HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM  UA KOOB TSHEEJ YES XUS YUG LOS Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


    COV ZAJ NYEEM UA KOOB TSHEEJ YES XUS YUG LOS

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty COV ZAJ NYEEM UA KOOB TSHEEJ YES XUS YUG LOS

    Post  Mim 24th December 2016, 6:09 am

    TIM      25     LUB    12    HLIS  

    HMOOV TSUJ XEEB HT YUG LOS (CHRISTMAS)

    HMO UA NTEJ TIM 24 - MIS XAS YAV TSAUS NTUJ (VIGIL MASS)

    Lectionary: 13

    COV ZAJ NYEEM  UA KOOB TSHEEJ YES XUS YUG LOS F110855c2d8d9100a2bff1adf5cfde4c

    Zaj Nyeem Ib: HIS XAIS 62: 1-5

    1 Vim Xis Yoos, kuv yuav tsis nyob ntsiag to, vim Yes Lus Xas Les, kuv yuav
    tsis ua twj ywm, mus txog lub caij nws txoj kev ncaj tawm plaws los xws li
    qhov kaj ntug, nws txoj kev yeej tawm plaws los xws li ib teg tsau cig lam lug.
    2 Cov kuj cuab yuav pom koj txoj kev ncaj, tas cov vaj huv si yuav pom
    koj lub hwj chim. Koj yuav muaj ib lub npe tshiab,
    HUAB TAIS lub ncauj yuav tis rau koj.
    3 Koj yuav zoo li ib lub mom teev kub zoo nkauj
    nyob hauv HUAB TAIS txhais tes,
    zoo li ib lub kaus mom ua vaj nyob hauv koj tus Tswv Ntuj lub xib teg.
    4 Luag yuav tsis hu koj ntxiv tias : "Tus luag tso pov tseg,"
    thiab yuav tsis hais txog koj thaj av tias: “Tsis muaj neeg nyob,”
    tiam sis koj yuav hu ua : "Nws yog kuv lub chaw zoo siab;"
    koj thaj av yuav hu ua: "Nkauj nyab tshiab."
    Vim koj yog HUAB TAIS chaw zoo siab,
    koj thaj av yuav raug ua nws tus nkauj nyab tshiab.
    5 Xws li ib tug nraug xwb qaws ib tug nkauj xwb ua nws tug,
    koj cov tub kuj yuav qaws koj thaj av ua lawv tug;
    xws li tus nkauj nyab yog nraug vauv lub chaw zoo siab,
    koj kuj yuav yog koj tus Tswv Ntuj lub chaw zoo siab thiab

    NPN: 89: 4-5, 16-17, 27+29

    Txais: (2a) Kuv yuav hu nkauj mus li cav txog HUAB TAIS lub siab zoo.

    Kuv tau cog ib lo lus nrog tus kuv xaiv,
    kuv tau cog lus khov rau kuv tus tub txib Das Vis tias :
    Kuv yuav tsa koj caj ces kom nyob ruaj mus li,
    kuv yuav txhim ib lub theej kiab rau koj zaum tiam dhau tiam.

    Txais: (2a) Kuv yuav hu nkauj mus li cav txog HUAB TAIS lub siab zoo.

    Hmoov zoo rau Haiv neeg uas paub lub suab qw zoo siab;
    Huab Tais, koj lub ntsej muag yuav ci kaj lawv txoj kev.
    Lawv hnov koj lub npe, lawv yuav dhia zoo siab tas hnub.
    Koj txoj kev ncaj yuav tsa lawv nyob rau qhov siab.

    Txais: (2a) Kuv yuav hu nkauj mus li cav txog HUAB TAIS lub siab zoo.

    Nws yuav hu kuv tias: "Koj yog kuv txiv,
    Kuv tus Tswv Ntuj, kuv Phab Tsua, tus cawm kuv."
    Kuv yuav ua zoo rau nws tas mus li ib txhis,
    Kuv lo lus kuv nrog nws cog yuav nyob ruaj khov.

    Txais: (2a) Kuv yuav hu nkauj mus li cav txog HUAB TAIS lub siab zoo.

    Zaj Nyeem Ob: HAUJ LWM 13: 16-17, 22-25

    Thaum Paj Lug mus txog As Nthias Kias
    nyob Pis Xis Dias teb, nws nkag mus hauv lub tsev txoos,
    16 nws sawv, nws tsa tes, thiab nws hais tias: "Cov kwv tij His Xas Lais,
    thiab nej cov uas hwm Tswv Ntuj sawv daws, nej mloog mas.
    17 Haiv neeg His Xas Lais tus Tswv Ntuj tau xaiv peb cov yawg koob thaud.
    thiab tau ua kom lawv yog ib haiv neeg loj thaum lub caij lawv khuam
    nyob Hais Nkws Tos teb. Nws tau tsa nws ob txhais tes kom siab
    los coj lawv tawm ntawm lub teb chaws ntawd los.
    22 Tswv Ntuj tau muab Xas Ws tshem tawm thiab tsa Das Vis
    ua tus vaj. Tswv Ntuj ua pov thawj txog Das Vis tias:
    'Kuv nrhiav tau Das Vis, Yes Xes tus tub. Nws yog tus neeg ntxim
    kuv siab, nws yuav ua raws li kuv lub siab xav tas huv si.'
    23 Nyob hauv Das Vis caj ces, Tswv Ntuj tau tsa ib tug cawm seej
    los pab His Xas Lais, raws li nws tau cog lus lawm, yog Yes Xus.
    24 Zam tau xub tuaj tshaj tawm ua ntej Yes Xus yuav tawm tuaj.
    Nws tau tshaj rau haiv His Xas Lais kom lawv
    sawv daws txais kab ke ntxuav thiab lees txhaum.
    25 Thaum Zam ua nws txoj hauj lwm yuav tiav, nws hais tias:
    'Nej xav hais tias kuv yog leej twg? Kuv tsis yog tus uas nej xav.
    Tiam sis tus lawv kuv qab, mas nws tuaj lawm,
    kuv tsis tsim nyog daws nws txoj hlua khau."

