Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

ZOS ROOB NYUJ QUS 1956 NTAWV HMOOB THOOB TEB LUB HAUV PAUS.

Gallery


UA KOOB TSHEEJ YES XUS YUG LOS XYOO 2018 - Page 5 Empty

Latest topics

» UA KOOB TSHEEJ YES XUS YUG LOS XYOO 2018
by Mim Yesterday at 11:47 am

» XH. Yaj Zoov Ntxheb lub Tsev THOOB TSIB
by Maiv Tooj Yesterday at 6:33 am

» XH.Zoov Ntxheb Yaj Nthuav Ntawv Ntshiab.
by NrhiavTswvNtuj Yesterday at 6:26 am

» COV ZAJ NYEEM HNUB CHIV 2018-2019 xyoo C
by NrhiavTswvNtuj Yesterday at 5:30 am

» Qhia Ntuj Kev Cai.
by Maiv Tooj 5th August 2019, 12:16 am

» Xov Tooj Cua Zoo Tswv Zov Yaj
by Maiv Tooj 22nd July 2019, 7:39 pm

» Txhob poob siab
by Mim 12th July 2019, 5:24 am

» Hlawv xyab hlawv ntawv rau cov Tuag puas tau ?
by Maiv Tooj 1st July 2019, 5:08 pm

» IB TUG TXIV PLIG NCAIM NTIAJ TEB SAUM HUAB CUA...
by Mim 1st July 2019, 3:20 am

» TP.Txhiaj Foom
by Maiv Tooj 14th June 2019, 6:17 am

» Leej Ntshiab Anthony of Padua
by Maiv Tooj 13th June 2019, 12:59 am

» KEV THOOB TSIB & ZAJ NKAUJ SEEV
by Maiv Tooj 16th May 2019, 10:10 pm

Suav neeg tuaj saib, txij hnub 17/09/2010 los mus.


    UA KOOB TSHEEJ YES XUS YUG LOS XYOO 2018

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 17th April 2019, 4:50 am

    TIM 17 LUB 4 HLIS 2019

    Hnub Plaub hauv Lis Piam Ntshiab Xyoo C Nruab Lis Piam Xyoo I

    Zaj Nyeem Ib: HIS XAIS 50: 4-9A


    4 HUAB TAIS Tswv Ntuj tau muab ib tug nplaig paub ua thwj tim rau kuv, kom kuv txawj hais tej lo lus nplij tus neeg qaug zog. Niaj tag kis nws tsa, nws tsa kuv lub pob ntseg kom tsim dheev, kom kuv txawj mloog xws li ib tug thwj tim. 5 HUAB TAIS Tswv Ntuj qhib kuv pob ntseg, mas kuv tsis yig, kuv tsis tig rov tom qab. 6 Kuv cuab nrob qaum rau cov neeg xav ntaus kuv, kuv tig kuv sab plhu rau cov neeg xav dob kuv hwj txwv; kuv tsis tau ntis ntsej muag kom txhob raug lawv thuam thiab txhob raug lawv nto. 7 HUAB TAIS Tswv Ntuj tuaj pab kuv, ces kuv tsis raug lawv tej lus phem, thiab kuv ua ntsej muag tawv li zeb, kuv paub tias kuv yuav tsis raug kev txaj muag. 8 Tus txiav txim ncaj ncees rau kuv, nws nyob ze kuv, leej twg yuav muaj cuab kav nrog kuv sib hais? Caw kom peb cia li tuaj mus sawv ua ke! Leej twg yog kuv tus yeeb ncuab ? Kom nws kav tsij txav los nyob ze kuv ! 9 Ntsia saib ! HUAB TAIS Tswv Ntuj yog tus tuaj pab kuv ! Leej twg yuav muab txim rau kuv tau ?

    NPN 69: 8-10, 21-22, 31+33-34

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Yog vim koj kuv ua tiag nyiaj luag cov lus cem kuv,
    kuv muab kuv ntsej muag mus tiv kev txaj muag.
    Kuv cov kwv tij tsis saib kuv yog lawv kwv tij ntxiv,
    kuv niam cov tub saib kuv yog ib tug qhua xwb,
    vim kuv muaj lub siab kub lug rau koj lub tsev,
    ces cov neeg thuam koj tej lus phem poob rau saum kuv.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Lawv tej lus phem chob kuv lub siab, ua rau kuv zog tas,
    kuv nrhiav saib puas muaj tus hlub kuv, tiam sis tsis muaj li;
    kuv nrhiav tus yuav nplij kuv, kuv nrhiav tsis tau ib tug li. .
    Lawv muab kua tsib los xyaw kuv cov mov,
    thaum kuv nqhis dej, lawv muab kua qaub rau kuv haus.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Kuv yuav hu nkauj cav txog Tswv Ntuj lub npe,
    kuv yuav ua nws tsaug kom nws tau koob meej:
    Cov neeg me , nej kav tsij ntsia kom nej zoo siab;
    Nej cov uas nrhiav Tswv Ntuj, kom nej lub siab rov muaj sia tuaj!
    Vim Huab Tais mloog cov pluag hu,
    nws tsis ntxub nws cov neeg uas raug txim.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Zaj Cav lub Moo Zoo

    Peb hawm koj, peb tus Vaj,
    koj ib leeg thiaj muaj lub siab zoo zam tau peb cov txhaum rau peb.

    Los:

    Peb hawm koj, peb tus Vaj, koj tau mloog leej Txiv lus;
    luag cab koj mus ntsia saum ntoo cuam
    xws li tus yaj seej seej luag cab mus tua.


    Ntawv Moo Zoo: MT 26: 14-25

    14 Muaj ib tug nyob hauv pab kaum ob, tus hu ua Yus Das Kas Lis Yaus, nws mus cuag cov thawj leej choj, 15 nws hais rau lawv tias : “Nej yuav muab dab tsi rau kuv yog kuv muab nws rau nej ?” Ces lawv them peb caug lub txiaj nyiag rau Yus Das. 16 Txij hnub ntawd los, Yus Das nrhiav ib lub sij hawm zoo yuav cob Yes Xus rau lawv. 17 Thaum txog thawj hnub noj cov ncuav mov tsis rau poov xab, cov thwj tim txav los nug Yes Xus tias : “Koj xav kom peb npaj Pluas Hla rau koj noj nyob qhov twg ?” 18 Yes Xus hais tias : “Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.” 19 Cov thwj tim ua raws li Yes Xus qhia. Ces lawv npaj Pluas Hla. 20 Thaum tsaus ntuj Yes Xus nrog pab Kaum Ob nyob ntawm rooj mov. 21 Thaum lawv tab tom noj mov, Yes Xus hais tias : “Kuv hais tseeb rau nej, nej ib tug yuav muab kuv muag.” 22 Lawv ntxhov siab tas nrho, lawv ib leeg nug nws zuj zus tias : “Huab Tais, puas yog kuv ?” 23 Yes Xus teb tias : “Tus yuav muab kuv muag, yog tus tau nrog kuv cev tes ntsw hauv lub phaj ! 24 Neeg Leej Tub yuav mus raws li Ntawv xub sau tseg txog nws lawm. Tab sis tus muab Neeg Leej Tub muag, nws txoj hmoov phem ! Txhiaj khoov tus ntawd tsis txhob yug los !” 25 Yus Das, tus muab Yes Xus muag, kuj nug tias : “Xib Hwb, puas yog kuv ?” Yes Xus hais rau Yus Das tias : “Yog li koj hais.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 17th April 2019, 7:05 am

    TIM 18 LUB 4 HLIS 2019

    TSIB NTSHIAB Xyoo C – YAV TSAUS NTUJ, NCO TXOG YES XUS NOJ PLUAS HMO KAWG

    Zaj Nyeem Ib: KEV TSIV 12: 1-8, 11-14


    1 HUAB TAIS hais rau Mais Xes thiab As Loos nyob Hais Nkws Tos teb tias: 2 "Lub hlis no yuav yog thawj lub hlis rau nej, nws yuav yog lub ib hlis qhib lub xyoo tshiab rau nej. 3 Neb hais rau ib tsoom pej xeem His Xas Lais tias: ‘Lub hlis no xiab kaum, mas txhua tus txiv neej nyias yuav tsum npaj ib tug tsiaj me rau nyias raws li nyias tsev neeg, ib tug tsiaj me rau ib yim neeg. 4 Yog tsev neeg twg tsawg dhau noj tsis tas ib tug tsiaj, mas nej yuav mus koom nrog lwm tsev neeg uas nyob ze nej dua cov kom muaj neeg coob txaus, ces nej yuav xaiv ib tug tsiaj kom txaus nkaus sawv daws noj tsis seem li. 5 Nej yuav xaiv ib tug tsiaj zoo nkauj tsis muaj chaw xyeej, yog tus txiv muaj hnub nyoog ib xyoos; nej yuav xaiv ib tug thav tshis los tau ib tug thav yaj los tau.
    6 Nej yuav ceev tus tsiaj no cia mus txog lub hlis no hnub xiab kaum plaub; hmo ntawd, tas tsoom His Xas Lais nyias yuav tua nyias tus tsiaj thaum hnub poob qho kiag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas nej noj tus tsiaj ntawd. 8 Hmo ntawd, nej yuav muab cov nqaij txhiab hauv hluav taws noj, nej yuav noj ntxuag ib co ncuav mov tsis xyaw poov xab, thiab ib cov nroj iab.
    11 Nej yuav noj mov zoo li no : Nej sia siv khov kho ntawm duav, nej rau khau tib si, thiab tuav rawv nej rab pas nrig ntawm tes. Nej yuav tsuag tsuag noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb, kuv yuav ntaus cov ua tus hlob nyob hauv Hais Nkws Tos teb tib si kom tuag, tsis hais neeg los tsiaj li, thiab kuv yuav txiav txim rau cov dab Hais Nkws Tos: kuv yog HUAB TAIS.
    13 Cov ntshav yuav yog ib lub cim txuag nej hauv cov tsev uas nej nyob. Kuv pom cov ntshav ntawd, kuv yuav hla dhau plaws mus, ces nej yuav tsis raug qhov xwv txheej loj ntawd, hmo uas kuv ntaus Hais Nkws Tos teb.
    14 Nej yuav cim ntsoov hnub ntawd cia ua ib hnub tshwj xeeb rau nej, nej yuav muab ua ib hnub cav txog HUAB TAIS, yuav yog ib hnub nej ua koob tsheej tiam dhau tiam, yog ib txog cai nej yuav coj mus li.

    NPN 116: 12-13, 15-16BC, 17-18

    Txais: (1 KLN 10:16) Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Kuv yuav muab dab tsi los pauj
    ib puas tsav yam zoo uas HUAB TAIS ua rau kuv ?
    Kuv yuav cev lub ntim cawm neeg,
    kuv yuav hu txog tuav txog HUAB TAIS lub npe.

    Txais: Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    HUAB TAIS saib cov ntseeg txog nws
    txoj kev tuag muaj nqes loj.
    Kuv yog koj tus tub txib, yog koj tus ntxhais txib tus tub;
    Koj tau daws cov hlua khi kuv.

    Txais: Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Kuv yuav cev ib co txim los ua koj tsaug,
    kuv yuav tuav txog HUAB TAIS lub npe.
    Kuv yuav pauj kuv lub yeem rau HUAB TAIS
    nyob ntawm nws haiv neeg xub ntiag,

    Txais: Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Zaj Nyeem Ob: 1 KLN 11: 23-26

    Cov kwv tij nkauj muam:
    23 Cov lus kuv qhia rau nej no, yog cov lus kuv tau txais ntawm Huab Tais los: Hmo Huab Tais Yes Xus raug muag, nws tuav ib lub ncuav mov,
    24 nws ua Ntuj tsaug, nws muab lub ncuav mov ntais, nws hais tias : “Qhov no yog kuv lub cev uas cia rau nej; Nej ua qhov no kom nej nco txog kuv.”
    25 Thaum noj hmo tas, nws kuj ua ib yam li ntawd rau ntim lub ntim cawv, nws hais tias : “Lub ntim cawv no yog kev cog lus tshiab nyob hauv kuv cov ntshav ; nej haus lub ntim no thaum twg, mas nej haus kom nej nco txog kuv.”
    26 Kwv tij, txij no mus, nej noj lub ncuav mov no thaum twg, thiab nej haus cov cawv no thaum twg, mas yog nej tshaj Huab Tais txoj kev tuag, nyem no mus txog hnub Huab Tais rov los.

    Zaj Cav lub Moo Zoo: ZAM 13: 34

    Huab Tais hais tias, kuv muab ib lo lus qhia tshiab rau nej:
    nej yuav sib nyiam sib hlub ib yam li kuv tau nyiam thiab hlub nej.

    Ntawv Moo Zoo: ZAM 13: 1-15

    1 Thaum yuav txog lub Ntees Hla, Yes Xus paub tias txog nws lub caij yuav hla lub ntiaj teb no rov mus cuag Leej Txiv lawm. Nws hlub nws cov neeg uas tseem nyob hauv ntiaj teb no, nws hlub lawv mus txog thaum kawg. 2 Thaum lawv tab tom noj hmo, dab phem twb nkag mus tshoj Yus Das, Xis Moos Kas Lis Yos tus tub lub siab kom muab Yes Xus rau luag ntes lawm. 3 Yes Xus paub tias Leej Txiv tso tas ib puas tsav yam rau hauv nws txhais tes, nws paub tias nws tuaj ntawm Tswv Ntuj tuaj, thiab nws yuav rov mus cuag Tswv Ntuj,
    4 Ces nws sawv ntawm lub rooj mov mus, nws hle tsho, nws muab ib daig ntaub khi rau ntawm nws duav. 5 Nws hliv dej rau hauv ib lub phiab, ces nws pib ntxuav cov thwj tim ko taw. Nws muab daim ntaub khi ntawm duav los so lawv ko taw. 6 Yes Xus los txog ntawm Xis Moos Pob Zeb, Pob Zeb hais rau Yes Xus tias : "Huab Tais, koj yuav ntxuav kuv ko taw lod ?" 7 Yes Xus teb rau Pob Zeb tias : "Qhov uas kuv ua, mas tam sis no koj tsis to taub, tiam sis yav tom ntej koj yuav to taub." 8 Pob Zeb hais rau Yes Xus tias : "Koj txhob ntxuav kuv ko taw, kuv tsis kam ib zaug li." Yes Xus teb rau Pob Zeb tias : "Yog kuv tsis ntxuav koj, mas koj yuav tsis tau nrog kuv ua ke."
    9 Xis Moos Pob Zeb hais rau Yes Xus tias : "Huab Tais, yog li mas tsis yog ntxuav taw xwb, koj ntxuav kuv tes thiab kuv taub hau huv tib si." 10 Yes Xus hais rau Pob Zeb tias : "Tus uas nws da dej lawm mas tsis tas yuav ntxuav ntxiv, vim nws ib ce huv tas tib si lawm. Nej kuj huv lawm thiab, tab sis huv tsis tas txhua leej." 11 Yes Xus yeej paub tus twg yog tus yuav muab nws rau luag. Vim li ntawd nws thiaj hais tias : "Nej huv tsis tas txhua leej."
    12 Thaum Yes Xus ntxuav lawv ko taw tas, nws rov hnav nws lub tsho, nws rov los zaum ntawm rooj mov, nws thiaj hais rau lawv tias : “Nej puas to taub qhov uas kuv ua rau nej ? 13 Nej hu kuv ua : Xib Hwb thiab Huab Tais. Nej hu raug lawm, vim kuv yeej yog tiag. 14 Yog tias kuv uas yog Xib Hwb thiab yog Huab Tais, kuv twb ntxuav nej ko taw, mas nej ib tug kuj yuav tsum rov ntxuav ib tug ko taw thiab. 15 Qhov kuv tau ua yog ib tug piv txwv rau nej, kom nej ua raws li kuv tau ua.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 18th April 2019, 9:53 am

    TIM      19      LUB      4     HLIS      2019

    Hnub Rau Ntshiab Xyoo C - Yes Xus Tuag - Kev Hawm Ntoo Cuam

    COV ZAJ NYEEM


    Tsis muaj thaj txi ntuj. Thaum pib lub Txoos, leej choj los khoov pw khwb rwg ntawm hauv ntej thov ntuj twj ywm ib pliag, nws sawv thiab hais ob peb lo lus thov ntuj tas ces cia li pib cov zaj nyeem mus.

    Zaj Nyeem Ib:       HIS XAIS  52:   13—53: 12

    52 13 Ntsia saib, kuv tus tub txib yuav vam meej, nws yuav raug luag saib siab, thiab yuav raug muab tsa rau qhov siab, ces nws yuav nyob siab kawg. 14 Ib yam li coob leej pom nws, lawv tau ceeb loj, vim nws txawv tas tsis zoo li neeg lawm, thiab nws lub cev hloov tas tsis zoo li neeg lub lawm, 15 ib yam li ntawd, nws kuj yuav ua rau ntau lub kuj cuab ceeb ; cov vaj yuav kaw qhov ncauj tsis hais lus vim nws, vim lawv yuav pom tej yam uas tsis tau muaj leej twg piav rau lawv dua, lawv yuav to taub txog tej yam uas lawv tsis tau hnov dua.
    53 1 Leej twg thiaj ntseeg qhov uas peb tau hnov? Leej twg yog tus Huab Tais qhia nws txhais npab rau? 2 Nws tau loj hlob nyob ntawm HUAB TAIS xub ntiag xws li ib tug ntsuag ntoo, xws li ib tug cag hlav tawm hauv thaj av qhuav los; nws tsis muaj qhov zoo saib los zoo nyiam ua kom peb xav ntsia nws, tsis muaj ib yam peb pom yuav rub kom peb nyiam nws li. 3 Nws raug luag ntxub, raug luag muab tso pov tseg; nws yog ib tug neeg ntsib kev tu siab loj, paub kev txom nyem ntau; yog ib tug neeg uas luag nraim ntsej muag rau nws, nws raug sawv daws thuam, peb tsis muab nws saib rau nqe li.
    4 Tab sis, twb yog nws ris peb tej kev txom nyem, twb yog nws nyiaj peb tej kev mob siab tu siab, los peb tseem xav tias yog nws tau hmoov phem, thiab yog Tswv Ntuj nplua nws, kom nws poob ntsej muag. 5 Tos nws raug luag nkaug, los yog vim peb tej kev ua phem, nws raug luag tsuj, los yog vim peb tej kev ua txhaum. Lub txim uas nws hloov peb chaw ris yog qhov ua kom peb tau kev kaj siab; nws tej nqaij ntuag kho peb kom zoo hlo. 6 Peb sawv daws zoo li ib co yaj poob zoo, peb nyias taug nyias txoj kev, HUAB TAIS muab peb lub txim txhaum huv si nog rau nws ris. 7 Nws raug luag hiam raug luag tsim, tab sis nws tsis qhib ncauj li; Nws ua zoo li tus thav yaj uas luag cab mus rau hauv lub tsev tua tsiaj, zoo li tus nkauj yaj uas luag txiav nws cov plaub, nws nyob twj ywm tsis qhib ncauj li. 8 Luag yuam nws, txiav txim tsis ncaj rau nws, thiab cab nws mus. Leej twg nyob hauv tiam neeg ntawd tau mob siab txog tias luag muab nws txiav tawm hauv tsoom neeg ciaj lub teb chaws mus lawm, vim tias nws ua tus ris kuv haiv neeg txoj kev txhaum? 9 Lawv muab nws zwm av nrog cov neeg phem, nws lub ntxa yog nrog cov neeg nplua nuj, txawm tias nws tsis tau ua ib qho phem, tsis tau hais ib lo lus dag.
    10 Yog HUAB TAIS tau pom zoo cia kev txom nyem tuaj raug nws muab nws tsuam. Yog vim nws muab nws txoj sia los txi Ntuj them txim txhaum, mas nws yuav muaj ib co xeeb leej xeeb ntxwv, thiab yuav ua lub neej nyob ntev dhawv, nws yog tus ua kom muaj raws li HUAB TAIS lub siab xav.
    11 Thaum nws tus plig nyiaj yeej kev sim siab lawm, nws yuav pom txoj kev pom kev thiab nws lub siab yuav puv npo. Vim nws muaj kev paub, kuv tus tub txib, tus siab ncaj, yuav ua kom coob leej ncaj tuaj, vim nws yuav ris lawv cov txhaum. 12 Yog vim li ntawd, kuv thiaj yuav pub kom nws muaj ib feem nyob hauv tsoom ua thawj, nws yuav nrog cov muaj hwv xyeej faib yeeb ncuab lub cuab tam, vim nws tau yeem cia nws raug kev tuag thiab cia luag suav nws nrog cov neeg phem, tiam sis twb yog nws ris coob leej cov txhaum thiab thov ntuj kom muab kev zam txhaum rau cov ua phem.

    NPN 31: 2-6, 12-13, 15-16, 17, 25

    Txais: (Lk 23:46) Txiv, kuv muab kuv tus ntsuj plig tso rau hauv koj txhais tes.

    HUAB TAIS, kuv los nkaum hauv koj,
    thov koj txhob pub kom kuv poob ntsej muag ib zaug li.
    Thov cawm kom kuv dim vim koj ncaj ncees.
    Kuv tso kuv tus ntsuj plig rau hauv koj txhais tes,
    HUAB TAIS, Tswv Ntuj tus pheej xeeb, koj yog tus txhiv kuv.

    Txais: Txiv, kuv muab kuv tus ntsuj plig tso rau hauv koj txhais tes.

    Rau kuv cov yeeb ncuab, kuv yog neeg phem,
    rau cov nyob ze kuv, kuv yog neeg qias,
    kuv cov phooj ywg ceeb laj pom kuv,
    thaum neeg pom kuv ntawm kev, lawv khiav mus deb kuv.
    Kuv zoo li tus neeg tuag uas ploj ntais hauv neeg lub siab mus lawm,
    zoo li ib lub twj taig tawg tas tsis zoo yuav.

    Txais: Txiv, kuv muab kuv tus ntsuj plig tso rau hauv koj txhais tes.

    Tiam sis, Huab Tais, kuv tso siab rau koj;
    Kuv hais tias, “Koj yog kuv tus Tswv Ntuj!
    Kuv lub neej nyob hauv koj txhais tes;
    thov koj cawm kuv ntawm kuv cov yeeb ncuab
    thiab ntawm cov neeg hiam kuv lub xib teg.”

    Txais: Txiv, kuv muab kuv tus ntsuj plig tso rau hauv koj txhais tes.

    Cia koj lub ntsej muag ci tuaj rau saum koj tus tub txib,
    thov cawm kuv vim koj hlub kuv.
    Nej kav tsij ua siab loj, ua siab tawv qhawv
    tas nej cov uas tso siab rau Huab Tais.

    Txais: Txiv, kuv muab kuv tus ntsuj plig tso rau hauv koj txhais tes.

    Zaj Nyeem Ob: HES NPLAWS 4: 14-16; 5: 7-9

    Cov kwv tij,
    4 14 Vim peb muaj ib tug Tuam Leej Choj uas tau hla dhau yim txheej cuaj txheej ntuj los lawm, uas yog Yes Xus, Tswv Ntuj leej Tub, mas peb yuav nyob ruaj nreb hauv peb txoj kev lees ntseeg nws. 15 Peb tsis muaj ib tug Tuam Leej Choj uas yuav tsis txawj hlub peb cov neeg zog me, rau qhov nws tau raug txoj kev sim siab txhij txhua ib yam li peb, tsuas tshuav txoj kev txhaum xwb, nws thiaj tsis raug. 16 Peb kav tsij tso siab lug mus ze ntawm lub theej kiab muaj txiaj ntsim, kom peb tau txais kev khuv leej, thiab txais txiaj ntsim los pab peb thaum peb xav tau kev pab.
    5 7 Thaum Leej pleev tseem ua neej muaj cev nqaij nyob, nws tau tsa suab quaj thov tus muaj peev xwm cawm tau nws ntawm txoj kev tuag; Tswv Ntuj tau mloog nws tej lus thov, vim nws hwm Tswv Ntuj zoo. 8 Txawm tias nws yog tus Tub cag, tsis kav nws yuav tsum tau kawm kev mloog lus nyob hauv txoj kev raug txom nyem.
    9 Thaum nws ua tau txhua yam zoo txhij zoo txhua lawm, nws kuj yog lub hauv paus uas muab kev cawm mus li rau txhua tus mloog nws lus.

    Zaj Cav lub Moo Zoo: FLP 2: 8-9

    Leej Pleev tuaj yeem mloog lus mus txog qhov tuag,
    thiab tseem xaiv txoj kev tuag saum ntoo cuam.
    Vim li ntawd, mas Tswv Ntuj thiaj tsa nws ua tus loj dua cov
    thiab muab lub npe uas nyob siab dua lwm cov npe rau nws.

    Ntawv Moo Zoo:       ZAM  18:   1—19: 42

    Vim zaj Ntawv Moo Zoo no ntev heev, mas yuav muab cais ua plaub tug neeg sib pab nyeem: ib tug ua tus piav (TP), ib tug ua Pis Las Tos los lwm tus neeg hais lus (ITN, ib tug neeg), ib tug ua Yes Xus hais lus (YX), thiab sawv daws (SD) nyeem thaum yog cov Yus das coob coob hais lus.

