lam His Xas Lais taug kuv txoj kev,
    mas kuv yuav muab cov nplej mov mog qab tshaj rau lawv noj,
    thiab kuv yuav tho cov zib mu saum tsua los daws lawv nqhis.”

    Txais: Kuv yog HUAB TAIS koj tus Tswv Ntuj, cia li mloog kuv hais.

    Zaj Cav Lub Moo Zoo: MT 4: 17

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Huab Tais hais tias, nej hloov siab mog,
    Ntuj lub Ceeb Tsheej nyob ze ze lawm.

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Ntawv Moo Zoo: MK 12: 28-34

    28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo lus qhia ?" 29 Yes Xus teb rau nws tias : "Thawj lo lus qhia yog lo lus no : ‘His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’ 31 Lo lus qhia ob yog lo lus no : ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws lawm. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog qhov zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tias tus kws Ntawv Ntshiab teb ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug nws ntxiv.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 29th March 2019, 10:25 am

    TIM 30 LUB 3 HLIS 2019

    Hnub Xya Lis Piam Peb Caij Plaub Caug Xyoo C Nruab Lis Piam Xyoo I

    Zaj Nyeem Ib: HOS 6:1-6


    Cov His Xas Lais hais tias :
    1 "Nej tuaj, peb rov qab mus cuag HUAB TAIS. Nws yog tus dua kom ntuag, tab sis nws yuav rov kho peb kom zoo tuaj. Nws tau nplawm peb, tab sis nws yuav qhwv peb cov qhov txhab. 2 Nws tos ob hnub ces nws yuav rov muab txoj sia rau peb. Hnub peb, nws yuav tsa peb ciaj sawv rov los, kom peb tau nyob ntawm nws xub ntiag. 3 Peb yuav tsum paub, peb kav tsij nrhiav kom paub HUAB TAIS. Yeej muaj tseeb tias nws yuav tuaj, tseeb ib yam li lub hnub tawm thaum sawv ntxov. Nws yuav tuaj xws li cov kob nag, xws li cov nag poob los ywg ntiaj teb lub caij ntuj tshiab." 4 "Kuv yuav ua dab tsi rau koj, Es Fais ? Kuv yuav ua dab tsi rau koj, Yus Das ? Nej txoj kev nyiam kuv yog zoo li cov huab thaum sawv ntxov, zoo li cov lwg uas yaj sai sai. 5 Yog vim li ntawd kuv thiaj kom cov Yaj Saub muab lawv txiav, kuv lub ncauj hais cov lus muab lawv tua, kuv txoj kev txiav txim yuav tawm los xws li qhov pom kev. 6 Vim tias txoj kev nyiam kev hlub xis kuv siab dua cov thaj txi ntuj, txoj kev paub Tswv Ntuj xis kuv siab dua cov thaj hlawv tsiaj."

    NPN 51: 3-4, 18-19, 20-21AB

    Txais: (OX 6:6) Kuv xav pom nej txoj kev hlub neeg dua nej tej kev txi ntuj.

    Thov koj khuv leej kuv, Tswv Ntuj, vim koj lub siab zoo,
    thov so kuv qhov txhaum pov tseg,
    vim koj txoj kev hlub loj kawg nkaus.
    thov ntxuav kuv lub txim kom tas nrho pov tseg
    thiab tshem kuv qhov txhaum mus kom kuv dawb huv tuaj.

    Txais: Kuv xav pom nej txoj kev hlub neeg dua nej tej kev txi ntuj.

    Vim koj tsis zoo siab txais peb tej kev txi ntuj,
    yog kuv yuav hlawv tsiaj txi ntuj, koj yuav tsis kam txais.
    Kuv txoj kev txi ntuj, Tswv Ntuj,
    yog muaj ib lub tswv yim xav lees txhaum;
    ib lub siab xav lees txhaum thiab ua neeg me,
    Tswv Ntuj, koj yuav tsis thuam.

    Txais: Kuv xav pom nej txoj kev hlub neeg dua nej tej kev txi ntuj.

    HUAB TAIS, thov koj ua siab dav rau Xis Yoos,
    vim koj lub siab zoo, koj rov tsa Yes Lus Xas Les cov ntsa loog.
    Ces thaum ntawd koj yuav zoo siab txais peb cov thaj txi ntuj,
    peb cov kev tua tsiaj hlawv tsiaj txi ntuj.

    Txais: Kuv xav pom nej txoj kev hlub neeg dua nej tej kev txi ntuj.

    Zaj Cav lub Moo Zoo: NPN 95: 8


    Yog hnub no nej hnov nws lub suab,
    nej tsis txhob ua nej lub siab tawv ncauj

    Ntawv Moo Zoo: LK 18: 9-14

    9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej. 10 "Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog neeg sau se. 11 Tus Fas Lis Xais sawv ntsug, nws teev Ntuj li no nyob hauv siab : 'Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd. 12 Ib lis piam, kuv yoo mov ob zaug. Kuv rho ib feem kaum ntawm tas txhia yam uas kuv khwv tau los pub rau luag.' 13 Tus sau se nyob deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : 'Aub ! Tswv Ntuj, thov koj khuv leej kuv, vim kuv yog neeg txhaum !' 14 Kuv hais rau nej : tus sau se nqes rov mus tsev, nws ntshiab huv tuaj, hos tus Fas Lis Xais nws tsis ntshiab huv tuaj. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 31st March 2019, 2:18 pm

    TIM 1 LUB 4 HLIS 2019

    Hnub Ob Lis Piam Plaub Caij Plaub Caug Xyoo C Nruab Lis Piam Xyoo I

    Zaj Nyeem Ib: HIS XAIS 65: 17-21


    Huab Tais hais tias:
    17 Saib ntawm no, kuv yuav tsim ib co txheej ntuj tshiab thiab ib lub ntiaj teb tshiab, yuav tsis nco txog yav tas los lawd ntxiv, yuav tsis muaj nyob hauv lub tswv yim ntxiv.
    18 Nej yuav hom khaj, nej yuav zoo siab mus lis txog yam kuv tsim no. Ntsia saib ! Kuv yuav ua kom Yes Lus Xas Les yog kev hom khaj thiab ua kom nws haiv neeg yog kev zoo siab.
    19 Ces kuv yuav zoo siab nyob hauv Yes Lus Xas Les, thiab yuav luag ntxhi nyob hauv kuv haiv neeg; yuav tsis hnov suab quaj ntxiv los suab nroo suab ntsaj ntxiv nyob ntawd.
    20 Yuav tsis muaj cov me nyuam mos yug los nyob ob peb hnub xwb ntxiv, yuav tsis muaj ib tug neeg laus uas nyob tsis puv nws lub hnub nyoog. Tus tuag hluas tshaj yog tuag thaum hnub nyoog muaj ib puas xyoo. Tus neeg tuag tsis muaj ib puas xyoo luag yuav saib nws yog ib tug neeg txhaum.
    21 Lawv yuav txhim tsev thiab yuav tau nyob hauv cov tsev ntawd; lawv yuav cog hmab txiv cawv thiab yuav tau noj nws cov txiv.

    NPN 30: 2+4, 5-6, 11-12A+13B

    Txais: (2a) Kuv yuav cav txog koj, Huab Tais, vim koj tau cawm kuv dim.

    Kuv yuav cav txog koj lub koob meej, Huab Tais, vim koj tau npo kuv dim,
    koj tsis pub kom kuv cov yeeb ncuab muaj kev zoo siab yeej kuv.
    HUAB TAIS, koj tau thau kuv ntawm ntuj txias teb tsaus los,
    koj tau txuag kuv kom txhob nrog cov uas poob mus rau lub qhov tob.

    Txais: (2a) Kuv yuav cav txog koj, Huab Tais, vim koj tau cawm kuv dim.

    Nej cav txog HUAB TAIS, nej cov uas nyiam nws,
    nej ua tsaug rau nws lub npe ntshiab.
    Nws kev npau taws tsuas nyob ib pliag,
    hos nws txoj kev ua zoo nyob tas ib tiam.
    Thaum tsaus ntuj muaj kev quaj tu siab,
    thaum sawv ntxov muaj kev qw zoo siab.

    Txais: (2a) Kuv yuav cav txog koj, Huab Tais, vim koj tau cawm kuv dim.

    HUAB TAIS, thov koj mloog kuv thiab khuv leej kuv,
    HUAB TAIS, thov koj ua tus pab kuv.
    Koj tau hloov kuv txoj kev quaj ntsuag ua kev dhia zoo siab.
    HUAB TAIS, kuv tus Tswv Ntuj, kuv yuav cav txog koj tas mus li.

    Txais: (2a) Kuv yuav cav txog koj, Huab Tais, vim koj tau cawm kuv dim.

    Zaj Cav lub Moo Zoo: AS MOS 5: 14

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Nej nrhiav qhov zoo txhob nrhiav qhov phem,
    nej thiaj yuav muaj txoj sia,
    thiab HUAB TAIS thiaj yuav nrog nej nyob.

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Ntawv Moo Zoo: ZAM 4: 43-54

    43 Dhau ob hnub ntawd lawm, Yes Xus sawv kev ntawm qhov chaw ntawd mus rau Nkas Lis Lais. 44 Yes Xus yeej hais meej tias ib tug yaj saub tsis raug luag saib muaj nqis nyob hauv lub zos nws nyob hlob. 45 Thaum Yes Xus los txog rau Nkas Lis Lais, cov neeg Nkas Lis Lais txais nws zoo, vim lawv tau pom tej yam nws ua nyob Yes Lus Xas Les lub caij nqaum paj nqaum nruas, yog vim lawv kuj tau mus nqaum paj nqaum nruas ped thiab. 46 Yes Xus thiaj rov tuaj rau Kas Nas xeev Nkas Lis Lais, lub zos uas nws muab dej los txia ua cawv. Thaum ntawd muaj ib tug nom ua hauj lwm rau tus vaj nws muaj ib tug tub mob nyob Kas Fas Naus. 47 Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub, uas twb tshuav tu siav lawm xwb. 48 Yes Xus hais rau nws tias : "Yog nej tsis pom ib co cim thiab tej yam hwj huam, mas nej tsis ntseeg li." 49 Tus nom hais rau Yes Xus tias : "Huab Tais, thov koj nqes mus, cheem kuv tus me nyuam tsis tau tuag." 50 Yes Xus hais rau nws tias : "Koj rov mus, koj tus tub yuav muaj txoj sia nyob." Tus neeg ntawd ntseeg lo lus Yes Xus hais rau nws, ces nws sawv kev mus. 51 Thaum nws tab tom nqes mus, nws cov tub txib tuaj tos nws, lawv hais tias nws tus tub zoo neej lawm. 52 Nws nug lawv saib yog lub sij hawm twg nws tus tub thiaj rov zoo los. Lawv hais rau nws tias : "Nag, thaum kwv yees ib teev hnub qaij, ces tus mob kub cev thim hlo lawm." 53 Leej txiv thiaj pom tias yog lub sij hawm uas Yes Xus hais rau nws tias : 'Koj tus tub yuav muaj txoj sia nyob.' Ces nws ntseeg, nws thiab tas nws tsev neeg huv si ntseeg.
    54 Zaj no yog qhov hwj huam Yes Xus tau ua zaum ob thaum nws los ntawm xeev Yus Das mus rau xeev Nkas Lis Lais.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 1st April 2019, 1:22 pm

    TIM 2 LUB 4 HLIS 2019

    Hnub Peb Lis Piam Plaub Caij Plaub Caug Xyoo C Nruab Lis Piam Xyoo I

    Hwm LN Francis nyob Paola, Txiv Twj Cuab

    Zaj Nyeem Ib: ES XES KIAS 47: 1-9, 12


    1 Ces nws coj kuv rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv qab taw rooj tawm los mus dua sab hnub tuaj lawm, vim lub Tuam Tsev tig mus rau sab hnub tuaj. Dej ntws tawm hauv qab sab xis ntawm lub Tuam Tsev Teev Ntuj, nyob sab naj ntawm lub thaj txi ntuj los. 2 Nws coj kuv tawm ntawm lub rooj vag nyob sab pej los, thiab coj kuv ncig sab Tuam Tsev nraud los txog ntawm lub rooj vag nyob sab hnub tuaj, pom dej ntws tshwm ntawm sab xis los. 3 Tus txiv neej mus rov rau sab hnub tuaj, nws nqa nws txoj hlua ntsuas ntawm tes, nws ntsuas ntev li ib txhiab tshim, ces nws coj kuv mus taw hla dej; dej txij li kuv qij taw. 4 Nws rov ntsuas ib txhiab tshim ntxiv thiab coj kuv hla dej dua, dej nce txij kuv hauv caug lawm. Nws rov ntsuas dua ib txhiab tshim ntxiv, nws coj kom kuv hla dej ntxiv, dej txij kuv duav lawm. 5 Nws tseem rov qab ntsuas dua ib txhiab tshim ntxiv, thaum ntawd cia li yog ib tug dej loj kuv hla tsis tau lawm, vim tus dej loj tuaj thiab tob lawm, zoo ua luam dej hauv lawm, yog ib tug dej mus taw hla tsis tau ntxiv. 6 Ces tus neeg hais rau kuv tias : " Neeg leej tub, koj puas pom?" Nws thiaj coj kuv kom kuv taug tus ntug dej rov los. 7 Thaum kuv rov los, kuv pom muaj ib co ntoo ntau ntau nyob ntawm ob sab ntug dej. 8 Tus neeg hais rau kuv tias : "Cov dej no ntws mus rau cheeb tsam nyob sab hnub tuaj thiab nqes mus rau nram lub hav As Las Npas; nws yuav mus tshwm rau hauv hiav txwv, yuav mus ua kom lub hiav txwv cov dej huv tuaj tsis daw ntxiv. 9 Tus dej no ntws txog qhov twg mas tas puas tsav yam muaj sia thiab txawj huam vam yuav ciaj tuaj; yuav muaj ntses ntau heev, vim cov dej no mus txog twg, lawv yuav ua kom cov dej hiav txwv huv tuaj tsis daw ntxiv; ces tus dej no ntws mus txog twg mas txhua yam yuav ciaj sia tau.
    12 Nyob ntawm tus dej ob sab ntug yuav tuaj tas puas tsav yam ntoo txi txiv zoo noj; lawv cov nplooj yuav tsis zeeg thiab lawv cov txiv yuav txi mus li. Niaj hli lawv yuav txi ib co txiv tshiab, vim cov dej yug lawv yog ntws ntawm thaj chaw ntshiab los. Lawv cov txiv yuav yog txhiam xws noj, lawv cov nplooj yuav yog tshuaj."