    As Les Lus Yas

    Txais: As les lus yas, as les lus yas.

    Tag kis lub ntiaj teb txoj kev phem yuav raug rhuav pov tseg tas:
    tus tuaj cawm lub sim ceeb yuav ua vaj kav peb.

    Txais: As les lus yas, as les lus yas.

    Ntawv Moo Zoo: Zaj ntev: MT 1: 1-25

    1 Phau ntawv qhia txog Yes Xus Pleev lub keeb;
    nws yog Das Vis leej tub thiab yog Has Nplas Has leej tub:
    2 Has Nplas Has yug Is Xas Has, Is Xas Has yug Yas Kos,
    Yas Kos yug Yus Das thiab nws cov kwv tij.
    3 Yus Das yug Fas Les thiab Ntxas Las nkawd ntawm Thas Mas los.
    Fas Les yug Es Xas Los, Es Xas Los yug As Las,
    4 As Las yug As Mis Nas Das, As Mis Nas Das yug Nas As Xoos,
    Nas As Xoos yug Xas Moos,
    5 Xas Moos yug Npuag Oos ntawm Las Has los.
    Npuag Oos yug Os Npes ntawm Luv los. Os Npes yug Yes Xes.
    6 Yes Xes yug tus vaj Das Vis. Vaj Das Vis yug Xas Los Moos,
    ntawm tus niam uas yog Us Lis poj niam los.
    7 Xas Los Moos yug Los Npuag, Los Npuag yug As Npias, As Npias yug As Xas,
    8 As Xas yug Yos Xas Fas, Yos Xas Fas yug Yos Las, Yos Las yug Os Xias,
    9 Os Xias yug Yos Thas, Yos Thas yug As Kas, As Kas yug Es Xes Kias,
    10 Es Xes Kias yug Mas Nas Xes, Mas Nas Xes
    yug As Moos, As Moos yug Yos Xias,
    11 Yos Xias yug Yes Kos Nias thiab Yes Kos Nias cov kwv tij,
    thaum lub caij lawv mus raug txim nyob Npas Npis Los.
    12 Dhau lub caij raug txim nyob Npas Npis Los lawm, Yes Kos Nias
    yug Xas Las Thias; Xas Las Thias yug Ntxos Los Npas Npes.
    13 Ntxos Los Npas Npes yug As Npis Yus,
    As Npis Yus yug Es Lias Kis, Es Lias Kis yug As Ntxos.
    14 As Ntxos yug Xas Dos, Xas Dos yug As Khis, As Khis yug Es Lis Us,
    15 Es Lis Us yug Es Les As Ntxas, Es Les As Ntxas
    yug Mas Thas, Mas Thas yug Yas Kos,
    16 Yas Kos yug Yos Xes uas yog Mab Liab tus txiv.
    Mab Liab yug Yes Xus, uas luag hu nws ua Leej Pleev.
    17 Tas cov tiam neeg huv tib si txij Has Nplas Has los txog Das Vis,
    muaj kaum plaub tiam; txij Das Vis los txog lub caij
    raug txim nyob Npas Npis Los, muaj kaum plaub tiam;
    txij lub caij raug txim nyob Npas Npis Los los txog
    lub caij Leej Pleev tuaj, muaj kaum plaub tiam.
    18 Yes Xus Pleev lub keeb chiv zoo li no: Mab Liab uas yog Yes Xus niam,
    lawv muab qhaib rau Yos Xes lawm. Thaum nkawd tseem tsis tau
    los nyob ua ke, Leej Ntuj Plig Ntshiab ua kom Mab Liab xeeb tub.
    19 Yos Xes uas yog Mab Liab tus txiv, yog ib tug neeg ncaj,
    nws tsis xav kom zeej tsoom hais lus xaiv txog Mab Liab,
    ces nws txiav siab nrauj Mab Liab ntsiag to xwb.
    20 Thaum nws tab tom xav tswv yim txog li ntawd,
    Huab Tais tus Tshiab tawm los ua npau suav rau nws,
    thiab hais rau nws tias: "Yos Xes, Das Vis leej tub, koj tsis
    txhob ntshai mus coj Mab Liab, koj tus poj niam los. Vim tus
    xeeb los nyob hauv nws yog los ntawm Leej Ntuj Plig Ntshiab los xwb.
    21 Nws yuav yug ib tug tub, koj yuav tis nws npe hu ua Yes Xus:
    vim nws yuav cawm nws haiv neeg ntawm lawv cov txhaum."
    22 Tas ib puas tsav yam ntawd tshwm sim raws li lo lus
    uas Huab Tais kom tus yaj saub xub hais tseg tias:
    23 'Tus ntxhais nkauj xwb yuav xeeb tub hauv nws lub cev,
    nws yuav yug ib tug tub. Luag yuav tis nws npe hu
    ua Es Mas Nus Es, txhais tias: Tswv Ntuj nrog peb nyob.'"
    24 Thaum Yos Xes tsim los, nws ua raws li Huab Tais tus Tshiab qhia
    rau nws: nws mus coj nws poj niam los nyob hauv nws tsev.
    25 Nws tsis paub nws poj niam li, mus txog hnub nws poj niam
    yug tau ib tug tub. Nws tis tus tub ntawd npe hu ua Yes Xus.


