HMONG CATHOLIQUE

Would you like to react to this message? Create an account in a few clicks or log in to continue.

Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

Tsev teev Ntuj XH.XYOOJ THOJ PAUL, zos Tiaj Ntxhw

Gallery


COV ZAJ NYEEM NRUAB LIS PIAM XYOO II,  2015-2016 - Page 5 Empty

Latest topics

» Tswv Ntuj txoj kev Khuv Leej Neeg.( Neuvaine à la Divine Miséricorde)
by Maiv Tooj Yesterday at 11:22 pm

» Ua tsaug ntees.
by Maiv Tooj 21st February 2024, 11:33 pm

» DUAB MAB LIAB TSHIAB.
by Maiv Tooj 16th February 2024, 8:39 am

» COV ZAJ NYEEM NRUAB LIS PIAM XYOO I 2022-2023
by Mim 10th August 2023, 7:04 am

» Cov zaj nyeem Hnub Chiv Xyoo A. 2022-2023
by Maiv Tooj 20th July 2023, 11:21 pm

» SAJ YES XUS KEV TXOM NYEM
by Maiv Tooj 7th March 2023, 6:34 am

» Tswv Ntuj ua tau tag puas tsav yam, F. Ts. Cob Tsib teb
by Mim 3rd February 2023, 11:33 am

» DAIM NTAUB QHWV TUAG NYOB TURIN
by Mim 29th January 2023, 9:24 am

» Txiv plig Tshaj Sawm (Harry Thiel ) Lub neej
by Maiv Tooj 28th December 2022, 8:25 am

» TXIV PLIG NYIAJ POV keeb kwm niam ntawv thoob teb ( Nias Ntawm no saib txuas ntxiv )
by Maiv Tooj 28th December 2022, 7:55 am

» COV ZAJ NYEEM NRUAB LIS PIAM XYOO II 2021-2022
by Mim 24th November 2022, 9:06 pm

» COV ZAJ NYEEM Hnub Chiv 2021-2022 Xyoo C
by NrhiavTswvNtuj 18th November 2022, 8:28 am

Suav neeg tuaj saib, txij hnub 17/09/2010 los mus.


2 posters

    COV ZAJ NYEEM NRUAB LIS PIAM XYOO II, 2015-2016

    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 21st March 2016, 9:58 am

    TIM 22 LUB 3 HLIS 2016

    Hnub Peb hauv Lis Piam Ntshiab Xyoo C

    Zaj Nyeem Ib: HIS XAIS 49: 1-6


    1 Cov pov txwv, nej cuab pob ntseg rau kuv, cov haiv neeg nyob deb, nej mloog. HUAB TAIS yeej hu kuv txij thaum kuv tseem tsis tau yug los; thaum kuv tseem nyob hauv kuv niam plab, nws yeej tuav kuv npe lawm. 2 Nws muab kuv lub ncauj los ua ib rab ntaj ntse zuag plias, nws muab kuv zais rau hauv nws txhais tes qhov ntxoov ntxoo. Nws muab kuv ua ib xib xub vos ntse ntse, zais hauv nws lub raj xub. 3 HUAB TAIS hais rau kuv tias : "Koj yog kuv tus tub txib, His Xas Lais, kuv yuav ua kuv lub hwj chim tawm los nyob hauv koj." 4 Kuv xav tau tias : "Kuv tau khwv ciaj khwv tuag, tab sis tsis tau dab tsi, kuv nkim kuv lub zog dag rau tej yam yaj ntshis xwb,” tiam sis kuv qhov paj tshab yog nyob ntawm HUAB TAIS, kuv tus nqi zog yog nyob ntawm kuv tus Tswv Ntuj. 5 Nyem no, HUAB TAIS, tus tau puab kuv nyob hauv kuv niam plab kom kuv ua nws tus tub txib, kom tau coj Yas Kos rov los cuag nws, kom sau His Xas Lais rov qab los nrog nws ua ke, nws yog tus tau hais tawm; kuv yuav tau ntsej muag nyob ntawm HUAB TAIS qhov muag; kuv tus Tswv Ntuj yog kuv lub zog. 6 Nws tau hais tias : "Tsis zoo txaus cia koj ua kuv tus tub txib xwb, ua tus rov tsa cov xeem Yas Kos kom sawv thiab coj cov His Xas Lais seem kom rov qab los xwb; kuv tseem yuav muab koj ua lub teeb ci kaj cov kuj cuab kom kuv txoj kev cawm txeem mus txog npoo ntiaj teb thiab.

    NPN 71: 1-2, 3-4A, 5AB-6AB, 15 + 17

    Txais: (15ab) Kuv yuav hu nkauj cav txog koj txoj kev cawm neeg.

    Huab Tais, kuv tuaj nkaum nyob hauv koj,
    thov tsis txhob cia kuv raug kev txaj muag ib zaug li.
    Thov tuaj pab kuv vim koj muaj txoj kev ncaj, thov tso kuv dim;
    cuab koj lub pob ntseg khoov los mloog kuv, thov cawm kuv.

    Txais: (15ab) Kuv yuav hu nkauj cav txog koj txoj kev cawm neeg.

    Thov koj yog lub tsua rau kuv ua chaw nkaum,
    yog lub yeej thaiv kuv ntawm xwv txheej,
    vim koj yeej yog kuv lub tsua thiab lub yeej ntsa zeb.
    Kuv tus Tswv Ntuj, thov npo kuv ntawm cov neeg phem txhais tes.

    Txais: (15ab) Kuv yuav hu nkauj cav txog koj txoj kev cawm neeg.

    Huab Tais, koj yog kuv txoj kev cia siab,
    Tswv Ntuj koj yog tus kuv ntseeg siab txij thaum hluas los.
    Kuv tso siab rau koj txij thaum kuv yug los,
    txij thaum kuv nyob hauv kuv niam plab los, koj yeej yog kuv lub zog.

    Txais: (15ab) Kuv yuav hu nkauj cav txog koj txoj kev cawm neeg.

    Kuv lub ncauj yuav tshaj koj txoj kev ncaj,
    thiab koj txoj kev cawm neeg hnub dhau hnub.
    Tswv Ntuj, koj tau qhuab qhia kuv txij thaum yau los,
    txog hnub no, kuv tshaj tawm koj cov hauj lwm txaus qhuas.

    Txais: (15ab) Kuv yuav hu nkauj cav txog koj txoj kev cawm neeg.

    Zaj Tshaj lub Moo Zoo:

    Peb hawm koj, peb tus Vaj, vim koj tau mloog leej Txiv lus;
    luag cab koj mus ntsia saum ntoo cuam xws li tus yaj seej seej luag cab mus tua.

    Ntawv Moo Zoo: ZAM 13: 21-33, 36-38


    21 Yes Xus hais li ntawd tas, ces nws lub tswv yim ntxhov hnyo, nws thiaj hais meej tias : "Kuv hais qhov muaj tseeb tiag rau nej tias nej ib tug yuav muab kuv muag." 22 Cov thwj tim sib ntsia zom zaws, lawv tsis paub tias Yes Xus hais txog leej twg. 23 Muaj ib tug thwj tim, yog tus uas Yes Xus nyiam, zaum qaij rau Yes Xus hauv siab. 24 Xis Moos Pob Zeb ncaws hau rau nws, thiab hais rau nws tias : "Koj nug saib nws hais txog leej twg ?" 25 Tus thwj tim ntawd tig los pheeb rau Yes Xus hauv siab, nws nug Yes Xus tias : "Huab Tais, yog leej twg ?" 26 Yes Xus teb tias : "Yog tus uas kuv yuav muab qhov ncuav mov no ntsw kua cev rau nws." Ces Yes Xus muab qhov ncuav mov ntsw kua, nws muab cev rau Yus Das, Xis Moos Kas Lis Yaus tus tub. 27 Thaum Yus Das txais qhov mov ntawd tas, ces Xas Tas nkag mus hauv Yus Das. Yes Xus hais rau Yus Das tias : "Qhov koj yuav ua, mas koj ua kom sai." 28 Cov zaum ntawm rooj mov, tsis muaj ib tug to taub tias yog vim li cas Yes Xus hais li ntawd rau Yus Das. 29 Vim tias Yus Das saib lub hnab nyiaj, ces ib txhia xav tias Yes Xus hais rau Yus Das tias : "Mus muas tej yam uas peb yuav siv rau rooj qav." los yog hais tias : "Pub tej yam rau cov pluag." 30 Yus Das txais lo mov, nws tawm mus tam sis ntawd. Thaum ntawd tsaus ntuj lawm. 31 Thaum Yus Das tawm mus lawm, Yes Xus hais tias : "Nyem no Neeg Leej Tub twb txais koob meej lawm, thiab Tswv Ntuj kuj muaj koob meej nyob hauv nws. 32 Yog Tswv Ntuj muaj koob meej nyob hauv Neeg Leej Tub, mas Tswv Ntuj kuj yuav ua kom Neeg Leej Tub muaj koob meej nyob hauv nws thiab. Tshuav tsis ntev, Tswv Ntuj yuav muab koob meej rau Neeg Leeg Tub. 33 Cov me nyuam me, kuv yuav nrog nej nyob me ntsis ntxiv xwb. Nej yuav nrhiav kuv. Nyem no, kuv hais rau nej ib yam li kuv tau hais rau cov Yus Das tias qhov chaw kuv mus, mas nej tuaj tsis tau.
    36 Xis Moos Pob Zeb hais rau Yes Xus tias : "Huab Tais, koj yuav mus qhov twg?" Yes Xus teb tias : "Qhov chaw kuv mus, nyem no koj lawv kuv qab tsis tau. Tab sis yav tom ntej, mas koj yuav lawv kuv qab." 37 Pob Zeb hais rau Yes Xus tias : "Huab Tais, vim li cas nyem no kuv thiaj lawv koj qab mus tsis tau ? Kuv tuaj yeem siv kuv txoj sia rau koj." 38 Yes Xus teb tias : "Koj yuav siv koj txoj sia rau kuv lod ! Kuv hais qhov tseeb tiag rau koj : Qaib tsis tau qua, koj twb tsis lees kuv peb zaug."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 22nd March 2016, 4:48 am

    TIM 23 LUB 3 HLIS 2016

    Hnub Plaub hauv Lis Piam Ntshiab Xyoo C

    Zaj Nyeem Ib: HIS XAIS 50: 4-9A


    4 HUAB TAIS Tswv Ntuj tau muab ib tug nplaig ua thwj tim rau kuv, kom kuv txawj hais ib lo lus nplij tus neeg qaug zog. Niaj tag kis nws tsa kuv lub pob ntseg kom tsim dheev, kom kuv txawj mloog xws li ib tug thwj tim. 5 HUAB TAIS Tswv Ntuj qhib kuv pob ntseg, mas kuv tsis yig, kuv tsis tig pob ntseg mus rau lwm qhov. 6 Kuv cuab nrob qaum rau cov neeg xav ntaus kuv, kuv tig kuv sab plhu rau cov neeg xav dob kuv hwj txwv; kuv tsis tau thaiv ntsej muag kom txhob raug lawv thuam thiab txhob raug lawv nto. 7 HUAB TAIS Tswv Ntuj tuaj pab kuv, ces lawv tej lus phem tsis raug kuv, thiab kuv ua ntsej muag tawv li zeb vim kuv paub tias kuv yuav tsis raug kev txaj muag. 8 Tus pom tias kuv siab ncaj, nws nyob ze kuv, leej twg yuav muaj cuab kav mus fooj kuv ? Caw kom peb cia li ua ke tuaj mus ntawm lub rooj txiav txim! Leej twg yog tus tau mus kom kuv rau cov nom txiav txim ? Kom nws kav tsij txav los nrog kuv tham ! 9 Ntsia saib ! HUAB TAIS Tswv Ntuj yog tus tuaj pab kuv ! Leej twg yuav muab txim rau kuv tau ?

    NPN 69: 8-10, 21-22, 31 + 33-34

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Yog vim koj, kuv ua tiag nyiaj luag cov lus cem kuv,
    kuv ua tiag ris kev txaj muag.
    Kuv cov kwv tij tsis saib kuv yog lawv kwv tij ntxiv,
    kuv niam cov tub saib kuv yog ib tug qhua xwb,
    vim kuv muaj lub siab kub lug rau koj lub tsev,
    ces cov neeg thuam koj tej lus phem poob rau saum kuv.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Lawv tej lus phem chob kuv lub siab, ua rau kuv zog tas,
    kuv vam tias yuav muaj tus hlub kuv, tiam sis tsis muaj li;
    kuv vam tias yuav muaj tus nplij kuv, kuv nrhiav tsis tau ib tug li. .
    Lawv tseem muab tshuaj lom xyaw rau kuv cov mov,
    thaum kuv nqhis dej lawv muab kua qaub rau kuv haus.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Kuv yuav hu nkauj cav txog Tswv Ntuj lub npe,
    kuv yuav ua nws tsaug kom nws tau koob meej loj:
    Cov neeg me, lawv tau pom, ces lawv zoo siab.
    Nej cov uas nrhiav Tswv Ntuj, thov kom nej lub siab rov muaj sia tuaj!
    Vim Huab Tais mloog cov pluag hu,
    nws tsis ntxub nws cov neeg raug kaw.

    Txais: (14c) Huab Tais, koj muaj lub siab hlub loj tas nrho, thov koj teb kuv.

    Zaj Tshaj lub Moo Zoo:


    Peb hawm koj, peb tus Vaj,
    koj ib leeg thiaj muaj lub siab zoo zam peb cov txhaum rau peb.
    Los:

    Peb hawm koj, peb tus Vaj, uas mloog leej Txiv lus;
    luag cab koj mus ntsia saum ntoo cuam xws li tus yaj seej seej luag cab mus tua.

    Ntawv Moo Zoo: MT 26: 14-25


    14 Muaj ib tug nyob hauv pab kaum ob, hu ua Yus Das Kas Lis Yaus. Nws mus cuag cov thawj leej choj, 15 nws hais rau lawv tias : “Nej muab dab tsi rau kuv, kuv yuav muab nws muag rau nej ?” Ces lawv them peb caug lub txiaj nyiag rau Yus Das. 16 Txij hnub ntawd los, Yus Das nrhiav ib lub sij hawm zoo cob Yes Xus rau hauv lawv txhais tes. 17 Thaum txog thawj hnub noj cov ncuav mov tsis muaj poov xab, cov thwj tim txav los nug Yes Xus tias : “Koj xav kom peb npaj Pluas Hla rau koj noj nyob qhov twg ?” 18 Yes Xus hais tias : “Nej mus tom nroog, hauv ib tug neeg tsev, nej hais rau nws tias : ‘Xib Hwb hais tias : Kuv lub caij nyoog los txog ze lawm. Kuv yuav nrog kuv cov thwj tim noj Pluas Hla nyob hauv koj tsev.” 19 Cov thwj tim ua raws li Yes Xus qhia. Ces lawv npaj Pluas Hla. 20 Thaum tsaus ntuj Yes Xus nrog pab Kaum Ob nyob ntawm rooj mov. 21 Thaum lawv noj mov, Yes Xus hais tias : “Kuv hais tseeb rau nej, nej ib tug yuav muab kuv muag. 22 Lawv ntxhov siab tas nrho, lawv nyias nug nyias tias : “Huab Tais, puas yog kuv ?” 23 Yes Xus teb tias : “Tus yuav muab kuv muag, yog tus tau nrog kuv cev tes ntsw hauv lub phaj ! 24 Neeg Leej Tub mus raws li Ntawv xub sau txog nws. Tab sis tus muab Neeg Leej Tub muag, nws raug txoj hmoov phem ! Txhiaj khoov tus ntawd tsis txhob yug los !” 25 Yus Das, tus muab Yes Xus muag, kuj teb tias : “Xib Hwb, puas yog kuv ?” Yes Xus hais rau Yus Das tias : “Yog li koj hais.”


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 22nd March 2016, 6:26 am

    TIM   24   LUB   3   HLIS    2016

    HNUB TSIB NTSHIAB  XYOO C

    THAJ TXI NTUJ TSIM COV ROJ NTSHIAB


    COV ZAJ NYEEM NRUAB LIS PIAM XYOO II,  2015-2016 - Page 5 Chrism133-1


    Zaj Nyeem Ib:  HIS XAIS  61:  1-3A, 6A, 8B-9

    1 HUAB TAIS Tswv Ntuj lub tswv yim nyob saum kuv, vim HUAB TAIS tau pleev kuv. Nws tau tso kuv tuaj xa lub Moo Zoo rau cov neeg txom nyem, kho cov neeg tu siab tu plawv kom lawv zoo siab, tshaj kev twj lij rau cov neeg raug kaw, tso cov nyob tsev loj faj kom dim los,  2 tshaj ib lub xyoo rau HUAB TAIS pub txiaj ntsim koob hmoov, tshaj ib hnub rau Tswv Ntuj yuav ua pauj, nplij cov neeg ntoo xyom quaj ntsuag,  3 muab ib lub mom paj ntoos rau cov neeg quaj ntsuag nyob Xis Yoos ntoo hloov lawv cov tshauv, muab ib co roj zoo siab los pleev lawv hloov kev tu siab, muab ib lub zam muaj hwj chim rau lawv hloov lawv txoj kev tas kev cia siab.
    6 Ntawm nej, mas lawv yuav hu nej ua "HUAB TAIS cov Leej Choj." Lawv yuav tis npe rau nej ua : "HUAB TAIS cov tim xyoob."
    8 Kuv,  HUAB TAIS, yuav muab nqi zog rau lawv kom haum pheej. Kuv yuav nrog lawv cog ib lo lus nyob mus li tas ib txhis. 9 Lawv haiv neeg yuav nto moo nyob hauv cov kuj cuab, lawv cov xeeb ntxwv yuav nto meej nyob hauv cov haiv neeg. Txhua leej uas pom lawv yuav zeem tias lawv yog ib tsav neeg uas HUAB TAIS foom hmoov zoo rau.

    NPN     89:  21-22, 25 + 27

    Txais:  (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Kuv nrhiav tau kuv tus tub txib Das Vis,
    kuv tau muab kuv cov roj ntshiab los pleev nws.
    Kuv txhais tes yuav nyob ze nws mus li,
    Thiab kuv txhais npab yuav ua kom nws muaj zog.

    Txais:  (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Kuv txoj kev pheej xeeb thiab kev hlub nyob ze nws,
    kuv lub npe yuav tsa nws hauv pliaj kom siab.
    Nws yuav hu kuv tias : "Kuv txiv,
    Kuv tus Tswv Ntuj, kuv lub Tsua,  kuv tus Cawm Seej!"

    Txais:  (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Txais:  (2) Kuv yuav hu nkauj mus li cav txog HUAB TAIS lub siab zoo.
    Los: As les lus yas.

    Zaj Nyeem Ob:   RV 1:  5-8

    5 Thov kom nej tau txais txiaj ntsim thiab kev thaj yeeb tuaj ntawm Yes Xus Pleev tuaj, uas yog tus Tim Khawv pheej xeeb, tus xub yug hauv cov tub tuag los, tus tswj kav tsoom vaj nyob ntiaj teb no. Nws nyiam peb, nws tau muab nws cov ntshav los ntxuav peb cov txhaum. 6 Nws tsa peb ua ib haiv neeg muaj ceeb tsheej, ua ib co Leej Choj teev nws Leej Txiv thiab nws tus Tswv Ntuj. Vim li ntawd, mas lub koob meej thiab lub hwj chim tswj fwm yog nws tug mus tas ib txhiab ib txhis. Ua li. 7 Ntsia saib ! Nws nrog cov huab los. Txhua leej txhua tus yuav pom nws, cov tau nkaug nws kuj yuav pom. Tas txhua haiv neeg nyob ntiaj teb yuav quaj yuav nyiav vim nws. Yuav muaj tseeb li ntawd. Ua li.  8 Huab Tais Tswv Ntuj hais tias : “Kuv yog As Fas thiab Os Mes Nkas ; kuv yog tus tab tom nyob, Tus nyob  dhau los lawm, tus tab tom yuav  los. Kuv yog tus Muaj Hwj Huam tas nrho.”

    Zaj Tshaj lub Moo Zoo:   HIS XAIS 61:  1 (LK 4: 18)

    HUAB TAIS lus tswv yim nyob saum kuv,
    nws tau tso kuv tuaj xa lub moo zoo rau cov neeg txom nyem.  

    Ntawv Moo Zoo:   LK 4:  16-21

    16 Yes Xus los txog Nas Xas Les, yog lub zos uas nws hlob. Hnub Xas Npas Tos, nws mus hauv lub tsev txoos xws li nws ua kam, ces nws sawv mus nyeem ntawv. 17 Lawv cev tus Yaj Saub His Xais phau ntawv rau nws. Nws nthuav kauj ntawv, nws nrhiav tau nqe lus uas sau tias : 18 Huab Tais lub Tswv Yim nyob saum kuv, vim nws pleev roj los qee kuv.. Nws xa kuv mus tshaj lub Moo Zoo rau cov pluag. Nws xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias lawv yuav rov tau ua neeg twj lij, 19 kom kuv tshaj tias yog xyoo Huab Tais yuav pub txiaj ntsim. 20 Yes Xus rov kauv phau ntawv, nws rov muab rau tus tub txib, ces nws zaum. Tas tsoom neeg uas nyob hauv lub tsev txoos ntsia ntsoov Yes Xus. 21 Ces Yes Xus hais rau lawv tias : “Hnub no, cov lus nyob hauv zaj Ntawv no tsheej xeeb raws li nej tau hnov."


    COV ZAJ NYEEM NRUAB LIS PIAM XYOO II,  2015-2016 - Page 5 Th?id=OIP.Md3f43bc9edab1a82a9c8ce784fffec2co0&pid=15

    Cov Roj Ntshiab

    SC = Sacred Chrism = Roj Ntshiab pleev cov txais Cim Txhab Zog
    OC los OS = Oil of Catechumens = Roj pleev cov npaj txais Cim Ntxuav
    OI = Oil of the Infirm/Sick = Roj pleev cov neeg muaj mob




    Last edited by Mim on 22nd March 2016, 7:22 am; edited 4 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 22nd March 2016, 6:32 am

    COV ZAJ NYEEM HNUB TIM   24/3/ 2016

    HNUB TSIB NTSHIAB – NCO TXOG YES XUS NOJ PLUAS HMO KAWG

    Zaj Nyeem Ib:    KEV TSIV  12:  1-8, 11-14


    1 HUAB TAIS hais rau Mais Xes thiab
    As Loos nyob Hais Nkws Tos teb tias :
    2 "Lub hlis no nej yuav muab suav ua thawj lub hlis ua
    ntej cov, nej yuav muab ua thawj lub hlis qhib lub xyoo.
    3 Neb hais rau ib tsoom pej xeem His Xas Lais tias:
    Lub hlis no xiab kaum, mas txhua yim neeg nyias yuav
    tsum npaj nyias ib tug tsiaj me,  txhua lub tsev
    nyias yuav tsum npaj nyias ib tug tsiaj me.
    4 Yog yim neeg twg tsawg dhau noj tsis tas ib tug tsiaj me,
    mas nej yuav mus koom nrog lwm yim neeg uas nyob ze
    nej dua cov kom muaj neeg coob txaus. Nej yuav xaiv ib
    tug tsiaj kom txaus nkaus sawv daws noj tsis seem.
    5 Nej yuav xaiv ib tug tsiaj zoo nkauj tsis muaj chaw xyeej,
    muaj hnub nyoog ib xyoos; nej yuav xaiv ib tug
    thav tshis los tau ib tug thav yaj los tau.
    6 Nej yuav ceev tus tsiaj no cia mus txog lub hlis no
    hnub xiab kaum plaub; hmo ntawd, tas tsoom His Xas Lais
    nyias yuav tua nyias tus tsiaj thaum hnub poob qho kiag.
    7 Nej yuav cug cov ntshav coj mus pleev ob tug ncej
    puab rooj thiab pleev daim txiag tav saum lub qhov
    rooj nkag hauv lub tsev uas nej noj tus tsiaj ntawd.
    8 Hmo ntawd, nej yuav muab cov nqaij txhiab
    hauv hluav taws noj, nej yuav noj ntxuag ib co
    ncuav mov tsis xyaw poov xab, thiab ib cov zaub iab.
    11 Nej yuav noj mov zoo li no :
    Nej sia siv khov kho ntawm duav, nej rau khau tib si,
    thiab tuav rawv nej rab pas nrig ntawm tes. Nej yuav
    tsuag tsuag noj nrawm nroos, vim yog HUAB TAIS hmo hla.
    12 Hmo ntawd, kuv yuav hla mus thoob Hais Nkws Tos teb,
    kuv yuav ntaus cov ua tus hlob nyob hauv Hais Nkws Tos
    teb tib si kom tuag, tsis hais neeg los tsiaj li, thiab kuv yuav
    txiav txim rau cov dab Hais Nkws Tos, kuv, HUAB TAIS.
    13 Cov ntshav yuav yog ib lub cim txuag nej hauv cov
    tsev uas nej nyob. Kuv pom lub cim ntawd, kuv yuav hla
    dhau plaws mus, ces nej yuav tsis raug qhov xwv
    txheej loj ntawd, hmo uas kuv ntaus Hais Nkws Tos teb.
    14 Nej yuav cim ntsoov hnub ntawd cia ua ib hnub tshwj
    xeeb rau nej, nej yuav muab ua ib hnub cav txog HUAB TAIS,
    yuav yog ib hnub nej ua koob tsheej tiam dhau tiam,
    yog ib txog cai nej yuav coj mus li.