    NPN 46: 2-3, 5-6, 8-9

    Txais: Tus Huab Tais kav tsoom tshiab nrog peb nyob;
    Peb lub yeej ntsa zeb yog Yas Kos tus Tswv Ntuj.

    Tswv Ntuj yog peb qhov chaw nkaum yog peb lub zog,
    yog tus pab peb mus li thaum peb ntsib kev nyuaj.
    Vim li no peb tsis ntshai, txawm ntiaj teb yuav ua zog koog
    thiab toj roob hauv pes yuav nphau nphwv rau hauv qab tiv txwv.

    Txais: Tus Huab Tais kav tsoom tshiab nrog peb nyob;
    Peb lub yeej ntsa zeb yog Yas Kos tus Tswv Ntuj.

    Muaj ib tug dej, nws ncau ceg mus ua
    kom Tswv Ntuj lub tsheej zoo siab,
    kom tus Nyob Siab tej vaj tse hom khaj.
    Tswv Ntuj nyob hauv lub tsheej,
    nws yuav tsis ntsib kev nyuaj ntxhov,
    Tswv Ntuj yuav pab nws thaum kaj ntug txoog.

    Txais: Tus Huab Tais kav tsoom tshiab nrog peb nyob;
    Peb lub yeej ntsa zeb yog Yas Kos tus Tswv Ntuj.

    Tus Huab Tais kav tsoom tshiab nrog peb nyob,
    peb lub yeej ntsa zeb yog Yas Kos tus Tswv Ntuj.
    Nej tuaj, nej yuav pom HUAB TAIS cov hauj lwm,
    nej yuav pom tej yam loj tas nrho nws ua nyob ntiaj teb.

    Txais: Tus Huab Tais kav tsoom tshiab nrog peb nyob;
    Peb lub yeej ntsa zeb yog Yas Kos tus Tswv Ntuj.

    Zaj Cav lub Moo Zoo: NPN 51: 12A, 14A

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Tswv Ntuj, thov koj tsim ib lub siab huv lis si rau kuv,
    koj pub kom kuv rov muaj kev zoo siab nyob hauv koj txoj kev cawm.

    Txais: Huab Tais Yes Xus Pleev, koj yog tus pub kev cawm seej,
    tus muaj koob meej thiab tus muaj hwj huam.

    Ntawv Moo Zoo: ZAM 5: 1-16

    1 Dhau tej ntawd tas lawm, txog cov Yus Das ib lub hnub nyoog tsuj xeeb, ces Yes Xus nce mus pem Yes Lus Xas Les. 2 Nyob Yes Lus Xas Les, nyob ze lub Qhov Rooj cov Maum Yaj, , muaj ib lub pas dej, lus Hes Nplaws hu ua Npes Xas Thas; muaj tsib lub ruv ua mom kaum tsev nyob ntawd. 3 Ib pab neeg coob kawg pw hauv cov qab ruv no: ib co muaj mob, ib co dig muag, ib co ceg tawv, ib co tuag ceg; lawv tos lub caij dej npau. 4 Vim muaj tej lub caij, Huab Tais tus Tshiab nqes los rau hauv lub pas dej, ces dej npau. Thaum dej nyuam qhuav npau tas, leej twg xub nqes mus hauv, mas nws tus mob zoo, txawm raug tus mob dab tsi los zoo tas huv tib si.
    5 Muaj ib tug txiv neej nyob ntawd, nws mob tuag ceg tau peb caug yim xyoo lawm. 6 Yes Xus pom nws pw, Yes Xus paub tias nws mob li ntawd tau ntev los lawm, Yes Xus hais rau nws tias : "Koj puas xav kom koj zoo ?" 7 Tus neeg tuag ceg teb rau Yes Xus tias : "Huab Tais, kuv twb tsis muaj leej twg pab muab kuv tso rau hauv pas dej thaum dej npau ntawd li. Thaum kuv tab tom mus, twb muaj lwm tus xub nqes ua kuv ntej lawm." 8 Yes Xus hais rau nws tias : "Koj sawv ! Nqa koj daim pua chaw, koj mus kev." 9 Tam sis ntawd tus neeg zoo hlo. Nws nqa nws daim pua chaw, ces nws sawv mus kev. Hnub ntawd yog hnub Xas Npas Tos. 10 Cov Yus Das hais rau tus neeg uas zoo lawd tias : "Hnub no yog hnub Xas Npas Tos, txwv tsis pub koj nqa koj daim pua chaw." 11 Tab sis nws hais rau lawv tias : "Tus uas kho kuv zoo, nws hais rau kuv tias : ‘Nqa koj daim pua chaw, koj mus kev’" no. 12 Lawv nug nws tias : "Leej twg yog tus hais rau koj tias : ‘Nqa koj daim pua chaw, koj mus kev?’" 13 Tab sis nws tsis paub yog leej twg, vim Yes Xus twb ploj lawm, thiab muaj neeg coob coob nyob ntawd.
    14 Dhau ntawd lawm, Yes Xus pom nws hauv lub Tuam Tsev Teev Ntuj, Yes Xus hais rau nws tias : "Nyem no, koj zoo lawm, koj txhob ua txhaum ntxiv, tsam ib yam phem tshaj no tuaj raug koj dua." 15 Tus neeg mus hais rau cov Yus Das tias tus kho nws zoo yog Yes Xus. 16 Vim li ntawd, cov Yus Das thiaj hiam Yes Xus , vim Yes Xus ua tej yam zoo li ntawd hnub Xas Npas Tos.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 3rd April 2019, 8:24 am

    TIM 3 LUB 4 HLIS 2019

    Hnub Plaub Lis Piam Plaub lub Caij Plaub Caug Xyoo C Nruab Lis Piam Xyoo I

    Zaj Nyeem Ib: HIS XAIS 49: 8-15


    8 HUAB TAIS hais li no : “Thaum txog lub zoo sij hawm, kuv tau teb koj, thaum txog hnub cawm neeg, kuv tau pab koj. Kuv tau txuag koj, tau muab koj ua ib txog kev cog lus rau tsoom neeg, kom koj tsa lub teb chaws rov sawv thiab kom koj khaws cov cuab tam uas puas tas lawd ua koj tug; 9 koj yuav hais rau cov neeg raug kaw tias : 'Nej tawm los,' rau cov neeg nyob hauv qhov tsaus ntuj tias : 'Nej tawm tuaj rau sawv daws pom!' Lawv yuav nog zaub ntawm tej ntug kev, cov roob do hau yuav yog lawv tej chaw nog zaub. 10 Lawv yuav tsis tshaib yuav tsis nqhis, cov cua kub thiab lub hnub yuav tsis kub rau lawv, vim tus hlub lawv yuav yog tus tswv zov yaj saib lawv, nws yuav coj lawv mus rau cov dej txhawv ntws lug.
    11 Kuv yuav muab tas kuv cov roob los ua ib txog kev, kuv tej kev yuav nyob siab.
    12 Ntsia saib cov no tuaj deb tuaj, hos cov no tuaj pej fab thiab xib fab tuaj, cov ntawd tuaj Xis Nim teb tuaj.
    13 Cov txheej ntuj, nej cia li qw suab zoo siab, ntiaj teb nrag cai, koj cia li dhia hom khaj ! Kom cov toj roob hauv pes qw suab qhuas txog, vim HUAB TAIS tau nplij nws haiv neeg, nws hlub nws cov neeg uas raug txom nyem.
    14 Xis Yoos hais tias : ‘HUAB TAIS tso kuv pov tseg lawm, HUAB TAIS tsis nco qab kuv lawm !’ 15 Ib tug poj niam puas tsis nco qab nws tus me nyuam tau? Nws puas tsis hlub tus tub uas tawm hauv nws lub cev los tau? Tab txawm cov poj niam tsis nco qab tau los kuv yuav tsis muaj qhov tsis nco qab koj li !”

    NPN 145: 8-9, 13CD-14, 17-18

    Txais: (8a) Huab Tais yog tus hlub thiab khuv leej neeg.

    Huab Tais yog tus hlub thiab khuv leej neeg,
    nws npau taws qeeb, nws lub siab puv kev hlub.
    Huab Tais ua zoo rau txhua leej txhua tus,
    nws hlub tas txhua yam nws tau tsim los.

    Txais: Huab Tais yog tus hlub thiab khuv leej neeg.

    Huab Tais yog tus pheej xeeb nyob hauv tas nws tej lus,
    nws yog tus dawb huv nyob hauv tas nws tej hauj lwm.
    Huab Tais tsa cov ntog kom sawv taus rov los,
    nws tsa cov khoov kom sawv taus ntseg.

    Txais: Huab Tais yog tus hlub thiab khuv leej neeg.

    Huab Tais yog tus ncaj nyob hauv tas nws tej kev,
    nws yog tus dawb huv nyob hauv tas nws tej hauj lwm.
    Huab Tais nyob ze ze cov uas hu txog nws,
    cov uas muaj lub siab hu txog nws tiag.

    Txais: Huab Tais yog tus hlub thiab khuv leej neeg.

    Zaj Cav lub Moo Zoo: ZAM 11: 25A, 26

    Huab Tais hais tias: kuv yog kev sawv rov los thiab yog txoj sia,
    leej twg ntseeg txog kuv yuav tsis txawj tuag li.

    Ntawv Moo Zoo: ZAM 5: 17-30

    17 Tab sis Yes Xus teb rau lawv tias : "Kuv Txiv ua hauj lwm txog tav no, kuv kuj ua hauj lwm ib yam thiab." 18 Yog vim li ntawd, cov Yus Das thiaj yim huab xav muab Yes Xus tua : yog vim nws tsis caiv hnub xas npas tos, thiab nws tseem hu Tswv Ntuj ua nws Txiv, ces nws tsa nws nrog Tswv Ntuj loj sib luag lawm. 19 Yes Xus thiaj teb rau lawv tias : "Kuv hais qhov muaj tseeb tiag rau nej: Leej Tub ua tsis tau ib yam dab tsi ntawm nws tus kheej, nws tsuas ua raws qhov nws pom Leej Txiv ua xwb. Vim tias Leej Txiv ua yam twg, Leej Tub kuj ua raws nraim li ntawd thiab xwb. 20 Leej Txiv nyiam Leej Tub, ces nws qhia ib puas tsav yam nws ua rau Leej Tub paub. Nws tseem yuav qhia ib co hauj lwm loj tshaj cov no rau Leej Tub paub thiab, kom nej ceeb tas. 21 Ib yam li leej Txiv tsa cov tuag sawv rov los thiab muab txoj sia rov rau lawv, ib yam li ntawd, leej Tub xav muab txoj sia rau leej twg kuj tau nyob ntawm nws xav.
    22 Leej Txiv tsis txiav txim rau leej twg : nws tso txoj hauj lwm txiav txim huv tib si rau Leej Tub ua, 23 kom sawv daws hwm Leej Tub ib yam li hwm Leej Txiv. Tus tsis hwm Leej Tub, kuj tsis hwm Leej Txiv uas yog tus xa Leej Tub tuaj thiab. 24 Kuv hais qhov muaj tseeb tiag rau nej : tus twg mloog kuv lo lus, thiab ntseeg txog Tus Xa kuv tuaj, nws tau txoj sia nyob mus li, nws tsis mus raug txiav txim, nws hla ntawm txoj kev tuag ncaj qha mus rau hauv txoj sia. 25 Kuv hais qhov muaj tseeb tiag rau nej tias lub zim txwv yuav los txog, twb los txog nyem no kiag lawm,ntag, uas cov tuag yuav hnov Tswv Ntuj Leej Tub lub suab. Cov uas yuav hnov, yuav muaj txoj sia nyob. 26 Ib yam li Leej Txiv muaj txoj sia nyob hauv nws, ib yam li ntawd Leej Txiv kuj ua kom Leej Tub muaj txoj sia nyob hauv nws thiab. 27 Leej Txiv pub hwj huam rau Leej Tub kom txiav txim tau, vim nws yog Neeg Leej Tub. 28 Nej tsis txhob poob siab rau qhov ntawd, vim txog lub sij hawm lawm uas tas ib tsoom neeg nyob hauv qhov ntxa yuav hnov nws lub suab, 29 ces lawv yuav tawm los. Cov tau ua zoo yuav mus rau txoj kev sawv rov los muaj txoj sia, hos cov tau ua phem yuav mus rau txoj kev sawv rov los mus raug txim.
    30 Kuv ua yam twg, kuv ua tsis tau kuv tus kheej: Kuv txiav txim raws li qhov kuv hnov xwb, ces kuv cov lus txiav txim yog lus ncaj, vim kuv tsis nrhiav kom tau ua raws li kuv lub siab xav, kuv tsuas nrhiav kom tau ua raws li Tus Xa kuv tuaj lub siab xav xwb.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 3rd April 2019, 12:44 pm

    TIM 4 LUB 4 HLIS 2019

    Hnub Tsib Lis Piam Plaub Caij Plaub Caug Xyoo C Nruab Lis Piam Xyoo I

    Hwm LN Isidore

    Zaj Nyeem Ib: KEV TSIV 32: 7-14


    7 HUAB TAIS hais rau Mais Xes tias : "Koj kav tsij nqes mus sai sai mus xyuas koj haiv neeg uas koj tau coj tawm ntawm Hais Nkws Tos teb los, vim lawv twb ua txhaum lawm. 8 Lawv twb maj maj ncaim ntawm txoj kev uas kuv tau qhia kom lawv taug. Lawv nchuav tau ib tug mlom nyuj rau lawv teev, lawv pe, thiab lawv tua tsiaj txi rau. Lawv hais tias : ‘Cov His Xas Lais, nej ntsia, cov no yog nej cov Tswv Ntuj uas tau coj nej tawm ntawm Hais Nkws Tos teb los!’" 9 HUAB TAIS hais rau Mais Xes tias : "Kuv pom tias haiv neeg ntawd yog ib haiv neeg xwb qwb txhav dhau. 10 Zaum no, koj txhob cuam tshuam kuv, cia kuv npau taws cuag hluav taws kub rau lawv, kuv yuav muab lawv hlawv kom tu noob, kuv mam li muab koj tsa uaa ib haiv neeg loj." 11 Tiam sis Mais Xes tsa suab thov HUAB TAIS nws tus Tswv Ntuj, nws hais tias : "HUAB TAIS, vim li cas koj thiaj li npau taws ua siab kub rau koj haiv neeg uas koj lub hwj huam loj thiab koj txhais tes muaj zog tau coj tawm ntawm Hais Nkws Tos teb los? 12 Vim li cas koj xav kom cov Hais Nkws Tos tau kev hnyos tias : ‘Nws muaj lub siab phem txhob txwm coj lawv los tuag kom tas nyob pem roob kom lawv txhob tshuav ib tug nyob ntiaj teb ntxiv ?' Thov koj thim koj lub siab npau taws ceev thiab tso qhov phem uas koj xav ua rau koj haiv neeg pov tseg mas. 13 Thov koj nco ntsoov txog koj cov tub txib Has Nplas Has, His Xas Has thiab His Xas Lais, uas koj tau tuav txog koj tus kheej los cog lus ruaj rau lawv tias : ‘Kuv yuav ua kom nej cov xeeb ntxwv huam vam coob npaum li cov hnub qub saum ntuj, thiab kuv yuav muab lub teb chaws uas kuv tau cog lus rau nej, pub rau nej cov xeeb ntxwv, ua lawv tug mus ib txhis.’" 14 Ces HUAB TAIS thim xav, nws tso tseg tsis ua phem rau nws haiv neeg raws li nws tau hais.