    Last edited by Mim on 24th December 2020, 9:17 am; edited 6 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Mim 24th December 2016, 6:14 am

    TIM      24     LUB     12     HLIS     (IB TAG HMO)

    HMOOV TSUJ XEEB HT YUG LOS
    MIS XAS THAUM IB TAG HMO (MIDNIGHT MASS)

    COV ZAJ NYEEM  UA KOOB TSHEEJ YES XUS YUG LOS L_f5394bb0-5bf9-11e1-bd30-79eb17000003

    Zaj Nyeem Ib:     HIS XAIS   9:1-6


    1 Tsoom neeg uas maub hauv qhov tsaus ntuj lawv pom ib qho pom kev loj.
    Cov uas nyob hauv lub teb chaws tsaus ntuj nti vim kev tuag,
    muaj ib qho pom kev ci ntsa tuaj rau saum lawv.
    2 Koj tau ua kom koj haiv neeg coob tuaj thiab muaj kev zoo siab loj.
    Lawv zoo siab nyob ntawm koj xub ntiag, ib yam li cov sau tau qoob loo lawv zoo siab,
    ib yam li cov neeg sib faib cov toob xib lawv txeeb tau los, lawv dhia lom zem.
    3 Vim tus quab uas tsuam lawv, tus ntas uas nyob saum lawv xwb pwg,
    tus zov cov neeg nyob txim rab qws, koj muab dam pov tseg tas,
    xws li koj ua thaum lub caij cov Mas Dias nyob.
    4 Vim txhua nkawm khau tub rog mus tom tshav rog, txhua lub tsho lo ntshav
    yuav raug muab pov hauv hluav taws cia ua taws rauv.
    5 Vim muaj ib tug me nyuam yug los rau peb lawm, Ntuj pub ib tug tub rau peb lawm.
    Txoj kev tswj kav poob rau saum nws xub pwg. Luag yuav tis nws npe hu ua :
    tus Pab Tswv Yim Zoo Tas Nrho, tus Tswv Ntuj Zog Loj,
    Leej Txiv Nyob Mus Li, tus Vaj Txheeb Pub Kev Thaj Yeeb.
    6 Nws kev tswj kav yuav vam meej mus thiab yuav muaj kev thaj yeeb lug tsis txawj kawg  
    nyob saum Das Vis lub theej kiab thiab nyob hauv nws txoj kev ua vaj ,
    uas nws tsa kom nyob ruaj nreb hauv txoj cai thiab txoj kev ncaj ncees,
    txij no mus txog ib txhiab ib txhis. Tus HUAB TAIS kav tsoom tshiab
    nws lub siab kub yuav ua qhov ntawd.

    NPN:      96: 1-2, 2-3, 11-12, 13

    Txais:   (Lk 2:11) Hnub no tus Cawm peb yug los lawm, nws yog peb tus Huab Tais Pleev.

    Nej hu ib zag nkauj tshiab rau HUAB TAIS,
    tas lub ntiaj teb, nej hu nkauj rau HUAB TAIS;
    Nej hu nkauj rau HUAB TAIS,
    nej foom lus zoo rau nws lub npe!

    Txais:   (Lk 2:11) Hnub no tus Cawm peb yug los lawm, nws yog peb tus Huab Tais Pleev.

    Hnub dhau hnub, nej tshaj nws txoj kev cawm.
    Nej ceeb toom txog nws lub koob meej rau tsoom kuj cuab paub,
    piav nws cov dej num nto moo rau tsoom haiv neeg hnov!

    Txais:   (Lk 2:11) Hnub no tus Cawm peb yug los lawm, nws yog peb tus Huab Tais Pleev.

    Kom lub ntuj zoo siab, lub ntiaj teb dhia lom zem,
    kom cov dej ntuj thiab cov tsiaj uas nyob hauv luag ua suab ntas ntua !
    Kom cov liaj cov teb thiab txhua yam nyob hauv zoo siab,
    kom txhua hom xyoob ntoo tom hav zoov nqua suab lom zem

    Txais:   (Lk 2:11) Hnub no tus Cawm peb yug los lawm, nws yog peb tus Huab Tais Pleev.

    Lawv yuav zoo siab ntawm HUAB TAIS xub ntiag, vim nws tuaj lawm,
    nws tuaj tswj kav lub ntiaj teb,
    nws yuav tswj kav lub sim ceeb raws kev haum pheej,
    nws yuav tswj cov haiv neeg nyob hauv txoj kev ncaj.

    Txais:   (Lk 2:11) Hnub no tus Cawm peb yug los lawm, nws yog peb tus Huab Tais Pleev.

    Zaj  Nyeem Ob:   TIS TOS  2:11-14

    Cov hmov tshua,
    11 Tswv Ntuj lub txiaj ntsim tawm tuaj lawm, nws tuaj muab kev cawm rau txhua leej txhua tus.  
    12 Nws qhia peb sawv daws kom tso tus yam ntxwv tsis hwm Ntuj pov tseg
    thiab tso txoj kev ntshaw tej yam hauv ntiaj teb no pov tseg;
    kom ua ib lub neej coj tus cheem tau yus lub siab, coj ncaj, thiab nyiam Ntuj rau tiam no,
    13 uas peb nyob tos ntsoov yuav tau txais txiaj ntsim raws peb txoj kev tso siab  
    thiab yuav tau pom peb tus tus Tswv Ntuj loj thiab
    tus cawm seej Yes Xus Pleev lub hwj chim tawm los.
    14 Nws yog tus tau muab nws rau luag ntes kom tau txhiv peb ntawm txhua txoj kev phem
    thiab tau ntxuav ib haiv neeg kom huv los ua nws tug,
    uas yuav kub siab ua cov dej num zoo.

    As Les LusYas:    LK 2:10-11

    Txais:  As les lus yas, as les lus yas.

    Kuv tuaj tshaj ib lub moo zoo rau nej uas yuav ua kom neeg zoo siab:
    Hnub no, tus Cawm peb yug los lawm, nws yog peb tus Huab Tais Leej Pleev.