    COV ZAJ NYEEM NRUAB LIS PIAM XYOO II,  2015-2016 - Page 5 The_Last_Supper_by_Vicente_Juan_Macip

    NPN:    116:12-13, 15-16BC, 17-18

    Txais:   (1 KLN 10:16) Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Kuv yuav muab dab tsi los pauj
    ib puas tsav yam zoo uas HUAB TAIS ua rau kuv ?
    Kuv yuav cev lub ntim cawm neeg,
    kuv yuav hu txog, tuav txog HUAB TAIS lub npe.

    Txais:   Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    HUAB TAIS saib cov ntseeg txog nws
    Txoj kev tuag  muaj nqes loj.
    Kuv yog koj tus tub txib, yog koj tus ntxhais txib tub;
    Koj tau daws cov hlua khi kuv.

    Txais:   Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Kuv yuav cev ib co txim los koj tsaug,
    kuv yuav tuav txog HUAB TAIS lub npe.
    Kuv yuav pauj kuv lub yeem rau HUAB TAIS
    nyob ntawm nws haiv neeg xub ntiag,

    Txais:   Peb lub ntim foom hmoov zoo yog ib txoj kev
    koom siab nyob hauv Leej Pleev cov Ntshav.

    Zaj Nyeem Ob:     1 KLN 11:  23-26


    Cov kwv tij nkauj muam:
    23 Cov lus kuv qhia rau nej, yog cov lus kuv txais ntawm
    Huab Tais los. Yam li, hmo lawv muab Huab Tais Yes Xus
    rau cov nom ntes, Huab Tais tuav ib lub ncuav mov,
    24 nws ua Ntuj tsaug, nws muab lub ncuav mov ntais,
    nws hais tias : ‘Qhov no yog kuv lub cev uas cia cawm nej.
    Nej ua qhov no kom nej nco txog kuv.
    25 Thaum noj hmo tas Huab Tais Yes Xus tuav lub ntim cawv,
    nws hais tias : Lub ntim cawv no yog zaj cog lus tshiab
    nyob hauv kuv cov ntshav ; nej haus lub ntim no
    thaum twg, mas nej haus kom nej nco txog kuv.
    26 Kwv tij, txij no mus, nej noj cov ncuav mov no thaum twg,
    thiab nej haus cov cawv no thaum twg, mas nej tshaj Huab Tais
    txoj kev tuag, nej ua li no mus txog hnub Huab Tais rov los.

    Zaj Tshaj lub Moo Zoo:    ZAM 13:34

    Huab Tais hais tias, kuv muab ib lo lus qhia tshiab rau nej:
    nej yuav sib nyiam sib hlub ib yam li kuv tau nyiam thiab hlub nej.

    Ntawv Moo Zoo:     ZAM 13:1-15

    COV ZAJ NYEEM NRUAB LIS PIAM XYOO II,  2015-2016 - Page 5 Jesus-washing-feet

    1 Thaum yuav txog lub Ntees Hla, Yes Xus paub tias txog
    nws lub caij hla lub ntiaj teb no rov mus cuag Leej Txiv.
    Nws nyiam nws cov thwj tim uas nyob hauv lub qab ntuj no,
    mas nws nyiam lawv mus txog thaum kawg.
    2 Thaum lawv tab tom noj ib pluag hmo, ces dab phem
    twb nkag mus tshoj Yus Das Kas Lis Yaus, Xis Moos
    tus tub lub siab kom muab Yes Xus muag.
    3 Yes Xus paub tias Leej Txiv tso tas ib puas tsav yam rau
    hauv nws txhais tes, nws paub tias nws tuaj ntawm
    Tswv Ntuj tuaj, nws yuav rov mus cuag Tswv Ntuj.
    4 Ces nws sawv ntawm lub rooj mov mus, nws hle tsho,
    nws muab ib daig ntaub khi rau ntawm nws duav.
    5 Nws hliv dej rau hauv ib lub phiab, ces nws ntxuav cov
    thwj tim ko taw. Nws muab daim ntaub
    khi ntawm duav los so lawv ko taw.
    6 Yes Xus los txog ntawm Xis Moos Pob Zeb.
    Pob Zeb hais rau Yes Xus tias :
    "Huab Tais, koj yuav ntxuav kuv ko taw lod ?"
    7 Yes Xus teb rau Pob Zeb tias : "Qhov uas kuv ua, mas tam sis
    no koj tsis to taub, tiam sis yav tom ntej koj yuav to taub."
    8 Pob Zeb hais rau Yes Xus tias : "Koj txhob ntxuav kuv ko taw,
    kuv tsis kam ib zaug li." Yes Xus teb rau Pob Zeb tias :
    "Yog kuv tsis ntxuav koj, mas koj yuav tsis tau nrog kuv ua ke."
    9 Xis Moos Pob Zeb hais rau Yes Xus tias :
    "Huab Tais, yog li mas tsis yog ntxuav taw xwb,
    koj ntxuav kuv tes thiab kuv taub hau huv si."
    10 Yes Xus hais rau Pob Zeb tias : "Tus uas nws da dej lawm mas
    tsis tas yuav ntxuav ntxiv, vim nws ib ce huv tas tib si lawm.
    Nej kuj huv lawm thiab, tab sis huv tsis tas txhua leej."
    11 Yes Xus yeej paub tus twg yog tus yuav muab nws muag.
    Vim li ntawd nws thiaj hais tias : "Nej huv tsis tas txhua leej."
    12 Thaum Yes Xus ntxuav lawv ko taw tas, nws rov hnav nws lub
    tsho txheej nraud, nws rov los zaum ntawm rooj mov, nws mam
    li hais rau lawv tias : "Nej puas to taub qhov uas kuv ua rau nej ?
    13 Nej hu kuv ua : Xib Hwb thiab Huab Tais.
    Nej hu raug lawm, vim kuv yeej yog tiag.
    14 Txawm tias kuv yog nej tus Xib Hwb thiab nej tus Huab Tais,
    tsis kav, kuv ntxuav nej ko taw, mas nej ib tug
    yuav tsum rov ntxuav ib tug ko taw thiab.
    15 Kuv muab ib tug piv txwv rau nej :
    kom nej ua raws li kuv tau ua rau nej.
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 25th March 2016, 5:13 pm

    COV ZAJ NYEEM HNUB TIM   03/25/ 2016

    Hnub Rau Ntshiab Xyoo C - Yes Xus Tuag - Kev Hawm Ntoo Cuam

    COV ZAJ NYEEM

    Tsis muaj thaj txi ntuj.  Thaum pib lub Txoos, leej choj los khoov pw khwb rwg ntawm hauv ntej thov ntuj twj ywm ib pliag, nws sawv thiab hais ob peb lo lus thov ntuj tas ces cia li pib cov zaj nyeem mus.

    Zaj Nyeem Ib:    HIS XAIS   52:  13—53:  12

    13 Ntsia saib, kuv tus tub txib yuav vam meej, nws yuav raug muab tsa rau qhov siab,  txhua leej yuav qhuas thiab muab nws saib rau qhov siab.
    14 Ib yam li cov neeg coob pom nws, lawv tau ceeb loj, vim nws txawv tas
    tsis zoo li neeg lawm, thiab nws lub cev hloov tas tsis zoo li tib neeg lub lawm,
    15 ib yam li ntawd, nws yuav ua kom ntau lub kuj cuab ceeb nkaus
    thiab vim nws mas cov vaj yuav tsis muaj ib lo lus hais,
    vim cov uas tsis tau muaj leej twg piav rau lawv yuav pom ntawm qhov muag,
    cov uas tsis tau hnov txog yuav muab coj los xav ntev loo .
    53  1 Leej twg yuav ntseeg tau qhov uas peb tau hnov?
    Huab Tais tau qhia nws txhais npab rau leej twg paub?  
    2 Nws tau loj hlob xws li ib tug ntsuag ntoo nyob ntawm HUAB TAIS
    xub ntiag, xws li ib tug cag nyob hauv thaj av qhuav;
    nws tsis muaj qhov zoo saib los zoo nyiam ua kom peb xav ntsia,
    tsis muaj ib yam yuav rub kom peb nyiam nws li.  
    3 Neeg ntxub nws, muab nws saib qis tshaj cov, nws yog ib tug neeg
    ntsib kev tu siab loj, paub kev txom nyem ntau, nws yog ib tug neeg
    uas yus npog qhov muag kom txhob pom,
    raug sawv daws thuam, tsis muaj neeg saib taus li.
    4 Tab sis, twb yog nws ris peb tej kev txom nyem, twb yog nws kwv
    peb tej kev tu siab, los peb tseem xav tias yog Tswv Ntuj nplua nws,
    thiab ua kom nws raug txom nyem, thiab poob ntsej muag.
    5  Tos nws raug luag nkaug, los yog vim peb tej hauj lwm phem,
    nws raug luag tsuj, los yog vim peb tej kev txhaum.
    Lub txim uas nws ris yog qhov ua kom peb tau nyob kaj siab,
    nws tej nqaij ntuag kho peb kom zoo hlo.
    6 Peb sawv daws zoo li ib co yaj poob zoo, peb nyias taug nyias txoj
    kev, HUAB TAIS muab peb lub txim txhaum huv si nog rau nws ris.
    7 Nws raug luag hiam, tab sis nws yeem ua tus me, nws tsis qhib ncauj;
    Nws ua zoo li tus yaj uas luag cab mus rau lub tsev tua tsiaj, nws nyob
    twj ywm xws li tus yaj uas luag txiav nws cov plaub, nws tsis qhib ncauj li.
    8 Luag txiav txim rau nws tas, luag yuam ntiag cab nws mus. Leej twg
    nyob hauv tiam neeg ntawd tau mob siab txog tias luag muab nws txiav
    tawm hauv tsoom neeg ciaj lub teb chaws mus lawm,
    los txog tias nws raug tua vim nws haiv neeg txoj kev txhaum?
    9 Lawv muab nws zwm av nrog cov neeg phem,
    nws lub ntxa yog nrog cov neeg lim hiam, txawm tias
    nws tsis tau ua ib qho phem, tsis tau hais ib lo lus dag.
    10 HUAB TAIS tau pom zoo cia kev txom nyem muab nws tsuam kom mob.
    Yog nws muab nws txoj sia los txi Ntuj them txim txhaum, nws yuav tau
    pom nws cov xeeb leej xeeb ntxwv, thiab yuav tau txoj sia nyob ntev dhawv,
    nws yog tus ua tau kom muaj raws li HUAB TAIS lub siab xav.
    11 Thaum nws tus plig nyiaj yeej kev sim siab lawm, nws yuav pom txoj kev
    pom kev thiab nws lub siab yuav puv npo. Vim nws paub,
    kuv tus tub txib, tus siab ncaj, yuav ua kom coob leej
    ntau tus ncaj tuaj, nws yuav ris lawv cov txhaum.
    12 Yog vim li ntawd, kuv thiaj yuav pub kom nws muaj feem nyob hauv tsoom
    ua thawj, nws yuav nrog cov muaj hwj xyeej txais yeeb ncuab lub cuab tam,
    vim nws tau yeem swb rau kev tuag thiab cia luag suav nws nrog cov neeg
    phem, tiam sis twb yog nws ris coob leej cov txhaum
    thiab thov ntuj kom muab kev zam txhaum rau lawv.

    NPN    31:  2-6, 12-13, 15-16, 17, 25

    Txais:   (Lk 23:46) Txiv, kuv muab kuv tus ntsuj plig tso rau hauv koj txhais tes.

    HUAB TAIS, kuv los nkaum hauv koj,
    thov koj txhob pub kuv poob ntsej muag ib zaug li.
    Thov cawm kom kuv dim vim koj ncaj ncees.
    Kuv tso kuv tus ntsuj plig rau hauv koj txhais tes,
    HUAB TAIS, Tswv Ntuj tus muaj kev tseeb, koj yog tus txhiv kuv.

    Txais:   Txiv, kuv muab kuv tus ntsuj plig tso rau hauv koj txhais tes.

    Rau kuv cov yeeb ncuab, kuv yog neeg phem,      
    rau cov nyob ze kuv, kuv yog neeg qias, kuv cov phooj ywg ceeb laj pom kuv,    
    thaum neeg pom kuv ntawm kev, lawv khiav mus deb kuv.    
    Kuv zoo li tus neeg tuag uas ploj ntais hauv neeg lub siab mus lawm,
    zoo li ib lub twj taig tawg tas tsis zoo yuav.

    Txais:   Txiv, kuv muab kuv tus ntsuj plig tso rau hauv koj txhais tes.

    Tiam sis, Huab Tais, kuv tso siab rau koj;    
    Kuv hais tias, “Koj yog kuv tus Tswv Ntuj!”      
    Kuv lub neej nyob hauv koj txhais tes; thov koj cawm kuv
    ntawm kuv cov yeeb ncuab thiab cov neeg hiam kuv xib teg.      

    Txais:   Txiv, kuv muab kuv tus ntsuj plig tso rau hauv koj txhais tes.

    Cia koj lub ntsej muag ci tuaj rau saum koj tus tub txib,      
    thov cawm kuv vim koj hlub kuv.
    Nej kav tsij ua siab loj, ua siab tawv qhawv
    tas nej cov uas tso siab rau Huab Tais.    

    Txais:   Txiv, kuv muab kuv tus ntsuj plig tso rau hauv koj txhais tes.

    Zaj Nyeem Ob:     HES NPLAWS   4:  14-16; 5:7-9

    14 Vim peb muaj ib tug Tuam Leej Choj uas tau hla dhau yim txheej
    cuaj txheej ntuj, uas yog Yes Xus, Tswv Ntuj leej Tub, mas peb yuav
    nyob ruaj nreb hauv peb txoj kev lees ntseeg nws.
    15 Peb tsis muaj ib tug Tuam Leej Choj uas yuav tsis txawj hlub peb
    cov neeg zog me, rau qhov nws tau raug txoj kev sim siab txhij txhua
    ib yam li peb, tsuas tshuav txoj kev txhaum xwb, nws thiaj tsis raug.
    16 Peb kav tsij tso siab lug mus kom txog lub theej kiab muaj txiaj ntsim,
    kom peb tau txais kev khuv leej, thiab txais txiaj ntsim
    los pab peb thaum peb xav tau kev pab.
    5   7  Thaum Leej pleev tseem ua neej nyob muaj cev nqaij, nws tau tsa
    suab quaj thov tus muaj peev xwm cawm tau nws ntawm txoj kev tuag;
    Tswv Ntuj tau mloog nws tej lus thov, vim nws hwm Tswv Ntuj zoo.
    8 Txawm tias nws yog tus Tub cag, tsis kav nws yuav tsum tau
    kawm kev mloog lus nyob hauv txoj kev raug txom nyem.  
    9  Thaum nws ua tau txhua yam zoo txhij zoo txhua lawm,
    nws kuj yog lub hauv paus uas muab kev cawm
    mus li rau txhua tus mloog nws lus.

    Zaj Tshaj Ntawv Moo Zoo:    FLP  2:  8-9

    Leej Pleev tuaj yeem mloog Tswv Ntuj lus mus txog qhov tuag,
    thiab tseem xaiv txoj kev tuag saum ntoo cuam.
    Vim li ntawd, mas Tswv Ntuj thiaj tsa nws ua tus loj dua cov
    thiab muab lub npe uas nyob siab dua lwm cov npe rau nws.

    Ntawv Moo Zoo:     ZAM   18:  1—19:  42

    Vim zaj Ntawv Moo Zoo no ntev heev, mas yuav muab cais ua plaub tug neeg sib pab nyeem:  ib tug ua tus piav (TP), ib tug ua Pis Las Tos los lwm tus neeg hais lus (ITN, ib tug neeg), ib tug ua Yes Xus hais lus  (YX), thiab sawv daws (SD) nyeem thaum yog cov Yus das coob coob hais lus.

