Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

ZOS ROOB NYUJ QUS 1956 NTAWV HMOOB THOOB TEB LUB HAUV PAUS.

Gallery


UA KOOB TSHEEJ YES XUS YUG LOS XYOO 2018 - Page 6 Empty

Latest topics

» UA KOOB TSHEEJ YES XUS YUG LOS XYOO 2018
by Mim Yesterday at 2:16 pm

» Qhia Ntuj Kev Cai.
by Maiv Tooj 21st October 2019, 10:29 pm

» XH. Yaj Zoov Ntxheb lub Tsev THOOB TSIB
by Maiv Tooj 21st October 2019, 10:27 pm

» Xov Tooj Cua Zoo Tswv Zov Yaj
by Maiv Tooj 21st October 2019, 6:30 pm

» COV ZAJ NYEEM HNUB CHIV 2018-2019 xyoo C
by NrhiavTswvNtuj 16th October 2019, 11:36 pm

» Tij Teej Xyooj Cob Tsib teb Cog Lus ib sim neej hauv Tswv Ntuj.
by Maiv Tooj 13th October 2019, 8:17 am

» Cov Txiv Plig Hmoob Suav teb
by Maiv Tooj 11th October 2019, 2:32 am

» HMOOB LUB XEEM
by Maiv Tooj 8th October 2019, 10:13 pm

» QHOV UAS DAB YUAV TSWJ KAV TAU NEEG
by Maiv Tooj 8th October 2019, 2:56 pm

» TXOJ KEV YUAV RAUG TXIM TIAM YUAV TUAJ NO.
by Maiv Tooj 18th September 2019, 6:33 am

» TP.Txhiaj Foom lub TSEV Ntawv
by Maiv Tooj 23rd August 2019, 6:08 am

» XH.Zoov Ntxheb Yaj Nthuav Ntawv Ntshiab.
by Maiv Tooj 23rd August 2019, 5:37 am

Suav neeg tuaj saib, txij hnub 17/09/2010 los mus.


    UA KOOB TSHEEJ YES XUS YUG LOS XYOO 2018

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 15th May 2019, 8:03 am

    TIM 16 LUB 5 HLIS 2019

    Hnub Tsib Lis Piam Plaub Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 13: 13-25


    13 Paj Lug thiab cov nrog nws caij nkoj ntawm Pas Fos mus rau Pes Zes uas nyob Pas Fis Lias teb. Zam tso lawv tseg, ntawd nws rov mus Yes Lus Xas Les lawm. 14 Paj Lug lawv mus ntawm Pes Zes mus txog As Nthias Kias, nyob Pis Xis Dias teb. Thaum txog hnub xas npas tos, lawv mus hauv lub Tsev Txoos, nkawd mus zaum. 15 Thaum lawv nyeem Txoj Cai thiab cov Yaj Saub tej ntawv tas, mas cov tswj lub Tsev Txoos tso neeg los hais rau lawv tias : "Kwv tij, yog nej muaj lus dab tsi zoo txhawb tsoom pej xeem lub siab no, nej hais mas !"
    16 Paj Lug thiaj li sawv tsees tsa tes, thiab nws hais tias : "Cov kwv tij His Xas Lais, thiab nej cov uas hwm Tswv Ntuj sawv daws, nej mloog mog ! 17 Haiv neeg His Xas Lais no tus Tswv Ntuj tau xaiv peb cov yawg koob thiab tau tsa kom lawv ciaj ua ib haiv neeg thaum lub caij lawv nyob Hais Nkws Tos teb, thiab yog nws tsa nws txhais npab tuaj coj lawv tawm ntawm lub teb chaws ntawd los. 18 Nws ua siab ntev nyiaj lawv tus cwj pwm tau plaub caug xyoo nyob hauv teb chaws suab puam. 19 Ces Tswv Ntuj rhuav tas xya haiv neeg nyob hauv teb chaws Kas Nas Has, nws mam li muab lawv lub teb chaws rau peb cov yawg koob nyob ua lawv tug. 20 Nws kam siv plaub puas tsib caug xyoo thiaj tau lub teb chaws. Dhau tej ntawd lawm, nws thiaj tsa ib co tub txiav txim coj lawv, los txog ntua rau tus Yaj Saub Xas Muas. 21 Txij thaum ntawd mus, lawv thov ib tug vaj. Ces Tswv Ntuj tsa Xas Ws rau lawv, nws yog Kis tus tub, xeem Npes Yas Mis, nws kav lawv ntev li plaub caug xyoo. 22 Ces Tswv Ntuj muab Xas Ws tshem, nws thiaj tsa Das Vis los ua lawv tus vaj. Tswv Ntuj ua pov thawj txog Das Vis tias : "Kuv nrhiav tau Das Vis, Yes Xes tub. Nws yog tus neeg ntxim kuv siab, nws yuav ua raws li kuv lub siab xav tas huv si." 23 Nyob hauv Das Vis cov xeeb ntxwv, Tswv Ntuj tau tsa raws li nws tau cog lus, ib tug cawm seej rau His Xas Lais, uas yog Yes Xus. 24 Zam xub tuaj ua ntej, tuaj npaj kev rau Yes Xus yuav tuaj. Nws tshaj rau tas haiv His Xas Lais kom sawv daws txais cov kab ke ntxuav los lees txhaum. 25 Thaum Zam ua nws txoj hauj lwm yuav tiav, nws hais tias : "Nej xav hais tias kuv tsis yog leej twg? Kuv tsis yog li nej xav; tiam sis muaj ib tug lawv kuv qab tuaj lawm. Tus ntawd mas kuv tsis tsim nyog daws nws txoj hlua khau."

    NPN 89: 2-3, 21-22, 25+27

    Txais: (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Kuv yuav hu nkauj mus li cav txog HUAB TAIS tej kev zoo,
    kuv lub ncauj yuav tshaj txog koj txoj kev pheej xeeb mus tiam dhau tiam.
    Vim koj tau hais tias: “Kuv lub siab zoo yuav nyob ruaj nreb mus li;”
    nyob saum ntuj koj tau cog koj txoj kev pheej xeeb kom ruaj khov

    Txais: (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Kuv nrhiav tau kuv tus tub txib Das Vis,
    kuv tau muab kuv cov roj ntshiab los pleev nws.
    Kuv txhais tes yuav nyob ze nws mus li,
    Thiab kuv txhais npab yuav ua kom nws muaj zog.

    Txais: (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Kuv txoj kev ncaj thiab kev hlub nyob ze nws,
    kuv lub npe yuav tsa nws hauv pliaj kom siab.
    Nws yuav hais rau kuv tias : "Koj yog kuv txiv,
    Kuv tus Tswv Ntuj, kuv lub Tsua, kuv tus Cawm Seej!"

    Txais: (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    As Les Lus Yas: QYTN 1: 5AB

    Txais: As les lus yas, as les lus yas.

    Yes Xus Pleev, koj yog tus tim khawv tseeb,
    tus tub hlob tawm ntawm kev tuag los,
    koj tau hlub peb thiab tau cawm peb dim ntawm
    peb cov txhaum nyob hauv koj cov ntshav.

    Txais: As les lus yas, as les lus yas.

    Ntawv Moo Zoo: ZAM 13: 16-20

    Thaum Yes Xus ntxuav nws cov thwj tim ko taw tas, nws hais rau lawv tias:
    16 “Kuv hais qhov muaj tseeb tiag rau nej : Tus tub txib tsis loj dua nws tus tswv, tus tub xa xov tsis loj dua tus uas txib nws mus.
    17 Yog nej paub qhov no, mas nej txoj hmoov zoo yog nej ua raws li ntawd.
    18 Kuv tsis hais txog nej txhua leej txhua tus. Kuv paub cov uas kuv tau xaiv. Tab sis vim yuav tsum tshwm sim raws li Ntawv sau cia tias : ‘Tus tau noj kuv qhov mov rov tig luj taws rau kuv.’
    19 Nyem no, kuv xub hais rau nej, cheem tej xwm no tseem tsis tau tshwm sim tuaj, kom xwv thaum tej ntawd tshwm tuaj, nej ntseeg tias kuv yog tus Nyob.
    20 Kuv hais qhov muaj tseeb tiag rau nej : Leej twg txais tus uas kuv xa mus, yog nws txais kuv. Leej twg txais kuv, yog txais tus uas xa kuv tuaj."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 16th May 2019, 4:04 am

    TIM 17 LUB 5 HLIS 2019

    Hnub Rau Lis Piam Plaub Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 13: 26-33


    Paj Lug hais nyob hauv lub tsev txoos nyob As Nthias Kias tias:
    26 “Cov kwv tij uas nej yog Has Nplas Has cov tub ki, thiab nej cov uas hwm Tswv Ntuj, lo lus tshaj txog txoj kev cawm neeg no tuaj txog peb lawm. 27 Vim cov nyob Yes Lus Xas Les thiab lawv cov thawj coj tsis lees paub Yes Xus thiab tsis to taub cov yaj saub tej lus uas lawv nyeem niaj hnub xav npas tos, ces lawv tau ua raws nraim li cov lus ntawd thaum lawv txiav txim kom Yes Xus tuag. 28 Lawv twb nrhiav tsis tau ib yam dab tsi nyob hauv Yes Xus kom nws tsim nyog tuag los lawv tseem thov kom Pis Las Tos muab nws tua. 29 Thaum lawv ua tas raws li Ntawv sau tseg txog nws lawm, mas lawv daws nws saum tus ntoo los thiab lawv muab nws lub cev mus zwm ntxa. 30 Tab sis Tswv Ntuj tsa nws sawv hauv cov tuag rov los lawm. 31 Tau ntau hnub nws tau tawm los xyuas cov neeg uas nrog nws tuaj ntawm Nkas Lis Lais tuaj mus rau Yes Lus Xas Les. Nyem no cov neeg ntawd ua tim khawv txog nws rau tsoom pej xeem sawv daws paub. 32 Ntawm peb los peb kuj tshaj lub Moo Zoo rau nej, uas yog lo lus Tswv Ntuj tau cog rau peb cov yawg koob. 33 Nws tau ua rau peb uas yog lawv cov tub ki raws nraim li lo lus nws tau cog, nws thiaj tau tsa Yes Xus sawv rov los, raws li nyob hauv zaj nkauj paj nruag ob muaj lo lus sau tseg tias : 'Koj yog kuv Leej Tub, hnub no kuv tau xeeb koj los.'”

    NPN 2: 6-7, 8-9, 10-11AB

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    “Kuv tau pleev roj rau kuv tus vaj
    nyob saum Xis Yoos, kuv lub roob ntshiab."
    Kuv yuav tshaj HUAB TAIS txoj cai tawm.
    HUAB TAIS hais rau kuv tias : 'Koj yog kuv leej tub.
    Hnub no kuv xeeb koj los.

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    Koj thov kuv, mas kuv yuav muab
    tsoom kuj cuab los ua cuab tam pub rau koj,
    kuv yuav muab lub ntiaj teb mus txog tim npoo ntuj los ua koj tug.
    Koj yuav tuav ib tug cwj hlau los tswj lawv.
    Koj yuav tsoo lawv ntsoog tas xws li lub lauj kaub av."

    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    Ib tsoom vaj, nej yuav ua neeg thoob tsib,
    cov tswj lub ntiaj teb, nej yuav tsum paub.
    Nej yuav ntshai rwg tsob hwb HUAB TAIS,
    Nej cia li pe tshee na ntawm nws ko taw.


    Txais: (7bc) Koj yog kuv Leej Tub, hnub no kuv tau xeeb koj los.
    los: As les lus yas.

    As Les Lus Yas: ZAM 14: 6

    Txais: As les lus yas, as les lus yas.

    Huab Tais hais tias: Kuv yog Txoj Kev, yog Qhov Tseeb, thiab yog Txoj Sia.
    Tsis muaj leej twg mus cuag Leej Txiv tau, yog nws tsis mus ntawm kuv mus.

    Txais: As les lus yas, as les lus yas.

    Ntawv Moo Zoo: ZAM 14: 1-6

    Yes Xus hais rau nws cov thwj tim tias:
    1 Nej tsis txhob ntxhov siab. Nej ntseeg txog Tswv Ntuj, ua li mas nej ntseeg txog kuv thiab. 2 Nyob hauv kuv Txiv tsev, muaj ntau chav. Yog tsis muaj mas kuv puas yuav hais rau nej tias kuv mus npaj ib qho chaw rau nej? 3 Thaum kuv mus npaj tau ib qho chaw rau nej lawm, kuv yuav rov los coj nej mus nyob ze kuv, kom xwv kuv nyob qhov twg, nej nrog kuv nyob qhov ntawd. 4 Qhov kuv yuav mus ntawd, nej twb paub txoj kev lawm. 5 Tos Mas hais rau Yes Xus tias : "Huab Tais, peb tsis paub koj yuav mus qhov twg. Peb yuav ua cas paub txoj kev ?" 6 Yes Xus hais rau Tos Mas tias : "Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis mus ntawm kuv mus."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 17th May 2019, 2:05 pm

    TIM 18 LUB 5 HLIS 2019

    Hnub Xya Lis Piam Plaub Caij Hla Xyoo C Nruab Lis Piam Xyoo I

    Hwm LN Zam I, Vaj Qhia tuag ua Tim Khawv

    Zaj Nyeem Ib: HAUJ LWM 13: 44-52


    44 Hnub Xya tom qab, yuav luag tas lub tsheej tuaj sib sau mloog Tswv Ntuj Lo Lus. 45 Cov Yus Das pom neeg tuaj coob coob, mas lawv khib kawg, ces lawv hais lus phem txog Paj Lug cov lus thiab lawv thuam nws. 46 Paj Lug thiab Npas Nas Npes nkawd ua siab loj tsis ntshai hais lus meej tias : "Raws txoj cai, peb yuav tsum xub tshaj Tswv Ntuj lo lus rau nej tso, tab sis yog vim nej tsis kam txais Tswv Ntuj lo lus thiab nej rov muab lub txim rau nej tias nej tsis tsim nyog txais txoj sia nyob mus li, ces nyem no peb yuav tig mus qhia cov neeg teev pej kum dab. 47 Huab Tais twb hais rau peb lawm tias : "Kuv tsa koj ua qhov pom kev kaj cov haiv neeg teev pej kum dab, kom koj coj kuv txoj kev cawm neeg mus txog tim npoo ntiaj teb kawg."
    48 Cov neeg teev pej kum dab hnov cov lus no mas lawv zoo siab kawg, lawv cav txog Huab Tais lo lus. Cov uas lawv txoj hmoo yog yuav tsum tau txais txoj sia nyob mus li mas lawv tig los ntseeg. 49 Ces Huab Tais lo lus ri mus puv tas ib cheeb tsam ntawd. 50 Tab sis cov Yus Das mus cob cov poj niam nom uas hwm Tswv Ntuj, thiab cov thawj coj nyob hauv lub tsheej, ces lawv pib hiam Paj Lug thiab Npas Nas Npes nkawd. Lawv ntiab nkawd kom tawm hauv lawv teb chaws mus. 51 Nkawd thiaj nchos cov plua av lo nkawd ko taw ua tim khawv txog lawv, ces nkawd mus rau Is Kos Nias lawm. 52 Hos cov thwj tim, mas lawv muaj kev zoo siab puv npo thiab Leej Ntuj Plig Ntshiab nyob puv hauv lawv.

    NPN 98: 1, 2-3AB, 3CD-4

    Txais: (3cd) Tas npoo ntuj npoo ntiaj teb kawg
    tau pom peb tus Tswv Ntuj txoj kev cawm neeg.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    thiab nws sab npab ntshiab

    Txais…

    HUAB TAIS ua kom sawv daws paub txog nws txoj kev cawm neeg,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo
    thiab kev pheej xeeb rau tsev neeg His Xas Lais.

    Txais…

    Tas npoo ntuj npoo ntiaj teb kawg tau pom
    peb tus Tswv Ntuj txoj kev cawm neeg.
    Tas txhua teb chaws, nej zoo siab hu nkauj rau HUAB TAIS,
    nej nqua suab hu nkauj, nej cav txog nws.

    Txais…

    As Les Lus Yas: ZAM 8: 31B-32

    Txais: As les lus yas, as les lus yas.

    Huab Tais hais tias: Yog nej nyob ruaj hauv kuv cov lus,
    mas nej yuav yog kuv cov tseem thwj tim
    thiab nej yuav paub qhov tseeb.

    Txais: As les lus yas, as les lus yas.

    Ntawv Moo Zoo: ZAM 14: 7-14

    Yes Xus hais rau cov thwj tim tias:
    7 “Yog nej paub kuv, mas nej kuj paub kuv Txiv thiab. Txij nyem no nej twb paub nws thiab twb pom nws lawm." 8 Fis Lis Pos hais rau Yes Xus tias : "Huab Tais, koj pub peb pom Leej Txiv, ces peb txaus siab lawm." 9 Yes Xus hais rau Fis Lis Pos tias : "Fis Lis Pos, kuv nrog nej nyob ntev npaum no, koj tseem tsis tau paub kuv thiab lod ? Tus twg pom kuv, mas yog nws pom Leej Txiv. Ua cas koj thiaj hais tau tias : 'Koj pub peb pom Leej Txiv' ? 10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ? Cov lus uas kuv hais rau nej, tsis yog kuv hais kuv tus kheej , yog Leej Txiv uas nyob txawm hauv kuv nws ua nws cov hauj lwm xwb. 11 Nej ntseeg kuv tias kuv nyob hauv Leej Txiv, thiab Leej Txiv nyob hauv kuv. Txawm nej tsis ntseeg los vim cov hauj lwm mas nej yuav tsum ntseeg. 12 Kuv hais qhov muaj tseeb tiag rau nej : Tus ntseeg kuv, nws kuj yuav ua cov hauj lwm kuv ua thiab. Nws tseem yuav ua tej yam loj dua cov ntawd thiab, vim kuv mus cuag Leej Txiv. 13 Txhua yam uas nej tuav txog kuv lub npe thov, mas kuv yuav ua huv tib si, kom xwv Leej Txiv muaj koob meej nyob hauv Leej Tub. 14 Yog nej tuav txog kuv lub npe thov ib yam dab tsi, mas kuv yuav ua yam ntawd."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st May 2019, 6:44 am

    Tim 20 lub 5 Hlis 2019

    Hnub Ob Lis Piam Tsib Caij Hla Xyoo C Nruab Lis Piam Xyoo I

    Hwm LN Bernardine nyob Siena

    Zaj NYeem Ib: Hauj Lwm 14: 5-18


    5 Cov neeg teev pej kum dab qhuas thiab cov Yus Das nyob Is Kos Nias nrog lawv cov thawj coj npaj yuav ua phem rau ob tug Hauv Paus Xa Lus thiab npaj xuas pob zeb los txawb nkawd kom tuag. 6 Tab sis nkawd xub paub li ntawd, ces nkawd khiav mus rau hauv cov nroog nyob Lis Kos Nias teb xws li lub nroog Lis Ros thiab Des Npes thiab nyob ib ncig thaj tsam ntawd. 7 Nkawd tshaj lub Moo Zoo nyob ntawd.
    8 Nyob Lis Ros, muaj ib tug neeg uas nws ob txhais taw tsis muaj zog. Nws tuag taw li ntawd txij hnub nws yug los lawm, nws tsis tau tshais ruam mus kev ib zaug li. 9 Nws mloog Paj Lug cov lus qhuab qhia. Paj Lug kuj ntsia ntsoov nws, ces Paj Lug pom tias nws muaj kev ntseeg txaus kho kom nws zoo lawm. 10 Paj Lug thiaj hu ib suab nrov nrov tias : "Koj sawv saib ! Koj sawv ntsug ntseg ntseg saum koj ob txhais taw saib." Tus tuag taw tib plhaw sawv tsees, ces nws pib mus taus kev. 11 Cov neeg pom Paj Lug ua li ntawd, lawv ua lus Lis Kos Nias qw zom zaws tias : "Ib co dab txia ua tib neeg nqes los nyob hauv peb lawm lau!"
    12 Lawv hu Npas Nas Npes ua dab ‘Zeus’, ho hu Paj Lug ua dab ‘Hermes’, vim Paj Lug yog tus hais lus. 13 Tus leej choj teev tus dab Zeus lub tuam tsev teev dab nyob ze ntawm lub rooj vag nkag los hauv nroog; nws coj ib co heev nyuj thiab ib co ntshua ntawv tuaj txog ntawm lub rooj vag, nws nrog tas tsoom sid tab tom npaj yuav txi nyuj rau nkawd. 14 Thaum ob tug Hauv Paus Xa Lus Npas Nas Npes thiab Paj Lug nkawd paub txog qhov ntawd, nkawd dua rhe nkawd cov ris tsho, thiab nkawd khiav mus hais rau tsoom sid tias : 15 "Tsoom neeg sawv daws, nej ua dab tsi li no ? Wb kuj yog tib neeg zoo ib yam nkaus li nej thiab xwb. Wb tuaj qhia ib lub moo zoo rau nej kom nej tso tej dab tej mlom tsis muaj qab hau no pov tseg, tig los hwm tus Tswv Ntuj muaj txoj sia uas tau tsim lub ntuj lub ntiaj teb, lub hiav txwv thiab tas txhua yam uas nyob hauv. 16 Yav thaud, Tswv Ntuj cia cov haiv neeg nyias mus raws nyias txoj kev. 17 Txawm li ntawd los yeej muaj tej yam ua tim khawv txog Tswv Ntuj lub siab zoo: nws tso nag poob saum ntuj los rau nej, nws ua kom muaj caij nyoog zoo ua qoob ua loo, nws pub kom nej muaj noj muaj haus txaus siab, thiab kom nej muaj kev zoo siab puv npo." 18 Nkawd hais cov lus no twb txwv yuav luag tsis tau kom tsoom sid tsis txhob tua nyuj txi rau nkawd.