    Txais:  As les lus yas, as les lus yas.

    Ntawv Moo Zoo:    LK 2:1-14

    1 Lub zwj ceeb ntawd, vaj ntxwv Xes Ntxas Aus Nkus Tus tshaj
    lus ceeb toom kom tas ntiaj teb txheeb tsoom mej hwm.
    2 Thaum txheeb tsoom mej hwm thawj zaug no, yog lub caij Kis Lis Nyus ua nom tswj Xis Lias teb.
    3 Txhua leej txhua tus sawv kev mus, nyias mus sau nyias npe hauv nyias lub nroog.
    4 Yos Xes kuj sawv kev hauv lub nroog Nas Xas Les,
    xeev Nkas Lis Lais mus pem Das Vis lub nroog hu ua Npes Les Hes, nyob hauv xeev Yus Das thiab,
    vim nws yog Das Vis tsev neeg thiab Das Vis caj ces.
    5 Yos Xes xav muab Mab Liab lub npe sau nrog nws lub npe,
    vim Mab Liab yog tus nws qhaib thiab Mab Liab cev hnyav lawm.
    6 Thaum nkawd nyob Npes Les Hes, txog lub caij Mab Liab yuav daws cev.
    7 Nws yug nws tus tub, nws muab ntaub qhwv, thiab muab tso pw hauv ib lub dab nyuj,
    vim lub tsev txais qhua tsis muaj chaw rau nkawd so.
    8 Nyob thaj tsam ntawd, muaj ib co neeg zov yaj.
    Lawv nyob nruab liaj nruab teb. Hmo ntuj, lawv nyob zov lawv pab yaj.
    9 Huab Tais tus Tshiab tawm los rau lawv pom, Huab Tais lub hwj chim ci dawb paug ncig lawv, lawv ntshai kawg.
    10 Tus Tshiab hais rau lawv tias : "Nej txhob ntshai, vim kuv tuaj xa
    ib tsab xov zoo uas yuav ua kom nej zoo siab thiab ib tsoom neeg zoo siab.
    11 Hnub no, nyob hauv Das Vis lub nroog, tus Cawm nej yug los lawm, nws yog Leej Pleev, thiab yog Huab Tais.
    12 Lub cim yuav ua kom nej paub yog lub cim no : nej yuav pom ib tug
    me nyuam mos qhwv ntaub pw hauv ib lub dab nyuj."
    13 Ib sij huam, txawm muaj ib pab Tshiab coob coob tuaj nrog tus Tshiab xa xov cav lus zoo txog Tswv Ntuj tias :
    14 "Nyob saum cov txheej ntuj siab, Tswv Ntuj nto meej nto moo, nyob ntiaj teb,
    tsoom neeg Tswv Ntuj nyiam, nyob thaj yeeb.



    Last edited by Mim on 26th December 2018, 7:44 pm; edited 4 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Mim 24th December 2016, 6:20 am

    TIM      25     LUB     12     HLIS  (YUAV KAJ NTUG)

    HMOOV TSUJ XEEB HT YUG LOS
    MIS XAS THAUM YUAV KAJ NTUG (MASS AT DAWN)

    COV ZAJ NYEEM  UA KOOB TSHEEJ YES XUS YUG LOS Birth-of-Jesus-Christ-1024x768

    Zaj Nyeem  Ib:    HIS XAIS  62:  11-12


    11 HUAB TAIS tshaj lus kom nrov mus txog npoo ntiaj teb tias:
    "Nej hais rau tus me ntxhais Xis Yoos li no, tus cawm koj tuaj lawm.
    Ntawm no yog nws cov khoom plig uas nws nqa tuaj,
    cov paj tshab uas nws nqa nrog nraim nws "
    12 Luag yuav hu lawv ua : "Haiv neeg Ntshiab,
    cov neeg uas HUAB TAIS txhiv." Luag yuav hu koj tias :
    "Muaj neeg coob tuaj xyuas,” lub tsheej uas Ntuj tsis tso pov tseg."

    NPN:       97:   1+ 6, 11-12

    Txais:    Ib qho pom kev ci tuaj rau peb hnub no:
               Huab Tais yug los vim peb.

    HUAB TAIS ua vaj, kom lub ntiaj teb hom khaj,
    kom tas cov pov txwv dhia zoo siab.
    Yim txheej cuaj txheej ntuj tau tshaj nws txoj kev ncaj,
    Thiab tas txhua haiv neeg tau pom nws lub hwj chim :

    Txais:    Ib qho pom kev ci tuaj rau peb hnub no: Huab Tais yug los vim peb.

    Qhov pom kev sawv los ci rau tus neeg ncaj ;
    kev kaj siab sawv los ci rau cov siab dawb.
    Cov neeg ncaj, nej zoo siab nyob hauv HUAB TAIS,
    nej ua tsaug rau nws lub npe ntshiab.

    Txais:    Ib qho pom kev ci tuaj rau peb hnub no: Huab Tais yug los vim peb.

    Zaj Nyeem  Ob:     TIS TOS  3:  4-7

    4 Tab sis, hnub uas tus Tswv Ntuj cawm peb
    qhib nws lub siab zoo tawm los thiab nws txoj kev nyiam
    tsoom sid tawm los rau qhov muag pom xyeem,
    5 mas nws tsis tshuaj tias peb puas tau
    ua cov dej num ncaj los tsis tau.
    Nws tsuas mloog nws lub siab khuv leej neeg.
    Nws cawm peb nyob hauv cov dej ntxuav neeg,
    kom peb rov yug los tshiab, thiab rov tshiab
    tuaj nyob hauv Leej Ntuj Plig Ntshiab.
    6 Tswv Ntuj tso Leej Ntuj Plig los nyob puv hauv peb ntau kawg,
    nyob hauv Yes Xus Pleev, tus cawm peb.
    7 Leej Pleev lub txiaj ntsim ua kom peb ntshiab tuaj,
    ces peb tso siab tau tias peb yuav txais txoj sia
    nyob mus li los ua peb lub cuab tam.

