COV ZAJ NYEEM NRUAB LIS PIAM XYOO II 2017-2018

TIM 1 LUB 3 HLIS 2018

Hnub Tsib Lis Piam Ob Caij Plaub Caug Xyoo B Nruab Lis Piam Xyoo II

Zaj Nyeem Ib: YES LES MIAS 17: 5-10

5 HUAB TAIS hais li no : "Muaj hmoov phem yog tus neeg uas tso siab rau tib neeg, nws muab lub cev nqaij los ua nws lub zog, hos nws lub siab txav mus deb ntawm HUAB TAIS. 6 Nws zoo li ib tsob me nyuam ntoo qhuav tuaj nyob hauv hav suab puam, nws tsis paub hloov raws caij nyoog li, nws nyob hauv ib thaj chaw qhuav dub nciab, uas yog av ntsev tsis muaj dab tsi yuav ciaj taus. 7 Tus neeg tso siab rau HUAB TAIS thiab vam khom HUAB TAIS, mas nws txoj hmoov zoo. 8 Nws zoo li ib tsob ntoo cog nyob ze ntug dej; nws nrhau cag mus txog cov dej. Thaum txog lub caij ntuj sov nws tsis ntshai dab tsi, nws cov nplooj ntsuab mus li; thaum txog lub xyoo ntuj qhuav qhawv nws tsis txhawj, nws tseem txi taus txiv. 9 Neeg lub siab nkhaus tshaj lwm yam tas nrho, thiab phem kawg hloov tsis tau li, leej twg yuav to taub tau nws ? 10 Kuv, HUAB TAIS, kuv pom tau hauv neeg lub tswv yim, sim tau neeg lub siab; ces kuv pub rau neeg kom phim li tus yam ntxwv nws coj, kom raws li cov koob hmoov ntawm nws tes hauj lwm."

NPN 1: 1-2, 3, 4+6

Txais: (40:5a) Muaj hmoov zoo yog cov uas tso siab rau Huab Tais.

Muaj hmoov zoo yog tus uas tsis coj
raws tus neeg phem zaj tswv yim,
los taug cov neeg txhaum txoj kev,
los zaum nrog cov neeg saib tsis taus luag tej,
tiam sis nws zoo siab hlo coj HUAB TAIS txoj cai,
thiab nws xav ntsoov HUAB TAIS txoj cai nruab hnub hmo ntuj.

Txais: (40:5a) Muaj hmoov zoo yog cov uas tso siab rau Huab Tais.

Nws zoo li ib tsob ntoo cog nyob ze cov dej ntws,
nws txi txiv raws caij raws nyoog,
thiab nws tej nplooj tsis txawj zeeg li.
Nws ua yam twg tau yam ntawd. .

Txais: (40:5a) Muaj hmoov zoo yog cov uas tso siab rau Huab Tais.

Cov neeg phem tsis zoo li ntawd,
lawv zoo li cov npluag nplej uas cua muab nplawm tawm mus.
Vim HUAB TAIS saib ntsoov tus neeg ncaj txoj kev,
hos tus neeg phem txoj kev yaj ntshis mus.

Txais: (40:5a) Muaj hmoov zoo yog cov uas tso siab rau Huab Tais.

Zaj Cav lub Moo Zoo: LK 8: 15

Cov muaj hmoov zoo yog cov muaj ib lub siab dav khaws Lo Lus,
thiab siv zog mus txog qhov kawg ces lawv txi tau txiv zoo.

Ntawv Moo Zoo: LK 16: 19-31

Yes Xus hais rau cov Fas Lis Xais tias:
19 "Muaj ib tug neeg nplua nuj, nws hnav ntaub tsuj liab tsam xem thiab ntaub pag mos. Nws niaj hnub noj tej rooj qav qab kawg. 20 Muaj ib tug pluag hu ua Las Ntxas Los pw ntawm nws qhov rooj, ib ce mob kiav txhab tas. 21 Las Ntxas Los ntshaw noj tej tsig poob ntawm tus nplua nuj lub rooj mov los kom tsau nws plab... Dev tseem tuaj yaim nws tej qhov txhab thiab. 22 Muaj ib hnub, tus pluag tuag, cov Tshiab tuaj nqa nws mus rau hauv Has Nplas Has xub ntiag. Tus nplua nuj kuj tuag thiab, luag muab nws coj mus faus. 23 Tus nplua nuj nyob hauv ntuj txias teb tsaus, nws raug txom nyem loj kawg. Nws tsa muag ntsia pom Has Nplas Has nyob deb thiab pom Las Ntxas Los nyob hauv nws xub ntiag. 24 Nws hu nrov nrov tias : Txiv Has Nplas Has, thov koj khuv leej kuv, thov koj xa Las Ntxas Los tuaj muab nws ntsis ntiv tes tub dej rau kuv tus nplaig kom txias, vim kuv raug tsim txom nyob hauv cov hluav taws no. 25 Tab sis Has Nplas Has hais tias : Kuv tub, koj nco ntsoov tias thaum ua neej nyob koj tau txais tej yam zoo, hos Las Ntxas Los tau txais qhov phem. Zaum no Las Ntxas Los txais kev nplij siab nyob ntawm no, hos koj raug tsim txom. 26 Thiab tsis tag li ntawd : tseem muaj ib lub qhov ntuj tob kawg kem peb rau ntawm nej, kom cov uas xav hla ntawm peb rau tim nej hla tsis tau, thiab kom cov nyob tim nej txhob hla tau los rau tim no. 27 Ces tus nplua nuj hais tias : "Txiv, kuv thov koj xa Las Ntxas Los mus hauv kuv txiv tsev, 28 vim kuv muaj tsib tug kwv tij, kom Las Ntxas Los mus qhia rau lawv paub, kom lawv tsis txhob tuaj nyob hauv qhov chaw raug tsim txom no.” 29 Ces Has Nplas Has hais tias : “Lawv muaj Mais Xes thiab cov Yaj Saub. Cia lawv mloog Mais Xes thiab cov Yaj Saub qhia.” 30 Tus nplua nuj hais tias : “Txiv Has Nplas Has, yog tias ib tug hauv cov tuag mus cuag lawv, mas lawv thiaj yuav hloov siab.” 31 Tab sis Has Nplas Has hais rau nws tias : “Yog lawv twb tsis mloog Mais Xes thiab cov Yaj Saub, mas tab yog ib tug sawv hauv cov tuag mus qhia lawv kiag los lawv yeej yuav tsis ntseeg nws li.”

TIM 2 LUB 3 HLIS 2018

Thawj Hnub Rau Lis Piam Ob Caij Plaub Caug Xyoo B Nruab Lis Piam Xyoo II

Zaj Nyeem Ib: HAUV PAUS 37: 3-4, 12-13A, 17B-28A

3 His Xas Lais hlub Yos Xes tshaj nws cov tub huv tib si, vim Yos Xes yug thaum nws twb laus lawm. Ces nws kom lawv xaws ib lub tsho ntev txaij ntau yam tsos rau Yos Xes hnav. 4 Nws cov tij laug pom tias lawv txiv hlub nws tshaj nws cov tij laug txhua tus, mas lawv sawv daws ntxub nws, lawv tsis xav nrog nws hais ib lo lus zoo li.
12 Yos Xes cov tij laug coj lawv txiv pab yaj mus noj zaub dua Xis Kes lawm. 13a His Xas Lais hais rau Yos Xes tias : "Koj cov tij laug coj tsiaj mus noj zaub dua tom lub tshav zaub Xis Kes lawm puas yog ? Los, kuv xa koj mus xyuas lawv."
17b Ces Yos Xes mus nrhiav nws cov tij laug, nws nrhiav tau lawv nyob Dos Tas. 18 Lawv pom nws tseem tuaj txog deb. Thaum nws tuaj tsis tau txog ntawd, lawv sib tuav tswv yim tias yuav ua kom nws tuag. 19 Lawv sib tham tias : "Nej saib ! Niag neeg ua npau suav tuaj lawm ! 20 Zaum no, peb muab nws tua kiag thiab muab nws pov rau hauv ib lub qhov tim thaj, ces peb mus hais tias yog ib tug tsiaj qus tom nws lawm xwb. Ces peb yuav pom tias nws cov npau suav mas leej tas nrho !" 21 Tiam sis Lus Npees hnov lawv tham, nws xav pab kom Yos Xes dim ntawm lawv tes. Nws hais tias : "Peb tsis txhob txo nws txoj sia." 22 Lus Npees hais ntxiv rau lawv tias : "Nej tsis txhob ua ntshav ntws, nej cia li muab nws pov rau hauv lub qhov tim thaj ntawm suab puam no xwb, nej tsis txhob tsa nej txhais tes rau saum nws." Lus Npees hais li no, vim nws xav cawm Yos Xes, nws thiaj li yuav coj tau Yos Xes rov mus rau nws txiv.
23 Ces thaum Yos Xes tuaj txog ntawm nws cov tij laug lawm, lawv muab nws lub tsho ntev txaij ntau tsos uas nws hnav hle. 24 Lawv txhom nws thiab muab nws pov rau hauv ib lub qhov dej. Yog ib lub qhov dej qhuav tsis muaj dej. 25 Ces lawv mus zaum noj mov. Lawv tsa muag ntsia pom ib pab neeg Is Mas Es tuaj Nkas Las As tuaj. Lawv cov ntxhuav thauj ib co nra uas yog txuj lom thiab tshuaj pleev tes taw thiab tshuaj tsw qab uas lawv yuav coj mus lawm Hais Nkws Tos teb. 26 Ces Yus Das hais rau nws cov kwv tij tias : "Yog peb muab peb tus kwv tua thiab muab nws cov ntshav faus, peb yuav tau dab tsi ? 27 Nej los, peb muab nws muag rau cov neeg Is Mas Es xwb, peb txhob tsa peb txhais tes rau saum nws : vim nws twb yog peb tus kwv, nrog peb koom ib lub cev nqaij xwb." Ces nws cov kwv tij mloog nws hais. 28 Thaum ntawd muaj ib co tub luam tuaj Mis Dias tuaj hla ntawd, ces lawv rub Yos Xes tawm hauv lub qhov tim thaj los, lawv muab nws muag nees nkaum lub txiaj nyiag, rau cov neeg Is Mas Es ntawd.

NPN 105: 16-17, 18-19, 20-21

Txais: (5a) Nej cim ntsoov Huab Tais cov hwj huam loj nws tau ua cia.

Thaum HUAB TAIS hu kom kev tshaib plab poob los rau saum lub teb chaws,
thiab ua kom tej qoob loo uas yuav yug lawv lwj tas,
nws tso ib tug neeg mus ua lawv ntej,
yog Yos Xes, tus raug muag mus ua qhev.

Txais: (5a) Nej cim ntsoov Huab Tais cov hwj huam loj nws tau ua cia.

Lawv muab khawb hlau khi nws ko taw
thiab muab kauj hlau pav nws caj dab.
Thaum txog caij, kuj muaj tuaj raws li nws tau ua saub hais tseg,
HUAB TAIS lo lus ua pov thawj tias nws hais qhov tseeb.

Txais: (5a) Nej cim ntsoov Huab Tais cov hwj huam loj nws tau ua cia.

Tus vaj hu nws mus thiab tso nws tawm nkuaj,
tus tswj cov haiv neeg muab kev twj lij rau nws.
Tus vaj muab nws ua tus kav nws lub vaj lub tsev
thiab tus tswj tas txhua yam uas yog nws tug.

Txais: (5a) Nej cim ntsoov Huab Tais cov hwj huam loj nws tau ua cia.

Zaj Cav lub Moo Zoo: ZAM 3: 16

Tswv Ntuj hlub lub ntiaj teb npaum li ntawd
nws thiaj tso nws tib leeg tub los
kom xwv txhua leej uas ntseeg nws
yuav muaj txoj sia nyob mus li.

Ntawv Moo Zoo: MT 21: 33-43, 45-46

Yes Xus hais rau cov thawj leej choj thiab cov kev txwj laus tias:
33 “Nej mloog dua ib zag paj lug li no. Muaj ib tug tswv teb, nws cog tau ib thaj txiv cawv. Nws xov laj kab ncig nws thaj teb. Nws txaug ib lub zeb zom txiv cawv, thiab tseem txhim tau ib lub lawj siab siab cia. Nws ntiav ib co neeg zov, ces nws tawm rooj mus kev deb lawm. 34 Thaum yuav txog caij de txiv, nws xa nws cov tub txib mus nqa txiv cawv ntawm cov neeg zov teb. 35 Cov zov teb ntes txawm cov tub txib, muab ib tug ntaus, muab ib tug tua, muab pob zeb los txawb lwm tus kom tuag. 36 Tus tswv rov xa ib co tub txib coob dua thawj cov mus, cov zov teb kuj ua ib yam li lawv ua rau thawj cov rau thiab. 37 Qhov kawg, nws xa nws tus tub mus cuag lawv, nws xav tias : “Lawv yuav hwm kuv tus tub.” 38 Tab sis cov zov teb pom dheev tus tub, lawv sib tham tias : “Tus ntawd yog tus yuav txais lub cuab tam. Tsuag tsuag ! Peb muab nws tua. Lub cuab tam thiaj yuav yog peb tug.” 39 Ces lawv ntes ntho tus tub, coj nws mus pov rau tom ntug teb thiab muab nws tua. 40 Thaum tus tswv thaj teb txiv cawv los txog, nws yuav ua dab tsi rau cov zov teb ?” 41 Lawv teb rau Yes Xus tias : “Nws yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb. Thaum txog caij txiv cawv siav, cov ntawd yuav xa cov txiv rau tus tswv.” 42 Yes Xus hais rau lawv tias : “Nej puas tau nyeem ib zaug li txog cov lus hauv Ntawv hais tias : ‘Lub pob zeb uas cov tub txhim tsev muab pov tseg, txia ua lub pob zeb txheem lub ru tsev. Qhov ntawd yog tuaj ntawm Huab Tais tuaj. Yog ib yam zoo kawg nkaus rau ntawm peb qhov muag.’ 43 Vim li ntawd, kuv hais rau nej tias: Ntuj lub Ceeb Tsheej yuav raug muab tshem ntawm nej tawm los cev rau ib haiv neeg uas yuav tu kom nws txi txiv.”
45 Cov thawj leej choj thiab cov Fas Lis Xais hnov Yes Xus cov zaj paj lug, lawv to taub tias Yes Xus hais txog lawv.
46 Lawv nrhiav kev ntes Yes Xus. Tab sis lawv ho ntshai tsoom sid, vim sawv daws saib Yes Xus yog ib tug yaj saub.

TIM 3 LUB 3 HLIS 2018

Thawj Hnub Xya Lis Piam Ob Caij Plaub Caug Xyoo B Nruab Xyoo II

Hwm LN Katharine Drexel

Zaj Nyeem Ib: MIS KES 7: 14-15, 18-20

14 Koj muab rab pas zov yaj los nplawm koj haiv neeg mus noj zaub, nplawm pab yaj uas yog koj li cuab tam; lawv nyob ncaim npoj nyob hauv ib koog zoov saum lub roob Kas Mes. Xav kom lawv rov los nog zaub nyob Npas Sas thiab nyob Nkas Las As xws li yav thaum ub. 15 Xws li thaum lub caij koj tawm Hais Nkws Tos teb los; kuv yuav ua tej yam hwj huam loj rau koj pom.
18 Tus tswv ntuj twg thiaj yuav piv tau rau koj? Koj yog tus Tswv Ntuj zam kev txhaum, thiab tsis suav txim rau pab neeg seem uas yog koj lub cuab tam; koj tsis npau taws tas mus li, koj nyiam ua lub siab zoo khuv leej neeg. 19 Koj yeej yuav hlub peb ib zaug ntxiv, yuav muab peb tej kev phem tsuj ntiag rau hauv av, muab tas peb tej txhaum pov lawm hauv qab tiv txwv. 20 Koj yuav ua raws qhov ncaj rau Yas Kos, thiab yuav pub txiaj ntsim rau Has Nplas Has, raws li koj tau cog lus rau peb cov yawg koob thaum ntxov ub lawm.

NPN 103: 1-2, 3-4, 9-10, 11-12

Txais: (8a) Huab Tais siab zoo thiab khuv leej neeg.

Kuv tus ntsuj plig, koj cav txog HUAB TAIS;
kuv tej siab ntsws, nej cav txog nws lub npe ntshiab.
Kuv tus ntsuj plig, koj cav txog HUAB TAIS,
koj tsis txhob hnov qab nws tej kev ua zoo ib qho li.

Txais: (8a) Huab Tais siab zoo thiab khuv leej neeg.

Nws tau zam tas koj tej txhaum rau koj,
nws tau kho tas koj tej kev mob nkeeg zoo.
Nws tau cawm koj txoj sia ntawm kev puas nstoog,
nws tau muab nws txoj kev ua siab zoo thiab kev khuv leej rau koj ntoo.

Txais: (8a) Huab Tais siab zoo thiab khuv leej neeg.

Nws tsis npau taws tas mus li,
nws kuj tsis chim tas mus ib txhis.
Nws tsis nplua peb raws li peb tau ua txhaum,
nws tsis pauj rau peb raws li peb tau ua phem.

Txais: (8a) Huab Tais siab zoo thiab khuv leej neeg.

Npaum li lub ntuj nyob siab tshaj saum ntiaj teb,
nws kuj hlub cov neeg uas hwm nws tshaj npaum li ntawd.
Deb npaum li sab hnub tuaj nyob deb sab hnub poob,
nws tau muab peb tej txhaum pov tseg deb ntawm peb npaum li ntawd .

Txais: (8a) Huab Tais siab zoo thiab khuv leej neeg.

Zaj Cav lub Moo Zoo: LK 15: 18

Kuv yuav sawv mus, kuv yuav mus cuag kuv txiv thiab hais rau nws tias:
Txiv, kuv tau ua txhaum rau Ntuj thiab rau koj lawm.

Ntawv Moo Zoo: LK 15: 1-3, 11-32

1 Tas cov neeg sau se thiab cov neeg txhaum txav los ze Yes Xus, kom tau mloog nws hais lus. 2 Ces cov Fas Lis Xais thiab cov Kws Ntawv Ntshiab pib cem zom zaws tias : "Tus neeg ntawd txais cov neeg txhaum, thiab nws tseem nrog lawv noj mov thiab !" 3 Yes Xus thiaj hais zaj paj lug no rau lawv :
11 Nws hais tias : “Ib tug neeg muaj ob tug tub. 12 Tus tub ntxawg hais rau nws txiv tias : 'Txiv, koj muab koj lub cuab tam feem uas yog kuv tug faib rau kuv.' Ces leej txiv thiaj muab nws lub cuab tam faib rau nws ob tug tub. 13 Ob peb hnub tom qab, tus tub ntxawg sau feem uas yog nws tug tas huv si, nws khiav mus rau ib lub teb chaws deb. Nyob ntawd nws muab nws lub cuab tam phob dog dig vim nws coj ib lub neej tsis tsim txiaj. 14 Thaum nws muab nws lub cuab tam phob tas huv si lawm, ces lub teb chaws tshaib plab loj. Nws pib paub txoj kev yoo tshaib yoo nqhis. 15 Nws thiaj mus ua zog hauv ib tug neeg nyob txawm lub teb chaws ntawd. Luag kom nws mus zov npua tom teb. 16 Tus tub ntxawg ntshaw noj cov qos uas npua noj kom tsau nws plab, tab sis tsis muaj neeg pub rau nws noj li. 17 Nws lub siab mam li ras dheev tias : 'Pes tsawg leej tub zog nyob hauv kuv txiv tsev tau mov noj seem noj so, hos kuv nyob tuag tshaib ntuas ntawm no. 18 Kuv yuav sawv mus, kuv yuav mus cuag kuv txiv, kuv yuav hais rau nws tias : 'Txiv, kuv tau ua txhaum rau Ntuj thiab rau koj lawm. 19 Kuv tsis tsim nyog koj hu kuv ua koj tus tub ntxiv. Thov koj saib kuv ib yam li koj ib tug tub zog.' 20 Tus tub ntxawg thiaj sawv kev rov los cuag nws txiv. Thaum tus tub tseem los txog deb, nws txiv twb pom nws lawm. Leej txiv ib ce muag tas thiab hlub nws kawg, leej txiv khiav mus puag nkaus tus tub caj dab, thiab nwj nws tub tub ntev loo. 21 Tus tub thiaj hais rau leej txiv tias : 'Txiv, kuv ua txhaum rau Ntuj thiab rau koj lawm. Kuv tsis tsim nyog koj hu kuv ua koj tus tub ntxiv.' 22 Tab sis leej txiv hais rau cov tub txib tias : 'Nej tsuag tsuag mus nqa lub tsho zoo nkauj tshaj los ntawm no, nej muab rau nws hnav, nej muab ib nti nplhaib los ntxig nws ntiv tes, thiab ib nkawg khau los ntxig nws ko taw. 23 Nej cab tus xyuas nyuj rog los tua. Peb yuav noj, peb yuav ua lom zem. 24 Vim tias kuv tus tub no tuag lawm, nyem no nws ciaj rov los. Nws ploj lawm, nyem no rov nrhiav tau nws lawm.' Ces lawv sawv daws noj haus lom zem kawg.
25 Thaum ntawd, tus tub hlob tseem nyob tom teb. Thaum nws rov los yuav txog tsev, nws hnov suab paj nruag thiab suab dhia seev cev nrov ntsuag qees. 26 Nws hu ib tug tub txib kom tawm mus cuag nws, nws nug saib lub suab ntawd yog dab tsi. 27 Tus tub txib hais rau nws tias : 'Yog koj tus kwv rov qab los tsev, ces koj txiv tua tus xyuas nyuj rog, vim nws tau koj tus kwv rov los, noj qab nyob zoo.' 28 Ces tus tub hlob npau taws, nws tsis kam los hauv tsev. Leej txiv tawm tuaj thov kom nws los hauv tsev. 29 Tab sis tus tub hlob teb rau nws txiv tias : 'Saib, kuv lis koj tej hauj lwm cuag li ib tug qhev tau npaum no xyoo, kuv tsis tau hla koj ib lo lus li, koj twb tsis muab ib tug me nyuam tshis pub kuv ib zaug, kom tau nrog kuv cov phooj ywg noj ib pluag lom zem. 30 Hos koj niag tub ntawd, mus nrog cov niam ntiav muab koj lub cuab tam nqos tas, thaum nws rov los tsev, koj tua tus xyuas nyuj rog rau nws !' 31 Ces leej txiv hais rau tus tub hlob tias : 'Me tub, koj ib txwm nrog kuv nyob. Ib puas tsav yam uas yog kuv tug, mas kuj yog koj tug. 32 Tab sis, peb yuav tsum noj ib roog qav thiab ua lom zem, vim koj tus kwv no tuag lawm, zaum no nws ciaj rov los, nws ploj lawm, nyem no nrhiav tau nws rov los lawm."

