Copyright@2010 Hmong Roman Catholic / Pictures-all rights reserved, reproduction and copy prohibited _HMONG: USA,FRANCE,GUYANE,THAILANDE,VIETNAM,LAOS,CHINE...

XH.XYOOJ THOJ PAUL YUAV UA THAWJ TUG LEEJ NTSHIAB HMOOB

Gallery


Suav neeg tuaj saib, txij hnub 17/09/2010 los mus.


    Mab Liab tshwm sim nyob L'Ile-Bouchard, Fab Kis teb, 1947.

    Share
    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5325
    Date d'inscription : 2009-08-18

    Mab Liab tshwm sim nyob L'Ile-Bouchard, Fab Kis teb, 1947.

    Post  Maiv Tooj on 16th September 2012, 8:50 am







    Mab Liab tshwm sim 10 zaus nyob L'Ile-Bouchard, Fab Kis teb, 1947.
    Ua Koom Txoos Catholic lees paub.




    Kuv lam muab txhais cov ntsiab lus me ntsis raws li nram no. Yog nej leej twg paub lus Fab Kis, mas yuav hais tau deev siab dua cov lus kuv txhais. Vim yog Jacqueline tus kheej yog tus piav kiag. Mloog nws tham mas cuag li yus twb nrog lawv pom Niam Mab Liab lawm thiab. Nws tham tau zoo tshaj plaws li.





    Mab Liab tshwm sim nyob L'Ile-Bouchard, Fab Kis teb, 1947.




    Hnub tim 8/12/1947, yog Hnub Hmoov Niam Mab Liab Dawb Huv, ua rau Fab Kis teb tau dim ntawm ib qho teeb meem loj uas muaj nyob hauv lub teb chaws. Xws li Txoov Tim Tswv (Président) De Gaules tso kev tswj hwm tseg, tog Koom Tsha Fab Kis muaj zog heev. Laj mej pej xeem sawv tawm tsam ntau yam, ua rau lub teb chaws ntxhov nyho, yuav sawv rog.
    Yog tim li ntawd, thiaj li muaj 4 tug me nyuam ntxhais pom Niam Mab Liab tshwm sim rau ntawm ib lub zos l'Ile Bouchard uas muaj 1.255 leej neeg nyob, deb 42 km ntawm lub nroog Tours.

    Hnub Ob (Monday), tim 8 lub 12 hlis thaum 12h50,

    1) Thaum ua ntej 13h me ntsis:

    Jacqueline Aubry 12 xyoos, thiab nws tus niam hluas Jeannette 7 xyoo, Nicole Robin 10 xyoo uas los nrog lawv noj sus vim lawv tsev nyob deb. Noj sus tag rov mus kawm ntawv. Hnub ntawd, thaum sawv ntxov tus Phauj Saib lub tsev kawm ntawv txawm txhawj me ntsis txog tej teeb meem kub ntxhov hauv lub teb chaws Fab Kis lub zwj ceeb ntawd ces nws txawm hais kom cov me nyuam tub Ntawv teev Niam Mab Liab pab lub teb chaws Fab Kis hnub ntawd uas yog Hnub Hmoov Niam Mab Liab Dawb Huv. Lawv los noj sus tag, lawv txawm mus tau ntxov me ntsis lawm, vim yuav rov kawm ntawv 1h30 ces tseem tsis tau txog moo. Peb tug me nyuam ntxhais mus hla ntawm tsev teev Ntuj qhov rooj ces Jacqueline tus hlob me ntsis txawm hais tias :
    -Twb tsis tau txog moo ces peb mus teev Ntuj me ntsis tso peb mam mus yom ?
    Ob tug yau kam thiab ces lawv mus, lawv mus sawv ntawm Thaj txi Ntuj thiab hais kaum zaj « Koj nyob zoo Mab Liab » tag ces lawv hais ntxiv 3 zaug « Mab Liab yug los Dawb Huv, thov Ntuj rau peb cov uas vam txog koj »



    Yog hauv lub tsev teev Ntuj nov uas cov me nyuam pom Niam Mab Liab.