    As Les Lus Yas:       LK 2:   14

    Txais:  As les lus yas, as les lus yas.

    Tswv Ntuj nto meej nto moo nyob saum cov txheej ntuj siab,
    nyob ntiaj teb, tsoom neeg Tswv Ntuj nyiam, nyob thaj yeeb.

    Txais:  As les lus yas, as les lus yas.

    Ntawv Moo Zoo:      LK 2:  15-20


    15 Thaum cov Tshiab tso cov zov yaj tseg rov mus
    saum ntuj lawm, cov zov yaj sib yaum tias : "Peb mus
    Npes Les Hes, mus xyuas yam xwm uas
    Huab Tais tuaj qhia peb ntawd saib."
    16 Ces lawv maj zeeg tuaj mus. Lawv pom Mab Liab thiab
    Yos Xes, thiab pom tus me nyuam mos pw hauv dab nyuj.
    17 Thaum lawv pom li ntawd, lawv piav lo lus uas tus Tshiab
    tau qhia rau lawv txog tus me nyuam.
    18 Tus twg hnov, tus twg kuj qhuas txog tej lus
    uas cov zov yaj hais rau lawv.
    19 Hos Mab Liab, nws ua tib zoo khaws
    tej lus no huv si cia rau nruab siab.
    20 Cov zov yaj rov mus tsev, lawv foom koob meej
    thiab cav lus zoo txog Tswv Ntuj vim tas txhua yam
    lawv tau pom thiab tau hnov raws li Ntuj qhia lawv.



    Last edited by Mim on 23rd December 2020, 5:50 pm; edited 4 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Mim 24th December 2016, 6:25 am

    TIM      25     LUB     12     HLIS  

    HMOOV TSUJ XEEB HT YUG LOS

    MIS XAS THAUM SAWV NTXOV NRUAB HNUB (MASS DURING THE DAY)

    Lectionary: 16


    COV ZAJ NYEEM  UA KOOB TSHEEJ YES XUS YUG LOS Religious_2091544a

    Zaj Nyeem Ib: HIS XAIS 52: 7-10

    7 Tus xa lub Moo Zoo tuaj, nws ob txhais taw
    zoo saib ua luaj nyob saum tej hauv roob,
    nws tshaj tias kev thaj yeeb tuaj lawm,
    nws qhia txog ib tsab xov zoo, nws tshaj txog txoj kev
    cawm neeg; nws hais rau Xis Yoos tias :
    "Koj tus Tswv Ntuj yog tus vaj !"
    8 Koj mloog saib! Koj cov neeg zov keeb tsa suab qw nrov nrov,
    lawv ua ke qw zoo siab vim lawv pom xyeem ntawm qhov muag tias
    HUAB TAIS tab tom rov txhim tsa Xis Yoos dua lawm.
    9 Yes Lus Xas Les cov vaj tse uas tau puas tas lawm,
    nej sawv daws hu nkauj ua suab ntas ntua mas,
    vim HUAB TAIS tuaj nplij nws haiv neeg, nws tuaj txhiv Yes Lus Xas Les.
    10 Tus HUAB TAIS loj nws sab npab ntshiab nyob ntawm
    txhua haiv neeg xub ntiag. Cov npoo ntuj npoo ntiaj teb kawg
    yuav pom peb tus Tswv Ntuj txoj kev cawm neeg.

    NPN: 98: 1, 2-3, 3-4, 5-6

    Txais: (3c) Tas cov npoo ntuj npoo ntiaj teb kawg tau pom
    Tswv Ntuj lub hwj huam cawm neeg lawm.

    Nej hu ib zag nkauj tshiab rau HUAB TAIS,
    vim nws tau ua dej num muaj tsim nto moo.
    Nws sab tes xis ua kom nws yeej,
    Yog nws sab npab ntshiab ua .

    Txais: (3c) Tas cov npoo ntuj npoo ntiaj teb kawg tau pom
    Tswv Ntuj lub hwj huam cawm neeg lawm.

    HUAB TAIS ua kom sawv daws paub txog nws txoj kev cawm;
    nws muab nws txoj kev ncaj rau cov haiv neeg pom.
    Nws rov nco txog nws txoj kev ua zoo thiab kev pheej xeeb
    uas nws muab rau His Xas Lais lub cuab lub yig.

    Txais: (3c) Tas cov npoo ntuj npoo ntiaj teb kawg tau pom
    Tswv Ntuj lub hwj huam cawm neeg lawm.

    Tas cov npoo ntuj npoo ntiaj teb kawg tau pom
    peb tus Tswv Ntuj txoj kev cawm neeg lawm.
    Tas ntiaj teb tej av, nej zoo siab cav txog HUAB TAIS,
    nej qhib suab hu nkauj; nej hu nkauj qhuas nws.

    Txais: (3c) Tas cov npoo ntuj npoo ntiaj teb kawg tau pom
    Tswv Ntuj lub hwj huam cawm neeg lawm.

    Nej ntaus nkauj nog ncas cav txog HUAB TAIS,
    Nej ntaus nkauj nog ncas ntxuag suab seev zoo mloog.
    Nej tshuab xyu tshuab hom ntxuag suab kub nyuj,
    nej hu nkauj zoo siab nyob ntawm tus Vaj, peb tus HUAB TAIS xub ntiag.

    Txais: (3c) Tas cov npoo ntuj npoo ntiaj teb kawg tau pom
    Tswv Ntuj lub hwj huam cawm neeg lawm.