TIM 5 LUB 3 HLIS 2018

Hnub Ob Lis Piam Peb Caij Plaub Caug Xyoo B Nruab Lis Piam Xyoo II

Zaj Nyeem Ib: 2 VAJ 5: 1-15AB

1 Nas Maas, tus thawj tub rog rau tus vaj As Las Mais, yog ib tug neeg uas tus vaj hwm thiab nyiam vim yog muaj nws mas HUAB TAIS thiaj pab cov As Las Mais yeej rog. Tab sis tus neeg muaj peev xwm ntawd mob ruas. 2 Muaj ib zaug cov As Las Mais tuaj lwg His Xas Lais teb, lawv coj tau ib tug me nyuam ntxhais mus lawm. Tus ntxhais ntawd mus ua Nas Maas tus poj niam tus ntxhais txib. 3 Nws hais rau nws tus niam tsev hais tias : "Yog kuv tus tswv mus cuag tus Yaj Saub nyob Xas Mas Lias teb mas tus Yaj Saub yuav cawm nws dim ntawm nws tus mob ruas xwb !" 4 Nas Maas mus qhia rau nws tus huab tais txog cov lus uas tus ntxhais tuaj teb chaws His Xas Lais tuaj tau hais. 5 Tus vaj As Las Mais teb tias : "Yog li ces koj mus, kuv yuav xa ib tsab ntawv mus rau tus vaj His Xas Lais." Ces Nas Maas mus, nws nqa kaum choj nyiag, rau txhiab lub txiaj kub thiab kaum cev tsoos tsho ua zam. 6 Nws mus txog, nws cev tus vaj tsab ntawv rau tus vaj His Xas Lais nyeem. Nyob hauv tsab ntawv muaj cov lus hais li no : "Kuv xa kuv tus tub txib Nas Maas nrog tsab ntawv no tuaj. Thov koj kho nws tus mob kom zoo." 7 Thaum tus vaj His Xas Lais nyeem tsab ntawv tas, nws dua rhe nws lub tsho, nws hais tias : "Kuv puas yog ib tug tswv ntuj txawj ua kom neeg ciaj los neeg tuag? Ua cas tus ntawd thiaj yuav kom kuv kho ib tug neeg mob ruas ? Qhov tseeb yog nws xav nrhiav lus rau kuv xwb." 8 Tab sis thaum Es Lis Xais hnov tias tus vaj dua nws cov ris tsho, mas nws tso neeg mus hais rau tus vaj tias : "Vim li cas koj dua koj cov ris tsho ? Kom nws tuaj cuag kuv saib ! Nws thiaj yuav paub tias muaj ib tug Yaj Saub nyob His Xas Lais teb." 9 Nas Maas caij tsheb nees nrog nws pab neeg tuaj txog, nws theem ntawm Es Lis Xais qhov rooj. 10 Es Lis Xais tso neeg mus hais rau nws tias : "Koj mus da dej xya zaus nyob hauv tus dej Yos Las Das ces koj cev nqaij yuav rov zoo thiab huv tuaj." 11 Nas Maas npau taws, nws hais tias : "Kuv vam tias ntshai nws yuav tawm tuaj, nws yuav hu txog HUAB TAIS nws tus Tswv Ntuj lub npe thiab nws yuav plhws kuv qhov nqaij mob, ces kuv yuav zoo hlo no. 12 Tus dej As Npas Nas thiab tus dej Fas Pas nyob Das Mas teb tsis zoo dua cov dej nyob His Xas Lais teb lod ? Yog kuv mus da cov dej nyob Das Mas teb kuv yuav tsis zoo tuaj sai dua lod ?" Ces Nas Maas lem loo nees rov qab, nws npau taws heev. 13 Tab sis nws cov tub txib txav los hais rau nws tias : "Txiv, yog tus Yaj Saub kom koj ua ib yam nyuaj dua ntawd mas koj twb yuav ua xwb puas yog ? Txawm yog nws hais tias kom koj mus da dej xwb ces koj yuav zoo mas koj haj yam yuav zoo siab ua xwb" 14 Nas Maas thiaj nqes mus hauv tus dej Yos Las Das, nws mus ntxuav cev xya zaus xws li Tswv Ntuj tus yaj saub hais, ces nws cov nqaij rov zoo tuaj xws li tus me nyuam mos tej nqaij. Nws huv tas lawm. 15 Nas Maas nrog nws cov tub txib rov los tom Tswv Ntuj tus neeg xub ntiag, nws hais tias : "Nyem no, kuv paub lawm tias tsis muaj dua lwm tus Tswv Ntuj nyob tas ntiaj teb, tsuas kawg muaj ib tug xwb nyob His Xas Lais teb !”

NPN 42: 2, 3; 43: 3, 4

Txais: (42:3) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Xws li tus kauv nqhis cov dej ntws lug,
ib yam li ntawd, kuv tus ntsuj plig nqhis txog koj, Tswv Ntuj.

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Thov xa koj qhov pom kev thiab koj txoj kev ua siab pheej xeeb tuaj rau kuv,
thiaj yuav coj kuv taug kev mus ntxiv, thiab coj kom kuv tuaj
txog koj lub roob ntshiab, tuaj txog koj lub tsev nyob.

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Ces kuv yuav chaws mus hauv lub thaj txi Tswv Ntuj,
tus Tswv Ntuj ua kom kuv muaj kev zoo siab thiab kaj siab.
Ces kuv yuav ntaus nkauj nog ncas ua koj tsaug,
Tswv Ntuj, kuv tus Tswv Ntuj!

Txais: Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
Thaum twg kuv li tau mus pom Tswv Ntuj lub ntsej muag?

Zaj Cav lub Moo Zoo: NPN 130: 5, 7

Kuv tso siab rau Huab Tais, kuv cia siab rau nws lo lus,
nws muaj lub siab zoo tas nrho thiab muaj kev cawm seej ntws lug.

Ntawv Moo Zoo: LK 4: 24-30

24 Yes Xus hais rau cov neeg nyob hauv lub tuam tsev teev ntuj nyob Naj Xas Les tias : "Kuv hais rau nej tias, tsis muaj ib tug yaj saub uas luag yuav txais nws zoo hauv lub zos nws hlob. 25 Kuv hais tseeb rau nej : lub caij Es Lias nyob, muaj coob tus poj ntsuam nyob His Xas Lais teb. Thaum ntuj kaw nag tau peb xyoos thiab rau hli, tas teb chaws tshaib plab loj kawg. 26 Tab sis Ntuj tsis xa Es Lias mus pab cov poj ntsuam His Xas Lais ib tug li. Ntuj xa Es Lias mus pab ib tug poj ntsuam nyob lub zos Xas Les Tas, nyob Xis Doos teb xwb. 27 Lub caij tus yaj saub Es Lis Xais nyob, kuj muaj coob tus mob ruas nyob His Xas Lais teb, tab sis tsis muaj ib tug mob ruas His Xas Lais rov huv, tsuas yog tus mob ruas Xis Lias hu ua Nas Maas thiaj rov huv xwb."
28 Tas cov neeg hauv lub tsev txoos hnov cov lus ntawd, mas lawv npau taws kawg. 29 Lawv sawv tsees, lawv ntiab Yes Xus tawm sab nroog nraud. Lawv coj Yes Xus mus txog ntawm ib qho ua tw roob saum lub roob uas lawv txhim lub nroog, lawv yuav thawb Yes Xus kom poob lawm hauv lub qab toj ntxhab. 30 Tab sis Yes Xus hla plaws hauv nruab nrab lawv, nws taug nws kev mus lawm.

TIM 6 LUB 3 HLIS 2018

Hnub Peb Lis Piam Peb Caij Plaub Caug Xyoo B Nruab Lis Piam Xyoo II

Zaj Nyeem Ib: DAS NIAS 3: 25, 34-43

25 As Xas Lias sawv hauv cov nplaim taws, nws thov ntuj nrov nrov tias :
34 "Huab Tais, thov koj saib koj lub npe, koj tsis txhob tso peb rau luag tes mus li, los tsis txhob thim lo lus koj tau cog. 35 Koj tsis txhob thau koj lub txiaj ntsim ntawm peb rov qab, vim koj saib Has Nplas Has koj tus phooj ywg, His Xas Has koj tus tub txib, thiab His Xas Lais koj tus Ntshiab. 36 Koj tau cog lus rau lawv tias lawv yuav muaj tub ki coob cuag li cov hnub qub nyob saum ntuj, los cuag li cov suab zeb nyob ntawm ntug hiav txwv. 37 Huab Tais, peb yog ib haiv neeg me tshaj lwm haiv neeg; hnub no nyob tas ntiaj teb qhov txhia chaw peb txaj muag vim peb cov txhaum. 38 Nyem no, peb tsis muaj vaj, tsis muaj yaj saub, tsis muaj tus thawj, peb tsis muaj tsiaj hlawv txi ntuj, tsis muaj cov txim yuav cev rau Ntuj, tsis muaj xyab, tsis muaj qhov chaw yuav cev thawj cov txiv, 39 thiab yuav ua raws koj nyiam li, tab sis thov koj txais peb vim peb muaj ib lub siab lees txhaum thiab ib lub tswv yim txo hwj chim, 40 zoo puav tam li yog ib co laug tshis thiab ib co heev nyuj los yog ib txhiab tus yaj rog hlawv txi rau koj. Thov kom hnub no peb thaj txi Ntuj yog zoo li ntawd rau koj, vim peb los raws koj tas peb lub siab lub ntsws, thiab vim cov tso siab rau koj yuav tsis raug kev poob ntsej muag. 41 Nyem no peb muab tas peb lub siab los raws koj, los hwm koj thiab rov nrhiav koj lub ntsej muag dua. 42 Thov koj tsis txhob cia peb poob rau kev txaj muag, tiam sis koj mloog koj lub siab zoo thiab khuv leej neeg, koj ua zoo rau peb. 43 Thov koj ua hwj huam loj los cawm peb, Huab Tais, koj ua kom sawv daws cav txog koj lub npe."

NPN 25: 4-5AB, 6+7BC, 8-9

Txais: (6a) Huab Tais, thov koj nco ntsoov koj txoj kev hlub.

Huab Tais, thov koj ua kom kuv paub koj tej kev,
thov qhia koj tej kev rau kuv taug,
thov coj kuv mus raws koj txoj kev tseeb thiab qhia rau kuv paub,
vim koj yog Tswv Ntuj, yog tus cawm kuv.

Txais: (6a) Huab Tais, thov koj nco ntsoov koj txoj kev hlub.

Huab Tais, thov koj nco ntsoov tias koj yeej ib txwm muaj
lub siab hlub neeg, thiab muaj siab zoo txij puag thaum ub los.
Huab Tais, vim koj lub siab zoo, thiab lub siab hlub neeg
thov koj nco txog kuv.


Txais: (6a) Huab Tais, thov koj nco ntsoov koj txoj kev hlub.

Huab Tais yog tus ncaj tus zoo,
nws thiaj qhia txoj kev zoo rau tus neeg txhaum.
Nws coj tus neeg me mus raws txoj kev ncaj,
nws qhia nws txoj kev rau tus neeg me taug.

Txais: (6a) Huab Tais, thov koj nco ntsoov koj txoj kev hlub.

Zaj Cav lub Moo Zoo: Yos Es 2: 12-13

HUAB TAIS hais tias, nyem no
nej cia li muab tas nej lub siab tig rov los cuag kuv,
vim kuv muaj lub siab zoo thiab khuv leej neeg.

Ntawv Moo Zoo: MT 18: 21-35

21 Thaum ntawd, Pob Zeb txav los hais rau Yes Xus tias : “Huab Tais, yog kuv tus kwv ua txhaum rau kuv, kuv yuav zam pes tsawg zaus rau nws? Kuv puas yuav zam txog xya zaus ?” 22 Yes Xus hais rau Pob Zeb tias : “Kuv tsis hais kom koj zam txog xya zaus, tiam sis kuv hais kom koj zam txog xya caum xya zaus. 23 Li ntawd, Ntuj lub Ceeb Tsheej yog zoo li ib tug vaj uas xav nrog nws cov tub txib txheeb nws tej nyiaj txiag. 24 Thaum lawv pib txheeb, luag coj ib tug tub txib uas tshuav nuj nqis txog ib vam nras nyiaj tuaj rau tus vaj. 25 Tus tub txib tsis muaj dab tsi them, ces tus vaj kom luag muab nws thiab nws poj niam, nws cov me nyuam thiab tas nws lub cuab tam huv si muag, los them cov nuj nqis ntawd. 26 Tus tub txib txhos caug ntua ntawm tus tswv ko taw, nws pe tus tswv, nws hais tias : ‘Thov koj ua siab ntev rau kuv, kuv yuav them kom tas rau koj.’ 27 Tus tswv hlub tus tub txib, ces nws tso tus tub txib mus thiab tseem zam cov nuj nqis huv tib si rau nws. 28 Thaum tus tub txib tawm rov qab mus, nws ntsib nws ib tug phooj ywg ua tub txib li nws thiab, uas tshuav nqi ntawm nws ib puas lub txiaj nyiag. Tus tub txib ntawd nthos nkaus nws tus phooj ywg caj dab, zawm tus phooj ywg caj pas, thiab hais tias : ‘Koj tshuav kuv nqi koj cia li them kom tas rau kuv.’ 29 Tus phooj ywg txhos caug ntua ntawm nws ko taw thov tias : ‘Thov koj ua siab ntev rau kuv, kuv yuav them rau koj.’ 30 Tab sis tus tub txib ntawd tsis kam li, nws kom luag muab nws tus phooj ywg mus kaw hauv tsev loj faj mus txog hnub tus phooj ywg them nuj nqis tas huv tib si rau nws. 31 Tus tub txib cov phooj ywg pom nws ua li ntawd, lawv chim kawg, lawv mus qhia tej ntawd rau lawv tus tswv. 32 Ces tus vaj hu tus tub txib tuaj, nws hais rau tus tub txib ntawd tias : ‘Tub txib siab phem dab tsi ! Cov nuj nqis uas koj tshuav ntawm kuv, kuv twb zam tas huv si rau koj, vim koj thov kuv. 33 Ua cas koj tsis hlub koj tus phooj ywg zoo li kuv tau hlub koj ?’ 34 Ces tus vaj npau taws heev, nws muab tus tub txib ntawd tso rau cov tub hiam neeg tsim txom mus txog hnub nws them nws cov nuj nqis tas huv tib si. 35 Kuv Txiv nyob saum ntuj los kuj yuav ua ib yam li ntawd rau nej thiab, yog tias nej txhua tus tsis zam hauv nruab siab rau nej ib tug kwv tij twg.”

TIM 7 LUB 3 HLIS 2018

Hnub Plaub Lis Piam Peb Caij Plaub Caug Xyoo B Nruab Lis Piam Xyoo II

Hwm LN Perpetua thiab LN Felicity

Zaj Nyeem Ib: TXOJ CAI OB 4: 1, 5-9

Mais Xes hais rau tsoom pej xeem tias:
1 "Cov His Xas Lais, zaum no nej mloog cov cai thiab cov lij choj uas kuv qhia rau nej coj, nej thiaj yuav muaj txoj sia thiab yuav tau nkag mus txeeb tau lub teb chaws uas HUAB TAIS nej cov yawg koob tus Tswv Ntuj muab pub rau nej los ua nej tug.
5 Li ntawd, kuv qhia rau nej ib co cai thiab lij choj raws li Huab Tais kuv tus Tswv Ntuj kom kuv qhia, kom nej yuav tau coj nyob hauv lub teb chaws nej yuav mus txeeb los ua nej tug. 6 Nej yuav mloog yuav coj raws nraim cov cai lij choj ntawd, ces lwm haiv neeg thiaj yuav pom tias nej yog neeg thoob tsib neeg ntse. Thaum lawv hnov txog tas cov cai lij choj no, lawv yuav hais tias : ‘Haiv neeg loj ntawd yog ib haiv neeg thoob tsib thiab ntse tiag tiag !’ 7 Vim tias, haiv neeg loj twg thiaj muaj ib co tswv ntuj nyob ze ze lawv li HUAB TAIS peb tus Tswv Ntuj nyob ze ze peb niaj zaus thaum peb hu txog nws ? 8 Haiv neeg loj twg thiaj muaj ib co cai thiab lij choj ncaj npaum li Txoj Cai uas kuv muab tso rau nej hnub no ? 9 Tiam sis nej yuav tau ceev faj zoo, nej yuav tau tsis txhob hnov qab tej yam nej qhov muag tau pom kiag, yuav tsis txhob muab tej ntawd tshem ntawm nej lub tswv yim mus li, txog thaum nej txoj sia tu; tiam sis nej yuav tsum tau muab qhia rau nej cov me nyuam, thiab rau nej cov me nyuam cov me nyuam huv tib si.

NPN 147: 12-13, 15-16, 19-20

Txais: (12a) Yes Lus Xas Les, koj cia li cav txog Huab Tais.

Yes Lus Xas Les, cia li cav txog Huab Tais lub koob meej,
Xis Yoos, cia li cav txog koj tus Tswv Ntuj,
Vim nws tau ua kom cov tab ntawm koj cov rooj vag khov tuaj lawm,
nws tau foom hmoov zoo rau koj cov me nyuam nyob hauv koj.

Txais: (12a) Yes Lus Xas Les, koj cia li cav txog Huab Tais.

Nws xa nws lo lus qhuab qhia tuaj rau ntiaj,
nws lo lus khiav nrawm nroos!
Nws tseb daus los zoo li plaub yaj,
nws pov cov te los zoo li tshauv.

Txais: (12a) Yes Lus Xas Les, koj cia li cav txog Huab Tais.

Nws tau tshaj nws lo lus rau Yas Kos,
nws cov kev cai thiab lij choj rau His Xas Lais.
Nws tsis tau ua zoo li ntawd rau lwm haiv neeg twg li,
nws tsis tau qhia nws cov lij choj rau lawv paub li.

Txais: (12a) Yes Lus Xas Les, koj cia li cav txog Huab Tais.

Zaj Cav lub Moo Zoo: ZAM 6: 63C, 68C

HUAB TAIS, koj cov lus yog tswv yim thiab txoj sia,
koj muaj cov lus pub txoj sia nyob mus li.

Ntawv Moo Zoo: MT 5: 17-19

Yes Xus hais rau nws cov thwj tim tias:
17 Nej txhob xav tias kuv tuaj rhuav Txoj Cai los cov Yaj Saub : kuv tsis yog tuaj rhuav, kuv tuaj qhia ntxiv kom thoob xwb. 18 Kuv hais tseeb rau nej tias: lub ntuj lub teb yuav dua mus, tab sis yuav tsis muaj ib tug txwm ntawv me me, los ib teev ntawv me me hauv Txoj Cai yuav ploj li, mus txog thaum tas ib puas tsav yam yuav tsum tshwm sim tuaj tas tso.
19 Vim li no yog leej twg hla ib txog cai me me, thiab nws qhia kom luag tej ua xws li nws, mas luag yuav hu tus ntawd ua tus me tshaj cov nyob hauv Ntuj lub Ceeb Tsheej; hos tus uas ua raws Txoj Cai tas huv si, thiab qhia kom luag tej ua li nws, mas luag yuav hu nws ua tus loj tshaj nyob hauv Ntuj lub Ceeb Tsheej.”

TIM 8 LUB 3 HLIS 2018

Hnub Tsib Lis Piam Peb Caij Plaub Caug Xyoo B Nruab Xyoo II

Hwm LN John of God

Zaj Nyeem Ib: YES LES MIAS 7: 23-28

HUAB TAIS hais li no:
23 Qhov kuv tau qhia kom kuv haiv neeg ua yog li no: ‘Nej mloog kuv lub suab, ces kuv yuav yog nej tus Tswv Ntuj thiab nej yuav yog kuv haiv neeg. Nej yuav taug nraim txoj kev uas kuv qhia kom nej taug, nej thiaj yuav tau qhov zoo.’ 24 Tab sis lawv tsis mloog kuv hais tsis cuab pob ntseg rau kuv li, lawv taug raws lawv lub siab phem zaj xav xwb; lawv tsis tig ntsej muag lawv tig nrob qaum rau kuv xwb. 25 Txij hnub nej cov yawg koob tawm hauv Hais Nkws Tos teb los txog hnub no, kuv tau xa kuv cov tub txib Yaj Saub tuaj rau nej tsis tseg. 26 Tab sis lawv tsis mloog kuv lus tsis tig pob ntseg los li, lawv ua xwb qwb txhav qhi, lawv tseem coj phem dua lawv cov yawg koob lawm thiab. 27 Koj yuav hais cov lus no tas huv si rau lawv, tiam sis lawv yeej yuav tsis mloog koj li thiab. Koj yuav hu lawv, tab sis lawv yuav tsis teb koj. 28 Ces koj hais rau lawv tias: ‘Nov yog haiv neeg uas tsis mloog HUAB TAIS nws tus Tswv Ntuj lub suab thiab tsis kam txais tej lus qhuab qhia li. Kev mloog lus ploj mus lawm, lawv twb tsis siv lo lus ntawd ntxiv thaum lawv sib tham.’

