XH.Zoov Ntxheb Yaj Nthuav Ntawv Ntshiab.

Cov zaj lus hnub no. nyob hauv peb zaj nyeem:
His Xais,{62:1-5.}
1Kos Lis Nthos,12:4-11.}
thiab Zam ntawv Moo Zoo,{2:1-12.}

Tswv Ntuj zaj lus hnub no, Ntuj xav hais tias:
Tswv Ntuj hlub nws haiv neeg xws li ib tug txiv hlub nws tsev neeg. Suav tas neho saum tus txij nkawm, los ti nkaus rau nws tej tub ki txhua tus.
Nyob hauv Tswv Ntuj lo lus, xav kom tas txhua yam tib si hloov los ua yam muaj nuj nqes. Nws tawm tuaj nyob hauv Yes Xus zaj hwj huam yees ntxwv, uas Nws muab dej los txia ua cawv.
Yesb Xus xav kom cov neeg nyob ua ke sib raug zoo, nws saib nws niam nrog rau nws cov kwv tij thiab cov qhua tshoob qhua kos. ces nws thiaj ua Hwj huam yees ntxwv kom muaj cawv ntau tuaj.
Yog thawj zaug Yes Xus tuaj nrog lawv noj tshoob, thiab muaj Yes Xus niam nyob hauv, nrog nws pab kwv tij. Zaj lus uas Tswv Ntuj xav kom neeg sib raug zoo, mas Ntuj thiaj pub kom muaj neeg paub ntau yam siv txawv.
Nws tib leeg ua cov hauj lwm ntawd, nyob hauv sawv daws,kom tau kev sib pab. Thaum sawv daws sib to tau Tswv Ntuj lawm, mas Ntuj yuav zam txhaum rau cov neeg muaj lub siab ti.
Tswv Ntuj nyiam hlub neeg, Nws thiaj xa Nws lo lus tuaj rau ntiaj teb neeg tsis tseg li txoj sab tshav ntuj ci tuaj ziab lub ntiaj teb kom pom kev lam lug los kaj neeg nruab siab.
Ces Tswv Ntuj thiaj xa Leej Tswv Yim Ntshiab tuaj ua hauj lwm nyob hauv neeg nruab siab. Kom ib leeg paub ib yam:
Tej tus Leej Tswv Yim pub kom nws txawj ua Yaj Saub, los txhais tau tej yam ub yam no. Leej puav Nws qhia kom lawv ua neeg thoob tsib kom mem tau tias yog Ntuj qhia los dab qhia.
Hos tej tus paub ntau xeem lus, ua neeg ntse paub kev tub qaug, los txawj khuv leej neeg. thiab txawj sib zam, kom neeg nyob taus ua ke.
Txhua yam no yog Leej tswv Yim tib leeg ua thiab faib los rau sawv daws. Ces thiaj hais tau tias Tswv Ntuj yog zoo li Leej txiv uas txawj hlub sawv daws.
Txij lub hauv paus los nto lub ntsis,nyias muaj nyias qhov zoo los sib dhos, nyob hauv txhua yam yam kom mus zoo. Tas cov neeg ntseeg mas peb xav kom Yes Xus muab peb hua tib lub npe ua Pob Zeb.
Kom peb nyob ruaj hauv kev ntseeg,Ces peb thiaj li yuav khov los txheem txhua yam, kom muaj kev sib hlub sib zam zoo li yog tseem Tswv Ntuj cov tub ki nyob ua ke tiag.
ZAJ THOV NTUJ.
1. Peb thov Ntuj rau Lub koom Txoos, kom peb cov ntseeg sawv daws to taub tias, yog Tswv Ntuj lo lus thiab Nws LeejTswv Yim Ntshiab coj peb kom sib raug zoo nyob hauv Tswv Ntuj kev nyiam kev hlub. Ntuj awb...
2. Peb thov Ntuj rau cov Nom Tswv kav teb chaws, kom lawv muaj kev sib haum xeeb nyob hauv Tswv Ntuj kev coj qhia, kom lawv tso tej kev ua tsov rog no tseg mus.
Ntuj awb....
3. Peb Thov Ntuj rau cov neeg txom nyem, kom. sawv daws txawj tso siab tias Tswv Ntuj yog Leej Txib txawj khuv leej, txhua tus muaj kev txom nyem, ces lawv yuav rov muaj lub siab loj tuaj. Ntuj awb...
4. Peb nyias thob Ntuj nyob hauv nyias nruab siab txog tej yam uas nyias paub xav muab cev rau Tswv Ntuj. Ntuj awb....
5. Peb thov Ntuj rau peb cov tuaj ntawm no, peb tau hnov Tswv Ntuj tej lus qhuab qhia peb lawm. Kom Tswv Ntuj zaj lus peb hnov no coj peb nrog Tswv Ntuj nyob tau ua txiv tub. Ntuj awb...


Yaj Zoov Ntxheb Xib Hwb.

Ntuj cov lus nyob hauv cov tsab ntawv, Yos Es {2: 12-17.} Thiab Kos Lis Nthos {5: 20-21.+6: 1-2.} los Mas Tais ntawv Moo Zoo,{6:1-6+16-18.}hais tias:
Peb yuav ua tej yam zoo,tsis yog ua los nrhiav lub koob meej,yog ua los txais txoj kev ncaj. Vim Tswv Ntuj xav kom peb tig los yuav lub siab tshiab.
Nyem no, txog lub caij uas peb yuav rov los nrog Tswv Ntuj sib haum xeeb. Vim Yes Xus yog tus tuaj them ntiaj teb neeg cov txim txhaum.
Peb yuav ua twb zoo xav, txhob ua cov neeg zoo nyob ntawm neeg xub ntiag xwb. Cov neeg uas, Tswv Ntuj xaiv thiab tsa lawv ua Leej Pleev cov tiam lis.
Kom tau tshaj lus rau luag, Tswv Ntuj tau qiv lawv lub ncauj los tshaj Ntuj cov lus ntuas neeg, kom sawv daws rov sib haum xeeb nyob hauv Leej Pleev.
Cov neeg uas Tswv Ntuj xaiv, mas Ntuj tsis xav kom lawv tshaj thiab ua tej tus ntsej muag ntshaus ntsho. Tswv Ntuj xav kom lawv ua lawv lub siab ntuag, tias lawv yog neeg ris kev txhaum.
Txhob ua neeg npau taws, maj mam tig lub siab los npuab Tswv Ntuj. Kom tau kev zam txhaum rau cov txheeb ze.
Tswv Ntuj hais tias, Nws xav foom hmoov zoo rau peb sawv daws. Kom peb niaj hnub nyiam cov kab ke txi Ntuj, thiab cov cov kab ke yoo kev ua txhaum li uas koj yoo mov.
Kom Huab Tais kev hlub tuaj txog neeg tej nruab siab. Kom lub ntiaj teb neeg tau txais Leej Plev txoj kev cawm. sawv daws thiaj tau kev, txais lub txiaj ntsim ua neeg siab ncaj.
Txhob ua zoo li cov neeg zoo ntawm daim me tawv, nyiam ua thawj neeg nyob tom luag hauv ntej. Ua txuj teev ntuj ntev loo, tsis tau hais ib yam dab tsi muaj nqes txog Ntuj cov txiaj ntsim.
Cov neeg uas tsis kho lawv lub siab, kom muaj kev mloog Ntuj lus. Tab lawv nkag mus hauv tsev teev Ntuj los, lawv mus pe ib co ncej laj kab, tsis txawj ua zog. Uas yog thaiv tsiaj los neeg phem, kom txhob los txom fav xwb.
Lawv rov mus tsev,lawv khaws tsis tau dab tsi,nqa mus qhia tej tub ki li. Zoo li lawv mus nrhiav ib cov tshuaj muaj zog los pab lawv kom muaj peev xwm khav theeb thiab ua neeg npau taws sai rau tej neeg txheeb ze saib xwb.
Ib tug neeg ntseeg, mas yuav to taub tias,cov neeg muaj peev xwm uas Ntuj xaiv lawv los ua thawj neeg, thiab ua Yaj Saub. uas lawv txawj hais lus npliag lias li nplaig nab.
Lawv tsuas muaj hwj chim ib vuag thaum lawv txeeb tau thawj lub roog zaum, nyob tom hauv ntej xwb. Lawv lub ntsej muag tsis npuab Tswv Ntuj. Lawv tig ntsej muag rau neeg saib tias nws muaj hwj chim lawm.
Nws lub siab nyob nrug deb Tswv Ntuj, Tswv Ntuj tuaj txog ntawm nws taw rooj los, nws tsis caw Ntuj mus saib nws lub vaj lub tsev.
Nws tsis paub tias nws yuav tu vaj tse zoo li cas, kom ntxim rau Tswv Ntuj tuaj saib xyuas.
ZAJ THOV NTUJ.
1. Peb thov Ntuj rau lub Koom Tsoos, kom txhua tus thawj neeg txhob ua neeg muab hlob, sawv daws tig los nrog Tswv Ntuj sib haum xeeb. Ntuj awb...
2. Peb thov Ntuj rau cov Nom Tswv kav teb chaws, kom lub txoos tu siab no coj lawv txo hwj chim los saib taus cov neeg txom nyem ua neeg me. Ntuj awb...
3. Peb thov Ntuj rau cov neeg muaj kev txom nyem, kom lawv muaj kev tso siab tias, Tswv Ntuj hlub tus muaj tus pluag sib npawg. Ntuj awb...
4. Peb thov Ntuj rau cov neeg muaj mob nkeeg, txhua tus kom lawv tso siab thiab vam txog Ntuj kev nyiam kev hlub los daws teeb meem. Ntuj awb...
5. Peb thov Ntuj rau peb cov tuaj hnub no,kom peb tuaj peb txawj cev tej yam tsim nyog qhia rau Tswv Ntuj pab peb hloov siab. Ntuj awb...

Yaj Zoov Ntxheb Xib Hwb.

