3 Tug Tij Hmoob Nyab Laj teb.

Hnub tim 17 lub 8 hli 2018, Xib Hwb Xyooj Neeb thiab ib tug Tim Hwb nyob Tsev Haus Paus Hmoob Tseej Maim tau coj Txiv Plig Pob Zeb Binh thiab 3 tug Leej Tij Hmoob Nyab Laj tuaj tsham lub tsev teev Ntuj Khej Me thiab Zoo Tswv Zov Yaj. Lawv lub hom phiaj yog xav tuaj ncig tsham xyuas cov neeg ntseeg nyob Thaib teb thiab nyob Los Tsuas teb, kom tau pom tau paub txog cov Hmoob txoj kev ntseeg nyob lwm teb chaws. 3 tug Leej Tij ntawd muaj xws li : Leej Tij Toov Xyooj, Leej Tij Vuaj Xyooj thiab Leej Tij Qiam Muas. Leej Tij Toov thiab Leej Tij Vuaj nkawd nyuam qhuav kawm ua Txiv Plig xwb, tab sis Leej Tij Qiam Muas mas tshuav ib xyoos thiab ces nws tau txais lub Cim Tiag Tes ua Txiv Plig lawm.
Leej Tij Toov hais tias : cov neeg ntseeg nyob Nyab Laj teb, thaum ub tsis muaj cov Txiv Plig tuaj mus tsham cov neeg ntseeg, mas lawv tsuas yog ntseeg nyob hauv lawv tsev thiab mloog lub xov tooj cua Zoo Tswv Zov Yaj xwb. Txhua txhia Hnub Chiv, mas lawv mloog lub thaj txi Ntuj, tab txawm lawv qhov muag tsis pom los twb zoo li lub siab pom lawm. Ces zoo li Zoo Tswv Zov Yaj yog ib lub zog txhawb cov neeg ntseeg lub siab. Thov kom Zoo Tswv Zov Yaj nyob ruaj khov thiab tuav txoj hauj lwm tshaj Ntuj Lus ntxiv mus.
Leej Tij Qiam hais tias : txij thaum yau los nws yeej mloog lub xov tooj cua qhia kev ntseeg nyob Fis Lis Pees, tab sis chiv thawj uas tsis tau muaj Zoo Tswv Zov Yaj, mas lawv mloog Xib Hwb Vam Txoov lub xov tooj cua xwb. Tom qab no muaj lub xov tooj cua Zoo Tswv Zov Yaj, ces sawv daws niaj hnub mloog. Cov neeg ntseeg nyob lub zos Sas Pas, mas lawv nyiam mloog thiab paub Zoo Tswv Zov Yaj.
Leej Tij Vuaj hais tias : lawv tau tuaj pom peb cov neeg ntseeg nyob Thaib teb, mas zoo li txoj kev ntseeg nyob Thaib teb vam meej dua, vim muaj cov Txiv Plig coob coob thiab txoj kev ntseeg tso ywj siab. Txoj kev ntseeg nyob Nyab Laj teb, mas tseem yog nyiag ntau xwb thiab tsis tau muaj ib tug Txiv Plig Hmoob li. Vim li ntawd, lawv thiaj npaj siab mus kawm ua Txiv Plig kom tau los tshaj Ntuj Lus rau cov Hmoob nyob Nyab Laj teb. Kom tau qhuab qhia sawv daws tej me tub me nyuam paub txog Tswv Ntuj txoj kev cai. Xav thov kom Zoo Tswv Zov Yaj muab cov zaj qhia kev ntseeg coj los tso tawm hauv youtube thiab facebook rau cov Hmoob tau mloog thiab tau kawm. Vim tias tam sim no nyob txhua txhia qhov chaw, mas puav leej muaj Internet siv yooj yim lawm. Txiv Plig Pob Zeb Binh yog ib tug Txiv Plig Nyab Laj, tab sis nws zoo siab tshaj Ntuj Lus rau Hmoob. Nws yog tus Txiv Plig saib cov neeg ntseeg nyob lub zos Sas Pas. Tom qab uas Txiv Plig Pob Zeb Binh thiab 3 tug Leej Tij lawv tsham Zoo Tswv Zov Yaj tag, mas Txiv Plig Pob Zeb Rangsan tau coj lawv mus rau lub Cheeb Koom Txoos Udonthani lawm.

Thov kom Tswv Ntuj pub nws lub txiaj ntsim los txhawb peb tug leej tij no kom lawv txiav txim siab ruaj nreb mus ua leej choj, thiaj yuav los pab tau peb tsoom Hmoob.

Peb ua Tswv Ntuj tsaug uas nws tseem hlub tshua peb cov Hmoob thiab tseem hu peb cov tub Hmoob los ua nws thwj tim.

Qiam Muas txais Cim Tiag Tes ua Leej Tsob Hwb.

Thov koom kev zoo siab nrog Leej Tij Qiam Xeem Muas uas hnub tim 18/02/2020 nws tau txais lub cim tiag tes tsa ua Leej Tsob Hwb (Deacon)​  Thov sawv daws pab thov Tswv Ntuj rau nws, kom tsis ntev hli saum no peb yuav muaj thawj tus Leej Choj Hmoob Nyab Laj.
Duab & sau : XH. Neeb Xyooj.

Tswv Ntuj peb Leej Txiv aw! Thov koj nchuav koj tej txiaj ntsim koob hmoov los rau saum koj tus tub txib Qiam Muas no. Koj qhib nws lub siab lub ntsws lub tswv yim kom nws pom tias txoj kev tsob hwb koj thiab leg koj tes dej num yog ib txog kev zooi tshaj plaws nyob ntiaj teb no lawm. Kom nws lub siab nyob ruaj nreb tsis ua xyem xyav, thiab kom nws ua tau koj ib tug tub txib ntshiab dawb huv. Ua li.