    Chiv keeb puam kwm zoo li no :

    Jacqueline hais tias :
    « Tib pliag ntshis, kuv pom ib qho pom kev loj loj, ci tshiab tshiab tab sis tsis fam qhov muag nyob ntawm kuv sab lauj, nruab nrab daim iav qhov rai uas daim duab Niam mab Liab nyob Lourdes thiab lub thaj txi Ntuj. Txawm muaj ib tug poj niam zoo zoo nkauj tawm hauv qhov pom kev ntawd los zoo li nws sawv ntawm ib lub qhov tsua. Muaj ib tug Tshiab nyob ntawm nws sab lauj. » Ob tug me nyuam yaus tseem tab tom nrhiav Jacqueline lub hnab ntim Saw Mab Liab uas poob lawd, nkawd tsa hau hlo nkawd pom, nkaw qw ib suab nrov nrov tias :
    - Auj ! Tus Niam zoo nkauj ! Auj ! Tus Tshiab zoo ! Nkawd ntshai heev ces nkawd tawm mus raum zoov ib pliag nkawd tsis tshua ntshai lawm ces nkawd mam rov nkag los. Jeannette hais rau nkawd tias :
    - Tus Niam zoo nkauj tseem nyob, nyob pem Thaj.
    - Nkawd pom ob tug phooj ywg kawm ntawv ua ke Sergine thiab Laura Croizon hla los ntawm tsev teev Ntuj, nkawd hais qhia thiab yaum los saib. Nkawd los txog, Laura pom thiab tab sis Sergine tsis pom Niam Mab Liab. Nkauj Ntshiab ntsia lawv luag ntxhi.
    - Muaj ib txoj phuam dawb kau taub hau, tus ntug ua paj ntaub tus S ua kub, pom nws cov plaub hau daj tsawv tshwm me ntsis. Nws hnav ib daim tiab dawb ua ntug kub, sia ib txoj siv xiav txho ob tug tw hlauv los txhog ntua ntawm hauv caug. Nws khawm tes. Nws ob txhais tes zoo zoo nkauj, cov ntiv tes zuag kaim. Muaj ib txoj saw Mab Liab hlaws dawb paug thiab loj loj, txoj sawv yog kub. Nws nyob hauv ib lub voj voog pom kev lam lug. Nws nyob li nyob hauv ib lub qho tsua. Nws ob txhais taw txawb saum ib lub pob zeb xwm fab. Ntawm nws xub ntiag muaj ib cov paj ntshua nplaim. Ntawm nws sab xis hauv qab me ntsis, muaj ib tug tshiab tuaj ob tug tis « ci li sab hnub ». Lub pob zeb uas ob tug sawv, tsis ti av. Tag nrho qhov ntawd huv si pom kev lam lug. Tus Leej Niam muab cov hlaws ntawm txoj saw swb, tab sis peb tsis hnov nrov.
    - Ces nws mus lawm. Laura hais tias tej zaud nws yuav rov tuaj dua. Tab sis Sergine, tus uas tsis nrog lawv pom txawm hais tias : Mus peb mus ! Ntshe yog dab xwb os ! Jacqueline thiab Jeannette mus qhia nkawd niam thiab txiv pem tsev. Tab sis nws niam tsis pub hais. Nws mus txog tom tsev ntawv Jacqueline nws tham rau Leej Phauj Soeur Marie de l'Enfant-Jésus, tab sis Leej Phauj tsis pub tham ntxiv tab sis nws ho mus qhia rau tus Txiv Plig hauv zos, Txiv Plig nug lawv me ntsis dog dig ces hais rau lawv tias :
    - Tsheej chim nawb mog thiab nyiam Nkauj Ntshiab Mab Liab. Nws xav tias ntshe yuav tag li ntawd lawm xwb no. Leej Phauj Loj txawm yws Jacqueline tias :
    - Yog nws nim zoo nkauj cuag li tiag ces kuv yog koj no ntshe kuv yeej nyob rawv tom tsev teev Ntuj xwb os.
    Nws hais li tag, nws tig hlo ces cov ntxhais xav zoj, ua kiag li nws hais, nyiag kev rov mus tom qhov chaw lawv pom, mus txog yog 13h50.
    - Lawv mus txog zoo li Niam mab Liab twb nyob tos tos lawv lawm. Pom nws lub ntsej muag nros ntshis, nws hais tus yees rau lawv tias :

    2) 13h50.