    NPN 115: 1-2, 3-4, 15-16

    Txais: (1ab) HUAB TAIS, koj txhob muab rau peb, tab sis koj muab koob meej rau koj lub npe.
    los: As les lus yas.

    HUAB TAIS, txhob muab koob meej rau peb, txhob muab rau peb,
    tab sis muab rau koj lub npe vim koj hlub neeg thiab koj yog tus ua ncaj.
    Vim li cas thiaj cia cov coj pej kum dab tau kev hais tias :
    "Lawv tus Tswv Ntuj nyob qhov twg ?"

    Txais: (1ab) HUAB TAIS, koj txhob muab rau peb, tab sis koj muab koob meej rau koj lub npe.
    los: As les lus yas.

    Peb tus Tswv Ntuj nyob txheej ntuj saud ;
    nws xav dab tsi nws ua tau tas nrho.
    Lawv cov mlom dab yog nyiaj yog kub,
    yog neeg ob txhais tes puab tawm los.

    Txais: (1ab) HUAB TAIS, koj txhob muab rau peb, tab sis koj muab koob meej rau koj lub npe.
    los: As les lus yas.

    Thov kom nej tau txais koob hmoov ntawm HUAB TAIS,
    ntawm tus xeeb ntuj xeeb teb.
    Yim txheej cuaj txheej ntuj yog HUAB TAIS li,
    hos lub ntiaj teb, nws muab pub rau tib neeg nyob.

    Txais: (1ab) HUAB TAIS, koj txhob muab rau peb, tab sis koj muab koob meej rau koj lub npe.
    los: As les lus yas.

    As Les Lus Yas: ZAM 14: 26


    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej
    thiab yuav pab kom nej rov nco txog txhua yam kuv tau hais rau nej.

    Txais: As les lus yas, as les lus yas.

    Ntawv Moo Zoo: ZAM 14: 21-26

    Yes Xus hais rau nws cov thwj tim tias:
    21 “Tus khaws kuv cov lus qhia, thiab coj rawv kuv cov lus qhia, nws thiaj yog tus nyiam kuv. Tus nyiam kuv, mas kuv Txiv yuav nyiam nws, kuv kuj yuav nyiam nws, thiab kuv yuav muab kuv rau nws pom." 22 Yus Das - tsis yog tus Kas Lis Yaus - hais rau Yes Xus tias : "Huab Tais, ua cas koj thiaj yuav muab koj rau peb pom xwb, tsis cia lub qab ntuj neeg pom koj?" 23 Yes Xus teb rau Yus Das tias : "Yog leej twg nyiam kuv, nws yuav coj rawv kuv lo lus, ces kuv Txiv yuav nyiam nws. Kuv Txiv wb yuav los nyob hauv nws, wb yuav ua tsev nyob rau hauv nws. 24 Tus tsis nyiam kuv, mas nws tsis khaws kuv cov lus. Lo lus uas nej hnov tsis yog kuv lo lus, yog Leej Txiv uas xa kuv tuaj lo lus. 25 Thaum kuv tseem nrog nej nyob, kuv twb hais tej no rau nej lawm. 26 Tab sis Leej Nplij Neeg, uas yog Leej Ntuj Plig Ntshiab, mas Leej Txiv yuav ua kuv npe xa nws tuaj, nws yuav qhia tas ib puas tsav yam rau nej, thiab nws yuav pab nej rov nco txog tas txhua yam uas kuv tau hais rau nej.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st May 2019, 6:46 am

    Tim 21 lub 5 Hlis 2019

    Hnub Peb Lis Piam Tsib Caij Hla Xyoo C Nruab Lis Piam Xyoo I

    Hwm LN Christopher Magallanes thiab cov nrog nws tuag ua Tim Khawv

    Zaj Nyeem Ib: HAUJ LWM 14: 19-28


    19 Thaum ntawd muaj ib co Yus Das tuaj As Nthias Kias thiab Is Kos Nias tuaj, lawv tuaj haub ntxias tsoom pej xeem, ces lawv xuas pob zeb txawb rau Paj Lug thiab muab nws cab mus pov rau sab tsheej nraud, lawv xav tias Paj Lug tuag lawm. 20 Tab sis cov thwj tim tuaj sawv ncig Paj Lug, ces nws rov sawv los thiab nws rov mus hauv lub tsheej. Tag kis sawv ntxov, nws thiaj nrog Npas Nas Npes sawv kev mus rau Des Npes.
    21 Thaum nkawd tshaj Ntuj lus tas nyob hauv lub tsheej Des Npes, thiab nkawd qhia tau ib pab thwj tim coob lawm, mas nkawd rov mus rau Lis Ros, rau Is Kos Nias thiab rau As Nthias Kias. 22 Nkawd pab kom cov thwj tim ua siab loj tawv qhawv nyob hauv txoj kev ntseeg. Nkawd qhia tias : "Peb yuav tsum raug ntau yam kev txom nyem, peb thiaj yuav tau mus hauv Tswv Ntuj lub Ceeb Tsheej." 23 Nkawd tsa ib co txwj laus nyob hauv txhua lub koom txoos. Nkawd ua cov kab ke teev ntuj thiab yoo mov pab rau lawv thiab muab lawv fij rau tus Huab Tais uas lawv ntseeg txog. 24 Ces nkawd hla Pis Xis Dias teb mus txog Pas Fis Lias teb. 25 Thaum nkawd tshaj ntuj lus nyob Pes Zes tas lawm, mas nkawd thiaj li mus rau nram Aas Tas Lias. 26 Nkawd caij nkoj nrad mus rau As Nthias Kias, uas yog lub tsheej nkawd tau txais Tswv Ntuj lub txiaj ntsim hu nkawd kom mus ua txoj hauj lwm uas nkawd tau mus ua tiav tas lawm. 27 Thaum nkawd rov los txog, mas nkawd hu lub Koom Txoos tas huv si kom tuaj, nkawd piav tas puas tsav yam uas Tswv Ntuj tau pab nkawd ua rau sawv daws paub, thiab nkawd qhia hais tias Tswv Ntuj tau qhib qhov rooj rau cov neeg teev pej kum dab kom los txais kev ntseeg lawm. 28 Nkawd rov los nrog cov thwj tim nyob ib ntus ntev hauj sim.

    NPN 145: 10-11, 12-13AB, 21

    Txais: (12) Huab Tais, koj cov phooj ywg tshaj tawm txog
    koj lub ceeb tsheej muaj hwj chim ci ntsa iab.
    los: As les lus yas.

    HUAB TAIS, cia koj txhua yam hauj lwm ua koj tsaug,
    thiab cia cov uas nyiam koj cav txog koj.
    Cia lawv qhuas txog koj lub Ceeb Tsheej muaj hwj chim
    thiab piav txog koj lub hwj huam loj.

    Txais: (12) Huab Tais, koj cov phooj ywg tshaj tawm txog
    koj lub ceeb tsheej muaj hwj chim ci ntsa iab.
    los: As les lus yas.

    Cia lawv qhia rau neeg paub txog koj lub hwj huam loj
    thiab koj lub Ceeb Tsheej muaj hwj chim ci ntsa iab.
    Koj lub Ceeb Tsheej yog lub Ceeb Tsheej txais tas cov hlob nrog cov yau,
    thiab koj txoj kev tswj kav yuav nyob mus txheej dhau txheej.

    Txais: (12) Huab Tais, koj cov phooj ywg tshaj tawm txog
    koj lub ceeb tsheej muaj hwj chim ci ntsa iab.
    los: As les lus yas.

    Kom kuv lub ncauj cia li hais lus cav txog HUAB TAIS,
    kom txhua lub cev nqaij cia li foom lus zoo rau
    nws lub npe ntshiab mus li ib txhiab ib txhis !

    Txais: (12) Huab Tais, koj cov phooj ywg tshaj tawm txog
    koj lub ceeb tsheej muaj hwj chim ci ntsa iab.
    los: As les lus yas.

    As Les Lus Yas: LK 24: 46, 26

    Txais: As les lus yas, as les lus yas.

    Leej Pleev yuav tsum raug txom nyem thiab sawv hauv cov tuag rov los tso,
    ces nws thiaj mam mus rau hauv nws lub hwj chim.

    Txais: As les lus yas, as les lus yas.

    Ntawv Moo Zoo: ZAM 14: 27-31A

    Yes Xus hais rau nws cov thwj tim tias:
    27 “Kuv tso txoj kev thaj yeeb rau nej, kuv muab kuv txoj kev thaj yeeb rau nej. Kuv tsis muab txoj kev thaj yeeb rau nej xws li lub qab ntuj neeg muab. Nej tsis txhob cia nej lub siab ntxhov hnyo los ntshai. 28 Nej twb tau hnov kuv hais rau nej lawm tias : Kuv yuav mus tab sis kuv yuav rov los cuag nej. Yog nej nyiam kuv mas nej yuav zoo siab tias kuv mus cuag Leej Txiv, vim Leej Txiv loj dua kuv. 29 Kuv xub hais tej ntawd rau nej nyem no cheem tseem tsis tau tshwm sim tuaj, kom thaum tej ntawd tshwm sim tuaj, nej ntseeg. 30 Kuv yuav tsis tau nrog nej tham ntau ntxiv lawm, vim tus Tswj lub qab ntuj neeg tuaj txog lawm. Nws tsis muaj hwj huam ua tau dab tsi rau kuv; 31 tab sis lub qab ntuj neeg yuav tsum paub hais tias kuv nyiam Leej Txiv thiab kuv ua raws li Leej Txiv txib kom kuv ua.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st May 2019, 10:32 am

    Tim      22      lub      5      Hlis      2019

    Hnub Plaub Lis Piam Tsib Caij Hla Xyoo C Nruab Lis Piam Xyoo I

    Hwm LN Rita nyob Cascia

    Zaj Nyeem Ib:       HAUJ LWM  15:   1-6


    1 Thaum ntawd muaj ib co neeg tuaj Yus Das teb tuaj, lawv qhia cov kwv tij tias : "Yog nej tsis ua lub cim txiav tawv raws li Mais Xes txoj cai, mas nej yuav tsis tau txais kev cawm." 2 Paj Lug thiab Npas Nas Npes nkawd nrog lawv sib cav muaj ceem hauj sim txog qhov ntawd, lawv hais tsis sib haum, ces sawv daws thiaj txiav tias yuav tso Paj Lug thiab Npas Nas Npes thiab lawv ob peb leeg mus tim Yes Lus Xas Les, mus cuag cov Hauv Paus Xa Lus thiab cov txwj laus, mus nrog lawv sab laj txog lo lus ntawd. 3 Lub Koom Txoos thiaj xa lawv mus, ces lawv hla Fes Nis Xias thiab Xas Mas Lias teb; Paj Lug nkawd piav txog tias cov coj pej kum dab tau tig los txais kev ntseeg lawm rau cov kwv tij mloog, mas sawv daws zoo siab kawg. 4 Thaum lawv tuaj txog Yes Lus Xas Les, lub Koom Txoos nrog cov Hauv Paus Xa Lus thiab cov txwj laus txais tos lawv zoo. Paj Lug nkawd piav rau sawv daws txog tej yam Tswv Ntuj tau pab nkawd ua. 5 Tab sis, muaj ib co neeg uas yog tog Fas Lis Xais tau los txais kev ntseeg, lawv sawv los tawm suab hais tias: "Yuav tsum kom cov neeg teev pej kum dab txais lub cim txiav thiab coj Mais Xes txoj cai thiab."
    6 Cov Hauv Paus Xa Lus thiab cov txwj laus thiaj sib sau los sab laj txog cov lus no.

    NPN       122:   1-2, 3-4AB, 4CD-5

    Txais: (1) Tuaj peb zoo siab hlo mus lawm pem Huab Tais tsev
    los: As les lus yas.

    Kuv zoo siab vim lawv hais rau kuv tias:.
    "Peb yuav nce mus lawm pem Huab Tais tsev.”
    Yes Lus Xas Les, nim no, peb txhais taw tau tsuj koj cov rooj loog lawm.

    Txais…

    Yes Lus Xas Les, luag txhim zoo li ib lub nroog
    Uas zoo tau xwm yeem.
    Cov xeem neeg nce mus pem Yes Lus Xas Les,
    Yog Huab Tais cov xeem neeg

    Txais…

    Lawv nce mus raws li txoj cai txiav rau His Xas Lais,
    Kom tau mus ua tsaug cav txog Huab Tais lub Npe.
    Nyob ntawd muaj ib co rooj txiav txim teeb tau tseg,
    Yog cov rooj cia rau Das Vis tsev neeg.

    Txais…

    As Les Lus Yas:       ZAM  15:   4A, 5B

    Txais: As les lus yas, as les lus yas.

    Huab Tais hais tias:
    Nej yuav nyob ruaj hauv kuv ib yam li kuv nyob hauv nej;
    leej twg nyob ruaj hauv kuv mas nws yuav txi txiv ncw.

    Txais: As les lus yas, as les lus yas.

    Ntawv Moo Zoo:       ZAM  15:   1-8

    Yes Xus hais rau nws cov thwj tim tias:
    1 “Kuv yog tsob tseem hmab txiv cawv. Kuv Txiv yog tus tswv cog cov hmab txiv cawv. 2 Txoj ceg hmab twg nyob hauv kuv tsis txi txiv, mas kuv Txiv muab txiav pov tseg. Txoj hmab twg txi txiv, mas kuv Txiv tav nws ntsis kom  nws haj yam txi ncw dua qub. 3 Kuv Txiv twb tav nej lub ntsis lawm, vim lo lus kuv tau hais rau nej. 4 Nej yuav nyob ruaj hauv kuv, li kuv nyob hauv nej. Ib yam li ib txoj ceg hmab yuav txi tsis taus txiv yog nws tsis txuas rau txoj hauv paus hmab, ib yam li ntawd, nej kuj yuav txi tsis taus txiv yog nej tsis nyob ruaj hauv kuv. 5 Kuv yog tsob hmab txiv cawv, nej yog cov ceg. Tus uas nyob ruaj hauv kuv thiab kuv nyob hauv nws, mas nws yuav txi txiv ncw. Vim tias yog nej ncaim ntawm kuv, mas nej yuav ua tsis tau dab tsi. 6 Yog leej twg tsis nyob ruaj hauv kuv, mas luag yuav muab nws pov tseg rau sab nraud xws li ib tug ceg, ces nws yuav qhuav. Luag yuav sau cov ceg qhuav mus pov rau hauv hluav taws kom kub hnyiab tas. 7 Yog nej nyob ruaj hauv kuv, thiab kuv cov lus nyob ruaj hauv nej, mas nej xav tau dab tsi nej thov mas nej yuav tau raws li ntawd. 8 Qhov ntawd yuav ua kom kuv Txiv tau koob meej, thiab ua kom nej txi txiv ntau thiab nej los ua kuv thwj tim.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 22nd May 2019, 6:31 am

    Tim 23 lub 5 Hlis 2019

    Hnub Tsib Lis Piam Tsib Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 15: 7-21


    7 Lawv sib cav ntev loo, ces Pob Zeb sawv thiab hais rau cov Hauv Paus Xa Lus thiab cov txwj laus tias : "Kwv tij sawv daws, nej twb paub hais tias thaum lub hauv paus los, Tswv Ntuj tau xaiv kuv nyob nruab nrab hauv nej, kom vim kuv lub ncauj ces cov teev pej kum dab tau hnov lub Moo Zoo thiab los ntseeg. 8 Tswv Ntuj tus uas paub neeg lub siab, nws twb tau ua tim khawv pom zoo txais lawv, thaum nws pub Leej Ntuj Plig Ntshiab rau lawv ib yam li pub rau peb lawm. 9 Nws tsis saib lawv thiab peb yog neeg sib txawv, vim tias nws ntxuav lawv lub siab kom dawb nyob hauv txoj kev ntseeg lawm. 10 Tim li cas nyem no nej thiaj li xav sim Tswv Ntuj kom tau muab ib rab quab los cuab rau cov thwj tim caj dab, uas peb cov yawg koob thiab peb twb tsis muaj zog ris? 11 Thiab peb kuj ntseeg tias yog Huab Tais Yes Xus lub txiaj ntsim xwb cawm peb ib yam li cawm lawv."
    12 Ces sawv daws nyob ntsiag to. Lawv mloog Paj Lug thiab Npas Nas Npes nkawd piav txog cov cim thiab cov hwj huam uas Tswv Ntuj tau siv nkawd ua nyob hauv tsoom neeg teev pej kum dab.
    13 Thaum nkawd hais lus ntsiag lawm, Yas Kos thiaj qhib ncauj hais tias : "Kwv tij sawv daws, nej mloog kuv hais. 14 Xis Moos nyuam qhuav piav tias txij lub hauv paus los, Tswv Ntuj tau tuaj xyuas thiab xaiv ib co nyob hauv cov neeg teev pej kum dab los ua ib haiv neeg hwm nws lub npe. 15 Qhov ntawd raug raws li cov Yaj Saub cov lus sau hauv Ntawv cia tias :
    16 ‘Dhau ntawd lawm, kuv yuav rov qab los, kuv yuav rov tsa Das Vis lub tsev tsam phooj uas vau lawm; tej yam uas pob tas, kuv yuav rov kho, kuv yuav rov txhim kom sawv ntseg ; 17 kom tas nrho lwm cov neeg tau kev nrhiav Huab Tais, nrog rau tas ib tsoom neeg teev pej kum dab uas hu txog kuv lub npe. 18 Tus Huab Tais uas tau ua tej yam ntawd thiab tau qhia rau neeg paub thaum ntxov los lawm hais li ntawd.’
    19 Vim li no, mas kuv thiaj pom zoo tias, kom tsis txhob ua ntxhov rau cov neeg teev pej kum dab uas tig los ntseeg Tswv Ntuj. 20 Peb yuav sau ntawv qhia rau lawv kom caiv tej yam uas txi rau dab ces tsis huv lawm, thiab caiv kev sib dee tsis raug cai, thiab caiv cov nqaij pos tuag, thiab caiv ntshav. 21 Vim tias txij puag txheej thaud los, yeej muaj neeg tshaj txog Mais Xes nyob tas txhia lub nroog thaum lawv nyeem nws tej lus niaj hnub xas npas tos nyob hauv cov Tsev Txoos."