Hnub chiv no siv zaj no los hloov cov tsab ntawv los tau.
Lub hnub nyoog,Valentine'sDay no, yog ib tug leej Choj los ib tug Tswv Qhia tau tsim kom muaj lub hnub nyoog no.Tus tub Koom Haum no tsim los kom tau pab cov ua txij ua nkawm, kom nyob ruaj hauv txoj kev sib hlub.
Kom ob tug muaj kev sib hlub no, nkawd rov sib pov hwm nkawd, kom ib leeg saib ib leeg zoo li tej pov haum tseem ceeb uas muaj qhov zoo nkauj nyob mus li.
Thaum koj muaj kev hlub txog ib tug neeg lawm, mas thawj yam koj yuav ntseeg nws. thiab tso siab rau nws, tas txhua yam hauv koj txoj kev xav.

Nyob hauv kev hlub yuav muaj 3 yam li no tuav rawv:
1->Koj yuav nco ntsoov tias, nws yog tus nyob ze koj txhua lub caij.
2-> Koj yuav txhawj txog nws, tsam nws muaj mob nkeeg, los tau kev tu siab rau txhua yam uas koj tsis txawj ua.
3-> Tus uas yog koj tus hlub lawd, mas koj xav nrog nws nyob ua ke, kom tau kev sib pab sib nres txhua yam yuav muaj tuaj, txog neb ob leeg tib si.
Dhau ntawm peb yam no lawm, mas koj yuav ntsia,nws tes hauj lwm ntsia nws tus yam ntxwv, nrog nws lub peev xwm.
Saib kom zoo cuag li nws yog koj tus niam nkauj Ntsuab, los koj tus txiv Nraug Nab.Tus yog txiv neej yuav muab koj lub peev xwm los pov hwm koj tus hlub kom tsim nyog.
Hos tus uas yog poj niam. Koj yuav khaws tas nrho, koj txoj kev zoo nkauj thiab kev hlub los pub rau tus uas yog koj tus hlub. Neb yuav sib saib zoo li ib co txim tsim txiaj tsim nyog muab los sib txi li ib co txim txi rau Ntuj.
Ob leeg yuav nco ntsoov tias, ib leeg yuav tau ua ib leeg luag kom tsis muaj kev txhawj xeeb nrog kev tu siab. Kom ob leeg tau nyob thaj yeeb thiab muaj kev zoo siab mus li.
Kom nyob hauv tsev los muaj kev kaj siab, tawm rooj los muaj ntsej muag luag ntxhi nyob kaj lug. Tab sis nco ntsoov, ib leeg txhob dag rau ib leeg ib zaug li.
Kom txhob muaj dej txiag los paug siab, tos hais li no, vim yuav tau ceev faj tiag, Muaj muaj khauv zeeg cua ntau, Cov khauv zeeg cua no, yog cov neeg muaj txiag nplua nuj yuav muab nyiaj los npog koj qhov muag.
Ces nyiag tau koj nplooj siab coj mus ua si, rau tom tej tshav puam, los nyob rau luag tej hotel. Kom nej tej kev hlub txawj ya ploj mus rau qab ntuj kawg.
Ces Niam Nkauj Zuag Paj, thiab txiv Nraug ntsuag nkawd yuav tau mus ntsib Niam Nkauj kub Kaws, ces neb yuav plhis tau mus ua yoov mos ntsub xwb.
Nej sawv daws nco ntsoov thov kom lub hnub nyoog no pov hwm nej ua neej kom mus thawm xyoo, thiab nyob laus. Ob leeg yuav sib koom ua ib co txim zoo, los sib txi, li cov txim zoo tshaj tsim nyog muab los txi Ntuj.
Kom Tswv Ntuj zoo siab saib xyuas thiab pov hwm, nej lub neej mus nqaj nto ntuj ploog mus nto ntsis.
Nyiam no, kuj hais rau nej cov uas tsis muaj txij nkawm, uas yog poj ntsuam,thiab nraug ntsuag. Nej tsis muaj txij muaj nkawm, los nej ua lub siab loj. Nej tsis yog ib pab neeg phem dua cov.
Tsuas yog txoj hmoo raug tau,los sib ncaim tus txij nkawm lawm xwb. Ntuj hlub nej tshaj li cov muaj txij nkawm. Nej tsis muaj tus,los ua nej luag,vim txoj kev hlub tu mus lawm xwb.
Nej yeej yog ib co txim ntshiab huv tsim nyog Ntuj txais los ua cov txim tsim txiaj rau ntawm Ntuj xub ntiag tib yam li luag tej thiab.
Hos cov hluas uas tsis tau sib txis los ua txij ua nkawm, mas nej muaj kev hlub los yeej zoo. tab tsis tsis tau paub tseeb tias, puas tau yog koj txoj tiag, tsam tag kis mus ces twb ho hloo
v rau lwm tus lawm,los tsis tau yog qhov tseeb, nej txhob maj tus siab.
Nej yeej yuav muaj hmoo tau txoj kev sib hlub xwb, thaum tau lawm mas tseem yuav yog ib txoj kev sib hlub ua kom lub ntiaj teb neeg ntshaw txog nej.
Hnub no kuv tuaj ntsib nej sawv daws li no, thov kom Huab Tais Ntuj foom Hmoov zoo rau nej txhua tus.
A men.
Yaj Zoov NTxheb Xib Hwb.

Tswv Ntuj cov lus nyob hauv ntawv hauv paus,{15:5-10+17-18.} tsab ntawv Fis Lis Pos,{3:17-21+4:1.} thiab Lus Kas ntawv Moo Zoo,9:28-36.} Hais tias:
Cov Thwj Tim twb tau pom Huab Tais Yes Xus lub hwj chim tawm tuaj. Tsis kav thaum Yes Xus raug txom neyem, mas lawv tseem ua xyem xyav, xws li niaj hnub no,tsoom neeg ntseeg twb pom Tswv Ntuj cov txiaj ntsim los lawv ntseeg tsawg kawg thiab.
Tus xav nrog Yes Xus muaj hwj chim, nws yuav tsum ntseeg thiab tso siab lug los nyiam Yes Xus raws li Mws tau qhia.
Kom Tswv Ntuj cov lus uas Nws hais rau peb thiab tsoom txheeb ze hnov. Kom hloov tau ntiaj teb neeg lub siab ncaj los mloog Ntuj lus.
Kom muaj ntau leej neeg muaj koob meej li Mais Xes thiab Es Lis, tau tawm tuaj ua Yes Xus ob tug tiam lis, xws li cov Thwj Tim tau pom tawm tuaj ntawd.
Kom Tswv Ntuj lub suab nqes tuaj txog peb tias, Nej yog kuv cov Leej tub los cov Leej Ntxhais uas kuv xaiv, kuv nyiam. Vim nej tau mloog leej Pleev.
Ua li mas, peb yuav txhob nyiam tej yam nyob ntiaj teb no. Peb lub tsheej, thiab peb chaw nyob yog nyob saum ntuj.
Peb yuav nrhiav txoj kev ua kom Tswv Ntuj lub koob meej nyob nto moo lug. Cov kev teev ntuj los cov kab ke txi ntuj. Tswv Ntuj yuav tuaj hla nyob nruab nrab, li thaum Has Nplas txi Ntuj Tswv Ntuj tuaj hla ntawd.
Vim thaum peb ua cov kab ke txi Ntuj los teev Ntuj,mas yog ntiaj teb kev nrog Tswv Ntuj sib cog lus. Txhua zaus Tswv Ntuj tuaj xyuas kom tau hla nyob ntawd.

ZAJ THOV NTUJ.
1. Yeb thov Ntuj rau lub Koom Txoos, Tswv Ntuj siab zoo tau peb kom Ntiaj teb neeg tau pom Tswv Ntuj lub Hwj chim. peb thov Ntuj pab kom cov thawj neeg nyob txheej qis txhob lam ntxiv tej yam tsis muaj qab hau rau Lub Moo Zoo. Ntuj awb...
2. Peb thov Ntuj rau cov Nom Tswv Kav teb chaws, muaj tshaj ib nrab ntau ntawm ntiaj teb neeg paub Tswv Ntuj. kom lawv txo hwj chim, lawv tsis kam ntseeg los kom muaj kev hlub, neeg ntiaj teb thiaj muaj kev thaj yeeb. Ntuj awb...
3. Peb thov Ntuj rau cov neeg txom nyem. Lub ntiaj teb muaj keb txom nyem txhawv qhov txhia chaw los, cuag li muaj dej nyab. Peb thov Tswv Ntuj qhia lawv lub siab, kom txawj tiv taus... Ntuj awb...
4. Peb thov Ntuj rau cov neeg tau sau lawv lub npe rau Tswv Ntuj pab daws teeb meem. Thiab tej peb paub nyob qhov ub qhov no uas lawm muaj kev mob nkeeg.
Ntuj awb....
Yaj Zoov Ntxheb Xib Hwb.

