Cov zaj nyeem xyoo B 2014-2015

TIM 18 LUB 2 HLIS   2015

Hnub Plaub Txais Tshauv – Pib Caij Plaub Caug



Zaj Nyeem Ib    YOS ES 2:12-18

12 HUAB TAIS hais li no : "Lub sij hawm no, nej mob siab rov qab los cuag kuv;
nej yoo mov, nej quaj, nej nyiav zoo li cov ntoo xyom.
13 Nej tsis txhob ua nej tej tsho ntuag,nej yuav ua nej lub siab ntuag thiaj yog.
Nej rov qab los cuag nej tus HUAB TAIS Tswv Ntuj.
Vim nws muaj kev hlub mos nyoos, nws khuv leej neeg tas nrho, nws npau taws qeeb,
nws muaj lub siab zoo tas nrho, nws tsis xav pom neeg raug txim.
14 Tej zaum nws yuav tsis rau txim, tiam sis nws yuav foom hmoov zoo rau nej,
ces nej yuav muaj qoob thiab muaj cawv txi rau nej tus HUAB TAIS Tswv Ntuj.
15 Nej tshuab puab nyob saum Xis Yoos ! Nej teem ib lub hnub nyoog ua kev yoo tshaib
thiab tshaj tawm ib lub caij tuaj sib txoos ua ke.
16 Nej hu tas tsoom pej xeem tuaj, nej sau tas nej lub cuab zej cuab zos tuaj;
nej hu cov laus huv si, nej sau coj cov me nyuam yaus thiab cov tseem noj mis tib si tuaj.
Tus vauv yuav tso nws lub paim tseg, tus nyab yuav tso nws lub chaw tseg.
17 Cov Leej Choj, HUAB TAIS cov tub txib,  yuav tuaj quaj nyob hauv lub tshav
ntawm kis nruab nrab lub qhov rooj thiab lub thaj txi Ntuj, lawv yuav quaj hais tias :
"HUAB TAIS, thov koj txuag koj haiv neeg ! Koj txhob tso koj lub cuab tam
rau hauv txoj kev txaj muag, txhob cia cov kuj cuab hnyos koj haiv neeg.
Vim li cas koj cia cov haiv neeg tau kev thuam tias :
His Xas Lais tus Tswv Ntuj dua qhov twg lawd ?"
18 Ces HUAB TAIS muaj khib txog nws lub teb chaws, nws hlub nws haiv neeg.


NPN   51:3-4, 5-6AB, 12-13, 14 + 17

Txais:   (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj khuv leej kuv vim koj lub siab zoo;
thov koj so kuv qhov txhaum pov tseg, vim koj muaj kev hlub loj tas nrho.  
Thov koj ntxuav kuv lub txim pov tseg kom tas nrho
thiab muab kuv qhov txhaum tshem mus kom kuv dawb huv tuaj.

Txais:   (3a) HUAB TAIS, thov koj khuv leej peb vim peb tau ua txhaum lawm.

Kuv lees paub kuv qhov txhaum,
kuv qhov txhaum nyob rawv ntawm kuv xub ntiag.
“Kuv tau ua txhaum rau koj ib leeg xwb,
kuv tau ua qhov uas koj saib yog tsis zoo.”

Txais:   (3a) HUAB TAIS, thov koj khuv leej peb vim peb tau ua txhaum lawm.

Tswv Ntuj, thov koj tsim ib lub siab huv lis si rau kuv,
thiab rov muab ib lub tswv yim nyob ruaj nreb rau kuv.
Koj tsis txhob muab kuv ntiab mus deb ntawm koj,  
thiab txhob rho koj leej Tswv Yim Ntshiab tawm ntawm kuv mus.

Txais:   (3a) HUAB TAIS, thov koj khuv leej peb vim peb tau ua txhaum lawm.

Thov koj pub kom kuv rov muaj kev zoo siab nyob hauv koj txoj kev cawm
thiab ua kom kuv muaj ib lub tswv yim xav mloog koj.
HUAB TAIS, thov qhib kuv di ncauj,
ces kuv lub ncauj yuav tshaj koj lub koob meej.

Txais:   (3a) HUAB TAIS, thov koj khuv leej peb vim peb tau ua txhaum lawm.

Zaj Nyeem Ob   2 KOS LIS NTHOS  5:20—6:2

20 Peb yog cov uas Tswv Ntuj xa mus ua Leej Pleev cov tiam lis ;
yog zoo li Tswv Ntuj siv peb lub ncauj mus qhuab qhia.
Peb tuav txog Leej Pleev lub npe thov nej tas zog,
kom nej cia li nrog Tswv Ntuj rov sib haum xeeb.
21 Tswv Ntuj ua kom tus uas tsis paub txoj kev txhaum, txia ua kev txhaum,
kom nws pab peb, ces peb nyob hauv nws,
mas peb plhis mus ua Tswv Ntuj txoj kev ncaj.
1 Vim peb yog cov neeg nrog Leej Pleev ua hauj lwm,
mas peb thov qhuab ntuas nej, kom nej txhob txais Ntuj lub txiaj ntsim dag.
2 Vim Tswv Ntuj hais tias: ‘Lub sij hawm zoo, kuv tau teb rau koj raws li koj thov.
Hnub cawm neeg, kuv tau cev tes pab koj.’
Lub sij hawm zoo, yog nyem no. Hnub cawm neeg, yog nyem no.

Zaj Tshaj Lub Moo Zoo     NPN 95:8

Hnub no yog nej hnov nws lub suab,
nej tsis txhob ua nej lub siab tawv ncauj.

Ntawv Moo Zoo   MT 6:1-6, 16-18

1 “Nej ceev faj, nej txhob ua ncaj nyob ntawm neeg xub ntiag xwb, kom luag qhuas nej.
Yog nej ua li ntawd, mas nej yuav tsis txais koob haum ntawm nej Txiv nyob saum ntuj.
2 Thaum koj pub rau luag, koj txhob tshuab hom ua koj ntej.
Cov neeg zoo sab nraud ua li ntawd nyob hauv cov tsev txoos thiab nyob ntawm tej kev,
kom sawv daws cav lus zoo txog lawv. Kuv hais tseeb rau nej,
lawv twb txais lawv cov koob haum tas lawm.
3 Hos koj, mas thaum koj pub rau luag,
koj txhob cia koj sab tes laug paub qhov uas sab tes xis ua.  
4 Li ntawd, tsis muaj neeg paub tias koj tau pub. Ces koj Txiv uas nws pom hauv
qhov chaw nraim yuav pauj rau koj. Teev Ntuj nyob hauv qhov chaw nraim.  
5 Thaum nej teev Ntuj, nej txhob ua li cov neeg zoo sab nraud :
lawv nyiam sawv ntsug hauv cov tsev txoos, thiab ntawm tej kev tshuam,
kom sawv daws pom lawv. Kuv hais tseeb rau nej, lawv twb txais lawv cov koob haum lawm.
6 Hos koj, mas thaum koj teev Ntuj, koj mus nyob twj ywm hauv koj kem txaj,
kaw koj qhov rooj ces koj teev koj Txiv uas nws nyob hauv qhov chaw nraim.
Koj Txiv uas nws pom hauv qhov chaw nraim, yuav pauj rau koj.
16 Thaum nej yoo mov, nej txhob ua ntsej muag ntshaus xws li cov neeg zoo sab nraud :
lawv ua ntsej muag mluas mluas, kom luag pom meej tias lawv yoo mov.
Kuv hais tseeb rau nej tias cov neeg ntawd twb txais lawv cov koob haum tas lawm.
17 Hos koj, mas thaum koj yoo mov, koj yuav pleev tshuaj tsw qab saum taub hau, koj ntxuav muag,
18 kom txhob muaj neeg paub tias koj yoo mov, tsuas kawg koj Txiv uas nws nyob hauv
qhov chaw nraim tib leeg paub xwb. Koj Txiv pom hauv qhov chaw nraim yuav pauj rau koj.”

COV ZAJ NYEEM HNUB TIM 22/02/2015

Hnub Chiv Ib hauv Caij 40

Zaj Nyeem IB:   HAUV PAUS 9:8-15

8 Tswv Ntuj hais li no rau Nos Hes thiab rau nws cov tub :
9 "Ntawm no, kuv nrog nej cog lus cia, nrog nej thiab nej caj ces puag tom qab,
10 nrog txhua yam uas muaj txoj sia nyob, nrog cov noog, cov tsiaj nyeg,
nrog txhua tsav txhua hom tsiaj hauv ntiaj teb uas tawm hauv lub nkoj los, cog lus.
11 Kuv cog lus rau nej tias : Tas puas tsav yam muaj sia yuav tsis raug dej nyab
rhuav siav kom tu noob ib zaug ntxiv. Yuav tsis muaj dej
los nyab ntiaj teb thiab rhuav ntiaj teb ib zaug ntxiv."
12 Tswv Ntuj hais tias : "Lub cim no yuav qhia rau cov tiam neeg tom ntej paub tias
kuv tau nrog nej thiab tas puas tsav yam muaj sia uas nrog nej muaj sia cog lus.
13 Kuv ua zaj sawv rau saum cov huab ; nws yuav ua lub cim nco txog
tias kuv thiab lub ntiaj teb tau cog lus cia lawm.
14 Thaum kuv sau cov huab los ncaj rau saum
lub ntiaj teb thiab pom zaj sawv saum cov huab,
15 ces kuv yuav nco dheev txog kuv cov lus cog rau nej
thiab rau tas puas tsav yam muaj lub cev nqaij,
ces dej yuav tsis hlob thiab tsis nyab tas puas tsav yam muaj sia ib zaug ntxiv. “

Zaj Nyeem Ob:   1 POB ZEB 3:18-22

18 Leej Pleev tuag ib zaug, vim peb cov txhaum.
Nws yog tus siab ncaj uas tuag mus cawm cov neeg tsis ncaj,
vim nws xav coj peb rov los rau Tswv Ntuj. Luag tua nws lub cev nqaij tuag lawm,
tab sis nws rov muaj txoj sia nyob hauv lub tswv yim.
19 Yog lub tswv yim no coj nws mus ceeb toom rau cov plig nyob hauv tsev loj faj,
20 yog cov ntsuj plig uas txheej thaud tsis mloog lus,
tab yog Tswv Ntuj tau ua siab ntev ntev tos lawv, thaum Nos Hes txua lub nkoj,
vim li ntawd thiaj muaj yim leej dim ntawm dej xwb.
21 Zaj no xub qhia txog lub Cim Ntxuav uas cawm nej :
lub Cim Ntxuav tsis yog ntxuav qhov qias ntawm lub cev nqaij sab nraud xwb,
lub Cim Ntxuav yog ib txog kev cog lus ncaj rau Tswv Ntuj,
nyob hauv Yes Xus Pleev txoj kev sawv rov los.
22 Thaum Yes Xus Pleev muab ib tsoom Tshiab los zwm rau nws tas,
mas nws nce mus pem ntuj, mus nyob ntawm Tswv Ntuj phab xis

Ntawv Moo Zoo:   MK 1:12-15

12 Leej Ntuj Plig txhib Yes Xus kom mus tam sis ntawd rau teb chaws suab puam.
13 Yes Xus nyob teb chaws suab puam plaub caug hnub. Xas Tas ntxias nws.
Yes Xus nrog cov tsiaj qus nyob, cov Tshiab tsob hwb nws.
14 Thaum luag ntes Zam lawm, ces Yes Xus mus Nkas Lis Lais teb.
Nws tshaj lub Moo Zoo qhia txog Tswv Ntuj, nws hais tias :
15 "Txog lub caij teem lawm, Tswv Ntuj lub Ceeb Tsheej los txog ze lawm :
nej hloov siab, nej ntseeg txog lub Moo Zoo mog."

COV ZAJ NYEEM HNUB TIM 08/03/2015
CHIV PEB HAUV CAIJ 40

Zaj Nyeem Ib: KEV TSIV 20:1-17

1 Tswv Ntuj hais cov lus no :
2 "Kuv, HUAB TAIS, yog koj tus Tswv Ntuj, yog tus ua kom koj dim
ntawm Hais Nkws Tos teb los, dim ntawm txoj kev ua luag qhev.
3 Koj yuav tsis txhob muaj dua lwm tus tswv ntuj.
4 Koj yuav tsis txhob puab ib tug mlom los ib tug duab
zoo li tej yam nyob saum ntuj, los tej yam nyob
hauv ntiaj teb no, los tej yam nyob hauv qab thu dej.
5 Koj yuav tsis txhob pe cov mlom ntawd, txhob tsob hwb lawv,
vim kuv yog HUAB TAIS thiab yog koj tus Tswv Ntuj, kuv yog
ib tug Tswv Ntuj muaj khib; cov uas ntxub kuv, mas kuv rau txim
rau phaj tub thiab phaj xeeb ntxwv thiab phaj xeeb ntxwv
cov xeeb ntxwv tom qab, vim phaj txiv tau ua txhaum rau kuv.
6 Hos cov nyiam kuv thiab ua raws kuv cov lus qhia, mas kuv hlub
lawv thiab pub txiaj ntsha txiaj ntsim ntau rau
txhiab leej vam leej mus tiam dhau tiam.
7 Koj yuav tsis txhob hu txog koj tus HUAB TAIS Tswv Ntuj
lub npe mus ua tej yam tsis zoo, vim HUAB TAIS yuav tsis
zam txim rau tus neeg uas tuav txog nws lub npe dog dig.
8 Koj yuav nco ntsoov caiv hnub xas npas tos,
koj yuav muab saib ua ib hnub ntshiab.
9 Koj ua hauj lwm rau hnub,
10 tab sis hnub xya yog hnub caiv xas npas tos rau koj tus
HUAB TAIS Tswv Ntuj. Koj yuav tsis txhob ua ib yam hauj lwm dab tsi li.
Koj thiab koj tus tub, koj tus ntxhais, koj tus tub txib, koj tus
ntxhais txib, koj cov tsiaj txhu, tus qhua uas tuaj nyob hauv koj tsev,
nej sawv daws yuav tsis txhob ua hauj lwm li.
11 Vim tias HUAB TAIS tau ua hauj lwm rau hnub los tsim lub ntuj,
lub ntiaj teb, lub hiav txwv, thiab tas puas tsav yam nyob rau hauv,
tiam sis hnub xya nws so, vim li ntawd HUAB TAIS tau foom hmoov
zoo rau hnub xya, nws muab hnub xya qee ua ib hnub ntshiab.
12 Koj yuav hwm koj niam thiab koj txiv, koj thiaj yuav tau
nyob ntev niaj ntau xyoo hauv lub ntiaj teb uas koj tus
HUAB TAIS Tswv Ntuj muab pub rau koj.
13 Koj yuav tsis txhob tua neeg.
14 Koj yuav tsis txhob ua hluas.
15 Koj yuav tsis txhob ua tub sab tub nyiag.
16 Koj yuav tsis txhob liam rau luag tej.
17 Koj yuav tsis txhob ntshaw txeeb luag vaj luag tsev.
Koj yuav tsis txhob ntshaw txeeb luag tus poj niam,
luag tus tub txib, luag tus ntxhais txib, luag tus nyuj
los tus luj, los ib yam dab tsi uas yog luag tug."

Los: KEV TSIV 20:1-3, 7-8, 12-17

1 Tswv Ntuj hais cov lus no :
2 "Kuv, HUAB TAIS, yog koj tus Tswv Ntuj, yog tus ua kom koj dim
ntawm Hais Nkws Tos teb los, dim ntawm txoj kev ua luag qhev.
3 Koj yuav tsis txhob muaj dua lwm tus tswv ntuj.
7 Koj yuav tsis txhob hu txog koj tus HUAB TAIS Tswv Ntuj
lub npe mus ua tej yam tsis zoo, vim HUAB TAIS yuav tsis
zam txim rau tus neeg uas tuav txog nws lub npe dog dig.
8 Koj yuav nco ntsoov caiv hnub xas npas tos,
koj yuav muab saib ua ib hnub ntshiab.
12 Koj yuav hwm koj niam thiab koj txiv, koj thiaj yuav tau
nyob ntev niaj ntau xyoo hauv lub ntiaj teb uas koj tus
HUAB TAIS Tswv Ntuj muab pub rau koj.
13 Koj yuav tsis txhob tua neeg.
14 Koj yuav tsis txhob ua hluas txhob ze luag txij nkawm.
15 Koj yuav tsis txhob ua tub sab tub nyiag.
16 Koj yuav tsis txhob liam rau luag tej.
17 Koj yuav tsis txhob ntshaw txeeb luag vaj luag tsev.
Koj yuav tsis txhob ntshaw txeeb luag tus poj niam,
luag tus tub txib, luag tus ntxhais txib, luag tus nyuj
los tus luj, los ib yam dab tsi uas yog luag tug."

Zaj Nyeem Ob: 1 KLN 1:22-25

22 Cov Yus Das mas lawv taij hwj huam yees ntxwv ,
cov Hes Las lawv nrhiav kev thoob tsib,
23 hos ntawm peb mas peb tshaj leej Pleev tuag saum ntoo cuam,
yog ib zag uas cov Yus Das saib yog kev yuam kev loj,
cov neeg teev dab saib yog kev vwm.
24 Tab sis cov uas Ntuj hu lawv, tsis hais Yus Das los Hes Las,
mas lawv saib Yes Xus yog Leej Pleev, yog Tswv Ntuj
lub hwj huam, yog Tswv Ntuj txoj kev Thoob Tsib.
25 Vim tias Tswv Ntuj txoj kev vwm,
mas nws thoob tsib dua neeg kev thoob tsib,
thiab Tswv Ntuj txoj kev tsis muaj zog,
mas nws muaj zog dua neeg kev muaj zog

Ntawv Moo Zoo: ZAM 2:13-25


13 Yuav txog cov Yus Das lub Ntees Hla,
ces Yes Xus mus pem Yes Lus Xas Les.
14 Nyob hauv lub Tuam Tsev Teev Ntuj, Yes Xus pom cov
tub luam muag nyuj, muag tshis, muag nquab, thiab cov neeg
pauv nyiaj zaum ntawm lawv cov rooj.
15 Nws muab ib co hlua ua ib rab nplawm, nws ntiab
sawv daws huv tib si tawm hauv lub Tuam Tsev Teev Ntuj,
nws caum cov yaj thiab cov nyuj. Nws nchuav
cov pauv nyiaj tej nyiaj, nws ntxeev lawv tej rooj.
16 Nws hais rau cov muag nquab tias :
"Nej tshem tej ntawd tawm hauv no mus. Nej tsis txhob
muab kuv Txiv lub Tsev los ua ib lub tsev ua luam ntxiv."
17 Yes Xus cov thwj tim nco txog lo lus uas Ntawv sau tseg tias :
Kev mob siab rau koj lub Tsev ua kuv lub siab kub lug.
18 Cov Yus Das thiaj qhib ncauj hais rau nws tias :
"Koj tau ua li no, koj yuav muab lub cim dab tsi rau peb pom ?
19 Yes Xus teb rau lawv, nws hais tias : "Nej rhuav lub
Tsev Ntshiab no. Peb hnub tom qab, mas kuv rov txhim tau.”
20 Cov Yus Das thiaj hais tias : "Lawv ua hauj lwm
plaub caug rau xyoo thiaj txhim tau lub Tsev Ntshiab no.
Hos koj, koj ua peb hnub, koj yuav rov txhim tau !"
21 Tab sis Yes Xus hais txog nws lub Cev uas yog lub Tsev Ntshiab.
22 Thaum Yes Xus sawv hauv cov tuag rov los lawm,
nws cov thwj tim rov nco tias nws twb tau hais li ntawd,
ces lawv ntseeg txog Phau Ntawv thiab ntseeg txog lo lus
uas Yes Xus tau hais. Yes Xus paub neeg lub siab sab hauv.
23 Thaum tab tom nqaum paj nqaum nruas ua lub Ntees Hla,
Yes Xus nyob Yes Lus Xas Les. Muaj coob leej ntseeg txog
nws lub Npe, vim lawv tau pom cov cim nws ua.
24 Tab sis Yes Xus tsis tso siab rau lawv,
vim nws paub lawv tas huv si,
25 tsis tas yuav muaj leej twg qhia txog neeg rau Yes Xus.
Vim nws paub neeg lub siab sab hauv.

COV ZAJ NYEEM HNUB TIM 15/03/2015
CHIV 4 HAUV CAIJ 40

Zaj Nyeem Ib:     2 XWM 36:14-16, 19-23

14 Lub caij ntawd cov nom tswv nyob Yus Das teb, cov Leej Choj,
thiab tsoom pej xeem sawv daws ua tsis ncaj tas mus li,
lawv xyaum coj tsis zoo, yoog raws li cov pej kum haiv neeg,
thiab lawv ua tsis huv rau lub tuam tsev teev ntuj
uas HUAB TAIS tau qee ua nws tug nyob Yes Lus Xas Les.
15 HUAB TAIS, lawv phaj txiv tus Tswv Ntuj tau xa ib co tiam lis tuaj
tsis tseg rau lawv, vim nws xav txuag nws haiv neeg thiab nws lub Tsev.
16 Tiam sis lawv luag cov neeg uas Tswv Ntuj xa tuaj,
lawv ntxub nws cov lus, lawv thuam nws cov Yaj Saub.
Ces Tswv Ntuj lub siab thiaj npau taws heev rau nws haiv neeg
tsis muaj dab tsi yuav cheem tau nws.
19 Tswv Ntuj xa tus vaj Kas Ntes tuaj hlawv Tswv Ntuj lub Tuam Tsev,
tuaj rhuav lub ntsa zeb xov Yes Lus Xas Les, zes taws rau vaj ntxwv
cov tsev, thiab muab tej toob xib muaj nqis ua piam tseem tas.
20 Ces Nas Npws Kos Dos Nos Xos coj cov seem uas dim ntawm
hniav ntaj mus nyob Npas Npis Los teb, mus ua nws qhev,
thiab tseem ua nws cov xeeb leej xeeb ntxwv qhev
mus txog lub caij uas tus vaj Pes Xias sawv ua vaj,  
21 kom  xwv muaj tuaj raws li HUAB TAIS lo lus uas Yes Les Mias
tau hais tseg tias: “Lub caij uas lub teb chaws tseem tshuav  
nuj nqes rau hnub xas npas tos, mas nws yuav nyob ua
teb chaws quav poj, yuav muaj kev tu siab loj –
lub caij yuav tsum ntev li xya caum xyoo.  
22 Ces thawj xyoos uas Kws Los ua vaj kav Pes Xias,
kom xwv muaj raws li HUAB TAIS lo lus uas Yes Les Mias tau hais,  
mas Tswv Ntuj tuaj tshoj Kws Los uas yog cov Pes Xias
tus vaj siab kom nws tshaj lus ceeb toom mus thoob nws lub
teb chaws, thiab tseem muab lo rau tej phab ntsa tib si tias :
23 " Kws Los tus vaj Pes Xias hais li no : HUAB TAIS,
tus Tswv kav lub ntuj, tau tso tas txhua haiv neeg nyob
ntiaj teb no rau kuv. Nws tau muab txoj hauj lwm txhim
ib lub Tuam Tsev teev ntuj nyob Yes Lus Xas Les, Yus Das
teb rau kuv ua. Li ntawd, nej leej twg yog haiv His Xas Lais
mas kom Tswv Ntuj nrog nws nyob,
thiab kom nws cia li rov mus lawm ped!"

Zaj Nyeem Ob:    ES FES XOS 2:4-10

4 Tswv Ntuj lub siab zam txhaum dav tis ua dav,
nws muab nws txoj kev nyiam los hlub peb.
5 Li ntawd, txawm tias peb twb tuag lawm, vim peb cov txhaum,
tsis kav, Tswv Ntuj ua kom peb nrog Leej Pleev rov muaj txoj sia :
qhov no, yog Ntuj lub txiaj ntsim cawm peb.
6 Tswv Ntuj tsa peb nrog Leej Pleev sawv rov los, nws coj
peb los zaum saum cov txheej ntuj, nyob hauv Yes Xus Pleev.
7 Tswv Ntuj xav qhia meej rau cov tiam tom ntej pom tias
nws lub txiaj ntsim nplua nuj tas nrho, nyob hauv
Yes Xus Pleev, ces nws thiaj ua siab zoo rau peb.
8 Yog lub txiaj ntsim cawm peb tiag, vim peb ntseeg.
9 Txoj kev cawm tsis tuaj hauv peb tuaj, vim txoj kev cawm
yog Tswv Ntuj pub ua paj tshab rau peb. Txoj kev cawm
kuj tsis tuaj ntawm cov hauj lwm tuaj thiab,
kom tsis txhob muaj ib tug tau kev khav.
10 Peb yog cov hauj lwm tawm ntawm Tswv Ntuj txhais
tes los ; Tswv Ntuj tsim peb nyob hauv Yes Xus Pleev, kom peb
ua cov hauj lwm zoo, uas Tswv Ntuj ib txwm npaj rau peb ua.

Ntawv Moo Zoo:     ZAM  3:14-21

Yes Xus hais hais rau Nis Kos Des Mos tias:
14 Neeg Leej Tub yuav tsum raug luag tsa nws siab xws li
Mais Xes tsa tus nab nyob teb chaws suab puam,
15 kom xwv tus ntseeg txog nws, muaj txoj sia nyob mus li.
16 Vim Tswv Ntuj nyiam lub qab ntuj neeg npaum no :
nws thiaj muab nws Leej Tub twm zeej rau, kom xwv tus
ntseeg txog Leej Tub txhob tuag, tab sis
kom nws muaj txoj sia nyob mus li.
17 Tswv Ntuj tsis xa Leej Tub tuaj hauv lub qab ntuj
kom nws muab txim rau lub qab ntuj neeg,
nws xa Leej Tub tuaj cawm lub qab ntuj neeg.
18 Tus ntseeg txog Leej Tub, nws tsis raug txiav txim.
Tus tsis ntseeg, nws twb raug txiav txim lawm, vim nws
tsis ntseeg txog Tswv Ntuj Leej Tub twm zeej lub npe.
19 Kev txiav txim yog zoo li no : Qhov pom kev tuaj nyob
hauv lub qab ntuj neeg, tab sis tsoom neeg nyiam qhov
tsaus ntuj dua qhov pom kev, vim lawv cov hauj lwm phem.
20 Tus twg ua qhov phem, mas nws ntxub qhov pom kev,
ces nws tsis los nyob hauv qhov pom kev, vim nws
ntshai tsam cov hauj lwm phem yuav qhib los.
21 Hos tus ua qhov tseeb, mas nws los nyob hauv
qhov pom kev, kom luag pom tias nws ua
nws cov hauj lwm nyob hauv Tswv Ntuj."