    NPN 96: 1-2A, 2B-3, 10

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Nej hu nkauj rau HUAB TAIS, nej hu ib zaj nkauj tshiab rau nws.
    Nej hu nkauj rau HUAB TAIS, tas txhua teb chaws,
    Nej hu nkauj rau HUAB TAIS, nej cav txog nws lub npe.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Nej tshaj txog nws txoj kev cawm neeg hnub dhau hnub .
    Nej piav txog nws lub hwj chij rau cov neeg tsis paub Ntuj,
    piav txog nws cov hauj lwm loj rau txhua haiv neeg paub.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    Nej hais rau cov naiv neeg tias: HUAB TAIS ua vaj.
    Nws tau tsim lub ntiaj teb kom nyob ruaj, muab tshem tsis tau,
    nws tswj cov haiv neeg raws txoj kev ncaj.

    Txais: (3) Nej tshaj tswv Ntuj cov hauj lwm loj rau txhua haiv neeg paub.
    Los: As les lus yas.

    As Les Lus Yas: ZAM 10: 27

    Txais: As les lus yas, as les lus yas.

    Huab Tais hais tias, kuv cov yaj mloog kuv lub suab;
    kuv paub lawv thiab lawv raws kuv qab mus.

    Txais: As les lus yas, as les lus yas.

    Ntawv Moo Zoo: ZAM 15: 9-11

    Yes Xus hais rau nws cov thwj tim tias:
    9 “Ib yam li Leej Txiv nyiam kuv, kuv kuj nyiam nej ib yam li ntawd. Nej nyob ruaj hauv kuv txoj kev nyiam mog.
    10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv coj kuv Txiv cov lus qhia thiab kuv nyob ruaj hauv nws txoj kev nyiam.
    11 Kuv qhia tej no rau nej kom kuv txoj kev kaj siab nyob hauv nej thiab kom nej muaj kev kaj siab puv npo.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 23rd May 2019, 8:29 am

    Tim 24 lub 5 Hlis 2019

    Hnub Rau Lis Piam Tsib Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 15: 22-31


    22 Ces cov Hauv Paus Xa Lus thiab cov txwj laus nrog tas lub Koom Txoos pom zoo tias cia xaiv lawv ob peb leeg xa nrog Paj Lug thiab Npas Nas Npes nkawd mus As Nthias Kias. Lawv thiaj xa Yus Das uas tseem hu ua Npas Xas Npas thiab Xis Las nkawd, uas yog ob tug neeg tseem ceeb nyob hauv cov kwv tij. 23 Lawv sau ib tsab ntawv li no rau nkawd nqa mus : "Cov Hauv Paus Xa Lus thiab cov txwj laus, uas yog nej cov kwv tij, xa lus tuaj rau cov kwv tij uas yog cov pej kum neeg los txais kev ntseeg nyob As Nthias Kias, nyob Xis Lias teb, thiab nyob Xis Lis Xias teb. Noj qab nyob zoo rau nej sawv daws. 24 Peb tau hnov tias muaj ib co neeg tuaj ntawm peb tuaj, lawv tau hais ib co lus ua kom nej ntxhov siab thiab ua kom nej lub tswv yim nyob tsis tus; tiam sis peb tsis tau kom lawv hais cov lus ntawd. 25 Peb thiaj li tau sawv daws pom zoov tias cia peb xaiv ib co neeg xa nrog ob tug kwv tij Npas Nas Npes thiab Paj Lug nkawd tuaj cuag nej; 26 nkawd yog ob tug neeg zoo siab siv nkawd txoj sia los tsob hwb peb tus Huab Tais Yes Xus Pleev lub Npe. 27 Ua li mas peb tso Yus Das thiab Xis Las tuaj, kom nkawd tuaj hais kiag rau nej raws li cov lus uas peb tau txiav. 28 Leej Ntuj Plig Ntshiab thiab peb tau pom zoo txiav tias yuav tsis yuam ib lub nra ntxiv rau nej ris, tsuas kom nej coj tej yam tseem ceeb raws li no xwb : 29 kom caiv cov nqaij txi dab, thiab caiv ntshav, thiab caiv cov nqaij muab pos tuag, thiab caiv kev sib dee tsis raws txoj cai. Yog nej caiv li no ces nej coj tau zoo lawm. Nej nyob kaj lug."
    30 Lawv thiaj tau sawv kev mus, lawv nqes mus rau As Nthias Kias. Thaum mus txog, lawv hu sawv daws tuaj sib sau ua ke, ces nkawd muab tsab ntawv rau lawv. 31 Lawv nyeem tsab ntawv ces lawv zoo siab tias cov lus nyob hauv txhawb lawv ntau.

    NPN 57: 8-9, 10+12

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv lub siab nyob ruaj nreb, Tswv Ntuj, kuv lub siab nyob ruaj nreb.
    Kuv yuav hu nkauj, yuav hu ib zaj cav txog koj.
    Kuv tus ntsuj plig, koj tsim dheev los mas;
    nkauj nog ncas thiab thaj cheej, nej cia li tsim dheev!
    Kuv yuav tsa kom lub hnub sawv tawm tuaj.

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    Kuv yuav nrog cov haiv neeg cav txog koj, Huab Tais,
    kuv yuav nrog tsoom kuj cuab hu nkauj qhuas txog koj.
    Vim koj txoj kev hlub loj siab npaum lub ntuj,
    thiab koj txoj kev ua ncaj loj siab npaum cov huab.
    Tswv Ntuj, ua kom koj nto koob meej nyob txheej ntuj saud,
    thiab kom koj lub hwj chim ci tuaj rau saum tas lub ntiaj teb!

    Txais: (10a) Kuv yuav nrog tsoom haiv neeg cav txog koj, Huab Tais.
    los: As les lus yas.

    As Les Lus Yas: ZAM 15: 15b

    Txais: As les lus yas, as les lus yas.

    Huab Tais hais tias, kuv hu nej ua kuv cov phooj ywg,
    vim kuv tau qhia rau nej paub tas puas tsav
    yam uas leej Txiv hais rau kuv.

    Txais: As les lus yas, as les lus yas.

    Ntawv Moo Zoo: ZAM 15: 12-17

    Yes Xus hais rau nws cov thwj tim tias:
    12 “Kuv lo lus qhia yog lo lus no : nej yuav sis nyiam sis hlub zoo li kuv tau nyiam tau hlub nej.
    13 Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg.
    14 Nej yog kuv cov phooj ywg, yog nej ua raws li qhov kuv qhia rau nej.
    15 Kuv tsis hu nej ntxiv ua kuv cov tub txib , vim tus tub txib tsis paub qhov uas tus tswv ua. Tab sis kuv hu nej ua phooj ywg, vim tas ib puas tsav yam kuv hnov ntawm kuv Txiv, mas kuv qhia rau nej paub tas huv si.
    16 Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, thiab kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej.
    17 Lo lus qhia uas kuv muab rau nej yog kom nej sis nyiam sis hlub.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 24th May 2019, 9:06 am

    Tim 25 lub 5 Hlis 2019

    Hnub Xya Lis Piam Tsib Caij Hla Xyoo C Nruab Lis Piam Xyoo I

    Hwm LN Bede; LN Gregory VII; LN Mary Magdalene de’ Pazzi

    Zaj Nyeem Ib: HAUJ LWM 16: 1-10


    1 Paj Lug thiaj mus txog Des Npes thiab Lis Ros. Nyob ntawd muaj ib tug thwj tim hu ua Tis Mos Tes. Nws niam yog ib tug poj niam Yus Das txais kev ntseeg. Nws txiv yog ib tug neeg Hes Las. 2 Cov kwv tij nyob Lis Ros thiab nyob Is Kos Nias, sawv daws zeem tseeb tias Tis Mos Tes yog neeg zoo. 3 Paj Lug xav coj Tis Mos Tes nrog nws mus. Ces Paj Lug coj Tis Mos Tes mus ua lub cim txiav tawv, vim muaj ib co Yus Das nyob thaj tsam ntawd, thiab sawv daws paub tias nws txiv yog neeg Hes Las. 4 Paj Lug lawv hla lub nroog twg, mas lawv tshaj thiab txhob kom sawv daws coj txoj cai uas cov Hauv Paus Xa Lus thiab cov txwj laus nyob Yes Lus Xas Les tau tsa rau cov Ntseeg. 5 Ua li mas cov Koom Txoos khov zuj zus nyob hauv txoj kev ntseeg, thiab niaj hnub huam vam coob ntxiv tuaj.
    6 Paj Lug lawv mus hla lub teb chaws Fis Zias thiab Nkas Las Tias, vim Leej Ntuj Plig tsis kheev lawv tshaj Ntuj Lo Lus nyob As Xias teb. 7 Thaum lawv tuaj txog ntawm ciam teb Mis Xias, lawv xav mus rau Npis Tis Nias teb, tab sis Yes Xus Leej Tswv Yim tsis kheev. 8 Ces lawv hla Mis Xias teb nqes mus rau nram lub tsheej Thuas. 9 Thaum hmo ntuj, Paj Lug txawm yees pom ib tug neeg Mas Xes Dos Nias sawv ntsug thov nws tias : "Koj hla tuaj rau Mas Xes Dos Nias teb, tuaj pab peb !" 10 Paj Lug pom li ntawd tas, peb nrhiav kev mus rau Mas Xes Dos Nias tam sis ntawd, vim peb to taub tias Tswv Ntuj hu peb mus tshaj Ntuj lus rau lawv cov ntawd.

    NPN 100: 1B-2, 3, 5


    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Tas lub ntiaj teb, nej hu nkauj rau HUAB TAIS !
    Nej xyiv fab hlo luag ntxhi tsob hwb HUAB TAIS ;
    nej hu nkauj zoo siab chaws los ntawm nws xub ntiag !


    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    Nej cia li lees tias HUAB TAIS yog Tswv Ntuj.
    Nws tsim peb los, peb yog nws tug,
    peb yog nws haiv neeg, yog pab yaj nws saib.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    HUAB TAIS muaj lub siab zoo :
    nws txoj kev hlub nyob mus li,
    nws ua ncaj rau peb txheej dhau txheej.

    Txais: Kom tas lub ntiaj teb qw zoo siab rau Tswv Ntuj.
    los: As les lus yas.

    As Les Lus Yas: KOS LOS XAIS 3: 1

    Txais: As les lus yas, as les lus yas.

    Yog nej twb tau nrog Leej Pleev sawv rov los lawm,
    mas nej cia li nrhiav tej yam nyob txheej saud,
    uas yog qhov chaw Leej Pleev nyob,
    zaum rawv ntawm Tswv Ntuj phab xis.

    Txais: As les lus yas, as les lus yas.

    Ntawv moo Zoo: Zam 15: 18-21

    Yes Xus hais rau nws cov thwj tim tias:
    18 "Yog lub qab ntuj neeg ntxub nej, mas nej yuav paub tias lawv twb ntxub kuv ua ntej lawm.
    19 Yog nej yog lub qab ntuj neeg tug, mas qab ntuj neeg yuav nyiam yam uas yog nws tug. Tab sis vim nej tsis yog qab ntuj neeg tug, rau qhov kuv tau xaiv nej thau nej hauv lub qab ntuj neeg los mas lub qab ntuj neeg ntxub nej.
    20 Nej nco ntsoov lo lus uas kuv tau hais rau nej tias : ‘Tus tub txib tsis loj dua nws tus tswv.’ Yog lawv twb hiam kuv, mas lawv kuj yuav hiam nej thiab. Yog lawv khaws kuv lo lus, mas lawv kuj yuav khaws nej lo lus thiab.
    21 Tiam sis lawv yuav ua tas puas tsav yam ntawd rau nej vim kuv lub npe, rau qhov lawv tsis paub Tus xa kuv tuaj.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 26th May 2019, 3:06 pm

    Tim 27 lub 5 Hlis 2019

    Hnub Ob Lis Piam Rau Caij Hla Xyoo C Nruab Lis Piam Xyoo I

    Hwm LN Augustine nyob Canterbury; Hnub nco txog ib tsoom tub rog (Memorial Day)

    Zaj Nyeem Ib: HAUJ LWM 16: 11-15


    11 Peb caij nkoj nyob Thuas ncaj qha mus rau Xas Mos Thas. Hnub tom qab peb mus rau Nias Pos Lis. 12 Txog ntawd, peb mus ntxiv rau Fis Lis Pos uas yog thawj lub tsheej nyob hauv lub cheeb tsam Mas Xes Dos Nias, uas yog ib lub xeev cov Los Mas kav. Peb nyob ob peb hnub hauv lub nroog ntawd. 13 Txog hnub xav npas tos, peb tawm mus rau sab rooj vag nraud, nyob ntawm ib tug ntug dej, uas peb xav tias yuav muaj ib qho chaw zoo teev ntuj. Peb mus zaum, thiab peb hais lus rau cov poj niam tuaj sib sau nyob ntawd. 14 Hauv pab poj niam ntawd muaj ib tug hu ua Lis Dias, nws mloog peb hais. Nws yog ib tug muag ntaub liab tsam xem nyob hauv lub tsheej Thias Tis Las. Nws hwm Tswv Ntuj. Huab Tais qhib nws lub siab kom nws zoo siab txais Paj Lug cov lus. 15 Thaum Lis Dias thiab nws tsev neeg txais lub cim ntxuav tas, nws hais rau peb li no: "Yog nej saib tias kuv yog ib tug neeg ntseeg txog Huab Tais tiag, mas thov nej nkag los nyob hauv kuv tsev." Ces nws tseev kom peb mus so hauv nws tsev.

    NPN 149: 1b-2, 3-4, 5-6A+9B

    Txais: (4a) Huab Tais zoo siab nyob hauv nws haiv neeg.
    los: As les lus yas

    Nej hu ib zaj nkauj tshiab rau HUAB TAIS,
    nej cav txog nws nyob hauv tsoom ntseeg lub txoos.
    Cov His Xas Lais yuav zoo siab nyob hauv tus uas tsim lawv,
    Xis Yoos cov me nyuam yuav luag ntxhi nyob hauv lawv tus vaj.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Lawv yuav ua kev lom zem yoj cev cav txog nws lub npe,
    lawv yuav hu nkauj cav txog nws nrog suab nruas thiab suab nkauj nog ncas.
    Vim HUAB TAIS hlub nws haiv neeg,
    thiab nws muab txoj kev yeej ua zam npua cov neeg me.

    Txais: (4a) Huab Tais zoo siab nyob hauv nws haiv neeg.
    los: As les lus yas

    Cov muaj lub siab ntseeg yuav hom khaj nyob hauv txoj kev muaj hwj chim;
    lawv yuav hu nkauj zoo siab nyob hauv lawv tej chaw saum;
    lawv lub qa tsuas muaj qw suab cav txog Tswv Ntuj.
    Qhov ntawd yog cov uas ntseeg nws lawv lub hwj chim. As les lus yas.

    Txais: (4a) Huab Tais zoo siab nyob hauv nws haiv neeg.
    los: As les lus yas

    As Les Lus Yas: ZAM 15: 26B, 27A

    Txais: As les lus yas, as les lus yas.

    Huab Tais hais tias, leej Tswv Yim tus qhia qhov tseeb yuav ua tim
    khawv txog kuv, thiab nej kuj yuav ua kuv tim khawv ib yam.

    Txais: As les lus yas, as les lus yas.

    Ntawv Moo Zoo: ZAM 15: 26—16:4A

    Yes Xus hais rau nws cov thwj tim tias:
    26 “Leej Nplij Neeg yuav tuaj; nws yog tus uas kuv yuav xa ntawm Leej Txiv tuaj rau nej. Nws yog Leej Ntuj Plig qhia qhov tseeb, nws tawm ntawm Leej Txiv los, nws yuav ua tim khawv txog kuv. 27 Nej kuj ua tim khawv thiab, vim nej yeej nrog kuv txij thaum lub hauv paus los lawm.
    16 1 "Kuv hais tej no rau nej kom nej txhob ntaus siab yau. 2 Luag yuav ntiab nej tawm hauv cov tsev txoos mus. Thiab tseem yuav muaj ib lub sij hawm uas tus muab nej tua, nws yuav xav tias nws ua ib qho los hawm Tswv Ntuj. 3 Lawv yuav ua li ntawd vim lawv tsis paub Leej Txiv thiab tsis paub kuv. 4 Kuv hais tej no rau nej, kom thaum txog lub sij hawm ntawd, nej nco ntsoov tias kuv twb xub qhia nej lawm.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 27th May 2019, 9:20 am

    Tim 28 lub 5 Hlis 2019

    Hnub Peb Lis Piam Rau Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 16: 22-34


    22 Tas tsoom sid nrog cov neeg tsis txaus siab qw ntsuag qees cem Paj Lug thiab Xis Las nkawd. Ces cov nom txiav txim kom luag muab nkawd tej khaub ncaws hle, thiab muab pas nplawm nkawd. 23 Lawv muab nkawd nplawm sab kawg, ces lawv muab nkawd pov rau hauv tsev loj faj. Lawv ceeb toom rau tus zov tsev loj faj tseev kom zov nkawd zoo zoo. 24 Tus zov tsev loj faj hnov cov nom tswv hais li ntawd, mas nws coj nkawd mus kaw hauv lub qhov taub uas nyob hauv nruab nrab tsev loj faj, thiab tseem xuas saw hlau khi nkawd ko taw tib si rau tej tus ncej.
    25 Thaum ib tag hmo, Paj Lug thiab Xis Las nkawd teev ntuj, nkawd hu nkauj cav txog Tswv Ntuj, cov neeg nyob txim mloog nkawd. 26 Ib sij huam, muaj av qeeg loj, lub tsev loj faj tej taw ntsa ua zog tas. Tas cov qhov rooj cia li qhib plho tam sim ntawd, hos cov saw khi cov neeg raug txim plam tas huv tib si. 27 Tus zov tsev loj faj tsim dheev los, nws pom cov qhov rooj qhib lug, ces nws rho hlo nws rab ntaj, nws yuav rov tua nws, vim nws xav tias cov neeg raug txim twb khiav tas lawm. 28 Tab sis Paj Lug qw ib suab nrov nrov tias : "Koj txhob tua koj. Peb sawv daws tseem nyob ntawm no tas huv tib si." 29 Tus zov tsev loj faj thiaj kom luag taws teeb, ces nws maj nroos nkag mus rau hauv, nws los txhos caug tshee ntawm Paj Lug thiab Xis Las nkawd xub ntiag, 30 nws coj nkawd tawm mus sab nraud, nws hais rau nkawd tias : "Ob tug hlob, kuv yuav ua li cas kuv thiaj yuav tau txais kev cawm?" 31 Nkawd teb tias : "Koj ntseeg txog Huab Tais Yes Xus, ces koj thiab koj tsev neeg yuav tau txais kev cawm." 32 Ces nkawd qhia Huab Tais Lo Lus rau nws, thiab rau tas cov neeg nyob hauv nws tsev huv tib si. 33 Tus zov tsev loj faj thiaj coj nkawd tawm thaum lub caij ib tag hmo ntawd, nws ntxuav nkawd cov qhov txhab, ces nws thiab tas nws tsev neeg huv si txais lub cim ntxuav tam sim ntawd. 34 Ces nws coj nkawd nce mus saum nws tsev, nws rau mov rau sawv daws noj. Nws thiab tas nws tsev neeg huv si zoo siab kawg, vim lawvtau los ntseeg txog Tswv Ntuj lawm.