    - Hais rau cov me nyuam yaus, kom lawv thov Ntuj pab lub teb chaws Fab Kis. Nws yuav vam txog lawv pab. Nws hais lo lus « Fab kis teb » no tag ces nws ntsiag ib pliag.
    - Laura txawm nug tias : Leej Niam, koj puas yog Peb Niam nyob saum Ntuj ?
    - Yog mav, nws teb ua suab mos nyoos luag ntxhi.
    - Jacqueline nug ntxiv tias : Es tus Tshiab ne ?
    Tus Tshiab txawm tig mus rau ntawm nws thiab teb ib lub suab nrov nrov luag ntxhi tias :
    - Kuv yog tus Tshiab Nkas Nplias. Nkauj Ntshiab Mab Liab cev tes mus rau ntawm cov me nyuam :
    - Muab nej cov tes los rau kuv nwj. Jacqueline xub txav los ua ntej, nws ncav taw. Tus Poj Niam nyo los, tuav nws txhais tes mus twb rau nws nws di ncauj. Tag ces yog Nicole, tab sis Laura thiab Jeannette nkawd me dhau lawm ces Jacqueline puag nkawd nqa sib khuav mus cev rau Nkauj Ntshiab. Tag nrho plaub tug me nyuam puav leej hnov Nkauj Ntshiab daim di ncauj chwv lawv cov tes sov so. Thiab cia li ua ib lub voj ci lam lam rau saum lawv cov qaum tes. Lawv thiaj li tuav rawv tes yuav coj mus rau lawv tus Xib Hwb saib no. Mus txog tom kev, ntsib ib tug pog, nws nug lawv tias nej khiav dab tsi, lawv teb tias peb pom Niam Mab Liab, nws nwj peb txhais tes, ces pom lub voj voog ci ci nyob saum peb qaum tes. Koj saib maj ! Ces tus pog ntawd pom, tab sis lawv nqa khiav mus txog pem tsev ntawv ces ploj tag lawm. Tus Xib Hwb tsis pom.

    2) 17h.

    - Nws hais tias : Ib tsam 17h thiab taig kis 13h nej rov tuaj dua. Ces nws cia li ploj hauv ib tauv huab dawb paug lawm. Tshwm sim thawj hnub no ntev li 8 rau 10 feeb.
    - Cov Phauj ua tij ywm soj lawv, coj lawv mus nug, coj nyias mus nyob nyias ib qho, muab ntawv rau ob tug hlob sau piav txog qhov lawv pom. Jacqueline sau tau 23 kab, nws tus viv ncaus Nicole sau tau 16 kab ntawv txog qhov tshwm sim rau lawv pom ntawd. Jacqueline nyiag kev rov mus txog tom tsev teev Ntuj, lawv tab tom hawm lub Cim Yug. Tshuav peb tug yau, lawv tsis pub tuaj. Jacqueline txawm teev Saw Mab Liab. Nws teev 5 zaug 10 zaj tag ces tus Poj Niam cia li rov tshwm plaws los, Jacqueline twb tsis nco qab pom nws los. Leej Niam co ntiv tes kom nws txav los. Pom tib pliag ntshis xwb ces Nkauj Ntshiab cia li ploj ntai nrog lub suab tswb uas co thaum coj lub Cim Yug los. Thaum Foom Hmoov Zoo tag, Txiv Plig hais los lus tias :
    - Mab Liab, yug los dawb huv, thov Ntuj rau lub teb chaws Fab Kis. Thaum ntawd Leej Niam thiab tus Tshiab rov tawm los hauv ib tau pom kev. Leej Phauj Loj tso cov me nyuam yaus tseg, nws tawm tuaj raws tau Jacqueline.
    - Leej Phauj Loj hais rau Jacqueline tias : Yog nim pom Niam Mab Liab tiag mas yuav tsis tig taub hau rau tom qab li os !
    - Tig mas ! Phauj, Leej Niam nyob ntawd, nws ntsia peb ! Yog Leej Phauj txhob txwm thom xwb, tab sis ua rau nws xav tsis tag thaum pom cov me nyuam nyob ntsiag to. Nkawd teev Saw Mab Liab ua ke. Thaum teev 2 zaug kaum zaj tag, Jacqueline hais tias :
    - Phauj, Nkauj Ntshiab mus lawm os. Tus Phauj thiaj coj Jacqueline chaws tij ywm mus kom txhob muaj neeg nug tau. Tus Phauj xav tias ntshe tej xwm no tsuas tag li no lawm xwb no tab sis Jacqueline tseem hais tias taig kis 1 teev tav su nws yuav rov tuaj dua. Leej Phauj cia li tsa tes saum ntuj hais tias :
    - Ntshe peb yuav sam tam xwb lauj ! Taig kis 1teev tav su mas kuv yuav muab tsev teev Ntuj kaw.

