Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Latest topics

» Thov Leej Ntshiab YOS XES
by Maiv Tooj Today at 10:36 am

» COV ZAJ NYEEM NRUAB LIS PIAM XYOO I 2016-2017
by Mim Yesterday at 2:09 pm

» COV ZAJ NYEEM NRUAB LIS PIAM XYOO II, 2015-2016
by Mim Yesterday at 1:29 pm

» COV ZAJ NYEEM HNUB CHIV XYOO A 2016-2017
by NrhiavTswvNtuj 1st December 2016, 12:54 pm

» XH.Zoov Ntxheb Yaj Nthuav Ntawv Ntshiab.
by Maiv Tooj 1st December 2016, 12:35 pm

» XH. Yaj Zoov Ntxheb lub Tsev THOOB TSIB
by Maiv Tooj 1st December 2016, 12:33 pm

» Qhia keeb kwm kev ntseeg. TP.Cwj Vuam CChiv.
by Maiv Tooj 28th November 2016, 9:58 pm

» Yes Xus lub ntsej muag tiag tiag.
by NrhiavTswvNtuj 26th November 2016, 1:52 pm

» HMOOB NPAM NAJ XEES
by NrhiavTswvNtuj 21st November 2016, 9:15 am

» MOO QAIJ QAUG
by Maiv Tooj 20th November 2016, 9:45 am

» TP.Txhiaj Foom lub TSEV Ntawv
by Maiv Tooj 19th November 2016, 12:04 pm

» COV ZAJ NYEEM HNUB CHIV XYOO C 2015-2016
by NrhiavTswvNtuj 19th November 2016, 4:57 am

Suav neeg tuaj saib, txij hnub 17/09/2010 los mus.


    Hauv Paus Xav Lus As Nres.

    Share

    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Hauv Paus Xav Lus As Nres.

    Post  Maiv Tooj on 25th February 2013, 10:12 am



    Leej Ntshiab As Nres, Hauv paus Xav Lus, tuag ua tim khawv +62.



    As Nres txhais tias zoo nraug, khov kho, muaj peev xwm, tshaj xo, txiv neej yawg, tshaj Ntuj lus, qhia tus tswv tsim txoj kev cai. Ib yam li nws tau lub neej zoo, pov thawj txoj kev ntseeg yam thoob tsib, neeg thev txoj kev tsim txom, nto koob meej. Nws qhov keeb kwm yog cov Leej Choj thiab Leej Tsob Hwb nyob Achaïe yog cov ntsia ntsoov tau sau tseg.

    As Nres thiab tus puav Thwj Tim mas Tswv Ntuj tau hu 3 zaug sib txawv. (1) Thawj zaug hu kom nws paub, yog hnub uas As Nres nrog tus puav Thawj Tim hnov Zam Ntxuav Plig hais rau nws tus Xib Hwb tias : « Nov yog Tswv Ntuj tus yaj ntshiab, yog tus yuav daws ntiaj teb neeg cov txhaum. » Ces tam sim ntawd As Nres los thiab nrog Yes Xus mus, txij hnub ntawd los nws nrog nraim Yes Xus nyob ua ke.
    As Nres ntsib nws tij laug Xim Moos thiaj coj nws mus cuag Yes Xus. Hnub tom qab nkawd thiaj rov mus puav ntse li nkawd txoj hauj lwm qub. Tom qab, Yes Xus rov hu nkawd zaum ob kom mus nrog Yes Xus nyob. Yog hnub uas tsoom neeg raws Yes Xus qab coob coob ntawm ntug pas dej Zes Nes Xas Lev (Génésareth) los yog hiav txwv Nkas Lis Lais; Tus Cawm Seej nce mus hauv Xis Moos thiab As Nres lub nkoj, thaum lawv cuab tau ntse ntau ntau, NWS hu Yas Kos thiab Zam nkawd uas nyob rau lwm lub nkoj. Lawv raws NWS qab ib tsam ces lawv rov mus tsev. Yes Xus rov hu lawv dua ua zaum peb, ntshe yog zaum kawg uas Yes Xus hu lawv los ua nws cov Thwj Tim yog thaum nws taug ntug ntawm ntug dej, pom lawv cuab ntses, nws hais rau lawv tias: « Los, kuv yuav muab nej ua cov cuab neeg.» Lawv poob siab tias yuav raws nws mus li, yuav tsis rov los tsev li lawm. Nws hu As Nres thiab lwm cov Thwj Tim ua Hauv Paus Xa Lus raws li Mas Kos (III):« Nws hu cov uas nws txaus siab tus kheej los ib leeg los, ces lawv muaj kaum ob leeg los nrog nws.»
    Tom qab uas Huab Tais Yes Xus mus saum Ntuj lawd cov Thwj Tim sib faib nyias mus nyias, ces As Nres mus tshaj Ntuj Lus rau Scythie hos Mas Tais mus rau Myrmidonie (Ethiopie). (2) Cov neeg nyob lub teb chaws no tsis kam mloog Mas Tais hais, lawv muab nws qhov muag dawj (cov neeg thaum ub mas lim hiam heev), lawv muab nws cuam ntawm tej tug hlau vim hnub puav tom qab lawv xav muab nws tua. Thaum ntawd muaj Tswv Ntuj ib tug Tshiab tshwm sim rau Hauv Paus Xa Lus As Nres, kom nws kav tsij mus rau Myrmidonie mus ntsib Hauv Paus Xa Lus Mas Tais. Nws teb tias nws tsis paub kev mus, ces tus Tshiab hais kom nws mus lawm tom ntug hiav txwv es nce thawj lub nkoj uas nws pom. Ces nws ua raws li tus Tshiab hais tam sim ntawd, tus Tshiab roos nws, cua zoo kawg, ua rau nws mus txog sai. Mus txog lub nroog hais ntawd, nws mus txog Hauv Paus Xa Lus Mas Tais lub tsev loj faj qheb lug, nws pom Mas Tais, nws tsa suab hlo quaj thiab thov Ntuj rau nws. Ces Tswv Ntuj rov muab Mas Tais ob lub qhov muag uas cov neeg txhaum muab dawj ua ib qho chaw ua si lom zem rau lawv rov rau nws tau ua hauj lwm. Mas Tais thiaj rov mus rau Antioche (qhov nov tsis paub hais tias ua cas Mas Tais ho tsis muaj hwj huam yees ntxwv, es ho tos As Nres los muaj hwj huam). As Nres thiaj nyob lub nroog uas cov neeg tau ua phem rau Mas Thais, lawv muab As Nres khi cab rau tom tshav puam. Nws ib ce to los ntshav si laim los nws tseem thov Ntuj rau lawv, yog vim nws cov lus thov Ntuj thiaj ua rau cov neeg tsim nws ntawd cia li tig los ntseeg Yes Xus Pleev, ces nws thiaj mus ntawd mus rau Achaïe.