    TP: 18 1 Yes Xus hais li ntawd tas, ces nws nrog nws cov thwj tim hla tus Kes Nroos mus rau sab tim ub. Muaj ib lub vaj nyob ntawd. Yes Xus thiab nws cov thwj tim mus hauv lub vaj. 2 Yus Das, tus uas muab Yes Xus rau luag, kuj paub qhov chaw ntawd thiab, vim Yes Xus thiab cov thwj tim sib sau ntau zaus nyob ntawd. 3 Yus Das coj ib pab peeb zeej thiab ib co zov keeb tuaj, uas yog cov thawj leej choj thiab cov Fas Lis Xais muab rau nws. Lawv taws teeb, taws tsau thiab nqa ntaj nqa riam tuaj. 4 Yes Xus paub ib puas tsav yam uas yuav tshwm sim tuaj raug nws, ces nws tawm los hais rau lawv tias :
    YX: "Nej nrhiav leej twg ?"
    TP: 5 Lawv teb rau nws tias :
    SD: " Yes Xus Nas Xas Les."
    TP: Yes Xus hais rau lawv tias :
    YX: "Yog kuv."
    TP: Yus Das, tus muab Yes Xus rau luag nrog lawv sawv ua ke.
    6 Thaum Yes Xus hais rau lawv tias : "Yog kuv", mas lawv thaub qab thiab lawv ntog tas rau hauv av. 7 Yes Xus rov nug lawv dua tias :
    YX: "Nej nrhiav leej twg ?"
    TP: Lawv hais tias :
    SD: "Yes Xus Nas Xas Les."
    TP: 8 Yes Xus teb tias :
    YX: "Kuv twb hais rau nej tias yog kuv. Yog nej nrhiav kuv, mas nej tso cov no mus."
    TP: 9 Qhov no tshwm sim raws li lo lus uas nws xub hais tseg tias : "Cov uas koj muab rau kuv, mas kuv tsis ua ib tug ploj li." 10 Xis Moos Pob Zeb muaj ib rab ntaj. Nws rho hlo nws rab ntaj tib ntag rau tus thawj leej choj tus qhev, txiav raug nws sab pob ntseg xis tu nrho. Tus qhev no hu ua Mas Kws. 11 Yes Xus hais rau Pob Zeb tias :
    YX: "Koj ntxig ntaj rau hauv hnab. Lub ntim uas Leej Txiv muab rau kuv, kuv puas yuav tsis haus ?"
    TP: 12 Ces pab peeb zeej nrog tus lwm txheeb, thiab cov zov keeb Yus Das ntes Yes Xus. Lawv muab nws khi.
    13 Lawv xub coj nws mus tim As Nas tsev. As Nas yog Kais Fas yawm txiv. Xyoo ntawd yog Kais Fas ua tuam leej choj. 14 Kais Fas yog tus tau tawm tswv yim rau cov Yus Das hais tias : "Cia ib tug neeg xwb tuag pauv tsoom pej xeem mas zoo dua." 15 Xis Moos Pob Zeb thiab lwm tus thwj tim raws Yes Xus qab. Tus thwj tim ntawd yog tus tuam leej choj ib tug swm neeg, ces nws tau nrog Yes Xus chaws mus hauv tus tuam leej choj lub tshav loog. 16 Hos Pob Zeb nyob sab nraud, nws sawv ze ntawm qhov rooj. Lwm tus thwj tim uas yog tus tuam leej choj ib tug swm neeg tawm los, nws hais lus rau tus ntxhais txib zov qhov rooj, ces nws kom Pob Zeb chaws mus hauv. 17 Tus ntxhais txib zov qhov rooj hais rau Pob Zeb tias :
    ITN: "Koj tsis yog tus neeg ntawd ib tug thwj tim thiab lod ?"
    TP: Pob Zeb hais tias :
    ITN: "Kuv tsis yog."
    TP: 18 Cov tub qhev thiab cov zov keeb rauv ib cub taws thee, vim lub caij ntawd no no; lawv nyob ntawd nte taws.
    Pob Zeb kuj nrog lawv nyob ntawd nte taws thiab. 19 Tus tuam leej choj nug Yes Xus txog nws cov thwj tim thiab nws cov lus qhia. 20 Yes Xus teb rau tus tuam leej choj tias :
    YX: "Kuv tab meeg hais lus rau lub qab ntuj neeg kom sawv daws hnov. Kuv niaj hnub qhuab qhia nyob hauv cov tsev txoos thiab hauv lub Tuam Tsev Teev Ntuj uas tas tsoom Yus Das tuaj sib txoos. Kuv tsis tau nyiag hais ib yam dab tsi. 21 Tim li cas koj nug kuv ? Koj nug cov uas tau hnov kuv tej lus qhuab qhia lawv; cov ntawd paub tias kuv tau hais dab tsi."
    TP: 22 Thaum Yes Xus hais li ntawd, mas cov zov keeb uas sawv ntsug nyob ntawd, muaj ib tug ib tawg ncuav rau Yes Xus, nws hais rau Yes Xus tias :
    ITN: "Koj teb li ntawd rau tus tuam leej choj lod ?"
    TP: 23 Yes Xus teb rau tus zov keeb tias :
    YX: "Yog kuv hais lus phem, koj ua pov thawj qhia saib qhov twg phem. Hos yog kuv hais raug lawm, vim li cas koj thiaj ntaus kuv ?”
    TP: 24 As Nas xa Yes Xus mus rau tuam leej choj Kais Fas, Yes Xus tseem nyob khi rawv li qub.
    25 Xis Moos Pob Zeb nyob ntawd nte taws. Lawv hais rau nws tias :
    SD: "Koj tsis yog nws ib tug thwj tim lod ?"
    TP: Pob Zeb tsis lees, nws hais tias :
    ITN: “Kuv tsis yog.”
    TP: 26 Tus tuam leej choj ib tug qhev, yog ib tug txheeb ze tus qhev uas raug Pob Zeb txiav ib sab pob ntseg, nws hais tias :
    ITN: "Kuv twb pom koj nrog nws nyob hauv lub vaj los tsis sub ?"
    TP: 27 Pob Zeb rov qab tsis lees, ces tam sis ntawd ib tug qaib qua. 28 Lawv coj Yes Xus tim Kais Fas tsev mus rau hauv lub tsev txiav txim. Thaum ntawd kaj ntug lawm. Tab sis cov Yus Das tsis
    mus hauv lub tsev txiav txim, kom lawv txhob tsuas yam tsis huv, lawv thiaj yuav noj tau pluas Hla. 29 Pis Las Tos thiaj li tawm tuaj cuag lawv, nws hais tias :
    ITN: "Nej muaj lus dab tsi tuaj kom rau tus neeg ntawd ?"
    TP: 30 Lawv teb rau Pis Las Tos hais tias :
    SD: "Yog tus neeg no txhob yog neeg phem, mas peb yuav tsis coj nws tuaj rau koj."
    TP: 31 Pis Las Tos hais rau lawv tias :
    ITN: "Nej coj nws mus, nej txiav txim rau nws raws li nej txoj cai."
    TP: Cov Yus Das hais rau Pis Las Tos tias :
    SD: "Txoj cai tsis pub peb muab ib tug neeg tua."
    TP: 32 Qhov no tshwm sim raws li lo lus Yes Xus tau xub hais qhia tias nws yuav tsum tuag zoo li cas. 33 Ces Pis Las Tos thiaj rov chaws mus hauv lub tsev txiav txim, nws hu Yes Xus los, nws hais tias :
    ITN: "Koj puas yog cov Yus Das tus vaj ?"
    TP: 34 Yes Xus teb tias :
    YX: "Puas yog koj hais koj, los yog luag tej hais txog kuv li ntawd rau koj ?"
    TP: 35 Pis Las Tos teb tias :
    ITN: "Kuv puas yog ib tug Yus Das ? Koj haiv neeg thiab cov thawj leej choj coj koj tuaj rau kuv. Koj tau ua dab tsi?"
    TP: 36 Yes Xus teb tias :
    YX: "Kuv lub Ceeb Tsheej tsis nyob hauv lub qab ntuj no. Yog kuv lub Ceeb Tsheej nyob hauv lub qab ntuj no, mas kuv cov neeg yuav sawv ntaus rog thaiv kom kuv txhob poob rau hauv cov Yus Das txhais tes. Tab sis, kuv lub Ceeb Tsheej tsis nyob hauv lub qab ntuj no."
    TP: 37 Pis Las Tos hais rau Yes Xus tias :
    ITN: "Ua li koj yog vaj lod ?"
    TP: Yes Xus teb hais tias :
    YX: "Yog li koj hais, kuv yog vaj. Kuv yug los, thiab kuv tuaj nyob hauv lub qab ntuj no tsuas yog tuaj ua tim khawv txog qhov tseeb xwb. Leej twg yog txoj kev tseeb tug, mas nws mloog kuv lub suab."
    TP: 8 Pis Las Tos hais rau Yes Xus tias :
    ITN: "Qhov tseeb yog dab tsi ?"
    TP: Thaum Pis Las Tos hais li no tas, nws tawm plaws rov mus cuag cov Yus Das, nws hais rau lawv tias :
    ITN: "Kuv tsis pom ib yam tsim nyog raug txim nyob hauv tus neeg ntawd. 39 Tab sis raws li nej kev cai, mas txog lub Ntees Hla kuv tso ib tug neeg mus. Nej puas xav kom kuv tso cov Yus Das tus vaj ?"
    TP: 40 Lawv rov qab qw nrov nrov tias :
    SD: "Txhob tso nws, tso Npas Las Npas!"
    TP: Npas Las Npas yog ib tug tub sab.
    19 1 Ces Pis Las Tos coj Yes Xus mus, nws kom lawv nplawm Yes Xus. 2 Cov tub rog xuas ib co pos ntxias ua ib lub kauj, lawv muab tso saum Yes Xus taub hau. Lawv muab ib lub tsho ntev liab tshiab rau Yes Xus hnav. 3 Lawv txav los ze nws, lawv hais tias :
    SD: "Nyob kaj lug, cov Yus Das tus vaj,"
    TP: ces lawv ntaus nws tej niag teg.
    4 Pis Las Tos rov tawm mus nraum zoov, nws hais rau lawv tias :
    ITN: "Nej saib, kuv coj tus neeg no tawm los rau nej, kom nej paub tias kuv tsis pom ib yam tsim nyog raug txim nyob hauv nws."
    TP: 5 Yes Xus tawm los sab nraud, nws ntoo lub kauj pos thiab hnav ib lub tsho ntev liab tshiab, ces Pis Las Tos
    hais rau lawv tias :
    ITN: "Nej ntsia tus neeg no."
    TP: 6 Thaum cov thawj leej choj thiab cov zov keeb pom Yes Xus, lawv
    nthe nthe hais tias :
    SD: "Muab dai saum ntoo cuam ! Muab dai saum ntoo cuam !"
    TP: Pis Las Tos hais rau lawv tias :
    ITN: "Nej coj nws mus, nej muab nws dai saum ntoo cuam. Vim tias kuv tsis pom ib yam tsim nyog raug txim nyob hauv nws."
    TP: 7 Cov Yus Das teb rau Pis Las Tos tias :
    SD: "Peb muaj ib Txoj Cai, raws li Txoj Cai ntawd, mas nws yuav tsum tuag, vim nws tsa nws ua Tswv Ntuj Leej Tub."
    TP: 8 Thaum Pis Las Tos hnov lo lus ntawd, mas nws haj yam ntshai. 9 Ces nws rov chaws mus hauv lub tsev txiav txim. Nws hais rau Yes Xus tias :
    ITN: "Koj nyob qhov twg tuaj ?"
    TP: Tab sis Yes Xus tsis teb ib lo lus rau nws li. 10 Pis Las Tos thiaj hais rau Yes Xus tias :
    ITN: "Koj tsis hais lus rau kuv. Koj puas paub hais tias kuv muaj hwj huam tso tau koj mus, thiab muaj hwj huam muab koj dai saum ntoo cuam ?"
    TP: 11 Yes Xus teb hais tias :
    YX: "Yog koj tsis tau txais hwj huam saum ntuj los, mas koj yuav ua tsis tau dab tsi rau kuv li. Vim li ntawd, tus muab kuv rau koj, nws muaj ib qho txhaum loj dua."
    TP: 12 Txij ntawd los, Pis Las Tos nrhiav kev tso Yes Xus. Tab sis cov Yus Das nthe nrov nrov hais tias :
    SD: "Yog koj tso tus neeg ntawd mus, mas koj tsis yog Xes Ntxas phooj ywg. Leej twg tsa nws ua vaj, mas nws sawv tiv Xes Ntxas."
    TP: 13 Thaum Pis Las Tos hnov cov lus no, nws kom lawv coj Yes Xus tawm los. Ces Pis Las Tos mus zaum saum lub theej kiab txiav txim, ntawm qhov chaw hu ua Tshav Txiag Zeb, lus Hes Nplaws hais tias Nkas Npas Thas.
    14 Hnub ntawd, yog hnub npaj ua lub Ntees Hla. Thaum ntawd kwv yees ze kaum ob teev tav su. Pis Las Tos hais rau cov Yus Das tias :
    ITN: "Nej ntsia nej tus vaj."
    TP: 15 Cov Yus Das nthe nrov nrov tias :
    SD: "Muab nws tua ! Muab nws tua ! Muab dai saum ntoo cuam !"
    TP: Pis Las Tos hais rau lawv tias :
    ITN: "Kuv yuav muab nej tus vaj dai saum ntoo cuam lod ?"
    TP: Cov thawj leej choj teb hais tias :
    SD: "Peb tsuas muaj Xes Ntxas ua peb tus vaj xwb."
    TP: 16 Ces Pis Las Tos muab Yes Xus rau lawv, kom lawv coj nws mus dai saum ntoo cuam. Lawv thiaj li coj Yes Xus mus. 17 Yes Xus kwv nws tus ntoo cuam, nws mus txog qhov chaw hu ua "Khauj Khaum Taub Hau", uas lus Hes Nplaws hu ua "Nkos Nkos Thas." 18 Lawv muab nws dai rau saum ntoo cuam nyob ntawd. Lawv kuj muab ob tug neeg dai saum ntoo cuam thiab, ib tug nyob ib sab, Yes Xus nyob nruab nrab. 19 Pis Las Tos sau ib co ntawv rau saum ib daim txiag ; nws kom muab tso rau saum tus ntoo cuam. Cov npe ntawv sau hais tias : “Yes Xus Nas Xas Les, cov Yus Das tus vaj.” 20 Coob leej Yus Das nyeem cov lus saum daim txiag, vim qhov chaw uas lawv muab Yes Xus dai saum ntoo cuam nyob ze lub nroog, thiab lawv sau ua lus Hes Nplaws, lus Las Tis Nas, thiab lus Hes Las. 21 Cov thawj leej choj Yus Das hais rau Pis Las Tos tias :
    SD: "Koj tsis txhob sau tias : Cov Yus Das tus vaj, yuav tsum sau tias "Tus ntawd hais tias : Kuv yog cov Yus Das tus vaj."
    TP: 22 Pis Las Tos teb hais tias :
    ITN: "Qhov kuv sau, mas twb sau tas lawm."
    TP: 23 Thaum cov tub rog muab Yes Xus dai saum ntoo cuam tas, lawv muab Yes Xus cov ris tsho faib ua plaub tsw, ib tsw rau ib tug tub rog. Lawv muab lub tsho ntev faib, tab sis lub tsho ntev tsis
    muaj leej leeg, yog tsho ntos ua ib daig xwb mus rau nram taw. 24 Cov tub rog sib tham tias :
    SD: "Peb txhob muab lub tsho ntev dua, peb twv saib leej twg yuav tau lub tsho ntawd."
    TP: Ua li mas tshwm sim raws li Ntawv sau cia tias : “Lawv sib faib kuv cov khaub ncaws, lawv twv saib leej twg yuav tau kuv cev tsho.” Cov tub rog tau ua li ntawd. 25 Yes Xus niam thiab nws niam tus niam hluas, Mab Liab uas yog Dlos Pas poj niam, thiab Mab Liab Mas Ntas Las, lawv sawv ze ntawm tus ntoo cuam. 26 Yes Xus pom nws niam, thiab pom tus thwj tim uas nws nyiam sawv ze nws niam, ces nws hais rau nws niam tias :
    YX: "Niad, tus ntawd yog koj tus tub."
    TP: 27 Thiab Yes Xus hais rau tus thwj tim tias :
    YX: "Tus ntawd yog koj niam."
    TP: Txij lub sij hawm ntawd los, tus thwj tim coj Mab Liab mus nyob hauv nws tsev. 28 Ua li ntawd tas, Yes Xus paub tias zaum no ib puas tsav yam tiav tas lawm, kom xwv muaj tshwm sim raws nraim li ntawv sau tswg, nws hais tias :
    YX: "Kuv nqhis dej",
    TP: 29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub chob rau ib tug ntsis pas nroj his xos cev mus rau Yes Xus qhov ncauj. 30 Thaum Yes Xus haus qhov kua qaub tas, nws hais tias :
    YX: "Ib puas tsav yam tiav tas lawm."
    TP: Ces Yes Xus nyo taub hau, nws tso nws tus ntsuj plig tawm mus.

    Lub caij no sawv daws nyob ntsiag to txhos caug hawm Yes Xus lub caij uas nws txoj sia tu.

    TP: 31 Hnub ntawd yog Hnub Npaj, mas cov Yus Das tsis xav cia cov tuag lub cev dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub nyoog loj, ces cov Yus Das thiaj thov Pis Las Tos kom muab cov neeg dai saum ntoo cuam ob sab ceg lov thiab muab lawv lub cev txo nqes los.
    32 Cov tub rog thiaj tuaj muab thawj tug uas nrog Yes Xus dai saum ntoo cuam ob sab ceg lov, thiab muab lwm tus ob sab ceg lov.
    33 Thaum lawv los txog ntawm Yes Xus, lawv pom nws twb tuag
    lawm, lawv tsis muab nws ob sab ceg lov,
    34 tab sis ib tug tub rog xuas nws rab hmuv nkaug Yes Xus phab tav,
    tam sis ntawd ib co ntshav thiab ib co dej tawm plaws los.
    35 Tus uas tau pom qhov ntawd ua pov thawj hais. Nws cov lus pov thawj muaj tseeb, nws paub tias qhov nws hais muaj tiag, nws hais kom nej ntseeg.
    36 Tej xwm no tshwm sim kom muaj raws li Ntawv sau cia tias : ‘Nws cov pob txha tsis lov ib tug li.’ 37 Tseem muaj lwm lo lus hauv Ntawv hais tias : ‘Lawv yuav saib tus uas lawv nkaug.’
    38 Thaum tej xwm ntawd tshwm tuaj tas, Yos Xes nyob As Lis Mas Tias, uas yog Yes Xus ib tug thwj tim tiam sis nws tsis tsis pub luag tej paub vim nws ntshai cov Yus Das, nws tuaj thov Pis Las Tos kom kheev nws mus txo Yes Xus lub cev los. Pis Las Tos tso lus. Ces nws mus txo Yes Xus lub cev. 39 Nis Kos Des Mos kuj tuaj thiab, yog tus uas thaum chiv thawj, nws tuaj cuag Yes Xus hmo ntuj, nws nqa ib cov tshuaj qhwv tuag tuaj : yog txab txiv yoov xyaw txab xyab phij, kwv yees hnyav li ib puas choj. 40 Lawv txo Yes Xus lub cev los, lawv xuas tej pluaj hlab ntaub pleev tshuaj tsw qab los qhwv nws lub cev,raws li cov Yus Das kev cai tu zam.
    41 Nyob ntawm thaj chaw uas luag muab Yes Xus dai saum ntoo cuam, muaj ib lub vaj. Nyob hauv lub vaj ntawd muaj ib lub ntxa tshiab uas tseem tsis tau tso ib tug tuag rau hauv li. 42 Vim tias hnub ntawd yog cov Yus Das Hnub Npaj, thiab lub ntxa ntawd nyob ze, ces lawv muab Yes Xus zwm rau hauv lub ntxa ntawd.

    KEV THOV NTUJ

    Thaum nyeeem Ntawv Moo Zoo tas lawm, muaj kev thov ntuj rau ntau yam:

    1. Thov ntuj rau lub Koom Txoos.
    2. Thov ntuj rau Vaj Qhia.
    3. Thov ntuj rau cov Tswv QHia, cov leej choj, cov leej tsob hwb, leej tij leej phauj thiab ta sib tsoom ntseeg.
    4. Thov ntuj rau cov neeg kawm npaj txais lub Cim Ntxuav, yuav los ua neeg ntseeg tshiab thaum Hmo Hla.
    5. Thov ntuj rau ib tsoom neeg ntseeg Yes Xus kom rov los muaj kev sib haum.
    6. Thov ntuj rau haiv neeg His Xas Lais kom lawv los ntseeg Yes Xus.
    7. Thov ntuj rau cov neeg uas tsis kam ntseeg Yes Xus.
    8. Thov ntuj rau cov neeg uas tsis kam ntseeg Tswv Ntuj.
    9. Thov ntuj rau cov ua nom ua tswv kabv teb kav chaw.
    10. Thov ntuj rau tas ib tsoom neeg uas ntsib ntau yam kev nyuaj, xws li cov muaj mob muaj nkeeg,
    cov tab tom tas sim neej, cov neeg taug kev yuav mus hauj lwm los lwm yam kom txhob ntsib
    teeb meem, cov raug quab yuam tsis muaj kev twj lij, thiab rau lub ntiaj teb kom puas tsav yam
    kev phem, kev cuav, kev tshaib kev nqhis, kev mob kev nkeeg yaj mus ploj mus kom tas.

    KEV HAWM NTOO CUAM

    Ua cov kab ke hawm ntoo cuam: Leej choj mus coj tus ntoo cuam los txawb rau ntawm hauv ntej ntawm lub thaj txi ntuj, ces sawv daws los mus hawm tus ntoo cuam.

    Cov Kab Ke Coj tus Ntoo Cuam los

    Muaj  ob yam ua:

    Yam ib:  Tus tsob hwb los tus xib hwb nqa tus Ntoo Cuam uas muab npog tas, hauv chav TP hnav ris tsho los txog ntawm ib nrab ke yuav mus lawm pem lub thaj txi ntuj, nws sawv tos. TP los sawv pem hauv ntej lub thaj txi ntuj, nws tig mus rau tsoom ntseeg. Ces tus tsob hwb los xib hwb mam nqa tus Ntoo Cuam mus rau TP.  TP txais tus Ntoo Cuam ntawm tes. Nws pib thws tus Ntoo Cuam ces saum taub hau, ces nws tsa tus Ntoo Cuam kom siab rau sawv daws saib, thiab nws hu zaj nkauj tias:

    “Nej ntsia tus Ntoo Cuam uas tus cawm ntiaj teb neeg nyob dai ncuv saud.”

    SD cuab suab teb tias:
    “Nej tuaj, peb pe hawm nws.”

    Thiab sd txhos caug ntsiag to hawm tus Ntoo Cuam ib plig.
    TP rov thws tus Ntoo Cuam ces npab xis,  rov muab tsa siab rau sawv daws saib, thiab rov hu zaj nkauj dua
    Ces sd rov teb thiab rov txhos caug hawm dua. Zaum peb, TP thws tas nrho tus Ntoo Cuam, muab tsa rau sd saib, thiab rov hu zaj nkauj, ces sd teb dua thiab rov txhos caug hawm dua.


    Yam ob: TP los tus tsob hwb sawv nyob sab hauv ntawm lub qhov rooj nkag mus hauv tsev teev ntuj, nws tuav tus Ntoo Cuam uas muab npog tas. Nws tshais ob peb ruam ces nws pib thws tus Ntoo Cuam ces saum taub hau thiab muab tsa kom siab rau sd saib, nws hu zaj nkauj: “Nej ntsia  tus Ntoo Cuam…,” sawv daws teb lo tias: “Nej tuaj, peb…” thiab sd txhos caug hawm. TP los tsob hwb los txog ntawm ib nrab tsev teev ntuj, nws rov thws tus Ntoo Cuam sab tes xis, muab tsa kom siab thiab rov hu zaj nkauj dua, sd kuj teb thiab txhos caug hawm dua. TP los XH los txog ntawm hauv ntej ze lub thaj txi ntuj, nws thws tus Ntoo Cuam tas nrho, muab tsa siab thiab rov hu zaj nkauj dua, cov neeg kuj rov teb thiab txhos caug hawm dua.

    Cov Kab Ke Hawm Ntoo Cuam

    TP los tsob hwb muab tus Ntoo Cuam mus tso rau ntawm ib lub rooj, ntawm hauv ntej lub thaj txi ntuj ntawd, ces sd tus hlob tus yau taug kev los mus hawm tus Ntoo Cuam.  Nyias hawm tus Ntoo Cuam raws li nyias nyiam, ib txhia kuj nwj tus Ntoo Cuam, ib txhia kuj cia li nyo hau ib nyuag txhos caug hawm xwb, nyob ntawm nyias.

    Thaum sd los mus li ntawd mas sd kuj hu tej zaj nkauj kom haum rau lub sij hawm ntawd thiab. Thaum sd mus hawm Ntoo Cuam tas lawm, yuav pib ua kev mus txais lub Cim Yug. Hnub Rau Ntshiab thiab Hnub Xya Ntshiab mas kev cai tsis muaj ua mis xas los ua thaj Txi ntuj li.

    KEV TXAIS LUB CIM YUG

    Tus Tsob Hwb los puas tus TP mus nqa lub ntim rau lub Cim Yug ntawm qhov chaw uas Hnub Tsib Ntshiab tus TP coj mus tso rau lawm, muaj ob tug nqa tswm ciab nrog nws taug kev los. SD sawv ntsug ntsiag to tos. Ob tug nqa tswm ciab coj ob tug tswm ciab must so rau saum lub thaj txi Ntuj.  

    Ces TP coj sawv daws hais zaj “Peb Txiv nyob saum ntuj…” thiab cov zaj ua ntej yuav txais lub Cim Yug.  Thaum sawv daws mus txais lub Cim Yug, yuav hu ib zaj nkauj los tau.

    Thaum xaus,  leej choj hais ib zaj thov ntuj rau saum sd, ces tas li ntawd.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 19th April 2019, 1:01 pm

    TIM      20      LUB      4      HLIS      2019

    Hnub Xya Ntshiab Xyoo C - Thaj Txi Ntuj Thaum tsaus Ntuj Hmo Hla


    Hmo Hla yog ib hmos tseem ceeb, lub Koom Txoos Kas Tos Liv txoj kev teev hawm yuav siv sij hawm ntev hauj sim. Kuv yuav piav raws li peb ua nyob rau As Mes Lis Kas teb, tsis paub tias nej cov nyob lwm lub teb chaws puas ua li ntawd. Lub txoos hmo no muab faib ua 4 ntu raws li nram no:

    NTU IB:

    A)  Rauv lub Cub Tawg Tshiab thiab Taws tus Tswm Ciab Hla:

    Lub tsev teev ntuj nyob tsaus ntuj nti.
    Cov ntseeg tuaj txog, lawv nyias yuav tsum mus muab nyias ib tug tswm ciab me nqa ntawm tes.
    TP thiab cov ntseeg sawv nyob sab nraum zoov los puas nyob sab hauv ntawm lub qhov rooj loj nkag mus hauv tsev teev ntuj.
    TP los tus tsob hwb los xib hwb taws ib lub cub tawg.
    TP thov ntuj foom hmoov zoo rau lub cub tawg.
    TP npaj tus Tswm Ciab Hla. Thaum npaj tau lawm,
    TP muab hluav taws hauv lub cub tawg tshiab los taws tus Tswm Ciab Hla, ces nws hais ib co lus tias:


    “Thov kom Leej Pleev qhov pom kev lub hwj chim ci tawm los tshem qhov tsaus ntuj uas nyob hauv peb lub siab thiab lub tswv yim.”

    Tus xib hwb muab ib co ncaig hauv lub cub tawg los tso rau hauv lub txws hlawv xyab.
    TP hais cov hmoov xyab los tso rau hauv lub txws ntawd kom hlawv ncho pa.
    Tus tsob hwb los xib hwb nqa tus Tswm Ciab Hla, nws pib mus ua ntej.
    Ib tug tuav lub ntim rau cov hmoov xyab lawv nws qab.
    TP thiab cov tub pab ua Thaj Txi Ntuj lawv nkawd qab.
    Ces tas sawv daws pib yuav taug kev mus lawm pem lub Thaj Txi Ntuj.

    Thaun nyob ntawm lub qhov rooj, tus tsob hwb uas nqa tus Tswm Ciab Hla, tsa tus tswm cia kom siab, thuiab bnws cuab hu nkauj tias:
    “Leej Pleev qhov pom kev.”  
    SD hu nkauj teb tias: “Peb ua Ntuj tsaug.”

    Ces TP mus taws nws tus tswm ciab ntawm tes, ntawm tus Tswm Ciab Hla.
    SD rov qab taug kev mus txog ntawm nruab nrab lub tsev teev ntuj, tus tsob hwb rov qab tsa tus Tswm Ciab Hla kom siab, thiuab rov cuab siab dua tias:
    “Leej Pleev qhov pom kev.”
    SD rov teb tias: “Peb ua Ntuj tsaug.”

    Thaum ntawd SD nyias taws nyias tus tswm xiab ntawm tes: Muaj ib tug xub mus taws nws tus tswm ciab ntawm tus Tswm Ciab Hla ces nws mam muab coj los taws rau lwm tus, ces SD mam sib faib taws mus.

    Thaum tus tsob hwb nqa tus Tswm Ciab Hla coj SD los txog ntawm hauv ntej ntawm lub Thaj Txi Ntuj lawm, nws tig rov los rau tsoom ntseeg, nws rov tsa tus Tswm Ciab Hla kom siab zaum peb, thiab rov cuab suab tias:
     “Leej Pleev qhov pom kev.”  
    SD rov teb tias: “Peb ua Ntuj tsaug.”

    Ces tus tsob hwb coj tus Tswm Ciab Hla mus txawb rau ntawm tus ncej txawb tswm ciab. Ces thaum ntawd mam  mus taws cov teeb hauv tsev teev ntuj, tiam sis tsis tau taws cov tswm ciab saum lub Thaj Txi Ntuj.

    B)  Zaj Nkauj Cav Txog lub Caij Hla (Exsultet)

    Zaj nkauj no yog tus tsob hwb yuav los hu; yog tsis muaj tsob hwb ces TP los hu. Tiam sis ntau zaus, kuj cia rau ib tug neeg hu nkauj hauv tsev teev ntuj los hu xwb thiab. Yog ib zaj nkauj ntev hauj sim. Sawv daws sawv ntsug mloog nyias tuav nyias tus tswm ciab tseem cig cig.

    Thaum hu zaj nkauj tas lawm, sawv daws zaum thiab tua nyias tus tswm ciab.


    NTU OB:  COV ZAJ NYEEM

    Cov zaj nyeem nram no muaj ntau zaj, tiam sis yog tus TP tsis xav kom nyeem txhua txhua zaj, ces nws muaj cai xaiv saib yuav nyeem zaj twg xwb. Tiam  sis tus kev cai qhia hais tias yuav tsum nyeem tsawg kawg twb yog 3 zaj nyeem nyob hauv cov ntawv Cog Qub Lus; Zaj Nyeem Peb nram no uas yog Kev Tsiv 14: 15-15:1 mas yuav tsum nyeem nrog rau zaj nkauj paj nruag.