    NPN 106: 19-20, 21-22, 23

    Txais: (4a) Thov koj nco txog peb, Huab Tais, thaum koj ua zoo rau koj haiv neeg.

    Peb cov yawg koob puab ib tug mlom nyuj nyob ntawm roob Hos Les;
    lawv txhos caug pe tus mlom uas lawv nchuav.
    Lawv muab lawv lub koob meej
    pauv ib tug mlom nyuj uas yog tsiaj noj zaub.

    Txais: (4a) Thov koj nco txog peb, Huab Tais, thaum koj ua zoo rau koj haiv neeg.

    Lawv tsis nco qab tus Tswv Ntuj uas tau cawm lawv,
    tus tau ua tej yam loj nyob Hais Nkws Tos teb,
    tus tau ua tej yam hwj huam txaus qhuas nyob Haas teb,
    tus tau ua tej yam txaus ntshai nyob ntawm Dej Ntuj Liab.

    Txais: (4a) Thov koj nco txog peb, Huab Tais,thaum koj ua rau koj haiv neeg.

    Nws tau hais tias nws yuav ua kom lawv tuag tu noob
    tab sis Mais Xes, tus uas nws xaiv,
    tau sawv lawv chaw thov nws nrog nws hais,
    kom nws txo nws lub siab npau tsis xav txuag lawv.

    Txais: (4a) Thov koj nco txog peb, Huab Tais, thaum koj ua zoo rau koj haiv neeg.

    Zaj Cav lub Moo Zoo: ZAM 3: 16


    Tswv Ntuj hlub lub ntiaj teb tas nrho, nws thiaj muab nws tib leeg tub rau,
    Kom xwv txhua tus uas ntseeg nws muaj txoj sia nyob mus li.

    Ntawv Moo Zoo: ZAM 5: 31-47

    Yes Xus hais rau lawv tias:
    31 “Yog kuv rov ua tim khawv zeem txog kuv, mas kuv cov lus pov thawj tsis yog lus tseeb. 32 Tiam sis muaj lwm tus ua tim khawv zeem txog kuv, mas kuv paub tias nws cov lus pov thawj zeem txog kuv ntawd yog lus tseeb. 33 Nej xa ib co tub coj xo mus cuag Zam, ces nws tau ua tim khawv txog qhov tseeb. 34 Kuv mas kuv tsis txais lus zeem tseeb ntawm ib tug neeg, tiam sis kuv hais tej no kom nej tau txais kev cawm. 35 Zam yog ib lub teeb cig cig thiab ci pom kev, ces nej muaj kev zoo siab ib ntus nyob hauv nws qhov pom kev. 36 Tiam sis kuv tau txais ib txog kev ua tim khawv loj dua Zam txoj. Cov hauj lwm Leej Txiv muab rau kuv ua kom tiav, cov hauj lwm ntawd uas kuv ua, lawv ua tim khawv txog kuv tias yog Leej Txiv xa kuv tuaj. 37 Leej Txiv uas xa kuv tuaj, nws kuj ua tim khawv txog kuv thiab. Tiam sis nej tsis tau hnov nws lub suab, tsis tau pom nws lub ntsej muag li, 38 thiab nej tsis muaj nws lo lus nyob txawm hauv nej, vim nej tsis ntseeg tus uas nws xa tuaj. 39 Nej tshawb hauv tej ntawv ntshiab, vim nej xav tias nej yuav tau txoj sia nyob mus li ntawm cov ntawv ntshiab los. Txawm tias ntawv ntshiab twb ua tim khawv txog kuv los, 40 nej tsis xav los cuag kuv kom tau txoj sia li.
    41 Kuv tsis txais koob meej ntawm tib neeg, 42 thiab kuv paub tias nej tsis muaj ib pluaj siab nyiam Tswv Ntuj nyob hauv nej li. 43 Kuv tuaj ntawm Leej Txiv lub npe tuaj, tab sis nej tsis txais kuv. Hos yog lwm tus, nws tuaj nws kheej xwb, nej ho txais nws. 44 Nej yuav ua cas ntseeg, vim nej tsuas nrhiav lub koob meej nej ib leeg muab rau ib leeg xwb, nej tsis nrhiav lub koob meej uas tuaj ntawm tus Tswv Ntuj tib leeg tuaj? 45 Nej txhob xav tias kuv yuav kom nej rau ntawm Leej Txiv. Tus yuav kom nej yog Mais Xes, tus uas nej tso siab rau. 46 Vim tias yog nej ntseeg Mais Xes mas nej kuj yuav ntseeg kuv thiab, vim Mais Xes sau ntawv hais txog kuv. 47 Tiam sis yog nej tsis ntseeg tej lus Mais Xes sau, mas nej yuav ua cas ntseeg kuv tej lus?"


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 4th April 2019, 6:35 am


    TIM 5 LUB 4 HLIS 2019

    Thawj Hnub Rau Lis Piam Plaub Caij Plaub Caug Xyoo C Nruab Lis Piam Xyoo I

    Hwm LN Vincent Ferrer, ua Leej Choj

    Zaj Nyeem Ib: THOOB TSIB 2: 1A, 12-22


    1 Cov neeg tsis hwm Ntuj tsis txawj xav raws qhov zoo, lawv rov sib tham lawv tias :
    12 “Peb kav tsij cuab ntxiab tos tus neeg ncaj, vim nws ua ntxhov peb siab, nws hais tsis zoo rau peb tus yam ntxwv, nws cem peb tias peb ua txhaum Txoj Cai, thiab nws liam tias peb ua txhaum txoj kev peb tau kawm los. 13 Nws khav tias nws paub Tswv Ntuj, nws rov hu nws ua Huab Tais tus me nyuam. 14 Nws yog ib tug txiav txim rau peb zaj tswv yim; pom nws xwb twb hnyav rau peb kawg lawm. 15 Nws txoj kev ua neej tsis xws luag txoj, nws tej xub ke txawv luag tej. 16 Nws saib peb qis qis; nws txav deb ntawm peb txoj kev cuag li yog ib yam qias qias. Nws tshaj tias hnub kawg cov neeg ncaj yuav tau txoj hmoov zoo, nws khav tias nws txiv yog Tswv Ntuj. 17 Peb sim ntsia saib qhov nws hais puas muaj tseeb. Peb sim nws saib nws yuav tuag zoo li cas. 18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws xwb, thiab yuav npo nws ntawm cov ntxub nws txhais tes. 19 Peb yuav sim nws, peb ua tub qaug nws, peb tsim txom nws saib, kom peb thiaj paub tias nws lub siab zoo npaum li cas, thiab saib nws puas ua siab ntev npaum li cas nyiaj kom kawg. 20 Peb kav tsij txiav txim kom nws tuag raws ib txog kev poob ntsej muag loj, vim raws li nws hais, yuav muaj tus tuaj pab nws.”
    21 Cov neeg tsis hwm Ntuj xav tswv yim li ntawd, tab sis lawv yuam kev, lawv lub siab phem mooj lawv lub qhov muag lawm lawv thiaj tsis pom kev. 22 Lawv tsis paub txog Tswv Ntuj cov txuj zais tob tob, lawv tsis tso siab tias Ntuj yuav pub nqi zog rau txoj kev ua neeg ntshiab, lawv tsis ntseeg tias cov neeg siab huv yuav tau txais paj tshab.

    NPN 34: 17-18, 19-20, 21+23

    Txais: (19a) Huab Tais nyob ze ze cov neeg ntxhov siab lwj plawv.

    HUAB TAIS tiv ntaus cov neeg ua phem,
    nws rhuav kom ntiaj teb txhob nco qab txog lawv ntxiv.
    Thaum cov neeg siab ncaj quaj qw, HUAB TAIS mloog lawv,
    nws npo lawv ntawm lawv tej kev ntxhov siab.

    Txais: (19a) Huab Tais nyob ze ze cov neeg ntxhov siab lwj plawv.

    HUAB TAIS nyob ze ze cov neeg ntxhov siab lwj plawv,
    nws cawm cov neeg uas tus ntsuj plig qaug zog tas.
    Tus siab ncaj raug ntau yam kev iab kev ntxhov,
    tiam sis HUAB TAIS npo nws dim ntawm tas txhua yam ntawd.

    Txais: (19a) Huab Tais nyob ze ze cov neeg ntxhov siab lwj plawv.

    Nws zov tus siab ncaj cov pob txha,
    nws tsis kheev kom ib tug pob txha lov li.
    HUAB TAIS txhiv nws cov tub txib txoj sia:
    cov tuaj nkaum hauv HUAB TAIS, tsis raug nplua ib tug li

    Txais: (19a) Huab Tais nyob ze ze cov neeg ntxhov siab lwj plawv.

    Zaj Cav lub Moo Zoo: MT 4: 4B


    Neeg tsis kawg muab mov los yug siav xwb,
    neeg tseem yuav yuav txhua lo lus tawm ntawm Tswv Ntuj lub ncauj los thiab.

    Ntawv Moo Zoo: ZAM 7: 1-2, 10, 25-30

    1 Dhau tej ntawd tas, Yes Xus mus ncig hauv xeev Nkas Lis Lais. Nws tsis xav mus ncig hauv xeev Yus Das, vim cov Yus Das nrhiav kev muab nws tua. 2 Tiam sis yuav txog lub hnub nyoog nqaum paj nqaum nruas tsa tsev tsam phooj.
    10 Thaum Yes Xus cov kwv tij nce mus nqaum paj nqaum nruas tas lawm, nws kuj nce mus thiab, tab sis nws mus nraim nkoos tsis tab meeg mus.
    25 Muaj ib co neeg nyob Yes Lus Xas Les hais tias : "Tus ntawd tsis yog tus uas lawv nrhiav nws tua lod ? 26 Zaum no nws tab meeg hais lus, los luag tsis hais dab tsi rau nws li. Puas yog cov thawj coj twb pom tias nws yog Leej Pleev lawm tiag? 27 Tab sis, peb twb paub nws nyob qhov twg tuaj, hos Leej Pleev mas thaum nws tuaj, tsis muaj neeg paub tias nws nyob qhov twg tuaj." 28 Ces thaum Yes Xus qhia nyob hauv lub Tuam Tsev Teev Ntuj, nws thiaj qw nrov nrov tias : "Nej paub kuv thiab paub tias kuv nyob qhov twg tuaj. Tab sis tsis yog kuv tuaj kuv xwb. Tus xa kuv tuaj, nej tsis paub nws, tiam sis nws yog tus tseeb. 29 Kuv paub nws, vim kuv tuaj ntawm nws tuaj, thiab yog nws xa kuv tuaj." 30 Ces lawv nrhiav kev ntes Yes Xus, tab sis tsis muaj leej twg tsa tes tuav nws, vim nws lub zim txwv los tsis tau txog.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 5th April 2019, 6:14 am

    TIM 6 LUB 4 HLIS 2019

    Thawj Hnub Xya Lis Piam Plaub Caij Plaub Caug Xyoo C Nruab Lis Piam Xyoo I

    Zaj Nyeem Ib: YES LES MIAS 11: 18-20


    18 HUAB TAIS qhia rau kuv ces kuv thiaj paub. Koj tau ua kom kuv paub txog tias lawv npaj tswv yim yuav ua dab tsi.
    19 Tiam sis kuv zoo xws li tus yaj tso tso siab uas luag cab nrhuj nrheev mus rau hauv lub tsev tua tsiaj, vim kuv tseem tsis tau to taub tias lawv sib tuav tsv yim ua phem rau kuv li no: "Peb muab tus ntoo uas tab tom muaj muaj zog txo pov tseg, peb muab nws ntov kiag kom nws txhob tau nyob hauv lub teb chaws neeg muaj txoj sia ntxiv, kom neeg tsis txhob nco qab txog nws lub npe ntxiv."
    20 Tiam sis, HUAB TAIS kav tsoom hnub qub, koj yog tus txiav txim raws qhov ncaj, koj yog tus tsom tau hauv neeg lub siab thiab lub plawv, thov cia kuv pom koj txoj kev ua pauj rau lawv, vim kuv tau muab kuv txoj kev nyuaj tso rau koj tes lawm.

    NPN 7: 2-3, 9BC-10, 11-12

    Txais: (2a) HUAB TAIS, kuv tus Tswv Ntuj, kuv tuaj nkaum hauv koj.

    HUAB TAIS, kuv tus Tswv Ntuj, kuv tuaj nkaum hauv koj.
    Thov koj cawm kuv ntawm cov caum ntes kuv, pab kom kuv dim;
    yog koj tsis pab ces kuv yuav raug tsov tom kuv,
    tsov yuav muab kuv dua ua daim, yuav tsis muaj tus pab.

    Txais: HUAB TAIS, kuv tus Tswv Ntuj, kuv tuaj nkaum hauv koj.

    Huab Tais, thov koj txiav txim rau kuv raws li kuv txoj kev ncaj,
    thiab raws li kuv txoj kev dawb huv tsis txhaum.
    Thov koj ua kom tus neeg phem txoj kev phem ploj ntais mus,
    tiam sis koj txheem tus neeg ncaj kom nyob ruaj nreb,
    vim koj yog tus tsom tau hauv neeg lub siab tus ntsuj plig,
    Tswv Ntuj tus siab ncaj.