{ Yog muaj ib pab neeg yuav txais lub cim ntxuav, mas siv xyoo As. tsis muaj siv xyoo C.}
Hnub no ntawv kev tsiv,{3:1-8+13-15.} Kos Lis Nthos,{ {10:1-6+10-12.}thiab Lus Kas,{13:1-9.} hais tias:
Tswv Ntuj yog tus siab ntev, nws tsis muab txim sai rau neeg. Peb yuav tig los yuav lub siab tshiab, kom tau muaj txoj sia.
Tswv Ntuj qhia rau Mais Xes tias, kuv yog tus nyob. Thiab yuav nyob mus li. Lo lus no Tswv xav hais tias,Tswv Ntuj yog tas txhua Haiv neeg tus Tswv Ntuj, Nws nrog txhua Haiv neeg nyob.
Thaum peb kawm Haiv His Xas Lais cov kwv huam, mas zoo pab peb to taub txhua yam txiaj ntsim nyob hauv lub Moo Zoo,Yes Xus hais txog kev ua txhaum.
Thaum muaj neeg, tuaj xa moo rau Yes Xus tias, Tus Vaj muab cov neeg Nkas Lis Lais tua muab lawv cov ntshav los xyaw tsiaj cov ntshav txi Ntuj.
Yes Xus hais tias Cov Nkas Lis Lais ntawd, tsis yog cov muaj txhaum ntau dua lwm cov. Tab yog nej tsis tig los yuav lub siab tshiab mas, sawv daws yuav raug ib yam nkaus li ntawd thiab.
Ib twm Yeej muaj neeg hloov siab, tuab ntaws tig los yuav lub siab tshiab. Zoo li Mais Xes thiab Tsoom His Xas Lais thaud los. Lawv thiaj tau los txais lub Cim Ntxuav nyob hauv lub Hiav txwv Liab.
Thiab lawv txais cov mov mog poob saum ntuj los xws me ntsis li Yes Xus lub Cim Yug. kom tau cawm neeg txoj sia ua neej nyob.
Tswv Ntuj nrog cov His Xas Lais nyob ua lawv luag. Thaum lawv nrog Tswv Ntuj cog lus, Ntuj txia ua nplaim taws tuaj hla ntawm lawv kev cog lus.
Nruab hnub Tswv Ntuj tuaj nyob zoo li ib twv huab roos thiab ntxoov lawv, nyob teb chaws suab puam, kom tau ua lawv luag, pab tiv thaiv xwv txheej.
Ntawm txhua yam kev tshaib plab nqhis dej, los kev mob kev nkeeg thiab nrog kev tsov rog. ntawm cov yeeb ncuab, txhua pab.
Qhov kawg Tswv Ntuj thiaj kom Mais Xes coj tsoom His Xas Lais los nyob lub teb chaws, muaj zib ntab zib mus thiab muaj mis nyuj ntaws sia laub sis lug los.
Peb txhob ua li txheej laus thaud, uas muaj neeg yws yws rau Tswv Ntuj, Ces Tswv Ntuj tsis tig los saib lawv,ces lawv tau raug xwv txheej tuag tas.
Cov Hwj huam uas Tswv Ntuj tau ua los pab cov His Xas Lais zoo ua piv txwv qhia peb tias peb yuav tau hloov yuav lub siab tshiab kom peb txawj ua neeg zam kev lwj siab, txhob ua neeg dig muag.
Maub xuas mus kev ces dawm tas txhua yam. Txij li xyoo 2000 los rau niaj hnub no peb hnov puas tsav puas yam niaj hnub dawm peb tsoom Hmoob taws puv nkaus qhov txhia chaw li.
Yog txhua yam kev teev hawm, uas coj tib neeg mus yuam kev ntawd.

ZAJ THOV NTUJ.
1.Peb thov Ntuj rau lub Koom Txoos , Vim Tswv Ntuj yog tus siab ntev tsis muab txim rau neeg sai. Kom sawv daws txawj tig los yuav lub siab tshiab. Ntuj awb...
2. Peb thob Ntuj rau cov nom Tswv kav teb chaws, kom lawv txawj pom Ntuj cov hwj huam pab neeg. Lawv txhob tsim keb ua tsov rog neeg,thiaj nyob thaj yeeb...NTuj awb....
3. Peb thov Ntuj rau txhua pab neeg txom nyem. Kom lawv txawj muab lawv tej kev mob nkeeg, los kev tshaib nqhis los kev tu siab cev rau Tswv Ntuj psub. Ntuj awb...
4. Peb thov Ntuj rau peb Tsoom hmoob kom lub xyoo no hmoob txawj sib hlub txhob muaj xaiv muaj lus ntau. Ntuj awb...
5. Peb thov Ntuj rau peb cov tuaj ntawm no, kom peb tau txais Ntuj cov hawj huam los pab ntxuav peb lub siab, hloov ua neeg ntshiab, kom tsim nyog ua Yes Xus cov tiam lis tshaj Nws lub Moo Zoo. Ntuj awb...
Yaj Zoov Ntxheb Xib Hwb.

CAIJ PLAUB CAUG CHIV 5 C Tim 13/3/2016.

Cov zaj nyeem hnub chiv 5 no,uas muaj nyob hauv ntawv His Xais,{43:16-21.} Fis lis Pos,{3:8-14.} thiab Zam ntawv Moo Zoo,{8:1-11.} Hais tias:
Yes Xus zam txhaum rau tus neeg muaj txhaum, mas Yes Xus tsis saib tias kev ua txhaum yog tej yam me. Yes Xus zam txhaum rau tus neeg ua txhaum, vim Yes Xus xav pab kom cov neeg txhaum yeej txoj kev ua txhaum mus rau yav tom ntej.
Thaum cov Fas Lis Xais, thiab cov thoob xwm ntawv,coj tus poj niam deev hluas, tuaj rau Yes Xus txiav txim rau nws.
Lawv hais tias, Mais Xes txoj cai qhia kom xuas pob zeb los txawb rau tus poj niam deev hluas li no kom tuag. Koj yuav hais li cas?
Yes Xus hais tias:
Yog nej leej twg tsis muaj ib qho txhaum li, mas tus ntawd xub los txawb thawj lub pob zeb rau tus poj niam no!
Ces Yes Xus kuj tsis muab txim rau tus poj niam ntawd thiab. Nws hais tias, koj rov mus, koj txhob ua txhaum ntxiv lawm.
Peb sawv daws txawm tsis muaj txoj kev ncaj tuaj ntawm ib txoj cai qhov twg tuaj, los peb muaj txoj kev ncaj tuaj ntawm Huab Tais Yes Xus Pleev tuaj.
Peb xav kom Tswv Ntuj ntsib peb,nyob hauv Yes Xus Pleev kev ncaj ncees. Vim Tswv Ntuj siab zoo, Nws tau tho ib txoj kev, hla lub hiav txwv tob tas nrho, rau tsoom His Xas Lais hla lub hiav txwv kom tau mus ntsib Tswv Ntuj txoj kev hlub.
Txoj kev hla lub hiav txwv no, yog hla tsis dhau ces kawg tuag nyob hauv txoj kev ua qhev. Muab hais tias yog peb hla tsis dhau peb kev ua txhaum ces peb tuag,thiab peb poob mus ua dab phem qhev tas tiam, tsis muaj dim tau li.
Kev ua txhaum yog ib yam kev quab yuam kom txhua tus neeg tuag mus zwm rau kev txhaum. Tus neeg ua txhaum lawm, mas thawj thiab tsis tau los ua lwm yam.
Vim kev ua txhaum yog yam tiv thaiv thiab zoj kom khov kho ua rau neeg dim tsis tau tas tiam mus li. Coj nws mus nyob txim.
Nyiam no Tswv Ntuj tau tuaj nrog Neeg ntiaj teb,sib haum xeeb nyob hauv Yes Xus Pleev lawm.  Tus xav kom tau txoj sia nyob mus li xws li Ntuj cov Tshiab ua Ntuj cov tub ki.
Mas nws ncaj qha mus zwm rau kev ncaj ncees, tuaj ntawm Leej Pleev tuaj,ces nws yuav muaj txoj sia nyob mus li tau.
Vim Leej Pleev twb thov kom Leej Txiv tus siab zoo no, zam kev ua txhaum rau lub sim ceeb tas lawm. Leej Pleev tus cwj nrig twb tho ib txoj kev tob dua Mais Xes tus cwj  uas Tswv Ntuj pab tho lub Hiav txwv tob thaud,rau cov neeg caij hla.
Leej Pleev tus cwj tshiab no, coj tau cov neeg ciaj nrog neeg tuag kom sawv tau rov los mus pom Tus Leej Txiv siab zoo, li Nws yeej ib txwm nyob.


ZAJ THOV NTUJ.
1. Peb thov Ntuj rau lub Koom Txoos, kom txhua phiaj neeg ntseeg rov nrog Tswv Ntuj sib haum xeeb nyob hauv Yes Xus Pleev kev ncaj ncees.   Ntuj awb....
2. Peb thov Ntuj rau cov nom tswv kav teb chaws. Kom lawv txawj hloov siab los nyiam Tswv Ntuj. Txhob sib nrhiav kev los ua neeg muaj sib tub qaug, Kom tau tsim kev ua tsov rog.    Ntuj awb....
3. Peb thov Ntuj rau cov neeg txom nyem, kom txhua pab neeg txawj tso siab rau Tswv Ntuj,tej txiaj ntsim hlub neeg, kom lawv txawj tiv taus kev iab kev khwv hauv lawv kev txom nyem.  Ntuj awb...
4.Peb thov Ntuj rau cov txheeb ze, uas nyob deb nyob ze, peb paub lawv muaj teeb meem....   Ntuj awb...
5. Peb thov Ntuj rau peb cov tuaj teev Ntuj hnub no, Peb tau hnov Ntuj zaj txuj ci coj peb ua neeg thoob tsib nrog Tswv Ntuj sib haum xeeb. kom peb tau nyob ruaj nrog  Tswv Ntuj kev kaj siab lug.   Ntuj awb...


Yaj Zoov Ntxheb Xib Hwb.