    Zaj Nyeem Ib:       HAUV PAUS  1:   1—2:2

    1 1 Thaum chiv lub keeb, Tswv Ntuj tsim lub ntuj thiab lub ntiaj teb, 2 mas lub ntiaj teb tseem tsis tau tsheej ntiaj teb thiab tsis muaj dab tsi nyob hauv li. Qhov tsaus ntuj nti npog lub qhov ntuj dub nciab. Tswv Ntuj nthwv cua kiv nplawm ntws saum cov nplaim dej. 3 Tswv Ntuj hais tias : "Kom muaj qhov pom kev." Ces txawm muaj qhov pom kev tuaj. 4 Tswv Ntuj pom tias qhov pom kev ntawd zoo. Tswv Ntuj cais qhov pom kev ntawm qhov tsaus ntuj. 5 Tswv Ntuj hu qhov pom kev ua "nruab hnub" thiab hu qhov tsaus ntuj ua "hmo ntuj." Txawm muaj tsaus ntuj thiab muaj kaj ntug : yog thawj hnub.
    6 Tswv Ntuj hais tias : "Kom muaj ib lub ntuj ntsuab nyob hauv nruab nrab cov dej thiab kom nws quas cov dej ntawm cov dej". Ces txawm muaj li ntawd tuaj. 7 Tswv Ntuj ua lub ntuj ntsuab los quas cov dej nyob hauv qab ntuj ntsuab ntawm cov dej nyob saum qaum ntuj ntsuab. 8 Tswv Ntuj hu lub ntuj ntsuab ua "ntuj." Txawm muaj tsaus ntuj thiab muaj kaj ntug : yog hnub ob.
    9 Tswv Ntuj hais tias : "Kom cov dej uas nyob hauv qab lub ntuj ntsuab sib sau los ua ib pawg xwb, thiab kom av qhuav tshwm los." Ces txawm muaj li ntawd tuaj. 10 Tswv Ntuj hu cov av qhuav ua "ntiaj teb" thiab hu cov dej ua "hiav txwv." Tswv Ntuj pom tias qhov ntawd zoo. 11 Tswv Ntuj hais tias : "Kom lub ntiaj teb tuaj nroj tsuag ntsuab xiab : kom muaj nroj tsuag txawj muaj noob, thiab kom muaj ntoo txi txiv nyias txi nyias hom txiv, nyias muaj nyias hom noob." Ces txawm muaj li ntawd tuaj. 12 Ntiaj teb tuaj nroj tsuag ntsuab xiab : tej nroj tsuag nyias txawj txi nyias hom noob thiab tej ntoo nyias txawj txi nyias hom txiv, nyias muaj nyias hom noob. Tswv Ntuj pom hais tias qhov ntawd zoo. 13 Txawm muaj tsaus ntuj thiab muaj kaj ntug : yog hnub peb.
    14 Tswv Ntuj hais tias : "Kom muaj tej lub ci ci nyob saum lub ntuj ntsuab saud, cais nruab hnub thiab hmo ntuj, thiab cia ua tej lub cim xam hnub xam nyoog thiab suav hnub suav xyoo, 15 kom tej lub ci ci nyob saum lub ntuj ntsuab ua kom ntiaj teb pom kev." Ces txawm muaj li ntawd tuaj. 16 Tswv Ntuj ua ob lub ci ci loj dua cov, lub ci ci loj yog lub kav nruab hnub, lub ci ci me yog lub kav hmo ntuj, thiab cov hnub qub. 17 Tswv Ntuj muab lawv txawb rau saum lub ntuj ntsuab saud kom ntiaj teb pom kev, 18 cia kav nruab hnub thiab hmo ntuj, thiab cia cais qhov pom kev ntawm qhov tsaus ntuj. Tswv Ntuj pom tias qhov ntawd zoo. 19 Txawm muaj tsaus ntuj thiab muaj kaj ntug : yog hnub plaub.
    20 Tswv Ntuj hais tias : "Kom muaj tej tsiaj muaj sia npau xi nyob hauv cov dej, thiab kom muaj noog ya saum npoo ntiaj teb, saum ib nta ntuj ntsuab." Ces txawm muaj li ntawd tuaj. 21 Tswv Ntuj tsim cov nab hiav txwv loj loj thiab tas puas tsav yam tsiaj muaj sia uas txawj ntab hauv dej, coob coob npau xi nyias muaj raws nyias hom, thiab tsim cov noog muaj tis, nyias muaj raws nyias hom. Tswv Ntuj pom tias qhov ntawd zoo. 22 Tswv Ntuj foom lus zoo rau lawv tias : "Nej yeej meem tsim noob, yeej meem huam vam mus nyob puv cov dej hauv hiav txwv, kom cov noog yeej meem huam vam mus puv ntiaj teb." 23 Txawm muaj tsaus ntuj thiab muaj kaj ntug : yog hnub tsib.
    24 Tswv Ntuj hais tias : "Kom lub ntiaj teb txawj muaj tej yam tsiaj muaj sia, nyias muaj raws nyias hom : tsiaj nyeg, kab ntsaum, tsiaj qus, nyias muaj raws nyias hom." Ces txawm muaj li ntawd tuaj. 25 Tswv Ntuj ua tej tsiaj qus kom nyias muaj nyias hom, tej tsiaj nyeg kom nyias muaj nyias hom, thiab tas txhua yam kab ntsaum kom nyias muaj nyias hom. Tswv Ntuj pom tias qhov ntawd zoo. 26 Tswv Ntuj hais tias : "Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg. Txawm muaj tsaus ntuj thiab muaj kaj ntug : yog hnub rau.
    2 1 Lub ntuj thiab lub ntiaj teb yog tsim los zoo li no, thiab tas txhua yam nyob rau hauv. 2 Tswv Ntuj ua nws txoj num tiav tas rau hnub xya. Ces hnub xya nws thiaj so, vim nws ua nws txoj num tiav tas lawm.

    Los:       HP  1:   1, 26-31A

    1 Thaum chiv lub keeb, Tswv Ntuj tsim lub ntuj thiab lub ntiaj teb.
    26 Tswv Ntuj hais tias : "Peb yuav ua tib neeg raws li peb tus duab, kom zoo li peb me ntsis. Kom lawv ua tswv kav cov ntses nyob hauv hiav txwv, cov noog ya saum ntuj, cov tsiaj nyeg, tas txhua yam tsiaj qus thiab txhua yam kab ntsaum nkag hauv av. 27 Ces Tswv Ntuj tsim tib neeg raws li nws tus duab. Yog raws li Tswv Ntuj tus duab, mas nws thiaj tau tsim tib neeg. Nws tsim nkawd ua txiv neej thiab ua poj niam. 28 Tswv Ntuj foom lus zoo rau nkawd thiab hais rau nkawd tias : "Neb yeej meem tsim noob, yeej meem huam vam mus puv ntiaj teb thiab tswj ntiaj teb. Neb kav cov ntses nyob hauv hiav txwv, cov noog ya saum ntuj thiab tas puas tsav yam tsiaj uas nkag hauv av." 29 Tswv Ntuj hais tias : "Kuv muab tas puas tsav yam nroj tsuag muaj noob uas tuaj nyob saum npoo av, kuv muab tas puas tsav yam ntoo txi txiv thiab muaj noob rau neb : tej ntawd yuav yog neb tej txhiam laj txhiam xws. 30 Kuv muab tas txhua yam nroj ntsuab rau cov tsiaj qus, cov noog ya saum ntuj, tas txhua yam nkag hauv av thiab ciaj sia, kuv muab rau lawv ua txhiam xws noj." Ces txawm muaj li ntawd tuaj. 31 Tswv Ntuj ntsia tas txhua yam nws tau ua : txhua yam ntawd zoo kawg nkaus.

    NPN       104:   1-2, 5-6, 10+12, 13-14, 24+35c

    Txais: (30) Huab Tais, thov koj xa koj Leej Tswv Yim tuaj ua kom lub ntiaj teb rov tshiab tuaj.

    Kuv tus plig, koj cav lus zoo txog HUAB TAIS !
    HUAB TAIS, kuv tus Tswv Ntuj, koj loj tas nrho !
    Koj hnav hwj chim ci ntsa iab thiab hnav koob meej,
    koj hnav qhov pom kev ua tsoos tsho.

    Txais: (30) Huab Tais, thov koj xa koj  Leej Tswv Yim tuaj ua kom lub ntiaj teb rov tshiab tuaj.

    Koj tsim lub ntiaj teb txawb rau chaw ruaj,
    ntiaj teb nyob ib sid tsis ua zog.
    Koj muab dej hiav txwv los vov ntiaj teb xws li daim tsoos tsho,
    dej nyob tus yees saum cov ncov roob.

    Txais: (30) Huab Tais, thov koj xa koj Leej Tswv Yim tuaj ua kom lub ntiaj teb rov tshiab tuaj.

    Koj tso cov dej txhawv ntws ua tej tus dej
    uas chev ncig tej kis roob.
    Cov noog ya saum ntuj khiav los nkaum ze ntawm cov dej,
    noog quaj saum cov ceg ntoo tuaj.

    Txais: (30) Huab Tais, thov koj xa koj Leej Tswv Yim tuaj ua kom lub ntiaj teb rov tshiab tuaj.

    Koj nyob saum koj lub tsev vaj loog tso dej los ywg cov roob,
    ntiaj teb puv nkaus koj cov hauj lwm koj ua.
    Koj ua kom nroj tsuag hlob los yug tsiaj,
    ua kom tej qoob loo hlob rau neeg siv,
    kom neeg tau mov tawm nruab av los noj.

    Txais: (30) Huab Tais, thov koj xa koj Leej Tswv Yim tuaj ua kom lub ntiaj teb rov tshiab tuaj.

    HUAB TAIS, koj cov hauj lwm ntau ua luaj !
    Koj tsim tas txhua yam raws kev thoob tsib,
    cov tsiaj koj tsim los nyob puv tas ntiaj teb.
    Kuv tus plig, koj cav lus zoo txog HUAB TAIS ! As Les Lus Yas !

    Txais: (30) Huab Tais, thov koj xa koj Leej Tswv Yim tuaj ua kom lub ntiaj teb rov tshiab tuaj.

    Los:      NPN  33:   4-5, 6-7, 12-13, 20+22

    Txais: (5b) Huab Tais txoj kev hlub nyob puv nkaus lub ntiaj teb.

    HUAB TAIS lo lus yog lus ncaj,
    nws tej num yog num ruaj txaus ntseeg.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (5b) Huab Tais txoj kev hlub nyob puv nkaus lub ntiaj teb.

    HUAB TAIS lo lus los tsim muaj yim txheej cuaj txheej ntuj,
    nws txoj pa tsim muaj ib tsoom hnub qub nyob saud.
    Nws sau cov dej rau hauv hiav txwv xws li rau ib lub taub dej,
    nws tauv cov dej tob cia rau hauv tej lub txhab dej.

    Txais: (5b) Huab Tais txoj kev hlub nyob puv nkaus lub ntiaj teb.

    Haiv neeg uas tau HUAB TAIS los uaTswv Ntuj, nws txoj hmoov zoo!
    Yog Haiv neeg Tswv Ntuj xaiv los ua HUAB TAIS lub cuab tam!
    Nyob txheej ntuj saud, HUAB TAIS dauv muag los ntsia,
    nws pom tas ib tsoom neeg.

    Txais: (5b) Huab Tais txoj kev hlub nyob puv nkaus lub ntiaj teb.

    Peb tus plig tos ntsoov HUAB TAIS:
    nws yog tus pab peb, nws yog peb daim leem phiaj.
    HUAB TAIS, thov kom koj lub siab hlub roos peb,
    vim koj yog peb qhov chaw vam khom !

    Txais: (5b) Huab Tais txoj kev hlub nyob puv nkaus lub ntiaj teb.

    Zaj NYeem Ob:       HP  22:   1-18

    1 Thaum tej xwm no dhau tas lawm, Tswv Ntuj sim Has Nplas Has siab. Nws hu tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 2 Tswv Ntuj hais tias : "Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj." 3 Tag kis, Has Nplas Has sawv ntxov los, nws nog nra rau nws tus luj, nws coj ob tug tub txib thiab nws tus tub His Xas Has nrog nws mus. Nws phua ib co taws npaj mus ua thaj txi ntuj, ces nws sawv kev mus rau thaj chaw uas Tswv Ntuj qhia rau nws.
    4 Hnub peb, Has Nplas Has tsa muag ntsia pom thaj chaw ntawd tseem nyob deb. 5 Has Nplas Has hais rau nws ob tug tub txib tias : "Neb nrog tus luj nyob ntawm no. Kuv tus me nyuam wb mus kom txog tid, wb yuav hawm Ntuj tas, wb mam rov los ntawm neb." 6 Has Nplas Has muab cov taws txi Ntuj nog rau nws tus tub His Xas Has ris, hos nws nqa cov hluav taws thiab rab riam, ces nkawd ob leeg ua ke mus. 7 His Xas Has nug nws txiv Has Nplas Has tias : "Kuv txiv !" Has Nplas Has teb tias : "Me tub, koj hais dab tsi !" His Xas Has hais ntxiv tias : "Ua cas pom hluav taws thiab cov taws xwb, ua li tus yaj yuav coj los hlawv txi Ntuj nyob qhov twg ?" 8 Has Nplas Has teb tias : "Me tub, Tswv Ntuj mam li muab tus yaj uas yuav txi Ntuj rau wb." Ces nkawd ob leeg taug kev mus ntxiv.
    9 Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud. Nws muab nws tus tub His Xas Has pav, ces nws muab tso rau saum cov taws saum lub thaj txi Ntuj. 10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 12 Tus Tshiab hais tias : "Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv." 13 Has Nplas Has tsa muag ntsia pom ib tug laug tshis uas ob tug kub daig hauv ib koog khaub. Ces nws mus muab tus laug tshis los hlawv txi Ntuj hloov nws tus tub chaw. 14 Has Nplas Has tis npe rau thaj chaw ntawd hu ua "HUAB TAIS yuav pub.” Ces zaum no thiaj muaj lo lus hais kam tias "Saum lub roob HUAB TAIS yuav pub."
    15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : "HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeej los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus."

    Los:       HP  22:   1-2, 9A, 10-13, 15-18

    1 Thaum tej xwm no dhau tas lawm, Tswv Ntuj sim Has Nplas Has siab. Nws hu tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 2 Tswv Ntuj hais tias : "Coj koj leej tub twm zeej His Xas Has uas koj hlub kawg, koj coj nws mus kom txog lub teb chaws Mos Lis Yas. Nyob ntawd koj yuav muab nws txi rau kuv saum ib lub roob uas kuv yuav qhia rau koj."
    9 Thaum nkawd tuaj txog thaj chaw uas Tswv Ntuj tau qhia nws, Has Nplas Has tsa ib lub thaj rau ntawd thiab nws muab cov taws mus teeb rau saud.
    10 Has Nplas Has tsa tes mus nthos rab riam yuav coj los tua nws tus tub. 11 Tiam sis HUAB TAIS tus Tshiab hu saum ntuj tuaj rau nws tias : "Has Nplas Has ! Has Nplas Has !" Has Nplas Has teb tias : "Kuv nyob ntawm no !" 12 Tus Tshiab hais tias : "Txhob tsa koj txhais tes rau saum tus me nyuad ! Txhob ua dab tsi phem rau nws ! Zaum no kuv paub hais tias koj hwm Tswv Ntuj tiag, vim koj tsis yig, koj tseem muab koj leej tub twm zeej los txi rau kuv." 13 Has Nplas Has tsa muag ntsia pom ib tug laug tshis uas ob tug kub daig hauv ib koog pos. Ces nws mus muab tus laug tshis los hlawv txi Ntuj hloov nws tus tub chaw.
    15 HUAB TAIS tus Tshiab rov hu zaum ob saum ntuj tuaj rau Has Nplas Has, 16 nws hais tias : "HUAB TAIS hais tias : Kuv tuav txog kuv lub npe cog lus rau koj tias : vim koj tau ua li ntawd, koj tsis yig, koj tuaj yeem muab koj leej tub twm zeej los txi rau kuv, 17 mas kuv yuav foom hmoov zoo ntau rau koj, kuv yuav ua kom koj tsoom xeeb zeej xeeb ntxwv coob npaum cov hnub qub saum ntuj thiab ntau npaum cov xuab zeb uas nyob ntawm ntug hiav txwv. Koj tsoom xeeb zeej xeeb ntxwv yuav ua tswv kav lawv cov yeeb ncuab tej qhov rooj loog. 18 Tas txhua haiv neeg nyob ntiaj teb yuav tuav txog koj tsoom xeeb ntxwv lub npe los sib foom hmoov zoo, vim koj tau mloog kuv lus."

    NPN       16:   5+8, 9-10, 11

    Txais: (1) Huab Tais, koj yog kuv lub cuab tam.

    HUAB TAIS, koj yog lub cuab tam kuv tau txais los,
    Koj yog kuv lub ntim, koj yog tus tuav kuv txoj hmoo.
    Kuv cia HUAB TAIS nyob ntawm kuv xub ntiag tsis tseg,
    Vim nws nyob ntawm kuv sab xis, kuv yuav tsis qaij qaug.

    Txais: (1) Huab Tais, koj yog kuv lub cuab tam.

    Vim li ntawd, kuv lub siab luag ntxhi, kuv tus plig hom khaj,
    kuv lub cev los kuj nyob nyab xeeb.
    Vim koj tsis tso kuv pov tseg rau ntuj txias teb tsaus.
    Koj tsis kheev kom tus ntseeg txog koj paub txoj kev lwj kev puas.

    Txais: (1) Huab Tais, koj yog kuv lub cuab tam.

    Koj yuav qhia txoj kev muaj txoj sia rau kuv paub,
    Yog kev zoo siab tsis tu nyob ntawm koj xub ntiag,
    Yog kev nplig siab nyob ntawm koj sab xis mus ib txhis.

    Txais: (1) Huab Tais, koj yog kuv lub cuab tam.

    Zaj Nyeem Peb:       KEV TSIV  14:   15—15:1

    14 15 HUAB TAIS hais rau Mais Xes tias : "Vim li cas koj thiaj hu kuv cuag li ntawd ? Koj hais rau cov His Xas Lais kom lawv rov sawv kev mus ntxiv. 16 Koj yuav tsa koj rab pas thiab xyab koj txhais tes rau saum dej ntuj, koj yuav faib dej ua ob sab, kom cov His Xas Lais tau taug kev qhuav qhawv hauv qab thu dej mus. 17 Kuv yuav ua kom cov Hais Nkws Tos lub siab tawv qhawv tuaj, lawv yuav caum cov His Xas Lais qab hla hauv qab thu dej mus thiab, ces kuv yuav siv Fas Las Oos thiab nws cov tub rog, nws cov tsheb rog thiab cov tsav tsheb los ua kom kuv nto koob meej. 18 Thaum kuv siv Fas Las Oos thiab nws cov tsheb rog thiab cov tsav tsheb ua kom kuv nto koob meej lawd, cov Hais Nkws Tos mam yuav paub tias kuv yog HUAB TAIS tiag."
    19 Tswv Ntuj tus Tshiab uas mus ua tsoom His Xas Lais ntej, hloov chaw mus thaiv tom lawv qab : ces tus ncej huab nyob ntawm lawv hauv ntej txav chaw mus nyob tom lawv qub qab. 20 Nws mus nyob nruab nrab kem tog Hais Nkws Tos ntawm tog His Xas Lais. Twv huab dub nciab tsaus nti ib hmos thaiv lawv, ces hmo ntawd ib hmos, ib tog txav tsis ti ib tog li. 21 Mais Xes tsa tes rau saum dej ntuj, ces HUAB TAIS ua cua hlob hlob ntsawj toob fab tuaj thawb cov dej ib hmos, qab thu dej tawm qhuav qhawv los, hos cov dej faib nyob ob sab. 22 Cov His Xas Lais nkag hauv hiav txwv, lawv tsuj av qhuav qhawv mus, nyob ntawm lawv sab xis thiab sab laug muaj ob lub phab ntsa dej. 23 Cov Hais Nkws Tos caum lawv qab : Fas Las Oos cov nees, cov tsheb rog thiab cov tsav tsheb nkag mus hauv dej ntuj caum cov cov His Xas Lais. 24 Thaum yuav kaj ntug, HUAB TAIS nyob saum tus ncej huab hluav taws, ntsia pom cov Hais Nkws Tos. Nws ua kom cov Hais Nkws Tos tau ntshai kawg. 25 Nws ua kom lawv cov log tsheb daig thiab ntog qeeb qeeb. Cov Hais Nkws Tos hais tias : "Peb khiav mus deb ntawm cov His Xas Lais vim HUAB TAIS pab lawv tawm tsam ntaus cov Hais Nkws Tos !" 26 HUAB TAIS hais rau Mais Xes tias : "Koj tsa tes rau saum dej ntuj, kom dej ntws rov los nyab cov Hais Nkws Tos thiab lawv cov tsheb rog thiab cov tsav tsheb tib si." 27 Mais Xes tsa tes rau saum dej ntuj, ces thaum pib kaj ntug, dej ntws rov los nyob qhov qub chaw. Cov Hais Nkws Tos tig khiav rov qab, tiam sis dej nphau nphwv los npog lawv, HUAB TAIS ua kom lawv ntxeev zom zaws rau hauv dej ntuj. 28 Cov dej nphau rov los nyob qhov qub, los npog cov tsheb thiab cov tsav tsheb Hais Nkws Tos uas tau nkag mus hauv qab thu dej caum cov His Xas Lais, tsis dim ib tug li. 29 Hos cov His Xas Lais tau taug kev qhuav nyob hauv plawv dej ntuj, cov dej ua ob sab phab ntsa nyob ntawm lawv sab xis thiab sab laug. 30 Hnub ntawd, HUAB TAIS cawm cov His Xas Lais dim ntawm cov Hais Nkws Tos txhais tes. Cov His Xas Lais pom cov Hais Nkws Tos tuag pawg lug ntawm ntug dej ntuj. 31 Cov His Xas Lais pom HUAB TAIS lub peev xwm uas nws siv los tiv yeej cov Hais Nkws Tos. Tsoom pej xeem sawv daws hwm HUAB TAIS. Lawv tso siab rau HUAB TAIS thiab rau nws tus tub txib Mais Xes.
    15 1 Ces Mais Xes thiab tsoom tub ki His Xas Lais hu nkauj cav txog HUAB TAIS li no : “Kuv hu nkauj cav txog HUAB TAIS, vim nws yeej thiab nws muaj koob meej, nws tau muab tus nees thiab tus caij nees pov rau hauv hiav txwv.”

    NPN:       KT  15:   1-2, 3-4, 5-6, 17-18

    Txais: (1b) Peb yuav cav txog Huab Tais vim nws tau ua kom nws nto koob meej.

    Kuv hu nkauj cav txog HUAB TAIS, vim nws yeej thiab nws muaj koob meej loj,
    nws tau muab tus nees thiab tus caij nees pov rau hauv hiav txwv.
    HUAB TAIS yog kuv lub zog, nws yog kuv lub peev xwm, nws tau cawm kuv dim.
    Nws yog kuv tus Tswv Ntuj, kuv cav txog nws,
    nws yog kuv txiv tus Tswv Ntuj, kuv qhuas txog nws

    Txais: (1b) Peb yuav cav txog Huab Tais vim nws tau ua kom nws nto koob meej.

    HUAB TAIS yog ib tug tseem tub rog, nws lub npe yog HUAB TAIS.
    Nws muab Fas Las Oos cov tsheb rog thiab cov tub rog pov rau hauv dej ntuj tas.
    Dej Ntuj Liab nqos nws cov thawj tub rog tas tib si

    Txais: (1b) Peb yuav cav txog Huab Tais vim nws tau ua kom nws nto koob meej.

    Cov dej nphau los nyab lawv tas,
    Lawv tog rau hauv qab thu xws li tej lub pob zeb.
    Huab Tais, koj sab tes xis muaj hwj huam loj tas nrho,
    Huab Tais, koj sab tes xis ua kom yeeb ncuab puas nstoog tas.

    Txais: (1b) Peb yuav cav txog Huab Tais vim nws tau ua kom nws nto koob meej.

    HUAB TAIS, koj coj koj haiv neeg uas koj tau cawm los,
    koj muab lawv cog rau saum lub roob uas yog koj li,
    qhov chaw uas koj muaj koj lub rooj zaum,
    thaj chaw ntshiab uas yog koj ob txhais tes tau npaj cia.
    HUAB TAIS yuav ua vaj nyob mus li tas ib txhiab ib txhis.

    Txais: (1b) Peb yuav cav txog Huab Tais vim nws tau ua kom nws nto koob meej.

    Zaj Nyeem Plaub:       HX  54:   5-14


    5 Koj tus txiv yog tus tsim koj, nws lub npe yog tus HUAB TAIS Nyob Siab. Tus txhiv koj yog His Xas Lais tus Ntshiab, nws hu ua Tswv Ntuj kav lub ntiaj teb. 6 Muaj tseeb ! Koj tus plig nyob hauv txoj kev lwj siab, xws li tus poj niam uas luag tso pov tseg. HUAB TAIS rov hu koj. Koj tus Tswv Ntuj hais tias : "Tus poj niam uas yus yuav thaum hluas, yus puas yuav ntiab tau nws ? 7 Kuv tso koj tseg ib nyuag me ntsis, tab sis kuv lub siab hlub koj heev, kuv rov sau koj. 8 Kuv tau npau taws heev rau koj, kuv thiaj nraim kuv lub ntsej muag ib nyuag chim, tab sis kuv lub siab npuab koj mus tas ib txhis, kuv khuv leej koj. Tus HUAB TAIS txhiv koj, hais li ntawd. 9 Thaum Nos Hes tseem nyob, kuv cog lus tias dej yuav tsis nyab ntiaj teb ntxiv. Nyem no, kuv rov cog lus zoo li ntawd, kuv yuav tsis npau taws rau koj, Yes Lus Xas Les, kuv yuav tsis tso hem thawj rau koj. 10 Cov roob txawj txav mus, cov hauv toj txawj vau, tab sis kuv lub siab npuab koj yuav tsis nrug deb koj, kuv kev cog lus nyob thaj yeeb yuav tsis ntshaus. Tus HUAB TAIS khuv leej koj hais li ntawd. 11 Yes Lus Xas Les, koj tau raug kev txom nyem loj, raug cua daj cua dub tuaj nplawm koj, tsis muaj leej twg nplij koj; koj ntsia saib, kuv yuav tsa koj cov pob zeb rau saum ib co pov haum, yuav muab pov haum xas fais los ua koj cov taw ntsa; 12 yuav muab pov haum lus npis los ua koj cov taub hau phab ntsa, yuav muab pov haum muaj nqes los ua koj cov qhov rooj thiab tas nrho koj tej phab ntsa tib si. 13 Koj cov tub ki sawv daws yuav ua HUAB TAIS thwj tim, ces lawv yuav muaj kev zoo siab loj. 14 Kev ncaj yuav ua kom koj nyob khov kho, koj yuav tsis paub txoj kev raug luag quab yuam; koj yuav tsis muaj kev txhawj xeeb dab tsi, yuav tsis muaj kev ntshai ntxiv; kev txhawj ntshai yuav tsis txav los ze ntawm koj lawm.

    NPN      30:   2+4, 5-6, 11+12B+13B

    Txais: (2a) Kuv yuav cav txog koj, Huab Tais, vim koj tau cawm kuv.

    HUAB TAIS, kuv cav lus zoo txog koj, vim koj tau cawm kuv dim,
    koj tsis cia kuv ua yeeb ncuab lub chaw zoo siab
    HUAB TAIS, koj rub kuv tus plig tawm hauv ntuj txias teb tsaus los,
    kuv nrog lawv nqes hauv qhov av, tiam sis koj tau txuag kuv txoj sia.

    Txais: (2a) Kuv yuav cav txog koj, Huab Tais, vim koj tau cawm kuv.

    Cov ntseeg HUAB TAIS, nej hu nkauj cav txog nws,
    nej ua tsaug rau nws lub siab ntshiab.
    Nws npau taws, tsuas npau ib pliag, nws hlub neeg hlub ib sid.
    Hmo ntuj txoj kev kua muag poob los raug yus,
    tab sis, qhov kaj ntug coj kev zoo siab tuaj.

    Txais: (2a) Kuv yuav cav txog koj, Huab Tais, vim koj tau cawm kuv.

    HUAB TAIS, koj mloog mas ! thov koj hlub kuv!
    HUAB TAIS, thov koj pab kuv!
    Koj muab kuv txoj kev quaj nyiav hloov los ua kev dhia lom zem,
    HUAB TAIS, kuv tus Tswv Ntuj, kuv yuav ua koj tsaug mus li.

    Txais: (2a) Kuv yuav cav txog koj, Huab Tais, vim koj tau cawm kuv.

