Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Suav neeg tuaj saib, txij hnub 17/09/2010 los mus.


    Xyoo 1986, Zam Thoj ntsib TP. Nyiaj Pov

    Share
    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5349
    Date d'inscription : 2009-08-18

    Xyoo 1986, Zam Thoj ntsib TP. Nyiaj Pov

    Post  Maiv Tooj on 12th October 2017, 3:26 pm


    XYOO 1986, THOJ ZAM NTSIB TXIV PLIG NYIAJ POV



    Thoj Zam tag sim neej hnub tim 13 lub 1 hlis xyoo 2011.
    Thoj Zam yog ib tug Hmoob Suav nyob rau lub zos Kwj Deg Txias, nroog Paj Tawg Lag, xeev Yeej Naj, Suav teb. Thoj Zam hais li no : xyoo 1986, kuv mus Khib Meej (Kunming), vim Khib Meej lub Cheeb Koom Txoos Kav Tos Liv muaj kev sib sau sab laj. Xyoo ntawd T.P Nyiaj Pov kuj tuaj tsham ua si txog nroog Khib Meej thiab. Nyob hauv Tswv Qhia tsev, muaj ib tug Txiv Plig Hmoob npe hu ua Tsheej. Txiv Plig Tsheej xub paub Txiv Plig Nyiaj Pov, vim nkawd xub ua phooj ywg lawm. Txiv Plig Tsheej kuj paub kuv thiab nrog kuv sib raug zoo los ntev. Txiv Plig Tsheej thiaj qhia kom T.P Nyiaj Pov los ntsib kuv nyob ntawm lub tsev teev Ntuj uas Pej Ceeb Lwm hom phiaj 92. Tag kis ntawd kwv yees 9 teev tej, peb ib pab neeg uas sib sau ua ke ntawm rooj sab laj los thau duab ua ke. Thaum thau duab tas, ib tug neeg Fab Kis ua ntsej muag luag ntxhi ntsia ntsoov kuv. Tab sis kuv tsis paub yog tus qab hau dab tsi. Nws nthos nkaus kuv txhais tes hu tias : “Koj yog Hmoob lod ?” Kuv teb tias : “Yog kawg”.
    Nws kuj nug tias : “Koj paub ntawv Hmoob thiab lod ?”Kuv teb tias : “Kuv paub me ntsis xwb”.
    Nws hais ntxiv tias : “Koj puas muaj sij hawm nrog kuv tham pem me ntsis ne ?” Kuv teb tias : “Ib me chim kuv mam los ntsib koj.”
    Ces peb ib pab neeg cia li rov qab mus tim lub tsev rooj sab laj mus noj tshais lawm. Lub sij hawm ntawd, kuv xav twj ywm hauv siab tias :
    kuv yog ib tug neeg me, vim li cas ib tus neeg Fab Kis yuav kom kuv mus ntsib nws ?
    Tus neeg Fab Kis ntawd nws so nyob saum Txiv Plig Kws lub tsev txheej 2. Kuv mem tias T.P Kws yeej yuav tsum paub nws xwb xwb. Kuv thiaj mus nug T.P Kws, T.P Kws qhia rau kuv tias : tus puag ta tuav koj tes, kuv qhia rau koj tias : nws yog T.P Nyiaj Pov. Kuv hnov hais li ntawd, ces kuv kuj zoo siab heev lauj !
    Peb ib pab neeg uas sib sau sab laj sawv daws ua ke noj tshais tas, kuv thiaj mus ntsib T.P Nyiaj Pov saum T.P Kws lub tsev txheej 2. Wb 2 leeg zoo siab tham li ub li no. Nws cev rau kuv ib cov ntawv Hmoob. Tab sis, cov ntawv Hmoob no kuv tsis paub. Vim cov kuv paub yog Suav teb cov ntawv Hmoob xwb. Txawm li ntawd los T.P Nyiaj Pov kuj kom kuv txais nws cov ntawv mus xyaum. Nws kuj hais tias yooj yim kawg. Kuv thiaj txais coj los hauv kuv tsev. Txij hnub ntawd los, Txiv Plig Nyiaj Pov kuj xa ntau phau ntawv tuaj rau kuv ntxiv. Kuv xav twj ywm tias : txawm yog ntawv Hmoob los tsis muaj tus qhia, yus ces kuj tsis txawj paub ib zaug li. Tsuas zoo muab khaws tso cia xwb lauj. Tiam sis kuv lub siab kuj nyob tsis kaj. Kuv kuj xav tias luag yog ib tus T.P tawv dawb, luag ntseeg yus yog tus neeg ntse, yeej yuav kawm txawj hom ntawv Hmoob no. Vim tus tsi yus ho tsis xav tswv yim muab kawm kom paub. Yuav mus nrhiav leej twg qhia yus ned ? Xav tas puas tsav yam hauv siab, kuj xav tsis tau lub zoo tswv yim. Muaj ib zaug kuv nrog kuv tus muam vauv thiab ib tug tij laug, tsis nco qab yog mus Khib Meej sab laj ua dab tsi lawm. Hnub ntawd, lawv 2 leeg caw kuv nrog lawv mus ntsib ib tug Hmoob Ham uas nyob hauv lub nroog Khib Meej. Tab sis ua ntej mas kuv twb xub ntsib T.P Kws lawm. Kuv hais rau Txiv Plig Kws tias :
    Txiv Plig kuv tsis paub hom ntawv Hmoob no. Tab sis T.P Nyiaj Pov muab cov ntawv no xa ntau phau tuaj rau kuv. Kuv saib mas ib tug txwm ntawv los kuv tsis paub li. Kuv kuj nug tsis tau Txiv Plig Nyiaj Pov moo li thiab. Yog koj ntsib nws, ces koj hais rau nws tias : kom nws txhob xa tuaj lawm. Tsis li mas, yuav nkim tas nws cov ntawv thiab nws cov txiaj xa ntawv, ces khuv xim kawg li. T.P Kws teb kuv tias : “Hom ntawv Hmoob no kawm yooj yim kawg. Kuv twb paub lawm.” Kuv hnov dheev nws hais li ntawd, kuv hais tias : “Txiv Plig Kws, koj puas kam qhia kuv me ntsis maj ?”