Zaj nyeem ib,Ntawv hauj lwm,{10 27-42}zaj nyeem ob, Kos Los Xais,{3:1-4.}Zam,{20:1-9.}
Peb tau hnov tias Yes Xus sawv rov los, Peb yuav tso siab tias,Yes Xus yog tus pub txoj sia rau peb tau. Mas peb tso siab tias, peb twb tau txais lub Cim Ntxuav, nyob hauv Yes Xus lub npe lawm.
Peb yuav tau nrog Yes Xus sawv rov los muaj txoj sia nyob. Vim tias Tswv Ntuj yog tus tsa Yes Xus sawv rov los,Peb xav txais Tswv Ntuj lub txiaj ntsim,Peb yuav npuab thiab vam txog Yes Xus.
Pob Zeb hais tias, Tswv Ntuj yog tus tau Pleev Yes Xus. Tswv Ntuj tau pub Leej Tswv Yim,thiab Nws lub peev xwm loj tas nrho rau Yes Xus. Kom Nws kho tau cov meeg mob poob hauv dab phem txhais tes, kom lawv zoo hlo.
Vim Tswv Ntuj nrog Yes Xus nyob, kom Yes Xus ua tau tej ntawd. Tas txhua yam uas Yes Xus tau ua , mas Nws cov Thwj Tim tau ua tim khawv, pom thiab paub txog, tas txhua yam.
Ua li mas peb tso siab tias,peb yuav tau nrog Yes Xus sawv rov los. Peb yuav nrhiav tej yam nyob txheej saud, vim Leej Pleev twb zaum nyob ntawm Leej Txiv sab xis lawm.
Peb lub siab yuav dai dhuam rau tej yam nyob txheej saud. Txhob cia peb lub siab dai dhuam rau tej yam nyob ntiaj teb no.
Thaum peb hla lub ntiaj teb no, Tswv Ntuj thiaj yuav khaws peb txoj sia tuav zoo li tsiv nraim nyob ntawm Txwv Ntuj lub hwj chim.
Uas Tswv Ntuj yuav rov muab cob rau peb, li Nws tau muab rau Leej Pleev uas Nws tau tsa sawv rov los ntawd.
Nyob hauv Ntawv Moo Zoo, Tus Thwj Tim uas Yes Xus nyiam tau hais tias:
Hnub chiv lis piam kaj ntug,Mab Liab Mas Ntas Las mus txog Yes Xus lub ntxa. Nws pom daim txiag zeb kaw rooj ntxa qhib lawm, nws khiav mus hais qhia cov Thwj Tim.
Ces Xis Moo Pob Zeb, thiab tus Thwj Tim uas Yes Xus nyiam. Khiav mus txog lub ntxa, ces nkawd kuj tsis pom Yes Xus nyob hauv. Nkawd ntseeg, nkawd tsis to taub tias Yes Xus sawv rov los lawm.
Niaj xyoo lub Koom Txoos ua cov kab ke nco txog Leej Pleev sawv hauv cov tub tuag rov los,Vim tias tsoom ntseeg tseem muaj qhov tsis to taub Leej Pleev sawv rov los lawm li hais no.
Lub Koom Txoos xav tshaj txoj kev Leej Pleev sawv rov los no, txhua txhua xyoo tias yog zaj tseeb tiag. Niaj xyoo lub Koom Txoos tshaj, mas Leej Pleev nyob ib sab ntawm cov neeg ntseeg.
Xws li Xis Moos Pob Zeb thiab tus thwj Tim uas Yes Xus nyiam ntawd nkawd ntseeg.
Niaj hnub chiv lub Koom Txoos ua thaj cav txiaj ntsim, nco txog Yes Xus tsim lub Cim Yug, ua cov kab ke lov mov. Mas zoo li thaum Leej Pleev sawv rov los. Nws yees tawm tuaj xyuas cov Thwj Tim txhua zaus.
Peb yuav ntseeg tias Leej Pleev niaj hnub yees tawm tuaj xyuas peb. Peb txhob tos kom zoo li Leej Pleeb hais rau Tos Mas tias:
Koj muab koj txhais tes los kov qhov no, koj ntsia kuv ob txhais tes saib yog kuv tiag!

ZAJ THOV NTUJ.
1. Peb thov Ntuj rau lub Koom Txoos, kom lub Koom Txoos rau siab tshaj. Leej Pleev kev sawv rov los, kom lub ntiaj teb neeg rov tshiab tuaj nyob hauv Tswv Ntuj lub hwj Chim. Ntuj awb....
2. Peb thov Ntuj rau cov Nom Tswv kav teb chaws, kom lawv paub tias, Tswv Ntuj yog tus muaj zog. Kom cov Nom Tswv lawv txawj txo hwj Chim, los nrhia yam tseem ceeb nyob ntiaj teb no, haum Tswv Ntuj siab. Ntuj awb...
3. Peb thov Ntuj rau cov neeg txom nyem,Kom Tswv Ntuj lub peev xwm nyob hauv Leej Tswv Yim thiab hauv Leej Pleev, pab txhua yam zoo tuaj rau cov txom nyem txawj tso siab rau Ntuj. Ntuj awb....
4. Peb thov Ntuj rau lub ntiaj teb neeg, kom cov nom Tswv tso kev ua tsov ua rog tseg mus, kom txhua lub teb chaws sib haum xeeb nyob hauv Tswv Ntuj lub hwj chim. Ntuj awb....
5. Peb thov Ntuj rau peb cov tuaj ntawm no,Kom Yes Xus Pleev lub peev xwm muaj zog, coj peb los sib haum xeeb lub caij Leej Pleev yees tawm tuaj xyuas peb nyob hauv txhua lub thaj cav txij ntsim. Ntuj awb...

Y.Z.N.X.H.

Lub caij hla hnub Chiv 2 no, ntawv hauj lwm,{ 5:12-16.} Ntawv qhib yav tom ntej,{1:9-19.} Thiab Zam ntawv Moo Zoo,{Saib xyoo B.} Zam,{ 20:22-31.} hais tias:
Tus ntseeg txog Yes Xus sawv rov los,mas Yes Xus pub kom nws tau nyob kaj lug. Thiab nws yuav txawj ua hwj huam yees ntxwv xws li Yes Xus, vim nws coj tus yam ntxwv xa kev kaj lug, mus rau sawv daws.
Cov ntawd,Lawv lub tswv yim yuav yees pom Yes Xus, xws li tus Thwj Tim Zam, uas tau yees pom Yes Xus, hnav xws li ib tug Vaj, los ib tug Leej Choj. Lawv yuav hnov Yes Xus lub suab nrov nyob hauv lawv tus Ntuj Plig nruab siab tias:
Kuv tuag ib zaug, nyiam no mus kuv yuav nyob mus li. Lo lus no,mas Yes Xus niaj hnub ntuas peb, nyob hauv cov hnuv Chiv, li hnub no.
Peb yuav pom Nws lub hwj chim li tus Thwj Tim Zam tau pom, Yes Xus muaj hwj Chim. Peb kuj yuav hnov Yes Xus hais rau peb tias:
Koj txhob ntshai Yog kuv xwb,Kuv yog tus ua thawj, thiab kuv yog tus kawg nkaus lawm,kuv yog tus muaj txoj sia nyob.
Thaud, kuv raug tuag, hos nyiam no, kuv muaj txoj sia nyob mus ib txhis. Kuv yog tus tuav tus yawm sij qhib txoj kev tuag,thiab qhib cov tub tuag lawv kev tuag.
Yes Xus hais rau Zam tias,Koj sau tej koj pom no tseg, tej yam tshwm sim lawd thiab tej yam tseem yuav tshwm sim tuaj tom ntej no. Yam li tus ntseeg txog kuv, mas tsis hais tus txiv neej los tus poj niam.
Nws kuj yuav txawj ua hwj huam li cov hauv paus xa lus. Luag yuav coj cov neeg mob tuaj cuag lawv, xws li cov Thwj Tim.
Uas lawv tau coj cov meeg mob tuaj pw ntawm kev tos kom, pob zeb tus duab los ntxoov lawv, ces lawv cov mob cia li zoo hlo lawm.
Thiab cov neeg raug dab tsis huv,los lawv cov dab kuj tau khiav tawm mus.
Yes Xus tseem tau hais rau cov thwj tim tias,yog nej daws txhaum rau leej twg, mas nws cov txhaum yuav daws mus. Hos nej cia txhaum rau leej twg mas nws cov txhaum yuav nyob.
Ua li mas, peb cov neeg ntseeg peb tau hnov yes Xus hais li no, mas Yes Xus tau hais tseeb kawg. Peb yuav rov sib zam txhaum, thaum peb sib zam txhaum lawm, mas kuj cuag li koj tau daws txhaum rau luag lawm.
Zoo li peb tsis cia txhaum rau leej twg, ces luag los peb cov txhaum tau daws mus lawm.Tus ua ua li no, mas nws tau ua xis Tswv Ntuj thiab Leej Pleev lub siab, ua rau Tswv Ntuj yuav nws nyiam kawg.
ZAJ THOV NTUJ.
1.Peb thov Ntuj rau lub Koom Txoos, kom cov neeg ntseeg sawv daws txawj sib zam kev ua txaum, kom Tswv Ntuj kev nyiam kev hlub loj hlob nthuav mus thoob qab ntuj khwb. Ntuj awb...
2. Peb thov Ntuj rau cov Nom Tswv kav teb chaws, Kom lawv txawj hlub nyias tsoom pej xeem, thiab kom lawv tos kev ua tsov rog sib tua pov tseg. Kom txhob lam muab neeg tej roj ntsha cnhuav mus xyaw av. Ntuj awb...
3. Peb thov Ntuj rau cov neeg txom nyem,kom sawv daws txawj ua siab loj tiv taus kev txom nyem, los ntawm leej tib neeg kev tsis sib zam txhaum thiaj muaj kev txom nyem li no. Ntuj awb....
4. Peb thov Ntuj rau cov neeg uas lawv tsis tau paub Tswv Ntuj. Kom Tswv Ntuj tshoj kom muaj tub txib tuaj yeem mus tshaj Ntuj lus rau lawv. Ntuj awb...
5. Peb thov Ntuj rau tej tus neeg muaj teeb meem uas peb paub txog lawv, Kom Tswv Ntuj pab daws lawv tej teeb meem. kom lawv rov muaj kev thaj yeeb. Ntuj awb...
6. Peb thov Ntuj rau peb cov tuaj hnub no, Tswv Ntuj peb yog koj cov me nyuam tau tuaj cav txog koj lub Hwj Chim. Thov koj pub cov lus muaj nqes hnub no, kom txeem mus txog peb nrub siab. Ntuj awb...
Yaj Zoov Ntxheb Xib Hwb.