    Zaj Nyeem Tsib:       HX  55:   1-11

    1 Nej sawv daws uas nej nqhis dej, cia li tuaj cuag tus dej. Nej cov uas tsis muaj nyiaj txiag, nej tuaj mas ! Nej muas nplej los ua ncuav mov ! Nej noj, tsis tas yuav them nyiaj. Nej muas cawv txiv ntoo muas mis nyuj, tsis tas yuav them dab tsi. 2 Ua cas nej yuav siv nyiaj los muas tej yam tsis yog mov noj ? Ua cas nej siv cov nyiaj nqe zog los muas tej yam tsis ua kom nej tsau plab ? Nej mloog kuv mas ! Ces nej yuav tau noj tej yam qab, nej yuav tau tej yam txhiam xws qab xis nej lub ncauj. 3a Nej tig ntsej los mloog kuv mog ! Nej mloog kuv, ces nej tus plig yuav muaj txoj sia nyob. 3b Kuv yuav nrog nej cog ib lo lus nyob mus ib txhiab ib txhis, raws li cov txiaj ntsim kuv hais ruaj tias kuv yuav muab rau Das Vis. 4 Kuv tau tsa Das Vis los ua ib tug tim khawv rau cov haiv neeg, ua ib tug ntaus thawj thiab ib tug muab txoj cai rau cov haiv neeg. 5 Yog li no, Yes Lus Xas Les, koj yuav hu ib lub kuj cuab uas koj tsis paub, ces lub kuj cuab ntawd yuav khiav tuaj cuag koj, yog vim HUAB TAIS koj tus Tswv Ntuj, yog vim His Xas Lais tus Ntshiab, nws ua kom koj nto koob meej.
    6 Nej cia li nrhiav HUAB TAIS thaum nej tseem nrhiav tau nws, nej hu txog nws thaum nws tseem nyob ze. 7 Tus siab phem, nws yuav tso nws txoj kev phem tseg. Tus siab nkhaus yuav tso nws lub tswv yim lim hiam tseg. Nws yuav tig los cuag HUAB TAIS, HUAB TAIS yuav khuv leej nws. Nws cia li los cuag Tswv Ntuj, vim Tswv Ntuj muaj lub siab zam dav kawg nkaus.
    8 Vim tias nej zaj tswv yim tsis zoo li kuv zaj, nej txoj kev tsis zoo li kuv txoj. Yog HUAB TAIS lus ceeb toom. 9 Lub ntuj nyob siab dua lub ntiaj teb npaum li cas, kuv txoj kev nyob siab dua nej txoj kev npaum li ntawd, thiab kuv zaj tswv yim kuj nyob siab dua nej zaj tswv yim ib yam li ntawd. 10 Cov nag cov daus uas poob saum ntuj los, lawv yuav tsis rov mus saum ntuj yog lawv tsis tau muab dej ywg lub ntiaj tas tso, ua kom cov noob lwj thiab nthaw kaus, ua kom lub ntiaj teb txi txiv rau tus tseb, thiab pub mov rau neeg tau noj tas tso, ces lawv mam rov mus lawm saum ntuj. 11 Lo lus tawm ntawm kuv lub ncauj los kuj zoo ib yam li ntawd. Nws tsis rov los cuag kuv yog nws tsis tau ua ib qho hauj lwm, tsis tau leg qhov kuv xav kom ua, thiab tsis tau ua kom nws txoj hauj lwm tiav tas tso.

    NPN:       HX  12:   2-3, 4, 5-6

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Tswv Ntuj yog kuv tus cawm seej tiag.
    Kuv tso siab rau nws, kuv tsis txhawj.
    Kuv lub zog thiab kuv peev xwm yog HUAB TAIS.
    Nws yog tus tau cawm kuv.
    Nej yuav zoo siab luag ntxhi mus
    ce dej hauv lub qhov dej cawm neeg.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Nej cav txog HUAB TAIS , nej cav txog nws lub npe !
    Nej tshaj nws tej hauj lwm loj nyob hauv cov haiv neeg,
    nej tshaj rau lawv kom lawv paub tias nws lub npe zoo tas nrho.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Nej hu nkauj cav txog HUAB TAIS vim nws
    tau ua ua tej yam muaj hwj chim loj tas nrho,
    kom tas ntiaj paub txog tej ntawd.
    Tsoom neeg nyob Xis Yoos, nej qw suab zoo siab,
    vim His Xas Lais tus Ntshiab loj tas nrho nyob hauv nej.Txais: (3) Nej yuav zoo siab hlo mus ce cov dej txhawv uas pub kev cawm seej.

    Zaj Nyeem Rau:       NPAS LWS  3:   9-15, 32-4:4

    His Xas Lais, koj yuav tsum mloog cov lus qhia uas pub txoj sia: Koj cuab pob ntseg mloog koj thiaj yuav paub kev thoob tsib! 10 Vim li cas, His Xas Lais, vim li cas koj thiaj nyob hauv koj cov yeeb ncuab tej teb chaws, koj thiaj ua neej laus nyob hauv tej pej kum av, 11 koj thiaj ua kom koj tsis huv nrog cov neeg tuag, luag thiaj suav koj xyaw cov mus rau ntuj txias teb tsaus lawm xwb? 12 Koj tau tso tus dej txhawv kev thoob tsib pov tseg lawm. 13 Kheev lam koj tau taug raws Tswv ntuj txoj kev mas koj yuav tau nyob thaj yeeb lug mus li. 14 Koj yuav tsum kawm kom koj paub tias kev thoob tsib yog nyob qhov twg, lub zog yog nyob qhov twg, kev to taub yog nyob qhov twg, ces koj thiaj yuav ib txhij paub txog tias lub neej thiab txoj sia ntev yog nyob qhov twg, qhov pom kev rau yus lub qhov muag thiab kev thaj yeeb yog nyob qhov twg. 15 Leej twg thiaj nrhiav tau kev thoob tsib qhov chaw nyob? Leej twg thiaj nkag tau rau hauv nws tej kev nplua nuj?
    32 Tsuas yog tus uas paub tas ib puas tsav yam xwb thiaj paub kev thoob tsib; nws txoj kev to taub ua kom nws nrhiav tau kev thoob tsib. Yog tus uas tau npaj lub ntiaj teb los nyob ib txhis, thiab tau tso tsiaj muaj plaub txhais tes taw los nyob puv rau hauv. 33 Yog tus uas xa qhov pom kev mus, ces qhov pom kev mus, yog nws hu qhov pom kev los, ces qhov pom kev tshee na mloog nws lus rov los. 34 Cov hnub qub ci thaum txog lawv lub caij nyoog mas ua rau lawv zoo siab; 35 nws hu lawv, ces lawv teb tias: “Peb nyob ntawm no.” Lawv zoo siab ci ntsa rau tus uas tsim lawv pom. 36 Tus ntawd yog peb tus Tswv Ntuj, tsis muaj lwm tus ntxiv zoo li nws lawm. 37 Nws tau tho kom muaj tas nrho txoj kev paub, thiab tau muab rau Yas Kos, nws tus tub txib, muab rau His Xas Lais, tus tub uas nws hlub. 38 Txoj kev paub ntawd tau tshwm los rau ntiaj teb thiab tau los nrog tib neeg nyob.
    4 1 Yog phau ntawv ntim Tswv Ntuj cov lus qhia, yog txoj cai uas nyob mus li; leej twg khaws txoj cai ntawd yuav muaj txoj sia, leej twg tso txoj cai ntawd tseg yuav ntsib kev tuag. 2 Yas Kos, koj cia li rov los, cia li khaws nkaus txoj cai los coj, cia li taug kev raws nws qhov pom kev thiaj li yuav mus txog qhov ci ntsa loj. 3 Koj tsis txhob cia lwm tau koj lub koob meej, tsis txhob cia lwm pej kum haiv neeg tau cov koob hmoov uas yog koj li. 4 His Xas Lais, peb tau txoj hmoov zoo, vim peb paub txog tias yam twg yog yam Tswv Ntuj nyiam.

    NPN       19:   8, 9, 10, 11

    Txais: (Zam 6:68c) Huab Tais, koj muaj cov lus pub txoj sia nyob mus li.

    HUAB TAIS txoj cai zoo tas nrho,
    nws ntxiv siav rau tus ntsuj plig;
    HUAB TAIS tus txhooj tsim nyog yuav,
    nws ua kom tus neeg ruam thoob tsib tuaj.

    Txais: (Zam 6:68c) Huab Tais, koj muaj cov lus pub txoj sia nyob mus li.

    HUAB TAIS cov lus qhuab qhia yog lus ncaj
    ua kom neeg muaj kev zoo siab.
    HUAB TAIS lo lus meej kawg nkaus,
    ua kom qhov muag pom kev.

    Txais: (Zam 6:68c) Huab Tais, koj muaj cov lus pub txoj sia nyob mus li.

    Kev hwm HUAB TAIS yog txoj kev dawb huv,
    kev hwm Huab Tais yuav nyob mus li.
    HUAB TAIS cov lus txiav txim yog lus tseeb,
    Txhua lo lus nws txiav yog qhov ncaj.

    Txais: (Zam 6:68c) Huab Tais, koj muaj cov lus pub txoj sia nyob mus li.

    Nws cov lus txiav txim, tsim nyog ntshaw dua kub,
    Tsim nyog ntshaw dua ib txhab tseem kub,
    qab zib dua cov kua zib,
    los cov zib mu ntawm daim nas muv.

    Txais: (Zam 6:68c) Huab Tais, koj muaj cov lus pub txoj sia nyob mus li.

    Zaj Nyeem Xya:       EXK  36:   16-17A, 18-28

    16 Kuv txais HUAB TAIS ib lo lus li no : 17 Neeg leej tub, Es Xes Kias, Zaj 34 thiab 36 36 461 thaud, tsoom His Xas Lais nyob txawm hauv lawv teb chaws. Lawv tus yam ntxwv thiab lawv tej hauj lwm ua kom lawv lub teb chaws sw tas.
    18 Kuv thiaj tau tso kuv lub siab npau taws rau lawv, vim lawv ua luag roj ntsha ntws nyob hauv lawv teb chaws, lawv muab tej tus mlom dab los ua kom lawv teb chaws sw. 19 Kuv ua kom cov His Xas Lais sib ncaim mus nyob hauv nruab nrab cov kuj cuab. Kuv muab lawv w mus rau pej kum teb. Kuv tau txiav txim rau lawv raws lawv tus yam ntxwv thiab lawv tes dej num. 20 Lawv tuaj nyob pej kum teb, lawv tseem ua puas kuv lub npe ntshiab. Lawv ua kom pej kum haiv neeg hais tias : Yog HUAB TAIS haiv neeg, lawv tawm hauv nws lub teb chaws tuaj nyob qhov no." 21 Tab sis kuv txuag kuv lub npe ntshiab, uas His Xas Lais ua kom puas rau hauv cov kuj cuab ua lawv tuaj nyob. 22 Koj mus hais rau tsoom His Xas Lais tias : "Huab Tais Tswv Ntuj hais li no : His Xas Lais tsev neeg, tsis yog vim nej ces kuv thiaj ua zoo li no, yog vim kuv lub npe ntshiab uas nej tau ua puas nyob hauv cov kuj cuab uas nej tuaj nyob. 23 Kuv yuav ua kom kuv lub npe loj ntshiab tuaj, vim nej tau ua kom kuv lub npe puas nyob hauv cov kuj cuab nej tuaj nyob. Cov kuj cuab thiaj yuav paub tias kuv yog HUAB TAIS. HUAB TAIS Tswv Ntuj hais zoo li ntawd. Kuv yuav ua kom kuv lub siab ntshiab ci tuaj rau lawv qhov muag pom. 24 Thaum ntawd kuv yuav thau nej hauv cov kuj cuab los, kuv yuav sau nej ntawm pej kum teb los nyob ua ke, kuv yuav coj nej rov los nyob hauv nej thaj av. 25 Kuv yuav hliv dej ntshiab ntws tuaj saum nej, ces nej yuav huv tuaj. Kuv yuav so nej tej yam sw thiab nej tej mlom dab pov tseg kom nej huv tuaj. 26 Kuv yuav pub ib lub siab tshiab rau nej, kuv yuav dawj nej lub siab tawv li zeb, kuv yuav cog ib lub siab muag li nqaij nyob hauv nej lub cev. 27 Kuv yuav muab kuv lub tswv yim rau hauv nej. Kuv yuav ua kom nej mus raws kuv tej lij choj, thiab kom nej coj kuv tej kev cai. 28 Nej yuav tau nyob hauv lub teb chaws uas kuv muab rau nej phaj txiv thiab phaj yawg. Nej yuav yog kuv haiv neeg. Kuv yuav yog nej tus Tswv Ntuj.

    NPN       42:   3, 5; 43:3, 4

    Yog muaj cov txais lub Cim Ntxuav hu zaj no.

    Txais: (42:2) Xws li tus kauv nqhis cov dej ntws lug, kuv tus ntsuj plig nqhis txog koj, Tswv Ntuj.

    Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
    Thaum twg kuv li tau mus pom Tswv Ntuj lub ntsej muag?

    Txais: (42:2) Xws li tus kauv nqhis cov dej ntws lug, kuv tus ntsuj plig nqhis txog koj, Tswv Ntuj

    Kuv nrog npoj neeg taug kev
    kuv ua lawv ntej mus kom txog Tswv Ntuj lub tsev,
    sawv daws qw zoo siab thiab ua Ntuj tsaug,
    sawv daws ua koob tsheej lom zem.

    Txais: (42:2) Xws li tus kauv nqhis cov dej ntws lug, kuv tus ntsuj plig nqhis txog koj, Tswv Ntuj

    Thov koj xa koj qhov pom kev thiab qhov tseeb tuaj
    coj kuv kev kom mus txog saum koj lub roob ntshiab,
    mus txog ntua qhov chaw koj nyob.

    Txais: (42:2) Xws li tus kauv nqhis cov dej ntws lug, kuv tus ntsuj plig nqhis txog koj, Tswv Ntuj

    Kuv yuav nkag mus rau hauv Tswv Ntuj lub thaj,
    mus txog tus Tswv Ntuj uas ua kom kuv dhia zoo siab.
    Ces kuv yuav ntaus nkauj nog ncas ua koj tsaug,
    Tswv Ntuj, kuv tus Tswv Ntuj!

    Txais: (42:2) Xws li tus kauv nqhis cov dej ntws lug, kuv tus ntsuj plig nqhis txog koj, Tswv Ntuj

    Los:       HX  12:   2-3, 4BCD, 5-6

    Yog tsis muaj neeg txais lub Cim Ntxuav hu zaj no.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Tswv Ntuj yog kuv tus cawm seej tiag.
    Kuv tso siab rau nws, kuv tsis txhawj.
    Kuv lub zog thiab kuv peev xwm yog HUAB TAIS.
    Nws yog tus tau cawm kuv.
    Nej yuav zoo siab luag ntxhi mus
    ce dej hauv lub qhov dej cawm neeg.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Nej cav txog HUAB TAIS , nej cav txog nws lub npe !
    Nej tshaj nws tej hauj lwm loj nyob hauv cov haiv neeg,
    nej tshaj rau lawv kom lawv paub tias nws lub npe zoo tas nrho.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Nej hu nkauj cav txog HUAB TAIS vim nws
    tau ua ua tej yam muaj hwj chim loj tas nrho,
    kom tas ntiaj paub txog tej ntawd.
    Tsoom neeg nyob Xis Yoos, nej qw suab zoo siab,
    vim His Xas Lais tus Ntshiab loj tas nrho nyob hauv nej.

    Txais: (3) Nej yuav zoo siab hlo mus ce cov dej txhawv uas pub kev cawm seej.

    Los:       NPN  51:   12-13, 14-15, 18-19

    Txais: (12a) Tswv Ntuj, thov koj tsim ib lub siab huv lis si rau kuv.

    Tswv Ntuj, thov koj tsim ib lub siab huv lis si rau kuv,
    thiab rov muab ib lub tswv yim nyob ruaj nreb rau kuv.
    Koj tsis txhob muab kuv ntiab mus deb ntawm koj,
    thiab txhob rho koj leej Tswv Yim Ntshiab tawm ntawm kuv mus.

    Txais: (12a) Tswv Ntuj, thov koj tsim ib lub siab huv lis si rau kuv.

    Koj ua kom kuv rov zoo siab nyob hauv koj txoj kev cawm;
    koj muab ib lub tswv yim txawj xav dav rau kuv.
    Kuv yuav qhia koj txoj kev rau cov neeg yuam kev,
    ces cov neeg txhaum yuav tig rov los cuag koj.

    Txais: (12a) Tswv Ntuj, thov koj tsim ib lub siab huv lis si rau kuv.

    Vim koj tsis zoo siab txais cov kev txi ntuj;
    yog kuv hlawv tsiaj txi ntuj, koj yuav tsis txais.
    Kuv txoj kev txi ntuj, Tswv Ntuj, yog muaj ib lub siab xav lees txhaum;
    muaj ib lub siab xav lees txhaum thiab ua neeg me, Tswv ntuj, koj yuav tsis thuam.

    Txais: (12a) Tswv Ntuj, thov koj tsim ib lub siab huv lis si rau kuv.

    Zaj Nyeem Tsab Ntawv:       LM  6:   3-11

    Cov kwv tij:
    3 Nej puas paub tias peb cov uas tau txais lub Cim Ntxuav nyob hauv Yes Xus Pleev, mas yog peb txais lub Cim Ntxuav nyob hauv Yes Xus txoj kev tuag? 4 Lub Cim Ntxuav ua kom peb nrog Yes Xus mus zwm ntxa nyob hauv txoj kev tuag, kom ib yam li Leej Pleev ciaj sawv hauv cov tub tuag rov los vim Leej Txiv lub hwj chim, peb kuj tau txais ib lub neej tshiab ua thiab. 5 Yog tias peb nrog Yes Xus koom ua ib tug xwb vim peb nrog nws tuag ua ke, mas peb kuj yuav nrog nws koom ua ib tug nyob hauv txoj kev sawv rov los thiab. 6 Peb yuav tsum to taub tias yog peb muab peb tus qub neeg ntsia nrog Yes Xus rau saum ntoo cuam, mas peb lub cev uas xib rau kev txhaum yuav tsis muaj zog ntxiv, ces peb thiaj tsis ua kev txhaum cov qhev ntxiv. 7 Vim tias tus neeg tuag lawm, tsis zwm rau txoj kev txhaum ntxiv. 8 Yog peb nrog Leej Pleev tuag mas peb ntseeg tias peb kuj yuav nrog nws muaj txoj sia thiab. 9 Peb paub tias Leej Pleev sawv hauv qhov tuag los lawm, nws yuav tsis rov tuag dua lawm, txoj kev tuag tsis muaj cuab kav tuaj raug nws ib zaug ntxiv. 10 Nws tuag yog yuav ua kom txoj kev txhaum tuag, nws tsuas tuag ib zaug xwb. Hos nws ciaj rov los yog ciaj kom muaj txoj sia nyob hauv Tswv Ntuj. 11 Ntawm nej, mas nej kuj zoo ib yam li ntawd thiab : nej yuav tsum saib tias nej tuag nyob sab kev txhaum lawm, tiam sis nej nrog Tswv Ntuj muaj txoj sia nyob hauv Yes Xus Pleev.

    NPN       118:   1-2, 16-17, 22-23

    Txais: As les lus yas, as les lus yas, as les lus yas.

    Nej cav lus zoo ua HUAB TAIS tsaug, vim nws siab zoo,
    Nws hlub peb tas ib txhiab ib txhis.
    Kom tsev neeg His Xas Lais hais tias :
    “Nws hlub peb tas ib txhiab ib txhis.”

    Txais: As les lus yas, as les lus yas, as les lus yas.

    HUAB TAIS txhais tes xis ua hauj lwm loj !
    HUAB TAIS txhais tes xis yeej lawm!
    Kuv yuav tsis tuag, kuv yuav muaj txoj sia nyob,
    kuv yuav tshaj txog HUAB TAIS cov dej num :

    Txais: As les lus yas, as les lus yas, as les lus yas.

    Lub pob zeb uas cov txhim tsev muab pov tseg,
    yog lub pob zeb txheem kaum tsev.
    Qhov ntawd yog tuaj ntawm HUAB TAIS tuaj,
    yog yam txaus qhuas kawg rau peb qhov muag pom.

    Txais: As les lus yas, as les lus yas, as les lus yas.

    Ntawv Moo Zoo:       LK  24:   1-12

    1 Thawj hnub pib lub lis piam, thaum kaj ntug txoog, cov poj niam mus tom ntxa. Lawv nqa cov tshuaj tsw qab uas lawv tau npaj. 2 Lawv pom daim txiag zeb dov tawm ntawm lub rooj ntxas lawm. 3 Lawv chaws mus hauv, lawv nrhiav tsis tau Huab Tais Yes Xus lub cev. 4 Lawv xav tsis thoob tias yog vim li cas. Ces thaum ntawd, ob tug neeg tshwm plaws los ntawm lawv, nkawd hnav tsoos ci dawb vog. 5 Cov poj niam ntshai, lawv dauv ntsej muag rau hauv av. Ob tug neeg ntawd hais rau lawv tias : "Ua cas nej nrhiav Tus Neeg Ciaj hauv cov neeg tuag ? 6 Nws tsis nyob ntawm no. Nws sawv rov los lawm. Nej nco ntsoov txog qhov nws tau hais rau nej, thaum nws tseem nyob Nkas Lis Lais. 7 Nws hais tias : Neeg Leej Tub yuav tsum raug luag muab rau hauv cov neeg txhaum txhais tes, raug dai saum ntoo cuam. Hnub peb, nws yuav sawv rov los." 8 Ces lawv rov nco txog Yes Xus cov lus.
    9 Cov poj niam rov ntawm ntxa los txog tsev, lawv qhia tej yam ntawd tib si rau Pab Kaum Ib thiab rau lwm cov thiab. 10 Yog Mab Liab Mas Ntas Las, Zag, thiab Mab Liab uas yog Yas Kos niam thiab lwm cov poj niam uas nrog lawv ua ke, lawv sawv daws hais li ntawd rau cov Hauv Paus Xa Lus. 11 Tab sis cov Hauv Paus Xa Lus saib tej lus no zoo li yog lus tsis meej pem, ces lawv tsis ntseeg cov poj niam. 12 Tiam sis Pob Zeb sawv tsees, nws khiav mus tom ntxa. Nws khoov xauj hauv, nws tsuas pom cov hlua pav xwb. Nws rov mus tsev, nws xav tsis thoob txog tej yam uas tshwm tuaj zoo li ntawd.

    NTU PEB: UA COV KAB KE NTXUAV PLIG

    Yog muaj ib co neeg kawm txais lub Cim Ntxuav vim lawv xav los ua neeg ntseg ces yog lub caij ua cov kav ke ntxuav plig rau lawv.

    Yog tsis muaj cov tau  npaj txais lub Cim Ntxuav, ces sawv daws rov los nyias lees nyias txoj kev ntsseg dua tshiab raws li TP cov lus nug.



    NTU PLAUB:  COV KAB KE TXI NTUJ


    TP Cev mov cev cawv thiab tsim lub Cim Yug.

    Sawv daws mus txais Yes Xus lub Cev.

    Xaus.




    Last edited by Mim on 22nd April 2019, 5:43 am; edited 2 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 21st April 2019, 8:51 am

    TIM 22 LUB 4 HLIS 2019

    Hnub Ob Thawj Yim Hnub hauv Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 2: 14, 22-33


    14 Pob Zeb nrog Pab Kaum Ib leeg sawv ntsug, nws hais cov lus no nrov nrov tias : "Cov Yus Das, thiab tas nej cov uas nyob hauv Yes Lus Xas Les, nej yuav tsum paub qhov no, nej tig ntsej los mloog kuv cov lus.
    22 His Xas Lais tsoom tub ki, nej mloog cov lus no : Yes Xus nyob Naj Xas Les yog tus uas Tswv Ntuj lees paub, nws thiaj tau ua hwj huam yees ntxwv, ua ib co dej num nto moo, thiab ib co cim nyob hauv Yes Xus rau nej pom, raws li nej twb paub tas lawm. 23 Tus Yes Xus ntawd raug muab muag rau luag raws nraim li Tswv Ntuj tau teem tseg thiab raws li nws yeej xub paub ua ntej lawm. Nej tau muab nws ntsia dai saum ntoo cuam thiab muab nws tua nyob hauv cov neeg tsis hwm txoj cai txhais tes. 24 Tiam sis Tswv Ntuj tau tsa nws sawv rov los, thiab npo nws ntawm txoj kev zwm rau kev tuag lawm, vim tias kev tuag tsis muaj hwj huam tuav tau nws cia.
    25 Das Vis twb tau hais txog nws tias :
    ‘Kuv pom Huab Tais nyob ntawm kuv xub ntiag tsis tseg, nws nyob ntawm kuv sab xis, kom kuv txhob qaij qaug.
    26 Yog vim li ntawd kuv lub siab muaj kev zoo siab hlo, kuv tus nplaig hom khaj, kuv cev nqaij tau zoo so nyob hauv txoj kev tso siab.
    27 Vim koj yuav tsis tso kuv tus plig pov tseg rau hauv ntuj txias teb tsaus, koj yuav tsis cia koj tus Ntshiab paub kev puas kev lwj.
    28 Koj ua kom kuv paub cov kev mus txog txoj sia, koj yuav pub kom kuv muaj kev zoo siab loj nyob ntawm koj xub ntiag.’
    29 Kwv tij sawv daws, kuv hais tau tseeb rau nej txog tus yawg koob Das Vis tias : nws tuag lawm thiab nws mus zwm av lawm. Nws lub ntxa tseem nyob rau peb pom txog niaj hnub no. 30 Tiam sis Das Vis yog ib tug yaj saub, thiab nws paub tias Tswv Ntuj twb tau cog lus rau nws lawm tias nws ib tug xeeb ntxwv uas yog nws roj ntsha yuav los zaum nws lub theej kiab. 31 Ces nws twb xub paub thiab xub hais txog Leej Pleev yuav sawv rov los tib si lawm tias : Nws yuav tsis raug muab tso pov tseg rau hauv tub tuag teb, thiab nws lub cev nqaij yuav tsis paub kev puas kev lwj . 32 Tus Yes Xus ntawd, Tswv Ntuj tau tsa nws sawv rov los lawm. Peb txhua tus ua taus tim khawv txog qhov ntawd. 33 Nyem no Tswv Ntuj tsa Yes Xus nyob siab ntawm Tswv Ntuj sab xis. Nws tau txais Leej Ntuj Plig Ntshiab ntawm Leej Txiv los raws li Leej Txiv yeej tau cog lus lawm, . ces nws thiaj tso Leej Ntuj Plig nqes los: yog qhov uas nej pom thiab nej hnov no.”

    NPN 16: 1-2A+5, 7-8, 9-10, 11

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Tswv Ntuj, thov koj txuag kuv, vim kuv tuaj khaub zig koj.
    Kuv hais rau HUAB TAIS tias: " Koj yog kuv tus HUAB TAIS !”
    Huab Tais, kuv lub cuab tam, kuv lub ntim,
    Koj yog tus tuav rawv kuv txoj hmoo.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Kuv cav lus zoo txog tus HUAB TAIS uas qhia kuv xav tswv yim,
    Tab yog hmo ntuj kuv siab ntsws tseem txhib kuv.
    Kuv cia HUAB TAIS nyob ntawm kuv xub ntiag tsis tseg,
    Yog nws nyob ntawm kuv sab xis, kuv yuav tsis qaij tsis qaug

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Vim li ntawd, kuv lub siab luag ntxhi, kuv tus plig dhia hom khaj,
    kuv lub cev kuj tau nyob nyab xeeb,
    Vim koj yuav tsis tso kuv tus ntsuj plig pov tseg rau ntuj txias teb tsaus.
    Koj tsis kheev tus ntseeg koj mus ntsib kev puas kev lwj.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    Koj yuav qhia kuv taug txoj kev mus txog txoj sia,
    txog kev zoo siab nyob ntawm koj xub ntiag,
    txog kev nplig siab tas ib sid nyob ntawm koj sab xis.