    Nws teb tias : “Kam kawg los maj.” Tam sim ntawd, nws qhia kuv kwv yees 2 teev. Kuv kuj rau siab ntso kawm, ib chim xwb kuv kawm tas nrho phau me ntawv uas “ XYAUM NYEEM NTAWV HMOOB THOOB TEB” ntawd. Qhov uas yooj yim rau kuv yog kuv xub paub Suav teb cov ntawv Hmoob lawm. Txawm tias tus txwm ntawv txawv, los lub suab kuj tsis txawv peg tsawg. Kuv kuj muab Suav teb cov ntawv Hmoob cim cia rau ib sab. Ces coj los txog tsev kuv niaj hmo nrhiav sij hawm los xyaum. Tab sis kuv niaj hnub ua liaj ua teb, maj tsis yeej los kawm nruab hnub. Tsuas yog hmo ntuj mam xyaum xwb, xyaum xyaum tsaug zog ces cia li pw. Ib lub hlis tom qab, kuv rov saib xyuas tej phau ntawv “DAB NEEG” uas Txiv Plig Nyiaj Pov xa rau kuv. Kuv tshwj zias tej txwm uas yog yeeb lus tseg, kuv puav leej nyeem tau tib si lawm. Muaj ib zaug kuv mus txog Khib Meej, yog zaum 2 uas kuv rov tau ntsib Txiv Plig Nyiaj Pov. Kuv thiaj muab phau ntawv nyeem rau Txiv Plig mloog, Txiv Plig npuaj npuaj kuv xub pwg hais tias : “Kuv pom tseeb tias koj paub ntawv Hmoob zoo lawm.” Vim li ntawd, Txiv Plig Nyiaj Pov nrog kuv ua phooj ywg txog hnub nws tas sim neej. Txij thaum wb sib paub txog nyiam no, nws pab tas kuv puas tsav yam tswv yim. Tseem pab nyiaj txiag rau kuv qhia Suav teb tej tub ntxhais kom txawj nyeem thiab sau ntawv Hmoob. Txiv Plig Nyiaj Pov tas nws ib sim neej nws pab ib ntiaj ntug txhua txhia lub kuj cuab uas muaj Hmoob nyob. Nws zoo tshaj ib tsoom Hmoob tej niam tej txiv. Nws ua ib tug niam thov khawv rau ib tsoom me nyuam thov khawv siv noj siv haus, siv ua hauj lwm li ub li no. Nws niaj xyoo tuaj Suav teb ntsib kuv thiab ib tsoom phooj ywg Hmoob. Nws ua rau luag txhua txhia leej noj pov khawv. Siv kom luag txaus siab, tab sis nws tsis noj pes tsawg. Nws kuj tsis haus yeeb haus cawv, nws siv txiaj txuag txuag rau nws. Nws hais kuv tias :
    “Koj kuj yoog xws kuv me ntsis. Vim koj siv txiaj kuj txuag zoo xws kuv, tsis noj zoo peg tsawg.” Txiv Plig Nyiaj Pov kheev nrog kuv ua ke noj haus, vim kuv kuj tsis haus cawv ntau ntau, tab sis kuv ho haus luam yeeb. Nyob Suav teb haus luam yeeb tsis siv txiaj ntau peg tsawg.
    Kuv ntsib Txiv Plig Nyiaj Pov nyob Thaib teb 2 zaug. Ua ntej kuv tsis tau mus ntsib nws nyob Thaib teb, mas kuv xav tias nws yog ib tug nto npe lug rau ib ntiaj ntug tsoom Hmoob. Ntshe nws yuav nyob tej tsev zoo nkauj cuag nom tswv tej vaj tse. Tiam sis thaum kuv mus pom kiag ntawm qhov muag, nws tsis muaj ib lub tsev li. Nws nyob 2 me kem tsev uas muaj 3 txheej, tab sis kuj yog nrog luag ntiav nyob xwb, tsis yog nws tug. Nyob hauv nws 2 kem tsev tsis muaj ib lub rooj uas zoo zaum muag nyoos. Nws tej rooj zaum kuj yog tej lub tawv qhawv, tsis tiag dab tsi rau saud li. Kuv nrog Txiv Plig Nyiaj Pov nyob ib hlis ntau, niaj hnub tsuas pom nws zaum tej rooj tawv qhawv ntawd xwb. Zaum ib hnub tsaus ntuj, cuag li taub qab tsis txawj tsaug, tsis txawj mob. Kuv pom nws lub zam zuag ntawd, kuv kuj xav twj ywm hauv kuv siab tias :
    “Txiv yuas Txiv ! Ib sim neej koj tsuas muab koj lub hlwb hau thiab lub zog siv tas rau ib tsoom Hmoob. Hlub luag tshaj koj hlub koj. Koj thiaj yog Yes Xus ib tug tseeb thwj tim tiag. Qhov tseeb kuj yog Yes Xus tus zoo phooj ywg. Tsim nyog peb ib tsoom kwv tij Hmoob qhuas txog koj !”
    Tsim nyog peb xyaum yoog raws Txiv Plig Nyiaj Pov tus cuj pwm. Yog yuav sau Txiv Plig Nyiaj Pov ib sim neej qhov muaj nqis, mas ceeb laj sau tas. Yuav suav nws cov txiaj ntsim uas ua pub rau Hmoob, kuj ceeb laj suav txhua. Kuv tsuas sau me me txij no xwb. Thov tsoom kwv tij Hmoob uas nej tau pom Txiv Plig Nyiaj Pov lub neej, ho sau rau kuv thiab sawv daws tau saib tau mloog, ua tsaug ntau ntau !