Ntawv hauj lwm,{5:27-32+40-41.} Qhib yav tom ntej, {5:11-14.} Zam {21:15-19.} Hais tias:
Thaum Yes Xus sawv rov los, Nws tseem tsis tau nce mus saum ntuj. Yes Xus yees tawm tuaj xyuas Nws cov thwj Tim nyob ntawm ntug pas dej.
Qhov uas Yes Xus qhia Nws cov Thwj Tim puav ntses ntawd,yog lub cim hais tias, Yes Xus xav vam txog cov neeg nyiam Yes Xus.
Pab xa Nws lub Moo Zoo, mus thoob ntiaj teb, viam cov neeg nyiam Yes Xus thiaj xav ua Yes Xus tim khawv.
Thiab cov xav ua Yes Xus Tim Khawv,mas lawv thiaj mloog Leej Ntuj Plig txhib lawv lub siab kom nyiam ua qhov zoo rau Tsoom txheeb ze.
Vim muaj Tswv Ntuj los lus nyob hauv ntawv qhib yav tom ntej hais tias,tas tsoom Leej Ntshiab nyob saum ntuj lawv yuav ua ib lub txoos loj.
Los cav txog Tswv Ntuj nyob ntiaj teb no, niaj hnub peb ua lub txoos cav txiaj ntsim hauv hnub chiv. Peb kuj yuav kub siab li Tsoom Leej Ntshiab uas,lawv yuav ua nyob saum ntuj thiab.
Ntawv qhib yav tom ntej hais tias:
Ntuj cov Tshiab coob tas nrho, nyob ncig lub theej kiab, muaj txhiab txhiab pua leej li,suav tsis txheeb. Cov muaj txoj sia, cov laus, lawv qw ntsuag qees tias:
Tsim nyog peb yuav cav txog Leej Yaj, uas luag muab tua. Nws lub hwj chim, muaj zog, muaj peev xwm, thiab thoob tsib to nrog, muaj koob meej nyob mus ib txhiab ib txhis lauj!
Tas txhua yam uas Ntuj tau tsim los nyob nruab yeeb mus nto plaws qaum ntuj. Cav thiab qw suab txog tus zaum saum lub theej kiab, thiab Leej Yaj lub koob meej muaj peev xwm,muaj hwj huam, hwj chim mus ib txhiab ib txhis.
Cov Thwj Tim sau tseg tias, txij thaum Yes Xus sawv rov los lawd, Nws tau yees tawm tuaj xyuas cov Thwj Tim ntau zaus. Zaum peb, Yes Xus hais rau Xis Moos Pob Zeb tias:
Xis Moos Zam tus tub! Koj puas nyiam kuv dua cov ntawd? Pob Zeb teb tias, Huab Tais koj paub tias kuv nyiam koj!
Yes Xus nug Pob Zeb peb zaug li ntawd tias, Xis Moos Zam Tus tub koj puas nyiam kuv? Pob Zeb ntshaus zog. Vim Yes Xus nug Pob Zeb peb zaug sib law li ntawd.
Xis Moos Pob Zeb teb tias, Huab Tais koj paub zoo tias kuv nyiam koj. Ces Yes Xus hais rau Pob Zeb tias: Koj zov kuv cov Yaj mog!
Vim muaj Yes Xus lo lus no, mas dhau Xis Moos Pob Zeb lawm, lub Koom Txoos thiaj Xaiv tsa ib tug los ua Vaj Qhia los kav lub Koom Txoos nyob thoob ntiaj teb, saib cov neeg ntseeg.....
Yes Xus tseem hais rau Pob Zeb ib yam ntxiv tias:
Thaum koj hluas mas koj sia koj siv, thiab koj xav mus qhov twg los ywj koj siab.
Hos yav laus mas, koj yuav tsa tes rau lwm tus kho siv rau koj sia,luag yuav coj koj mus rau tej qhov koj tsis xav mus. Tos Yes Xus hais li no rau Pob zeb, mas Yes Xus xav qhia tias:
Pob Zeb lub neej yav laus nws yuav mus zoo li cas. Yes Xus thiaj hais tias, koj raws kuv qab mus.

ZAJ THOV NTUJ.
1. Peb thov Ntuj rau lub Koom Txoos,yog Yes Xus tsa Pob Zeb, thiab cov Vaj Qhia sib hloov los saib Yes Xus pab yaj txog tus niaj hnub no. Tswv Ntuj thov koj pov hwm koj lub Koom Txoos uas Yog Leej Pleev tsa, kom tsoom ntseeg coj tau qhov zoo. Ntuj awb...

2. Peb Thov Ntuj rau Cov Nom Tswv Kav Teb Chaws. Tswv Ntuj, cov Nom Tswv Kav Teb Chaws no. Yog koj tsis pab nres mas lawv txoj kev tswj teb chaws, tsis muaj qab hau li. Thov koj tuaj qhia lawv lub siab kom nyiam kev sib raug zoo. Ntuj awb....

3. Peb thov Ntuj rau cov neeg txom nyem. Tswv Ntuj txhua pab neeg txom nyem tsis yog vim lawv tau raug dab. Lawv thiaj muaj kev txom nyem. Thov Koj Kho cov neeg ua rau, kom muaj neeg txom nyem ntawd txawj hloov siab los ua qhov zoo. Ntuj awb...

4. Peb thov Ntuj rau cov sau npe qhia rau Tswv Ntuj paub, lawv cov teeb meem. Thiab cov neeg txom nyem uas muaj neeg paub tsis tau tso lub npe Tswv Ntuj thov koj tuaj daws sawv daws cov teeb meem no. Ntuj awb...

5. Peb thov Ntuj rau peb cov tuaj ntawm no, hnub no peb tau hnov Tswv Ntuj zaj txuj ci coj peb lub siab kom paub ua Yes Xus Tus Tim Khawv zoo, kom haum xeeb nrog Leej Pleev nyiam. Ntuj awb...
Yaj Zoov Ntxheb Xib Hwb.

Hnub no lub Koom Txoos siv cov zaj,nyob hauv ntawv hauj lwm,{13:14+43-52.}Ntawv qhib yav tom ntej, {7:9+14+17.} thiab Zam ntawv Moo Zoo,{10:27-30.} Cov lus hnub no hais tias:
Cov neeg ua Yes Xus cov Yaj, thiab txais txoj sia ntawm Nws, yog cov neeg siab zoo. Yes Xus yog lawv tus Xib Hwb thiab lawv tus Tswv. Yes Xus nyiam lawv li cas, mas lawv yuav nyiam Yes Xus li ntawd.
Nyob hauv Tswv Ntuj lub siab, mas Nws xav tias,cov neeg tuaj yeem tiv kev txom nyem kom tau pab luag tej. Mas Tswv Ntuj yuav hu lawv mus nyob rau Ntuj Ceeb Tsheej . Lub nras lom zem ntawd ib hnub xwb li.
Peb cov neeg ntseeg yuav saib li uas Paj Lug tshaj Ntuj lus rau nws Haiv neeg. lawv tsis mloog thiab lawv tseem hiam nws,mas nws tsis ntaus siab me. Nws tshaj Ntuj lus rau lwm qhov chaw, los lwm Pab neeg.
Paj Lug tau qhuab qhia cov pej Kum neeg, thiab cov nyiam Tswv Ntuj. Kom lawv nyob ruaj nreb hauv Tswv Ntuj lub txiaj ntsim. Nws hais tias:
Huab Tais twb tau qhia peb tias,kuv tsa koj ua qhov pom kev kaj tas txhua Haiv neeg. Kom koj xa txoj kev cawm neeg mus txog puag tim npoo ntiaj teb. Kom cov muaj txoj hmoo tau txais txoj sia nyob mus li.
Thiab kom Leej Tswv Yim Ntshiab tau tuaj nyob puv cov neeg muaj hmoo lawv nruab siab.
Ntawv qhib yav tom ntej, tseem hais tias, cov muaj txoj hmoo,lawv yuav tau hnav tej lub tsho dawb thiab muaj tej lub suab qw tias:
Cov ntawd yog cov uas lawv tau raug txom nyem loj. Thiab lawv tau ntxhua lawv tej tsho kom dawb, nyob hauv Leej Yaj cov ntshav.
Nyiam no Leej Yaj yog lawv tus zoo Tswv zov Yaj, saib lawv. Nws yuav coj lawv mus haus cov dej muaj txoj sia.
Nws yuav so lawv cov kua muag, Yes tau hais meej kawg tias, Txij no mus, mas kuv cov Yaj yuav mloog kuv lub suab. Lawv yuav raws nraim kuv.
Kuv txiv yuav muab txoj sia nyob mus li rau lawv. Ces lawv yuav tsis ploj ib zaug li. Tsis muaj leej twg yuav txeeb tau ntawm Kuv txiv txhais tes mus.
ZAJ THOV NTUJ.
1. Peb thov Ntuj rau lub Koom Txoos, Kom txhua phiaj neeg ntseeg Yes Xus lub Moo Zoo. nco ntsoov ua lub teeb kaj rau lub qab ntuj neeg. Kom peb tus Xib Hwb Yes Xus coj sawv daws mus txog lub pas dej muaj txoj sia. Ntuj awb...
2.Peb thov Ntuj rau cov Nom Tswv kav teb chaws,Kom lawv txawj pom tus tswv siab zoo pub txoj sia nyob mus li rau cov neeg muaj hmoo. Kom cov Nom Tswv txawj sib rau zoo. Ntuj awb...
3. Peb thov Ntuj rau cov neeg txom nyem, Kom Tswv Ntuj tsa zaj muag los ntsia, cov tsis muaj vaj tse nyob, cov muaj mob pw tsev tshuaj, cov nyob hauv lawv tej vaj tse,
Thiab cov peb paub lawv nyob hauv tsoom txheeb ze. Ntuj awb....
4. Peb thob Ntuj rau cov ntseeg muaj txij nkawm, kom lawv nco tias, lawv yog lub teeb kaj tsoom txheeb ze. Kom lawv txawj sib hwm. Ntuj awb...
5. Peb thov Ntuj rau peb cov tuaj hnub no, Tswv Ntuj peb tau hnov koj tej lus pub txoj sia.... Ntuj awb...

Y.Z.N.X.H.

LUB CAIJ HLA CHIV 6 C Tim 1/5/2016.