COV ZAJ NYEEM HNUB TIM 22/03/2015
CHIV 5 Xyoo B HAUV CAIJ 40



Zaj Nyeem Ib:  Yes Les Mias 31, 31-34

HUAB TAIS yuav nrog nws haiv neeg rov cog lus.

31 HUAB TAIS ceeb toom lo lus no :
"Lub hnub nyoog uas kuv yuav
nrog His Xas Lais thiab Yus Das cog lus
tshiab tuaj yuav txog. 32 Tsis yog cov
lus zoo li kuv tau nrog lawv cov yawg
koob cog, hnub uas kuv tau tuav lawv tes
coj lawv tawm hauv Hais Nkws Tos teb
los. Lawv nrauj lo lus kuv nrog lawv cog
ntawd lawm. Kuv yog lawv tus tswv, tab
sis lawv nrauj kuv lo lus. 33 Tab sis kuv
yuav rov nrog His Xas Lais cog lus dua.
Thaum ntawd mas kuv yuav ua zoo li no :
Kuv yuav muab kuv Txoj Cai cog rau
hauv lawv. Kuv yuav sau kuv Txoj Cai
nyob hauv lawv nruab siab.
Ces kuv yuav yog lawv tus Tswv Ntuj,
lawv yuav yog kuv haiv neeg.
34 Thaum ntawd, tsis tas lawv yuav
sib qhia, tsis tas ib tug hais rau ib tug tias :
"Koj yuav tsum paub HUAB TAIS mas !"
Hos thaum ntawd lawv yuav paub kuv tas
huv tib si, tsis hais cov yau los cov hlob.
Vim kuv yuav zam rau lawv, kuv yuav
tsis nco txog lawv cov txhaum ntxiv lawm.


Zaj Nyeem Ob: Hes Nplaws 5,7-9

7 Leej Pleev, thaum nws ua neej nyob
hauv nws lub cev nqaij, nws tau tsa suab
quaj thov tus muaj peev xwm cawm tau
nws ntawm txoj kev tuag. Leej Txiv
mloog Leej Pleev lus thov, vim Leej
Pleev yog tus hwm Leej Txiv zoo.
8 Txawm tias Leej Pleev twb yog tus
Tub cag, tsis kav nws tuaj yeem raug
txom nyem. Nws tau kawm tias kev
mloog lus yog dab tsi.
9 Nyem no, Leej Pleev yog tus zoo txhij
zoo txhua. Leej Pleev los ua lub hauv
paus uas cawm cov neeg mloog nws lus mus li.


Zam Ntawv Moo Zoo:  Zam 12,20-33

Yes Xus qhia tias nws txoj kev tuag
yog nws lub koob meej.

20 Nyob hauv tsoom neeg nce tuaj teev
Ntuj lub caij nqaum paj nqaum nruas,
muaj ob peb tug Hes Las. 21 Cov Hes
Las ntawd txav los ze Fis Lis Pos uas yog
tus tuaj hauv Npes Xais Das, xeev Nkas
Lis Lais tuaj, lawv thov nws tias :
"Huab tais, peb xav ntsib Yes Xus."
22 Fis Lis Pos mus hais rau As Nres.
Ces As Nres thiab Fis Lis Pos nkawd mus
hais rau Yes Xus. 23 Yes Xus teb rau lawv hais tias :

"Txog lub sij hawm uas Neeg Leej Tub
yuav txais koob meej. 24 Kuv hais qhov
muaj tseeb tiag rau nej : Yog lub noob
nplej uas poob rau hauv av tsis tuag, mas
nws nyob nws, ua ib lub noob twm zeej.
Hos yog nws tuag, mas nws txi txiv ntau.
25 Tus twg nyiam nws txoj sia, mas nws
plam nws txoj sia. Hos nyob hauv lub
qab ntuj no, tus twg tsis khuv xim nws
txoj sia, mas nws yuav ceev nws txoj sia
kom ciaj nyob mus li. 26 Tus twg tsob
hwb kuv, mas nws yuav tsum los raws
kuv. Kuv nyob qhov twg, kuv tus tub
txib kuj yuav nyob qhov ntawd thiab.
Tus twg tsob hwb kuv, mas Leej Txiv
yuav saib nws muaj tsim. 27 Nyem no
kuv lub siab ntxhov tas nrho. Kuv yuav
hais dab tsi ? Puas yuav hais tias : Txiv,
thov koj cawm kuv ntawm lub sij hawm
no ! Tab sis twb yog vim lub sij hawm no
kuv thiaj li tuaj. 28 Txiv, ua kom koj
lub npe nto koob meej mas." Ces muaj
ib lub suab nrov saum ntuj tuaj tias :
"Kuv twb ua kom kuv lub Npe nto koob
meej lawm. Kuv tseem yuav ua kom rov
nto koob meej dua."
29 Cov neeg nyob ntawd hnov lub suab,
lawv hais tias yog xob nthe. Ib txhia hais
tias : Yog ib tug Tshiab hais lus rau Yes
Xus. 30 Yes Xus teb rau lawv hais tias :
"Lub suab nrov ntawd tsis yog tuaj pab
kuv, yog tuaj pab nej. 31 Nyem no yog
lub caij txiav txim rau lub qab ntuj neeg
lawm. Zaum no, tus Thawj Tswj lub qab
ntuj no yuav raug ncaws pov tseg rau
nraum zoov. 32 Hos kuv, thaum luag tsa
kuv siab rau saum ntiaj teb, mas kuv yuav
rub tas ib tsoom neeg los cuag kuv."
33 Yes Xus hais li ntawd qhia tias nws
yuav raug txoj kev tuag zoo li cas.

COV ZAJ NYEEM HNUB TIM   29/03/ 2015

Hnub Chiv Nqaum Nplooj



Thaum Taug Kev Tuav Nplooj – Ntawv Moo:   MK  11:1-10

1 Thaum lawv tuaj yuav txog Yes Lus Xas Les, ntsia pom
Npes Fas Zes thiab Npes Tas Nias, ze lub Roob Txiv Ntoo Roj,
Yes Xus xa ob tug thwj tim mus ua ntej.
2 Nws hais rau nkawd tias : "Neb mus hauv lub zos tom neb hauv ntej.
Thaum neb nyuam qhuav mus txog hauv zos,
neb yuav pom ib tug me nyuam luj uas tseem tsis tau muaj neeg
caij ib zaug li, khi nyob ntawd. Neb daws txoj hlua, neb cab los.
3 Yog muaj neeg hais rau neb tias : "Neb ua dab tsi li ntawd ?" Mas neb
teb tias : "Yog Huab Tais yuav siv. Ib me ntsis nws yuav xa rov qab los."
4 Ob tug thwj tim mus, nkawd pom ib tug me nyuam luj khi nraum zoov,
ze ib lub qhov rooj ntawm ntug kev. Nkawd daws tus me nyuam luj.
5 Muaj ob peb tug neeg nyob ntawd nug nkawd tias :
"Neb daws tus me nyuam luj no ua dab tsi?"
6 Nkawd teb rau lawv raws li Yes Xus xub qhia, ces lawv cia nkawd daws nkawd.
7 Nkawd coj tus me nyuam luj los rau Yes Xus. Nkawd muab nkawd
cov tsho ntev pov rau saum me nyuam luj nraub qaum, ces Yes Xus caij.
8 Muaj neeg coob muab lawv cov tsho ntev pua txoj kev, ib txhia xuas
cov nplooj ntoos ntsuab uas lawv txiav tom teb los pua kev.
9 Cov neeg ua Yes Xus ntej thiab lawv Yes Xus qab sawv daws qw tias :
"Thov koj cawm peb mas ! Tus uas Huab Tais xa tuaj muaj koob meej.
10 Lub Ceeb Tsheej uas tab tom los, muaj koob meej, yog peb txiv Das Vis
lub Ceeb Tsheej. Tus nyob saum cov txheej ntuj siab, thov koj cawm peb."

Los:     ZAM  12:12-16

12 Hnub tom qab, pab neeg coob coob uas tuaj nqaum paj
nqaum nruas hnov tias Yes Xus tuaj txog Yes Lus Xas Les.
13 Ces lawv nqa tej rev nplooj txoob tawm mus tos Yes Xus.
Lawv qw tias : "Thov koj Cawm Peb, Tus uas Huab Tais xa tuaj,
nws nto koob meej, His Xas Lais tus vaj nto koob meej !"
14 Yes Xus nrhiav tau ib tug me nyuam luj,
nws caij saud, raws li Ntawv sau tias :
15 Ntxhais Xis Yoos, koj txhob ntshai mog, ntsia saib, koj tus vaj
tuaj lawm, nws zaum saum maum luj tus me nyuam.
16 Thaum ntawd, Yes Xus cov thwj tim tsis to taub txog tej ntawd li.
Tab sis thaum Yes Xus tau txais koob meej lawm,
lawv mam nco tias yeej muaj lus sau hais li ntawd txog Yes Xus,
thiab luag yeej tau ua rau nws raws li cov lus sau tseg.

Thaj Txi Ntuj – Zaj Nyeem Ib:    HIS XAIS  50:4-7

4 HUAB TAIS Tswv Ntuj tau muab ib tug nplaig ua thwj tim rau kuv,
kom kuv txawj hais tej lo lus nplij tus qaug zog.
Niaj tag kis nws tsa kuv pob ntseg kom ras dheev,
kom kuv txawj mloog xws li cov thwj tim mloog.
5 HUAB TAIS Tswv Ntuj qhib kuv pob ntseg,
mas kuv tsis yig, kuv tsis thaub qab.
6 Lawv ntaus kuv, mas kuv tig kuv nraub qaum rau lawv ntaus.
Lawv xav rho kuv cov hwj txwv, mas kuv tig kuv sab plhu rau lawv.
Lawv xav ib tawg ncuav rau kuv thiab xav nto qaub ncaug
rau kuv ntsej muag, los kuv tsis fee plhu rau lawv.
7 HUAB TAIS Tswv Ntuj yuav tuaj pab kuv, vim li no
Kuv tsis qaug zog tsis tas kev cia siab,  kuv ua ntseg muag tuab
xws pob zeb, vim kuv paub tias kuv yuav tsis raug kev txaj muag.



Zaj Nyeem Ob:     FIS LIS POS  2:6-11

6 Yes Xus Pleev yog Tswv Ntuj, tiam sis nws tsis cia nws lub hwj
chim Tswv Ntuj rau luag hawm : nws muab nws lub hwj chim hle.
7 Nws yeem ua ib tug qhev, nws yug los ua neeg xws li ib tsoom neeg.
Luag pom nws tus yam ntxwv yog yam ntxwv tib neeg.
8 Nws txo nws qis : nws tuaj yeem mloog Ntuj lus mus txog qhov tuag,
thiab tseem xaiv txoj kev tuag saum ntoo cuam.
9 Vim li ntawd, mas Tswv Ntuj thiaj tsa Yes Xus ua ib tug loj nyob siab
siab. Tswv Ntuj muab lub npe uas nyob siab dua lwm cov npe rau nws.
10 Li ntawd, tus twg hnov tuav txog Yes Xus lub npe, tsis hais nyob saum
cov txheej ntuj, los nyob ntiaj teb no, los nyob nruab yeeb,
mas tus ntawd cia li txhos caug hawm.
11 Txhua xeem lus yuav tsum cav tias Yes Xus Pleev yog Huab Tais :
Leej Txiv Tswv Ntuj thiaj muaj koob meej nto moo lug.


Ntawv Moo Zoo:     MK 14:1—15:47

1 Thaum tshuav ob hnub yuav txog lub ntees Hla thiab lub
hnub nyoog noj cov mov tsis xyaw poov xab, mas cov thawj
leej choj thiab cov kws Ntawv Ntshiab nrhiav
ib txog kev nyas ntes Yes Xus, thiab muab nws tua.
2 Lawv sib tham tias : "Tsis txhob ntes thaum tab tom nqaum
paj nqaum nruas, tsam cov pej xeem ua ntxhov hnyo."
3 Thaum Yes Xus nyob Npes Tas Nias, hauv tus Xis Moos mob
ruas tsev, lub caij uas Yes Xus tab tom zaum ntawm rooj mov,
muaj ib tug poj niam nqa ib hwj zeb dawb ntim cov tseem
tshuaj tsw qab muaj nqi kawg. Nws muab lub hwj dam,
nws hliv tshuaj tsw qab rau saum Yes Xus taub hau.
4 Muaj ib co neeg nyob ntawd tsis zoo siab, lawv rov sib hais tias :
"Ua cas yuav nkim tej tshuaj li ntawd ? 5 Cov tshuaj ntawd yog
muab muag mas yuav tau tshaj peb puas lub txiaj nyiag
los pub rau cov pluag." Ces lawv cem tus poj niam.
6 Tab sis Yes Xus hais tias : "Cia nws ua nws. Vim li cas nej ua
ntxhov nws siab ? Nws ua ib txog hauj lwm zoo nkauj rau kuv.
7 Vim nej yuav muaj cov pluag nrog nej nyob mus li,
nej xav ua zoo rau lawv thaum twg kuj tau. Tab sis kuv,
mas nej yuav tsis muaj kuv nrog nej nyob mus li.
8 Nws ua qhov uas nws ua tau. Nws xub pleev tshuaj
tsw qab rau kuv, npaj kuv lub cev mus zwm ntxa.
9 Kuv hais tseeb rau nej, nej tshaj lub Moo Zoo kom thoob
qab ntuj, nej mus txog qhov twg, sawv daws yuav rov
hais txog qhov nws nyuam qhuav ua no, kom nco txog nws."
10 Yus Das Kas Lis Yaus, yog ib tug nyob hauv Pab Kaum Ob,
nws mus cuag cov thawj leej choj,
nws yuav muab Yes Xus muag rau lawv.
11 Lawv hnov Yus Das hais li ntawd, mas lawv zoo siab, ces
lawv lees tias yuav muab nyiaj rau Yus Das. Ces Yus Das nrhiav
saib yuav ua li cas kom tau ib lub sij hawm zoo cob Yes Xus rau lawv.
12 Thaum txog thawj hnub noj cov mov tsis muaj poov xab,
lawv tua tus Yaj Hla, cov thwj tim hais rau Yes Xus tias :
"Koj xav kom peb mus npaj pluas Hla rau koj noj nyob qhov twg ?
13 Ces Yes Xus xa nws ob tug thwj tim, nws hais rau nkawd tias :
"Neb mus hauv nroog, yuav muaj ib tug neeg kwv
ib hub dej tuaj ntsib neb. Neb raws nws mus.
14 Nws chaws mus hauv lub tsev twg, mas neb yuav hais rau
tus tswv tsev ntawd tias : “Xib Hwb hais tias kem tsev uas kuv
yuav nrog kuv cov thwj tim noj pluas Hla nyob qhov twg ?”
15 Ces nws yuav qhia ib kem tsev dav rau neb nyob theem saud,
muaj rooj tog, thiab tu txhij tas. Neb npaj txhua yam kom tiav rau peb."
16 Ob tug thwj tim mus. Thaum nkawd mus txog hauv nroog,
nkawd pom txhua yam raws li Yes Xus tau
hais rau nkawd, ces nkawd npaj pluas Hla.
17 Yav tsaus ntuj, Yes Xus nrog Pab Kaum Ob tuaj txog.
18 Thaum lawv zaum ntawm rooj, lawv tab tom noj mov,
Yes Xus hais tias : "Kuv hais tseeb rau nej, muaj ib tug nyob hauv nej
yuav muab kuv muag rau luag, yog ib tug uas nrog kuv noj mov."
19 Tas cov thwj tim ntxhov siab, lawv nug zom zaws tias :
"Puas yog kuv ?" 20 Yes Xus hais rau lawv tias : "Yog ib tug hauv
Pab Kaub Ob, yog tus uas nrog kuv cev tes ntsw hauv lub phaj.
21 Neeg Leej Tub rov mus raws li Ntawv sau txog nws.
Tab sis tus uas muab Neeg Leej Tub muag, mas nws txoj
hmoov phem. Txhiaj khoov tus neeg ntawd tsis txhob yug los.




22 Thaum lawv tab tom noj mov, Yes Xus tuav lub ncuav mov,
nws hais zaj foom hmoov zoo rau, nws muab ntais,
thiab muab faib rau nws cov thwj tim, nws hais tias :

"Nej txais, qhov no yog kuv lub cev."
23 Yes Xus tuav ib lub ntim, nws ua Ntuj tsaug, nws muab cev
rau cov thwj tim, ces sawv daws haus hauv lub ntim ntawd.
24 Yes Xus hais rau lawv tias : "Qhov no yog kuv cov ntshav, yog
cov ntshav cog lus, cov ntshav no yuav ntws mus cawm coob leej.
25 Kuv hais tseeb rau nej : txij no mus, kuv yuav tsis haus cov
kua txiv cawv no ntxiv, mus txog hnub kuv rov haus
cov cawv tshiab nyob hauv Tswv Ntuj lub Ceeb Tsheej."
26 Yes Xus lawv hu cov nkauj paj nruag tas,
ces lawv tawm mus pem roob Txiv Ntoo Roj.
27 Yes Xus hais rau lawv tias : "Nej sawv daws yuav ntog, vim
Ntawv sau cia tias : Kuv yuav ntaus tus zov yaj, ces pab yaj yuav tawg.
28 Tab sis, thaum kuv rov sawv,
kuv yuav ua nej ntej mus Nkas Lis Lais."
29 Pob Zeb hais rau Yes Xus tias : "Txawm yog
sawv daws ntog tas, los kuv yuav tsis ntog !"
30 Yes Xus hais rau Pob Zeb tias : "Kuv hais tseeb rau koj :
Ntawm koj, mas hnub no, hmo no kiag, thaum qaib tsis tau
qua ob tsig, koj twb yuav tsis lees kuv peb zaug."
31 Tab sis Pob Zeb haj yam hais heev dua tias :
"Txawm tias kuv yuav tsum nrog koj tuag, los kuv yeej lees koj."
Tas sawv daws puav leej hais zoo li ntawd.
32 Yes Xus lawv tuaj txog ib thaj chaw hu ua Nkes Txes Mas Nis,
Yes Xus hais rau nws cov thwj tim tias :
"Nej zaum ntawm no, kuv yuav teev Ntuj."
33 Ces Yes Xus coj Pob Zeb, Yas Kos thiab Zam nrog nws mus.
Nws pib ntshai heev thiab txhawj kawg.
34 Ces Yes Xus hais rau lawv tias : "Kuv tus plig ntxhov
siab yuav tuag, nej nyob ntawm no, nej zov hmo."
35 Yes Xus txav mus deb me ntsis, nws khooj hauv pem teb,
ces nws thov saib lub sij hawm ntawd hla mus deb nws puas tau.
36 Yes Xus hais tias : "As Npas, Txiv ! Koj ua tau tas ib puas
tsav yam : thov koj tshem lub ntim no mus deb kuv.
Tab sis, txhob ua raws li kuv xav, koj ua raws li koj xav !"
37 Yes Xus los pom peb leeg thwj tim tab tom tsaug zog,
nws hais rau Pob Zeb tias : "Xis Moos, koj tsaug zog lod ?
Koj tsis muaj peev xwm zov hmo ib teev lod ?
38 Nej zov hmo, thiab nej teev Ntuj kom nej txhob
nkag mus rau hauv txoj kev ntxias :
lub tswv yim kub lug, tab sis cev nqaij tsis muaj zog."
39 Ces Yes Xus rov mus, nws rov qab teev Ntuj,
nws rov hais tib co lus li qub.
40 Yes Xus rov qab los pom cov thwj tim tsaug zog, vim lawv qhov
muag tawv, lawv tsis paub teb dab tsi rau Yes Xus.
41 Yes Xus rov los zaum peb, nws hais rau lawv tias : "Nej tseem
tsaug zog thiab tseem so lod ? Nej tsum mog. Txog caij lawm.
Neeg Leej Tub yuav poob rau hauv cov neeg txhaum txhais tes.
42 Nej sawv ! Peb mus ! Tus muab kuv muag tuaj yuav txog.
43 Thaum Yes Xus tseem tab tom hais li ntawd, ces Yus Das
tuaj txog. Nws yog ib tug hauv Pab Kaum Ob.
Nws coj ib pab neeg nqa ntaj nqa qws tuaj. Lawv tuaj ntawm cov
thawj leej choj, cov kws Ntawv Ntshiab thiab cov txwj laus tuaj.
44 Tus ntxeev siab twb xub teem rau lawv tias : ‘Yes Xus yog
tus kuv yuav nwj. Nej ntes, nej coj nws mus, nej saib nws nruj.’
45 Thaum Yus Das tuaj txog ntua, nws txav los hais rau
Yes Xus tias : "Xib Hwb", ces nws nwj Yes Xus.
46 Pab neeg nrog Yus Das tuaj cev tes
tuav nkaus Yes Xus, lawv ntes nws.
47 Cov neeg nyob ntawd, muaj ib tug rho hlo nws rab ntaj,
tib ntag rau tus tuam Leej Choj tus tub txib,
txiav raug nws ib ya pob ntseg tu nrho.
48 Yes Xus hais rau cov tuaj ntes nws tias:
"Nej nqa ntaj nqa qws tuaj ntes kuv xws li ib tug tub sab !
49 Kuv niaj hnub qhia hauv lub Tuam Tsev Teev Ntuj,
kuv nrog nej nyob ua ke, thaum ntawd nej ho tsis ntes kuv.
Tab sis nej ua li no kom xwv tshwm sim raws li Ntawv sau cia."
50 Cov thwj tim tso Yes Xus pov tseg, sawv daws khiav tas.
51 Muaj ib tug hluas raws Yes Xus qab, nws tsuas npua ib
daim ntaub xwb, tsis hnav ris tsho, luag los tuav nkaus nws,
52 ces nws tso plhuav nws daim ntaub pov tseg,
nws cia li khiav liab qab."
53 Lawv coj Yes Xus mus hauv tus tuam leej choj lub tsev.
Tas cov thawj leej choj, cov txwj laus thiab cov kws
Ntawv Ntshiab tuaj sib sau nyob hauv.
54 Pob Zeb nyas deb raws Yes Xus qab mus txog hauv
tus tuam leej choj lub loog. Nws nrog cov tub zov
keeb zaum nte taws ntawm lub cub tawg.
55 Cov thawj leej choj thiab cov txwj laus xas nes nrees nrhiav
ib zag liam rau Yes Xus kom tau kev muab nws tua,
tab sis lawv nrhiav tsis tau.
56 Muaj coob leej tuaj liam cuav rau Yes Xus,
tab sis lawv cov zaj liam tsis sib haum.
57 Muaj ob peb tug sawv los liam cuav rau Yes Xus tias :
58 "Peb hnov tus ntawd hais tias : Kuv yuav rhuav lub
Tsev Ntshiab no, uas yog neeg txhais tes ua,
kuv ua peb hnub txhim tau lub uas tsis yog neeg txhais tes ua."
59 Tab yog zaj liam no, lawv cov lus kuj tsis sib haum thiab.
60 Ces tus tuam leej choj sawv ntsug hauv nruab
nrab sawv daws, nws nug Yes Xus tias : “Koj tsis teb dab
tsi lod ? Cov neeg no ua pov thawj liam dab tsi rau koj ?”
61 Tab sis Yes Xus nyob ntsiag to, tsis teb ib lo lus.
Tus tuam leej choj rov nug Yes Xus tias : "Koj puas yog
Leej Pleev, puas yog tus Nto Moo Zoo Leej Tub ?"
62 Yes Xus hais tias : "Kuv yog. Nej tseem yuav pom Neeg
Leej Tub zaum ntawm tus Muaj Hwj Huam sab xis,
thiab nrog cov huab nqes saum ntuj los."
63 Ces tus tuam leej choj dua nws tej tsho, nws hais tias :
"Peb tseem yuav nrhiav tim khawv ua dab tsi ?
64 Nej twb hnov nws cov lus thuam Ntuj lawm, nej xav li cas ?"
Sawv daws txiav txim tias nws tsim nyog tuag.
65 Muaj ib txhia nto aub ncaug rau Yes Xus. Lawv muab ib
daim ntaub vov nws ntsej muag. Lawv xuas nrig ntaus nws.
Lawv hais rau nws tias : "Koj ua yaj saub mas !"
Ces cov tub mab tub qhe xuas nrig ntaus Yes Xus.



66 Thaum Pob Zeb nyob hauv lub loog,
tus tuam leej choj ib tug ntxhais txib los txog ntawd.
67 Nws pom Pob Zeb nte taws, nws ntsia ntsoov Pob Zeb,
nws hais tias : "Koj ne, koj nrog Yes Xus Nas Xas Les ua ke thiab !"
68 Tab sis Pob Zeb tsis lees, nws hais tias: "Kuv tsis paub,
kuv tsis to taub koj hais dab tsi." Ces Pob Zeb tawm mus rau
nraum qhov rooj, thaum ntawd ib tug qaib qua.
69 Tus ntxhais txib uas tau pom Pob Zeb rov qab hais rau cov
neeg nyob ntawd tias : "Tus ntawd, yog ib tug nrog Yes Xus !"
70 Tab sis Pob Zeb rov qab tsis lees dua. Ib me ntsis ntxiv, cov neeg
nyob ntawd tseem hais rau Pob Zeb tias : "Koj yeej yog lawv ib tug
neeg xwb tiag. Txawm li cas los koj yog ib tug Nkas Lis Lais."
71 Tab sis Pob Zeb twv yeej twv swb tias :
"Kuv tsis paub tus neeg nej hais ntawd."
72 Thaum ntawd, ib tug qaib tab tom qua tsig ob.
Pob Zeb nco dheev txog lo lus uas Yes Xus hais rau nws tias : ‘Qaib tsis
tau qua ob tsig, koj twb tsis lees kuv peb zaug.’ Ces Pob Zeb quaj."

