Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» TP.Txhiaj Foom lub TSEV Ntawv
by Maiv Tooj Today at 8:04 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 1:02 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 17th February 2017, 10:57 am

» XH.Zoov Ntxheb Yaj Nthuav Ntawv Ntshiab.
by Maiv Tooj 17th February 2017, 10:51 am

» Xib Hwb Thoj Xyooj lub neej
by Maiv Tooj 13th February 2017, 11:15 am

» Tshuaj NTSUAB
by Lajpovyaj 12th February 2017, 8:54 am

» COV ZAJ NYEEM RAU TEJ HNUB TSHWJ XEEB
by Mim 24th January 2017, 5:06 pm

» Hmoob Guyane
by Yaj Suav Nus 21st January 2017, 6:59 am

» XH. Yaj Zoov Ntxheb lub Tsev THOOB TSIB
by Maiv Tooj 19th January 2017, 10:10 am

» Tswv Ntuj txoj kev HLUB. Cob Tsib teb.
by NrhiavTswvNtuj 17th January 2017, 11:45 pm

» HMOOB CATHOLIC NYOB COB TSIB TEB (Hmong Catholic Vietnam)
by Maiv Tooj 17th January 2017, 11:19 pm

» Nos Hes lub nkoj = L'Arche de Noé = Noah's Ark
by NrhiavTswvNtuj 13th January 2017, 9:53 am

Suav neeg tuaj saib, txij hnub 17/09/2010 los mus.


    Ib hnub zoo tshaj plaws: Phauj Txiab Neeb Tsab.

    Share

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5189
    Date d'inscription : 2009-08-18

    Ib hnub zoo tshaj plaws: Phauj Txiab Neeb Tsab.

    Post  Maiv Tooj on 28th April 2014, 10:11 am


    IB HNUB ZOO TSHAJ PLAWS.

    Saïx Avril 2014



    Hais txog ntawm kev ntseeg ntuj los mus zoo li cas thaum lub hauv paus nyob rau teb chaws Los Tsuas.
    Xyoo 1962 tim 15 lub 6 hli ntuj yog ib hnub uas tsis tau pom dua nyob hauv peb Hmoob toj siab lub neej li.
    Yog ib hnub uas saib mas cas yuav muaj tsim muaj nuj nqes tshaj, yog ib hnub loj kawg nkaus rau peb ob lub zos toj siab. Hnub ntawd cov laus hais tias txhob mus ua teb vim hnub no dav hlau es lis cos tes yuav thauj cov Hmoob Vis Xus tawg rog los nyob peb teb chaws pas qav ze peb zos mas peb yuav mus xyuas lawv. Thaum tus txiv tsev hais li no mas zoo siab tshaj, muaj zog ua hauj lwm kawg li, pub npua, pub qaib, pub nees nrawm nroos tag ua tshais tsuag tsuag rau sawv daws noj, ntim su zoj zeeg rau hauv kawm ces peb sawv kev zom zaws mus ko taw ntev li ib xuaj moos thiaj txog qhov chaw uas cov Hmoob Vis Xus yuav los ntawd. Thaum peb mus txog tsis ntev kwv yees li 9,30 h mus txog 10 h ntawd ces suab hélicoptère mas ya nrov ntig ntwg qeeg cuag li cas lub thawj tsaws ntua pom cov neeg tawm sis dhu los muab lawv tej khoom thau tsuag tsuag tas, ya plo lawm. Lub thib ob tsaws ntua ua ib yam nkaus li ntawd tag ya plho lawm, lub thib peb ua ib yam li no, mus mus los los txog ntua hnub qaij hlo ces thiaj tag lawm. Lawv los tau coob kawg muaj tus Txiv Plig Paj Zeb yog neeg Italie nrog lawv saib xyuas lawv zoo. Ntsia mas cas lawv yuav tsim txiaj muaj nqes ua luaj. Zoo li ib yam dab tsi ua rau kuv lub siab phau npog xav tau tias yog dab tsi ua rau pab neeg ntawd lawv nyob tshiab ua luaj. Pab neeg ntawd yog Tsav Ntxaij Thoj thiab Zam Nob Yaj lawv, yog tawg rog roob Nyuj Qus los, yuav los nyob peb xeev Sayaboury.