Hnub Chiv no Lub Koom Txoos siv cov ntawv Ntshiab hauv ntawv hauj lwm,{ 15:1-2+22-29.}Ntawv qhib yav tom ntej,{ 21:10-14+22-23.} Thiab Zam,{14:23-29.} Hais
tias:
Cov neeg ntseeg yuav txhob ntshai mus ntsib cov tsis ntseeg, los lwm pab neeg ntseeg tau yam tsis tseeb. Vim cov muaj kev ntseeg tseem ceeb mas yog cov muaj Leej Tswv Yim Ntshiab,pab lawv ceev Yes Xus cov lus nyob rau lawv nruab siab.
Lawv yog cov yuav pab kom lub ntiaj teb neeg ntshaw txog lub Ceeb Tsheej, uas sawv daws yuav tau mus nyob kaj siab lug.
Lub Ceeb Tsheej ntawd, yog Tswv Ntuj lub. Muaj li ntawd, Yes Xus thiaj tuaj cawm tas txhua Haiv neeg. Yes Xus xav kom cov xub ntseeg cev txoj kev ntseeg tseem ceeb no kom meej pem rau rau lub ntiaj teb neeg. Txhob xyaw lwm yam kev ntseeg tsis tseeb rau.
Leej Tswv Yim Ntshiab yuav pab kom sawv daws ntsib qhov tseem ceeb, nyob hauv txhua fab ntawm kev coj. Zoo li cov neeg txais kev ntseeg, yuav caiv tej yam txi dab. Thiab caiv tsis noj cov nqaij laig dab. Los ua yam yuav muab lub cev los tej ntsuj plig coj los txi dab.
Tej kev ntshaw ua plees ua yi, kev dag los kev ua tub sab tub nyiag mas, suav tas nrho nyob hauv. Tus uas nws zam dhau tej no huv si ces yog zoo lawm.
Hais tseeb yam uas nkag ntawm neeg lub ncauj mus rau neeg lub cev, mas tsis muaj qab hau dab tsis li. Yog yam tawm ntawm neeg lub siab los rau ntawm neeg lub ncauj mas yuav tsum caiv thiaj yog cov nyiam Yes Xus tiag.
Vim tias nyob hauv Tswv Ntuj lub Ceeb Tsheej uas zoo tshaj tej pov haum tsim txiaj ntawd. Muaj ntau lub qhov rooj, txais ntau pab neeg nkag mus nyob hauv.
Ib sab muaj peb lub qhov rooj loj, yog Leej Yaj cov hauv paus xa lus cov qhov rooj tseem ceeb uas coj neeg nkag mus rau qhov tseeb thiab yog.
Lub tsheej tsis muaj Leej Yaj cov hauv paus xa lus cov npe los txhim txawb lub tsheej rau saud, mas tsis yog tus Tswv Ntuj muaj hwj Chim lub tsheej.
Cov nrhiav tau Tswv Ntuj lub Tsheej Lom zem, yog cov coj Yes Xus cov lus li Nws hais tias:
Ib tug neeg nyiam kuv,mas nws coj kuv cov lus. Kuv Txiv wb yuav los tsa tsev nyob hauv nws.
Tus tsis nyiam kuv,mas nws kuj tsis coj kuv cov lus. Lo lus kuv hais no,yog kuv lo lus. Yog tus xa kuv tuaj lo lus.
Yav tom ntej mas yog tus Leej Tswv Yim Ntshiab,uas kuv thov kom Leej Txiv xa tuaj ntawd, yuav qhia txhua yam rau nej. Kom nej rov nco tau txhua yam uas kuv twb tau qhia nej los lawd.
Tswv Ntuj yuav tsis yuam leej twg,Nws hais tias, kuv yuav tso kev thaj yeeb rau nej, kuv yuav muab kuv kev thaj yeeb rau nej. Nej twb hnov lawm, kuv mus, kuv yuav rov los cuag nej.
Yog nej nyiam kuv,mas nej yuav zoo siab pom kuv mus cuag Leej Txiv. Yav tom ntej txhua yam xwm tshwm sim tuaj, mas Leej Txiv wb ob leeg nyob hauv yuav ua kom nej paub tseeb.
Yes Xus 4 lo lus uas Nws tau tuag rau peb:
1-Vim Nws khuv leej peb...2- Nws zam txim rau peb... 3-Nws ua siab ntev rau peb....4-Nws hlub peb tsi paub kawg li....Lo lus uas Yes Xus hais tias Yoj tus nyiam kuv mas nws yuav coj kuv cov lus qhia, mas yog cov no.
Peb yuav txawj khuv leej luag tej, peb yuav txawj zam txim rau luag tej, peb yuav txawj ua siab ntev rau luag tej, vimTswv Ntuj Nws hlub peb tsis txawj tas li. Tswv Ntuj nyob hauv luag tej,Luag tej cuag li yog Tswv Ntuj tug, tas tib si.
ZAJ THOV NTUJ.
1. Peb thov Ntuj rau lub Koom Txoos,kom lub Koom Txoos txawj mloog Leej Tswv Yim Ntshiab coj qhia txhua yam. kom mus raws nraim li Yes Xus cov lus kev nyiaj Ntuj. Ntuj awb...

2. Peb thov Ntuj rau cov Nom Tswv kav teb chaws. Kom lawv txawj hwm Leej Tswv Yim Ntshiab nyob hauv txhua phiaj neeg, kom lub ntiaj teb muaj Tswv Ntuj kev thaj yeeb. Ntuj awb...

3. Peb thov Ntuj rau cov neeg txom nyem, Tswv Ntuj xyoo no neeg txom nyem muaj thoob qab ntuj khwb lawm. Thov koj pab cheem tej tsov rog no, thiab nplij cov tuam los pav pab cuam kev tshaib nqhis rau lawv. Ntuj awb...
4.Peb thov Ntuj rau cov neeg muaj txiab nkeeg, uas pw nyob tsev tshuaj, cov nyob hauv lawv vaj tse, cov uas tsis tau cev npe rau koj ntawd thiab. Kom lawv rov tau nyob kaj lug. Ntuj awb...

5. Peb thov Ntuj rau peb cov tuaj ntawm no, Thov kom cov lus peb hnov hnub no coj peb txawj nyiam Leej Pleev cov lus, kom Leej txiv thiaj Leej pLeev nrog Leej Tswv Yim tau tuaj tsa tsev nyob hauv peb. Ntuj awb...


Yaj Zoov Ntxheb Xib Hwb.

Hnub no peb ua lub hnub nyug nco txog Yes Xus mus saum ntuj. Cov tsab ntawv hauj lwm,{1:1-11.} ntawv Es Fes Xos,{1:17-23.} tiab Lus Kas,{24:46-53.} Hais tias:
Yes Xus rov mus saum ntuj lwm,Nws cov Thwj Tim yuav txais ib lub zog, pab lawv tshaj txoj kev cawm neeg rau lub ntiaj teb:
Yog lub zog uas Tswv Ntuj tau tsa Yes Xus sawv rov los,thiab tsa Yes Xus ua tus loj tshaj nyob saum ntuj. Yes Xus kuj xav kom lub Tswv Yim ntawd, nyob hauv peb sawv daws. Yog tus Leej Tswv Yim Ntshiab.
Thaum Yes Xus raug txom nyem tuag tas, Nws rov muaj txoj sia, Nws ua kom cov hauv paus xa lus tau pom Nws, muaj txoj sia nyob li 40 hnub, Nws tawm tuaj xyuas lawv.
Thaum Yes Xus tham txog Tswv Ntuj lub Ceeb Tsheej tas,hais nws cov lus kawg rau cov hauv paus xa lus ces Yes Xus nce zuj zus mus saum ntuj.
Yes Xus tau hais tias, Leej Tswv Yim Ntshiab, yuav nqes los rau saum nej, ces nej yuav ua kuv cov tim khawv, nyob Yes Lus Xas Les mus txog tim npoo ntuj.
Yes Xus Pleev tus Tswv Ntuj,yuav pub lub tswv yim thoob tsib ntawd rau nej, kom nej txawj pom Tswv Ntuj zaj txuj ci tawm tuaj. Ces nej yuav paub Tswv Ntuj tiag,kuv yuav thov kom Tswv Ntuj ua nej lub siab pom kev.
Kom nej txais tau Tswv Ntuj lub cuab tam, xws li cov Leej Ntshiab,yog Tswv Ntuj lub lub hwj chim, loj uas yuav nres cov ntseeg zoo tshaj.
Tswv Ntuj twb tau muab Nws lub zog no,rau sawv daws pom nyob hauv Leej Pleev. Yam li Nws tau tsa Yes Xus sawv hauv cov tub tuag rov los. Nyiam no Nws nyob ntawm Tswv Ntuj sab xis, nyob saum ntuj, siab dua txhua tus Tshiab ua Vaj Txheeb.
Tswv Ntuj tau tso tas puas tsav yam, nyob hauv Nws qab xib taws. Tswv Ntuj lo lus xub hais tseg tias, nej yuav tshaj txoj kev tig los yuav lub siab tshiab, rau tas txhua Haiv neeg. Kom tau daws txhaum nyob hauv Leej Pleev lub npe.
Yes Xus hais ntxiv tias, yam uas kuv Txiv cog lus yuav xa tuaj, mas yog lub zog tuaj ntawm txheej ntuj siab saud tuaj. Ces Yes Xus Foom lus zoo rau cov hauv paus xa lus, Nws nce zuj zus rau saum ntuj lawm.
Peb yuav saib tias, cov hauv paus xa lus ntawd,yog tas nrho peb cov neeg ntseeg txog Yes Xus lub npe. Peb nyias yuav ua nyias txoj haum lwm, kom txoj kev cawm neeg, mus txog peb cov txheeb ze txhua tus.

ZAJ THOV NTUJ.
1. Peb thov Ntuj rau Lub Koom Txoos, uas yog tus Tswv Ntuj tau tsa Nws nyob siab dua Tsoom Vaj txheeb nyob ntawm Tswv Ntuj sab Xis. Kom sawv daws txaus siab los zwm rau Leej Pleev. Ntuj awb...

2. Peb thov Ntuj rau Cov Nom Tswv kab teb chaws. kom lawv txo hwj chim pub kev thaj yeeb rau tsoom pej Xeem txhua tus. Ntuj awb...

3. peb thov Ntuj rai cov neeg txom nyem,cov neeg nyob tsev loj faj, cov muaj mob pw tsev tshuaj, cov nyob hauv vaj tse, thiab cov sau npe rau hauv phau ntwv thov txiaj ntsim. Kom sawv daws tau nyob kaj siab lug. Ntuj awb...

4. peb thov Ntuj rau cov neeg tsis tau ntseeg Ntuj, kom lawv ntsib Tswv Ntuj lub zog lub hwj chim muaj nqes loj uas hnub no peb tau tshaj. NTuj awb...

5. Peb thov Ntuj rau peb cov tuaj hnub no, uas peb tau paub Tswv Ntuj lub zog, los txhawb peb ua ib pab neeg tsim nyog los txais Tswv Ntuj lub cuab tam uas Ntuj npaj rau cov neeg siab dawb ntawd. Ntuj awb...


