XYOO NTSHIAB NRHIAV THIAB FAIB TSWV NTUJ TXOJ KEV KHUV LEEJ

Vaj Qhia Faas Ntshis Kus tau teem ib xyoos Ntshiab rau peb nrhiav thiab faib Tswv Ntuj txoj kev khuv leej (Jubilee year of Mercy/Année du Jubilé de la Miséricorde).

Hnub pib Xyoo Ntshiab yog hnub no ntag uas yog hnub peb hwm Niam Mab Liab xeeb los tsis lo neeg lub keeb txhaum. Xyoo Ntshiab yuav xaus rau Hnub Chiv tim 20 lub 11 Hlis 2016, uas yog hnub hawm Yes Xus ua Vaj thiab yog hnub xaus Xyoo Teev Ntuj 2015-16. Vaj Qhia xav kom peb xyaum nrhiav Tswv Ntuj txoj kev khuv leej rau yus tus kheej. Vim peb yog neeg muaj txhaum, txawm peb xav ua zoo npaum twg los ntau zaus peb yeej ua qhov tsis zoo, yog li ntawd peb yuav tsum vam txog Tswv Ntuj txoj kev hlub kev khuv leej peb. Txhais hais tias peb yuav tsum tau xyaum nquag mus daws txhaum ntawm txiv plig hauv lub Cim Daws Txhaum. Tej zaum peb cov ntseeg tsuas mus daws txhaum li ib zaug thaum lub Caij yes Xus Yug Los xwb los kuj muaj. Ib txhia tej zaum kuj mus thaum lub Caij Hla thiab, ces tsuas mus ib xyoos ib zaug los ob zaug xwb. Yog peb mus daws txhaum tsawg tsawg li ntawd xwb puas txaus lost sis txaus? Lub Cim Daws Txhaum yog mus thov Tswv ntuj txoj kev Khuv Leej rau yug tus kheej. Yog peb ntshaw Tswv Ntuj txoj kev Hkuv Leej peb mas peb yuav tsum tau xyaum nquag mus daws txhaum ntau tshaj ntawd.

Nyob hauv Xyoo Ntshiab no peb kuj yuav tau xyaum faib Tswv Ntuj txoj kev Khuv Leej rau lwm leej lwm tus thiab. Ib yam li Tswv Ntuj twb hlub peb thiab zam txhaum rau peb, yog li ntawd peb kuj yuav tsum zam rau cov neeg uas tau ua phem rau yus thiab. HT Yes Xus yog tus piv txwv qhia txog Tswv Ntuj txoj kev Khuv Leej zoo tshaj. Thaum nws ua nruj nriaj saum ntoo cuam, nws qw nrov nrov thov Leej Txiv tias: “Thov koj zam rau lawv, vim lawv tsis paub tias lawv ua dab tsi.” HT Yes Xus twb zam rau cov neeg ua phem thiab tsim txom nws loj tas npaud, yog li peb yuav xyaum sib zam txhaum thiab. HT Yes Xus yeej hais tau ib lo lus tseg rau nws cov thwj tim tias: “Nej yuav sib nyiam sib hlub ib yam li kuv tau nyiam thiab hlub nej.” Lo lus ntawd Yes Xus yeej hais rau peb txhua leej txhua tus uas ntseeg nws.

Hnub no Vaj Qhia tau pib lub Xyoo Ntshiab lawm. Txoj cai pib lub Xyoo Ntshiab mas yog yuav tsum qhib ib lub qhov rooj hu ua lub Qhov Rooj Ntshiab (Holy Door). Xyoo no hu ua lub “Qhov Rooj Mus rau kev Khuv Leej” (Mercy Door).
Nej mus mloog cov lus no piav txog lub Qhov Rooj Ntshiab ntawd:

Lus Aas Kiv:    https://misericordia.media/en/

Lus Fab Kis:    https://misericordia.media/fr/

Hnub no Vaj Qhia qhib lub Qhov Rooj Ntshiab hauv lub tuam tsev teev ntuj Leej Ntshiab Pob Zeb nyob Los Mas (St Peter Basilica, Rome) los pib Xyoo Ntshiab. Vaj Qhia Npes Nes Dis XVI kuj tuaj koom tib si. Thaum peb cov ntseeg mus hla lub Qhov Rooj Ntshiab yog ib lub cim qhia tias peb hla ntawm txoj kev txhaum mus rau hauv Tswv Ntuj txoj kev Khuv Leej.  Nej mus saib thiab nyeem zaj nyob hauv ob qho chaw no; thaum nej qhib mas lawv xub muaj khaus xas nam ua ntej, nej ua siab ntev tos kom tas ces nej mam pom:
https://www.washingtonpost.com/news/acts-of-faith/wp/2015/12/08/pope-francis-has-just-launched-a-year-of-mercy-heres-what-to-expect/

http://www.foxnews.com/world/2015/12/08/pope-launches-his-holy-year-mercy-amid-heavy-security-in-rome/

