Home
Yog koj tso siab rau Yesxus lub siab ntshiab, nws yuav ua koj siab kaj lug 
 |
Thaum 1965, TP. Tshaj Sawm thiab Xib Hwb Lis nkaj Teev nyuam qhuav mus nrog rau Khej Me, nkaws nrog Xib Hwb Nom Thoob txiv uas Ntxoov Xyooj Yaj nyob. Ces mam li yuav ua tsev ces mam li mus txiav kuj yem los cuam yuav ua tsev. Ces muaj ib tug Hmoob Lis hu ua Nyiaj no nyob ntawd. Nws muaj ib lub tsev, tab sis lub tsev ntawd nyob ncaj Dab txoj kev, ces muaj ib hnub thaum qaib qua, dab los mus ces raug nws poj niam. Ces nws poj niam cia li poob txag, npau ntshav dhev, ces lawv ntshai ntshai, lawv cia li muab niam Nyiaj rho tawm qhov phab ntsa lawm. Ces lawv thiaj tuaj hais rau Txiv Plig wb hais tias yog tseem yuav ua tsev, seb wb puas kam yuav Nyiaj lub, Nyiaj yuav muab muag. Yog wb yuav no ces yuav muab muag rau wb. Ces twb thiaj hais tias, wb yuav kawg seb nws yuav muag npaum li cas? Nws hais tias 200 Bath, ces Txiv Plig wb hais tias: Ub! 200 npaj ces wb yuav. Ces wb thiaj li yuav Nyiaj lub tsev, wb mus kho rau. Hmo ntawd wb kho Nyiaj lub tsev tag ces hmo ntawd peb mus pw, taig kis ib hnub tseem, muaj cov Hmoob Yaj ib tug hu ua Nkaub muab tau ib tug poj qaib plhuaj taub coj ib pab me nyuam muab pub rau wb. Hais tias wb tau tsev lawm ces muab pub rau wb yug. Ces muab tau ib rab taus Hmoob rau kuv thiab. Ces hnub tom qab kub txawm hais tias Awb! Tsis muaj taws rauv lawm ces, nyob ntawm qaum tsev muaj ib lub niag pob ntoos qhuav, uas lawv ntov lawm txij qab nthab, kuv txawm mus muab lub niaj pob ntoos ntawd khob khob, tsoo cov niag cag ntoo los rauv. Thaum kuv tsoo cov cag ntoo ntawd ces txawm muaj ib cov dab ntxaug tawm los, cov dab ntxaug mas me me liab liab luaj li ntiv tes rwg qab; txiv ntswg me me ntev ntev hos ko tw liab liab, ib tug tuav ib tug ko tw tawm hauv cov niag qhov cag ntoo hauv los nim no laim laim rau kuv saib kom kuv ntshai no tab sis kuv tsis paub dab tsi li ces kuv tsis ntshai, kuv cia li xuas roob tau hus tsuag tsuag los pov rau niag poj qaib, ces niaj poj qaib cia li muab rau me nyuam noj tas tsis muaj dab tsi li lawm. Ces TP. Wb thiaj li ua lub tsev teev Ntuj nyob ntawm lus hauv paus ntoo rau sab xis sab tod, kuv lub tsev nyob mas nyob ntawm lub hauv paus ntoo ntawd qab ntoos. Ua tau lub tsev teev Ntuj ces Txiv Plig yuav tau ib lub teev Mouchon , teeb tsog ( cig pom kev ib yam li hluas taws xob)ces hnub hnub Saturday, kuv yuav qhia Ntuj Kev Cai thiab ntawv Hmoob ces kuv taws lub teeb, kuv muab dai rau saum lub thaj Txiv Ntuj saud pom pom kev. Ces cov neeg tuaj zaum ntawm qab rooj Txi Ntuj ntawd. Hnub ntawd Txiv Plig tseem mus nram nroog lawm, kuv qhia Ntuj Kev Cai rau sawv daws, tseem tab tom qhia txog qhov tias: Ntuj tsim neeg, tsim dab, tsim tsiaj ntxhu tas puas tsav yam". Tab tom qhia txog qhov nov ces cas cia li muaj ob tug nas me me=ob tug dab ntxaug tawm hauv kab niag tawg pleb los. Sib tuav tw liab liab, tawm plaws los saud ces txawm ua ntshee ntshee ces kuv cia li xuas kiag ko taws xuab kiag mus ntsaws rau hauv kab niag tawg pleb ces tas li.