    Txais: HUAB TAIS, kuv tus Tswv Ntuj, kuv tuaj nkaum hauv koj.

    Tswv Ntuj yog daim leem phiaj thaiv kuv,
    nws yog tus cawm cov muaj lub siab ncaj.
    Tswv Ntuj yog tus txiav txim ncaj,
    tiam sis nws yog tus yuav npau taws hnub dhau hnub.

    Txais: HUAB TAIS, kuv tus Tswv Ntuj, kuv tuaj nkaum hauv koj.

    Zaj Cav lub Moo Zoo: LK 8: 15


    Cov muaj hmoov zoo yog cov muaj ib lub siab dav khaws nkaus lo lus coj,
    lawv txi txiv zoo vim lawv xyaum niaj hnub coj rawv lo lus.

    Ntawv Moo Zoo: ZAM 7: 40-53

    40 Thaum tsoom neeg ntawd hnov Yes Xus hais cov lus no, mas coob leej hais tias : "Tus no yog tus yaj saub tiag!" 41 Ib txhia hais tias : "Tus no yog Leej Pleev!" Tiam sis tseem muaj lwm cov hais tias : "Leej Pleev puas yuav tuaj Nkas Lis Lais tuaj ? 42 Ntawv tsis tau hais tias Leej Pleev yog Das Vis xeeb ntxwv thiab nws yuav tawm hauv Das Vis lub zos Npes Les Hes tuaj, no lod ?" 43 Li ntawd, tsoom sid sib faib tsis sib haum tim Yes Xus. 44 Lawv ib txhia xav ntes Yes Xus, tab sis tsis muaj leej twg cev tes nthos Yes Xus.
    45 Cov zov keeb thiaj mus cuag cov thawj leej choj thiab cov Fas Lis Xais. Lawv hais rau cov zov keeb tias : "Vim li cas nej tsis ntes nws los ?" 46 Cov zov keeb teb hais tias : "Vim tsis tau muaj leej twg hais lus zoo cuag li tus neeg ntawd ib zaug li!" 47 Cov Fas Lis Xais hais rau cov zov keeb tias : "Puas yog nej raug nws haub tau nej lawm thiab ? 48 Nyob hauv cov thawj coj, puas muaj ib tug ntseeg nws ? Los nyob hauv cov Fas Lis Xais, puas muaj ib tug ntseeg nwd ? 49 Tiam sis tsoom pej xeem no yog cov tsis paub Txoj Cai, ces lawv yog cov uas tau hmoov phem.” 50 Nis Kos Des Mos, uas yog ib tug Fas Lis Xais, yav dhau los nws tau tuaj cuag Yes Xus, nws hais rau lawv tias : 51 "Peb txoj cai puas kheev kom cia li muab txim rau ib tug neeg uas peb tsis tau xub hnov nws lus thiab paub tej yam nws ua tso ?" 52 Lawv teb rau Nis Kos Des Mos tias : "Koj puas yog ib tug nyob Nkas Lis Lais tuaj thiab ? Koj mus kawm kom puab tso, koj yuav pom tias tsis muaj yaj saub sawv hauv Nkas Lis Lais teb tuaj li." 53 Ces lawv nyias rov mus nyias tsev tas.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 7th April 2019, 4:53 pm

    TIM 8 LUB 4 HLIS 2019

    Hnub Ob Lis Piam Tsib Caij Plaub Caug Xyoo C Nruab Lis Piam Xyoo I

    Zaj Nyeem Ib: DN 13: 1-9, 15-17, 19-30, 33-62


    1 Thaum ntawd, nyob Npas Npis Los, muaj ib tug txiv neej hu ua Yuas Kis. 2 Nws yuav ib tug poj niam hu ua Xus Xas Nas, yog Hes Kias tus ntxhais, nws yog ib tug poj niam zoo nkauj kawg thiab nws hwm Tswv Ntuj zoo, 3 Vim nws niam nws txiv yog neeg ncaj, nkawd tu nkawd tus ntxhais hlob nyob hauv Mais Xes Txoj Cai. 4 Yuas Kis yog ib tug neeg nplua nuj heev, nws muaj ib lub vaj nyob puab nws lub tsev; cov Yus Das muaj coob leej kheev tuaj thov nws pab, vim sawv daws saib nws zoo tshaj tej.
    5 Xyoo ntawd, tsoom pej xeem tau xaiv ob tug laus neeg los ua txwj laus txiav txim. Huab Tais tau hais txog ob tug txwj laus ntawd tias: "Txoj kev phem tawm hauv Npas Npis Los tuaj, yog tuaj ntawm cov laus neeg uas yog cov txwj laus txiav txim tuaj, lawv ua cov coj tsoom pej xeem." 6 Ob tug txwj laus ntawd niaj hnub tuaj hauv Yuas Kis tsev. Yog leej twg muaj plaub muaj ntug hais mas lawv tuaj cuag nkawd nyob ntawd.
    7 Thaum tav su thaum sawv daws mus tsev tas lawm mas Xws Xas Nas tawm tuaj ncig ua si nyob hauv nws tus txiv lub vaj. 8 Ob tug neeg laus ntawd niaj hnub pom Xus Xas Nas nkag mus ncig ua si li ntawd, mas nkawd cia li pib ntshaw xav deev Xus Xas Nas. 9 Nkawd lub tswv yim mooj tas, nkawd tsis tig qhov muag mus rau lub Ntuj ntxiv, thiab nkawd tsis nco qab lawm tias nkawd yuav raug txiav txim raws txoj kevv ncaj.
    15 Nkawd thiaj tos ntsoov kom muaj ib lub zoo sij hawm. Muaj ib hnub, Xus Xas Nas nkag mus hauv lub vaj li niaj zaus, nws nrog ob tug ntxhais txib mus xwb. Sov sov ces nws xav da dej nyob hauv lub vaj. 16 Tsis muaj ib tug neeg li. Tab sis ob tug neeg laus twb nkaum nyas ntshis nws nyob ze ntawd lawm. 17 Xus Xas Nas hais rau nws ob tug ntxhais txib tias : "Neb mus nqa cov roj thiab xus npus tuaj rau kuv. Neb kaw lub qhov rooj vag rau, kom kuv tau zoo da dej."
    19 Thaum ob tug ntxhais txib mus ploj ntais lawm, ob tug neeg laus cia li tawm plaws los ntawm Xus Xas Nas thiab hais tias : 20 "Lub rooj vag kaw zoo zoo lawm, tsis muaj neeg yuav pom peb li. Wb nyiam nyiam koj li, koj cia li kam nrog wb pw ! 21 Yog koj tsis kam mas wb yuav liam hais tias muaj ib tug tub hluas nrog koj nyob, vim li ntawd mas koj thiaj kom koj ob tug ntxhais txib rov mus lawm." 22 Xus Xas Nas seev tias : "Ab cas kuv kev tws tas li lawm! Yog kuv mloog neb mas kuv kawg yuav tsum tuag. Yog kuv tsis mloog los kuv yuav tsis tau kev dim ntawm neb li. 23 Tab sis kuv tsis kam , kuv yeem raug neb liam dua nrog neb ua txhaum nyob ntawm kuv tus Huab Tais xub ntiag !"
    24 Ces Xus Xas Nas thiaj quaj qw nrov nrov hu neeg. Ob tug neeg laus kuj qw nthe qw nthe rau Xus Xas Nas thiab. 25 Ib tug txawm khiav loo mus qhib lub rooj vag. 26 Thaum cov neeg nyob hauv tsev hnov qw li ntawd hauv lub vaj tuaj, sawv daws khiav tawm ntawm lub qhov rooj ntawm ib sab tuaj xyuas saib muaj tus xwm dab tsi tuaj raug Xus Xas Nas lawm. 27 Ces ob tug neeg laus piav nkawd zaj rau cov tub txib mloog. Cov tub txib kuj txaj muag kawg vim tsis tau muaj dua leej twg hais lus phem li ntawd txog Xus Xas Nas.
    28 Tag Kis los, sawv daws tuaj sib sau nyob hauv nws tus txiv Yuas Kis tsev. Ob tug neeg laus kuj tuaj thiab, nkawd lub siab puv nkaus tswv yim phem, xav ua kom Xus Xas Nas raug muab tua. 29 Nkawd hais rau sawv daws tias : "Nej hu Xus Xas Nas uas yog Hes Kias tus ntxhais thiab yog Yuas Kis poj niam tuaj." Ces lawv mus hu Xus Xas Nas tuaj. 30 Nws nrog nws niam nws txiv, nws cov me nyuam, thiab nws cov neej tsa huv si tuaj.
    33 Xus Xas Nas tsev neeg, nws cov phooj ywg thiab cov neeg nyob ntawd sawv daws quaj tas tib si.
    34 Ob tug txwj laus sawv thiab nkawd tsa tes rau saum Xus Xas Nas taub hau. 35 Xus Xas Nas kua muag poob dawb vog, nws tsa muag ntsia lub ntuj, vim nws tso siab lug rau Huab Tais. 36 Ob tug txwj laus thiaj liam tias : "Nag, wb taug taug kev ua si hauv lub vaj, wb ob leeg xwb, wb pom tus poj niam ntawd nrog ob tug ntxhais txib tuaj. Nws kaw rooj vag tas ces nws kom ob tug ntxhais txib rov qab mus lawm. 37 Ces ib tug tub hluas nkaum nyob ntawd txawm tawm los thiab nrog tus poj niam ntawd pw. 38 Wb nyob tom ib ces kaum vaj pom nkawd ua phem li ntawd ces wb thiaj khiav mus xyuas nkawd. 39 Wb tau pom nkawd ob leeg pw ua ke , tab sis wb ntes tsis tau tus txiv neej, vim nws muaj zog dua wb. Nws qhib plho qhov rooj ces nws tso tes khiav lawm. 40 Wb ntes tau tus poj niam xwb. Wb nug nws tias tus hluas ntawd yog leej twg, tab sis nws tsis kam qhia wb. Wb ua pov thawj pom qhov no."
    41 Ob tug ntawd kam yog ob tug txwj laus txiav txim diam, mas sawv daws kuj ntseeg nkawd. Ces lawv txiav txim tias Xus Xas Nas yuav tsum tuag. 42 Xus Xas Nas thiaj quaj nrov nrov hais tias : "Tswv Ntuj nyob mus li, koj paub tas ib puas tsav yam zais ntshis, ib qho tsis tau tshwm sim tuaj los koj twb xub paub lawm. 43 Koj yeej paub tias ob tug neeg ntawd liam ib qho dag rau kuv. Nyem no kuv yuav tsum tuag, tiam sis kuv tsis tau ua txhaum xws li lawv lub siab phem xav xev liam rau kuv."
    44 Huab Tais hnov Xus Xas Nas lub suab thov. 45 Thaum lawv tab tom cab Xus Xas Nas mus yuav coj nws mus tua, mas Huab Tais txhib leej tswv yim ntshiab uas nyob hauv ib tug me nyuam tub hu ua Das Nias. 46 Das Nias thiaj qw nrov nrov tias : "Kuv tsis nrog nej koom ua kom tus poj niam no cov ntshav ntws." 47 Sawv daws tig ntsia Das Nias, lawv nug nws tias: "Koj hais koj cov lus ntawd yog xav hais dab tsi tiag ?" 48 Ces tus me nyuam tub sawv ntawm lawv xub ntiag, nws hais tias : "His Xas Lais tsoom tub ki, ua cas nej yuav ruam ua luaj? Nej muab txim rau ib tug ntxhais His Xas Lais, nej twb tsis tau tshuaj lus kom meej tso, nej twb tsis paub qhov tseeb li ! 49 Nej sawv daws rov qab mus tom tsev txiav txim tso, vim ob tug neeg ntawd liam ib qho cuav rau tus poj niam ntawd." 50 Sawv daws thiaj maj nroos rov mus rau hauv tsev txiav txim. Cov neeg laus hais rau Das Nias tias : "Koj los nrog peb zaum ua ke, thiab koj qhia koj lub tswv yim rau peb. Vim peb pom tias Ntuj twb pub ib lub hwj chim phim ua neeg laus rau koj lawm."
    51 Das Nias hais rau lawv tias : "Nej muab ob tug ntawd cais nyias nyob nyias. Kuv yuav nug nkawd ib leeg zuj zus." 52 Ces lawv muab ob tug neeg laus ntawd sib cais. Das Nias thiaj hu ib tug los. Das Nias hais rau nws tias : "Koj yog ib tug laus neeg, laus nyob hauv txoj kev txhaum xwb. Nyem no koj cov txhaum yuav tawm los, cov uas koj tau ua yav tas lawd: 53 Koj tau txiav txim tsis ncaj ncees, koj muab txim rau tus neeg tsis txhaum, koj tsos tus neeg txhaum dim dawb, txawm Huab Tais twb hais tias: ‘Nej yuav tsis txhob muab tus neeg tsis txhaum thiab muaj lub siab ncaj tua.’ 54 Zaum no yog koj tau pom tiag no, koj qhia kuv saib koj pom nkawd nyob ua ke hauv tsob qab ntoos twg ?" Tus neeg laus teb tias : "Nyob hauv ib tsob qab ntoo roj hmab." 55 Das Nias hais tias : "Kuv hais rau koj tias, koj lo lus dag yuav rov raug koj taub hau. Tswv Ntuj tus tshiab twb tau txais Tswv Ntuj lo lus txiav txim lawm, nws yuav muab koj lub cev txiav ua ob ya." 56 Das Nias tso tus ntawd tawm mus. Nws hu tus ob los, nws hais tias : "Koj yog caj ces Kas Nas Has, tsis yog caj ces Yus Das ! Poj niam lub cev zoo nkauj ntxias tau koj lawm, txoj kev nyiam sib dee ua kom koj lub siab phem tuaj. 57 Koj zes kam cov ntxhais His Xas Lais los lawm; lawv ntshai ces lawv thiaj lam nrog koj ua kev txhaum. Tab sis nyem no ib tug ntxhais Yus Das tsis kam nrog koj ua kev txhaum ! 58 Koj sim hais rau kuv saib koj pom nkawd ua ke nyob hauv tsob qab ntoos twg ?" Nws teb tias : "Nyob hauv ib tsob qab ntoo qhib." 59 Das Nias hais tias : "Kuv hais rau koj, koj lo lus dag yuav rov raug koj taub hau thiab. Tswv Ntuj tus Tshiab twb tuav rawv ib rab ntaj tos yuav txiav koj ua ob ya lawm, kom neb ob leeg tau ntsib kev ploj tuag mus." 60 Ces tas lub txoos qw nrov nrov cav txog Tswv Ntuj uas nws cawm cov neeg tso siab rau nws.
    61 Sawv daws sawv los muab txim rau ob tug neeg laus ntawd, vim Das Nias tau ua kom nkawd lub ncauj rov lees tias nkawd tau liam tej yam cuav. Lawv ua phem rau nkawd raws nraim li nkawd tau ua rau luag tej. 62 Raws li Mais Xes Txoj Cai, lawv thiaj tau muab ob tug txwj laus ntawd coj mus tua lawm. Ces hnub ntawd, ib tug neeg siab dawb cov roj ntsha tsis tau ntws.