    HNUB PEB (TUESDAY) TIM 09/12/1947

    - 4) 13h.

    Taig kis tom qab thaum 12h50, Yawg le Doyen Segelle nqa tauv yuam sij ntawm tes tuaj tom tsev teev Ntuj, tab sis nws hloov siab lawm, nws ho tsis xauv tsev teev Ntuj. Plaub tug ntxhais : Jacqueline, Jeannette, Nicole thiab Laura tuaj txog naj cas qhov rooj qheb, lawv nkag ncaj qha mus rau pem Thaj uas Nkauj Ntshiab tshwm. Txog ntua xwb pom ib lub cheeb pom kev lam lug. Daim ntaub dawb ci dai ntawm phab ntsa los rau ntawm tus mlom Mab Liab qheb plho. Leej Niam rov tshwm. Tus Tshiab nyob ntawm nws sab laug es tsis yog nyob sab xis. Muaj ib cov paj ntshua nplaim ntawm nws xub ntiag, hauv qab cov paj ntshua nplaim muaj ib pluaj ntaub sau tias : « Kuv yog tus yug los dawb huv ».
    Jacqueline nug tias :
    - Kuv coj kuv cov phooj ywg nkag los puas tau ?
    - Tau kawg, tab sis lawv yuav tsis pom kuv.
    Nkauj Ntshiab hais kom cov uas pom Nws nwj tus Ntoo Cuam ntawm nws txoj saw Mab Liab. Jacqueline nwj tag, Nicole nwj tag, Jacqueline rov nqa ob tug yau mus nws li thawj hnub.
    Nkauj Ntshiab ua Ntoo Cuam Lub Cim, Nws maj mam ua qeeb qeeb kawg nkaus.
    - Kuv yuav qhia ib qho tseem ceeb rau nej uas nej yuav npog 3 hnub mam qhia tau. Niaj hnub no nej yuav thov Ntuj rau lub teb chaws Fab Kis uas tab tom yuav raug kev plhom sij.
    - Mus hais kom Txiv Plig coj cov me nyuam thiab neeg tuaj thaum 2 teev qhov nov, tuaj teev Ntuj.
    - Pib hais zaj « Koj nyob zoo Mab Liab. »
    Cov me nyuam hais tag 10 zaj, Leej Niam luag nyav.
    - Hais kom Txiv Plig txhim ib lub qho tsua, txhim tau sai npaum li cas haj yam zoo, txhim rau qhov chaw uas kuv nyob nov; muab kuv thiab tus Tshiab wb tus mlom los tso rau ntawm ib sab. Thaum ua tiav lawd, kuv yuav foom hmoov zoo rau.
    - Nej rov tuaj ib chim 2 teev thiab ib tsam 5 teev. Ces Nkauj Ntshiab cia li ploj ntais rau ntawm phab ntsa, hos daim ntaub dawb thaiv rov qhaws. Cov me nyuam mus hais Txiv Plig tom tsev, tab sis Txiv Plig tias thaum 2 teev, yog lub caij kawm ntawv ces kom lawv mus kawm ntawv! Kom lawv mloog lawv tus Xib Hwb hais. Kom lawv mloog lus thiab teev Ntuj. Cov Phauj thiab cov tub kawm hais zom zaws tom tsev ntawv. Tab sis Jacqueline tias Txiv Plig tsis kam ces kuv tsis mus. Txog 4teev nrab, Jacqueline nrog ob tug me nyuam yau rov mus tom tsev teev Ntuj, Nicole tsis mus, nws ncaj qha mus tsev vim nws tsev nyob deb 3km, yuav mus ko taw tsam tsaus ntuj. Mus txog ces Jeannette yuav mus tsev, vim thaum nws pom Niam Mab Liab ces nws ntshai tsam Niam Mab Liab coj nws mus lawm ces nws tsis pom nws niam lawm no. Jacqueline thiaj hais kom nws tus nus hlob uas tuaj ntawd thiab coj Jeanette mus tsev lawm. Ces tshuav Jacqueline thiab Laura nkawd ob leeg lawm xwb.