NPN 95: 1-2, 6-7, 8-9

Txais: Hnub no yog nej hnov nws lub suab, nej tsis txhob ua lub siab tawv ncauj.

Nej tuaj peb hu nkauj luag ntxhi rau HUAB TAIS,
peb qw suab cav txog lub Tsua Cawm peb.
Peb tuaj nyob ntawm nws xub ntiag ua nws tsaug,
peb hu nkauj paj nruag luag ntxi rau nws.

Txais: Hnub no yog nej hnov nws lub suab, nej tsis txhob ua lub siab tawv ncauj.

Tuaj peb mus khoov pe hawm nws,
peb mus txhos caug ntawm tus
HUAB TAIS tsim peb los xub ntiag.
Vim nws yog peb tus Tswv Ntuj,
peb yog haiv neeg nws zov, pab yaj nws coj.

Txais: Hnub no yog nej hnov nws lub suab, nej tsis txhob ua lub siab tawv ncauj.

Xav kom hnub no nej mloog nws lus suab hais:
“Nej tsis txhob ua lub siab cam thawj li nyob Me Lis Npas,
thiab li lub caij nyob Mas Xas hauv teb chaws suab puam,
qhov chaw uas nej phaj txiv tau sim kuv;
lawv twb tau pom kuv tej hwj huam los lawv tseem sim kuv thiab.”

Txais: Hnub no yog nej hnov nws lub suab, nej tsis txhob ua lub siab tawv ncauj.

Zaj Cav lub Moo Zoo: YOS ES 2: 12-13

HUAB TAIS hais tias, lub sij hawm no,
nej muab tas nrho nej lub siab tig rov los cuag kuv,
vim kuv muaj lub siab hlub thiab khuv leej neeg.

Ntawv Moo Zoo: LK 11: 14-23

14 Yes Xus ntiab ib tug dab phem, yog tus dab ua kom neeg tsis txawj hais lus. Thaum tus dab tawm lawd, ces tus neeg nplaig txhav hais tau lus. Tej pab neeg coob nyob ntawd kuj poob siab loj. 15 Nyob hauv cov neeg ntawd, ib txhia hais tias : "Nws hu txog tus vaj dab phem Npes Ntxes Npus los ntiab dab." 16 Tseem muaj ib txhia xav sim Yes Xus, ces lawv thov kom Yes Xus ua ib lub cim tawm saum ntuj tuaj. 17 Tab sis Yes Xus paub qhov lawv xav, nws hais rau lawv tias : "Lub teb chaws twg rov tawm tsam nws tus kheej, mas nws kawg yuav raug kev puas tsuaj, tej vaj tse, ib lub yuav vau tsuam ib lub tas. 18 Yog tias Xas Tas rov tawm tsam Xas Tas tus kheej, mas nws lub ceeb tsheej yuav ua cas nyob tau ruaj ? Vim nej hais tias yog kuv hu txog Npes Ntxes Npus los ntiab dab, 19 mas yog tias kuv hu txog Npes Ntxes Npus los ntiab dab no, nej cov tub ho vam txog leej twg los ntiab dab ? Ua li mas, nej cov tub yuav txiav txim rau nej. 20 Hos yog tias kuv vam txog Tswv Ntuj tus ntiv tes los ntiab dab, mas Tswv Ntuj lub Ceeb Tsheej los txog nej lawm. 21 Thaum ib tug neeg muaj zog tuav ntaj tuav hmuv zov nws lub tsev, mas nws lub cuab tam nyob nyab xeeb. 22 Tab sis, thaum twg lwm tus muaj zog dua nws tuaj ntaus yeej nws, txeeb tau nws cev ris tsho hlau uas yog nws lub chaw tso siab lawm, ces luag yuav muab nws tej cuab yeej cuab tam lwg mus sib faib. 23 Leej twg tsis nrog kuv, mas yog nws tiv kuv. Leej twg tsis nrog kuv sau los cia, mas yog nws muab tseb pov tseg.”

TIM 9 LUB 3 HLIS 2018

Hnub Rau Lis Piam Peb Caij Plaub Caug Xyoo B Nruab Xyoo II

Hwm LN Frances nyob Los Mas

Zaj Nyeem Ib: OS XES 14: 2-10

Huab Tais hais li no:
2 “Cov His Xas Lais, nej cia li rov qab los cuag HUAB TAIS nej tus Tswv Ntuj; nej poob tsag vim nej tau ua txhaum. 3 Nej yuav npaj ib co lus, ces nej yuav rov los cuag HUAB TAIS, nej yuav hais rau nws tias : Thov koj zam peb cov txhaum tas huv si, koj tsuas yuav qhov zoo xwb. Peb yuav muab peb di ncauj los cav txog koj xws li yog ib co thav nyuj tua txi koj. 4 As Xws yuav cawm tsis tau peb, peb yuav tsis muaj nees caij ntxiv, peb yuav tsis hais ntxiv rau tej yam peb txhais tes tsim tawm tias : ‘Peb tus Tswv Ntuj !’ Vim yog nyob hauv koj, tus me nyuam ntsuag thiaj tau txais kev khuv leej."
5 Ces HUAB TAIS hais tias: “Kuv yuav kho lawv kev ntxeev siab kom lawv zoo hlo, kuv yuav hlub lawv ywj siab. Kuv yuav tsis npau taws rau lawv ntxiv. 6 Kuv yuav zoo li ib co lwg poob los yug His Xas Lais. Nws yuav tawg taus paj zoo li lub paj ‘lis lis’, nws yuav nrhau cag xws li cov ntoo ciab nyob Lis Npaas. 7 Nws cov ceg yuav hlav tuaj, yuav zoo saib xws li tsob txiv ntoo roj, yuav tsw qab xws li cov ntoo ciab nyob Lis Npaas. 8 Lawv yuav rov qab los nkaum hauv nws qhov ntxoov ntxoo thiab lawv yuav ua kom tej noob nplej rov ciaj tuaj. Lawv yuav tawg paj xws li cov hmab txiv cawv, hos nws yuav nto moo xws li cov cawv nyob Lis Npaas.
9 Es Fais, ua cas nws thiaj tseem yuav vam txog tej pej kum dab ntxiv?’ Kuv yog tus hnov nws cov lus thov, kuv saib ntsoov nws. Kuv zoo puav tam li ib tsob ntoo thuv ntsuab xiab. Yog vim kuv, koj thiaj txi txiv tau. 10 Tus neeg thoob tsib thiaj yuav to taub tej no, tus neeg ntse thiaj yuav mem tau lub ntsiab. Vim HUAB TAIS tej kev yog kev ncaj, cov neeg siab ncaj thiaj yuav taug tau, hos cov neeg txhaum yuav ntog."

NPN 81: 6C-8A, 8BC-9, 10-11AB, 14+17

Txais: (11+9a) Kuv yog HUAB TAIS koj tus Tswv Ntuj, cia li mloog kuv hais.

Kuv hnov ib co lus tshiab tias:
“Kuv txo nws lub nra ntawm nws xub pwg,
nws ob txhais tes dim tsis tau tuav lub pob tawb ntxiv.
Thaum koj muaj kev nyuaj siab,
koj tau hu, ces kuv tau tuaj pab koj.”

Txais: Kuv yog HUAB TAIS koj tus Tswv Ntuj, cia li mloog kuv hais.

Koj tsis pom kuv, kuv tau teb koj nyob hauv xob quaj.
Kuv tau sim koj nyob ntawm cov dej Mes Lis Npas.
Kuv haiv neeg, nej mloog kuv, kuv yuav ntuas nej,
His Xas Lais, koj puas yuav hnov kuv?

Txais: Kuv yog HUAB TAIS koj tus Tswv Ntuj, cia li mloog kuv hais.

Nej yuav tsis txhob muaj dua lwm tus tswv ntuj,
tsis txhob teev hawm lwm tus pej kum dab.
Kuv, HUAB TAIS, yog nej tus Tswv Ntuj
tus tau coj nej tawm Hais Nkws Tos teb los.

Txais: Kuv yog HUAB TAIS koj tus Tswv Ntuj, cia li mloog kuv hais.

Kheev lam kuv haiv neeg cuab pob ntseg mloog kuv,
kheev lam His Xas Lais taug kuv tej kev,
mas kuv yuav muab cov nplej mov mog qab tshaj rau lawv noj,
thiab kuv yuav tho cov zib muv saum tsua los daws lawv nqhis.

Txais: Kuv yog HUAB TAIS koj tus Tswv Ntuj, cia li mloog kuv hais.

Zaj Cav lub Moo Zoo: MT 4: 17

Huab Tais hais tias, nej cia li hloov siab,
Ntuj lub Ceeb Tsheej nyob ze ze lawm.

Ntawv Moo Zoo: MK 12: 28-34

28 Ib tug kws Ntawv Ntshiab hnov lawv sib cav, nws pom tias Yes Xus teb raug kawg rau cov xas dus kais, nws txav los nug Yes Xus tias : "Nyob hauv cov lus qhia tas huv tib si, lo lus qhia twg yog thawj lo?" 29 Yes Xus teb rau nws tias : "Thawj lo lus qhia yog lo lus no : ‘His Xas Lais, koj mloog mog ! Peb tus Huab Tais Tswv Ntuj tib leeg xwb yog Huab Tais. 30 Koj yuav nyiam koj tus Huab Tais Tswv Ntuj tas siab tas ntsws, tas koj tus ntsuj plig, tas koj lub tswv yim thiab tas koj lub zog.’ 31 Lo lus qhia ob yog lo lus no : ‘Koj yuav nyiam tus nyob ze koj ib yam li koj nyiam koj.’ Tsis muaj lwm lo lus qhia loj dua ob lo lus no lawm." 32 Tus kws Ntawv Ntshiab hais rau Yes Xus tias : "Koj hais raug kawg, Xib Hwb, koj hais qhov tseeb : muaj ib tug Huab Tais Tswv Ntuj xwb, tsis muaj dua lwm tus Tswv Ntuj dhau ntawm nws lawm. 33 Kev nyiam Tswv Ntuj tas yus lub siab lub ntsws, tas yus lub tswv yim thiab tas yus lub zog, thiab nyiam tus nyob ze yus ib yam li yus nyiam yus, yog zoo tshaj tej tsiaj hlawv thiab tej thaj txi Ntuj huv tib si." 34 Yes Xus pom tus kws Ntawv Ntshiab txhab ib lo lus thoob tsib, ces nws hais rau tus kws Ntawv Ntshiab tias : "Koj nyob tsis deb ntawm Tswv Ntuj lub Ceeb Tsheej lawm." Ces tsis muaj leej twg muaj cuab kav nug Yes Xus dab tsi ntxiv.

TIM 10 LUB 3 HLIS 2018

Hnub Xya Lis Piam Peb Caij Plaub Caug Xyoo B Nruab Lis Piam Xyoo II

Zaj Nyeem Ib: OS XES 6: 1-6

1 Nej tuaj, peb rov qab los cuag HUAB TAIS. Nws tau dua peb ntuag, tab sis nws yuav rov kho peb; nws tau nplawm peb, tab sis nws yuav qhwv peb cov qhov txhab. 2 Nws tos dhau ob hnub ces nws yuav rov muab txoj sia rau peb; hnub peb, nws yuav tsa peb sawv rov los, peb yuav tau nyob ntawm nws xub ntiag. 3 Peb yuav tsum paub, peb kav tsij nrhiav kom paub HUAB TAIS. Tseeb ib yam li lub hnub tuaj thaum sawv ntxov, nws yeej yuav tuaj tiag. Nws yuav tuaj xws li thawj cov kob nag thiab cov kob nag kawg poob los ywg lub ntiaj teb.
4 Kuv yuav ua dab tsi rau koj, Es Fais ? Kuv yuav ua dab tsi rau koj, Yus Das ? Nej txoj kev nyiam kuv yog zoo li cov huab thaum sawv ntxov, thiab zoo li cov lwg uas yaj sai sai. 5 Yog vim li ntawd kuv thiaj siv cov Yaj Saub muab lawv txiav ua ntau daim, kuv lub ncauj thiaj hais cov lus muab lawv tua, kuv txoj kev txiav txim yuav ci tawm plaws tuaj xws li qhov pom kev. 6 Vim tias kev nyiam kev hlub xis kuv siab dua cov thaj txi Ntuj, kev paub Tswv Ntuj xis kuv siab dua cov thaj hlawv tsiaj.

NPN 51: 3-4, 18-19, 20-21AB

Txais: (OX 6:6) Kuv xav pom nej txoj kev hlub neeg dua nej tej kev txi ntuj.

Thov koj khuv leej kuv, Tswv Ntuj, vim koj lub siab zoo,
thov so kuv qhov txhaum pov tseg,
vim koj txoj kev hlub loj kawg nkaus.
thov ntxuav kuv lub txim kom tas nrho pov tseg
thiab tshem kuv qhov txhaum mus kom kuv dawb huv tuaj.

Txais: Kuv xav pom nej txoj kev hlub neeg dua nej tej kev txi ntuj.

Vim koj tsis zoo siab txais peb tej kev txi ntuj,
yog kuv yuav hlawv tsiaj txi ntuj, koj yuav tsis kam txais.
Kuv txoj kev txi ntuj, Tswv Ntuj,
yog muaj ib lub tswv yim xav lees txhaum;
ib lub siab xav lees txhaum thiab ua neeg me,
Tswv Ntuj, koj yuav tsis thuam.

Txais: Kuv xav pom nej txoj kev hlub neeg dua nej tej kev txi ntuj.

HUAB TAIS, thov koj ua siab dav rau Xis Yoos,
vim koj lub siab zoo, koj rov tsa Yes Lus Xas Les cov ntsa loog.
Ces thaum ntawd koj yuav zoo siab txais peb cov thaj txi ntuj,
peb cov kev tua tsiaj hlawv tsiaj txi ntuj.

Txais: Kuv xav pom nej txoj kev hlub neeg dua nej tej kev txi ntuj

Zaj Cav lub Moo Zoo: NPN 95: 8

Yog hnub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo: LK 18: 9-14

9 Yes Xus tseem hais zaj paj lug no ntxiv, nws hais rau ib txhia neeg uas lawv khav tias lawv yog neeg ncaj, ces lawv thuam luag tej. 10 "Muaj ob tug neeg nce mus teev Ntuj pem lub Tuam Tsev Teev Ntuj. Ib tug yog Fas Lis Xais, ib tug yog tub sau se. 11 Tus Fas Lis Xais sawv ntsug, nws teev Ntuj li no nyob hauv siab : 'Aub, Tswv Ntuj, kuv ua koj tsaug, vim kuv tsis zoo li zeej tsoom sawv daws. Lawv mas lawv ua tub sab, ua tsis ncaj, deev luag txij luag nkawm, thiab tseem ua zoo li tus sau se ntawd thiab. 12 Ib lis piam twg, kuv yoo mov ob zaug. Kuv pub ib feem kaum ntawm tas txhia yam uas kuv khwv tau.' 13 Tus sau se nyob nrug deb, tsis muaj cuab kav tsa muag ntsia saum ntuj. Nws ntaus nws hauv siab, nws hais tias : 'Aub ! Tswv Ntuj, thov koj khuv leej kuv, vim kuv yog neeg txhaum !' 14 Kuv hais rau nej tias: Tus sau se nqes rov mus tsev, nws dawb huv tuaj lawm, hos tus Fas Lis Xais tsis dawb huv. Vim tias leej twg tsa nws siab, Ntuj yuav txo nws qis, hos leej twg txo nws qis, Ntuj yuav tsa nws siab."

TIM 12 LUB 3 HLIS 2018

Hnub Ob Lis Piam Plaub Caij Plaub Caug Xyoo B Nruab Lis Piam Xyoo II

Zaj Nyeem Ib: HIS XAIS 65: 17-21

Huab Tais hais tias:
17 Saib ntawm no, kuv tsim cov txheej ntuj tshiab thiab ib lub ntiaj teb tshiab. Yuav tsis nco txog yav tas los lawd ntxiv, yuav tsis muaj nyob hauv lub tswv yim ntxiv. 18 Yuav muaj kev hom khaj thiab kev zoo siab mus li nyob hauv qhov kuv tsim. Vim kuv tsim Yes Lus Xas Les los ua ib qho kev zoo siab, kuv tsim nws haiv neeg los ua ua ib qho kev puv siab. 19 Kuv yuav zoo siab nyob hauv Yes Lus Xas Les, yuav dhia hom khaj nyob hauv kuv haiv neeg. Yuav tsis hnov suab quaj los suab ncia nyob hauv nws ntxiv. 20 Nyob hauv nws, yuav tsis muaj ntxiv cov me nyuam mos uas yug los nyob ob peb hnub xwb, yuav tsis muaj ib tug neeg laus uas nyob tsis puv nws lub hnub nyoog. Tus neeg tuag thaum hnub nyoog puv ib puas xyoo, mas yog nws tuag hluas kawg; hos tus tuag tsis muaj ib puas xyoo mas luag yuav saib nws yog ib tug neeg tau hmoov phem. 21 Lawv yuav tau nyob hauv cov tsev uas lawv txhim tsa, thiab lawv yuav tau noj cov txiv cawv uas lawv tau cog.

NPN 30: 2+4, 5-6, 11-12A+13B

Txais: (2a) Kuv yuav cav txog koj, Huab Tais, vim koj tau cawm kuv.

Kuv yuav cav txog koj lub koob meej, Huab Tais, vim koj tau npo kuv dim,
tsis pub kuv cov yeeb ncuab muaj kev zoo siab yeej kuv.
HUAB TAIS, koj tau thau kuv tus plig ntawm ntuj txias teb tsaus los;
kuv nyob hauv cov uas poob mus rau lub qhov,
koj tau rov muab txoj sia rau kuv.

Txais: (2a) Kuv yuav cxav txog koj, Huab Tais, vim koj tau pab kuv.

Nej cav txog HUAB TAIS, nej cov uas nyiam nws,
nej cav txog nws thaum nej nco txog nws txoj kev ntshiab.
vim nws kev npau taws tsuas nyob ib pliag,
hos nws txoj kev ua zoo nyob mus ib tiam.
Thaum tsaus ntuj kev quaj nkag los,
thaum sawv ntxov muaj kev zoo siab.

Txais: (2a) Kuv yuav cxav txog koj, Huab Tais, vim koj tau pab kuv.

HUAB TAIS, thov koj mloog kuv thiab khuv leej kuv,
HUAB TAIS, thov koj ua tus pab kuv.
Koj tau hloov kuv txoj kev quaj ntsuag ua kev dhia zoo siab.
HUAB TAIS, kuv tus Tswv Ntuj, kuv yuav cav txog koj mus li ib txhis.

Txais: (2a) Kuv yuav cxav txog koj, Huab Tais, vim koj tau pab kuv.

Zaj Cav lub Moo Zoo: AS MOS 5: 14

Nej nrhiav qhov zoo txhob nrhiav qhov phem, nej thiaj yuav muaj sia nyob,
thiab HUAB TAIS thiaj yuav nrog nej nyob.

Ntawv Moo Zoo: ZAM 4: 43-54

43 Dhau ob hnub ntawd lawm, Yes Xus sawv kev ntawm qhov chaw ntawd mus rau Nkas Lis Lais. 44 Vim Yes Xus tau hais meej tias ib tug yaj saub tsis raug luag saib muaj nqis nyob hauv lub zos nws hlob. 45 Thaum Yes Xus tuaj txog Nkas Lis Lais, cov neeg Nkas Lis Lais txais nws zoo, vim lawv tau pom tej yam nws ua nyob Yes Lus Xas Les thaum lub caij ua koob tsheej, yog vim lawv kuj tau mus ua koob tshej nyob ped thiab. 46 Yes Xus thiaj rov tuaj txog Kas Nas xeev Nkas Lis Lais, lub zos uas nws muab dej los txia ua cawv. Muaj ib tug nom ua hauj lwm rau tus vaj nyob Kas Fas Naus nws tus tub muaj mob. 47 Nws hnov tias Yes Xus los Yus Das teb los txog Nkas Lis Lais lawm, ces nws mus cuag Yes Xus, nws thov Yes Xus kom nqes mus kho nws tus tub ; vim tus tub twb yuav tuag. 48 Yes Xus hais rau nws tias : "Yog nej tsis pom ib co cim thiab tej yam hwj huam, mas nej tsis ntseeg li." 49 Tus nom hais rau Yes Xus tias : "Huab Tais, thov koj nqes mus, cheem kuv tus me nyuam tsis tau tuag." 50 Yes Xus hais rau nws tias : "Koj rov mus, koj tus tub zoo lawm." Tus neeg ntawd ntseeg lo lus Yes Xus hais rau nws, ces nws sawv kev rov mus. 51 Thaum nws tab tom nqes mus, nws cov tub txib tuaj tos nws, lawv hais tias nws tus tub zoo neej lawm. 52 Nws nug lawv saib yog lub sij hawm twg tus tub thiaj rov zoo. Lawv hais rau nws tias : "Nag, thaum ib teev hnub qaij, ces tus mob kub cev thim hlo lawm." 53 Leej txiv thiaj pom tias yog lub sij hawm uas Yes Xus hais rau nws tias : 'Koj tus tub zoo lawm.' Ces nws ntseeg, nws thiab tas nws tsev neeg huv si ntseeg. 54 Thaum Yes Xus los ntawm xeev Yus Das mus rau Nkas Lis Lais, mas nws ua lub cim ob yog zoo li ntawd.