    (3)Muaj ib tug tub nom, nws ncawg Thwj tim As Nres heev, tab sis nws niam thiab nws txiv tsis kam ces ib hnub nkawd cia tis taws rau lub tsev uas As Nres thiab nkawd tus tub nyob. Cov nplaim taws twb cig siab siab lawm, tab sis tus tub hluas khaws nkaus ib khob dej ntov kiag rau naj ua cas khob dej cia li tuav kiag tau cov hluav taws tuag kiag lawm. Ces ob niam txiv cia li hais tias : « Wb leej tub twb yog ib tug txiv khawv koob loj lawm.» Thaum ob niam txiv tab tom yuav nce ntaiv, Huab tais Ntuj ua nkawd dig muag, nkawd cia li tsis pom kev kiag li lawm. Thiaj muaj neeg qw tias: «Tsis tas neb yuav sib zog ua luaj? Huab Tais Ntuj tawm tsam rau nkawd es neb tseem tsis pom thiab lov! Tsum thiab mas, ntshai tsam ces Tswv Ntuj kev nplua taws poob rau neb.» Ntau tus tim khawv pom li no tag ces lawv ntseeg txog Tswv Ntuj; hos ob niam txiv ces nkawd cia li tuag lawm ces tsib hnub tom qab lawv muab faus.

    Muaj ib tug pog yuav ib tug txiv tua neeg, nws mob plab yug tsis tau me nyuam. Nws hais rau nws tus niam hluas tias: « Koj thov peb tus poj huab tais Diane rau kuv.» Ces dab phem teb tias: « Ua cas koj thiaj tuaj hu kuv uas tsis paub yuav pab koj ? Qhov zoo mas xub mus cuag Thwj Tim As Nres, nws thiaj yuav pab tau koj tus niam laus.»
    Nws thiaj mus coj tau Thwj Tim As Nres tuaj rau tom nws tus niam laus uas tab tom raug kev plhom sij zoo li twb yuav tag mus. As Nres hais rau tias: « Yeej yog lawm mas uas koj mob txom nyem, vim koj yuav txiv yuam kev lawm, koj xeeb tau tus tsis zoo, thiab koj tseem mus kom dab phem saib tsawv thiab. Li ntawd koj yuav tau lees txhaum thiab ntseeg txog Yes Xus Pleev, ces nws cia li yug kiag tau tam sim ntawd (yug tau tus me nyuam tsis muaj sia).» Nws ntseeg txog Yes Xus Pleev thiab nws tu me nyuam ( yog dab los xeeb rau nws) hauv plab cia li nchuav ces nws plab zoo hlo tam sim ntawd.

    (4) Ib tug yawg laus npe hu ua Nicolas, mus cuag Thwj Tim As Nres thiab hais nws tias : « Huab Tais, tau 70 lub xyoo los uas kuv ciaj cev qhev rau tej yam kev tsis ntshiab huv. Ces kuv kuj tau ib phau Ntawv Moo Zoo, thiab kuv thov kom Tswv Ntuj pab kom kuv dim ntawm txoj kev plees kev yi tsis huv. Tab sis ib txwm swm rau txoj kev txhaum no, lub siab tsuas xia plias rau, ces kuv rov poob rau kuv lub neej ntxhov li qub. Muaj ib hnub, kuv siab kub lug rau kev daj deev tsis huv ntawd, kuv tsis nco qab tias kuv nqa rawv ib phau Ntawv Moo Zoo nrog kuv, kuv nkag mus rau hauv ib lub tsev xyiv fab, tam sim ntawd tus Niam txais qhua cia li hais tias : « Tawm mus yawg laus, tawm ntawm nov mus, koj yog Tswv Ntuj ib tug Tshiab. Txhob kov kuv, koj txhob xav txav los ze; vim kuv pom koj zoo li ib tug tau Ntuj txiaj ntsim.» Kuv hnov tus pog hais li ntawd, kuv ntshai tag, kuv mam nco tias kuv nqa phau Ntawv Moo Zoo nrog kuv. Zaum no, Tswv Ntuj tus Leej Ntshiab, txais kuv lub yim rau koj tej kev thov Ntuj rau kuv. Thaum As Nres hnov nws cov lus li ntawd, ua rau As Nres quaj, thiab nws teev Ntuj txij thaum 9 teev txog ntua tav su. Nws teev Ntuj, nws sawv ntsug teev Ntuj, nws tsis kam noj sus, tab sis nws hais tias : « Kuv yuav tsis noj mov txog thaum Tswv Ntuj khuv leej tus yawg laus no.» As Nres yoo mov tau tsib hnub, ib lub suab ntshoo rau As Nres thiab hais tias: « Koj tau qhov uas koj thov rau tus yawg laus lawm, tab sis tus yawg laus tau yoo mov kom tag nws lub zog me ntsis li koj thiab.»
    Ces tus yawg laus yoog mov tau rau lub hlis, nws noj mov ci ntxuag dej xwb, tom qab ntawd nws tau txiaj ntsim zoo, nws nyob thaj yeeb lug. Thiab ib lub suab hais rau As Nres tias : « Vim muaj koj teev Ntuj es kuv rov tau Nicolas uas kuv tau poob lawd. »