    COV ZAJ NYEEM NRUAB LIS PIAM XYOO II,  2015-2016 - Page 5 Jesusjudas

    TP: 18   1 Yes Xus hais li ntawd tas, ces nws nrog nws cov thwj tim mus rau
    tus kwj deg Kes Nroos sab tim ub. Muaj ib lub vaj nyob ntawd.
    Yes Xus thiab cov thwj tim mus hauv lub vaj.
    2 Yus Das, tus uas muab Yes Xus rau luag, kuj paub qhov chaw ntawd
    thiab, vim Yes Xus thiab cov thwj tim sib sau ntau zaus nyob ntawd.
    3 Yus Das coj pab peeb zeej thiab ib co zov keeb tuaj. Yog cov thawj
    leej choj thiab cov Fas Lis Xais sau cov zov keeb ntawd.
    Lawv taws teeb, taws tsau thiab nqa ntaj nqa riam tuaj.
    4 Yes Xus paub ib puas tsav yam uas yuav tshwm sim tuaj raug nws,
    ces nws tawm los hais rau lawv tias :
    YX:   "Nej nrhiav leej twg ?"
    TP:  5 Lawv teb rau nws tias :
    SD:   " Yes Xus Nas Xas Les."
    TP:  Yes Xus hais rau lawv tias :
    YX:   "Yog kuv."
    TP:   Yus Das, tus muab Yes Xus rau luag nrog lawv sawv ua ke.
    6 Thaum Yes Xus hais rau lawv tias : "Yog kuv",
    mas lawv thaub qab thiab lawv ntog hauv av.
    7 Yes Xus rov nug lawv dua tias :
    YX:   "Nej nrhiav leej twg ?"
    TP:   Lawv hais tias :
    SD:   "Yes Xus Nas Xas Les."
    TP:    8 Yes Xus teb tias :
    YX:   "Kuv twb hais rau nej tias yog kuv.
    Yog nej nrhiav kuv, mas nej cia cov no mus."
    TP:   9 Qhov no tshwm sim raws li lo lus uas nws xub hais tseg tias :
    "Cov uas koj muab rau kuv, mas kuv tsis ua ib tug ploj li."
    10 Xis Moos Pob Zeb muaj ib rab ntaj. Nws rho hlo nws rab ntaj tib
    ntag rau tus thawj leej choj tus qhev, txiav raug nws sab pob
    ntseg xis lub qia ntsej tu nrho. Tus qhev no hu ua Mas Kws.
    11 Yes Xus hais rau Pob Zeb tias :
    YX:    "Koj ntxig ntaj rau hauv hnab.
    Lub ntim uas Leej Txiv muab rau kuv, kuv yuav tsis haus lod ?"
    TP:    12 Pab peeb zeej nrog tus lwm txheeb, thiab cov zov keeb
    Yus Das ntes Yes Xus. Lawv muab Yes Xus khi.
    13 Lawv xub coj nws mus tim As Nas tsev. As Nas yog Kais Fas
    yawm txiv. Xyoo ntawd yog Kais Fas ua tuam leej choj.
    14 Kais Fas yog tus tau tawm tswv yim rau cov Yus Das hais tias :
    "Cia ib tug neeg this tsoom pej xeem tuag mas zoo dua."
    15 Xis Moos Pob Zeb thiab lwm tus thwj tim raws Yes Xus qab.
    Tus thwj tim ntawd yog tus tuam leej choj ib tug swm neeg, ces nws
    tau nrog Yes Xus chaws mus hauv tus tuam leej choj lub tshav loog.
    16 Hos Pob Zeb nyob sab nraud, nws sawv ze ntawm qhov rooj. Lwm
    tus thwj tim uas swm tus tuam leej choj tawm los, nws hais lus rau tus
    ntxhais txib zov qhov rooj, ces nws kom Pob Zeb chaws mus hauv.
    17 Tus ntxhais txib zov qhov rooj hais rau Pob Zeb tias :
    ITN:  "Koj tsis yog tus neeg ntawd ib tug thwj tim lod ?"
    TP:      Pob Zeb hais tias :
    ITN:    "Kuv tsis yog."
    TP:    18 Cov tub qhev thiab cov zov keeb rauv ib cub taws thee,
    vim lub caij ntawd no no. Lawv nyob ntawd nte taws.
    Pob Zeb kuj nrog lawv nyob ntawd nte taws thiab.
    19 Tus tuam leej choj nug Yes Xus txog
    nws cov thwj tim thiab nws cov lus qhia.
    20 Yes Xus teb rau tus tuam leej choj tias :
    YX:    "Kuv tab meeg hais lus rau lub qab ntuj neeg.
    Kuv niaj hnub qhia nyob hauv cov tsev txoos thiab
    hauv lub Tuam Tsev Teev Ntuj uas tas tsoom Yus Das tuaj sib txoos.
    Kuv tsis tau nyiag hais ib yam dab tsi.
    21 Tim li cas koj nug kuv ? Koj nug cov uas tau hnov tej lus kuv hais
    rau lawv. Cov ntawd paub tias kuv tau hais dab tsi."
    TP:   22 Thaum Yes Xus hais li ntawd, mas cov zov keeb uas sawv ntsug nyob
    ntawd, muaj ib tug ib tawg ncuav rau Yes Xus, nws hais rau Yes Xus tias :
    ITN:   "Koj teb li ntawd rau tus tuam leej choj lod !"
    TP:     23 Yes Xus teb rau tus zov keeb tias :
    YX:  "Yog kuv hais lus phem, koj ua pov thawj qhia saib qhov twg phem.
    Hos yog kuv hais raug lawm, vim li cas koj thiaj ntaus kuv ?”
    TP:    24 As Nas xa Yes Xus mus rau tuam leej choj Kais Fas.
    Yes Xus tseem khi rawv li qub.
    25 Xis Moos Pob Zeb nyob ntawd nte taws. Lawv hais rau nws tias :
    SD:   "Koj tsis yog nws ib tug thwj tim lod ?"
    TP:     Pob Zeb tsis lees, nws hais tias :
    ITN:     “Kuv tsis yog.”
    TP:    26 Tus tuam leej choj muaj ib tug qhev, nws yog ib tug txheeb ze tus
    qhev uas raug Pob Zeb txiav ib sab qia ntsej, nws hais tias :
    ITN:   "Kuv twb pom koj nrog nws nyob hauv lub vaj los tsis sub ?"
    TP:  27 Pob Zeb rov qab tsis lees, ces tam sis ntawd ib tug qaib qua.
    COV ZAJ NYEEM NRUAB LIS PIAM XYOO II,  2015-2016 - Page 5 Peter-denies-christ-bloch-carl_1167438_inl
    28 Lawv coj Yes Xus tim Kais Fas tsev mus rau hauv lub tsev txiav
    txim. Thaum ntawd kaj ntug lawm. Tab sis cov Yus Das tsis
    mus hauv lub tsev txiav txim, kom lawv txhob tsuas yam
    tsis huv, lawv thiaj yuav noj tau pluas Hla.
    29 Pis Las Tos thiaj li tawm tuaj cuag lawv, nws hais tias :
    ITN:    "Nej muaj lus dab tsi, nej thiaj tuaj kom tus neeg ntawd ?"
    TP:   30 Lawv teb rau Pis Las Tos hais tias :
    SD:   "Yog tus neeg no txhob yog neeg phem, mas peb yuav tsis coj nws tuaj rau koj."
    TP:    31 Pis Las Tos hais rau lawv tias :
    ITN:    "Nej coj nws mus, nej txiav txim rau nws raws li nej txoj cai."
    TP:   Cov Yus Das hais rau Pis Las Tos tias :
    SD:    "Txoj cai tsis pub peb muab ib tug neeg tua."
    TP:    32 Qhov no tshwm sim raws li lo lus Yes Xus tau xub
    hais qhia tias nws yuav tsum tuag zoo li cas.
    33 Pis Las Tos thiaj rov chaws mus hauv lub tsev txiav txim, nws hu
    Yes Xus los, nws hais tias :
    ITN:   "Koj puas yog cov Yus Das tus vaj ?"
    TP:   34 Yes Xus teb tias :
    YX:   "Puas yog koj hais koj, los yog luag tej hais txog kuv li ntawd rau koj ?"
    TP:   35 Pis Las Tos teb tias :
    ITN:   "Kuv puas yog ib tug Yus Das ? Koj haiv neeg
    thiab cov thawj leej choj coj koj tuaj rau kuv. Koj tau ua dab tsi ?"
    TP:    36 Yes Xus teb tias :
    YX:   "Kuv lub Ceeb Tsheej tsis nyob hauv lub qab ntuj no. Yog kuv lub Ceeb Tsheej
    nyob hauv lub qab ntuj no, mas kuv cov neeg yuav sawv ntaus rog thaiv kom kuv txhob
    poob rau hauv cov Yus Das txhais tes. Tab sis,
    kuv lub Ceeb Tsheej tsis nyob hauv lub qab ntuj no."
    TP:    37 Pis Las Tos hais rau Yes Xus tias :
    ITN:   "Ua li koj yog vaj lod ?"
    TP:   Yes Xus teb hais tias :
    YX:   "Yog koj hais tias kuv yog vaj. Yog vim qhov ntawd
    kuv thiaj yug los, thiab yog vim qhov ntawd kuv thiaj tuaj nyob hauv
    lub qab ntuj no : kuv tuaj ua tim khawv txog qhov tseeb.
    Leej twg yog txoj kev tseeb tug, mas nws mloog kuv lub suab."
    TP:   38 Pis Las Tos hais rau Yes Xus tias :
    ITN:    "Qhov tseeb yog dab tsi ?"
    TP:   Thaum Pis Las Tos hais li no tas, nws tawm rov mus cuag cov Yus Das,
    nws hais rau lawv tias :
    ITN:   "Kuv tsis pom ib yam tsim nyog raug txim nyob hauv tus neeg ntawd.
    39 Tab sis raws li nej kev cai, mas txog lub Ntees Hla kuv tso ib tug
    neeg mus. Nej puas xav kom kuv tso cov Yus Das tus vaj ?"
    COV ZAJ NYEEM NRUAB LIS PIAM XYOO II,  2015-2016 - Page 5 20130729224840
    TP:    40 Lawv rov qab nthe nrov tias :
    SD:     "Txhob tso nws, tso Npas Las Npas!"
    TP:   Npas Las Npas yog ib tug tub sab.
    19   1 Ces Pis Las Tos coj Yes Xus mus, nws kom lawv nplawm Yes Xus.
    2 Cov tub rog xuas ib co pos ntxias ua ib lub kauj, lawv muab tso saum
    Yes Xus taub hau. Lawv muab ib lub tsho ntev liab tshiab rau Yes Xus hnav.
    3 Lawv txav los ze nws, lawv hais tias :
    SD:   "Nyob kaj lug, cov Yus Das tus vaj,"
    TP:    ces lawv ntaus nws tej niag teg.
    4 Pis Las Tos rov tawm mus nraum zoov, nws hais rau lawv tias :
    ITN:    "Nej saib, kuv coj tus neeg no tawm los rau nej, kom nej paub tias
    kuv tsis pom ib yam tsim nyog raug txim nyob hauv nws."
    5 Yes Xus tawm los sab nraud, nws ntoo lub kauj pos thiab
    hnav lub tsho ntev liab tshiab, ces Pis Las Tos
    hais rau lawv tias :
    ITN:    "Nej ntsia tus neeg no."
    TP:    6 Thaum cov thawj leej choj thiab cov zov keeb pom Yes Xus, lawv
    nthe nthe hais tias :
    SD:     "Muab dai saum ntoo cuam ! Muab dai saum ntoo cuam !"
    TP:    Pis Las Tos hais rau lawv tias :
    ITN:    "Nej coj nws mus,nej muab nws dai saum ntoo cuam. Vim tias kuv tsis
    pom ib yam tsim nyog raug txim nyob hauv nws."
    TP:   7 Cov Yus Das teb rau Pis Las Tos tias :
    SD:    "Peb muaj ib Txoj Cai, raws li Txoj Cai ntawd, mas nws yuav tsum tuag,
    vim nws tsa nws ua Tswv Ntuj Leej Tub."
    TP:    8 Thaum Pis Las Tos hnov lo lus ntawd, mas nws haj yam ntshai.
    9 Ces nws rov chaws mus hauv lub tsev txiav txim. Nws hais rau Yes Xus tias :
    ITN:    "Koj nyob qhov twg tuaj ?"
    TP:     Tab sis Yes Xus tsis teb ib lo lus rau nws li.
    10 Pis Las Tos thiaj hais rau Yes Xus tias :
    ITN:    "Koj tsis hais lus rau kuv. Koj puas paub hais tias kuv muaj hwj huam
    tso tau koj mus, thiab muaj hwj huam muab koj dai saum ntoo cuam ?"
    TP:    11 Yes Xus teb hais tias :
    YX:    "Yog koj tsis tau txais hwj huam saum ntuj los, mas koj yuav ua tsis tau
    dab tsi rau kuv. Vim li ntawd, tus muab kuv rau koj, nws muaj ib qho txhaum loj dua."
    TP:    12 Txij ntawd los, Pis Las Tos nrhiav kev tso Yes Xus.
    Tab sis cov Yus Das nthe nthe hais tias :
    SD:     "Yog koj tso tus neeg ntawd mus, mas koj tsis yog Xes Ntxas phooj ywg.
    Leej twg tsa nws ua vaj, mas nws sawv tiv Xes Ntxas."
    TP:   13 Thaum Pis Las Tos hnov cov lus no, nws kom lawv coj Yes Xus
    tawm mus sab nraud. Ces Pis Las Tos mus zaum saum lub theej kiab txiav txim,
    ntawm qhov chaw hu ua Tshav Txiag Zeb, lus Hes Nplaws hais tias Nkas Npas Thas.
    14 Hnub ntawd, yog hnub npaj ua lub Ntees Hla. Thaum ntawd
    kwv yees ze kaum ob teev tav su. Pis Las Tos hais rau cov Yus Das tias :
    ITN:     "Nej ntsia nej tus vaj."
    TP:    15 Cov Yus Das nthe nrov nrov tias :
    SD:   "Muab nws tua ! Muab nws tua !  Muab dai saum ntoo cuam !"
    TP:     Pis Las Tos hais rau lawv tias :
    ITN:    "Kuv yuav muab nej tus vaj dai saum ntoo cuam lod ?"
    TP:     Cov thawj leej choj teb hais tias :
    SD:     "Peb tsuas muaj Xes Ntxas ua peb tus vaj xwb."
    TP:    16 Ces Pis Las Tos muab Yes Xus rau lawv, kom lawv coj nws mus
    dai saum ntoo cuam.  Lawv thiaj li coj Yes Xus mus.
    17 Yes Xus kwv nws tus ntoo cuam. Nws tawm mus txog qhov
    chaw hu ua "Khauj Khaum Taub Hau", uas lus Hes Nplaws hu ua "Nkos Nkos Thas."
    18 Lawv muab nws dai rau saum ntoo cuam nyob ntawd.  Lawv muab ob tug neeg
    dai saum ntoo cuam xws li nws thiab, ib tug nyob ib sab, Yes Xus nyob nruab nrab.
    19 Pis Las Tos sau ntawv rau saum ib daim txiag ; nws kom muab
    tso saum tus ntoo cuam. Cov npe ntawv saum daim txiag sau hais tias :
    “Yes Xus Nas Xas Les, cov Yus Das tus vaj.”
    20 Coob leej Yus Das nyeem cov lus saum daim txiag, vim qhov chaw
    uas lawv muab Yes Xus dai saum ntoo cuam nyob ze lub nroog,
    thiab lawv sau ua lus Hes Nplaws, lus Las Tis Nas, thiab lus Hes Las.
    21 Cov thawj leej choj Yus Das hais rau Pis Las Tos tias :
    SD:     "Koj tsis txhob sau tias : Cov Yus Das tus vaj, yuav tsum sau tias
    "Tus ntawd hais tias : Kuv yog cov Yus Das tus vaj."
    TP:     22 Pis Las Tos teb hais tias :
    ITN:    "Qhov kuv sau, mas twb sau tas lawm."  
    TP:    23 Thaum cov tub rog muab Yes Xus dai saum ntoo cuam tas,
    lawv muab Yes Xus cov ris tsho faib ua plaub tsw, ib tsw rau ib tug
    tub rog. Lawv muab lub tsho ntev faib, tab sis lub tsho ntev tsis
    muaj leej leeg, yog tsho ntos ua ib daig xwb mus rau nram taw.
    24 Cov tub rog sib tham tias :
    SD:   "Peb txhob muab lub tsho ntev dua, peb twv saib leej twg yuav tau lub tsho ntawd."
    TP:   Ua li mas tshwm sim raws li Ntawv sau cia tias :
    “Lawv sib faib kuv cov khaub ncaws, lawv
    twv saib leej twg yuav tau kuv cov ris tsho.” Cov tub rog tau ua li ntawd.  
    25 Yes Xus niam thiab nws niam tus niam hluas,
    nrog Mab Liab uas yog Dlos Pas poj niam, thiab
    Mab Liab Mas Ntas Las, lawv sawv ze tus ntoo cuam.
    26 Yes Xus pom nws niam, thiab pom tus thwj tim uas nws nyiam
    sawv ze nws niam, ces nws hais rau nws niam tias :
    YX:   "Niad, tus ntawd yog koj tus tub."
    TP:     27 Thiab Yes Xus hais rau tus thwj tim tias :
    YX:     "Tus ntawd yog koj niam."
    TP:     Txij lub sij hawm ntawd los, tus thwj tim coj Mab Liab mus nyob hauv nws tsev.  
    28 Ua li ntawd tas, nws paub tias zaum no ib puas tsav yam tiav tas lawm, nws hais tias :
    YX:   "Kuv nqhis dej",
    TP:  kom xwv muaj raws li Ntawv sau tseg.
    29 Muaj ib hub kua qaub puv nkaus nyob ntawd. Lawv muab ib thooj rwb tub kua qaub
    chob rau ib tug ntsis pas nroj his xaus cev mus rau Yes Xus qhov ncauj.
    30 Thaum Yes Xus haus qhov kua qaub tas, nws hais tias :
    YX:    "Ib puas tsav yam tiav tas lawm."

    COV ZAJ NYEEM NRUAB LIS PIAM XYOO II,  2015-2016 - Page 5 Station7b-station-cross122-e1333545754457
    TP:    Ces Yes Xus nyo taub hau, nws tso nws tus ntsuj plig tawm mus.
    Lub caij no sawv daws nyob ntsiag to txhos caug hawm Yes Xus
    lub caij uas nws txoj sia tu.

     
    TP:    31 Hnub ntawd yog Hnub Npaj, mas cov Yus Das tsis xav cia cov tuag lub cev
    dai saum ntoo cuam hnub Xas Npas Tos, vim tias hnub Xas Npas Tos ntawd yog ib lub hnub
    nyoog loj. Cov Yus Das thov Pis Las Tos kom muab cov neeg dai saum ntoo
    cuam ob sab ceg lov thiab muab lawv lub cev txo nqes los.
    32 Cov tub rog thiaj tuaj muab thawj tug ob sab ceg lov, thiab muab
    lwm tus uas nrog nws dai saum ntoo cuam ob sab ceg lov.
    33 Thaum lawv los txog ntawm Yes Xus, lawv pom nws twb tuag
    lawm, lawv tsis muab nws ob sab ceg lov,
    34 tab sis ib tug tub rog xuas nws rab hmuv hno Yes Xus phab tav,
    tam sis ntawd ib co ntshav thiab ib co dej tawm los.
    35 Tus uas tau pom qhov ntawd ua pov thawj hais. Nws ua tim khawv hais qhov tseeb,
    nws paub tias qhov nws hais muaj tiag. Nws hais tej ntawd kom nej ntseeg.
    36 Tej xwm no tshwm sim kom muaj raws li Ntawv sau
    cia tias : Nws cov pob txha tsis lov ib tug li.
    37 Tseem muaj lwm lo lus hauv Ntawv hais tias : Lawv yuav ntsia tus uas lawv nkaug.
    38 Thaum tej xwm ntawd tshwm tuaj tas, Yos Xes nyob As Lis Mas Tias tuaj thov
    Pis Las Tos kom kheev nws txo Yes Xus lub cev. Pis Las Tos tso lus rau Yos Xes.
    Ces Yos Xes mus txo Yes Xus lub cev. Yos Xes yog Yes Xus ib tug thwj tim,
    tab sis nws tsis pub luag tej paub vim nws ntshai cov Yus Das.
    39 Nis Kos Des Mos kuj tuaj thiab. Nis Kos Des Mos yog tus uas thaum chiv thawj,
    nws tuaj cuag Yes Xus hmo ntuj. Nws nqa ib cov tshuaj qhwv tuag tuaj :
    yog txab txiv yoov xyaw txab xyab phij, kwv yees hnyav li ib puas choj.
    40 Lawv txo Yes Xus lub cev los, lawv xuas tej pluaj hlab ntaub
    pleev tshuaj tsw qab los qhwv nws lub cev,raws li cov Yus Das kev cai tu zam.
    41 Nyob ntawm thaj chaw uas luag muab Yes Xus dai saum ntoo cuam, muaj ib lub vaj.
    Nyob hauv lub vaj ntawd muaj ib lub ntxa tshiab uas tseem tsis tau tso ib tug tuag rau hauv li.
    42 Vim tias hnub ntawd yog cov Yus Das Hnub Npaj, thiab lub ntxa
    ntawd nyob ze, ces lawv muab Yes Xus zwm rau hauv lub ntxa ntawd.

    KEV THOV NTUJ

    Thaum nyeeem Ntawv Moo Zoo tas lawm, muaj kev thov ntuj rau ntau yam:

    1. Thov ntuj rau lub Koom Txoos.
    2. Thov ntuj rau Vaj Qhia.
    3. Thov ntuj rau cov Tswv QHia, cov leej choj, cov leej tsob hwb, leej tij leej phauj thiab ta sib tsoom ntseeg.
    4. Thov ntuj rau cov neeg kawm npaj txais lub Cim Ntxuav, yuav los ua neeg ntseeg tshiab thaum Hmo Hla.
    5. Thov ntuj rau ib tsoom neeg ntseeg Yes Xus kom rov los muaj kev sib haum.
    6. Thov ntuj rau haiv neeg His Xas Lais kom lawv los ntseeg Yes Xus.
    7. Thov ntuj rau cov neeg uas tsis kam ntseeg Yes Xus.
    8. Thov ntuj rau cov neeg uas tsis kam ntseeg Tswv Ntuj.
    9. Thov ntuj rau cov ua nom ua tswv kabv teb kav chaw.
    10. Thov ntuj rau tas ib tsoom neeg uas ntsib ntau yam kev nyuaj, xws li cov muaj mob muaj nkeeg,
    cov tab tom tas sim neej, cov neeg taug kev yuav mus hauj lwm los lwm yam kom txhob ntsib
    teeb meem, cov raug quab yuam tsis muaj kev twj lij, thiab rau lub ntiaj teb kom puas tsav yam
    kev phem, kev cuav, kev tshaib kev nqhis, kev mob kev nkeeg yaj mus ploj mus kom tas.

    KEV HAWM NTOO CUAM

    COV ZAJ NYEEM NRUAB LIS PIAM XYOO II,  2015-2016 - Page 5 3-29-13%20Good%20Friday%20Pic%203

    Ua cov kab ke hawm ntoo cuam:  Leej choj mus coj tus ntoo cuam los txawb rau ntawm hauv ntej ntawm lub thaj txi ntuj, ces sawv daws los mus hawm tus ntoo cuam.

    KEV TXAIS LUB CIM YUG

    Xub hais zaj “Peb Txiv nyob saum ntuj…” ces sawv daws mus txais lub Cim Yug; leej choj hais ib zaj thov ntuj kawg, ces tas li ntawd.


    Last edited by Mim on 12th April 2017, 3:05 am; edited 2 times in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 27th March 2016, 3:22 pm

    TIM 28 LUB 3 HLIS 2016

    Hnub Ob Lis Piam Ib Caij Hla Xyoo C

    Zaj Nyeem Ib: HAUJ LWM 2: 14, 22-33


    14 Pob Zeb nrog Pab Kaum Ib leeg sawv ntsug, nws hais cov lus no nrov nrov tias : "Cov Yus Das, thiab tas nej cov uas nyob hauv Yes Lus Xas Les, nej yuav tsum paub qhov no, nej tig ntsej los mloog kuv cov lus mog.
    22 "Cov His Xas Lais, nej mloog cov lus no mog : Yes Xus Nas Xas Les yog tus uas Tswv Ntuj pom zoo kom nws ua hwj huam yees ntxwv, ua cov dej num nto moo, thiab ua ib co cim nyob hauv nej. Yog Tswv Ntuj pub kom nws ua tau li ntawd. 23 Tus neeg ntawd, luag muab nws muag rau nej, raws nraim li Tswv Ntuj tau teem tseg nyob hauv nws txoj kev paub yav tom ntej. Nej kom cov neeg tsis hwm txoj cai xuas lawv txhais tes mus tua nws, thiab muab nws ntsia saum ntoo cuam. 24 Tswv Ntuj tsa nws sawv rov los, thiab npo nws ntawm txoj kev txom nyem hauv qhov tuag. Vim tias kev tuag tsis muaj hwj huam tuav tau nws cia. 25 Das Vis twb hais txog nws tias : Kuv pom Huab Tais nyob ntawm kuv xub ntiag tsis tseg. Huab Tais nyob ntawm kuv sab xis, kom kuv txhob qaij txhob qaug. 26 Yog vim li ntawd kuv lub plawv thiaj xyiv fab hlo, kuv tus nplaig hom khaj. Kuv cev nqaij muaj sia nyob hauv txoj kev tso siab. 27 Vim koj yuav tsis tso kuv tus plig pov tseg rau hauv ntuj txias teb tsaus, koj yuav tsis cia koj tus Ntshiab lub cev lwj. 28 Koj ua kom kuv paub cov kev mus hauv txoj sia. Koj cia kuv pom koj lub ntsej muag kom kuv xyiv fab. 29 Kwv tij sawv daws, kuv thov hais meej rau nej txog tus yawg koob Das Vis tias : nws tuag thiab nws mus zwm av lawm. Nws lub ntxa tseem nyob rau peb pom txog niaj hnub no. 30 Tiam sis Das Vis yog ib tug yaj saub, mas nws paub tias Tswv Ntuj twb cog lus rau nws yuav cia nws ib tug xeeb ntxwv uas yog nws cov roj ntsha zaum nws lub theej kiab. 31 Das Vis twb xub pom tias Leej Pleev yuav sawv rov los, ces nws thiaj qhia tias : Ntuj yuav tsis tso nws pov tseg rau hauv tub tuag teb, thiab nws lub cev nqaij yuav tsis lwj. 32 Tus Yes Xus ntawd, Tswv Ntuj tsa nws sawv rov los lawm. Peb ua taus tim khawv. 33 Nyem no Tswv Ntuj sab xis tsa Yes Xus nyob siab. Nws tau txais Leej Ntuj Plig Ntshiab ntawm Leej Txiv, vim Leej Txiv yeej tau cog lus li ntawd. Yes Xus thiaj tso Leej Ntuj Plig los rau sawv daws : yog qhov uas nej pom thiab nej hnov.

    NPN 16: 1-2A + 5, 7-8, 9-10, 11

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Tswv Ntuj, thov koj txuag kuv, vim kuv tuaj khaub zig koj.
    Kuv hais rau HUAB TAIS tias: " Koj yog kuv tus HUAB TAIS !”
    Huab Tais, kuv lub cuab tam, kuv lub ntim,
    Koj yog tus tuav rawv kuvb txoj hmoo.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Kuv cav lus zoo txog tus HUAB TAIS uas qhia kuv xav tswv yim,
    Tab yog hmo ntuj kuv siab ntsws tseem qhia kuv.
    Kuv cia HUAB TAIS nyob ntawm kuv xub ntiag tsis tseg,
    Vim nws nyob ntawm kuv sab xis, kuv yuav tsis qaij tsis qaug

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Vim li ntawd, kuv lub siab luag ntxhi, kuv tus plig hom khaj,
    kuv lub cev kuj tau nyob nyab xeeb,
    Vim koj yuav tsis tso kuv tus ntsuj plig pov tseg rau ntuj txias teb tsaus.
    Koj tsis kheev tus ntseeg koj mus pom lub qhov ntuj tob.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    Koj yuav qhia rau kuv txog txoj kev muaj txoj sia,
    txog kev zoo siab nyob ntawm koj xub ntiag,
    txog nyob ntawm koj sab xis, muaj kev nplij siab tsis txawj tsuag ib sid.

