TSO SIAB RAU NTUJ COV LUS

Mas Lias wrote:

ZAM NTAWV MOO ZOO

Yes Xus yees tawm los rau cov
thwj tim pom thaum Tos Mas nyob.
20 : 24 - 29.



24 Tos Mas yog ib tug hauv pab Kaum
Ob, nws tseem hu ua Dis Dws Mos thiab.
Thaum Yes Xus tawm los, mas nws tsis
nrog cov thwj tim nyob. 25 Lwm cov
thwj tim hais rau nws tias :
"Peb pom Huab Tais lawm !"
706
Ces Tos Mas hais rau lawv tias :
"Yog kuv tsis pom lub qhov txhab ntsia
hlau nyob hauv nws ob txhais tes, yog
kuv tsis muab kuv tus ntiv tes ntxig lub
qhov ntsia hlau, thiab yog kuv tsis muab
kuv txhais tes rau ntawm nws phab tav,
mas kuv tsis ntseeg."
26 Yim hnub tom qab, cov thwj tim rov
nyob hauv tsev dua. Tos Mas kuj nrog
lawv nyob thiab. Cov qhov rooj puav leej
kaw tas. Yes Xus tawm los sawv hauv
nruab nrab, nws hais rau lawv tias :
"Nej nyob kaj lug !"
27 Ces Yes Xus hais rau Tos Mas tias :
"Cev koj ntiv tes rau ntawm no, koj ntsia
kuv ob txhais tes. Cev koj txhais tes los,
muab rau hauv kuv phab tav. Koj txhob
ua neeg tsis ntseeg ntxiv, koj ntseeg
mog."
28 Tos Mas teb rau Yes Xus tias :
"Kuv tus Huab Tais, Kuv tus Tswv
Ntuj."
29 Yes Xus hais rau Tos Mas tias :
"Vim koj pom kuv, mas koj thiaj ntseeg.
Cov uas tsis tau pom tab sis lawv ntseeg,
mas lawv txoj hmoov zoo."

MUAB TSO POV TSEG, TEJ YAM TXHAWJ XEEB UAS TSIS MAUJ NQES DAB TSI.
KOJ YUAV TSUM NCO NTSOOV TIAS TSIS YOG TUS NIAG NTXIAS QHIA KOJ MUS UA KEV TXHAUM, TIAM SIS YOG KOJ YEEJ TXAUS SIAB MUS UA TXHAUM.
YOG KOJ LUB PEEV XWM CIA KOJ XAIV PHAB ZOO LOS PHAB PHEM. THAUM LUB PEEV XWM MUAJ ZOG UA QHIA RAU TUS NIAG NTXIAS TIAS NWS YUAM TSIS TAU KOJ, TSIS YOG YUAM KEV, TAB SIS YOG XAIV KEV UA ZOO.

( Leej Choj Padre Pio cov lus )

Nyob zoo phooj ywg,

Peb txhua txhua tus lub siab yeej ua xyem xyav ib yam li Leej Ntshiab TosMas. Niaj hnub tam sim no, yog peb muaj kev nyuaj siab, los muaj mob muaj nkeeg, peb yeej xav kom TswvNtuj kho kom peb zoo kiag ntawm qhov muag rau peb pom mas thiaj zoo siab, thiaj ntseeg.
Tsis yog li ntawd mas, lub ncauj hais tias ntseeg, tab sis lub siab yeej xav tau tias, puas mauj tiag?
Vim yog tsis tso siab rau ntuj cov lus.