    - 5) 17h.

    Jacqueline hais tias Nkauj Ntshiab ntsia peb ib pliag ces nws hais tias :
    - Hu zaj nkauj « Koj nyob zoo Mab Liab » yog zaj nkauj seev uas kuv nyiam tshaj. Thaum peb hu nkauj mas nws zoo siab luag ntxhi xwb. Nkauj Ntshiab hais kom kuv hais cov neeg txav los ze, kom lawv sawv daws teev 10 zaj sib law. Ces kuv hais, sawv daws txav los ti nkaus ntawm Nkauj Ntshiab ko taw thiab hais 10 zaj « Koj nyob zoo Mab Liab ». Thaum hais tag.
    - Jacqueline nug nws tias : Taig kis koj puas rov tuaj ntxiv lawm ?
    - Tuaj mas ! Txhua hnub thaum 1 teev tav su. Kuv mam hais qhia nej yog twg kuv tsis tuaj lawm. Leej Niam rov ua Ntoo Cuam Lub Cim ib zaug ntxiv.

    HNUB PLAUB (Wednesday) Tim 10/12/1947 :


    - 6) 13h.
    Cov neeg tuaj coob.
    Nkauj Ntshiab hais rau lawv tias :
    - Nej hu zaj nkauj « Koj nyob zoo Mab Liab »
    Lawv teev Saw Mab Liab, hais xaus rau « Huab tais Leej Txiv, Huab tais Leej Tub, Huab tais Leej Ntuj Plig… », Nkauj Ntshiab txaum yim. Nkauj Ntshiab hais tias :
    - Nwj kuv txhais tes.
    Nkawd nwj Nkauj Ntshiab txhais tes tag, Nicole nug tias :
    - Yuav xuas dab tsi ua lub qhov tsua uas nag hmo koj hais ?
    Leej Niam teb tias :
    - Xub xua ntawv ua ua ntej.
    Jacqueline hais :
    - Niad, koj puas ka mua ib qho hwj huam yees ntxwv kom sawv daws ntseeg ?
    - Kuv tsis yog yuav tuaj ua hwj huam yees ntxwv, yog tuaj kom nej thov Ntuj rau lub teb chaws Fab Kis. Tab sis taig kis ces koj qhov muag yuav pom kev, koj yuav tsis rau tsom qhov muag lawm.
    - Kuv yuav qhia ib qho dab tsi rau nej, cog lus rau kuv tias nej yuav zais txhob qhia leej twg li.
    Cov me nyuam teb tias :
    - Peb cog lus.
    - Taig kis nej rov tuaj xyuas kuv tib lub caij qub no.


    HNUB TSIB (Thursday), Tim 11/02/1947.


    Pw ib hmos taig kis, Jacqueline niam, nqa ib taig dej ntxuav muag sov nrog ib txoj phuam mus so nws lub qhov muag li txhua taig kis, (vim Jacqueline mob qhov muag liab tas li ces qhov muag los los kua ces yog pw sawv cov quav muag cam ob lub qhov muag tag lawm, yog tsis muab phuam thiab dej maj mam ntxuav dawj ces nws qheb tsis tau qhov muag. Nws cov quav muag cam cam nws qhov muag, ua rau cov plaub muag lhe tag, ua rau nws tsis muaj plaub muag yam tsis zoo nkauj thiab nrhiab neeg heev), mus txog cas Jacqueline qhov muag huv si, qheb qhov muag pom kev, tsis rau tsom los pom lawm.

    7) 13h.