Vaj Qhia tau tso cai kom nyob thoob ntiaj teb, cov Tswv Qhia loj saib lawv cov Cheeb Koom Txoos yuav tsum qhib ib lub Qhov Rooj Ntshiab nyob hauv nyias lub Cheeb Koom Txoos rau nyias cov ntseeg tuaj mus hla mus nrhiav Tswv Ntuj txoj kev Khuv Leej. Txoj cai qhia hais tias thaum Vaj Qhia los cov Tswv Qhia qhib ib lub Qhov Rooj Ntshiab li no mas yog yus mus hla lub qhov rooj ntawd mus teev ntuj mas yus yuav tau txais Tswv Ntuj lub txiaj ntsim, xyoo no yog lub txiaj ntsim Tswv Ntuj Khuv Leej  peb. Yog nej leej twg xav txais Tswv Ntuj lub txiaj ntsim Khuv Leej Neeg xyoo no mas nej yuav tsum nug saib lub Qhov Rooj Ntshiab uas nej tus Tswv Qhia yuav qhib rau hnub Chiv yuav tuaj no uas yog tim 13 lub 12 hlis 2015 no yog lub twg. Ntau zaus yog lub qhov rooj ntawm lub tuam tsev teev ntuj uas tus Tswv Qhia nyob.

Nyob zoo Mim,

Ua tsaug ntau koj txhais tau zaj nov tuaj rau sawv daws nyeem thiab paub txog. Kuv yeej hnov ntsoov xov tooj cua hais, tab sis kuv tsis muaj sij hawm ces kuv tseem khuv khuv xim uas txhais tsis tau tuaj qhia sawv daws no tab sis koj twb ho maj zeeg txhais tau tuaj tso lawm mas zoo siab tshaj plaws. Kuv tseem mus nrhiav tau cov lus uas thiab cov zaj uas thaum tab tom yuav hla thiab hla lub qhov rooj Ntshiab uas yus npaj ua ntej ntawd. Cia seb kuv puas npaj yeej tuaj tso ua ntej hnub Chiv 13/12/2016 no. Kom sawv daws ho tau npaj ua ntej yuav mus hla.

Tais Tooj,

Tsis ua cas os. Kuv xav tau tias tej zaum koj yeej muaj hauj lwm ntau no ces kuv thiaj tuaj piav me me kom peb cov Hmoob paub thiab hnov txog. Koj sau hais tias hnub chiv 13/12/2016 no tiam sis ntshai yog koj sau yuam kev xwb, nws yog hnub chiv 13/12/2015, yog hnub Chiv yuav tuaj no kiag xwb ov.

Nyob zoo Mim thiab N hlob, ua tsaug uas neb tuaj qhia zaj xov xwm tshiab no og. Yog tsi muaj nej no tej zaum peb yuav tsi paub li.

Zoo kawg, yog li xyoo no yog ib xyoos ua ntshiab huv, tiam sis peb kuj nyob deb TP thiab TTQ kawg, peb kuj tsi paub txog li, ntshe peb yuav tsis paub mus hauv lub Qhov Rooj Ntshiab yog mus li cas og.

Nyob zoo Tub Kawm,

Nej nyob deb Txiv Plig thiab Tswv Qhia, nej tsis tau ua qhov kab ke Nkag lub Qhov Rooj Ntshiab los tsis ua cas, tsuav nej muab lub xyoo no coj los hloov yus lub siab zam txhaum rau luag, xyaum txhob ua txhaum luag, txhob ua siab luag, hwm luag thiab yog muaj chaw daws txhaum ces ho mus daws txhaum kom ntau dua xwb, yog nej tsis muaj Txiv Plig ces nej rau siab teev Ntuj thiab ua hauj lwm dawb pab luag, pab cov neeg txom nyem los yog muaj mob xwb ces yeej yog kev Nkag lub Qhov Rooj Ntshiab lawm. Peb cov nyob muaj tsev teev Ntuj ua npog luas los coob leej yeej tsis muaj fwv tsam mus nkag thiab.