Yaj Zoov Ntxheb Xib Hwb.

Hnub no, yog lub hnub nyug Leej Ntuj Plig Nqes Los. Peb siv cov zaj lus nyob hauv ntawv hauj lwm,{2:1-11.} 1 Kos Lis Nthos,{12:3-13.} Thiab Zam,{ 7:37-39.} Hais tias:
Thaum Leej Tswv Yim Ntshiab los nyob hauv ib tug neeg, mas yog Tswv Ntuj lub Txiaj Ntsim ntws los, nyob hauv tus neeg ntawd tsis tseg.
Vim Leej Tswv Yim Ntshiab xav pab, kom lawv txawj ua lawv txoj hauj lwm, nyob hauv lub Koom Txoos. Leej Tswv Yim Ntshiab yuav siv lub hwj Chim, lub zog zoo li Cua tshuab, thiaj yuav zoo li hluav taws, ua kom neeg pom kev, thiab kub siab.
Thaum cov Yus Das ua lub hnub nyug tsib caug, Yes Xus cov Thwj Tim mus sib sau nyob ib qho chaw. Ib sij huam, txawm hnov ib yam nrov nroo ntws, xws li ib nthwv Cua ua nca tas lub tsev lawv nyob.
Muaj ib co nplaim taws tawm tuaj poob rau saum lawv tau hau. Tam sim ntawd, Leej Tswv Yim Ntshiab tuaj nyob puv lawv siab.
Ces Leej Tswv Yim pib qhia lawv hais tej xeem lus tshiab, uas lawv tsis tau hais dua los. Lub caij ntawd, cov neeg teev Ntuj nyob thoob qab ntuj khwb hnov. Ces lawv tuaj ntsauv lub tsev uas cov Thwj Tim nyob.
Yog Leej Tswv Yim qhib lawv cov qhov ncauj, kom lawv hais tias, Yes Xus yog Huab Tais. Thiab lawv nthuav tias, muaj ntau txoj Kab Xwm, yog tib tug Huab Tais tswj.
Muaj ntau txoj hauj lwm yog tib tug Tswv kav, nyob hauv sawv daws. Kom nyias txawj ua nyias kom tau kev sis pab rau sawv daws.
Yog Leej Tswv Yim ua tus pub kev thoob tsib rau sawv daws. Nws pub kom tej tus muaj kev txawj kev ntse,Nws pub kom muaj tej tus muaj lub siab ntseeg, pub kom muaj neeg txawj kho mob, Nws pub kom muaj cov txawj ua Yaj Saub, Nws pub kom muaj tus mem tau yam ub yam no,thiab pub kom muaj tus txawj txhais tej xeem lus.
Puav Leej yog Leej Tswv Yim Ntshiab tib leeg ua nyob hauv sawv daws. kom txhua tus neeg ua tau sib dhos zoo, li Leej Tswv Yim qhia ua.
Raws li Yes Xus tau hais tias.Leej twg nqhis dej, kom nws tuaj cuag kuv! Tus ntseeg txog kuv kom nws haus mas! Tus dej muaj txoj sia yuav txawv hauv nws xub ntiag los!
Lo lus no, Yes Xus hais txog tus Leej Tswv Yim Ntshiab uas cov neeg ntseeg yuav tau txais rau hnub Yes Xus xa tuaj, zoo li hnub uas Nws cov Twj Tim tau Txais li peb tau hnov no.

ZAJ THOV NTUJ.
1. Peb Thov Ntuj rau lub Koom Txoos,kom Tswv Ntuj lub txiaj ntsim ntws los nyob hauv cov neeg ntseeg xws li tus dej ntxawv hauv nws xub ntiag los tsis tu ncua li. Ntuj awb...
2. Peb thov Ntuj rau cov Nom Tswv Kav teb chaws, kom lawv paub tias lawv txoj kev ua Nom muaj ib feem nyob hauv Tswv Ntuj, kom lawv txawj txo hwj chim los zeen Tswv Ntuj ua tus coj lawv. Ntuj awb...
3. Peb thov Ntuj rau cov neeg txom nyem, kom lawv txawj tsos siab, vam txog Ntuj pab tiv kev txom nyem. Ntuj awb...
4. Peb thov Ntuj rau cov neeg muaj txiab xeeb mob nkeeg, cov rau ua neeg thoj Nam, cov raug kev tu siab tu saus. Kom tswv Ntuj khuv leej lawv thiab. Ntuj awb...
5. peb thov Ntuj rau peb cov tuaj hnub no uas pebpaub Leej Ntuj Plig kev coj, kom peb txawj xaiv ua raws li Leej Ntuj Plig qhia. Ntuj awb...


Yaj Zoov Ntxheb Xib Hwb.

Hnub Chiv no peb hwm peb Leeg Huab Tais,lub Koom Txoo siv cov zaj nyeem,ntawv Paj Lug,{8:22-31.} Tsab ntawv Los Mas,{5:1-5.} Thia Zam,{16:12-15.} hais tias:
Muaj Leej Ntuj Plig nyob hauv peb, pab peb xav tswv yim, kom peb to taub tias,muaj Tswv Ntuj nrog neeg ua hauj lwm nyob ntiaj teb no.
Tswv Ntuj yog tus coj thiab qhia txhua yam tias,yuav ua zoo li cas.  Kom ua tau xis Tswv Ntuj thiab neeg siab. Thaum peb txawj pom thiab saib tias,peb ua lub neej nyob nrog Yes Xus.
Mas txhua yam peb ua ib txhij loj hlob thiab mus zoo nrog Leej Tswv Yim Ntshiab ua tus coj peb ua nyob hauv Tswv Ntuj kev thoob tsib. Ces peb yoog tau peb Leeg Huab Tais tus kev cai li choj uas thaum Nws pib tsim kom muaj lub ntuj lub teb los nyob.
Tswv Ntuj yeej ib txwm nyob ua ntej thaum Nws tau xav kom muaj  txhua yam txawm los nyob.
Thaum tsis tau muaj lub ntiaj teb thiab dej Hiav Txwv, mas Leej Txiv thiab Leej Tub thiab Leej Ntuj Plig, yeej nyob lawm.
Thaum Tswv Ntuj tso  lub ntiaj teb los nyob ruaj lawm,ces Nws kos ib txoj kab, los xov lub Hiav txwv kom txhob hla dhau. Nws tau teem kom nyias nyob txij li nyias ciam.
Peb txhob xav tias, lub Hiav Txwv nyob qis dua tej toj roob hauv pes. Tas txhua yam nws nyob sib txig zos,vim yog Tswv Ntuj nyob ze txhua yam uas Nws tau tsim los ntawd tib si.
Zoo li nyob saum ntuj, peb tsis pom muaj dej, tab sis yog los nag. mas dej poob los, nws muaj peev xwm nyab kom av pob tau mus, thiab kuav tau tsheej ntus teb kom ploj mus tas.
Yog peb paub Tswv Ntuj, mas tsim nyog peb yuav zoo siab siab rau Tswb Ntuj lub txiaj ntsim.  Uas nws ua siab zoo rau neeg ntiaj teb txhua tus.
Vim nyob hauv Tswv Ntuj lub txiaj ntsim, mas nws zoo siab hliv Nws kev nyiam kev hlub loj ta nrho rau ntiaj teb neeg kom sawv daws tau nyob tiaj tus, li peb tau pom no.
Yog tsis muaj Tswv Ntuj lub txiaj ntsim, mas tas txhua yam yuav sib xyaws xws li qhov chaw luag hliv loj cov kem tsuab uas tsis zoo saib los tsis zoo ntsia li tej chaw qias neeg.
Tseem muaj ntau yam uas peb neeg tsis paub txog.  yog peb paub thiab pom tau, mas neeg ntiaj teb yuav ris tsis taus.
Leej Tswv Yim Ntshiab yuav maj mam qhia qhov tseeb thiab meej pem rau neeg. kom neeg mem tau tias Tswv Ntuj lub txiaj ntsim muaj nqes npaum li cas.
Txhua yam ua rau kom neeg tau nyob tiaj tus li peb pom niaj hnub no. Yog tus Leej Tswv Yim Ntshiab no, pab kon sawv daws tau nyob nrog Tswv Ntuj lub Koob Meej.
Tas ib puas tsav yam zoo yog Tswv Ntuj ntiag tug. Yeej tseeb li Yes Xus tau hais tseg tias;
Leej Tswv Yim Ntshiab yuav thau tej yam uas yog Kuv  tug los faib rau neej.{Amen.}
Yog Tswv Ntuj tus duab tthiab Nws lo lus tsis ntxoov txog neeg ntiaj teb no, mas xyov tej tsam no, peb neeg ntiaj teb yuav yog dab tsi lawm.

ZAJ THOV NTUJ.
1. Peb thov Ntuj rau lub Koom Txoos,kom Leej Tswv Yim Ntshiab hwj lub Koom Txoos coj ib lub neej mus raws Tswv Ntuj lub siab, ua rau cov neeg ntseeg nyob ruaj hauv Ntuj cov lus muaj txoj sia.    Ntuj awb...
2. Peb thov Ntuj rau cov Nom Tswv kav teb chaws, kom lawv txawj pom Txwv Ntuj kev nyiam kev hlub yog qhov loj. tso kev ua tsov rog tseg.      Ntuj awb...
3. Peb thov Ntuj rau cov neeg muaj kev txom nyem, cov muaj mob, cov nyob tsev loj faj, cov raug kev tshaib nqhis, Kom Tswv Ntuj hlub txog lawv. Ntuj awb...
4. Peb thov Ntuj rau cov tsis paub Tswv Ntuj uas lawv tsis muaj kev taug. Kom Leej Tswv Yim xa lub moo nyob laj lug mus txog lawv.     Ntuj awb..
5. Peb thov Ntuj rau cov neeg tuaj hnub no. Kom peb ntseeg thiab tso siab rau Tswv Ntuj lub txiaj ntsim, peb thiaj tau nyob kaj lug nrog Leej Pleev kuv thaj yeeb.  
Ntuj awb..
Yaj Zoov Ntxheb Xib Hwb.