Thaum xyoo 1999-2000 ntawd, kuv lub neej tau muaj kev lwj siab ntxhov plawv, txom nyem kawg nkaus. Thiaj tau npaj siab mus cuag ib tug HaujSam nyob Paris. Ntawm peb nyob mus rau Paris, caij tsheb yog 6 teev kev.
Kuv tau coj kuv peb tug me nyuam mus ib hnub txog pem ib tug txiv hlob. Npaj siab tias yuav cia cov me nyuam rau tus niam hlob thiab txiv hlob saib, tso kuv mam mus cuag HaujSam. Thaum xav tau li ntawd lub siab mas tsis kaj li, ntxhov ntxhov siab tag zog, xav tsis thoob li, xyov yuav ua zaj twg thiaj yog?
Lub siab mas thov ntuj tas zog xwb, tsis paub xaiv txoj kab twg li? Tab sis zoo li pheej xav xav mus saib ntawm tus HaujSam li thiab. Vim xav paub lub neej tom ntej.
Kuv lub siab pheej nyob tsis tus, ua nyuj nyev thiaj tau khob xov tooj rau kuv niam thiab kuv tus niam laus, nug saib yuav ua zaj twg thiaj zoo?
Kuv tus niam laus hais tias yog tsis kaj siab mas txhob ua dab tsis li, cia li tso siab rau ntuj xwb. Tab txawm lub neej tom ntej yuav txom nyem npaum li cas los yog ntuj xaiv rau yus lawm ces zoo siab hlo txais.
Kuv thiaj muab nws lo lus xav ntev loo. Kuv ua ib siab pu ib hmos hauv niam hlob thiab txiv hlob tsev. Tag kis sawv ntxov, kuv cia li coj cov me nyuam rov los tsev, ua ib siab tso siab rau ntuj, yog lub neej ntuj xaiv rau kuv lawm ces yuav raws li ntuj pom zoo.
Thaum rov los txog tsev, twb tsaus ntuj zuag lawm, kuv muab cov me nyuam coj mus tso kiag rau hauv tsev, kuv cia li mus pem ib lub tsev teev ntuj lauslaus. Lub tsev teev ntuj tawd mas tsis yog lub kuv niaj zaus mus teev ntuj. Yog ib lub tuam tsev teev ntuj uas kuv tsis tau mus dua li. Zaum ntawd kuv cia li mus rau ntawm lub tuam tsev teev ntuj ntawd ; mus txog lub qhov rooj kaw nti, xauv huv tib si ; kuv thiaj nrhiav seb txiv plig nyob qhov twg?
Thaum nrhiav tau txiv plig lawm, thov TP. tias: kuv xav mus teev ntuj rau hauv tsev, thov txiv plig qhib kuv qhov rooj! TP. teb kuv tias, nws yog ib tug l'Abbé xwb, tsis yog tus tswv tuav lub tsev teev ntuj, ntshe yuav txais tsis tau kuv.
Kuv thiaj rov thov TP. ob peb zaug ntxiv. TP. thiaj qhib kuv qhov rooj, nws hais rau kuv tias: koj thov ntuj ntawm no, kuv nyob sab tod! yog koj thov tas, koj rov los hais rau kuv, kuv yuav liaj qhov rooj rau.
Kuv thiaj teb TP. tias ua li!
Kuv tau mus thov ntuj ntev loo tas, kuv rov los hais rau TP. kom nws los kaw qhov rooj, thaum ntawd nws nug kuv tias: koj tuaj thov ntuj ua dab tsi?
Kuv tau piav me ntsi kuv lub neej txom nyem rau nws.
Nws thiaj kom kuv txhos caug, kom wb teev zaj Peb Txiv Nyob Saum Ntuj, nws teev lus Latin, kuv teev lus Hmoob, nws muab nws ob txhais tes tiag rau saum kuv taub hau, thaum wb tab tom teev ntuj, kuv hnov Tswv Ntuj lub Txiaj Ntsim los rau saum kuv taub hau, txias vog, ib ce tshee hna thoob plaws saum taub hau mus rau nram ko taw.
Ua rau kuv lub siab nyob kaj lug, kuv paub tias Tswv Ntuj zam txim rau kuv lawm, thiab nws muab nws lub TxiajNtsim rau kuv.
Yog thawj zaug uas kuv tau hnov Tswv Ntuj lub Txiaj Ntsim
zaum ob yog thaum kuv txais lub Cim Txhab Zog xyoo 2003,
zaum peb yog thaum TP. NyiajPov tuag, kuv tuaj mus thov ntuj rau nws.

Tswv Ntuj lub TxiajNtsim, mas yus yeej tau txais ntau zaus tab sis tsis paub thiab tsis nco qab lawm.
Hos peb zaug uas kuv tau tham los no mas kuv yeej paub meej meej tias tau txais tiag tiag.

Hnub no kuv muab TswvNtuj lub moo zoo qhia rau nej SD tau paub tias, yog yus tso siab rau ntuj, ces yeej tau txais Tswv Ntuj lub Txiaj Ntsim tiag.