Paj Lug txog ib tug yawg nrhiav txiv ntoo cog

Nyob zoo ib tsoom phoojywg sawv daws,

ntawm no kuv yuav sau ib txoj paj lug uas Leej Tswv Yim Ntshiab nyuam qhuav xav los rau kuv tus nus lub lis piam tas los no.

Yav sawv ntxov thaum yuav kaj ntug thaj tsam 5 moo sawv ntxov, kuv tus nus hu ua Vaj Xob pw tsis taus, nws tig ib hmos, yuav kaj ntug nws txawm looj kiag me me, hnov ib lub suab hu nws, thiab hais rau nws tias: " Me tub, koj sau zaj paj lug no tseg rau koj nawb "

Lub suab pib li no : " Muaj ib tug yawg Hmoob, muaj vaj muaj tsev, nws xav cog txiv hmab txiv ntoo rau nws lub vaj, nws txawm mus ncig hauv kiab khw, nws mus txog thawj lub tsev muag khoom, nws xav yuav yub txiv ntoo los cog tiam sis thawj lub khw tsis muaj ces nws txawm mus nrhiav lwm lub khw muag khoom, lub khw thib ob ho muaj txiv ntoo cog, ces tus yawg txawm yuav tau ob tsob txiv ntoo los cog, ib tsob yog txiv kab ntxwv, ib tsob yog txiv apple (Pomme), tus yawg coj ob tsob txiv ntoo los cog, nws rau siab ntso ywg dej thiab rau chiv rau ob tsob ntoo, ces ob tsoo nto hlav mos nyoos, tsis ntev xyoo ob tso ntoo twb tawg paj txi txiv lawm, nws xav xav nws txawm hais tias: ob tsob txiv ntoo no zoo dhau lawm kuv xav mus yuav dua ib tsob txiv duaj los cog.

Tus yawg ntawv txawm rov qab mus ncig hauv lub khw thib ob uas nws yuav ob tsob thawj txiv ntoo, tiam sis lub khw thib ob hais tias tsis muaj txiv ntoo cog lawm, ces tus yawg rov qab los ncig txog thawj lub khw, ua cia pom thawj lub khw muag yub txiv duaj, tus yawg thiaj yuav tau ib tsob yub txiv duaj los cog, nws coj los cog tsis deb ntawm ob tsob nws xub cog, nws kuj tu ,ywg dej thiab rau chiv rau kom hlav mos nyoos, tiam sis thaum tus yawg pom tau tias nws ob tsob txiv ntoo nws xub cog loj heev thiab zoo nkauj heev, txi txiv ncw ncw liab plwb ploog, ua rau nws zoo siab heev ces nws cia li tso tseg tsob txiv duaj tsis saib tsis xyuas tsis tu , tsis ywg dej, tsis rau chiv li lawm.

Txij ntawv los tsob me txiv duaj tsis tau dej tsis tau chiv, nroj tsuag fab zuj zus tuaj cetsob me txiv cia li hlob tsis taus, maj mam hlav daj lis rau dej nag ywg, tsob txiv duaj nrog nroj tsuag sib txeeb hlav.

Tom qav ob tso txiv ntoo uas tus yawg xub cog me txiv siav, nws mus de los noj na ua cas tib co txiv ntoo qaub qaub, lub iab los muaj, lub qaub los muaj, tsis tau zoo ib lub txiv ntoo noj li, tus yawg mam li tig ntsia tsob txiv duaj ua cas nws tsis tu li hos tib tso mi siab siab fab fab, mos mos, me nas me noog ntsauv zom zaws, los ua ze noog dai ncwb ncuv rau saum tej ntsis ntoo, tus yawg xav xav nws txaj muag rau tsob txiv duaj, ces nws khiav nkaum tsob txiv duaj, tsis tawm mus ncig saib ncig xyuas li lawm.

ib xyoos tom qab tsob me txiv duaj txawm hlob tuaj, tseem siab tshaj ob tsob thawj txiv ntoo uas xub cog, dej nag ywg hlob xwb ce stsob txiv ntoo khov kho, tsis muaj chiv pab, tiam sis muaj nroj tsuag sib tw laum ces tsob txiv siab tshaj nroj tsuag thiab mos nyoos tuaj, tawg paj txi txiv siav, tej me txiv mas tsw ha ntxiag tsw qab zib, nas noog tau kev los noj tej txiv ntoo ncw zom zaws.