TIM 13 LUB 3 HLIS 2018

Hnub Peb Lis Piam Plaub Caij Plaub Caug Xyoo B Nruab Lis Piam Xyoo II

Zaj Nyeem Ib: ES XES KIAS 47: 1-9, 12

1 Ces tus tshiab coj kuv, Es Xes Kias, rov los txog ntawm lub qhov rooj mus hauv lub Tuam Tsev Teev Ntuj. Ua ciav muaj ib tug dej ntws hauv taw rooj los dua sab hnub tuaj lawm, vim lub Tuam Tsev tig mus rau sab hnub tuaj. Dej ntws tawm hauv qab sab xis lub Tuam Tsev Teev Ntuj nyob sab naj lub thaj txi ntuj. 2 Nws coj kuv tawm ntawm lub rooj vag nyob sab pej los, thiab coj kuv ncig sab Tuam Tsev nraud los txog ntawm lub rooj vag nyob sab hnub tuaj, ces kuv pom dej ntws tawm ntawm sab xis los. 3 Tus txiv neej mus rov rau sab hnub tuaj, nws nqa ib txoj hlua ntsuas ntawm tes, nws ntsuas ntev li ib txhiab tshim, ces nws kom kuv hla dej; dej txij li kuv qij taw. 4 Nws rov ntsuas ib txhiab tshim ntxiv thiab kom kuv hla dej dua, dej nce txij kuv hauv caug lawm. Nws rov ntsuas dua ib txhiab tshim ntxiv, nws rov kom kuv hla dej, dej txij kuv duav lawm. 5 Nws tseem rov qab ntsuas dua ib txhiab tshim ntxiv, thaum ntawd cia li yog ib tug dej loj kuv hla tsis tau lawm, vim cov dej ntau tuaj ua ib tug dej loj hla tsis tau lawm. 6 Ces tus neeg hais rau kuv tias : " Neeg leej tub, koj puas pom?" Nws thiaj coj kuv rov los rau ntawm tus ntug dej. 7 Thaum kuv los txog, mas nyob ntawm ob sab ntug dej kuv pom muaj ib co ntoo ntau ntau. 8 Tus neeg hais rau kuv tias : "Cov dej no ntws mus rau sab toob fab mus rau nram lub hav As Las Npas, yuav mus tshuam rau hauv hiav txwv, mus ua kom lub hiav txwv cov dej huv tuaj. 9 Tus dej no ntws txog qhov twg mas tas puas tsav yam muaj sia uas txawj huam vam yuav ciaj; yuav muaj ntses ntau vim tus dej no ntws txog twg, nws yuaj coj kev noj qab nyob zoo rau qhov ntawd; ces tus dej no mus txog twg tas txhua yam yuav muaj sia npau xi nyob qhov ntawd.
12 Nyob ntawm tus dej ob sab ntug yuav tuaj tas ib puas tsav yam txiv ntoo, lawv cov nplooj yuav tsis zeeg ib zaug thiab lawv yuav txi txiv mus li. Niaj hli lawv yuav txi ib co txiv tshiab, vim cov dej ntawd ntws ntawm thaj chaw ntshiab los. Cov txiv yuav yog txhiam xws noj, cov nplooj yuav yog tshuaj."

NPN 46: 2-3, 5-6, 8-9

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tswv Ntuj yog peb chawm nkaum yog peb lub zog,
yog tus pab peb mus li thaum peb ntsib kev nyuaj.
Vim li no, txawm ntiaj teb yuav ua zog koog thiab toj roob hauv pes
yuav nphau nphwv rau hauv qab tiv txwv los peb tsis ntshai.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Muaj ib tug dej, nws cov ceg ncau mus ua kom Tswv Ntuj lub tsheej zoo siab,
nws ntxuav kom tus Nyob Siab tej vaj tse dawb huv.
Tswv Ntuj nyob hauv lub tsheej, nws yuav tsis muaj kev swb,
Tswv Ntuj yuav pab nws thaum kaj ntug txoog.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Tus Huab Tais kav tsoom tshiab nrog peb nyob,
peb lub yeej ntsa zeb yog Yas Kos tus Tswv Ntuj.
Nej tuaj xyuas HUAB TAIS cov hauj lwm saib!
xyuas tej yam txaus ntshai nws ua nyob ntiaj teb.

Txais: Tus Huab Tais kav tsoom tshiab nrog peb nyob;
Peb lub yeej ntsa zeb yog Yas Kos tus Tswv Ntuj.

Zaj Cav lub Moo Zoo: NPN 51: 12A, 14A

Tswv Ntuj, thov koj tsim ib lub siab huv lis si rau kuv,
koj pub kom kuv rov muaj kev zoo siab nyob hauv koj txoj kev cawm.

Ntawv Moo Zoo: ZAM 5: 1-16

1 Dhau tej ntawd tas lawm, txog cov Yus Das ib lub hnub nyoog ua koob tsheej, ces Yes Xus nce mus pem Yes Lus Xas Les. 2 Nyob Yes Lus Xas Les, muaj ib lub pas dej nyob ze lub rooj vag hu ua Qhov Rooj Yaj, uas lus Hes Nplaws hu ua Npes Xais Das. Lub pas dej no muaj tsib lub maum kaum tsev nyob ib ncig. 3 Ib pab neeg coob kawg pw hauv cov maum kaum tsev no : ib co mob, ib co dig muag, ib co ceg tawv, ib co tuag ceg. Lawv tos lub caij dej ntas. 4 Vim muaj tej lub caij, Huab Tais tus Tshiab nqes los hauv lub pas dej, ces ua rau dej ntas. Thaum dej nyuam qhuav ntas, yog leej twg xub nqes mus hauv, mas nws tus mob zoo hlo, txawm raug tus mob dab tsi los zoo tas huv tib si. 5 Muaj ib tug txiv neej nyob ntawd, nws mob tau peb caug yim xyoo lawm. 6 Yes Xus pom nws pw, Yes Xus paub tias nws mob li ntawd tau ntev los lawm, nws hais rau tus neeg mob tias : "Koj puas xav kom koj tus mob zoo ?" 7 Tus neeg mob teb rau Yes Xus tias : "Huab Tais, thaum dej ntas, kuv tsis muaj leej twg pab muab kuv tso rau hauv dej. Thaum kuv tab tom mus, twb muaj lwm tus xub nqes ua kuv ntej lawm." 8 Yes Xus hais rau nws tias : "Koj sawv ! Nqa koj daim pua chaw, koj mus kev." 9 Tam sis ntawd tus neeg mob zoo hlo. Nws nqa nws daim pua chaw, ces nws sawv mus kev. Hnub ntawd yog hnub Xas Npas Tos. 10 Cov Yus Das hais rau tus neeg uas zoo lawd tias : "Hnub no yog Xas Npas Tos, txwv tsis pub koj nqa koj daim pua chaw." 11 Tab sis nws hais rau lawv tias : "Tus uas kho kuv zoo, nws hais rau kuv tias : Nqa koj daim pua chaw, koj mus kev." 12 Lawv nug nws tias : "Leej twg yog tus hais rau koj tias : Nqa koj daim pua chaw, koj mus kev?" 13 Tab sis tus neeg mob uas zoo ntawd tsis paub yog leej twg, vim Yes Xus twb ploj lawm, thiab muaj neeg coob coob nyob ntawd. 14 Ib tsam, Yes Xus pom nws hauv lub Tuam Tsev Teev Ntuj, Yes Xus hais rau nws tias : "Nyem no, koj tus mob zoo lawm, koj txhob ua txhaum ntxiv, tsam ib yam phem tshaj ho rov raug koj dua." 15 Tus neeg mus hais rau cov Yus Das tias tus kho nws zoo yog Yes Xus. 16 Vim li ntawd, cov Yus Das thiaj pib hiam Yes Xus, vim nws ua tej ntawd hnub Xas Npas Tos.

TIM 14 LUB 3 HLIS 2018

Hnub Plaub Lis Piam Plaub lub Caij Plaub Caug Xyoo B Nruab Lis Piam Xyoo II

Zaj Nyeem Ib: HIS XAIS 49: 8-15

8 HUAB TAIS hais li no : "Thaum txog lub zoo caij, kuv tau mloog koj cov lus thov; thaum txog hnub cawm neeg, kuv tau pab koj dim. Kuv tau txuag koj, tau muab koj ua ib txog kev cog lus rau tsoom neeg, kom tau tsa lub teb chaws rov sawv, kom tau rov faib cov cuab tam uas piam tas lawd, 9 kom tau hais rau cov neeg raug kaw tias : 'Nej tawm los,' kom tau hais rau cov neeg nyob hauv qhov tsaus ntuj tias : 'Nej tawm tuaj rau sawv daws pom!' Lawv yuav nog zaub taug tej ntug kev; cov roob do hau yuav yog lawv tej roob zaub. 10 Lawv yuav tsis tshaib, tsis nqhis ntxiv; cov cua kub thiab lub hnub yuav tsis ntaiv lawv, vim tus uas hlub lawv yuav coj lawv kev, nws yuav coj lawv mus kom txog cov dej txhawv ntws lug. 11 Kuv yuav muab tas nrho kuv cov roob huv si los ua ib txog kev; kuv tej kev yuav yog kev nyob rau qhov chaw siab. 12 Ntsia saib ! Lawv yuav tuaj deb tuaj, cov no tuaj pej fab thiab xib fab tuaj, cov ntawd tuaj Xis Nim teb tuaj.”
13 “Cuaj txheej ntuj, nej qw suab zoo siab, ntiaj teb nrag cai, koj dhia hom khaj ! Kom cov toj roob hauv pes qw suab nkauj, vim HUAB TAIS tau nplij nws haiv neeg, nws tau hlub nws cov neeg raug txom nyem. 14 Xis Yoos tau hais tias: ‘HUAB TAIS tso kuv pov tseg lawm, HUAB TAIS tsis nco qab kuv lawm !’ 15 Tiam sis ib tug poj niam puas tsis nco qab nws tus me nyuam tseem noj mis tau? Nws puas tsis hlub tus uas tawm hauv nws lub cev los tau? Tab txawm cov ntawd tsis nco qab tau los kuv yuav tsis muaj qhov tsis nco qab koj ib zaug li !”

NPN 145: 8-9, 13CD-14, 17-18

Txais: (8a) Huab Tais muaj lub siab hlub thiab khuv leej neeg.

Huab Tais muaj lub siab hlub thiab khuv leej neeg,
nws npau taws qeeb, nws lub siab puv nkaus kev hlub.
Huab Tais ua zoo rau txhua leej txhua tus,
nws txoj kev khuv leej vov tas txhua yam nws tau tsim.

Txais: Huab Tais muaj lub siab hlub thiab khuv leej neeg.

Tas nrho Huab Tais tej lus yog qhov tseeb,
tas nrho nws tej hauj lwm yog kev hlub.
Huab Tais hwj tas nrho cov ntog kom sawv taus los,
nws tsa tas nrho cov khoov kom sawv taus ntseg.

Txais: Huab Tais muaj lub siab hlub thiab khuv leej neeg.

Huab Tais tej kev yog kev ncaj tas huv si
nws tej dej num tas nrho yog kev ntshiab.
Huab Tais nyob ze tas cov hu txog nws tib si,
tas cov uas muaj lub siab hu txog nws tiag.

Txais: Huab Tais muaj lub siab hlub thiab khuv leej neeg.

Zaj Cav lub Moo Zoo: ZAM 11: 25A, 26

Huab Tais hais tias, kuv yog kev sawv rov los thiab yog txoj sia,
leej twg ntseeg txog kuv yuav tsis txawj tuag li.

Ntawv Moo Zoo: ZAM 5: 17-30

17 Yes Xus teb rau lawv tias : "Kuv Txiv ua hauj lwm txog tav no, kuv kuj ua hauj lwm thiab." 18 Yog vim li ntawd, cov Yus Das yim huab xav muab Yes Xus tua, tsis yog vim nws tsis caiv hnub xas npas tos xwb, nws tseem hu Tswv Ntuj ua nws Txiv thiab, ces yog nws tsa nws nrog Tswv Ntuj loj sib luag lawm.
19 Yes Xus thiaj tsa ncauj hais rau lawv tias : "Kuv hais qhov muaj tseeb tiag rau nej: Leej Tub ua tsis tau ib yam ntawm nws tus kheej, nws tsuas ua tau qhov nws pom Leej Txiv ua xwb; vim tias Leej Txiv ua yam twg, mas Leej Tub kuj yuav ua raws li ntawd thiab. 20 Vim Leej Txiv nyiam Leej Tub, nws muab ib puas tsav yam nws ua rau Leej Tub pom. Nws tseem yuav muab ib co hauj lwm loj tshaj cov no rau Leej Tub pom thiab, ces nej yuav qhuas kawg nkaus. 21 Ib yam li Leej Txiv tsa cov tuag sawv rov los thiab ua kom lawv muaj txoj sia, yog Leej Tub xav ua kom leej twg muaj txoj sia kuj tau nyob ntawm nws nyiam. 22 Leej Txiv tsis txiav txim rau leej twg li, nws tso txoj hauj lwm txiav txim tas huv tib si rau Leej Tub lawm, 23 kom sawv daws hwm Leej Tub ib yam li lawv hwm Leej Txiv thiab. Tus tsis hwm Leej Tub, kuj tsis hwm Leej Txiv uas yog tus xa Leej Tub tuaj thiab. 24 Kuv hais qhov muaj tseeb tiag rau nej, tus twg mloog kuv lo lus, thiab ntseeg txog tus xa kuv tuaj, mas nws tau txoj sia nyob mus li, nws tsis raug mus nyob txim, nws hla dhau txoj kev tuag mus rau hauv txoj sia lawm. 25 Kuv hais qhov muaj tseeb tiag rau nej tias lub zim txwv los txog lawm, yog nyem no ntag, yog lub caij uas cov tuag yuav hnov Tswv Ntuj Leej Tub lub suab; cov uas hnov, yuav muaj txoj sia. 26 Ib yam li Leej Txiv muaj txoj sia nyob hauv nws tus kheej, nws kuj pub kom Leej Tub muaj txoj sia nyob hauv nws tus kheej thiab. 27 Leej Txiv tau pub hwj huam muaj cai txiav txim tau rau Leej Tub, vim nws yog Neeg Leej Tub. 28 Nej tsis txhob ceeb, vim txog lub caij lawm uas tas ib tsoom neeg nyob hauv qhov ntxa yuav hnov Neeg Leej Tub lub suab. 29 Ces lawv yuav tawm los; cov tau ua qhov zoo, yuav sawv rov los mus txais txoj sia, hos cov tau ua qhov phem, yuav sawv rov los mus raug txim.
30 Kuv ua tsis tau ib yam ntawm kuv tus kheej. Thaum kuv txiav txim, kuv ua raws li qhov kuv hnov, ces kuv cov lus txiav txim yog lus ncaj ncees, vim kuv tsis nrhiav kom tau ua raws li kuv lub siab xav, kuv tsuas nrhiav kom tau ua raws li tus xa kuv tuaj lub siab xav xwb.”

TIM 15 LUB 3 HLIS 2018

Hnub Tsib Lis Piam Plaub Caij 40 Xyoo B Nruab Lis Piam Xyoo II

Zaj Nyeem Ib: KEV TSIV 32: 7-14

7 Ces HUAB TAIS hais rau Mais Xes tias : "Koj kav tsij nqes mus sai sai mus xyuas koj haiv neeg uas koj tau coj tawm ntawm Hais Nkws Tos teb los, vim lawv twb ua phem lawm. 8 Lawv twb maj maj ncaim ntawm txoj kev uas kuv tau qhia kom lawv taug. Lawv nchuav tau ib tug mlom nyuj rau lawv teev, lawv pe, thiab lawv tua tsiaj txi rau. Lawv hais tias : ‘Cov His Xas Lais, nej ntsia, tus no yog nej tus Tswv Ntuj uas tau coj nej tawm ntawm Hais Nkws Tos teb los!’ " 9 Ces HUAB TAIS hais rau Mais Xes tias : "Kuv pom tias haiv neeg ntawd yog ib haiv neeg xwb qwb txhav dhau. 10 Zaum no, koj txhob cheem kuv, koj cia kuv npau taws kub lug rau lawv, kuv yuav muab lawv hlawv pov tseg, kuv mam li muab koj mus tsim dua ib haiv neeg loj." 11 Tiam sis Mais Xes ua tib zoo thov nws tus HUAB TAIS Tswv Ntuj, nws hais tias : "HUAB TAIS, vim li cas koj thiaj li npau taws rau koj haiv neeg uas koj lub hwj huam loj thiab koj txhais tes muaj zog tau coj tawm ntawm Hais Nkws Tos teb los? 12 Vim li cas koj xav kom cov Hais Nkws Tos tau kev hnyos tias : ‘Nws muaj lub siab phem xav coj lawv los tuag kom tas nyob pem roob kom lawv txhob tshuav ib tug ua noob nyob ntiaj teb ntxiv ?' Thov koj cia koj lub siab npau taws kub lug ntaug mus, thiab koj tso qhov phem uas koj xav ua rau koj haiv neeg pov tseg mas. 13 Thov koj nco ntsoov txog koj cov tub txib Has Nplas Has, His Xas Has thiab His Xas Lais, uas koj tau cog lus ntawm koj tus kheej rau lawv tias : ‘Kuv yuav ua kom nej cov xeeb zeej xeeb ntxwv huam vam coob npaum li cov hnub qub saum ntuj, thiab kuv yuav muab lub teb chaws uas kuv tau cog lus rau nej, pub rau nej cov xeeb zeej xeeb ntxwv ua lawv tug mus ib txhis.’" 14 Ces HUAB TAIS thim xav, nws tsis rau txim rau nws haiv neeg raws li nws tau hais hem lawv.

NPN 106: 19-20, 21-22, 23

Txais: (4a) Thov koj nco txog peb, Huab Tais, koj ua zoo rau koj haiv neeg.

Peb cov yawg koob puab ib tug mlom nyuj nyob ntawm roob Hos Les;
lawv txhos caug pe tus mlom uas lawv nchuav.
Lawv muab lawv lub koob meej
pauv ib tug mlom nyuj uas yog tsiaj noj zaub.

Txais: (4a) Thov koj nco txog peb, Huab Tais, koj ua zoo rau koj haiv neeg.

Lawv tsis nco qab Tswv Ntuj tus tau cawm lawv,
tus tau ua tej yam loj nyob Hais Nkws Tos teb,
tus tau ua tej yam hwj huam txaus qhuas nyob Has teb,
tus tau ua tej yam txaus ntshai nyob ntawm Dej Ntuj Liab.

Txais: (4a) Thov koj nco txog peb, Huab Tais, koj ua zoo rau koj haiv neeg.

Nws tau hais tias nws yuav ua kom lawv tuag tu noob
tab sis Mais Xes, tus nws xaiv,
tau cheem nws kom txhob ua raws nws xav,
kom nws thim nws lub siab npau taws xav txo lawv.

Txais: (4a) Thov koj nco txog peb, Huab Tais, koj ua zoo rau koj haiv neeg.

Zaj Cav lub Moo Zoo: ZAM 3: 16

Tswv Ntuj hlub lub ntiaj teb npaum no,
nws thiaj muab nws tib leeg tub rau,
Kom xwv txhua tus uas ntseeg nws muaj txoj sia nyob mus li.

Ntawv Moo Zoo: ZAM 5: 31-47

Yes Xus hais rau lawv tias:
31 Yog kuv rov ua tim khawv zeem txog kuv, mas kuv cov lus pov thawj tsis yog lus tseeb. 32 Yog Lwm Tus ua tim khawv zeem txog kuv, mas kuv paub tias nws cov lus pov thawj zeem txog kuv ntawd yog lus tseeb. 33 Nej xa ib co tub coj xo mus cuag Zam. Zam ua tim khawv txog qhov tseeb. 34 Kuv mas kuv tsis txais lus zeem tseeb ntawm ib tug neeg, kuv tsuas hais tej ntawd kom nej txais kev cawm xwb. 35 Zam yog lub teeb cig thiab ci tuaj, ces nej xyiv fab zoo siab ib ntus nyob hauv nws qhov pom kev. 36 Kuv cov lus ua tim khawv loj dua Zam cov. Cov hauj lwm uas Leej Txiv muab rau kuv ua, cov hauj lwm uas kuv ua no rov ua tim khawv txog kuv tias yog Leej Txiv xa kuv tuaj. 37 Leej Txiv uas xa kuv tuaj, nws kuj ua tim khawv txog kuv thiab. Nej tsis tau hnov nws lub suab ib zaug, tsis tau pom nws ntsej muag li, 38 thiab nej tsis muaj nws lo lus nyob hauv nej, vim nej twb tsis ntseeg tus uas Leej Txiv xa tuaj. 39 Nej tshawb hauv tej Ntawv, vim nej xav tias nej yuav tau txoj sia nyob mus li ntawm cov Ntawv ntawd los. Tab cov Ntawv kiag twb ua tim khawv txog kuv. 40 Tab sis nej tsis xav los cuag kuv kom nej tau txoj sia. 41 Kuv tsis txais koob meej ntawm tib neeg, 42 tsis tas li xwb, kuv paub tias nej tsis muaj ib pluaj siab nyiam Tswv Ntuj nyob hauv nej li. 43 Kuv tuaj ntawm Leej Txiv lub npe tuaj, tab sis nej tsis txais kuv. Hos lwm tus uas nws tuaj nws tus kheej tuaj xwb, nej ho txais nws. 44 Nej yuav ua cas ntseeg tau, yog tias nej tsuas nrhiav kom nej ib leeg rov qhuas ib leeg xwb, nej twb tsis nrhiav lub koob meej uas tuaj ntawm tib tug Tswv Ntuj li? 45 Nej txhob xav tias kuv yog tus yuav kom nej rau ntawm Leej Txiv; tus yuav kom nej yog Mais Xes, tus uas nej tso siab rau. 46 Vim tias yog nej ntseeg Mais Xes tiag, nej kuj yuav ntseeg kuv thiab ; vim Mais Xes sau ntawv hais txog kuv. 47 Tiam sis yog nej tsis ntseeg tej lus Mais Xes sau cia, mas nej yuav ua cas ntseeg kuv tej lus ?"