    Txiv Plig nyob rawv ntawd.
    Nkauj Ntshiab hais tias :
    - Nej hu zaj nkauj « Koj nyob zoo Mab Liab »
    - Nej puas thov Ntuj rau cov neeg txhaum thiab ?
    - Peb thov os Niam.
    Lawv hais 10 zaj « Koj nyob zoo Mab Liab » tag.
    Jacqueline nug cov lus uas Txiv Plig thiab cov Phauj npaj tseg :
    - Yog lub sam xeeb dab tsi uas koj tuaj ntawm lub tsev teev Ntuj Saint-Gilles ?
    - Vim muaj cov neeg ntseeg zoo thiab Jeanne Delanoue tau nyob los.
    - Puas yog koj nco txog Jeanne Delanoue uas nws nyiam teev koj thiab Leej Niam nyob tom Ardilliers...
    - Yog mas, kuv paub kawg.(Nkauj Ntshiab txiav lus).
    ….thiab nws tus kheej coj cov ntxhais tuaj nyob nov (Jacqueline rov txais).
    - Muaj pes tsawg tus Phauj tuaj qhov nov ?
    - Muaj 3 tug.
    - Lawv nyob lub Koom Haum twg ?
    - Jeanne Delanoue.
    - Niad, koj puas kam kho cov neeg muaj tus mob ntxhov siab thiab cov mob laug ?
    - Kuv yuav muab txoj kev nyab xeeb rau cov yim neeg…
    - Nej puas kam hu zaj nkauj « Koj nyob zoo Mab Liab » rau kuv ?
    - Peb kam kawg.
    Thaum hu nkauj tag, Leej Niam nug tias :
    - Txiv Plig puas kam txhim lub qhov tsua?
    - Niad, peb cog lus rau koj tias peb yuav ua.
    - Taig ki thaum 1 teev tav sus, nej rov tuaj dua.
    - Awj, Niam, taig kis peb mam tuaj.

    HNUB RAU (Friday), tim 12/12/1947

    8 ) 13h.
    Nkauj Ntshiab hais :
    - Nej hu zaj nkauj « Koj nyob zoo Mab Liab ».
    Lawv hais 10 zaj tag. Nkauj Ntshiab nws hais nws ib leeg 3 zaug « Mab Liab yug los dawb huv… » ces 4 tug me nyuam txais nqe ob « …Thov Ntuj rau peb cov uas vam txog koj »
    - Hu zaj nkauj « Koj nyob zoo Mab Liab »
    - Rov hu « Koj nyob zoo Mab Liab » ntxiv thiab.
    - Awj, Niam.
    Tab sis Jacqueline hnov tsis tseeb txawm nug tias : Dab tsi nov ?
    - Nej puas kam rov hu zaj nkauj « Koj nyob zoo Mab Liab ».
    - Peb kam kawg.
    - Hnia kuv txhais tes.
    Hnub no cov me nyuam pom saum nws taub hau muaj ib lub voj voog ci lam lug, ntawm ntawm nws hauv siab muaj ib txoj ntaub vas sau tias : MAGNIFICAT = Mab Liab hu nkauj (Thaum tus Tshiab tuaj hais rau Mab Liab tias nws yuav xeeb tub, nws hu nkauj).
    - Nej puas thov Ntuj rau cov neeg txhaum ?
    - Awj, niad peb thov.
    - Yog mas, yuav tsum thov Ntuj ntau ntau rau cov neeg txhaum.

    Thaum lawv teev 10 zaj tag. Thiab hais 3 zaug cov lus thov. Jacqueline thov kom pab kho tus ntxhais hluas tuag ceg uas nrog lawv nyob ua ke ntawd :
    - Niam, koj puas kam kho tus ntxhais nov ?
    - Yog kuv tsis kho nws ntawm nov los kuv yuav kho nws nyob lwm qhov.
    - Niam ! Koj puas kam kho ib tug uas nws yog neeg ntseeg zoo heev ?
    - Kuv tuaj nov tsis yog kuv yuav tuaj ua hwj huam yees ntxwv, kuv tuaj kom nej thov Ntuj rau Fab Kis teb xwb.

    Hais li nov tag ces Nkauj Ntshiab Foom Hmoov Zoo rau cov neeg tag ces nws thiab tus Tshiab ploj ua ke lawm.