    Txais: (1) Tswv Ntuj, thov koj txuag kuv, koj yog kuv chaw tso siab.
    Los : As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: MT 28: 8-15

    8 Ob tug poj niam, Mab Liab Mas Ntas Las thiab lwm tus Mab Liab, tso plhuav lub ntxa tseg. Nkawd ntshai thiab kuj ho zoo siab tas nrho. Nkawd khiav mus xa lub moo ntawd rau cov thwj tim. 9 Yes Xus tuaj tos nkawd kev, nws hais tias : "Neb nyob kaj lug". Ces nkawd txav los ze Yes Xus, nkawd puag Yes Xus ko taw, nkawd pe nws. 10 Yes Xus hais rau nkawd tias : "Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ped."
    11 Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog thiab. Lawv mus qhia tej xwm uas lawv tau pom rau cov thawj leej choj. 12 Cov thawj leej choj nrog cov txwj laus sib sau tuav tswv yim. Lawv muab nyiaj ntau rau cov zov keeb, 13 lawv hais tias : "Nej hais li no : 'Hmo ntuj, thaum peb tsaug zog lawm, Yes Xus cov thwj tim tuaj nyiag nws lub cev mus lawm.' 14 Yog tias tej no nrov txog tus nom tswj teb chaws pob ntseg, peb yuav npliag nws kom nej tsis txhob raug dab tsi nyuaj." 15 Ces cov zov keeb khaws cov nyiaj, lawv ua raws li luag qhia lawv. Cov lus no thiaj nrov nyob hauv cov Yus Das los txog niaj hnub no.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 22nd April 2019, 6:22 am

    TIM 23 LUB 4 HLIS 2019

    Hnub Peb Thawj Yim Hnub hauv Lis Piam Hla Xyoo C Nruab Lis Piam Xyoo I

    Zaj Nyeem Ib: HAUJ LWM 2: 36-41


    Pob Zeb hais rau tsoom neeg His Xas Lais tias:
    36 "Tsoom His Xas Lais, nej yuav tsum paub meej tias : Tswv Ntuj tsa tus Yes Xus uas nej tau muab dai saum ntoo cuam, ua Huab Tais thiab ua Leej Pleev." 37 Cov lus ntawd ua rau lawv lub siab mob chob nkuav , ces lawv hais rau Pob Zeb thiab rau cov Hauv Paus Xa Lus tias : "Cov kwv tij, peb yuav ua dab tsi ?" 38 Pob Zeb teb rau lawv tias : “Nej yuav thov txhaum, thiab nej txhia leej txhia tus yuav txais lub cim ntxuav nyob hauv Yes Xus Pleev lub npe kom Ntuj zam txhaum rau nej. Ces nej yuav txais Leej Ntuj Plig Ntshiab cov paj tshab. 39 Vim thaum Ntuj cog lus, mas yog nws cog lus yuav muab rau nej, thiab rau nej cov me nyuam, rau cov neeg nyob deb, thiab rau tsoom neeg coob uas Huab Tais peb tus Tswv Ntuj yuav hu lawv los cuag nws." 40 Pob Zeb tseem hais ntau lo lus qhuab qhia thiab ntuas lawv ntxiv. Nws hais tias : "Nej khiav kom nej dim ntawm tiam neeg xib rau kev phem no." 41 Cov neeg ntawd mloog Pob Zeb cov lus, lawv txais lub cim ntxuav. Hnub ntawd, muaj ze ntawm peb txhiab leej los ntseeg ntxiv.

    NPN 33: 4-5, 18-19, 20+22

    Txais: (5b) Huab Tais txoj kev hlub nyob puv nkaus lub ntiaj teb.
    Los: As les lus yas.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (5b) Huab Tais txoj kev hlub nyob puv nkaus lub ntiaj teb.
    Los: As les lus yas.

    Ntsia saib HUAB TAIS lub qhov muag saib ntsoov cov neeg hwm nws,
    saib ntsoov cov tso siab rau nws txoj kev hlub
    tias nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (5b) Huab Tais txoj kev hlub nyob puv nkaus lub ntiaj teb.
    Los: As les lus yas.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj !
    HUAB TAIS, thov kom koj lub siab hlub roos peb,
    vim koj yog peb qhov chaw vam khom !

    Txais: (5b) Huab Tais txoj kev hlub nyob puv nkaus lub ntiaj teb.
    Los: As les lus yas.

    As Les Lus Yas: NPN 118: 24


    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: ZAM 20: 11-18


    11 Mab Liab Mas Ntas Las sawv ze lub ntxa sab nraud, nws quaj. Thaum nws quaj, nws khoov rau hauv lub ntxa. 12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem taub hau, ib tug zaum nram ko taw. 13 Ob tug Tshiab hais rau Mab Liab tias: "Tus poj niam, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso qhov twg." 14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. 15 Yes Xus hais rau Mab Liab tias : "Tus poj niam, ua cas koj quaj ? Koj nrhiav leej twg ?" Mab Liab xav tias yog tus tu lub vaj, ces Mab Liab hais rau nws tias : "Huab tais, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis !" Txhais tias : “Xib Hwb.” 17 Yes Xus hais rau Mab Liab tias : "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias : Kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj." 18 Mab Liab Mas Ntas Las thiaj los tshaj rau cov thwj tim hais tias : "Kuv pom Huab Tais lawm,” thiab nws hais cov lus uas Yes Xus tau hais rau nws.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 23rd April 2019, 4:29 am

    TIM 24 LUB 4 HLIS 2019

    Hnub Plaub Thawj Yim Hnub hauv Lis Piam Hla Xyoo C Nruab Lis Piam Xyoo I

    Zaj Nyeem Ib: HAUJ LWM 3: 1-10


    1 Pob Zeb thiab Zam nkawd nce mus pem lub Tuam Tsev Teev Ntuj, mus ua zaj teev ntuj thaum teev cuaj (uas yog thaum peb teev). 2 Thaum ntawd, lawv coj ib tug neeg tuag ceg nruab thiab tuaj. Lawv niaj hnub muab nws tso rau ntawm lub qhov rooj mus hauv lub Tuam Tsev Teev Ntuj, hu ua Qhov Rooj Zoo Nkauj, kom tus tuag ceg tau kev thov khawv ntawm cov neeg chaws mus hauv. 3 Thaum nws pom Pob Zeb thiab Zam nkawd tab tom yuav chaws mus hauv, ces nws thov khawv ntawm nkawd. 4 Pob Zeb ntsia ntsoov nws, Zam kuj ntsia ntsoov thiab. Pob Zeb hais tias : "Koj ntsia wb." 5 Tus tuag ceg ntsia ntsoov nkawd, nws xav tias nws yuav tau ib yam dab tsi. 6 Tab sis Pob Zeb hais tias : "Nyiaj thiab kub mas kuv tsis muaj. Tab sis qhov kuv muaj, mas kuv muab pub rau koj : Kuv tuav txog Yes Xus Pleev, tus neeg Nas Xas Les lub npe, koj sawv, koj mus kev !" 7 Ces Pob Zeb tuav nkaus tus tuag ceg sab tes xis, rub nws sawv. Tam sim ntawd, nws ob txhais taw thiab nws ob lub pob luj taws ruaj nrees muaj zog tuaj. 8 Nws tib plhaw sawv tsees, nws sim mus kev ib ncig ntawd. Ces nws nrog nkawd chaws mus hauv lub Tuam Tsev, nws ke mus kev ke dhia tej paj paws thiab ke cav txog Tswv Ntuj. 9 Tas tsoom pej xeem pom nws rhais ruam mus kev thiab cav txog Tswv Ntuj, 10 sawv daws zeem tau tias nws yog tus ib txwm zaum thov khawv ntawm lub Qhov Rooj Zoo Nkauj tiag, lawv poob siab thiab qhuas kawg nkaus txog qhov uas nyuam qhuav tshwm sim tuaj rau tus tuag ceg ntawd.

    NPN 105: 1-2, 3-4, 6-7, 8-9

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nej ua HUAB TAIS tsaug, nej hu txog nws lub npe,
    nej qhia nws cov hauj lwm nto koob meej rau cov haiv neeg paub.
    Nej seev nkauj rau HUAB TAIS, nej ntaus paj nruag cav txog nws ;
    nej tshaj txog nws cov hwj huaj txaus qhuas tas tib si.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nej nrhiav koob meej rau nej nyob hauv nws lub npe,
    cov uas muaj lub siab nrhiav Huab Tais, nej cia li zoo siab!
    Nej nrhiav HUAB TAIS thiab nws lub zog,
    nrhiav kev tsob hwb nws tsis tseg.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Has Nplas Has tsoom xeeb ntxwv, nej yog nws cov tub txib,
    Yas Kos cov tub, nej yog cov uas nws tau xaiv,
    Nws HUAB TAIS yog peb tus Tswv Ntuj,
    Nws tej cai tswj tas lub ntiaj teb.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nws nco ntsoov mus li cov lus nws cog cia,
    yog ib co lus cog ruaj rau txhiab tiam tub ki.
    Yog cov lus nws tau nrog Has Nplas Has cog,
    thiab nws tau rov zeem tseeb rau His Xas Has.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: LK 24: 13-35

    13 Tib hnub ntawd, ob leeg hauv cov thwj tim taug kev mus rau ib lub zos hu ua Es Mas Ws, deb li rau caum ncua kev ntawm Yes Lus Xas Les. 14 Nkawd sib tham txog txhua tsav yam xwm uas tau tshwm sim tuaj. 15 Thaum nkawd tab tom piav thiab sib tham txog tej ntawd, Yes Xus caum tau nkawd, nws nrog nkawd taug kev mus. 16 Tab sis nkawd qhov muag plooj lawm zeem tsis tau Yes Xus. 17 Yes Xus hais rau nkawd tias : "Neb sib tham txog tej lus dab tsi taug kev ?" Ces nkawd nres, nkawd ua ntsej muag ntshaus ntsho. 18 Tus hu ua Khes Os Fas qhib ncauj teb tias : "Tas cov neeg tuaj pem Yes Lus Xas Les, ntshai koj tib leeg xwb thiaj tsis paub txog qhov uas tau tshwm sim ob peb hnub los no?" 19 Yes Xus hais rau nkawd tias : "Muaj dab tsi ?" Nkawd hais rau Yes Xus tias : "Tej xwm uas hais txog Yes Xus Nas Xas Les. Nws yog ib tug yaj saub ua tau tej hauj lwm thiab hais tau tej lus muaj hwj huam nyob ntawm Tswv Ntuj thiab tsoom pej xeem xub ntiag. 20 Peb cov Thawj Leej Choj thiab peb cov nom tswv tau ntes nws rau luag, kom luag txiav lub txim tuag rau nws thiab muab nws dai saum ntoo cuam. 21 Peb mas peb twb vam tias nws yog tus yuav txhiv His Xas Lais no. Tsis tag li ntawd, tej xwm no twb tshwm sim tau peb hnub rau hnub no lawm, 22 ces ob peb tug poj niam uas yog peb cov neeg, tseem ua rau peb poob siab tas thiab. Tag kis no, lawv sawv ntxov ntxov mus tom ntxa, 23 lawv nrhiav tsis tau nws lub cev. Lawv rov los hais rau peb tias ib cov Tshiab tawm los rau lawv pom. Cov Tshiab hais tias Yes Xus muaj txoj sia nyob no. 24 Cov nrog peb muaj ob peb leeg kuj tau mus txog tom lub ntxa, lawv pom txhua yam raws li cov poj niam hais, tab sis lawv kuj tsis pom nws thiab." 25 Ces Yes Xus hais rau nkawd tias : "Ua cas nej lub siab yuav ruam ua luaj, thiab yuav ntseeg qeeb ua luaj txog tas txhua yam uas cov Yaj Saub tau hais tseg lawm ! 26 Tej ntawd tsis yog tej kev tsim txom uas Leej Pleev yuav tsum raug tso, nws mam li mus hauv nws lub koob meej lod ?" 27 Yes Xus txhais cov Ntawv uas sau txog nws tus kheej, txij Mais Xes los txog cov Yaj Saub tas huv tib si rau nkawd. 28 Thaum lawv tuaj yuav txog lub zos uas ob tug thwj tim mus, Yes Xus ua txuj yuav mus ntxiv. 29 Tab sis nkawd cheem Yes Xus tias : "Nrog wb nyob mas ! Yuav tsaus ntuj, lub hnub twb yuav poob qho." Yes Xus thiaj chaws mus hauv tsev mus nrog nkawd nyob. 30 Thaum nws nrog nkawd nyob ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. 31 Ces nkawd qhov muag qhib plho, nkawd zeem tau Yes Xus, tab sis Yes Xus ploj ntais ntawm nkawd qhov muag lawm. 32 Ces nkawd rov sib tham tias : "Wb hnov wb lub siab kub lug thaum nws hais lus rau wb tom kev thiab thaum nws txhais Ntawv rau wb, puas yog ?" 33 Ces nkawd sawv tsees tam sis ntawd rov mus Yes Lus Xas Les. Nkawd los pom Pab Kaum Ib nrog lawv cov neegg sib txoos ua ke. 34 Lawv hais tias : "Huab Tais sawv rov los lawm tiag, nws tawm los rau Xis Moos pom lawm!" 35 Ces nkawd piav qhov uas tshwm tuaj nyob tom kev, thiab piav tias nkawd zeem tau Huab Tais yog thaum nws ntais lub ncuav mov.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 24th April 2019, 4:45 am

    TIM 25 LUB 4 HLIS 2019

    Hnub Tsib Thawj Yim Hnub hauv Lis Piam Hla Xyoo C Nruab Lis Piam Xyoo I

    Zaj Nyeem Ib: HAUJ LWM 3: 11-26


    11 Tus tuag ceg tsis tso Pob Zeb thiab Zam nkawd tseg li. Tas tsoom pej xeem ceeb tas, lawv khiav tuaj vij nkawd nyob hauv lub qab ru tsev uas hu ua Xas Los Moos qab ru tsev. 12 Pob Zeb pom li ntawd, nws hais rau tsoom pej xeem hais tias : “Cov His Xas Lais, vim li cas nej poob siab rau qhov ntawd ? Vim li cas nej qhov muag ntsia ntsoov wb, cuag li yog wb ua kom tus neeg ntawd mus taus kev vim wb muaj hwj huam thiab txawj thov Ntuj? 13 Has Nplas Has, His Xas Has, thiab Yas Kos tus Tswv Ntuj, peb cov yawg koob tus Tswv Ntuj tau muab koob meej rau nws tus tub txib Yes Xus, uas nej tau muab nws rau luag, nej tsis kam lees nws thaum Pis Las Tos xav tso nws mus. 14 Nej tsis kam lees tus siab Ntshiab thiab siab Ncaj, nej thov kom luag tso ib tug neeg tua neeg dim los rau nej. 15 Nej tau muab tus Tswv txoj sia tua. Tiam sis Tswv Ntuj tsa nws sawv hauv cov tub tuag rov los lawm. Peb ua tim khawv pom. 16 Yog vim txoj kev ntseeg txog Yes Xus lub npe, mas tus neeg uas nej pom thiab nej paub no nws nyuam qhuav tau lees ntseeg lub npe ntawd, ces nws txoj kev ntseeg uas yog Yes Xus muab thiaj ua kom tus neeg no zoo hlo muaj zog tuaj nyob ntawm nej xub ntiag.
    17 Cov kwv tij, kuv paub hais tias thaum nej ua li ntawd, nej yeej tsis paub tias nej ua dab tsi. Nej cov nom tswv los kuj tsis paub thiab. 18 Li ntawd, Tswv Ntuj thiaj tau ua raws li nws tau siv cov Yaj Saub lub ncauj los xub hais tseg lawm tias Leej Pleev yuav tsum raug txom nyem loj. 19 Ua li mas nej yuav tsum thov txhaum thiab tig los hloov dua siab tshiab kom Ntuj so nej cov txhaum pov tseg. 20 Ces Huab Tais yuav pub ib lub caij txhawb zog tuaj ntawm nws tuaj rau sawv daws, thiab nws yuav xa tus uas nws ib txwm npaj ua Leej Pleev tuaj rau nej, uas yog Yes Xus, 21 tus uas lub ntuj yuav tau txais nws nyob mus txog lub zim txwv tas txhia yam yuav rov plhis dua tshiab, raws li Tswv Ntuj tau siv nws cov yaj saub ntshiab lub ncauj xub hais thaum ub lawm.
    22 Mais Xes yog tus xub hais tias : ‘Huab Tais nej tus Tswv Ntuj yuav muab nej ib tug kwv tij tsa ua Yaj Saub xws li kuv. Nej yuav mloog tas puas tsav yam nws qhia rau nej. 23 Leej twg tsis mloog tus Yaj Saub ntawd hais, mas nws yuav raug muab tshem tawm ntawm nws haiv neeg mus.’ 24 Tas cov yaj saub tom qab no, txij Xas Muas los rau cov hloov nws, sawv daws kuj tau hais txog tej yam uas tshwm sim niaj hnub no. 25 Nej yog cov yaj saub cov tub, thiab nej yog cov tub hauv txoj kev cog lus uas Tswv Ntuj tau nrog nej cov yawg koob cog thaum nws hais rau Has Nplas Has tias : ‘Nyob hauv koj cov xeeb leej xeeb ntxwv, tas txhua xeem neeg nyob ntiaj teb yuav tau txais ib txog hmoov zoo.’ 26 Li ntawd thaum Tswv Ntuj tsa nws tus tub txib sawv rov los, Tswv Ntuj xa nws tuaj rau nej ua ntej dua cov, kom nws tuaj foom hmoov zoo rau nej kom nej txhua tus hloov dua siab tshiab txhob taug nej txoj kev ua phem ntxiv.”

    NPN 8: 2AB+5, 6-7, 8-9

    Txais: (2ab) HUAB TAIS peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    HUAB TAIS, peb tus Tswv Ntuj,
    koj lub npe muaj hwj xyeej nyob puv tas ntiaj teb.
    Neeg yog dab tsi, koj thiaj quav ntsej txog nws?
    As Das tus tub yog dab tsi, koj thiaj li txhawj txog nws?

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    Koj muab neeg tso nyob qis dua ntuj cov tshiab me me.
    Koj muab hwj chim thiab meej mom zoo rau neeg ntoo.
    Koj tsa neeg kav tas txhua yam koj txhais tes tau tsim los,
    koj tso tas puas tsav yam rau hauv neeg qab xib taws :

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    Tas tej me yaj, me nyuj huv tib si,
    thiab tas tsoom tsiaj qus nyob nruab nrag,
    tej me noog ya saum ntuj, me ntses nyob hauv hiav txwv,
    thiab tas txhua hom tsiaj khiav hauv dej ntuj.

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: LK 24: 35-48

    35 Ces ob tug thwj tim piav qhov uas tshwm tuaj nyob ntawm kev, thiab piav tias nkawd zeem tau Huab Tais yog thaum nws ntais lub ncuav mov.
    36 Thaum lawv tseem sib tham li ntawd, Yes Xus sawv ntsug kiag hauv nruab nrab ntawm lawv, nws hais rau lawv tias : "Nej nyob kaj lug." 37 Lawv ceeb tas thiab ntshai kawg, lawv xav tias lawv pom ib tug dab. 38 Ces Yes Xus hais rau lawv tias : "Vim li cas nej poob siab ? Vim li cas muaj tej zaj ua xyem xyav txhawv los nyob hauv nej lub siab ? 39 Nej ntsia kuv ob txhais tes thiab ob txhais taw saib : yeej yog kuv tiag! Nej xuas kuv mas, nej yuav pom tias dab tsis muaj nqaij tsis muaj txha xws li nej pom kuv muaj." 40 Thaum Yes Xus hais li ntawd, nws muab nws ob txhais tes ob txhais taw rau lawv saib. 41 Lawv tseem ntseeg tsis tau tau vim lawv zoo siab dhau thiab lawv yoob tas. Yes Xus hais rau lawv tias : "Nyob ntawm no, nej puas muaj dab tsi noj ?" 42 Lawv muab ib ya ntses txhiab rau Yes Xus. 43 Yes Xus txais los tuav, nws noj yav ntses ntawd nyob ntawm lawv xub ntiag.
    44 Yes Xus hais rau lawv tias : "Thaum kuv tseem nrog nej nyob, kuv tau hais cov lus no rau nej tias: Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, mas yuav tsum tshwm sim kom tiav tas." 45 Ces Yes Xus qhib lawv lub tswv yim kom lawv to taub cov Ntawv Ntshiab. 46 Nws hais rau lawv tias : "Ntawv yeej sau hais tias Leej Pleev yuav raug luag tsim txom thiab hnub peb nws yuav sawv hauv cov tuag rov los, 47 thiab sau tias yuav muaj kev qhuab qhia nyob hauv leej Pleev lub npe txog txoj kev lees txhaum kom Ntuj zam txhaum rau ta sib tsoom haiv neeg sawv daws. Yuav xub qhuab qhia nyob Yes Lus Xas Les ua ntej tuaj mus. 48 Nej yuav ua tim khawv txog qhov no.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 25th April 2019, 10:17 am

    TIM 26 LUB 4 HLIS 2019

    Hnub Rau Thawj Yim Hnub hauv Lis Piam Hla Xyoo C Nruab Lis Piam Xyoo I

    Zaj Nyeem Ib: HAUJ LWM 4: 1-12


    1 Pob Zeb thiab Zam nkawd tseem tab tom hais lus rau tsoom pej xeem, ces cov leej choj, tus tswj lub Tsev Txoos, thiab cov Xas Dus Kais tuaj txog. 2 Lawv tsis zoo siab rau qhov tias nkawd qhia tsoom sid thiab nkawd tshaj tias neeg tuag yuav sawv rov los nyob hauv Yes Xus. 3 Lawv ntes nkawd thiab coj nkawd mus kaw hauv tsev loj faj tos txog tag kis kaj ntug, vim thaum ntawd twb tsaus ntuj lawm. 4 Tiam sis muaj ntau leej uas tau hnov nkawd lo lus kuj txais kev ntseeg. Suav cov txiv neej xwb, cov ntseeg muaj nto tsib txhiab leej tej lawm.
    5 Hnub tom qab, cov nom tswv Yus Das, cov laus neeg, thiab cov kws ntawv, sawv daws tuaj sib sau nyob Yes Lus Xas Les, 6 Tus tuam leej choj As Nas kuj tuaj, Kais Fas, Yos Nas Thas, As Les Xas Nraws thiab tas cov uas yog caj ces ua tuam leej choj kuj puav leej tuaj tib si. 7 Lawv kom luag coj ob tug Hauv Paus Xa Lus los sawv hauv nruab nrab, ces lawv nug nkawd tias: "Neb tau cai qhov twg los, thiab neb tuav txog leej twg npe los ua tej ntawd?” 8 Ces Pob Zeb muaj Leej Ntuj Plig nyob puv hauv nws, nws hais rau lawv tias : "Cov nom tswv coj tsoom pej xeem, thiab tsoom laus neeg sawv daws : 9 Hnub no, zoo li yog nej xav nug wb txog qhov hauj lwm zoo wb tau ua pab ib tug neeg tuag ceg, ces nws thiaj li zoo lawm. 10 Ua li mas nej sawv daws thiab tas tsoom His Xas Lais huv tib si, nej yuav tsum paub tias yog nyob hauv Yes Xus Pleev lub npe, tus Yes Xus nyob Nas Xas Les uas nej muab nws dai saum ntoo cuam, tab sis Tswv Ntuj tau tsa nws sawv hauv cov tub tuag rov los lawm, yog nyob hauv Yes Xus mas tus neeg no thiaj sawv ntsug zoo hlo li no rau nej pom. 11 Yes Xus yog lub pob zeb uas nej cov txhim tsev muab pov tseg, zaum no nws yog thawj lub pob zeb txheem lub tsev. 12 Tsis muaj kev cawm neeg nyob hauv lwm tus li lawm, thiab kuj tsis muaj dua lwm lub npe neeg nyob hauv tas lub qab ntuj khwb no uas yuav cawm tau peb lawm."

    NPN 118: 1-2+4, 22-24, 25-27A

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    Nej ua HUAB TAIS tsaug vim nws siab zoo,
    Nws hlub peb tas ib txhiab ib txhis!
    Kom His Xas Lais tsev neeg hais tias :
    Nws hlub peb tas ib txhiab ib txhis!
    Kom cov neeg hwm HUAB TAIS hais tias :
    Nws hlub peb tas ib txhiab ib txhis!

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    Lub pob zeb uas cov txhim tsev muab pov tseg
    txia ntshis ua lub pob zeb txheem tsev.
    Qhov ntawd yog HUAB TAIS ua
    yog ib yam txaus qhuas rau peb qhov muag pom !
    Hnub no yog hnub HUAB TAIS tau tsim,
    peb zoo siab thiab yuav luag ntxhi hauv hnub no.

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    HUAB TAIS, peb thov koj, thov koj pub kev cawm rau peb !
    HUAB TAIS, peb thov koj, thov koj pub kev yeej rau peb!
    Tus tuaj nyob hauv HUAB TAIS lub npe, nws nto koob meej!
    Peb nyob hauv HUAB TAIS tsev foom hmoov zooi rau nej.
    HUAB TAIS yog Tswv Ntuj, nws muab qhov pom kev rau peb.

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: ZAM 21: 1-14

    1 Dua li ntawd, Yes Xus rov tawm los rau cov thwj tim pom nyob ntawm ntug dej ntuj Tis Npes Lias. Thaum Yes Xus tawm los yog zoo li no. 2 Cov nyob ua ke ntawd yog Xis Moos Pob Zeb, Tos Mas uas hu ua Dis Dws Mos, Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv. 3 Xis Moos Pob Zeb hais rau lawv tias : "Kuv yuav mus puav ntses." Lawv hais rau nws tias : "Peb yuav nrog koj mus thiab." Lawv tawm mus lawv nce rau hauv lub nkoj. Hmo ntawd lawv puav tsis tau dab tsi li. 4 Thaum kaj ntug lawm, Yes Xus sawv nyob tim ntug dej. Tab sis cov thwj tim tsis paub tias yog Yes Xus. 5 Yes Xus thiaj hais rau lawv tias : "Cov me nyuam, nej puas muaj dab tsi noj ?" Lawv teb rau Yes Xus tias : "Tsis muaj." 6 Nws hais rau lawv tias : "Nej pov vas rau ntawm lub nkoj sab xis, nej yuav tau ntses." Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. 7 Tus thwj tim uas Yes Xus nyiam thiaj hais rau Pob Zeb tias : "Yog Huab Tais !" Xis Moos Pob Zeb hnov dheev tias yog Huab Tais, nws muab ib daim khaub ncaws khi kiag ntawm duav, vim nws liab qab, ces nws dhia mus rau hauv dej. 8 Lwm cov thwj tim mam li caij nkoj, vim lawv nyob tsis deb ntawm ntug nqhuab lawm, kwv yees deb li ob puas tshim xwb, thiab lawv cab lub nkoj nrog cov ntses los. 9 Thaum lawv nqes nkoj los txog saum av, lawv pom ib cub tawg thee nyob ntawd, hos muaj ib co ntses tso rau saud, thiab ib co ncuav mov. 10 Yes Xus hais rau lawv tias : "Nej nqa ib co ntses me uas nej nyuam qhuav puav tau los." 11 Xis Moos Pob Zeb nce mus hauv nkoj, nws rub lub vas mag ntses loj puv nkaus los rau saum av : tau ib puas tsib caug peb tus ntses ! Txawm tias puav tau ntses ntau npaum ntawd los lub vas kuj tsis ntuag. 12 Yes Xus hais rau lawv tias : "Nej los noj tshais." Tsis muaj ib tug thwj tim muaj cuab kav nug Yes Xus tias : "Koj yog leej twg ?" Vim lawv yeej paub tseeb tias yog Huab Tais. 13 Yes Xus txav los muab cov ncuav mov cev rau lawv, nws kuj muab cov ntses cev rau lawv thiab. 14 Zaum no yog zaum peb uas Yes Xus tawm los rau nws cov thwj tim pom, tom qab nws sawv hauv cov tuag rov los lawm..


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 26th April 2019, 8:02 am

    TIM 27 LUB 4 HLIS 2019

    Hnub Xya Thawj Yim Hnub hauv Lis Piam Hla Xyoo C Nruab Lis Piam Xyoo I

    Zaj Nyeem Ib: HAUJ LWM 4: 13-21


    13 Cov tuaj koom lub rooj sab laj pom tias Pob Zeb thiab Zam nkawd hais lus khov kho tsis muaj ua xyem xyav li, thiab lawv pom tias nkawd yog neeg tsis tau kawm txuj ci, tsis muaj kev txawj ntse li, nkawd yog neeg pej xeem xwb, ces lawv ua siab poob nthav. Lawv kuj rov zeem tau tias nkawd yog cov uas tau nrog Yes Xus ua ke thiab. 14 Tib lub sij hawm ntawd, lawv kuj pom tus neeg uas nkawd kho zoo, sawv ntsug nyob ze nkawd, ces lawv tsis pom qab teb nkawd dab tsi li. 15 Lawv kom neeg coj nkawd tawm ntawm lub tsev txiav txim mus, ces lawv mam sab laj ua ke. 16 Lawv hais tias "Peb yuav ua dab tsi rau ob tug neeg ntawd ? Qhov tias nkawd tau ua ib yam hwj huam yees ntxwv loj, mas tas cov neeg nyob Yes Lus Xas Les paub tas lawm, peb dag tsis tau tias nkawd tsis tau ua. 17 Tiam sis yuav kom cov pej xeem tsis txhob ntseeg coob zuj zus ntxiv, mas peb yuav tsum muab kev hem los txwv nkawd, tsis pub nkawd hais txog lub Npe ntawd ntxiv rau leej twg li." 18 Ces lawv hu Pob Zeb thiab Zam nkawd rov los, lawv txwv tsis kheev nkawd hais dab tsi txog los qhuab qhia txog Yes Xus lub npe li. 19 Tiam sis Pob Zeb thiab Zam nkawd teb hais tias : "Nej yog cov paub txiav saib Tswv Ntuj pom zoo kom wb yuav tsum xub mloog nej los mloog Tswv Ntuj dua, nej yog cov txiav txim . 20 Ntawm wb mas yuav kom wb tsis txhob tshaj tej yam wb tau pom tau hnov mas wb ua tsis tau li ntawd." 21 Lawv thiaj hem nkawd ntau yam ntxiv, ces lawv cia li tso nkawd mus; lawv tsis pom qab muab txim dab tsi rau nkawd vim lawv ntshai tsoom pej xeem; cov neeg tas sawv daws cav txog Tswv Ntuj rau tej yam tau tshwm sim tuaj ntawd.