TIM 16 LUB 3 HLIS 2018

Hnub Rau Lis Piam Plaub Caij Plaub Caug Xyoo B Nruab Lis Piam Xyoo II

Zaj Nyeem Ib: THOOB TSIB 2: 1A, 12-22

1 Cov neeg tsis hwm Ntuj tsis txawj xav raws qhov ncaj, lawv rov sib tham lawv tias : 12 “Peb kav tsij cuab ntxiab tos tus neeg ncaj, vim nws ua kom nyuaj peb, nws tsis nyiam peb tus yam ntxwv, nws cem peb tias peb ua txhaum rau Txoj Cai, thiab nws liam tias peb ua txhaum vim peb tsis ua raws li peb tau kawm. 13 Nws khav tias nws yog tus paub Tswv Ntuj, nws rov hu nws ua Huab Tais tus me nyuam. 14 Nws yog ib tug txiav txim rau peb zaj tswv yim, pom nws xwb twb ua rau peb nyuaj siab kawg lawm. 15 Nws lub neej tsis xws luag tej lub neej li, nws tej kev txawv luag tej kawg nkaus. 16 Nws saib peb yog tej yam cuav, nws txav tawm ntawm peb txoj kev cuag li peb yog tej yam qias qias. Nws tshaj tias cov neeg ncaj yuav tau txoj hmoov zoo, nws khav tias Tswv Ntuj yog nws txiv. 17 Peb yuav ntsia saib qhov nws hais puas muaj tseeb; peb sim nws saib nws yuav xaus zoo li cas. 18 Yog tus siab ncaj yog Tswv Ntuj tus tub tiag, mas Tswv Ntuj yuav pab nws xwb, thiab yuav npo nws ntawm cov ntxub nws txhais tes. 19 Peb yuav sim nws, peb ua phem rau nws, peb hiam nws saib, ces peb yuav pom tias nws lub siab zoo npaum li cas, thiab saib nws puas ua siab ntev nyiaj kom dhau. 20 Peb kav tsij txiav txim rau nws tuag nyob hauv txoj kev poob koob meej ntsuav, vim raws li nws hais, Tswv Ntuj twb yuav tuaj npo nws.”
21 Cov tsis hwm Ntuj xav tswv yim li ntawd, tab sis lawv yuam kev, lawv lub siab phem ua kom lawv dig muag. 22 Lawv tsis paub txog Tswv Ntuj cov txuj zais tob tob. Lawv tsis tso siab tias Ntuj yuav pub nqi zog rau txoj kev ua neeg ntshiab, lawv tsis ntseeg tias cov ntsuj plig dawb huv yuav tau txais paj tshab.

NPN 34: 17-18, 19-20, 21+23

Txais: (19a) Huab Tais nyob ze cov neeg ntxhov siab lwj plawv.

HUAB TAIS tiv cov neeg ua phem,
nws ua kom ntiaj teb neeg txhob nco qab txog lawv.
Thaum cov neeg siab ncaj quaj qw, HUAB TAIS mloog lawv,
nws npo lawv ntawm lawv tej kev ntxhov siab.

Txais: (19a) Huab Tais nyob ze cov neeg ntxhov siab lwj plawv.

HUAB TAIS nyob ze cov neeg ntxhov siab lwj plawv,
nws cawm cov neeg uas muaj lub tswv yim qaug zog.
Tus siab ncaj ntsib kev nyuaj tas los kev nyuaj tuaj thiab,
HUAB TAIS npo nws ntawm txhua yam huv tib si.

Txais: (19a) Huab Tais nyob ze cov neeg ntxhov siab lwj plawv.

Huab Tais zov tus siab ncaj cov pob txha,
nws tsis pub kom ib tug lov li.
HUAB TAIS txhiv nws cov tub txib tus ntsuj plig,
cov tuaj nkaum hauv nws yuav tsis raug txim ib tug li

Txais: (19a) Huab Tais nyob ze cov neeg ntxhov siab lwj plawv.

Zaj Cav lub Moo Zoo: MT 4: 4b

Neeg tsis kawg muab mov los yug siav xwb,
neeg tseem yuav yuav txhua lo lus tawm ntawm Tswv Ntuj lub ncauj los thiab.

Ntawv Moo Zoo: ZAM 7: 1-2, 10, 25-30

1 Dhau tej ntawd tas, Yes Xus mus ncig hauv xeev Nkas Lis Lais. Nws tsis xav mus hauv xeev Yus Das, vim cov Yus Das nrhiav kev muab nws tua. 2 Tab sis yuav txog lub hnub nyoog nqaum paj nqaum nruas tsa tsev tsam phooj.
10 Ces thaum Yes Xus cov kwv tij nce mus nqaum paj nqaum nruas tas lawm, nws kuj nce mus thiab, tab sis nws tsis tab meeg mus nws nyiag mus xwb.
25 Muaj ib co neeg nyob Yes Lus Xas Les hais tias : "Tus ntawd tsis yog tus uas lawv nrhiav nws tua lod ? 26 Saib, zaum no nws tab meeg hais lus, luag tsis hais dab tsi rau nws li. Puas yog tias cov thawj coj lees tias nws yog Leej Pleev tiag lawd? 27 Tab sis, peb paub tias tus neeg no nyob qhov twg tuaj. Hos Leej Pleev, thaum nws tuaj, mas tsis muaj neeg paub tias nws nyob qhov twg tuaj li." 28 Ces Yes Xus uas tab tom qhia nyob hauv lub Tuam Tsev Teev Ntuj thiaj hais nrov nrov tias : "Nej paub kuv thiab paub tias kuv nyob qhov twg tuaj; tsis kav tsis yog kuv tuaj kuv xwb, tus Xa kuv tuaj nws yog ib tug tseeb, nej tsis paub nws; 29 hos kuv paub nws, vim kuv tuaj ntawm nws tuaj, thiab nws yog tus xa kuv tuaj." 30 Lawv xav ntes Yes Xus tam sis ntawd, tab sis tsis muaj leej twg tsa tes tuav nws, vim nws lub zim txwv los tsis tau txog.

TIM       17      LUB      3      HLIS       2018

Hnub Xya Lis Piam Plaub Caij Plaub Caug Xyoo B Nruab Lis Piam Xyoo II

Hwm LN Patrick

Zaj Nyeem Ib:       YES LES MIAS  11:   18-20

18 HUAB TAIS qhia kuv ces kuv thiaj paub: Koj tau ua kom kuv paub txog tias lawv npaj ua dab tsi. 19 Ntawm kuv mas kuv zoo li tus yaj tso tso siab uas luag twb cab mus rau hauv lub tsev tua tsiaj ntag, vim kuv tsis paub tias lawv npaj ua phem rau kuv li: "Peb muab tus ntoo uas tab tom muaj muaj zog tshem pov tseg, peb muab nws rho tawm hauv lub ntiaj teb neeg uas muaj txoj sia mus, kom neeg tsis nco qab nws lub npe ntxiv." 20 Tiam sis koj, HUAB TAIS kav tsoom tshiab, tus txiav txim raws kev ncaj, tus pom hauv neeg lub tswv yim xav thiab hauv neeg nruab siab, koj cia kuv tau pom koj txoj kev ua pauj, vim kuv tso siab rau koj tias koj yuav tsa kuv cai.

NPN       7:   2-3, 9BC-10, 11-12

Txais: (2a) HUAB TAIS kuv tus Tswv Ntuj, kuv tuaj nkaum hauv koj.

HUAB TAIS kuv tus Tswv Ntuj, kuv tuaj nkaum hauv koj.
Thov koj cawm kuv ntawm cov nrhiav kuv, thov pab kom kuv dim;
yog koj tsis pab ces kuv yuav raug tsov nthos kuv,
yuav muab kuv dua ua daim, yuav tsis muaj tus pab.

Txais: HUAB TAIS kuv tus Tswv Ntuj, kuv tuaj nkaum hauv koj.

Huab Tais, thov koj txiav txim ncaj rau kuv, vim kuv yog neeg ncaj,
thiab vim kuv tsis tau ua txhaum nyob hauv kuv.
Thov koj ua kom tus neeg phem txoj kev phem ploj ntais mus,
tiam sis koj txheem tus neeg ncaj kom nyob ruaj nreb,
koj tus tsom tau hauv neeg lub siab lub tswv yim, Tswv Ntuj tus siab ncaj.

Txais: HUAB TAIS kuv tus Tswv Ntuj, kuv tuaj nkaum hauv koj.

Tswv Ntuj yog daim leem phiaj thaiv kuv,
nws yog tus cawm cov muaj lub siab ncaj.
Tswv Ntuj yog tus txiav txim ncaj, nws npau taws qeeb,
tiam sis nws yog tus yuav rau txim txhua lub sij hawm.

Txais: HUAB TAIS kuv tus Tswv Ntuj, kuv tuaj nkaum hauv koj.

Zaj Cav lub Moo Zoo:       LK  8:   15

Cov muaj hmoov zoo yog cov muaj ib lub siab loj siab dav khaws nkaus lo lus los coj
Thiab lawv txi taus txiv vim lawv ua siab tawv qhawv coj raws lo lus mus kom kawg.

Ntawv Moo Zoo:       ZAM  7:   40-53

40 Thaum pab neeg ntawd hnov Yes Xus hais cov lus no, muaj coob leej hais tias : "Tus no yog tus yaj saub tiag !" 41 Ib txhia hais tias : "Yeej yog Leej Pleev lawm tiag !" Lwm cov hais tias : "Leej Pleev puas yuav tuaj Nkas Lis Lais tuaj mas? 42 Ntawv twb tau hais tseg tias Leej Pleev yog Das Vis xeeb ntxwv thiab nws yuav tawm hauv Das Vis lub zos Npes Les Hes tuaj no ne ?" 43 Li ntawd, tsoom sid muaj lus tsis sib haum vim Yes Xus. 44 Lawv ib txhia xav ntes Yes Xus kawg, tab sis tsis muaj leej twg tsa taus tes rau nws li. 45 Cov zov keeb thiaj rov los cuag cov thawj leej choj thiab cov Fas Lis Xais. Cov no hais rau lawv tias : "Vim li cas nej tsis coj nws los ?" 46 Cov zov keeb teb tias : "Tsis tau muaj dua leej twg hais lus zoo npaum li tus neeg ntawd ib zaug li!" 47 Cov Fas Lis Xais hais rau cov zov keeb tias : "Puas yog nej raug nws haub tau nej lawm thiab ? 48 Nyob hauv cov thawj coj los nyob hauv cov Fas Lis Xais puas muaj ib tug ntseeg txog nws ? 49 Tsuas kawg tsoom pej xeem ntawd xwb uas yog cov tsis paub Txoj Cai li, lawv yog cov uas tau hmoov phem.” 50 Nis Kos Des Mos, uas yog lawv cov Fas Lis Xais ib tug, yav dhau los nws tau tuaj cuag Yes Xus, nws hais rau lawv tias : 51 "Peb txoj cai puas kheev kom cia li muab txim rau ib tug neeg uas peb tsis tau xub hnov nws lus thiab paub tej yam nws ua tso ?" 52 Lawv teb rau Nis Kos Des Mos tias : "Koj puas yog ib tug nyob Nkas Lis Lais tuaj thiab ? Koj soj ntsuam zoo zoo mas, koj yuav pom tias tsis muaj ib tug yaj saub sawv hauv Nkas Lis Lais tuaj li." 53 Ces lawv nyias rov mus nyias tsev tas.

TIM      19      LUB      3      HLIS       2018

Hnub Ob Lis Piam Tsib Caij Plaub Caug Xyoo B Nruab Lis Piam Xyoo II

Hwm leej Ntshiab Yos Xes, Niam Mab Liab tus txij nkawm



Zaj Nyeem Ib:       2 XAS MUAS  7:   4-5A, 12-14A, 16

4 Tib hmos ntawd, HUAB TAIS lo lus nrov tuaj rau Nas Taas tias : 5 "Koj mus hais rau kuv tus tub txib Das Vis tias:
12 ‘Thaum txog koj lub caij koj mus nrog koj cov poj yawm txwv koob pw tsaug zog lawm, kuv yuav tsa koj ib tug tub los tuav koj lub cuab tam tom qab koj, yog ib tug tawm ntawm koj roj ntsha los, kuv yuav nres nws txoj kev ua vaj kom nyob ruaj nreb. 13 Nws yog tus yuav txhim tsa ib lub tsev rau kuv lub npe, ces kuv yuav nres nws txoj keb ua vaj kom nyob ruaj nreb mus li. 14 Kuv yuav ua nws txiv, nws yuav ua kuv tus tub.
16 Koj tsev neeg thiab koj txoj kev ua vaj yuav nyob mus li nyob ntawm kuv xub ntiag. Koj lub theej kiab yuav nyob ruaj nreb mus ib txhis.’"

NPN       89:   2-3, 4-5, 27+29

Txais: (37) Das Vis leej tub yuav nyob mus li ib txhis.

Kuv yuav hu nkauj mus li txog HUAB TAIS txoj kev hlub;
tiam dhau tiam kuv lub ncauj yuav tshaj tawm txog nws lub siab ncaj.
Koj yeej tau hais tias: “Kuv txoj kev hlub yuav nyob mus li,”
koj tau tsa koj txoj kev ua siab ncaj kom nyob ruaj saum ntuj.

Txais: (37) Das Vis leej tub yuav nyob mus li ib txhis.

“Kuv tau hais haum nrog tus kuv xaiv,
kuv tau cog lus ruaj rau Das Vis kuv tus tub txib tias:
‘Kuv yuav nres koj caj ces kom nyob mus li,
thiab yuav tsa koj lub theej kiab kom nyob tiam dhau tiam.”

Txais: (37) Das Vis leej tub yuav nyob mus li ib txhis.

“Nws yuav hais txog kuv tias: ‘Koj yog kuv txiv,
kuv tus Tswv Ntuj, kuv lub tsua, tus cawm kuv.’
Kuv yuav muab kuv txoj kev hlub rau nws tas mus li,
thiab kuv txoj kev nrog nws cog lus yuav nyob ruaj nreb.”

Txais: (37) Das Vis leej tub yuav nyob mus li ib txhis.

Zaj Nyeem Ob:       LOS MAS  4:   13, 16-18, 22

13 Tsis yog vim txoj cai ces Has Nplas Has los nws tsoom xeeb ntxwv thiaj tau txais txoj kev cog lus tias lawv yuav tau txais lub ntiaj teb los ua lawv tug, tiam sis yog vim txoj kev ncaj ncees uas los ntawm kev ntseeg los.
16 Vim li no txoj kev cog lus ntawd yog los ntawm kev ntseeg los ces nws thiaj yog ib qho txiaj ntsim koob hmoov thiab thiaj li nyob ruaj nreb rau tas Has Nplas Has tsoom xeeb leej xeeb ntxwv, tsis yog rau cov uas coj raws txoj cai xwb, tiam sis rau txhua tus uas coj txoj kev ntseeg raws li Has Nplas Has uas yog peb sawv daws tus yawg koob, 17 raws li muaj ntawv sau tseg tias: “Kuv tsa koj ua txiv rau ntau haiv neeg,” Tswv Ntuj yeej saib Has Nplas Has yog peb txiv, vim nws ntseeg Tswv Ntuj tus uas muab tau txoj sia rau cov neeg tuag thiab cia li hu xwb ces txhua yam txawj xeeb muaj tuaj. 18 Thaum tsis muaj kev cia siab li lawm, Has Nplas Has tseem cia siab tuag nthi thiab ntseeg tuag nthi, ces nws tau ua txiv rau ntau haiv neeg raws li cov lus hais rau nws tias: “Koj tsoom xeeb ntxwv yuav coob npaum li no.”
22 Vim li no thiaj muab qhov kev ntseeg ntawd ntaus nqe ua nws txoj kev ncaj ncees.

Zaj Cav lub Moo Zoo:       NPN  84:   5

Cov muaj hmoov zoo yog cov nyob hauv koj lub tsev, HUAB TAIS,
lawv yuav cav txog koj mus li tsis muaj caij kawg.

Ntawv Moo Zoo:       MT  1:   16, 18-21, 24

16 Yas Kos yug Yos Xes uas yog Mab Liab tus txiv. Mab Liab yug Yes Xus, uas luag hu nws ua Leej Pleev.
18 Yes Xus Pleev lub keeb chiv zoo li no : Mab Liab uas yog Yes Xus niam, lawv muab qhaib rau Yos Xes lawm. Thaum nkawd tseem tsis tau los nyob ua ke, Leej Ntuj Plig Ntshiab ua kom Mab Liab xeeb tub. 19 Yos Xes uas yog Mab Liab tus txiv, yog ib tug neeg ncaj, nws tsis xav kom zeej tsoom hais lus xaiv txog Mab Liab, ces nws txiav siab nrauj Mab Liab twj ywm. 20 Thaum nws txiav siab nrauj li ntawd, Huab Tais tus Tshiab tawm los ua npau suav rau nws, thiab hais rau nws tias : "Yos Xes, Das Vis leej tub, koj txhob ntshai coj Mab Liab koj tus poj niam los nyob hauv koj tsev. Yog Leej Ntuj Plig Ntshiab ua kom nws xeeb tub. 21 Nws yuav yug ib tug tub, koj yuav tis nws npe hu ua Yes Xus : vim nws yuav cawm nws haiv neeg ntawm lawv cov txhaum."
24 Thaum Yos Xes tsim los, nws ua raws li Huab Tais tus Tshiab qhia rau nws : nws coj nws poj niam los nyob hauv nws tsev.

Los:       LK  2:   41-51A

41 Yes Xus niam thiab txiv nkawd niaj xyoo mus ua lub Ntees Hla pem Yes Lus Xas Les. 42 Thaum Yes Xus muaj kaum ob xyoos, lawv kuj mus ua lub Ntees Hla pem Yes Lus Xas Les raws li kev cai. 43 Thaum cov hnub ua ntees tas lawm, Yos Xes thiab Mab Liab nkawd sawv kev rov mus tsev, hos tus me tub Yes Xus tseem nyob Yes Lus Xas Les, nws niam thiab nws txiv tsis paub. 44 Nkawd xav tias nkawd tus tub nrog pab neeg tuaj ua ke rov qab lawm. Ces nkawd mus ib hnub ke, nkawd mam li pib nrhiav nkawd tus tub hauv cov txheeb ze thiab cov swm neeg. 45 Nkawd nrhiav tsis tau, nkawd rov mus nrhiav nws pem Yes Lus Xas Les. 46 Nkawd nrhiav peb hnub, thiaj nrhiav tau Yes Xus nyob hauv lub Tuam Tsev Teev Ntuj. Nws zaum hauv nruab nrab cov kws Txoj Cai, nws mloog lawv thiab ho nug lawv. 47 Cov neeg uas tau hnov Yes Xus hais lus, puav leej yoob tas rau nws lub tswv yim ntse thiab rau nws cov lus teb. 48 Thaum nkawd pom Yes Xus, nkawd xav tsis thoob, ces Yes Xus niam hais rau Yes Xus tias : "Me tub, vim li cas koj ua li ntawd rau wb ? Saib ! Koj txiv wb nrhiav koj, wb ntxhov siab tas nrho." 49 Yes Xus hais rau nkawd tias : "Vim li cas neb nrhiav kuv ? Neb tsis paub tias kuv yuav leg kuv Txiv cov hauj lwm no lod ?” 50 Mab Liab thiab Yos Xes nkawd tsis to taub lo lus uas Yes Xus hais rau nkawd li. 51 Yes Xus nrog nkawd rov mus Nas Xas Les. Nws mloog nkawd lus.