    NPN 138: 1-2AB, 2CDE-3, 7C-8

    Txais: (7c) Huab Tais, koj sab tes xis cawm kuv.
    Los: As les lus yas.

    Kuv yuav ua koj tsaug, HUAB TAIS, tas kuv lub siab ntsws,
    vim koj tau hnov kuv lub ncauj cov lus thov;
    kuv yuav hu nkauj cav txog koj nyob ntawm tsoom tshiab xub ntiag;
    kuv yuav tuaj pe hawm koj nyob hauv koj lub tuam tsev ntshiab
    thiab yuav ua tsaug rau koj lub npe.

    Txais: (7c) Huab Tais, koj sab tes xis cawm kuv.
    Los: As les lus yas.

    Vim koj lub siab zoo thiab koj txoj kev tseeb,
    koj tau muab koj lub npe thiab koj txoj kev cog lus
    ua qhov loj tshaj tas txhua yam.
    Thaum kuv hu, koj teb kuv,
    koj ntxiv zog rau kuv kom kuv lub zog loj tuaj.

    Txais: (7c) Huab Tais, koj sab tes xis cawm kuv.
    Los: As les lus yas.

    Koj txhais tes xis cawm kuv.
    HUAB TAIS yuav ua kom tiav tej yam nws npaj ua rau kuv. ;
    HUAB TAIS, koj lub siab zoo yuav nyob mus li;
    thov koj txhob muab yam koj txhais tes tau tsim los tso tseg.

    Txais: (7c) Huab Tais, koj sab tes xis cawm kuv.
    Los: As les lus yas.

    As Les Lus Yas: ZAM 16: 7, 13

    Txais: As les lus yas, as les lus yas.

    Huab Tais hais tias, kuv yuav xa Leej Tswv yim qhia qhov tseeb tuaj rau nej,
    nws yuav coj nej mus txog yam uas yog tseem qhov tseeb.

    Txais: As les lus yas, as les lus yas.

    Ntawv Moo Zoo: ZAM 16: 5-11

    Yes Xus hais rau nws cov thwj tim tias:
    5 "Nyem no kuv yuav mus cuag Tus Xa kuv tuaj. Nej tsis muaj leej twg nug kuv txog tias: ‘Koj yuav mus qhov twg?’
    6 Vim kuv hais tej no rau nej ces nej muaj kev tu siab puv npo hauv nej lub siab.
    7 Tab sis kuv hais qhov tseeb rau nej tias: Cia kuv mus mas yuav zoo dua rau nej. Vim yog kuv tsis mus, mas Leej Nplij Neeg yuav tsis tuaj nyob hauv nej. Hos yog kuv mus, mas kuv yuav xa Leej Nplij Neeg tuaj rau nej.
    8 Thaum Leej Nplij Neeg tuaj txog, nws yuav txiav txim rau qab ntuj neeg txog ntawm kev txhaum, kev ncaj, thiab kev raug txim,
    9 kev txhaum, vim lawv tsis ntseeg txog kuv,
    10 kev ncaj, vim kuv mus cuag Leej Txiv, ces nej yuav tsis pom kuv ntxiv,
    11 kev raug txim, vim tus tswj lub qab ntuj neeg twb raug txim lawm. “


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 29th May 2019, 3:14 am

    Tim 29 lub 5 Hlis 2019

    Hnub Plaub Lis Piam Rau Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 17: 15, 22—18:1


    15 Cov neeg uas xa Paj Lug xa nws mus txog ntua As Thes Nas; Paj Lug hais rau lawv kom lawv mus hais rau Xis Las thiab Tis Mos Tes nkawd kom nkawd mus caum Paj Lug qab sai sai, ces lawv rov los lawm.
    22 Paj Lug mus sawv ntsug ntawm pab txwj laus tuav tswv yim As Les Os Pas Nkus, nws hais tias : "Cov neeg As Thes Nas, raws li kuv pom mas nej yog ib co neeg muaj kev teev hawm zoo kawg nkaus. 23 Kuv mus yos hauv nej lub tsheej thiab mus xyuas nej cov tsev teev hawm, mas kuv pom muaj ib lub thaj uas sau ib co npe ntawv tias : ‘Rau tus tswv ntuj peb tsis paub.’ Tus uas nej teev hawm tab sis nej tsis paub, mas kuv tuaj tshaj txog nws rau nej. 24 Tus Tswv Ntuj tsim lub sim ceeb thiab tsim tas puas tsav yam nyob hauv lub sim ceeb yog tus Huab Tais kav lub ntuj lub teb, nws tsis nyob hauv cov tsev teev hawm uas yog neeg ob txhais tes txhim. 25 Nws kuj tsis tas yuav neeg ob txhais tes los tsob hwb nws, xws li ib tug uas xav tau yam ub yam no, vim nws twb yog tus pub txoj sia thiab txoj pa thiab txhua tsav yam rau tib neeg. 26 Tswv Ntuj tsim tib neeg kom sawv daws tawm ntawm ib lub hauv paus los nyob puv tas ntiaj teb, thiab nws teem caij nyoog teem ciam dej ciam av rau lawv nyob , 27 vim nws xav kom tsoom neeg nrhiav Tswv Ntuj; tej zaud lawv yuav tsum maj mam maub nrhiav thiaj yuav ntsib nws, txawm tias nws yeej nyob tsis deb ntawm peb ib tug twg li.
    28 Vim peb yeej ‘Nyob hauv Tswv Ntuj, peb thiaj muaj txoj sia, txawj nti, thiab ciaj taus.’ Nej twb muaj ib co neeg txawj sau lus paj huam tseg tias : ‘Peb kuj yog nws caj ces thiab.’ 29 Li ntawd, peb yog Tswv Ntuj caj ces, mas peb yuav tsis txhob xav tias Tswv Ntuj yog zoo li ib tug mlom kub, mlom nyiaj, los mlom pob zeb uas neeg lub tswv yim thiab txhais tes puab tau. 30 Tswv Ntuj tau ua siab ntev nyiaj lub caij uas tib neeg tsis paub nws, tiam sis nyem no, Tswv Ntuj ceeb toom kom tas ib zeej tsoom nyob tas qhov txhia chaw sawv daws yuav tsum los lees txhaum. 31 Vim nws tau teem ib hnub cia txiav txim rau lub ntiaj neeg raws li txoj kev ncaj, ces nws twb xaiv tau tus yuav txiav txim ntawd lawm. Nws kuj tau tsa tus yuav txiav txim ntawd sawv hauv cov tub tuag rov los, kom sawv daws paub tias muaj tseeb tiag."
    32 Thaum cov neeg hnov hais txog kev sawv hauv cov tub tuag rov los, mas ib txhia thuam Paj Lug, ib txhia hais rau Paj Lug tias : "Lwm zaus tso, peb mam rov mloog koj hais txog qhov ntawd dua." 33 Ces Paj Lug tso lawv tseg li ntawd. 34 Tsis kav, kuj muaj tus puav raws Paj Lug thiab txais kev ntseeg. Cov txais kev ntseeg muaj ib tug yog Des Nis Xyus, uas nws yog ib tug kev txwj laus As Les Os Pas Nkus; kuj muaj ib tug poj niam hu ua Das Mas Lis thiab ob peb leeg ntxiv .
    18 1 Ua li ntawd tas, ces Paj Lug tawm hauv As Thes Nas mus, nws thiaj mus rau Kos Lis Nthos.

    NPN 148: 1-2, 11-12, 13, 14

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nej nyob saum ntuj cav txog Huab Tais,
    nej nyob saum tej chaw siab cav txog nws.
    Nws cov tshiab, nej cav txog nws,
    nws cov peeb zeej, nej cav txog nws.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom tas cov vaj ntxwv nyob ntiaj teb thiab tas txhua haiv neeg,
    tas cov tub nom tub tsw thiab cov nom txiav txim nyob ntiaj teb,
    cov tub nraug hluas thiab ntxhais nkauj xwb,
    cov laus thiab cov me nyuam yaus,

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Kom lawv cia li cav txog Huab Tais lub npe ,
    vim nws tib lub npe thiaj loj siab dua cov;
    nws lub hwj xyeej nyob siab tshaj lub ntiaj teb thiab lub ntuj.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    Nws tsa nws haiv neeg lub peev xwm kom siab :
    Vim li no kom sawv daws yuav tsum cav txog nws,
    Xws li cov ntseeg nws, uas yog cov tub ki His Xas Lais
    uas yog haiv neeg nyob ze nws.

    Txais: Lub ntuj thiab lub ntiaj teb puv nkaus koj lub hwj chim.
    los: As les lus yas.

    As Les Lus Yas: ZAM 14: 16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib Tug Pab nej
    los nrog nej nyob mus li.

    Txais: As les lus yas, as les lus yas.

    Ntawv Moo Zoo: ZAM 16: 12-15

    Yes Xus hais rau nws cov thwj tim tias:
    12 “Kuv tseem tshuav ntau yam yuav hais rau nej, tab sis nyem no nej ris tsis taus.
    13 Thaum Leej Tswv Yim qhia qhov tseeb tuaj txog, nws yuav coj nej mus rau qhov tseeb tas huv si. Vim nws yuav tsis hais nws cov lus, nws yuav hais qhov nws hnov, thiab nws yuav xub qhia nej txog tej xwm uas yuav tshwm sim tuaj.
    14 Nws yuav ua kom kuv nto koob meej, vim nws yuav coj yam uas yog kuv tug tuaj qhia rau nej.
    15 Tas ib puas tsav yam uas yog Leej Txiv tug, mas kuj yog kuv tug huv tib si. Vim li ntawd kuv thiaj hais rau nej tias : Leej Tswv Yim yuav coj yam uas yog kuv tug tuaj qhia rau nej. “


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 29th May 2019, 6:11 pm

    Tim 30 lub 5 Hlis 2019

    HNUB TSIB LIS PIAM RAU CAIJ HLA XYOO C Nruab Lis Piam Xyoo I


    Hnub Tsib no kev cai yog ua hmoov nco txog Yes Xus nce mus saum ntuj, tiam sis nyob ntau qhov chaw lub Koom Txoos muab Hnub Yes Xus nce mus saum ntuj pauv mus rau Hnub Chiv tom ntej lawm. Yog li ntawd kuv thiaj tso ob co zaj nyeem tib si rau hnub no. Yog nej lub teb chaws los nej qhov chaw ua hmoov nco txog Yes Xus mus saum ntuj rau hnub no, ces nej mus xaiv cov zaj nyeem hais txog Yes Xus mus saum ntuj, yog nej teb chaws los qhov chaw tsis ua hmoov Yes Xus mus saum ntuj hnub no, ces nej mus xaiv cov zaj nyeem rau Hnub Tsib Lis Piam Rau Caij Hla.


    NCO TXOG YES XUS NCE MUS SAUM NTUJ

    Zaj Nyeem Ib: HAUJ LWM 1: 1-11


    1 Tes Os Fis Los aw, nyob hauv kuv thawj phau ntawv, kuv twb sau txog tas ib puas tsav yam uas Yes Xus tau pib ua thiab tau qhia,
    2 mus txog hnub uas Leej Ntuj Plig Ntshiab tau tshoj kom nws hais nws cov lus kawg rau cov Hauv Paus Xa Lus uas nws tau xaiv, ces nws raug nqa mus saum ntuj lawm.
    3 Lawv kuj yog cov uas nws tau yees tawm los muaj txoj sia rau lawv pom xyeem, tom qab uas nws tau raug txom nyem tas lawm; muaj pov thawj ntau txog qhov tias nws tawm los rau lawv pom tau plaub caug hnub thiab nws tham txog Tswv Ntuj lub Ceeb Tsheej rau lawv.
    4 Muaj ib zaug thaum nws nrog lawv noj mov, nws hais rau lawv kom tsis txhob tawm hauv Yes Lus Xas Les mus, tiam sis, “Nej yuav nyob tos qhov uas Leej Txiv tau cog lus yuav xa tua,j raws li nej tau hnov kuv hais rau nej lawm,
    5 vim tias Zam ua kab ke ntxuav nyob hauv dej, hos nej, mas tsis tshuav pes tsawg hnub ntxiv, ces nej yuav txais kab ke ntxuav nyob hauv Leej Ntuj Plig Ntshiab."
    6 Thaum cov Hauv Paus Xa Lus tuaj nyob ua ke, lawv nug Yes Xus tias : "Huab Tais, nyem no puas yog lub sij hawm koj yuav rov tsa tus vaj His Xas Lais ?"
    7 Yes Xus hais rau lawv tias : "Tsis yog nej hauj lwm yuav paub txog lub zim txwv thiab lub sij hawm uas Leej Txiv siv nws lub hwj huam los teem cia.
    8 Tab sis nej, mas nej yuav txais ib lub peev xwm tuaj ntawm Leej Ntuj Plig Ntshiab uas yuav nqes los rau saum nej tuaj. Ces nej yuav ua kuv cov tim khawv nyob Yes Lus Xas Les, nyob thoob lub xeev Yus Das thiab Xas Mas Lias, mus txog puag tim npoo ntiaj teb kawg."
    9 Nws hais cov lus no tas nrho, nws ntsia nstoov lawv, ces nws nce siab zuj zus, txawm muaj ib tw huab los thaiv lawv qhov muag ces lawv tsis pom nws ntxiv.
    10 Thaum Yes Xus nce mus lawm, lawv tseem nyob hab nuv ntawd ntsia ntsoov saum ntuj, ces cia li muaj ob tug neeg hnav dawb los nyob ntawm lawv.
    11 Nkawd hais tias : "Cov meeg Nkas Lis Lais, vim li cas nej sawv ntsug ntsia ntsoov saum ntuj zoo li no ? Tus Yes Xus uas raug nqa ntawm nej mus rau saum ntuj lawd, nws yuav rov los zoo nkaus li nej pom nws nce mus saum ntuj thiab."

    NPN 47: 2-3, 6-7, 8-9

    Txais: (6) Tswv Ntuj nce mus saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yos tus vaj loj kav tas nrho lub ntiaj teb.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tswv Ntuj nce mus saum nws lub theej kiab, muaj suab zoo siab
    HUAB TAIS nce, muaj suab hom nrov.
    Nej hu nkauj cav txog Tswv Ntuj, nej cav txog nws,
    nej hu nkauj cav txog peb tus vaj, nej cav txog nws.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub theej kiab ntshiab.

    Txais: (6) Tswv Ntuj nce saum nws lub theej kiab,
    muaj suab qw zoo siab, muaj suab hom nrov rau Huab Tais.
    Los: As les lus yas.

    Zaj Nyeem Ob: ES FES XOS 1: 17-23

    Cov kwv tij nkauj muam,
    17 Kuv thov kom peb tus Huab Tais Yes Xus Pleev tus Tswv Ntuj, Leej Txiv uas muaj koob meej, pub ib lub tswv yim thoob tsib thiab txawj paub tej yam tob rau nej, kom nej paub nws tseeb tiag.
    18 Kuv thov kom nws tso qhov pom kev tuaj kaj nej cov qhov muag hauv nej lub siab, kom nej pom tias nej muaj kev tso siab loj npaum li cas vim Tswv Ntuj hu nej, nej yuav nplua nuj kev nto koob meej npaum li cas vim nej yuav tau nrog tsoom leej ntshiab txais nws lub cuab tam,
    19 thiab nws tau siv nws lub hwj huam loj tshaj npaum li cas rau peb cov uas ntseeg, raws li lub zog nyob hauv nws lub peev xwm,
    20 uas nws tau siv los ua hauj lwm nyob hauv Leej Pleev: nws tsa Leej Pleev sawv hauv cov tub tuag los thiab tsa Leej Pleev zaum ntawm nws phab xis nyob saum txheej ntuj siab,
    21 nyob siab tshaj txhua tus loj, txhua tus tuav txoj cai, txhua tus muaj hwj chim, txhua tus vaj ntxwv huab tais, thiab txhua lub npe uas hu tau, hauv lub zim txwv tiam no mus dhau tiam yav tom ntej huv si.
    22 Tswv Ntuj tso tas puas tsav yam rau hauv Leej Pleev qab xib taws thiab tsa nws ua lub taub hau kav txhua yam nyob hauv lub Koom Txoos,
    23 uas yog nws lub Cev, yog nws tus kheej tas nrho uas nyob puv txhua tsav txhua yam.

    Los: Hes Nplaws 9: 24 - 28; 10: 19-23

    24 Leej Pleev tsis tau chaws mus hauv tej lub tsev Ntshiab uas yog neeg txhais tes txhim thiab tsuas yog tej lub tsev ua piv txwv txog lub tseem xwb, tiam sis Leej Pleev mus kiag saum ntuj lawm tiag, kom zaum no nws tawm los nyob ntawm Tswv Ntuj xub ntiag hloov peb chaw. 25 Nws tsis tas yuav rov cev nws rau Ntuj ntau ntau zaus li tus tuam leej choj uas niaj xyoo yuav tsum nkag mus hauv Kem Ntshiab mus cev ib co ntshav uas tsis yog nws cov ntshav. 26 Yog tias zoo li ntawd xwb mas nws yuav tsum tau raug txom nyem ntau ntau zaus txij thaum ntuj tsim teb raug los lawm. Tab sis zaum no thaum txog cov hnub nyoog kawg, nws tau tawm los ib zaug xwb los muab nws txi rau Ntuj kom tau rhuav kev txhaum pov tseg. 27 Txoj cai tsuas pub kom leej tib neeg tuag ib zaug xwb, dhau qhov ntawd lawm, yog lub caij txiav txim. 28 Leej Pleev kuj ib yam, nws rov muab nws txi Ntuj ib zaug xwb, kom nws tau ris coob leej cov txhaum. Ces nws tseem yuav tawm los zaum ob, tsis yog los ris kev txhaum, tiam sis nws yuav tawm los cawm cov neeg uas tos ntsoov nws.
    10 19 Cov kwv tij, peb tso siab lug tias nyob hauv Yes Xus cov ntshav, peb yuav nkag tau mus rau hauv lub tsev Ntshiab, 20 vim txoj kev tshiab thiab pub txoj sia uas nws qhib rau peb taug hla ntawm daim ntaub thaiv qhov rooj uas yog nws lub cev, 21 thiab vim peb muaj ib tug Leej Choj loj tas nrho saib Tswv Ntuj lub tsev. 22 Ua li mas peb kav tsij tso siab lug muab tas nrho peb lub siab txav mus ze Tswv Ntuj, nrog ib lub siab huv si tsis tsuas kev phem, thiab nrog peb lub cev uas muab ntxuav tas hauv cov dej ntshiab lawm 23 Peb kav tsij tuav peb txoj kev ntseeg uas ua rau peb tso siab lug kom ruaj nreb tsis txhob ua xyem xyav, vim tus tau cog lus, nws tsis dag.

    As Les Lus Yas: MT 28: 19A, 20
    B

    Txais: As les lus yas, as les lus yas.

    Huab Tais hais tias, nej mus qhuab qhia rau tas txhua haiv neeg,
    kuv yuav nrog nej nyob nraim mus txog thaum ntiaj teb kawg.

    Txais: As les lus yas, as les lus yas.