    NPN 118: 1+14-15AB, 16-18, 19-21

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    Nej ua HUAB TAIS tsaug, vim nws siab zoo,
    Nws hlub peb tas ib txhiab ib txhis.
    Kuv lub zog, kuv lub peev xwm yog HUAB TAIS !
    Nws yog tus tau cawm kuv.
    Muaj suab zoo siab suab yeej rog qw ntsuag qees
    nyob hauv tsoom neeg siab ncaj cov tsev tsam phooj :

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    HUAB TAIS txhais tes xis muaj zog loj !
    HUAB TAIS txhais tes xis ntaus yeej lawm!
    Kuv yuav tsis tuag, kuv yuav muaj txoj sia,
    thiab yuav tshaj txog HUAB TAIS cov dej num :
    HUAB TAIS tau rau txim hnyav rau kuv tiag,
    tiam sis nws tsis tau tso kuv raug txoj kev tuag.

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    Nej qhib lub rooj vag mus rau hauv txoj kev ncaj rau kuv,
    kuv yuav chaws mus ua HUAB TAIS tsaug.
    Ntawm no yog HUAB TAIS lub rooj vag ,
    Cov muaj siab ncaj yuav tau chaws mus hauv.
    Kuv yuav ua koj tsaug, vim koj tau teb kuv lawm,
    koj yog tus tau cawm kuv.

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: MK 16: 9-15

    9 Thaum Yes Xus sawv rov los, hnub chiv lub lis piam thaum sawv ntxov ntxov, nws xub tawm los rau Mab Liab Mas Ntas Las pom. Mab Liab yog tus uas Yes Xus ntiab xya tus dab phem tawm hauv nws mus. 10 Mab Liab mus qhia lub moo ntawd rau cov tau nrog Yes Xus ua ke, thaum lawv tab tom muaj kev tu siab thiab quaj ntsuag.
    11 Thaum lawv hnov hais tias Yes Xus muaj txoj sia nyob, thiab Mab Liab Mas Ntas Las tau pom nws lawm, mas lawv tsis ntseeg li. 12 Dhau qhov ntawd lawm, Yes Xus ua ib tug txawv me ntsis tawm tuaj rau ob leeg hauv lawv pom thaum nkawd tab tom taug kev mus tom cov zos ua liaj ua teb. 13 Ob tug ntawd rov los qhia rau cov, tab sis lawv kuj tsis ntseeg nkawd li thiab.
    14 Thaum kawg thaum Pab Kaum Ib tab tom noj mov, Yes Xus tawm tuaj rau lawv pom, thiab nws yws yws lawv lub siab tsis xav ntseeg thiab lub siab tawv, vim lawv tsis ntseeg cov uas tau pom nws thaum nws nyuam qhuav sawv rov los. 15 Yes Xus hais rau lawv tias : "Nej mus thoob lub qab ntuj, thiab nej tshaj lub Moo Zoo rau txhua leej txhua tus paub.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 28th April 2019, 5:55 am

    TIM 29 LUB 4 HLIS 2019

    Hnub Ob Lis Piam Ob Caij Hla Xyoo C Nruab Lis Piam Xyoo I

    Hwm LN Catherine nyob Siena

    Zaj Nyeem Ib:       HAUJ LWM  4:   23-31


    23 Thaum lawv tso Pob Zeb thiab Zam nkawd tawm lawm, mas nkawd rov qab los nrog nkawd cov neeg nyob thiab nkawd piav tas tej yam uas cov leej choj thiab cov txwj laus tau hais rau nkawd. 24 Sawv daws hnov li ntawd mas sawv daws koom siab tsa suab thov Tswv Ntuj tias : "Huab Tais loj tas nrho, koj yog tus tsim lub ntuj lub teb, lub hiav txwv thiab tas ib puas tsav yam nyob hauv hiav txwv. 25 Koj yog tus tau siv peb txiv Das Vis koj tus tub txib lub ncauj los hais cov lus no nyob hauv Leej Ntuj Plig Ntshiab tias : ‘Vim li cas tsoom kuj cuab thiaj npau taws, vim li cas cov haiv neeg thiaj xav tau tej yam vwm ua luaj ? 26 Cov vaj nyob ntiaj teb sawv los tiv, cov thawj coj ua tej pab sib koom nrhiav kev tawm tsam Huab Tais thiab nws Leej Pleev.’ 27 Muaj tseeb li ntawd tiag, vim lawv tuaj sib sau nyob hauv lub nroog no koom tiv koj Leej Tub Txib Ntshiab Yes Xus uas koj tau Pleev nws; yog Hes Los thiab Poos Xyus Pis Las Tos nrog cov pej kum haiv neeg thiab nrog cov xeem neeg His Xas Lais tuaj sib koom  28 kom ua tau raws li koj txhais tes thiab koj lub tswv yim yeej tau teem puag ntxov los lawm kom muaj tuaj. 29 Huab Tais, nyem no koj ntsia saib lawv hem peb; thov koj pab koj cov tub txib kom lawv lub siab muaj peev xwm tshaj koj lo lus; 30 thov koj cev tes los ua hwj huam kho cov neeg mob kom zoo hlo, thiab ua tej lub cim, thiab tej yam txaus qhuas nyob hauv koj Leej Tub Ntshiab Yes Xus lub npe."
    31 Lub caij lawv teev ntuj li ntawd tas, mas qhov chaw uas lawv tuaj sis sau qeeg nkaws; Leej Ntuj Plig Ntshiab los nyob puv tas lawv txhua tus tej siab ntsws, ces lawv muaj peev xwm tshaj Tswv Ntuj lo lus ntxiv mus.

    NPN      2:   1-3, 4-7A, 7B-9

    Txais:    (11d)  Tas cov vam khom Huab Tais lawv txoj hmoov zoo.
    los:   Alleluia.

    Vim li cas cov kuj cuab yuav npau taws,
    Cov haiv neeg yuav ntxhi xyib xyaub tsis muaj qab hau?
    Cov vaj nyob ntiaj teb sawv ntxeev siab, cov nom tswv sib tuav tswv yim
    nrhiav kev tawm tsam HUAB TAIS thiab nws leej pleev tias :
    "Peb nriaj kom nkawd cov saw khi peb tu,
    "peb muab nkawd tej saw hlau hle pov tseg !"

    Txais:    (11d)  Tas cov vam khom Huab Tais lawv txoj hmoov zoo.
    los:   Alleluia.

    Tus zaum saum txheej ntuj siab tuaj dab ros.
    HUAB TAIS thuam lawv.
    Nws lub siab ceev ua rau lawv ntshai,  
    Nws hais lus npau taws rau lawv tias:
    "Kuv tau pleev roj rau kuv tus vaj
    nyob saum Xis Yoos, kuv lub roob ntshiab."
    Kuv yuav tshaj HUAB TAIS txoj cai tawm.

    Txais:    (11d)  Tas cov vam khom Huab Tais lawv txoj hmoov zoo.
    los:   Alleluia.

    HUAB TAIS hais rau kuv tias : 'Koj yog kuv leej tub.
    Hnub no kuv tau xeeb koj los.
    Koj thov kuv, mas kuv yuav muab
    tsoom kuj cuab los ua cuab tam pub rau koj,
    kuv yuav muab lub ntiaj teb mus txog tim npoo ntuj los ua koj tug.
    Koj yuav tuav ib tug cwj hlau los tswj lawv.
    Koj yuav tsoo lawv ntsoog tas xws li lub lauj kaub av."

    Txais:    (11d)  Tas cov vam khom Huab Tais lawv txoj hmoov zoo.
    los:   Alleluia.

    As Les Lus Yas:       KOS LOS XAIS   3:   1

    Txais:   As les lus yas, as les lus yas.

    Nej twb tau nrog Leej Pleev sawv rov los lawm,
    mas nej yuav nrhiav tej yam nyob txheej siab saud,
    uas yog qhov chaw Leej Pleev zaum ntawm Tswv Ntuj phab xis.

    Txais:   As les lus yas, as les lus yas.

    Ntawv Moo Zoo:        ZAM   3:   1-8

    1 Nyob hauv cov Fas Lis Xais, muaj ib tug hu ua Nis Kos Des Mos, nws yog cov Yus Das ib tug thawj coj. 2 Nws tuaj cuag Yes Xus hmo ntuj, nws hais rau Yes Xus tias : "Las Npis, peb paub tias koj yog ib tug xib hwb tuaj ntawm Tswv Ntuj tuaj, vim yeej tsis muaj leej twg ua tau cov cim koj ua, yog Tswv Ntuj tsis nrog nws nyob." 3 Yes Xus teb rau Nis Kos Des Mos tias : “Kuv hais qhov muaj tseeb tiag rau koj : Tus tsis yug saum txheej siab los, mas nws pom tsis tau Tswv Ntuj lub Ceeb Tsheej.” 4 Nis Kos Des Mos hais rau Yes Xus tias : "Ib tug neeg laus lawm, nws yuav ua li cas rov yug los tau ? Nws puas rov mus tau rau hauv nws niam plab ib zaug ntxiv, mam rov yug los dua ?” 5 Yes Xus teb tias : “Kuv hais qhov muaj tseeb tiag rau koj: Tus tsis yug ntawm dej thiab ntawm Leej Ntuj Plig los, mas nws yuav mus tsis tau hauv Tswv Ntuj lub Ceeb Tsheej. 6 Tus uas yug ntawm lub cev nqaij los, mas nws yog nqaij; tus uas yug ntawm Leej Ntuj Plig los, mas nws yog ntsuj plig. 7 Koj txhob poob siab vim kuv hais rau koj tias : Nej yuav tsum yug ntawm txheej siab los. 8 Cua xav tshuab lawm seem twg kuj tau, koj hnov cua nrov, tab sis koj tsis paub tias cua tuaj qhov twg tuaj los cua mus lawm qhov twg li. Tus uas yug ntawm Leej Ntuj Plig los kuj zoo ib yam li ntawd thiab.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 29th April 2019, 11:45 am

    TIM 30 LUB 4 HLIS 2019

    Hnub Peb Lis Piam Ob Caij Hla Xyoo C Nruab Lis Piam Xyoo I

    Hwm LN Pis Yus V (St Pius V)

    Zaj Nyeem Ib HAUJ LWM 4: 32-37


    32 Tas tsoom ntseeg sawv daws koom ib lub siab ib lub tswv yim xwb. Tej yam twb yog nws li, tsis kav tsis muaj leej twg yuav hais tias yog nws tug nkau sxwb, lawv nyias muab nyias tug los ua sawv daws tug. 33 Cov Hauv Paus Xa Lus muaj hwj huam loj, lawv ua tim khawv txog Huab Tais Yes Xus sawv rov los, sawv daws hwm lawv zoo kawg. 34 Nyob hauv lawv, tsis muaj ib tug yuav tshaib nqhis dab tsi : vim tias cov uas muaj liaj muaj teb, muaj vaj tse, muab muag tas huv si, 35 lawv nqa tus nqi uas muag tau tuaj tso ntawm cov Hauv Paus Xa Lus ko taw. Lawv mam muab faib rau sawv daws kom nyias tau txaus nyias siv. 36 Muaj ib tug hu ua Yos Xes, cov Hauv Paus Xa Lus hu nws ua Npas Nas Npes - lub npe no txhais tias: tus txawj txhawb neeg lub siab, nws yog xeem Les Vis, nws yug los nyob Kws Plos. 37 Npas Nas Npes muaj ib daim teb, nws muab muag, nws coj cov nyiaj tuaj tso rau ntawm cov Hauv Paus Xa Lus ko taw.

    NPN 93: 1AB, 1CD-2, 5

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    HUAB TAIS ua vaj, nws hnav hwj chim ci ntsa iab.
    HUAB TAIS hnav zam, nws muab lub zog los sia duav.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    Nws tsim Lub ntiaj teb nyob ruaj nreb, tsis pub txav chaw.
    Koj lub theej kiab yeej nyob ruaj khov kho txij puag thaum ub los,
    Huab Tais, koj yeej ib txwm nyob txhiab niag tim puas xyoo los lawm.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    Koj cov cai tswj fwm tsim nyog ntseeg tas nrho,
    Huab Tais, txoj kev ntshiab tsab koj lub tsev
    kom zoo mus li ntev niaj ntau xyoo.

    Txais: (1a) HUAB TAIS ua vaj, nws hnav hwj chim muaj tsim.
    los: As les lus yas.

    As Les Lus Yas ZAM 3: 14-15

    Txais: As les lus yas, as les lus yas.

    Neeg Leej Tub yuav tsum raug muab tsa siab,
    kom xwv txhua tus uas ntseeg txog nws muaj txoj sia nyob mus li.

    Txais: As les lus yas, as les lus yas.

    Ntawv Moo Zoo ZAM 3: 7B-15

    Yes Xus hais rau Nis Kos Des Mos tias:
    7b Nej yuav tsum yug saum txheej siab los. 8 Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, los cua mus lawm qhov twg. Tus uas yug ntawm Leej Ntuj Plig los kuj zoo ib yam li ntawd thiab.” 9 Nis Kos Des Mos teb rau Yes Xus tias : "Yuav ua zoo li ntawd tau li cas?” 10 Yes Xus hais rau Nis Kos Des Mos tias : "Koj yog cov His Xas Lais ib tug xib hwb, koj tseem tsis paub tej ntawd thiab lod? 11 Kuv hais qhov muaj tseeb tiag rau koj, peb hais yam peb paub, peb ua tim khawv txog tej uas peb pom, tab sis nej tsis txais peb cov lus ua tim khawv. 12 Thaum kuv hais txog tej yam nyob ntiaj teb no rau nej, nej twb tsis ntseeg. Yog kuv hais txog tej yam nyob saum ntuj rau nej, mas nej yuav ua cas ntseeg tau ? 13 Tsis muaj leej twg tau nce mus saum ntuj dua li, tsuas yog tus nqes saum ntuj los, uas yog Neeg Leej Tub xwb. 14 Neeg Leej Tub yuav tsum raug muab tsa siab xws li Mais Xes tau tsa tus nab nyob teb chaws suab puam, 15 kom xwv txhua tus ntseeg txog nws, muaj txoj sia nyob mus li.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 30th April 2019, 5:22 am

    TIM      1      LUB      5      HLIS      2019

    Hnub Plaub Lis Piam Ob Caij Hla Xyoo C Nruab Lis Piam Xyoo I

    Hwm LN Yos Xes tus Ua Hauj Lwm (St Joseph the Worker)

    Zaj Nyeem Ib:       HAUJ LWM  5:   17-26


    17 Tus thawj leej choj thiab nws cov neeg uas yog tog Xas Dus Kais sawv tsees, lawv khib kawg, 18 ces lawv ntes cov Hauv Paus Xa Lus coj mus pov rau hauv lub tsev loj faj kaw cov pej xeem. 19 Tab sis hmo ntuj, Huab Tais tus Tshiab qhib cov qhov rooj tsev loj faj, nws coj lawv tawm sab nraud, ces nws hais rau lawv tias : 20 "Nej mus sawv ntsug nyob hauv lub Tuam Tsev Teev Ntuj, nej tshaj cov lus qhia txog Txoj Sia no rau tsoom pej xeem." 21 Cov Hauv Paus Xa Lus ua raws li ntawd : thaum kaj ntug txoog, lawv chaws mus hauv lub Tuam Tsev Teev Ntuj, ces lawv pib qhuab qhia. Thaum ntawd, tus thawj leej choj nrog nws cov neeg tuaj txog. Lawv hu cov Xas Nes Nrees thiab cov txwj laus hauv tsoom tub ki His Xas Lais tas huv si tuaj. Ces lawv tso neeg mus coj cov Hauv Paus Xa Lus tom tsev loj faj los. 22 Thaum cov tub ceev xwm mus txog, lawv tsis pom cov Hauv Paus Xa Lus nyob hauv tsev loj faj lawm, lawv thiaj rov los ceeb toom, 23 lawv hais tias: "Peb mus pom lub tsev loj faj kaw zoo zoo, hos cov zov keeb nyob rawv ntawm cov qhov rooj. Tab sis thaum peb qhib qhov rooj, peb tsis pom leej twg nyob sab hauv li." 24 Tus thawj tub ceev xwm zov lub Tuam Tsev Teev Ntuj thiab cov thawj leej choj hnov cov lus ntawd, lawv nyob hab nuv tsis to taub tias qhov ntawd yog vim li cas. 25 Ces txawm muaj ib tug neeg tuaj ceeb toom rau lawv tias : "Cov neeg uas nej muab kaw hauv tsev loj faj, mas lawv nyob hauv lub Tuam Tsev Teev Ntuj tab tom sawv ntsug qhuab qhia tsoom pej xeem." 26 Tus thawj tub ceev xwm thiaj nrog nws cov neeg mus coj cov Hauv Paus Xa Lus zoo zoo los, lawv tsis ua phem, vim lawv ntshai tsam tsoom pej xeem txawb pob zeb tua lawv.

    NPN       34:   2-3, 4-5, 6-7, 8-9


    Txais: (7a) Huab Tais mloog tus pluag lub suab quaj.
    los : As les lus yas.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Kuv tus plig tau koob meej yog nyob hauv HUAB TAIS;
    kom tus neeg me hnov thiab zoo siab.

    Txais: (7a) Huab Tais mloog tus pluag lub suab quaj.
    los : As les lus yas.

    Nej nrog kuv cav txog HUAB TAIS lub koob meej,
    peb sawv daws ua ke qhuas nws lub npe.
    Kuv nrhiav HUAB TAIS, nws tau teb kuv,
    thiab tau cawm kuv ntawm tas kuv tej kev ntshai.

    Txais: (7a) Huab Tais mloog tus pluag lub suab quaj.
    los : As les lus yas.

    Nej vam txog HUAB TAIS, ces nej ntsej muag yuav kaj lug luag ntxhi,
    nej ntsej muag yuav tsis liab ploog vim kev txaj muag.
    Thaum tus pluag hu, HUAB TAIS mloog
    thiab yuav cawm nws dim ntawm nws tej kev nyuaj ntxhov.

    Txais: (7a) Huab Tais mloog tus pluag lub suab quaj.
    los : As les lus yas.

    HUAB TAIS tus tshiab tsa tsev tsam phooj
    ncig cov neeg hwm nws thiab cawm lawv dim.
    Nej saj ces nej yuav pom tias HUAB TAIS siab zoo npaum li cas.
    Tus muaj hmoov zoo yog tus mus nkaum nyob hauv HUAB TAIS.

    Txais: (7a) Huab Tais mloog tus pluag lub suab quaj.
    los : As les lus yas.

    As Les Lus Yas:       ZAM  3:   16

    Txais: As les lus yas, as les lus yas.

    Tswv Ntuj hlub lub qab ntuj neeg npaum no,
    nws thiaj muab nws Leej Tub twm zeej rau,
    kom xwv tus ntseeg txog nws muaj txoj sia nyob mus li.

    Txais: As les lus yas, as les lus yas.

    Ntawv Moo Zoo:       ZAM  3:   16-21

    16 Tswv Ntuj hlub lub qab ntuj neeg npaum no, nws thiaj muab nws Leej Tub twm zeej rau, kom xwv leej twg ntseeg txog Leej Tub txhob tuag, tab sis kom nws muaj txoj sia nyob mus li. 17 Tswv Ntuj tsis tau xa Leej Tub tuaj hauv lub qab ntuj kom tuaj muab txim rau qab ntuj neeg, nws xa Leej Tub tuaj kom tau cawm lub qab ntuj neeg. 18 Tus twg ntseeg txog Leej Tub, nws yuav tsis raug txiav txim. Tus twg tsis ntseeg, nws twb raug txiav txim lawm, vim nws tsis ntseeg txog Tswv Ntuj Leej Tub twm zeej lub npe. 19 Kev txiav txim lub ntsiab yog li no : Qhov pom kev tuaj nyob hauv lub qab ntuj neeg, tab sis tsoom neeg nyiam qhov tsaus ntuj dua qhov pom kev, vim lawv ua cov hauj lwm phem. 20 Tus twg ua qhov phem, mas nws ntxub qhov pom kev, ces nws tsis los nyob hauv qhov pom kev, vim nws ntshai tsam nws cov hauj lwm phem yuav qhib tawm los. 21 Hos tus ua qhov tseeb, mas nws los nyob hauv qhov pom kev, kom luag pom tseeb tias nws ua nws cov hauj lwm nyob hauv Tswv Ntuj.



    Last edited by Mim on 1st May 2019, 3:06 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 30th April 2019, 6:21 am

    TIM      2      LUB      5      HLIS      2019

    Hnub Tsib Lis Piam Ob Caij Hla Xyoo C Nruab Lis Piam Xyoo I

    Hwm LN Athanasius, ua Tswv Qhia thiab Kws Txuj Kev Ntseeg

    Zaj Nyeem Ib:       HAUJ LWM  5:   27-33


    27 Lawv coj cov Hauv Paus Xa Lus los, lawv kom mus sawv ntawm cov txwj laus Xas Nes Nrees xub ntiag. Tus Thawj leej choj nug cov Hauv Paus Xa Lus,  28 nws hais tias : "Peb twb txwv nej, tsis kheev nej siv lub npe ntawd los qhuab qhia. Tab sis nej tseem coj nej zaj qhuab qhia mus hais thoob Yes Lus Xas Les. Yog nej xav kom tus neeg ntawd cov ntshav rov poob los rau peb ris xwb." 29 Ces Pob Zeb thiab cov Hauv Paus Xa Lus teb tias : "Peb yuav tsum mloog Tswv Ntuj lus zoo dua mloog tib neeg lus. 30 Peb cov yawg koob tus Tswv Ntuj tau tsa Yes Xus sawv rov los lawm, nws uas nej txhais tes tau muab tua dai saum ntoo.  31 Tswv Ntuj tau tsa nws nyob siab ntawm Tswv Ntuj sab xis los ua tus Thawj thiab tus Cawm Seej, kom tau pub txoj kev thov txhaum thiab kev zam txhaum rau His Xas Lais. 32 Peb yog cov tim khawv pom tej yam ntawd, thiab Leej Ntuj Plig Ntshiab uas Tswv Ntuj pub rau cov neeg mloog nws lus kuj ua tim khawv txog thiab."
    33 Lawv hnov li ntawd mas lawv npau taws kawg, lawv xav muab cov Hauv Paus Xa Lus tua.

    NPN       34:   2+9, 17-18, 19-20

    Txais: (7a) Huab Tais mloog tus pluag lub suab quaj.
    los : As les lus yas.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Nej saj ces nej yuav pom tias HUAB TAIS siab zoo npaum li cas.
    Tus muaj hmoov zoo yog tus mus nkaum nyob hauv HUAB TAIS.

    Txais: (7a) Huab Tais mloog tus pluag lub suab quaj.
    los : As les lus yas.

    HUAB TAIS tig ntsej muag mus tiv cov neeg phem,
    rhuav kom txhob muaj kev nco txog lawv nyob ntiaj teb ntxiv.
    Thaum cov neeg ncaj hu, HUAB TAIS mloog lawv,
    thiab npo lawv dim ntawm tas lawv tej kev nyuaj siab.

    Txais: (7a) Huab Tais mloog tus pluag lub suab quaj.
    los : As les lus yas.

    HUAB TAIS nyob ze ze tus neeg muaj kev tu siab;
    nws pab cov neeg tag kev cia siab.
    Tus siab ncaj raug ntau yam kev nyuaj kev ntxhov,
    Tiam sis HUAB TAIS npo nws dim ntawm tas txhua yam.

    Txais: (7a) Huab Tais mloog tus pluag lub suab quaj.
    los : As les lus yas.

    As Les Lus Yas:       ZAM  20:   29

    Txais: As les lus yas, as les lus yas.

    Huab Tais hais tias: "Tos Mas, koj ntseeg vim koj tau pom kuv.
    Cov uas tsis tau pom tab sis lawv ntseeg, mas lawv txoj hmoov zoo!"

    Txais: As les lus yas, as les lus yas.

    Ntawv Moo Zoo:       ZAM  3:   31-36

    31 “Tus tuaj saum txheej siab tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob hauv ntiaj teb. Tus tuaj saum ntuj tuaj, nws nyob siab dua sawv daws, 32 nws ua tim khawv txog qhov nws tau pom thiab tau hnov, tab sis tsis muaj leej twg txais nws cov lus tim khawv. 33 Tus uas txais nws cov lus tim khawv, nws lees meej tias Tswv Ntuj yog tus tseeb. 34 Tus uas Tswv Ntuj xa tuaj, nws hais Tswv Ntuj cov lus, vim Tswv Ntuj pub Leej Ntuj Plig rau tsis xuas dab tsi luj. 35 Leej Txiv nyiam Leej Tub, nws tso tas ib puas tsav yam rau hauv Leej Tub txhais tes. 36 Tus ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, mas nws yuav tsis pom txoj sia, Tswv Ntuj lub siab npau taws yuav nyob rawv saum nws.”

    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 1st May 2019, 4:18 am

    TIM 3 LUB 5 HLIS 2019

    Hnub Rau Lis Piam Ob Caij Hla Xyoo C Nruab Lis PIam Xyoo I

    Hwm LN Fis Lis Pos thiab LN Yas Kos, ob tug Hauv Pais Xa Lus

    Zaj Nyeem Ib: 1 KLN 15: 1-8


    1 Cov kwv tij, kuv tshaj lub Moo Zoo uas kuv twb tau tshaj dua rau nej lawm; nej tau txais, thiab nej yeej nyob ruaj nreb hauv lub Moo Zoo ntawd. 2 Nej yuav tau txais kev cawm vim lub moo zoo ntawd, yog tias nej ntseeg raws nraim li kuv tau qhia rau nej, thiab nej tsis yog lam ntseeg dag xwb.
    3 Qhov tseem ceeb kuv tau xub qhia rau nej ua ntej tas nrho, kuj yog qhov kuv tus kheej tau txais los thiab: Yog qhov tias Leej Pleev tuag vim peb cov txhaum, raws li Ntawv tau hais tseg; 4 yog qhov tias lawv muab nws mus zwm ntxa, thiab hnub peb, nws sawv rov qab los, raws li Ntawv xub hais tseg; 5 yog qhov tias nws yees tawm los rau Pob Zeb pom, thiab rau pab kaum ob pom. 6 Tom qab ntawd, nws tseem yees tawm los rau cov kwv tij muaj tsib puas leej ib txhij pom; lawv cov coob tseem ua neej nyob tiam sis muaj qee leej twb ncaim mus lawm. 7 Nws kuj tseem tawm los rau Yas Kos pom, thiab rau tas cov Hauv Paus Xa Lus huv tib si pom. 8 Puag tom qab no, nws kuj yees tawm tuaj rau kuv pom thiab, txawm tias kuv zoo li ib tug me nyuam yug los tsis yog caij yog nyoog.

    NPN 19: 2-3, 4-5

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Cov txheej ntuj saud piav txog Tswv Ntuj lub koob meej,
    lub qab ntuj khwb tshaj cov hauj lwm nws txhais tes tsim los.
    Nruab hnub hais lo lus rau nruab hnub mloog,
    Hmo ntuj qhia rau hmo ntuj paub txog.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    Tsis muaj ib lo lus los ib zaj lus piav
    Uas leej tib neeg yuav tsis hnov txog.
    Lawv lub suab ncha puv tas ntiaj teb,
    lawv lo lus xa moo nrov txog
    tim npoo ntiaj teb kawg.

    Txais: (5) Lawv lo lus xa moo nrov mus thoob ntiaj teb.
    los: As les lus yas.