    Los DAS NIAS 13: 41C-62

    41 Lawv txiav txim tias Xus Xas Nas yuav tsum tuag. 42 Xus Xas Nas thiaj quaj nrov nrov hais tias : "Tswv Ntuj nyob mus li, koj paub tas ib puas tsav yam zais ntshis, ib qho tsis tau tshwm sim tuaj los koj twb xub paub lawm. 43 Koj yeej paub tias ob tug neeg ntawd liam ib qho dag rau kuv. Nyem no kuv yuav tsum tuag, tiam sis kuv tsis tau ua txhaum xws li lawv lub siab phem xav xev liam rau kuv."
    44 Huab Tais hnov Xus Xas Nas lub suab thov. 45 Thaum lawv tab tom cab Xus Xas Nas mus yuav coj nws mus tua, mas Huab Tais txhib leej tswv yim ntshiab uas nyob hauv ib tug me nyuam tub hu ua Das Nias. 46 Das Nias thiaj qw nrov nrov tias : "Kuv tsis nrog nej koom ua kom tus poj niam no cov ntshav ntws." 47 Sawv daws tig ntsia Das Nias, lawv nug nws tias: "Koj hais koj cov lus ntawd yog xav hais dab tsi tiag ?" 48 Ces tus me nyuam tub sawv ntawm lawv xub ntiag, nws hais tias : "His Xas Lais tsoom tub ki, ua cas nej yuav ruam ua luaj? Nej muab txim rau ib tug ntxhais His Xas Lais, nej twb tsis tau tshuaj lus kom meej tso, nej twb tsis paub qhov tseeb li ! 49 Nej sawv daws rov qab mus tom tsev txiav txim tso, vim ob tug neeg ntawd liam ib qho cuav rau tus poj niam ntawd." 50 Sawv daws thiaj maj nroos rov mus rau hauv tsev txiav txim. Cov neeg laus hais rau Das Nias tias : "Koj los nrog peb zaum ua ke, thiab koj qhia koj lub tswv yim rau peb. Vim peb pom tias Ntuj twb pub ib lub hwj chim phim ua neeg laus rau koj lawm."
    51 Das Nias hais rau lawv tias : "Nej muab ob tug ntawd cais nyias nyob nyias. Kuv yuav nug nkawd ib leeg zuj zus." 52 Ces lawv muab ob tug neeg laus ntawd sib cais. Das Nias thiaj hu ib tug los. Das Nias hais rau nws tias : "Koj yog ib tug laus neeg, laus nyob hauv txoj kev txhaum xwb. Nyem no koj cov txhaum yuav tawm los, cov uas koj tau ua yav tas lawd: 53 Koj tau txiav txim tsis ncaj ncees, koj muab txim rau tus neeg tsis txhaum, koj tsos tus neeg txhaum dim dawb, txawm Huab Tais twb hais tias: ‘Nej yuav tsis txhob muab tus neeg tsis txhaum thiab muaj lub siab ncaj tua.’ 54 Zaum no yog koj tau pom tiag no, koj qhia kuv saib koj pom nkawd nyob ua ke hauv tsob qab ntoos twg ?" Tus neeg laus teb tias : "Nyob hauv ib tsob qab ntoo roj hmab." 55 Das Nias hais tias : "Kuv hais rau koj tias, koj lo lus dag yuav rov raug koj taub hau. Tswv Ntuj tus tshiab twb tau txais Tswv Ntuj lo lus txiav txim lawm, nws yuav muab koj lub cev txiav ua ob ya." 56 Das Nias tso tus ntawd tawm mus. Nws hu tus ob los, nws hais tias : "Koj yog caj ces Kas Nas Has, tsis yog caj ces Yus Das ! Poj niam lub cev zoo nkauj ntxias tau koj lawm, txoj kev nyiam sib dee ua kom koj lub siab phem tuaj. 57 Koj zes kam cov ntxhais His Xas Lais los lawm; lawv ntshai ces lawv thiaj lam nrog koj ua kev txhaum. Tab sis nyem no ib tug ntxhais Yus Das tsis kam nrog koj ua kev txhaum ! 58 Koj sim hais rau kuv saib koj pom nkawd ua ke nyob hauv tsob qab ntoos twg ?" Nws teb tias : "Nyob hauv ib tsob qab ntoo qhib." 59 Das Nias hais tias : "Kuv hais rau koj, koj lo lus dag yuav rov raug koj taub hau thiab. Tswv Ntuj tus Tshiab twb tuav rawv ib rab ntaj tos yuav txiav koj ua ob ya lawm, kom neb ob leeg tau ntsib kev ploj tuag mus." 60 Ces tas lub txoos qw nrov nrov cav txog Tswv Ntuj uas nws cawm cov neeg tso siab rau nws.
    61 Sawv daws sawv los muab txim rau ob tug neeg laus ntawd, vim Das Nias tau ua kom nkawd lub ncauj rov lees tias nkawd tau liam tej yam cuav. Lawv ua phem rau nkawd raws nraim li nkawd tau ua rau luag tej. 62 Raws li Mais Xes Txoj Cai, lawv thiaj tau muab ob tug txwj laus ntawd coj mus tua lawm. Ces hnub ntawd, ib tug neeg siab dawb cov roj ntsha tsis tau ntws.

    NPN 23: 1-3A, 3B-4, 5, 6

    Txais: (4ab) Txawm kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob ntawm kuv ib sab.

    HUAB TAIS yog kuv tus tswv zov yaj, kuv tsis tshaib dab tsi.
    Nws tso kuv so nyob hauv tej tshav zaub mos;
    nws coj kuv mus nyob ze tej tus dej tus yees,
    kom tau ntxiv siav rau kuv tus ntsuj plig.

    Txais: Txawm kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob ntawm kuv ib sab.

    Nws coj kuv mus taug txoj kev ncaj vim nws lub npe
    Tab yog kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nrog kuv ua ke,
    koj rab qws, thiab koj rab pas nrig pab kuv ua siab loj.

    Txais: Txawm kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob ntawm kuv ib sab.

    Koj npaj ib roog qav rau ntawm kuv xub ntiag,
    rau cov neeg ntxub kuv qhov muag pom ntsoov,
    koj muab roj tsw qab pleev kuv taub hau.
    Kuv lub khob puv cawv phwj yaws.

    Txais: Txawm kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob ntawm kuv ib sab.

    Kev ua siab zoo thiab kev hlub raws nraim kuv
    niaj hnub hauv kuv lub neej;
    Kuv yuav tau nyob hauv Huab Tais lub tsev
    ntev niaj ntau xyoo lawm yav tom ntej.

    Txais: Txawm kuv taug kev hauv lub hav tsaus ntuj nti,
    kuv tsis ntshai dab tsi phem, vim koj nyob ntawm kuv ib sab.

    Zaj Cav lub Moo Zoo: ES XES KIAS 33: 11

    Huab Tais hais tias: Kuv tsis zoo siab pom tus neeg phem tuag,
    tiam sis kuv xav pom nws hloov siab tig los ua zoo, ces nws thiaj yuav tau txoj sis.

    Ntawv moo Zoo: ZAM 8: 12-20

    12 Yes Xus rov qab hais lus rau lawv. Nws hais tias : "Kuv yog qhov pom kev kaj lub qab ntuj neeg. Leej twg lawv kuv qab, nws yuav tsis maub kev tsaus ntuj. Nws yuav tau qhov pom kev uas coj mus rau txoj sia." 13 Cov Fas Lis Xais hais rau Yes Xus tias : "Koj ua tim khawv rov zeem txog koj, koj tej lus tim khawv tsis tseeb." 14 Yes Xus teb rau lawv hais tias : "Tab yog kuv ua tim khawv rov zeem txog kuv, mas kuv cov lus pov thawj yog qhov tseeb, vim kuv paub tias kuv tuaj qhov twg tuaj, thiab kuv yuav mus lawm qhov twg. Hos nej, mas nej tsis paub kuv tuaj qhov twg tuaj, thiab kuv yuav mus lawm qhov twg. 15 Nej txiav txim raws li lub cev nqaij uas nej pom. Hos kuv tsis txiav txim rau leej twg. 16 Yog tias kuv txiav txim, mas kuv cov lus txiav txim mus raws qhov tseeb, vim kuv tsis txiav kuv ib leeg, muaj kuv thiab Tus Xa kuv tuaj, wb ua ke txiav txim. 17 Nyob hauv nej Txoj Cai, muaj lus sau cia tias : Thaum ob tug neeg ua tim khawv mas nkawd cov lus yog lus tseeb. 18 Kuv rov ua tim khawv txog kuv, thiab Leej Txiv uas xa kuv tuaj kuj ua tim khawv txog kuv." 19 Lawv hais rau Yes Xus tias : "Koj Txiv nyob qhov twg ?" Yes Xus teb tias : "Nej tsis paub kuv thiab tsis paub kuv Txiv. Yog nej paub kuv, nej kuj yuav paub kuv Txiv thiab." 20 Yog thaum Yes Xus qhia nyob hauv lub Tuam Tsev Teev Ntuj, hauv Chav Tsev Ceev nyiaj, mas nws thiaj hais cov lus no. Tsis muaj leej twg ntes nws, vim nws lub zim txwv los tsis tau txog.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 8th April 2019, 1:33 pm

    TIM 9 LUB 4 HLIS 2019

    Hnub Peb Lis Piam Tsib Caij Plaub Caug Xyoo C Nruab Lis Piam Xyoo I

    Zaj Nyeem Ib: XAM PHA 21: 4-9


    4 Cov His Xas Lais tso lub Roob Hoj tseg, lawv taug txoj kev mus rau lub hiav txwv Liab, lawv lug Es Dos teb mus. Tsoom pej xeem npau taws nyob ntawm ib tog kev. 5 Lawv cem Tswv Ntuj thiab cem Mais Xes tias: "Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau lawm !" 6 Tswv Ntuj thiaj tso ib cov nab muaj taug hluav taws tuaj rau hauv tsoom neeg. Cov nab ntawd tom cov neeg, ces muaj coob leej tuag nyob hauv cov His Xas Lais. 7 Tsoom pej xeem mus cuag Mais Xe, lawv hais rau nws tias : "Peb ua txhaum lawm vim peb tau cem HUAB TAIS thiab cem koj. Koj thov kom HUAB TAIS zam rau peb, kom nws ntiab cov nab ntawd khiav mus deb peb." Ces Mais Xes thiaj thov kom Tswv Ntuj zam rau tsoom neeg. 8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, kyog nws ntsia tus nab nchuav ntawd ces nws yuav muaj txoj sia nyob." 9 Mais Xes thiaj muab tooj los nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws muaj txoj sia nyob.

    NPN 102: 2-3, 16-18, 19-21

    Txais: (2) HUAB TAIS, thov koj mloog kuv zaj thov ntuj
    thiab cia kuv lub suab nrov tuaj txog koj !

    HUAB TAIS, thov koj mloog kuv zaj thov ntuj
    thiab cia kuv lub suab nrov tuaj txog koj !
    Thov koj txhob thaiv ntsej muag rau kuv,
    thaum kuv txom nyem,
    Thov koj tig pob ntseg los rau kuv,
    thaum kuv hu txog koj,
    thov koj tsuag tsuag teb kuv.

    Txais: HUAB TAIS, thov koj mloog kuv zaj thov
    thiab cia kuv lub suab nrov tuaj txog koj !

    HUAB TAIS, cov kuj cuab yuav hwm koj lub npe,
    cov vaj nyob ntiaj teb yuav hwm koj lub koob meej,
    thaum HUAB TAIS rov txhim Xis Yoos,
    thiab nws tawm tuaj nyob hauv nws lub hwj chim,
    thaum nws tig los mloog cov neeg txom nyem tej lus thov,
    thiab tsis saib lawv tej lus thov tsis muaj nqes.

    Txais: HUAB TAIS, thov koj mloog kuv zaj thov
    thiab cia kuv lub suab nrov tuaj txog koj !

    Nej sau qhov no cia rau phaj tub ki uas tseem yuav yug los,
    kom cov neeg Huab Tais tsim yav tom ntej los yuav cav txog nws :
    HUAB TAIS nyob saum nws thaj chaw ntshiab dauv muag los saib;
    nws nyob saum txheej ntuj siab ntsia pom ntiaj teb,
    nws mloog cov neeg nyob txim lub suab ntsaj,
    nws tso cov raug txim tuag kom lawv dim.

    Txais: HUAB TAIS, thov koj mloog kuv zaj thov
    thiab cia kuv lub suab nrov tuaj txog koj !

    Zaj Cav lub Moo Zoo

    Lub noob nplej yog Tswv Ntuj lo lus, Leej Pleev yog tus tseb nplej;
    txhua leej uas mus cuag nws yuav muaj txoj sia nyob mus li.