    Ntawv Moo Zoo: LK 24: 46-53

    46 Yes Xus hais rau nws cov thwj tim tias : "Ntawv sau tseg tias: Leej Pleev yuav raug luag tsim txom, hnub peb, nws yuav sawv hauv cov tuag rov los. 47 Thiab tseem sau tias, nyob hauv nws lub npe yuav muaj kev tshaj txog txoj kev hloov siab tig los ntxub kev txhaum kom Ntuj zam txhaum rau tas ib tsoom haiv neeg; yuav xub pib tshaj nyob Yes Lus Xas Les tuaj mus. 48 Nej yuav ua tim khawv txog tej ntawd. 49 Kuv yuav xa qhov uas kuv Txiv tau cog lus tuaj rau nej. Ua li mas nej nyob hauv lub nroog mus txog hnub nej tau txais lub zog nqes saum txheej siab los hnav tso."
    50 Yes Xus coj lawv mus txog Npes Tas Nias, ces nws tsa tes foom hmoov zoo rau saum lawv. 51 Thaum nws tab tom foom hmoov zoo, mas nws ncaim ntawm lawv mus. Ces luag nqa nws mus saum ntuj lawm. 52 Hos lawv, mas lawv txhos caug pe Yes Xus. Ces lawv rov qab mus rau Yes Lus Xas Les, lawv zoo siab tas nrho. 53 Lawv nyob hauv lub Tuam Tsev Teev Ntuj tas mus li cav txog Tswv Ntuj.

    ************************************************

    HNUB TSIB LIS PIAM RAU CAIJ HLA XYOO C Nruab Lis Piam Xyoo I

    Zaj Nyeem Ib: HAUJ LWM 18: 1-8


    1 Dhau ntawd tas, Paj Lug tawm hauv As Thes Nas mus, nws mus Rau Kos Lis Nthos. 2 Nyob Kos Lis Nthos, nws ntsib ib tug neeg Yus Das hu ua As Kis Las, uas yug los nyob Poos Tus teb. Nws thiab nws poj niam hu ua Phis Xis Las nkawd nyuam qhuav tsiv tim Is Tas Lis teb los txog vim tus Vaj Klaus Dis Yus ceeb toom kom tas cov Yus Das sawv daws yuav tsum tawm hauv Los Mas mus. Paj Lug mus ntsib nkawd. 3 Vim tias Paj Lug kuj ua txoj hauj lwm uas nkawd ua thiab, nws thiaj mus nrog nkawd nyob, thiab ua hauj lwm. Lawv txoj hauj lwm yog xaws ntaub ua tsev tsam phooj. 4 Niaj hnub xas npas tos, Paj Lug mus nrog sawv daws sib tham nyob hauv lub tsev txoos. Nws txawj cav kom cov Yus Das thiab cov Hes Las ntseeg nws.
    5 Thaum Xis Las thiab Tis Mos Tes nkawd tuaj ntawm Mas Xes Dos Nias teb tuaj txog lawm, mas Paj Lug siv nws lub sij hawm cia tshaj Lo Lus lawm xwb. Nws zeem tseeb rau cov Yus Das tias Yes Xus yog Leej Pleev. 6 Tab sis lawv hais lus tiv nws thiab thuam Ntuj. Ces Paj Lug nchos nws cov ris tsho thiab nws hais rau lawv tias : "Cia nej cov ntshav rov poob los rau saum nej taub hau, kuv tsis muaj txhaum dab tsi txog ntawm nej, txij no mus kuv yuav mus tsham cov neeg teev pej kum dab lawm xwb." 7 Ces Paj Lug tawm ntawd mus, nws mus hauv ib tug hu ua Tis Tos Yus Tus lub tsev. Yus Tus yog ib tug neeg hwm Tswv Ntuj; nws lub tsev nyob puab lub tsev Txoos. 8 Khis Pus uas yog tus thawj saib lub tsev Txoos nrog tas nws tsev neeg sawv daws ntseeg txog Huab Tais. Muaj ntau leej neeg Kos Lis Nthos hnov Paj Lug cov lus, ces lawv ntseeg thiab txais lub cim ntxuav.

    NPN 98: 1, 2-3ab, 3cd-4

    Txais: (2b) Huab Tais tau muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Nej hu ib zag nkauj tshiab rau HUAB TAIS,
    vim nws ua dej num loj muaj tsim nto moo.
    Nws sab xis, nws sab npab ntshiab ua kom nws muaj yeej.

    Txais: (2b) Huab Tais tau muab nws txoj kev cawm neeg muaj hwj huam rau cov kuj cuab pom.
    los: As les lus yas.

    HUAB TAIS ua kom sawv daws paub nws txoj kev cawm ;
    nws muab nws txoj kev ncaj rau cov kuj cuab pom.
    Nws rov nco txog nws txoj kev hlub thiab npuab His Xas Lais tsev neeg.

    Txais: (2b) Huab Tais tau muab nws txoj kev cawm neeg muaj hwj huam rau cov kuj cuab pom.
    los: As les lus yas.

    Tas npoo ntuj npoo ntiaj teb tau pom
    peb tus Tswv Ntuj txoj kev cawm neeg.
    Tas txhua teb chaws, nej qw zoo siab cav txog HUAB TAIS !
    Nej qhib suab hu nkauj, nej qhuas txog nws!

    Txais: (2b) Huab Tais tau muab nws txoj kev cawm neeg muaj hwj huam rau cov kuj cuab pom.
    los: As les lus yas.

    As Les Lus Yas: ZAM 14: 18

    Txais: As les lus yas, as les lus yas.

    Huab Tais hais tias: kuv yuav tsis cia nej ua ntsuag,
    kuv yuav rov los nrog nej nyob ces nej yuav zoo siab hlo.

    Txais: As les lus yas, as les lus yas.

    Ntawv Moo Zoo: ZAM 16: 16-20


    Yes Xus hais rau nws cov thwj tim tias:
    16 "Tshuav me ntsis ntxiv lawm xwb, ces nej yuav tsis pom kuv. Tab sis ib me ntsis ntxiv, nej yuav rov pom kuv." 17 Muaj ob peb tug thwj tim sib tham tias : "Nws hais dab tsi li ntawd rau peb tias : ‘Tshuav me ntsis ntxiv lawm xwb, ces nej yuav tsis pom kuv, tab sis ib me ntsis ntxiv , nej yuav rov pom kuv,’ thiab lo lus tias : ‘Kuv mus cuag Leej Txiv’ " lub ntsiab yog li cas? 18 Lawv tseem hais tias : "Lo lus tias ‘me ntsis’, uas nws hais ntawd yog li cas ? Peb tsis paub xyov nws xav hais dab tsi li." 19 Yes Xus paub tias lawv xav nug nws, ces nws hais rau lawv tias : "Nej rov sib nug txog lo lus kuv hais tias : Tshuav me ntsis lawm xwb, nej yuav tsis pom kuv, tab sis ib me ntsis ntxiv, nej yuav rov pom kuv. 20 Kuv hais qhov muaj tseeb tiag rau nej tias nej yuav quaj thiab nej yuav nyiav, hos lub qab ntuj neeg yuav zoo siab. Nej yuav tu siab loj, tab sis nej txoj kev tu siab yuav hloov ua kev zoo siab.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 30th May 2019, 6:11 am

    Tim      31      lub      5      Hlis      2019

    Hnub Tsib Lis Piam Rau Caij Hla Xyoo CNruab Lis Piam Xyoo I

    Hwm Niam Mab Liab mus saib Es Lis Xas Npes

    Zaj Nyeem Ib:     XFN  3:   14-18A


    14 Koj cia li zoo siab, leej me ntxhais Xis Yoos, koj cia li nqua suab!
    Tsoom His Xas Lais, nej cia li hu nkauj luag ntxhi!
    Me ntxhais Yes Lus Xas Les,
    koj cia li luag ntxhi thiab dhia hom khaj kom tas siab nrho!
    15 HUAB TAIS tau thim nws cov lus txiav txim rau koj lawm.
    Nws tau caum koj cov yeeb ncuab khiav mus tas lawm.
    HUAB TAIS , His Xas Lais tus vaj nws nyob nruab nrab hauv koj,
    koj yuav tsis ntshai kev phem dab tsi ntxiv.
    16 Hnub ntawd, luag yuav hais rau Yes Lus Xas Les tias:
    “Xis Yoos, koj txhob ntshai,
    Txhob ua koj ob txhais tes qaug zog!
    17 HUAB TAIS koj tus Tswv Ntuj nyob nruab nrab hauv koj lawm!
    Nws yog tus muaj hwj huam cawm koj.
    Nws luag ntxhi zoo siab tas nrho vim koj.
    Nws kev hlub ua kom koj rov tshiab tuaj.
    Nws hu nkauj dhia zoo siab yog vim koj,
    18 xws li thaum neeg hu nkauj ua koob tsheej zoo siab.”

    Los:      LOS MAS  12:   9-16

    Cov kwv tij nkauj muam:
    9 Nej tsis txhob ua txuj lam nyiam luag xwb. Nej yuav ntxub qhov phem tuag nthi nyiam qhov zoo. 10 Nej yuav ua siab mos siab muag sib hlub xws li ib pab kwv tij txheeb tiag. Nej yuav ib leeg xub saib ib leeg muaj nqes. 11 Nej yuav siv zog rau siab ua hauj lwm tsob hwb Huab Tais, txhob ua neeg nkees, thiab yuav siv tas nej lub tswv yim. 12 Nej yuav zoo siab nyob hauv txoj kev tso siab rau Ntuj, yuav ua siab ntev ris kev txom nyem, yuav nquag teev Ntuj tsis tseg. 13 Nej yuav koom tes pub pab rau cov ntshiab, yuav txais tos cov qhua tuaj hauv nej. 14 Nej yuav foom lus zoo rau cov neeg hiam nej, foom lus zoo xwb, txhob foom lus phem. 15 Nej yuav zoo siab nrog cov neeg muaj kev zoo siab, nej yuav quaj ntsuag nrog cov neeg tau kev quaj ntsuag. 16 Nej yuav ib leeg rov ua siab zoo rau ib leeg kom xwm yeem; tsis txhob ua neeg muab hlob saib tsis taus cov neeg me, tiam sis yuav nrog lawv ua phooj ywg; txhob rov saib nej zoo dua luag tej.

    NPN:       HIS XAIS  12:   2-3, 4BCD, 5-6

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Tswv Ntuj yog tus cawm kuv,
    Kuv tso siab rau nws, kuv tsis txhawj.
    Kuv lub zog thiab kuv lub peev xwm yog HUAB TAIS,
    Nws yog tus cawm kuv.
    Nej yuav zoo siab luag ntxhi mus ce dej
    Hauv lub qhov dej muaj kev cawm neeg."

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Nej ua HUAB TAIS tsaug, nej cav txog nws lub npe;
    Nej qhia nws tej hauj lwm loj rau cov haiv neeg paub,
    Nej tshaj rau lawv tias nws lub npe zoo tas nrho.

    Txais: (6) His Xas Lais tus loj thiab tus Ntshiab tuaj nyob hauv nej lawm.

    Nej hu nkauj qhuas HUAB TAIS txog nws tej hauj lwm muaj hwj chim,
    Coj mus qhia rau tas ntiaj teb paub kom thoob .
    Nroog Xis Yoos, koj tsa suab qw zoo siab,
    vim His Xas Lais tus loj thiab tus Ntshiab tuaj nyob hauv nej lawm!

    Txais: (6) His Xas Lais tus loj thiab tus Ntshiab tuaj nyob hauv nej lawm.

    As Les Lus Yas:     LK  1:   45

    Txais: As les lus yas, as l;es lus yas.

    Koj tau hmoov zoo, nkauj tsim txiaj Mab Liab, vim koj ntseeg
    tias yuav muaj tuaj raws li Huab Tais hais rau koj.

    Txais: As les lus yas, as les lus yas.

    Ntawv Moo Zoo:      LK  1:   39-56


    39 Mab Liab sawv kev mus, nws maj nroos mus pem toj siab, mus rau ib lub nroog nyob xeev Yus Das. 40 Nws chaws mus hauv Ntxas Kas Lias tsev, nws foom lus nyob kaj lug rau Es Lis Xas Npes. 41 Thaum Es Lis Xas Npes hnov Mab Liab foom kev kaj lug, mas nws tus me nyuam dhia hauv nws plab, thiab Leej Ntuj Plig Ntshiab los nyob puv hauv Es Lis Xas Npes. 42 Ces nws tsa suab hlo hais nrov nrov tias : "Koj tau koob tau hmoov tshaj ib tsoom poj niam huv tib si, thiab lub txiv txi hauv koj lub cev tau koob tau hmoov. 43 Ua cas kuv tau txoj hmoov dab tsi, kuv tus Huab Tais leej niam thiaj tuaj txog kuv ? 44 Koj saib, thaum kuv hnov dheev koj lub suab foom kev kaj lug nrov txog kuv pob ntseg, mas tus me nyuam hauv kuv plab dhia zoo siab. 45 Vim li ntawd tus uas ntseeg tias cov lus Huab Tais hais rau nws yuav tsheej xeeb tau, mas nws txoj hmoov zoo !"
    46 Ces Mab Liab hais tias : "Kuv tus plig cav txog Huab Tais lub hwj chim, 47 kuv lub tswv yim hom khaj nyob hauv Tswv Ntuj tus Cawm kuv, 48 vim nws tau dauv muag los ntsia nws tus ntxhais txib tsis muaj tsim. Txij no mus, txhua tiam neeg yuav hais tias kuv txoj hmoov zoo. 49 Vim tus Muaj Hwj Huam tau ua tej yam loj rau kuv, nws lub npe Ntshiab. 50 Nws lub siab hlub cov neeg hwm nws tiam dhau tiam. 51 Nws tau xyab nws txhais npab muaj zog ua kom cov neeg muab hlob nyob hauv lawv lub siab lub tswv yim tawg tas. 52 Huab Tais nchuav cov muaj hwj chim kom poob ntawm lawv lub rooj zaum, nws tsa cov neeg nyob hauv txheej qis kom siab. 53 Nws pub tej yam zoo rau cov neeg tshaib tau noj seem noj so, nws ntiab cov neeg muaj rov qab mus tes qhuav nquas. 54 Nws tuaj pab nws tus tub txib His Xas Lais, nws nco txog nws  txoj kev khuv leej neeg, 55 raws li nws tau hais rau peb cov yawg koob, tshwj xeeb yog rau Has Nplas Has thiab nws tsoom xeeb leej xeeb ntxwv mus ib txhiab ib txhis."
    56 Mab Liab nrog Es Lis Xas Npes nyob tau peb lub hlis tej, ces nws mam rov mus tsev.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 31st May 2019, 3:39 am

    Tim      1      lub      6      Hli      2019

    Thawj Hnub Xya Lis Piam Rau Caij Hla Xyoo C Nruab Lis Piam Xyoo I

    Hwm LN Justin, tuag ua Tim Khawv

    Zaj Nyeem Ib: HAUJ LWM 18: 23-28


    23 Paj Lug nyob As Nthias Kias ib ntus, ces nws sawv kev, nws mus ncig cov teb chaws Nkas Las Tias thiab Fis Zias ib qho dhau ib qho zuj zus, mus pab txhawb zog rau cov thwj tim.
    24 Muaj ib tug Yus Das hu ua As Pos Los, uas yug nyob As Les Xas Nrias, neeg txawj hais lus zoo heev, nws tuaj txog Es Fes Xos; nws yog neeg paub Ntawv Ntshiab zoo. 25 Nws tau hnov hais txog Huab Tais Txoj Kev, ces nws muaj Leej Ntuj Plig kub siab lug hais thiab qhia raug kawg txog Yes Xus, txawm tias nws tsuas paub Zam lub cim ntxuav xwb. 26 Nws pib qhuab qhia tsis ua xyem xyav li nyob hauv lub tsev Txoos. Phis Xis Las thiab As Kis Las nkawd hnov nws cov lus, ces nkawd coj nws mus nrog nkawd, thiab nkawd qhia Tswv Ntuj Txoj Kev rau nws kom meej dua. 27 Thaum As Pos Los xav hla mus rau As Kas Yis teb, cov kwv tij txhawb nws kom ua siab loj mus. Lawv sau ib tsab ntawv rau cov thwj tim kom lawv txais nws. Thaum nws tuaj txog, nws tau pab cov uas los txais kev ntseeg nyob hauv lub txiaj ntsim ntau kawg nkaus. 28 Nws tsis ntshai tab meeg hais lus tiv cov Yus Das, nws siv Ntawv Ntshiab los zeem tias Yes Xus yog Leej Pleev

    NPN 47: 2-3, 8-9, 10


    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tas txhua haiv neeg, nej npuaj teg,
    nej qw suab zoo siab rau Tswv Ntuj,
    vim HUAB TAIS tus nyob siab, tus zoo tshaj,
    yog tus vaj loj kav tas nrho lub ntiaj teb.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Tus vaj kav tas lub ntiaj teb yog Tswv Ntuj,
    nej hu nkauj cav txog nws.
    Tswv Ntuj tswj cov haiv neeg,
    Tswv Ntuj zaum saum nws lub rooj zaum ntshiab.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    Cov vaj txheeb hauv txhua haiv neeg tuaj sib sau ua ke
    nrog Has Nplas Has tus Tswv Ntuj haiv neeg.
    Vim cov leem phiaj thaiv ntiaj teb yog Tswv Ntuj tug,
    Nws loj tshaj tas txhia tsav txhua yam.

    Txais: (8a) Tswv Ntuj ua vaj kav tas lub ntiaj teb.
    los: Alleluia.

    As Les Lus Yas: ZAM 16: 28

    Txais: As les lus yas, as les lus yas.

    Kuv tuaj ntawm Leej Txiv tuaj rau hauv ntiaj teb,
    zaum no kuv yuav tso ntiaj teb tseg thiab rov mus cuag Leej Txiv.

    Txais: As les lus yas, as les lus yas.

    Ntawv Moo Zoo: ZAM 16: 23B-28

    Yes Xus hais rau nws cov thwj tim tias:
    23b “"Kuv hais qhov muaj tseeb tiag rau nej : Nej tuav txog kuv lub npe thov dab tsi ntawm Leej Txiv, mas nws yuav pub rau nej. 24 Los txog tav no, nej tsis tau tuav txog kuv lub npe thov ib yam dab tsi li. Nej thov ces nej yuav tau txais, nej thiaj yuav muaj kev zoo siab puv npo.
    25 Kuv tau siv tej zaj paj lug los hais tej no rau nej. Txog lub caij lawm uas kuv yuav tsis siv tej zaj paj lug los hais rau nej ntxiv. Kuv yuav ncaj qha qhia meej txog Leej Txiv rau nej. 26 Txog hnub ntawd, nej yuav tuav txog kuv lub npe los thov. Kuv tsis hais rau nej tias kuv yuav thov Leej Txiv rau nej. 27 Leej Txiv yeej  nyiam nej, vim nej nyiam kuv, thiab nej ntseeg tias kuv tuaj ntawm Tswv Ntuj tuaj. 28 Kuv tau tawm ntawm Leej Txiv tuaj nyob hauv lub ntiaj teb no. Zaum no kuv yuav tso lub ntiaj teb tseg, kuv yuav rov mus cuag Leej Txiv."