    As Les Lus Yas: ZAM 14: 6B, 9C

    Txais: As les lus yas, as les lus yas.

    Huab Tais hais tias:
    “Kuv yog Txoj Kev, yog Qhov Tseeb, thiab yog Txoj Sia;
    Fis Lis Pos, leej twg tau pom kuv ces yog pom Leej Txiv lawm.”

    Txais: As les lus yas, as les lus yas.

    Ntawv Moo Zoo: ZAM 14: 6-14

    6 Yes Xus hais rau Tos Mas tias : "Kuv yog Txoj Kev, yog Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis mus ntawm kuv mus. 7 Yog nej paub kuv, mas nej kuj paub kuv Txiv thiab. Txij nyem no, nej twb paub nws thiab tau pom nws lawm." 8 Fis Lis Pos hais rau Yes Xus tias : "Huab Tais, thov koj pub peb pom Leej Txiv, ces txaus peb siab lawm." 9 Yes Xus hais rau Fis Lis Pos tias : "Fis Lis Pos, kuv nrog nej nyob ntev npaum no, koj tseem tsis tau paub kuv thiab lod ? Tus twg pom kuv, ces yog nws pom Leej Txiv. Ua cas koj thiaj hais tau tias : 'Koj pub peb pom Leej Txiv' ? 10 Koj tsis ntseeg tias kuv nyob hauv Leej Txiv, thiab Leej Txiv nyob hauv kuv lod ? Cov lus uas kuv hais rau nej, tsis yog kuv hais kuv; yog Leej Txiv uas nyob txawm hauv kuv nws ua nws cov hauj lwm. 11 Nej ntseeg kuv mog tias kuv nyob hauv Leej Txiv, thiab Leej Txiv nyob hauv kuv; txawm nej tsis ntseeg los nej yuav tsum ntseeg vim cov hauj lwm.
    12 "Kuv hais qhov muaj tseeb tiag rau nej : Tus ntseeg txog kuv, nws kuj yuav ua cov hauj lwm kuv ua, thiab nws tseem yuav ua tej yam loj dua, vim kuv yuav mus cuag Leej Txiv. 13 Yam twg nej tuav txog kuv lub npe thov, mas kuv yuav ua yam ntawd, kom xwv Leej Txiv muaj koob meej nyob hauv Leej Tub. 14 Yog nej tuav txog kuv lub npe thov ib yam dab tsi, mas kuv yuav ua yam ntawd."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 2nd May 2019, 12:12 pm

    TIM 4 LUB 5 HLIS 2019

    Thawj Hnub Xya Lis Piam Ob Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 6: 1-7


    1 Lub caij ntawd, cov thwj tim coob zuj zus tuaj lawm. Ces cov Hes Las yws yws cov Hes Nplaws. Lawv hais tias niaj hnub thaum faib mov mas tsis muaj neeg nco txog lawv cov poj ntsuam Hes Las li. 2 Pab Kaum Ob thiaj hu tas nrho cov thwj tim tuaj sab laj, lawv hais tias : "Tsis phim peb yuav tso Tswv Ntuj lo lus tseg, es mus faib zaub faib mov ntawm cov rooj noj mov. 3 Cov kwv tij, nej nrhiav nyob hauv nej ib co txiv neej uas nto moo zoo, nej nrhiav xya leej kom yog neeg muaj Leej Ntuj Plig nyob puv hauv lawv thiab yog neeg thoob tsib. Peb yuav tsa lawv tuav txoj hauj lwm ntawd. 4 Hos peb, mas peb yuav mob siab hlo npuab txoj kev teev ntuj thiab tsob hwb Lo Lus.” 5 Cov lus no haum lub txoos siab, ces lawv xaiv Tes Fas Nos, uas nws yog ib tug neeg ntseeg ruaj, thiab muaj Leej Ntuj Plig Ntshiab nyob puv hauv nws, Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las uas yog ib tug neeg ntseeg tshiab nyob As Nthias Kias tuaj. 6 Lawv coj cov neeg no los rau cov Hauv Paus Xa Lus. Cov Hauv Paus Xa Lus thov ntuj tas, ces lawv tsa tes rau saum xya leej ntawd.
    7 Ces Tswv Ntuj lo lus hlob zuj zus tuaj. Cov thwj tim huam vam coob kawg nyob Yes Lus Xas Les. Muaj ib co leej choj coob kawg kuj los mloog txoj kev ntseeg thiab.

    NPN 33: 1-2, 4-5, 18-19

    Txais: (22) HUAB TAIS, thov kom koj txoj kev hlub roos peb, vim peb tso siab rau koj.
    Los : As les lus yas.

    Cov neeg siab ncaj, nej cia li zoo siab nyob hauv HUAB TAIS,
    txoj kev qhuas Huab Tais phim tus neeg siab ncaj.
    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws.

    Txais: (22) HUAB TAIS, thov kom koj txoj kev hlub roos peb, vim peb tso siab rau koj.
    Los : As les lus yas.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (22) HUAB TAIS, thov kom koj txoj kev hlub roos peb, vim peb tso siab rau koj.
    Los : As les lus yas.

    HUAB TAIS lub qhov muag saib ntsoov cov neeg hwm nws,
    thiab saib ntsoov cov tso siab rau nws txoj kev hlub.
    Nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (22) HUAB TAIS, thov kom koj txoj kev hlub roos peb, vim peb tso siab rau koj. .
    Los : As les lus yas.

    As Les Lus Yas

    Txais: As les lus yas, as les lus yas.

    Leej Pleev, tus tsim tas puas tsav yam, sawv rov los lawm,.
    nws khuv leej tas txhua haiv neeg.

    Txais: As les lus yas, as les lus yas.

    Ntawv Moo Zoo: ZAM 6: 16-21

    16 Thaum yav tsaus ntuj, Yes Xus cov thwj tim nqes mus nram dej ntuj,
    17 lawv nce hauv ib lub nkoj, lawv hla dej mus rau Kas Fas Naus nyob sab ntug dej tid. Twb tsaus ntuj lawm, tab sis Yes Xus tseem tsis tau los txog ntawm lawv.
    18 Muaj ib nthwv cua hlob ntsawj, ces dej ntuj kuj nphau zom zaws tuaj.
    19 Thaum cov thwj tim nquam nkoj los deb li nees nkaum tsib los peb caug ntsua muag lawm, ces lawv txawm pom Yes Xus mus kev saum dej ntuj, los ze zuj zus rau ntawm lub nkoj, ces lawv ntshai.
    20 Tab sis Yes Xus hais rau lawv tias : "Yog kuv, nej tsis txhob ntshai."
    21 Lawv thiaj npaj tos nws los rau hauv nkoj. Tab sis tam sis ntawd lub nkoj cia li mus txog qhov chaw lawv yuav mus lawm.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 4th May 2019, 7:33 am

    TIM 6 LUB 5 HLIS 2019

    Hnub Ob Lis Piam Peb Caij Hla Xyoo C Nruab Lis Piam Xyoo I

    Zaj Nyeem Ib: Hauj Lwm 6: 8-15


    8 Tes Fas Nos yog ib tug neeg txais txiaj ntsim ntau thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos hu ua tsev txoos rau cov Qhev Dim Txim, rau cov neeg Xis Les Nas, cov neeg As Les Xas Nrias, cov eeg Xis Lis Xias, thiab cov neeg As Xias tuaj. Lawv tuaj nrog Tes Fas Nos sib cav. 10 Tab sis lawv cav tsis yeej Tes Fas Nos, vim nws muaj kev thoob tsib, thiab muaj Leej Ntuj Plig qhia nws hais lus. 11 Ces lawv txhob ib co neeg kom liam tias : "Peb hnov tus neeg ntawd hais ib co lus thuam Mais Xes thiab thuam Tswv Ntuj." 12 Lawv haub tsoom pej xeem, tsoom laus neeg, thiab tsoom kws ntawv kom sawv daws npau taws. Ces lawv nyas kom tau ntes Tes Fas Nos, lawv coj nws mus rau ntawm lub rooj txwj laus Xas Nes Nrees. 13 Lawv coj ib co tim khawv cuav tuaj liam tias : "Tus neeg ntawd hais lus phem tsis tseg thuam lub Tsev Ntshiab no thiab Txoj Cai. 14 Peb tau hnov nws hais tias Yes Xus tus neeg Nas Xas Les, yuav rhuav lub Chaw no, thiab nws yuav hloov tej kab ke uas Mais Xes muab rau peb." 15 Tas cov uas zaum hauv lub rooj txwj laus Xas Nes Nrees tig qhov muag ntsia nruj nreem rau Tes Fas Nos, lawv pom Tes Fas Nos lub ntsej muag zoo xws li ib tug Tshiab lub ntsej muag.

    NPN 119: 23-24, 26-27, 29-30

    Txais: (1ab) Cov tau txoj hmoov zoo yog cov neeg
    ua raws nraim HUAB TAIS Txoj Cai!
    los: Alleluia.

    Txawm tias cov tub huav tais zaum sab laj nrhiav kev liam rau kuv,
    los koj tus tub txib tseem xav ntsoov txog koj tej cai lij choj.
    Koj cov kev cai ua rau kuv zoo siab,
    Koj cov kev cai qhia tswv yim rau kuv.

    Txais: (1ab) Cov tau txoj hmoov zoo yog cov neeg
    ua raws nraim HUAB TAIS Txoj Cai!
    los: Alleluia.

    Kuv qhia kuv txoj kev rau koj, koj twb teb kuv lawm,
    thov koj qhia koj txoj cai lij choj rau kuv paub.
    Thov koj ua kom kuv to taub txog txoj kev mloog koj cov lus qhuab qhia,
    kuv yuav mob siab xav txog koj cov dej num uas txaus qhuas.

    Txais: (1ab) Cov tau txoj hmoov zoo yog cov neeg ua
    raws nraim HUAB TAIS Txoj Cai!
    los: Alleluia.

    Thov koj tshem txoj kev dag mus deb ntawm kuv,
    koj muab koj Txoj Cai pub ua txiaj ntsim rau kuv.
    Kuv tau xaiv txoj kev tseeb taug,
    kuv ua raws nraim koj cov cai tswj siab.

    Txais: (1ab) Cov tau txoj hmoov zoo yog cov neeg
    ua raws nraim HUAB TAIS Txoj Cai!
    los: Alleluia.

    As Les Lus yas: MT 4: 4B


    Txais: As les lus yas, as les lus yas.

    Neeg tsis kawg muab mov los yug siav xwb,
    neeg tseem yuav yuav txhua lo lus tawm ntawm
    Tswv Ntuj lub ncauj los yug siav thiab.

    Txais: As les lus yas, as les lus yas.

    Ntawv Moo Zoo: Zam 6: 22-29

    22 Tag kis kaj ntug, tsoom neeg uas nyob sab dej ntuj tim ub pom tias tsuas muaj ib lub nkoj nyob ntawd xwb. Lawv kuj pom tias Yes Xus tsis nrog nws cov thwj tim nce nkoj mus, cov thwj tim lawv mus lawv xwb. 23 Ces muaj ib co nkoj tuaj Tis Npes Lias tuaj, lawv los ze ntawm qhov chaw uas cov neeg tau noj cov mov thaum Huab Tais ua Ntuj tsaug. 24 Thaum tsoom pej xeem pom tias Yes Xus tsis nyob ntawd lawm, nws cov thwj tim los kuj tsis nyob lawm thiab, ces lawv nce mus hauv ib co nkoj, lawv mus nrhiav Yes Xus tim Kas Fas Naus. 25 Lawv tuaj nrhiav tau Yes Xus rau sab ntug dej tid, lawv hais rau nws tias : "Las Npis, thaum twg koj tuaj ntawm no lawm ?" 26 Yes Xus teb rau lawv tias : "Kuv hais qhov tseeb tiag rau nej : Nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab xwb. 27 Nej tsis txhob ua hauj lwm nrhiav cov txhiam xws txawj lwj, nej yuav tsum ua hauj lwm nrhiav cov txhiam xws pub txoj sia nyob mus li, uas yog Neeg Leej Tub yuav pub rau nej. Vim nws yog tus uas Leej Txiv Tswv Ntuj ntaus thwj rau lawm." 28 Lawv hais rau Yes Xus tias : "Peb yuav ua dab tsi, peb thiaj ua tau Tswv Ntuj cov hauj lwm ?" 29 Yes Xus teb rau lawv tias : "Tswv Ntuj txoj hauj lwm yog zoo li no : Kom nej ntseeg txog tus nws xa tuaj."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 5th May 2019, 7:13 am

    TIM 7 LUB 5 HLIS 2019

    Hnub Peb Lis Piam Peb Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 7: 51—8:1A


    Tes Fas Nos hais rau cov neeg, cov txwj laus thiab cov kws Ntawv Ntshiab tias:
    51 “Nej yog neeg xwb qwb txhav, uas lub siab thiab pob ntseg tsis txais lub cim txiav, nej thiaj tawv ncauj tsis mloog Leej Ntuj Plig Ntshiab. Nej coj yog nkaus li nej cov yawg koob thiab. 52 Puas muaj ib tug yaj saub uas nej cov yawg koob tsis tau hiam li? Lawv tua cov yaj saub uas tau xub hais txog tus Siab Ncaj uas yuav tuaj. Tus Siab Ncaj yog tus uas nej nyuam qhuav ntxeev siab rau nws, thiab nyuam qhuav muab nws tua. 53 Nej tau txais Txoj Cai ntawm cov Tshiab los, tab sis nej tsis ua raws li Txoj Cai.”
    54 Thaum lawv hnov cov lus no, mas lawv npau taws ceev kawg. Lawv zim hniav zaig rau Tes Fas Nos. 55 Tiam sis Leej Ntuj Plig Ntshiab nyob puv hauv nws lub siab. Nws tsa muag ntsia ntsoov rau saum ntuj, nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg, ces sawv daws ua ib tsaug khiav mus rau Tes Fas Nos. 58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov ua tim khawv tso lawv tej tsho loj rau ntawm ib tug tub hluas hu ua Xauv ko taw. 59 Thaum lawv tab tom txawb pob zeb tua Tes Fas Nos mas Tes Fas Nos hu txog Ntuj. Nws hais tias : "Huab Tais Yes Xus, thov koj txais kuv tus ntsuj plig." 60 Ces nws txhos caug ntua, nws hais ib los nrov nrov tias : "Huab Tais, koj txhob muab qhov txhaum ntawd rau lawv ris." Thaum nws hais lo lus ntawd tas, nws vau hlo thiab tsaug zog lawm. (Los lus “tsaug zog” no txhais tias nws tas sim neej lawm)
    8 1 Hos Xauv, mas nws pom zoo kom lawv muab Tes Fas Nos tua.

    NPN 31: 3CD-4, 6+7B+8A, 17+21AB

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Thov koj ua kuv lub tsua muaj zog,
    ua lub tsev xov ntsa zeb rau kuv nkaum.
    Vim kuv lub tsua kuv lub yeej ntsa zeb yeej yog koj;
    vim koj lub npe, thov koj tuav kuv tes coj kev kev.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Kuv tso kuv tus ntsuj plig rau hauv koj txhais tes.
    HUAB TAIS, Tswv Ntuj tus muaj kev tseeb, koj yog tus txhiv kuv.
    Kuv tso siab tas nrho rau Huab Tais,
    Kuv zoo siab hom khaj vim koj khuv leej kuv.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Thov cia koj lub ntsej muag ci tuaj rau saum koj tus tub txib,
    thov cawm kuv vim koj hlub kuv.
    Koj coj cov neeg hwm koj mus zais rau hauv koj xub ntiag,
    Deb ntawm cov neeg phem tej kev nkhaus.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    As Les Lus Yas: ZAM 6: 35AB

    Txais: As les lus yas, as les lus yas.

    Huab Tais hais tias, kuv yog cov mov pub txoj sia;
    leej twg tuaj cuag kuv yuav tsis tshaib ib zaug ntxiv.

    Txais: As les lus yas, as les lus yas.

    Ntawv Moo Zoo: ZAM 6: 30-35

    30 Tsoom neeg hais rau Yes Xus tias : "Koj yuav ua lub cim dab tsi rau peb pom, kom peb ntseeg koj ? Koj ua tau dab tsi ? 31 Peb cov yawg koob noj cov mov mas nas nyob teb chaws suab puam, raws li cov lus sau cia hais tias : "Nws pub cov mov tuaj saum ntuj tuaj rau lawv noj."
    32 Yes Xus thiaj hais rau lawv tias : "Kuv hais qhov tseeb tiag rau nej : Tsis yog Mais Xes pub cov mov tuaj saum ntuj tuaj rau nej, yog kuv Txiv pub cov tseem mov tuaj saum ntuj tuaj rau nej.
    33 Vim Tswv Ntuj cov mov yog tus uas nqes saum ntuj los pub txoj sia rau lub qab ntuj neeg."
    34 Lawv thiaj hais rau Yes Xus tias : "Huab Tais, thov koj pub cov mov ntawd rau peb noj mus li."
    35 Yes Xus hais rau lawv tias : “Kuv yog cov mov pub txoj sia. Tus tuaj cuag kuv nws yuav tsis tshaib ib zaug li, tus ntseeg txog kuv nws yuav tsis nqhis ib zaug li.”


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 7th May 2019, 12:30 pm

    TIM 8 LUB 5 HLIS 2019

    Hnub Plaub Lis Piam Peb Caij Hla

    Zaj Nyeem Ib: HAUJ LWM 8: 1B-8


    1b Hnub ntawd, lub Koom Txoos nyob Yes Lus Xas Les raug luag hiam loj kawg. Tas sawv daws tawg mus nyob nruab liaj nruab teb hauv cov xeev Yus Das thiab Xas Mas Lias. Tsuas tshuav cov Hauv Paus Xa Lus thiaj tsis khiav xwb. 2 Muaj ib co neeg ntseeg tuaj muab Tes Fas Nos lub cev mus faus, thiab lawv quaj nyiav nws nrov nrov. 3 Hos Xauv, mas nws nrhiav kev kom tau rhuav lub Koom Txoos. Nws mus ib lub tsev dhau ib lub tsev, nws cab cov txiv neej thiab cov poj niam huv si coj mus rau luag muab kaw. 4 Cov neeg uas tawg ncaim mus rau ntau qhov chaw, mas lawv mus txog twg lawv yeej tshaj lo lus txog lub Moo Zoo tsis tseg. 5 Yog vim li ntawd Fis Lis Pos thiaj mus rau nram ib lub nroog nyob Xas Mas Lias teb, nws tshaj txog Leej Pleev rau lawv. 6 Tas tsoom sid koom ua ib lub siab mob siab xav hnov cov lus uas Fis Lis Pos hais thaum lawv mloog nws thiab pom cov cim uas Fis Lis Pos ua. 7 Vim tias muaj dab phem tawm ntawm coob leej neeg raug dab mus, lawv qw tej suab nrov nrov; cov tuag ceg thiab cov ceg tawv coob leej kuj cia li zoo hlo. 8 Nyob hauv lub nroog ntawd, sawv daws zoo siab kawg nkaus.

    NPN 66: 1-3A, 4-5, 6-7A

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    Tas ntiaj teb, nej qw zoo siab rau Tswv Ntuj ;
    Nej hu nkauj cav txog nws lub npe muaj hwj chim,
    nej hais tej zaj lus cav txog nws lub koob meej.
    Nej hais rau Tswv Ntuj tias : "Koj tej num muaj hwj xyeej ua luaj !”

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    " Kom tas lub ntiaj teb tuaj pe hawm koj thiab hu nkauj cav txog koj,
    hu nkauj qhuas txog koj lub npe!”
    Nej tuaj xyuas Tswv Ntuj cov hauj lwm saib,
    Nws ua hauj lwm loj txaus qhuas nyob hauv As Das tsoom tub ki.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    Nws ua kom dej ntuj hloov ua av khov,
    lawv hla dej, dej tsis ntub lawv taw.
    Vim li ntawd, peb zoo siab nyob hauv nws.
    Nws lub hwj huam yuav kav sawv daws tas mus li.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    As Les Lus Yas: ZAM 6: 40

    Txais: As les lus yas, as les lus yas.

    Huab Tais hais tias:
    Txhua tus uas ntseeg txog Leej tub yuav muaj txoj sia nyob mus li,
    kuv yuav tsa nws sawv rov los thaum txog hnub kawg.

    Txais: As les lus yas, as les lus yas.

    Ntawv Moo Zoo: ZAM 6: 35-40

    35 Yes Xus hais rau lawv tias : "Kuv yog cov mov muaj txoj sia. Tus tuaj cuag kuv yuav tsis tshaib ib zaug li, tus ntseeg txog kuv nws yuav tsis nqhis ib zaug li.
    36 Kuv tau hais rau nej lawm tias : Nej twb pom kuv, los nej tsis ntseeg.
    37 Txhua yam uas kuv Txiv muab rau kuv yuav los cuag kuv. Tus tuaj cuag kuv, kuv yuav tsis ntiab nws rau nraum zoov.
    38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab.
    39 Tus Xa kuv tuaj lub siab xav, yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los.
    40 Qhov uas kuv Txiv nyiam yog zoo li no : kom txhua tus uas pom Leej Tub thiab ntseeg txog Leej Tub muaj txoj sia nyob mus li, ces Hnub Kawg, kuv yuav tsa nws sawv rov los."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 8th May 2019, 10:04 am

    TIM 9 LUB 5 HLIS 2019

    Hnub Tsib Lis Piam Peb Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 8: 26-40


    26 Huab Tais tus Tshiab hais rau Fis Lis Pos tias : "Koj sawv kev, koj mus lawm sab qab teb mus rau ntawm txoj kev uas nqes ntawm Yes Lus Xas Les mus rau nram Nkas Xas. Yog ib txog kev neeg taug tsis heev." 27 Fis Lis Pos thiaj sawv kev mus. Nws txawm mus ntsib ib tug neeg Es Thias Pias uas yog ib tug neeg sam, yog tus poj vaj Es Thias Pias hu ua Kaas Des ib tug nom loj. Nws yog tus tuav cov txhab nyiaj tas nrho. Nws tuaj mus teev ntuj pem Yes Lus Xas Les. 28 Thaum rov los, nws zaum hauv nws lub tsheb, ces nws nyeem tus yaj saub His Xais phau ntawv. 29 Leej Ntuj Plig hais rau Fis Lis Pos tias : "Koj mus caum lub tsheb ntawd thiab koj nce mus rau saud." 30 Fis Lis Pos thiaj khiav mus caum, thiab hnov tug neeg nyeem His Xais phau ntawv. Fis Lis Pos nug nws tias : "koj puas to taub qhov koj nyeem?" 31 Tus nom teb hais tias : "Yog tsis muaj neeg qhia rau kuv, mas kuv yuav ua li cas to taub ?" Ces nws caw kom Fis Lis Pos nce los zaum ntawm nws ib sab.
    32 Zaj uas tus nom tab tom nyeem yog zaj no : “Nws zoo li ib tug yaj luag cab nrhuj nrheev mus rau hauv tsev tua tsiaj. Nws kuj zoo li ib tug me nyuam yaj nyob twj ywm ntsiag to rau tus uas chais nws cov plaub, nws tsis qhib ncauj li. 33 Nyob hauv nws txoj kev poob ntsej muag, luag tsis muab kev ncaj ncees rau nws. Leej twg thiaj yuav piav txog tiam nws nyob ? Vim tias luag twb txo nws txoj sia kom ploj hauv ntiaj teb mus lawm.”
    34 Tus nom sam hais rau Fis Lis Pos tias : "Koj sim qhia saib, tus yaj saub hais txog leej twg zoo li ntawd ? Nws puas rov hais txog nws, los nws hais txog lwm tus ?" 35 Fis Lis Pos thiaj qhib ncauj hais lus. Nws siv cov lus sau tseg ntawd los qhia txog Yes Xus lub Moo Zoo rau tus nom sam. 36 Thaum nkawd mus kev, txog ib qho chaw muaj dej, ces tus nom sam hais tias : "Ntawm no muaj dej. Ua cas kuv thiaj txais tsis tau lub cim ntxuav ?" 37 Fis Lis Pos hais tias: “Yog koj muab tas koj lub siab los ntseeg mas koj txais tau.” Tus nom sam teb tias: “Kuv ntseeg tias Yes Xus Pleev yog Tswv Ntuj Leej Tub.” 38 Ces nws kom lub tsheb nres. Fis Lis Pos thiab tus nom sam nkawd ob leeg nqes mus hauv dej. Fis Lis Pos thiaj ua lub cim ntxuav rau nws. 39 Thaum nkawd tawm hauv dej los, Huab Tais tus Ntsuj Plig nqa Fis Lis Pos mus lawm, ces tus nom sam tsis pom Fis Lis Pos ntxiv. Tab sis nws zoo siab xyiv fab hlo taug nws txoj kev mus ntxiv. 40 Hos Fis Lis Pos mas nws tshwm hauv lub zos As Ntxos. Nws taug kev hla mus ntxiv, nws tshaj lub Moo Zoo rau cov nroog uas nws hla tas huv si, mus txog ntua rau Xes Ntxas Les.

    NPN 66: 8-9, 16-17, 20

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    Tsoom haiv neeg, nej cav txog peb tus Tswv Ntuj,
    nej qw nrov nrov cav txog nws;
    vim nws yog tus pub txoj sia rau peb tus ntsuj plig
    thiab nws tsis cia kom peb npleem ko taw.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas

    Tas nej cov uas hwm Tswv Ntuj, nej mloog kuv tshaj tawm
    txog qhov uas nws tau ua rau kuv.
    Thaum kuv qhib ncauj thov nws,
    Lo lus qhuas twb nyob ntawm kuv tsis nplaig lawm.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas

    Thov kom Tswv Ntuj nto meej nto moo,
    vim nws tsis xyeeb kuv zaj thov,
    nws tsis tshem nws txoj kev hlub mus deb kuv!

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    As Les Lus Yas: ZAM 6: 51

    Txais: As les lus yas, as les lus yas.

    Huab Tais hais tias, kuv yog cov mov muaj txoj sia nqes saum ntuj los,
    leej twg noj cov mov no yuav ciaj nyob mus li.

    Txais: As les lus yas, as les lus yas.

    Ntawv Moo Zoo: ZAM 6: 44-51

    Yes Xus hais rau lawv tias:
    44 “Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. Hos kuv, mas hnub kawg, kuv yuav tsa nws sawv rov qab los. 45 Muaj ntawv sau nyob hauv cov Yaj Saub hais tias: ‘Tswv Ntuj yog tus yuav qhuab qhia lawv.’ Txhua tus uas mloog Leej Txiv hais thiab kawm ntawm Leej Txiv, mas nws tuaj cuag kuv. 46 Tsis muaj leej twg tau pom Leej Txiv, tsuas yog tus tuaj ntawm Tswv Ntuj tuaj thiaj tau pom Leej Txiv xwb. 47 Kuv hais qhov muaj tseeb tiag rau nej : Tus ntseeg, nws muaj txoj sia nyob mus li. 48 Kuv yog cov mov muaj txoj sia. 49 Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. 50 Tus no yog cov mov nqes saum ntuj los, kom lee twg noj tus no, nws tsis txhob tuag. 51 Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab rau yog kuv lub cev nqaij kom lub qab ntuj neeg muaj txoj sia."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 8th May 2019, 2:36 pm

    TIM 10 LUB 5 HLIS 2019

    Hnub Rau Lis Piam Peb Caij Hla Xyoo C Nruab Lis Piam Xyoo I

    Hwm LN Damien de Veuster (los tseem hu ua LN Damien nyob Molokai)

    Zaj Nyeem Ib: HAUJ LWM 9: 1-20


    1 Hais txog Xauv, mas nws tseem niaj hnub xav ntsoov txog qhov hiam thiab tua Huab Tais cov thwj tim. Nws mus cuag tus thawj leej choj. 2 Nws thov kom tus thawj leej choj ua ntawv tso cai rau nws mus Das Mas mus xyuas hauv cov tsev txoos saib puas muaj cov neeg ntseeg Txoj Kev. Yog muaj, mas nws yuav muab lawv khi cab mus pem Yes Lus Xas Les, tsis hais poj niam los txiv neej . 3 Thaum nws tab tom taug kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws. 4 Nws ntog rau pem teb. Nws hnov ib lub suab hais rau nws tias : "Xauv, Xauv, tim li cas koj hiam kuv ?" 5 Xauv teb hais tias : "Huab Tais, koj yog leej twg ?" Lub suab ntawd hais tias : "Kuv yog Yes Xus, tus uas koj hiam. 6 Koj sawv, koj mus hauv lub nroog. Yuav muaj neeg qhia koj tias koj yuav ua dab tsi." 7 Cov neeg nrog Xauv ua ke taug kev sawv daws nres, lawv tsis hais lus li lawv ntshai kawg, vim lawv hnov lub suab, tab sis lawv tsis pom dab tsi li. 8 Xauv sawv hauv av los, nws rua qhov muag, tab sis nws tsis pom kev li. Lawv thiaj tuav nws tes coj nws mus hauv lub nroog Das Mas. 9 Nws nyob tau peb hnub, tsis pom kev, tsis noj tsis haus dab tsi li.
    10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias : "As Nas Nias." As Nas Nias teb tias : "Huab Tais, kuv nyob ntawm no." 11 Huab Tais hais ntxiv tias : "Koj sawv, koj mus tom txoj kev uas hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj. 12 Nws yees pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj." 13 As Nas Nias teb tias : "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les. 14 Nws tuaj ntawm no, vim nws tau cai ntawm cov thawj leej choj tuaj khi cov neeg uas hu txog koj lub npe tas huv tib si." 15 Tab sis Huab Tais hais rau As Nas Nias hais tias : "Koj mus, vim tus neeg ntawd yog ib rab twj zoo uas kuv xaiv los coj kuv lub Npe mus qhia rau cov pej kum haiv neeg, rau cov vaj, thiab rau cov tub ki His Xas Lais. 16 Kuv yuav qhia nws tias nws yuav tsum raug tsim txom npaum li cas vim kuv lub Npe." 17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias : "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim zoo li tej daim nplai poob ntawm Xauv qhov muag los, ces nws rov qab pom kev tuaj. Nws thiaj sawv tsees los, ces nws txais lub cim ntxuav.
    19 Nws noj mov, ces nws rov qab muaj zog tuaj. Xauv nrog cov thwj tim nyob ob peb hnub hauv Das Mas. 20 Ces nws cia li maj zoj zeeg mus nyob hauv cov tsev Txoos pib tshaj txog Yes Xus tias nws yog Tswv Ntuj Leej Tub.