    Ntawv Moo Zoo: ZAM 8: 21-30

    21 Yes Xus hais rau cov Fas Lis Xais tias : "Kuv yuav mus, nej yuav nrhiav kuv, thiab nej yuav tuag nyob hauv nej cov txhaum. Qhov chaw kuv mus, mas nej tuaj tsis tau." 22 Ces cov Yus Das hais tias : "Puas yog nws yuav rov tua nws, nws thiaj hais tias : ‘Qhov chaw kuv mus, mas nej tuaj tsis tau ?’" 23 Yes Xus hais rau lawv tias : "Nej tawm hauv txheej qis los. Kuv tawm saum txheej siab los. Nej yog ntiaj teb tug, kuv tsis yog ntiaj teb tug. 24 Li ntawd kuv thiaj hais rau nej tias nej yuav tuag nyob hauv nej cov txhaum. Vim yog nej tsis ntseeg tias kuv yog Tus Nyob, mas nej yuav tuag nyob hauv nej cov txhaum." 25 Lawv hais rau Yes Xus tias : "Koj yog leej twg ?" Yes Xus hais rau lawv tias : "Kuv yog tus kuv ib txwm hais rau nej thaum pib los lawm. 26 Kuv muaj ntau yam hais txog nej thiab ntau yam yuav txiav txim rau nej. Tus Xa kuv tuaj yog tus tseeb, mas qhov kuv tshaj rau lub qab ntuj neeg yog qhov kuv hnov ntawm nws los." 27 Lawv tsis to taub tias Yes Xus hais txog Leej Txiv rau lawv. 28 Ces Yes Xus thiaj hais tias : "Thaum nej muab Neeg Leej Tub tsa siab lawm, mas nej yuav pom tias kuv yog Tus Nyob, thiab tsis muaj ib yam uas yog kuv ua ntawm kuv tus kheej, yam uas kuv hais, yog Leej Txiv qhia rau kuv; 29 nej yuav pom tias tus xa kuv tuaj nws nrog nraim kuv, nws tsis cia kuv nyob ib leeg, vim kuv ua qhov ntxim nws siab tas mus li.” 30 Thaum Yes Xus hais lus li ntawd, muaj coob leej ntseeg txog nws.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 9th April 2019, 5:17 pm

    TIM 10 LUB 4 HLIS 2019

    Hnub Plaub Lis Piam Tsib Caij Plaub Caug Xyoo A Nruab Lis Piam Xyoo I

    Zaj Nyeem Ib: DN 3: 14-20, 91-92, 95


    14 Tus vaj Nas Npws Kos Dos Nos Xos nug tias : "Sas Ntas, Mes Sas thiab As Npes Nes Nkos, puas muaj tseeb tias nej tsis kam tsob hwb kuv cov dab thiab nej tsis kim caug pe tus mlom kub uas kuv tau tsa rau neeg hawm os? 15 Zaum no thaum nej hnov raj kub tshis nrov, hnov tshuab qeej tshuab xyu tshuab raj, hnov ntaus nkauj nog ncas ntaus thaj cheej thiab hnov tas txhia hom suab paj nruag nrov, mas nej yuav tsum txhos caug hauv av thiab pe hawm tus mlom uas kuv tau ua. Yog nej tsis pe mas tam sim ntawd nej yuav raug muab pov rau hauv lub qhov hluav taws kub ntaiv. Saib tus dab twg yuav tuaj cawm nej ntawm kuv txhais tes tau ?" 16 Sas Ntas, Mes Sas, thiab As Npes Nes Nkos teb rau tus vaj Nes Npws Kos Nos Xos tias : "Tsis tas peb yuav teb koj hais txog qhov no li. 17 Aub ! Vaj ! Yog peb tus Tswv Ntuj, tus uas peb tsob hwb, nws pab tau peb dim ntawm lub qhov hluav taws kub ntaiv thiab ntawm koj txhais tes, mas nws yeej yuav pab peb kom peb dim xwb. 18 Tab yog nws tsis pab los koj yuav tsum paub tias peb yeej tsis tsob hwb koj tus dab thiab peb tsis kam pe tus mlom koj tau tsa !"
    19 Tus vaj Nas Npws Kos Dos Nos Xos npau taws ceev ceev ua ntsej muag dub nciab rau Sas Ntas, Mes Sas thiab As Npes Nes Nkos lawv. Nws txib neeg kom mus rauv taws hauv lub qhov hluav taws kom kub xya npaug tshaj raws kev cai. 20 Thiab nws txib cov neeg muaj zog nyob hauv nws pab tub rog kom lawv muab Sas Ntas, Mes Sas thiab As Npes Nes Nkos pav thiab muab pov rau hauv lub qhov hluav taws.
    91 Tus vaj Nas Npws Kos Dos Nos Xos poob siab, nws sawv tsees. Nws hais rau nws cov tub ncig tias : "Ua cas tsis yog peb muab peb tug neeg pav tas huv si mam pov rau hauv hluav taws lod ?" Lawv teb tias : "Aub ! Vaj ! Yog li ntawd kawg !" 92 Tus vaj hais tias : "Ua cas kuv pom plaub tug neeg tsis pav li, lawv mus mus los los hauv hluav taws, xws li hluav taws tsis kub lawv qhov twg li. Tus plaub muaj ntsis yuav zoo li yog Tswv Ntuj ib tug tub."
    95 Nas Npws Kos Dos Nos Xos tsa suab hlo qw tias : "Sas Ntas, Mes Sas thiab As Npes Nes Nkos lawv tus Tswv Ntuj nto koob meej! Nws xa nws tus tshiab tuaj cawm nws cov tub txib, vim lawv tso siab rau nws; lawv tsis tau mloog tus vaj cov lus, lawv tuaj yeem cia lawv lub cev raug txom nyem dua tsob hwb los teev hawm lwm tus tswv ntuj, lawv tsuas tsob hwb lawv tus Tswv Ntuj xwb.”

    NPN DN 3: 52, 53, 54, 55, 56

    Txais: (52b) Peb cav txog koj peb qhuas txog koj tas mus li!

    Huab Tais peb phaj txiv tus Tswv Ntuj, thov kom koj nto koob meej,
    Koj yog tus tsim nyog cav txog tsim nyog qhuas txog
    tshaj tas txhua yam mus li ib txhis;
    Kom koj lub npe ntshiab muaj hwj chim nto koob meej,
    Tsim nyog cav txog tsim nyog qhuas txog
    tshaj tas txhua yam mus tiam dhau tiam.

    Txais: (52b) Peb cav txog koj peb qhuas txog koj tas mus li!

    Koj nto koob meej nyob hauv lub tuam tsev
    muaj koj lub hwj chim nsthiab,
    Koj yog tus tsim nyog cav txog tsim nyog qhuas txog
    tshaj tas txhua yam mus li ib txhis.

    Txais: (52b) Peb cav txog koj peb qhuas txog koj tas mus li!

    Koj nto koob meej nyob saum koj
    lub theej kiab hauv koj lub ceeb tsheej,
    Koj yog tus tsim nyog cav txog tsim nyog qhuas txog
    tshaj tas txhua yam mus li ib txhis.

    Txais: (52b) Peb cav txog koj peb qhuas txog koj tas mus li!

    K0j nto koob meej, koj tus zaum saum koj lub theej kiab
    txawb saum cov kes lus npis tsom rau hauv cov qab thu tob;
    Koj yog tus tsim nyog cav txog tsim nyog qhuas txog
    tshaj tas txhua yam mus li ib txhis.

    Txais: (52b) Peb cav txog koj peb qhuas txog koj tas mus li!

    Koj nto koob meej nyob saum lub ntuj ntsuab saum ntuj,
    Koj yog tus tsim nyog cav txog tsim nyog qhuas txog tas mus li ib txhis.

    Txais: (52b) Peb cav txog koj peb qhuas txog koj tas mus li!

    Zaj Cav txog lub Moo Zoo: LK 8: 15

    Cov muaj hmoov zoo yog cov muaj ib lub siab dav khaws nkaus Lo Lus coj,
    lawv txi txiv zoo vim lawv xyaum coj rawv Lo Lus tsis tso tseg.

    Ntawv Moo Zoo: ZAM 8: 31-42

    31 Yes Xus hais rau cov Yus Das uas ntseeg nws tias : "Yog nej nyob rawv hauv kuv cov lus, mas nej yog kuv cov thwj tim tiag. 32 Nej yuav paub qhov tseeb, ces qhov tseeb yuav ua kom nej twj lij." 33 Lawv hais rau Yes Xus tias : "Peb yog Has Nplas Has cov xeeb ntxwv, peb tsis tau ua dua leej twg qhev ib zaug, ua cas koj thiaj hais tias : Nej yuav twj lij ?" 34 Yes Xus teb rau lawv tias : "Kuv hais qhov muaj tseeb tiag rau nej tias : Leej twg ua txhaum, mas nws ua kev txhaum qhev. 35 Ib tug qhev tsis tau nyob hauv tsev neeg tas mus li, tus tub thiaj tau nyob tas mus li. 36 Yog Leej Tub ua kom nej twj lij, mas nej thiaj yog tseem neeg twj lij tiag. 37 Kuv paub tias nej yog Has Nplas Has cov xeeb ntxwv tiag, tiam sis nej ho nrhiav kev muab kuv tua, vim kuv lo lus tsis muaj chaw nyob rau hauv nej. 38 Kuv hais yam uas kuv pom ntawm kuv Txiv, hos nej ua yam uas nej hnov ntawm nej txiv."
    39 Lawv teb rau Yes Xus tias : "Peb txiv yog Has Nplas Has." Yes Xus hais rau lawv tias : "Yog tias nej yog Has Nplas Has cov me nyuam, mas nej yuav ua Has Nplas Has cov hauj lwm. 40 Tab sis nej nrhiav kev muab kuv tua, kuv twb yog ib tug hais qhov tseeb uas kuv hnov ntawm Tswv Ntuj los rau nej. Has Nplas Has tsis tau ua li ntawd. 41 Nej ua nej txiv cov hauj lwm xwb." Lawv hais rau Yes Xus tias : "Peb tsis yog me nyuam tsaub : Peb tsuas muaj ib leeg txiv xwb, yog Tswv Ntuj." 42 Yes Xus hais rau lawv tias : “Yog tias nej Txiv yog Tswv Ntuj, mas nej yuav nyiam kuv, vim kuv tawm ntawm Tswv Ntuj los, thiab kuv tuaj ntawm nws tuaj; tsis yog kuv tuaj kuv tus kheej xwb, yog nws xa kuv tuaj.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 10th April 2019, 7:08 am

    TIM 11 LUB 4 HLIS 2019

    Hnub Tsib Lis Piam Tsib Caij Plaub Caug Xyoo C Nruab Lis Piam Xyoo I

    Hwm LN Stanislaus, Tswv Qhia tuag ua Tim Khawv

    Zaj Nyeem Ib: HAUV PAUS 17: 3-9


    3 Ces Has Nplas khoov pe ntsej muag ti nkaus av. Tswv Ntuj hais rau nws tias : 4 "Ntawm kuv mas kuv nrog koj cog lus li no : Koj yuav ua txiv rau ntau haiv neeg. 5 Koj lub npe yuav tsis hu ua Has Nplas ntxiv, koj lub npe yuav hu ua Has Nplas Has lawm xwb, vim kuv muab koj los ua txiv rau ntau haiv neeg. 6 Kuv yuav ua kom koj huam vam ntau tuaj. Tej haiv neeg yuav tawm hauv koj los, thiab ib co vaj yuav sawv hauv koj tuaj. 7 Kuv yuav muaj kev cog lus nrog koj thiab nrog koj tsoom xeeb leej xeeb ntxws uas los tom qab koj tas mus li txheej dhau txheej tiam dhau tiam tias: Kuv yuav ua koj tus Tswv Ntuj thiab ua koj tsoom xeeb leej xeeb ntxwv uas los tom qab koj tus Tswv Ntuj. 8 Kuv yuav muab lub teb chaws uas koj nyob ntawm no rau koj thiab rau koj tsoom xeeb leej xeeb ntxwv uas los tom qab koj, muab tas nrho lub teb chaws Kas Nas Has rau nej ua nej tug mus li tsis muaj caij kawg, thiab kuv yuav ua lawv tus Tswv Ntuj."
    9 Tswv Ntuj tseem hais rau Has Nplas Has tias : "Ntawm koj mas koj yuav ua raws nraim li kuv lo lus uas kuv nrog koj cog, koj thiab koj tsoom xeeb leej xeeb ntxwv uas los tom qab koj nej yuav ua raws li ntawd mus tiam dhau tiam.”

    NPN 105: 4-5, 6-7, 8-9

    Txais: (8a) Huab Tais nco ntsoov nws lo lus nws tau cog tas mus li.

    Nej nrhiav Huab Tais thiab nws lub zog,
    nej nrhiav nws lub ntsej muag tsis tseg.
    Nej nco ntsoov txog cov hwj huam nws tau ua,
    nco ntsoov nws cov hauj lwm nto moo,
    nco ntsoov cov lus txiav txim nws lub ncauj tau hais.

    Txais: Huab Tais nco ntsoov nws lo lus nws tau cog tas mus li.

    Has Nplas Has tsoom xeeb ntxwv, nej yog nws cov tub txib,
    Yas Kos cov tub, nej yog nws pab neeg nws tau xaiv!
    Huab Tais yog peb tus Tswv Ntuj,
    tas ntiaj teb yuav raws li nws txiav txim.

    Txais: Huab Tais nco ntsoov nws lo lus nws tau cog tas mus li.

    Nws nco ntsoov tas mus li tias nws tau cog lo lus,
    yog lus nws cog ruaj nreb rau txhiab tiam tub ki.
    Yog cov lus nws tau pib nrog Has Nplas Has cog,
    thiab nws rov zeem tseeb rau His Xas Has.

    Txais: Huab Tais nco ntsoov nws lo lus nws tau cog tas mus li.

    Zaj Cav lub Moo Zoo: NPN 95: 8


    Yog hnub no nej hnov nws lub suab,
    tsis txhob ua nej lub siab tawv ncauj.