    Txais: (1) Tswv Ntuj, thov koj txuag kuv, vim koj yog kuv chaw tso siab.
    Los : As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: MT 28: 8-15

    8 Ob tug poj niam tso plhuav lub ntxa tseg. Nkawd ntshai thiab zoo siab tas nrho. Nkawd khiav mus xa lub moo ntawd rau cov thwj tim. 9 Yes Xus tuaj tos ob tug poj niam kev, nws hais tias : "Neb nyob kaj lug". Ces nkawd txav los ze Yes Xus, nkawd puag Yes Xus ko taw, nkawd pe nws. 10 Yes Xus hais rau nkawd tias : "Neb txhob ntshai mog, neb mus qhia kuv cov kwv tij kom lawv mus lawm Nkas Lis Lais teb, lawv yuav pom kuv nyob ntawd." 11 Lub sij hawm ob tug poj niam tab tom rov mus, cov zov keeb ob peb leeg kuj rov mus hauv nroog. Lawv mus qhia tej xwm uas lawv tau pom rau cov thawj leej choj. 12 Cov thawj leej choj nrog cov txwj laus sib sau tuav xam. Lawv muab nyiaj ntau rau cov zov keeb, 13 lawv hais tias : "Nej hais li no : 'Hmo ntuj, thaum peb tsaug zog, Yes Xus cov thwj tim tuaj nyiag nws lub cev.' 14 Yog tias tej lus no nrov txog tus nom tswj teb chaws pob ntseg, peb yuav npliag kom nej tsis txhob raug dab tsi nyuaj." 15 Cov zov keeb khaws cov nyiaj, lawv ua raws li cov hlob qhia lawv. Cov lus no thiaj ri mus hauv cov Yus Das txog niaj hnub no.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 28th March 2016, 4:22 am

    TIM    29    LUB    3    HLIS    2016

    Hnub Peb Lis Piam Hla Xyoo C

    Zaj Nyeem Ib:     HAUJ LWM   2:  36-41


    Pob Zeb hais rau tsoom neeg His Xas Lais tias:
    36 "Tsoom His Xas Lais, nej yuav paub meej tias : Tswv Ntuj tsa tus Yes Xus uas nej tau dai saum ntoo cuam, ua Huab Tais thiab ua Leej Pleev." 37 Cov lus ntawd phua rhe sawv daws lub siab, ces lawv hais rau Pob Zeb thiab rau cov Hauv Paus Xa Lus tias : "Kwv tij, peb yuav ua dab tsi ?" 38 Pob Zeb teb rau lawv tias : Nej yuav thov txhaum, thiab nej txhia leej txhia tus yuav txais lub cim ntxuav nyob hauv Yes Xus Pleev lub npe kom Ntuj zam txhaum rau nej. Ces nej yuav txais Leej Ntuj Plig Ntshiab cov paj tshab. 39 Vim muaj kev cog lus li ntawd rau nej, thiab rau nej cov me nyuam, thiab rau tas cov neeg nyob deb uas Huab Tais peb tus Tswv Ntuj yuav hu lawv los." 40 Pob Zeb tseem hais ntau lo lus qhuab qhia thiab ntuas lawv. Nws hais tias : "Nej khiav kom nej dim ntawm tiam neeg xib rau kev phem no." 41 Cov neeg ntawd mloog Pob Zeb cov lus, lawv txais lub cim ntxuav. Hnub ntawd, muaj ze ntawm peb txhiab leej los ntxiv cov thwj tim.

    NPN     33:  4-5, 18-19, 20 + 22

    Txais:    (5b)  Lub ntiaj teb puv nkaus Huab Tais txoj kev ua zoo.      Los:     As les lus yas.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais:    (5b) Huab Tais txoj kev hlub nyob puv nkaus lub ntiaj teb. Los:     As les lus yas.

    Ntsias saib HUAB TAIS lub qhov muag saib ntsoov cov neeg hwm nws,
    saib ntsoov cov tso siab rau nws txoj kev hlub,
    tias nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais:    (5b) Lub ntiaj teb puv nkaus Huab Tais txoj kev ua zoo.      Los:     As les lus yas.

    Peb tus ntsuj plig tos ntsoov HUAB TAIS:
    nws yog tus pab peb, nws yog peb daim leem phiaj !
    HUAB TAIS, thov kom koj lub siab hlub roos peb,
    vim koj yog peb qhov chaw vam khom !

    Txais:    (5b) Lub ntiaj teb puv nkaus Huab Tais txoj kev ua zoo.     Los:     As les lus yas.

    As Les Lus Yas:     NPN  118:  24

    Txais:    As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.  

    Txais:    As les lus yas, as les lus yas.

    Ntawv Moo Zoo:     ZAM  20:  11-18

    11 Mab Liab sawv ze lub ntxa sab nraud, nws quaj. Thaum nws quaj, nws khoov rau hauv lub ntxa. 12 Ces nws pom ob tug Tshiab hnav dawb zaum hauv qhov chaw uas lawv tso Yes Xus lub cev, ib tug zaum pem yav taub hau, ib tug zaum nram yav ko taw. 13 Ob tug Tshiab hais rau Mab Liab tias: "Tus poj niam, ua cas koj quaj ?" Mab Liab hais rau nkawd tias : "Vim lawv nqa kuv tus Huab Tais lawm, kuv tsis paub lawv muab nws tso qhov twg." 14 Hais li ntawd tas, Mab Liab tig ntsia tom qab. Nws pom Yes Xus sawv ntsug nyob ntawd. Tab sis nws tsis paub tias yog Yes Xus. 15 Yes Xus hais rau Mab Liab tias : "Phauj, ua cas koj quaj ? Koj nrhiav leej twg ?" Mab Liab xav tias yog tus saib lub vaj, ces Mab Liab hais rau nws tias : "Huab tais, yog koj nqa nws lub cev lawm no, koj qhia kuv saib koj muab tso qhov twg lawm, kuv yuav mus nqa nws los." 16 Yes Xus hais rau Mab Liab tias : "Mab Liab !" Mab Liab tig hlo mus, nws ua lus Hes Nplaws hais tias : "Las Npus Nis !" Txhais tias : Xib Hwb. 17 Yes Xus hais rau Mab Liab tias : "Koj txhob tuav kuv, vim kuv tseem tsis tau nce mus cuag Leej Txiv. Koj mus cuag kuv cov kwv tij, koj hais rau lawv tias : Kuv nce mus cuag kuv Txiv thiab nej Txiv, mus cuag kuv tus Tswv Ntuj thiab nej tus Tswv Ntuj." 18 Mab Liab Mas Ntas Las thiaj los tshaj rau cov thwj tim hais tias : "Kuv pom Huab Tais lawm, nws hais cov lus no rau kuv."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 31st March 2016, 4:03 am

    TIM 30 LUB 3 HLIS 2016

    HNUB Plaub Lis Piam Hla Xyoo C

    Zaj Nyeem Ib: HAUJ LWM 3: 1-10


    1 Pob Zeb thiab Zam nkawd nce mus pem lub Tuam Tsev Teev Ntuj, mus ua zaj teev ntuj thaum teev cuaj. 2 Thaum ntawd, luag coj ib tug neeg tuag ceg nruab thiab tuaj. Lawv niaj hnub muab nws tso rau ntawm lub qhov rooj mus hauv lub Tuam Tsev Teev Ntuj, uas hu ua Zoo Nkauj, kom tus tuag ceg tau kev thov khawv ntawm cov neeg uas chaws mus hauv. 3 Thaum nws pom Pob Zeb thiab Zam nkawd tab tom yuav chaws mus hauv, ces nws thov khawv ntawm nkawd. 4 Pob Zeb ntsia ntsoov nws, Zam kuj ntsia ntsoov thiab. Pob Zeb hais tias : "Koj ntsia wb." 5 Tus tuag ceg ntsia ntsoov nkawd, tsis ntsais muag, nws xav tias nws yuav tau ib yam dab tsi. 6 Tab sis Pob Zeb hais tias : "Nyiaj thiab kub mas kuv tsis muaj. Tab sis qhov kuv muaj, mas kuv muab pub rau koj : Kuv tuav txog Yes Xus Pleev, tus Nas Xas Les lub npe, koj mus kev !" 7 Ces Pob Zeb tuav nkaus tus tuag ceg sab tes xis, rub nws sawv. Tam sim ntawd, nws ob txhais taw thiab nws ob lub pob luj taws ruaj nrees tuaj. 8 Nws tib plhaw, sawv tsees, ces nws mus taus kev. Nws nrog nkawd chaws mus hauv lub Tuam Tsev. Nws rhais ruam mus kev, nws dhia tej paj paws thiab nws cav txog Tswv Ntuj. 9 Tas tsoom pej xeem pom nws rhais ruam mus kev thiab cav txog Tswv Ntuj. 10 Sawv daws zeem tau nws : yog tus zaum thov khawv ntawm lub Qhov Rooj Zoo Nkauj tiag. Sawv daws ntshai, ua siab poob nthav txog qhov uas nyuam qhuav tshwm sim tuaj rau tus tuag ceg.

    NPN 105: 1-2, 3-4, 6-7, 8-9

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nej ua HUAB TAIS tsaug, nej hu txog nws lub npe,
    nej qhia nws cov hauj lwm nto koob meej rau cov haiv neeg paub.
    Nej seev nkauj rau HUAB TAIS, nej ntaus paj nruag rau nws ;
    nej piav txog nws cov hwj huam yees ntxwv tas tib si.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nej nrhiav koob meej rau nej nyob hauv nws lub npe,
    cov uas muaj lub siab nrhiav Huab Tais, nej cia li zoo siab!
    Nej nrhiav HUAB TAIS thiab nws lub zog,
    nrhiav nws lub ntsej muag tsis tseg.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Has Nplas Has tsoom xeeb ntxwv, nws cov tub txib,
    Yas Kos cov tub, cov uas nws tau xaiv,
    Nws yog HUAB TAIS peb tus Tswv Ntuj,
    Nws tej cai tswj tas lub ntiaj teb.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    Nws nco ntsoov mus li cov lus nws cog cia,
    yog ib co lus cog ruaj rau txhiab tiam tub ki.
    Yog cov lus nws tau nrog Has Nplas Has cog,
    nws tau rov zeem tseeb rau His Xas Has.

    Txais: (3b) Cov uas muaj lub siab nrhiav Huab Tais, nej cia li zoo siab.
    los : As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: LK 24: 13-35

    13 Tib hnub ntawd, ob leeg hauv cov thwj tim taug kev mus rau ib lub zos hu ua Es Mas Ws, deb li rau caum ncuas kev ntawm Yes Lus Xas Les. 14 Nkawd sib tham txog txhua tsav yam xwm uas tau tshwm sim tuaj. 15 Thaum nkawd piav thiab sib tham txog tej ntawd, Yes Xus caum tau nkawd, nws nrog nkawd mus kev. 16 Tab sis nkawd qhov muag zeem tsis tau Yes Xus. 17 Ces Yes Xus hais rau nkawd tias : "Neb sib tham txog tej lus dab tsi taug kev ?" Ces nkawd nres, nkawd ntsej muag ntshaus tas. 18 Tus hu ua Khes Os Fas qhib ncauj hlo hais tias : "Tas cov neeg tuaj pem Yes Lus Xas Les, ntshai koj tib leeg xwb thiaj tsis paub txog qhov uas tau tshwm sim ob peb hnub no !" 19 Yes Xus hais rau nkawd tias : "Muaj dab tsi ?" Nkawd hais rau Yes Xus tias : "Tej xwm uas hais txog Yes Xus Nas Xas Les. Nws yog ib tug yaj saub ua tau tej hauj lwm thiab hais tau tej lus muaj hwj huam, nyob ntawm Tswv Ntuj thiab tsoom pej xeem xub ntiag. 20 Tab sis peb cov Thawj Leej Choj thiab peb cov nom tswv ntes nws rau luag, kom luag txiav lub txim tuag rau nws thiab muab nws dai saum ntoo cuam. 21 Peb mas peb vam tias nws yog tus yuav txhiv His Xas Lais. Tsis tag li ntawd, tej xwm no tshwm sim tau peb hnub, 22 ces ob peb tug poj niam uas yog peb cov neeg, tseem ua rau peb poob siab tas. Tag kis no, lawv sawv ntxov mus tom ntxa, 23 lawv nrhiav tsis tau nws lub cev. Lawv rov los hais rau peb tias ib cov Tshiab tawm los rau lawv pom. Cov Tshiab hais tias Yes Xus muaj txoj sia nyob. 24 Cov nrog peb, ob peb leeg kuj tau mus txog tom lub ntxa, lawv pom txhua yam raws li cov poj niam hais, tab sis lawv kuj tsis pom nws lub cev thiab." 25 Ces Yes Xus hais rau nkawd tias : "Ua cas nej lub siab yuav ruam ua luaj, thiab yuav ntseeg qeeb ua luaj txog tas txhua yam uas cov Yaj Saub tau tshaj los ! 26 Tej ntawd tsis yog txoj kev tsim txom uas Leej Pleev yuav tsum raug tso, nws mam li mus hauv nws lub koob meej lod ?" 27 Yes Xus txhais cov Ntawv uas sau txog nws, txij Mais Xes los txog cov Yaj Saub tas huv tib si rau nkawd. 28 Thaum lawv tuaj yuav txog lub zos uas ob tug thwj tim mus, Yes Xus ua txuj yuav mus ntxiv. 29 Tab sis nkawd cheemYes Xus tias : "Nrog wb nyob mas ! Yuav tsaus ntuj, lub hnub twb yuav poob qho." Yes Xus thiaj chaws mus hauv tsev, nws nrog nkawd nyob. 30 Thaum nws nrog nkawd zaum ntawm rooj mov, nws tuav lub ncuav mov, nws hais zaj foom hmoov zoo, nws muab lub ncuav mov ntais, nws cev rau nkawd. 31 Ces nkawd qhov muag qhib plho, nkawd zeem tau Yes Xus... Tab sis Yes Xus ploj ntais ntawm nkawd xub ntiag lawm. 32 Ces nkawd rov sib tham tias : "Thaum nws hais lus rau wb tom kev, thiab nws txhais Ntawv rau wb, mas wb lub siab kub lug hauv nrog cev, puas yog ?" 33 Ces nkawd sawv tsees tam sis ntawd, rov mus Yes Lus Xas Les. Nkawd los pom Pab Kaum Ib nrog lawv cov npawg sib txoos ua ke. 34 Lawv hais tias : "Huab Tais sawv rov los lawm tiag, nws tawm los rau Xis Moos pom !" 35 Ces nkawd piav qhov uas tshwm tuaj nyob tom kev, thiab piav tias Huab Tais ua dab tsi, nkawd thiaj zeem tau nws thaum nws ntais lub ncuav mov.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 31st March 2016, 4:09 am

    TIM 31 LUB 3 HLIS 2016

    Hnub Tsib Lis Piam Hla Xyoo C

    Zaj Nyeem Ib: HAUJ LWM 3: 11-26


    11 Tus tuag ceg tsis tso Pob Zeb thiab Zam nkawd tseg li. Ces tas tsoom pej xeem ntshai, lawv khiav tuaj vij nkawd nyob hauv lub qab ruv tsev uas hu ua Xas Los Moos. 12 Pob Zeb pom li ntawd, nws hais rau tsoom pej xeem hais tias : "Cov His Xas Lais, vim li cas nej poob siab rau qhov ntawd ? Vim li cas nej qhov muag ntsia ntsoov rau peb, xws li peb yog neeg muaj hwj huam thiab txawj thov Ntuj, ua kom tus neeg ntawd mus taus kev ? 13 Yog Has Nplas Has, His Xas Has, thiab Yas Kos tus Tswv Ntuj, thiab peb cov yawg koob tus Tswv Ntuj muab koob meej rau nws tus tub txib Yes Xus, uas nej muab nws ntes. Thaum Pis Las Tos xav tso nws mus, mas nej tsis kam lees nws. 14 Nej tsis lees tus siab Ntshiab thiab siab Ncaj. Nej thov kom luag zam rau ib tug tua neeg. 15 Hos nej muab tus Tswv pub txoj sia tua. Tiam sis Tswv Ntuj tsa nws sawv hauv cov tub tuag rov los lawm. Peb ua tim khawv pom. 16 Yog vim peb ntseeg txog nws lub npe, mas nws lub npe thiaj li ua kom tus neeg ntawd muaj zog, uas yog tus nej pom kam nws thiab paub nws. Yog txoj kev ntseeg txog Yes Xus tsa tus neeg ntawd kom nws lub cev zoo hlo rau ntawm nej xub ntiag. 17 Kwv tij sawv daws, kuv paub hais tias thaum nej ua li ntawd, nej yeej tsis paub dab tsi. Nej cov nom los kuj tsis paub thiab. 18 Li ntawd, Tswv Ntuj ua raws li nws tau xuas cov Yaj Saub lub ncauj xub hais ntxov los tias nws Leej Pleev yuav raug luag tsim. 19 Ua li mas nyem no, nej yuav thov txhaum thiab nej yuav tig los hloov ib lub siab tshiab kom Ntuj so nej cov txhaum. 20 Ces Huab Tais yuav pub ib co sij hawm zam rau sawv daws, thiab nws yuav xa tus uas nws ib txwm npaj cia ua Leej Pleev tuaj rau nej : Yes Xus, 21 tus uas lub ntuj yuav tau txais nws mus txog lub zim txwv tas txhia yam yuav rov plhis dua tshiab. Raws li Tswv Ntuj xuas nws cov yaj saub ntshiab lub ncauj xub qhia thaum ub. 22 Mais Xes xub hais tias : Huab Tais Tswv Ntuj yuav muab nej ib tug kwv tij tsa ua Yaj Saub xws li kuv. Nej yuav mloog tas puas tsav yam nws qhia rau nej. 23 Leej twg tsis mloog tus Yaj Saub ntawd, mas luag yuav muab nws thau ntawm peb haiv neeg mus. 24 Tas cov yaj saub tom qab no, txij Xas Muas los rau cov hloov nws, sawv daws kuj tau hais txog tej yam uas tshwm sim ob peb hnub no. 25 Nej yog cov yaj saub ntawd cov tub. Nej yog cov neeg txais lo lus Tswv Ntuj cog rau peb cov yawg koob, raws li Tswv Ntuj hais rau Has Nplas Has tias : Tas ib tsoom haiv neeg nyob ntiaj teb no yuav tau txais ib txog hmoov zoo nyob hauv koj cov xeeb zeej xeeb ntxwv. 26 Yog vim nej, mas Tswv Ntuj thiaj tsa nws Leej Tub sawv rov los, thiab Tswv Ntuj tso nws tuaj foom hmoov zoo rau nej thiab pab nej ncaim ntawm nej txoj kev phem."

    NPN 8: 2AB + 5, 6-7, 8-9

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    HUAB TAIS, peb tus Tswv Ntuj,
    koj lub npe muaj hwj xyeej nyob puv tas ntiaj teb.
    Neeg yog dab tsi, koj thiaj quav ntsej txog?
    As Das tus tub yog dab tsi, koj thiaj li txhawj txog?

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    Koj muab neeg tsa siab yuav luag cuag ib tug tswv ntuj.
    Koj muab hwj chim thiab meej mom zoo rau neeg ntoo.
    Koj tsa neeg kav txhua yam koj txhais tes tsim los,
    koj tso tas puas tsav yam rau hauv neeg qab xib taws :

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    tas tej me yaj, me nyuj huv tib si,
    thiab tas tsoom tsiaj qus nyob nruab nrag,
    me noog ya saum ntuj, me ntses nyob hauv dej ntuj,
    thiab tas txhua hom tsiaj khiav hauv dej ntuj.

    Txais: (2ab) HUAB TAIS, peb tus Tswv Ntuj, koj lub npe muaj hwj xyeej nyob puv tas ntiaj teb!
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: LK 24: 35-48

    35 Ces nkawd piav qhov uas tshwm tuaj nyob tom kev, thiab piav tias Huab Tais ua dab tsi, nkawd thiaj zeem tau nws thaum nws ntais lub ncuav mov. 36 Thaum lawv tseem sib tham txog tej lus ntawd, Yes Xus sawv ntsug hauv nruab nrab lawv, nws hais rau lawv tias : "Nej nyob kaj lug." 37 Cov thwj tim ceeb nkaus, lawv ntshai kawg, lawv xav tias lawv pom ib tug dab. 38 Ces Yes Xus hais rau lawv tias : "Vim li cas nej poob siab ? Vim li cas tej zaj ua xyem xyav li ntawd sawv los nyob hauv nej lub siab ? 39 Nej ntsia kuv ob txhais tes thiab ob txhais taw : yog kuv tiag ! Nej xuas kuv saib ! Nej ntsia mas : dab tsis muaj nqaij tsis muaj pob txha, xws li nej pom kuv muaj." 40 Yes Xus hais li ntawd tas, nws muab nws ob txhais tes ob txhais taw rau lawv saib. 41 Lawv zoo siab dhau, lawv tseem tsis tau xav ntseeg. Lawv yoob tas. Yes Xus hais rau lawv tias : "Nyob ntawm no, nej muaj dab tsi noj ?" 42 Lawv muab ib ya ntses txhiab rau Yes Xus. 43 Yes Xus tuav, nws noj yav ntses ntawd nyob ntawm lawv xub ntiag. 44 Yes Xus hais rau lawv tias : "Thaum kuv tseem nrog nej nyob, kuv hais cov lus no rau nej : Tas ib puas tsav yam uas Mais Xes Txoj Cai, cov Yaj Saub, thiab cov Nkauj Paj Nruag sau txog kuv, yuav tsum tshwm sim kom tiav." 45 Ces Yes Xus qhib lawv lub tswv yim kom lawv to taub Ntawv. 46 Nws hais rau lawv tias : "Ntawv sau hais tias Leej Pleev yuav raug luag tsim txom. Hnub peb, nws yuav sawv hauv cov tuag rov los. 47 Thiab Ntawv tseem hais tias yuav tsum tshaj txoj kev tig los hloov siab ntxub kev txhaum kom Ntuj zam txhaum rau ib tsoom haiv neeg nyob hauv Leej Pleev lub Npe. Yuav xub tshaj nyob Yes Lus Xas Les. 48 Nej yuav ua tim khawv txog tej ntawd.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 31st March 2016, 4:14 am

    TIM 1 LUB 4 HLIS 2016

    Thawj Hnub Rau Lis Piam Hla Xyoo C

    Zaj Nyeem Ib: HAUJ LWM 4: 1-12


    1 Pob Zeb thiab Zam nkawd tseem tab tom hais lus rau tsoom pej xeem, ces cov leej choj, tus tswj lub Tsev Txoos, thiab cov Xas Dus Kais tuaj txog. 2 Lawv tsis zoo siab rau qhov tias nkawd qhia tsoom sid thiab nkawd tshaj tias neeg tuag yuav sawv rov los xws li Yes Xus. 3 Lawv ntes nkawd thiab coj nkawd mus kaw hauv tsev loj faj txog kaj ntug, vim thaum ntawd twb tsaus ntuj lawm. 4 Tiam sis muaj ntau leej uas tau hnov nkawd lo lus kuj txais kev ntseeg. Suav cov txiv neej xwb, cov ntseeg muaj nto tsib txhiab leej tej lawm. 5 Hnub tom qab, cov nom tswv Yus Das, cov laus neeg, thiab cov kws ntawv, sawv daws tuaj sib sau nyob Yes Lus Xas Les. 6 Tus thawj leej choj As Nas kuj nyob ntawd, Kais Fas, Yos Nas Thas, As Les Xas Nrias thiab cov uas yog caj ces ua leej choj puav leej tuaj nyob ntawd tas huv tib si. 7 Lawv kom luag coj ob tug Hauv Paus Xa Lus los, ces lawv nug nkawd tias : "Leej twg muab cai rau neb, thiab neb tuav txog leej twg lub npe los ua tej ntawd" ? 8 Ces Pob Zeb muaj Leej Ntuj Plig nyob puv hauv nws, nws hais rau lawv tias : "Cov nom tswv coj tsoom pej xeem, thiab tsoom laus neeg sawv daws : 9 Hnub no, nej kom wb hais tseeb txog qhov tias ib tug tuag ceg zoo lawm, thiab tim li cas nws thiaj li zoo lawm. 10 Nej sawv daws, thiab tas tsoom His Xas Lais huv tib si, nej yuav tsum paub tias yog nyob hauv Yes Xus Pleev lub npe, tus Yes Xus Nas Xas Les uas nej muab dai saum ntoo cuam, tab sis Tswv Ntuj tsa nws sawv hauv cov tub tuag rov los lawm, yog nyob hauv nws lub npe tsis yog lwm tus npe, tus neeg no thiaj sawv zoo hlo li no rau nej pom. 11 Yes Xus yog lub pob zeb uas nej cov txhim tsev muab pov tseg, zaum no nws yog thawj lub pob zeb txheem lub tsev. 12 Kev cawm neeg tsuas muaj nyob hauv nws ib leeg xwb, vim nyob hauv tas lub qab ntuj khwb tsis muaj dua lwm lub npe yuav cawm tau peb lawm."