15. 1 Thaum nyuam qhuav kaj ntug txoog, cov thawj leej choj nrog cov
laus neeg, cov kws Ntawv Ntshiab thiab lub rooj txwj laus xas nes nrees
tuav xam. Lawv muab Yes Xus khi, lawv coj nws mus rau Pis Las Tos.
2 Pis Las Tos nug Yes Xus tias : "Koj puas yog cov Yus Das tus vaj ?"
Yes Xus teb rau Pis Las Tos tias : "Yog koj hais li ntawd."
3 Cov thawj leej choj hais ntau zaj liam rau Yes Xus.
4 Ces Pis Las Tos rov nug Yes Xus tias : "Koj tsis teb dab tsi lod ?
Saib ! lawv liam npaum no rau koj !"
5 Tab sis Yes Xus tsis teb dab tsi ntxiv. Mas Pis Las Tos xav tsis thoob.
6 Niaj xyoo, thaum ua lub Ntees Hla, Pis Las Tos tso ib tug neeg
raug txim mus, nws tso tus uas sawv daws taij.
7 Thaum ntawd, muaj ib tug nyob hauv tsev loj faj,
hu ua Npas Las Npas, nws nrog ib pab ntxeev siab raug kaw,
vim nws tua neeg thaum lawv sawv ntxeev siab.
8 Tsoom pej xeem nce mus taij Pis Las Tos
kom nws ua rau lawv xws li nws ua kam.
9 Pis Las Tos teb rau lawv tias : "Nej puas
xav kom kuv tso cov Yus Das tus vaj ?"
10 Pis Las Tos yeej paub tias yog vim cov thawj leej choj khib,
lawv thiaj coj Yes Xus tuaj kom rau nws.
11 Cov thawj leej choj haub tsoom sid kom
taij Pis Las Tos tso Npas Las Npas mus.
12 Pis Las Tos rov qab hais rau tsoom pej xeem tias : "Kuv yuav
ua dab tsi rau tus uas nej hu nws ua cov Yus Das tus vaj ?"
13 Tsoom sid rov qw qw dua tias: "Muab nws dai saum ntoo cuam!"
14 Ces Pis Las Tos hais rau lawv tias: "Nws tau ua dab tsi phem ?"
Tiam sis lawv haj yam qw nrov tias :
"Muab nws dai saum ntoo cuam !"



15 Pis Las Tos xav kom tsoom pej xeem zoo siab, ces nws tso
Npas Las Npas mus. Nws kom lawv nplawm Yes Xus,
ces nws muab Yes Xus rau lawv coj mus dai saum ntoo cuam.
16 Cov tub rog coj Yes Xus mus rau hauv lub plawv loog ,
uas yog lub tshav txiav txim. Lawv hu tas nrho pab peeb zeej tuaj.
17 Lawv muab ib daim ntaub liab dub rau Yes Xus hnav.
Lawv muab pos los sib qhaib ua ib lub kauj,
lawv muab tso saum Yes Xus taub hau.
18 Ces lawv hawm nws tias : "Nyob kaj lug, cov Yus Das tus vaj !"
19 Lawv xuas ib rab pas tauj ntaus nws taub hau,
lawv nto aub ncaug rau nws, lawv kim caug hawm nws.
20 Thaum lawv thuam Yes Xus tas, lawv hle daim ntaub liab dub,
lawv rov muab nws cov ris tsho rau nws hnav. Ces lawv coj Yes Xus
tawm mus sab nraud kom tau muab nws dai saum ntoo cuam.
21 Lawv yuam ib tug neeg dua kev kwv Yes Xus tus ntoo cuam.
Tus ntawd yog Xis Moos nyob Xis Les Nas, nws mus ua teb
rov los txog ntawd. Xis Moos nyob Xis Les Nas
yog As Les Xas Nros thiab Luj Fus nkawd txiv.
22 Ces lawv coj Yes Xus mus txog ib qho chaw hu ua Nkos Nkos Tas,
txhais tias chaw Khauj Khaum Taub Hau.
23 Lawv muab ib co cawv tov me ntsis txab txiv yoov
rau Yes Xus haus, tab sis nws tsis haus.
24 Ces lawv muab nws tsa saum ntoo cuam. Lawv muab Yes Xus
cov ris tsho los sib faib, lawv twv saib leej twg yuav tau daim twg.
25 Thaum lawv tsa Yes Xus rau saum ntoo cuam,
mas tav li cuaj teev sawv ntxov.
26 Lawv sau ib co npe ntawv piav txog
Yes Xus lub txim li no : ‘Cov Yus Das tus vaj.’
27 Lawv kuj muab ob tug tub sab dai nrog Yes Xus rau saum ntoo
cuam thiab, ib tug nyob sab xis, ib tug nyob sab laug. [28...]
29 Cov neeg dua kev co taub hau tsawm Yes Xus tias : "Haj ! Koj yog
tus yuav rhuav lub Tsev Ntshiab thiab peb hnub, rov txhim tau li qub.
30 Koj rov cawm koj mas ! Koj nqes saum ntoo cuam los saib !"
31 Cov thawj leej choj nrog cov kws Ntawv Ntshiab ua ke hnyos tias :
"Nws cawm tau luag tej, nws rov cawm tsis tau nws !
32 Leej Pleev, Vaj His Xas Lais ! Kom nws nqes saum ntoo cuam
los rau peb pom, peb thiaj ntseeg !" Tab yog ob tug tub sab
uas dai saum ntoo cuam zoo li Yes Xus, kuj thuam Yes Xus.
33 Thaum tav su, tas lub ntiaj teb tsaus ntuj nti mus txog peb teev.
34 Thaum peb teev Yes Xus qw ib suab nrov nrov tias :
"Es los is, Es los is, las mas xas npas thas nis," txhais tias :
Kuv tus Tswv Ntuj, kuv tus Tswv Ntuj, ua cas koj tso kuv pov tseg?
35 Muaj tus puav nyob ze ntawd hnov,
lawv hais tias : "Saib, nws hu Es Lias".
36 Muaj ib tug neeg khiav ceev mus muab ib daim ntaub tub dej
qaub, nws muab chob rau ib tog ntsis pas tauj, nws cev
rau Yes Xus haus, nws hais tias : "Tos saib !
Peb puas pom Es Lias tuaj txo nws nqes los."
37 Ces Yes Xus qw ib suab nrov, nws txoj sia tu.





38 Thaum ntawd, daim ntaub hauv Kem Ntshiab
ntuag rhe saud rau hauv, ua ob sab.
39 Tus xab txheeb sawv ntsug ntawm Yes Xus xub ntiag
pom Yes Xus txoj sia tu li ntawd, nws hais tias :
"Tus no yog Tswv Ntuj Leej Tub tiag !"
40 Muaj ib co poj niam nyob nrug deb ntsia. Nyob hauv cov poj
niam ntawd, muaj Mab Liab Mas Ntas Las, Mab Liab uas yog
Yas Kos me thiab Yos Xes nkawd niam, thiab Xas Los Mes.
41 Cov poj niam ntawd raws Yes Xus thiab tsob hwb Yes Xus
thaum nws nyob Nkas Lis Lais. Thiab tseem muaj ntau leej poj
niam uas nrog Yes Xus nce tuaj rau pem Yes Lus Xas Les.
42 Thaum tsaus ntuj, yog Hnub Npaj, yam li yog hmo yuav pib
hnub Xas Npas Tos. 43 Yos Xes nyob As Lis Mas Thias tuaj.
Nws yog ib tug muaj meej mom nyob hauv Rooj Sab Laj,
nws tos ntshis Tswv Ntuj lub Ceeb Tsheej, nws muaj
cuab kav mus cuag Pis Las Tos, nws thov Yes Xus lub cev.
44 Pis Las Tos ceeb tias Yes Xus txawm siv tuag lawm.
Nws hu tus xab txheeb los, nws nug tus xab txheeb
saib Yes Xus tuag tau hov ntev lawm.
45 Thaum Pis Las Tos paub ntawm tus lwm txheeb tias Yes Xus
tuag lawm tiag, ces Pis Las Tos tso lus
rau Yos Xes mus txo Yes Xus lub cev.
46 Yos Xes muas tau ib daim ntaub qhwv tuag, nws txo
Yes Xus lub cev nqes los, nws muab daim ntaub qhwv Yes Xus,
ces nws tso Yes Xus lub cev rau hauv ib lub ntxa txaug rau hauv
pob tsuas. Nws dov ib daim txiag zeb los kaw lub rooj ntxas.
47 Mab Liab Mas Ntas Las thiab Mab Liab uas yog Yos Xes niam,
nkawd ntsia ntsoov qhov chaw uas lawv tso Yes Xus lub cev.

Los:     MAS KOS  15:1-39

1 Thaum nyuam qhuav kaj ntug txoog, cov thawj leej choj nrog
cov laus neeg, cov kws Ntawv Ntshiab thiab lub rooj
txwj laus xas nes nrees tuav xam. Lawv muab Yes Xus khi,
lawv coj nws mus rau Pis Las Tos.
2 Pis Las Tos nug Yes Xus tias : "Koj puas yog cov Yus Das tus vaj ?"
Yes Xus teb rau Pis Las Tos tias : "Yog koj hais li ntawd."
3 Cov thawj leej choj hais ntau zaj liam rau Yes Xus.
4 Ces Pis Las Tos rov nug Yes Xus tias : "Koj tsis teb dab tsi lod ?
Saib ! lawv liam npaum no rau koj !"
5 Tab sis Yes Xus tsis teb dab tsi ntxiv. Mas Pis Las Tos xav tsis thoob.
6 Niaj xyoo, thaum ua lub Ntees Hla, Pis Las Tos tso ib
tug neeg raug txim mus, nws tso tus uas sawv daws taij.
7 Thaum ntawd, muaj ib tug nyob hauv tsev loj faj,
hu ua Npas Las Npas, nws nrog ib pab ntxeev siab raug kaw,
vim nws tua neeg thaum lawv sawv ntxeev siab.
8 Tsoom pej xeem nce mus taij Pis Las Tos
kom nws ua rau lawv xws li nws ua kam.
9 Pis Las Tos teb rau lawv tias : "Nej puas xav
kom kuv tso cov Yus Das tus vaj ?"
10 Pis Las Tos yeej paub tias yog vim cov thawj leej choj khib,
lawv thiaj coj Yes Xus tuaj kom rau nws.
11 Cov thawj leej choj haub tsoom sid kom
taij Pis Las Tos tso Npas Las Npas mus.
12 Pis Las Tos rov qab hais rau tsoom pej xeem tias : "Kuv yuav
ua dab tsi rau tus uas nej hu nws ua cov Yus Das tus vaj ?"
13 Tsoom sid rov qw qw dua tias: "Muab nws dai saum ntoo cuam!"
14 Ces Pis Las Tos hais rau lawv tias : "Nws tau ua dab tsi phem ?"
Tiam sis lawv haj yam qw nrov tias :
"Muab nws dai saum ntoo cuam !"
15 Pis Las Tos xav kom tsoom pej xeem zoo siab, ces nws tso
Npas Las Npas mus. Nws kom lawv nplawm Yes Xus,
ces nws muab Yes Xus rau lawv coj mus dai saum ntoo cuam.
16 Cov tub rog coj Yes Xus mus rau hauv lub plawv loog ,
uas yog lub tshav txiav txim. Lawv hu tas nrho pab peeb zeej tuaj.
17 Lawv muab ib daim ntaub liab dub rau Yes Xus hnav.
Lawv muab pos los sib qhaib ua ib lub kauj,
lawv muab tso saum Yes Xus taub hau.
18 Ces lawv hawm nws tias : "Nyob kaj lug, cov Yus Das tus vaj !"
19 Lawv xuas ib rab pas tauj ntaus nws taub hau,
lawv nto aub ncaug rau nws, lawv kim caug hawm nws.
20 Thaum lawv thuam Yes Xus tas, lawv hle daim ntaub liab dub,
lawv rov muab nws cov ris tsho rau nws hnav. Ces lawv coj Yes
Xus tawm mus sab nraud kom tau muab nws dai saum ntoo cuam.
21 Lawv yuam ib tug neeg dua kev kwv Yes Xus tus ntoo cuam.
Tus ntawd yog Xis Moos nyob Xis Les Nas,
nws mus ua teb rov los txog ntawd. Xis Moos nyob
Xis Les Nas yog As Les Xas Nros thiab Luj Fus nkawd txiv.
22 Ces lawv coj Yes Xus mus txog ib qho chaw hu ua Nkos Nkos Tas,
txhais tias chaw Khauj Khaum Taub Hau.
23 Lawv muab ib co cawv tov me ntsis txab txiv yoov
rau Yes Xus haus, tab sis nws tsis haus.
24 Ces lawv muab nws tsa saum ntoo cuam. Lawv muab Yes Xus
cov ris tsho los sib faib, lawv twv saib leej twg yuav tau daim twg.
25 Thaum lawv tsa Yes Xus rau saum ntoo cuam,
mas tav li cuaj teev sawv ntxov.
26 Lawv sau ib co npe ntawv piav txog
Yes Xus lub txim li no : ‘Cov Yus Das tus vaj.’
27 Lawv kuj muab ob tug tub sab dai nrog Yes Xus rau saum ntoo
cuam thiab, ib tug nyob sab xis, ib tug nyob sab laug. [28...]
29 Cov neeg dua kev co taub hau tsawm Yes Xus tias :
"Haj ! Koj yog tus yuav rhuav lub Tsev Ntshiab
thiab peb hnub, rov txhim tau li qub.
30 Koj rov cawm koj mas ! Koj nqes saum ntoo cuam los saib !"
31 Cov thawj leej choj nrog cov kws Ntawv Ntshiab ua ke hnyos tias :
"Nws cawm tau luag tej, nws rov cawm tsis tau nws !
32 Leej Pleev, Vaj His Xas Lais ! Kom nws nqes saum ntoo cuam
los rau peb pom, peb thiaj ntseeg !" Tab yog ob tug tub
sab uas dai saum ntoo cuam zoo li Yes Xus, kuj thuam Yes Xus.
33 Thaum tav su, tas lub ntiaj teb tsaus ntuj nti mus txog peb teev.
34 Thaum peb teev Yes Xus qw ib suab nrov nrov tias :
"Es los is, Es los is, las mas xas npas thas nis," txhais tias : Kuv tus
Tswv Ntuj, kuv tus Tswv Ntuj, ua cas koj tso kuv pov tseg?
35 Muaj tus puav nyob ze ntawd hnov,
lawv hais tias : "Saib, nws hu Es Lias".
36 Muaj ib tug neeg khiav ceev mus muab ib daim ntaub tub dej
qaub, nws muab chob rau ib tog ntsis pas tauj,
nws cev rau Yes Xus haus, nws hais tias :
"Tos saib ! Peb puas pom Es Lias tuaj txo nws nqes los."
37 Ces Yes Xus qw ib suab nrov, nws txoj sia tu.
38 Thaum ntawd, daim ntaub hauv Kem Ntshiab
ntuag rhe saud rau hauv, ua ob sab.
39 Tus xab txheeb sawv ntsug ntawm Yes Xus xub
ntiag pom Yes Xus txoj sia tu li ntawd, nws hais tias :
"Tus no yog Tswv Ntuj Leej Tub tiag !"

COV ZAJ NYEEM HNUB TIM   02/04/ 2015

HNUB TSIB NTSHIAB – NCO TXOG YES XUS NOJ PLUAS HMO KAWG

Zaj Nyeem Ib:    KEV TSIV  12:1-8, 11-14


1 HUAB TAIS hais rau Mais Xes thiab
As Loos nyob Hais Nkws Tos teb tias :
2 "Lub hlis no nej yuav muab suav ua thawj lub hlis ua
ntej cov, nej yuav muab ua thawj lub hlis qhib lub xyoo.
3 Neb hais rau ib tsoom pej xeem His Xas Lais tias:
Lub hlis no xiab kaum, mas txhua yim neeg nyias yuav
tsum npaj nyias ib tug tsiaj me,  txhua lub tsev
nyias yuav tsum npaj nyias ib tug tsiaj me.
4 Yog yim neeg twg tsawg dhau noj tsis tas ib tug tsiaj me,
mas nej yuav mus koom nrog lwm yim neeg uas nyob ze
nej dua cov kom muaj neeg coob txaus. Nej yuav xaiv ib
tug tsiaj kom txaus nkaus sawv daws noj tsis seem.
5 Nej yuav xaiv ib tug tsiaj zoo nkauj tsis muaj chaw xyeej,
muaj hnub nyoog ib xyoos; nej yuav xaiv ib tug
thav tshis los tau ib tug thav yaj los tau.
6 Nej yuav ceev tus tsiaj no cia mus txog lub hlis no
hnub xiab kaum plaub; hmo ntawd, tas tsoom His Xas Lais
nyias yuav tua nyias tus tsiaj thaum hnub poob qho kiag.
7 Nej yuav cug cov ntshav coj mus pleev ob tug ncej
puab rooj thiab pleev daim txiag tav saum lub qhov
rooj nkag hauv lub tsev uas nej noj tus tsiaj ntawd.
8 Hmo ntawd, nej yuav muab cov nqaij txhiab
hauv hluav taws noj, nej yuav noj ntxuag ib co
ncuav mov tsis xyaw poov xab, thiab ib cov zaub iab.
11 Nej yuav noj mov zoo li no :
Nej sia siv khov kho ntawm duav, nej rau khau tib si,
thiab tuav rawv nej rab pas nrig ntawm tes. Nej yuav
tsuag tsuag noj nrawm nroos, vim yog HUAB TAIS hmo hla.
12 Hmo ntawd, kuv yuav hla mus thoob Hais Nkws Tos teb,
kuv yuav ntaus cov ua tus hlob nyob hauv Hais Nkws Tos
teb tib si kom tuag, tsis hais neeg los tsiaj li, thiab kuv yuav
txiav txim rau cov dab Hais Nkws Tos, kuv, HUAB TAIS.
13 Cov ntshav yuav yog ib lub cim txuag nej hauv cov
tsev uas nej nyob. Kuv pom lub cim ntawd, kuv yuav hla
dhau plaws mus, ces nej yuav tsis raug qhov xwv
txheej loj ntawd, hmo uas kuv ntaus Hais Nkws Tos teb.
14 Nej yuav cim ntsoov hnub ntawd cia ua ib hnub tshwj
xeeb rau nej, nej yuav muab ua ib hnub cav txog HUAB TAIS,
yuav yog ib hnub nej ua koob tsheej tiam dhau tiam,
yog ib txog cai nej yuav coj mus li.

NPN:    116:12-13, 15-16BC, 17-18

Txais:   (1 KLN 10:16) Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav muab dab tsi los pauj
ib puas tsav yam zoo uas HUAB TAIS ua rau kuv ?
Kuv yuav cev lub ntim cawm neeg,
kuv yuav hu txog, tuav txog HUAB TAIS lub npe.

Txais:   Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

HUAB TAIS saib cov ntseeg txog nws
Txoj kev tuag  muaj nqes loj.
Kuv yog koj tus tub txib, yog koj tus ntxhais txib tub;
Koj tau daws cov hlua khi kuv.

Txais:   Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Kuv yuav cev ib co txim los koj tsaug,
kuv yuav tuav txog HUAB TAIS lub npe.
Kuv yuav pauj kuv lub yeem rau HUAB TAIS
nyob ntawm nws haiv neeg xub ntiag,

Txais:   Peb lub ntim foom hmoov zoo yog ib txoj kev
koom siab nyob hauv Leej Pleev cov Ntshav.

Zaj Nyeem Ob:     1 KLN 11:23-26

Cov kwv tij nkauj muam:
23 Cov lus kuv qhia rau nej, yog cov lus kuv txais ntawm
Huab Tais los. Yam li, hmo lawv muab Huab Tais Yes Xus
rau cov nom ntes, Huab Tais tuav ib lub ncuav mov,
24 nws ua Ntuj tsaug, nws muab lub ncuav mov ntais,
nws hais tias : ‘Qhov no yog kuv lub cev uas cia cawm nej.
Nej ua qhov no kom nej nco txog kuv.
25 Thaum noj hmo tas Huab Tais Yes Xus tuav lub ntim cawv,
nws hais tias : Lub ntim cawv no yog zaj cog lus tshiab
nyob hauv kuv cov ntshav ; nej haus lub ntim no
thaum twg, mas nej haus kom nej nco txog kuv.
26 Kwv tij, txij no mus, nej noj cov ncuav mov no thaum twg,
thiab nej haus cov cawv no thaum twg, mas nej tshaj Huab Tais
txoj kev tuag, nej ua li no mus txog hnub Huab Tais rov los.

Zaj Tshaj lub Moo Zoo:    ZAM 13:34

Huab Tais hais tias, kuv muab ib lo lus qhia tshiab rau nej:
nej yuav sib nyiam sib hlub ib yam li kuv tau hlub nej.

Ntawv Moo Zoo:     ZAM 13:1-15


1 Thaum yuav txog lub Ntees Hla, Yes Xus paub tias txog
nws lub caij hla lub ntiaj teb no rov mus cuag Leej Txiv.
Nws nyiam nws cov thwj tim uas nyob hauv lub qab ntuj no,
mas nws nyiam lawv mus txog thaum kawg.
2 Thaum lawv tab tom noj ib pluag hmo, ces dab phem
twb nkag mus tshoj Yus Das Kas Lis Yaus, Xis Moos
tus tub lub siab kom muab Yes Xus muag.
3 Yes Xus paub tias Leej Txiv tso tas ib puas tsav yam rau
hauv nws txhais tes, nws paub tias nws tuaj ntawm
Tswv Ntuj tuaj, nws yuav rov mus cuag Tswv Ntuj.
4 Ces nws sawv ntawm lub rooj mov mus, nws hle tsho,
nws muab ib daig ntaub khi rau ntawm nws duav.
5 Nws hliv dej rau hauv ib lub phiab, ces nws ntxuav cov
thwj tim ko taw. Nws muab daim ntaub
khi ntawm duav los so lawv ko taw.
6 Yes Xus los txog ntawm Xis Moos Pob Zeb.
Pob Zeb hais rau Yes Xus tias :
"Huab Tais, koj yuav ntxuav kuv ko taw lod ?"
7 Yes Xus teb rau Pob Zeb tias : "Qhov uas kuv ua, mas tam sis
no koj tsis to taub, tiam sis yav tom ntej koj yuav to taub."
8 Pob Zeb hais rau Yes Xus tias : "Koj txhob ntxuav kuv ko taw,
kuv tsis kam ib zaug li." Yes Xus teb rau Pob Zeb tias :
"Yog kuv tsis ntxuav koj, mas koj yuav tsis tau nrog kuv ua ke."
9 Xis Moos Pob Zeb hais rau Yes Xus tias :
"Huab Tais, yog li mas tsis yog ntxuav taw xwb,
koj ntxuav kuv tes thiab kuv taub hau huv si."
10 Yes Xus hais rau Pob Zeb tias : "Tus uas nws da dej lawm mas
tsis tas yuav ntxuav ntxiv, vim nws ib ce huv tas tib si lawm.
Nej kuj huv lawm thiab, tab sis huv tsis tas txhua leej."
11 Yes Xus yeej paub tus twg yog tus yuav muab nws muag.
Vim li ntawd nws thiaj hais tias : "Nej huv tsis tas txhua leej."
12 Thaum Yes Xus ntxuav lawv ko taw tas, nws rov hnav nws lub
tsho txheej nraud, nws rov los zaum ntawm rooj mov, nws mam
li hais rau lawv tias : "Nej puas to taub qhov uas kuv ua rau nej ?
13 Nej hu kuv ua : Xib Hwb thiab Huab Tais.
Nej hu raug lawm, vim kuv yeej yog tiag.
14 Txawm tias kuv yog nej tus Xib Hwb thiab nej tus Huab Tais,
tsis kav, kuv ntxuav nej ko taw, mas nej ib tug
yuav tsum rov ntxuav ib tug ko taw thiab.
15 Kuv muab ib tug piv txwv rau nej :
kom nej ua raws li kuv tau ua rau nej.

COV ZAJ NYEEM HNUB TIM   03/04/ 2015

Hnub Rau Ntshiab - Yes Xus Tuag

Zaj Nyeem Ib:    HIS XAIS   52:13—53:12

13 Ntsia saib, kuv tus tub txib yuav vam meej, nws yuav loj tuaj,
nws yuav nce zuj zus, yuav tau mus nyob puag saum qhov chaw siab.
14 Ib yam li cov npoj neeg coob pom nws, lawv tau ceeb loj,
vim nws lub cev tau puas loj, nws tsis zoo li neeg lawm.
15 Ib yam li ntawd, nws yuav ua kom ntau lub kuj cuab ceeb nkaus
thiab cov vaj yuav nyob qhov ncauj kaw nti rau ntawm nws xub ntiag,
vim lawv pom ib yam uas tsis muaj leej twg tau piav rau lawv,
lawv hnov ib yam uas lawv tsis tau hnov hais txog dua.
53  1 Leej twg yuav ntseeg tau qhov uas peb tau hnov?
Huab Tais tau qhia nws txhais npab rau leej twg paub?  
2 Nws tau loj hlob xws li ib tug ntsuag ntoo nyob ntawm HUAB TAIS
xub ntiag, xws li ib tug cag nyob hauv thaj av qhuav;
nws tsis muaj qhov zoo saib los zoo nyiam ua kom peb xav ntsia,
tsis muaj ib yam yuav rub kom peb nyiam nws li.  
3 Neeg ntxub nws, muab nws saib qis tshaj cov, nws yog ib tug neeg
ntsib kev tu siab loj, paub kev txom nyem ntau, nws yog ib tug neeg
uas yus npog qhov muag kom txhob pom,
raug sawv daws thuam, tsis muaj neeg saib taus li.
4 Tab sis, twb yog nws ris peb tej kev txom nyem, twb yog nws kwv
peb tej kev tu siab, los peb tseem xav tias yog Tswv Ntuj nplua nws,
thiab ua kom nws raug txom nyem, thiab poob ntsej muag.
5  Tos nws raug luag nkaug, los yog vim peb tej hauj lwm phem,
nws raug luag tsuj, los yog vim peb tej kev txhaum.
Lub txim uas nws ris yog qhov ua kom peb tau nyob kaj siab,
nws tej nqaij ntuag kho peb kom zoo hlo.
6 Peb sawv daws zoo li ib co yaj poob zoo, peb nyias taug nyias txoj
kev, HUAB TAIS muab peb lub txim txhaum huv si nog rau nws ris.
7 Nws raug luag hiam, tab sis nws yeem ua tus me, nws tsis qhib ncauj;
Nws ua zoo li tus yaj uas luag cab mus rau lub tsev tua tsiaj, nws nyob
twj ywm xws li tus yaj uas luag txiav nws cov plaub, nws tsis qhib ncauj li.
8 Luag txiav txim rau nws tas, luag yuam ntiag cab nws mus. Leej twg
nyob hauv tiam neeg ntawd tau mob siab txog tias luag muab nws txiav
tawm hauv tsoom neeg ciaj lub teb chaws mus lawm,
los txog tias nws raug tua vim nws haiv neeg txoj kev txhaum?
9 Lawv muab nws zwm av nrog cov neeg phem,
nws lub ntxa yog nrog cov neeg muaj, txawm tias
nws tsis tau ua ib qho phem, tsis tau hais ib lo lus dag.
10 HUAB TAIS tau pom zoo cia kev txom nyem muab nws tsuam kom mob.
Yog nws muab nws txoj sia los txi Ntuj them txim txhaum, nws yuav tau
pom nws cov xeeb leej xeeb ntxwv, thiab yuav tau txoj sia nyob ntev dhawv,
nws yog tus ua tau kom muaj raws li HUAB TAIS lub siab xav.
11 Thaum nws tus plig nyiaj yeej kev sim siab lawm, nws yuav pom txoj kev
pom kev thiab nws lub siab yuav puv npo. Vim nws paub,
kuv tus tub txib, tus siab ncaj, yuav ua kom coob leej
ntau tus ncaj tuaj, nws yuav ris lawv cov txhaum.
12 Yog vim li ntawd, kuv thiaj yuav pub kom nws muaj feem nyob hauv tsoom
ua thawj, nws yuav nrog cov muaj hwj xyeej txais yeeb ncuab lub cuab tam,
vim nws tau yeem swb rau kev tuag thiab cia luag suav nws nrog cov neeg
phem, tiam sis twb yog nws ris coob leej cov txhaum,
thiab thov ntuj kom muab kev zam txhaum rau lawv.