    Tsaus ntuj rov los tsev, cas hnub ntawd pheej nyob nraim hauv nruab sial mus txhua hnub, txhua hmo. Ua teb tsuag tsuag tag rov los tsev, ces ho rov mus soj ntsuam saib pab hmoob ntawd lub neej zoo li cas tiag. Thaum peb mus txog pom tau tias cas lawv tub ua tau tsev nyob puv lub hauv toj ncee ai lawm, txeem kiag mus txog lub plawv zos tshiab ntawd pom cov me nyuam kawm ntawd uas yus lub neej xeev xwm los yeej tsis tau pom dua ib zaug zoo li ntawd yuav tsaus ntuj cov neeg tuaj coob pom Txiv Plig Paj Zeb faib tshuaj kho cov neeg ; thaum lawv noj hmo tas pom cov laus cov hluas sawv daws tuaj txhos caug teev ntuj hais ua ke suab ua ib tsaug, ib tsaug, hu nkauj teev ntuj zoo qeeg nkaws rau hauv kuv nruab siab, yog ib co lus, ib co zaj uas yus yeej tsis tau hnov dua ib zaug li, ua yus lub siab kub lug tsis paub xyov yog dab tsi txawv tshaj tas txhua yam uas tau pam lawm. Rov los tsev, tsuas niaj hnub mus ua teb thiab cov hmoob Vis Xus ntawd lawv lub suab teev ntuj nrog Txiv Plig yam li hais tias Koj nyob zoo Mab Liab no ces lo lus ntawd yeej lo nkaus hauv kuv lub taub hau tas niaj hnub niaj hmo lawm. Pheej xav tias yuav ua cas ais yus thiaj yuav tau paub tau txais tej yam muaj muaj nqes zoo zoo ntawd.

    Txoj kev ua teb ua hauj lwm ntau dhau lawm lub cev nqaij daim tawv thev tsis taus lawm niag mob thiaj sawv laim txias rau nruab ce, noj tsis taus ua tsis taus lawm ntau hnub ntau hmo tsuas tab yog pw saum txaj xwb lawv twb nrhiav tshuaj hmoob, ua khawv koob tag los yeej tsis nquag li, muaj ib hnub peb niam peb txiv lawv thiaj xav tias cia muab ib tug npua coj los ua neeb kho kuv, lub sij hawm peb txiv tab tom ua neeb lawv muab kuv tuav los zaum ntawm tus txiv neeb qab lawv muab tus npua ciaj ntawd khi ib txog hlua cab los khi rau kuv duav hos tus txiv neeb tab tom dhia lub rooj neeb yuam dab heev kawg, los cas ib sij huam xwb ces kuv cia li tsis nco qab li lawm ntog ntxeev tiaj hlo, thaum kuv hnov lim loog ces yog tu txiv neeb tab tom ntxais caj dab, hauv siab kom kuv tsim los. Sawv daws pom tau tias kuv sab kawg ua rau sawv daws ntshai tag.

    Kaj ntug tag kis, thiaj txib ob tug neeg mus hu Txiv Plig Paj zeb uas yog nrog cov neeg Vis Xus nyob tuaj xyuas kuv saib yuav ua li cas kom kuv zoo rov los.

    Thaum Txiv Plig tuaj txog, nws xuas kuv mem tes xuas taub hau tag nws txhaj ib koob tshuaj tam sis ntawd thiab muab tshuaj noj thiab pub tau ob peb koob tshuaj txhaj nrog tshuaj noj rau peb txiv kom yuav tsum kho kuv kom tag cov tshuaj ntawd. Thaum ua li Txiv Plig hais ntawd tag ces kuv zoo zoo li tuaj lawm tiag. Txij thaum ntawd los ces peb lub yim neeg thiab kuv mas niaj hnub tos tias peb yuav ua li cas peb thiaj li yuav txia tau mus ua hom Vis Xus li tus Txiv Plig thiab pab hmoob ntawd.

    Peb txiv Tooj Xeeb Tsab mas yeej yog ib tug tuam txiv neeb txiv yaig, yees siv khawv koob, kab tshoob kev kos, zaj tshoob txiv xaiv nyob rau peb xeev Sayaboury sab Hmoob toj siab. Nws yog zoo li tus kws tshuaj kho peb cov hmoob pab peb cov hmoob rau ntau ntau lub zos nyob rau phab teb chaws ntawd. Thaum Txiv Plig kho kuv tag rov lawm. Ces ntshai Leeg Ntuj Plig sawv los tshoj nws siab uas yog tus txiv tsev, ces nws thiaj mus cuag Txiv Plig komTxiv Plig tuaj xyuas peb saib yuav ua li cas peb thiaj yuav txia tau mus ua Hom Visus li Txiv Plig coj ntawd.