TIM       20      LUB      3      HLIS       2018

Hnub Peb Lis Piam Tsib Caij Plaub Caug Xyoo B Nruab Lis Piam Xyoo II

Zaj Nyeem Ib:       XAM PHAJ  21:   4-9

4 Cov His Xas Lais tso lub roob Hos tseg, lawv taug txoj kev mus rau lub hiav txwv Liab, lawv lug ncig Es Dos teb mus. Thaum lawv mus txog ib tog kev, tsoom pej xeem npau taws. 5 Lawv cem Tswv Ntuj thiab cem Mais Xes tias : "Vim li cas neb thiaj coj peb tawm Hais Nkws Tos teb kom peb los tuag hauv lub teb chaws suab puam no ? Tsis muaj mov noj, tsis muaj dej haus li, peb dhuav noj cov niag mov tuag tshaib ntawd dhau lawm !" 6 Tswv Ntuj thiaj tso ib cov nab muaj taug hluav taws tuaj tom lawv. Cov nab ntawd tom cov His Xas Lais tuag coob leej. 7 Tsoom pej xeem mus hais rau Mais Xes tias : "Peb ua txhaum lawm vim peb tau cem HUAB TAIS thiab cem koj. Koj thov HUAB TAIS rau peb, kom nws tshem cov nab ntawd khiav mus deb peb." Ces Mais Xes thiaj thov Ntuj rau lawv. 8 HUAB TAIS hais rau Mais Xes tias : "Koj nchuav ib tug nab muaj taug hluav taws, koj muab khuam rau saum ib tug ncej. Leej twg raug nab tom, yog nws ntsia tus nab nchuav ntawd ces nws yuav tsis tuag." 9 Mais Xes thiaj muab tooj los nchuav ua ib tug nab, nws muab khuam rau saum ib tug ncej. Yog nab tom leej twg, mas nws tsa muag ntsia tus nab tooj ntawd ces nws tsis tuag.

NPN       102:   2-3, 16-18, 19-21

Txais: (2) HUAB TAIS, thov koj mloog kuv zaj thov
thiab cia kuv lub suab nrov tuaj txog koj !

HUAB TAIS, thov koj mloog kuv zaj thov
thiab cia kuv lub suab nrov tuaj txog koj !
Thov koj txhob thaiv ntsej muag rau kuv
thaum kuv raug kev nyuaj siab.  
Thov koj tig pob ntseg mloog kuv,
hnub kuv hu txog koj, thov koj tsuag tsuag teb kuv.

Txais: HUAB TAIS, thov koj mloog kuv zaj thov
thiab cia kuv lub suab nrov tuaj txog koj !

Cov kuj cuab yuav hawm koj lub npe, HUAB TAIS
cov vaj nyob ntiaj teb yuav hawm koj lub koob meej,
Thaum HUAB TAIS rov txhim Xis Yoos,
nws yuav tawm tuaj nyob hauv nws lub hwj chim,
nws yuav tig los mloog cov neeg txom nyem tej lus thov,
nws yuav tsis ntxub lawv zaj thov ntuj.

Txais: HUAB TAIS, thov koj mloog kuv zaj thov
thiab cia kuv lub suab nrov tuaj txog koj !

Nej sau qhov no cia rau cov tub ki uas tseem yuav yug los,
ces cov phaj neeg tsim los tshiab yuav cav txog Huab Tais :
“HUAB TAIS nyob saum nws lub tsev ntshiab dauv muag los saib;
nws nyob saum txheej ntuj siab ntsia rau ntiaj teb,
Kom tau mloog cov neeg nyob txim lub suab ntsaj,
kom tau tso cov yuav raug kev tuag dim.

Txais: HUAB TAIS, thov koj mloog kuv zaj thov
thiab cia kuv lub suab nrov tuaj txog koj !

Zaj Cav lub Moo Zoo:

Lub noob nplej yog Tswv Ntuj lo lus, leej Pleev yog tus tseb nplej;
txhua leej uas mus cuag nws yuav muaj txoj sia nyob mus li.

Ntawv Moo Zoo:       ZAM  8:   21-30

21 Yes Xus tseem rov hais rau cov Fas Lis Xais tias : "Kuv yuav mus, nej yuav nrhiav kuv, tab sis nej yuav tuag nyob hauv nej qhov txhaum. Qhov chaw kuv mus, mas nej tuaj tsis tau." 22 Ces cov Yus Das hais tias : "Puas yog nws yuav rov tua nws, nws thiaj hais tias : Qhov chaw kuv mus, mas nej tuaj tsis tau ?" 23 Yes Xus hais rau lawv tias : "Nej yog cov nyob hauv txheej qis no, kuv yog cov nyob saum txheej siab. Nej yog ntiaj teb no tug, kuv tsis yog ntiaj teb no tug. 24 Kuv thiaj hais rau nej tias nej yuav tuag nyob hauv nej cov txhaum, vim yog nej tsis ntseeg tias kuv yog tus uas Nyob, mas nej yuav tuag nyob hauv nej cov txhaum." 25 Lawv hais rau Yes Xus tias : "Koj yog leej twg ?" Yes Xus hais rau lawv tias : "Kuv yog tus kuv ib txwm hais rau nej los lawm. 26 Kuv muaj ntau yam hais txog nej thiab muaj chaw txiav txim ntau qhov rau nej. Tiam sis tus Xa kuv tuaj yog tus tseeb, qhov kuv hnov ntawm nws los kuv hais rau lub qab ntuj neeg paub." 27 Lawv tsis to taub tias Yes Xus hais txog Leej Txiv rau lawv. 28 Yes Xus thiaj hais tias : "Thaum Neeg Leej Tub raug muab tsa siab, mas nej yuav pom tias kuv yog tus uas Nyob, thiab tsis muaj ib yam uas yog kuv ua kuv xwb, tiam sis yam uas Leej Txiv qhia rau kuv mas kuv hais yam ntawd. 29 Tus Xa kuv tuaj nws nrog nraim kuv, nws tsis cia kuv nyob kuv ib leeg, vim kuv ua ntxim nws siab tas mus li.” 30 Thaum Yes Xus hais cov lus ntawd, muaj coob leej ntseeg txog nws.

TIM 21 LUB 3 HLIS 2018

Hnub Plaub Lis Piam Tsib Caij Plaub Caug Xyoo B Nruab Lis Piam Xyoo II

Zaj Nyeem Ib: DAS NIAS 3: 14-20, 91-92, 95

14 Tus vaj Nas Npws Kos Dos Nos Xos nug tias : "Sas Nras, Mes Sas thiab As Npes Nes Nkos, puas muaj tseeb tias nej tsis kam tsob hwb kuv cov tswv ntuj, thiab nej tsis kam kim caug pe tus mlom kub uas kuv tau tsa? 15 Zaum no nej yuav tsum npaj, thaum nej hnov raj kub twg nrov, hnov luag tshuab raj tshuab xyu, ntaus thaj cheej thiab hnov tas txhia lub suab paj nruag nrov, mas nej yuav tsum txhos caug ntua pe tus mlom uas kuv tau ua, yog nej tsis pe mas tam sim ntawd muaj neeg yuav muab nej pov rau hauv lub qhov txos kub liab ploog. Saib tus Tswv Ntuj twg yuav tuaj cawm nej ntawm kuv txhais tes tau ?" 16 Sas Nras, Mes Sas, thiab As Npes Nes Nkos lawv teb rau tus vaj tias : "Tsis tas peb yuav nrog koj sib cav txog qhov koj nug no. 17 Aub ! Vaj ! Yog peb tus Tswv Ntuj, tus uas peb tsob hwb, nws pab tau peb dim ntawm lub qhov txos kub liab ploog thiab ntawm koj txhais tes, mas yeej xav thov kom nws pab peb dim xwb. 18 Tab yog nws tsis pab los, koj yuav tsum paub tias peb yeej tsis tsob hwb koj tus tswv ntuj thiab peb tsis kam pe tus mlom koj tau tsa li !" 19 Tus vaj Nas Npws Kos Dos Nos Xos npau taws heev heev ua ntsej muag hloov tas liab tag rau Sas Nras, Mes Sas thiab As Npes Nes Nkos lawv. Nws txib neeg kom mus rauv taws hauv lub qhov txos kom kub tshaj txhua zaus xya npaug ntxiv. 20 Thiab nws txib cov neeg muaj zog tshaj nyob hauv nws pab tub rog kom lawv muab Sas Nras, Mes Sas thiab As Npes Nes Nkos pav thiab muab pov rau hauv lub qhov txos kub liab ploog.
91 Tus vaj Nas Npws Kos Dos Nos Xos sawv tsees. Nws hais rau nws cov tub ncig tias : "Ua cas ? Peb tau muab peb tug hluas pav thiab pov rau hauv hluav taws lawm sad, puas yog ?" Lawv teb tias : "Aub ! Vaj ! Yog kawg !" 92 Tus vaj hais tias : "Ua cas kuv pom plaub tug neeg tsis pav li, lawv mus mus los los hauv hluav taws, lawv tsis raug mob li. Tus plaub zoo li yog Tswv Ntuj ib tug tub."
95 Nas Npws Kos Dos Nos Xos tsa suab hlo hais tias : "Sas Nras, Mes Sas thiab As Npes Nes Nkos tus Huab Tais nto koob meej; nws tau xa nws tus tshiab tuaj cawm nws cov tub txib, uas lawv tso siab rau nws, lawv tsis kam mloog tus vaj lo lus ceeb toom, lawv tuaj yeem cia lawv lub cev raug puas dua mus teev lwm tus tswv ntuj uas tsis yog lawv tus Tswv Ntuj.”

NPN: DN 3: 52, 53, 54, 55, 56

Txais: (52b) Kom Tswv Ntuj muaj hwj chim thiab nto koob meej mus li!

Koj nto koob meej, HUAB TAIS, peb phaj txiv tus Tswv Ntuj,
tus tsim nyog qhuas thiab nyob siab tshaj tas txhua yam mus li;
koj lub npe ntshiab muaj hwj chim nto koob meej,
koj yog tus tsim nyog qhuas thiab nyob siab tshaj
tas txhua yam mus tas txhua tiam.

Txais: (52b) Kom Tswv Ntuj muaj hwj chim thiab nto koob meej mus li!

Koj nto koob meej nyob hauv lub tuam tsev muaj koj lub hwj chim ntshiab,
koj yog tus tsim nyog qhuas thiab nyob siab tshaj tas txhua yam mus li.

Txais: (52b) Kom Tswv Ntuj muaj hwj chim thiab nto koob meej mus li!

Koj nto koob meej nyob saum lub theej kiab hauv koj lub ceeb tsheej,
koj yog tus tsim nyog qhuas thiab nyob siab tshaj tas txhua yam mus li.

Txais: (52b) Kom Tswv Ntuj muaj hwj chim thiab nto koob meej mus li!

Koj nto koob meej, koj nyob saum koj lub theej kiab
saum cov kes lus npis ntsia mus lawm hauv tej qab thu tob,
koj yog tus tsim nyog qhuas thiab nyob siab tshaj tas txhua yam mus li.

Txais: (52b) Kom Tswv Ntuj muaj hwj chim thiab nto koob meej mus li!

Koj nto koob meej nyob saum lub qab ntuj ntsuab saum ntuj
koj yog tus tsim nyog qhuas thiab muaj hwj chim mus li .

Txais: (52b) Kom Tswv Ntuj muaj hwj chim thiab nto koob meej mus li!

Zaj Cav lub Moo Zoo: LK 8: 15

Cov muaj hmoov zoo yog cov muaj ib lub siab loj siab dav khaws nkaus lo lus los coj
Thiab lawv txi taus txiv vim lawv ua siab tawv qhawv coj raws lo lus mus kom kawg.

Ntawv Moo Zoo: ZAM 8: 31-42

31 Yes Xus hais rau cov Yus Das uas ntseeg nws tias : "Yog nej nyob ruaj hauv kuv cov lus, mas nej yog kuv cov thwj tim tiag. 32 Nej yuav paub qhov tseeb, ces txoj kev tseeb yuav ua kom nej ua neeg twj lij." 33 Lawv hais rau Yes Xus tias : "Peb yog Has Nplas Has cov xeeb ntxwv, peb tsis tau ua dua leej twg qhev ib zaug, ua cas koj thiaj hais tias : Nej yuav ua neeg twj lij ?" 34 Yes Xus teb rau lawv tias : "Kuv hais qhov muaj tseeb tiag rau nej tias : Leej twg ua txhaum, nws yog kev txhaum tus qhev. 35 Tus qhev tsis tau nyob hauv lub tsev neeg tas nws sid, hos tus tub thiaj tau nyob tas mus li. 36 Yog Leej Tub ua kom nej twj lij, mas nej thiaj ua tsheej neeg twj lij tiag. 37 Kuv paub tias nej yog Has Nplas Has cov xeeb ntxwv, tab sis nej nrhiav kev muab kuv tua, vim kuv lo lus txeem tsis tau rau hauv nej. 38 Kuv hais yam uas kuv pom ntawm kuv Txiv, hos nej ua yam nej hnov ntawm nej txiv." 39 Lawv teb rau Yes Xus tias : "Peb txiv yog Has Nplas Has." Yes Xus hais rau lawv tias : "Yog tias nej yog Has Nplas Has cov me nyuam, mas nej yuav ua Has Nplas Has cov hauj lwm. 40 Tab sis nej nrhiav kev tua kuv, uas yog ib tug hais qhov tseeb uas kuv hnov ntawm Tswv Ntuj los. Has Nplas Has tsis tau ua li ntawd. 41 Nej ua nej txiv cov hauj lwm." Lawv hais rau Yes Xus tias : "Peb tsis yog me nyuam tsaub : Peb tsuas muaj ib leeg txiv xwb: Yog Tswv Ntuj." 42 Yes Xus hais rau lawv tias : “Yog tias Tswv Ntuj yog nej Txiv tiag, mas nej yuav nyiam kuv, vim kuv tawm ntawm Tswv Ntuj los thiab kuv tuaj ntawm Tswv Ntuj tuaj rau ntawm no; tsis yog kuv tuaj kuv, yog nws xa kuv tuaj.”

TIM 22 LUB 3 HLIS 2018

Hnub Tsib Lis Piam Tsib Caij Plaub Caug Xyoo B Nruab Lis Piam Xyoo II

Zaj Nyeem Ib: HAUV PAUS 17: 3-9

3 Ces Has Nplas txhos caug khoov ntsej muag ti av pe. Tswv Ntuj hais rau Has Nplas tias: 4 "Ntawm kuv mas kuv nrog koj cog lus li no : Koj yuav ua txiv rau ntau haiv neeg. 5 Luag yuav tsis hu koj ua Has Nplas ntxiv; koj yuav hu ua Has Nplas Has, vim kuv muab koj los ua txiv rau ntau haiv neeg. 6 Kuv yuav ua kom koj huam vam ntau, yuav ua kom koj ciaj ua ntau haiv neeg; thiab ntau tus vaj yuav sawv hauv koj los. 7 Kuv yuav tsa kom muaj ib txog kev cog lus nyob ntawm kuv thiab ntawm koj, kuv nrog koj cog lus thiab nrog haiv neeg uas los tom qab koj cog ib lo lus nyob mus li txheej dhau txheej tiam dhau tiam tias kuv yuav ua koj tus Tswv Ntuj thiab ua haiv neeg uas los tom qab koj tus Tswv Ntuj. 8 Kuv yuav muab lub teb chaws uas koj nyob ntawm no, yog tas nrho lub teb chaws Kas Nas Has, rau koj thiab rau haiv neeg uas los tom qab koj nyob mus tiam dhau tiam ua nej tug tas mus li ib txhis; thiab kuv yuav ua nej tus Tswv Ntuj." 9 Tswv Ntuj tseem hais rau Has Nplas Has tias : "Ntawm koj mas koj yuav ua raws li kuv lo lus uas kuv nrog koj cog, koj thiab haiv neeg uas los tom qab koj, nej yuav ua raws nraim li ntawd mus tiam dhau tiam.”

NPN 105: 4-5, 6-7, 8-9

Txais: (8a) Huab Tais nco ntsoov tas mus li nws lo lus nws tau cog.

Nej nrhiav Huab Tais nyob hauv nws lub zog,
nej nrhiav kom tau tsob hwb nws mus li.
Nej nco ntsoov txog cov hwj huam nws tau ua,
nco ntsoov nws cov hauj lwm muaj hwj chim,
thiab cov lus txiav txim nws lub ncauj tau hais.

Txais: Huab Tais nco ntsoov tas mus li nws lo lus nws tau cog.

Has Nplas Has tsoom xeeb ntxwv, Huab Tais cov tub txib,
Yas Kos cov tub, uas yog nws pab neeg nws tau xaiv!
Huab Tais yog peb tus Tswv Ntuj,
tas ntiaj teb yuav raws li nws tej lus txiav txim.

Txais: Huab Tais nco ntsoov tas mus li nws lo lus nws tau cog.

Nws nco ntsoov tas mus li nws lo lus nws tau cog,
yog nws lo lus cog ruaj nreb rau txhiab tiam neeg.
Yog lo lus nws xub nrog Has Nplas Has cog,
thiab nws rov zeem tseeb rau His Xas Has.

Txais: Huab Tais nco ntsoov tas mus li nws lo lus nws tau cog.

Zaj Cav lub Moo Zoo: NPN 95: 8

Yog hnub no nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo: ZAM 8: 51-59

Yes Xus hais rau cov neeg Yus Das tias:
51 Kuv hais qhov muaj tseeb tiag rau nej : Leej twg khaws kuv lo lus, mas nws yuav tsis pom txoj kev tuag ib zaug li." 52 Ces cov Yus Das hais rau Yes Xus tias : "Zaum no peb paub tseeb tias koj yog neeg raug dab lawm. Has Nplas Has tuag lawm, cov yaj saub kuj tuag lawm, hos koj hais tias : 'Yog leej twg khaws kuv lo lus, mas nws yuav tsis saj txoj kev tuag ib zaug li.' 53 Ua li koj puas loj dua peb txiv Has Nplas Has uas nws tuag lawd ? Los loj dua cov yaj saub uas kuj tuag lawm thiab ? Koj khav tias koj yog leej twg tiag?" 54 Yes Xus teb tias : "Yog kuv rov cav txog kuv lub koob meej, mas kuv lub koob meej tsis muaj nqi dab tsi. Tab sis, tus cav txog kuv lub koob meej yog kuv Txiv, yog tus uas nej hais txog tias : 'Nws yog peb tus Tswv Ntuj.' 55 Tab sis nej tsis paub nws, hos kuv paub nws. Yog kuv hais tias kuv tsis paub nws, mas kuv yog ib tug neeg dag ib yam li nej. Tab sis kuv paub nws thiab kuv khaws nws lo lus. 56 Nej txiv Has Nplas Has twb zoo siab kawg vim nws tau pom kuv lub hnub nyoog lawm; nws tau pom, ces nws txaus siab lawm." 57 Cov Yus Das hais rau Yes Xus tias : "Koj twb tsis tau muaj tsib caug xyoo, koj txawm siv pom Has Nplas Has lawm lod?" 58 Yes Xus hais rau lawv tias : "Kuv hais qhov muaj tseeb tiag rau nej tias : Thaum Has Nplas Has tsis tau yug los, kuv yeej yog tus uas Nyob." 59 Lawv khaws pob zeb txawb rau Yes Xus, tab sis Yes Xus mus tsiv nraim, thiab nws tawm hauv lub Tuam Tsev Teev Ntuj mus lawm.

TIM      23      LUB      3      HLIS       2018

Hnub Rau Lis Piam Tsib lub Caij Plaub Caug Xyoo B Nruab Lis Piam Xyoo II

Hwm LN Turibius nyob Mogrovejo

Zaj Nyeem Ib:       YES LES MIAS  20:   10-13

10 Kuv hnov ntau leej ntxhi tej yam ntais ntuj tias : "Peb kav tsij tso hem thawj txhua sab tuaj rau nws! Kom nws kiag! Peb mus kom nws!" Cov uas thaud yog kuv phooj ywg, lawv nyas ntshis saib kuv puas ua ib qho yuam kev. Lawv hais tias : "Nyaj tej zaud, nws yuav mloog cov neeg tej lus ntxias nws, ces peb yuav yeej thiab peb yuav tau kev ua pauj." 11 Tab sis HUAB TAIS nrog rawv kuv zoo li ib tug peeb zeej zog nchav txaus ntshai. Kuv cov yeeb ncuab yuav ntog, lawv yuav swb loj; lawv yuav xav tsis thoob tias ua cas lawv swb; lawv yuav poob ntsej muag mus ib txhiab ib txhis tsis muaj tias yuav tsis nco qab tau. 12 HUAB TAIS kav tsoom tshiab, koj tsom tau tus neeg siab ncaj, koj pom tau hauv neeg nruab siab nruab plawv, thov cia kuv pom koj ua pauj rau lawv, vim kuv tso kuv rooj plaub rau koj leg lawm. 13 Nej hu nkauj rau HUAB TAIS, nej cav lus zoo txog HUAB TAIS, vim nws tau npo tus neeg txom nyem tus plig ntawm cov neeg phem txhais tes los.

NPN       18:   2-3A, 3BC-4, 5-6, 7

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

HUAB TAIS, kuv nyiam koj, koj yog kuv lub zog.
HUAB TAIS yog kuv phab tsua, kuv lub yeej ntsa zeb,
nws yog tus cawm kuv dim.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Kuv nkaum hauv nws, uas yog kuv lub tsua, kuv daim leem phiaj thaiv,
Yog lub zog cawm kuv, kuv lub yeej ntsa zeb, kuv lub chaw nkaum!
Kuv tau thov Huab Tais tus tsim nyog peb cav txog
ces kuv dim ntawm kuv cov yeeb ncuab.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Kev tuag cov nplaim dej loj ntas tuaj ncig kuv,
cov dej sab siv huam loj tuaj nyab kuv,
cov hlua hauv tub tuag teb tuaj zoj kuv,
kev tuag cov vas tuaj puav kuv tas.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Kuv nyuaj siab, kuv vam txog Huab Tais,
kuv qw hu txog kuv tus Tswv Ntuj;
Nws nyob hauv nws lub tuam tsev hnov kuv lub suab,
kuv lub suab quaj nrov txog nws pob ntseg.