    (5) Ib tug me nyuam tub hluas yog neeg ntseeg tau hais qhov uas nws tsi kam qhia rau leej twg li rau As Nres tias : « Kuv niam pom kuv zoo nraug, nws xav kom kuv muaj siab nrog nws, yam li kuv tsis kam, ces nws mus kom rau tus Tswj Hwm Lij Choj, ntxeev kom lub txim poob rau kuv. Koj thov Ntuj rau kuv kom kuv tsis txhob tuag yam tsis ncaj ncees; vim thaum nws hiam ces kuv yeem txhob hais lus li, kuv tuaj yeem tuag uas yuav ua kom kuv niam poob ntsej muag.» Tus hluas tab tom thov kev ncaj ncees : As Nres txawm mus ntawm lawv hais plaub, leej niam hiam khov kho tias nws tus tub xav muab nws yuam deev. Lawv nug tus tub ntau zaus, nws tsis teb li. Ces As Nres hais rau leej niam nov tias : « Auj! Leej niam lim hiam siab phem tshaj tag nrho poj niam tib si, tsuas xav rawv muab koj leej tub twm zeej los ua koj txoj kev zoo siab, ua dev npua nrog koj ! » Ces leej niam hais rau tus Tswj Hwm Lij Choj tias : « Huab tais, tus neeg nov xav tuaj nws tog kom rooj plaub nov cia li tag, yam twb tsis tau pib hais. » Ces tus Tswj hwm Lij Choj siv hwj chim txiav txim kom muab tus tub hluas ntim hauv seev xyaw pob zeb thiab muab roj ntoo pleev sab hnab nraud thiab muab pov hauv hav dej ; thiab tso qeb txam kom lawv muab As Nres ntes mus kaw txog thaum nrhiav tau qhov txaus muab nws ua kom ploj mus.
    Tab sis As Nres teev Ntuj, ces xob tua tib rhe rau cov neeg nyob ntawd ua rau av qeeg nkaws ua rau lawv ntog zom zaws, tib txhij ntawd xob muab tus poj niam tua hlawv ua nws qhuav tag. Sawv daws thov kom Thwj Tim txhob cia lawv tuag. Nws teev Ntuj rau lawv ces rov ntsiag tus yees li qub lawm. Tus Tswj Hwm Lij Choj thiab tag nrho cov nyob hauv lub tsev ntawd ntseeg As Nres.

    (6) Yam li Hauv paus Xas Lus As Nres nyob rau Nis Xes (Nicée), cov neeg zos hais rau nws tias ntu kev uas mus rau tom nroog, muaj xya tus dab tua cov neeg taug kev. Ces Thwj Tim muab cov dab yees ua ib cov dev ntawm tsoom sid xub ntiag, nws hais kom lawv mus deb deb, kom tsis txhob thab leej twg ntxiv lawm. Tam sim ntawd cov dab cia li ploj tag nrho. Tsoom neeg pom li ntawd, lawv ntseeg txog Yes Xus Pleev. Thaum As Nres tab tom mus txog ntawm ib lub rooj loog dua ib lub nroog tshiab, pom ib cov txiv neej tab tom kwv ib tug hluas tuag mus faus; lawv tham qhia nws tias muaj xya tus dev tuaj txog ntawd es muab nws ua tuag saum nws txaj. As Nres cia li quaj thiab hais tias : « Huab Tais Tswv Ntuj, kuv paub tias yog cov dab phem uas kuv ntiab khiav tom Niv Xes ua ntag. » Hais li ntawd tag ces nws hais rau tus tub tuag leej txiv tias : « Koj yuav muab dab tsi rau kuv, yog tias kuv tsa tau koj tus tub sawv rov los? » Leej txiv teb tias : « Nws yog qhov tseem ceeb tshaj plaws hauv ntiaj teb no, kuv muab nws rau koj. » Ces As Nres teev ib zag Ntuj tag ces tsa tau tus tub sawv rov los, ces nkawd thiaj mus ua ke lawm.

    Muaj ib hnub plaub caug tus yuav tuaj kawm kev cai ntawm As Nres no tab sis dab phem ua ib qho nag xob nag cua muab lawv plov, nkoj tawg tag, lawv cov cev ntab los rau ntawm ntug dej, neeg kwv lawv los rau As Nres, nws muab lawv tsa tag nrog ciaj rov qab los. Lawv thiaj piav rau As Nres mloog tias lawv tuaj es lawv raug teeb meem li cas.
    Txij thaum ntawd los, lawv nyeem nws cov hauj lwm tias : « Nws tsa tau plaub caug tus neeg uas dej muab nphau npog tuag sawv rov los. » XH. Jean Beleth hais tias Hauv paus Xa Lus As Nres yog ib tug neeg me, dub tawv tsawv thiab tuaj hwj txwv kom nyos.