    Thaum Txiv Plig khoom ces nws thiaj tuaj txog peb mas kuv hnov zoo li nim tshiab tshiab kaj lug rau kuv, kaj siab, zoo siab twj ywm rau nruab siab, muaj zog ua hauj lwm tos txais Txiv Plig. Cov laus nrog Txiv Plig sib tham thiab mloog nws piav zoo li cas kom sawv daws sib paub zoo dua. Nws rov mus tsev kwv yees li ob hlis tej ces nws mam coj xib hwb Thoj Tshu Hwj nrog nws tuaj txog peb, pw hauv peb tsev, ces peb niam peb txiv lawv hais tias tag kis peb yuav tsis mus ua teb. Zaum no peb hmoov los txog lawm.
    Kaj ntug tag kis ces Txiv Plig yuav ntiab peb tej dab qhuas ces peb yuav rais mus ua Txiv Plig lawv Hom Visus ntawd. Thaum tau hnov tus txiv tsev hais li no mas zoo siab tshaj li, npaj siab tos saib yuav tshum sim zoo li cas rau tag kis. Hnub ob tig los txog, hauj lwm sawv ntxov ua tag, qav num npaj tiav sawv daws noj tshais tas. Npaj siab tos qhov zoo zoo yuav tawm los zoo li cas. Tav niag tuam tshais kwv yees yog 10 h li, ces xib hwb thiab Txiv Plig nkawd thiaj li kom peb tsev neeg sib txoos ua ib pawg, ces Txiv Plig hnug tias txij no mus nej puas ntseeg txog peb tus Huab Tais Yes Xus tiag uas nws tuag saum ntoo cuam kom tau cawm peb tus plig mus ua ntuj cov me nyuam nrog Huab Tais ntuj nyob. Peb txiv teb tias ntseeg raws li koj hais koj qhia txij no mus peb tsis teev dab lawm. Ces Txiv Plig thiab xib hwb nkawd tuav ib phau ntawv nkawd nyeem phau ntawv ntawd txog ib co lus zoo zoo muaj ceem kawg ntiab dab uas yus xeev xwm los yeej tsis tau hnov dua tag ces xib hwb thiaj mus txo peb txiv lub thaj neeb, xwm kab ntawm phab ntsa hauv plag thiab tej niag cab so qhua neeb hauv lub tsev rub huv si coj los hlawv ntawm peb lub hauv plag rau peb ntsia ntsoov tuag ua hluav tag ces ho rov nyeem ntawv hais ib co lus muaj kuab zoo zoo foom hmoov ib txhij nrog pov nchos dej rau peb tag ces Txiv Plig hais ib lo nrov tias txij no mus nej yog Huab Tais ntuj cov me nyuam lawm nej tso siab mog, Huab Tais Yes Xus yuav pov hwm nej, tus dab phem yuav tsis yeej Yes Xus lub zog li, ces nkawd muab daim duab Mab Liab zoo nkauj muaj ib co me nyuam dab ntuj nyob ib ncig Mab Liab ntawd coj los dai rau qhov chaw dai xwm kab. Thaum peb yuav pw mas peb niaj hmo sawv ntawm hauv plag ntsia daim duab Mab Liab ces peb teev ntuj ua ke tag ces nyias mam mus pw nyias. Hloov li no tag mas kuv lub neej hnub ntawd zoo siab tshaj plaws tsis muaj dab tsi yuav pauv tau hnub ntawd li, rau kuv ces yeej yog ib qho hwj huam yees ntxwv loj uas Huab Tais Yes Xus npo kuv lawm.

    Hloov los mus coj dua ib txog kev ntseeg tshiab thiab txoj cai tshiab no coj kev tso siab, kev zoo siab, kev kaj siab, kev cia siab, kev sib nyiam sib hlub thiab kev sib zam txim nyob hauv Huab Tais Yes Xus lawm, mas zoo yam li yus plhis dua tshiab hauv nruab siab thiab tus plig lawm, tsis muaj ib yam dab tsi yuav zoo siab npaum li ntawd.

    Txiv Plig thiab xib hwb nkawd pib qhia peb ua ntoo cuam lub cim, qhia zaj peb txiv nyob saum ntuj, zaj koj nyob zoo Mab Liab, Huab Tais leej Txiv Huab Tais leej tub Huab Tais Leej Ntuj Plig, zaj thov Huab Tais foom hmoov zoo rau zaub mov thiab zaj noj mov tas ua ntuj tsaug rau peb ua ntej, kuv yeej yog ib tug ntxhais toj siab nquag kawm kwv txhiaj thiab yeej tsis paub ib tug ntawv dab tsi li, qhov twg los yuav tsum kawm kom tau hauv nruab siab xwb, thaum ntawd kuv mas rau siab kawm cov zaj teev ntuj kawg thiab tau sai.