Muaj neeg dua kev lawv pom tias tsob txiv siav poob zom zaws los tus yawg tsis tuaj khaws ib lub mus noj, lawv txawm khaws mus saj, tsob txiv qab zib nto ntsis, lub txiv txi hauv paus mus nto ntsis los qab zib tag, lawv thiaj qhuas puv teb chaws tias tsob txiv duaj ntawv thiaj yog tau Ntuj txiaj ntsim.

Tus yawg uas cog tsob txiv duaj ces txaj txaj muag, xav de ib lub noj los tu siab, vim nws tsis tau pov ib lub chiv los ywg ib thoob dej rau li ce snws ua siab tsis noj, vim nws txaj muag heev rau nws."

Lub suab hais txoj paj lug no rau kuv tus nus txawm txuas ntxiv tias : " Me Tub, zaj paj lug no yog koj txoj nawb, koj txiv yog tus yawg, ob lub khiab khw yog nws ob tug pojniam, niam loj thiab niam yau, thawj lub khiab khw yog koj niam, lub kiab khw thib ob yog niam yau, ob tsob txiv xub cog yog koj ob tug tij laug xub yug los ntawm niam yau los, tsob txiv duaj cog tom qab yog koj, niaj hnub no nej peb leeg tub muaj neej ua tag, tiam sis niam yau ob tug tub tau txiv nyiaj thiab txiaj mus ua neej, hos koj ces tsis tau, tsuas yog niam tau li cas muaj li ntawv, tiam sis nim no koj tau Tswv Ntuj lub txiaj ntsim, koj ua neej muaj me tub me nyuam puv vaj puv tsev, hos koj ob tug tij laug tus muaj me nyuam kuj muaj tug puav, tus tsis muaj kuj tsis muaj, koj txiv pom tias koj lub neej zoo, ua Tswv Ntuj dej num coj tsoom ntseeg teev ntuj, koj thiaj yog tus nyob ntawm Tswv Ntuj xub ntiag, es zoo siab hlo sau koj zaj pj lug no tseg."

Lub suab cia li ploj zuj zus lawm, kuv tus nus Xob Vaj mam li sawv tsees los muab mem sau tsuag tsuag cia...

Xav tsis txog Tias Huab Tais Yesxus lub txiaj ntsim thiab tej paj lug tseem nij hnub nrog peb nraim. Amen.

Maiv Paj, koj tu nus zaj paj lug nov yeej yog ib zaj zoo. Tswv Ntuj txhawb nws lub zog thiab qhia txog nws lub neej rau nws. Muaj tseeb tiag, Tswv Ntuj lub Txiaj Ntsim yeej nyob nrog peb tas li. Tswv Ntuj yeej txhawb peb txhua lub sij hawm yog tias peb ntseeg thiab tso siab rau nws. Tswv Ntuj lub siab zoo tas nrho.

Nyob zoo Maiv Paj Lug,

Muaj tseeb dab laug Xob zaj npau suav no, tab sis kom nws zam rau luag mog, yog luag tsis paub luag thiaj ua rau yus. Txhob tu siab, txhua yam muaj sia tshwm sim rau qab ntuj khwb no nyias muaj nyias txoj koob hmoov los ua neej. Thaum yau ces yuav vam luag pab yus thiaj yuav hlob tau, yog ntxeem loj hlob lawm ces nyias yeej txawj txawj ua nyias lub neej. Kom nws txhob tu siab rau yav neej dhau los, tej zaud nws txoj hmoov yog tau zoo rau yav nws loj, nws cov kwv yog txoj hmoov tau zoo thaum nyob niam txiv xub ntiag.