    Last edited by Maiv Tooj on 6th March 2013, 8:39 am; edited 2 times in total




    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Hauv Paus Xav Lus As Nres.

    Post  Maiv Tooj on 5th March 2013, 11:41 pm


    Leej Ntshiab As Nres raug txom nyem.



    Leej Ntshiab As Nres nyob As Sais (Achaïe), nws tsim ntau lub tsev teev Ntuj thiab coj tau coob leej los coj Yes Xus Pleev txoj kev Ntseeg. Nws tseem qhia kev thoob tsib rau niam Tiam Lis Aws Zes (Egée), tau muab cov dej Ntshiab ntxuav pli grau nws. Thaum hnov li no lawd, Aws Zes tuaj rau Pas Tas las (Patra) tuaj yuan cov neeg ntseeg kom mus txi dab, teev mlom. As Nres mus cuag nws thiab hais rau nws tias : « Yuav tsum kom koj tus uas ua thoob xwm txoj cai muaj hwj huam nyob ntiaj teb no paub thiab hwm koj tus thoob xwm txoj cai sau Ntuj, thaum uas koj tso koj lub siab teev tej mlom cuav pov tseg. »
    Es Zes teb nws tias : « Yog koj ntag As Nres ! koj qhia txog kev ntseeg saub ua kom ntshai dab uas vaj txheeb Los Mas nyuam qhuav tso qeb txam suaj kaum. »
    As Ntes teb tias : « Cov vaj txheeb los mas tseem tsis tau paub tias Tswv Ntuj Leej Tub los rau ntiaj teb , yog los qhia tias teev dab mlom yog dab phem ntxias neeg ko mua txhaum rau Tswv Ntuj ; kev ua txhaum tau yog ua kom neeg fee ntawm NWS lub ntsej muag, uas yuav hov lawv , NWS yuav tsis yuav, thiab yog tsis yuav, lawv yuav poob cev qhev los rau dab phem ua si, txog hnub uas muab txhua yam hauv lawv lub cev hle tag, ces lawv tsuas tshuav lawv cov txhaum rau lawv nqa mus xwb. »
    Aws Zes hais : « Nej niag Yes Xus qhia tej niag lus ruam ruam thiaj rau dai rau saum ntoo cuam. »
    As Nres teb tias : « Yo gua kom tau txhiv peb es tsis yog nws muaj ib lub txim txhaum thiaj raug dai ; nws yeej txhob txwm tuaj yeem txom nyem rau saum tus ntoo cuam xwb. »
    Aws Zes hais : « Twb yog nws tus thwj tim muab nws rau cov yus das ntes ntes thiab yog cov peeb zeej muab nws ntsia saum ntoo cuam ; tseem yog dab tsi thiab yog tseem hais tias yog nws txhob txwm xav txom nyem nws tus kheej rau lub yeem ntoo cuam ! »
    Ces As Nres thiaj ntshua tsib nqes uas vim li cas Yes Xus Pleev tau txom nyem vim nws xav ua :
    1° NWS yeej xub hais txog nws txoj kev yuav raug txom nyem rau nws cov thwj tim, thaum nws hais, nws hais li no : « Thaum peb mus Yes lus Xas Les, thc… »
    2° Thaum Leej Ntshiab Pob Zeb xav hais kom nws txhob mus, nws twb cem nyha zog tias : « Khiav lawm tom kuv pob tw ; dab phem ! thc... »
    3° NWS yeej hais ncaj qha tias nws muaj peev xwm ua kom nws raug txom nyem, nws muaj peev xwm rov ciaj sia rov los, nws ua tau txhua ya mua ke, yam li thaum nws hais : « KUV muaj peev xwm tso tau txoj sia tseg thiab rov muab txoj sia rov los. »
    4° NWS xub paub cov neeg uas yuav hiam nws, yog thaum nws muab qhov mov ci ntsw kua zaub, txij ntawd NWS tsis ntsia nws ntxiv li lawm.
    5° NWS xaiv qhov chaw uas nws paub tias tus tom nws yuav tuaj qhov twg tuaj. NWS tus kheej yuav ntsia ntsoov tej uas yuav tshwm sim tuaj ; NWS hais tias yuav yog ib qho uas paub tsis tau li txog ntawm tus Ntoo Cuam.
    Aws Zes rov teb tias : « Ntshe ua rau neeg luag xwb os qhov uas hais tias paub tsis txog es yog ua kom txom nyem ; li ntawd yog koj tsis hwm kuv cov qeb txam, kuv yuav muab koj xav mus rau qhov uas paub tsis tau ntawd. »
    As Nres teb tias : « Yog kuv ntshai txom nyem saum ntoo cuam ces kuv yeej tsis cav koob meej li os. Vim kuv xav qhia kom koj paub txog qhov tsis paub txog ntawm tus ntoo cuam ; yog tias koj paub no nyaj koj yuav ntseeg, koj yuav teev thiab koj yuav tau dim. »
    Ces nws pib piav txog qhov uas paub tsis tau txog Kev Txhiv lub Keeb Txhaum ua tsib nqes tseem ceeb xws li :
    1- Thawj tus xub xeeb los ua neeg tau txoj kev tuag los ntawm ntoo los (Kas Ees xua qws ntau As Npes), yeej yog lawm uas tus neeg thib ob yuav rhuav txoj kev tuag pov tseg yuav tau txom nyem nyob saum ntoo.
    2- Tus neeg tsis leem cai twb yog tshwm sim rau ntawm ib daim av tshiab yeej yog lawm uas tus yuav rov tuam choj yuav yug los ntawm ib tug nkauj tsim txiaj ntshiab.
    3- As Das (6) tau tawv ncauj, ncav tes mus rau tsob txiv txwv, yeej tsim nyog lawm uas tus As Das ncav nws ob txhais tes dawb huv rau saum ntoo cuam.
    4- As Das saj tsob ntoo txwv lub txiv qab zib laj siab, yeej yog lawm uas Leej Pleev, thaum nws saj cov kua tsib, los rhuav tshem qhov txawv ntawm tus txawv nws.
    5- Ua kom muaj txoj sia nyob mus li, yuav ua kom Leej Pleev nqa peb txoj kev tuag nrog nws mus : Vim tsis tau tsim Tswv Ntuj los kom txawj tuag, neeg yuav tsis ua kom tsis txawj tuag.