    Muab los ntawm Zoo Tswv Zov Yaj.


    Last edited by Maiv Tooj on 16th October 2017, 8:55 am; edited 1 time in total



    avatar
    Mim
    Tswv Cuab Hmong Catholique
    Tswv Cuab Hmong Catholique

    Messages : 1970
    Date d'inscription : 2009-10-16

    Re: Xyoo 1986, Zam Thoj ntsib TP. Nyiaj Pov

    Post  Mim on 13th October 2017, 7:41 am

    Nyob zoo tais Tooj,

    Es Thoj Zam tau tas sim neej lawm lod? Cas kuv twb tsis paub txog li.

    Puag thaum lub caij Yes Xus Yug xyoo 1999 thiab lub xyoo Tshiab 2000 ntawd peb 3 niam txiv tub tau mus Paj Tawg Lag ib zaug, peb kuj tau mus txog hauv Thoj Zam lub tsev thiab hos. Zoo li nws yog ib tug xib hwb sub os. Raws li kuv nco mas zoo li nws tsis nyiam koom nrog lub Koom Txoov Kas Tos Liv Suav, nws nyiam koom nrog lub Koom Txoos Los Mas sub.

    Zaum no kuv paub lawm no ces kuv mam li thov ntuj rau nws thiab.
    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5349
    Date d'inscription : 2009-08-18

    Re: Xyoo 1986, Zam Thoj ntsib TP. Nyiaj Pov

    Post  Maiv Tooj on 16th October 2017, 8:58 am



    Mim,

    Zoo kawg, koj muaj hmoo koj au mus ntsib cov Hmoob ntseeg nyob Tuam Tshoj. Muaj ib xyoos lawv sab laj, TP.Lis Pej kuj hu kom kuv mus koom lawv thiab no tab sis kuv tsis mus, cia lwm hnub yog muaj sij hawm no xav mus xyuas lawv ib zaug. Yam kuv twb tsis paub tias muaj Hmoob ntseeg nyob tid tab sis twb tseem muaj coob leej Txiv Plig lawm thiab mas zoo siab ua Tswv Ntuj tsaug.



    avatar
    Tub Kawm
    Phooj Ywg
    Phooj Ywg

    Messages : 415
    Date d'inscription : 2011-10-13

    Re: Xyoo 1986, Zam Thoj ntsib TP. Nyiaj Pov

    Post  Tub Kawm Today at 10:55 am

    Nyob zoo N hlob thiab Mim hais txog XH Thoj Zam zoo li kuv kuv twb hnov nws tus nru lus tshaj Tswv Ntuj lub Moo Zoo rau hauv XT CUAS ZTZY ntau zaug lawm tiam si kuv tsis nco yog xyoo twg xwb . Kuv xav tias ntshe nws tseem muaj txoj si nyob no cas nws twb tau ncaim peb mus lawm.
    Thov kom Tswv Ntuj tshoj peb tsoom hmoob kom muaj ntau tus tig los ua XH hmoob xws li Thoj Zam.






    Ua tsaug ntau rau koj  tuaj saib peb lub Tsev Forum hmong Catholic  no.
    Thov Leej Ntuj Plig Ntshiab tuaj tshoj koj lub siab kom koj to taub Tswv Ntuj cov lus.

    Sponsored content

    Re: Xyoo 1986, Zam Thoj ntsib TP. Nyiaj Pov

    Post  Sponsored content


      Current date/time is 22nd October 2017, 5:24 pm