    Last edited by Mim on 6th June 2019, 2:47 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 2nd June 2019, 5:27 pm

    Tim 3 lub 6 Hli 2019

    Hnub Ob Lis Piam Xya Caij Hla Xyoo C Nruab Lis Piam Xyoo I

    Hwm LN Lwanga thiab cov nrog nws tuag ua Tim Khawv

    Zaj Nyeem Ib: HAUJ LWM 19: 1-8

    1 Thaum As Pos Los nyob Kos Lis Nthos, Paj Lug hla lub teb chaws pem toj siab nqes mus rau nram Es Fes Xos. Nws ntsib ib co thwj tim nyob nrad. 2 Nws hais rau lawv tias : "Thaum nej los ntseeg, nej puas tau txais Leej Ntuj Plig Ntshiab ?" Lawv teb nws tias : "Peb tsis tau hnov dua tias muaj Leej Ntuj Plig Ntshiab li." 3 Paj Lug thiaj hais tias : "Ua li nej txais lub cim ntxuav zoo li cas?” Lawv teb tias : "Peb txais Zam lub cim ntxuav." 4 Ces Paj Lug hais rau lawv tias : "Zam ua kab ke ntxuav kom sawv daws thov txhaum. Nws hais kom tsoom laj mej pej xeem ntseeg txog tus yuav lawv nws qab tuaj, tus ntawd yog Yes Xus." 5 Lawv hnov cov lus ntawd, mas lawv txais lub cim ntxuav nyob hauv Huab Tais Yes Xus lub npe. 6 Thaum Paj Lug tsa tes rau saum lawv, mas Leej Ntuj Plig Ntshiab los nyob hauv lawv, ces lawv txawj hais tej xeem lus tshiab, thiab lawv ua yaj saub. 7 Pab neeg no tas huv si muaj kaum ob leeg.
    8 Paj Lug mus hauv lub tsev Txoos, nws qhuab qhia tsis ua xyem xyav tau peb lub hlis, nws piav thiab nws hais ib co lus kom cov neeg ntseeg txog Tswv Ntuj lub Ceeb Tsheej.

    NPN 68: 2-3AB, 4-5ACD, 6-7AB

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    Tswv Ntuj sawv tsees, nws cov yeeb ncuab tawg sib ncaim tas,
    Cov ntxub nws khiav mus deb ntawm nws lub ntsej muag.
    Xws li cov pa taws txawj yaj tas, koj ua kom lawv yaj mus,
    zoo li ciab ntab yaj nyob hauv hluav taws.

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    Cov neeg siab ncaj zoo siab, lawv dhia hom khaj
    nyob ntawm Tswv Ntuj xub ntiag,
    lawv zoo sia bthiab luag ntxhi .
    Nej hu nkauj rau Tswv Ntuj, nej hu nkauj cav txog nws lub npe ;
    Nws lub npe yog: HUAB TAIS .

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    Tus ua leej txiv rau cov ntsuag nos, tus txheem plaub rau cov poj ntsuam,
    Yog tus Tswv Ntuj uas nyob hauv nws lub tsev ntshiab.
    Tswv Ntuj pub tsev rau tus neeg txom nyem nyob,
    nws coj cov neeg raug txim tawm los kom tau ntsib kev vam meej,

    Txais: (33a) Cov ceeb tsheej nyob ntiaj teb, nej cia li hu nkauj rau Tswv Ntuj.
    los: As les lus yas.

    As Les Lus Yas: KOS LOS XAIS 3: 1

    Txais: As les lus yas, as les lus yas.

    Yog nej twb tau nrog Leej Pleev sawv rov los lawm,
    mas nej cia li nrhiav tej yam nyob txheej saud,
    uas yog qhov chaw Leej Pleev zaum rawv ntawm Tswv Ntuj phab xis.

    Txais: As les lus yas, as les lus yas.

    Ntawv Moo Zoo: ZAM 16: 29-33

    29 Yes Xus cov thwj tim hais rau nws tias : "Zaum no koj hais lus ncaj qha, koj tsis siv tej zaj paj lug lawm. 30 Zaum no peb paub tias koj paub tas ib puas tsav yam, tsis tas kom leej twg nug koj li. Yog vim li ntawd peb thiaj ntseeg tias koj tuaj ntawm Tswv Ntuj tuaj." 31 Yes Xus teb rau lawv tias : "Nyem no nej ntseeg lawm lod ? 32 Yuav txog sij hawm, twb txog sij hawm lawm uas nej sawv daws yuav sib ncaim, nyias mus nyias vaj nyias tsev tas, nej yuav tso kuv pov tseg ib leeg. Tab sis kuv tsis nyob kuv ib leeg, vim Leej Txiv nrog kuv nyob. 33 Kuv hais tej no rau nej kom nej nyob thaj yeeb hauv kuv. Nyob hauv ntiaj teb, nej yuav raug luag hiam, tab sis nej yuav ua siab loj, kuv twb yeej lub ntiaj teb lawm.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 3rd June 2019, 3:58 pm

    Tim      4      lub      6      Hli      2019

    Hnub Peb Lis Piam Xya Caij Hla Xyoo C Nruab Lis Piam Xyoo I

    Zaj Nyeem Ib:       HAUJ LWM  20:   17-27


    17 Thaum Paj Lug tuaj txog Mis Les Tos, nws xa neeg mus hu cov txwj laus saib lub Koom Txoos nyob Es Fes Xos tuaj. 18 Thaum lawv tuaj txog, nws hais rau lawv tias : “Nej paub zoo tias txij hnub kuv ko taw tau tsuj As Xias teb los txog tav no, kuv ib txwm coj li cas thaum kuv nrog nej nyob. 19 Kuv tau ua neeg me tsob hwb Huab Tais, txawm kuv yuav ntsib txoj kev los kua muag, los txoj kev txom nyem vim cov Yus Das tuav tswv yim ua phem rau kuv. 20 Kuv tsis tau khiav ntawm txoj hauj lwm qhia tej yam zoo rau nej kom pab nej, txawm yuav yog thaum kuv qhuab ntuas nej thiab qhia nej nyob ntawm sawv daws xub ntiag los nyob hauv nej vaj nej tsev. 21 Kuv tau hais lus ua tim khawv rau cov Yus Das thiab cov Hes Las txog txoj kev tig los mloog Tswv Ntuj thiab ntseeg txog peb tus Huab Tais Yes Xus Pleev. 22 Nyem no, kuv mus Yes Lus Xas Les vim yog Leej Ntuj Plig khi kuv coj kuv mus, kuv yeej tsis paub tias yuav muaj dab tsi tuaj raug kuv nyob ntawd li. 23 Kuv tsuas paub tias Leej Ntuj Plig Ntshiab qhia kuv tias thaum kuv mus ncig ib lub nroog rau lwm lub, mas saw hlau thiab kev txom nyem tos nrhw kuv. 24 Txawm li cas los kuv tsis muab kuv txoj sia saib ua qhov loj los qhov muaj nqes tshaj rau kuv, kuv saib tias tsuav yog kuv tau taug kuv txoj kev kom kawg thiab leg cov dej num uas Huab Tais Yes Xus muab rau kuv leg kom tiav xwb, uas yog mus ua tim khawv hais txog lub Moo Zoo pub Tswv Ntuj lub txiaj ntsim.
    25 Nyem no, kuv paub tias tas nej cov uas kuv tau tuaj nyob hauv nej tshaj txog lub Ceeb Tsheej rau nej, mas nej yuav tsis pom kuv lub ntsej muag ntxiv lawm. 26 Vim li no mas hnub no, kuv thiaj hais tseeb rau nej tias kuv tsis tshuav nej ib tug twg nqe txog ntawm nws txoj sia, 27 vim tias kuv tsis tau khiav ntawm txoj hauj lwm tshaj rau nej kom tas nrho qhov uas  Tswv Ntuj tau npaj.”

    NPN       68:   10-11, 20-21


    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    Tswv Ntuj, koj tso nag xauv npo los ywg koj lub cuab tam,
    koj rov ua kom thaj av zoo tuaj thaum nws tsuag lawm.
    koj cov yaj los nyob hauv thaj av ntawd,
    Tswv Ntuj, koj lub siab zoo pub thaj av ntawd rau tus pluag.

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    Nej cia li foom lus zoo rau  HUAB TAIS hnub dhau hnub !
    Tswv Ntuj, nws saib xyuas peb, nws yog peb txoj kev cawm.
    Peb tus Tswv Ntuj yog tus Tswv Ntuj muaj kev cawm,
    Txoj kev dim ntawm kev tuag yog HUAB TAIS Tswv Ntuj li.

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    As Les Lus Yas:       ZAM  14:   16

    Txais: As les lus yas, as les lus yas.

    Kuv yuav thov Leej Txiv,
    ces nws yuav xa dua ib Tug Pab
    los nrog nej nyob mus li.

    Txais: As les lus yas, as les lus yas.

    Ntawv Moo Zoo:       ZAM  17:   1-11A

    1 Yes Xus hais li ntawd tas, nws tsa muag ntsia saum ntuj, nws hais tias: “Txiv, txog sij hawm lawm. Koj ua kom koj Leej Tub muaj koob meej, ces koj Leej Tub yuav ua kom koj muaj koob meej. 2 Raws li koj tau muab hwj huam rau nws kav tas ib tsoom neeg, koj ua li ntawd kom nws pub txoj sia nyob mus li rau txhua leej txhua tus uas koj muab rau nws. 3 Txoj sia nyob mus li yog li no : kom lawv paub koj, uas yog tus tseem Tswv Ntuj, thiab paub tus uas koj xa tuaj, Yes Xus Pleev. 4 Kuv tau ua kom koj muaj koob meej nyob ntiaj teb no, vim tias cov hauj lwm uas koj muab rau kuv ua, mas kuv ua tiav lawm. 5 Txiv, nyem no koj ua kom kuv muaj koob meej nyob ntawm koj xub ntiag, lub koob meej uas kuv yeej muaj txawm rau ntawm koj xub ntiag thaum lub sim ceeb tseem tsis tau xeeb los nyob.
    6 "Kuv tau qhia koj lub npe rau cov neeg uas koj rho hauv lub qab ntuj los pub rau kuv. Lawv yog koj tug, koj muab lawv pub rau kuv, ces lawv coj rawv koj lo lus. 7 Nyem no lawv paub tias tas txhua yam uas koj muab rau kuv yog tuaj ntawm koj tuaj. 8 Vim tias cov lus uas koj muab rau kuv, mas kuv muab rau lawv lawm. Lawv txais koj cov lus, ces lawv paub tseeb tias kuv tuaj ntawm koj tuaj tiag, thiab lawv ntseeg tias yog koj xa kuv tuaj. 9 Kuv thov koj rau lawv. Kuv tsis thov koj rau lub qab ntuj neeg, kuv thov koj rau cov uas koj muab pub rau kuv, vim lawv yog koj tug. 10 Txhua yam uas yog kuv tug, kuj yog koj tug ; txhua yam uas yog koj tug, kuj yog kuv tug thiab. Kuv muaj koob meej nyob hauv lawv lawm. 11 Kuv yuav tsis nyob hauv lub qab ntuj no ntxiv lawm, tab sis lawv tseem yuav nyob hauv lub qab ntuj no, hos kuv yuav los cuag koj.”
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 4th June 2019, 5:45 am

    Tim 5 lub 6 Hli 2019

    Hnub Plaub Lis Piam Xya Caij Hla Xyoo C Nruab Lis Piam Xyoo I

    Hwm LN Boniface, Tswv Qhia tuag ua Tim Khawv

    Zaj Nyeem Ib: HAUJ LWM 20: 28-38


    Paj Lug hais rau cov txwj laus tuaj Es Fes Xos tuaj tias:
    28 Nej yuav muab siab rau saib nej tus kheej, thiab saib tas nrho pab yaj uas Leej Ntuj Plig Ntshiab tsa nej ua cov tswv zov, kom nej coj Tswv Ntuj lub Koom Txoos uas nws tau muab nws roj ntsha kiag los txhiv mus noj zaub. 29 Kuv paub ntsoov tias thaum kuv mus lawm, mas yuav muaj ib co hma tsiv tsaim txeem los nrog nej ua ib pab. Lawv yuav tsis txuag pab yaj siav. 30 Tab yog nyob hauv nej pab neeg kiag, kuj tseem yuav muaj ib co sawv los hais tej zaj nkhaus tsis raug qhov tseeb kom rub tau cov thwj tim mus raws lawv. 31 Ua li mas nej yuav ceev faj tiag. Nej nco ntsoov tias kuv tau quaj ntuas nej tsis tseg ib leeg dhau ib leeg nruab hnub hmo ntuj tau peb lub xyoos. 32 Nyem no, kuv muab nej tas nrho tso rau Tswv Ntuj saib thiab tso nej rau nws Lo Lus pub txiaj ntsim uas muaj hwj huam yuav txhim tau nej kom sawv muaj zog, thiab yuav pub tau ib lub cuab tam rau nej nrog tas tsoom neeg siab ntshiab. 33 Kuv tsis tau thov dua leej twg tej nyiaj tej kub los tsoos tsho li. 34 Nej yeej paub lawm tias yog kuv ob txhais tes ntawm no tau ua rau kuv thiab cov nrog kuv peb noj xwb. 35 Kuv ua txhij ua txhua li ntawd kom tau qhia rau nej tias peb yuav tsum khwv yuav tsum pab cov tsis muaj zog, thiaj ua rau peb nco ntsoov Huab Tais Yes Xus lo lus tias: "Thaum koj pub, koj muaj kev zoo siab ntau dua thaum koj tau txais los."
    36 Paj Lug hais cov lus no tas, nws nrog lawv sawv daws txhos caug hauv av, ces nws thov Ntuj. 37 Sawv daws quaj, sawv daws mus puag Paj Lug caj dab, thiab nwj Paj Lug. 38 Lawv tu siab tshaj rau lo lus uas nws hais tias lawv yuav tsis rov pom nws ntsej muag ntxiv lawm. Ces lawv xa Paj Lug mus txog ntua ntawm lub nkoj.

    NPN 68: 29-30, 33-35A, 35BC-36AB

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    Tswv Ntuj, thov koj ua kom peb pom koj lub zog,
    koj lub zog, Tswv Ntuj, uas koj tau siv los ua hwj huam pab peb.
    Nyob saum koj lub tuam tsev nyob Yes Lus Xas Les,
    Cov vaj ntxwv huab tais yuav nqa paj tshab tuaj rau koj.

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    Ntiaj teb cov vaj, nej hu nkauj rau Tswv Ntuj,
    Nej nqua suab hu nkauj cav txog Huab Tais
    tus uas caij nees hla saum cov txheej ntuj saud,
    saum cov txheej ntuj puag txheej thaum ub.
    Nej mloog, nws lub suab nrov nroo ntws, lub suab muaj zog.
    Nej cia li lees tias Tswv Ntuj muaj hwj huam.

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    Nws lub hwj xyeej nyob saum haiv His Xas Lais,
    nws lub hwj huam nyob saum cov txheej ntuj saud.
    Tswv Ntuj, His Xas Lais tus Tswv Ntuj loj kawg nkaus nyob hauv nws lub tuam tsev.
    Nws muab lub hwj huam thiab lub zog rau nws haiv neeg.

    Txais: (33a) Cov vaj nyob ntiaj teb, nej cia li hu nkauj rau Tswv Ntuj.
    los: As les lus yas.

    As Les Lus Yas: ZAM 17:17B, 17A

    Txais: As les lus yas, as les lus yas.

    Huab Tais, koj lo lus yog qhov tseeb,
    Thov koj txuag peb nyob hauv qhov tseeb.

    Txais: As les lus yas, as les lus yas.

    Ntawv Moo Zoo: ZAM 17: 11B-19

    Yes Xus tsa muag rau saum ntuj, nws thov ntuj li no:
    11b “Leej Txiv Ntshiab, thov koj txuag lawv nyob hauv koj lub Npe uas koj muab rau kuv, kom xwv lawv ua ib leeg xws li wb ua ib leeg. 12 Thaum kuv nrog lawv nyob, kuv txuag lawv nyob hauv koj lub Npe uas koj muab rau kuv. Kuv saib xyuas lawv, ces tsis muaj ib tug ploj li, tsuas muaj kev ploj tus tub xwb, kom tshwm sim tuaj raws li Ntawv sau cia. 13 Zaum no kuv rov los cuag koj, kuv hais tej no nyob hauv ntiaj teb, kom xwv lawv muaj kuv txoj kev zoo siab puv npo nyob hauv lawv. 14 Kuv tau muab koj lo lus rau lawv, ces lub ntiaj teb thiaj li ntxub lawv, vim lawv tsis yog ntiaj teb tug, ib yam li kuv tsis yog ntiaj teb tug. 15 Kuv tsis thov kom koj rho lawv tawm hauv ntiaj teb mus, kuv thov kom koj txuag lawv ntawm tus Phem xwb. 16 Lawv tsis yog lub ntiaj teb tug ib yam li kuv tsis yog ntiaj teb tug. 17 Thov koj ua kom lawv ntshiab tuaj nyob hauv txoj kev tseeb : Koj lo lus yog qhov tseeb. 18 Ib yam li koj xa kuv los nyob hauv lub ntiaj teb, kuv kuj xa lawv mus nyob hauv lub ntiaj teb thiab. 19 Kuv rov ua kom kuv ntshiab tuaj pub rau lawv, kom xwv lawv ntshiab tuaj nyob hauv qhov tseeb.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 5th June 2019, 6:21 am

    Tim 6 lub 6 Hli 2019

    Hnub Tsib Lis Piam Xya Caij Hla Xyoo C Nruab Lis Piam Xyoo I

    Hwm LN Norbert

    Zaj Nyeem Ib: HAUJ LWM 22: 30; 23: 6-11


    30 Hnub tom qab, tus xab txheeb xav paub tseeb tias cov Yus Das liam dab tsi rau Paj Lug, ces nws daws Paj Lug thiab nws kom cov leej choj thiab tas tsoom txwj laus Xas Nes Nrees tuaj sib sau. Ces nws tso Paj Lug nqe los thiab coj nws mus sawv ntawm lawv xub ntiag.
    23 6 Paj Lug paub tias cov neeg nyob ntawd muaj ib co yog tog Xas Dus Kais, ib co yog tog Fas Lis Xais. Ces nws tsa suab hais nrov nrov rau tsoom Xas Nes Nrees tias : "Cov kwv tij, kuv yog ib tug Fas Lis Xais, kuv yog cov Fas Lis Xais tub. Yog vim txoj kev cia siab thiab ntseeg tias cov neeg tuag yuav ciaj rov qab los, kuv thiaj raug txiav txim ." 7 Paj Lug tseem hais li no suab tsis tau tu, cov Fas Lis Xais thiab cov Xas Dus Kais twb pib sib ceg lawm, ces sawv daws faib kiag ua ob tog. 8 Vim cov Xas Dus Kais hais tias tsis muaj kev sawv rov los, tsis muaj cov Tshiab thiab tsis muaj dab li, hos cov Fas Lis Xais ntseeg txog peb yam ntawd tib si. 9 Sawv daws thiaj qw ntshoo nrooj sib cav ntsuag qees. Muaj ob peb tug kws ntawv uas yog tog Fas Lis Xais txawm sawv, lawv siv zog hais nrov nrov tias : "Peb tsis pom tus neeg ntawd ua ib qho txhaum dab tsi. Tej zaum tsam yog ib tug dab los yog ib tug Tshiab hais lus rau nws ne ?" 10 Ces lawv haj yam sib cav heev zuj zus tuaj xwb. Tus xab txheeb ntshai tsam lawv muab Paj Lug dua ua daim, nws thiaj kom pab tub rog nqes mus chua Paj Lug ntawm lawv los thiab coj nws los nyob hauv lub yeej.
    11 Hmo tom qab, Huab Tais tuaj xyuas Paj Lug, thiab hais rau nws tias : "Ua siab loj loj! Koj tau ua tim khawv txog kuv nyob Yes Lus Xas Les lawm, ib yam nkaus li ntawd koj tseem yuav ua tim khawv txog kuv nyob Los Mas thiab."