    Ces Aws Zes hais tias : « Kav tsij mus piav koj tej npau suav rau koj cov neeg, thiab kav tsij mloog kuv hais, mus txi cov dab muaj zog tas nrho. »
    As Nres teb tias : « Txhua hnub kuv muab tus yaj ntshiab tsis lo txhaum txi rau tus Tswv Ntuj muaj hwj huam tas nrho, thaum txhua haiv neeg noj nws, tus yaj no ciaj sia thiab nyob mus li hauv lawv. »
    Aws Zes nug tias ua cas ho ua tau li ntawd, As Nres teb tias yuav tsum ua nws cov thwj tim. Aws Zes hais nyha zog tias : « Cia muab koj com tso kuv yuav qhia ntau yam txog qhov ntawd rau koj. »
    Nws npau taws heev ces thiab muab As Nres ntes kaw tsev loj faj. Ib hmos taig kis, nws rov tuaj zaum nws lub rooj txiav txim, nws rov kom As Nres leev mus txi dab, nws hais tias : « Yog koj tsis mloog kuv hais, kuv yuav muab koj dai rau ntawm tus ntoo cuam uas koj cav txog lub koob meej. »
    Thiab nws hem ntau yam kev tsim txom, ces As Nres teb tias : « Kav tsij xev tag puas tsav yam kev lim hiam los txov kuv. Kuv haj yam zoo siab hlo yuav tiv kev txom nyem rau kuv tus Huab Tais, kuv haj yam yuav zoo siab. »
    Ces Aws Zes kom nees nkaum leej txiv neej yawg los rho qws ntau As Nres tag ces muab nws khi tes khi taw com rau ntawm tus ntoo cuam kom nws tau nyiaj mob ntev dua. Zoo li lawv cog nws mus khi saum ntoo cuam (7) muaj neeg coob hais tias : « Nws twb tsis txhaum, cia li muab ib tug neeg rau txim yam tsis tau hais plaub, tsis muaj pov thawj, cia li muab nws tso ntshav. »
    Thawm ntawd Thwj Tim thov kom tsoom neeg txhob cheem nws kev txom nyem ua tim khawv. Thaum As Nres tuaj deb deb pom tus ntoo cuam, nws xyom thiab hais tias : « Sam hwm koj mog, tus khaub lig ntshiab uas Leej Pleev cov ntshav tau tsa thiab tau muab nws lub cev ib daig zuj zus los dai koj zoo li cov nplai nyiaj nplai kub muaj nqes. Ua ntej uas Huab Tais raug dai rau ntawm koj, koj yog ib qho chaw txias siab rau ntiaj teb neeg ; zaum no koj yog qhov uas neeg ntshaw yog thaum paub txog qaum ntug txoj kev hlub lawm. Kuv zoo siab hlo los ua kom koj zoo siab rov los ntsib koj tus thwj tim uas ploj lawm. Kuv nyiam koj mus li, kuv xav nyob ze koj. Auj ! tus ntoo cuam muaj nqes uas tau txais koob meej thiab kuv tus Huab Tais tej tes taw muaj hwj huam. Koj yog qhov kuv ntshaw los ntev lawm, kuv ntshaw tij ywm rau hauv kuv lub siab ib leeg, kuv nrhiav koj tsis tseg, kuv tus plig ntshaw nraim lub caij yuav ntsib koj, zaum no kuv nrhiav tau koj lawm, koj xaiv kuv hauv ib tsoom neeg, thiab cev kuv rau kuv tus Tswv kom nws tau txais kuv ntawm koj los, yog muaj koj es NWS thiaj li txhiv tau kuv tej txim txhaum. »
    Nws hais li no tag, nws hle nws cev ris tsho nws muab cev rau cov tuaj ntes nws tag ces lawv muab nws dai rau saum ntoo cuam li nws tau hais rau lawv. Nws dai ncuv saum ntoo cuam los tshaj Ntuj lus rau nees nkaum txhiab leej neeg uas tuaj zov ncig nws tau ob hnub. Tsoom neeg no tau cem Aws Zes zom zaws uas muab As Nres ua kom tuag ; lawv tias As Nres yog ib tug neeg ntshiab neeg zoo, tsis tsim nyog yuav muab nws tua, ces Aws Zes tuaj tso nws. Thaum As Nres pom nws As Nres hais rau nws tias : « Koj tuaj xyuas peb dab tsi ? Yog tias tuaj thov txim no koj yuav tau txais ; tab sis yog tuaj daws kuv ntawm ntoo cuam no, nco ntsoov tias yog kuv tseem ciaj sia mas kuv yuav tsis nqes saum ntoo cuam los. ( 8 ) Kuv tus Huab Tais twb tos kuv lawm. »