NPN    31:2-6, 12-13, 15-16, 17, 25

Txais:   (Lk 23:46) Txiv, kuv muab kuv tus ntsuj plig tso rau hauv koj txhais tes.

HUAB TAIS, kuv los nkaum hauv koj,
thov koj txhob pub kuv poob ntsej muag ib zaug li.
Thov cawm kom kuv dim vim koj ncaj ncees.
Kuv tso kuv tus ntsuj plig rau hauv koj txhais tes,
HUAB TAIS, Tswv Ntuj tus muaj kev tseeb, koj yog tus txhiv kuv.

Txais:   Txiv, kuv muab kuv tus ntsuj plig tso rau hauv koj txhais tes.

Rau kuv cov yeeb ncuab, kuv yog neeg phem,      
rau cov nyob ze kuv, kuv yog neeg qias, kuv cov phooj ywg ceeb laj pom kuv,    
thaum neeg pom kuv ntawm kev, lawv khiav mus deb kuv.    
Kuv zoo li tus neeg tuag uas ploj ntais hauv neeg lub siab mus lawm,
zoo li ib lub twj taig tawg tas tsis zoo yuav.

Txais:   Txiv, kuv muab kuv tus ntsuj plig tso rau hauv koj txhais tes.

Tiam sis, Huab Tais, kuv tso siab rau koj;    
Kuv hais tias, “Koj yog kuv tus Tswv Ntuj!”      
Kuv lub neej nyob hauv koj txhais tes; thov koj cawm kuv
ntawm kuv cov yeeb ncuab thiab cov neeg hiam kuv xib teg.      

Txais:   Txiv, kuv muab kuv tus ntsuj plig tso rau hauv koj txhais tes.

Cia koj lub ntsej muag ci tuaj rau saum koj tus tub txib,      
thov cawm kuv vim koj hlub kuv.
Nej kav tsij ua siab loj, ua siab tawv qhawv
tas nej cov uas tso siab rau Huab Tais.    

Txais:   Txiv, kuv muab kuv tus ntsuj plig tso rau hauv koj txhais tes.

Zaj Nyeem Ob:     HES NPLAWS   4:14-16; 5:7-9

14 Vim peb muaj ib tug Tuam Leej Choj uas tau hla dhau yim txheej
cuaj txheej ntuj, uas yog Yes Xus, Tswv Ntuj leej Tub, mas peb yuav
nyob ruaj nreb hauv peb txoj kev lees ntseeg nws.
15 Peb tsis muaj ib tug Tuam Leej Choj uas yuav tsis txawj hlub peb
cov neeg zog me, rau qhov nws tau raug txoj kev sim siab txhij txhua
ib yam li peb, tsuas tshuav txoj kev txhaum xwb, nws thiaj tsis raug.
16 Peb kav tsij tso siab lug mus kom txog lub theej kiab muaj txiaj ntsim,
kom peb tau txais kev khuv leej, thiab txais txiaj ntsim
los pab peb thaum peb xav tau kev pab.
5   7  Thaum Leej pleev tseem ua neej nyob muaj cev nqaij, nws tau tsa
suab quaj thov tus muaj peev xwm cawm tau nws ntawm txoj kev tuag;
Tswv Ntuj tau mloog nws tej lus thov, vim nws hwm Tswv Ntuj zoo.
8 Txawm tias nws yog tus Tub cag, tsis kav nws yuav tsum tau
kawm kev mloog lus nyob hauv txoj kev raug txom nyem.  
9  Thaum nws ua tau txhua yam zoo txhij zoo txhua lawm,
nws kuj yog lub hauv paus uas muab kev cawm
mus li rau txhua tus mloog nws lus.

Zaj Tshaj Ntawv Moo Zoo    FLP  2:8-9

Leej Pleev tuaj yeem mloog Tswv Ntuj lus mus txog qhov tuag,
thiab tseem xaiv txoj kev tuag saum ntoo cuam.
Vim li ntawd, mas Tswv Ntuj thiaj tsa nws ua tus loj dua cov
thiab muab lub npe uas nyob siab dua lwm cov npe rau nws.

Ntawv Moo Zoo:     ZAM   18:1—19:42

1 Yes Xus hais li ntawd tas, ces nws nrog nws cov thwj tim mus rau
tus kwj deg Kes Nroos sab tim ub. Muaj ib lub vaj nyob ntawd.
Yes Xus thiab cov thwj tim mus hauv lub vaj.
2 Yus Das, tus uas muab Yes Xus rau luag, kuj paub qhov chaw ntawd
thiab, vim Yes Xus thiab cov thwj tim sib sau ntau zaus nyob ntawd.
3 Yus Das coj pab peeb zeej thiab ib co zov keeb tuaj. Yog cov thawj
leej choj thiab cov Fas Lis Xais sau cov zov keeb ntawd.
Lawv taws teeb, taws tsau thiab nqa ntaj nqa riam tuaj.
4 Yes Xus paub ib puas tsav yam uas yuav tshwm sim tuaj raug nws,
ces nws tawm los hais rau lawv tias : "Nej nrhiav leej twg ?"
5 Lawv teb rau nws tias : "tus Yes Xus Nas Xas Les." Yes Xus hais rau lawv tias :
"Yog kuv." Yus Das, tus muab Yes Xus rau luag nrog lawv sawv ua ke.
6 Thaum Yes Xus hais rau lawv tias : "Yog kuv",
mas lawv thaub qab thiab lawv ntog pem teb.
7 Yes Xus rov nug lawv dua tias : "Nej nrhiav leej twg ?"
Lawv hais tias : "Yes Xus Nas Xas Les."
8 Yes Xus teb tias : "Kuv twb hais rau nej tias yog kuv.
Yog nej nrhiav kuv, mas nej cia cov no mus."
9 Qhov no tshwm sim raws li lo lus uas nws xub hais tseg tias :
"Cov uas koj muab rau kuv, mas kuv tsis ua ib tug ploj li."
10 Xis Moos Pob Zeb muaj ib rab ntaj. Nws rho hlo nws rab ntaj tib
ntag rau tus thawj leej choj tus qhev, txiav raug nws sab pob
ntseg xis lub qia ntsej tu nrho. Tus qhev no hu ua Mas Kws.
11 Yes Xus hais rau Pob Zeb tias : "Koj ntxig ntaj rau hauv hnab.
Lub ntim uas Leej Txiv muab rau kuv, kuv yuav tsis haus lod ?"
12 Pab peeb zeej nrog tus lwm txheeb, thiab cov zov keeb
Yus Das ntes Yes Xus. Lawv muab Yes Xus khi.
13 Lawv xub coj nws mus tim As Nas tsev. As Nas yog Kais Fas
yawm txiv. Xyoo ntawd yog Kais Fas ua tuam leej choj.
14 Kais Fas yog tus tau tawm tswv yim rau cov Yus Das hais tias :
"Cia ib tug neeg this tsoom pej xeem tuag mas zoo dua."
15 Xis Moos Pob Zeb thiab lwm tus thwj tim raws Yes Xus qab.
Tus thwj tim ntawd yog tus tuam leej choj ib tug swm neeg, ces nws
tau nrog Yes Xus chaws mus hauv tus tuam leej choj lub tshav loog.
16 Hos Pob Zeb nyob sab nraud, nws sawv ze ntawm qhov rooj. Lwm
tus thwj tim uas swm tus tuam leej choj tawm los, nws hais lus rau tus
ntxhais txib zov qhov rooj, ces nws kom Pob Zeb chaws mus hauv.
17 Tus ntxhais txib zov qhov rooj hais rau Pob Zeb tias : "Koj tsis yog tus
neeg ntawd ib tug thwj tim lod ?" Pob Zeb hais tias : "Kuv tsis yog."
18 Cov tub qhev thiab cov zov keeb rauv ib cub taws thee,
vim lub caij ntawd no no. Lawv nyob ntawd nte taws.
Pob Zeb kuj nrog lawv nyob ntawd nte taws thiab.
19 Tus tuam leej choj nug Yes Xus txog
nws cov thwj tim thiab nws cov lus qhia.
20 Yes Xus teb rau tus tuam leej choj tias : "Kuv tab meeg hais lus rau
lub qab ntuj neeg. Kuv niaj hnub qhia nyob hauv cov tsev txoos thiab
hauv lub Tuam Tsev Teev Ntuj uas tas tsoom Yus Das tuaj sib txoos.
Kuv tsis tau nyiag hais ib yam dab tsi.
21 Tim li cas koj nug kuv ? Koj nug cov uas tau hnov tej lus kuv hais
rau lawv. Cov ntawd paub tias kuv tau hais dab tsi."
22 Thaum Yes Xus hais li ntawd, mas cov zov keeb uas sawv ntsug nyob
ntawd, muaj ib tug ib tawg ncuav rau Yes Xus, nws hais rau Yes Xus tias :
"Koj teb li ntawd rau tus tuam leej choj lod !"
23 Yes Xus teb rau tus zov keeb tias : "Yog kuv hais lus phem,
koj ua pov thawj qhia saib qhov twg phem. Hos yog kuv
hais raug lawm, vim li cas koj thiaj ntaus kuv ?”
24 As Nas xa Yes Xus mus rau tuam leej choj Kais Fas.
Yes Xus tseem khi rawv li qub.
25 Xis Moos Pob Zeb nyob ntawd nte taws. Lawv hais rau nws tias :
"Koj tsis yog nws ib tug thwj tim lod ?" Pob Zeb tsis lees,
nws hais tias : “Kuv tsis yog.”
26 Tus tuam leej choj muaj ib tug qhev, nws yog ib tug txheeb ze tus
qhev uas raug Pob Zeb txiav ib sab qia ntsej, nws hais tias :
"Kuv twb pom koj nrog nws nyob hauv lub vaj los tsis sub ?"
27 Pob Zeb rov qab tsis lees, ces tam sis ntawd ib tug qaib qua.
28 Lawv coj Yes Xus tim Kais Fas tsev mus rau hauv lub tsev txiav
txim. Thaum ntawd kaj ntug lawm. Tab sis cov Yus Das tsis
mus hauv lub tsev txiav txim, kom lawv txhob tsuas yam
tsis huv, lawv thiaj yuav noj tau pluas Hla.
29 Pis Las Tos thiaj li tawm tuaj cuag lawv, nws hais tias :
"Nej muaj lus dab tsi, nej thiaj tuaj kom tus neeg ntawd ?"
30 Lawv teb rau Pis Las Tos hais tias : "Yog tus neeg no txhob
yog neeg phem, mas peb yuav tsis coj nws tuaj rau koj."
31 Pis Las Tos hais rau lawv tias : "Nej coj nws mus, nej txiav txim
rau nws raws li nej txoj cai." Cov Yus Das hais rau Pis Las Tos tias :
"Txoj cai tsis pub peb muab ib tug neeg tua."
32 Qhov no tshwm sim raws li lo lus Yes Xus tau xub
hais qhia tias nws yuav tsum tuag zoo li cas.
33 Pis Las Tos thiaj rov chaws mus hauv lub tsev txiav txim, nws hu
Yes Xus los, nws hais tias : "Koj puas yog cov Yus Das tus vaj ?"
34 Yes Xus teb tias : "Puas yog koj hais koj,
los yog luag tej hais txog kuv li ntawd rau koj ?"
35 Pis Las Tos teb tias : "Kuv puas yog ib tug Yus Das ? Koj haiv neeg
thiab cov thawj leej choj coj koj tuaj rau kuv. Koj tau ua dab tsi ?"
36 Yes Xus teb tias : "Kuv lub Ceeb Tsheej tsis nyob hauv lub qab
ntuj no. Yog kuv lub Ceeb Tsheej nyob hauv lub qab ntuj no,
mas kuv cov neeg yuav sawv ntaus rog thaiv kom kuv txhob poob
rau hauv cov Yus Das txhais tes. Tab sis,
kuv lub Ceeb Tsheej tsis nyob hauv lub qab ntuj no."
37 Pis Las Tos hais rau Yes Xus tias : "Ua li koj yog vaj lod ?" Yes Xus
teb hais tias : "Yog koj hais tias kuv yog vaj. Yog vim qhov ntawd
kuv thiaj yug los, thiab yog vim qhov ntawd kuv thiaj tuaj nyob hauv
lub qab ntuj no : kuv tuaj ua tim khawv txog qhov tseeb.
Leej twg yog txoj kev tseeb tug, mas nws mloog kuv lub suab."
38 Pis Las Tos hais rau Yes Xus tias : "Qhov tseeb yog dab tsi ?"
Thaum Pis Las Tos hais li no tas, nws tawm rov mus cuag cov Yus Das,
nws hais rau lawv tias : "Kuv tsis pom ib yam tsim
nyog raug txim nyob hauv tus neeg ntawd.
39 Tab sis raws li nej kev cai, mas txog lub Ntees Hla kuv tso ib tug
neeg mus. Nej puas xav kom kuv tso cov Yus Das tus vaj ?"
40 Lawv rov qab nthe nrov tias : "Txhob tso nws, tso
Npas Las Npas!" Npas Las Npas yog ib tug tub sab.
19   1 Ces Pis Las Tos coj Yes Xus mus, nws kom lawv nplawm Yes Xus.
2 Cov tub rog xuas ib co pos ntxias ua ib lub kauj, lawv muab tso saum
Yes Xus taub hau. Lawv muab ib lub tsho ntev liab tshiab rau Yes Xus hnav.
3 Lawv txav los ze nws, lawv hais tias : "Nyob kaj lug,
cov Yus Das tus vaj," ces lawv ntaus nws tej niag teg.
4 Pis Las Tos rov tawm mus nraum zoov, nws hais rau lawv tias :
"Nej saib, kuv coj tus neeg no tawm los rau nej, kom nej paub tias
kuv tsis pom ib yam tsim nyog raug txim nyob hauv nws."
5 Yes Xus tawm los sab nraud, nws ntoo lub kauj pos thiab
hnav lub tsho ntev liab tshiab, ces Pis Las Tos
hais rau lawv tias : "Nej ntsia tus neeg no."
6 Thaum cov thawj leej choj thiab cov zov keeb pom Yes Xus, lawv
nthe nthe hais tias : "Muab dai saum ntoo cuam ! Muab dai saum
ntoo cuam !" Pis Las Tos hais rau lawv tias : "Nej coj nws mus,
nej muab nws dai saum ntoo cuam. Vim tias kuv tsis
pom ib yam tsim nyog raug txim nyob hauv nws."
7 Cov Yus Das teb rau Pis Las Tos tias : "Peb muaj ib Txoj Cai,
raws li Txoj Cai ntawd, mas nws yuav tsum tuag,
vim nws tsa nws ua Tswv Ntuj Leej Tub."
8 Thaum Pis Las Tos hnov lo lus ntawd, mas nws haj yam ntshai.
9 Ces nws rov chaws mus hauv lub tsev txiav txim. Nws hais rau
Yes Xus tias : "Koj nyob qhov twg tuaj ?"
Tab sis Yes Xus tsis teb ib lo lus rau nws li.
10 Pis Las Tos thiaj hais rau Yes Xus tias : "Koj tsis hais lus rau kuv.
Koj puas paub hais tias kuv muaj hwj huam tso tau koj mus,
thiab muaj hwj huam muab koj dai saum ntoo cuam ?"
11 Yes Xus teb hais tias : "Yog koj tsis tau txais hwj huam saum
ntuj los, mas koj yuav ua tsis tau dab tsi rau kuv. Vim li ntawd,
tus muab kuv rau koj, nws muaj ib qho txhaum loj dua."
12 Txij ntawd los, Pis Las Tos nrhiav kev tso Yes Xus.
Tab sis cov Yus Das nthe nthe hais tias : "Yog koj tso tus neeg
ntawd mus, mas koj tsis yog Xes Ntxas phooj ywg.
Leej twg tsa nws ua vaj, mas nws sawv tiv Xes Ntxas."
13 Thaum Pis Las Tos hnov cov lus no, nws kom lawv coj Yes Xus
tawm mus sab nraud. Ces Pis Las Tos mus zaum saum lub theej kiab
txiav txim, ntawm qhov chaw hu ua Tshav Txiag Zeb,
lus Hes Nplaws hais tias Nkas Npas Thas.
14 Hnub ntawd, yog Hnub Npaj ua lub Ntees Hla. Thaum ntawd
kwv yees ze kaum ob teev tav su. Pis Las Tos hais
rau cov Yus Das tias : "Nej ntsia nej tus vaj."
15 Cov Yus Das nthe nrov nrov tias : "Muab tua ! Muab tua !
Muab dai saum ntoo cuam !" Pis Las Tos hais rau lawv tias :
"Kuv yuav muab nej tus vaj dai saum ntoo cuam lod ?" Cov thawj
leej choj teb hais tias : "Peb tsuas muaj Xes Ntxas ua peb tus vaj xwb."
16 Ces Pis Las Tos muab Yes Xus rau lawv, kom lawv coj nws mus
dai saum ntoo cuam.  Lawv thiaj li coj Yes Xus mus.
17 Yes Xus kwv nws tus ntoo cuam. Nws tawm mus txog qhov
chaw hu ua "Khauj Khaum Taub Hau",
uas lus Hes Nplaws hu ua "Nkos Nkos Thas."
18 Lawv muab nws dai rau saum ntoo cuam nyob ntawd.
Lawv muab ob tug neeg dai saum ntoo cuam xws li nws thiab,
ib tug nyob ib sab, Yes Xus nyob nruab nrab.
19 Pis Las Tos sau ntawv rau saum ib daim txiag ; nws kom muab
tso saum tus ntoo cuam. Cov npe ntawv saum daim txiag sau hais tias :
Yes Xus Nas Xas Les, cov Yus Das tus vaj.
20 Coob leej Yus Das nyeem cov lus saum daim txiag, vim qhov chaw
uas lawv muab Yes Xus dai saum ntoo cuam nyob ze lub nroog,
thiab lawv sau ua lus Hes Nplaws, lus Las Tis Nas, thiab lus Hes Las.
21 Cov thawj leej choj Yus Das hais rau Pis Las Tos tias :
"Koj tsis txhob sau tias : Cov Yus Das tus vaj, yuav tsum sau tias
"Tus ntawd hais tias : Kuv yog cov Yus Das tus vaj."
22 Pis Las Tos teb hais tias : "Qhov kuv sau, mas twb sau tas lawm."  
23 Thaum cov tub rog muab Yes Xus dai saum ntoo cuam tas,
lawv muab Yes Xus cov ris tsho faib ua plaub tsw, ib tsw rau ib tug
tub rog. Lawv muab lub tsho ntev faib, tab sis lub tsho ntev tsis
muaj leej leeg, yog tsho ntos ua ib daig xwb mus rau nram taw.
24 Cov tub rog sib tham tias : "Peb txhob muab lub tsho ntev dua,
peb twv saib leej twg yuav tau lub tsho ntawd." Ua li mas tshwm sim
raws li Ntawv sau cia tias : Lawv sib faib kuv cov khaub ncaws,lawv
twv saib leej twg yuav tau kuv cov ris tsho. Cov tub rog tau ua li ntawd.  
25 Yes Xus niam thiab nws niam tus niam hluas,
nrog Mab Liab uas yog Khos Pas poj niam, thiab
Mab Liab Mas Ntas Las, lawv sawv ze tus ntoo cuam.
26 Yes Xus pom nws niam, thiab pom tus thwj tim uas nws nyiam
sawv ze nws niam, ces nws hais rau nws
niam tias : "Niad, tus ntawd yog koj tus tub."
27 Thiab Yes Xus hais rau tus thwj tim tias : "Tus ntawd yog
koj niam." Txij lub sij hawm ntawd los,
tus thwj tim coj Mab Liab mus nyob hauv nws tsev.  
28 Ua li ntawd tas, nws paub tias zaum no
ib puas tsav yam tiav tas lawm, nws hais tias :
"Kuv nqhis dej", kom xwv muaj raws li Ntawv sau tseg.
29 Muaj ib hub kua qaub puv nkaus nyob ntawd. Lawv muab ib
thooj rwb tub kua qaub chob rau ib tug ntsis pas nroj his xaus cev
mus rau Yes Xus qhov ncauj. 30 Thaum Yes Xus haus qhov kua
qaub tas, nws hais tias : "Ib puas tsav yam tiav tas lawm." Ces Yes Xus
nyo taub hau, nws tso nws tus ntsuj plig tawm mus.  
31 Hnub ntawd yog Hnub Npaj, mas cov Yus Das tsis xav cia cov
tuag lub cev dai saum ntoo cuam hnub Xas Npas Tos, vim tias hnub
Xas Npas Tos ntawd yog ib lub hnub nyoog loj.
Cov Yus Das thov Pis Las Tos kom muab cov neeg dai saum ntoo
cuam ob sab ceg lov thiab muab lawv lub cev txo nqes los.
32 Cov tub rog thiaj tuaj muab thawj tug ob sab ceg lov, thiab muab
lwm tus uas nrog nws dai saum ntoo cuam ob sab ceg lov.
33 Thaum lawv los txog ntawm Yes Xus, lawv pom nws twb tuag
lawm, lawv tsis muab nws ob sab ceg lov,
34 tab sis ib tug tub rog xuas nws rab hmuv hno Yes Xus phab tav,
tam sis ntawd ib co ntshav thiab ib co dej tawm los.
35 Tus uas tau pom qhov ntawd ua pov thawj hais.
Nws ua tim khawv hais qhov tseeb, nws paub tias
qhov nws hais muaj tiag. Nws hais tej ntawd kom nej ntseeg.
36 Tej xwm no tshwm sim kom muaj raws li Ntawv
sau cia tias : Nws cov pob txha tsis lov ib tug li.
37 Tseem muaj lwm lo lus hauv Ntawv hais tias :
Lawv yuav ntsia tus uas lawv nkaug.
38 Thaum tej xwm ntawd tshwm tuaj tas, Yos Xes nyob As Lis Mas
Tias tuaj thov Pis Las Tos kom kheev nws txo Yes Xus lub cev.
Pis Las Tos tso lus rau Yos Xes. Ces Yos Xes mus txo Yes Xus lub cev.
Yos Xes yog Yes Xus ib tug thwj tim, tab sis nws tsis
pub luag tej paub vim nws ntshai cov Yus Das.
39 Nis Kos Des Mos kuj tuaj thiab. Nis Kos Des Mos yog tus uas
thaum chiv thawj, nws tuaj cuag Yes Xus hmo ntuj. Nws nqa ib
cov tshuaj qhwv tuag tuaj : yog txab txiv yoov xyaw
txab xyab phij, kwv yees hnyav li ib puas choj.
40 Lawv txo Yes Xus lub cev los, lawv xuas tej pluaj hlab ntaub
pleev tshuaj tsw qab los qhwv nws lub cev,
raws li cov Yus Das kev cai tu zam.
41 Nyob ntawm thaj chaw uas luag muab Yes Xus dai saum ntoo
cuam, muaj ib lub vaj. Nyob hauv lub vaj ntawd muaj ib lub ntxa
tshiab uas tseem tsis tau tso ib tug tuag rau hauv li.
42 Vim tias hnub ntawd yog cov Yus Das Hnub Npaj, thiab lub ntxa
ntawd nyob ze, ces lawv muab Yes Xus zwm rau hauv lub ntxa ntawd.