    HNUB XYA (Saturday), Tim 13/12/1947 :

    9) 13h.

    Leej Niam zoo nkauj hais tias :
    - Nej hu zaj nkauj « Koj nyob zoo Mab Liab ».
    - Xub hu zaj « Koj nyob zoo Mab Liab ».
    - Awj, Niam.
    Lawv hais tag 10 zaj thaum xaus, Nkauj Ntshiab rov hais nws ib leeg : « Mab Liab yug los dawb huv… » ces cov me nyuam txuas ntxiv : …Thov Ntuj rau peb uas vam txog koj. » Cov me nyuam de tau ib cov paj coj tuaj ces rau Leej Niam.
    Jacqueline ces ib tau œillets liab paj yeeb, nws hais tias :
    - Leej Niam, kuv muab cov paj nov rau koj.
    - Nkauj Ntshiab foom hmoov zoo rau cov paj, kom lawv hais 10 zaj « Koj nyob zoo Mab Liab nrog rau 3 zaug Mab Liab yug los dawv huv, ntxiv rau 10 zaj Koj Nyob zoo Mab Liab ntxiv. »
    Jacqueline hais tias :
    - Leej Niam, ua ib qho hwj huam yees ntxwv mas!
    Leej Niam teb tias :
    - Lwm hnub tso. Hais 10 zaj saw Mab Liab zaum plaub ntxiv.
    Nicole hais :
    - Leej Niam, yog thaum peb ua lub qhov tsua no peb puas tseg lub thaj Txiv Ntuj nyob ntawm ib sab ?
    - Awj, cia lub Thaj nws nyob nws.
    - Nej hais 10 zaj saw Mab Laib ntxiv.
    - Taig kis kuv rov tuaj dua ua zaum kawg.

    HNUB CHIV(Sunday) Tim 14/02/1947

    10) 13h.

    Cov neeg tuaj coob hauv tsev teev Ntuj.
    Nkauj Ntshiab hais tias :
    - Nej hu zaj nkauj « Koj nyob zoo Mab Liab ».
    - Hais kom tag nrho 10 zaj saw Mab Liab.
    Cov me nyuam hais tag 10 zaj hnub no, yog lub fwv tsam zaum ob uas
    tau hais ib zaj « Huab tais Leej txiv, Huab tais Leej Tub, Huab Tais Leej Ntuj Plig muaj koob meej nto moo lug… », Nkauj Ntshiab txaum yim hwm thiab hais 3 zaug « Mab Liab yug los dawb huv… » Ces cov neeg teb ntu…thov Ntuj peb peb cov uas vam txog koj ». Hnub no hais 5 zaug 10 zaj « Koj Nyob zoo Mab Liab », tib yam li nag hmo, yog teev tag nrho ib txoj sawv Mab Liab.
    Jacqueline thiab Nicole nyeem Txiv Plig ib lo lus nug :
    - Leej Niam, peb thov koj pab Foom Hmoov zoo rau Txiv Tswv Qhia, uas nws ua Tswv tau 25 xyoos, Tswv Qhia Liab nyob Blois, ob lub tsev teev Ntuj, ob lub Tsev Ntawv ntiav thiab lub Koom Haum Carême, cov Leej Choj nyob lub zos Doyenné, thiab kom muaj Txiv Plig coob rau lub Cheeb Tsam Touraine.
    Leej Niam, txaum yim txais luag nyav.