Txais: (7) Thaum kuv nyuaj siab kuv tau hu txog Huab tais, nws mloog kuv lub suab.

Zaj Cav lub Moo Zoo:       ZAM  6:   63C, 68C

Huab Tais, koj cov lus yog ntsuj plig thiab yog txoj sia;
koj muaj cov lus pub txoj sia nyob mus li.

Ntawv Moo Zoo:       ZAM  10:   31-42

31 Cov Yus Das rov nqa dua ib co pob zeb los yuav txawb rau Yes Xus. 32 Yes Xus teb rau lawv tias : "Kuv tau muab ntau txoj hauj lwm zoo tuaj ntawm kuv Txiv tuaj rau nej pom. Tim qhov twg, nej thiaj xav txawb pob zeb rau kuv ?" 33 Cov Yus Das teb rau Yes Xus tias : "Peb txawb pob zeb rau koj, tsis yog tim ib txog hauj lwm zoo, yog tim koj thuam Ntuj; vim tias koj tsuas yog ib tug neeg xwb, tsis kav, koj muab koj tsa ua Tswv Ntuj." 34 Yes Xus teb rau lawv tias : "Nyob hauv nej Txoj Cai, puas muaj lus sau cia tias : ‘Kuv hais tias : nej yog ib co tswv ntuj ?’ 35 Yog tias Ntawv twb hu cov neeg txais Tswv Ntuj lo lus ua tswv ntuj, thiab peb yuav rhuav tsis tau Ntawv, 36 ua cas tus uas Leej Txiv qee nws, thiab xa nws tuaj rau lub qab ntuj neeg, nej ho hais tias : 'Koj thuam Ntuj' - vim kuv hais tias kuv yog Tswv Ntuj Leej Tub? 37 Yog tias kuv tsis ua kuv Txiv cov hauj lwm, mas nej txhob ntseeg kuv. 38 Tab sis yog kuv ua kuv Txiv cov hauj lwm, mas txawm tias nej tsis ntseeg kuv, los nej yuav tsum ntseeg cov hauj lwm, kom xwv nej thiaj paub thiab to taub tias Leej Txiv nyob hauv kuv, thiab kuv nyob hauv Leej Txiv." 39 Ces lawv rov qab xav ntes Yes Xus dua, tab sis nws khiav dim ntawm lawv tes mus lawm.
40 Yes Xus rov hla mus rau sab dej Yos Las Das tim ub, ntawm thaj chaw uas yav dhau los Zam ua kab ke ntxuav;  ces Yes Xus nyob ntawd. 41 Muaj neeg coob tuaj cuag Yes Xus, lawv hais tias : "Zam tsis tau ua ib lub cim li, tab sis txhua yam uas Zam hais txog tus neeg no, mas muaj tseeb tas huv tib si." 42 Ces muaj coob leej ntseeg txog Yes Xus nyob ntawd.

TIM 24 LUB 3 HLIS 2018

Hnub Xya Lis Piam Tsib Caij Plaub Caug Xyoo B Nruab Lis Piam Xyoo II

Zaj Nyeem Ib: EXK 37: 21-28

21 Koj yuav hais rau lawv tias : "HUAB TAIS Tswv Ntuj hais li no : ‘Kuv yuav mus coj cov His Xas Lais uas mus nyob xyaw lwm haiv neeg lawm rov los, kuv yuav sau lawv nyob tas qhov txhia chaw rov los rau hauv lawv thaj av. 22 Kuv yuav cia lawv ua ib lub kuj cuab xwb nyob hauv lub teb chaws, nyob saum cov roob His Xas Lais. Ib tug vaj xwb yuav ua sawv daws tus vaj. Lawv yuav tsis sib faib ua ob haiv neeg nyob ob lub teb chaws ib zaug ntxiv lawm.
23 Lawv yuav tsis rov ua kom lawv qias ntxiv, lawv yuav tso lawv tej kev teev mlom thiab tej kev phem kev txhaum tseg. Kuv yuav cawm lawv ntawm lawv txoj kev fav xeeb tsis kam ntseeg thiab kuv yuav ntxuav lawv kom lawv huv tuaj. Ces lawv yuav ua kuv haiv neeg, kuv yuav ua lawv tus Tswv Ntuj. 24 Kuv tus tub txib Das Vis yuav ua vaj kav lawv, ces yuav muaj ib tug tswv zov yaj saib sawv daws xwb. Lawv yuav mloog kuv tej kev cai lij choj, thiaj yuav coj kuv Txoj Cai nruj. 25 Lawv yuav nyob txawm hauv lub teb chaws uas kuv muab rau kuv tus tub txib Yas Kos, yog lub teb chaws uas lawv cov yawg koob tau nyob. Lawv thiab lawv cov me nyuam thiab lawv cov me nyuam cov me nyuam yuav nyob ntawd mus li tsis muaj caij kawg. Kuv tus tub txib Das Vis yuav ua lawv tus vaj mus li.
26 Kuv yuav nrog lawv cog lus nyob hauv txoj kev thaj yeeb, yuav yog ib txog kev cog lus nyob mus li. Kuv yuav tsa kom lawv nyob khov kho, kom lawv huam vam mus, thiab kuv yuav tsa kuv lub tsev ntshiab nyob nruab nrab hauv lawv mus li. 27 Kuv qhov chaw nyob yog nyob nrog lawv. Kuv yuav yog lawv tus Tswv Ntuj. Lawv yuav yog kuv haiv neeg. 28 Ces cov kuj cuab thiaj yuav paub tias kuv, HUAB TAIS, yog tus ua kom His Xas Lais ntshiab tuaj, vim kuv lub tsev ntshiab yuav nyob nruab nrab hauv lawv mus li."

NPN YLM 31: 10, 11-12ABCD, 13

Txais: (10d) Huab Tais yuav saib peb xws li tus tswv zov yaj saib nws pab yaj.

Cov haiv neeg, nej mloog Huab Tais lo lus,
nej muab tshaj tawm rau cov pov txwv hnov, nej hais tias:
Tus uas tau cais kom His Xas Lais tawg ua ntau pab,
zaum no nws sau lawv rov los nyob ua ke,
Nws saib lawv xws li tus tswv zov yaj saib nws pab yaj.

Txais: (10d) Huab Tais yuav saib peb xws li tus tswv zov yaj saib nws pab yaj.

Huab Tais yuav rov txhiv Yas Kos,
nws yuav npo Yas Kos ntawm lawv tus yeeb ncuab txhais tes.
Lawv yuav ke qw ke taug kev nce lub roob Xis Yoos,
lawv yuav tuaj sis dug tuaj mus txais Huab Tais txoj
koob hmoov zoo: Yog nplej, cawv, roj, yaj thiab nyuj.

Txais: (10d) Huab Tais yuav saib peb xws li tus tswv zov yaj saib nws pab yaj.

Cov nkauj xwb yuav ua lom zem thiab yuav seev cev,
cov nraug xwb thiab cov neeg laus kuj yuav ua ib yam.
Kuv yuav hloov lawv txoj kev quaj kev nyiav ua kev zoo siab;
kuv yuav nplij lawv thiab yuav hloov lawv kev tu siab ua kev puv siab.

Txais: (10d) Huab Tais yuav saib peb xws li tus tswv zov yaj saib nws pab yaj.

Zaj Cav lub Moo Zoo: EXK 18: 31

Huab Tais hais tias: “Muab nej tej txhaum nej tau ua tso pov tseg kom tas,
nej yuav dua ib lub siab tshiab thiab ib lub tswv yim tshiab.”

Ntawv Moo Zoo: ZAM 11: 45-56

45 Coob tus Yus Das uas tuaj xyuas Mab Liab tau pom qhov uas Yes Xus ua ces lawv ntseeg txog Yes Xus. 46 Tab sis muaj ib co Yus Das mus cuag cov Fas Lis Xais, lawv mus qhia cov Fas Lis Xais txog qhov Yes Xus tau ua. 47 Cov thawj leej choj thiab cov Fas Lis Xais thiaj hu lub rooj sab laj xas nes nrees, lawv hais tias : "Peb yuav ua dab tsi, vim tus neeg ntawd pheej ua ib co cim ntau kawg ? 48 Yog peb cia nws ua li no ntxiv, mas sawv daws yuav ntseeg txog nws, ces cov Los Mas yuav tuaj rhuav peb thiab rhuav lub Chaw Ntshiab thiab peb haiv neeg." 49 Nyob hauv lawv, muaj ib tug hu ua Kais Fas, xyoo ntawd yog nws ua tuam thawj leej choj. Nws hais rau lawv tias : "Nej tsis paub dab tsi li ! 50 Nej tsis xav tswv yim tias qhov zoo tshaj rau nej, yog cia ib tug neeg xwb this tsoom pej xeem tuag, kom xwv tas haiv neeg tsis txhob tuag." 51 Kais Fas hais li ntawd, tsis yog nws hais nws xwb, tab sis vim nws ua tuam thawj leej choj xyoo ntawd, ces nws thiaj ua saub qhia tias Yes Xus yuav tsum tuag rau nws haiv neeg, 52 thiab tsis yog tuag rau nws haiv neeg xwb, nws tseem tuag kom tau sau Tswv Ntuj cov me nyuam uas sib ncaim lawd rov los koom ua ib pab. 53 Txij hnub ntawd los, lawv txiav tias yuav tsum muab Yes Xus tua. 54 Ces Yes Xus thiaj tsis tab meeg mus mus los los nyob hauv tsoom Yus Das ntxiv. Nws mus nraim nyob rau ib thaj tsam tsis deb ntawm teb chaws suab puam, hauv ib lub nroog hu ua Es Fas Is. Nws nrog nws cov thwj tim nyob ntawd.
55 Thaum yuav txog cov Yus Das lub hnub nyoog Hla, cov neeg hauv tej zos nruab liaj nruab teb nce coob mus pem Yes Xus Xas Les, lawv xub mus ua cov kab ke ntxuav ua ntej lub ntees Hla kom lawv dawb huv. 56 Thaum lawv nyob hauv lub Tuam Tsev Teev Ntuj, lawv nrhiav Yes Xus, lawv ib leeg nug ib leeg tias : "Nej xav li cas ? Nej puas xav tias nws yuav tsis tuaj koom lub Ntees no?"

TIM 26 LUB 3 HLIS 2018

Hnub Ob Lis Piam Ntshiab Xyoo B Nruab Lis Piam Xyoo II

Zaj Nyeem Ib: HIS XAIS 42: 1-7

1 Nej ntsia kuv tus tub txib uas kuv nres, tus kuv xaiv uas ntxim kuv siab tiag; kuv muab kuv lub tswv yim rau saum nws, ces nws yuav coj kev txiav los rau tsoom kuj cuab. 2 Nws yuav tsis qw nrov tsis nthe tsis ua suab ncha kom neeg hnov nyob ntawm tej kev. 3 Nws yuav tsis dam tus txhiav qaug kom lov ntho, nws yuav tsis tshuab tus nplaim teeb cig qauj les kom tuag, nws yuav tsa kom tau txoj kev txiav txim ncaj nyob hauv kev tseeb. 4 Nws yuav tsis ntaus siab me yuav tsis swb mus txog hnub nws tsa tau txoj kev txiav txim ncaj nyob hauv ntiaj teb lawm; cov pov txwv tos ntsoov nws lo lus qhia. 5 Tus Tswv Ntuj, tus HUAB TAIS uas yog tus tsim thiab nthuav cov txheej ntuj saud kom dav, tus ua kom lub ntiaj teb thiab tej yam tawm hauv los nyob ruaj khov, tus tshuab pa rau tsoom neeg nyob ntiaj teb, thiab muab tswv yim rau cov taug kev hauv lub ntiaj teb, nws hais li no: 6 “Kuv , HUAB TAIS, tau hu koj nyob hauv txoj kev ncaj, kuv tau tuav koj tes, tau puab koj, tau muab koj ua haiv neeg txoj kev cog lus, muab koj ua lub teeb pom kev kaj cov kuj cuab, 7 kom koj ua tus qhib cov dig muag qhov muag, ua tus tso cov neeg kaw hauv tsev loj faj kom dim los, rho cov neeg kaw hauv qhov taub kom tawm hauv kev tsaus ntuj los.

NPN 27: 1, 2, 3, 13-14

Txais: (1a) HuabTais yog kuv qhov pom kev thiab kuv txoj kev cawm seej.

HUAB TAIS yog kuv qhov pom kev thiab kuv txoj kev cawm seej.
Kuv yuav ntshai leej twg?
HUAB TAIS yog lub yeej ntsa zeb thaiv kuv txoj sia,
Kuv yuav tshee vim leej twg?

Txais: (1a) HuabTais yog kuv qhov pom kev thiab kuv txoj kev cawm seej.

Thaum ib pab neeg phem txav los ze kuv,
yuav los dua kuv lub cev,
yog lawv, kuv cov yeeb ncuab thiab cov ntxub kuv,
yog lawv yuav dawm taw thiab yuav ntog.

Txais: (1a) HuabTais yog kuv qhov pom kev thiab kuv txoj kev cawm seej.

Txawm muaj ib pab tub rog tuaj tsa yeej npaj ntaus kuv,
Kuv lub plawv tsis ntshai dab tsi li;
Tab yog lawv sawv ntaus rog tua kuv kiag,
los kuv tseem yuav tso siab lug.

Txais: (1a) HuabTais yog kuv qhov pom kev thiab kuv txoj kev cawm seej.

Kuv ntseeg tias kuv yuav tau pom HUAB TAIS lub siab zoo
nyob hauv tsoom neeg ciaj lub teb chaws.
Koj tos ntsoov HUAB TAIS, ua siab loj loj ;
ua siab tawv qhawv, tos ntsoov HUAB TAIS!

Txais: (1a) HuabTais yog kuv qhov pom kev thiab kuv txoj kev cawm seej.

Zaj Cav lub Moo Zoo:

Peb hawm koj, peb tus Vaj,
koj ib leeg thiaj muaj lub siab zoo zam peb cov txhaum rau peb.

Ntawv Moo Zoo: ZAM 12: 1-11

1 Rau hnub ua ntej lub Ntees Hla, Yes Xus tuaj txog Npes Tas Nias, uas yog Las Ntxas Los lub zos; Las Ntxas Los yog tus uas Yes Xus tau tsa nws sawv hauv cov tuag rov los. 2 Nyob ntawd, lawv ua ib roog mov txais tos Yes Xus. Mas Tas rau mov, hos Las Ntxas Los yog ib tug nyob hauv cov uas nrog Yes Xus zaum ntawm rooj noj mov. 3 Mab Liab muab ib hwj tshuaj tsw qab, yog cov tseem tshuaj muaj nqis kim kawg los pleev Yes Xus ko taw, thiab nws muab nws cov plaub hau los so Yes Xus ko taw; cov tshuaj tsw thoob plaws lub tsev. 4 Ces Yus Das Kas Lis Yaus, uas yog Yes Xus ib tug thwj tim, nws yog tus yuav muab Yes Xus muag, nws hais tias : 5 "Ua cas tsis muab cov tshuaj tsw qab ntawd muag peb puas lub txiaj nyiag, ces muab pub cov rau pluag ?" 6 Yus Das hais li ntawd, tsis yog vim nws nco txog cov pluag, tab sis vim nws yog ib tug tub sab, nws yog tus saib lub hnab rau nyiaj, ces nws nyiag cov nyiaj uas lawv tso rau hauv. 7 Yes Xus thiaj hais tias : "Nej cia nws ua nws. Nws ua qhov no kom tau xub npaj hnub lawv yuav coj kuv mus zwm ntxa. 8 Nej muaj cov pluag nrog nej nyob mus li ; tab sis nej tsis muaj kuv nrog nej nyob mus li."
9 Cov Yus Das paub txog tias Yes Xus tuaj nyob ntawd, lawv tuaj tej pab coob coob tuaj, tsis yog vim lawv xav pom Yes Xus xwb, lawv kuj xav pom Las Ntxas Los uas Yes Xus tau tsa sawv hauv cov tuag rov los thiab. 10 Cov thawj leej choj txiav siab tias lawv yuav muab Las Ntxas Los tua thiab, 11 vim tias, tim Las Ntxas Los, ces cov Yus Das coob leej thiaj tso lawv tseg thiab los ntseeg Yes Xus.

TIM 27 LUB 3 HLIS 2018

Hnub Peb Lis Piam Ntshiab Xyoo B Nruab Lis Piam Xyoo II

Zaj Nyeem Ib: HIS XAIS 49: 1-6

1 Cov pov txwv, nej cuab pob ntseg rau kuv, cov haiv neeg nyob deb, nej mloog. HUAB TAIS twb hu kuv txij thaum kuv tseem tsis tau yug los lawm; thaum kuv tseem nyob hauv kuv niam plab, nws yeej tuav kuv npe lawm. 2 Nws muab kuv lub ncauj los ua ib rab ntaj ntse zuag plias, nws muab kuv zais rau hauv nws txhais tes qhov ntxoov ntxoo. Nws muab kuv ua ib xib xub vos ntse ntse, muab kuv zais rau hauv nws lub raj xub. 3 HUAB TAIS hais rau kuv tias : "Koj yog kuv tus tub txib His Xas Lais, kuv yuav ua kom kuv nto koob meej nyob hauv koj." 4 Kuv xav tau tias : "Kuv tau khwv ciaj khwv tuag, tab sis tsis tau dab tsi li, kuv nkim kuv lub zog dag rau tej yam yaj ntshis xwb;” tiam sis kuv qhov paj tshab yog nyob ntawm HUAB TAIS, kuv tus nqi zog yog nyob ntawm kuv tus Tswv Ntuj. 5 Nyem no, HUAB TAIS tau hais lawm, nws yog tus tau puab kuv nyob hauv kuv niam plab kom kuv ua nws tus tub txib, kom tau coj Yas Kos rov los cuag nws, thiab kom tau sau His Xas Lais rov qab los nrog nws koom ua ke; kuv yuav tau ntsej muag nyob ntawm HUAB TAIS qhov muag; kuv tus Tswv Ntuj yog kuv lub zog. 6 Nws tau hais tias : “Tsis zoo txaus cia koj ua kuv tus tub txib xwb, ua tus rov tsa cov xeem Yas Kos kom sawv thiab coj cov His Xas Lais seem kom rov qab los xwb; kuv tseem yuav muab koj ua lub teeb ci kaj cov kuj cuab kom kuv txoj kev cawm txeem mus txog npoo ntiaj teb kawg thiab.”

NPN 71: 1-2, 3-4A, 5AB-6AB, 15+17

Txais: (15ab) Kuv yuav hu nkauj cav txog koj txoj kev cawm seej.

Huab Tais, kuv tuaj nkaum nyob hauv koj,
thov tsis txhob cia kuv raug kev txaj muag ib zaug li.
Nyob hauv koj txoj kev ncaj, thov tuaj pab kuv, thov tso kuv dim;
cuab koj lub pob ntseg khoov los mloog kuv, thov cawm kuv.

Txais: (15ab) Kuv yuav hu nkauj cav txog koj txoj kev cawm seej.

Thov koj yog lub tsua rau kuv ua chaw nkaum,
yog lub yeej thaiv kuv ntawm tej xwv txheej,
vim koj yeej yog kuv lub tsua thiab kuv lub yeej ntsa zeb.
Kuv tus Tswv Ntuj, thov npo kuv ntawm cov neeg phem txhais tes.

Txais: (15ab) Kuv yuav hu nkauj cav txog koj txoj kev cawm seej.

Huab Tais, koj yog kuv txoj kev cia siab,
Tswv Ntuj koj yog tus kuv ntseeg siab txij thaum hluas los.
Kuv tso siab rau koj txij thaum kuv yug los,
txij thaum kuv nyob hauv kuv niam plab los, koj yeej yog kuv lub zog.

Txais: (15ab) Kuv yuav hu nkauj cav txog koj txoj kev cawm seej.

Kuv lub ncauj yuav tshaj koj txoj kev ncaj,
thiab koj txoj kev cawm neeg hnub dhau hnub.
Tswv Ntuj, koj tau qhuab qhia kuv txij thaum yau los,
txog hnub no, kuv tshaj tawm koj cov hauj lwm txaus qhuas.

Txais: (15ab) Kuv yuav hu nkauj cav txog koj txoj kev cawm seej.

Zaj Cav lub Moo Zoo:

Peb hawm koj, peb tus Vaj, vim koj tau mloog leej Txiv lus;
luag cab koj mus ntsia saum ntoo cuam xws li tus yaj seej seej lawv cab mus tua.