    Tsoom sid xav tso nws, tab sis tsis muaj tus yuav tso tau li, vim leej twg cev tes mus daws nws ces ob txhais npab cia li txhav thiab tuag kiag li ua tsis tau zog li lawm. Thaum As Nres pom tias tsoom neeg xav tso nws, nws hais zaj thov Ntuj no saum ntoo cuam zoo li Leej Ntshiab Aus Nkws Xaws Tees phau ntawv Lees Txhaum : « Huab Tais Tswv Ntuj, txhob pub kom kuv tau nqes saum ntoo cuam ciaj, txog caij lawm uas kuv yuav muab kuv lub cev tso rau daim av rau koj, vim tias yog thaum kuv tseem nrog nws, kuv tseem saib xyuas nws ; kuv rau siab khwv kom maj mam dim, thiab xav hle kom tau cev khaub ncaws tuab tuab. Kuv paub tias kuv hnav cev khaub ncaws nyhav npaum li cas, yeej kov tsis yeej nws li, kuv nkees tsij taws kom kug (kub nyhiab tag), xav kom kum tag sai sai. Tswv Ntuj, koj puas paub tias nws rub kuv kom kuv dim ntawm kuv lub tswv yim xav muab kuv tus plig txi rau koj npaum li cas ; nws sib zog rub kom kuv dim ntawm nruab dab ntub uas kuv yuav tau los pw tsaug zog ntawm koj. Txhua zaud, twb yog plaub zaug lawm uas nws ua kom kuv mob tshaj. Txhua zaus uas kuv tau nyiaj mob, Leej Txiv lim xeeb, kuv ua tiag nyiaj tawm tsam es zaum no kuv yeej vim muaj koj pab. Kuv thov KOJ uas tus ua yog, ncaj ncees thiab hwm Ntuj txhov muab kuv rov tso rau kuv lub cev lawm ; tab sis kuv yuav muab tso rau koj teem tseg. Koj mam muab rau lwm tus, txhob cia nws ua laj kab thaiv kuv. Txawm yuav khaws cia thiab cia kom tsa ciaj sawv rov los yeej yog kom koj tau hwj huam rau nws tes dej num. Koj muaj nws tso rau hauv av kom kuv txhob tau zov, kom nws txhob txiav kuv txoj kev xav los cuag koj uas yog lub keeb txoj sia thiab kaj siab lug tsis kawg. » (Saint Augustin, De vexa et falsa poenit., c. VIII)
    Nws hais li no tag, muaj ib qho pom kev lam lug ci nqes saum ntuj los vij nws ntev li 30 fiab (mn), kom txhob muaj leej twg yuav ntsia tau li, (9)thiab thaum qhov pom kev ci no ploj ces nws txoj sia tu tib txhij nrog. Mas Xis Mis Lias, Aws Zes poj niam, txo Hauv paus Xa Lus lub cev coj mus faus rau lub sam xeeb. Aws Zes ces, los yuav txog tsev, dab phem nthos tau nws, nws cia li tu pa ntawm kev rau ntawm sawv daws xub ntiag.
    Lawv tias Leej Ntshiab As Nres lub ntxa tawm ib cov hmoov dawb dawb li hmoob nplej thiab ib cov roj tswv tswv qab. Cov neeg zos ntawm lub teb chaws ntawd mua bua ib qhov tsawv sim. Yam li tias xyoo twg yog tawm ntau ces xyoo ntawd lub teb chaws tau qoob loo ntau, yog xyoo twg cov roj thiab hmoov dawb tawm tsawg ces xyoo ntawd tau qoob loo tsawg. Nov yog yav thaum ub xwb, zaum no hnov tias lawv muab nws lub cev coj mus rau Constantinople lawm.