    NPN 118: 1-2 + 4, 22-24, 25-27A

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    Nej ua HUAB TAIS tsaug, vim nws siab zoo,
    Nws hlub peb tas ib txhiab ib txhis!
    Xav kom His Xas Lais tsev neeg hais tias :
    Nws hlub peb tas ib txhiab ib txhis!
    Xav kom cov neeg hwm HUAB TAIS hais tias :
    Nws hlub peb tas ib txhiab ib txhis!

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    Lub pob zeb uas cov txhim tsev muab pov tseg The stone which the builders rejected
    txia ntshis ua lub pob zeb txheem tsev. has become the cornerstone.
    Qhov ntawd yog tuaj ntawm HUAB TAIS tuaj
    yog ib yam txaus qhuas rau peb qhov muag pom !
    Hnub no yog hnub HUAB TAIS tau tsim,
    peb zoo siab thiab yuav luag ntxhi hauv hnub no.

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    HUAB TAIS, peb thov koj, thov koj pub kev cawm !
    HUAB TAIS, peb thov koj, thov koj pub kev yeej !
    Tus tuaj nyob hauv HUAB TAIS lub npe, nws nto koob meej!
    Peb nyob hauv HUAB TAIS tsev foom koob hmoov rau nej.
    HUAB TAIS yog Tswv Ntuj, nws ua kom peb pom kev :

    Txais: (22) Lub pob zeb uas cov txhim tsev muab pov tseg txia ua lub pob zeb txheem tsev.
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: ZAM 21: 1-14

    1 Dua li ntawd, Yes Xus rov tawm los rau cov thwj tim pom nyob ntawm ntug dej ntuj Tis Npes Lias. Thaum Yes Xus tawm los mas muaj zoo li no. 2 Cov nyob ua ke ntawd yog Xis Moos Pob Zeb, Tos Mas uas hu ua Dis Dws Mos, Nas Tas Nais uas nyob Kas Nas hauv xeev Nkas Lis Lais, Ntxes Npes Dais ob tug tub, thiab ob tug thwj tim ntxiv. 3 Xis Moos Pob Zeb hais rau lawv tias : "Kuv yuav mus puav ntses." Lawv hais rau nws tias : "Peb nrog koj mus thiab." Lawv tawm mus nce rau hauv lub nkoj. Hmo ntawd lawv puav tsis tau dab tsi li. 4 Thaum kaj ntug lawm, Yes Xus nyob tim ntug dej. Tab sis cov thwj tim tsis paub tias yog Yes Xus. 5 Yes Xus thiaj hais rau lawv tias : "Cov me nyuam, nej puas muaj dab tsi noj ?" Lawv teb rau Yes Xus tias : "Tsis muaj." 6 Nws hais rau lawv tias : "Nej pov vas rau ntawm lub nkoj sab xis, nej yuav tau ntses." Lawv thiaj pov vas mus, ces lawv rub tsis tau lub vas rov los, vim mag tau ntses ntau kawg. 7 Tus thwj tim uas Yes Xus nyiam thiaj hais rau Pob Zeb tias : "Yog Huab Tais !" Xis Moos Pob Zeb hnov dheev tias yog Huab Tais, nws muab ib daim khaub ncaws khi ntawm duav, vim nws liab qab, ces nws dhia mus hauv dej. 8 Lwm cov thwj tim mam li caij nkoj thiab cab lub vas puav ntses los. Lawv nyob tsis deb ntawm ntug nqhuab lawm, kwv yees deb li ob puas tshim. 9 Thaum lawv nqes los txog saum av, lawv pom ib cub tawg thee nyob ntawd, hos muaj ib co ntses tso rau saud, thiab ib co ncuav mov. 10 Yes Xus hais rau lawv tias : "Nej nqa cov ntses me uas nej nyuam qhuav puav tau los." 11 Xis Moos Pob Zeb nce mus hauv nkoj, nws rub lub vas mag ntses loj puv nkaus los rau saum av : tau ib puas tsib caug peb tus ntses ! Txawm tias puav tau ntses ntau npaum ntawd, tsis kav lub vas tsis ntuag. 12 Yes Xus hais rau lawv tias : "Nej los noj tshais." Tsis muaj ib tug thwj tim muaj cuab kav nug Yes Xus tias : "Koj yog leej twg ?" Vim lawv yeej paub tseeb tias yog Huab Tais. 13 Yes Xus txav los muab cov ncuav mov cev rau lawv, nws kuj muab cov ntses cev rau lawv thiab. 14 Txij thaum Yes Xus sawv hauv cov tuag rov los, mas nws tawm los rau cov thwj tim pom, zaum no yog zaum peb.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 1st April 2016, 5:17 am

    TIM 2 LUB 4 2016

    Thawj Hnub Xya Lis Piam Hla Xyoo c

    Zaj Nyeem Ib: HAUJ LWM 4: 13-21


    13 Cov nom txiav txim pom Pob Zeb thiab Zam nkawd lub siab tawv, thiab lawv pom tias nkawd yog neeg tsis tau kawm txuj ci, thiab tsis muaj kev txawj ntse, ces cov kev txwj laus neeg ua siab poob nthav. Lawv kuj rov zeem tau tias nkawd yog cov uas tau nrog Yes Xus ua ke. 14 Ib ziag ntawd, lawv kuj pom tus neeg uas nkawd kho zoo, sawv ntsug nyob ze nkawd. Ces lawv tsis pom qab teb dab tsi. 15 Lawv kom coj nkawd tawm ntawm lub tsev txiav txim mus, ces lawv mam sab laj ua ke hais tias : 16 "Peb yuav ua dab tsi rau ob tug neeg ntawd ? Qhov tias nkawd tau ua ib yam hwj huam yees ntxwv loj kawg, mas tas cov neeg nyob Yes Lus Xas Les paub tas lawm, peb dag tsis tau tias nkawd tsis tau ua. 17 Tiam sis yuav kom cov pej xeem tsis txhob ntseeg zuj zus ntxiv, mas peb yuav txwv nkawd, tsis pub nkawd hais txog lub Npe ntawd ntxiv rau leej twg li." 18 Ces lawv hu Pob Zeb thiab Zam nkawd rov los, lawv txwv tsis kheev nkawd hais dab tsi. 19 Tiam sis Pob Zeb thiab Zam nkawd teb hais tias : "Yog nej thiaj paub txiav saib Tswv Ntuj pom zoo wb mloog nej, los wb mloog Tswv Ntuj. 20 Hos wb, mas yog wb tsis tshaj tej yam wb tau pom tau hnov mas wb nyob tsis taus." 21 Cov nom tswv tseem hem nkawd ntxiv, ces lawv tso nkawd mus : lawv tsis pom qab muab txim dab tsi rau nkawd, vim lawv ntshai cov pej xeem. Sawv daws cav txog Tswv Ntuj rau tej yam tshwm sim tuaj.

    NPN 118: 1 + 14-15AB, 16-18, 19-21

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    Nej ua HUAB TAIS tsaug, vim nws siab zoo,
    Nws hlub peb tas ib txhiab ib txhis.
    Kuv lub zog, kuv lub peev xwm yog HUAB TAIS !
    Nws yog tus cawm kuv.
    Muaj suab zoo siab suab yeej rog qw ntsuag qees
    hauv tsoom neeg siab ncaj cov tsev tsam phooj :

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    "HUAB TAIS txhais xis muaj zog loj !
    HUAB TAIS txhais xis ntaus yeej lawm! "
    Kuv yuav tsis tuag, kuv yuav muaj txoj sia,
    thiab yuav tshaj txog HUAB TAIS cov dej num :
    HUAB TAIS rau txim hnyav rau kuv,
    tiam sis nws tsis tau tso kuv raug txoj kev tuag.

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    Nej qhib lub rooj vag mus rau hauv txoj kev ncaj rau kuv,
    kuv yuav chaws mus ua HUAB TAIS tsaug.
    Ntawm no yog HUAB TAIS lub rooj vag ,
    Cov muaj siab ncaj yuav tau chaws mus hauv.
    Kuv yuav ua koj tsaug, vim koj tau teb kuv lawm,
    koj yog tus cawm kuv.

    Txais: (21a) Kuv yuav ua koj tsaug, vim koj tau teb kuv.
    los: As les lus yas.

    As Les Lus Yas: NPN 118: 24

    Txais: As les lus yas, as les lus yas.

    Hnub no yog hnub Huab Tais tau Tsim,
    peb yuav zoo siab thiab yuav luag ntxhi hauv hnub no.

    Txais: As les lus yas, as les lus yas.

    Ntawv Moo Zoo: MK 16: 9-15

    9 Thaum Yes Xus sawv rov los lawm, hnub chiv lub lis piam, thaum sawv ntxov, Yes Xus tawm los rau Mab Liab Mas Ntas Las pom. Mab Liab yog tus uas Yes Xus ntiab xya tus dab phem tawm. 10 Mab Liab mus qhia lub moo ntawd rau cov tau nrog Yes Xus nyob, vim lawv tu siab thiab lawv quaj. 11 Thaum lawv hnov hais tias Yes Xus tseem muaj txoj sia nyob, thiab Mab Liab Mas Ntas Las twb tau pom nws, mas lawv tsis ntseeg. 12 Dhau qhov ntawd lawm, Yes Xus txia ua ib tug txawv, nws tawm tuaj rau ob leeg hauv lawv pom, thaum nkawd tab tom taug kev tom cov nras teb. 13 Ob tug ntawd rov los qhia rau cov, tab sis lawv kuj tsis ntseeg nkawd thiab. 14 Tom qab no, Yes Xus tawm los rau Pab Kaum Ib pom, thaum lawv tab tom noj mov. Yes Xus yws lawv lub siab tsis ntseeg thiab lub siab txhav, vim lawv tsis ntseeg cov uas tau pom Yes Xus sawv rov los. 15 Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 3rd April 2016, 7:59 am

    TIM  4 LUB 4 HLIS   2016

    Hnub Ob Lis Piam Ob Caij Hla Xyoo C

    Hwm txog lub Caij tus Tshiab Tuaj Xa Lus rau Mab Liab


    Nej nco tias niaj xyoo peb ua kev nco txog tus Tshiab tuaj xa lus rau Mab Liab yog tim 25 lub 3 hlis, tiam sis xyoo no tim 25 lub 3 hlis yog Hnub Rau Ntshiab, vim li ntawd thiaj muab hloov los rau hnub no.

    Zaj Nyeem Ib:      HIS XAIS   7:  10-14; 8:  10c

    10 HUAB TAIS kom His Xais rov mus hais rau As Kas : 11 "Koj thov koj tus HUAB TAIS Ntuj kom nws ua ib lub cim rau koj nyob puag hauv qab ntuj txias teb tsaus, los nyob saum cov chaw siab, puag saum ub." 12 As Kas hais tias : "Kuv yuav tsis thov. Kuv yuav tsis sim HUAB TAIS." 13 His Xais hais tias : "Das Vis tsev neeg, nej mloog ! Nej ua kom tej tib neeg ceeb laj tas nrho los tsis txaus nej siab ! Nej tseem yuav ua kom Tswv Ntuj ceeb laj thiab. 14 Vim li ntawd, Huab Tais yuav pub ib lub cim rau nej. Nej ntsia saib ! Tus nkauj tsim txiaj xeeb tub lawm. Nws yuav yug ib tug tub. Nws yuav tis npe rau nws tus tub hu ua Es Mas Nus Es,
    8   10 txhais tias: “Tswv Ntuj nrog peb nyob!”

    NPN        40:  7-8A, 8B-9, 10, 11

    Txais:    (8a+9a) Kuv nyob ntawm no, Huab tais, kuv tuaj ua raws koj siab nyiam.

    Koj tsis  xav yuav tsiaj txi los txhiam xws cev rau koj,      
    koj muab ib lub pob ntseg hnov lus mloog lus rau kuv;
    koj tsis xav tau cov tsiaj hlawv txi ntuj los cov tsiaj them txim txhaum.
    Ces kuv hais tias: “Cia kuv tuaj.”    

    Txais:   Kuv nyob ntawm no, Tswv Ntuj, kuv tuaj ua raws koj siab nyiam.

    “Nyob hauv kauj ntawv, muaj lus sau tseg txog kuv;
    Kuv txoj kev zoo siab yog ua raws koj siab nyiam;
    Tswv Ntuj, koj txoj cai nyob rawv hauv kuv nruab siab!”  

    Txais:   Kuv nyob ntawm no, Tswv Ntuj, kuv tuaj ua raws koj siab nyiam.

    Kuv tau tshaj koj txoj kev ncaj nyob hauv lub txoos loj;
    kuv tsis tau kaw kuv qhov ncauj, Huab tais, koj yeej paub.

    Txais:   Kuv nyob ntawm no, Tswv Ntuj, kuv tuaj ua raws koj siab nyiam.

    Kuv tsis tau muab koj txoj kev ncaj zais cia rau nruab siab;
    kuv tau piav txog koj txoj kev ncaj thiab kev cawm neeg;
    kuv tsis tau zais tsis qhia koj txoj kev hlub thiab kev tseeb rau lub txoos loj.  

    Txais:   Kuv nyob ntawm no, Tswv Ntuj, kuv tuaj ua raws koj siab nyiam.

    Zaj Nyeem Ob:      HES NPLAWS   10:  4-10

    4 Vim ntshav nyuj ntshav tshis daws txhaum tsis tau. 5 Vim qhov ntawd, thaum Leej Pleev los nyob ntiaj teb no, nws thiaj hais tias : “Tswv Ntuj, cov thaj txi Ntuj thiab cov paj tshab, mas koj tsis xav yuav, koj thiaj puab ib lub cev rau kuv. 6 Cov thaj hlawv tsiaj thiab cov thaj txi Ntuj them txim txhaum, koj tsis zoo siab txais. 7 Kuv thiaj hais tias : “Tswv Ntuj, kuv tuaj ua raws li koj nyiam, raws li riam Ntawv sau hais txog kuv”. 8 Leej Pleev xub hais tias : “Cov thaj txi Ntuj, cov paj tshab, cov thaj hlawv tsiaj, cov thaj txi Ntuj them txim txhaum, koj tsis zoo siab txais : tej ntawd yog tej yam uas Txoj Cai qhia kom cev. 9 Leej Pleev hais ntxiv tias : “Kuv tuaj ua raws li koj nyiam.” Li ntawd, Leej Pleev rhuav thawj txoj cai, nws tsa ib txog tshiab los hloov. 10 Qhov Tswv Ntuj nyiam ntawd yog kom peb ntshiab tuaj nyob Yes Xus Pleev txoj kev cev nws lub cev  rau Ntuj, nws tsuas cev ib zaug xwb pub rau txhua leej txhua tus.

    As Les Lus Yas:     ZAM  1:  14AB

    Txais: As les lus yas, as les lus yas.

    Tswv Ntuj Lo Lus yuav ib lub cev nqaij thiab tuaj nrog peb nyob,
    peb tau pom nws lub hwj chim.  
    Txais: As les lus yas, as les lus yas.

    Ntawv Moo Zoo:    LK 1:  26-38

    26 Lub rau hli, Tswv Ntuj xa tus Tshiab Nkas Nplias mus cuag ib tug ntxhais hauv ib lub zos nyob Nkas Lis Lais. Lub zos ntawd hu ua Nas Xas Les. 27 Tus ntxhais ntawd, lawv muab qhaib rau ib tug txiv neej hu ua Yos Xes, xeem Das Vis. Hos tus ntxhais lub npe hu ua Mab Liab. 28 Tus Tshiab chaws mus hauv Mab Liab tsev, nws hais rau Mab Liab tias : "Koj nyob kaj lug, tus tau txiaj ntsim puv siab ! Huab Tais nrog koj nyob." 29 Mab Liab hnov lo lus ntawd, nws lub siab nphau npog, nws xav hauv nruab siab tias lo lus hawm ntawd yog dab tsi. 30 Tus Tshiab hais rau Mab Liab tias : "Mab Liab, koj tsis txhob ntshai. Tswv Ntuj saib koj ntxim Tswv Ntuj siab. 31 Zaum no, koj yuav xeeb tub, koj yuav yug ib tug tub, koj yuav tis nws npe hu ua Yes Xus. 32 Nws yuav yog ib tug loj, luag yuav hu nws ua tus Nyob Siab leej Tub. Huab Tais Tswv Ntuj yuav muab nws txiv Das Vis lub theej kiab rau nws. 33 Nws yuav ua vaj kav Yas Kos tsev neeg tiam dhau tiam. Nws txoj kev ua vaj yuav tsis muaj caij kawg." 34 Mab Liab hais rau tus Tshiab tias : "Qhov ntawd yuav muaj tuaj zoo li cas, vim kuv tsis paub ib tug txiv neej." 35 Tus Tshiab teb rau Mab Liab tias : "Leej Ntuj Plig Ntshiab yuav los nyob saum koj, tus Nyob Siab lub hwj huam yuav los roos koj. Li ntawd, tus ntshiab yug los yuav hu ua Tswv Ntuj Leej Tub. 36 Saib ! Es Lis Xas Npes, tus uas txheeb koj, luag hu nws ua pog khoom, nws hnub nyoog laus lawm, tab sis nws kuj xeeb tub lawm thiab. Lub hlis no, nws xeeb tub tau rau hli lawm. Vim tias, tsis muaj ib yam uas Tswv Ntuj ua tsis tau." 38 Ces Mab Liab hais tias : "Kuv yog Huab Tais tus ntxhais txib. Kuv xav kom muaj raws li koj hais." Tus Tshiab thiaj tso Mab Liab tseg.


    Last edited by Mim on 11th April 2018, 2:51 pm; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 4th April 2016, 6:59 am

    TIM    5   LUB   4     2016

    Hnub Peb Lis Piam Ob hauv Caij Hla Xyoo C

    Hwm LN Vincent Ferrer

    Zaj Nyeem Ib:     HAUJ  LWM   4:   32-37


    32 Tas ib tsoom ntseeg sawv daws muaj ib lub siab, ib lub tswv yim xwb. Tej yam uas yog nws li, tsis kav tsis muaj leej twg yuav hais tias yog nws tug xwb. Nyias muab nyias tug los ua sawv daws tug. 33 Cov Hauv Paus Xa Lus muaj hwj huam loj, lawv ua tim khawv txog Huab Tais Yes Xus sawv rov los, sawv daws hwm lawv zoo kawg. 34 Nyob hauv lawv, tsis muaj ib tug yuav tshaib nqhis dab tsi : vim tias cov uas muaj liaj muaj teb, muaj vaj tse, muab muag tas huv si, 35 lawv nqa tus nqi uas muag tau tuaj tso ntawm cov Hauv Paus Xa Lus ko taw. Lawv mam muab faib rau sawv daws kom nyias tau txaus nyias siv. 36 Muaj ib tug hu ua Yos Xes, cov Hauv Paus Xa Lus hu nws ua Npas Nas Npes - lub npe no txhais tias: tus txawj nplij neeg, nws yog xeem Les Vis, nws yug los nyob Kws Plos. 37 Npas Nas Npes muaj ib daim teb, nws muab muag, nws coj cov nyiaj tuaj tso ntawm cov Hauv Paus Xa Lus ko taw.

    NPN     93:   1AB, 1CD-2, 5

    Txais:    (1a) HUAB TAIS ua vaj, nws hnav hwj chim muaj tsim.
    los:     As les lus yas.    

    HUAB TAIS ua vaj, nws hnav hwj chim muaj tsim.
    HUAB TAIS hnav zam, nws muab lub zog los sia duav.

    Txais:    (1a) HUAB TAIS ua vaj, nws hnav hwj chim muaj tsim.
    los:     As les lus yas.

    Nws tsim Lub ntiaj teb nyob  ruaj nreb, tsis pub txav chaw.
    Koj lub theej kiab yeej nyob ruaj khov kho txij puag thaum ub los,
    Huab Tais, koj yeej ib txwm nyob txhiab niag tim puas xyoo los lawm.

    Txais:    (1a) HUAB TAIS ua vaj, nws hnav hwj chim muaj tsim.
    los:     As les lus yas.

    Koj cov cai tswj fwm tseeb thiab khov tas nrho,
    Huab Tais, txoj kev ntshiab tsab koj lub tsev
    kom zoo nkauj mus li txhua hnub lawm yav tom ntej.

    Txais:    (1a) HUAB TAIS ua vaj, nws hnav hwj chim muaj tsim.
    los:     As les lus yas.

    As Les Lus Yas:      ZAM   3:   14-15

    Txais:     As les lus yas, as les lus yas.    

    Neeg Leej Tub yuav tsum raug muab tsa siab,
    kom xwv txhua tus uas ntseeg txog nws, muaj txoj sia nyob mus li.

    Txais:     As les lus yas, as les lus yas.

    Ntawv Moo Zoo:        ZAM    3:   7B-15

    Yes Xus hais rau Nis Kos Des Mos tias:
    7b  Nej yuav tsum yug saum txheej siab los. 8 Cua xav tshuab lawm seem twg kuj tau. Koj hnov cua nrov, tab sis koj tsis paub cua tuaj qhov twg tuaj, thiab cua mus qhov twg. Tus uas yug ntawm Leej Ntuj Plig los kuj zoo ib yam li ntawd thiab.” 9 Nis Kos Des Mos teb rau Yes Xus tias : "Qhov ntawd yog zoo li cas ? 10 Yes Xus hais rau Nis Kos Des Mos tias : "Koj yog cov His Xas Lais ib tug xib hwb, koj tseem tsis paub tej ntawd lod? 11 Kuv hais qhov muaj tseeb tiag rau koj, peb hais yam peb paub, peb ua tim khawv txog tej uas peb pom, tab sis nej tsis txais peb cov lus ua tim khawv. 12 Thaum kuv hais txog tej yam nyob ntiaj teb no rau nej, nej twb tsis ntseeg. Yog kuv hais txog tej yam nyob saum ntuj rau nej, mas nej yuav ua cas ntseeg tau ? 13 Tsis muaj leej twg tau nce mus saum ntuj, tsuas yog tus nqes saum ntuj los, uas yog Neeg Leej Tub thiaj paub saum ntuj xwb. 14 Neeg Leej Tub yuav tsum raug muab tsa siab xws li Mais Xes tau tsa tus nab nyob teb chaws suab puam, 15 kom xwv txhua tus ntseeg txog nws, muaj txoj sia nyob mus li.




    Last edited by Mim on 5th April 2016, 3:38 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 5th April 2016, 3:37 am

    TIM    6    LUB    4      2016

    Hnub Plaub Lis Piam Ob  Caij Hla Xyoo C

    Zaj Nyeem Ib:       HAUJ LWM   5:    17-26


    17 Tus thawj leej choj thiab nws cov tub ncig uas yog tog Xas Dus Kais, sawv tuaj cuam tshuam. Lawv khib kawg, 18 ces lawv ntes cov Hauv Paus Xa Lus coj mus pov rau hauv tsev loj faj. 19 Tab sis hmo ntuj, Huab Tais tus Tshiab qhib cov qhov rooj hauv tsev loj faj, nws coj lawv tawm sab nraud, ces nws hais rau lawv tias : 20 "Nej ua siab tawv qhawv mus tshaj cov lus muaj Txoj Sia rau tsoom pej xeem nyob hauv lub Tuam Tsev Teev Ntuj." 21 Cov Hauv Paus Xa Lus ua raws li cov lus ntawd : thaum kaj ntug txoog, lawv chaws mus hauv lub Tuam Tsev Teev Ntuj, ces lawv pib qhia.
    Thaum ntawd, tus thawj leej choj nrog nws cov tub ncig tuaj txog. Lawv hu cov txwj laus Xas Nes Nrees thiab lub rooj sab laj laus neeg hauv cov tub His Xas Lais tas hu si tuaj. Ces luag tso neeg mus coj cov Hauv Paus Xa Lus tom tsev loj faj los. 22 Tab sis thaum cov zov keeb mus txog tom chaw, lawv tsis pom cov Hauv Paus Xa Lus nyob hauv tsev loj faj. Lawv thiaj rov los ceeb toom tias : 23 "Peb pom lub tsev loj faj kaw zoo, hos cov zov keeb nyob rawv ntawm cov rooj loog. Tab sis thaum peb qhib qhov rooj, peb tsis pom leej twg nyob sab hauv li." 24 Tus tswj zov lub Tuam Tsev Teev Ntuj thiab cov thawj leej choj hnov cov lus ntawd, lawv nyob hab nuv tsis to taub tias qhov ntawd yog vim li cas. 25 Ces txawm muaj ib tug neeg tuaj ceeb toom rau lawv tias : "Cov neeg uas nej muab kaw hauv tsev loj faj, mas nyem no lawv nyob hauv lub Tuam Tsev Teev Ntuj qhia tsoom pej xeem." 26 Tus tswj zov lub Tuam Tsev thiaj nrog nws cov neeg mus coj cov Hauv Paus Xa Lus rov los. Lawv tsis ua phem rau cov Hauv Paus Xa Lus, vim lawv ntshai tsam tsoom pej xeem txawb pob zeb l tua lawv.