    NPN 16: 1-2A+5, 7-8, 9-10, 11

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Tswv Ntuj, thov koj txuag kuv, vim kuv tuaj khaub zig koj.
    Kuv hais rau HUAB TAIS tias: " Koj yog kuv tus HUAB TAIS !”
    Huab Tais, kuv lub cuab tam, kuv lub ntim,
    Koj yog tus tuav rawv kuv txoj hmoo.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Kuv cav lus zoo txog tus HUAB TAIS uas qhia kuv xav tswv yim,
    Tab yog hmo ntuj kuv siab ntsws tseem txhib kuv.
    Kuv cia HUAB TAIS nyob ntawm kuv xub ntiag tsis tseg,
    Vim nws nyob ntawm kuv sab xis, kuv yuav tsis qaij tsis qaug

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Vim li ntawd, kuv lub siab luag ntxhi, kuv tus plig hom khaj,
    kuv lub cev kuj tau nyob nyab xeeb,
    Vim koj yuav tsis tso kuv tus ntsuj plig
    pov tseg rau hauv ntuj txias teb tsaus.
    Koj yuav tsis kheev kom tus ntseeg txog koj lub cev txawj lwj.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Koj yuav qhia rau kuv txog txoj kev muaj txoj sia,
    txog kev zoo siab nyob ntawm koj xub ntiag,
    txog nyob ntawm koj sab xis, muaj kev nplij siab tsis txawj tsuag ib sid.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    As Les Lus Yas: ZAM 17: 21

    Txais: As les lus yas, as les lus yas.

    Huab Tais hais tias: Thov kom lawv sawv daws koom ua ib leeg,
    ib yam li koj, Leej Txiv, nyob hauv kuv, thiab kuv nyob hauv koj,
    kom ntiaj teb neeg thiaj ntseeg tias yog koj xa kuv tuaj.

    Txais: As les lus yas, as les lus yas.

    Ntawv Moo Zoo: ZAM 17: 20-26

    Yes Xus tsa muag ntsia saum ntuj, nws thov ntuj li no:
    20 "Kuv tsis thov koj rau cov no xwb, kuv tseem thov koj rau cov uas yuav ntseeg txog kuv vim lawv lo lus thiab,
    21 kom lawv sawv daws koom ua ib leeg, ib yam li koj, Leej Txiv, nyob hauv kuv, kuv nyob hauv koj, kom lawv nyob hauv wb, ntiaj teb neeg thiaj ntseeg tias yog koj xa kuv tuaj.
    22 Lub koob meej uas koj muab rau kuv, mas kuv muab rau lawv lawm, kom xwv lawv ua ib leeg xws li wb ua ib leeg. 23 Kuv nyob hauv lawv, koj nyob hauv kuv, lawv thiaj li ua tsheej ib leeg tiag, lub qab ntuj neeg thiaj paub tias yog koj xa kuv tuaj, thiab paub tias koj nyiam lawv ib yam li koj nyiam kuv.
    24 Txiv, cov uas koj muab rau kuv, kuv nyob qhov twg, mas kuv xav kom lawv tau nrog kuv nyob qhov ntawd thiab, kom lawv pom kuv lub koob meej uas koj muab rau kuv, vim koj tau nyiam kuv, txij thaum tsis tau tsim lub sim ceeb los lawm.
    25 Txiv siab ncaj, lub qab ntuj neeg tsis paub koj, tab sis kuv paub koj, thiab cov no kuj paub tias yog koj xa kuv tuaj. 26 Kuv twb ua kom lawv paub koj lub npe lawm. Kuv tseem yuav ua kom lawv haj yam paub ntxiv, kom txoj kev nyiam uas koj nyiam kuv ntawd nyob hauv lawv thiab kom kuv nyob hauv lawv."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 6th June 2019, 4:53 am

    Tim 7 lub 6 Hli 2019

    Thawj Hnub Rau Lis Piam Xya Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 25: 13-21


    13 Ob peb hnub tom qab, tus vaj As Nqis Pas thiab Npes Les Nis nkawd tuaj txog Xes Ntxas Les tuaj txais tos Fes Tus. 14 Vim tias nkawd yuav nyob ntev hnub, ces Fes Tus thiaj piav txog Paj Lug rau tus vaj tias : "Nyob ntawm no, muaj ib tug neeg uas Fes Lis tau cia nws kaw rau hauv tsev loj faj tseg. 15 Thaum kuv mus Yes Lus Xas Les, cov leej choj thiab cov txwj laus Yus Das tuaj liam nws rau kuv, lawv kom kuv muab txim rau nws. 16 Kuv teb lawv tias cov Los Mas tsis muaj cai yuav cia li muab tus neeg raug luag liam tso rau lawv tes, yuav tsum xub hu cov neeg kom tuaj nrog tus raug liam ntawd tim ntsej tim muag hais tso, thiab yuav cia tus raug liam tau kev hais lus daws lub txim uas luag liam rau nws tso. 17 Ua li mas cov Yus Das thiaj tuaj ntawm no; kuv tsis ncua sij hawm li, tag kis tom qab kiag, kuv mus zaum hauv lub tsev txiav txim, kuv kom lawv coj tus neeg los. 18 Cov neeg tuaj liam sawv los nyob ib ncig liam rau nws; tiam sis lawv liam tsis tau ib qho uas kuv xav tias yog ib qho phem li. 19 Lawv tsuas yog nrog nws muaj lus sib cav hais txog lawv txoj kev ntseeg xwb, thiab hais txog ib tug Yes Xus uas tuag lawm, tab sis Paj Lug hais tias nws rov muaj txoj sia nyob xwb. 20 Kuv tsis pom qab ua dab tsi rau ib zag sib cav li ntawd, kuv thiaj nug Paj Lug saib nws puas yeem mus pem Yes Lus Xas Les, cia mam txiav txim txog tej ntawd rau nws nyob ped. 21 Tiam sis Paj Lug tau thov kom tuav nws cia thiab tso nws mus rau tus Tuam Vaj txiav txim rau nws xwb. Kuv thiaj li ceeb toom kom tuav Paj Lug cia nyob ntawm no mus txog hnub kuv xa nws mus rau Xes Ntxas.”

    NPN 103: 1-2, 11-12, 19-20AB

    Txais: (19a) Huab Tais tau tsa nws lub theej kiab rau txheej ntuj saud.
    los: As les lus yas.

    Kuv tus ntsuj plig, koj cav txog HUAB TAIS;
    kuv tej siab ntsws, nej cav txog nws lub npe ntshiab.
    Kuv tus ntsuj plig, koj cav txog HUAB TAIS,
    koj tsis txhob hnov qab nws tej kev zoo ib qho li.

    Txais: (19a) Huab Tais tau tsa nws lub theej kiab rau txheej ntuj saud.
    los: As les lus yas.

    Npaum li lub ntuj nyob siab tshaj rau saum ntiaj teb,
    nws hlub cov neeg uas hwm nws tshaj npaum li ntawd.
    Npaum li sab hnub tuaj nyob deb ntawm sab hnub poob,
    nws muab peb tej txhaum pov tseg deb ntawm peb npaum li ntawd .

    Txais: (19a) Huab Tais tau tsa nws lub theej kiab rau txheej ntuj saud.
    los: As les lus yas.

    HUAB TAIS tsa nws lub theej kiab rau txheej ntuj saud,
    nws lub hwj chim ua vaj kav tas txhua tsav txhua yam.
    Nej uas yog nws cov Tshiab, nej cav lus zoo txog HUAB TAIS,
    nej uas yog cov muaj peev xwm zog loj thiab nej mloog nws lus.

    Txais: (19a) Huab Tais tau tsa nws lub theej kiab rau txheej ntuj saud.
    los: As les lus yas.

    As Les Lus Yas: ZAM 14: 26

    Txais: As les lus yas, as les lus yas.

    Leej Ntuj Plig Ntshiab yuav qhia tas ib puas tsav yam rau nej,
    thiab yuav pab nej rov nco txog tas txhua yam kuv tau hais rau nej.

    Txais: As les lus yas, as les lus yas.

    Ntawv Moo Zoo: ZAM 21: 15-19

    15 Thaum lawv noj tshais tas, Yes Xus hais rau Xis Moos Pob Zeb tias : "Xis Moos, Zam tub, koj puas nyiam kuv dua lawv cov ntawd ?"
    Pob Zeb hais rau Yes Xus tias : "Huab Tais, koj yeej paub tias kuv nyiam koj."
    Yes Xus hais rau Pob Zeb tias : "Koj muab zaub rau kuv cov yaj me noj."
    16 Yes Xus rov hais zaum ob tias : "Xis Moos, Zam tub, koj puas nyiam kuv ?
    Pob Zeb hais rau Yes Xus tias : "Huab Tais, koj yeej paub tias kuv nyiam koj."
    Yes Xus hais rau nws tias : "Koj zov kuv cov yaj mog."
    17 Yes Xus tseem rov hais dua zaum peb rau Pob Zeb tias : "Xis Moos, Zam tub, koj puas nyiam kuv?”
    Pob Zeb tu siab rau qhov Yes Xus hais rau nws zaum peb tias : "Koj puas nyiam kuv ?"
    Pob Zeb hais rau Yes Xus tias : "Huab Tais, koj paub tas ib puas tsav yam, koj yeej paub tias kuv nyiam koj."
    Yes Xus hais rau Pob Zeb tias : "Koj muab zaub rau kuv cov yaj noj mog.
    18 Kuv hais qhov muaj tseeb tiag rau koj : Thaum koj tseem hluas, koj muab koj siv koj sia koj, koj xav mus qhov twg los koj mus koj. Tiam sis thaum koj laus lawm, koj yuav tsa tes cia lwm tus kho siv rau koj sia thiab coj koj mus qhov uas koj tsis xav mus."
    19 Yes Xus hais qhov ntawd qhia tias Pob Zeb yuav tuag zoo li cas kom Tswv Ntuj nto koob meej.
    Yes Xus hais li tas, nws hais rau Pob Zeb tias : "Koj raws kuv mus."

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 7th June 2019, 8:15 am

    Tim 8 lub 6 Hli 2019

    Hnub Xya Lis Piam Xya Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 28: 16-20, 30-31


    16 Thaum peb tuaj txog hauv Los Mas lawm, mas lawv cia Paj Lug nws nyob nws hauv ib lub tsev, tsuas muaj tus tub rog uas zov nws nrog nws nyob xwb.
    17 Peb hnub tom qab, Paj Lug nqua hu cov thawj coj Yus Das hauv lub nroog tuaj sib txoos ua ke. Thaum lawv tuaj txog tas, Paj Lug hais rau lawv tias : "Cov kwv tij, kuv tsis tau ua dab tsi txhaum peb haiv neeg, los txhaum peb cov yawg koob tej kev cai, tsis kav lawv ntes kuv kaw nyob Yes Lus Xas Les thiab muab kuv rau cov Los Mas. 18 Thaum cov Los Mas tshuaj lus tas, lawv xav tso kuv mus, vim lawv pom kuv tsis tau ua dab tsi txaus ris lub txim tuag. 19 Tab sis cov Yus Das tsis kam tso, vim qhov no kuv thiaj yuav tsum tau hu txog Xes Ntxas ua kuv tus txiav txim, tsis yog vim kuv xav liam dab tsi rau kuv haiv neeg. 20 Vim li no, mas kuv thiaj xav ntsib nej thiab hais rau nej paub tias, yog vim His Xas Lais txoj kev tso siab, mas kuv thiaj li coj tej saw zoo li no."
    30 Paj Lug nyob tau ob xyoos nkaus hauv lub tsev uas nws nyob ntawd. Nws txais cov neeg uas tuaj xyuas nws tas huv tib si. 31 Nws tshaj txog Tswv Ntuj lub Ceeb Tsheej, thiab qhia txog Huab Tais Yes Xus Pleev, nws tso siab lug qhia, tsis muaj leej twg txwv nws li.

    NPN 11: 4, 5+7

    Txais: (7b) Huab Tais, cov neeg siab ncaj yuav nyob ntsia ntsoov koj lub ntsej muag.
    los: As les lus yas.

    HUAB TAIS nyob hauv nws lub tuam tsev ntshiab;
    HUAB TAIS lub theej kiab nyob saum ntuj.
    Nws qhov muag saib ntsoov ntiaj teb,
    nws ntsia tsom ntsoov rau tsoom tib teb neeg.

    Txais: (7b) Huab Tais, cov neeg siab ncaj yuav nyob ntsia ntsoov koj lub ntsej muag.
    los: As les lus yas.

    HUAB TAIS nrhiav tus neeg ncaj thiab tus neeg phem,
    nws ntxub tus lim hiam nyiam kev sib ntaus sib tua.
    Vim HUAB TAIS siab ncaj, nws nyiam cov hauj lwm ncaj ncees,
    cov neeg siab ncaj yuav tau ntsia ntsoov HUAB TAIS ntsej muag

    Txais: (7b) Huab Tais, cov neeg siab ncaj yuav nyob ntsia ntsoov koj lub ntsej muag.
    los: As les lus yas.

    As Les Lus Yas: ZAM 16: 7, 13

    Txais: As les lus yas, as les lus yas.

    Huab Tais hais tias:
    Kuv yuav xa Leej Tswv Yim qhia qhov tseeb tuaj rau nej;
    Nws yuav coj nej mus txog txhua yam tseeb.

    Txais: As les lus yas, as les lus yas.

    Ntawv Moo Zoo: ZAM 21: 20-25

    20 Pob Zeb tig ntsia tom qab, nws pom tus thwj tim uas Yes Xus nyiam lawv qab, yog tus uas thaum lawv noj hmo, nws tig mus pheeb rau ntawm Yes Xus hauv siab, thiab nug tias : “Huab Tais, tus muab koj rau luag yog leej twg?”. 21 Pob Zeb pom tus thwj tim ntawd, Pob Zeb hais rau Yes Xus tias : "Huab Tais, tus ntawd ned ?" 22 Yes Xus hais rau Pob Zeb tias : "Yog kuv xav kom nws nyob mus txog hnub kuv rov los los kuj xij, tsis yog koj hauj lwm. Hos koj, mas koj raws kuv mus." 23 Ces thiaj muaj ib lo lus no ncha mus rau hauv cov kwv tij tias tus thwj tim ntawd yuav tsis tuag. Tab sis Yes Xus tsis tau hais rau Pob Zeb tias : 'Nws yuav tsis tuag', Yes Xus tsuas tau hais tias : 'Yog kuv xav kom nws nyob txog hnub kuv rov los los kuj xij, tsis yog koj hauj lwm.'
    24 Yog tus thwj tim ntawd ua tim khawv txog tej no thiab yog nws muab sau cia. Peb paub tias nws cov lus ua pov thawj muaj tseeb.
    25 Tseem tshuav ntau yam kawg uas Yes Xus tau ua, yog yuav sau ib yam zuj zus tas huv tib si, mas kuv xav tias lub ntiaj teb yuav ntim tsis tas cov ntawv uas sau txog nws tej hauj lwm li.

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 10th June 2019, 6:14 am

    Tim 10 lub 6 hli 2019

    Hnub Ob Lis Piam Kaum Nruab Xyoo C Nruab Lis Piam Xyoo I

    Hwm tus Nkauj Nkauj Xwb Tsim Txiaj Mab Liab ua lub Koom Txoos Leej Niam

    (yog ib lub hmoov tshiab Vaj Qhia Francis kom pib muaj xyoo 2018 los, yuav muaj nco txog li no niaj xyoo Hnub Ob tom qab Leej Ntuj Plig nqes los).

    Zaj Nyeem Ib: HP 3: 9-15, 20

    Thaum As Das thiab Es Vas nkawd noj lub txiv tas,
    9 HUAB TAIS Tswv Ntuj hu tus txiv neej hais tias : "Koj nyob qhov twg ?" 10 Tus txiv neej teb tias : "Kuv hnov koj nyob hauv lub vaj, tiam sis kuv ntshai vim kuv liab qab, ces kuv thiaj khiav tsiv nraim lawm." 11 Tswv Ntuj hais ntxiv tias : "Leej twg qhia koj tias koj liab qab ? Yog koj noj lub txiv uas kuv txwv tsis pub koj noj lawm xwb!" 12 Tus txiv neej teb tias: "Yog tus poj niam uas koj tso nrog kuv nyob, nws muab lub txiv ntawm tsob ntoo rau kuv, ces kuv thiaj noj !" 13 HUAB TAIS Tswv Ntuj hais rau tus poj niam tias : "Koj ua dab tsi li ntawd ?" Tus poj niam teb tias : "Yog niag nab ntxias kuv, kuv thiaj noj." 14 Ces HUAB TAIS Tswv Ntuj hais rau tus nab hais tias : "Vim koj tau ua li ntawd, koj txoj hmoov yuav phem tshaj ib tsoom tsiaj nyeg thiab tsiaj qus. Koj yuav xuas koj lub plab mus kev, thiab koj yuav niaj hnub noj av tas koj sim neej. 15 Kuv yuav ua kom muaj kev ciaj caub ntawm koj thiab tus poj niam, ntawm koj caj ces thiab nws caj ces. Nws yuav tsuj koj taub hau, koj yuav tom nws luj taws."
    20 Tus txiv neej tis npe rau nws poj niam hu ua Es Vas, vim nws yog ib tsoom neeg muaj txoj sia leej niam.

    Los: HL 1: 12-14

    Thaum Yes Xus nce mus saum ntuj lawm,
    12 cov thwj tim rov los rau Yes Lus Xas Les, lawv nqes pem lub roob uas hu ua "Roob Txiv Ntoo Roj" los, uas nyob ze ntawm Yes Lus Xas Les li ib ncua kev uas neeg taug kam hnub Xas Npas Tos. 13 Thaum lawv rov los txog, lawv nce mus saum chav tsev siab uas yog qhov chaw lawv nyob : muaj Pob Zeb thiab Zam, Yas Kos thiab As Nres, Fis Lis Pos thiab Tos Mas, Npas Tos Los Mas Yos thiab Mas Tais, Yas Kos uas yog As Fais Yos tub, Xis Moos Siab Kub, thiab Yus Das uas yog Yas Kos tub. 14 Tas lawv cov no sawv daws koom ib lub siab lawv kub siab teev ntuj; muaj ob peb tug poj niam nrog lawv, thiab kuj muaj Mab Liab uas yog Yes Xus niam, thiab muaj Yes Xus cov kwv tij thiab.

    NPN 87: 1-2, 3+5, 6-7

    Txais: (3) Tswv Ntuj lub tsheej, lawv hais tej yam zoo kawg qhuas txog koj!

    Nws lub taw ntsa txhos nyob saum cov roob ntshiab,
    Huab Tais nyiam Xis Yoos cov rooj vag
    heev dua Yas Kos lwm cov tsev tas huv si.

    Txais: (3) Tswv Ntuj lub tsheej, lawv hais tej yam zoo kawg qhuas txog koj!

    Tswv Ntuj lub tsheej, lawv hais tej yam zoo kawg qhuas txog koj!
    Lawv yuav hais txog Xis Yoos tias:
    “Tus no thiab txhua tus neeg yug nyob hauv nws.
    Tus uas txhim tsa Xis Yoos yog tus Huab Tais nyob siab.”

    Txais: (3) Tswv Ntuj lub tsheej, lawv hais tej yam zoo kawg qhuas txog koj!

    HUAB TAIS yuav sau rau hauv phau ntawv txheeb npe txog
    cov tib neeg tias: "Tus neeg no yug los nyob ntawd,”
    Nws kuj sau txog cov vaj txheeb thiab cov me nyuam huv si :
    “Sawv daws puav leej nyob txawm hauv koj."

    Txais: (3) Tswv Ntuj lub tsheej, lawv hais tej yam zoo kawg qhuas txog koj!