    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5044
    Date d'inscription : 2009-08-18

    Re: Hauv Paus Xav Lus As Nres.

    Post  Maiv Tooj on 12th March 2013, 9:38 am



    Muaj ib tug Tswv Qhia ua lub neej ntshiab huv, nws nyiam teev Leej Ntshiab As Nres, yam li nws xub muab Huab Tais Tswv Ntuj thiab As Nres ua ntej tshaj nws lub luag hauj lwm. Li ntawd, tus yeeb ncuab txwv nyeej puaj tiam khib khib Tswv Qhia tus neeg uas ntshiab huv, ua txhua yam los dib, deev nws siab tsis tau thiaj li txia ua ib tug poj niam zoo nkauj thiab zoo heev. Nws tuaj ntawm Tswv Qhia lub vaj loog, ua txuj yuav tuaj daws Txhaum ntawm nws. Tswv Qhia tso qeb txam kom mus daws txhaum ntawm nws tus Txiv Plig Daws txhaum uas nws muaj hwj huam heev, tab sis tus pog teb tias nws yuav tsis kam qhia rau leej twg li tsuas yog Txiv Tswv Qhia tib leeg xwb. Ces Tswv Qhia siab muag rau nws cov lus thiaj cia nws los tsev. Nws los hauv tsev thiab hais tias :
    « Kuv hais tseeb rau koj, Huab Tais, khuv leej kuv os. Vim kuv tseem hluas heev li koj pom no, ib txwm hlob nyob hauv txoj kev tau zoo thaum yau los, yug hauv tsev neeg noob nom noob tswv, kuv muab cov neeg mus teev Ntuj chaw ntshiab (pèlerin) cov khaub ncaws hnav nyiag tuaj qhov nov ib leeg. Vim kuv txiv uas yog ib tug vaj ntxwv muaj hwj huam heev yuav muab kuv yuam yuav ib tug yawg tseem ceeb; tab sis kuv teb nws tias kuv ntxub txoj kev sib yuav heev, vim kuv twb muab kuv lub cev nkauj xwb los txi rau Yes Xus Pleev tib leeg mus tag ib txhiab ib txhid. Li ntawd kuv thiaj tsis tseev kom kuv plam kuv lub hom phiaj nov li. Kuv maj maj kom kuv tau mloog Yes Xus cov lus txib kuv, los yog yuav txais txhua yam kev txom nyem ntiaj teb, kuv thiaj li nyiag kev tij ywm, kuv tuaj yeem khiav zoo dua yuav thim kuv tej lus uas kuv tau cog rau kuv tus TXIV (Yes Xus, Fab Kis nyiam hais tias thaum yus txais lub Cim Cog Lus ua Phauj mas yog ua tshoob nrog Yes Xus, ces lawv thiaj hais tias Yes Xus yog lawv tus txiv). Koj lub koob meej ntshiab huv nrov txog kuv pob ntseg, kuv thiaj txhob txwm tuaj nkhaum hauv koj phab tis rau koj roos kuv, vam tias kuv yuav tuaj nrhiav tau koj ua kuv qhov chaw so uas kuv yuav zoo siab tij ywm tias yuav tau ntsia Tswv Ntuj li qhov kuv ntshaw tshaj, yuav cawm kuv ntawm kuv lub neej nchuav no, yuav muab tej suab sab thiab lub ntiaj teb ntxhov ua zog koog faus tseg tsis hnov. »
    Txiv Tswv Qhia ntsia nws, qhuas thiab xwv nws lub hwj chim meej mom ntxhais nom, cev ntaj ntsug zoo nkauj thiab tus neeg muaj lub siab ntseeg zoo, thiab lub suab lus mos nyoos ntxim nyiam, ces Tswv Qhia teb nws mos nyoos tias :
    « Txhob txhawj, me ntxhais ; txhob ntshai lawm, tus uas koj muab txoj kev hlub tag nrho es muaj peev xwm txo koj lub hwj chim, tso koj niam koj txiv, koj lub cuab tam uas yog koob meej hauv lub ntiaj teb no tseg, nws yuav muab txoj kev kaj siab rau lub neej tom ntej rau koj. Ib yam li kuv uas yog nws tus tub txib tub txuas, kuv muab tag nrho txhua yam uas yog kuv tug rau koj : Koj xaiv seb koj nyiam chav tsev twg, kuv xav kom hnub no koj nrog kuv noj mov ua ib tsum. »
    Nws teb tias : « Ab ! Txiv Plig, tsis txhob ua li ntawd rau kuv tsam ces luag tej ho xav yuam kev thiab yuav ua puas koj tus uas muaj koob nto npe. »
    Txiv Tswv Qhia teb tias: « Peb coob leej nyob ua ke, tsis yog wb ob leej xwb, luag yuav hais tsis tau dab tsi rau wb. »
    Cov qhua los noj mov, Txiv Tswv Qhia muab pog zaum ib tog rooj, Txiv Tswv Qhia zaum ib tog ntawm pog xub ntiag hos cov qhua zaum ntawm nkawd ob sab lub rooj. Tswv Qhia ntsia ntsoov tus pog no; nws ib sij laim muag ntsia ib zaug saib pog qhov zoo nkauj. Thaum nws qhov muag ntsia ncaj qha rau li ntawd, nws tus plig twb raug lawm (raug dab), thaum nws ib sij ntsia ib lwm ntawd tus yeeb ncuab puaj txwm twb tua ib xib xub mus chob nws lub plawv. Tus Dab, xam txhua yam, nws ua kom nws zoo nkauj dua ntxiv. Ua rau Tswv Qhia yuav luag zoo siab swb rau lub txim tuag uas tus neeg no ntxias, tam sim ntawd muaj ib tug neeg teev Ntuj chaw ntshiab (Pèlerin) txawm tsoo qhov rooj nrov nrov thiab qws nrov nrov kom qheb nws qhov rooj, ces Tswv Qhia txawm nug tus poj niam seb nws puas kam txais tus neeg taug kev teev Ntuj ntawd. Tus poj niam txawm hais tias :
    « Peb muab ib cov lus nyuaj nug nws seb yog nws teb tau no ces mam cia nws los tsev; yog tias nws tsis paub no ces peb cia nws khiav mus , vim nws ruam dhau ces tsis tsim nyog yuav sawv ntawm Tswv Qhia lub xub ntiag. »
    Sawv daws npuaj teg rau nws lub tswv yim zoo, thiab txawm sib nug tias leej twg thiaj muaj peev xwm yuav nug tau cov lus tob. Yam li nrhiav tsis tau leej twg li ces Tswv Qhia hais tias : « Tseem yuav nrhiav leej twg ntxiv thiab, madame, thiaj yog tus txawj thiab paub tab tshaj peb sawv daws ? Koj cia li nug kiag ib los rau xwb mas.”