COV ZAJ NYEEM HNUB TIM 04/04/ 2015

Hnub Xya Ntshiab – Yav Tsaus Ntuj Hmo Hla

Zaj Nyeem Ib: HAUV PAUS 1: 1—2:2

1 Thaum chiv lub keeb, Tswv Ntuj tsim lub ntuj thiab lub ntiaj teb,
2 mas lub ntiaj teb tseem tsis tau tsheej ntiaj teb thiab tsis muaj
dab tsi nyob hauv li. Qhov tsaus ntuj nti npog lub qhov ntuj dub nciab.
Tswv Ntuj nthwv cua kiv nplawm ntws saum nplaim dej. 3
Tswv Ntuj hais tias : "Kom muaj qhov pom kev."
Ces txawm muaj qhov pom kev tuaj.
4 Tswv Ntuj pom tias qhov pom kev ntawd zoo.
Tswv Ntuj cais qhov pom kev ntawm qhov tsaus ntuj.
5 Tswv Ntuj hu qhov pom kev ua "nruab hnub"
thiab hu qhov tsaus ntuj ua "hmo ntuj." T
xawm muaj tsaus ntuj thiab muaj kaj ntug : yog thawj hnub.
6 Tswv Ntuj hais tias : "Kom muaj ib lub ntuj ntsuab
nyob hauv nruab nrab cov dej thiab kom nws
quas cov dej ntawm cov dej". Ces txawm muaj li ntawd tuaj.
7 Tswv Ntuj ua lub ntuj ntsuab los quas cov dej nyob hauv qab
ntuj ntsuab ntawm cov dej nyob saum qaum ntuj ntsuab.
8 Tswv Ntuj hu lub ntuj ntsuab ua "ntuj." Txawm muaj
tsaus ntuj thiab muaj kaj ntug : yog hnub ob.
9 Tswv Ntuj hais tias : "Kom cov dej uas nyob hauv qab lub ntuj
ntsuab sib sau los ua ib pawg xwb, thiab kom av
qhuav tshwm los." Ces txawm muaj li ntawd tuaj.
10 Tswv Ntuj hu cov av qhuav ua "ntiaj teb" thiab hu cov dej
ua "hiav txwv." Tswv Ntuj pom tias qhov ntawd zoo.
11 Tswv Ntuj hais tias : "Kom lub ntiaj teb tuaj nroj tsuag ntsuab xiab :
kom muaj nroj tsuag txawj muaj noob, thiab kom muaj
ntoo txi txiv nyias txi nyias hom txiv, nyias muaj nyias
hom noob." Ces txawm muaj li ntawd tuaj.
12 Ntiaj teb tuaj nroj tsuag ntsuab xiab : tej nroj tsuag nyias txawj
txi nyias hom noob thiab tej ntoo nyias txawj txi nyias hom txiv,
nyias muaj nyias hom noob. Tswv Ntuj pom hais tias qhov ntawd zoo.
13 Txawm muaj tsaus ntuj thiab muaj kaj ntug : yog hnub peb.
14 Tswv Ntuj hais tias : "Kom muaj tej lub ci ci nyob saum lub ntuj
ntsuab saud, cais nruab hnub thiab hmo ntuj, thiab cia ua
tej lub cim xam hnub xam nyoog thiab suav hnub suav xyoo,
15 kom tej lub ci ci nyob saum lub ntuj ntsuab
ua kom ntiaj teb pom kev." Ces txawm muaj li ntawd tuaj.
16 Tswv Ntuj ua ob lub ci ci loj dua cov, lub ci ci loj yog lub kav
nruab hnub, lub ci ci me yog lub kav hmo ntuj, thiab cov hnub qub.
17 Tswv Ntuj muab lawv txawb rau saum
lub ntuj ntsuab saud kom ntiaj teb pom kev, 1
8 cia kav nruab hnub thiab hmo ntuj, thiab cia cais qhov pom kev
ntawm qhov tsaus ntuj. Tswv Ntuj pom tias qhov ntawd zoo.
19 Txawm muaj tsaus ntuj thiab muaj kaj ntug : yog hnub plaub.
20 Tswv Ntuj hais tias : "Kom muaj tej tsiaj muaj sia npau xi nyob
hauv cov dej, thiab kom muaj noog ya saum npoo ntiaj teb,
saum ib nta ntuj ntsuab." Ces txawm muaj li ntawd tuaj.
21 Tswv Ntuj tsim cov nab hiav txwv loj loj thiab tas puas tsav yam
tsiaj muaj sia uas txawj ntab hauv dej, coob coob npau xi nyias
muaj raws nyias hom, thiab tsim cov noog muaj tis,
nyias muaj raws nyias hom. Tswv Ntuj pom tias qhov ntawd zoo.
22 Tswv Ntuj foom lus zoo rau lawv tias : "Nej yeej meem tsim noob,
yeej meem huam vam mus nyob puv cov dej hauv hiav txwv,
kom cov noog yeej meem huam vam mus puv ntiaj teb."
23 Txawm muaj tsaus ntuj thiab muaj kaj ntug : yog hnub tsib.
24 Tswv Ntuj hais tias : "Kom lub ntiaj teb txawj muaj tej yam tsiaj
muaj sia, nyias muaj raws nyias hom : tsiaj nyeg, kab ntsaum, tsiaj
qus, nyias muaj raws nyias hom." Ces txawm muaj li ntawd tuaj.
25 Tswv Ntuj ua tej tsiaj qus kom nyias muaj nyias hom, tej tsiaj
nyeg kom nyias muaj nyias hom, thiab tas txhua yam kab ntsaum
kom nyias muaj nyias hom. Tswv Ntuj pom tias qhov ntawd zoo.
26 Tswv Ntuj hais tias : "Peb yuav ua tib neeg raws li peb tus duab,
kom zoo li peb me ntsis. Kom lawv ua tswv kav cov ntses nyob
hauv hiav txwv, cov noog ya saum ntuj, cov tsiaj nyeg,
tas txhua yam tsiaj qus thiab txhua yam kab ntsaum nkag hauv av.
27 Ces Tswv Ntuj tsim tib neeg raws li nws tus duab. Yog raws li
Tswv Ntuj tus duab, mas nws thiaj tau tsim tib neeg.
Nws tsim nkawd ua txiv neej thiab ua poj niam.
28 Tswv Ntuj foom lus zoo rau nkawd thiab hais rau nkawd tias :
"Neb yeej meem tsim noob, yeej meem huam vam mus puv ntiaj
teb thiab tswj ntiaj teb. Neb kav cov ntses nyob hauv hiav txwv, cov
noog ya saum ntuj thiab tas puas tsav yam tsiaj uas nkag hauv av."
29 Tswv Ntuj hais tias : "Kuv muab tas puas tsav yam nroj tsuag
muaj noob uas tuaj nyob saum npoo av, kuv muab tas puas
tsav yam ntoo txi txiv thiab muaj noob rau neb :
tej ntawd yuav yog neb tej txhiam laj txhiam xws.
30 Kuv muab tas txhua yam nroj ntsuab rau cov tsiaj qus, cov noog
ya saum ntuj, tas txhua yam nkag hauv av thiab ciaj sia, kuv muab
rau lawv ua txhiam xws noj." Ces txawm muaj li ntawd tuaj.
31 Tswv Ntuj ntsia tas txhua yam nws tau ua : txhua yam ntawd zoo
kawg. Txawm muaj tsaus ntuj thiab muaj kaj ntug : yog hnub rau.
2 1 Lub ntuj thiab lub ntiaj teb yog tsim los
zoo li no, thiab tas txhua yam nyob rau hauv.
2 Tswv Ntuj ua nws txoj num tiav tas rau hnub xya.
Ces hnub xya nws thiaj so, vim nws ua nws txoj num tiav tas.

Los: HAUV PAUS 1:1, 26-31A

1 Thaum chiv lub keeb, Tswv Ntuj tsim lub ntuj thiab lub ntiaj teb,
26 Tswv Ntuj hais tias : "Peb yuav ua tib neeg raws li peb tus duab,
kom zoo li peb me ntsis. Kom lawv ua tswv kav cov ntses
nyob hauv hiav txwv, cov noog ya saum ntuj, cov tsiaj nyeg, tas
txhua yam tsiaj qus thiab txhua yam kab ntsaum nkag hauv av.
27 Ces Tswv Ntuj tsim tib neeg raws li nws tus duab.
Yog raws li Tswv Ntuj tus duab, mas nws thiaj tau tsim tib neeg.
Nws tsim nkawd ua txiv neej thiab ua poj niam.
28 Tswv Ntuj foom lus zoo rau nkawd thiab hais rau nkawd tias :
"Neb yeej meem tsim noob, yeej meem huam vam mus puv ntiaj
teb thiab tswj ntiaj teb. Neb kav cov ntses nyob hauv hiav txwv, cov
noog ya saum ntuj thiab tas puas tsav yam tsiaj uas nkag hauv av."
29 Tswv Ntuj hais tias : "Kuv muab tas puas tsav yam nroj tsuag
muaj noob uas tuaj nyob saum npoo av, kuv muab tas
puas tsav yam ntoo txi txiv thiab muaj noob rau neb :
tej ntawd yuav yog neb tej txhiam laj txhiam xws.
30 Kuv muab tas txhua yam nroj ntsuab rau cov tsiaj qus, cov noog
ya saum ntuj, tas txhua yam nkag hauv av thiab ciaj sia, kuv muab
rau lawv ua txhiam xws noj." Ces txawm muaj li ntawd tuaj.
31 Tswv Ntuj ntsia tas txhua yam nws
tau ua : txhua yam ntawd zoo kawg.

Zaj Nyeem Ob: HAUV PAUS 22:1-18

1 Tswv Ntuj sim Has Nplas Has siab. Nws hu tias : "Has Nplas Has!
Has Nplas Has !" Has Nplas Has teb tias : "Kuv nyob ntawm no !"
2 Tswv Ntuj hais tias : "Coj koj leej tub twm zeej His Xas Has uas
koj hlub kawg, koj coj nws mus kom txog lub teb chaws
Mos Lis Yas. Nyob ntawd koj yuav muab nws txi rau
kuv saum ib lub roob uas kuv yuav qhia rau koj."
3 Tag kis, Has Nplas Has sawv ntxov, nws nog nra rau nws tus luj,
nws coj ob tug tub txib thiab nws tus tub His Xas Has nrog nws mus.
Nws phua ib co taws npaj mus ua thaj txi ntuj, ces nws sawv kev
mus rau thaj chaw uas Tswv Ntuj qhia rau nws.
4 Hnub peb, Has Nplas Has tsa muag ntsia
pom thaj chaw ntawd tseem nyob deb.
5 Has Nplas Has hais rau nws ob tug tub txib tias : "Neb nrog tus
luj nyob ntawm no. Kuv tus me nyuam wb mus
kom txog tid, wb yuav hawm Ntuj, wb mam rov los ntawm neb."
6 Has Nplas Has muab cov taws txi Ntuj nog rau nws tus tub His
Xas Has ris, hos nws nqa cov hluav
taws thiab rab riam, ces nkawd ob leeg ua ke mus.
7 His Xas Has nug nws txiv Has Nplas Has tias : "Kuv txiv !"
Has Nplas Has teb tias : "Me tub, koj hais dab tsi !"
His Xas Has hais ntxiv tias : "Ua cas pom hluav taws thiab cov taws
xwb, ua li tus yaj yuav coj los hlawv txi Ntuj nyob qhov twg ?"
8 Has Nplas Has teb tias : "Me tub, Tswv Ntuj mam li muab tus yaj
uas yuav txi Ntuj rau wb." Ces nkawd ob leeg taug kev mus ntxiv.
9 Thaum nkawd tuaj txog thaj chaw uas Tswv Ntuj tau qhia nws,
Has Nplas Has tsa ib lub thaj rau ntawd thiab nws muab cov taws
mus teeb rau saud. Nws muab nws tus tub His Xas Has pav,
ces nws muab tso rau saum cov taws saum lub thaj txi Ntuj.
10 Has Nplas Has tsa tes mus nthos rab
riam yuav coj los tua nws tus tub.
11 Tiam sis HUAB TAIS tus Tshiab hu saum ntuj tuaj rau nws tias :
"Has Nplas Has ! Has Nplas Has !" Has Nplas
Has teb tias : "Kuv nyob ntawm no !"
12 Tus Tshiab hais tias : "Txhob tsa koj txhais tes rau saum tus me
nyuad ! Txhob ua dab tsi phem rau nws ! Zaum no kuv paub
hais tias koj hwm Tswv Ntuj tiag, vim koj tsis yig,
koj tseem muab koj leej tub twm zeej los txi rau kuv."
13 Has Nplas Has tsa muag ntsia pom ib tug laug
tshis uas ob tug kub daig hauv ib koog pos. Ces nws mus muab
tus laug tshis los hlawv txi Ntuj hloov nws tus tub chaw.
14 Has Nplas Has tis npe rau thaj chaw ntawd hu ua "HUAB TAIS
yuav pub.” Ces zaum no thiaj muaj lo lus hais kam tias
"Saum lub roob HUAB TAIS yuav pub."
15 HUAB TAIS tus Tshiab rov hu zaum ob
saum ntuj tuaj rau Has Nplas Has,
16 nws hais tias : "HUAB TAIS hais tias : Kuv tuav txog kuv lub npe
cog lus rau koj tias : vim koj tau ua li ntawd, koj tsis yig,
koj tuaj yeem muab koj leej tub twm zeem los txi rau kuv,
17 mas kuv yuav foom hmoov zoo ntau rau koj, kuv yuav ua kom
koj tsoom xeeb zeej xeeb ntxwv coob npaum cov hnub qub saum
ntuj thiab ntau npaum cov xuab zeb uas nyob ntawm ntug hiav txwv.
Koj tsoom xeeb zeej xeeb ntxwv yuav ua tswv
kav lawv cov yeeb ncuab tej qhov rooj loog.
18 Tas txhua haiv neeg nyob ntiaj teb yuav tuav txog koj tsoom xeeb
ntxwv lub npe los sib foom hmoov zoo, vim koj tau mloog kuv lus."

Los: HAUV PAUS 22:1-2, 9A, 10-13, 15-18

1 Thaum tej xwm no dhau tas lawm, Tswv Ntuj sim Has Nplas Has
siab. Nws hu tias : "Has Nplas Has ! Has Nplas Has !"
Has Nplas Has teb tias : "Kuv nyob ntawm no !"
2 Tswv Ntuj hais tias : "Coj koj leej tub twm zeej His Xas Has uas
koj hlub kawg, koj coj nws mus kom txog lub teb chaws Mos Lis
Yas. Nyob ntawd koj yuav muab nws txi rau
kuv saum ib lub roob uas kuv yuav qhia rau koj."
9 Thaum nkawd tuaj txog thaj chaw uas Tswv Ntuj tau qhia nws,
Has Nplas Has tsa ib lub thaj rau ntawd
thiab nws muab cov taws mus teeb rau saud…
10 Has Nplas Has tsa tes mus nthos
rab riam yuav coj los tua nws tus tub.
11 Tiam sis HUAB TAIS tus Tshiab hu saum ntuj tuaj rau nws tias :
"Has Nplas Has ! Has Nplas Has !" Has Nplas
Has teb tias : "Kuv nyob ntawm no !"
12 Tus Tshiab hais tias : "Txhob tsa koj txhais tes rau saum tus
me nyuad ! Txhob ua dab tsi phem rau nws ! Zaum no kuv paub
hais tias koj hwm Tswv Ntuj tiag, vim koj tsis yig,
koj tseem muab koj leej tub twm zeej los txi rau kuv."
13 Has Nplas Has tsa muag ntsia pom ib tug laug tshis uas ob tug
kub daig hauv ib koog pos. Ces nws mus muab
tus laug tshis los hlawv txi Ntuj hloov nws tus tub chaw.
15 HUAB TAIS tus Tshiab rov hu zaum ob
saum ntuj tuaj rau Has Nplas Has,
16 nws hais tias : "HUAB TAIS hais tias : Kuv tuav txog kuv
lub npe cog lus rau koj tias : vim koj tau ua li ntawd, koj tsis yig,
koj tuaj yeem muab koj leej tub twm zeem los txi rau kuv,
17 mas kuv yuav foom hmoov zoo ntau rau koj, kuv yuav ua kom
koj tsoom xeeb zeej xeeb ntxwv coob npaum cov hnub qub saum
ntuj thiab ntau npaum cov xuab zeb uas nyob ntawm ntug
hiav txwv. Koj tsoom xeeb zeej xeeb ntxwv yuav
ua tswv kav lawv cov yeeb ncuab tej qhov rooj loog.
18 Tas txhua haiv neeg nyob ntiaj teb yuav tuav
txog koj tsoom xeeb ntxwv lub npe los sib
foom hmoov zoo, vim koj tau mloog kuv lus."

Zaj Nyeem Peb: KEV TSIV 14:15—15:1

15 HUAB TAIS hais rau Mais Xes tias : "Vim li cas koj thiaj quaj hu
kuv? Koj hais rau cov His Xas Lais kom lawv rov sawv kev mus ntxiv.
16 Ntawm koj, koj yuav tsa koj rab pas thiab xyab koj txhais tes
rau saum dej ntuj, koj muab dej ua ob sab, kom cov His Xas Lais
tau taug kev qhuav qhawv hauv qab thu dej mus.
17 Kuv yuav ua kom cov Hais Nkws Tos lub siab tawv qhawv tuaj,
lawv yuav caum cov His Xas Lais qab hla hauv qab thu dej mus,
ces kuv yuav siv Fas Las Oos thiab nws cov tub rog, nws cov
tsheb rog thiab cov tsav nees los ua kom kuv nto koob meej.
18 Cov Hais Nkws Tos yuav paub tias kuv yog HUAB TAIS
thaum kuv siv Fas Las Oos thiab nws cov tsheb rog
thiab cov tsav tsheb ua kom kuv nto koob meej lawm.
19 Tswv Ntuj tus Tshiab uas mus ua tsoom His Xas Lais ntej, hloov
chaw mus taug kev lawv lawv qab : tus ncej huab nyob ntawm lawv
hauv ntej kuj txav chaw mus nyob tom lawv qub qab thiab.
20 Nws mus nyob nruab nrab kem tog Hais Nkws Tos
ntawm tog His Xas Lais. Twv huab dub nciab tsaus nti,
ces hmo ntawd ib hmos, ib tog txav tsis ti ib tog li.
21 Mais Xes tsa tes rau saum dej ntuj, ces HUAB TAIS ua cua
hlob hlob ntsawj toob fab tuaj thawb cov dej hiav txwv ib hmos, ua
kom qab thu dej qhuav qhawv tawm los, hos dej faib nyob ob sab.
22 Cov His Xas Lais nkag hauv hiav txwv, lawv tsuj av qhuav qhawv hla
mus, nyob ntawm lawv sab xis thiab sab laug muaj ob lub phab ntsa dej.
23 Cov Hais Nkws Tos caum lawv qab, Fas Las Oos cov nees tas nrho,
cov tsheb rog thiab cov tsav nees nkag mus hauv dej ntuj caum lawv.
24 Thaum yuav kaj ntug, HUAB TAIS nyob saum tus ncej hluav taws
thiab huab ntsia pom tog tub rog Hais Nkws Tos,
nws ua kom tog Hais Nkws Tos muaj teeb meem.
25 Nws ua kom lawv cov log tsheb daig thiab khiav mus qeeb qeeb.
Cov Hais Nkws Tos hais tias : "Peb khiav mus deb ntawm cov His Xas
Lais vim HUAB TAIS pab lawv tawm tsam ntaus cov Hais Nkws Tos !"
26 HUAB TAIS hais rau Mais Xes tias : "Koj tsa tes rau saum dej ntuj,
kom dej ntws rov los nyab cov Hais Nkws Tos thiab
lawv cov tsheb rog thiab cov tsav nees tib si."
27 Mais Xes tsa tes rau saum dej ntuj, ces thaum pib kaj ntug,
dej nphau rov los nyob qhov qub chaw. Cov Hais Nkws Tos tig khiav
rov qab, lawv tab tom mus ntsib cov dej nphau nphwv los,
HUAB TAIS ua kom lawv ntxeev zom zaws rau hauv dej ntuj.
28 Cov dej nphau rov los nyob qhov qub, los npog nkaus cov tsheb
thiab cov tsav nees ua tub rog Hais Nkws Tos tas nrho uas tau nkag
mus hauv qab thu dej caum cov His Xas Lais, tsis dim ib tug li.
29 Hos cov His Xas Lais li lawv tau taug kev qhuav qhawv
nyob hauv plawv dej ntuj, cov dej sawv ua ob sab phab
ntsa nyob ntawm lawv sab xis thiab sab laug.
30 Hnub ntawd, HUAB TAIS cawm cov His Xas Lais dim ntawm
cov Hais Nkws Tos txhais tes. Cov His Xas Lais pom
cov Hais Nkws Tos tuag pawg lug ntawm ntug dej ntuj.
31 Cov His Xas Lais pom HUAB TAIS lub peev xwm uas nws siv los tiv
yeej cov Hais Nkws Tos. Tsoom pej xeem sawv daws hwm HUAB TAIS,
lawv ntseeg HUAB TAIS thiab ntseeg Mais Xes nws tus tub txib.
15 1 Ces Mais Xes thiab tsoom His Xas Lais hu zaj nkauj no cav txog
HUAB TAIS: "Kuv yuav hu nkauj cav txog HUAB TAIS,
vim nws hnav kev nto koob meej, nws tau muab tus nees
thiab tus caij nees pov rau hauv hiav txwv.”

Zaj Nyeem Plaub: HIS XAIS 54:5-14

5 Tus ua koj tus txiv yog tus tsim koj; nws lub npe yog tus HUAB TAIS
Xas Npas Os. Tus txhiv koj yog His Xas Lais tus Ntshiab,
nws hu ua Tswv Ntuj kav tas nrho lub ntiaj teb.
6 Muaj tiag, koj zoo li tus poj niam uas luag muab tso pov tseg thiab
muaj kev nyuaj siab loj, HUAB TAIS hu koj rov qab,
zoo li tus poj niam ib txhis raug thaum hluas los
uas tau muab nrauj lawm; koj tus Tswv Ntuj hais li.
7 Kuv tau tso koj tseg ib nyuag ntu luv luv, tab sis kuv lub siab hlub
khuv leej koj kawg nkaus, kuv yuav coj koj rov los nrog kuv nyob.
8 Kuv tau npau taws heev rau koj, kuv thiaj nraim kuv lub ntsej muag
ntawm koj ib nyuag chim, tab sis kuv lub siab hlub koj mus tas ib txhis,
kuv khuv leej koj; HUAB TAIS tus txhiv koj hais li ntawd.
9 Rau kuv yog zoo li thaum Nos Hes ua neej nyob, kuv cog lus tias dej
yuav tsis nyab ntiaj teb ntxiv. Nyem no, kuv cog lus ib yam li ntawd
tias kuv yuav tsis npau taws rau koj, thiab yuav tsis ntiab koj ntxiv.
10 Txawm cov roob txawj txav chaw, cov hauv toj txawj vau,
kuv lub siab hlub koj yuav tsis nrug deb koj ib zaug li,
kuv kev cog lus cia koj nyob thaj yeeb los kuj yuav tsis hloov.
Tus HUAB TAIS khuv leej koj hais li ntawd."
11 Koj uas raug kev txom nyem loj, raug cua daj cua dub nplawm,
tsis muaj tus hlub, ntsias saib, kuv yuav muab pob zeb
pov haum daj liab doog pua koj cov kev, yuav muab
pob zeb xiav los ua koj cov ncej txheem tsev.
12 Kuv yuav muab pov haum liab los tso rau saum koj cov taub hau
ntsa zeb, yuav muab pob zeb ci hob los ua koj cov rooj vag thiab
yuav muab pov haum muaj nqes los ua koj cov phab ntsa.
13 HUAB TAIS yuav ua xib hwb qhia koj cov me nyuam txhua tus,
ces koj cov me nyuam yuav muaj kev nyob tiaj tus loj.
14 Koj yuav nyob ruaj nreb hauv txoj kev ncaj ncees, yuav tsis raug
kev quab yuam; koj yuav tsis ntshai dab tsi li, yuav tseg ncua kev
txhawj ntshai, nws yuav tsis txav los ze ntawm koj ntxiv.

Zaj Nyeem Tsib: HIS XAIS 55:1-11

1 Nej sawv daws uas nej nqhis dej, cia li tuaj cuag cov dej. Nej cov
tsis muaj nyiaj txiag, cia li tuaj, tuaj muas thiab tuaj noj dawb; tuaj
muas cawv thiab mis nyuj, tsis tas yuav siv nyiaj, tsis tas yuav them li.
2 Vim li cas nej thiaj siv nyiaj los muas tej yam tsis yog mov ? Vim li
cas nej siv nej cov nqe zog los muas tej yam tsis ua kom nej tsau plab?
Nej cia li mloog kuv hais, ces nej yuav tau noj tej yam zoo,
nej yuav tau tej yam qab xis nej lub ncauj.
3 Nej tig ntsej los mloog, nej tuaj cuag kuv; nej mloog ces nej thiaj
yuav muaj txoj sia. Kuv yuav rov nrog nej cog ib lo
lus nyob mus li kom tau ua raws li kuv tau hais ruaj tias
yuav pub tej yam zoo rau Das Vis lawm.
4 Kuv tau tsa Das Vis ua ib tug tim khawv rau cov haiv neeg,
ua ib tug ntaus thawj thiab ib tug tswj cov haiv neeg.
5 Koj yuav hu ib haiv neeg uas koj tsis paub, ib haiv neeg uas koj tsis
paub yuav khiav tuaj cuag koj, vim muaj HUAB TAIS koj tus Tswv Ntuj,
vim His Xas Lais tus Ntshiab tau ua kom koj nto koob meej.
6 Nej yuav nrhiav HUAB TAIS thaum nej tseem nrhiav tau nws,
nej yuav hu nws thaum nws tseem nyob ze.
7 Tus siab phem yuav tsum tso nws txoj kev phem tseg, tus siab
nkhaus yuav tsum tso nws lub tswv yim lim hiam tseg. Nws yuav tig
rov los cuag HUAB TAIS, tus yuav khuv leej nws, tig los cuag peb tus
Tswv Ntuj, uas nws muaj lub siab puv nkaus txoj kev zam txhaum.
8 Nej zaj tswv yim tsis zoo li kuv zaj, nej txoj kev tsis zoo
li kuv txoj kev, HUAB TAIS ceeb toom li ntawd.
9 Ib yam li lub ntuj nyob siab dua lub ntiaj teb,
ib yam li ntawd kuv tej kev nyob siab dua nej tej kev,
thiab kuv zaj tswv yim nyob siab dua nej zaj tswv yim.
10 Ib yam li cov nag thiab cov daus uas poob saum ntuj los, lawv
tsis rov mus saum ntuj ua ntej lawv yuav tsum xub ywg lub ntiaj teb
tso, ua kom av zoo thiab kom cov noob tuaj taus, thiaj yuav tau
noob ntxiv rau tus tseb noob, thiab thiaj tau mov los noj.
11 Lo lus tawm ntawm kuv lub ncauj los kuj zoo ib yam li ntawd thiab,
nws tsis rov los cuag kuv, yog nws ua num tsis tiav,
los yog nws tsis tau leg qhov kuv xav kom ua,
thiab tsis tau ua tiav qhov kuv xa nws mus ua.

Zaj Nyeem Rau NPAS LWS 3:9-15, 32- 4:4
9 His Xas Lais, koj mloog cov lus qhia uas yuav pub tau txoj sia rau
yus, cuab pob ntseg mloog kom koj thiaj muaj kev txawj ntse.
10 Vim li cas, His Xas Lais, koj thiaj nyob hauv koj cov yeeb ncuab
lub teb chaws, koj thiaj laus zuj zus nyob hauv pej kum teb?
11 Vim li cas koj kov cov tuag ua kom koj tsis huv, cas luag thiaj
muab koj suav nrog cov uas twb yuav mus lawm ntuj txias teb tsaus?
12 Yog vim koj tau muab lub hauv paus
muaj kev thoob tsib tso pov tseg lawm.
13 Yog tias koj lam tau taug raws Tswv Ntuj txoj kev,
ces koj twb tau nyob thaj yeeb lug mus li lawm.
14 Koj yuav tsum kawm saib txoj kev txawj ntse nyob qhov twg, lub
zog nyob qhov twg, txoj kev to taub nyob qhov twg, ces koj thiaj yuav
paub txog tias lub neej nyob ntev niaj ntau xyoo thiab txoj sia nyob qhov
twg, lub qhov muag qhov pom kev thiab kev thaj yeeb nyob qhov twg.
15 Tiam sis yog leej twg thiaj nrhiav tau kev thoob tsib qhov chaw nyob,
leej twg thiaj nkag tau rau hauv nws txhab nyiaj?
32 Yog tus uas paub tas ib puas tsav yam thiaj paub nws,
thiaj muaj txoj kev ntse tsom tshab hauv nws – yog tus uas tau teeb
lub ntiaj teb kom nyob ruaj nreb mus li thiab tau tso cov
tsiaj muaj plaub txhais tes taw los nyob puv ntiaj teb.
33 Nws xa qhov pom kev mus, ces qhov pom kev mus; nws kom qhov
pom kev rov los, ces qhov pom kev tshee na mloog nws lus.
34 Yog tus uas ua kom cov hnub qub zoo siab ci
ntsais tsias nyob ntawm lawv qhov chaw;
35 Thaum nws hu lawv, lawv teb tias: “Peb nyob ntawm no;”
lawv ci ua kom tus Tsim lawv zoo siab.
36 Nws yog peb tus Tswv Ntuj, tsis muaj lwm tus yuav piv tau rau nws.
37 Nws tau tho txoj kev txawj ntse kom thoob tas thiab tau muab qhia rau
nws tus tub txib Yas Kos, qhia rau His Xas Lais, tus uas nws nyiam.
38 Txij thaum ntawd los txoj kev txawj ntse thiaj tshwm nyob
ntiaj teb thiab mus mus los los nyob hauv ib tsoom neeg.
4 1 Nws yog phau ntawv uas qhia txog Tswv Ntuj tej cai lij choj,
txoj cai uas nyob mus li; cov uas coj raws txoj cai ntawd
yuav ciaj, cov uas tsis coj raws yuav tuag.
2 Yas Kos, tig rov qab, cia li ntsiab nkaus txoj cai los,
kom nws qhov ci tsom koj txoj kev mus txog qhov pom kev.
3 Koj tsis txhob cia koj lub hwj chim poob rau lwm tus, tsis txhob
cia yam koj muaj poob rau ib haiv neeg uas tsis yog koj haiv.
4 His Xas Lais, peb muaj hmoov zoo kawg,
vim peb paub txog yam uas xis Tswv Ntuj siab lawm.