    Zaj Nyeem Ob: HES NPLAWS 1: 1-6

    Cov kwv tij nkauj muad:
    1 Yav thaum ub, Tswv Ntuj kom cov Yaj Saub siv ntau zaus
    thiab ntau txoj kev los cev nws cov lus rau peb cov yawg koob.
    2 Lub zim txwv kawg niaj hnub no, nws hais nws cov lus
    rau peb nyob hauv nws Leej Tub, tus uas nws tau tsa los txais
    lub cuab tam tas huv tib si, thiab tus tau nrog nws tsim tas lub sim ceeb.
    3 Leej Tub yog Tswv Ntuj lub hwj chim ci ntsa iab, yog Tswv Ntuj tus duab;
    nws siv nws lo lus muaj hwj huam los nres tas lub sim ceeb huv tib si.
    Thaum nws ntxuav txoj kev txhaum pov tseg tas lawm,
    nws los zaum ntawm tus Muaj Hwj Huam nyob txheej ntuj saud sab xis.
    4 Nws loj dua ib tsoom Tshiab, nws thiaj tau txais ib lub npe
    muaj hwj chim loj dua tas cov Tshiab tej npe huv tib si.
    5 Vim tias, puas muaj ib tug Tshiab twg uas Tswv Ntuj tau hais rau nws tias:
    “Koj yog kuv Leej Tub, hnub no kuv xeeb koj los.”?
    Los tseem hais tias:“Kuv yog nws Txiv, nws yog kuv Leej Tub.”?
    6 Tseem muaj ib lo lus ntxiv: thaum Tswv Ntuj coj tus uas Xub Yug
    los tuaj nyob hauv lub sim ceeb no, nws hais tias:
    “Kom tas Tswv Ntuj ib tsoom Tshiab pe hawm nws.”

    As Les Lus Yas

    Txais: As les lus yas, as les lus yas.

    Ib hnub ntshiab tawm tuaj ci rau peb lawm.
    Txhua haiv neeg, nej cia li tuaj pe hawm Huab Tais,
    Vim hnub no muaj ib qho pom kev loj ci tuaj rau ntiaj teb lawm.

    Txais: As les lus yas, as les lus yas.

    Ntawv Moo Zoo: ZAM 1: 1-18

    1 Thaum lub hauv paus, Leej Lo Lus yeej nyob lawm.
    Leej Lo Lus nyob ze Tswv Ntu, thiab Leej Lo Lus yog Tswv Ntuj.
    2 Thaum lub hauv paus, Leej Lo Lus yeej nyob ze Tswv Ntuj.
    3 Tas ib puas tsav yam tshwm sim los yog vim nws. Yog tsis muaj nws,
    mas tsis muaj ib yam dab tsi tshwm tau los nyob.
    4 Leej Lo Lus yog txoj sia; txoj sia ntawd yog tib neeg qhov pom kev.
    5 Ces qhov pom kev ci hauv qhov tsaus ntuj,
    qhov tsaus ntuj thaiv tsis tau qhov pom kev.
    6 Muaj ib tug neeg tuaj, yog Tswv Ntuj xa
    nws tuaj. Nws lub npe hu ua Zam.
    7 Nws yog ib tug tim khawv tuaj ua pov thawj txog qhov pom kev,
    kom txhua leej txhua tus ntseeg vim nws.
    8 Tus ntawd tsis yog qhov pom kev, tab sis nws tuaj
    ua tim khawv txog qhov pom kev.
    9 Qhov pom kev uas yog qhov tseeb, qhov ci tuaj kaj txhua leej tib neeg,
    nws tuaj nyob hauv lub sim ceeb.
    10 Nws yeej nyob txawm hauv lub sim ceeb no;
    nws yog tus ua kom lub sim ceeb no tshwm tawm los,
    tsis kav lub sim ceeb tsis paub nws li.
    11 Nws los nyob hauv nws tsev neeg,
    tsis kav nws cov neeg tsis txais nws li.
    12 Tab sis, cov neeg uas tos txais nws,
    mas nws pub hwj huam rau lawv kom los ua Tswv Ntuj me nyuam,
    lawv yog cov uas ntseeg txog nws lub npe.
    13 Cov ntawd, yog cov uas tsis yug raws tib neeg txoj kev xeeb los,
    tsis yog tib neeg xaiv cia lawv yug los,
    thiab kuj tsis yog neeg lub siab xav kom lawv yug los;
    tiam sis lawv yog cov yug ntawm Tswv Ntuj los.
    14 Ces Leej Lo Lus xeeb los ua ib lub cev neeg,
    nws nrog peb nyob, peb tau ntsia ntsoov nws lub hwj chim.
    Yog lub hwj chim uas Leej Tub twm zeej tau ntawm Leej Txiv los,
    muaj txiaj ntsim thiab qhov tseeb nyob puv hauv nws.
    15 Zam ua tim khawv txog nws, Zam tshaj nrov nrov tias:
    "Tus no yog tus kuv tau hais txog tias: ‘Tus uas lawv kuv qab tuaj,
    nws yeej ua kuv ntej lawm, vim nws xub nyob dua kuv.’"
    16 Peb sawv daws puav leej tau txais qhov txhawv nphau nphwv
    hauv nws los: peb tau txais txiaj ntsim tas los tau txais thiab.
    17 Vim tias txoj Cai yog siv Mais Xes muab rau peb,
    hos lub txiaj ntsim thiab txoj kev tseeb yog Yes Xus Pleev coj tuaj.
    18 Tsis muaj leej twg tau pom dua Tswv Ntuj ib zaug li.
    Yog Leej Tub Twm Zeej uas yog Tswv Ntuj,
    nws nyob nraim hauv Leej Txiv lub xub ntiag,
    nws ua kom peb pom Tswv Ntuj.