    NPN        34:     2-3, 4-5, 6-7, 8-9

    Txais:     (7a) Huab Tais mloog tus pluag lub suab quaj.    
    los :   As les lus yas.

    Kuv yuav qhuas txog HUAB TAIS txhua lub sij hawm;
    lo lus cav txog nws yuav nyob rawv ntawm kuv lub ncauj.
    Kuv tus plig tau koob meej yog nyob hauv HUAB TAIS;
    kom tus neeg me hnov kuv thiab zoo siab.

    Txais:     (7a) Huab Tais mloog tus pluag lub suab quaj.    
    los :   As les lus yas.

    Nej nrog kuv cav txog HUAB TAIS lub koob meej,
    peb sawv daws ua ke qhuas nws lub npe.
    Kuv nrhiav HUAB TAIS, nws tau teb kuv,
    thiab tau cawm kuv ntawm tas kuv tej kev ntshai.

    Txais:     (7a) Huab Tais mloog tus pluag lub suab quaj.    
    los :   As les lus yas.

    Koj vam txog HUAB TAIS, ces koj ntsej muag yuav kaj lug luag ntxhi,
    koj ntsej muag yuav tsis liab ploog vim kev txaj muag.
    Thaum tus pluag hu, HUAB TAIS mloog
    thiab yuav cawm nws dim ntawm nws tej kev nyuaj ntxhov.

    Txais:     (7a) Huab Tais mloog tus pluag lub suab quaj.    
    los :   As les lus yas.

    HUAB TAIS tus tshiab tsa yeej
    ncig cov neeg hwm nws thiab cawm lawv dim.
    Nej saj ces nej yuav pom tias HUAB TAIS siab zoo npaum li cas.
    Tus muaj hmoov zoo yog tus mus nkaum nyob hauv HUAB TAIS.

    Txais:     (7a) Huab Tais mloog tus pluag lub suab quaj.    
    los :   As les lus yas.

    As Les Lus yas       ZAM     3:    16

    Txais:   As les lus yas, as les lus yas.

    Tswv Ntuj hlub lub qab ntuj neeg npaum no,
    nws thiaj muab nws Leej Tub twm zeej rau,
    kom xwv tus ntseeg txog nws muaj txoj sia nyob mus li.

    Txais:   As les lus yas, as les lus yas.

    Ntawv moo Zoo        ZAM   3:    16-21

    16 Vim Tswv Ntuj nyiam lub qab ntuj neeg npaum no : nws thiaj muab nws Leej Tub twm zeej rau, kom xwv tus ntseeg txog Leej Tub txhob tuag, tab sis kom nws muaj txoj sia nyob mus li. 17 Tswv Ntuj tsis xa Leej Tub tuaj hauv lub qab ntuj kom nws muab txim rau lub qab ntuj neeg, nws xa Leej Tub tuaj cawm lub qab ntuj neeg. 18 Tus ntseeg txog Leej Tub, nws tsis raug txiav txim. Tus tsis ntseeg, nws twb raug txiav txim lawm, vim nws tsis ntseeg txog Tswv Ntuj Leej Tub twm zeej lub npe. 19 Kev txiav txim yog zoo li no : Qhov pom kev tuaj nyob hauv lub qab ntuj neeg, tab sis tsoom neeg nyiam qhov tsaus ntuj dua qhov pom kev, vim lawv cov hauj lwm phem. 20 Tus twg ua qhov phem, mas nws ntxub qhov pom kev, ces nws tsis los nyob hauv qhov pom kev, vim nws ntshai tsam cov hauj lwm phem yuav qhib los. 21 Hos tus ua qhov tseeb, mas nws los nyob hauv qhov pom kev, kom luag pom tias nws ua nws cov hauj lwm nyob hauv Tswv Ntuj."


    Last edited by Mim on 11th April 2018, 4:16 pm; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 6th April 2016, 2:20 am

    TIM 7 LUB 4 HLIS 2016

    Hnub Tsib Lis Piam Ob Caij Hla Xyoo C

    Hwm LN John Baptist de la Salle

    Zaj Nyeem Ib: HAUJ LWM 5: 27-33


    27 Lawv coj cov Hauv Paus Xa Lus los txog, lawv kom mus sawv ntawm cov txwj laus Xas Nes Nrees xub ntiag. Tus Thawj leej choj nug cov Hauv Paus Xa Lus tias : 28 "Peb twb txwv nej, tsis kheev nej siv lub npe ntawd los qhia. Tab sis nej tseem qhia nej zaj ntawd mus thoob Yes Lus Xas Les. Yog nej xav kom tus neeg ntawd cov ntshav rov qab poob los rau saum peb xwb." 29 Ces Pob Zeb nrog cov Hauv Paus Xa Lus teb tias : "Yuav tsum mloog Tswv Ntuj lus zoo dua mloog neeg lus. 30 Tus Yes Xus uas nej muab nws dai saum ib tug ncej kom tuag, mas peb cov yawg koob tus Tswv Ntuj tau tsa nws sawv rov los lawm. 31 Nws yog tus uas Tswv Ntuj txhais tes xis tsa nws nyob siab kom nws ua tus Thawj thiab tus Cawm Seej. Yog vim nws, mas Tswv Ntuj thiaj pub txoj kev thov txhaum thiab kev zam txhaum rau His Xas Lais. 32 Peb yog cov tim khawv pom tej yam ntawd, thiab Leej Ntuj Plig Ntshiab uas Tswv Ntuj pub rau cov neeg mloog nws lus kuj ua tim khawv txog thiab." 33 Lawv hnov li ntawd mas lawv npau taws kawg, lawv xav muab cov Hauv Paus Xa Lus tua.

    NPN 34: 2 + 9, 17-18, 19-20

    Txais: (7a) Huab Tais mloog tus pluag lub suab quaj.
    los : As les lus yas.

    Kuv yuav cav txog HUAB TAIS txhua lub sij hawm;
    nws lub koob meej yuav nyob rawv ntawm kuv lub ncauj.
    Nej saj ces nej yuav pom tias HUAB TAIS siab zoo npaum li cas.
    Tus muaj hmoov zoo yog tus mus nkaum nyob hauv HUAB TAIS.

    Txais: (7a) Huab Tais mloog tus pluag lub suab quaj.
    los : As les lus yas.

    HUAB TAIS tig ntsej muag mus tiv cov neeg phem,
    rhuav kom txhob muaj chaw nco txog lawv nyob ntiaj teb ntxiv.
    Thaum cov neeg ncaj hu, HUAB TAIS mloog lawv,
    thiab npo lawv dim ntawm tas lawv txoj kev nyuaj siab.

    Txais: (7a) Huab Tais mloog tus pluag lub suab quaj.
    los : As les lus yas.

    HUAB TAIS nyob ze ze tus neeg muaj kev tu siab;
    nws pab cov neeg tag kev cia siab.
    Tus siab ncaj raug ntau yam kev nyuaj kev ntxhov,
    Tiam sis HUAB TAIS npo nws dim ntawm txhua yam.

    Txais: (7a) Huab Tais mloog tus pluag lub suab quaj.
    los : As les lus yas.

    As Les Lus Yas: ZAM 20: 29

    Txais: As les lus yas, as les lus yas.

    Huab Tais hais tias: "Tos Mas, koj ntseeg vim koj pom kuv.
    Cov uas tsis tau pom tab sis lawv ntseeg, mas lawv txoj hmoov zoo!"

    Txais: As les lus yas, as les lus yas.

    Ntawv Moo Zoo: ZAM 3: 31-36

    31 “Tus tuaj saum txheej saud tuaj, nws nyob siab dua sawv daws. Tus tuaj hauv ntiaj teb tuaj, nws yog ntiaj teb tug, nws hais txog tej yam nyob ntiaj teb. Tus tuaj saum ntuj tuaj, 32 nws ua tim khawv txog qhov nws pom thiab nws hnov, tab sis tsis muaj leej twg txais nws cov lus tim khawv. 33 Tus uas txais nws cov lus tim khawv, nws lees meej tias Tswv Ntuj yog tus tseeb. 34 Tus uas Tswv Ntuj xa tuaj, nws hais Tswv Ntuj cov lus, vim Tswv Ntuj pub Leej Ntuj Plig tsis xuas dab tsi luj. 35 Leej Txiv nyiam Leej Tub, nws tso tas ib puas tsav yam rau hauv Leej Tub txhais tes. 36 Tus ntseeg txog Leej Tub, mas nws muaj txoj sia nyob mus li. Hos tus tsis kam ntseeg txog Leej Tub, nws yuav tsis pom txoj sia, ces Tswv Ntuj lub siab npau taws yuav nyob saum nws.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 7th April 2016, 3:19 am

    TIM    8    LUB    4    HLIS     2016

    Hnub Rau Lis Piam Ob Caij Hla Xyoo C

    Zaj Nyeem Ib:         HAUJ LWM   5:   34-42


    34 Ces ib tug Fas Lis Xais hu ua Nkas Mas Lias sawv hauv cov txwj laus Xas Nes Nrees. Nws yog ib tug kws Txoj Cai uas tas tsoom pej xeem hwm. Nws hais kom coj cov Hauv Paus Xa Lus tawm mus ib pliag. 35 Ces nws hais rau cov txwj laus Xas Nes Nrees tias : "Cov His Xas Lais, nej yuav xyuam xim rau tej yam nej ua rau cov neeg ntawd. 36 Tau tsis ntev muaj ib tug hu ua Thaws Das. Nws hais tias nws yog ib tug loj. Nws sau tau kwv yees plaub puas leej neeg. Tab sis nws raug luag tua tuag, ces nws cov neeg tawg tas, tsis tshuav ib tug li. 37 Tom qab no, lub zim txwv txheeb tsoom mej hwm, mas Yus Das tus uas nyob Nkas Lis Lais kuj sawv. Nws coj tau coob leej raws nws qab. Nws kuj tuag thiab, ces cov neeg uas raws nws tawg tas. 38 Ua li mas, nyem no, kuv hais rau nej tias nej tsis txhob quav ntsej rau cov neeg ntawd, nej tso plhuav lawv. Vim tias yog lawv cov lus thiab lawv txoj kab xwm tuaj ntawm neeg tuaj, mas txoj kab xwm ntawd nws yuav rov rhuav nws ploj mus. 39 Hos yog tias lawv txoj kab xwm tuaj ntawm Tswv Ntuj tuaj tiag, mas nej yeej rhuav tsis tau. Nej tsis txhob tuam yim, tsam nej lam ua rog tiv Tswv Ntuj." Sawv daws yuav Nkas Mas Lias zaj tswv yim. 40 Lawv hu cov Hauv Paus Xa Lus kom rov los hauv tsev. Lawv kom luag muab cov Hauv Paus Xa Lus nplawm tas, lawv txwv tsis pub tuav txog Yes Xus lub npe los qhuab qhia. Ces lawv tso cov Hauv Paus Xa Lus mus. 41 Cov Hauv Paus Xa Lus tawm ntawm lub rooj txwj laus Xas Nes Nrees, lawv zoo siab vim Ntuj saib lawv tsim nyog raug luag hiam vim Lub Npe. 42 Lawv niaj hnub nyob hauv lub Tuam Tsev Teev Ntuj thiab nyob hauv lawv tsev qhia thiab tshaj txog Yes Xus lub Moo Zoo tsis tseg.

    NPN       27:   1, 4, 13-14

    Txais:      (4abc)  Ib yam uas kuv nrhiav: yog kom tau nyob hauv Huab Tais tsev.  
    los:   As les lus yas.    

    Huab Tais yog kuv qhov pom kev thiab kuv txoj kev cawm;
    Kuv yuav ntshau leej twg?
    Huab Tais yog kuv qhov chaw nkaum hauv kuv lub neej,  
    Kuv yuav ntshai leej twg?

    Txais:      (4abc)  Ib yam uas kuv nrhiav: yog kom tau nyob hauv Huab Tais tsev.  
    los:   As les lus yas.    

    Kuv tsuas thov ib yam ntawm Huab Tais; qhov kuv nrhiav yog:
    kom tau nyob hauv Huab Tais lub tsev niaj hnub hauv kuv lub neej;
    Kom kuv tau ntsia ntsoov Huab Tais txoj kev zoo
    thiab tau pom nws lub tuam tsev.

    Txais:      (4abc)  Ib yam uas kuv nrhiav: yog kom tau nyob hauv Huab Tais tsev.  
    los:   As les lus yas.    

    Kuv ntseeg hais tias kuv yuav tau pom Huab Tais txoj kev nplua mias
    nyob hauv cov neeg ciaj sia lub teb chaws.
    Ua siab loj tos ntsoov Huab Tias;
    ua siab tawv qhawv tos ntsoov Huab Tais.

    Txais:      (4abc)  Ib yam uas kuv nrhiav: yog kom tau nyob hauv Huab Tais tsev.  
    los:   As les lus yas.    

    As Les Lus yas:       MT 4:   4b

    Txais:    As les lus yas, as les lus yas.

    Neeg tsis kawg muab mov los yug siav xwb,
    neeg tseem yuav yuav txhua lo lus tawm ntawm
    Tswv Ntuj lub ncauj los yug siav thiab.  

    Txais:    As les lus yas, as les lus yas.

    Ntawv Moo Zoo :         ZAM   6:   A1-15

    1 Dhau tej no lawm, Yes Xus mus rau sab dej ntuj Nkas Lis Lais tim ub, uas tseem hu ua Dej Ntuj Tis Npes Lias. 2 Ib pab neeg coob raws nws mus, vim lawv tau pom cov cim nws ua kho neeg mob. 3 Yes Xus nce saum lub roob, nws nrog nws cov thwj tim zaum nyob saud. 4 Yuav txog lub Ntees Hla uas yog cov Yus Das lub ntees nqaum paj nqaum nruas. 5 Yes Xus tsa muag ntsia pom ib pab neeg coob tuaj cuag nws, nws hais rau Fis Lis Pos tias : "Peb yuav ua li cas muas ncuav mov txaus cov neeg ntawd noj ?" 6 Yes Xus hais li ntawd sim Fis Lis Pos, tab sis Yes Xus yeej paub tias nws yuav ua dab tsi. 7 Fis Lis Pos teb rau Yes Xus tias : "Muab ob puas lub txiaj nyiag muas mov los tseem yuav tsis txaus kom ib leeg tau ib qho me me." 8 Yes Xus ib tug thwj tim hu ua As Nres, yog Xis Moos Pob Zeb tus kwv, hais rau Yes Xus tias : 9 "Ib tug me tub nyob ntawm no muaj tsib lub ncuav mov qib thiab ob tug ntses me me, tab sis qhov ntawd yuav ua cas txaus rau npaum no leej neeg noj ?" 10 Yes Xus hais tias : "Nej kom cov neeg zaum." Nyob ntawm qhov chaw ntawd muaj nroj ntau. Ces cov neeg zaum, kwv yees muaj tsib txhiab leej neeg. 11 Yes Xus tuav cov ncuav mov, nws ua ntuj tsaug tas, nws muab faib rau cov neeg uas zaum ntawd. Nws kuj ua ib yam li ntawd rau cov ntses me me kom txaus lawv noj thiab. 12 Thaum lawv noj tsau tas, Yes Xus hais rau nws cov thwj tim tias : "Nej khaws cov sab mov seem kom txhob sem ib qho li." 13 Thaum lawv noj tsau tas, lawv thiaj khaws cov mov seem uas ntsu ntawm tsib lub ncuav mov qib los, lawv ntim puv kaum ob tawb. 14 Tsoom sid pom lub cim Yes Xus ua, ces lawv hais tias : "Tus no yog tus Yaj Saub uas yuav tuaj nyob hauv lub qab ntuj neeg tiag." 15 Yes Xus to taub hais tias lawv yuav tuaj ntes nws mus tsa ua vaj, ces nws mus nws tib leeg twj ywm rau pem roob.



    Last edited by Mim on 17th April 2018, 11:13 am; edited 1 time in total
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 8th April 2016, 3:55 am

    TIM 9 LUB 4 HLIS 2016

    Hnub Xya Lis Piam Ob Caij Hla Xyoo C

    Zaj Nyeem Ib: HAUJ LWM 6: 1-7


    1 Lub caij ntawd, cov thwj tim huam vam coob zuj zus. Ces cov Hes Las yws yws cov Hes Nplaws. Lawv hais tias niaj hnub thaum faib mov mas tsis muaj neeg nco txog cov poj ntsuam Hes Las. 2 Pab Kaum Ob hu cov thwj tim tuaj sab laj, lawv hais tias : "Tsis phim peb yuav tso Tswv Ntuj lo lus tseg, mus saib cov rooj noj mov. 3 Kwv tij, nej nrhiav nyob hauv nej, xya leej txiv neej nto moo zoo, uas yog neeg thoob tsib, thiab muaj Leej Ntuj Plig nyob puv hauv lawv. Peb yuav tsa lawv tuav txoj hauj lwm ntawd. 4 Hos peb, mas peb yuav muab siab hlo npuab txoj kev teev ntuj thiab tsob hwb Lo Lus.” 5 Cov lus no haum lub txoos siab, ces lawv xaiv Tes Fas Nos, uas nws yog ib tug neeg ntseeg ruaj, thiab muaj Leej Ntuj Plig Ntshiab nyob puv hauv nws, Fis Lis Pos, Plos Kos Los, Nis Kas Nos, Tis Moos, Pas Mes Nas, thiab Nis Kos Las uas yog ib tug neeg ntseeg nyob As Nthias Kias tuaj. 6 Lawv coj cov neeg no los rau cov Hauv Paus Xa Lus. Cov Hauv Paus Xa Lus thov ntuj tas, ces lawv tsa tes rau saum xya leej ntawd. 7 Huab Tais lo lus hlob zuj zus. Cov thwj tim huam vam coob kawg nyob Yes Lus Xas Les. Muaj ib co leej choj coob kawg los mloog txoj kev ntseeg.

    NPN 33: 1-2, 4-5, 18-19

    Txais: (22) HUAB TAIS, thov kom koj txoj kev hlub roos peb,
    vim koj yog peb qhov chaw tso siab.
    Los : As les lus yas.

    Cov neeg siab ncaj, nej cia li zoo siab nyob hauv HUAB TAIS,
    txoj kev qhuas nws phim tus neeg siab ncaj.
    Nej ntaus nkauj nog ncas ua HUAB TAIS tsaug,
    nej ntaus thaj cheej kaum txoj hlua cav txog nws.

    Txais: (22) HUAB TAIS, thov kom koj txoj kev hlub roos peb,
    vim koj yog peb qhov chaw tso siab.
    Los : As les lus yas.

    HUAB TAIS lo lus yog lus ncaj,
    nws tej num yog num tseeb.
    Nws nyiam kev ncaj thiab kev haum pheej;
    HUAB TAIS txoj kev hlub nyob puv lub ntiaj teb.

    Txais: (22) HUAB TAIS, thov kom koj txoj kev hlub roos peb,
    vim koj yog peb qhov chaw tso siab.
    Los : As les lus yas.

    Ntsias saib HUAB TAIS lub qhov muag saib ntsoov cov neeg hwm nws,
    saib ntsoov cov tso siab rau nws txoj kev hlub,
    tias nws yuav npo lawv dim ntawm kev tuag,
    thiab yuav txuag lawv txoj sia thaum muaj kev tshaib plab.

    Txais: (22) HUAB TAIS, thov kom koj txoj kev hlub roos peb,
    vim koj yog peb qhov chaw tso siab.
    Los : As les lus yas.

    As Les Lus Yas

    Txais: As les lus yas, as les lus yas.

    Leej Pleev, tus tsim tas puas tsav yam, sawv rov los lawm,.
    nws khuv leej tas txhua leej neeg.

    Txais: As les lus yas, as les lus yas.

    Ntawv Moo Zoo: ZAM 6: 16-21


    16 Thaum tsaus ntuj, Yes Xus cov thwj tim nqes mus nram dej ntuj, 17 lawv nce hauv ib lub nkoj, lawv hla dej mus rau Kas Fas Naus, nyob sab ntug dej tid. Thaum ntawd twb tsaus ntuj lawm, tab sis Yes Xus tseem tsis tau los txog ntawm lawv. 18 Muaj ib nthwv cua hlob ntsawj, ces dej ntuj nphau nphwv sawv tuaj. 19 Thaum cov thwj tim nquam nkoj deb li nees nkaum los peb caug ntsua muag lawm, ces lawv txawm pom Yes Xus mus kev saum dej ntuj, los ze zuj zus rau ntawm lub nkoj, ces lawv ntshai. 20 Tab sis Yes Xus hais rau lawv tias : "Yog kuv, nej txhob ntshai." 21 Lawv thiaj npaj tos nws los rau hauv nkoj. Tab sis tam sis ntawd lub nkoj cia li mus txog qhov chaw lawv yuav mus lawm.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 11th April 2016, 4:53 am

    Tim    11    lub    4     2016

    Hnub Ob Lis Piam Peb Caij Hla Xyoo C

    Hwm LN Stanislaus, ua Tim Khawv

    Zaj Nyeem Ib:       Hauj Lwm   6:   8-15


    8 Tes Fas Nos yog ib tug neeg muaj txiaj ntsim thiab muaj hwj chim. Nws ua ib co hwj huam yees ntxwv thiab ib co cim loj kawg nyob hauv tsoom pej xeem. 9 Ces muaj ib co neeg tuaj ntawm lub Tsev Txoos cov Qhev Dim Txim  tuaj ; lawv yog neeg Xis Les Nas, neeg As Les Xas Nrias, neeg Xis Lis Xias, thiab neeg As Xias. 10 Lawv tuaj nrog Tes Fas Nos sib cav. Tab sis lawv cav tsis yeej Tes Fas Nos, vim nws yog neeg thoob tsib, thiab yog Leej Ntuj Plig qhia nws hais. 11 Ces lawv xiab ib co neeg kom liam tias : "Peb hnov tus neeg ntawd hais ib co lus thuam Mais Xes thiab thuam Tswv Ntuj." 12 Lawv haub tsoom pej xeem, tsoom laus neeg, thiab tsoom kws ntawv kom sawv daws npau taws. Ces lawv nyas tuaj ntes Tes Fas Nos, lawv coj nws mus rau ntawm lub rooj txwj laus Xas Nes Nrees. 13 Lawv coj ib co tim khawv cuav tuaj liam tias : "Tus neeg ntawd hais lus phem tsis tseg txog lub Tsev Ntshiab no thiab txog Txoj Cai. 14 Peb tau hnov nws hais tias Yes Xus, tus niag neeg Nas Xas Les, yuav rhuav lub Chaw no, thiab nws yuav hloov tej kab ke uas Mais Xes muab rau peb." 15 Tas cov uas zaum hauv lub rooj txwj laus Xas Nes Nrees tig qhov muag ntsia nruj nreem rau Tes Fas Nos, lawv pom Tes Fas Nos lub ntsej muag zoo xws li ib tug Tshiab lub ntsej muag.