Zaj Nyeem Xya: ES XES KIAS 36:16-17A, 18-28

16 HUAB TAIS lo lus nrov tuaj rau kuv li no : 17a Neeg leej tub, thaud,
tsoom His Xas Lais nyob txawm hauv lawv teb chaws, tiam sis lawv tus
yam ntxwv thiab lawv tej hauj lwm ua kom lawv lub teb chaws qias tas.
18 Kuv thiaj tau cia kuv lub siab npau taws rau lawv, vim lawv ua kom
neeg roj ntsha ntws nyob hauv lawv teb chaws, lawv muab tej
tus mlom dab los ua kom lawv teb chaws qias.
19 Kuv ua kom lawv sib ncaim mus nyob hauv cov kuj cuab,
kuv muab lawv faib mus rau ntau lub teb chaws. Kuv tau rau txim
rau lawv raws lawv tus yam ntxwv thiab lawv tes dej num.
20 Lawv tau thuam kuv lub npe ntshiab nyob hauv cov haiv neeg
uas lawv mus nyob nrog, ua kom cov neeg ntawd hais tias :
“Lawv yog HUAB TAIS haiv neeg; nws muab
lawv ntiab tawm hauv nws lub teb chaws mus."
21 Tab sis kuv xav txuag kuv lub npe ntshiab, uas His Xas Lais
ua kom puas rau hauv cov kuj cuab ua lawv mus nyob.
22 Li ntawd koj mus hais rau tsoom His Xas Lais tias :
"HUAB TAIS peb tus Tswv hais li no: His Xas Lais tsev neeg, tsis yog
vim nej ces kuv thiaj ua li no, tiam sis yog vim kuv lub npe ntshiab
uas nej tau thuam nyob hauv cov kuj cuab uas nej tuaj nyob.
23 Kuv yuav ua kom kuv lub npe loj ntshiab tuaj, vim nej tau ua kom
kuv lub npe puas nyob hauv cov kuj cuab uas nej thuam kuv lub npe.
Ces cov kuj cuab thiaj yuav paub tias kuv yog HUAB TAIS -
tus Tswv HUAB TAIS hais li - thaum kuv ua kom kuv txoj kev
ntshiab tshwm tuaj nyob hauv nej rau lawv qhov muag pom.
24 Vim kuv yuav thau nej hauv cov kuj cuab los,
kuv yuav sau nej ntawm lwm teb los nyob ua ke,
kuv yuav coj nej rov los nyob hauv nej thaj av.
25 Kuv yuav hliv dej ntshiab los ntxuav nej, ces nej yuav huv tuaj;
kuv yuav ntxuav tej yam qias ntawm nej tawm thiab
yuav tshem nej tej dab mlom pov tseg kom nej huv tuaj.
26 Kuv yuav muab ib lub siab thiab ib lub tswv yim tshiab rau nej;
kuv yuav dawj nej lub siab tawv li zeb hauv nej lub cev
tawm thiab yuav cog ib lub siab muag li nqaij rau nej.
27 Kuv yuav muab kuv lub tswv yim rau hauv nej, kom nej coj raws
kuv txoj cai, thiab kom nej hwm thiab yoog raws tej kev kuv tau txiav.
28 Nej yuav tau nyob hauv lub teb chaws uas kuv muab rau
nej phaj txiv thiab phaj yawg. Nej yuav yog kuv
haiv neeg, kuv yuav yog nej tus Tswv Ntuj."

Tsab Ntawv: LOS MAS 6:3-11

3 Peb cov uas tau txais lub Cim Ntxuav nyob hauv Yes Xus Pleev,
mas yog peb txais lub Cim Ntxuav nyob hauv Yes Xus txoj kev tuag.
4 Thaum peb txais lub Cim Ntxuav peb nrog Yes Xus tuag,
peb nrog nws mus hauv nws lub ntxa.
5 Ua li mas peb yuav coj ib lub neej tshiab xws li Leej Pleev sawv
hauv yeeb ceeb rov los, vim Leej Txiv lub hwj huam tau tsa nws.
6 Peb nrog Leej Pleev koom. Peb nrog Leej Pleev tuag, peb thiaj
yuav nrog nws sawv rov los. Peb paub tseeb tias peb muab peb
tus qub neeg nrog Yes Xus ntsia saum ntoo cuam,
vim peb xav muab peb lub cev xib rau kev txhaum tua.
Mas peb thiaj tsis ua kev txhaum cov qhev ntxiv.
7 Vim tias tus neeg tuag, tsis zwm rau txoj kev txhaum ntxiv.
8 Tab sis, yog peb nrog Leej Pleev tuag mas
peb ntseeg tias peb yuav nrog nws muaj txoj sia.
9 Peb paub tias Leej Pleev sawv hauv qhov tuag los lawm,
nws yuav tsis rov tuag dua, txoj kev tuag tsis
muaj cuab kav tuaj raug nws ib zaug ntxiv.
10 Nws tuag ib zaug kom txoj kev txhaum tuag.
Nyem no, nws ciaj rov los nws npuab Tswv Ntuj mus li.
11 Nej, mas nej kuj zoo li ntawd thiab : nej yuav saib tias nej tus
neeg txhaum tuag lawm, tshuav nej tus neeg tshiab npuab Tswv
Ntuj uas muaj txoj sia nyob hauv Huab Tais Yes Xus Pleev mus li.

Ntawv Moo Zoo: MK 16:1-7

1 Dhau hnub Xas Npas Tos lawm, Mab Liab Mas Ntas Las,
Mab Liab uas yog Yas Kos niam, thiab Xas Los Mes lawv muas
ib co tshuaj pleev neeg tuag coj mus pleev Yes Xus lub cev.
2 Hnub chiv lub lis piam sawv ntxov, thaum lub hnub
nyuam qhuav tawm tuaj, lawv mus tom ntxa.
3 Lawv sib tham tias : “Leej twg yuav dov
daim txiag zeb kaw rooj ntxas rau peb ?”
4 Lawv tsa muag ntsia, lawv pom tias daim txiag zeb twb
dov rau ib sab lawm : daim txiag zeb ntawd loj kawg.
5 Lawv nkag mus hauv ntxa, lawv pom ib tug hluas zaum sab xis,
nws hnav ib lub tsho dawb ntev, lawv ntshai tas nrho.
6 Tab sis tus hluas hais rau lawv tias : "Nej txhob ntshai !
Nej nrhiav Yes Xus Nas Xas Les, tus uas luag muab tua saum
ntoo cuam : nws sawv rov los lawm, nws tsis nyob ntawm no.
Saib qhov chaw no, yog lub chaw lawv tso nws lub cev.
7 Nej mus hais rau nws cov thwj tim thiab hais rau Pob Zeb tias,
nws ua nej ntej mus Nkas Lis Lais : nej yuav pom
nws nyob ntawd, raws li nws tau hais rau nej."

COV ZAJ NYEEM HNUB TIM   05/04/ 2015

Hnub Chiv Hla – Thaj Txi Ntuj Yes Xus Sawv Rov Los

Zaj Nyeem Ib:   HAUJ LWM   10:34A, 37-43


34 Ces Pob Zeb pib hais tias :
37 Nej twb tau hnov txog tej xwm uas tshwm sim tuaj nyob hauv
xeev Yus Das : yam li thaum Zam tshaj tias sawv daws
yuav txais lub cim ntxuav, mas nej kuj hnov hais txog Yes Xus
nyob Nas Xas Les. Nws pib qhia hauv xeev Nkas Lis Lais.
38 Tswv Ntuj tau pleev nws. Tswv Ntuj muab Leej Ntuj Plig Ntshiab
thiab muab hwj huam rau nws. Nws mus ncig teb ncig chaw,
nws ua zoo rau sawv daws. Nws kho cov neeg poob hauv
dab phem tes kom lawv zoo. Vim Tswv Ntuj nrog nws nyob.
39 Peb ua tim khawv pom tas puas tsav yam Yes Xus tau ua nyob
hauv cov Yus Das lub teb chaws thiab nyob Yes Lus Xas Les.
Cov Yus Das tau ua phem rau nws : lawv muab
nws dai saum ib tug ncej kom nws tuag.
40 Tab sis, hnub tim peb, Tswv Ntuj tsa nws sawv
rov qab los lawm thiab pub kom nws tawm los xyuas
cov tim khawv uas nws xub tau xaiv ua ntej.
41 Tsis yog tas tsoom pej xeem tau pom nws. Cov tau
pom nws yog peb. Thaum nws sawv hauv cov tub tuag rov los,
mas peb tau nrog nws noj thiab haus ua ke.
42 Nws qhia peb kom peb tshaj rau tsoom pej xeem thiab ua
pov thawj zeem tias nws yog tus uas Tswv Ntuj
tsa los txiav txim rau cov neeg ciaj thiab cov neeg tuag.
43 Tas cov yaj saub ua tim khawv txog Yes Xus tias leej
twg ntseeg txog nws, mas leej twg cov txhaum
yuav daws tas nyob hauv nws lub npe."

Zaj Nyeem Ob:   KOS LOS XAIS   3:1-4

1 Nej pom xeeb nrog Leej Pleev sawv rov los lawm,
mas nej nrhiav tej yam nyob txheej saud, vim txheej saud yog Leej
Pleev qhov chaw nyob, nws zaum ntawm Tswv Ntuj phab xis.
2 Nej lub siab yuav dai dhuam rau tej yam nyob txheej saud,
txhob dai rau tej yam nyob ntiaj teb no.
3 Vim tias, nej tuag lawm, hos nej txoj sia nrog
Leej Pleev tsiv nraim hauv Tswv Ntuj.
4 Leej Pleev yog nej txoj sia : thaum nws yuav tawm los rau pom xyeem,
mas nej kuj yuav nrog nws tawm los muaj hwj chim.

Los:    1 KOS LIS NTHOS   5:6B-8

6b  Nej puas paub tias, ib qho poov xab me me
ua kom tas cov hmoov nplej su tuaj ?
7 Nej ntxuav cov poov xab qub uas lo nej pov tseg,
kom nej txia ua ib co hmoov nplej nkos tshiab, ua cov mov tsis xyaw
poov xab. Vim peb txoj kev Hla, yog Leej Pleev, uas nws tuag txi Ntuj.
8 Li ntawd peb ua lub Ntees Hla, peb tsis txhob yuav cov qub poov
xab, peb tsis txhob yuav ib co poov xab tsim kev phem. Peb yuav
ua cov mov tsis xyaw poov xab, uas tsim kev huv thiab kev tseeb.

Ntawv Moo Zoo:    ZAM   20:1-9


1 Thawj hnub pib lub lis piam, thaum sawv ntxov, ntuj tsis tau kaj,
Mab Lias Mas Ntas Las mus tom ntxa. Nws pom
daim txiag zeb tshem ntawm lub ntxa lawm.
2 Mab Liab Mas Ntas Las khiav mus cuag Xis Moos Pob Zeb thiab
lwm tus thwj tim, uas yog tus Yes Xus nyiam. Nws hais rau nkawd
tias : "Lawv nqa Huab Tais tawm hauv ntxa lawm,
peb tsis paub xyov lawv coj nws mus tso qhov twg lawm."
3 Pob Zeb tawm plaws mus, lwm tus thwj tim
kuj tawm plaws thiab, nkawd mus tom ntxa.
4 Nkawd ob leeg ua ke khiav mus, tab sis lwm tus thwj tim khiav
nrawm dua Pob Zeb, nws khiav ua ntej, nws xub mus txog tom ntxa.
5 Nws khoov mus xauj, nws pom tej hlab ntaub nyob ntawd ;
tab sis nws tsis chaws mus hauv.
6 Ces Xis Moos Pob Zeb lawv tus thwj tim qab mus txog,
nws chaws mus hauv lub ntxa. Nws pom cov hlab ntaub nyob ntawd,
7 hos daim ntaub qhwv taub hau kauv cia
nyob lwm qhov, tsis xyaw cov hlab ntaub.
8 Ces lwm tus thwj tim uas xub mus txog ntawm lub ntxa
mam li chaws mus hauv. Nws pom ces nws ntseeg.
9 Vim lawv tseem tsis tau to taub tias Yes Xus
yuav sawv hauv cov tuag rov los raws li Ntawv qhia.

COV ZAJ NYEEM HNUB TIM   12/04/ 2015

Hnub Chiv  Ob  lub  Caij  Hla  -  Hnub Teev Tswv Ntuj txoj Kev Khuv Leej

Zaj Nyeem Ib:    HAUJ LWM   4:32-35

32 Tas ib tsoom ntseeg coob coob sawv daws muaj ib lub siab,
ib lub tswv yim xwb. Tej yam uas yog nws li,
tsis kav tsis muaj leej twg yuav hais tias yog nws tug xwb.
Nyias muab nyias tug los ua sawv daws tug.
33 Cov Hauv Paus Xa Lus muaj hwj huam loj, lawv ua tim khawv
txog Huab Tais Yes Xus sawv rov los. Tsoom sid hwm lawv zoo kawg.
34 Nyob hauv lawv, tsis muaj ib tug yuav tshaib nqhis dab tsi :
vim tias cov uas muaj liaj muaj teb, muaj vaj tse, muab muag tas huv si,
35 lawv nqa tus nqi uas muag tau tuaj tso ntawm cov
Hauv Paus Xa Lus ko taw. Lawv mam muab faib rau
sawv daws kom nyias tau txaus nyias siv.

Zaj Nyeem Ob:    1 ZAM  5: 1-6

1 Leej twg ntseeg tias Yes Xus yog Leej Pleev, mas tus ntawd
tawm ntawm Tswv Ntuj los. Leej twg nyiam Leej Txiv,
mas nws kuj nyiam tus tawm ntawm Leej Txiv los thiab.
2 Li ntawd, peb paub tias peb nyiam Tswv Ntuj cov me nyuam,
yog peb nyiam Tswv Ntuj, thiab peb coj nws cov lus qhia.
3 Vim kev nyiam Tswv Ntuj yog li no,  kom peb coj nws cov lus qhia.
Tswv Ntuj cov lus qhia yeej tsis ua nra rau peb.
4 Vim leej twg tawm ntawm Tswv Ntuj los, mas nws yeej lub ntiaj teb.
Txoj kev yeej lub ntiaj teb yog peb txoj kev ntseeg.
5 Leej twg thiaj yeej lub ntiaj teb? Tsuas yog tus ntseeg
tias Yes Xus yog Tswv Ntuj Leej Tub xwb thiaj yeej.
6 Tus tawm hauv dej thiab ntshav los yog Yes Xus.
Nws tsis tawm hauv dej xwb, nws tawm hauv dej
thiab ntshav los, yog Leej Ntuj Plig ua tim khawv zeem
qhov ntawd, vim Leej Ntuj Plig yog qhov tseeb.

Ntawv Moo Zoo:     ZAM  20:19-31

19 Tib hnub ntawd thaum tsaus ntuj, uas yog thawj hnub pib
lub lis piam, cov qhov rooj hauv qhov chaw cov thwj tim nyob
kaw tas, vim lawv ntshai cov Yus Das. Yes Xus los sawv
hauv nruab nrab, nws hais rau lawv tias : "Nej nyob kaj lug."
20 Thaum Yes Xus hais lo lus ntawd tas, nws muab nws
ob txhais tes thiab nws phab tav rau lawv saib.
Cov thwj tim pom Huab Tais, lawv zoo siab kawg.
21 Yes Xus rov hais rau lawv tias : "Nej nyob kaj lug !
Kuv xa nej mus xws li Leej Txiv xa kuv tuaj."
22 Yes Xus hais li tas, nws tshuab pa rau lawv,
nws hais rau lawv tias : "Nej txais Leej Ntuj Plig Ntshiab.
23 Nej daws txhaum rau leej twg, mas nws cov txhaum yuav daws.
Nej tsis daws leej twg cov txhaum, mas nws cov txhaum yuav nyob."
24 Tos Mas yog ib tug hauv pab Kaum Ob,
nws tseem hu ua Dis Dws Mos thiab. Thaum Yes Xus
tawm los, mas nws tsis nrog cov thwj tim nyob.
25 Lwm cov thwj tim hais rau nws tias : "Peb pom Huab Tais lawm !"
Ces Tos Mas hais rau lawv tias : "Yog kuv tsis pom lub qhov txhab
ntsia hlau nyob hauv nws ob txhais tes, yog kuv tsis muab kuv tus
ntiv tes ntxig lub qhov ntsia hlau, thiab yog kuv tsis muab
kuv txhais tes rau ntawm nws phab tav, mas kuv tsis ntseeg."
26 Yim hnub tom qab, cov thwj tim rov nyob hauv tsev dua.
Tos Mas kuj nrog lawv nyob thiab. Cov qhov rooj puav leej kaw tas.
Yes Xus tawm los sawv hauv nruab nrab,
nws hais rau lawv tias : "Nej nyob kaj lug !"
27 Ces Yes Xus hais rau Tos Mas tias : "Cev koj ntiv tes rau ntawm no,
koj ntsia kuv ob txhais tes. Cev koj txhais tes los, muab rau hauv kuv
phab tav. Koj txhob ua neeg tsis ntseeg ntxiv, koj ntseeg mog."
28 Tos Mas teb rau Yes Xus tias : "Kuv tus Huab Tais, Kuv tus Tswv Ntuj."
29 Yes Xus hais rau Tos Mas tias : "Vim koj pom kuv,
mas koj thiaj ntseeg. Cov uas tsis tau pom
tab sis lawv ntseeg, mas lawv txoj hmoov zoo."
30 Yes Xus tseem tau ua lwm cov cim ntau nyob ntawm cov thwj
tim xub ntiag, uas tsis tau muab sau rau hauv phau ntawv no.
31 Tau muab cov cim no sau tseg kom nej ntseeg tias
Yes Xus yog Leej Pleev, Tswv Ntuj Leej Tub. Nej ntseeg
ces nej yuav muaj txoj sia nyob hauv nws lub npe.

COV ZAJ NYEEM HNUB TIM   19/04/ 2015

Hnub Chiv Peb Caij Hla Xyoo B

Zaj Nyeem Ib:     HAUJ LWM    3:13-15, 17-19

Pob Zeb hais rau lawv tias:
13 Yog Has Nplas Has, His Xas Has, thiab Yas Kos tus Tswv Ntuj,
thiab peb cov yawg koob tus Tswv Ntuj muab koob meej
rau nws tus tub txib Yes Xus, uas nej muab nws ntes.
Thaum Pis Las Tos xav tso nws mus, mas nej tsis kam lees nws.
14 Nej tsis lees tus siab Ntshiab thiab siab Ncaj.
Nej thov kom luag tso ib tug neeg tua neeg rau nej.
15 Hos nej muab tus Tswv pub txoj sia tua. Tiam sis Tswv Ntuj tsa
nws sawv hauv cov tub tuag rov los lawm. Peb ua tim khawv pom.
17 Kwv tij, kuv paub zoo hais tias thaum nej ua li ntawd,
nej yeej tsis paub dab tsi, nej cov coj los kuj tsis paub li thiab.
18 Li ntawd, Tswv Ntuj ua raws li nws tau siv cov Yaj Saub lub ncauj
xub hais ntxov los tias nws Leej Pleev yuav raug luag tsim txom.
19 Ua li mas nyem no, nej yuav thov txhaum thiab nej yuav tig los
yuav ib lub siab tshiab kom Ntuj so nej cov txhaum pov tseg.

Zaj Nyeem Ob:       1 ZAM 2:1-5A

1 Kuv cov me nyuam, kuv sau tej yam ntawd tuaj rau nej, kom nej
tsis txhob ua txhaum. Tiam sis yog muaj ib tug tau ua txhaum lawm,
los peb muaj ib tug cev lus rau peb nyob ze Leej Txiv,
yog Yes Xus Pleev, tus siab ncaj.
2 Nws nws muab nws los ua nqi txhiv peb ntawm peb cov txhaum.
Tsis yog txhiv peb xwb, nws txhiv tas lub qab ntuj
neeg ntawm lawv cov txhaum huv tib si.
3 Qhov ua kom peb pom tias peb paub nws
yog qhov no: yog peb coj nws cov lus qhia.
4 Tus hais tias : “Kuv paub nws,” tab sis twb tsis coj nws cov lus qhia,
mas yog ib tug neeg dag, qhov tseeb tsis nyob hauv nws.
5 Hos tus coj nws lo lus, mas tus ntawd muaj txoj
kev nyiam Tswv Ntuj zoo kawg nkaus nyob hauv nws.

Ntawv moo Zoo:        LK 24:  35-48

35 Ob tug thwj tim piav qhov uas tshwm tuaj nyob tom kev,
thiab piav tias Huab Tais ua dab tsi, nkawd thiaj zeem tau
nws thaum nws ntais lub ncuav mov.
36 Thaum lawv tseem sib tham txog tej lus ntawd, Yes Xus sawv ntsug
hauv nruab nrab lawv, nws hais rau lawv tias : "Nej nyob kaj lug."
37 Cov thwj tim ceeb nkaus, lawv ntshai kawg,
lawv xav tias lawv pom ib tug dab.
38 Ces Yes Xus hais rau lawv tias : "Vim li cas nej poob siab ? Vim li cas
tej zaj ua xyem xyav li ntawd sawv los nyob hauv nej lub siab ?
39 Nej ntsia kuv ob txhais tes thiab ob txhais taw :
yog kuv tiag ! Nej xuas kuv saib ! Nej ntsia mas : dab tsis muaj
nqaij tsis muaj pob txha, xws li nej pom kuv muaj."
40 Yes Xus hais li ntawd tas, nws muab
nws ob txhais tes ob txhais taw rau lawv saib.
41 Lawv zoo siab dhau, lawv tseem tsis tau xav ntseeg. Lawv yoob tas.
Yes Xus hais rau lawv tias : "Nyob ntawm no, nej muaj dab tsi noj ?"
42 Lawv muab ib ya ntses txhiab rau Yes Xus.
43 Yes Xus tuav, nws noj yav ntses ntawd nyob ntawm lawv xub ntiag.
44 Yes Xus hais rau lawv tias : "Thaum kuv tseem nrog nej nyob,
kuv hais cov lus no rau nej : Tas ib puas tsav yam uas Mais Xes
Txoj Cai, cov Yaj Saub, thiab cov Nkauj Paj Nruag
sau txog kuv, yuav tsum tshwm sim kom tiav."
45 Ces Yes Xus qhib lawv lub tswv yim kom lawv to taub Ntawv.
46 Nws hais rau lawv tias : "Ntawv sau hais tias Leej Pleev yuav raug
luag tsim txom. Hnub peb, nws yuav sawv hauv cov tuag rov los.
47 Thiab Ntawv tseem hais tias yuav tsum tshaj txoj kev tig los hloov
siab ntxub kev txhaum kom Ntuj zam txhaum rau ib tsoom haiv neeg
nyob hauv Leej Pleev lub Npe. Yuav xub tshaj nyob Yes Lus Xas Les.
48 Nej yuav ua tim khawv txog tej ntawd.

Zaj Nyeem Ib: Hauj Lwm 4: 8-12

8 Ces Pob Zeb muaj Leej Ntuj Plig nyob puv hauv nws,
nws hais rau lawv tias : "Cov nom tswv coj
tsoom pej xeem, thiab tsoom laus neeg sawv daws :
9 Hnub no, nej kom wb hais tseeb txog qhov tias ib tug
tuag ceg zoo lawm, thiab tim li cas nws thiaj li zoo lawm.
10 Nej sawv daws, thiab tas tsoom His Xas Lais huv tib si,
nej yuav tsum paub tias yog nyob hauv Yes Xus Pleev lub npe,
tus Yes Xus Nas Xas Les uas nej muab dai saum ntoo cuam,
tab sis Tswv Ntuj tsa nws sawv hauv cov tub tuag rov los lawm,
yog nyob hauv nws lub npe tsis yog lwm tus npe,
tus neeg no thiaj sawv zoo hlo li no rau nej pom.
11 Yes Xus yog lub pob zeb uas nej cov txhim tsev muab pov tseg,
zaum no nws yog thawj lub pob zeb txheem lub tsev.
12 Kev cawm neeg tsuas muaj nyob hauv nws ib leeg xwb,
vim nyob hauv tas lub qab ntuj khwb tsis muaj
dua lwm lub npe yuav cawm tau peb lawm."

Zaj Nyeem Ob:       1 Zam 3: 1-2

1 Nej ntsia saib, Leej Txiv txoj kev hlub peb loj tas npaum no ,
nws thiaj cia peb hu ua Tswv Ntuj cov me nyuam,
thiab peb yeej yog Tswv Ntuj cov me nyuam tiag ! Tos lub ntiaj teb
neeg tsis paub peb los vim nws twb tsis paub Leej Txiv li.  
2 Cov zoo nyiam, nyem no peb yog Tswv Ntuj cov me nyuam lawm.
Qhov uas yav tom ntej peb yuav plhis mus zoo li cas, tseem tsis tau
tawm los rau peb pom. Peb paub zoo tias, thaum nws tawm tuaj, mas
peb yuav zoo li nws, vim nws zoo li cas, peb yuav pom Nws zoo li ntawd.