    NPN 117: 1BC, 2

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Huab Tais txoj kev hlub peb nyob ruaj nreb khov kho,
    nws lub siab pheej xeeb mus ib txhiab ib txhis.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    As Les Lus yas: ZAM 6: 56

    Txais: As les lus yas, as les lus yas.

    Huab Tais hais tias, tus twg noj kuv lub cev thiab haus kuv cov ntshav,
    nws yuav nyob hauv kuv thiab kuv yuav nyob hauv nws.

    Txais: As les lus yas, as les lus yas.

    Ntawv Moo Zoo: Zam 6: 52-59

    52 Ces cov Yus Das sib cav zom zaws tias : "Tus neeg ntawd yuav ua li cas muab tau nws cev nqaij los rau peb noj ?" 53 Yes Xus thiaj hais rau lawv tias : "Kuv hais qhov tseeb tiag rau nej : Yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. 54 Tus twg noj kuv lub cev nqaij thiab haus kuv cov ntshav, nws muaj txoj sia nyob mus li. Hnub kawg, kuv yuav tsa nws sawv rov qab los. 55 Vim kuv lub cev nqaij yog ib co tseem txhiam xws, thiab kuv cov ntshav yog ib co tseem dej haus. 56 Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws. 57 Ib yam li Leej Txiv uas muaj txoj sia, nws xa kuv tuaj, ces kuv muaj txoj sia vim Leej Txiv; ib yam li ntawd, tus noj kuv, nws kuj yuav muaj txoj sia vim kuv. 58 Ntawm no yog cov mov nqes saum ntuj los, nws tsis zoo li cov uas cov yawg koob tau noj, tab sis lawv tuag tas lawm. Hos tus noj cov mov no, mas nws yuav ciaj nyob mus li." 59 Yes Xus hais cov lus no thaum nws qhuab qhia nyob hauv lub tsev txoos nyob Kas Fas Naus.


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 10th May 2019, 11:52 am

    TIM 11 LUB 5 HLIS 2019

    Hnub Xya Lis Piam Peb Caij Hla Xyoo C Nruab Lis Piam Xyoo I

    Zaj Nyeem Ib: HAUJ LWM 9: 31-42


    31 Lub caij ntawd, lub Koom Txoos nyob hauv xeev Yus Das, xeev Nkas Lis Lais, thiab xeev Xas Mas Lias tau nyob thaj yeeb. Nws loj hlob zuj zus, thiab taug txoj kev hwm Huab Tais. Leej Ntuj Plig Ntshiab nplij lub Koom Txoos, ces nws huam vam zuj zus.
    32 Pob Zeb ncig mus rau txhua qhov chaw xyuas sawv daws. Nws nqes mus txog nram cov ntshiab nyob lub zos Lis Das. 33 Nyob nrad muaj ib tug txiv neej hu ua Es Nes pw saum ib daim khaub lev tau yim xyoo lawm, vim nws tuag ceg. 34 Pob Zeb hais rau nws tias : "Es Nes, Yes Xus Pleev kho kom koj zoo. Koj sawv tsees los kho koj lub txaj." Tam sim ntawd tus tuag ceg sawv tsees. 35 Tas cov neeg nyob hauv Lis Das thiab nyob hauv Xas Loos pom Es Nes, mas sawv daws tig los ntseeg txog Huab Tais.
    36 Nyob Yos Pes, muaj ib tug thwj tim poj niam hu ua Tas Npis Thas. Nws lub npe txhais tias Me Nyuam Mos Lwj. Nws ua ntau yam hauj lwm zoo thiab nws pub ntau yam rau cov neeg txom nyem. 37 Muaj ib hnub, Tas Npis Thas cia li mob, ces nws tuag. Lawv muab nws ntxuav tas, lawv coj nws mus tso saum chav tsev siab. 38 Lis Das kuj nyob ze ntawm Yos Pes. Cov thwj tim hnov tias Pob Zeb tuaj txog Lis Das lawm, ces lawv tso ob tug neeg tuaj caw Pob Zeb tias : "Thov koj tuaj nram peb sai sai, txhob ncua ntev." 39 Pob Zeb nrog ob tug neeg mus tam sim ntawd. Thaum nws tuaj txog ntua, lawv kom nws nce mus saum chav tsev siab. Cov poj ntsuam sawv daws tuaj ntsauv Pob Zeb. Lawv quaj zom zaws, lawv muab tej tiab tej tsho uas tus me nyuam mos lwj tau ua thaum nws tseem nrog lawv nyob rau Pob Zeb saib. 40 Pob Zeb kom sawv daws tawm mus sab nraud. Nws txhos caug thov Ntuj, ces nws tig los hais rau tus tuag lub cev tias : "Tas Npis Thas, koj sawv." Tus poj niam rua muag pom Pob Zeb, nws sawv tsees los zaum. 41 Pob Zeb tuav nws txhais tes, rub nws kom sawv ntsug. Ces Pob Zeb hu cov Ntshiab thiab cov poj ntsuam los xyuas Tas Npis Thas uas nws ciaj rov los lawm. 42 Tas lub tsheej Yos Pes hnov lub moo ntawd, mas coob leej kuj los ntseeg txog Huab Tais.

    NPN 116: 12-13, 14-15, 16-17

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    Kuv yuav muab dab tsi los pauj ib puas
    tsav yam zoo uas HUAB TAIS ua rau kuv ?
    Kuv yuav cev lub ntim cawm neeg rau nws,
    Thiab kuv yuav hu txog HUAB TAIS lub npe.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm tas nws haiv neeg xub ntiag.
    HUAB TAIS saib nws cov ntseeg
    txoj kev tuag muaj nqes heev.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    HUAB TAIS, kuv yog koj tus tub txib;
    Kuv yog koj tus tub txib, yog koj tus ntxhais txib tus tub.
    Koj tau daws cov hlua khi kuv.
    Kuv yuav cev ib co txim los ua koj tsaug,
    Thiab kuv yuav tuav txog HUAB TAIS lub npe.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    As Les Lus Yas: ZAM 6: 63C, 68C

    Txais: As les lus yas, as les lus yas.

    Koj cov lus, Huab Tais, yog ntsuj plig thiab yog txoj sia;
    koj muaj cov lus pub txoj sia nyob mus li.

    Txais: As les lus yas, as les lus yas.

    Ntawv Moo Zoo: ZAM 6: 60-69

    60 Yes Xus ib co thwj tim coob coob tau hnov cov lus ntawd, ces lawv hais tias : "Cov lus no ntxhib dhau, leej twg yuav xav mloog ?" 61 Tab sis Yes Xus yeej paub hauv nruab siab tias nws cov thwj tim yws txog cov lus ntawd, nws thiaj hais rau lawv tias : "Tej lus ntawd dawm nej taw lod ? 62 Yog nej tseem pom Neeg Leej Tub nce mus saum qhov chaw uas thaud nws nyob, nej ho yuav xav li cas ? 63 Yog tus ntsuj plig ua kom muaj txoj sia, lub cev nqaij ua tsis tau dab tsi. Cov lus uas kuv tau hais rau nej yog ntsuj plig thiab yog txoj sia. 64 Tab sis nyob hauv nej, muaj ib co tsis ntseeg." Vim txij lub hauv paus los, Yes Xus yeej paub tias cov tsis ntseeg yog leej twg, thiab tus yuav muab nws muag yog leej twg. 65 Ces Yes Xus hais tias : "Vim li no kuv thiaj hais rau nej tias tsis muaj leej twg tuaj cuag kuv tau, yog kuv Txiv tsis pub qhov ntawd rau nws."
    66 Txij thaum ntawd los, Yes Xus ib co thwj tim coob leej thiaj li rov qab mus tsev, lawv tsis nrog Yes Xus mus ntxiv lawm. 67 Yes Xus thiaj hais rau Pab Kaum Ob tias : "Nej ne, nej puas xav mus thiab ?" 68 Xis Moos Pob Zeb teb rau Yes Xus tias : "Huab Tais, peb yuav mus nrog leej twg ? Koj muaj cov lus pub txoj sia nyob mus li. 69 Peb ntseeg thiab peb paub tias koj yog Tswv Ntuj tus Ntshiab."


    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 12th May 2019, 11:08 am

    TIM      13      LUB      5      HLIS      2019

    Hnub Ob Lis Piam Plaub Caij Hla Xyoo C Nruab Lis Piam Xyoo I

    Hwm Niam Mab Liab tuaj tim Fatima tau 102 xyoos lawm

    Zaj Nyeem Ib:       Hauj Lwm  11:   1-18


    1 Cov Hauv Paus Xa Lus thiab cov kwv tij nyob hauv xeev Yus Das tau hnov tias tab yog cov neeg teev pej kum dab, los lawv kuj tau txais Tswv Ntuj lo lus lawm thiab. 2 Ces thaum Pob Zeb mus pem Yes Lus Xas Les, mas cov neeg uas tau txais lub cim txiav yws yws rau Pob Zeb tias : 3 "Vim li cas koj thiaj li mus hauv cov neeg tsis txais lub cim txiav tsev, thiab nrog lawv noj mov ?" 4 Pob Zeb thiaj li piav txij lub hauv paus txog lub ntsis rau lawv tias : 5 "Nyob hauv lub nroog Yos Pes, thaum kuv tseem tab tom teev ntuj, kuv ua yog toog pom ib yam zoo li ib daig ntaub pua rooj loj loj uas leej twg tuav plaub ceg kaum tso nqes saun ntuj los, cia li los txog ntawm kuv. 6 Kuv ua zoo ntsia ntsoov daim ntaub, kuv pom muaj cov tsiaj muaj plaub txhais tes taw nyob ntiaj teb no, cov tsiaj qus, cov tsiaj nkag hauv av, thiab cov noog ya saum ntuj nyob saud. 7 Kuv hnov ib lub suab hais rau kuv tias : 'Pob Zeb, koj sawv, koj mus muab los tua noj.' 8 Kuv teb tias : 'Huab Tais, kuv tsis noj, txog tav no tsis tau muaj dua ib yam tsis zoo los tsis huv nkag mus hauv kuv lub ncauj ib zaug li.' 9 Lub suab ntawd tseem hais ib zaug ntxiv saum ntuj tuaj tias : 'Tej yam uas Tswv Ntuj tau ua kom huv lawm, mas koj tsis txhob hais tias tsis huv.' 10 Muaj zoo li no peb zaug tas ces txhia yam rov nce rau saum ntuj lawm. 11 Thaum ntawd, muaj peb tug neeg tab tom tuaj txog ntawm lub tsev peb nyob. Luag xa lawv ntawm Xes Ntxas Les tuaj hu kuv. 12 Leej Ntuj Plig qhia kuv kom cia li nrog lawv mus, tsis txhob saib neeg tso. Rau leej kwv tij no kuj mus huv tib si thiab. Peb sawv daws chaws mus hauv tus neeg lub tsev. 13 Tus neeg ntawd thiaj piav rau peb tias nws pom Ntuj ib tug Tshiab tuaj sawv ntsug nyob hauv nws lub tsev, hais rau nws tias : 'Koj tso neeg mus Yos Pes mus tos tus Xis Moos uas hu ua Pob Zeb tuaj. 14 Nws yuav hais ib co lus ua kom koj thiab koj tsev neeg tas huv tib si tau txais kev cawm.’ 15 Kuv nyuam qhuav pib hais lus xwb, Leej Ntuj Plig Ntshiab cia li nqes los rau saum lawv ib yam li thawj zaug nws nqes los rau saum peb thiab. 16 Kuv thiaj nco txog Huab Tais lo lus tias: ' Ntawm Zam mas nws muab dej los ua kab ke ntxuav, tiam sis ntawm nej mas nej yuav txais kab ke ntxuav nyob hauv Leej Ntuj Plig Ntshiab.' 17 Yog Tswv Ntuj twb pub tib lub txiaj ntsim rau cov neeg ntawd xws li nws pub rau peb, vim lawv ntseeg txog Huab Tais Yes Xus Pleev, mas kuv ho yog leej twg, kuv thiaj yuav txwv tau Tswv Ntuj ?' 18 Cov lus no thiaj ua rau lawv lub siab nqig, ces lawv cav txog Tswv Ntuj tias : "Ua li mas Tswv Ntuj kuj pub txoj kev thov txhaum uas coj neeg mus txog txoj sia rau cov neeg teev pej kum dab thiab."

    NPN       42:   2-3; 43: 3, 4

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Puav tam li tus kauv nqhis cov dej ntws lug,
    kuv tus ntsuj plig kuj nqhis txog koj, Tswv Ntuj.
    Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
    Thaum twg kuv li tau mus pom Tswv Ntuj lub ntsej muag?

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Thov koj xa koj qhov pom kev thiab qhov tseeb tuaj
    coj kuv kev mus txog saum koj lub roob ntshiab,
    mus txog ntua qhov chaw koj nyob.

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Thaum ntawd kuv yuav mus kom txog ntawm Tswv Ntuj lub thaj,
    mus txog tus Tswv Ntuj uas ua kom kuv dhia zoo siab.
    Ces kuv yuav ntaus nkauj nog ncas ua koj tsaug,
    Tswv Ntuj, kuv tus Tswv Ntuj!

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    As Les Lus Yas:       ZAM  10:   14

    Txais: As les lus yas, as les lus yas.

    Huab Tais hais tias, Kuv yog tus zoo tswv zov yaj,
    kuv paub kuv cov yaj, kuv cov yaj paub kuv.

    Txais: As les lus yas, as les lus yas.

    Ntawv Moo Zoo:       ZAM  10:   1-10

    Yes Xus hais tias:
    1 "Kuv hais qhov muaj tseeb tiag rau nej : Tus tsis nkag ntawm qhov rooj mus rau hauv lub nkuaj yaj, hos nws nce lwm qhov chaw mus rau hauv, mas nws yog ib tug tub sab tuaj nyiag thiab tuaj lwg. 2 Tus uas nkag ntawm qhov rooj mus  thiaj yog tus tswv zov pab yaj. 3 Tus zov rooj loog qhib qhov rooj rau nws, cov yaj mloog nws lub suab. Nws hu nws cov yaj, nws tuav lawv ib leeg zuj zus npe, nws coj lawv tawm mus. 4 Thaum nws coj cov yaj tawm tas lawm, nws mus ua lawv ntej, cov yaj lawv nws qab, vim lawv paub nws lub suab. 5 Cov yaj yuav tsis mus raws lwm tus, lawv yuav khiav ntawm lwm tus mus, vim lawv tsis paub luag tej lub suab."
    6 Yes Xus hais zaj paj lug no rau lawv, tab sis lawv tsis paub tias nws hais txog dab tsi rau lawv. 7 Ces Yes Xus rov qab hais tias : "Kuv hais qhov muaj tseeb tiag rau nej tias kuv yog cov yaj lub qhov rooj. 8 Tas cov uas tuaj ua kuv ntej yog ib co tub sab tuaj nyiag thiab tuaj lwg, tab sis cov yaj kuj tsis mloog lawv. 9 Kuv yog lub qhov rooj, tus twg nkag ntawm kuv mus, nws yuav txais kev cawm, nws yuav nkag tau rau hauv thiab yuav tawm tau los, nws yuav nrhiav tau chaw noj zaub. 10 Tus tub sab tsuas yog tuaj nyiag, tuaj lwg, thiab tuaj txo txoj sia xwb. Hos kuv, mas kuv tuaj ua kom lawv tau txoj sia, thiab kom lawv tau txoj sia puv npo phwj yaws.”



    Last edited by Mim on 14th May 2019, 6:25 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 13th May 2019, 2:55 am

    TIM 14 LUB 5 HLIS 2019

    Hnub Peb Lis Piam Plaub Caij Hla Xyoo C Nruab Lis Piam Xyoo I

    Hwm Hauv Paus Xa Lus Leej Ntshiab Mas Thias

    Zaj Nyeem Ib: HAUJ LWM 1: 15-17, 20-26


    15 Lub caij ntawd, Pob Zeb sawv ntsug hauv nruab nrab cov kwv tij, - muaj ze ntawm ib puas nees nkaum leej tuaj sib txoos ua ke nyob ib qho, - nws hais tias : 16 "Kwv tij sawv daws, cov lus uas sau rau hauv Phau Ntawv yuav tsum tshwm sim tuaj, raws li Leej Ntuj Plig tau siv Das Vis lub ncauj los hais txog Yus Das, uas yog tus coj luag kev tuaj ntes Yes Xus. 17 Yus Das yog ib tug nyob hauv peb thiab nws kuj tau txais ib txog hauj lwm xws li peb txoj thiab.
    20 Ntawv Nkauj Paj Nruag sau tseg tias : ‘Cia kom nws lub vaj tse nyob nphob xuav, tsis txhob muaj neeg nyob hauv li,’ thiab hais tias : ‘Cia lwm tus ua nws txoj dej num.’ 21 Vim li ntawd, cov neeg uas tau nrog peb ua ke tas lub caij Huab Tais Yes Xus nrog peb mus mus los los, 22 txij hnub Zam ua kab ke ntxuav los txog hnub uas nws raug nqa hauv peb mus lawd, mas yuav tsum muaj ib tug los nrog peb ua tim khawv txog nws txoj kev sawv rov los." 23 Ces lawv muab tau ob leeg npe los, yog Yos Xes tseem hu ua Npas Xas Npas, uas sawv daws kuj tseem hu nws ua Zus Tws thiab, thiab Mas Thias. 24 Lawv thov Ntuj li no : "Huab Tais, koj paub tas txhua leej neeg lub siab, thov koj qhia saib ob tug no tus twg yog tus koj xaiv 25 kom los leg txoj dej num ua Hauv Paus Xa Lus uas Yus Das muab tso pov tseg thiab khiav mus nyob nws qhov chaw lawm." 26 Ces lawv tso nkawd npe cia rho ntawv saib tau leej twg; lawv rho tau Mas Thias npe, lawv thiaj suav nws los ntxiv rau pab Kaum Ib leeg Hauv Paus Xa Lus.

    NPN 113: 1-2, 3-4, 5-6, 7-8

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    HUAB TAIS cov tub txib, nej cav txog nws,
    nej cav txog HUAB TAIS lub npe.
    Kom HUAB TAIS lub npe nto moo lug,
    txij no mus txheej dhau txheej !

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Txij thaum hnub tawm txog hnub poob qho,
    kom HUAB TAIS lub npe nto koob meej.
    HUAB TAIS loj siab tshaj ib tsoom kuj cuab,
    nws lub hwj chim nyob siab dua txheej ntuj saud.

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Leej twg thiaj zoo li HUAB TAIS peb tus Tswv Ntuj,
    Uas nws zaum saum nws lub theej kiab nyob siab saud
    Thiab nws dauv muag khoov los ntsia lub ntuj
    thiab lub ntiaj teb nyob txheej qis hauv?

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    Nws tsa tus pluag hauv plua tshauv los,
    nws rub tus txom nyem hauv qhov qias los
    kom los zaum nrog cov tub huab tais,
    cov tub huab tais hauv nws haiv neeg.

    Txais: Huab Tais yuav coj nws mus zaum nrog cov thawj coj hauv nws haiv neeg.
    los: As les lus yas.

    As Les Lus Yas: ZAM 15: 16

    Txais: As les lus yas, as les lus yas.

    Huab Tais hais tias: Kuv tau xaiv nej hauv lub ntiaj teb los,
    kom nej mus thiab nej txi ib co txiv uas yuav nyob ruaj.

    Txais: As les lus yas, as les lus yas.

    Ntawv Moo Zoo: ZAM 15: 9-17

    Yes Xus hais rau nws cov thwj tim tias:
    9 “Ib yam li Leej Txiv nyiam kuv, kuv kuj nyiam nej ib yam li ntawd. Nej nyob ruaj hauv kuv txoj kev nyiam mog. 10 Yog nej coj kuv cov lus qhia, mas nej yuav nyob ruaj hauv kuv txoj kev nyiam, ib yam li kuv tau coj kuv Txiv cov lus qhia thiab kuv nyob ruaj hauv nws txoj kev nyiam.
    11 Kuv hais tej no rau nej kom kuv txoj kev kaj siab nyob hauv nej thiab nej thiaj muaj kev kaj siab puv npo.” 12 Kuv lo lus qhia yog lo lus no : nej yuav sis nyiam sis hlub ib yam li kuv tau nyiam tau hlub nej. 13 Tsis muaj leej twg muaj txoj kev nyiam loj dua tus uas siv nws txoj sia rau nws cov phooj ywg. 14 Yog nej ua qhov kuv kom ua, mas nej yog kuv cov phooj ywg. 15 Kuv tsis hu nej ua tub txib ntxiv, vim tus tub txib tsis paub qhov uas tus tswv ua. Tab sis kuv tau hu nej ua phooj ywg, vim kuv tau qhia nej paub txog tas ib puas tsav yam kuv hnov ntawm kuv Txiv los. 16 Tsis yog nej xaiv kuv, yog kuv xaiv nej. Thiab yog kuv xa nej mus kom nej txi txiv, kom nej cov txiv nyob ruaj, kom xwv nej tuav txog kuv lub npe thov yam twg ntawm Leej Txiv, mas nws muab rau nej. 17 Lo lus qhia uas kuv muab rau nej yog kom nej sis nyiam sis hlub."



    Mim
    Mim
    Tswv Cuab Hmong Catholique
    Tswv Cuab Hmong Catholique

    Messages : 2515
    Date d'inscription : 2009-10-16

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Mim on 14th May 2019, 8:13 am

    TIM 15 LUB 5 HLIS 2019

    Hnub Plaub Lis Piam Plaub Caij Hla Xyoo C Nruab Lis Piam Xyoo I

    Hwm LN Isidore

    Zaj Nyeem Ib: HAUJ LWM 12: 24—13:5A


    24 Tswv Ntuj lo lus loj hlob thiab huam vam ntxiv tuaj. 25 Thaum Npas Nas Npes thiab Xauv nkawd ua nkawd txoj hauj lwm tiav lawm, ces nkawd rov ntawm Yes Lus Xas Les rov los, nkawd coj Zam, uas tseem hu ua Mas Kos nrog nkawd los thiab.
    13 1 Lub Koom Txoos nyob As Nthias Kias muaj ib co yaj saub thiab ib co kws txoj cai : yog Npas Nas Npes, Xis Mes Oos uas tseem hu ua Nis Zes thiab, Lus Xyus tus nyob Xis Les Nas teb tuaj, Mas Nas Ees uas thaum yau nws nrog tus vaj Hes Los ua phooj ywg, thiab Xauv. 2 Muaj ib hnub, lawv tab tom ua lub txoos teev ntuj, thiab coj cov kab ke yoo mov, mas Leej Ntuj Plig Ntshiab hais rau lawv tias : "Nej qee Npas Nas Npes thiab Xauv nkawd rau kuv, kom nkawd mus ua txoj hauj lwm kuv tau rau nkawd lawm." 3 Ces thaum lawv yoo mov tas thiab teev Ntuj tas, lawv tsa tes rau saum nkawd, lawv tso nkawd mus. 4 Yog Leej Ntuj Plig Ntshiab xa nkawd mus, ces nkawd nqes mus rau nram Xes Laws Xias, nkawd mam caij nkoj ntaub nrad mus ntxiv rau Kws Plos. 5 Thaum nkawd tuaj txog Xas Las Mis lawm, nkawd pib tshaj Tswv Ntuj Lo Lus nyob hauv cov Tsev Txoos Yus Das.

    NPN 67: 2-3, 5, 6 + 8

    Txais: (4) Tswv Ntuj, cia kom tas txhua haiv neeg cav txog koj!
    los: Alleluia.

    Thov kom Tswv Ntuj hlub peb thiab foom hmoov zoo rau peb,
    kom nws ua nws lub ntsej muag ci tuaj rau saum peb,
    Kom lub ntiaj teb thiaj yuav paub txog koj txoj kev,
    cov kuj cuab thiaj yuav paub koj txoj kev cawm neeg.

    Txais: (4) Tswv Ntuj, cia kom tas txhua haiv neeg cav txog koj!
    los: Alleluia.

    Xav kom cov kuj cuab hom khaj thiab qw zoo siab,
    vim koj tswj kav cov haiv neeg raws kev ncaj,
    koj taw kev rau cov kuj cuab nyob ntiaj teb taug.

    Txais: (4) Tswv Ntuj, cia kom tas txhua haiv neeg cav txog koj!
    los: Alleluia.

    Kom cov haiv neeg cav txog koj, Tswv Ntuj ,
    kom tas txhua haiv neeg cav txog koj !
    Thov kom Tswv Ntuj foom hmoov zoo rau peb,
    kom tas npoo ntuj npoo ntiaj teb hwm Tswv Ntuj!

    Txais: (4) Tswv Ntuj, cia kom tas txhua haiv neeg cav txog koj!
    los: Alleluia.

    As Les Lus Yas: ZAM 8: 12

    Txais: As les lus yas, as les lus yas.

    Huab Tais hais tias, kuv yog ntiaj teb neeg qhov pom kev,
    leej twg los raws kuv yuav tau kev pom kev rau nws lub neej.

    Txais: As les lus yas, as les lus yas.

    Ntawv Moo Zoo: ZAM 12: 44-50

    44 Yes Xus hais nrov nrov tias : "Leej twg ntseeg txog kuv, mas tsis yog nws ntseeg txog kuv, yog ntseeg txog Tus Xa kuv tuaj. 45 Leej twg pom kuv, mas nws pom Tus Xa kuv tuaj. 46 Kuv yog qhov pom kev, kuv tuaj nyob hauv lub qab ntuj no kom xwv tus ntseeg txog kuv tsis txhob nyob hauv qhov tsaus ntuj. 47 Leej twg hnov kuv cov lus tab sis nws tsis ua raws, mas tsis yog kuv yuav xiav txim rau nws ; vim kuv tsis tuaj txiav txim rau lub qab ntuj neeg, kuv tuaj cawm lub qab ntuj neeg. 48 Tus xyeej kuv thiab tsis txais kuv cov lus, mas nws muaj nws ib tug txiav txim : hnub kawg yog lo lus uas kuv tau hais yuav txiav txim rau nws. 49 Vim tias tsis yog kuv hais kuv, yog Leej Txiv tus Xa kuv tuaj, nws yog tus txib kuv kom hais dab tsi thiab qhia dab tsi. 50 Kuv paub tias Leej Txiv lo lus qhia yog txoj sia nyob mus li. Li ntawd, qhov kuv hais, kuv hais raws nraim li Leej Txiv tau hais rau kuv."



    Sponsored content

    UA KOOB TSHEEJ YES XUS YUG LOS XYOO 2018 - Page 5 Empty Re: UA KOOB TSHEEJ YES XUS YUG LOS XYOO 2018

    Post  Sponsored content


      Current date/time is 17th August 2019, 9:59 pm