Thaum ntawd mas cov Hmoob uas tseem tsis tau ua Ntuj Kev Cai es lawv tuaj nyob sab nraum zoov xauj kuv qhia Ntuj Kev Cai mas ntshai tsis ntshai li os. Cov Hmoob mas hais tias "Haub! Cov ntawd mas yog kwv tij xwb os, cas Xib Hwb lawv es ua tau ua luaj li es muaj peev xwm ua tau li...! Es lawv tseem mauj peev xwm muab ua tau li ntawd ho tsis ua dab tsi rau lawv?
Xib Hwb lawv txoj mas ntshe yog txoj yog tiag, vim lawv twb muab peev xwm tsuj dab ntxaug kiag, dab ntxaug twb tsis tom lawv.
Txiv Plig Tshaj Sawm wb nyob tau ib xyoo tom qab ces muaj ib tsob niag Faj Khaum nram qab Tsev teev Ntuj. Tsob faj khaum ntawd muaj cov niag ntoo zes dav nyob ntau ntau saud, mas muaj dab ntxaug nyob saud. Yog xyoo twg, thaum twg muaj ib tug qaib qus ya los tsaws saum tsob ntoo ntawd mas nyob lub zos ntawd muaj ib tug neeg mob, yuav tuag xwb li. Ces Txiv Plig wb txawm xav tias tso ntoo ntawd nyob ze ze wb tsev thiab tsam muaj cov niag ntoo ze dav ntau ntau saud, lub caij hlawv teb ho lam muaj txim taws los txais ces cia wb ntiav ib niag mab daum quab yeeb ntob, muab txo ceg tag nrho. Niag Thaib hais tias yog nws ntov thiab txo ceg tas no Txiv Plig yuav muab li cas rau nws. Ces Txiv Plig txawm hais tias muab 100 Npaj, ces tus Thaib zoo zoo siab, nws thiaj muab txiav ceg tas du lug, hnub ntawd Hmoob mus teb ib hnub los txog naj cas tsob niag faj khaum nqha nrig, tsis pom muaj ceg ntoo qhov twg, cov niag ceg muab txo poob tag lawm. Ces Hmoob hais ncha nthi, Hmoob hais tias cas txiv Plig lawv es yuav muaj peev xwm ua luaj li es muab tsob niag faj khaum ntaws txo tag lawm es dab ho tsis ua dab tsi rau lawv?
Rau qhov thaum txo cov niag ceg ntoo ntawd tag, tos qhuav me ntsis, kuv tseem nqa taus mus muab txiav los ua taws rauv huc si thiab. Hmoob mas twb tsis kav mus txiav ib tug ceg, twb ua rau lawv mob lawm.
Xyoo ntawd tas, xyoo tom qab muaj ib yam Hmoob Vaj nyob pem qhov dej, yog yim Hmoob uas xub xub txais Ntuj Kev Cai, nws tuaj hais rau kuv tias nyob pem lawv zos ped muaj ib lub tiag zoo mas muaj ib lub tiaj zoo, hav zoov zoo ua teb kawg nkaus li, tab sis muaj ib tsob faj khaum muaj ib cov ntoo yiag zoo nkauj kawg nyob ze ntawd tab sis tsis muaj neeg mus txiav tau cov ntoo ib ncig kiag li. Yog leej twg mus txiav cov ntoo ntawd mas ua mob kiag thiab los ntshav ntswg kiag. Yuav tsum ua neeb kho xwb. Ces kuv thiaj hais rau Vaj tub hais tias:
"Koj txhob ntshai...! Koj mus mas koj mus teev Ntuj, koj hais tias koj yog Ntuj ib tug neeg thiab, qhov nov yog ib thajk chaw ua noj ua haus, koj tsuas tuaj luaj teb ua noj ua haus xwb. Koj mus luaj, koj tsis ntshai li os".
Ces tus Vaj Tub thiaj mus luaj thaj teb ntawd tas, muab hlawv tas, kuv zoo kawg nkaus li. Thaum ua nplej tab tom tuaj, yuav ua plab nab zom zaws, kuv mus xyuas Vaj Tub, Tub thiaj hais rau kuv tias: “Awb! Xib Hwb oj! Kuv ua raws nraim li koj hais, kuv ua li koj hais, kuv los luaj daim teb nov, kuv muab hlawv tas cog tau nplej mas zoo kawg nkaus li tsis muaj dab tsi li”.
Khej Me 1968
Last edited by Maiv Tooj on 19th February 2021, 7:05 am; edited 9 times in total
.JPG)
Vim li cas peb cov Kas Tos Liv ntseeg tias NIAM MAB LIAB yog TSWV NTUJ Niam? caws nej mus nias nyeem tau hauv no.
Leej Tshiab Mis Kas Ees thov koj pab tuav thiab saib xyuas peb lub Vas Sab Hmong Catholique ntawm no kom ruaj nrees.