    Ntawv Moo Zoo: ZAM 8: 51-59

    Yes Xus hais rau cov Yus Das tias:
    51 Kuv hais qhov muaj tseeb tiag rau nej : Leej twg khaws kuv lo lus, nws yuav tsis pom txoj kev tuag ib zaug li." 52 Cov Yus Das hais rau Yes Xus tias : "Nyem no peb paub tseeb tias koj raug ib tug dab phem lawm. Has Nplas Has tuag lawm, cov yaj saub los kuj tuag lawm. Hos koj hais tias : 'Yog leej twg khaws kuv lo lus, nws yuav tsis saj txoj kev tuag ib zaug.' 53 Koj puas loj dua peb txiv Has Nplas Has uas nws tuag lawm ? Puas loj dua cov yaj saub uas kuj tuag lawm thiab ? Koj khav tias koj yog leej twg ?" 54 Yes Xus teb tias : "Yog kuv rov cav txog kuv lub koob meej, mas kuv lub koob meej tsis muaj nuj nqi dab tsi. Tab sis, tus cav txog kuv lub koob meej, yog kuv Txiv, yog tus uas nej hais tias : 'Nws yog peb tus Tswv Ntuj.' 55 Tab sis nej tsis paub nws, hos kuv paub nws. Yog kuv hais tias kuv tsis paub nws, mas kuv yog ib tug neeg dag ib yam li nej. Tab sis kuv paub nws thiab kuv khaws nws lo lus. 56 Nej txiv Has Nplas Has twb zoo siab tias nws yuav tau pom lub hnub nyoog kuv tuaj; nws tau pom lawm, ces nws zoo siab lawm." 57 Cov Yus Das hais rau Yes Xus tias : "Koj twb tsis tau muaj tsib caug xyoo, koj txawm siv pom Has Nplas Has lawm lod?" 58 Yes Xus hais rau lawv tias : "Kuv hais qhov muaj tseeb tiag rau nej tias : Thaum tsis tau muaj Has Nplas Has, kuv yeej Nyob lawm." 59 Lawv khaws pob zeb zom zaws yuav txawb rau Yes Xus, tab sis Yes Xus khiav mus nkaum, thiab nws tawm hauv lub Tuam Tsev Teev Ntuj mus lawm.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 11th April 2019, 1:09 pm

    TIM 12 LUB 4 HLIS 2019

    Hnub Rau Lis Piam Tsib lub Caij Plaub Caug Xyoo C Nruab Lis Piam Xyoo I

    Zaj Nyeem Ib: YLM 20: 10-13


    10 Kuv hnov ntau leej sib ntxhi tias : "Kev ntshai nyob ib ncig tas qhov txhia chaw! Kom nws kiag! Peb mus kom nws kiag!" Cov uas thaud lawv yog kuv cov phooj ywg, lawv nyas nrhw saib kuv puas yuav ua ib qho yuam kev : "Nyaj tej zaud, nws yuav mloog cov neeg tej lus ntxias, ces peb yuav yeej nws, peb yuav tau kev rov ua pauj rau nws."
    11 Tab sis HUAB TAIS nrog rawv kuv zoo li ib tug peeb zeej zog nchav. Kuv cov yeeb ncuab yuav ntog, lawv yuav tsis yeej; lawv yuav poob ntsej muag loj kawg nkaus tias cas lawv tsis yeej; lawv txoj kev swb yuav nyob mus li ib txhiab ib txhis tsis muaj tias yuav tsis nco qab tau.
    12 HUAB TAIS kav tsoom hnub qub, koj sim tus neeg siab ncaj, koj pom tshab hauv neeg nruab siab nruab plawv, thov koj cia kuv pom koj txoj kev ua pauj rau lawv, vim kuv tso kuv txoj kev nyuaj tas rau hauv koj txhais tes lawm.
    13 Nej hu nkauj rau HUAB TAIS, nej cav lus zoo txog HUAB TAIS, vim nws tau cawm tus neeg txom nyem txoj sia ntawm cov neeg phem txhais tes.

    NPN 18: 2-3A, 3BC-4, 5-6, 7


    Txais: (7) Thaum kuv nyuaj siab kuv hu txog Huab tais, nws mloog kuv lub suab.

    Kuv nyiam koj, HUAB TAIS, koj yog kuv lub zog,
    HUAB TAIS, koj yog kuv phab tsua,
    kuv lub yeej ntsa zeb, tus cawm kuv dim.

    Txais: (7) Thaum kuv nyuaj siab kuv hu txog Huab tais, nws mloog kuv lub suab.

    Kuv tus Tswv Ntuj yog kuv lub tsua kuv chaw nkaum,
    kuv daim leem phiaj thaiv, lub zog cawm kuv,
    nws yog kuv lub yeej ruaj khov,
    Kuv tau thov Huab Tais tus tsim nyog peb cav txog,
    ces kuv dim ntawm kuv cov yeeb ncuab.

    Txais: (7) Thaum kuv nyuaj siab kuv hu txog Huab tais, nws mloog kuv lub suab.

    Kev tuag cov hlua tuaj vij puag ncig kuv,
    kev txhaum cov dej sab siv huam loj tuaj nyab kuv,
    cov vas hauv tub tuag teb tuaj puav kuv,
    kev tuag cov rooj ntxiab tuaj zawm kuv.

    Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

    Nyob hauv txoj kev nyuaj kev ti, kuv hu txog Huab Tais,
    kuv tsa suab quaj thov txog kuv tus Tswv Ntuj;
    Nws nyob hauv nws lub tuam tsev hnov kuv lub suab,
    kuv zaj quaj thov ntuj nrov txog nws pob ntseg.

    Txais: (7) Thaum kuv nyuaj siab kuv hu txog Huab tais, nws mloog kuv lub suab.

    Zaj Cav lub Moo Zoo: ZAM 6: 63C, 68C

    Huab Tais, koj cov lus yog ntsuj plig thiab yog txoj sia;
    koj muaj cov lus muaj txoj sia nyob mus li.

    Ntawv Moo Zoo: ZAM 10: 31-42

    31 Cov Yus Das rov khaws dua ib co pob zeb los yuav txawb rau Yes Xus. 32 Yes Xus hais rau lawv tias : "Kuv tau ua ntau yam hauj lwm zoo tuaj ntawm Leej Txiv tuaj rau nej pom. Tim yam hauj lwm twg, nej thiaj xav txawb pob zeb rau kuv ?" 33 Cov Yus Das teb rau Yes Xus tias : "Peb yuav txawb pob zeb rau koj, tsis yog tim ib yam hauj lwm zoo, yog tim koj thuam Ntuj; vim tias koj tsuas yog ib tug neeg xwb, tsis kav, koj muab koj tsa ua Tswv Ntuj." 34 Yes Xus teb rau lawv tias : "Nyob hauv nej Txoj Cai, puas muaj lus sau cia tias : ‘Kuv hais tias nej yog ib co tswv ntuj’? 35 Yog tias Ntawv twb hu cov neeg txais Tswv Ntuj lo lus ua tswv ntuj, mas peb rhuav tsis tau cov Ntawv ntawd. 36 Uas cas nej hais rau tus uas Leej Txiv qee nws, thiab xa nws tuaj rau hauv lub qab ntuj neeg tias : 'Koj thuam Ntuj' - vim kuv hais tias : ‘Kuv yog Tswv Ntuj Leej Tub’? 37 Yog kuv tsis ua kuv Txiv cov hauj lwm, mas nej txhob ntseeg kuv. 38 Tab sis yog kuv ua kuv Txiv cov hauj lwm, mas txawm tias nej tsis ntseeg kuv, los nej yuav tsum ntseeg cov hauj lwm, kom xwv nej paub thiab to taub tias Leej Txiv nyob hauv kuv, thiab kuv nyob hauv Leej Txiv." 39 Lawv rov qab nrhiav kev xav ntes Yes Xus, tab sis nws khiav dim ntawm lawv tes mus lawm.
    40 Yes Xus rov hla mus rau sab dej Yos Las Das tim ub, ntawm thaj chaw uas yav dhau los Zam ua kab ke ntxuav. Ces Yes Xus nyob ntawd. 41 Muaj neeg coob coob tuaj cuag Yes Xus, lawv hais tias : "Zam tsis tau ua ib lub cim li, tab sis txhua yam uas Zam hais txog tus no, mas muaj tseeb tas huv tib si." 42 Ces muaj coob leej ntseeg txog Yes Xus nyob ntawd.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 12th April 2019, 1:59 pm

    TIM 13 LUB 4 HLIS 2019

    Hnub Xya Lis Piam Tsib lub Caij Plaub Caug Xyoo C Nruab Lis Piam Xyoo I

    Zaj Nyeem Ib: ES XES KIAS 37: 21-28


    21 Koj hais rau tsoom His Xas Lais tias : "HUAB TAIS hais li no : Kuv yuav coj tsoom His Xas Lais ntawm cov kuj cuab uas lawv mus nyob los, kuv yuav sau lawv nyob tas qhov txhia chaw, yuav coj lawv rov los rau hauv lawv thaj av. 22 Kuv yuav muab lawv ua ib haiv neeg xwb nyob hauv lub teb chaws, nyob saum cov roob His Xas Lais. Ib tug vaj xwb yuav ua sawv daws tus vaj. Lawv yuav tsis sib faib ua ob haiv neeg nyob ob lub teb chaws ntxiv lawm. 23 Lawv yuav tsis ua kom lawv qias neeg ntxiv vim lawv tej kev teev mlom, tej kev ua phem ua qias, thiab lawv tej kev txhaum txhua yam. Kuv yuav cawm lawv dim ntawm tas lawv tej kev txhaum fav xeeb uas lawv tau ua thiab kuv yuav ntxuav kom lawv dawb huv tuaj, ces lawv yuav ua kuv haiv neeg, kuv yuav ua lawv tus Tswv Ntuj. 24 Kuv tus tub txib Das Vis yuav ua vaj kav lawv, thiab yuav muaj tib tug tswv zov yaj saib lawv sawv daws xwb. Lawv yuav ua neej coj raws nraim kuv tej kev cai lij choj, lawv yuav mob siab rau coj kuv txoj cai uas kuv tau txiav. 25 Lawv yuav nyob hauv lub teb chaws kuv tau muab rau kuv tus tub txib Yas Kos, yog lub teb chaws uas nej cov yawg koob tau nyob. Lawv yuav tau nyob, lawv thiab lawv cov tub ki thiab cov tub ki tej tub ki yuav tau nyob ntawd mus li. Kuv tus tub txib Das Vis yuav ua lawv tus vaj mus li. 26 Kuv yuav nrog lawv cog lus kom muaj kev thaj yeeb, yuav yog ib txog kev cog lus nyob mus li rau lawv. Kuv yuav ua kom lawv nyob ruaj khov kho, thiab kom lawv huam vam tuaj; kuv yuav tsa kuv lub tsev ntshiab nyob mus li hauv lawv. 27 Kuv yuav tsa kuv lub tsev rau saum lawv; kuv yuav yog lawv tus Tswv Ntuj, lawv yuav yog kuv haiv neeg. 28 Ces cov kuj cuab yuav paub tias kuv yog HUAB TAIS, yog tus ua kom His Xas Lais ntshiab tuaj, vim kuv lub tsev ntshiab yuav nyob nruab nrab hauv lawv mus li."

    NPN: YES LES MIAS 31: 10, 11-12ABCD, 13

    Txais: (10d) Huab Tais yuav saib peb nraim xws li tus tswv zov yaj saib nws pab yaj.

    Txhua haiv neeg, nej mloog Huab Tais lo lus,
    nej coj mus tshaj tawm rau cov pov txwv nyob deb hais tias:
    ‘Nws tau cia His Xas Lais tawg mus rau ntau qhov,
    nyem no nws rov sau lawv los ua ke,
    nws saib lawv xws li tus tswv saib nws pab yaj.’

    Txais: (10d) Huab Tais yuav saib peb nraim xws li tus tswv zov yaj saib nws pab yaj.

    Huab Tais yuav txhiv Yas Kos rov los,
    nws yuav txhiv lawv ntawm tus neeg tswj lawv txhais tes los.
    Lawv yuav qw zom zaws nce mus saum cov ncov roob Xis Yoos,
    lawv yuav tuaj laub lug tuaj mus txais
    Huab Tais lo lus koob hmoov,
    foom noob qoob noo tsa, dej caw, roj, yaj thiab nyuj.

    Txais: (10d) Huab Tais yuav saib peb nraim xws li tus tswv zov yaj saib nws pab yaj.

    Ces cov ntxhais hluas yuav ua lom zem thiab yoj cev,
    cov tub hluas thiab cov laus neeg kuj ua ib yam.
    Kuv yuav muab lawv tej kev tu siab ntxeev ua kev zoo siab,
    kuv yuav chawj lawv nplij lawv thaum dhau tej kev txom nyem lawm.

    Txais: (10d) Huab Tais yuav saib peb nraim xws li tus tswv zov yaj saib nws pab yaj.

    Zaj Cav lub Moo Zoo: ES XES KIAS 18: 31

    Huab Tais hais tias, muab tej kev phem
    nej tau ua tshem pov tseg deb ntawm nej,
    nej rov ua dua ib lub siab tshiab
    thiab ib lub tswv yim tshiab rau nej.

    Ntawv Moo Zoo: ZAM 11: 45-56

    45 Coob tus Yus Das uas tuaj xyuas Mab Liab(Mas Ntas Las) tau pom qhov uas Yes Xus ua ces lawv ntseeg txog Yes Xus. 46 Tab sis muaj ib co Yus Das mus cuag cov Fas Lis Xais, lawv mus qhia cov Fas Lis Xais txog qhov Yes Xus tau ua. 47 Cov thawj leej choj thiab cov Fas Lis Xais thiaj hu ib lub rooj sab laj rau cov Xas Nes Nrees, lawv hais tias : "Peb yuav ua dab tsi ? Tus neeg ntawd pheej ua ib co cim ntau kawg ? 48 Yog peb cia nws ua li no ntxiv, mas sawv daws yuav ntseeg nws, ces cov Los Mas yuav tuaj rhuav peb thiab peb lub teb chaws thiab peb haiv neeg." 49 Nyob hauv lawv, muaj ib tug hu ua Kais Fas, xyoo ntawd yog nws ua tuam thawj leej choj. Nws hais rau lawv tias : "Nej tsis paub dab tsi li ! 50 Nej tsis xav tswv yim tias qhov zoo tshaj rau nej, yog cia ib tug neeg xwb tuag hloov tsoom pej xeem chaw, kom xwv tas haiv neeg tsis txhob tuag." 51 Kais Fas hais li ntawd, tsis yog nws hais nws xwb. Tab sis vim nws ua tuam thawj leej choj xyoo ntawd, ces nws thiaj ua yaj saub qhia tias Yes Xus yuav tsum tuag hloov nws haiv neeg chaw. 52 Tsis yog Yes Xus yuav tuag hloov nws haiv neeg chaw xwb, tiam sis nws kuj tuag kom tau sau Tswv Ntuj cov me nyuam uas tau sib tawg lawd rov los ua ib pab. 53 Txij hnub ntawd los, lawv txiav tias yuav muab Yes Xus tua.
    54 Ces Yes Xus thiaj tsis tab meeg mus los hauv tsoom Yus Das ntxiv. Nws sawv kev ntawm qhov chaw ntawd mus rau ib thaj tsam tsis deb ntawm teb chaws suab puam, rau hauv ib lub nroog hu ua Es Fas Is. Nws nrog nws cov thwj tim nyob ntawd.
    55 Thaum yuav txog cov Yus Das lub hnub nyoog Hla, cov neeg hauv tej zos nruab liaj nruab teb nce coob mus pem Yes Xus Xas Les ua ntej lub ntees Hla, konm lawv tau mus ua cov kab ke ntxuav kom lawv dawb huv ua ntej. 56 Thaum lawv sawv nyob hauv lub Tuam Tsev Teev Ntuj, lawv nrhiav Yes Xus, lawv ib leeg nug ib leeg tias : "Nej xav li cas ? Nws puas yuav tuaj koom lub Ntees no?"