    NPN     119:   23-24, 26-27, 29-30

    Txais:    (1ab) Cov tau txoj hmoov zoo yog cov neeg
               ua raws nraim HUAB TAIS Txoj Cai!
       los:   Alleluia.

    Txawm tias cov tub huab tais zaum sab laj nrhiav kev liam rau kuv,
    Koj tus tub txib tseem xav ntsoov txog koj tej cai lij choj.
    Koj cov lus ua rau kuv zoo siab,
    Koj cov lus qhia tswv yim rau kuv.

    Txais:    (1ab) Cov tau txoj hmoov zoo yog cov neeg
               ua raws nraim HUAB TAIS Txoj Cai!
       los:   Alleluia.

    Kuv qhia kuv tej kev rau koj, ces koj teb kuv,
    thov koj qhia koj txoj cai lij choj rau kuv paub.
    Thov koj ua kom kuv to taub txog txoj kev mloog koj cov lus qhuab qhia,
    kuv yuav mob siab xav txog koj cov dej num uas txaus qhuas.

    Txais:    (1ab) Cov tau txoj hmoov zoo yog cov neeg ua
               raws nraim HUAB TAIS Txoj Cai!
       los:   Alleluia.

    Thov koj tshem txoj kev dag mus deb kuv,
    koj muab koj Txoj Cai pub ua txiaj ntsim rau kuv.
    Kuv xaiv txoj kev tseeb taug,
    kuv ua raws nraim koj cov cai tswj siab.

    Txais:    (1ab) Cov tau txoj hmoov zoo yog cov neeg
               ua raws nraim HUAB TAIS Txoj Cai!
       los:   Alleluia.

    As Les Lus yas:     MT 4: 4B

    Txais: As les lus yas, as les lus yas.

    Neeg tsis kawg muab mov los yug siav xwb,
    neeg tseem yuav yuav txhua lo lus tawm ntawm
    Tswv Ntuj lub ncauj los yug siav thiab.

    Txais: As les lus yas, as les lus yas.

    Ntawv Moo Zoo:      Zam  6: 22-29

    22 Tag kis kaj ntug, tsoom neeg uas nyob sab dej ntuj tim ub pom tias nag hmo tsuas muaj ib lub nkoj nyob ntawd xwb. Lawv kuj pom tias Yes Xus tsis nrog nws cov thwj tim nce mus hauv nkoj, cov thwj tim lawv mus lawv xwb. 23 Tab sis, muaj ib co nkoj tuaj Tis Npes Lias tuaj, cov nkoj los ze ntawm qhov chaw lawv noj cov mov uas thaum Huab Tais ua Ntuj tsaug tas, nws muab rau lawv noj. 24 Tab sis tsoom neeg pom tias Yes Xus tsis nyob ntawd lawm, nws cov thwj tim kuj tsis nyob lawm thiab, ces lawv nce mus hauv cov nkoj ntawd, lawv mus nrhiav Yes Xus tim Kas Fas Naus. 25 Lawv tuaj nrhiav tau Yes Xus rau sab ntug dej tid, lawv hais rau nws tias : "Las Npis, thaum twg koj tuaj ntawm no lawm ?" 26 Yes Xus teb rau lawv tias : "Kuv hais qhov tseeb tiag rau nej : Nej nrhiav kuv, tsis yog vim nej tau pom ib co cim, yog vim nej tau noj cov ncuav mov tsau nej plab. 27 Nej txhob ua hauj lwm nrhiav cov txhiam xws txawj ploj. Nej ua hauj lwm nrhiav cov txhiam xws pub txoj sia nyob mus li. Cov txhiam xws ntawd yog cov uas Neeg Leej Tub yuav pub rau nej. Vim nws yog tus uas Leej Txiv Tswv Ntuj ntaus thwj rau." 28 Lawv hais rau Yes Xus tias : "Peb yuav ua dab tsi, peb thiaj ua tau Tswv Ntuj cov hauj lwm ?" 29 Yes Xus teb rau lawv hais tias : "Tswv Ntuj txoj hauj lwm yog zoo li no : Kom nej ntseeg txog tus nws xa tuaj."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 11th April 2016, 4:59 am

    TIM 12 LUB 4 2016

    Hnub Peb Lis Piam Peb Caij Hla Xyoo C

    Zaj Nyeem Ib: HAUJ LWM 7: 51—8:1A


    Tes Fas Nos hais rau cov neeg tias:
    51 Nej yog neeg xwb qwb txhav, uas lub siab thiab pob ntseg tsis txais lub cim txiav, nej thiaj tawv ncauj tsis mloog Leej Ntuj Plig Ntshiab. Nej coj yog nkaus li nej cov yawg koob thiab. 52 Puas muaj ib tug yaj saub uas nej cov yawg koob tsis tau hiam ? Lawv tua cov yaj saub uas tau xub hais txog tus Siab Ncaj uas yuav tuaj. Tus Siab Ncaj yog tus uas nej nyuam qhuav ntxeev siab rau nws, thiab nyuam qhuav muab nws tua. 53 Nej tau txais Txoj Cai ntawm cov Tshiab los, tab sis nej tsis mloog Txoj Cai. 54 Thaum lawv hnov cov lus no, mas lawv npau taws ceev kawg. Lawv zim hniav zaig rau Tes Fas Nos. 55 Leej Ntuj Plig Ntshiab nyob puv hauv Tes Fas Nos lub siab. Tes Fas Nos tsa muag ntsia ntsoov rau saum ntuj. Nws pom Tswv Ntuj lub hwj chim thiab pom Yes Xus sawv nyob ntawm Tswv Ntuj sab xis. 56 Ces nws hais tias : "Kuv pom lub ntuj qhib lug, thiab pom Neeg Leej Tub sawv ntsug ntawm Tswv Ntuj sab xis." 57 Thaum ntawd, cov Yus Das nthe nrov nrov. Lawv pos pob ntseg. Sawv daws ua ib tsaug khiav mus nthos nkaus Tes Fas Nos. 58 Lawv thawb Tes Fas Nos mus rau sab nroog nraud, ces lawv txawb pob zeb tua nws. Cov tim khawv tso lawv tej khaub ncaws rau ntawm ib tug tub hluas ko taw. Tus hluas ntawd hu ua Xauv. 59 Thaum lawv tab tom txawb pob zeb tua Tes Fas Nos mas Tes Fas Nos hu txog Ntuj. Nws hais tias : "Huab Tais Yes Xus, thov koj txais kuv tus ntsuj plig." 60 Ces nws txhos caug, nws hais ib lo nrov nrov tias : "Huab Tais, koj txhob muab qhov txhaum ntawd rau lawv ris." Thaum nws hais lo lus ntawd, nws ntog kiag thiab tsaug zog lawm. (Los lus “tsaug zog” no txhais tias nws tas sim neej lawm)
    8 1 Hos Xauv, mas nws pom zoo kom lawv muab Tes Fas Nos tua.

    NPN 31: 3CD-4, 6 + 7B + 8A, 17 + 21AB

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Thov koj ua kuv lub tsua muaj zog,
    ua lub tsev xov ntsa zeb rau kuv nkaum.
    Vim kuv lub tsua kuv lub yeej ntsa zeb yeej yog koj;
    vim koj lub npe, thov koj tuav kuv tes coj kev kev.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Kuv tso kuv tus ntsuj plig rau hauv koj txhais tes.
    HUAB TAIS, Tswv Ntuj tus muaj kev tseeb, koj yog tus txhiv kuv.
    Kuv tso siab tas nrho rau Huab Tais,
    Kuv zoo siab hom khaj vim koj khuv leej kuv.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    Thov cia koj lub ntsej muag ci tuaj rau saum koj tus tub txib,
    thov cawm kuv vim koj hlub kuv.
    Koj coj cov neeg hwm koj mus zais rau hauv koj xub ntiag,
    Deb ntawm cov neeg phem tej kev nkhaus.

    Txais: (6a) Huab Tais, kuv tso kuv tus ntsuj plig rau hauv koj txhais tes.
    los: As les lus yas.

    As Les Lus Yas: ZAM 6: 35AB

    Txais: As les lus yas, as les lus yas.

    Huab Tais hais tias, kuv yog cov mov pub txoj sia;
    leej twg tuaj cuag kuv yuav tsis tshaib ib zaug ntxiv.

    Txais: As les lus yas, as les lus yas.

    Ntawv Moo Zoo: ZAM 6: 30-35

    30 Lawv hais rau Yes Xus tias : "Koj yuav ua lub cim dab tsi rau peb pom, kom peb ntseeg koj ? Koj ua tau dab tsi ? 31 Peb cov yawg koob noj cov mov mas nas nyob teb chaws suab puam, raws li cov lus sau cia hais tias : "Nws pub cov mov tuaj saum ntuj tuaj rau lawv noj." 32 Yes Xus thiaj hais rau lawv tias : "Kuv hais qhov tseeb tiag rau nej : Tsis yog Mais Xes pub cov mov tuaj saum ntuj tuaj rau nej, yog kuv Txiv pub rau nej; nws pub cov mov tuaj saum ntuj tuaj uas yog tseem mov. 33 Vim Tswv Ntuj cov mov yog tus uas nqes saum ntuj los pub txoj sia rau lub qab ntuj neeg." 34 Lawv thiaj hais rau Yes Xus tias : "Huab Tais, thov koj pub cov mov ntawd rau peb noj mus li." 35 Yes Xus hais rau lawv tias : "Kuv yog cov mov pub txoj sia. Tus tuaj cuag kuv nws yuav tsis tshaib ib zaug li, tus ntseeg txog kuv nws yuav tsis nqhis ib zaug li.



    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 12th April 2016, 4:09 am

    TIM     13    LUB    4     2016

    Hnub Plaub Lis Piam Peb Caij Hla Xyoo C

    Hwm LN Martin I, Vaj Qhia tuag ua Tim Khawv.

    Zaj Nyeem Ib:   HAUJ  LWM   8:   1b-8


    1b  Hnub ntawd, lub Koom Txoos nyob Yes Lus Xas Les raug luag hiam loj kawg. Tas sawv daws tawg mus nyob nruab liaj nruab teb, hauv cov xeev Yus Das thiab Xas Mas Lias. Tsuas tshuav cov Hauv Paus Xa Lus thiaj tsis khiav xwb. 2 Muaj ib co neeg hwm Ntuj tuaj muab Tes Fas Nos lub cev mus faus, thiab lawv quaj nyiav nws nrov nrov. 3 Hos Xauv, mas nws nrhiav kev iab hiam lub Koom Txoos. Nws mus ib lub tsev dhau ib lub tsev, nws cab cov txiv neej thiab cov poj niam huv si coj mus rau luag muab kaw.  4 Cov neeg uas tawg ncaim mus rau txhua qhov chaw, mas lawv tshaj lub Moo Zoo rau sawv daws mloog. 5 Yog vim li ntawd Fis Lis Pos thiaj li mus rau nram ib lub nroog nyob Xas Mas Lias teb, nws tshaj lus txog Yes Xus nyob ntawd. 6 Tas tsoom sid koom ib lub siab tuaj mloog cov lus uas Fis Lis Pos hais, vim sawv daws hnov txog cov cim uas Fis Lis Pos ua thiab pom nws ua. 7 Vim tias muaj dab phem tawm ntawm coob leej neeg raug dab mus, lawv qw tej suab nrov nrov, cov tuag ceg thiab cov ceg tawv coob leej kuj cia li zoo hlo. 8 Nyob hauv lub nroog ntawd, sawv daws zoo siab kawg nkaus.

    NPN    66:   1-3A, 4-5, 6-7A

    Txais: (1) Tas ntiaj teb, nej cia li qw zoo siab rau Tswv Ntuj.  
    los: As les lus yas.

    Tas ntiaj teb, nej qw zoo siab rau Tswv Ntuj ;
    Nej hu nkauj cav txog nws lub npe muaj hwj chim,
    nej hais tej zaj lus cav txog nws lub koob meej.
    Nej hais rau Tswv Ntuj tias : "Koj tej num muaj hwj xyeej ua luaj !”

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    " Kom tas lub ntiaj teb tuaj txhos caug pe hawm koj thiab hu nkauj cav txog koj,
    hu nkauj qhuas koj lub npe!”
    Nej tuaj xyuas Tswv Ntuj cov hauj lwm saib,
    Nws ua hauj lwm loj txaus qhuas rau As Das tsoom tub ki.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    Nws ua kom dej ntuj hloov ua av khov,
    lawv hla dej, dej tsis ntub lawv taw ;
    nyob ntawd, lawv zoo siab nyob hauv nws.
    Nws lub hwj huam yuav kav sawv daws tas mus li.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    As Les Lus Yas:      ZAM   6:   40

    Txais: As les lus yas, as les lus yas.

    Huab Tais hais tias:  
    Kom txhua tus uas ntseeg txog Leej tub muaj txoj sia nyob mus li,
    thiab kuv yuav tsa nws sawv rov los thaum txog hnub kawg.

    Txais: As les lus yas, as les lus yas.

    Ntawv Moo Zoo:    ZAM  6:   35-40

    35 Yes Xus hais rau lawv tias : "Kuv yog cov mov muaj txoj sia. Tus tuaj cuag kuv yuav tsis tshaib ib zaug li, tus ntseeg txog kuv nws yuav tsis nqhis ib zaug li. 36 Kuv hais rau nej tias : Nej twb pom kuv, tab sis nej tsis ntseeg. 37 Txhua yam uas kuv Txiv muab rau kuv yuav los cuag kuv. Tus tuaj cuag kuv, kuv yuav tsis ntiab nws rau nraum zoov. 38 Vim kuv nqes saum ntuj los, tsis yog los ua ywj kuv siab, yog los ua raws li Tus Xa kuv tuaj lub siab. 39 Tus Xa kuv tuaj lub siab xav, yog zoo li no : Kom kuv tsis txhob ua ib yam uas nws muab rau kuv ploj li, thiab hnub kawg, kom kuv tsa yam ntawd sawv rov los. 40 Qhov uas kuv Txiv nyiam yog zoo li no : kom txhua tus uas pom Leej Tub thiab ntseeg txog Leej Tub muaj txoj sia nyob mus li, thiab Hnub Kawg, kuv yuav tsa nws sawv rov los."
    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 13th April 2016, 6:38 am

    TIM 14 LUB 4 HLIS 2016

    Hnub Tsib Lis Piam Peb Caij Hla Xyoo C

    Zaj Nyeem Ib: HAUJ LWM 8: 26-40


    26 Huab Tais tus Tshiab hais rau Fis Lis Pos tias : "Thaum tav su, koj sawv kev, koj mus rau tom txoj kev uas nqes ntawm Yes Lus Xas Les mus nram Nkas Xas. Tsis muaj neeg taug txoj kev ntawd." 27 Fis Lis Pos thiaj sawv kev mus txog tom txoj kev. Thaum ntawd, ib tug Es Thias Pias tab tom los txog ntawd. Nws yog ib tug neeg sam, yog tus poj vaj Es Thias Pias hu ua Kas Ntas ib tug nom loj. Nws yog tus saib cov txhab nyiaj. Nws tuaj mus teev ntuj pem Yes Lus Xas Les rov los. 28 Nws zaum hauv nws lub tsheb rov mus, ces nws nyeem tus yaj saub His Xais phau ntawv. 29 Leej Ntuj Plig hais rau Fis Lis Pos tias : "Koj khiav mus caum lub tsheb ntawd." 30 Fis Lis Pos thiaj khiav ntsuj caum. Nws hnov tus nom Es Thias Pias nyeem His Xais phau ntawv. Fis Lis Pos nug nws tias : "koj puas to taub qhov koj nyeem?" 31 Tus nom teb hais tias : "Yog tsis muaj neeg qhia kuv, mas kuv yuav ua li cas to taub ?" Ces nws caw kom Fis Lis Pos nce los zaum ntawm nws ib sab. 32 Zaj uas tus nom tab tom nyeem yog zaj no : Nws zoo li ib tug yaj Luag cab mus hauv tsev tua tsiaj. Nws kuj zoo li ib tug me nyuam yaj nyob twj ywm ntsiag to rau tus uas chais nws cov plaub, nws tsis qhib ncauj tsis hais lus li. 33 Nws txo nws rau hauv txoj kev poob tsim, luag tsis ua ncaj rau nws li. Leej twg yuav hais txog nws tej xeeb ntxwv ? Vim tias luag twb txo nws txoj sia kom ploj hauv ntiaj teb mus lawm. 34 Tus nom sam hais rau Fis Lis Pos tias : "Koj sim qhia saib. Tus yaj saub hais txog leej twg zoo li ntawd ? Nws puas rov hais txog nws, los nws hais txog lwm tus ?" 35 Fis Lis Pos thiaj qhib ncauj hais lus. Nws siv cov lus sau tseg hauv Ntawv los qhia Yes Xus lub Moo Zoo rau tus nom sam. 36 Thaum nkawd mus kev, txog ib qho chaw muaj dej, ces tus nom sam hais tias : "Ntawm no muaj dej. Ua cas kuv yuav txais tsis tau lub cim ntxuav ?" [37...] 38 Ces nws kom lub tsheb nres. Fis Lis Pos thiab tus nom sam nkawd ob leeg nqes mus hauv dej. Fis Lis Pos thiaj ua lub cim ntxuav rau nws. 39 Thaum nkawd tawm hauv dej los, Huab Tais tus Ntsuj Plig nqa Fis Lis Pos lawm. Ces tus nom sam tsis pom Fis Lis Pos ntxiv. Tab sis tus nom sam xyiv fab hlo taug nws txoj kev mus ntxiv. 40 Hos Fis Lis Pos mas, nws tshwm hauv lub zos As Ntxos, nws taug kev mus ntxiv. Nws tshaj lub Moo Zoo rau cov nroog uas nws hla tas huv si. Nws ua li ntawd mus txog Xes Ntxas Les.

    NPN 66: 8-9, 16-17, 20

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    Tsoom haiv neeg, nej cav txog peb tus Tswv Ntuj,
    nej qw nrov nrov cav txog nws;
    vim nws yog tus pub txoj sia rau peb tus ntsuj plig
    thiab nws tsis cia kom peb npleem ko taw.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas

    Tas nej cov uas hwm Tswv Ntuj, nej mloog kuv tshaj tawm
    txog qhov uas nws tau ua rau kuv.
    Thaum kuv qhib ncauj thov nws,
    Lo lus qhuas twb nyob ntawm kuv tsis nplaig lawm.

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas

    Thov kom Tswv Ntuj nto meej nto moo,
    vim nws tsis xyeeb kuv zaj thov,
    nws tsis tshem nws txoj kev hlub mus deb kuv!

    Txais: (1) Tas ntiaj teb, nej cia li qw zoo siab rau Tswv Ntuj.
    los: As les lus yas.

    As Les Lus Yas: ZAM 6: 51

    Txais: As les lus yas, as les lus yas.

    Huab Tais hais tias, kuv yog cov mov muaj txoj sia nqes saum ntuj los,
    leej twg noj cov mov no yuav ciaj nyob mus li.

    Txais: As les lus yas, as les lus yas.

    Ntawv Moo Zoo: ZAM 6: 44-51

    Yes Xus hais rau lawv tias:
    44 Tsis muaj leej twg tuaj cuag kuv tau, yog Leej Txiv uas xa kuv tuaj tsis rub nws los. Hos kuv, mas Hnub Kawg, kuv yuav tsa nws sawv rov qab los. 45 Cov Yaj Saub Phau Ntawv sau hais tias: "Tswv Ntuj yog tus yuav qhuab qhia sawv daws." Tus twg hnov Leej Txiv lub suab thiab txais nws lo lus qhia, mas tus ntawd tuaj cuag kuv. 46 Tsis muaj leej twg tau pom Leej Txiv. Tsuas yog tus tuaj ntawm Tswv Ntuj tuaj thiaj tau pom Leej Txiv. 47 Kuv hais qhov muaj tseeb tiag rau nej : Tus ntseeg, nws muaj txoj sia nyob mus li. 48 "Kuv yog cov mov muaj txoj sia. 49 Nej cov yawg koob tau noj cov mov mas nas hauv teb chaws suab puam, tab sis lawv tuag tas lawm. 50 Cov mov nqes saum ntuj los yog zoo li no : tus noj cov mov no, nws tsis tuag. 51 Kuv yog cov mov muaj txoj sia nqes saum ntuj los. Leej twg noj cov mov no, nws yuav ciaj nyob mus li. Cov mov uas kuv yuav muab pub rau lub qab ntuj neeg noj kom lawv muaj txoj sia, yog kuv lub cev nqaij."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 14th April 2016, 4:15 am

    TIM 15 LUB 4 HLIS 2016

    Hnub Rau Lis Piam Peb Caij Hla Xyoo C

    Zaj Nyeem Ib: HAUJ LWM 9: 1-20


    1 Hais txog Xauv, mas nws yeej niaj hnub xav ntsoov txog qhov hiam thiab tua Huab Tais cov thwj tim. Nws mus cuag tus thawj leej choj. 2 Nws thov kom tus thawj leej choj muab ntawv tso cai rau nws mus xyuas hauv cov tsev txoos nyob Das Mas saib puas muaj cov neeg ntseeg Txoj Kev. Yog muaj, mas nws yuav muab lawv khi cab mus pem Yes Lus Xas Les, tsis hais poj niam los txiv neej . 3 Thaum nws tab tom mus kev, yuav txog Das Mas, ces ib sij huam, muaj ib qho pom kev ci dawb vog tuaj saum ntuj tuaj ncig nws. 4 Nws ntog rau pem teb. Nws hnov ib lub suab hais rau nws tias : "Xauv, Xauv, tim li cas koj hiam kuv ?" 5 Xauv teb hais tias : "Huab Tais, koj yog leej twg ?" Lub suab ntawd hais tias : "Kuv yog Yes Xus, tus uas koj hiam. 6 Koj sawv, koj mus hauv lub nroog. Yuav muaj neeg qhia koj tias yuav ua dab tsi." 7 Cov neeg nrog Xauv ua ke mus kev sawv daws nres, lawv tsis hais lus li, vim lawv hnov lub suab, tab sis lawv tsis pom dab tsi li. 8 Xauv sawv hauv av los, nws rua qhov muag, tab sis nws tsis pom kev li. Lawv thiaj tuav nws tes coj nws mus hauv lub nroog Das Mas. 9 Nws nyob peb hnub, tsis pom kev, tsis noj tsis haus dab tsi li.
    10 Nyob Das Mas, muaj ib tug thwj tim hu ua As Nas Nias. Huab Tais yees tawm los hais rau nws tias : "As Nas Nias." As Nas Nias teb tias : "Huab Tais, kuv nyob ntawm no." 11 Huab Tais hais ntxiv tias : "Koj sawv, koj mus tom txoj kev uas hu ua Kev Ncaj, koj mus hauv Yus Das tsev, koj nrhiav ib tug neeg hu ua Xauv nyob Tas Xis tuaj. Tam sim no nws tab tom teev Ntuj. 12 Nws yees pom ib tug txiv neej hu ua As Nas Nias chaws los tsa tes rau saum nws kom nws rov pom kev tuaj." 13 As Nas Nias teb tias : "Huab Tais, kuv tau hnov ntau leej hais tias tus neeg ntawd ua phem kawg rau koj cov Ntshiab nyob Yes Lus Xas Les. 14 Nws tuaj ntawm no, vim nws tau cai ntawm cov leej choj tuaj khi cov neeg uas hu txog koj lub npe tas huv tib si." 15 Tab sis Huab Tais hais rau As Nas Nias hais tias : "Koj mus, vim tus neeg ntawd yog ib rab twj uas kuv xaiv los coj kuv lub Npe mus qhia rau cov neeg teev dab, rau cov vaj, thiab rau cov tub ki His Xas Lais. 16 Kuv yuav qhia nws tias nws yuav tsum raug tsim txom npaum li cas vim kuv lub Npe." 17 As Nas Nias thiaj mus. Nws chaws mus hauv lub tsev ntawd. Nws tsa tes rau saum Xauv, nws hais tias : "Xauv, kuv tus kwv, yog Huab Tais xa kuv tuaj, yog tus Yes Xus uas tau tawm los rau koj pom tom txoj kev uas koj tuaj. Nws xa kuv tuaj kom koj rov qab pom kev, thiab kom koj tau txais Leej Ntuj Plig Ntshiab puv hauv koj.” 18 Tam sim ntawd muaj tej daim zoo li nplai ntses poob ntawm Xauv qhov muag los, ces nws rov qab pom kev. Lawv ua lub cim ntxuav rau nws tam sim ntawd. 19 Ces nws noj mov, nws rov qab muaj zog. Xauv nrog cov thwj tim nyob ob peb hnub hauv Das Mas. 20 Ces nws cia li maj zoj zeeg mus nyob hauv cov tsev Txoos pib qhia tias Yes Xus yog Tswv Ntuj Leej Tub.