Ntawv Moo Zoo:  Zam 10:11-18

11 Kuv yog tus zoo tswv zov yaj. Tus zoo tswv
zov yaj siv nws txoj sia rau nws cov yaj.
12 Tus ntiav zog zov yaj, nws tsis yog tswv, cov yaj tsis yog nws li,
thaum nws pom hma tuaj, nws tso cov yaj pov tseg, nws khiav lawm.
Hma muab cov yaj kwv mus, ua pab yaj tawg tas.
13 Vim nws tsuas yog tus ntiav zog zov yaj xwb,
nws tsis txhawj dab tsi txog cov yaj.
14 Kuv yog tus zoo tswv zov yaj. Kuv paub
kuv cov yaj, kuv cov yaj paub kuv,
15 ib yam li Leej Txiv paub kuv thiab kuv paub Leej Txiv.
Kuv siv kuv txoj sia rau kuv cov yaj.
16 Kuv tseem muaj ib co yaj uas tsis nyob hauv lub vaj no.
Kuv yuav tsum coj cov ntawd los thiab. Lawv yuav mloog kuv lub suab,
ces yuav muaj ib pab yaj, thiab ib tug tswv zov yaj xwb.
17 Tos Leej Txiv nyiam kuv, yog vim kuv muab kuv txoj sia rau luag,
thiab kuv kuj muab tau kuv txoj sia rov los.
18 Tsis muaj leej twg txo kuv txoj sia, yog kuv txaus siab muab pub.
Kuv muaj peev xwm siv tau kuv txoj sia, thiab muaj peev xwm
muab tau kuv txoj sia rov los : Qhov no yog
lo lus qhia kuv txais ntawm kuv Txiv los."

COV ZAJ NYEEM HNUB TIM   03/05/ 2015

Hnub Chiv Tsib Caij Hla Xyoo B

Zaj Nyeem Ib: HAUJ LWM  9: 26-31

26 Thaum Xauv tuaj txog Yes Lus Xas Les lawm,
nws xav mus nrog cov thwj tim sib koom. Tab sis sawv daws
ntshai nws, lawv tsis ntseeg tias nws yog ib tug thwj tim tiag.
27 Ces Npas Nas Npes thiaj coj Xauv mus cuag cov Hauv Paus Xa Lus.
Nws piav rau lawv txog qhov Xauv tau pom Huab Tais hais lus
rau nws ntawm kev, thiab piav tias Xauv muaj peev xwm tshaj
Yes Xus lub npe nyob Das Mas, nws tsis ntshai.
28 Txij hnub ntawd los, Xauv nrog cov Hauv Paus Xa Lus mus mus los
los hauv Yes Lus Xas Les. Nws muaj lub siab
tawv qhawv tshaj lus qhia txog Yes Xus lub npe.
29 Nws hais lus rau cov Hes Las, nws nrog lawv tham.
Tab sis lawv nrhiav kev kom tau muab nws tua.
30 Cov kwv tij hnov li ntawd, mas lawv coj Xauv mus rau Xes Ntxas Les,
ces lawv xa nws ntawm Xes Ntxas Les mus rau Tas Xis.
31 Lub caij ntawd, cov Koom Txoos nyob hauv xeev Yus Das,
Nkas Lis Lais, thiab Xas Mas Lias tau nyob thaj yeeb.
Sawv daws txhim cov Koom Txoos, thiab sawv daws
taug txoj kev hwm Huab Tais. Leej Ntuj Plig Ntshiab
nplij cov Koom Txoos, ces lawv huam vam.


Zaj Nyeem Ob: 1 ZAM 3:18-24

18 Cov me nyuad, peb tsis txhob sib nyiam ntawm lo lus
los ntawm lub ncauj xwb, peb ua kiag tej yam
hauj lwm los sib nyiam thiaj li yog qhov tseeb.
19 Peb ua li ntawd, peb thiaj yuav paub tias peb nyob
hauv qhov tseeb. Thiab peb lub siab thiaj yuav nyob
tiaj tus nyob ntawm Tswv Ntuj xub ntiag
20 yog tias peb lub siab rov muab txim rau peb, vim Tswv Ntuj
loj tshaj peb lub siab thiab nws paub tas puas tsav yam.
21 Cov zoo nyiad, yog peb lub siab tsis muab txim rau peb,
mas peb tso siab lug rau Tswv Ntuj.
22 Yog peb thov yam twg ntawm nws, mas peb yuav tau txais yam
ntawd, vim peb coj nws cov lus qhia, thiab peb ua xis nws siab.
23 Tswv Ntuj Lo Lus qhia yog li no : kom peb ntseeg
txog nws Leej Tub Yes Xus Pleev lub npe,
thiab peb yuav sib nyiam sib hlub raws li nws qhia kom peb ua.
24 Tus coj Tswv Ntuj cov lus qhia, nws nyob hauv Tswv Ntuj thiab
Tswv Ntuj nyob hauv nws. Peb paub tias Tswv Ntuj nyob hauv peb,
vim muaj Leej Ntuj Plig uas Tswv Ntuj pub rau peb.

Ntawv Moo Zoo: ZAM  15: 1-8



1 "Kuv yog tsob tseem txiv cawv. Kuv Txiv yog tus tswv teb txiv cawv.
2 Nyob hauv kuv, txoj hmab twg tsis txi txiv, kuv Txiv muab txiav pov
tseg. Txoj hmab twg txi txiv, kuv Txiv tav nws ntsis kom txi ncw dua.
3 Kuv Txiv twb tav nej lub ntsis lawm, vim lo lus kuv tau hais rau nej.
4 Nej nyob hauv kuv, ib yam li kuv nyob hauv nej.
Yog nej tsis nyob hauv kuv, mas nej txi tsis taus txiv,
xws li txoj hmab uas tsis txuas rau tus kav, mas nws txi tsis taus txiv.
5 Kuv yog tsob txiv cawv, nej yog cov ceg. Tus uas nyob
hauv kuv thiab kuv nyob hauv nws, mas nws txi txiv ncw.
Yog nej ncaim ntawm kuv, nej ua tsis tau dab tsi.
6 Yog leej twg tsis nyob hauv kuv, luag yuav muab nws pov tseg
rau sab nraud xws li tus ceg khaub, nws yuav qhuav. Luag yuav
sau cov ceg qhuav mus pov rau hauv hluav taws kom kub hnyiab.
7 Yog nej nyob ruaj hauv kuv, thiab kuv cov lus nyob ruaj hauv nej,
mas nej thov dab tsi, nej yuav tau raws li nej thov.
8 Qhov ua kom kuv Txiv muaj koob meej, mas yog
nej txi txiv ntau thiab nej los ua kuv thwj tim.

COV ZAJ NYEEM HNUB TIM 10/05/ 2015

Hnub Chiv Rau Caij Hla Xyoo B

Zaj Nyeem Ib: HAUJ LWM 10: 25-26, 34-35, 44-48

25 Thaum Pob Zeb tab tom yuav chaws los hauv tsev, Kos Nes Lias
tuaj tos Pob Zeb, nws txhos caug ntawm Pob Zeb ko taw, pe Pob Zeb.
26 Tab sis Pob Zeb rub nws sawv, thiab hais tias :
"Koj sawv, kuv kuj yog ib tug neeg thiab xwb."
34 Ces Pob Zeb pib hais tias : "Nyem no,
kuv paub tseeb tias Tswv Ntuj tsis kws leej twg cai.
35 Nyob hauv tas txhua haiv neeg, yog leej twg hwm Ntuj
thiab coj txoj kev ncaj, mas leej twg ntxim Tswv Ntuj siab.
44 Pob Zeb tseem tab tom hais lus, ces Leej Ntuj Plig Ntshiab
cia li nqes los rau saum cov neeg mloog Lo Lus.
45 Cov ntseeg uas nrog Pob Zeb tuaj yog ib co neeg txais lub cim
txiav lawm. Lawv pom tias Leej Ntuj Plig Ntshiab kuj nqes los rau
saum cov neeg teev pej kum dab thiab, mas lawv poob siab tas nrho.
46 Lawv hnov cov neeg ntawd hais tej hom lus txawv
cav txog Tswv Ntuj. Pob Zeb thiaj hais tias :
47 "Ua cas peb yuav pub tsis tau cov dej ua lub cim ntxuav rau
cov neeg uas tau txais Leej Ntuj Plig Ntshiab ib yam li peb ?"
48 Ces Pob Zeb kom lawv ua lub cim ntxuav rau
cov neeg ntawd nyob hauv Yes Xus Pleev lub npe.
Lawv thov kom Pob Zeb nrog lawv nyob ob peb hnub.

Zaj Nyeem Ob: 1 ZAM 4: 7-10

7 Cov zoo nyiam, peb yuav sib nyiam sib hlub mog ! Vim txoj kev
nyiam tuaj ntawm Tswv Ntuj tuaj, ua li mas tus twg nyiam,
tus ntawd yug ntawm Tswv Ntuj los, thiab nws paub Tswv Ntuj.
8 Tus tsis txawj nyiam, mas nws tsis paub Tswv Ntuj,
vim Tswv Ntuj yog txoj kev nyiam.
9 Tswv Ntuj txoj kev nyiam peb tawm los rau qhov muag
pom xyeem li no : Tswv Ntuj xa nws Leej Tub Twm Zeej
tuaj nyob ntiaj teb no, kom peb ciaj nyob hauv nws Leej Tub.
10 Nws txoj kev nyiam yog zoo li no : tsis yog peb tau nyiam
Tswv Ntuj, yog Tswv Ntuj tau nyiam peb, thiab yog nws xa
nws Leej Tub tuaj ua nqi txhiv peb ntawm peb cov txhaum.

Ntawv Moo Zoo: ZAM 15: 9-17

9 Kuv nyiam nej ib yam li Leej Txiv nyiam kuv.
Nej nyob hauv kuv txoj kev nyiam mog.
10 Yog nej coj kuv cov lus qhia, mas nej nyob ruaj hauv
kuv txoj kev nyiam, ib yam li kuv coj kuv Txiv cov lus qhia
thiab kuv nyob ruaj hauv nws txoj kev nyiam.
11 Kuv hais tej no rau nej kom kuv txoj kev kaj siab
nyob hauv nej, nej thiaj txais kev kaj siab puv nej.
12 Kuv lo lus qhia yog lo lus no : nej sis nyiam sis hlub
zoo li kuv tau nyiam tau hlub nej.
13 Tsis muaj leej twg muaj txoj kev nyiam loj dua
tus uas siv nws txoj sia rau nws cov phooj ywg.
14 Yog nej ua qhov kuv qhia nej, mas nej yog kuv cov phooj ywg.
15 Kuv tsis hu nej ua kuv cov tub txib, vim tus tub txib tsis paub qhov
uas tus tswv ua. Tab sis kuv hu nej ua phooj ywg, vim tas ib puas tsav
yam kuv hnov ntawm kuv Txiv, mas kuv qhia nej paub tas huv si.
16 Tsis yog nej xaiv kuv, yog kuv xaiv nej. Thiab yog kuv xa nej mus
kom nej txi txiv, kom nej cov txiv nyob ruaj, kom xwv nej tuav txog
kuv lub npe thov yam twg ntawm Leej Txiv, mas nws muab rau nej.
17 Lo lus qhia uas kuv muab rau nej yog kom nej sis nyiam sis hlub."

COV ZAJ NYEEM HNUB TIM  17/ 5 / 2015

NCO TXOG YES XUS NCE MUS SAUM NTUJ


HNUB CHIV XYA CAIJ HLA XYOO B

Zaj Nyeem Ib: HAUJ LWM  1: 1-11

1 Tes Os Fis Los, nyob hauv kuv thawj phau ntawv, kuv twb sau txog tas
ib puas tsav yam uas Yes Xus tau ua thiab tau qhia txij lub hauv paus los,
2 mus txog hnub uas Leej Ntuj Plig Ntshiab tau tshoj kom nws hais
nws cov lus kawg rau cov Hauv Paus Xa Lus uas nws tau xaiv,
ces nws raug nqa mus saum ntuj lawm.
3  Lawv yog cov uas muaj ntau yam zeem tseeb tias thaum nws raug luag tsim txom tas,
nws yees tawm los muaj txoj sia rau lawv pom;  nws tawm los rau lawv pom
tau plaub caug hnub, nws tham txog Tswv Ntuj lub Ceeb Tsheej rau lawv.
4 Muaj ib zaug thaum nws nrog lawv noj mov, nws hais rau lawv kom
tsis txhob tawm hauv Yes Lus Xas Les mus, kom nyob tos qhov uas Leej Txiv tau cog lus
yuav muab lawm.  Nws hais tias: "Yog Lo lus no uas nej tau hnov ntawm kuv lub ncauj:  
5 Zam ua kab ke ntxuav nyob hauv dej, hos nej, mas tshuav hnub puav ntxiv xwb,
nej yuav txais kab ke ntxuav nyob hauv Leej Ntuj Plig Ntshiab."
6 Thaum cov Hauv Paus Xa Lus nyob ua ke, lawv nug Yes Xus tias :
"Huab Tais, nyem no puas yog lub sij hawm koj yuav rov tsa tus vaj His Xas Lais ?"
7 Yes Xus hais rau lawv tias : "Tsis yog nej hauj lwm yuav paub txog lub zim txwv
thiab lub sij hawm uas Leej Txiv siv nws lub hwj huam los teem cia.
8 Tab sis nej,  mas nej  yuav txais ib lub peev xwm, uas yog Leej Tswv Yim Ntshiab
yuav nqes los rau saum nej. Ces nej yuav ua kuv cov tim khawv nyob Yes Lus Xas Les,
nyob thoob lub xeev Yus Das thiab Xas Mas Lias, mus txog puag tim npoo ntiaj teb."
9 Nws hais cov lus no tas xwb, ces nws nce siab zuj zus ntawm lawv qhov muag mus lawm;
muaj ib tw huab los thaiv ces lawv tsis pom nws ntxiv.
10 Thaum Yes Xus nce mus lawm, lawv tseem nyob hab nuv ntawd ntsia ntsoov saum ntuj,
ces cia li muaj ob tug neeg hnav dawb los sawv ntawm lawv.
11 Nkawd hais tias : "Cov meeg Nkas Lis Lais, vim li cas nej sawv ntsug ntsia ntsoov
saum ntuj zoo li no ? Tus Yes Xus uas raug nqa ntawm nej mus rau saum ntuj lawd,
nws yuav rov los zoo nkaus li nej pom nws nce mus saum ntuj thiab."

NPN 47: 2-3, 6-7, 8-9

Txais: (6) Tswv Ntuj nce saum nws lub theej kiab,
         muaj suab qw zoo siab, muaj suab hom nrov rau Huab Tais.
Los:  As les lus yas.

Txhua haiv neeg, nej npuaj teg,
nej qw suab zoo siab rau Tswv Ntuj,
vim HUAB TAIS tus nyob siab, tus zoo tshaj,
yos tus vaj loj kav tas nrho lub ntiaj teb.

Txais: (6) Tswv Ntuj nce saum nws lub theej kiab,
          muaj suab qw zoo siab, muaj suab hom nrov rau Huab Tais.
Los:   As les lus yas.

Tswv Ntuj nce saum nws lub theej kiab, muaj suab zoo sia
HUAB TAIS nce, muaj suab hom nrov.
nej hu nkauj cav txog Tswv Ntuj, nej cav txog nws,
nej hu nkauj cav txog peb tus vaj, nej cav txog nws.

Txais: (6) Tswv Ntuj nce saum nws lub theej kiab,
          muaj suab qw zoo siab, muaj suab hom nrov rau Huab Tais.
Los:   As les lus yas.

Tus vaj kav tas lub ntiaj teb yog Tswv Ntuj,
nej hu nkauj cav txog nws.
Tswv Ntuj tswj cov haiv neeg,
Tswv Ntuj zaum saum nws lub rooj ntshiab.

Txais: (6) Tswv Ntuj nce saum nws lub theej kiab,
          muaj suab qw zoo siab, muaj suab hom nrov rau Huab Tais.
Los:   As les lus yas.

Zaj Nyeem Ob: ES FES XOS  1: 17-23

Cov kwv tij nkauj muam,
17 Kuv thov kom peb tus Huab Tais Yes Xus Pleev tus Tswv Ntuj, Leej Txiv uas muaj
koob meej, pub ib lub tswv yim thoob tsib thiab txawj mem tau tej yam
uas Ntuj qhib tawm los rau nej, nej thiaj yuav paub nws tseeb tiag.
18 Kuv thov nws tso qhov pom kev tuaj kaj cov qhov muag hauv nej lub siab,
kom nej pom tias nej muaj kev tso siab loj npaum li cas vim Tswv Ntuj hu nej,
nej yuav nplua nuj kev nto koob meej npaum li cas
vim nej yuav tau nws lub cuab tam koom cov leej ntshiab,
19 thiab nws lub hwj huam loj heev tshaj npaum li cas rau peb cov ntseeg ,
raws li peb pom nws siv nws lub hwj huam  
20 Nws siv nws lub hwj huam nyob hauv Leej Pleev:  
nws tsa Leej Pleev sawv hauv cov tub tuag los thiab tsa
Leej Pleev zaum ua vaj  ntawm nws phab xis nyob saum ntuj,  
21 nyob siab tshaj txhua tus loj, txhua tus tswj muaj zog, txhua tus muaj hwj chim,  
txhua tus vaj ntxwv huab tais, thiab txhua lub npe uas hu tau,
hauv lub zim txwv tiam no mus dhau tiam yav tom ntej huv si.
22 Tswv Ntuj tso tas puas tsav yam rau hauv Leej Pleev qab xib taws thiab tsa nws
nyob rau qhov chaw siab tshaj uas yog ua lub Koom Txoos tus Hau,  
23 lub Koom Txoos yog nws lub Cev, yog qhov puv npo
nyob hauv tus uas nyob puv txhua yam txhua tsav.

Los: ES FES XOS  4: 1-13

1 Kuv yog tus raug txim vim Huab Tais, kuv thov nej,
kom nej coj ib lub neej phim txoj kev uas Ntuj tau hu nej los taug.  
2 Nej yuav ua neeg tsis muab hlob ,  ua neeg siab muag siab zoo,
ua siab ntev ib leeg txhawb ib leeg nyob hauv txoj kev nyiam.
3 Nej yuav siv zog txuag kom nej nyob sib haum koom ib lub tswv yim hauv kev thaj yeeb.
4 Tsuas muaj ib lub cev thiab ib lub tswv yim xwb, ib yam li
tsuas muaj ib txoj kev tso siab uas Ntuj hu nej los taug xwb.
5 Tsuas muaj ib tug Huab Tais, ib txoj kev ntseeg, ib lub cim ntxuav,  
6 ib tug Tswv Ntuj xwb, nws ua sawv daws Txiv,  nws nyob siab dua sawv daws,
nws nyob tas qhov txhia chaw thiab nyob hauv sawv daws.
7 Tsis kav peb nyias tau txais Ntuj lub txiaj ntsim, raws li Yes Xus Pleev pub rau nyias.
8 Li ntawd luag thiaj hais tias : ‘Nws nce mus saum qhov siab,
nws coj cov raug txim mus, nws pub paj tshab rau cov tib neeg.’
9 Lo lus tias : ‘nws nce’,  txhais tias nws kuj tau xub nqes mus puag hauv yeeb ceeb lawm thiab.
10 Tus tau nqes mus puag hauv, kuj yog tus uas tau nce mus nyob siab dua
cov txheej ntuj saud thiab. Nws ua li ntawd, mas nws thiaj nyob puv hauv txhua yam.
11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub,
ib txhia tshaj lub Moo Zoo, ib txhia ua leej choj, ib txhia ua xib hwb.
12 Yes Xus tau tsa cov neeg ntshiab ua ntau txoj kab xwm raws li no, kom lawv txhim Leej Pleev lub Cev.
13 Thaum ua qhov no tiav lawm, mas peb sawv daws yuav tsum ua ib leeg xwb,
nyob hauv txoj kev ntseeg thiab txoj kev paub Tswv Ntuj Leej Tub. Ces peb sawv daws yuav
koom ua tus tib neeg uas zoo txhij zoo txhua, uas yog Yes Xus Pleev lub Cev hlob tiav log.

Los: ES FES XOS  4: 1-7, 11-13

1 Kuv yog tus raug txim vim Huab Tais, kuv thov nej,
kom nej coj ib lub neej phim txoj kev uas Ntuj tau hu nej los taug.  
2 Nej yuav ua neeg tsis muab hlob ,  ua neeg siab muag siab zoo,
ua siab ntev ib leeg txhawb ib leeg nyob hauv txoj kev sib nyiam.
3 Nej yuav siv zog txuag kom nej nyob sib haum koom ib lub tswv yim hauv txoj kev thaj yeeb.
4 Tsuas muaj ib lub cev thiab ib lub tswv yim xwb, ib yam li
tsuas muaj ib txoj kev tso siab uas Ntuj hu nej los taug xwb.
5 Tsuas muaj ib tug Huab Tais, ib txoj kev ntseeg, ib lub cim ntxuav,  
6 ib tug Tswv Ntuj xwb, nws ua sawv daws Txiv,  nws nyob siab dua sawv daws,
nws nyob tas qhov txhia chaw thiab nyob hauv sawv daws.
7 Tsis kav peb nyias tau txais Ntuj lub txiaj ntsim, raws li Yes Xus Pleev pub rau nyias.
11 Thiab nws kuj yog tus pub kom ib txhia ua Hauv Paus Xa Lus, ib txhia ua Yaj Saub,
ib txhia tshaj lub Moo Zoo, ib txhia ua tub leej choj, ib txhia ua xib hwb.
12 Yes Xus tau tsa cov neeg ntshiab ua ntau txoj kab xwm raws li no, kom lawv txhim Leej Pleev lub Cev.
13 Thaum ua qhov no tiav lawm, mas peb sawv daws yuav tsum ua ib leeg xwb, nyob hauv
txoj kev ntseeg thiab txoj kev paub Tswv Ntuj Leej Tub. Ces peb sawv daws yuav koom ua tus
tib neeg uas zoo txhij zoo txhua, uas yog Yes Xus Pleev lub Cev hlob tiav log.

As Les Lus Yas:      MT 28: 19A, 20B

Txais: As les lus yas, as les lus yas.

Huab Tais hais tias, nej mus qhuab qhia tas txhua haiv neeg,
kuv yuav nrog nej nyob nraim mus txog thaum ntiaj teb kawg.

Txais: As les lus yas, as les lus yas.

Ntawv Moo Zoo: MK 16: 15-20


15 Yes Xus hais rau lawv tias : "Nej mus thoob qab ntuj, nej tshaj lub Moo Zoo rau txhua leej txhua tus.
16 Tus twg ntseeg thiab txais lub cim ntxuav, mas nws yuav
txais kev cawm dim, hos tus tsis ntseeg yuav raug txim.
17 Cov cim no yuav nrog cov uas ntseeg : lawv yuav hu txog
kuv lub npe los ntiab dab tau; lawv yuav hais ib co lus tshiab;
18 lawv yuav tuav tau nab ntawm lawv tes; yog lawv haus tshuaj lom neeg, tshuaj yuav tsis
ua xwv txheej rau lawv; thaum lawv tsa tes rau saum cov neeg mob, mas cov mob yuav zoo."
19  Thaum Huab Tais Yes Xus hais cov lus no tas rau lawv, nws raug nqa nce mus
saum ntuj thiab nws mus zaum ntawm Tswv Ntuj sab xis lawm.
20 Ces cov thwj tim tawm mus qhuab qhia rau tas qhov txhia chaw, Huab Tais nrog lawv lis
hauj lwm thiab nws ua ib co cim nrog los ua tim khawv txhawb Lo Lus.

COV ZAJ NYEEM HNUB TIM 17/5/2015

HNUB CHIV XYA CAIJ HLA XYOO B

COV TEB CHAWS UAS TWB UA HMOOV NCO TXOG HNUB YES XUS MUS SAUM NTUJ RAU HNUB TSIB TIM 14 LAWM, CES HNUB NO LAWV YUAV NYEEM COV ZAJ RAU HNUB CHIV XYA RAWS LI NRAM NO:

Zaj Nyeem Ib: HAUJ LWM  1: 15-17, 20A, 20C-26

15 Lub caij ntawd, Pob Zeb sawv ntsug hauv nruab nrab cov kwv tij,
- muaj ze ntawm ib puas nees nkaum leej tuaj sib txoos ua ke,  -  nws hais tias :
16 "Kwv tij sawv daws, cov lus uas sau rau hauv Ntawv Ntshiab yuav tsum tshwm sim tuaj,
raws li Leej Ntuj Plig tau siv Das Vis lub ncauj hais txog Yus Das,
uas yog tus coj luag kev tuaj ntes Yes Xus.
17 Nws yog ib tug nyob hauv peb thiab kuj tau txais ib txog hauj lwm ua xws li peb txoj thiab.
20 Ntawv Nkauj Paj Nruag sau tseg tias : ‘Cia lwm tus ua nws txoj dej num.’
21 Vim li ntawd, cov neeg uas tau nrog peb ua ke tas lub caij
Huab Tais Yes Xus nrog peb mus mus los los,
22 txij hnub Zam ua kab ke ntxuav los txog hnub uas nws raug nqa hauv peb mus lawd,
mas yuav tsum muaj ib tug los nrog peb ua tim khawv txog nws txoj kev sawv rov los."
23 Ces lawv coj tau ob leeg los, yog Yos Xes tseem hu ua Npas Xas Npas,
uas sawv daws kuj tseem hu nws ua Zus Tws, thiab Mas Thias.
24 Lawv thov Ntuj li no : "Huab Tais, koj paub tas sawv daws neeg lub siab,
thov koj qhia saib ob tug no tus twg yog tus koj xaiv  
25  kom los leg txoj dej num ua hauv paus xa lus uas Yus Das
muab tso pov tseg,  thiab khiav mus nyob nws qhov chaw lawm."  
26 Ces lawv kom nkawd rho ntawv, txoj hmoo los raug rau Mas Thias.
Lawv thiaj suav nws los ntxiv rau pab Kaum Ib leeg Hauv Paus Xas Lus.

NPN    103: 1-2, 11-12, 19-20

Txais:   (19a) HUAB TAIS tsa nws lub theej kiab rau txheej ntuj saud
los:          As les lus yas.

Kuv tus ntsuj plig, cia li cav txog HUAB TAISs,;
tas nrho kuv tus kheej, cia li cav txog nws lub npe ntshiab.
Kuv tus ntsuj plig, cia li cav txog HUAB TAISs,
thiab tsis txhob hnov qab nws tej  txiaj ntsim koob hmoov.

Txais:   (19a) HUAB TAIS tsa nws lub theej kiab rau txheej ntuj saud
los:          As les lus yas.

Siab npaum li lub ntuj nyob  saum ntiaj teb,
nws kuj hlub cov neeg uas hwm nws loj npaum li ntawd.  
Deb npaum li sab hnub tuaj nyob deb sab hnub poob,
nws tau muab peb tej txhaum pov tseg deb ntawm peb npaum li ntawd .

Txais:   (19a) HUAB TAIS tsa nws lub theej kiab rau txheej ntuj saud
los:          As les lus yas.