    As Les Lus Yas

    Txais: As les lus yas, as les lus yas.

    Nkauj Xwb Tsim Txiaj, koj yuav zoo siab,
    koj yog tus yug peb tus Huab Tais;
    lub Koom Txoos Leej Niam tus tau txoj hmoov zoo,
    koj ua kom peb sov siab nyob hauv
    koj leej Tub Yes Xus Pleev Leej Tswv Yim.

    O happy Virgin, you gave birth to the Lord;
    O blessed mother of the Church,
    you warm our hearts with the Spirit of your Son Jesus Christ.

    Txais: As les lus yas, as les lus yas.

    Ntawv Moo Zoo: ZAM 19: 25-34

    25 Cov sawv nyob ze ntawm Yes Xus tus ntoo cuam yog nws niam thiab nws niam tus niam hluas Mab Liab uas yog Khos Pas poj niam, thiab Mab Liab Mas Ntas Las. 26 Yes Xus pom nws niam, thiab pom tus thwj tim uas nws nyiam sawv nyob ze, ces nws hais rau nws niam tias : "Leej Niam, tus ntawd yog koj tus tub." 27 Thiab Yes Xus hais rau tus thwj tim tias : "Tus ntawd yog koj niam." Txij lub sij hawm ntawd los, tus thwj tim coj Mab Liab mus nyob hauv nws tsev.
    28 Ua li ntawd tas, Yes Xus paub tias zaum no ib puas tsav yam tiav tas lawm; kom xwv muaj raws li ntawv sau tseg, nws hais tias : "Kuv nqhis dej." 29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ntsis pas nroj his xaus cev mus rau Yes Xus qhov ncauj. 30 Thaum Yes Xus saj qhov kua qaub tas, nws hais tias : "Ib puas tsav yam tiav tas lawm." Ces Yes Xus nyo taub hau, nws tso nws tus ntsuj plig tawm mus.
    31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj. Cov Yus Das thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev tshem mus. 32 Cov tub rog thiaj tuaj muab thawj tug ob sab ceg lov, thiab muab lwm tus uas nrog nws dai saum ntoo cuam ob sab ceg lov. 33 Thaum lawv los txog ntawm Yes Xus, lawv pom nws twb tuag lawm, lawv tsis muab nws ob sab ceg lov, 34 tab sis ib tug tub rog xuas nws rab hmuv hno Yes Xus phab tav; tam sis ntawd ib co ntshav thiab ib co dej tawm los.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 10th June 2019, 9:30 am

    Tim 11 lub 6 Hli 2019

    Hnub Ob Lis Piam Kaum Nruab Xyoo C Nruab Lis Piam Xyoo I

    Hwm LN Npas Nas Npas, Hauv Paus Xa Lus

    Zaj Nyeem Ib: HAUJ LWM 11: 21B-26; 13:1-3


    11 21b Lub caij ntawd muaj neeg coob txais kev ntseeg thiab tig los cuag Huab Tais. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Caus Kus. 23 Thaum Npas Nas Npes tuaj txog, nws pom Tswv Ntuj lub txiaj ntsim, mas nws zoo siab kawg, nws pab txhawb kom lawv sawv daws ua siab loj siab tawv nyob ruaj nreb hauv txoj kev ntseeg txog Huab Tais. 24 Vim Npas Nas Npes yog ib tug neeg zoo, muaj Leej Ntuj Plig Ntshiab nyob puv hauv nws, thiab muaj kev ntseeg ruaj, mas muaj ib pab neeg coob kawg los ntseeg txog Huab Tais ntxiv. 25 Ces Npas Nas Npes mus nrhiav Xauv nyob Tas Xis. 26 Thaum nws nrhiav tau Xauv lawm, nws coj Xauv los nyob As Caus Kus. Tau ib xyoos nkaus, nkawd nrog lub Koom Txoos sib sau sib ntsib, thiab nkawd qhuab qhia ib pab neeg coob kawg. Yog nyob As Caus Kus uas luag xub pib hu cov thwj tim ua cov Pleev.
    13 1 Lub Koom Txoos nyob As Caus Kus thaum ntawd muaj ib co yaj saub thiab ib co kws qhuab qhia : yog Npas Nas Npes, Xis Mes Oos uas luag hu nws ua Nis Zes, Lus Xyus tus nyob Xis Les Nas teb tuaj, Mas Nas Ees uas thaum yau nws nrog tus vaj Hes Los ua phooj ywg, thiab Xauv. 2 Thaum lawv tab tom ua lub txoos teev ntuj thiab ua cov kab ke yoo mov, mas Leej Ntuj Plig Ntshiab hais rau lawv tias : "Nej xaiv qee Npas Nas Npes thiab Xauv nkawd mus ua txoj hauj lwm uas kuv tau hu nkawd mus ua." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, thiab lawv xa nkawd mus.


    NPN 98: 1, 2-3AB, 3CD-4, 5-6

    Txais: (2b) Huab Tais muab nws lub hwj huam
    cawm neeg rau cov haiv neeg pom.

    Nej hu ib zaj nkauj tshiab rau HUAB TAIS
    vim nws tau ua tej yam txaus qhuas;
    nws txhais tes xis tau ua kom nws yeej,
    thiab nws sab npab ntshiab.

    Txais: (2b) Huab Tais muab nws lub hwj huam
    cawm neeg rau cov haiv neeg pom.

    HUAB TAIS ua kom sawv daws paub txog nws txoj kev cawm neeg,
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo thiab kev pheej xeeb rau
    tsev neeg His Xas Lais.

    Txais: (2b) Huab Tais muab nws lub hwj huam
    cawm neeg rau cov haiv neeg pom.

    Tas npoo ntuj npoo ntiaj teb kawg tau pom
    peb tus Tswv Ntuj txoj kev cawm neeg.
    Tas txhuam teb chaws, nej zoo siab hu nkauj rau HUAB TAIS,
    nej qw suab hu nkauj, nej cav txog nws.

    Txais: (2b) Huab Tais muab nws lub hwj huam
    cawm neeg rau cov haiv neeg pom.

    Nej ntaus nkauj nog ncas cav txog Huab Tais,
    nej ntaus nkauj nog ncas nrog tej zaj nkauj zoo mloog.
    Nej tshuab hom ntxuag suab kub nyuj,
    nej dhia zoo siab nyob ntawm tus Vaj Ntxwv HUAB TAIS xub ntiag.

    Txais: (2b) Huab Tais muab nws lub hwj huam
    cawm neeg rau cov haiv neeg pom.

    As Les Lus Yas: MT 5: 16

    Txais: As les lus yas, as les lus yas.

    nej yuav tsum cia nej qhov pom kev ci nyob ntawm zeej tsoom xub ntiag,
    kom lawv pom nej cov dej num zoo, ces lawv yuav cav txog nej Txiv nyob saum ntuj.

    Txais: As les lus yas, as les lus yas.

    Ntawv Moo Zoo: MT 5: 13-16

    Yes Xus hais rau nws cov thwj tim tias:
    13 "Nej yog cov ntsev las lub ntiaj teb. Tab sis yog ntsev tsuag lawm, yuav muab dab tsi ua kom ntsev rov qab daw tuaj ? Ntsev tsuag tsis zoo ua dab tsi, tsuas kawg muab pov tseg nraum zoov rau neeg tsuj xwb. 14 "Nej yog qhov pom kev ci rau lub ntiaj teb. Ib lub nroog txhim rau saum ib lub ncov roob, yuav muab zais tsis tau. 15 Hos, luag kuj tsis taws ib lub teeb coj mus khwb rau hauv qab pob tawb, luag muab txawb rau saum tus ncej teeb, kom ci rau tas cov neeg nyob hauv lub tsev pom kev. 16 Li ntawd, nej qhov pom kev yuav tsum ci nyob ntawm zeej tsoom xub ntiag, kom lawv pom nej cov dej num zoo, ces lawv yuav cav txog nej Txiv nyob saum ntuj.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 11th June 2019, 1:37 pm

    Tim 12 lub 6 Hli 2019

    Hnub Plaub Lis Piam Kaum Nruab Xyoo C Nruab Lis Piam Xyoo I

    Zaj Nyeem Ib: 2 KLN 3: 4-11


    Cov kwv tij nkauj muad:
    4 Peb ntseeg khov ntseeg ruaj li ntawd ntawm Tswv Ntuj xub ntiag nyob hauv Leej Pleev. 5 Tsis yog vim tias peb tus kheej muaj peev xwm ua tau tej yam uas peb yuav khav tau tias yog peb ua tawm los; tiam sis peb lub peev xwm yog tuaj ntawm Tswv Ntuj tuaj. 6 Nws yog tus pub kom peb muaj peev xwm lis txoj kab xwm saib txoj kev cog lus tshiab, uas tsis yog ib txog kev cog lus nyob hauv ntawv, tiam sis yog ib txog kev cog lus nyob hauv Leej Ntuj Plig, vim tias ntawv txawj ua kom tuag, hos Leej Ntuj Plig ua kom muaj txoj sia.
    7 Yog tias txoj kab xwm hais txog kev tuag uas muab txaug rau saum daim txiag zeb, twb muaj hwj chim loj npaum ntawd, ua tau kom cov tub ki His Xas Lais ntsia tsis taus Mais Xes lub ntsej muag vim nws lub ntsej muag muaj hwj chim, txawm tias yog ib lub hwj chim kav tsis ntev, 8 mas txoj kab xwm hais txog Leej Ntuj Plig haj yam yuav tsum muaj hwj chim loj tshaj ntawd ! 9 Yog tias txoj kab xwm muab txim rau neeg twb muaj hwj chim, mas txoj kab xwm muab kev ncaj ncees haj yam yuav muaj hwj chim loj dua. 10 Yog peb muab lub hwj chim hauv txoj kab xwm qub los piv rau lub hwj chim loj hauv txoj kab xwm tshiab, mas txoj kab xwb qub tsis muaj hwj chim dab tsi li; 11 vim tias yog yam uas yuav dua sai twb muaj hwj chim, mas yam uas yuav nyob mus li, haj yam yuav tsum muaj hwj chim tshaj!

    NPN 99: 5, 6, 7, 8, 9

    Txais: (9c) Huab Tais, peb tus Tswv Ntuj yog tus ntshiab.

    Nej qhuas nej khav txog HUAB TAIS, peb tus Tswv Ntuj;
    nej pe hawm nws ntawm nws lub rooj tiag taw !
    Nws ntshiab tiag!

    Txais: (9c) Huab Tais, peb tus Tswv Ntuj yog tus ntshiab.

    Mais Xes thiab As Loos yog ob tug nyob hauv nws tsoom leej choj,
    Xas Muas yog ib tug nyob hauv cov uas vam txog nws lub npe;
    thaum lawv hu txog HUAB TAIS, nws teb lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS nyob hauv tus ncej huab nrog lawv tham;
    Lawv hnov nws hais nws tej lij choj thiab nws txoj cai nws muab rau lawv.

    Txais: (9c) Huab Tais, peb tus Tswv Ntuj yog tus ntshiab.

    HUAB TAIS, peb tus Tswv Ntuj, koj teb rau lawv,
    koj yog ib tug Tswv Ntuj ua siab ntev rau lawv,
    tab sis koj rau txim rau lawv vim lawv cov txhaum.

    Txais: (9c) Huab Tais, peb tus Tswv Ntuj yog tus ntshiab.

    Nej qhuas txog HUAB TAIS, peb tus Tswv Ntuj ;
    nej pe hawm nws nyob saum nws lub roob ntsiab,
    vim HUAB TAIS peb tus Tswv Ntuj ntshiab tiag !

    Txais: (9c) Huab Tais, peb tus Tswv Ntuj yog tus ntshiab.

    As Les Lus Yas: NPN 25: 4B, 5A

    Txais: As les lus yas, as les lus yas.

    Kuv tus Tswv Ntuj, thov qhia koj txoj kev rau kuv taug,
    thiab coj kuv mus nyob hauv koj txoj kev tseeb.

    Txais: As les lus yas, as les lus yas.

    Ntawv Moo Zoo: MT 5: 17-19

    Yes Xus hais rau nws cov thwj tim tias:
    17 Nej txhob xav tias kuv tuaj rhuav Txoj Cai thiab cov Yaj Saub : kuv tsis tuaj rhuav, kuv tuaj qhia ntxiv kom thoob. 18 Kuv hais qhov muaj tseeb rau nej tias : mus txog thaum lub ntuj lub teb dua, yuav tsis muaj ib tug txwm ntawv, los ib lub cim ntawv me me hauv Txoj Cai yuav ploj. Tas ib puas tsav yam nyob hauv yuav tsum tshwm sim tuaj tso.
    19 Leej twg hla ib txog cai me me nyob hauv cov lus qhia, thiab qhia kom luag tej ua xws li nws, mas Ntuj yuav saib tus ntawd qis tshaj cov nyob hauv Ntuj lub Ceeb Tsheej. Hos tus ua raws Txoj Cai tas huv si, thiab nws qhia kom luag ua xws li nws, mas Ntuj yuav saib nws yog tus loj tshaj nyob hauv Ntuj lub Ceeb Tsheej.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2572
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Mim on 12th June 2019, 9:06 am

    [size=18]Tim 13 lub 6 Hli 2019[/size]

    Hnub Tsib Lis Piam Kaum Nruab Xyoo C Nruab Lis Piam Xyoo I

    Hwm LN Anthony nyob Padua

    Zaj Nyeem Ib: 2 KLN 3: 15—4: 1, 3-6


    Cov kwv tij nkauj muam:
    15 Muaj tseeb tias thaum cov His Xas Lais nyeem Mais Xes cov ntawv, mas ib daig ntaub tseem npog rawv lawv lub siab los txog niaj hnub no. 16 Tiam sis thaum ib tug neeg tig los hwm Huab Tais, mas daim ntaub ntawd yuav raug muab tshem mus. 17 Vim tias Huab Tais yog Leej Tswv Yim; yog Huab Tais lub Tswv Yim nyob qhov twg, mas kev twj lij kuj nyob qhov ntawd thiab. 18 Ntawm peb sawv daws, mas peb lub ntsej muag tsis muaj ntaub npog, peb zoo li daim tsom iav uas tsom pom tau Huab Tais lub hwj chim; ces peb plhis ua zoo li daim duab ntawd, uas txais hwj chim tas, txais hwj chim dua ntawm Huab Tais uas yog Leej Tswv Yim.
    4 1 Yog vim Tswv Ntuj lub siab hlub neeg muab txoj kab xwm no rau peb ua, mas peb tsis ntaus siab me.
    3 Yog tias peb lub Moo Zoo muaj zoo li dab tsi npog, mas tsuas yog npog rau cov neeg uas mus taug txoj kev ploj xwb, 4 lawv yog cov neeg tsis ntseeg uas tus tswv ntuj kav tiam neeg no ua kom lawv lub tswv yim tsis pom kev, kom lawv txhob pom txoj kev pom kev uas ci ntawm lub Moo Zoo qhia txog Leej Pleev lub hwj chim tuaj, Leej Pleev uas yog Tswv Ntuj tus duab. 5 Vim tias peb tsis rov tshaj txog peb tus kheej, hos peb tshaj txog Yes Xus Pleev yog Huab Tais. Ntawm peb, peb tsuas ua nej tub txib xwb, vim peb nyiam Yes Xus. 6 Tus Tswv Ntuj uas tau hais tias : ‘Kom qhov pom kev ci hauv qhov tsaus ntuj tuaj,’ nws yog tus ci hauv peb nruab siab tuaj, thiaj yuav ua kom txoj kev paub txog Tswv Ntuj lub hwj chim uas nyob saum Leej Pleev lub ntsej muag ci hob tawm tuaj.

    NPN 85: 9AB+10, 11-12, 13-14

    Txais: (10b) HUAB TAIS lub hwj chim yuav nyob txawm hauv peb lub teb chaws.

    Kuv yuav hnov Tswv Ntuj tshaj tawm txog dab tsi;
    Huab Tais, nws tshaj tawm txog kev thaj yeeb rau nws haiv neeg.
    Nws txoj kev cawm nyob ze ze cov neeg hwm nws lawm,
    nws lub hwj chim yuav nyob txawm hauv peb lub teb chaws.

    Txais: (10b) HUAB TAIS lub hwj chim yuav nyob txawm hauv peb lub teb chaws.

    Kev ua siab zoo thiab kev tseeb yuav los sib ntsib,
    kev ncaj ncees thiab kev thaj yeeb yuav los sib qawg.
    Kev tseeb yuav txhawv tawm hauv ntiaj teb daim av los,
    kev ncaj ncees yuav dauv muag ntsia saum ntuj tuaj

    Txais: (10b) HUAB TAIS lub hwj chim yuav nyob txawm hauv peb lub teb chaws.

    HUAB TAIS yuav pub nws txoj kev nplua nuj,
    ces peb cov av yuav ntsu qoob ntsu loo tuaj.
    Kev ncaj ncees yuav taug kev ua nws ntej,
    kev cawm yuav taug kev raws nws tcov hneev taw.

    Txais: (10b) HUAB TAIS lub hwj chim yuav nyob txawm hauv peb lub teb chaws.

    As Les Lus Yas: JN 13: 34

    Txais: As les lus yas, as les lus yas.

    Kuv muab ib lo lus qhia tshiab rau nej:
    Nej yuav ib leeg hlub ib leeg raws li kuv tau hlub nej.

    Txais: As les lus yas, as les lus yas.

    Ntawv Moo Zoo: MT 5: 20-26

    Yes Xus hais rau nws cov thwj tim tias:
    20 "Kuv hais rau nej tias: Yog nej tsis ua siab ncaj dua cov Kws Ntawv Ntshiab thiab cov Fas Lis Xais, mas nej yuav mus tsis tau hauv Ntuj lub Ceeb Tsheej.
    21 "Nej tau hnov cov lus qhia rau nej cov laus thaud tias : ‘Koj tsis txhob tua neeg. Tus twg tua neeg, nws yuav raug luag txiav txim rau nws.’ 22 Hos kuv mas kuv hais rau nej tias: Leej twg npau taws rau nws tus kwv tij, mas nws yuav raug txiav txim ntawm tsev hais plaub. Yog nws hais rau nws tus kwv tij tias "Niag ruam !" mas nws yuav raug txiav txim ntawm lub rooj txwj laus Xas Nes Nrees. Yog nws hais rau nws tus kwv tij tias : "Niag vwm", mas nws yuav raug txiav txim mus nyob hauv dab phem cov hluav taws. 23 Li ntawd, thaum koj cev ib co txim rau saum lub thaj txi Ntuj, yog koj nco dheev tias koj tus kwv tij tau muaj lus tsis zoo rau koj lawm, 24 mas koj cia li tso koj cov txim rau ntawm lub thaj txi Ntuj, koj mus nrog koj tus kwv tij hais kom haum tso, koj mam rov los cev koj cov txim. 25 Koj kav tsij nrog koj tus yeeb ncuab hais kom haum sai sai, thaum koj tseem nrog nws ua ke taug kev, tsam nws coj koj mus kom rau tus txiav txim, ces tus txiav txim muab koj cob rau tub ceev xwm kom muab koj kaw hauv tsev loj faj. 26 Kuv hais tseeb rau koj tias, koj yuav tawm tsis tau hauv tsev loj faj los, mus txog thaum koj rho nyiaj qab nas txog npib kawg mus them tas rau tso.”



    Sponsored content

    UA KOOB TSHEEJ YES XUS YUG LOS XYOO 2018 - Page 6 Empty Re: UA KOOB TSHEEJ YES XUS YUG LOS XYOO 2018

    Post  Sponsored content


      Current date/time is 23rd October 2019, 2:06 am