    NPN 117: 1BC, 2


    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Tas ib tsoom kuj cuab, nej cav lus zoo txog HUAB TAIS.
    Tas ib tsoom haiv neeg, nej cav txog nws lub hwj chim.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    Vim nws lub siab hlub peb nyob ruaj nreb,
    HUAB TAIS lub siab pheej xeeb mus ib txhiab ib txhis.

    Txais: (Mas Kos 16:15) Nej mus thoob qab ntuj, nej tshaj
    lub Moo Zoo rau txhua leej txhua tus.
    los: As les lus yas.

    As Les Lus yas: ZAM 6: 56

    Txais: As les lus yas, as les lus yas.

    Huab Tais hais tias, tus twg noj kuv lub cev thiab haus kuv cov ntshav,
    nws yuav nyob hauv kuv thiab kuv yuav nyob hauv nws.

    Txais: As les lus yas, as les lus yas.

    Ntawv Moo Zoo: Zam 6: 52-59

    52 Ces cov Yus Das sib cav zom zaws tias : "Tus neeg ntawd yuav ua li cas muab tau nws cev nqaij los rau peb noj ?" 53 Yes Xus thiaj hais rau lawv tias : "Kuv hais qhov tseeb tiag rau nej : Yog nej tsis noj Neeg Leej Tub lub cev nqaij thiab tsis haus nws cov ntshav, mas nej yuav tsis muaj txoj sia nyob hauv nej. 54 Hos tus noj kuv lub cev nqaij thiab haus kuv cov ntshav, nws muaj txoj sia nyob mus li. Hnub kawg, kuv yuav tsa nws sawv rov qab los. 55 Vim kuv lub cev nqaij yog ib co tseem txhiam xws noj, thiab kuv cov ntshav yog ib yam zoo haus. 56 Tus noj kuv cev nqaij thiab haus kuv cov ntshav, nws nyob hauv kuv thiab kuv nyob hauv nws. 57 Leej Txiv uas nws muaj txoj sia, nws xa kuv tuaj, ces kuv muaj txoj sia vim Leej Txiv. Li ntawd, tus noj kuv, nws kuj yuav muaj txoj sia, vim kuv. 58 Cov mov nqes saum ntuj los yog zoo li ntawd. Cov mov no tsis zoo li cov uas cov yawg koob tau noj, tab sis lawv tuag tas lawm. Hos tus noj cov mov no, mas nws yuav ciaj nyob mus li." 59 Yes Xus hais cov lus ntawd thaum nws qhia nyob hauv lub tsev txoos nyob Kas Fas Naus.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 15th April 2016, 5:45 am

    TIM 16 LUB 4 HLIS 2016

    Hnub Xya Lis Piam Peb Caij Hla Xyoo C

    Zaj Nyeem Ib: HAUJ LWM 9: 31-42


    31 Lub caij ntawd, cov Koom Txoos nyob hauv xeev Yus Das, Nkas Lis Lais, thiab Xas Mas Lias tau nyob thaj yeeb. Sawv daws txhim cov Koom Txoos, thiab sawv daws taug txoj kev hwm Huab Tais. Leej Ntuj Plig Ntshiab nplij cov Koom Txoos, ces lawv huam vam. 32 Pob Zeb ncig mus rau txhua qhov chaw xyuas sawv daws. Nws nqes mus txog nram cov ntshiab nyob lub zos Lis Das. 33 Nyob nrad muaj ib tug neeg hu ua Es Nes pw saum ib daim khaub lev tau yim xyoo lawm. Nws tuag ceg. 34 Pob Zeb hais rau nws tias : "Es Nes, Yes Xus Pleev kho koj zoo. Koj sawv tsees los kho koj lub txaj." Tam sim ntawd tus tuag ceg sawv tsees. 35 Tas cov neeg nyob hauv Lis Das thiab nyob hauv lub tiaj Xas Loos pom Es Nes, mas sawv daws tig los ntseeg txog Huab Tais. 36 Nyob Yos Pes, muaj ib tug thwj tim poj niam hu ua Tas Npis Thas. Nws lub npe txhais tias Me Nyuam Mos Lwj. Nws ua ntau yam hauj lwm zoo thiab nws pub ntau yam rau cov neeg txom nyem. 37 Muaj ib hnub, Tas Npis Thas cia li mob, ces nws tuag. Lawv muab nws ntxuav tas, thiab lawv coj nws mus tso saum chav tsev siab. 38 Lis Das kuj nyob ze Yos Pes. Cov thwj tim hnov tias Pob Zeb tuaj txog Lis Das, ces lawv tso ob tug neeg tuaj thov Pob Zeb tias : "Thov koj tuaj nram peb, txhob ncua." 39 Pob Zeb nrog ob tug neeg mus tam sim ntawd. Thaum nws tuaj txog ntua, lawv kom nws nce mus saum chav tsev siab. Cov poj ntsuam tuaj pom tuag, sawv daws los ntsauv vog Pob Zeb. Lawv quaj zom zaws. Lawv muab tej tsoos tsho uas Tas Npis Thas tau ua thaum nws tseem nrog lawv nyob rau Pob Zeb saib. 40 Pob Zeb kom sawv daws tawm mus sab nraud. Nws txhos caug thov Ntuj, ces nws tig los hais rau tus tuag tias : "Tas Npis Thas, koj sawv." Tus poj niam rua muag pom Pob Zeb, nws sawv tsees los zaum. 41 Pob Zeb tuav nws txhais tes, rub nws sawv ntsug. Ces Pob Zeb hu cov Ntshiab thiab cov poj ntsuam los xyuas Tas Npis Thas rau qhov nws ciaj rov los lawm. 42 Tas lub tsheej Yos Pes hnov lub moo ntawd, mas ntau leej ntseeg txog Huab Tais.

    NPN 116: 12-13, 14-15, 16-17

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    Kuv yuav muab dab tsi los pauj ib puas
    tsav yam zoo uas HUAB TAIS ua rau kuv ?
    Kuv yuav cev lub ntim cawm neeg,
    Thiab kuv yuav hu txog HUAB TAIS lub npe.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    Kuv yuav pauj kuv lub yeem rau HUAB TAIS
    nyob ntawm tas nws haiv neeg xub ntiag.
    HUAB TAIS saib nws cov ntseeg
    txoj kev tuag muaj nqes heev.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    HUAB TAIS, kuv yog koj tus tub txib,
    Kuv yog koj tus tub txib, yog koj tus ntxhais txib tus tub.
    Koj tau daws cov hlua khi kuv.
    Kuv yuav cev ib co txim los ua koj tsaug,
    Thiab kuv yuav tuav txog HUAB TAIS lub npe.

    Txais: (12) Kuv yuav muab dab tsi los pauj ib puas tsav yam zoo uas HUAB TAIS ua rau kuv ?
    los: As les lus yas.

    As Les Lus Yas: ZAM 6: 63C, 68C

    Txais: As les lus yas, as les lus yas.

    Koj cov lus, Huab Tais, yog ntsuj plig thiab yog txoj sia;
    koj muaj cov lus pub txoj sia nyob mus li.

    Txais: As les lus yas, as les lus yas.

    Ntawv Moo Zoo: ZAM 6: 60-69

    60 Yes Xus ib co thwj tim coob tau hnov cov lus ntawd, ces lawv hais tias : "Cov lus no tawv dhau, leej twg yuav mloog tau ?" 61 Tab sis Yes Xus yeej paub hauv nruab siab tias nws cov thwj tim yws txog cov lus ntawd, nws thiaj hais rau lawv tias : "Tej lus ntawd dawm nej taw lod ? 62 Yog nej tseem pom Neeg Leej Tub nce mus saum qhov chaw uas thaud nws nyob, nej yuav ua li cas to taub ? 63 Yog tus ntsuj plig ua kom muaj txoj sia, lub cev nqaij ua tsis tau dab tsi. Cov lus uas kuv hais rau nej yog ntsuj plig thiab yog txoj sia. 64 Tab sis nyob hauv nej, muaj ib co tsis ntseeg." Vim txij lub hauv paus los, Yes Xus yeej paub tias cov tsis ntseeg yog leej twg, thiab tus yuav muab nws muag yog leej twg. 65 Ces Yes Xus hais tias : "Vim li no kuv thiaj hais rau nej tias tsis muaj leej twg tuaj cuag kuv tau, yog Leej Txiv tsis pub qhov ntawd rau nws." 66 Txij thaum ntawd los, Yes Xus ib co thwj tim coob thiaj li rov qab mus tsev, lawv tsis nrog Yes Xus mus ntxiv lawm. 67 Yes Xus thiaj hais rau Pab Kaum Ob tias : "Nej ne, nej puas xav mus thiab ?" 68 Xis Moos Pob Zeb teb rau Yes Xus tias : "Huab Tais, peb yuav mus nrog leej twg ? Koj muaj cov lus pub txoj sia nyob mus li. 69 Peb ntseeg thiab peb paub tias koj yog Tswv Ntuj tus Ntshiab."


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 17th April 2016, 10:31 am

    TIM 18 LUB 4 HLIS 2016

    Hnub Ob Lis Piam Plaub Caij Hla Xyoo C

    Zaj Nyeem Ib: Hauj Lwm 11: 1-18


    1 Cov Hauv Paus Xa Lus thiab cov kwv tij nyob hauv xeev Yus Das tau hnov tias tab yog cov neeg teev pej kum dab, mas lawv kuj tau txais Tswv Ntuj lo lus thiab. 2 Ces thaum Pob Zeb mus pem Yes Lus Xas Les, mas cov txais lub cim txiav yws yws rau Pob Zeb tias : 3 "Vim li cas koj thiaj li mus hauv cov niag neeg tsis txais lub cim txiav tsev, thiab nrog lawv noj mov ?" 4 Pob Zeb thiaj li piav txij lub hauv paus txog lub ntsis rau lawv tias : 5 "Nyob hauv lub nroog Yos Pes, thaum kuv tseem tab tom teev ntuj, kuv ua yog toog pom ib yam zoo li ib daig ntaub pua rooj loj loj nqes los. Daim ntaub ntawd plaub ceg kaum khi ua plaub lub cos, cia li nqes los txog ntawm kuv. 6 Kuv ntsia ntsoov daim ntaub, kuv pom muaj tas ib puas tsav yam tsiaj nyob ntiaj teb no, cov muaj plaub txhais tes taw, cov tsiaj qus, tsiaj nkag hauv av, thiab cov noog ya saum ntuj. 7 Kuv hnov ib lub suab hais rau kuv tias : 'Pob Zeb, koj sawv, koj muab los tua noj.' 8 Kuv teb tias : 'Huab Tais, kuv tsis noj, txog tav no tsis tau muaj ib yam lo txhaum los ib yam tsis huv nkag mus hauv kuv lub ncauj ib zaug.' 9 Lub suab ntawd tseem hais ib zaug ntxiv saum ntuj tuaj tias : 'Tej yam uas Tswv Ntuj ua kom huv, mas koj tsis txhob hais tias tsis huv.' 10 Lub suab hais peb zaug li ntawd tas, ces txhia yam rov nce rau saum ntuj lawm. 11 Thaum ntawd, muaj peb tug neeg tab tom tuaj txog ntawm lub tsev peb nyob. Luag xa lawv ntawm Xes Ntxas Les tuaj hu kuv. 12 Leej Ntuj Plig qhia kuv kom nrog lawv mus, tsis txhob ua xyem xyav. Rau leej kwv tij uas nrog kuv ua ke no, kuj mus huv tib si thiab. Peb sawv daws chaws mus hauv tus neeg lub tsev, uas yog tus nej hais no. 13 Tus neeg ntawd thiaj piav rau peb tias Ntuj ib tug Tshiab tuaj xyuas nws, hais rau nws tias : 'Koj tso neeg mus tos tus Xis Moos uas hu ua Pob Zeb nram Yos Pes tuaj. 14 Nws yuav hais ib co lus coj txoj kev cawm tuaj rau koj thiab rau koj tsev neeg tas huv tib si. 15 Kuv nyuam qhuav pib hais lus xwb, Leej Ntuj Plig Ntshiab cia li nqes los rau saum lawv ib yam li thawj zaug nws nqes los rau saum peb. 16 Kuv thiaj nco txog Huab Tais lo lus no : 'Zam muab dej los ntxuav, tiam sis nej mas Ntuj yuav ntxuav nej nyob hauv Leej Ntuj Plig.' 17 Yog Tswv Ntuj twb pub tib lub txiaj ntsim rau cov neeg ntawd xws li pub rau peb, vim lawv ntseeg txog Huab Tais Yes Xus Pleev. Kuv yog leej twg, kuv thiaj yuav txwv tau Tswv Ntuj ?' 18 Cov lus no thiaj ua rau lawv lub siab nqig, ces lawv cav txog Tswv Ntuj tias : "Ua li mas Tswv Ntuj kuj pub txoj kev thov txhaum uas coj neeg mus txog txoj sia rau cov neeg teev pej kum dab thiab."

    NPN 42: 2-3; 43: 3, 4

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Xws li tus kauv nqhis cov dej ntws lug,
    ib yam li ntawd, kuv tus ntsuj plig nqhis txog koj, Tswv Ntuj.
    Kuv tus ntsuj plig nqhis txog Tswv Ntuj, tus Tswv Ntuj muaj txoj sia.
    Thaum twg kuv li tau mus pom Tswv Ntuj lub ntsej muag?

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Thov koj xa koj qhov pom kev thiab qhov tseeb tuaj
    coj kuv kev mus txog saum koj lub roob ntshiab,
    mus txog ntua qhov chaw koj nyob.

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    Ces kuv yuav mus kom txog ntawm Tswv Ntuj lub thaj,
    mus txog tus Tswv Ntuj uas ua kom kuv dhia zoo siab.
    Ces kuv yuav ntaus nkauj nog ncas ua koj tsaug,
    Tswv Ntuj, kuv tus Tswv Ntuj!

    Txais: (3a) Kuv tus ntsuj plig nqhis qhuav siab qhawv txog tus Tswv Ntuj muaj txoj sia.
    los: As les lus yas.

    As Les Lus Yas: ZAM 10: 14

    Txais: As les lus yas, as les lus yas.

    Huab Tais hais tias, Kuv yog tus zoo tswv zov yaj,
    kuv paub kuv cov yaj, kuv cov yaj paub kuv.

    Txais: As les lus yas, as les lus yas.

    Ntawv Moo Zoo: ZAM 10: 1-10

    Yes Xus hais tias:
    1 "Kuv hais qhov muaj tseeb tiag rau nej : Tus tsis nkag ntawm qhov rooj mus hauv lub nkuaj yaj, hos nws nce lwm qhov chaw mus rau hauv, mas nws yog ib tug tub sab tuaj nyiag thiab tuaj lwg. 2 Tus uas nkag ntawm qhov rooj mus yog ib tug tswv zov yaj. 3 Tus zov rooj loog qhib qhov rooj rau nws, cov yaj mloog nws lub suab. Nws hu nws cov yaj, nws tuav lawv ib leeg zuj zus lub npe, nws coj lawv mus. 4 Thaum nws coj cov yaj tawm tas lawm, nws mus ua ntej, cov yaj lawv nws qab, vim lawv paub nws lub suab. 5 Cov yaj yuav tsis mus raws lwm tus, lawv yuav khiav ntawm lwm tus, vim lawv tsis paub luag tej lub suab." 6 Yes Xus hais zaj paj lug no rau lawv, tab sis lawv tsis paub tias nws hais txog dab tsi rau lawv. 7 Yes Xus rov qab hais tias : "Kuv hais qhov muaj tseeb tiag rau nej tias kuv yog cov yaj lub qhov rooj. 8 Tas cov uas tuaj ua kuv ntej yog ib co tub sab tuaj nyiag thiab tuaj lwg, tab sis cov yaj kuj tsis mloog lawv. 9 Kuv yog lub qhov rooj : tus twg nkag ntawm kuv mus, nws yuav txais kev cawm, nws yuav nkag tau rau hauv thiab tawm tau los, nws yuav nrhiav tau lub tshav zaub. 10 Tus tub sab tsuas tuaj nyiag, tuaj lwg, thiab tuaj txo txoj sia xwb. Hos kuv, mas kuv tuaj ua kom lawv tau txoj sia, thiab kom lawv tau txoj sia loj zuj zus.


    Mim
    Mim
    Tswv Cuab Hmong Catholique
    Tswv Cuab Hmong Catholique


    Messages : 3770
    Date d'inscription : 2009-10-16

    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Mim 18th April 2016, 2:39 am

    TIM 19 LUB 4 HLIS 2016

    Hnub Peb Lis Piam Plaub Caij Hla Xyoo C

    Zaj Nyeem Ib: HAUJ LWM 11: 19-26


    19 Thaum Tes Fas Nos raug luag muab tua tas, muaj ib co ntseeg raug luag hiam, ces lawv thiaj tawg khiav mus txog Fes Nis Xias teb, txog Kws Plos, thiab txog As Nthias Kias. Mas lawv tsis tshaj Ntuj Lo Lus rau leej twg li, lawv tsuas tshaj rau cov Yus Das xwb. 20 Tsis kav, nyob hauv lawv, muaj tus puav yog cov neeg tuaj Kws Plos thiab Xis Les Nas tuaj txog As Nthias Kias, lawv tshaj Huab Tais Yes Xus lub Moo Zoo rau cov Hes Las. 21 Huab Tais txhais tes pab lawv. Ces cov neeg txais kev ntseeg thiab tig los cuag Huab Tais coob kawg. 22 Lub Koom Txoos nyob Yes Lus Xas Les hnov lub moo ntawd, lawv thiaj xa Npas Nas Npes mus nyob As Nthias Kias. 23 Thaum Npas Nas Npes tuaj txog, nws pom Tswv Ntuj lub txiaj ntsim, mas nws zoo siab hlo. Nws pab lawv ua siab loj siab tawv kom lawv nyob ruaj nreb hauv txoj kev ntseeg txog Huab Tais. 24 Npas Nas Npes yog ib tug neeg zoo. Leej Ntuj Plig Ntshiab nyob puv hauv nws, thiab nws yog ib tug neeg ntseeg ruaj. Ib pab neeg coob kawg los ntseeg txog Huab Tais ntxiv. 25 Ces Npas Nas Npes mus nrhiav Xauv nyob Tas Xis. 26 Thaum nws nrhiav tau Xauv lawm, mas nws coj Xauv los nyob As Nthias Kias. Nkawd nyob li ntawd ib xyoos hauv lub Koom Txoos, nkawd qhia ib pab neeg coob kawg. Yog nyob As Nthias Kias mas luag thiaj pib hu cov thwj tim ua cov Pleev.

    NPN 87: 1B-3, 4-5, 6-7

    Txais: (117:1a) Tas txhua haiv neeg, nej cav txog Huab Tais.
    los: Alleluia.

    HUAB TAIS txhim Xis Yoos rau saum cov roob ntshiab,
    Nws nyiam Xis Yoos cov rooj vag tshaj Yas Kos cov tsev.
    Tswv Ntuj lub tsheej, neeg hais ntau yam qhuas txog koj!

    Txais: (117:1a) Tas txhua haiv neeg, nej cav txog Huab Tais.
    los: Alleluia.

    Kuv xam Las Has thiab Npas Npis Los nrog cov uas lees paub kuv.
    Hais txog Fis Lis Tis, Tws Los, Es Thias Pias mas tus no los tus no yug nyob hauv".
    Tiam sis luag yuav hais txog Xis Yoos tias : “Txhua tus neeg yug nyob hauv nws,
    Tus Nyob Siab yog tus txhim nws kom ruaj khov."

    Txais: (117:1a) Tas txhua haiv neeg, nej cav txog Huab Tais.
    los: Alleluia.

    HUAB TAIS yuav sau rau hauv phau ntawv txheeb npe tias :
    "Tus neeg no yug los nyob qhov no !"
    tsis hais cov vaj txheeb los cov me nyuam tib si.
    Sawv daws puav leej muab koj ua lawv chaw nyob.

    Txais: (117:1a) Tas txhua haiv neeg, nej cav txog Huab Tais.
    los: Alleluia.

    As Les Lus yas: ZAM 10: 27

    Txais: As les lus yas, as les lus yas.

    Huab Tais hais tias: kuv cov yaj mloog kuv lub suab,
    kuv paub lawv thiab lawv raws kuv mus.

    Txais: As les lus yas, as les lus yas.

    Ntawv Moo Zoo: ZAM 10: 22-30

    22 Thaum ntawd txog lub hnub nyoog nqaum paj nqaum nruas Ntxuav lub Tuam Tsev Teev Ntuj nyob Yes Lus Xas Les. Yog lub caij ntuj no. 23 Yes Xus mus mus los los hauv lub Tuam Tsev Teev Ntuj nyob hauv lub qab ru tsev Xas Los Moos. 24 Cov Yus Das los ntsauv ncig nws, ces lawv hais rau nws tias : "Koj yuav cia peb lub siab ua xyem xyav txog thaum twg ? Saib koj yog Leej Pleev no, koj tab meeg hais rau peb ?" 25 Yes Xus teb rau lawv tias : "Kuv twb hais qhia nej lawm, uas nej tsis ntseeg. Cov hauj lwm uas kuv hu txog kuv Txiv lub npe los ua, zeem tseeb txog kuv. 26 Tab sis nej tsis ntseeg vim nej tsis yog kuv cov yaj. 27 Kuv cov yaj mloog kuv lub suab, kuv paub lawv, lawv raws nraim kuv. 28 Kuv pub txoj sia nyob mus li rau lawv, lawv yuav tsis tuag ib zaug li. Tsis muaj leej twg yuav chua tau lawv ntawm kuv txhais tes. 29 Kuv Txiv yog tus loj tshaj txhua tsav txhua yam, nws muab cov yaj no rau kuv, mas yeej tsis muaj leej twg yuav chua tau dab tsi ntawm kuv Txiv txhais tes li. 30 Leej Txiv thiab kuv, wb yog ib tug xwb."



    Sponsored content


    COV ZAJ NYEEM NRUAB LIS PIAM XYOO II,  2015-2016 - Page 5 Empty Re: COV ZAJ NYEEM NRUAB LIS PIAM XYOO II, 2015-2016

    Post  Sponsored content


      Current date/time is 28th March 2024, 12:23 am