HUAB TAIS tsa nws lub theej kiab rau txheej ntuj saud,
nws ua vaj kav tas txhia tsav txhua yam.
Cia li cav txog Huab tais, nej uas yog nws cov Tshiab, cov muaj zog loj,
Cov ua raws nws lo lus, thiab xyiv fab mloog ntsoov nws lub suab.

Txais:   (19a) HUAB TAIS tsa nws lub theej kiab rau txheej ntuj saud
los:         As les lus yas.

Zaj Nyeem Ob: 1 ZAM 4: 11-16

11 Cov zoo nyiam, yog Tswv Ntuj nyiam peb npaum li ntawd,
mas peb kuj yuav tsum sib nyiam sib hlub thiab.
12 Tsis muaj leej twg tau pom Tswv Ntuj ib zaug li. Tiam sis yog peb sib nyiam sib hlub,
mas Tswv Ntuj nyob hauv peb, thiab nws txoj kev nyiam yuav loj hlob tiav log nyob hauv peb.
13 Qhov ua kom peb paub tias peb nyob hauv Tswv Ntuj, thiab nws nyob hauv peb
yog qhov tias nws tau pub nws Leej Tswv Yim rau peb lawm.
14 Ntawm peb, mas peb tau ntsia ntsoov, thiab peb ua tim khawv zeem tias Leej Txiv
tau xa Leej Tub tuaj cawm lub qab ntuj neeg.
15 Tus lees tias Yes Xus yog Tswv Ntuj Leej Tub,
mas Tswv Ntuj nyob hauv nws, thiab nws nyob hauv Tswv Ntuj.
16 Peb paub txog thiab peb ntseeg tias Tswv Ntuj yeej nyiam peb hlub peb.  
Tswv Ntuj yog txoj kev nyiam : tus twg nyob hauv txoj kev nyiam, mas
nws kuj nyob hauv Tswv Ntuj, thiab Tswv Ntuj nyob hauv nws.

As Les Lus Yas: ZAM 14: 18

Txais:   As les lus yas, as les lus yas.

Huab Tais hais tias:  Kuv yuav tsis cia nej ua ntsuag,
kuv yuav rov los cuag nej ces nej yuav zoo siab puv npo.

Txais:   As les lus yas, as les lus yas.

Ntawv Moo Zoo: ZAM  17: 11B-19

Yes Xus thov ntuj li no:
11b  Leej Txiv Ntshiab, koj zov lawv nyob hauv koj lub Npe uas koj muab rau kuv,
kom xwv lawv ua ib leeg xws li wb ua ib leeg.
12 Thaum kuv nrog lawv nyob, kuv zov lawv nyob hauv koj lub Npe uas koj muab rau kuv. Kuv
txuag lawv, ces tsis muaj ib tug ploj li, tsuas muaj kev ploj tus tub, kom tshwm sim raws li Ntawv sau cia.
13 Zaum no kuv rov los cuag koj, kuv hais tej no rau hauv lub qab ntuj neeg,
kom xwv lawv tau kuv txoj kev kaj siab phwj yaws los nyob hauv lawv.
14 Kuv muab koj lo lus pub rau lawv, lub qab ntuj neeg thiaj li ntxub lawv,
vim lawv tsis yog qab ntuj neeg tug, ib yam li kuv tsis yog qab ntuj neeg tug.
15 Kuv tsis thov kom koj rho lawv hauv lub qab ntuj neeg mus,
kuv thov kom koj txuag lawv ntawm tus Phem.
16 Lawv tsis yog lub qab ntuj neeg tug ib yam li kuv tsis yog lub qab ntuj neeg tug.
17 Thov koj qee lawv mus nyob hauv txoj kev tseeb : Koj lo lus yog qhov tseeb.
18 Kuv xa lawv mus nyob hauv lub qab ntuj neeg, ib yam li koj xa kuv los nyob hauv lub qab ntuj neeg.
19 Kuv rov qee kuv, kom lawv ntshiab tuaj nyob hauv qhov tseeb.

COV ZAJ NYEEM HNUB TIM 24/5/2015

HNUB CHIV 8 CAIJ HLA XYOO B
Hmoov Leej Ntuj Plig nqes los.



Zaj nyeem ib: Hauj Lwm 2,1-11.

Leej Ntuj Plig nqes los.

1 Thaum txog lub Hnub NyoogTsib Caug, tas cov thwj tim huv tib si tuaj sib txoos ua ke.
2 Ib sij huam, txawm muaj ib lub suab nrov saum ntuj tuaj xws li ib nthwv cua
hlob hlob ntsawj, lub suab ntawd nrov thoob plaws lub tsevuas lawv nyob.
3 Ces lawv pom tej ntshua nplaim zoo li nplaim taws, ncau ua tej tus
nplaim me ya tuaj tsaws saum cov thwj tim txhua tus.
4 Lawv sawv daws tau txais Leej Ntuj Plig Ntshiab puv hauv lawv,
ces lawv pib hais ntau xeem lus raws li Leej Ntuj Plig pub kom lawv hais tau.
5 Thaum ntawd, muaj ib co Yus Das kub siab ntseeg tuaj ntawm tas
cov teb chaws hauv lub qab ntuj khwb tuaj nyob Yes Lus Xas Les.
6 Thaum lawv hnov lub suab nrov, tas ib tsoom neeg tuaj ntsauv vij vog.
Sawv daws ua siab poob nthav vim tias thaum cov thwj tim hais lus,
mas lawv nyias hnov hais nyias xeem lus.
7 Lawv ceeb tas nrho, xav tsis thoob, ces lawv hais tias :
"Tas cov neeg uas hais lus ntawd, lawv tsis yog ib co Nkas Lis Lais lod ?
8 Ua li cas peb thiaj nyias hnov lawv hais nyias xeem lus ?
9 Peb yog ib co neeg Pas Tos, Mes Dias, Es Las Mias,
peb nyob Mes Xos Pos Tas Mias tuaj,  Yus Das, Kas Pas Dos, Poos Tus, As Xias,
10 Fis Zias, Pas Fis Lias, nyob Hais Nkws Tos  thiab Lis Npias teb chaws
uas ze Xis Les Nas,  peb yog neeg Los Mas tuaj nyob ntawm no.
11 Peb yog ib co Yus Das thiab ib co teev dab txais kev ntseeg, ib co Khes Tas,
As Las Npias, peb puav leej hnov lawv hais peb xeem lus cav txog Tswv Ntuj lub hwj chim."

Zaj nyeem ob: 1KLN 12,3b-7, 12-13, los NLT 5,16-25.

Yog ib tug neeg tsis muaj Leej Ntuj Plig qhia nws,
mas nws hais tsis tau tias : ‘Yes Xus yog Huab Tais.’

4 Ntuj pub ntau yam txiaj ntsim, tiam sis yog tuaj ntawm Leej Ntuj Plig tib leeg tuaj xwb.
5 Muaj ntau txoj kab xwm, tab sis yog tuaj ntawm tib tug Huab Tais tuaj.
6 Muaj ntau txoj hauj lwm, tab sis yog tib tug Tswv Ntuj
ua cov hauj lwm ntawd nyob hauv txhua leej tib neeg.
7 Ntuj pub Leej Ntuj Plig rau peb kom peb pab tau tsoom sid.
12 Ib yam li neeg lub cev : neeg muaj tib lub cev xwb : tab sis muaj tes, muaj taw,
muaj ntau yam : txhua yam yog lub cev, txawm tias muaj ntau ces, los yeej yog tib
lub cev xwb. Nyob hauv Leej Pleev kuj zoo li ntawd.
13 Vim tias peb sawv daws tau txais lub Cim Ntxuav nyob hauv Leej Ntuj Plig tib leeg,
thiab nyob hauv tib lub cev xwb. Tsis hais cov Yus Das los cov
Hes Las, cov qhev los cov twj lij, peb sawv daws puav leej tau
haus txaus siab ntawm Leej Ntuj Plig tib leeg.

los nyeem: NLT 5,16-25

16 Kuv hais rau nej tias : nej cia Leej Ntuj Plig coj nej lub neej,
ces nej yuav tsis mloog nej lub cev ntshaw.
17 Vim qhov uas lub cev ntshaw tsis yog qhov uas lub tswv yim ntshaw.
Hos qhov uas lub tswv yim ntshaw, kuj tsis yog qhov uas lub cev ntshaw.
Lub cev thiab lub tswv yim tsis sib haum, vim li ntawd, muaj ntau zaus,
nej thiaj tsis ua qhov uas nej lub siab xav ua.

18 Yog nej cia Leej Ntuj Plig coj nej, mas nws tsis zwm rau Txoj Cai.
19 Yog nej mloog nej lub cev, mas nej yuav zoo li no : yuav muaj kev ua plees
ua yi, ua tsis huv, yuav nrhiav kev ua phem,
20 yuav mus teev mlom teev dab, yuav mus ua khawv koob, yuav sib ntxub, tsis sib haum,
21 sib khib, npau lwj npau liam, sib ceg, sib ncaim, nyias tawg nyias mus, noj haus liam sim,
noj haus hu dab, thiab tseem yuav ua ntau yam phem ntxiv. Ua li mas kuv xav
ceeb toom rau nej, kom paub tias, cov neeg ua txhaum zoo li ntawd,
yuav tsis tau txais Tswv Ntuj lub Ceeb Tsheej los ua lawv tug.
22 Tiam sis, leej twg mloog Leej Ntuj Plig, mas nws yuav txi tej lub txiv zoo lino :
nws nyiam Ntuj, nws zoo siab ua neeg, nws nyob kaj lug, nws ua siab ntev,
nws xyiv fab pab luag tej, nws ua siab zoo rau luag, nws tso siab rau luag,
23 nws txawj hlub luag tej, nws txawj kav nws lub cev zoo.
Tus neeg zoo li ntawd, mas nws tsis txhawj coj Ntuj Txoj Cai.
24 Cov uas lawv yog Yes Xus Pleev tug, mas lawv muab lawv lub cev
thiab lub siab ntshaw ua phem ntsia rau saum ntoo cuam.
25 Leej Ntuj Plig yog peb txoj sia, peb cia Leej Ntuj Plig coj peb lub neej.

Zam Ntawv Moo Zoo:  Zam 20,19-23, los  Zam 15,26-27; 16,12-15.

Yes Xus tawm los rau cov thwj tim pom thaum Tos Mas tsis nyob.

Zam 20 : 19 - 23.

19 Tib hnub ntawd thaum tsaus ntuj, uas yog thawj hnub pib lub lis piam,
cov qhov rooj hauv qhov chaw cov thwj tim nyob kaw tas, vim lawv ntshai cov Yus Das.
Yes Xus los sawv hauv nruab nrab, nws hais rau lawv tias : "Nej nyob kaj lug."
20 Thaum Yes Xus hais lo lus ntawd tas, nws muab nws ob txhais tes thiab nws phab tav
rau lawv saib. Cov thwj tim pom Huab Tais, lawv zoo siab kawg.
21 Yes Xus rov hais rau lawv tias : "Nej nyob kaj lug !
Kuv xa nej mus xws li Leej Txiv xa kuv tuaj."
22 Yes Xus hais li tas, nws tshuab pa rau lawv, nws hais rau
lawv tias : "Nej txais Leej Ntuj Plig Ntshiab.
23 Nej daws txhaum rau leej twg, mas nws cov txhaum yuav daws.
Nej tsis daws leej twg cov txhaum, mas nws cov txhaum yuav nyob."

los nyeem Zam 15,26-27; Zam 16, 12-15

26 Leej Nplij Neeg yuav tuaj. Nws yog tus uas kuv yuav xa ntawm
Leej Txiv tuaj rau nej. Nws yog Leej Ntuj Plig qhia qhov tseeb uas tawm
hauv Leej Txiv los, nws yuav ua tim khawv txog kuv.
27 Nej kuj ua tim khawv thiab, vim nej nrog kuv txij lub hauv paus los.
Zam 16,12-15
12 Kuv tseem tshuav ntau yam yuav hais rau nej, tab sis nyem no nej ris tsis taus.
13 Thaum Leej Ntuj Plig qhia qhov tseem ceeb tuaj txog, nws yuav coj nej mus rau
qhov tseeb tas huv si. Vim nws yuav tsis hais nws cov lus, nws yuav hais qhov
nws hnov, thiab nws yuav xub qhia nej txog tej xwm uas yuav tshwm sim tuaj.
14 Nws yuav ua kom kuv muaj koob meej, vim nws yuav
coj yam uas yog kuv tug tuaj qhia rau nej.
15 Tas ib puas tsav yam uas yog Leej Txiv tug, mas kuj yog kuv tug huv tib si.
Vim li ntawd kuv thiaj hais rau nej tias : Leej Nplij Neeg yuav coj
yam uas yog kuv tug tuaj qhia rau nej.

COV ZAJ NYEEM HNUB TIM 31/5/2015

HNUB CHIV 9 NRUAB XYOO B

HNUB HAWM TSWV NTUJ PEB LEEG



Zaj Nyeem Ib: TXOJ CAI OB 4: 32-34, 39-40

Mais Xes hais rau nws haiv neeg tias:
32 "Nej sim nug tej laus thaud saib, cov uas nyob ua ntej nej, txij hnub Tswv Ntuj
tau tsim neeg los nyob ntiaj teb lawm saib: txij qab ntug mus txog hauv ntuj,
puas tau muaj ib lo lus muaj hwj chim loj npaum li ntawd ?
Puas muaj neeg tau hnov dua ib lo lus zoo li ntawd ?
33 Puas tau muaj dua lwm haiv neeg tau hnov tus Tswv Ntuj muaj txoj sia lub suab
hais lus hauv hluav taws tuaj li nej tau hnov tas thiab lawv tseem muaj txoj sia nyob ntxiv ?
34 Puas tau muaj dua lwm tus Tswv Ntuj uas tau mus coj ib haiv neeg hauv lwm haiv neeg
los thiab tau ua tej yam los sim neeg siab, tej lub cim loj thiab tej yam txaus qhuas,
tau sawv ntaus tej tsam rog, tau siv nws txhais tes muaj hwj huam thiab xyab nws
txhais npab muaj zog, tau siv nws lub peev xwm ua tej yam txaus ntshai kawg, xws li nej
tus HUAB TAIS Tswv Ntuj tau ua pab nej nyob Hais Nkws Tos teb, rau nej qhov muag pom ?
39 Vim li no, hnub no nej yuav tsum paub, yuav tsum nco ntsoov rau nruab siab tias :
HUAB TAIS yog tus Tswv Ntuj nyob saum ntuj thiab nyob ntiaj teb no tib si,
tsis muaj dua lwm tus Tswv Ntuj ntxiv lawm.
40 Nej yuav khaws Huab Tais txoj cai thiab nws cov lus qhia uas kuv ceeb toom
rau nej hnub no, kom nej thiab nej cov tub ki tau txoj hmoov zoo thiab tau ua neej nyob
ntev niaj ntau xyoo hauv lub teb chaws uas nej tus HUAB TAIS
Tswv Ntuj muab pub rau nej nyob mus ib txhis."

Zaj Nyeem Ob: LOS MAS 8: 14-17

14 Txhua leej txhua tus uas muaj Tswv Ntuj Leej Tswv Yim coj lawv,
mas lawv yog Tswv Ntuj cov me nyuam.
15 Nej tsis tau txais ib lub tswv yim ua qhev kom nej rov poob rau hauv txoj kev ntshai;
nej tau txais ib lub tswv yim ua tub ki tshiab, ces peb muaj cai hu tias : ‘As Npas ! Txiv !’
16 Leej Ntuj Plig nrog peb lub tswv yim zeem tseeb tias peb yog Tswv Ntuj cov me nyuam tiag.
17 Vim peb yog me nyuam, mas peb kuj yog cov yuav txais cuab tam thiab :
peb yog cov yuav txais Tswv Ntuj lub cuab tam ; peb koom nrog Leej Pleev txais ib lub
cuab tam, vim peb nrog nws raug txom nyem kom tau nrog nws muaj hwj chim thiab.

Ntawv Moo Zoo: MT 28: 16-20

16 Pab Kaum Ib leeg thwj tim mus rau Nkas Lis Lais teb,
mus saum lub roob uas Yes Xus teem rau lawv.
17 Thaum lawv pom nws, lawv txhos caug pe; ib txhia tseem ua xyem xyav.
18 Yes Xus txav los hais lus rau lawv, nws hais tias : "Ntuj pub ib puas tsav yam
hwj huam rau kuv nyob saum ntuj thiab nyob ntiaj teb no.
19 Nej mus, nej coj kom tas txhua haiv neeg los ua kuv thwj tim, nej hu txog
Leej Txiv thiab Leej Tub thiab Leej Ntuj Plig Ntshiab lub npe, nej ntxuav lawv.
20 Nej qhia kom lawv coj tas puas tsav yam raws li kuv tau qhia rau nej.
Ntawm kuv, mas kuv niaj hnub nrog nej nyob ntaim mus txog lub zim txwv kawg.

COV ZAJ  NYEEM  HNUB  TIM  7  LUB  6  HLI    2015

Hnub Chiv 10 Nruab Xyoo B

Hnub Hawm HT Yes Xus lub Cev thiab cov Ntshav Ntshiab (Corpus Christi)



Zaj Nyeem Ib: KEV TSIV  24: 3-8

3 Thaum Mais Xes rov los hais HUAB TAIS cov lus thiab cov kev cai tas huv si
qhia rau tsoom pej xeem, tas sawv daws pom zoo koom ib lub suab teb tias :
"Tas HUAB TAIS cov lus nws tau hais, peb yuav coj huv tib si."
4 Mais Xes muab HUAB TAIS cov lus tas huv si sau rau hauv ntawv cia,
ces tag kis thaum sawv ntxov ntxov, nws txhim ib lub thaj txi Ntuj rau ntawm
taw roob muaj kaum ob tug ncej zeb rau kaum ob lub xeem His Xas Lais.
5 Ces nws xa ib co tub hluas His Xas Lais mus hlawv tsiaj txi Ntuj,
lawv coj tej tus thav nyuj mus tua ua kev koom siab txi rau HUAB TAIS.
6 Mais Xes cug cov tsiaj ntawd cov ntshav, nws muab ib nrab rau hauv phiab,
nws muab ib nrab hliv ywg lub thaj txi Ntuj.
7 Ces nws muab phau ntawv cog lus los nyeem rau tsoom pej xeem mloog, lawv qw tias :
"Txhua yam HUAB TAIS tau hais, peb yuav coj, peb yuav mloog."
8 Mais Xes txawm muab cov ntshav los nchos rau saum tsoom pej xeem sawv daws,
nws hais tias : "Cov ntshav no yog ntshav cog lus uas
HUAB TAIS tau nrog nej cog raws li nws cov lus no tas huv si."

Zaj Nyeem Ob: HES NPLAWS  9: 11-15

11 Tab sis Leej Pleev tuaj lawm, nws yog tus Tuam Leej Choj kav lub cuab tam tom ntej.  
Nws tau hla ib lub tsev tsam phooj loj dua thiab zoo dua,
uas tsis yog neeg txhais tes ua, tsis yog lub sim ceeb no tug,  
12 nws tau chaws mus hauv thaj chaw Ntshiab ib zaug xwb thiab tau ua kom txhua
yam tiav log, nws tsis muab ntshav tshis los ntshav heev nyuj,
tiam sis nws hliv kiag nws roj ntsha los txhiv tau peb dim plaws tas mus li lawm.
13 Yog tias ntshav tshis thiab ntshav heev nyuj, los tshauv maum nyuj uas luag
muab tsuag rau saum cov neeg tsis huv, ua tau kom lawv ntshiab tuaj,
vim kho tau kom  lawv lub cev nqaij rov huv tuaj tiag,
14 mas Leej Pleev uas nws muaj leej Tswv Yim nyob mus li cob kom nws muab
nws tus kheej ua ib co txim dawb huv txi rau Tswv Ntuj, mas nws cov ntshav
haj yam ua tau kom peb lub siab huv tuaj thiab dim ntawm peb cov hauj lwm
pub kev tuag, kom peb los teev hawm tus Tswv Ntuj muaj txoj sia.
15 Yog vim li ntawd mas Leej Pleev thiaj yog peb tus sawv cev rov cog dua lus tshiab,
kom xwv vim twb muaj kev tuag them cov txhaum ua thaum lub caij cog qub lus lawm,
mas kom cov neeg uas Ntuj hu tau mus txais lub cuab tam nyob mus li raws li kev cog lus.

Ntawv Moo Zoo: MK 14: 12-16, 22-26



12 Thaum txog thawj hnub noj cov mov tsis muaj poov xab,
lawv tua tus Yaj Hla, cov thwj tim hais rau Yes Xus tias :
"Koj xav kom peb mus npaj pluas Hla rau koj noj nyob qhov twg ?
13 Ces Yes Xus xa nws ob tug thwj tim, nws hais rau nkawd tias :
"Neb mus hauv nroog, yuav muaj ib tug neeg
kwv ib hub dej tuaj ntsib neb. Neb raws nws mus.
14 Nws chaws mus hauv lub tsev twg, mas neb yuav hais rau tus tswv tsev ntawd tias :
“Xib Hwb hais tias kem tsev uas kuv yuav nrog kuv cov thwj tim noj pluas Hla nyob qhov twg ?”
15 Ces nws yuav qhia ib kem tsev dav rau neb nyob theem saud,
muaj rooj tog, thiab tu txhij tas. Neb npaj txhua yam kom tiav rau peb."
16 Ob tug thwj tim mus. Thaum nkawd mus txog hauv nroog, nkawd pom txhua yam
raws li Yes Xus tau hais rau nkawd, ces nkawd npaj pluas Hla.
22 Thaum lawv tab tom noj mov, Yes Xus tuav lub ncuav mov,
nws hais zaj foom hmoov zoo rau, nws muab ntais, thiab muab faib rau nws cov
thwj tim, nws hais tias : "Nej txais, qhov no yog kuv lub cev."
23 Yes Xus tuav ib lub ntim, nws ua Ntuj tsaug, nws muab cev rau
cov thwj tim, ces sawv daws haus hauv lub ntim ntawd.
24 Yes Xus hais rau lawv tias : "Qhov no yog kuv cov ntshav, yog cov ntshav
cog lus, cov ntshav no yuav ntws mus cawm coob leej.
25 Kuv hais tseeb rau nej : txij no mus, kuv yuav tsis haus cov kua txiv cawv no ntxiv,
mus txog hnub kuv rov haus cov cawv tshiab nyob hauv Tswv Ntuj lub Ceeb Tsheej."
26 Yes Xus lawv hu cov nkauj paj nruag tas, ces lawv tawm mus pem roob Txiv Ntoo Roj.

COV ZAJ NYEEM HNUB TIM  14/06/ 2015

Hnub Chiv  Kaum Ib  Caij Nruab Xyoo B

Zaj Nyeem Ib: EXK 17: 22-24

22 HUAB TAIS Tswv Ntuj hais li no : "Kuv yuav mus txiav puag saum
tus ntoo ciab lub ntsis, puag saum nws cov ceg siab dua cov, kuv yuav dam ib
tug ceg mos, kuv yuav coj mus cog nyob saum ib lub ncov roob siab siab.
23 Kuv yuav coj mus cog rau saum cov roob siab siab His Xas Lais. Nws yuav ncau ceg,
nws yuav txi txiv thiab yuav hlob mus ua ib tug ntoo ciab loj zoo saib. Tas txhia tsav noog
yuav tuaj nyob hauv nws, txhua yam muaj tis yuav tuaj so hauv nws tej qab ceg ntxoov.
24 Tas txhia yam ntoo tuaj nyob nruab liaj nruab teb yuav tsum paub tias kuv, Huab Tais,
yog tus ua kom cov ntoo siab qis tuaj thiab ua kom cov ntoo qis siab tuaj, thiab yog
tus ua kom tus ntoo ntsuab ntsws tas tuaj thiab ua kom tus ntoo ntsws tas rov tawg
taus paj dua. Kuv, HUAB TAIS, tau hais li ntawd, kuv yuav ua li ntawd."

Zaj Byeen Ob: 2 KLN 5: 6-10

6 Vim li ntawd, peb lub siab thiaj ruaj nreb, peb paub tias thaum peb tseem zoo siab
nyob hauv peb lub cev, mas peb khuam nyob deb ntawm Huab Tais.
7 Yog txoj kev ntseeg coj peb taug kev, tsis yog peb ob lub qhov muag uas pom tsis tseeb.
8 Peb lub siab thiaj ruaj nreb, peb zoo siab tso lub cev no tseg,
kom peb tau mus nyob ze Huab Tais.
9 Vim li ntawd txawm peb nyob hauv lub cev los peb tso lub cev tseg,
los peb muaj siab xav nrhiav txoj kev ua xis nws siab.
10 Vim peb txhua tus yuav tsum mus sawv qhib lug rau ntawm Leej Pleev lub rooj txiaj txim,
ces nyias yuav tau txais raws li nyias tau ua thaum
tseem nyob hauv lub cev, saib tau ua zoo los tau ua phem.

Ntawv Moo Zoo: MK 4: 26-34



26 Yes Xus hais tias : Tswv Ntuj lub Ceeb Tsheej zoo xws li
ib tug neeg pov ib co noob rau nruab a :
27 Nws txawm pw los nws sawv, hmo ntuj los nruab hnub,
lub noob tuaj kaus thiab hlob, nws tsis paub tias lub noob hlob zoo li cas.
28 Av xwb tim txawj xeeb kom hloov : xub ua yub tas,
ua plab nab, ces nplej txhawv puv hnab.
29 Thaum nplej siav, tus neeg ntawd xuas liag hlais tam sis ntawd, vim qoob siav lawm."
30 Yes Xus hais tias : "Peb yuav muab Tswv Ntuj lub Ceeb Tsheej piv rau dab tsi ?
Thiab peb yuav ua paj lug qhia txog Tswv Ntuj lub Ceeb Tsheej zoo li cas ?
31 Tswv Ntuj lub Ceeb Tsheej yog zoo li ib lub noob zaub roj, uas thaum luag muab
tseb rau hauv av, mas lub noob ntawd me tshaj lwm cov noob nyob ntiaj teb no.
32 Tab sis thaum tseb tas lawd, lub noob hlob, nws siab dua lwm cov zaub huv si ;
nws ncau ceg deb, ces tej noog ya saum ntuj tau kev los nkaum hauv nws qhov ntxoov."  
33 Yes Xus siv ntau hom paj lug zoo li no los qhia Lo Lus rau lawv, raws li lawv mloog tau.
34 Tsis muaj ib yam uas nws tsis ua paj lug hais. Thaum tshuav cov thwj tim
nrog nws nyob xwb, nws txhais txhua yam huv tib si rau lawv.