Cov Zaj Nyeem hnub no, ntawv Es Xis Kias,{34:11-16.} Los Mas,{5:5-11.} thiab Kus Kas,{15:3-7.} Hais tias:
Yes Xus yog tus Huab Tais siab zoo, txawj zam rau neeg ntiaj teb mus li. Tab yog neeg ua txhaum mas, Nws tsis tso pov tseg. Nws tseem nyiam neeg li qub.
Li ntawd, mas peb paub tias, Yes Xus nyiam peb. Tab peb txawm yog ib co neeg tsis dawb huv, los Yes Xus zoo siab tuag kom tau cawm peb.
Yes Xus yog tus zoo Tswv zov yaj siab zoo, Nws sau tas ntiaj teb neeg los noj, Nws cov txhiam xws ntxiv zog. Nws pub rau tas nrho rau txhua Haiv neeg.
Tswv Ntuj thiaj hais Nws cov lus tias:
Zaum no, Kuv yuav saib Kuv cov Yaj, Kuv yuav tshuaj xyuas kuv cov yaj. Tab yog lawv tawg mus qhov twg lawm, los kuv yuav sau lawv rov los nog kuv lub tshav zaub mos.
Tus ncaim npoj lawd los, kuv yuav coj nws rov los poo npoj. Tus rau mob los Kuv yuav qhwv nws cov qhov txhab kom zoo. Kuv yuav coj lawv mus nog zaub raws txoj kev ncaj.
Kuv Tij, ua li mas Tswv Ntuj tus Zoo Tswv Zov yaj no Nws hlub peb tiag! Nws tuaj yeem tuag kom tau cawm peb ntawm peb kev ua txhaum los.
Peb muaj Puav Pheej tias, Tswv Ntuj nyiam peb tiag. Peb tau rov Ncaj tuaj nyob hauv Leej Pleev cov Roj Ntsha. Vim Leej Pleev tau Cawm Peb ntawm Tswv Ntuj kev Npau Taws.
Txij no mus mas peb yuav qhuas thiab Cav tias, peb muaj Hwj Chim nyob hauv Tswv Ntuj. Vim Leej Pleev tau thov Kom Leej Tswv Yim Ntshiab tuaj nres peb nyob hauv Leej Pleev kev nyiam kev hlub.
Kom peb niaj hnub rov tig los nrog Tswv Ntuj sib haum xeeb, nyob hauv Leej Pleev cov Roj Ntsha, los ntawm Nws kev hlub peb tsis tu ncua.
Vim Leej Pleev tau hais tseeb tawm ntawm Nws txoj kev ua tus Zoo Tswv Zo Yaj los tias:
Yog leej twg muaj 100 tus Yaj, muaj ib tug ploj lawm, mas nws yuav tso 99 tug rau tom hav quav poj. Nws yuav mus rhiav kom tau tus Yaj ploj ntawd, rov los poo npoj mas nws thiaj zoo siab.
Tus Zoo Tswv Zov Yaj Nws hlub peb npaum no,tsim nyog peb yuav seev yees txog Nws lub tshav zaub mos no mus li.

ZAJ THOV NTUJ.
1. Peb thov Ntuj rau lub Koom Txoos,Kom tsoom ntseeg, ncawg Tus Zoo Tswv Zov Yaj lub tsav zaub mos thiab taug Nws txoj kev ncaj. Ntuj awb...

2. Peb thov Ntuj rau cov Nom Tswv kav teb chaws,kom lawv mus raws Tswv Ntuj txoj kev ncaj. Kom lub qab ntuj neeg sib haum xeeb xws li Pab Yaj koom tib tug Tswv zov xwb. Ntuj awb...

3. peb thov Ntuj rau cov neeg txom nyem,Kom Tus Zoo Tswv Zov Yaj. Qhwv lawv tej qhov txhab mob, thiab coj lawv los poo npoj ua ib pab neeg tau nyob tiaj tus. Ntuj....
4. Peb thov Ntuj rau cov neeg tsis tau ntseeg txog Tswv Ntuj kom Leej Pleev kev Cawm Seej mus txog lawv. Ntuj awb....

5. Peb thov Ntuj rau peb cov tuaj hnub no. Kom peb txawj pom Leej Pleev kev nyiam kev hlub uas Nws thov kom Tswv Ntuj txhob npau taws rau lub qab Ntuj neeg. Ntuj awb...


Yaj Zoo Ntxheb Xib Hwb.

NRUAB XYOO CHIV 11 C Tim 12/6/2016.

Lub lis piam no, peb muaj cov zaj nyeem, 2 Xas Muas, {12:1-14.) Nkas Las Tias,{ 2:16+19-21.} Thiab Lus Kas, {7:36-50.} Hais tias:
Vim Yes Xus yog tus Siab Ntshiab, mas cov neeg txhaum thiaj tuaj cuag Yes Xus. Ces lawv pom lawv cov txhaum, lawv thiaj xav tig los yuav lub siab tshiab.
Peb pom tias Tswv Ntuj siab zoo rau peb,mas tsis yog peb los coj tej txoj cai thiab tej lub cim nyob hauv kev ntseeg! Qhov tseeb mas peb yuav tso siab rau Yes Xus yog Tswv Ntuj Leej Tub siab zoo.
Peb twb hnov Tswv Ntuj tej lus nyob hauv ntawv ntshiab cog lus qub tias: Tswv Ntuj zam rau tus Vaj Das Vis,vim tias Das Vis lees nws cov txhaum,rau Tswv Ntuj tas nws sim neej.
Thiab Das Vis pom tias,yog nws ua txhaum rau ib tug neeg txom nyem, mas phim nws yuav them plaub npaug rov rau nws. Vim Das Vis ua li ntawd, mas Tswv thiaj zam rau Das Vis.
Tswv Ntuj zam rau Das Vis tsis cia xwv txheej raug Das Vis. Ntuj tsuas kheev kom xwv txheej,nyob ze ntawm Das Vis cov txheeb ze, kom zeem tau tias nws kev txhaum ua txhaum poob los rau nws tej txheeb ze.
Ua li mas peb kev ua neeg siab ntshiab, mas yog peb kev ntseeg thiab kev tso siab rau Yes Xus, tsis yog tej kev cai peb coj nyob ntiaj teb no.
Vim yog kev ntseeg txog Leej Pleev,yog qhov peb muaj txoj sia. Vim peb txoj sia tuaj ntawm Leej Pleev tuaj,zoo li yog Leej Pleev txoj sia nyob hauv peb.
Li ntawd Tswv Ntuj thiaj txib tej tus tib neeg nyob ntiaj teb no,tshaj txoj kev ntseeg txog Tswv Ntuj Leej Tub. Peb yuav nyiam raws li Tswv Ntuj, kom muaj txoj kev nyiam tuaj saum ntuj tuaj. Txoj kev nyiam kev hlub neeg txhawv puag nruab siab tawm los.
Thiaj yogTswv Ntuj Tus Pleev txoj kev nyiam kev hlub nyob nrog txoj sia nyob hauv Leej Pleev. Li ntawd, mas Tswv Ntuj hlub tas sawv daws, tsis hais tus neeg loj los neeg me, kuj tsis hais tus muaj thiab tus pluag li. Ntuj hlub sawv daws sib npaug.
Yes Xus thiaj hais ib zaj txhais rau Tus Fas Lis Xais txhais saib puas raug! Yes Xus hais tias:
Muaj ib tug Tswv Npua nuj, txais nyiaj rau ob tug neeg, nkawd, puav leej tsis muaj nyiaj them rov qab. Tus Tswv zam rau kawd ob leeg tib si,ua li mas yog Leej twg yuav zoo siab dua?
Tus Fas Lis Xais teb tias, yog tus tau txais nyiaj ntau dua rau nws. Yes Xus hais rau tus Fas Lis Xais tias, koj teb tau zoo zoo lawm.
Neeg tej kev txhaum kuj zoo li ntawd,tus luag hu nws ua neeg muaj txhaum, nws tau nyiaj Tswv Ntuj ntau dua, ces nws cov txhaum kuj tau daws tas.
Hos tus hais tis nws tsis muaj txhaum, thiab nws nyiam Ntuj tsawg Ntuj kuj zam tsawg rau nws li tau qhia los. Cov tsis tau qhia kuj nyob ruaj li qub tsis muaj leej twg zam rau.
Tej lus no, peb yuav tsom xyuas sab ntsuj plig thiab hauv nruab siab. Peb yuav ntseeg Tswv Ntuj tej lus! Kev ntshais mas muaj ob yam ntshai:
a. Ntseeg tias tsam ho muaj ne! yog muaj tiag koj yuav khuv xim, vim koj tau hnov lawm, koj tsis ntseeg.
b. Ntseeg tsias ntshai tsis muaj li! yog tsis muaj ces kuj zoo, tsis tau nkim zog muab muab los ntseeg cia.

ZAJTHOV NTUJ.
1. Peb thov Ntuj rau Lub Koom Txoos,kom txhua tus neeg ntseeg txawj hloov los yuav lub siab Ntshiab raws li Leej Pleev, uas yog tus siab ntshiab txawj hlub txhua tus uas yog cov neeg muaj txhaum. Ntuj awb...
2. Peb thov Ntuj rau cov Nom Tswv kav teb chaws thiab cov tuav kab xwm. Kom lawv txawj hlub cov neeg nrog lawv nyob Koom teb chaws, kom Tswv Ntuj kev nyiam kev hlub nyob nrog txua tus tib neeg. Ntuj awb...
3. Peb thov Ntuj rau cov neeg txom nyem, kom lawv paub tias, Tswv Ntuj yog tus siab ntshiab, sawv daws txawj muab kev txom nyem cev rau Tswv Ntuj ua tus pab daws. Ntuj awb...
4. Peb thov ntuaj rau txhua tus neeg muaj teeb meem, thiab cov tau sau npe qhia rau Ntuj. Tswv Ntuj koj daws cov neeg muaj teeb meem uas peb cev rau koj no. Ntuj awb...
5. peb thov Ntuj rau peb cov tuaj hnub no, kom Tswv Ntuj lub txiaj ntsim los nrog peb nyob. Ua kom peb txawj tso siab rau Tswv Ntuj. Ntuj awb...


Yaj Zoov Ntxheb Xib Hwb.