Ntawv Moo Zoo: ZAM 13: 21-33, 36-38


21 Yes Xus hais li ntawd tas, ces nws lub siab ntxhov hnyo, nws thiaj hais meej tias : "Kuv hais qhov muaj tseeb tiag rau nej tias nej ib tug yuav muab kuv muag." 22 Cov thwj tim sib ntsia zom zaws, lawv tsis paub tias Yes Xus hais txog leej twg. 23 Muaj ib tug thwj tim, yog tus uas Yes Xus nyiam, zaum qaij rau Yes Xus hauv siab. 24 Xis Moos Pob Zeb ncaws hau rau nws kom nug saib Yes Xus hais txog leej twg ?" 25 Tus thwj tim ntawd thiaj muab taub hau ntxeev tiaj mus pheeb kiag rau Yes Xus hauv siab, nws nug tias : "Huab Tais, yog leej twg ?" 26 Yes Xus teb tias : "Yog tus uas kuv yuav muab qhov ncuav mov no ntsw kua cev rau nws." Ces Yes Xus muab qhov ncuav mov ntsw kua, nws muab cev rau Yus Das, Xis Moos Kas Lis Yaus tus tub. 27 Thaum Yus Das txais qhov mov ntawd tas, ces Xas Tas nkag mus rau hauv Yus Das. Yes Xus hais rau Yus Das tias : "Qhov koj yuav ua, mas koj ua kom sai." 28 Cov zaum ntawm rooj mov, tsis muaj ib tug to taub tias yog vim li cas Yes Xus hais li ntawd rau Yus Das li. 29 Vim tias Yus Das saib lub hnab nyiaj, ces ib txhia xav tias Yes Xus hais rau nws tias : "Mus muas tej yam uas peb yuav siv rau rooj mov." los yog hais tias : "Pub tej yam rau cov pluag." 30 Yus Das txais nkaus lo mov, nws tawm mus tam sis ntawd; thaum ntawd tsaus ntuj lawm.
31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj txais koob meej nyob hauv nws lawm. 32 Yog Tswv Ntuj txais koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tswv Ntuj yuav muab koob meej rau Neeg Leeg Tub sai sai no. 33 Cov me nyuad, kuv yuav nrog nej nyob me ntsis ntxiv xwb. Nej yuav nrhiav kuv; tiam sis ib yam li kuv tau hais rau cov Yus Das, qhov chaw kuv mus, mas nej tuaj tsis tau, ces zaum no kuv hais rau nej thiab.”
36 Xis Moos Pob Zeb hais rau Yes Xus tias : "Huab Tais, koj yuav mus qhov twg?" Yes Xus teb tias : "Qhov chaw kuv mus, nyem no koj lawv kuv qab tsis tau. Tab sis yav tom ntej, mas koj yuav lawv kuv qab." 37 Pob Zeb hais rau Yes Xus tias : "Huab Tais, vim li cas nyem no kuv thiaj lawv koj qab mus tsis tau ? Kuv tuaj yeem siv kuv txoj sia rau koj." 38 Yes Xus teb tias : "Koj yuav siv koj txoj sia rau kuv no lod ? Kuv hais qhov tseeb tiag rau koj : Qaib tsis tau qua, koj twb tsis lees kuv peb zaug lawm."

TIM 28 LUB 3 HLIS 2018

Hnub Plaub hauv Lis Piam Ntshiab Xyoo C

Zaj Nyeem Ib: HIS XAIS 50: 4-9A

4 HUAB TAIS Tswv Ntuj tau muab ib tug nplaig ua thwj tim rau kuv, kom kuv txawj hais ib lo lus txhawb tus neeg qaug zog. Ib tag kis dhau ib tag kis nws tsa kuv lub pob ntseg kom tsim dheev, nws tsa kuv lub pob ntseg kom kuv txawj mloog xws li ib tug thwj tim. 5 HUAB TAIS Tswv Ntuj qhib kuv pob ntseg, mas kuv tsis tawv ncauj, kuv tsis tig fee mus rau lwm qhov. 6 Kuv cuab nrob qaum rau cov neeg xav ntaus kuv, kuv tig kuv sab plhu rau cov neeg xav dob kuv hwj txwv; kuv tsis tau thaiv ntsej muag kom txhob raug lawv thuam thiab txhob raug lawv nto. 7 HUAB TAIS Tswv Ntuj yuav tuaj pab kuv, ces kuv yuav tsis swb; kuv ua ntsej muag tawv li zeb vim kuv paub tias kuv yuav tsis raug kev txaj muag. 8 Tus saib tias kuv yog neeg ncaj, nws nyob ze kuv, leej twg yuav muaj cuab kav nrog kuv hais yeej hais swb? Kom peb cia li ua ke tuaj mus ntawm lub rooj txiav txim! Leej twg yog kuv tus yeeb ncuab? Kom nws kav tsij txav los ze kuv ! 9 Ntsia saib ! HUAB TAIS Tswv Ntuj yog tus tuaj pab kuv ! Leej twg yuav muab txim rau kuv tau ?

NPN 69: 8-10, 21-22, 31 + 33-34

Txais: (14c) Huab Tais, koj muaj lub siab hlub loj tas nrho, thov koj teb kuv.

Yog vim koj, kuv ua tiag nyiaj luag cov lus cem kuv,
kuv ua tiag ris kev txaj muag.
Kuv cov kwv tij tsis saib kuv yog lawv kwv tij ntxiv,
kuv niam cov tub saib kuv yog ib tug qhua xwb,
vim kuv muaj lub siab kub lug rau koj lub tsev,
ces cov neeg thuam koj tej lus phem poob rau saum kuv.

Txais: (14c) Huab Tais, koj muaj lub siab hlub loj tas nrho, thov koj teb kuv.

Lawv tej lus phem chob kuv lub siab, ua rau kuv zog tas,
kuv vam tias yuav muaj tus hlub kuv, tiam sis tsis muaj li;
vam tias yuav muaj tus nplij kuv, kuv nrhiav tsis tau li.
Lawv tseem muab kau tsib xyaw rau kuv cov mov,
thaum kuv nqhis dej lawv muab kua qaub rau kuv haus.

Txais: (14c) Huab Tais, koj muaj lub siab hlub loj tas nrho, thov koj teb kuv.

Kuv yuav hu nkauj cav txog Tswv Ntuj lub npe,
kuv yuav ua nws tsaug kom nws tau koob meej loj:
Cov neeg me yuav pom, ces lawv yuav zoo siab.
Nej cov uas nrhiav Tswv Ntuj, kom nej lub siab muaj sia tuaj!
Vim Huab Tais mloog cov pluag hu,
nws tsis ntxub nws cov neeg uas raug nyob txim.

Txais: (14c) Huab Tais, koj muaj lub siab hlub loj tas nrho, thov koj teb kuv.

Zaj Cav lub Moo Zoo:

Peb hawm koj, peb tus Vaj,
koj ib leeg thiaj muaj lub siab zoo zam peb cov txhaum rau peb.

Los:

Peb hawm koj, peb tus Vaj, uas mloog leej Txiv lus;
luag cab koj mus ntsia saum ntoo cuam xws li tus yaj seej seej luag cab mus tua.

Ntawv Moo Zoo: MT 26: 14-25

14 Muaj ib tug nyob hauv pab kaum ob, hu ua Yus Das Kas Lis Yaus, nws mus cuag cov thawj leej choj, 15 nws hais rau lawv tias : “Nej yuav muab dab tsi rau kuv, yog kuv muab nws cob rau nej ?” Ces lawv them peb caug lub txiaj nyiag rau Yus Das. 16 Txij hnub ntawd los, Yus Das nrhiav ib lub sij hawm zoo cob Yes Xus rau hauv lawv txhais tes. 17 Thaum txog thawj hnub noj cov ncuav mov tsis xyaw poov xab, cov thwj tim txav los nug Yes Xus tias : “Koj xav kom peb npaj Pluas Hla rau koj noj nyob qhov twg ?” 18 Yes Xus hais tias : “Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.’” 19 Cov thwj tim ua raws li Yes Xus qhia. Ces lawv npaj Pluas Hla. 20 Thaum tsaus ntuj Yes Xus nrog pab Kaum Ob nyob ntawm rooj mov. 21 Thaum lawv noj mov, Yes Xus hais tias : “Kuv hais tseeb rau nej, nej ib tug yuav muab kuv muag.” 22 Lawv ntxhov siab tas nrho, lawv nyias pib nug nyias rau nws tias : “Huab Tais, puas yog kuv ?” 23 Yes Xus teb tias : “Tus yuav muab kuv muag, yog tus tau nrog kuv cev tes ntsw hauv lub phaj ! 24 Neeg Leej Tub mus raws li Ntawv xub sau tseg txog nws. Tab sis tus muab Neeg Leej Tub muag, mas nws txoj hmoov phem ! Txhiaj khoov tus ntawd tsis txhob yug los li!” 25 Yus Das, tus muab Yes Xus muag, kuj teb tias : “Xib Hwb, puas yog kuv ?” Yes Xus hais rau Yus Das tias : “Yog li koj hais.”

TIM 29 LUB 3 HLIS 2018 – HNUB TSIB NTSHIAB XYOO B

Tswv Qhia ua THAJ TXI NTUJ TSIM COV ROJ NTSHIAB thaum Sawv Ntxov

Zaj Nyeem Ib: HIS XAIS 61: 1-3A, 6A, 8B-9

1 HUAB TAIS Tswv Ntuj lub tswv yim nyob saum kuv, vim HUAB TAIS tau pleev kuv. Nws tau tso kuv tuaj xa lub moo zoo rau cov neeg txom nyem, tuaj kho cov neeg tu siab lwj plawv kom lawv zoo hlo, tuaj tshaj kev twj lij rau cov neeg raug txim, thiab kev dim rau cov neeg nyob tsev loj faj, 2 tuaj tshaj txog ib xyoos uas HUAB TAIS yuav pub txiaj ntsim koob hmoov, ib hnub uas Tswv Ntuj yuav ua pauj, kom tau nplij cov neeg ntoo xyom quaj ntsuag; 3 nws tso kuv tuaj muab ib lub mom teev kub rau cov ntoo xyom quaj ntsuag nyob saum Xis Yoos hloov lawv cov tshauv, muab ib co roj zoo siab los pleev lawv hloov lawv kev tu siab, muab ib lub zam muaj hwj chim rau lawv hloov lawv txoj kev tas kev cia siab.
6 Ntawm nej, mas lawv yuav hu nej ua HUAB TAIS cov Leej Choj. Lawv yuav tis npe rau nej ua : HUAB TAIS cov tim xyoob.
8 Kuv, HUAB TAIS, yuav muab nqi zog rau lawv kom haum pheej. Kuv yuav nrog lawv cog ib lo lus nyob mus li tas ib txhis. 9 Lawv haiv neeg yuav nto moo nyob hauv cov kuj cuab, lawv cov xeeb ntxwv yuav nto meej nyob hauv cov haiv neeg. Txhua leej uas pom lawv yuav zeem tias lawv yog ib tsav neeg uas HUAB TAIS foom hmoov zoo rau.

NPN 89: 21-22, 25+27

Txais: (2) Kuv yuav hu nkauj mus li cav txog HUAB TAIS lub siab zoo.

Kuv nrhiav tau Das Vis ua kuv tus tub txib,
kuv tau muab kuv cov roj ntshiab los pleev nws.
Kom kuv txhais tes nyob ze nws mus li,
Thiab kom kuv txhais npab ua kom nws muaj zog.

Txais: (2) Kuv yuav hu nkauj mus li cav txog HUAB TAIS lub siab zoo.

Kuv txoj kev pheej xeeb thiab kev hlub yuav nyob ze nws,
kuv lub npe yuav tsa nws hauv pliaj kom siab.
Nws yuav hu kuv tias : "Koj yog kuv txiv,
Kuv tus Tswv Ntuj, kuv lub Tsua, kuv tus Cawm Seej!"

Txais: (2) Kuv yuav hu nkauj mus li cav txog HUAB TAIS lub siab zoo.

Zaj Nyeem Ob: QYTN 1: 5-8

5 Thov kom nej tau txais txiaj ntsim thiab kev thaj yeeb tuaj ntawm Yes Xus Pleev tuaj, uas yog tus Tim Khawv pheej xeeb, tus xub yug hauv cov tub tuag los, tus tswj kav tsoom vaj nyob ntiaj teb no. Nws nyiam peb, nws tau muab nws cov ntshav los ntxuav peb cov txhaum.
6 Nws tsa peb ua ib haiv neeg ua vaj, ua ib co Leej Choj teev nws Leej Txiv thiab nws tus Tswv Ntuj. Vim li ntawd, mas lub koob meej thiab lub hwj chim yog nws tug mus tas ib txhiab ib txhis. Ua li.
7 Ntsia saib ! Nws nrog cov huab tuaj. Txhua leej txhua tus yuav pom nws; cov tau nkaug nws kuj yuav pom. Tas txhua haiv neeg nyob ntiaj teb yuav quaj yuav nyiav vim nws. Yuav muaj tseeb li ntawd. Ua li.
8 Huab Tais Tswv Ntuj hais tias: “Kuv yog As Fas thiab Os Mes Nkas,”, vim nws yog tus tab tom nyob, tus nyob dhau los lawd, thiab tus tab tom yuav tuaj, nws yog tus Muaj Hwj Huam tas nrho.

Zaj Cav lub Moo Zoo: HIS XAIS 61: 1 (LK 4: 18)

HUAB TAIS lus tswv yim nyob saum kuv,
nws tau tso kuv tuaj xa lub moo zoo rau cov neeg txom nyem.

Ntawv Moo Zoo: LK 4: 16-21

16 Yes Xus los txog Nas Xas Les, lub zos uas nws nyob hlob. Hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv.
17 Lawv cev tus Yaj Saub His Xais kauj ntawv rau nws. Nws nthuav kauj ntawv, nws nrhiav tau nqe lus uas sau tias : 18 “Huab Tais lub Tswv Yim nyob saum kuv, vim nws pleev roj los qee kuv kom kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij;
19 nws xa kuv mus tshaj tias yog xyoo Huab Tais yuav pub txiaj ntsim.”
20 Yes Xus rov kauv kauj ntawv rau, nws rov muab rau tus tub txib, ces nws mus zaum. Tas tsoom neeg uas nyob hauv lub tsev txoos ntsia ntsoov Yes Xus.
21 Ces Yes Xus hais rau lawv tias : “Hnub no, cov lus nyob hauv zaj ntawv no tsheej xeeb raws li nej tau hnov lawm."

+++++++++++++++++++++++++++++++++++++++++

Thaj Txi Ntuj NCO TXOG YES XUS NOJ PLUAS HMO KAWG yav tsaus ntuj

Zaj Nyeem Ib: KEV TSIV 12: 1-8, 11-14

1 HUAB TAIS hais rau Mais Xes thiab As Loos nyob Hais Nkws Tos teb tias: 2 "Lub hlis no nej yuav muab suav ua thawj lub hlis ua ntej cov, nej yuav muab ua lub ib hlis qhib lub xyoo tshiab. 3 Neb hais rau ib tsoom pej xeem His Xas Lais tias: ‘Lub hlis no xiab kaum, mas nej txhua yim neeg nyias yuav tsum npaj nyias ib tug tsiaj me, txhua lub tsev yuav tsum npaj ib tug tsiaj me. 4 Yog tsev neeg twg tsawg dhau noj tsis tas ib tug tsiaj me, mas nej yuav mus koom nrog lwm tsev neeg uas nyob ze nej dua cov kom muaj neeg coob txaus. Nej yuav xaiv ib tug tsiaj kom txaus nkaus sawv daws noj tsis seem. 5 Nej yuav xaiv ib tug tsiaj zoo nkauj tsis muaj chaw xyeej, muaj hnub nyoog ib xyoos; nej yuav xaiv ib tug thav tshis los tau ib tug thav yaj los tau.
6 Nej yuav ceev tus tsiaj no cia mus txog lub hlis no hnub xiab kaum plaub; hmo ntawd, tas tsoom His Xas Lais nyias yuav tua nyias tus tsiaj thaum hnub poob qho kiag. 7 Nej yuav cug cov ntshav coj mus pleev ob tug ncej puab rooj thiab pleev daim txiag tav saum lub qhov rooj nkag hauv lub tsev uas nej noj tus tsiaj ntawd. 8 Hmo ntawd, nej yuav muab cov nqaij txhiab hauv hluav taws noj, nej yuav noj ntxuag ib co ncuav mov tsis xyaw poov xab, thiab ib cov zaub iab.
11 Nej yuav noj mov zoo li no : Nej sia siv khov kho ntawm duav, nej rau khau tib si, thiab tuav rawv nej rab pas nrig ntawm tes. Nej yuav tsuag tsuag noj nrawm nroos, vim yog HUAB TAIS hmo hla. 12 Hmo ntawd, kuv yuav hla mus thoob Hais Nkws Tos teb, kuv yuav ntaus cov ua tub hlob nyob hauv Hais Nkws Tos teb tib si kom tuag, tsis hais neeg los tsiaj li, thiab kuv yuav txiav txim rau cov dab Hais Nkws Tos, kuv yog HUAB TAIS!
13 Cov ntshav yuav yog ib lub cim txuag nej hauv cov tsev uas nej nyob. Kuv pom lub cim ntawd, kuv yuav hla dhau plaws mus, ces nej yuav tsis raug qhov xwv txheej loj ntawd, hmo uas kuv ntaus Hais Nkws Tos teb.
14 Nej yuav cim ntsoov hnub ntawd cia ua ib hnub tshwj xeeb rau nej, nej yuav muab ua ib hnub cav txog HUAB TAIS, yuav yog ib hnub nej ua koob tsheej tiam dhau tiam, yog ib txog cai nej yuav coj mus li.

NPN 116: 12-13, 15-16BC, 17-18

Txais: (1 KLN 10:16) Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
thiab kuv yuav tuav txog HUAB TAIS lub npe.

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

HUAB TAIS saib cov ntseeg txog nws
txoj kev tuag muaj nqes loj.
Kuv yog koj tus tub txib, yog koj tus ntxhais txib tus tub;
Koj tau daws cov hlua khi kuv.

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav cev ib co txim los ua koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,

Txais: Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Zaj Nyeem Ob: 1 KLN 11: 23-26

Cov kwv tij nkauj muam:
23 Cov lus kuv qhia rau nej no, yog cov lus kuv tau txais ntawm Huab Tais los: Hmo Huab Tais Yes Xus raug muag, nws tuav ib lub ncuav mov,
24 nws ua Ntuj tsaug, nws muab lub ncuav mov ntais, nws hais tias : “Qhov no yog kuv lub cev uas cia rau nej; Nej ua qhov no kom nej nco txog kuv.”
25 Thaum noj hmo tas kuj ib yam, nws tuav lub ntim cawv, nws hais tias : “Lub ntim cawv no yog zaj cog lus tshiab nyob hauv kuv cov ntshav ; nej haus lub ntim no thaum twg, mas nej haus kom nej nco txog kuv.”
26 Vim li no, niaj zaus thaum nej noj lub ncuav mov no thiab nej haus cov cawv no, mas yog nej tshaj Huab Tais txoj kev tuag mus txog hnub Huab Tais rov los.

Zaj Cav lub Moo Zoo: ZAM 13: 34

Huab Tais hais tias, kuv muab ib lo lus qhia tshiab rau nej:
nej yuav sib nyiam sib hlub ib yam li kuv tau nyiam thiab hlub nej.

Ntawv Moo Zoo: ZAM 13: 1-15

1 Thaum yuav txog lub Ntees Hla, Yes Xus paub tias txog nws lub caij hla lub ntiaj teb no rov mus cuag Leej Txiv lawm. Nws hlub nws cov neeg uas nyob hauv lub qab ntuj no, mas nws hlub lawv mus txog thaum kawg. 2 Thaum lawv tab tom noj hmo, dab phem twb xub nkag ua ntej mus tshoj Yus Das Kas Lis Yaus, Xis Moos tus tub, lub siab lawm kom muab Yes Xus rau luag ntes. 3 Yes Xus paub tias Leej Txiv tso tas ib puas tsav yam rau hauv nws txhais tes, nws paub tias nws tuaj ntawm Tswv Ntuj tuaj, thiab nws yuav rov mus cuag Tswv Ntuj,
4 Ces nws sawv ntawm lub rooj mov mus, nws hle tsho, nws muab ib daig ntaub khi rau ntawm nws duav. 5 Nws hliv dej rau hauv ib lub phiab, ces nws pib ntxuav cov thwj tim ko taw. Nws muab daim ntaub khi ntawm duav los so lawv ko taw. 6 Yes Xus los txog ntawm Xis Moos Pob Zeb, Pob Zeb hais rau Yes Xus tias : "Huab Tais, koj yuav ntxuav kuv ko taw lod ?" 7 Yes Xus teb rau Pob Zeb tias : "Qhov uas kuv ua, mas tam sis no koj tsis to taub, tiam sis yav tom ntej koj yuav to taub." 8 Pob Zeb hais rau Yes Xus tias : "Koj txhob ntxuav kuv ko taw, kuv tsis kam ib zaug li." Yes Xus teb rau Pob Zeb tias : "Yog kuv tsis ntxuav koj, mas koj yuav tsis muaj cuab tam nrog kuv ua ke."
9 Xis Moos Pob Zeb hais rau Yes Xus tias : "Huab Tais, yog li mas tsis yog ntxuav taw xwb, koj ntxuav kuv tes thiab kuv taub hau huv tib si." 10 Yes Xus hais rau Pob Zeb tias : "Tus uas nws da dej lawm mas tsis tas yuav ntxuav ntxiv, tsuas ntxuav ko taw xwb, vim nws ib ce huv tas tib si lawm; nej kuj huv lawm thiab, tab sis huv tsis tas txhua leej." 11 Yes Xus yeej paub tus twg yog tus yuav muab nws rau luag, vim li ntawd nws thiaj hais tias : "Nej huv tsis tas txhua leej."
12 Thaum Yes Xus ntxuav lawv ko taw tas, nws rov hnav nws lub tsho, nws rov los zaum ntawm rooj mov, nws thiaj hais rau lawv tias : "Nej puas to taub qhov uas kuv ua rau nej ? 13 Nej hu kuv ua : Xib Hwb thiab Huab Tais. Nej hu raug lawm, vim kuv yeej yog tiag. 14 Yog tias kuv uas yog Xib Hwb thiab yog Huab Tais, kuv twb ntxuav nej ko taw, mas nej ib tug kuj yuav tsum rov ntxuav ib tug ko taw thiab. 15 Qhov kuv tau ua yog ib tug piv txwv rau nej, kom nej ua raws li kuv tau ua rau nej.