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 14th April 2019, 12:17 pm

    TIM      15      LUB      4      HLIS      2019

    Hnub Ob hauv Lis Piam Ntshiab Xyoo C Nruab Lis Piam Xyoo I

    Zaj Nyeem Ib:       HIS XAIS  42:   1-7


    1 “Nej ntsia ! Ntawm no yog kuv tus tub txib uas kuv nres, tus kuv tau xaiv uas ntxim kuv siab; kuv tau muab kuv lub tswv yim los rau saum nws. Nws yuav coj txoj kev ncaj mus qhia rau cov kuj cuab. 2 Kuv tus tub txib yuav tsis nthe, tsis hais lus nrov, tsis ua suab ncha nyob hauv tej kev hauv nroog. 3 Nws yuav tsis dam tus txhiav qaug, nws yuav tsis ntov dej rau tus nplaim teeb cig qauj les kom tuag, nws yuav tsa kom muaj txoj kev ncaj raws qhov tseeb 4 Nws yuav tsis ntaus siab me, yuav tsis swb mus txog hnub nws tsa tau txoj kev ncaj kav ntiaj teb lawm, ces cov pov txwv yuav tos ntsoov nws txoj kev qhuab qhia.”
    5 HUAB TAIS Tswv Ntuj, tus tsim thiab nthuav cov txheej ntuj saud kom dav, tus ua kom lub ntiaj teb thiab txhua yam tawm hauv ntiaj teb los nyob ruaj, tus tshuab pa rau tsoom neeg nyob ntiaj teb kom ciaj sia, thiab muab tswv yim rau cov taug kev hauv lub ntiaj teb, nws hais li no:  6 “Kuv , HUAB TAIS tau hu koj nyob hauv txoj kev ncaj, kuv tau tuav koj tes, kuv tau puab koj, tau muab koj ua haiv neeg txoj kev cog lus, ua lub teeb pom kev kaj cov kuj cuab, 7 kom tau qhib cov dig muag lub qhov muag, kom tau tso cov neeg kaw hauv tsev loj faj kom tawm los, thiab tso cov neeg kaw hauv nkuaj kom tawm hauv kev tsaus ntuj los.

    NPN       27:   1, 2, 3, 13-14

    Txais: (1a) HuabTais yog kuv qhov pom kev thiab yog tus cawm kuv.

    HUAB TAIS yog kuv qhov pom kev thiab yog tus cawm kuv.
    Kuv yuav ntshai leej twg?
    HUAB TAIS yog lub yeej ntsa zeb thaiv kuv txoj sia,
    Kuv yuav tshee na ntawm leej twg xub ntiag?

    Txais: (1a) HuabTais yog kuv qhov pom kev thiab yog tus cawm kuv.

    Thaum ib pab neeg phem txav los ze kuv,
    yuav los dua kuv lub cev,
    yog lawv, kuv cov yeeb ncuab, thiab cov ntxub kuv,
    yog lawv yuav dawm taw thiab yuav ntog.

    Txais: (1a) HuabTais yog kuv qhov pom kev thiab yog tus cawm kuv.

    Txawm muaj ib pab tub rog tuaj
    tsa tsev tsam phooj npaj tua kuv,
    los kuv lub siab tsis ntshai dab tsi;
    Tab yog lawv sawv ntaus rog tua kuv,
    los kuv tseem tso siab lug li qub.

    Txais: (1a) HuabTais yog kuv qhov pom kev thiab yog tus cawm kuv.

    Kuv ntseeg tias kuv yuav tau pom HUAB TAIS lub siab zoo
    nyob hauv tsoom neeg ciaj lub teb chaws.
    Koj tos ntsoov HUAB TAIS, ua siab loj loj ;
    ua siab tawv qhawv, tos ntsoov HUAB TAIS mog !

    Txais: (1a) HuabTais yog kuv qhov pom kev thiab yog tus cawm kuv.

    Zaj Cav lub Moo Zoo

    Peb hawm koj, peb tus Vaj,
    koj ib leeg thiaj muaj lub siab zoo zam tau txhaum rau peb.

    Ntawv Moo Zoo:       ZAM  12:   1-11


    1 Rau hnub ua ntej lub Ntees Hla, Yes Xus tuaj txog Npes Tas Nias, yog Las Ntxas Los lub zos, yog tus uas Yes Xus tau tsa nws sawv hauv cov tuag rov los. 2 Nyob ntawd, lawv ua ib roog qav tos txais Yes Xus tuaj. Mas Tas yog tus rau mov, hos Las Ntxas Los yog ib tug nyob hauv cov uas nrog Yes Xus zaum ntawm rooj noj mov. 3 Mab Liab muab ib hwj tshuaj tsw qab, yog cov tseem tshuaj muaj nqis kim kawg los pleev Yes Xus ko taw. Thiab nws muab nws cov plaub hau los so Yes Xus ko taw. Cov tshuaj tsw thoob plaws lub tsev. 4 Ces Yus Das Kas Lis Yaus, uas yog Yes Xus ib tug thwj tim, nws yog tus yuav muab Yes Xus muag, nws hais tias : 5 "Ua cas tsis muab cov tshuaj tsw qab ntawd muag peb puas lub txiaj nyiag, ces muab cov nyiaj pub rau cov pluag ?" 6 Yus Das hais li ntawd, tsis yog vim nws hlub txog cov pluag, tab sis vim nws yog ib tug tub sab, nws yog tus tuav lub hnab rau nyiaj, ces nws pheej nyiag kam cov nyiaj uas lawv tso rau hauv. 7 Yes Xus thiaj hais tias : "Nej cia nws ua nws, nws yuav tsum khaws cov tshuaj no cia rau hnub uas kuv lub cev yuav mus zwm ntxa. 8 Nej muaj cov pluag nrog nej nyob mus li ; tab sis nej tsis muaj kuv nrog nej nyob mus li."
    9 Cov Yus Das paub tias Yes Xus tuaj nyob ntawd, lawv tuaj tej pab coob coob tuaj, tsis yog vim lawv xav pom Yes Xus xwb, lawv kuj xav pom Las Ntxas Los uas Yes Xus tau tsa nws sawv hauv cov tuag rov los thiab. 10 Ces cov thawj leej choj txiav tias lawv yuav muab Las Ntxas Los tua thiab,  11 vim yog tim nws mas cov Yus Das coob leej thiaj tig los ntseeg txog Yes Xus.
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2595
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Mim on 15th April 2019, 4:47 am

    TIM 16 LUB 4 HLIS 2019

    Hnub Peb hauv Lis Piam Ntshiab Xyoo C Nruab Lis Piam Xyoo I

    Zaj Nyeem Ib: HIS XAIS 49: 1-6


    1 Cov pov txwv, nej cuab pob ntseg rau kuv, cov haiv neeg nyob deb, nej mloog. Txij thaum kuv tseem nyob hauv kuv niam plab, HUAB TAIS yeej hu kuv lawm, txij thaum kuv tseem nyob hauv kuv niam cev, nws tis npe rau kuv lawm. 2 Nws muab kuv lub ncauj los ua ib rab ntaj ntse zuag plias, nws muab kuv nraim rau hauv nws txhais tes qhov ntxoov ntxoo. Nws muab kuv ua ib xib xub vos ntse ntse, zais kuv rau hauv nws lub raj xub. 3 HUAB TAIS hais rau kuv tias : "His Xas Lais, koj yog kuv tus tub txib, kuv yuav nto koob meej nyob hauv koj."
    4 Txawm kuv hais tias : "Kuv tau khwv ciaj khwv tuag tsis tau dab tsi li, kuv nkim kuv lub zog dag rau tej yam yaj ntshis li cua xwb.” Tsis kav kuv muaj paj tshab nyob ze ntawm HUAB TAIS, kuv muaj nqi zog nyob ze ntawm kuv tus Tswv Ntuj. 5 Nyem no HUAB TAIS hais tawm, nws uas yog tus puab kuv nyob hauv kuv niam nrog cev kom kuv ua nws tus tub txib coj Yas Kos rov los cuag nws, thiab sau His Xas Lais rov qab los nrog nws koom siab, vim kuv muaj nqes nyob ntawm HUAB TAIS qhov muag, thiab kuv tus Tswv Ntuj yog kuv lub zog, 6 nws hais tias : "Tsis zoo txaus cia koj ua kuv tus tub txib, tus rov tsa cov xeem Yas Kos kom sawv, thiab coj cov His Xas Lais seem kom rov qab los xwb, kuv tseem yuav muab koj ua lub teeb ci kaj cov kuj cuab kom kuv txoj kev cawm txeem mus txog npoo ntiaj teb kawg tib si thiab.”

    NPN 71: 1-2, 3-4A, 5AB-6AB, 15+17

    Txais: (15ab) Kuv yuav hu nkauj cav txog koj txoj kev cawm neeg.

    Huab Tais, kuv tuaj nkaum nyob hauv koj,
    thov tsis txhob cia kuv raug kev txaj muag ib zaug li.
    Thov tuaj pab kub nyob hauv koj txoj kev ncaj, thov tso kuv dim;
    cuab koj lub pob ntseg khoov los mloog kuv, thov cawm kuv.

    Txais: (15ab) Kuv yuav hu nkauj cav txog koj txoj kev cawm neeg.

    Thov koj yog lub tsua rau kuv ua chaw nkaum,
    yog lub yeej thaiv kuv ntawm xwv txheej,
    vim koj yeej yog kuv lub tsua thiab lub yeej ntsa zeb.
    Kuv tus Tswv Ntuj, thov npo kuv ntawm cov neeg phem txhais tes.

    Txais: (15ab) Kuv yuav hu nkauj cav txog koj txoj kev cawm neeg.

    Huab Tais, koj yog kuv txoj kev cia siab,
    Tswv Ntuj koj yog tus kuv ntseeg siab txij thaum hluas los.
    Kuv yeej tso siab rau koj txij thaum kuv yug los lawm,
    txij thaum kuv nyob hauv kuv niam plab los, koj yeej yog kuv lub zog.

    Txais: (15ab) Kuv yuav hu nkauj cav txog koj txoj kev cawm neeg.

    Kuv lub ncauj yuav tshaj koj txoj kev ncaj,
    thiab koj txoj kev cawm neeg hnub dhau hnub.
    Tswv Ntuj, koj tau qhuab qhia kuv txij thaum yau los,
    los txog hnub no, kuv tshaj tawm koj cov hauj lwm txaus qhuas.

    Txais: (15ab) Kuv yuav hu nkauj cav txog koj txoj kev cawm neeg.

    Zaj Cav lub Moo Zoo

    Peb hawm koj, peb tus Vaj, koj tau mloog leej Txiv lus;
    luag cab koj mus ntsia saum ntoo cuam xws li tus yaj seej seej luag cab mus tua.

    Ntawv Moo Zoo: ZAM 13: 21-33, 36-38

    21 Yes Xus hais li ntawd tas, ces nws lub siab ntxhov hnyo, nws thiaj hais lus pov thawj tias : "Kuv hais qhov muaj tseeb tiag rau nej tias nej ib tug yuav muab kuv muag." 22 Cov thwj tim sib ntsia zom zaws, lawv tsis paub tias Yes Xus hais txog leej twg. 23 Muaj ib tug thwj tim, yog tus uas Yes Xus nyiam, zaum qaij rau Yes Xus hauv siab. 24 Xis Moos Pob Zeb ncaws hau rau nws tias : "Nws hais txog leej twg ?" 25 Tus thwj tim ntawd tig los pheeb rau Yes Xus hauv siab, nws nug Yes Xus tias : "Huab Tais, yog leej twg ?" 26 Yes Xus teb tias : "Yog tus uas kuv yuav muab qhov ncuav mov no ntsw kua cev rau nws." Ces Yes Xus muab qhov ncuav mov ntsw kua, nws muab cev rau Yus Das, Xis Moos Kas Lis Yaus tus tub. 27 Thaum Yus Das txais qhov mov ntawd noj tas, Xas Tas nkag mus rau hauv Yus Das. Yes Xus hais rau nws tias : "Qhov koj yuav ua, mas koj ua kom sai." 28 Cov zaum ntawm rooj mov, tsis muaj ib tug to taub tias yog vim li cas Yes Xus hais li ntawd rau Yus Das. 29 Vim tias Yus Das saib lub hnab nyiaj, ces ib txhia xav tias Yes Xus hais rau Yus Das tias : "Mus muas tej yam uas peb yuav siv rau rooj qav," los yog hais tias : "Pub tej yam rau cov pluag." 30 Yus Das txais lo mov ntawd los noj, ces nws tawm mus tam sis ntawd. Thaum ntawd tsaus ntuj lawm.
    31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj muaj koob meej nyob hauv nws lawm. 32 Yog Tswv Ntuj muaj koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tshuav tsis ntev, Tswv Ntuj yuav muab koob meej rau Neeg Leeg Tub. 33 Cov me nyuad, kuv yuav nrog nej nyob me ntsis ntxiv xwb. Nej yuav nrhiav kuv. Nyem no, kuv hais rau nej ib yam li kuv tau hais rau cov Yus Das tias qhov chaw kuv mus, mas nej tuaj tsis tau.
    36 Xis Moos Pob Zeb hais rau Yes Xus tias : "Huab Tais, koj yuav mus qhov twg?" Yes Xus teb tias : "Qhov chaw kuv mus, nyem no koj lawv kuv qab tsis tau. Tab sis yav tom ntej, mas koj yuav lawv kuv qab." 37 Pob Zeb hais rau Yes Xus tias : "Huab Tais, vim li cas nyem no kuv thiaj lawv koj qab mus tsis tau ? Kuv tuaj yeem siv kuv txoj sia rau koj." 38 Yes Xus teb tias : "Koj yuav siv koj txoj sia rau kuv no lod? Kuv hais qhov tseeb tiag rau koj : Qaib tsis tau qua, koj twb tsis lees kuv peb zaug lawm."



    Sponsored content

    UA KOOB TSHEEJ YES XUS YUG LOS XYOO 2018 - Page 4 Empty Re: UA KOOB TSHEEJ YES XUS YUG LOS XYOO 2018

    Post  Sponsored content


      Current date/time is 17th November 2019, 8:12 pm