    (10) Nws teb tias: “ Peb nug tias Tswv Ntuj ua tau dab tsi zoo tshaj hauv tej yam me me?”
    Tus neeg teev Ntuj teb tias: “Yog qhov tseeb thiab lub ntsej muag zoo tshiab khiv, hauv tsoom neeg puag thaum ntuj tsim teb raug xeeb los txog niaj hnub no thiab yuav nyob mus ntxiv lawm yav tom ntej, luag yuav paub txog ob lub ntsej muag zoo sib xws tsis txawv, li ntawd nyob ntawm ib lub me nyuam ntsej muag me me, Tswv Ntuj muab tag nrhog neeg lub cev los zwm rau (lub taub haus kav tag nrho txhua yam).”
    Thaum lawv hnov cov lus teb no, lawv qw ntsoog nqees tias yog kawg, teb raug cov lus nug kawg li. Ces tus pog hais tias peb rov nug dua ib zaug kom nyuaj dua ntxiv kom muab nws caws ntxiab kiag: “Peb nug tias qhov av twg thiaj siab dua lub ntuj tag nrho?”
    Tus neeg teev Ntuj teb tias: “Nyob hauv lub ntuj ceeb tsheej uas txoos tag nrho cov txhaum , qhov ntawd muaj Leej Pleev lub cev nyob. Yog Leej Pleev lub cev tiag, uas nws siab tshaj lub ntuj tag nrho, yog xuas peb cov nqaij ua; vim tias peb cov nqaij yog xuas av puab los: Li ntawd Leej Pleev lub cev thiaj siab tshaj lub ntuj tag nrho, thiab keeb kwm peb cov nqaij yog los ntawm nws los, vim peb cov nqaij yog xuas av ua los, li ntawd muaj tau pov thawj tias ntawm qhov uas Leej Pleev lub cev nyob, hov av ntawd yeej siab tshaj lub ntuj.”
    Tus tub coj lus los hais tus neeg teev Ntuj cov lus tag, lawv pom tias nws thoob tsib heev, nws hais tau zoo heev cov lus no. Ces tus poj niam rov hais dua tias peb rov nug ib cov lus nyhav, nyuab thiab teb nyuaj heev ua zaum peb ntxiv kom xwv thiaj tsim nyog nws los zaum koom tsum nrog Txiv Tswv Qhia. Nws nug tias:
    « Daim av thiab lub ntuj sib nrug deb npaum li cas ? »
    (11)Tus neeg teev Ntuj teb rau tus coj lus kom xa lus mus rau lawv tias : « Mus nug tib tug uas nug cov lus no. Nws yeej yuav tsum paub teb zoo dua kuv yuav hais ; vim nws tus kheej kiag ntag uas tau ntsuas qhov nov, thaum uas lub ntuj poob rau hauv khuab ha; kuv mas kuv tseem tsis tau poob dua saum ntuj rau hauv khuab ha, kuv tsis tau ntsuas qhov deb no. Vim tsis yog ib tug poj niam, tab sis yog niag dab yees zoo li ib tug poj niam xwb. »
    Hnov cov lus no, tus coj lus cia li tsaus muag thiab hais ntawm cov qhua xub ntiag rau sawv daws hnov. Ua rau sawv daws ceeb tag nrho, ces niag yeeb ncuab txwv nyeej puaj tiam cia li ploj ntais. Tswv Qhia mam rov xeev los, nws tsis zoo siab rau nws tus yam ntxwv thiab tu siab rau nws kev ua txhaum thiab thov kom lawv zam txhaum rau tej uas nws tau ua tsis raug qhov muag. Nws kom lawv cia li mus qheb tus neeg teev Ntuj qhov rooj thiab coj los tsev, tab sis lawv nrhiav tsis pom li lawm. Tswv Qhia thiaj hu neeg zeg neeg zos tuaj nug, nws tham ib qho zuj zus txog qhov xwm uas tau tshwm sim ntawd, thiab kom sawv daws yuav tsum yoo mov thiab teev Huab Tais Tswv Ntuj seb puas qhia tus neeg teev Ntuj uas tau pab cawm nws ntawm txoj kev tuag ntawd yog leej twg. Hmo ntawd pw ces nws los hais rau Tswv Qhia tias yog Leej Ntshiab As Nres, kom tau cawm lawv, nws txia ua ib tug neeg teev Ntuj. Txij ntawd los Txiv Tswv Qhia tseem haj yam rau siab teev Hauv Paus Xa Lus ntshiab ntau dua ntxiv.
    Ib tug thoob xwm txoj cai ntawm ib lub zos txeeb Leej Ntshiab As Nres ib thaj teb, Tswv Qhia teev Ntuj ces yawg cia li kub cev heev heev. Nws mus cuag Tswv Qhia thiab hais rau yawg tias nws mam li hais kom Tswv Qhia yeej thiab rov muab daim teb rau nws. Tab sis thaum Tswv Qhia thov Ntuj rau nws zoo lawm ces nws rov txeeb thaj teb dua ntxiv thiab. Ces Tswv Qhia rov teev Ntuj dua, ua rau cov teeb hauv tsev teev Ntuj tawg tag, ces nws hais tias : « Nej tsis txhob taws cov teeb no txog thaum Tswv Ntuj rov pauj nws tus yeeb ncuab, thiab kom lub tsev teev Ntuj rov tau qhov uas nws tau poob lawd. »
    Li ntawd tus thoob xwm txoj cai thiaj rov kub cev dua; nws tso neeg mus hais Tswv Qhia thov Ntuj rau nws tso nws mam li muab teb rau lawv thiab tseem yuav ntxiv ib daim li ib npaug ntxiv. Yam li txhua zaus, Tswv Qhia yeej teb rau nws tas mus li : « Kuv twb thov Ntuj lawm, Tswv Ntuj twb pab kuv, » ces lawv kwv yawg thoob xwm yuam qhe nkag mus hauv tsev teev Ntuj kom tau mus teev Ntuj.
    Tam si muas Tswv Qhia nkag los tsev ces yawg thoob xwm siav cia li tu nrho ces lawv thiaj li rov muab cov teb rau lub Koom Txoos.

    Txhais tim 12/03/2013.





    Sponsored content

    Re: Hauv Paus Xav Lus As Nres.

    Post  Sponsored content Today at 12:54 pm


      Current date/time is 3rd December 2016, 12:54 pm