    Los:    ZAM 1:1-5, 9-14

    1 Thaum lub hauv paus, Leej Lo Lus yeej nyob lawm.
    Leej Lo Lus nyob ze Tswv Ntu, thiab Leej Lo Lus yog Tswv Ntuj.
    2 Thaum lub hauv paus, Leej Lo Lus yeej nyob ze Tswv Ntuj.
    3 Tas ib puas tsav yam tshwm sim los yog vim nws. Yog tsis muaj nws,
    mas tsis muaj ib yam dab tsi tshwm tau los nyob.
    4 Leej Lo Lus yog txoj sia; txoj sia ntawd yog tib neeg qhov pom kev.
    5 Ces qhov pom kev ci hauv qhov tsaus ntuj,
    qhov tsaus ntuj thaiv tsis tau qhov pom kev..
    9 Qhov pom kev uas yog qhov tseeb, qhov ci tuaj kaj txhua leej tib neeg,
    nws tuaj nyob hauv lub sim ceeb.
    10 Nws yeej nyob txawm hauv lub sim ceeb no;
    nws yog tus ua kom lub sim ceeb no tshwm tawm los,
    tsis kav lub sim ceeb tsis paub nws li.
    11 Nws los nyob hauv nws tsev neeg,
    tsis kav nws cov neeg tsis txais nws li.
    12 Tab sis, cov neeg uas tos txais nws,
    mas nws pub hwj huam rau lawv kom los ua Tswv Ntuj me nyuam,
    lawv yog cov uas ntseeg txog nws lub npe.
    13 Cov ntawd, yog cov uas tsis yug raws tib neeg txoj kev xeeb los,
    tsis yog tib neeg xaiv cia lawv yug los,
    thiab kuj tsis yog neeg lub siab xav kom lawv yug los;
    tiam sis lawv yog cov yug ntawm Tswv Ntuj los.
    14 Ces Leej Lo Lus xeeb los ua ib lub cev neeg,
    nws nrog peb nyob, peb tau ntsia ntsoov nws lub hwj chim.
    Yog lub hwj chim uas Leej Tub twm zeej tau ntawm Leej Txiv los,
    muaj txiaj ntsim thiab qhov tseeb nyob puv hauv nws.



    Last edited by Mim on 24th December 2020, 9:23 am; edited 5 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Mim 25th December 2016, 4:44 pm

    TIM      26      LUB      12      HLIS      2016

    Hnub Ob – Hnub tom qab Yes Xus Yug Los Nruab Lis Piam Xyoo I

    Hwm Leej Ntshiab Tes Fas Nos (Stephen), Thawj tus Tuag Ua tim Khawv

    Zaj Nyeem Ib HAUJ LWM 6:8-10; 7:54-59

    8 Tes Fas Nos yog ib tug neeg muaj txiaj ntsim thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos uas hu ua cov Qhev Dim Txim lub ; lawv yog ib co neeg nyob Xis Les Nas tuaj, nyob As Les Xas Nrias tuaj, thiab ib co nyob Xis Lis Xias, thiab nyob As Xias tuaj. 10 Lawv nrog Tes Fas Nos sib cav. Tab sis lawv cav tsis yeej Tes Fas Nos, vim nws yog neeg thoob tsib, thiab yog Leej Ntuj Plig qhia nws hais. 54 Thaum lawv hnov cov lus no, mas lawv npau taws ceev kawg. Lawv zim hniav zog rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg. Sawv daws ua ib tsaug khiav mus nthos nkaus Tes Fas Nos. 58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov tim khawv tso lawv tej khaub ncaws rau ntawm ib tug tub hluas ko taw. Tus hluas ntawd hu ua Xauv. 59 Thaum lawv tab tom txawb pob zeb tua Tes Fas Nos mas Tes Fas Nos hu txog Ntuj. Nws hais tias : "Huab Tais Yes Xus, thov koj txais kuv tus plig."

    NPN 31:3CD-4, 6 + 8AB, 16BC + 17

    Txais: (6) Huab Tais, kuv tso kuv tus ntsuj plig
    rau hauv koj txhais tes.

    Thov koj ua kuv lub tsua rau kuv tau chaw nkaum,
    ua ib lub loog khov ruaj thaiv kuv.
    Koj yog kuv lub tsua thiab kuv lub ntsa loog zeb;
    vim koj saib koj lub npe, koj yuav coj kuv thiab qhia kev rau kuv.

    Txais…

    Kuv muab kuv tus ntsuj plig tso rau hauv koj txhais tes;
    HUAB TAIS, tus Tswv Ntuj muaj kev pheej xeeb, koj yuav txhiv kuv;
    Kuv yuav zoo siab thiab luag ntxhi vim koj txoj kev khuv leej.

    Txais…

    Thov koj cawm kuv dim ntawm kuv cov yeeb ncuab thiab cov tsim txom kuv.
    Thov cia koj lub ntsej muag ci hob tuaj rau koj tus tub txib;
    thov cawm kuv vim koj muaj lub siab zoo.

    Txais…

    As Les Lus Yas NPN 118:26A, 27A

    Txais: As les lus yas, As les lus yas

    Tus uas tuaj ntawm Huab Tais lub npe tuaj nto koob meej;
    HUAB TAIS yog Tswv Ntuj, nws muab txoj kev pom kev rau peb.