    Cov me nyuam ib txhij hais tias :
    - Ua tsaug , Niam.
    Jacqueline thiab cov me nyuam cev ib leeg ib tau paj rau Nkauj Ntshiab :
    - Leej Niam, kuv muab paj rau koj, txais mus.
    Nkauj Ntshiab luag nyav thiab teb tias :
    - Kuv hniav cov paj tab sis kuv tsis nqa mus. Cia nej nqa mus tsev.
    Jacqueline :
    - Ua tsaug, Leej Niam. Lawv hu zaj nkauj « Koj nyob zoo Mab Liab ».
    Jacqueline nyeem Phauj Marie de l’Enfant de Jesus ib zaj lus :
    - Leej Niam, yuav ua li cas thiaj li yuav nplij tau Tswv Ntuj lub siab uas cov neeg txhaum ua mob ?
    - Yuav tsum teev Ntuj thiab qee pub rau luag.
    Leej Niam hais :
    - Hais Saw Mab Liab ntxiv.
    Lawv teev tag, Jacqueline hais tias :
    - Leej Niam, kuv thov koj ua ib yam kom pom tias koj tuaj nov tiag.
    Leej Niam hais :
    - Ua ntej kuv yuav mus, kuv yuav ua kom pom ib qho sab hnub.
    - Hais kom sawv daws hu zaj nkauj Magnificat (Mab Liab hu nkauj=Kuv tus plig).
    Txiv Plig doog suab ces sawv daws cuab suab hu.
    - Thov Ntuj rau cov neeg txhaum.
    - Awj ! Niam, peb mam thov.
    Nkauj Ntshiab hais ntxiv tias :
    - Nej nthuav daj ua li nyob saum ntoo cuam, hais 10 zaj « Koj Nyob zoo Mab Liab »
    Nkauj Ntshiab Foom Hmoov Zoo rau cov neeg, thiab nug peb zaug sib law tias :
    - Nej puas yuav ua lub qhov tsua ?
    - Awj, peb mam ua.
    Nkauj Ntshiab hais 3 zaug sib law « Mab Liab yug los dawb huv… », 4 tug ntxhais teb « …Thov Ntuj rau peb uas vam txog koj.» Zaum no yog zaum ntev tshaj, yog 35 feeb uas Niam Mab Liab tshwm los rau lawv. Thaum tag, nraum zoo ntuj pos huab nti, tab sis cia li muaj ib qho tshav ntuj ci lam lug ntawm lub qhov rais thib ob sab pem phab ntsa los rau hauv tsev teev Ntuj uas tsaus tsaus thiab lam cov me nyuam ntxhais thiab lawv cov paj ntawm tes. Tej tug pom zoo li tej lub lwg poob los.
    Cov neeg zoo siab tshaj uas pom qhov tshav ntuj ci ntsa iab ntev li 4 feeb. Qhov tshav ntuj tuaj nov, nws tsis tuaj raws seem hnub. Cov neeg zos nyob deb kuj pom sab hnub tshav ntuj nov thiab. Ces lawv paub tias yog thaum kawg lawm ces Jacqueline kom lawv sawv daws rov mus tsev.

    NKAUJ NTSHIAB COV NTSIAB LUS :

    « Hais kom cov me nyuam yaus thov Ntuj rau lub teb chaws Fab Kis, vim nws muaj chaw txawm peem heev. »
    « Yog, kuv yog nej Niam nyob saum Ntuj. »
    « Muab nej txhais tes rau kuv nwj. »
    « Nwj tus Ntoo Cuam ntawm kuv txoj sawv. »
    « Hu zaj nkauj ‘Koj nyob zoo Mab Liab’, zaj nkauj seev uas kuv nyiam heev. »
    « Hais 1 zaj saw Mab Liab (10 zaj koj nyob zoo Mab Liab). »
    « Nwj kuv txhais tes. »
    « Nej puas thov Ntuj rau cov neeg txhaum ? »
    « Kuv yuav muab txoj kev thaj yeeb rau hauv cov tsev neeg. »
    « Hais rau cov neeg hu zaj nkauj Magnificat = Kuv tus Plig. »



    Magnificat @ Notre-Dame de Paris



    Mab Liab hu nkauj
    (Yog thaum Tshiab Nkas Nplias los tshaj moo rau Mab Liab tag, nws hu)






    avatar
    Maiv Tooj
    Tswv Cuab Hmong Catholique
    Tswv Cuab Hmong Catholique

    Messages : 5325
    Date d'inscription : 2009-08-18

    Re: Mab Liab tshwm sim nyob L'Ile-Bouchard, Fab Kis teb, 1947.

    Post  Maiv Tooj on 28th October 2012, 2:14 am


    Notre Dame de la prière, à l'Ile-Bouchard


    Zaj nkauj cov lus uas Niam Mab Liab hais rau cov me nyuam.


    Notre Dame de la prière, à l'Ile-Bouchard par Emmanuelmedias




      Current date/time is 20th September 2017, 10:47 am