    Txiv Plig nrog peb nyob ib hnub ntxiv ces nkawd rov mus tsev lawm. Txij peb lawb dab tag mas kuv nqhuag teev ntuj tas mus li, taug kev los sis ua teb mas kuv yeej hais cov zaj teev ntuj daws dom ces tsis nco qab ntshai dab tsi hos kwv txhiaj los kuj tsis nco qab hais lawm, tsuas nco yus qhov nyiam txoj cai tshiab uas yog qhov tseem ceeb rau yus lawm xwb.


    CHA Sia Neng Marie, épouse LE BLANC





    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5189
    Date d'inscription : 2009-08-18

    Re: Ib hnub zoo tshaj plaws: Phauj Txiab Neeb Tsab.

    Post  Maiv Tooj on 29th April 2014, 7:40 am


    Cov txiv plig Italy nyob Moos Loob.



    Tswv Qhia Lionelo Berti, yog ib tug Tswv Qhia kav lub tsev kawm txiv plig Dao Hung nyob Moos Loob, Nplog teb.


    Xyoo 1969, thawj cov Hmoob ua Ntuj Kev Cai nyob teb chaws Kas Xav, xeev Moos Loob, tus tub hluas Tshaj Hawj tsev neeg thiab cov neeg zos, pom lub teb chaws ciaj quav poj, quav pwm tag, noj av tsuag tag tsis zoo ua noj lawm thiab dej deb deb kawg li, mus li 2-3 teev kev mus kwv dej los tsev.
    Tswv Qhia pom tias teb chaws teb chaws Sayabury zoo ua noj; yog ib qho chaw uas zoo ua noj, lawv tab tom cais dej los ua ib cov liaj tshiab. Ces Tswv Qhia Lionelo Berti txawm mus coj cov hmoob Kas Xav ntawd los mus nyob rau Sayabury no. Yuav ua ob dav hlau los mus, lawv txawm caij thawj lub dav hlau ntiav los rau pem Moos Loob los rau Sayabury, los tsis muaj hmoo, dav hlau thawj lub dav hlau poob rau hauv niam dej Nab Khoom. Thaum dav hlau poob, cov neeg tuag tag nrho tsis seem ib tug li. Sawv daws cov neeg tuag mas tawm los lawv tej khaub ncaws hle tag, thiab phem phem tsis paub neeg li lawm. Lawv txawm mus zov seb puas pom Txiv Tswv Qhia tawm. Txiv Plig Bountha thiab Tij Liab lawv mus zaum saum pob zeb zov, zov txog hnub 10, cas pom ib tug tawm tawm plaws los; lawv saib naj cas yog Txiv Tswv Qhia Lionelo Berti. Luag tej mas khaub ncaws hle tag, Txiv Tswv Qhia mas cov khaub ncaws nyob zoo zoo, tsis muaj ib yam dab tsi puas li. Tej khawm tsho los tseem nyob li qub, tab tus cwj mem rhais ntawm hnab tshos los tseem nyob twb tsis poob li. Lawv muab tau los, lawv thiaj li nchuav kiag ib hwj cawv ywg kiag rau. Lawv coj los pam, lawv muab nws faus rau hauv tsev teev Ntuj hauv Dao Hnug.

    Thawj lub dav hlau poob li no ces cov uas yuav caij lub dav hlau thib ob cia li tsis kam los lawm.  (Raws li kuv xav mas thaum ntawd nqe dav hlau kuj yog ib tug neeg no raug ib daig nyiaj (ib choj) mas ntshe yuav tsis yog cov Hmoob rov them lawv cov nqes dav hlau, ntshe yuav yog Txiv Plig lawv them rau hmoob caij).

    Thaum txiv Tswv Qhia tuag tag, Tuam Txhab nkoj cua Nplog yuav them Txiv Tswv Qhia nqe taub hau li txoj cai no tab sis cov Txiv Plig tsis yuav nws nqe taub hau. Thaum ntawd mas nqe dav hlau ib tug yog 10.000 kip, nqe taub hau yog ib tug yog 1.000.000 kip.



    TP.Paj Zeb, Natalino Sartor.



    Tus tuav kaus mom yog ib tug Txiv Plig loj tuaj Italie tuaj saib lawv,
    Tus npuav yeeb nkab yog TP.Vaj Pov, Sion Luigi
    Tus puag me nyuam TP.Nkaj Xyaum, Umberto Nespolo.

    Duab thiab lus: Phauj Txiab Neeb Tsab.




      Current date/time is 21st February 2017, 12:19 pm