    Txais: As les lus yas, As les lus yas

    Ntawv Moo Zoo MT 10:17-22

    17 Nej ceev faj txog neeg : lawv yuav mus kom nej rau cov rooj txwj laus txiav txim, lawv yuav nplawm nej hauv cov tsev txoos. 18 Luag yuav coj nej mus rau cov nom thiab cov vaj vim kuv, kom nej ua tim khawv txog kuv nyob ntawm cov nom tswv thiab cov teev pej kum dab xub ntiag. 19 Thaum luag ntes nej, mas nej tsis txhob txhawj tias yuav hais li cas thiab yuav teb dab tsi. Lub sij hawm ntawd, Ntuj yuav muab cov lus teb rau nej. 20 Li ntawd, yuav tsis yog nej hais lus, yog nej Txiv tus Ntsuj Plig yuav hais tawm hauv nej los. 21 "Tus tij yuav muab tus kwv muag rau luag tua, leej txiv yuav mus kom nws tus me nyuam rau luag. Tej me nyuam yuav sawv tiv niam thiab txiv, thiab yuav muab nkawd tua. 22 Sawv daws yuav ntxub nej vim kuv lub npe. Tab sis, tus twg ua siab ntev nyiaj txog qhov kawg, mas nws yuav txais kev cawm.


    Last edited by Mim on 27th December 2016, 5:58 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Mim 27th December 2016, 5:55 am

    TIM     27     LUB     12     HLIS      2016

    Hnub Peb - hauv Thawj Yim Hnub Caij Yes Xus Yug Los, Nruab Lis Piam Xyoo I

    Hwm LN Zam, Hauv Paus Xa Lus thiab Kws Sau Ntawv Moo Zoo (John, Apostle and evangelist)

    Zaj Nyeem Ib:    1 ZAM  1:   1-4


    1 Tej yam uas tau tshwm sim thaum lub hauv paus los, tej yam uas peb tau hnov, tej yam peb tau pom xyeem ntawm qhov muag, tej yam peb tau ntsia ntsoov, tej yam peb txhais tes tau kov, uas yog hais txog Leej Lo Lus pub txoj sia; 2 vim Txoj Sia tau tawm los lawm. Peb tau pom Txoj Sia lawm, peb ua tim khawv hais txog Txoj Sia no, thiab peb tuaj qhia kom nej paub txog Txoj Sia nyob mus li no; nws nyob ze Leej Txiv thiab nws kuj ho tawm los rau peb pom thiab. 3 Yam uas peb tau pom thiab tau hnov, mas peb tshaj rau nej paub, kom nej nrog peb koom ua ib lub siab. Peb txoj kev sib koom siab ntawd kuj yog nrog Leej Txiv thiab nws Leej Tub Yes Xus Pleev koom siab thiab. 4 Peb sau tas puas tsav yam no rau nej paub, kom nej muaj txoj kev zoo siab puv meem mias nyob hauv nej.

    NPN  97:   1-2, 5-6, 11-12

    Txais:  (12) Tus neeg ncaj,  koj yuav zoo siab nyob hauv Huab Tais!

    HUAB TAIS yog vaj ntxwv, kom lub ntiaj teb zoo siab;
    kom ntau lub pov txwv luag ntxhi.
    Cov huab thiab qhov tsaus nyob ncig nws,
    kev ncaj ncess thiab kev txiav txim yog lub taw
    Ncej txheem nws lub theej kiab.

    Txais…

    Cov roob yaj tas xws li ciab ntab yaj nyob ntawm Huab Tais xub ntiag,
    ntawm tus HUAB TAIS  kav tas lub ntiaj teb xub ntiag.
    Lub ntuj tshaj txog nws txoj kev ncaj ncees,
    tas txhua haiv neeg pom nws lub hwj chim.

    Txais…

    Qhov pom kev ci tawm tuaj kaj tus neeg ncaj,
    kev zoo siab ci tuaj rau tus neeg siab zoo.
    Cov neeg ncaj nej zoo siab nyob hauv HUAB TAIS,
    nej ua tsaug rau nws lub npe ntshiab.

    Txais…

    As Les Lus Yas

    Txais:  As les lus yas, As les lus yas

    Tswv Ntuj peb cav txog koj,
    peb qw xaiv koj ua peb tus Huab Tais;
    npoj Hauv Paus Xa Lus muaj hwj chim cav txog koj.

    Txais:  As les lus yas, As les lus yas

    Ntawv Moo Zoo:     ZAM  20:   1A + 2-8

    1 Thawj hnub pib lub lis piam, thaum sawv ntxov,  2 Mab Liab Mas Ntas Las khiav mus cuag Xis Moos Pob Zeb thiab lwm tus thwj tim uas yog tus Yes Xus nyiam. Nws hais rau nkawd tias : "Lawv nqa Huab Tais tawm hauv ntxa lawm, peb tsis paub xyov lawv coj nws mus tso qhov twg lawm." 3 Pob Zeb tawm plaws mus, lwm tus thwj tim kuj tawm plaws thiab, nkawd mus tom ntxa. 4 Nkawd ob leeg ua ke khiav mus, tab sis lwm tus thwj tim khiav nrawm dua Pob Zeb, nws khiav ua ntej, nws xub mus txog tom ntxa. 5 Nws khoov mus xauj, nws pom cov ntaub qhwv nyob ntawd, tab sis nws tsis chaws mus hauv. 6 Ces Xis Moos Pob Zeb lawv nws qab tuaj txog, Pob Zeb chaws mus hauv lub ntxa. Nws pom cov ntaub qhwv nyob ntawd, 7 hos daim ntaub qhwv taub hau kauv cia nyob lwm qhov, tsis xyaw cov ntaub qhwv. 8 Ces lwm tus thwj tim uas xub mus txog ntawm lub ntxa mam li chaws mus hauv. Nws pom ces nws ntseeg.


    Sponsored content


    COV ZAJ NYEEM  UA KOOB TSHEEJ YES XUS YUG LOS Empty Re: COV ZAJ NYEEM UA KOOB TSHEEJ YES XUS YUG LOS

    Post  Sponsored content


      Current date/time is 28th March 2024, 4:06 am